IL-KUMMISSJONI EWROPEA

Brussell, 22.3.2017

COM(2017) 142 final

2017/0063(COD)

Proposta għal

DIRETTIVA TAL-PARLAMENT EWROPEW U TAL-KUNSILL

sabiex l-awtoritajiet tal-kompetizzjoni tal-Istati Membri jingħataw is-setgħa biex ikunu inforzaturi aktar effettivi, u biex jiġi żgurat il-funzjonament tajjeb tas-suq intern

(Test b'rilevanza għaż-ŻEE)

{SWD(2017) 114 final}
{SWD(2017) 115 final}
{SWD(2017) 116 final}

MEMORANDUM TA’ SPJEGAZZJONI

1.KUNTEST TAL-PROPOSTA

Kuntest Ġenerali

Raġunijiet u għanijiet tal-proposta

1. Xi NCAs ma għandhomx garanziji infurzabbli li bihom jistgħu japplikaw ir-regoli tal-kompetizzjoni tal-UE b’mod indipendenti mingħajr ma jieħdu struzzjonijiet mingħand entitajiet pubbliċi jew privati. Numru ta’ awtoritajiet iħabbtu wiċċhom ma’ riżorsi umani u finanzjarji insuffiċjenti. Dan jista’ jkollu impatt fuq l-abbiltà tagħhom li jinfurzaw b’mod effettiv. Pereżempju, xi NCAs ma jistgħux iwettqu spezzjonijiet simultanji tal-membri kollha ta’ kartell li dwar hemm suspett, li jagħti lill-oħrajn ħin prezzjuż sabiex jeqirdu l-evidenza u ma jinkixfux. Oħrajn ma għandhomx l-għodod forensiċi xierqa tal-IT sabiex isibu evidenza tal-ksur.

2. Bosta NCAs ma għandhomx l-għodod kollha li għandhom bżonn sabiex isibu u jindirizzaw każijiet ta’ ksur tad-dritt tal-kompetizzjoni. Xi NCAs ma għandhomx setgħat investigattivi importanti bħal pereżempju biex jiġbru evidenza maħżuna fuq telefowns mobbli, laptops, tablets, eċċ. - żvantaġġ kbir fl-era diġitali. Is-setgħat investigattivi tagħhom ħafna drabi huma mingħajr forza minħabba li mhumiex appoġġati b’sanzjonijiet effettivi jekk il-kumpaniji ma jikkonformawx magħhom.

3. Mhux l-NCAs kollha jistgħu jimponu multi effettivi: F’xi Stati Membri, il-liġi nazzjonali timpedixxi lill-NCAs milli jimponu multi effettivi għal ksur tad-dritt tal-kompetizzjoni tal-UE, eż. f’xi Stati Membri l-kumpaniji jistgħu jagħmlu ristrutturazzjoni sabiex jevitaw milli jħallsu l-multi. F’xi Stati Membri, ftit li xejn jew l-ebda multa ma tiġi imposta għall-ksur tal-Artikoli 101 u 102 TFUE. Il-livell tal-multi imposti jvarja ħafna: il-penali għall-istess reat tista’ tkun ferm ogħla fi Stat Membru partikolari milli f’ieħor, mingħajr ma din id-differenza tiġi ġġustifikata minn ċirkustanzi oġġettivi.

4. Il-programmi ta’ klemenza huma għodda ewlenija sabiex jinstabu l-kartelli. Huma jinkoraġġixxu lill-kumpaniji sabiex jipprovdu informazzjoni prezzjuża dwar il-kartelli li pparteċipaw fihom u talli jagħmlu dan jingħataw immunità sħiħa jew parzjali mill-multi. Il-kumpaniji li jkunu qegħdin jikkunsidraw li japplikaw għall-klemenza jeħtieġu grad suffiċjenti ta’ ċertezza legali sabiex jiġu inċentivati li jikkooperaw mal-awtoritajiet. Dan huwa partikolarment il-każ meta kumpaniji japplikaw għall-klemenza fi Stati Membri differenti minħabba li l-kartell jaffettwa numru ta’ ġurisdizzjonijiet. Madankollu, id-diverġenzi fil-programmi ta’ klemenza madwar l-Ewropa jiskoraġġixxu lill-kumpaniji milli jgħidu l-verità u jipprovdu evidenza ta’ dawn il-prattiki antikompetittivi.

5. Id-diskrepanzi u l-limitazzjonijiet fl-għodod u l-garanziji tal-NCAs jimminaw ukoll is-sistema ta’ setgħat paralleli għall-infurzar tal-Artikolu 101 u 102 TFUE abbażi ta' kooperazzjoni mill-qrib fi ħdan in-NEK. Din is-sistema teħtieġ li l-awtoritajiet ikunu jistgħu jserrħu fuq xulxin sabiex iwettqu miżuri ta’ ġbir ta’ informazzjoni f’isem xulxin. Madankollu ma taħdimx tajjeb meta jkun għad hemm NCAs li ma għandhomx għodod adegwati għall-ġbir tal-informazzjoni. Diskrepanzi oħra fl-abbiltà tal-NCAs li jipprovdu assistenza reċiproka jimminaw ukoll is-sistema Ewropea tal-infurzar tal-kompetizzjoni li hija mfassla biex taħdem bħala unità sħiħa koeżiva. Pereżempju, l-NCAs amministrattivi ma jistgħux jitolbu l-infurzar tal-multi tagħhom bejn il-fruntieri jekk il-kontraventur ma jkollu l-ebda preżenza legali fit-territorju tagħhom. Fl-era diġitali, bosta kumpaniji jbigħu fuq l-internet lejn għadd potenzjalment kbir ta’ pajjiżi iżda jista’ jkollhom preżenza legali biss pereżempju fi Stat Membru wieħed. Kumpaniji bħal dawn fil-preżent huma protetti milli jħallsu l-multa.

Għalhekk hija meħtieġa proposta leġiżlattiva li tagħti s-setgħa lill-NCAs sabiex ikunu inforzaturi aktar effettivi tar-regoli tal-kompetizzjoni tal-UE sabiex ikun żgurat li l-NCAs ikollhom il-garanziji neċessarji ta’ indipendenza u riżorsi kif ukoll setgħat ta’ infurzar u mmultar. It-tneħħija tal-ostakoli nazzjonali li jimpedixxu lill-NCAs milli jinfurzaw b’mod effettiv se tgħin biex jitneħħa t-tfixkil għall-kompetizzjoni fis-suq intern u biex il-konsumturi u l-impriżi, inlużi l-SMEs, ma jibqgħux jitpoġġew fi żvantaġġ għad-detrimernt tagħhom b'dawn il-miżuri. Barra minn hekk, il-fatt li l-NCAs ikunu jistgħu jipprovdu b’mod effettiv assistenza reċiproka lil xulxin se jiżgura kundizzjonijiet aktar ekwi u se tiġi ssalvagwardjata l-kooperazzjoni mill-qrib fi ħdan in-NEK.

Konsistenza mad-dispożizzjonijiet ta’ politika eżistenti fil-qasam ta’ politika

Konsistenza ma’ politiki oħra tal-Unjoni

2.BAŻI ĠURIDIKA, SUSSIDJARJETÀ U PROPORZJONALITÀ

Bażi ġuridika

Sussidjarjetà

Ir-Regolament (KE) Nru 1/2003 stabbilixxa sistema deċentralizzata ta’ infurzar tal-kompetizzjoni, madankollu l-potenzjal sħiħ ta’ din is-sistema għad irid jiġi mħaddem. Id-Direttiva proposta se tiżgura li l-infurzar tal-kompetizzjoni ikun effikaċi fil-livell nazzjonali, billi tagħti lill-NCAs il-garanziji u l-istrumenti meħtieġa biex ikunu inforzaturi effettivi.

Interkonnessjoni bejn il-programmi ta’ klemenza tal-awtoritajiet tal-kompetizzjoni fl-Ewropa

Proporzjonalità

Għal ħafna aspetti l-proposta se tistabbilixxi standards minimi sabiex l-NCAs jingħataw is-setgħa li jinfurzaw b’mod effettiv ir-regoli tal-kompetizzjoni tal-UE. Dan jiżgura bilanċ xieraq bejn li jiġu ssodisfati l-għanijiet ġenerali u speċifiċi tal-proposta filwaqt li tiġi evitata interferenza bla bżonn fit-tradizzjonijiet nazzjonali. L-Istati Membri xorta se jkunu jistgħu jistabbilixxu standards aktar għoljin u jaddattaw ir-regoli tagħhom għall-ispeċifiċitajiet nazzjonali. Pereżempju l-Istati Membri se jibqgħu liberi biex ifasslu, jorganizzaw u jiffinanzjaw lill-awtoritajiet nazzjonali tal-kompetizzjoni tagħhom kif jidhrilhom xieraq, dment li tkun żgurata l-effikaċja tagħhom. Barra minn hekk id-Direttiva proposta tiżgura wkoll li tiġi rrispettata bis-sħiħ l-għażla ta’ dawk l-Istati Membri li jkunu għażlu mudell ġudizzjarju għall-infurzar tal-kompetizzjoni.

Għażla tal-istrument

L-għan tal-proposta għal Direttiva huwa biex tiżdied l-effettività tal-NCAs, filwaqt li ma tiġix imposta soluzzjoni waħda għal kulħadd sabiex ikunu jistgħu jittieħdu inkonsiderazzjoni t-tradizzjonijiet legali u l-ispeċifiċitajiet istituzzjonali tal-Istati Membri. Għalhekk, direttiva hija l-aħjar mod biex jiġi żgurat li l-NCAs ikollhom il-garanziji li għandhom bżonn sabiex ikunu inforzaturi aktar effettivi, mingħajr indħil bla bżonn fl-ispeċifiċitajiet u t-tradizzjonijiet nazzjonali. B’kuntrast ma’ regolament, hija tħalli lill-Istati Membri l-għażla tal-aktar mezzi xierqa sabiex jimplimentaw il-miżuri fid-Direttiva. Barra minn hekk, direttiva hija għodda flessibbli sabiex jiġi żgurat li l-NCAs ikollhom il-garanziji neċessarji ta’ indipendenza u r-riżorsi, kif ukoll setgħat ta’ infurzar u ta’ mmultar, filwaqt li tħalli spazju lill-Istati Membri biex jagħmlu aktar minn hekk jekk ikunu jixtiequ.

3.RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET IKKONĊERNATI U TAL-VALUTAZZJONIJIET TAL-IMPATT

Evalwazzjonijiet ex post/kontrolli tal-idoneità tal-leġiżlazzjoni eżistenti

Konsultazzjonijiet mal-partijiet ikkonċernati

Ġbir u użu tal-għarfien espert

Valutazzjoni tal-impatt

Drittijiet fundamentali

4.IMPLIKAZZJONIJIET GĦALL-BAĠIT

5.ELEMENTI OĦRA

Pjanijiet ta’ implimentazzjoni u arranġamenti dwar il-monitoraġġ, l-evalwazzjoni u r-rapportar

Il-Pjan ta’ Implimentazzjoni jinkludi (i) punt uniku ta’ kuntatt mal-Kummissjoni permezz ta’ indirizz elettroniku funzjonali li l-Istati Membri jistgħu jużaw għall-kwistjonijiet kollha relatati mad-Direttiva proposta, u (ii) għadd ta’ azzjonijiet li għandhom jitwettqu mill-Kummissjoni u mill-Istati Membri sabiex jindirizzaw it-tliet sfidi ewlenin tal-implimentazzjoni: (a) l-implimentazzjoni fil-ħin, (b) l-għoti ta’ taħriġ u appoġġ lill-NCAs, u (c) l-iżgurar ta’ informazzjoni adegwata għall-komunità kummerċjali.

Il-Kummissjoni se timmonitorja t-traspożizzjoni u l-implimentazzjoni tad-Direttiva, kemm matul il-perjodu li jasal sad-data tat-traspożizzjoni kif ukoll wara t-traspożizzjoni.

Wara ħames snin mid-data tat-traspożizzjoni tad-Direttiva se titwettaq evalwazzjoni ex post tagħha.

Dokumenti ta’ spjegazzjoni

Spjegazzjoni fid-dettall tad-dispożizzjonijiet speċifiċi tal-proposta

Is-setgħat u l-proċeduri deċiżjonali u ta’ investigazzjoni huma l-għodod ta’ ħidma ewlenija tal-awtoritajiet tal-kompetizzjoni. Madankollu, fil-preżent hemm taħlita frammentata ta’ setgħat madwar l-Ewropa, b’ħafna NCAs li ma għandhomx is-setgħat kollha meħtieġa minnhom. Il-kamp ta' applikazzjoni tas-setgħat investigattivi u deċiżjonali tal-NCAs ivarja b’mod konsiderevoli, li jista’ jaffettwa b’mod sinifikanti l-effikaċja tagħhom.

2017/0063 (COD)

Proposta għal

DIRETTIVA TAL-PARLAMENT EWROPEW U TAL-KUNSILL

sabiex l-awtoritajiet tal-kompetizzjoni tal-Istati Membri jingħataw is-setgħa biex ikunu inforzaturi aktar effettivi, u biex jiġi żgurat il-funzjonament tajjeb tas-suq intern

(Test b'rilevanza għaż-ŻEE)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikoli 103 u 114 tiegħu,

Wara li kkunsidraw il-proposta tal-Kummissjoni Ewropea,

Wara li l-abbozz tal-att leġiżlattiv intbagħat lill-parlamenti nazzjonali,

Wara li kkunsidraw l-opinjoni tal-Kumitat Ekonomiku u Soċjali Ewropew 21

Waqt li jaġixxu skont il-proċedura leġiżlattiva ordinarja,

Billi:

(1)L-Artikoli 101 u 102 tat-Trattat dwar il-Funzjonament tal-Unjoni Ewropea (TFUE) huma kwistjoni ta’ ordni pubbliku u jinħtieġ li jiġu applikati b’mod effettiv fl-Unjoni kollha sabiex jiġi żgurat li l-kompetizzjoni fis-suq intern ma tiġix imfixkla. L-infurzar effettiv tal-Artikoli 101 u 102 TFUE huwa meħtieġa sabiex jiġu żgurati swieq aktar miftuħa u kompetittivi fl-Ewropa, fejn il-kumpaniji jikkompetu fuq il-merti tagħhom u mingħajr ma joħolqu ostakoli għad-dħul fis-suq, u dan jippermettilhom jiġġeneraw il-ġid u joħolqu l-impjiegi. Tipproteġi lill-konsumaturi minn prattiki kummerċjali li jżommu l-prezzijiet tal-oġġetti u tas-servizzi f’livell artifiċjalment għoli, u ttejjeb l-għażla tagħhom ta’ prodotti u servizzi innovattivi.

(2)L-infurzar pubbliku tal-Artikoli 101 u 102 TFUE jitwettaq mill-awtoritajiet nazzjonali tal-kompetizzjoni (NCAs) tal-Istati Membri b’mod parallel mal-Kummissjoni skont ir-Regolament tal-Kunsill (KE) Nru 1/2003( 22 ). L-NCAs u l-Kummissjoni flimkien jiffurmaw netwerk ta’ awtoritajiet pubbliċi li japplikaw ir-regoli tal-kompetizzjoni tal-UE f’kooperazzjoni mill-qrib (in-Netwerk Ewropew għall-Kompetizzjoni).

(3)L-Artikolu 3(1) tar-Regolament (KE) Nru 1/2003 jobbliga lill-NCAs u lill-qrati nazzjonali biex japplikaw l-Artikoli 101 u 102 TFUE fil-każ ta' arranġamenti jew imġiba li jistgħu jaffettwaw il-kummerċ bejn l-Istati Membri. Fil-prattika l-biċċa l-kbira tal-NCAs japplikaw d-dispożizzjonijiet tad-dritt nazzjonali tal-kompetizzjoni flimkien mal-Artikoli 101 u 102 TFUE. Għaldaqstant, din id-Direttiva, li l-għan tagħha huwa li jiġi żgurat li l-NCAs ikollhom il-garanziji meħtieġa ta’ indipendenza u l-infurzar u ta’ setgħat għall-immultar, sabiex ikunu jistgħu japplikaw l-Artikoli 101 u 102 TFUE b’mod effettiv, inevitabbilment se jkollha impatt fuq id-dispożizzjonijiet tad-dritt nazzjonali tal-kompetizzjoni li jiġu applikati mill-NCAs b’mod parallel.

(4)Barra minn hekk, l-għoti lill-NCAs tas-setgħa li jiksbu l-informazzjoni kollha, relatata ma’ impriża li tkun suġġetta għall-investigazzjoni, f’forma diġitali irrispettivament mill-mezz li fuqu tkun maħżuna, jinħtieġ li jaffettwa wkoll il-kamp ta’ applikazzjoni tas-setgħat tal-NCAs meta, fl-istadji bikrin tal-proċedimenti, huma jieħdu wkoll il-miżura investigattiva rilevanti abbażi tad-dispożizzjonijiet tad-dritt nazzjonali tal-kompetizzjoni applikati b’mod parallel għall-Artikoli 101 u 102 TFUE. L-għoti lill-NCAs b’setgħat ta’ spezzjoni b’kamp ta’ applikazzjoni differenti, li jiddependi fuq jekk dawn fl-aħħar mill-aħħar hux se japplikaw id-dispożizzjonijiet tad-dritt nazzjonali tal-kompetizzjoni biss jew ukoll l-Artikoli 101 u 102 TFUE b’mod parallel, ixekkel l-effettività tal-infurzar tad-dritt tal-kompetizzjoni fis-suq intern. Għaldaqstant, il-kamp ta’ applikazzjoni tad-Direttiva jinħtieġ li jkopri kemm l-applikazzjoni tal-Artikoli 101 u 102 TFUE fuq bażi indipendenti kif ukoll l-applikazzjoni tad-dritt nazzjonali tal-kompetizzjoni applikat b’mod parallel għall-istess każ. Dan iseħħ bl-eċċezzjoni għall-protezzjoni tad-dikjarazzjonijiet ta’ klemenza u tas-sottomissjonijiet għas-saldu li jestendu wkoll għad-dritt nazzjonali tal-kompetizzjoni applikat fuq bażi indipendenti.

(5)Il-liġi nazzjonali timpedixxi lil bosta NCAs milli jkollhom il-garanziji meħtieġa ta’ indipendenza u ta’ infurzar kif ukoll is-setgħat għall-immultar, sabiex ikunu jistgħu jinfurzaw dawn ir-regoli b’mod effettiv. Dan idgħajjef il-ħila tagħhom biex japplikaw b’effikaċja l-Artikoli 101 u 102 TFUE u d-dispożizzjonijiet tad-dritt nazzjonali tal-kompetizzjoni b’mod parallel u adegwatament għall-Artikoli 101 u 102 TFUE. Pereżempju, skont il-liġi nazzjonali, bosta NCAs ma għandhomx għodod effettivi sabiex isibu evidenza għall-ksur tal-Artikoli 101 u 102 TFUE, sabiex jimmultaw lill-kumpaniji li jiksru l-liġi, jew ma għandhomx ir-riżorsi li għandhom bżonn sabiex japplikaw b’mod effettiv l-Artikoli 101 u 102 TFUE. Dan jista’ jimpedihom milli jieħdu kwalunkwe azzjoni jew iwassalhom biex jillimitaw l-azzjoni tagħhom ta’ infurzar. In-nuqqas ta’ għodod u garanziji operattivi ta’ bosta NCAs sabiex japplikaw b’mod effettiv l-Artikoli 101 u 102 TFUE jfisser li l-impriżi involuti fi prattiki antikompetittivi jistgħu jiffaċċjaw eżiti differenti ħafna waqt proċeduri, skont l-Istati Membri li fihom ikunu attivi: huma jistgħu ma jkunu soġġetti għall-ebda infurzar skont l-Artikoli 101 jew 102 TFUE, jew suġġetti għal infurzar mhux effettiv. Pereżempju, f’xi Stati Membri, l-impriżi jistgħu ma jerfgħux ir-responsabbiltà tal-multi sempliċement billi jagħmlu ristrutturazzjoni. L-infurzar mhux uniformi, tal-Artikoli 101 u 102 TFUE u tad-dispożizzjonijiet tad-dritt nazzjonali tal-kompetizzjoni applikati b’mod parallel għall-Artikoli 101 u 102 TFUE, jirriżulta f’opportunitajiet mitlufa sabiex jitneħħew l-ostakoli għad-dħul fis-suq u sabiex jinħolqu swieq kompetittivi aktar miftuħa fl-Unjoni Ewropea kollha, fejn l-impriżi jikkompetu b’mod ġust u fuq il-merti tagħhom. L-impriżi u l-konsumaturi jbatu b’mod partikolari f’dawk l-Istati Membri fejn l-NCAs huma anqas mgħammra sabiex ikunu inforzaturi effettivi. L-impriżi ma jistgħux jikkompetu fuq il-merti tagħhom fejn ikun hemm kenn għall-prattiki antikompetittivi, pereżempju, minħabba li ma tkunx tista’ tinġabar evidenza tal-prattiki antikompetittivi jew minħabba li l-impriżi jkunu jistgħu ma jerfgħux ir-responsabbiltà tal-multi. Għalhekk għandhom diżinċentiv biex jidħlu f’dawn is-swieq u biex jeżerċitaw id-drittijiet tagħhom ta’ stabbiliment u biex jipprovdu prodotti u servizzi hemmhekk. Il-konsumaturi bbażati fi Stati Membri fejn hemm inqas infurzar mhux se jgawdu mill-benefiċċji ta’ infurzar effikaċi tal-kompetizzjoni. L-infurzar mhux uniformi tal-Artikoli 101 u 102 TFUE u tad-dispożizzjonijiet tad-dritt nazzjonali tal-kompetizzjoni applikati b’mod parallel għall-Artikoli 101 u 102 TFUE fl-Ewropa għaldaqstant joħloq distorzjoni tal-kompetizzjoni fis-suq intern, u jtellef il-funzjonament tajjeb tiegħu.

(6)Id-diskrepanzi u l-limitazzjonijiet fl-għodod u l-garanziji tal-NCAs jimminaw is-sistema ta’ setgħat paralleli għall-infurzar tal-Artikoli 101 u 102 TFUE li hija mfassla biex taħdem bħala unità sħiħa koeżiva bbażata fuq kooperazzjoni mill-qrib fl-ambitu tan-Netwerk Ewropew għall-Kompetizzjoni. Din is-sistema tiddependi fuq il-fatt li l-awtoritajiet ikunu jistgħu jibbażaw fuq xulxin sabiex iwettqu miżuri ta’ tiftix ta’ informazzjoni f’isem xulxin. Madankollu ma taħdimx tajjeb meta jkun għad hemm NCAs li ma għandhomx għodod adegwati għall-ġbir tal-informazzjoni. F’aspetti ewlenin oħra, l-NCAs ma jistgħux jipprovdu assistenza reċiproka lil xulxin. Pereżempju, fil-maġġoranza tal-Istati Membri, l-impriżi li joperaw bejn il-fruntieri jistgħu jevadu milli jħallsu l-multi sempliċement billi ma jkollhomx preżenza legali f’xi wħud mit-territorji tal-Istati Membri li fihom ikunu attivi. Dan inaqqas l-inċentivi sabiex jikkonformaw mal-Artikoli 101 u 102 TFUE. L-infurzar ineffettiv li jirriżulta jfixkel il-kompetizzjoni għall-impriżi li josservaw il-liġi u jimmina l-kunfidenza tal-konsumaturi fis-suq intern, b’mod partikolari fl-ambjent diġitali.

(7)Sabiex jiġi assigurat spazju verament komuni ta’ infurzar tal-kompetizzjoni fl-Ewropa li jipprovdi kundizzjonijiet aktar ekwi għall-impriżi li joperaw fis-suq intern u li jnaqqas il-kundizzjonijiet mhux ugwali għall-konsumaturi, jinħtieġ li jiġu stabbiliti garanziji minimi ta’ indipendenza u riżorsi, u setgħat ewlenin ta’ infurzar u mmultar meta jiġu applikati l-Artikoli 101 u 102 TFUE u d-dispożizzjonijiet tad-dritt nazzjonali tal-kompetizzjoni b’mod parallel mal-Artikoli 101 u 102 TFUE, sabiex l-NCAs ikunu jistgħu jkunu kompletament effikaċi.

(8)Huwa xieraq li din id-Direttiva tissejjes fuq il-bażi legali doppja tal-Artikoli 103 u 114 TFUE. Dan huwa minħabba li din id-Direttiva ma tkoprix biss l-applikazzjoni tal-Artikoli 101 u 102 TFUE u l-applikazzjoni ta’ dispożizzjonijiet tad-dritt nazzjonali tal-kompetizzjoni b’mod parallel ma’ dawn l-Artikoli, iżda wkoll in-nuqqasijiet u l-limitazzjonijiet tal-għodod u tal-garanziji tal-NCAs biex jiġu applikati l-Artikoli 101 u 102 TFUE, li jaffettwaw b’mod negattiv kemm il-kompetizzjoni kif ukoll il-funzjonament tajjeb tas-suq intern.

(9)L-istabbiliment ta’ garanziji minimi sabiex ikun żgurat li l-NCAs japplikaw l-Artikoli 101 u 102 TFUE b’mod effettiv huwa mingħajr preġudizzju għall-abbiltà tal-Istati Membri li jżommu jew idaħħlu garanziji aktar estensivi ta’ indipendenza kif ukoll riżorsi għall-NCAs, u regoli aktar iddettaljati dwar is-setgħat ta’ infurzar u ta’ mmultar ta’ dawn l-awtoritajiet. B’mod partikolari, l-Istati Membri jistgħu jagħtu lill-NCAs setgħat addizzjonali lil hinn mis-ġabra bażika prevista f’din id-Direttiva sabiex iżidu ulterjorment l-effettività tagħhom.

(10)Min-naħa l-oħra, huma meħtieġa regoli ddettaljati fil-qasam tal-kundizzjonijiet għall-għoti tal-klemenza għal kartelli sigrieti. Il-kumpaniji se jgħidu l-verità dwar il-kartelli sigrieti li fihom ikunu pparteċipaw biss jekk ikollhom ċertezza legali suffiċjenti dwar jekk ikunux se jibbenefikaw minn immunità mill-multi. Id-differenzi sinifikanti bejn il-programmi ta’ klemenza applikabbli fl-Istati Membri jwasslu għal inċertezza legali għall-applikanti potenzjali għall-klemenza, li tista’ ddgħajjef l-inċentivi tagħhom sabiex japplikaw għall-klemenza. Jekk l-Istati Membri jkunu jistgħu jimplimentaw jew japplikaw regoli anqas jew aktar restrittivi għall-klemenza fil-qasam kopert minn din id-Direttiva, dan mhux biss imur kontra l-objettiv li jinżammu l-inċentivi għall-applikanti sabiex l-infurzar tal-kompetizzjoni fl-Unjoni jsir l-aktar effettiv possibbli, iżda jista' wkoll jipperikola l-kundizzjonijiet ekwi għall-impriżi li joperaw fis-suq intern. Dan ma jimpedixxix lill-Istati Membri milli japplikaw programmi ta’ klemenza li mhux biss ikopru l-kartelli sigrieti, iżda wkoll ksur ieħor tal-Artikoli 101 u 102 TFUE u dispożizzjonijiet nazzjonali ekwivalenti.

(11)Din id-Direttiva ma tapplikax għal-liġijiet nazzjonali sakemm dawn jipprevedu l-impożizzjoni ta’ sanzjonijiet kriminali fuq persuni fiżiċi, bl-eċċezzjoni tar-regoli li jirregolaw l-interazzjoni bejn il-programmi ta’ klemenza u l-impożizzjoni ta’ sanzjonijiet fil-konfront ta’ persuni naturali.

(12)L-eżerċizzju tas-setgħat mogħti lill-NCAs jinħtieġ li jkun soġġett għal salvagwardji xierqa li mill-anqas jilħqu l-istandards tal-prinċipji ġenerali tad-dritt tal-Unjoni u tal-Karta tad-Drittijiet Fundamentali tal-Unjoni Ewropea. Dawn is-salvagwardji jinkludu d-dritt għal aministrazzjoni tajba u r-rispett għad-drittijiet tad-difiża tal-impriżi, li komponent essenzjali tagħhom huwa d-dritt li jinstemgħu. B’mod partikolari, l-NCAs jinħtieġ li jinfurmaw lill-partijiet li jkunu qegħdin jiġu investigati, dwar l-oġġezzjonijiet preliminari mqajmin kontrihom skont l-Artikolu 101 jew l-Artikolu 102 TFUE, qabel ma jieħdu deċiżjoni li taffettwa negattivament l-interessi tagħhom, u dawn il-partijiet jinħtieġ li jkollhom l-opportunità li effettivament jesprimu l-fehmiet tagħhom dwar dawn l-oġġezzjonijiet qabel ma tittieħed deċiżjoni bħal din. Il-partijiet li dwarhom jkunu ġew innotifikati oġġezzjonijiet preliminari dwar allegat ksur tal-Artikolu 101 jew tal-Artikolu 102 TFUE jinħtieġ li jkollhom id-dritt tal-aċċess għall-fajl tal-każ rilevanti tal-NCAs sabiex ikunu jistgħu jeżerċitaw b’mod effettiv id-dritt tagħhom tad-difiża. Dan huwa soġġett għall-interess leġittimu tal-impriżi fil-protezzjoni tas-sigrieti kummerċjali tagħhom u ma jestendix għall-informazzjoni kunfidenzjali u għad-dokumenti interni tal-NCAs u tal-Kummissjoni, u għall-korrispondenza ta' bejniethom. Barra minn hekk id-destinatarji ta’ deċiżjonijiet finali tal-NCAs li japplikaw l-Artikoli 101 u 102 TFUE jinħtieġ li jkollhom id-dritt għal rimedju effettiv quddiem tribunal, skont l-Artikolu 47 tal-Karta Fundamentali tad-Drittijiet tal-Unjoni Ewropea. Dawn id-deċiżjonijiet finali tal-NCAs jinħtieġ li jkunu mmotivati sabiex jippermettu lid-destinatarji ta’ dawn id-deċiżjonijiet biex jivverifikaw ir-raġunijiet għad-deċiżjoni u biex jeżerċitaw id-dritt tagħhom għal rimedju effettiv. It-tifsila ta’ dawn is-salvagwardji jinħtieġ li tilħaq bilanċ bejn ir-rispett tad-drittijiet fundamentali tal-impriżi u d-dmir li jiġi żgurat li l-Artikoli 101 u 102 TFUE jiġu infurzati b’mod effettiv.

(13)L-għoti tas-setgħa lill-NCAs sabiex japplikaw l-Artikoli 101 u 102 TFUE b’mod imparzjali u fl-interess komuni tal-infurzar effettiv tar-regoli Ewropej tal-kompetizzjoni huwa komponent essenzjali tal-applikazzjoni effettiva u uniformi ta’ dawn ir-regoli.

(14)Jinħtieġ li tissaħħaħ l-indipendenza tal-NCAs sabiex tkun assigurata l-applikazzjoni effettiva u uniformi tal-Artikoli 101 u 102 TFUE. Għal dan il-għan, jinħtieġ li jsir provvediment espliċitu fil-liġi nazzjonali sabiex ikun żgurat li meta jiġu applikati l-Artikoli 101 u 102 TFUE, l-NCAs jkunu protetti kontra intervent estern jew pressjoni politika li jistgħu jpoġġu f’periklu l-valutazzjoni indipendenti tagħhom tal-kwistjonijiet li jiġu quddiemhom. Għal dan il-għan, jinħtieġ li jiġu stabbiliti regoli bil-quddiem rigward ir-raġunijiet għat-tneħħija tal-membri tal-korp deċiżjonali tal-NCAs sabiex jitneħħa kwalunkwe dubju raġonevoli rigward l-imparzjalità ta’ dan il-korp u l-kapaċità tiegħu li ma jiġix influwenzat minn fatturi esterni.

(15)Sabiex tiġi assigurata l-indipendenza tal-NCAs, il-persunal tagħhom u l-membri tal-korp deċiżjonali jinħtieġ li jaġixxu b’integrità u joqogħdu lura minn kull azzjoni li ma tkunx kompatibbli mat-twettiq tad-dmirijiet tagħhom. Il-ħtieġa li ma titħalliex tiġi pperikolata l-valutazzjoni indipendenti tal-persunal jew tal-membri tal-korp deċiżjonali timplika li waqt l-impjieg u l-ħatra tagħhom, u għal perjodu ta’ żmien raġonevoli wara, huma jinħtieġ li joqogħdu lura minn kwalunkwe impjieg mhux kompatibbli, sew bi qligħ kif ukoll jekk mhux. Barra minn hekk, dan jimplika wkoll li matul l-impjieg u l-ħatra tagħhom huma ma għandu jkollhom interess fl-ebda impriża jew organizzazzjoni li jkollhom x’jaqsmu ma’ NCA, sakemm dan għandu l-potenzjal li jikkomprometti l-indipendenza tagħhom. Il-persunal u l-membri tal-korp deċiżjonali jinħtieġ li jiddikjaraw kull interess jew assi li jistgħu joħolqu kunflitt tal-interess fit-twettiq tad-dmirijiet tagħhom. Huma jinħtieġ li jkunu obbligati jinfurmaw lill-korp deċiżjonali, lill-membri l-oħra tiegħu jew, fil-każ ta’ NCAs li s-setgħa għat-teħid tad-deċiżjonijiet tkun f’idejn persuna waħda lill-awtorità tal-ħatra tagħhom, jekk, fit-twettiq tad-dmirijiet tagħhom, huma jiġu msejħa sabiex jiddeċiedu dwar kwistjoni li fiha jkollhom interess li jista’ jdgħajjef l-imparzjalità tagħhom.

(16)L-indipendenza tal-NCAs ma tipprekludix stħarriġ ġudizzjarju jew superviżjoni parlamentari skont il-liġijiet tal-Istati Membri. Ir-rekwiżiti tal-obbligu tar-rendikont jikkontribwixxu wkoll sabiex tkun żgurata l-kredibilità u l-leġittimità tal-azzjonijiet tal-NCAs. Ir-rekwiżiti tal-obbligu tar-rendikont proporzjonati jinkludu l-pubblikazzjoni, mill-NCAs, ta’ rapporti perjodiċi dwar l-attivitajiet tagħhom għal korp governattiv jew parlamentari. L-NCAs jistgħu jkunu soġġetti wkoll għal kontroll jew monitoraġġ tan-nefqa finanzjarja tagħhom, dment li dan ma jaffettwax l-indipendenza tagħhom.

(17)L-NCAs jinħtieġ li jkunu kapaċi jipprijoritizzaw il-proċedimenti tagħhom għall-infurzar tal-Artikoli 101 u 102 TFUE biex jagħmlu użu effettiv tar-riżorsi tagħhom, u biex ikunu jistgħu jiffukaw fuq il-prevenzjoni u t-temma ta’ komportament antikompetittiv li jfixkel il-kompetizzjoni fis-suq intern. Għal dan il-għan, huma jinħtieġ li jkunu jistgħu jirrifjutaw ilmenti għax ma jkunux prijorità. Dan jinħtieġ li jkun mingħajr preġudizzju għas-setgħa tal-NCAs li jirrifjutaw ilmenti għal raġunijiet oħra, bħan-nuqqas ta’ kompetenza, jew li jiddeċiedu li ma jkunx hemm raġunijiet għal azzjoni min-naħa tagħhom. Is-setgħa tal-NCAs li jipprijoritizzaw il-proċedimenti ta’ infurzar tagħhom hija mingħajr preġudizzju għad-dritt ta’ gvern ta’ Stat Membru li joħroġ politika ġenerali jew linji gwida dwar il-prijoritajiet għall-awtoritajiet nazzjonali tal-kompetizzjoni li ma jkunux relatati ma’ proċedimenti speċifiċi għall-infurzar tal-Artikoli 101 u 102 TFUE.

(18)L-NCAs jinħtieġ li jkollhom ir-riżorsi neċessarji, f’termini ta’ persunal, għarfien espert, mezzi finanzjarji u tagħmir tekniku, sabiex jiġi żgurat li huma jkunu jistgħu jwettqu l-kompiti tagħhom b’mod effettiv meta japplikaw l-Artikoli 101 u 102 TFUE. F’każ li d-dmirijiet u s-setgħat tagħhom skont il-liġi nazzjonali jiġu estiżi, ir-riżorsi neċessarji għat-twettiq ta’ dawn il-kompiti xorta jridu jkunu suffiċjenti.

(19)L-NCAs jinħtieġu gabra minima ta’ setgħat investigattivi u deċiżjonali komuni sabiex ikunu jistgħu jinfurzaw b’mod effettiv l-Artikoli 101 u 102 TFUE.

(20)L-NCAs jinħtieġ li jingħataw is-setgħa sabiex ikollhom setgħat effettivi ta’ investigazzjoni sabiex jidentifikaw kwalunkwe ftehim, deċiżjoni jew prattika miftiehma pprojbiti mill-Artikolu 101 TFUE jew kwalunkwe abbuż ta’ pożizzjoni dominanti pprojbit mill-Artikolu 102 TFUE fi kwalunkwe stadju tal-proċedimenti quddiemhom.

(21)Is-setgħat investigattivi tal-awtoritajiet amministrattivi nazzjonali tal-kompetizzjoni jridu jkunu adegwati biex jilħqu l-isfidi tal-infurzar tal-ambjent diġitali u jinħtieġ li jippermettu lill-awtoritajiet nazzjonali tal-kompetizzjoni li jiksbu l-informazzjoni kollha f’forma diġitali, inkluża d-dejta miksuba b’mod forensiku, relatata mal-impriża jew l-assoċjazzjoni ta’ impriżi li tkun soġġetta għall-miżura ta’ investigazzjoni, irrispettivament mill-mezz li tkun maħżuna fuqu, bħal pereżempju fuq laptops, telefowns mobbli u apparat mobbli ieħor.

(22)L-awtoritajiet amministrattivi nazzjonali tal-kompetizzjoni jinħtieġ li jingħataw is-setgħa li jispezzjonaw il-bini kemm ta’ impriżi kif ukoll ta’ assoċjazzjonijiet ta’ impriżi li jkunu s-suġġett ta’ proċedimenti għall-applikazzjoni tal-Artikoli 101 u 102 TFUE, kif ukoll ta’ atturi tas-suq oħra li jista’ jkollhom informazzjoni li tkun rilevanti għal dawn il-proċedimenti. L-awtoritajiet amministrattivi nazzjonali tal-kompetizzjoni jinħtieġ li jkunu jistgħu jwettqu dawn l-ispezzjonijiet meta jkun hemm tal-anqas bażi raġonevoli biex jiġi ssuspettat il-ksur tal-Artikolu 101 jew tal-Artikolu 102 TFUE.

(23)Sabiex tkun effettiva, is-setgħa tal-awtoritajiet amministrattivi nazzjonali tal-kompetizzjoni biex iwettqu spezzjonijiet jinħtieġ li tippermettilhom jaċċessaw informazzjoni li tkun aċċessibbli għall-impriża jew għall-assoċjazzjoni ta’ impriżi jew għall-persuna soġġetta għall-ispezzjoni, u li tkun relatata mal-impriża investigata.

(24)Sabiex jiġi evitat id-dewmien bla bżonn tal-ispezzjonijiet, l-awtoritajiet amministrattivi nazzjonali tal-kompetizzjoni jinħtieġ li jkollhom is-setgħa li jkomplu jagħmlu tfittxijiet għal kopji jew siltiet minn kotba u rekords relatati man-negozju tal-impriża jew tal-assoċjazzjoni ta’ impriżi li jkunu qed jiġu spezzjonati, fil-bini tal-awtorità jew f’postijiet indikati oħra.

(25)L-esperjenza turi li r-rekords tan-negozju jistgħu jinżammu fid-djar tad-diretturi jew ta’ persuni oħra li jaħdmu għal impriża, speċjalment biż-żieda fl-użu ta’ arranġamenti ta’ ħidma aktar flessibbli. Sabiex jiġi żgurat li l-ispezzjonijiet ikunu effettivi, l-awtoritajiet amministrattivi nazzjonali tal-kompetizzjoni jinħtieġ li jkollhom is-setgħa li jidħlu fi kwalunkwe bini, inklużi djar privati, meta jkun hemm suspett raġonevoli li jkunu qegħdin jinżammu rekords tan-negozju li jistgħu jkunu rilevanti sabiex jiġi ppruvat ksur serju tal-Artikolu 101 jew tal-Artikolu 102 TFUE. L-eżerċizzju ta’ din is-setgħa jinħtieġ li jkun suġġett għall-awtorizzazzjoni minn qabel ta’ awtorità ġudizzjarja. Dan ma jwaqqafx lill-Istati Membri milli jgħaddu l-kompiti ta’ awtorità ġudizzjarja nazzjonali lil awtorità amministrattiva nazzjonali tal-kompetizzjoni li f’każijiet ta’ urġenza estrema taġixxi bħala awtorità ġudizzjarja.

(26)L-NCAs jinħtieġ li jkollhom setgħat effettivi sabiex jitolbu li tiġi pprovduta l-informazzjoni neċessarja sabiex jinstab kwalunkwe ftehim, deċiżjoni jew prattika miftiehma pprojbiti mill-Artikolu 101 TFUE jew kwalunkwe abbuż ipprojbit mill-Artikolu 102 TFUE. Dan jinħtieġ li jinkludi d-dritt li jitolbu l-informazzjoni irrispettivament minn fejn tkun maħżuna, bil-kundizzjoni li tkun aċċessibbli għad-destinatarju tat-talba għall-informazzjoni. L-esperjenza turi li l-informazzjoni pprovduta fuq bażi volontarja minn partijiet terzi, bħal kompetituri, klijenti u konsumaturi fis-suq, tista’ tkun ukoll sors siewi ta’ informazzjoni għal infurzar infurmat kif ukoll sod, u l-NCAs għandhom jinkoraġġixxu dan.

(27)L-NCAs jinħtieġ li jkollhom mezzi effettivi sabiex jerġgħu jistabbilixxu l-kompetizzjoni fis-suq billi jimponu rimedji strutturali u ta’ aġir proporzjonati.

(28)Meta, waqt proċedimenti li jistgħu jwasslu biex ftehim jew prattika jiġu pprojbiti, impriżi jew assoċjazzjonijiet ta’ impriżi joffru lill-NCAs impenji li jissodisfaw it-tħassib tagħhom, dawn l-awtoritajiet jinħtieġ li jkunu jistgħu jadottaw deċiżjonijiet li jagħmlu dawn l-impenji vinkolanti għall-impriżi kkonċernati kif ukoll inforzabbli kontrihom. Deċiżjonijiet ta’ impenn bħal dawn jinħtieġ li jaċċertaw li ma jkunx hemm aktar raġunijiet għal azzjoni mill-NCAs, mingħajr ma jikkonkludu jekk kienx hemm ksur jew le tal-Artikolu 101 jew tal-Artikolu 102 TFUE. Id-deċiżjonijiet ta’ impenn huma mingħajr preġudizzju għas-setgħat tal-awtoritajiet tal-kompetizzjoni u l-qrati talIstati Membri li jikkonstataw ksur bħal dan u jieħdu deċiżjoni fuq il-każ.

(29)Sabiex jiġi żgurat infurzar effettiv u uniformi tal-Artikoli 101 u 102 TFUE, l-awtoritajiet amministrattivi nazzjonali tal-kompetizzjoni jinħtieġ li jkollhom is-setgħa li jimponu multi effettivi, proporzjonati u dissważivi fuq l-impriżi u l-assoċjazzjonijiet ta’ impriżi għall-ksur tal-Artikoli 101 jew 102 TFUE, jew direttament huma stess fi proċedimenti amministrattivi jew inkella jippruvaw jimponu l-multi permezz ta’ proċedimenti ġudizzjarji mhux kriminali. Dan huwa mingħajr preġudizzju għal-liġijiet nazzjonali tal-Istati Membri li jipprevedu l-impożizzjoni ta’ sanzjonijiet mill-qrati fi proċedimenti kriminali għall-ksur tal-Artikoli 101 u 102 TFUE.

(30)Sabiex jiġi żgurat li l-impriżi u l-assoċjazzjonijiet ta’ impriżi jikkonformaw mas-setgħat deċiżjonali u ta’ investigazzjoni tal-NCAs, l-awtoritajiet amministrattivi nazzjonali tal-kompetizzjoni jridu jkunu jistgħu jimponu multi effettivi għan-nuqqas ta’ konformità kif ukoll il-ħlasijiet ta’ penali perjodiċi sabiex jesiġu konformità ma’ dawn is-setgħat, jew direttament huma stess fi proċedimenti amministrattivi jew inkella jippruvaw jimponu l-multi permezz ta’ proċedimenti ġudizzjarji mhux kriminali. Dan huwa mingħajr preġudizzju għal-liġijiet nazzjonali tal-Istati Membri li jipprevedu l-impożizzjoni ta’ tali multi mill-qrati fi proċedimenti ġudizzjarji kriminali. Barra minn hekk, din id-Direttiva la taffettwa r-regoli nazzjonali dwar l-istandard tal-provi u lanqas l-obbligi tal-NCAs sabiex jaċċertaw il-fatti marbutin ma’ każ rilevanti, dment li dawn ir-regoli u l-obbligi jkunu kompatibbli mal-prinċipji ġenerali tad-dritt tal-Unjoni. Il-multi u l-ħlasijiet ta’ penali perjodiċi jinħtieġ li jiġu ddeterminati b’mod proporzjonali għall-fatturat totali tal-impriżi u tal-assoċjazzjonijiet ta’ impriżi kkonċernati.

(31)Sabiex tiġi assigurata l-applikazzjoni effettiva u uniformi tal-Artikoli 101 u 102 TFUE, il-kunċett ta’ impriża, kif qiegħed fl-Artikoli 101 u 102 TFUE, jinħtieġ li jiġi applikat skont il-ġurisprudenza tal-Qorti tal-Ġustizzja tal-Unjoni Ewropea, bħala li jindika unità ekonomika, anki jekk din tkun magħmula minn diversi persuni ġuridiċi jew fiżiċi. Għaldaqstant, l-NCAs jinħtieġ li jkunu jistgħu japplikaw il-kunċett ta’ impriża sabiex isibu l-kumpanija prinċipali responsabbli, u jimponu multi fuqha, għall-aġir ta’ waħda mis-sussidjarji tagħha meta din il-kumpanija prinċipali u s-sussidjarja tagħha jiffurmaw unità ekonomika waħda. Sabiex jiġi evitat li l-impriżi jaħarbu mir-responsabbiltà tal-multi għall-ksur tal-Artikoli 101 u 102 TFUE permezz ta’ bidliet legali jew organizzattivi, l-NCAs jinħtieġ li jkunu jistgħu jsibu s-suċċessuri legali jew ekonomiċi għall-impriża responsabbli, u jimponu multi fuqhom, għal ksur tal-Artikoli 101 u 102 TFUE skont il-ġurisprudenza tal-Qorti tal-Ġustizzja tal-Unjoni Ewropea.

(32)Sabiex jiġi żgurat li l-multi imposti għal ksur tal-Artikoli 101 u 102 TFUE jirriflettu l-importanza ekonomika tal-ksur, l-NCAs jinħtieġ li jqisu l-gravità tal-ksur. L-NCAs jinħtieġ li jkunu jistgħu jistabbilixxu wkoll multi li jkunu proporzjonali għat-tul ta’ żmien tal-ksur. Dawn il-fatturi jinħtieġ li jiġu vvalutati skont il-ġurisprudenza tal-Qorti tal-Ġustizzja tal-Unjoni Ewropea. B’mod partikolari, fir-rigward tal-valutazzjoni tal-gravità ta’ ksur, il-Qorti tal-Ġustizzja tal-Unjoni Ewropea stabbiliet li jridu jiġu kkunsidrati ċ-ċirkustanzi tal-każ, il-kuntest li fih ikun seħħ il-ksur u l-effett deterrent tal-multi. Fatturi li jistgħu jiffurmaw parti minn din il-valutazzjoni huma l-fatturat għall-prodotti u s-servizzi li fir-rigward tiegħu jkun twettaq il-ksur u d-daqs u s-saħħa ekonomika tal-impriża, billi dawn jirriflettu l-influwenza li l-impriża kienet kapaċi tagħmel fuq is-suq. Barra minn hekk, l-eżistenza ta’ ksur ripetut mill-istess awtur juri l-propensità tiegħu li jwettaq tali ksur u għalhekk huwa indikazzjoni sinifikanti ħafna tal-gravità tal-imġiba inkwistjoni, u għalhekk tal-ħtieġa li jiżdied il-livell tal-penali sabiex tintlaħaq deterrenza effettiva. Meta l-NCAs jistabbilixxu l-multa li għandha tiġi imposta, jinħtieġ li jikkunsidraw il-valur tal-bejgħ tal-prodotti u s-servizzi tal-impriża li miegħu jkun marbut direttament jew indirettament il-ksur. Bl-istess mod, l-NCAs jinħtieġ li jkollhom id-dritt li jżidu l-multa li għandha tiġi imposta fuq impriża jew fuq assoċjazzjoni ta’ impriżi li tkompli bl-istess ksur, jew twettaq ksur simili wara li l-Kummissjoni jew awtorità nazzjonali tal-kompetizzjoni tkun ħadet deċiżjoni li ssib li l-istess impriża jew assoċjazzjoni ta’ impriżi tkun kisret l-Artikoli 101 jew 102 TFUE.

(33)L-esperjenza wriet li l-assoċjazzjonijiet ta’ impriżi b’mod regolari għandhom rwol fil-ksur tar-regoli tal-kompetizzjoni u l-NCAs jinħtieġ li jkunu jistgħu jimmultaw b’mod effettiv lil dawn l-assoċjazzjonijiet. Meta tkun qiegħda tiġi valutata l-gravità tal-ksur sabiex jiġi stabbilit l-ammont tal-multa fi proċedimenti mressqa kontra assoċjazzjonijiet ta’ impriżi meta l-ksur ikun jirrigwarda l-attivitajiet tal-membri tagħhom, jinħtieġ li tiġi kkunsidrata s-somma tal-bejgħ mill-impriżi li jkunu membri tal-assoċjazzjoni tal-prodotti u s-servizzi, li magħha jkun marbut direttament jew indirettament il-ksur. Sabiex jiġi żgurat l-irkupru effettiv tal-multi imposti fuq assoċjazzjonijiet ta’ impriżi għall-ksur li jikkommettu, huwa meħtieġ li jiġu stabbiliti l-kundizzjonijiet li fuqhom l-NCAs ikunu jistgħu jesiġu l-ħlas ta’ multa mill-membri tal-assoċjazzjoni meta l-assoċjazzjoni ma tkunx solventi. Meta jseħħ dan, l-NCAs għandhom jagħtu kas għall-kobor relattiv tal-impriżi li jappartjenu għall-assoċjazzjoni, u b’mod partikolari għas-sitwazzjoni tal-intrapriżi żgħar u ta’ daqs medju. Il-ħlas ta’ multa minn membru jew minn diversi membri ta’ assoċjazzjoni jkun mingħajr preġudizzju għar-regoli tal-liġi nazzjonali li jipprevedu l-irkupru tal-ammont imħallas minn membri oħra tal-assoċjazzjoni.

(34)L-effett dissważiv tal-multi jvarja ħafna fl-Ewropa u f’xi Stati Membri l-ammont massimu tal-multa li jista’ jkun stabbilit huwa baxx ħafna. Sabiex jiġi żgurat li l-NCAs jistgħu jistabbilixxu multi ta’ deterrent, l-ammont massimu tal-multa jinħtieġ li jiġi stabbilit f’livell ta’ mhux inqas minn 10 % tal-fatturat dinji totali tal-impriża kkonċernata. Dan ma għandux jimpedixxi lill-Istati Membri milli jżommu jew jintroduċu ammont massimu ogħla bħala multa.

(35)Il-programmi ta’ klemenza huma għodda ewlenija għall-kxif ta' kartelli sigrieti u għalhekk jikkontribwixxu għall-prosekuzzjoni effiċjenti tal-aktar ksur serju tad-dritt tal-kompetizzjoni u għall-impożizzjoni ta' penali għalih. Madankollu, fil-preżent hemm differenzi sinifikanti bejn il-programmi ta’ klemenza applikabbli fl-Istati Membri. Dawn id-differenzi jwasslu għal inċertezza legali min-naħa tal-impriżi kontraventuri rigward il-kundizzjonijiet li taħthom jistgħu japplikaw għall-klemenza kif ukoll dwar l-istatus tal-immunità tagħhom skont il-programm(i) ta’ klemenza rispettiv(i). Din l-inċertezza tista’ ddgħajjef l-inċentivi għall-applikanti potenzjali għall-klemenza sabiex japplikaw għall-klemenza. Dan imbagħad jista’ jwassal għal infurzar anqas effettiv tal-kompetizzjoni fl-Unjoni, billi jinkixfu anqas kartelli sigrieti.

(36)Id-differenzi bejn il-programmi ta’ klemenza fuq il-livell tal-Istati Membri jipperikolaw ukoll il-kundizzjonijiet ekwi għall-impriżi li joperaw fis-suq intern. Għalhekk huwa f’loku li tiżdied iċ-ċertezza legali billi jitnaqqsu dawn id-differenzi.

(37)L-NCAs jinħtieġ li jagħtu lill-impriżi immunità mill-multi u tnaqqis tal-multi jekk jiġu ssodisfati ċerti kundizzjonijiet. L-impriżi għandhom jitqiesu li pprovdew lil awtorità nazzjonali tal-kompetizzjoni b’evidenza fir-rigward ta’ kartell sigriet li tippermetti l-konstatazzjoni ta’ ksur tal-Artikolu 101 TFUE jekk dik l-awtorità nazzjonali tal-kompetizzjoni ma jkollhiex evidenza suffiċjenti biex issib il-ksur tal-Artikolu 101 TFUE b’rabta mal-istess kartell fil-mument tas-sottomissjoni ta’ din l-evidenza mill-impriża.

(38)L-applikanti jinħtieġ li jkollhom il-possibbiltà li japplikaw għall-klemenza bil-miktub jew fejn ikun xieraq, b’mezzi oħra li ma jirriżultawx fil-produzzjoni ta’ dokumenti, informazzjoni, jew materjal ieħor fil-pussess, il-kustodja, jew il-kontroll tal-applikant. Għal dan il-għan, l-NCAs jinħtieġ li jkollhom fis-seħħ sistema li tippermettilhom li jaċċettaw dikjarazzjonijiet ta’ klemenza kemm bil-fomm kif ukoll permezz ta’ mezzi oħra, inkluż f’forma diġitali.

(39)L-applikanti li jkunu applikaw għall-klemenza mal-Kummissjoni Ewropea fir-rigward ta’ allegat kartell sigriet jinħtieġ li jkunu jistgħu jippreżentaw applikazzjonijiet fil-qosor fir-rigward tal-istess kartell lill-NCAs li huma jqisu adegwati. L-NCAs jinħtieġ li jaċċettaw applikazzjonijiet fil-qosor li jkun fihom ġabra minima ta’ informazzjoni fir-rigward tal-allegat kartell u ma jitolbux informazzjoni addizzjonali apparti din il-ġabra minima qabel ma jkun beħsiebhom jieħdu azzjoni dwar il-każ. Madankollu, huwa l-oneru tal-applikanti li jinfurmaw lill-NCAs li lilhom ikunu ssottomettew l-applikazzjonijiet fil-qosor jekk jinbidel il-kamp ta’ applikazzjoni tal-applikazzjoni tagħhom għall-klemenza mal-Kummissjoni. L-NCAs jinħtieġ li jipprovdu lill-applikanti konferma tar-riċevuta li tindika d-data u l-ħin tar-riċevuta, u jinfurmaw lill-applikant jekk ikunux diġà rċevew applikazzjoni fil-qosor jew applikazzjoini għall-klemenza preċedenti fir-rigward tal-istess kartell. Ladarba l-Kummissjoni tkun iddeċidiet li ma tiħux azzjoni dwar każ b’mod sħiħ jew parzjali, l-applikanti jinħtieġ li jkollhom l-opportunità li jissottomettu applikazzjonijiet sħaħ għall-klemenza lill-NCAs li lilhom ikunu ssottomettew applikazzjonijiet fil-qosor.

(40)L-inċertezza legali dwar jekk l-impjegati tal-impriżi humiex protetti minn sanzjonijiet individwali tista’ żomm applikanti potenzjali milli japplikaw għall-klemenza. L-impjegati u d-diretturi attwali u mgħoddija tal-impriżi li japplikaw għall-immunità mill-multi għand l-awtoritajiet tal-kompetizzjoni għalhekk jinħtieġ li jiġu protetti minn kwalunkwe sanzjoni imposta mill-awtoritajiet pubbliċi għall-involviment tagħhom fil-kartell sigriet kopert mill-applikazzjoni. Tali protezzjoni jinħtieġ li tingħata bil-kundizzjoni li l-impjegati u d-diretturi jikkooperaw attivament mal-NCAs ikkonċernati u li l-applikazzjoni għall-immunità ssir qabel il-bidu tal-proċedimenti kriminali.

(41)F’sistema ta’ setgħat paralleli għall-applikazzjoni tal-Artikoli 101 u 102 TFUE, hija meħtieġa kooperazzjoni mill-qrib bejn l-NCAs. B’mod partikolari meta NCA twettaq spezzjoni f’isem NCA oħra skont l-Artikolu 22(1) tar-Regolament tal-Kunsill (KE) Nru 1/2003, jinħtieġ li tkun possibbli l-preżenza u l-assistenza tal-uffiċjali mill-awtorità li tagħmel it-talba, sabiex tiżdied l-effettività ta’ dawn l-ispezzjonijiet billi jiġu pprovduti riżorsi, għarfien u kompetenza teknika addizzjonali.

(42)Bl-istess mod, jinħtieġ li jiġu stabbiliti arranġamenti sabiex l-NCAs jkunu jistgħu jitolbu assistenza reċiproka għan-notifika tal-oġġezzjonijiet u d-deċiżjonijiet preliminari u tal-infurzar tad-deċiżjonijiet li jimponu multi jew ħlasijiet perjodiċi meta l-impriża kkonċernata ma jkollhiex preżenza legali fit-territorju tagħhom. Dan jiżgura l-infurzar effettiv tal-Artikoli 101 u 102 TFUE u jikkontribwixxi għall-funzjonament korrett tas-suq intern.

(43)Sabiex jiġi żgurat l-infurzar effettiv tal-Artikoli 101 u 102 TFUE mill-NCAs, hemm bżonn li jiġu pprovduti regoli effikaċi dwar is-sospensjoni tal-perjodi ta’ limitazzjoni. B’mod partikolari, f’sistema ta’ setgħat paralleli, il-perjodi ta’ limitazzjoni nazzjonali jinħtieġ li jiġu sospiżi għat-tul ta’ żmien tal-proċedimenti quddiem l-NCAs ta’ Stat Membru ieħor jew quddiem il-Kummissjoni. Dan ma jimpedix lill-Istati Membri milli jżommu jew jintroduċu perjodi ta’ limitazzjoni assoluti, bil-kundizzjoni li t-tul ta’ dawn il-perjodi taż-żmien assoluti ma j l-infurzar effettiv tal-Artikoli 101 u 102 TFUE prattikament impossibbli jew diffiċli żżejjed.

(44)Sabiex ikun żgurat li l-każijiet jiġu ttrattati b’mod effiċjenti u effettiv fi ħdan in-Netwerk Ewropew għall-Kompetizzjoni, f’dawk l-Istati Membri fejn awtorità amministrattiva nazzjonali tal-kompetizzjoni jkollha l-kompetenza sabiex tinvestiga ksur tal-Artikoli 101 jew 102 TFUE u awtorità ġudizzjarja nazzjonali tal-kompetizzjoni jkollha l-kompetenza sabiex tadotta deċiżjoni li tikkonstata l-ksur u / jew li timponi l-multa, l-awtoritajiet amministrattivi nazzjonali tal-kompetizzjoni għandhom ikunu jistgħu jressqu direttament l-azzjoni quddiem l-awtorità ġudizzjarja nazzjonali tal-kompetizzjoni. Barra minn hekk, billi l-qrati nazzjonali jaġixxu bħala qrati ta’ rieżami fi proċedimenti mressqa kontra deċiżjonijiet ta’ infurzar ta’ NCAs li japplikaw l-Artikoli 101 jew 102, l-awtoritajiet aministrattivi nazzjonali tal-kompetizzjoni jinħtieġ li bi dritt jipparteċipaw bħala prosekutur, konvenut jew intimat f’dawn il-proċedimenti, u jgawdu l-istess drittijiet ta’ din il-parti f’dawn il-proċedimenti.

(45)Ir-riskju li jiġi divulgat materjal awtoinkriminanti barra l-kuntest tal-investigazzjoni li għall-iskopijiet tagħha jkun ingħata, jista’ jdgħajjef l-inċentivi għall-applikanti potenzjali għall-klemenza sabiex jikkooperaw mal-awtoritajiet tal-kompetizzjoni. Minħabba f’hekk, irrispettivament mill-forma li fiha jiġu ppreżentati d-dikjarazzjonijiet ta’ klemenza, l-informazzjoni fid-dikjarazzjonijiet ta’ klemenza li tinkiseb permezz tal-aċċess għall-fajl jinħtieġ li tintuża biss fejn ikun meħtieġ għall-eżerċitar tad-drittijiet tad-difiża fi proċedimenti quddiem il-qrati tal-Istati Membri f’ċerti każijiet limitati ħafna li jkunu direttament marbuta mal-każ li fih ikun ingħata l-aċċess. Dan ma għandux iżomm lill-awtoritajiet tal-kompetizzjoni milli jippubblikaw id-deċiżjonijiet tagħhom skont id-dritt tal-Unjoni jew nazzjonali applikabbli.

(46)L-evidenza hija element importanti fl-infurzar tal-Artikoli 101 u 102 TFUE. L-NCAs jinħtieġ li jkunu jistgħu jikkunsidraw l-evidenza rilevanti irrispettivament minn jekk din issirx bil-miktub, bil-fomm jew f’forma rrekordjata, inklużi rikordings sigrieti magħmula minn persuni ġuridiċi jew fiżiċi bil-kundizzjoni li dawn ma jkunx l-uniku sors ta’ evidenza. Dan huwa mingħajr preġudizzju għad-dritt li jinstemgħu.

(47)Sabiex issostni kooperazzjoni mill-qrib fin-Netwerk Ewropew għall-Kompetizzjoni, il-Kummissjoni jinħtieġ li żżomm, tiżviluppa, tospita, tħaddem u tappoġġa sistema ċentrali ta’ informazzjoni (is-Sistema tan-Netwerk Ewropew għall-Kompetizzjoni) f’konformità mal-istandards rilevanti dwar il-kunfidenzjalità, il-protezzjoni tad-dejta u s-sigurtà tad-dejta. In-Netwerk Ewropew għall-Kompetizzjoni jiddependi fuq l-interoperabilità għall-funzjonament effettiv u effiċjenti tiegħu. Il-baġit ġenerali tal-Unjoni jinħtieġ li jerfa’ l-ispejjeż tal-manutenzjoni, l-iżvilupp, l-ospitar, l-appoġġ għall-utenti u t-tħaddim tas-sistema ċentrali ta’ informazzjoni kif ukoll spejjeż amministrattivi oħra mġarrba b’rabta mal-funzjonament tan-Netwerk Ewropew għall-Kompetizzjoni, b’mod partikolari l-ispejjeż relatati mal-organizzazzjoni tal-laqgħat. Sal-2020, l-ispejjeż għas-Sistema tan-Netwerk Ewropew għall-Kompetizzjoni huma previsti li jiġu koperti mill-programm dwar soluzzjonijiet ta’ interoperabbiltà u oqfsa komuni għall-amministrazzjonijiet pubbliċi Ewropej (il-program ISA2), suġġetti għad-disponibbiltà tar-riżorsi u għall-kriterji ta’ eleġibbiltà u ta’ prijorità tal-programm.

(48)Billi l-għanijiet ta’ din id-Direttiva, jiġifieri li jiġi żgurat li l-NCAs jkollhom il-garanziji neċessarji ta’ indipendenza u riżorsi u setgħat ta’ infurzar u mmultar sabiex ikunu jistgħu japplikaw b’mod effettiv l-Artikoli 101 u 102 TFUE u d-dritt nazzjonali tal-kompetizzjoni b’mod parallel għall-Artikoli 101 u 102 TFUE, u li jiġi żgurat il-funzjonament effikaċi tas-suq intern u tan-Netwerk Ewropew għall-Kompetizzjoni, ma jistgħux jintlaħqu b’mod suffiċjenti mill-Istati Membri waħedhom, u billi dan l-objettiv minħabba r-rekwiżiti tal-effettività u tal-uniformità meħtieġa fl-applikazzjoni tal-Artikoli 101 u 102 TFUE jista’ jintlaħaq aħjar mill-Unjoni waħedha, b’mod partikolari minħabba l-kamp ta’ applikazzjoni territorjali tiegħu, l-Unjoni tista’ tadotta miżuri skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. Skont il-prinċipju tal-proporzjonalità, kif stabbilit f’dan l-Artikolu, din id-Direttiva ma tmurx lil hinn minn dak li huwa meħtieġ biex jintlaħaq dan il-għan.

(49)Skont id-Dikjarazzjoni Politika Konġunta tat-28 ta’ Settembru 2011 tal-Istati Membri u l-Kummissjoni dwar id-dokumenti ta’ spjegazzjoni, 23 l-Istati Membri impenjaw ruħhom li, f’każijiet ġustifikati, jakkumpanjaw in-notifika tal-miżuri ta’ traspożizzjoni tagħhom b’dokument wieħed jew aktar li jispjegw ir-relazzjoni bejn il-komponenti ta’ direttiva u l-partijiet korrispondenti tal-istrumenti ta’ traspożizzjoni nazzjonali. F’dak li għandu x’jaqsam ma’ din id-Direttiva, il-leġiżlatur iqis li t-trażmissjoni ta’ dawn id-dokumenti hija ġustifikata.

ADOTTAW DIN ID-DIRETTIVA:

KAPITOLU I

SUĠĠETT, KAMP TA’ APPLIKAZZJONI U DEFINIZZJONIJIET

Artikolu 1

Suġġett u kamp ta’ applikazzjoni

1.Din id-Direttiva tistabbilixxi ċerti regoli sabiex ikun żgurat li l-awtoritajiet nazzjonali tal-kompetizzjoni jkollhom il-garanziji meħtieġa ta’ indipendenza u riżorsi u setgħat ta’ infurzar u mmultar sabiex ikunu jistgħu japplikaw b’mod effettiv l-Artikoli 101 u 102 TFUE, sabiex il-kompetizzjoni fis-suq intern ma tiġix imfixkla u l-konsumaturi u l-impriżi ma jitpoġġewx fi żvantaġġ minn liġijiet u miżuri nazzjonali li jimpedixxu lill-awtoritajiet nazzjonali tal-kompetizzjoni milli jkunu inforzaturi effettivi. Il-kamp ta’ applikazzjoni tad-Direttiva jkopri l-applikazzjoni tal-Artikoli 101 u 102 TFUE u d-dispożizzjonijiet tad-dritt nazzjonali tal-kompetizzjoni applikati b’mod parallel mal-Artikoli 101 u 102 TFUE għall-istess każ, bl-eċċezzjoni tal-Artikolu 29(2) li jestendi ruħu wkoll għall-applikazzjoni esklussiva tad-dritt nazzjonali tal-kompetizzjoni.

2.Din id-Direttiva tistabbilixxi ċerti regoli dwar l-assistenza reċiproka sabiex jiġi salvagwardjat l-funzjonament mingħajr problemi tas-suq intern u s-sistema ta’ kooperazzjoni mill-qrib fin-Netwerk Ewropew għall-Kompetizzjoni.

Artikolu 2

Definizzjonijiet

Għall-finijiet ta’ din id-Direttiva, japplikaw id-definizzjonijiet li ġejjin:

(1) “awtorità nazzjonali tal-kompetizzjoni” tfisser awtorità nnominata minn Stat Membru skont l-Artikolu 35 tar-Regolament (KE) Nru 1/2003 li tkun responsabbli għall-applikazzjoni tal-Artikoli 101 u 102 TFUE. L-Istati Membri jistgħu jinnominaw awtorità amministrattiva waħda jew aktar (“awtorità amministrattiva nazzjonali tal-kompetizzjoni”), kif ukoll awtoritajiet ġudizzjarji (“awtorità ġudizzjarja nazzjonali tal-kompetizzjoni”) sabiex iwettqu dawn il-funzjonijiet;

(2) “awtorità tal-kompetizzjoni” tfisser awtorità nazzjonali tal-kompetizzjoni jew il-Kummissjoni jew it-tnejn, skont xi jkun jitlob il-kuntest;

(3) “Netwerk Ewropew għall-Kompetizzjoni” tfisser in-Netwerk ta’ awtoritajiet pubbliċi ffurmat mill-awtoritajiet nazzjonali tal-kompetizzjoni u l-Kummissjoni sabiex jipprovdi forum għad-diskussjoni u l-kooperazzjoni fl-applikazzjoni u l-infurzar tal-Artikoli 101 u 102 TFUE;

(4)“dispożizzjonijiet nazzjonali ekwivalenti” tfisser dispożizzjonijiet tal-liġi nazzjonali li jsegwu prinċipalment l-istess għan bħall-Artikoli 101 u 102 TFUE u li jiġu applikati għall-istess każ u b’mod parallel mal-liġi tal-antitrust tal-Unjoni skont l-Artikolu 3(1) tar-Regolament (KE) Nru 1/2003, bl-eċċezjoni għall-użu tal-informazzjoni meħuda minn dikjarazzjonijiet ta’ klemenza u sottomissjonijiet għas-saldu kif imsemmija fl-Artikolu 29(2), u bl-esklużjoni tad-dispożizzjonijiet tal-liġi nazzjonali li jimponu pieni kriminali fuq persuni fiżiċi.

(5) “qorti nazzjonali” tfisser qorti jew tribunal nazzjonali skont l-Artikolu 267 TFUE;

(6) “qorti ta’ rieżami” tfisser qorti nazzjonali li jkollha s-setgħa bil-mezzi ta’ appell ordinarji li teżamina mill-ġdid id-deċiżjonijiet ta’ awtorità nazzjonali tal-kompetizzjoni jew li teżamina mill-ġdid is-sentenzi li jagħmlu dikjarazzjonijiet dwar dawk id-deċiżjonijiet, irrispettivament minn jekk dik il-qorti jkollhiex hija stess is-setgħa li ssib ksur tad-dritt tal-kompetizzjoni;

(7) “proċedimenti” tfisser il-proċedimenti quddiem awtorità nazzjonali tal-kompetizzjoni għall-applikazzjoni tal-Artikolu 101 jew l-Artikolu 102 TFUE, sakemm dik l-awtorità tkun għalqet dawk il-proċedimenti billi tieħu deċiżjoni msemmija fl-Artikolu 9 jew fl-Artikolu 11 jew tkun ikkonkludiet li ma jkunx hemm raġunijiet għal aktar azzjoni min-naħa tagħha, jew fil-każ tal-Kummissjoni, tfisser proċedimenti quddiemha għall-applikazzjoni tal-Artikolu 101 jew l-Artikolu 102 TFUE sakemm hija tkun għalqet dawn il-proċedimenti billi tieħu deċiżjoni skont l-Artikoli 7, 9 jew 10 tar-Regolament (KE) Nru 1/2003 jew tkun ikkonkludiet li ma jkunx hemm raġunijiet għal aktar azzjoni min-naħa tagħha;

(8) “impriża” kif imsemmija fl-Artikoli 101 u 102 TFUE, tfisser kwalunkwe entità involuta f’attività kummerċjali, irrispettivament mill-istatus legali tagħha jew il-mod li bih tkun iffinanzjata skont il-ġurisprudenza tal-Qorti tal-Ġustizzja tal-Unjoni Ewropea;

(9) “kartell sigriet” tfisser ftehim u / jew prattika miftiehma bejn żewġ kompetituri jew iktar bl-iskop li jikkoordinaw l-imġiba kompetittiva tagħhom fis-suq u / jew li jinfluwenzaw il-parametri rilevanti tal-kompetizzjoni permezz ta’ prattiki bħall-iffissar tal-prezzijiet tax-xiri jew tal-bejgħ jew kundizzjonijiet oħra tal-kummerċ, l-allokazzjoni ta’ kwoti ta’ produzzjoni jew bejgħ, il-kondiviżjoni tas-swieq inkluż l-immanuvrar tal-offerti, ir-restrizzjonijiet fuq l-importazzjoni jew l-esportazzjoni u / jew azzjonijiet antikompetittivi kontra kompetituri oħra, li ma jkunux, parzjalment jew kompletament, magħrufa ħlief għall-parteċipanti;

(10) “immunità mill-multi” tfisser li ma tiġi imposta l-ebda multa fuq impriża għall-parteċipazzjoni tagħha f’kartell sigriet, bħala kumpens għall-kooperazzjoni tagħha ma’ awtorità tal-kompetizzjoni fil-qafas ta’ programm ta’ klemenza;

(11) “tnaqqis tal-multi” tfisser li tiġi imposta multa mnaqqsa meta mqabbla mal-multi li kieku jiġu imposti fuq impriża għall-parteċipazzjoni tagħha f’kartell sigriet, bħala kumpens għall-kooperazzjoni tagħha ma’ awtorità tal-kompetizzjoni fil-qafas ta’ programm ta’ klemenza;

(12) “klemenza” tfisser kemm immunità mill-multi kif ukoll tnaqqis tal-multi;

(13) “programm ta’ klemenza” tfisser programm li jikkonċerna l-applikazzjoni tal-Artikolu 101 TFUE jew tad-dritt nazzjonali tal-kompetizzjoni li abbażi tiegħu parteċipant f’kartell sigriet, b’mod indipendenti mill-impriżi l-oħra involuti fil-kartell, jikkoopera ma’ investigazzjoni tal-awtorità tal-kompetizzjoni, billi b’mod volontarju l-parteċipant jippreżenta l-għarfien tiegħu dwar il-kartell u r-rwol tiegħu fih, u ta’ dan il-parteċipant jirċievi, permezz ta’ deċiżjoni jew permezz tat-twaqqif tal-proċedimenti, l-immunità mill-multi li għandhom jiġu imposti għall-involviment tiegħu fil-kartell jew it-tnaqqis tat-tali multi;

(14) “dikjarazzjoni ta’ klemenza” tfisser preżentazzjoni bil-fomm jew bil-miktub ipprovduta b’mod volontarju minn, jew f’isem, impriża jew persuna fiżika lil awtorità tal-kompetizzjoni, jew rekord tagħha, li tiddeskrivi l-għarfien ta’ dik l-impriża jew tal-persuna fiżika dwar kartell sigriet u r-rwol tagħha fih, li tkun tfasslet speċifikament biex tiġi ppreżentata lill-awtorità tal-kompetizzjoni bil-għan li tinkiseb immunità jew tnaqqis tal-multi permezz ta’ programm ta’ klemenza, li ma tinkludix informazzjoni preeżistenti; 

(15) “informazzjoni preeżistenti” tfisser evidenza li tkun teżisti irrispettivament mill-proċedimenti ta’ awtorità tal-kompetizzjoni, irrispettivament minn jekk tali informazzjoni tkunx tinsab jew le fil-fajl ta’ awtorità tal-kompetizzjoni;

(16) “sottomissjoni ta’ saldu” tfisser preżentazzjoni volontarja minn, jew f’isem, impriża lil awtorità tal-kompetizzjoni li tiddeskrivi r-rikonoxximent tal-impriża jew ir-rinunzja tagħha għal tilwima dwar is-sehem tagħha fi ksur tal-Artikolu 101 TFUE jew tad-dritt nazzjonali tal-kompetizzjoni u r-responsabbiltà tagħha għal dan il-ksur, li tkun tfasslet speċifikament sabiex tippermetti li l-awtorità tal-kompetizzjoni tapplika proċedura simplifikata jew proċedura mħaffa;

(17) “applikant” tfisser impriża li tapplika għall-immunità jew għal tnaqqis fil-multi taħt il-programm ta’ klemenza; 

(18) “awtorità applikanti” tfisser awtorità nazzjonali tal-kompetizzjoni li tagħmel talba għall-assistenza reċiproka kif imsemmija fl-Artikoli 23, 24 jew 25;

(19) “awtorità li ssirilha t-talba” tfisser awtorità nazzjonali tal-kompetizzjoni li tirċievi talba għall-assistenza reċiproka u fil-każ ta’ talba għall-assistenza msemmija fl-Artikoli 24 u 25 tista’ tfisser l-uffiċċju pubbliku, l-awtorità jew id-dipartiment kompetenti li jkollu r-responsabbiltà prinċipali għall-infurzar ta’ tali deċiżjonijiet skont il-liġijiet, ir-regolamenti u l-prattika amministrattiva nazzjonali.

Ir-referenzi kollha għal applikazzjoni u għall-ksur tal-Artikoli 101 u 102 TFUE għandhom jinftiehmu bħala li jinkludu l-applikazzjoni parallela tad-dispożizzjonijiet tad-dritt nazzjonali tal-kompetizzjoni għall-istess każ.

KAPITOLU II

DRITTIJIET FUNDAMENTALI

Artikolu 3

Salvagwardji

L-eżerċizzju tas-setgħat imsemmija f’din id-Direttiva mill-awtoritajiet nazzjonali tal-kompetizzjoni għandu jkun soġġett għas-salvagwardji xierqa, inkluż li jiġu rrispettati d-drittijiet tad-difiża tal-impriżi u d-dritt għal rimedju effettiv quddiem tribunal, skont il-prinċipji ġenerali tad-dritt tal-Unjoni u l-Karta tad-Drittijiet Fundamentali tal-Unjoni Ewropea.

KAPITOLU III

INDIPENDENZA U RIŻORSI

Artikolu 4

Indipendenza

1.Sabiex tiġi garantita l-indipendenza tal-awtoritajiet amministrattivi nazzjonali tal-kompetizzjoni meta japplikaw l-Artikoli 101 u 102 TFUE, l-Istati Membri għandhom jiżguraw li huma jwettqu d-dmirijiet tagħhom u jeżerċitaw is-setgħat tagħhom b’mod imparzjali u fl-interessi tal-infurzar effettiv u uniformi ta’ dawn id-dispożizzjonijiet, soġġetti għal rekwiżiti proporzjonati tal-obbligu tar-rendikont u mingħajr ma jippreġudikaw il-kooperazzjoni mill-qrib bejn l-awtoritajiet tal-kompetizzjoni fin-Netwerk Ewropew għall-Kompetizzjoni.

2.B’mod partikolari, l-Istati Membri għandhom jiżguraw li:

a) Il-persunal u l-membri tal-korp deċiżjonali tal-awtoritajiet amministrattivi nazzjonali tal-kompetizzjoni jkunu jistgħu jwettqu d-dmirijiet tagħhom u jeżerċitaw is-setgħat tagħhom għall-applikazzjoni tal-Artikoli 101 u 102 TFUE b’mod indipendenti minn influwenza politika u kwalunkwe influwenza esterna oħra;

b) Il-persunal u l-membri tal-korp deċiżjonali tal-awtoritajiet amministrattivi nazzjonali tal-kompetizzjoni ma jistgħux ifittxu jew jieħdu struzzjonijiet mingħand l-ebda entità governattiva jew entità pubblika jew privata oħra meta jkunu qegħdin iwettqu d-dmirijiet tagħhom u jeżerċitaw is-setgħat tagħhom għall-applikazzjoni tal-Artikoli 101 u 102 TFUE;

c) Il-persunal u l-membri tal-korp deċiżjonali tal-awtoritajiet amministrattivi nazzjonali tal-kompetizzjoni joqogħdu lura minn kwalunkwe azzjoni li ma tkunx kompatibbli mat-twettiq tad-dmirijiet tagħhom u l-eżerċizzju tas-setgħat tagħhom għall-applikazzjoni tal-Artikoli 101 u 102 TFUE;

d) Il-membri tal-korp deċiżjonali tal-awtoritajiet amministrattivi nazzjonali tal-kompetizzjoni jkunu jistgħu jitneħħew biss jekk ma jibqgħux jissodisfaw il-kundizzjonijiet meħtieġa għat-twettiq tad-dmirijiet tagħhom jew ikunu nstabu ħatja ta’ mġiba ħażina serja skont il-liġi nazzjonali. Ir-raġunijiet għat-tkeċċija jinħtieġ li jiġu stabbiliti minn qabel fil-liġi nazzjonali. Huma ma għandhomx jitneħħew għal raġunijiet relatati mat-twettiq tajjeb tad-dmirijiet tagħhom u l-eżerċizzju tas-setgħat tagħhom fl-applikazzjoni tal-Artikoli 101 u 102 TFUE kif definiti fl-Artikolu 5(2);

e) L-awtoritajiet amministrattivi nazzjonali tal-kompetizzjoni jkollhom is-setgħa li jistabbilixxu l-prijoritajiet tagħhom għat-twettiq tal-kompiti għall-applikazzjoni tal-Artikoli 101 u 102 TFUE kif definiti fl-Artikolu 5(2). Billi l-awtoritajiet amministrattivi nazzjonali tal-kompetizzjoni huma obbligati jikkunsidraw l-ilmenti li jiġu ppreżentati b’mod formali, dan għandu jinkludi li dawn l-awtoritajiet ikollhom is-setgħa li jirrifjutaw tali lmenti għar-raġuni li ma jqisuhomx bħala prijorità. Dan huwa mingħajr preġudizzju għas-setgħa tal-awtoritajiet nazzjonali tal-kompetizzjoni li jirrifjutaw ilmenti għal raġunijiet oħra definiti mil-liġi nazzjonali.

Artikolu 5

Riżorsi

1.L-Istati Membri għandhom jiżguraw li l-awtoritajiet nazzjonali tal-kompetizzjoni jkollhom ir-riżorsi umani, finanzjarji u tekniċi neċessarji għat-twettiq b’mod effettiv tad-dmirijiet tagħhom u għall-eżerċitar tas-setgħat tagħhom meta japplikaw l-Artikoli 101 u 102 TFUE kif definit fil-paragrafu 2.

2.L-applikazzjoni tal-Artikoli 101 u 102 TFUE mill-awtoritajiet nazzjonali tal-kompetizzjoni għandha tinkludi: it-twettiq ta’ investigazzjonijiet sabiex jiġu applikati l-Artikoli 101 u 102 TFUE; it-teħid ta’ deċiżjonijiet li japplikaw dawn id-dispożizzjonijiet fuq il-bażi tal-Artikolu 5 tar-Regolament 1/2003; u l-kooperazzjoni mill-qrib fin-Netwerk Ewropew għall-Kompetizzjoni bil-għan li tiġi żgurata l-applikazzjoni effettiva u uniformi tal-Artikoli 101 u 102 TFUE.

KAPITOLU IV

SETGĦAT

Artikolu 6

Is-setgħa li l-bini tan-negozju jiġi spezzjonat

1.L-Istati Membri għandhom jiżguraw li l-awtoritajiet amministrattivi nazzjonali tal-kompetizzjoni jkunu jistgħu jwettqu l-ispezzjonijiet għal għarrieda meħtieġa tal-impriżi u tal-assoċjazzjonijiet ta’ impriżi għall-applikazzjoni tal-Artikoli 101 u 102 TFUE. L-Istati Membri għandhom jiżguraw li l-uffiċjali u persuni oħra li jakkumpanjawhom, awtorizzati mill-awtoritajiet nazzjonali tal-kompetizzjoni sabiex iwettqu spezzjoni, ikollhom mill-anqas is-setgħa:

a) li jidħlu fi kwalunkwe bini, biċċa art u f'mezzi tat-trasport tal-impriżi u tal-assoċjazzjonijiet ta’ impriżi;

b) li jeżaminaw il-kotba u reġistri oħra relatati man-negozju irrispettivament mill-mezz li fuqu jkunu maħżuna, inkluż id-dritt li jaċċessaw informazzjoni li tkun aċċessibbli għall-entità soġġetta għall-ispezzjoni;

c) li jieħdu jew jiksbu fi kwalunkwe forma kopji jew siltiet minn dawn il-kotba jew ir-reġistri u meta jħossu l-bżonn, li jkomplu jagħmlu tfittxijiet għal dawn il-kopji jew is-siltiet fil-bini tagħhom jew f’postijiet oħra indikati;

d) li jissiġillaw kwalunkwe proprjetà fejn isir in-negozju kif ukoll kotba jew reġistri għal tul l-ispezzjoni u kemm ikun meħtieġ għaliha.

e) li jistaqsu lil kwalunkwe rappreżentant jew membru tal-persunal tal-impriża jew tal-assoċjazzjoni ta’ impriżi għal spjegazzjonijiet dwar fatti jew dokumenti li għandhom x'jaqsmu mas-suġġett u mal-għan tal-ispezzjoni u biex jirreġistraw it-tweġibiet.

2.L-Istati Membri għandhom jiżguraw li l-impriżi u l-assoċjazzjonijiet ta’ impriżi jkunu meħtieġa joqogħdu għall-ispezzjonijiet imwettqa mill-awtoritajiet amministrattivi nazzjonali tal-kompetizzjoni. Meta impriża jew assoċjazzjoni ta’ impriżi topponi spezzjoni ordnata minn awtorità amministrattiva nazzjonali tal-kompetizzjoni jew awtorizzata minn awtorità ġudizzjarja nazzjonali, l-awtoritajiet nazzjonali tal-kompetizzjoni jistgħu jiksbu l-assistenza neċessarja tal-pulizija jew ta’ aġenzija ekwivalenti tal-infurzar sabiex ikunu jistgħu jwettqu l-ispezzjoni. Assistenza bħal din tista’ tinkiseb ukoll bħala miżura ta’ prekawzjoni.

Artikolu 7

Is-setgħa li jispezzjonaw bini ieħor

1.L-Istati Membri għandhom jiżguraw li jekk ikun jeżisti suspett raġonevoli li kotba jew reġistri oħra relatati man-negozju u mas-suġġett tal-ispezzjoni, li jistgħu jkunu rilevanti sabiex jiġi ppruvat ksur serju tal-Artikolu 101 jew tal-Artikolu 102 TFUE, ikunu qegħdin jinżammu fi kwalunkwe bini, għajr dawk imsemmija fl-Artikolu 6, biċċa art jew f'mezzi tat-trasport, inklużi d-djar ta’ diretturi, maniġers, u membri oħra tal-persunal tal-impriżi u tal-assoċjazzjonijiet ta’ impriżi, l-awtoritajiet amministrattivi nazzjonali tal-kompetizzjoni jkunu jistgħu jwettqu spezzjonijiet għal għarrieda fit-tali bini, biċċa art u f'mezzi tat-trasport.

2.Spezzjonijiet bħal dawn ma jistgħux jitwettqu mingħajr l-awtorizzazzjoni minn qabel ta’ awtorità ġudizzjarja nazzjonali.

3.L-Istati Membri għandhom jiżguraw li l-uffiċjali u persuni oħra li jakkumpanjawhom, awtorizzati mill-qrati nazzjonali sabiex iwettqu spezzjoni skont il-paragrafu 1 ta’ dan l-Artikolu, ikollhom mill-anqas is-setgħat stabbiliti fl-Artikolu 6(1)(a)(b) u (c) u fl-Artikolu 6(2).

Artikolu 8

Talbiet għall-informazzjoni

L-Istati Membri għandhom jiżguraw li l-awtoritajiet amministrattivi nazzjonali tal-kompetizzjoni jkunu jistgħu, permezz ta’ deċiżjoni, jitolbu lill-impriżi u lill-assoċjazzjonijiet ta’ impriżi jipprovdu l-informazzjoni kollha neċessarja għall-applikazzjoni tal-Artikoli 101 u 102 TFUE fi żmien speċifikat. Dan l-obbligu għandu jkopri l-informazzjoni li tkun aċċessibbli għall-impriża u għall-assoċjazzjoni ta’ impriżi.

Artikolu 9

Konstatazzjoni u terminazzjoni tal-ksur

L-Istati Membri għandhom jiżguraw li fejn l-awtoritajiet nazzjonali tal-kompetizzjoni jsibu li jkun hemm ksur tal-Artikolu 101 jew 102 TFUE, dawn ikunu jistgħu permezz ta’ deċiżjoni jitolbu lill-impriżi u lill-assoċjazzjonijiet ta’ impriżi kkonċernati sabiex itemmu dak il-ksur. Għal dan il-għan, huma jistgħu jimponu kwalunkwe rimedju fl-aġir jew strutturali li jkun proporzjonat għall-ksur imwettaq u neċessarju sabiex itemm effettivament il-ksur.

Artikolu 10

Miżuri interim

L-Istati Membri għandhom jiżguraw li l-awtoritajiet amministrattivi nazzjonali tal-kompetizzjoni li jkunu qegħdin jaġixxu fuq inizjattiva proprja tagħhom ikunu jistgħu permezz ta’ deċiżjoni jordnaw l-impożizzjoni ta’ miżuri interim fuq l-impriżi, tal-anqas f’każijiet fejn ikun hemm urġenza minħabba r-riskju ta’ ħsara serja u irreparabbli għall-kompetizzjoni u abbażi ta’ konstatazzjoni prima facie ta’ ksur tal-Artikolu 101 jew tal-Artikolu 102 TFUE. Deċiżjoni bħal din għandha tapplika għal perjodu ta’ żmien speċifiku u tista’ tiġi mġedda sakemm dan ikun meħtieġ u xieraq.

Artikolu 11

Impenji

L-Istati Membri għandhom jiżguraw li fi proċedimenti mibdija rigward deċiżjoni li titlob it-temma tal-ksur tal-Artikolu 101 jew tal-Artikolu 102 TFUE, l-awtoritajiet nazzjonali tal-kompetizzjoni jkunu jistgħu permezz ta’ deċiżjoni jrendu l-impenji vinkolanti offruti mill-impriżi tajbin biex jindirizzaw it-tħassib espress minn dawn l-awtoritajiet. Deċiżjoni bħal din tista’ tiġi adottata għal perjodu speċifikat u għandha tikkonkludi li ma jkunx hemm aktar raġunijiet għal azzjoni mill-awtorità nazzjonali tal-kompetizzjoni kkonċernata.

KAPITOLU V

MULTI U ĦLASIJIET PERJODIĊI TA' PENALI

Artikolu 12

Multi fuq l-impriżi u l-assoċjazzjonijiet ta’ impriżi

1.Mingħajr preġudizzju għal-liġijiet nazzjonali tal-Istati Membri li jipprevedu l-impożizzjoni ta’ sanzjonijiet fi proċedimenti ġudizzjarji kriminali, l-Istati Membri għandhom jiżguraw li l-awtoritajiet amministrattivi nazzjonali tal-kompetizzjoni jkunu jistgħu jew jimponu permezz ta’ deċiżjoni fi proċedimenti amministrattivi, jew, jitolbu fi proċedimenti ġudizzjarji mhux kriminali, l-impożizzjoni ta’ multi pekunjarji effikaċi, proporzjonati u ta’ deterrent fuq impriżi jew assoċjazzjonijiet ta’ impriżi meta, b’intenzjoni jew b’negliġenza, dawn jiksru l-Artikoli 101 jew 102 TFUE.

2.Mingħajr preġudizzju għal-liġijiet nazzjonali tal-Istati Membri li jipprevedu l-impożizzjoni ta’ sanzjonijiet fi proċedimenti ġudizzjarji kriminali, l-Istati Membri għandhom jiżguraw li l-awtoritajiet amministrattivi nazzjonali tal-kompetizzjoni jkunu jistgħu jew jimponu permezz ta’ deċiżjoni fi proċedimenti amministrattivi, jew, jitolbu fi proċedimenti ġudizzjarji mhux kriminali, l-impożizzjoni ta’ multi pekunjarji effettivi, proporzjonati u ta' deterrent fuq impriżi jew assoċjazzjonijiet ta’ impriżi, li jiġu ddeterminati b’mod proporzjonali għall-fatturat totali tagħhom, meta b’intenzjoni jew b’negliġenza:

a)huma jonqsu milli jikkonformaw mal-ispezzjoni msemmija fl-Artikolu 6(2);

b)ikunu nkisru s-siġilli mwaħħla mill-uffiċjali jew persuni oħra li jakkumpanjawhom awtorizzati mill-awtoritajiet nazzjonali tal-kompetizzjoni kif imsemmija fl-Artikolu 6(1)(d);

c)għal mistoqsija msemmija fl-Artikolu 6(1)(e), huma jagħtu tweġiba mhux korretta jew qarrieqa, jonqsu milli jipprovdu jew jirrifjutaw milli jipprovdu tweġiba sħiħa jew jonqsu milli jirrettifikaw, f’perjodu ta’ żmien stabbilit mill-awtorità nazzjonali tal-kompetizzjoni, tweġiba mhux korretta, qarrieqa jew mhux kompluta mogħtija minn membru tal-persunal;

d)huma jagħtu informazzjoni żbaljata, mhux kompluta jew qarrieqa bi tweġiba għal talba magħmula permezz ta’ deċiżjoni msemmija fl-Artikolu 8 jew ma jipprovdux l-informazzjoni fil-limitu ta’ żmien speċifikat;

e)huma jonqsu milli jikkonformaw ma’ deċiżjoni msemmija fl-Artikoli 10 u 11.

3.L-Istati Membri għandhom jiżguraw li l-kunċett ta’ impriża jiġi applikat għall-iskop tal-impożizzjoni ta’ multi fuq il-kumpaniji prinċipali u s-suċċessuri legali u ekonomiċi tal-impriżi.

Artikolu 13

Kalkolu tal-multi

1.L-Istati Membri għandhom jiżguraw li meta l-awtoritajiet nazzjonali tal-kompetizzjoni jistabbilixxu l-ammont tal-multa għal ksur tal-Artikolu 101 jew tal-Artikolu 102 TFUE, huma jikkunsidraw kemm il-gravità kif ukoll it-tul ta’ żmien tal-ksur.

2.L-Istati Membri għandhom jiżguraw li, meta tiġi imposta multa fuq assoċjazzjoni ta’ impriżi, filwaqt li jitqies il-fatturat tal-membri tagħha u li l-assoċjazzjoni ma tkunx solventi, l-assoċjazzjoni tkun obbligata ssejjaħ għal kontribuzzjonijiet mill-membri tagħha biex tkopri l-ammont tal-multa.

Fejn ikun neċessarju sabiex jiġi żgurat il-pagament sħiħ tal-multa, l-Istati Membri għandhom jiżguraw li l-awtoritajiet nazzjonali tal-kompetizzjoni jkunu intitolati li jitolbu l-ħlas tal-ammont pendenti tal-multa minn kwalunkwe waħda mill-impriżi li r-rappreżentanti tagħha kienu membri tal-korpi deċiżjonali tal-assoċjazzjoni. Safejn ikun għadu neċessarju, l-awtoritajiet nazzjonali tal-kompetizzjoni għandhom ikunu intitolati wkoll li jitolbu l-pagament tal-ammont pendenti tal-multa minn kwalunkwe wieħed mill-membri tal-assoċjazzjoni li kien attiv fis-suq li fih ikun seħħ il-ksur. Madankollu, ma għandux ikun meħtieġ ħlas mingħand dawk il-membri tal-assoċjazzjoni li ma jkunux wettqu l-ksur u, jew ma kinux jafu bih jew kienu ddistanzjaw attivament irwieħhom minnu qabel bdiet l-investigazzjoni.

Artikolu 14

Ammont massimu tal-multa

1.L-Istati Membri għandhom jiżguraw li l-ammont massimu tal-multa li awtorità nazzjonali tal-kompetizzjoni tista’ timponi fuq kull impriża jew assoċjazzjoni ta’ impriżi li tipparteċipa fi ksur tal-Artikoli 101 jew 102 TFUE ma għandux jiġi stabbilit għal livell taħt l-10 % tal-fatturat totali tagħha madwar id-dinja kollha fis-sena kontabilistika ta’ qabel id-deċiżjoni.

2.Meta ksur minn assoċjazzjoni ta’ impriżi jkun jirrigwarda l-attivitajiet tal-membri tagħha, l-ammont massimu tal-multa ma għandux jiġi stabbilit għal livel taħt l-10 % tas-somma tal-fatturat totali fid-dinja kollha, ta’ kull membru attiv fis-suq affettwat mill-ksur tal-assoċjazzjoni. Madankollu, ir-responsabbiltà finanzjarja ta’ kull impriża fir-rigward tal-ħlas tal-multa ma għandhiex taqbeż l-ammont massimu stabbilit skont il-paragrafu 1.

Artikolu 15

Ħlasijiet perjodiċi ta’ penali

L-Istati Membri għandhom jiżguraw li l-awtoritajiet amministrattivi nazzjonali tal-kompetizzjoni jkunu jistgħu, permezz ta’ deċiżjoni, jimponu ħlasijiet ta’ penali perjodiċi effettivi, proporzjonati u ta' deterrent fuq l-impriżi u l-assoċjazzjonijiet ta’ impriżi, li jiġu stabbiliti b’mod proporzjonali għall-fatturat totali tagħhom ta’ kuljum sabiex iġegħluhom:

a)joqogħdu għall-ispezzjoni msemmija fl-Artikolu 6(2),

b) jipprovdu informazzjoni sħiħa u korretta kif imsemmija fl-Artikolu 8,

c) jikkonformaw ma’ deċiżjoni msemmija fl-Artikoli 9, 10 u 11.

KAPITOLU VI

KLEMENZA

Artikolu 16

Immunità mill-multi

1.L-Istati Membri għandhom jiżguraw li l-awtoritajiet nazzjonali tal-kompetizzjoni jkollhom fis-seħħ programmi ta’ klemenza li jippermettulhom li jagħtu immunità mill-multi lill-impriżi.

2.L-Istati Membri għandhom jiżguraw li l-immunità tkun tista’ tingħata biss jekk l-impriża

a)tissodisfa l-kundizzjonijiet stipulati fl-Artikolu 18;

b)tiżvela l-parteċipazzjoni tagħha f’kartell sigriet; u

c)tkun l-ewwel li tissottometti evidenza li:

i.fil-ħin li l-awtorità nazzjonali tal-kompetizzjoni tirċievi l-applikazzjoni, din tippermettilha twettaq spezzjoni mmirata b’rabta mal-kartell sigriet, dment li l-awtorità nazzjonali tal-kompetizzjoni ma kellhiex diġà fil-pussess tagħha evidenza biex twettaq spezzjoni b’rabta mal-kartell sigriet jew ma kinitx diġà wettqet tali spezzjoni; jew inkella

ii.fil-fehma tal-awtorità nazzjonali tal-kompetizzjoni, tippermetti l-konstatazzjoni ta’ ksur tad-dritt tal-kompetizzjoni, bil-kundizzjoni li l-awtorità nazzjonali tal-kompetizzjoni ma jkollhiex diġà fil-pussess tagħha evidenza biex issib tali ksur u li l-ebda impriża oħra ma tkun ikkwalifikat qabel għall-immunità skont il-paragrafu 2(c)(i) fir-rigward tal-istess kartell.

3.L-Istati Membri għandhom jiżguraw li l-impriżi kollha huma eliġibbli għall-immunità mill-multi, bl-eċċezzjoni tal-impriżi li jkunu ħadu passi sabiex iġiegħlu impriżi oħra jipparteċipaw f’kartell sigriet.

Artikolu 17

Tnaqqis tal-multi

1.L-Istati Membri għandhom jiżguraw li l-awtoritajiet nazzjonali tal-kompetizzjoni jkollhom fis-seħħ programmi ta’ klemenza li jippermettulhom li jagħtu tnaqqis tal-multi lill-impriżi li ma jikkwalifikawx għall-immunità.

2.L-Istati Membri għandhom jiżguraw li tnaqqis tal-multi jingħata biss jekk jiġu ssodisfati l-kundizzjonijiet stabbiliti fl-Artikolu 18 u l-applikant jikxef il-parteċipazzjoni tiegħu f’kartell sigriet u jipprovdi lill-awtorità nazzjonali tal-kompetizzjoni b’evidenza tal-allegat kartell sigriet li tkun tirrappreżenta valur miżjud sinifikanti sabiex jiġi ppruvat il-ksur tal-Artikolu 101 TFUE jew ta’ dispożizzjoni korrispondenti skont il-liġi nazzjonali, meta mqabbla mal-evidenza li diġà jkollha l-awtorità nazzjonali tal-kompetizzjoni fiż-żmien tal-applikazzjoni.

3.L-Istati Membri għandhom jiżguraw li l-awtoritajiet nazzjonali tal-kompetizzjoni jkunu jistgħu jagħtu tnaqqis addizzjonali tal-multi jekk l-applikant jissottometti evidenza li l-awtorità nazzjonali tal-kompetizzjoni tuża, mingħajr il-ħtieġa ta’ aktar korroborazzjoni, sabiex tipprova fatti addizzjonali li jwasslu għal żieda fil-multi meta mqabbel mal-multi li kieku kienu jiġu imposti fuq il-parteċipanti fil-kartell sigriet. It-tnaqqis tal-multi għall-applikant għandu jkun proporzjonat ma’ din iż-żieda fil-multi.

Artikolu 18

Kundizzjonijiet ġenerali għall-klemenza

L-Istati Membri għandhom jiżguraw li, sabiex jikkwalifika għall-klemenza, l-applikant irid jissodisfa l-kundizzjonijiet kumulattivi li ġejjin:

a)ikun temm l-involviment tiegħu fl-allegat kartell sigriet immedjatament wara l-applikazzjoni tiegħu, ħlief għal dak li, fil-fehma tal-awtorità nazzjonali tal-kompetizzjoni kompetenti, ikun raġonevolment neċessarju sabiex tiġi ppreservata l-integrità tal-investigazzjoni tiegħu;

b)huwa jikkoopera ġenwinament, b’mod sħiħ, fuq bażi kontinwa u mingħajr dewmien mal-awtorità nazzjonali tal-kompetizzjoni mill-mument tal-applikazzjoni tiegħu sakemm l-awtorità tkun għalqet il-proċedimenti tagħha kontra l-partijiet kollha taħt investigazzjoni billi tadotta deċiżjoni jew tkun temmet b’mod ieħor il-proċedimenti tagħha. Dan jinkludi:

i.li jipprovdi mingħajr dewmien lill-awtorità nazzjonali tal-kompetizzjoni l-informazzjoni u l-evidenza kollha rilevanti fir-rigward tal-allegat kartell sigriet li tiġi fil-pussess tiegħu jew li tkun għad-dispożizzjoni tiegħu;

ii.li jibqa’ disponibbli għall-awtorità nazzjonali tal-kompetizzjoni sabiex iwieġeb għal kwalunkwe rikjesta li tista’ tikkontribwixxi għall-istabbiliment tal-fatti;

iii.li jagħmel lill-impjegati u lid-diretturi preżenti (u, jekk ikun possibbli, ta’ qabel) disponibbli għall-intervisti mal-awtorità nazzjonali tal-kompetizzjoni;

iv.li ma jeqridx, jiffalsifika jew jaħbi informazzjoni jew evidenza rilevanti; u

v.li ma jiżvelax il-fatti tal-applikazzjoni jew l-ebda kontenut tal-applikazzjoni tiegħu qabel ma l-awtorità nazzjonali tal-kompetizzjoni tkun ħarġet l-oġġezzjonijiet għall-proċedimenti quddiemha, sakemm ma jkunx miftiehem mod ieħor; u

c)meta jkun qiegħed jikkunsidra li jagħmel applikazzjoni lill-awtorità nazzjonali tal-kompetizzjoni huwa ma jridx ikun:

i.qered, iffalsifika jew ħeba evidenza tal-allegat kartell sigriet; jew

ii.żvela l-fatti jew xi kontenut tal-applikazzjoni kkontemplata tiegħu, ħlief lil awtoritajiet oħra tal-kompetizzjoni.

Artikolu 19

Forma tal-applikazzjonijiet għall-klemenza

L-Istati Membri għandhom jiżguraw li l-applikanti jkunu jistgħu japplikaw għall-klemenza bil-miktub u li l-awtoritajiet nazzjonali tal-kompetizzjoni jkollhom fis-seħħ sistema li tippermettilhom li jaċċettaw dikjarazzjonijiet ta’ klemenza kemm bil-fomm kif ukoll b’mezzi oħra li ma jirriżultawx fil-preżentazzjoni ta’ dokumenti, informazzjoni jew materjali oħra fil-pussess, kustodja jew kontroll tal-applikant.

Artikolu 20

Indikatur għal applikazzjoni formali għall-immunità

1.L-Istati Membri għandhom jiżguraw li impriża li tkun tixtieq tapplika għall-immunità tkun tista’ inizjalment tapplika għal indikatur għand l-awtoritajiet nazzjonali tal-kompetizzjoni. L-indikatur jagħti lill-applikant post fil-lista għal perjodu li għandu jiġi speċifikat fuq bażi ta’ każ b’każ mill-awtorità nazzjonali tal-kompetizzjoni li tirċievi l-applikazzjoni għal indikatur. Dan jippermetti lill-applikant biex jiġbor l-informazzjoni u l-evidenza neċessarji sabiex jissodisfa l-livell limitu ta' evidenza rilevanti għall-immunità.

2.L-Istati Membri għandhom jiżguraw li l-awtoritajiet nazzjonali tal-kompetizzjoni jkollhom id-diskrezzjoni jekk jagħtux indikatur jew le.

3.L-Istati Membri għandhom jiżguraw li jekk l-applikant jipperfezzjona l-indikatur fil-perjodu speċifikat, l-informazzjoni u l-evidenza mogħtija jitqiesu li ġew ippreżentati fiż-żmien li ngħata l-indikatur.

Artikolu 21

Applikazzjonijiet fil-qosor

1.L-Istati Membri għandhom jiżguraw li l-applikanti li jkunu applikaw għall-klemenza, jew billi applikaw għal indikatur jew billi ssottomettew applikazzjoni sħiħa mal-Kummissjoni fir-rigward ta’ allegat kartell sigriet, ikunu jistgħu jippreżentaw applikazzjonijiet fil-qosor fir-rigward tal-istess kartell mal-awtoritajiet nazzjonali tal-kompetizzjoni, li l-applikant iqis li jkunu f’pożizzjoni tajba biex jittrattaw il-każ.

2.L-Istati Membri għandhom jiżguraw li l-awtoritajiet nazzjonali tal-kompetizzjoni jaċċettaw applikazzjonijiet fil-qosor bil-kundizzjoni li dawn ikunu f’waħda mill-forom stipulati fl-Artikolu 19, ikollhom l-istess kamp ta’ applikazzjoni tal-prodott, ġeografiku u ta' tul ta' żmien bħall-applikazzjoni għall-klemenza ppreżentata lill-Kummissjoni, u jinkludu deskrizzjoni qasira ta’ dawn li ġejjin, meta dawn ikunu magħrufa mill-applikant fil-ħin tas-sottomissjoni:

a)l-isem u l-indirizz tal-applikant;

b)il-partijiet l-oħra fl-allegat kartell sigriet;

c)il-prodott(i) affettwat(i)

d)it-territorju/i affettwat(i);

e)it-tul ta’ żmien;

f)in-natura tal-aġir tal-allegat kartell;

g)l-Istat Membru jew l-Istati Membri fejn x’aktarx tkun tinsab l-evidenza; u

h)informazzjoni dwar applikazzjonijiet oħra possibbli għall-klemenza, imgħoddija jew futuri, tal-applikant, fir-rigward tal-allegat kartell sigriet.

3.L-Istati Membri għandhom jiżguraw li l-awtoritajiet nazzjonali tal-kompetizzjoni joqogħdu lura milli jitolbu lill-applikant xi informazzjoni relatata mal-allegat ksur kopert mill-applikazzjoni fil-qosor li mhix fil-punti stabbiliti fil-paragrafu 2, qabel ma jitolbu li tiġi ppreżentata applikazzjoni sħiħa skont il-paragrafu 6.

4.L-Istati Membri għandhom jiżguraw li l-awtoritajiet nazzjonali tal-kompetizzjoni li jirċievu applikazzjoni fil-qosor jagħtu lill-applikant konferma tar-riċevuta li tindika d-data u l-ħin tar-riċevuta.

5.L-Istati Membri għandhom jiżguraw li l-awtoritajiet nazzjonali tal-kompetizzjoni li jirċievu applikazzjoni fil-qosor jivverifikaw jekk ikunux diġà rċevew applikazzjoni preċedenti fil-qosor jew għall-klemenza fir-rigward tal-istess allegat kartell sigriet meta jirċevuha, u jinfurmaw lill-applikant skont il-każ.

6.L-Istati Membri għandhom jiżguraw li l-applikanti jkollhom l-opportunità li jissottomettu applikazzjonijiet sħaħ għall-klemenza, li jipperfezzjonaw l-applikazzjonijiet fil-qosor imsemmija fil-paragrafu 1 għall-awtoritajiet nazzjonali tal-kompetizzjoni kkonċernati, ladarba l-Kummissjoni tkun infurmat lil dawn l-awtoritajiet li hija ma jkunx beħsiebha tieħu azzjoni dwar il-każ b’mod sħiħ jew parzjali. L-Istati Membri għandhom jiżguraw li l-awtoritajiet nazzjonali tal-kompetizzjoni jkollhom is-setgħa li jispeċifikaw perjodu ta’ żmien raġonevoli sa meta l-applikant irid jissottometti l-applikazzjoni sħiħa flimkien mal-evidenza u l-informazzjoni korrispondenti.

7.L-Istati Membri għandhom jiżguraw li jekk l-applikant jissottometti l-applikazzjoni sħiħa skont il-paragrafu 6, sal-perjodu speċifikat mill-awtorità nazzjonali tal-kompetizzjoni, l-informazzjoni li tinsab fiha titqies li ġiet ippreżentata fid-data u l-ħin tal-applikazzjoni fil-qosor. Jekk l-applikant ikun issottometta l-applikazzjoni fil-qosor mhux aktar tard minn ħamest ijiem tax-xogħol wara li jippreżenta l-applikazzjoni għall-klemenza lill-Kummissjoni, l-applikazzjoni fil-qosor titqies li ġiet ippreżentata fid-data u l-ħin tal-applikazzjoni għall-klemenza ppreżentata lill-Kummissjoni.

Artikolu 22

Interazzjoni bejn programmi ta’ klemenza u sanzjonijiet fuq persuni fiżiċi

L-Istati Membri għandhom jiżguraw li l-impjegati u d-diretturi attwali u mgħoddija tal-applikanti għall-immunità mill-multi quddiem l-awtoritajiet tal-kompetizzjoni jiġu protetti minn kwalunkwe sanzjoni kriminali u amministrattiva u minn sanzjonijiet imposti fi proċedimenti ġudizzjarji mhux kriminali għall-involviment tagħhom fil-kartell sigriet kopert mill-applikazzjoni, jekk dawn l-impjegati u d-diretturi jikkooperaw attivament mal-awtoritajiet tal-kompetizzjoni kkonċernati u l-applikazzjoni għall-immunità tkun saret qabel il-bidu tal-proċedimenti kriminali.

KAPITOLU VII

ASSISTENZA REĊIPROKA

Artikolu 23

Kooperazzjoni bejn l-awtoritajiet nazzjonali tal-kompetizzjoni

L-Istati Membri għandhom jiżguraw li meta l-awtoritajiet amministrattivi nazzjonali tal-kompetizzjoni jwettqu spezzjoni f’isem u għall-kont ta’ awtoritajiet nazzjonali oħra tal-kompetizzjoni skont l-Artikolu 22 tar-Regolament tal-Kunsill (KE) Nru 1/2003, l-uffiċjali u persuni oħra li jakkumpanjawhom, awtorizzati mill-awtorità nazzjonali tal-kompetizzjoni li tagħmel it-talba għandhom jitħallew jattendu u jassistu attivament lill-awtorità nazzjonali tal-kompetizzjoni li ssirilha t-talba fl-ispezzjoni tagħha, billi jeżerċitaw is-setgħat imsemmija fl-Artikoli 6 u 7.

Artikolu 24

Talbiet għan-notifika ta’ oġġezzjonijiet u deċiżjonijiet preliminari

1.Mingħajr preġudizzju għal kwalunkwe forma oħra ta’ notifika magħmula minn awtorità nazzjonali tal-kompetizzjoni tal-Istat Membru applikanti skont ir-regoli fis-seħħ f’dak l-Istat Membru, l-Istati Membri għandhom jiżguraw li fuq talba tal-awtorità applikanti, l-awtorità li ssirilha t-talba għandha tinnotifika lid-destinatarju f’isem l-awtorità applikanti, bl-oġġezzjonijiet preliminari għall-allegat ksur tal-Artikoli 101 jew 102 TFUE u d-deċiżjonijiet li japplikaw dawn l-Artikoli, kif ukoll b’dokumenti li għandhom x’jaqsmu mal-infurzar tad-deċiżjonijiet li jimponu multi u ħlasijiet perjodiċi ta’ penali.

2.L-awtorità li ssirilha t-talba għandha tiżgura li n-notifika fl-Istat Membru li ssirlu t-talba tkun f’konformità mal-liġijiet, ir-regolamenti u l-prattiki amministrattivi nazzjonali fis-seħħ fl-Istat Membru li ssirlu t-talba.

Artikolu 25

Talbiet għall-infurzar ta’ deċiżjonijiet li jimponu multi jew ħlasijiet perjodiċi ta’ penali

1.L-Istati Membri għandhom jiżguraw li fuq talba tal-awtorità applikanti, l-awtorità li ssirilha t-talba għandha tinforza d-deċiżjonijiet li jimponu multi jew ħlasijiet perjodiċi ta’ penali adottati skont l-Artikoli 12 u 15 mill-awtorità applikanti. Dan għandu japplika biss sakemm:

a)l-impriża li kontriha l-multa jew il-ħlas perjodiku ta’ penali jista’ jiġi infurzat ma jkollhiex preżenza legali fl-Istat Membru tal-awtorità applikanti; jew

b) huwa ovvju li l-impriża li kontriha l-multa jew il-ħlas perjodiku ta’ penali jista’ jiġi infurzat ma għandhiex assi suffiċjenti fl-Istat Membru tal-awtorità applikanti;

2.L-awtorità li ssirilha t-talba għandha tiżgura li l-infurzar fl-Istat Membru li ssirlu t-talba jsir f’konformità mal-liġijiet, ir-regolamenti u l-prattiki amministrattivi nazzjonali fis-seħħ fl-Istat Membru li ssirlu t-talba.

3.L-awtorità applikanti tista’ tagħmel talba għall-infurzar biss meta d-deċiżjoni li tippermetti l-infurzar tagħha fl-Istat Membru applikanti tkun finali u ma tkunx tista’ tiġi appellata aktar b’mezzi ordinarji.

4.Il-kwistjonijiet li jirrigwardaw il-perjodi ta’ limitazzjoni għandhom ikunu rregolati mil-liġijiet fis-seħħ tal-Istat Membru applikanti.

5.L-awtorità li ssirilha t-talba ma għandhiex tkun obbligata tinforza deċiżjonijiet skont il-paragrafu 1 jekk dan ikun manifestament kuntrarju għall-ordni pubbliku fl-Istat Membru li fih qed jintalab l-infurzar.

Artikolu 26

Tilwimiet li jirrigwardaw it-talbiet għal notifika u għall-infurzar ta’ deċiżjonijiet li jimponu multi jew ħlasijiet ta’ penali

1.It-tilwimiet dwar il-legalità ta’ miżura li għandha tiġi notifikata jew deċiżjoni li timponi multi jew ħlasijiet perjodiċi ta’ penali skont l-Artikoli 12 u 15 magħmula minn awtorità applikanti għandhom jaqgħu taħt il-kompetenza tal-korpi kompetenti tal-Istat Membru applikanti u jkunu regolati bir-regoli nazzjonali ta’ dak l-Istat.

2.It-tilwimiet dwar il-miżuri ta’ infurzar meħuda fl-Istat Membru li ssirlu t-talba jew dwar il-validità ta’ notifika magħmula mill-awtorità li ssirilha t-talba għandhom jaqgħu taħt il-kompetenza tal-korpi kompetenti tal-Istat Membru li ssirlu t-talba u jkunu regolati bir-regoli fis-seħħ ta’ dak l-Istat.

KAPITOLU VIII

PERJODI TA’ LIMITAZZJONI

Artikolu 27

Sospensjoni tal-perjodi ta’ limitazzjoni għall-impożizzjoni ta’ penali

1.L-Istati Membri għandhom jiżguraw li l-perjodi ta’ limitazzjoni għall-impożizzjoni ta’ multi jew ta’ ħlasijiet perjodiċi ta’ penali mill-awtoritajiet nazzjonali tal-kompetizzjoni skont l-Artikoli 12 u 15 għandhom jiġu sospiżi għat-tul ta’ żmien tal-proċedimenti quddiem l-awtoritajiet nazzjonali tal-kompetizzjoni ta’ Stati Membri oħra jew il-Kummissjoni fir-rigward ta’ ksur li jkun jirrigwarda l-istess ftehim, deċiżjoni ta’ assoċjazzjoni jew prattika miftiehma. Is-sospensjoni għandha tibda tgħodd min-notifika tal-ewwel miżura ta’ investigazzjoni formali lill-impriża soġġetta għall-proċedimenti. Hija għandha tintemm fil-jum li l-awtorità kkonċernata tkun għalqet il-proċedimenti tagħha u infurmat lill-impriża dwar dan. It-tul ta’ żmien ta’ dan il-perijodu ta’ limitazzjoni huwa mingħajr preġudizzju għall-perjodi assoluti ta’ limitazzjoni previsti skont il-liġi nazzjonali.

2.Il-perijodu ta’ limitazzjoni għall-impożizzjoni ta’ multi jew ħlasijiet perjodiċi ta’ penali għandu jiġi sospiż sakemm id-deċiżjoni ta’ awtorità tal-kompetizzjoni tkun is-suġġett ta’ proċedimenti quddiem qorti ta’ rieżami.

KAPITOLU IX

DISPOŻIZZJONIJIET ĠENERALI

Artikolu 28

Rwol tal-awtoritajiet amministrattivi nazzjonali tal-kompetizzjoni quddiem il-qrati nazzjonali

1.L-Istati Membri li jaħtru kemm awtorità amministrattiva nazzjonali tal-kompetizzjoni, li jkollha l-kompetenza sabiex tinvestiga ksur tal-Artikoli 101 jew 102 TFUE, kif ukoll awtorità ġudizzjarja nazzjonali tal-kompetizzjoni, li jkollha l-kompetenza sabiex tadotta deċiżjoni li tikkontesta l-ksur u / jew li timponi l-multa, għandhom jiżguraw li l-azzjoni quddiem l-awtorità ġudizzjarja nazzjonali tal-kompetizzjoni tkun tista’ titressaq direttament mill-awtorità amministrattiva nazzjonali tal-kompetizzjoni.

2.Billi l-qrati nazzjonali jaġixxu fi proċedimenti mressqa kontra deċiżjonijiet ta’ infurzar ta’ awtoritajiet nazzjonali tal-kompetizzjoni li japplikaw l-Artikoli 101 jew 102 TFUE, l-Istati Membri għandhom jiżguraw li l-awtorità aministrattiva nazzjonali tal-kompetizzjoni jkollha d-dritt sħiħ li tipparteċipa bħala prosekutur, konvenut jew intimat f’dawn il-proċedimenti, u li tgawdi l-istess drittijiet bħall-partijiet pubbliċi f’dawn il-proċedimenti.

Artikolu 29

Limitazzjonijiet fuq l-użu tal-informazzjoni

1.L-informazzjoni miġbura fuq il-bażi tad-dispożizzjonijiet imsemmija f’din id-Direttiva jinħtieġ li tintuża biss għall-iskop li għalih tkun inkisbet. Hija ma għandhiex tintuża f’evidenza għall-impożizzjoni ta’ sanzjonijiet fuq persuni fiżiċi.

2.L-Istati Membri għandhom jiżguraw li jingħata aċċess għad-dikjarazzjonijiet ta’ klemenza jew għas-sottomissjonijiet ta’ saldu għall-iskopijiet biss tal-eżerċitar tad-drittijiet tad-difiża fi proċedimenti quddiem awtorità nazzjonali tal-kompetizzjoni. L-Istati Membri għandhom jiżguraw li l-informazzjoni meħuda minn dawn id-dikjarazzjonijiet ta’ klemenza u s-sottomissjonijiet ta’ saldu tkun tista’ tintuża mill-parti li tkun kisbet l-aċċess għall-fajl biss meta dan ikun neċessarju għall-eżerċitar tad-drittijiet tagħha tad-difiża fi proċedimenti quddiem il-qrati tal-Istati Membri f’każijiet li jkunu direttament marbuta mal-każ li fih ikun ingħata l-aċċess, u li jirrigwardaw:

a)l-għoti bejn il-parteċipanti f’kartell, ta’ multa imposta in solidum fuqhom minn awtorità nazzjonali tal-kompetizzjoni; jew

b)ir-rieżami ta’ deċiżjoni li biha awtorità nazzjonali tal-kompetizzjoni tkun sabet ksur tal-Artikolu 101 TFUE jew tad-dispożizzjonijiet tad-dritt nazzjonali tal-kompetizzjoni.

3.L-Istati Membri għandhom jiżguraw li l-kategoriji ta’ informazzjoni li ġejjin miksuba waqt proċedimenti quddiem awtorità nazzjonali tal-kompetizzjoni ma għandhomx jintużaw fi proċedimenti quddiem il-qrati nazzjonali sakemm l-awtorità nazzjonali tal-kompetizzjoni ma tkunx għalqet il-proċedimenti tagħha kontra l-partijiet kollha investigati billi tadotta d-deċiżjoni msemmija fl-Artikolu 9 jew l-Artiklou 11, jew inkella għax tkun temmet il-proċedimenti tagħha:

a)Informazzjoni li tkun ġiet ippreparata minn persuni fiżiċi jew ġuridiċi oħra speċifikament għall-proċedimenti tal-awtorità nazzjonali tal-kompetizzjoni; u

b)Informazzjoni li l-awtorità nazzjonali tal-kompetizzjoni tkun ħejjiet u bagħtet lill-partijiet matul il-proċedimenti tagħha.

4.L-Istati Membri għandhom jiżguraw li d-dikjarazzjonijiet ta’ klemenza jiġu skambjati biss bejn l-awtoritajiet nazzjonali tal-kompetizzjoni skont l-Artikolu 12 tar-Regolament (KE) Nru 1/2003:

a)bil-kunsens tal-applikant; jew

b)meta l-awtorità riċeventi tkun irċeviet ukoll applikazzjoni għall-klemenza relatata mal-istess ksur mill-istess applikant bħall-awtorità trasmittenti, bil-kundizzjoni li fil-mument li tiġi trasmessa l-informazzjoni, din ma tkunx miftuħa għall-applikant sabiex jirtira l-informazzjoni li huwa jkun issottometta lil dik l-awtorità riċeventi; jew

c)meta l-awtorità riċeventi tkun ipprovdiet impenn bil-miktub li la l-informazzjoni trasmessa lilha u l-ebda informazzjoni oħra li hija tista’ tikseb wara d-data u l-ħin tat-trasmissjoni kif innotati mill-awtorità trasmettenti ma tkun se tintuża minnha jew minn xi awtorità oħra li lilha eventwalment tiġi trasmessa l-informazzjoni sabiex jiġu imposti sanzjonijiet fuq l-applikant, fuq kwalunkwe persuna ġuridika jew fiżika oħra koperta mit-trattament favorevoli offrut mill-awtorità trasmittenti bħala riżultat tal-applikazzjoni magħmula mill-applikant taħt il-programm ta’ klemenza tagħha, jew fuq kwalunkwe impjegat jew eks impjegat ta’ xi waħda mill-persuni hawn fuq imsemmija;

u bil-kundizzjoni li l-protezzjoni kontra d-divulgazzjoni mogħtija mill-awtorità nazzjonali tal-kompetizzjoni riċeventi tkun ekwivalenti għal dik mogħtija mill-awtorità nazzjonali tal-kompetizzjoni trasmittenti.

5.Meta awtorità tal-kompetizzjoni tittrasmetti informazzjoni pprovduta b’mod volontarju minn applikant skont l-Artikolu 12 tar-Regolament (KE) Nru 1/2003 mingħajr il-kunsens tal-applikant, l-Istati Membri għandhom jiżguraw li l-awtoritajiet nazzjonali tal-kompetizzjoni riċeventi jkunu kapaċi jipprovdu l-impenn imsemmi fil-paragrafu 4(c).

6.Il-paragrafi 2-5 japplikaw irrispettivament mill-forma li fiha jiġu ppreżentati d-dikjarazzjonijiet ta’ klemenza skont l-Artikolu 19.

Artikolu 30

Ammissibbiltà tal-evidenza quddiem l-awtoritajiet nazzjonali tal-kompetizzjoni

L-Istati Membri għandhom jiżguraw li t-tipi ta’ provi ammissibbli bħala evidenza quddiem awtorità nazzjonali tal-kompetizzjoni jinkludu dokumenti, dikjarazzjonijiet bil-fomm, rikordings u kull oġġett ieħor li jinkludi informazzjoni, irrispettivament mill-mezz li fuqu tkun maħżuna l-informazzjoni.

Artikolu 31

Spejjeż tas-Sistema tan-Netwerk Ewropew għall-Kompetizzjoni

L-ispejjeż imġarrba mill-Kummissjoni b’rabta maż-żamma u l-iżvilupp tas-Sistema tan-Netwerk Ewropew għall-Kompetizzjoni u l-kooperazzjoni fin-Netwerk Ewropew għall-Kompetizzjoni għandhom jinġarru mill-baġit ġenerali tal-Unjoni fil-limitu tal-approprjazzjonijiet disponibbli.

KAPITOLU X

DISPOŻIZZJONIJIET FINALI

Artikolu 32

Traspożizzjoni

1.L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva sa mhux aktar tard minn (perjodu ta’ sentejn għat-traspożizzjoni). Huma għandhom jikkomunikaw minnufih lill-Kummissjoni t-test ta’ dawn id-dispożizzjonijiet.

Meta l-Istati Membri jadottaw dawn id-dispożizzjonijiet, dawn għandhom jirreferu għal din id-Direttiva jew ikunu akkumpanjati minn referenza bħal din waqt il-pubblikazzjoni uffiċjali tagħhom. L-Istati Membri għandhom jiddeċiedu kif għandha ssir din ir-referenza.

2.L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert minn din id-Direttiva.

Artikolu 33

Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha fil-Ġurnal Uffiċjali tal-Unjoni Ewropea.

Artikolu 34

Destinatarji

Din id-Direttiva hija indirizzata lill-Istati Membri.

Magħmul fi Brussell,

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA/INIZJATTIVA

1.1.Titolu tal-proposta / inizjattiva

1.2.Qasam / oqsma ta’ politika kkonċernat(i) fl-istruttura ABM/ABB

1.3.Natura tal-proposta / inizjattiva

1.4.Għan(ijiet)

1.5.Raġunijiet għall-proposta / inizjattiva

1.6.Tul taż-żmien u impatt finanzjarju

1.7.Metodu/i ta’ ġestjoni ppjanat(i)

2.MIŻURI TA’ ĠESTJONI

2.1.Regoli dwar il-monitoraġġ u r-rappurtar

2.2.Sistema ta’ ġestjoni u kontroll

2.3.Miżuri għall-prevenzjoni ta’ frodi u irregolaritajiet

3.IMPATT FINANZJARJU SMAT TAL-PROPOSTA / INIZJATTIVA

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i:

3.2.Impatt stmat fuq in-nefqa 

3.2.1.Sommarju tal-impatt stmat fuq in-nefqa

3.2.2.Impatt stmat fuq l-approprjazzjonijiet operazzjonali

3.2.3.Impatt stmat fuq l-approprjazzjonijiet ta’ natura amministrattiva

3.2.4.Kompatibbiltà mal-qafas finanzjarju pluriennali attwali

3.2.5.Kontribuzzjonijiet ta’ partijiet terzi

3.3.Impatt stmat fuq id-dħul

DIKJARAZZJONI FINANZJARJA LEĠIŻLATTIVA

1.QAFAS TAL-PROPOSTA / INIZJATTIVA

1.1.Titolu tal-proposta / inizjattiva

Direttiva tal-Parlament Ewropew u tal-Kunsill sabiex l-awtoritajiet tal-kompetizzjoni tal-Istati Membri jingħataw is-setgħa biex ikunu inforzaturi aktar effettivi, u biex jiġi żgurat il-funzjonament tajjeb tas-suq intern.

1.2.Qasam / oqsma ta’ politika kkonċernat(i) fl-istruttura ABM / ABB 24  

Qasam ta’ politika:    Titolu 03 – Politika tal-kompetizzjoni.

Attivitajiet:    03 02 – Koordinazzjoni tal-politika, Netwerk Ewropew għall-Kompetizzjoni u l-kooperazzjoni internazzjonali.

03 05 – Kartelli, regoli tal-antitrust u liberalizzazzjoni.

1.3.Natura tal-proposta / inizjattiva

Il-proposta / l-inizjattiva tirrigwarda azzjoni ġdida. 

1.4.Għan(ijiet)

1.4.1.L-għan(ijiet) strateġiku / strateġiċi pluriennali tal-Kummissjoni fil-mira tal-proposta / tal-inizjattiva

Għan Ġenerali A: Spinta Ġdida għall-Impjiegi, it-Tkabbir u l-Investiment.

1.4.2.Għan(ijiet) speċifiku / speċifiċi u l-attività/attivitajiet ABM/ABB ikkonċernata/i

Għan speċifiku Nru 2: L-applikazzjoni effettiva u koerenti tad-dritt tal-kompetizzjoni tal-UE mill-NCAs u mill-qrati nazzjonali.

Attività / attivitajiet ABM / ABB ikkonċernata/i: 03 02 - Koordinazzjoni tal-politika, Netwerk Ewropew għall-Kompetizzjoni u kooperazzzjoni internazzjonali, u 03 05 - Kartelli, regoli tal-antitrust u liberalizzazzjoni.

1.4.3.Riżultat(i) mistennija u l-impatt

1.4.4.L-impatt prinċipali tal-inizjattiva se jkun fuq l-NCAs, in-negozji u l-konsumaturi, kif spjegat fis-sezzjoni 2 tal-Memorandum ta’ Spjegazzjoni. Indikaturi tar-riżultati u l-impatt

It-tabella ta’ hawn taħt turi l-indikaturi possibbli li jistgħu jintużaw sabiex jitkejlu r-riżultati u l-impatt.

1.5.Raġunijiet għall-proposta / għall-inizjattiva

1.5.1.Rekwiżit(i) li għandu/hom jiġi/u ssodisfat(i) f'terminu ta' żmien qasir jew twil

L-għan prinċipali ta’ din l-inizjattiva leġiżlattiva hija sabiex ikun żgurat li jitwettaq il-potenzjal sħiħ tas-sistema deċentralizzata ta’ infurzar tar-regoli tal-kompetizzjoni tal-UE stabbilita bir-Regolament (KE) Nru 1/2003, billi l-NCAs jingħataw is-setgħa sabiex ikunu inforzaturi aktar effettivi. Dan se jsaħħaħ l-infurzar effettiv tar-regoli tal-kompetizzjoni tal-UE. Se ssaħħaħ wkoll il-kooperazzjoni mill-qrib fin-Netwerk Ewropew għall-Kompetizzjoni.

Dan jeħtieġ il-kisba tal-għanijiet speċifiċi li ġejjin:

1.    li jiġi żgurat li l-NCAs kollha jkollhom għodod ta’ investigazzjoni u deċiżjonali effikaċi;

2.    li jiġi żgurat li l-NCAs kollha jkunu jistgħu jimponu multi ta' deterrent effikaċi;

3.    li jiġi żgurat li l-NCAs kollha jkollhom fis-seħħ programm ta’ klemenza mfassal tajjeb li jiffaċilita l-applikazzjoni għall-klemenza f’ġurisdizzjonijiet multipli; u

4.    li jiġi żgurat li l-NCAs ikollhom riżorsi suffiċjenti u li jkunu jistgħu jinfurzaw ir-regoli tal-kompetizzjoni tal-UE b’mod indipendenti.

1.5.2.Valur miżjud tal-involviment tal-UE

Hemm diversi raġunijiet li jiġġustifikaw l-involviment tal-UE sabiex jintlaħqu l-għanijiet deskritti fis-sezzjoni 1.5.1 u jintlaħaq il-potenzjal sħiħ tas-sistema deċentralizzata ta’ infurzar tar-regoli tal-kompetizzjoni tal-UE, kif spjegat fis-sezzjoni 2 tal-Memorandum ta’ Spjegazzjoni.

1.5.3.Tagħlimiet miksuba minn esperjenzi simili fil-passat

Ir-Regolament (KE) Nru 1/2003 ta s-setgħa lill-NCAs li japplikaw ir-regoli tal-kompetizzjoni tal-UE. B’riżultat ta’ dan, l-infurzar tar-regoli tal-kompetizzjoni tal-UE issa qiegħed iseħħ fuq skala li l-Kummissjoni qatt ma kienet tkun tista’ tikseb waħedha. Mill-2004, il-Kummissjoni u l-NCAs ħadu aktar minn 1000 deċiżjoni ta’ infurzar, bl-NCAs ikunu responsabbli għal 85% minnhom. Il-proposta leġiżlattiva hija bbażata fuq l-esperjenza fl-infurzar tal-NCAs u l-ġbir ta’ informazzjoni addizzjonali mill-2004.

1.5.4.Kompatibbiltà u sinerġija possibbli ma’ strumenti xierqa oħra

Il-proposta leġiżlattiva hija kompatibbli mar-Regolament (KE) Nru 1/2003 u se jkollha sinerġiji b’saħħithom miegħu, billi se tippermetti li l-NCAs jilħqu l-potenzjal sħiħ tagħhom fis-sistema deċentralizzata ta’ infurzar tar-regoli tal-kompetizzjoni tal-UE prevista minn dan ir-Regolament.

1.6.Tul taż-żmien u impatt finanzjarju

Proposta / inizjattiva ta’ tul ta’ żmien mingħajr limitu

1.7.Metodu/i ta’ ġestjoni ppjanat(i) 25  

Ġestjoni diretta mill-Kummissjoni u d-dipartimenti tagħha.

2.MIŻURI TA’ ĠESTJONI

2.1.Regoli dwar il-monitoraġġ u r-rappurtar

L-approprjazzjonijiet se jservu sabiex tinżamm, tiġi żviluppata, ospitata, imħaddma u appoġġata sistema ċentrali ta’ informazzjoni (is-Sistema tan-Netwerk Ewropew għall-Kompetizzjoni) f’konformità mal-istandards rilevanti dwar il-kunfidenzjalità u s-sigurtà tad-dejta. Huma se jiggarantixxu kooperazzjoni mill-qrib bejn l-NCAs u l-Kummissjoni fin-Netwerk Ewropew għall-Kompetizzjoni permezz ta’ diversi mezzi. Se japplikaw ir-regoli dwar ir-rappurtar tad-Direttorat Ġenerali.

2.2.Sistema ta’ ġestjoni u kontroll

2.2.1.Riskju/i identifikat(i)

Fir-rigward tal-IT; ir-riskju li s-sistemi tal-IT jonqsu milli jappoġġaw b’mod effettiv il-ħidma tan-Netwerk Ewropew għall-Kompetizzjoni.

2.2.2.Informazzjoni dwar l-istabbiliment tas-sistema ta’ kontroll intern

IT: Proċessi għall-governanza effettiva tal-IT, li jinvolvu b’mod attiv lill-utenti tas-sistemi.

Nefqiet: il-proċessi ta’ kontroll intern għandhom l-għan li jiżguraw il-ġestjoni adegwata tar-riskji relatati mal-legalità u r-regolarità tat-tranżazzjonijiet sottostanti, u n-natura tal-pagamenti. Barra minn hekk, is-sistema ta’ kontroll tikkonsisti minn elementi differenti, bħar-rappurtar lill-maniġment superjuri, il-verifika ex ante mit-tim finanzjarju ċentrali, il-kumitat konsultattiv intern għall-akkwisti u l-kuntratti, il-kontrolli ex post u l-awditi mis-Servizz tal-Awditjar Intern u l-Qorti Ewropea tal-Awdituri .

2.2.3.Stima tal-ispejjeż u tal-benefiċċji tal-kontrolli u valutazzjoni tal-livell mistenni tar-riskju ta’ żball

Nefqa: L-ispejjeż tal-kontrolli huma stmati għal anqas minn 3% tan-nefqa totali. Il-benefiċċji tal-kontrolli f’termini mhux finanzjarji jkopru: valur aħjar għall-flus, id-deterrenza, iż-żidiet fl-effiċjenza, it-titjib fis-sistemi u l-konformità mad-dispożizzjonijiet regolatorji.

Ir-riskji huma effettivament mitigati permezz tal-kontrolli stabbiliti, u l-livell tar-riskju ta’ żball huwa stmat għal anqas minn 2%.

2.3.Miżuri għall-prevenzjoni ta’ frodi u irregolaritajiet

Ir-riskji ta’ frodi huma mitigati permezz ta’ kontrolli speċifiċi. L-attivitajiet u l-operazzjonijiet b’riskju ogħla ta’ frodi huma soġġetti għal monitoraġġ u kontroll aktar dettaljat. Is-sistema ta’ kontroll hawn fuq imsemmija u n-natura tan-nefqiet taħt ġestjoni diretta jippermettu li l-probabbiltà ta’ frodi tiġi stmata bħala baxxa.

It-tranżazzjonijiet kollha huma soġġetti għal kontrolli ex ante tal-ewwel livell skont iċ-ċirkwiti finanzjarji tagħna. Il-kontrolli huma kemm operazzjonali kif ukoll finanzjarji, it-tnedija u l-verifika operazzjonali jitwettqu mid-direttorat operazzjonali, filwaqt li t-tnedija u l-verifika finanzjarja jitwettqu miċ-ċellola finanzjarja fl-Unità COMP R2.

Ir-riskju ta’ frodi jiġi stmat kull sena fil-kuntest tal-eżerċizzju tal-ġestjoni tar-riskju.

3.IMPATT FINANZJARJU SMAT TAL-PROPOSTA / INIZJATTIVA

3.1.Intestatura/i tal-qafas finanzjarju pluriennali u l-linja/i baġitarja/i tan-nefqa affettwata/i:

Linji baġitarji eżistenti

Fl-2016, is-sistemi ta’ informazzjoni li jappoġġaw l-operazzjonijiet tan-Netwerk Ewropew għall-Kompetizzjoni kienu ffinanzjati mill-programm ISA2 permezz tal-azzjoni ABCDE. Spejjeż oħra mġarrba b’rabta mal-funzjonament tan-Netwerk Ewropew għall-Kompetizzjoni huma ffinanzjati permezz tan-nefqiet amministrattivi. L-istess japplika mill-2017 sal-2020. Il-modalitajiet tal-impatt baġitarju tal-proposta wara l-2020 se jkunu suġġetti għall-proposti tal-Kummissjoni dwar il-QFP li jmiss u għall-eżitu finali tan-negozjati dwar il-QFP għal wara l-2020.

Skont l-ordni tal-intestaturi tal-qafas finanzjarju pluriennali u tal-linji baġitarji.

3.2.Impatt stmat fuq in-nefqa

3.2.1.Sommarju tal-impatt stmat fuq in-nefqa

EUR miljun (sa tliet punti deċimali)

EUR miljun (sa tliet punti deċimali)

EUR miljun (sa tliet punti deċimali)

3.2.2.Impatt stmat fuq l-approprjazzjonijiet operazzjonali

Il-proposta / inizjattiva teħtieġ l-użu ta’ approprjazzjonijiet operazzjonali, kif spjegat hawn taħt:

Id-DĠ Kompetizzjoni ma jistax jipprovdi lista eżawrjenti tar-riżultati li għandhom jitwasslu permezz tal-interventi finanzjarji, l-ispejjeż medji u n-numri kif mitluba minn din is-sezzjoni billi din hija inizjattiva ġdida u ma hemm l-ebda dejta statistika preċedenti li wieħed jista’ juża.

Sabiex tiġi appoġġata l-kooperazzjoni mill-qrib fin-Netwerk Ewropew għall-Kompetizzjoni u sabiex l-għanijiet jintlaħqu bl-aħjar mod, nipprevedu fost affarijiet oħra n-nefqiet li ġejjin:

sabiex tinżamm, tiġi żviluppata, ospitata, imħaddma u appoġġata s-sistema ċentrali ta’ informazzjoni (is-Sistema tan-Netwerk Ewropew għall-Kompetizzjoni) f’konformità mal-istandards rilevanti dwar il-kunfidenzjalità u s-sigurtà tad-dejta. In-Netwerk Ewropew għall-Kompetizzjoni jiddependi fuq l-interoperabilità għall-funzjonament effettiv u effiċjenti tiegħu.

spejjeż amministrattivi oħra mġarrba b’rabta mal-funzjonament tan-Netwerk Ewropew għall-Kompetizzjoni, bħal:

l-ispejjeż relatati mal-organizzazzjoni tal-laqgħat;

l-għoti ta’ taħriġ lill-awtoritajiet nazzjonali tal-kompetizzjoni;

materjal stampat tradott fil-lingwi kollha;

il-ħruġ ta’ prattiki / gwidi rakkomandati, tradotti fil-lingwi kollha;

stħarriġ / studji / evalwazzjonijiet ta’ segwitu.

3.2.3.Impatt stmat fuq l-approprjazzjonijiet ta’ natura amministrattiva

3.2.3.1.Sommarju

Il-proposta / l-inizjattiva ma teħtieġx l-użu ta’ approprjazzjonijiet addizzjonali ta’ natura amministrattiva.

Ir-riżorsi umani meħtieġa għandhom jiġu mill-persunal tad-DĠ li diġà jkun assenjat għall-immaniġġjar tal-azzjoni u / jew ikun ġie riallokat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ ta’ ġestjoni skont il-proċedura annwali ta’ allokazzjoni u fid-dawl tal-limiti baġitarji. L-istess japplika għall-approprjazzjonijiet meħtieġa biex ikopru infiq amministrattiv ieħor.

3.2.3.2.Stima tar-riżorsi umani meħtieġa

Il-proposta / l-inizjattiva teħtieġ l-użu ta’ riżorsi umani, kif spjegat hawn taħt:

L-istima trid tingħata f’unitajiet ekwivalenti għall-full time

XX huwa l-qasam ta’ politika jew it-titolu tal-baġit ikkonċernat.

Ir-riżorsi umani meħtieġa għandhom jiġu mill-persunal tad-DĠ li diġà jkun assenjat għall-immaniġġjar tal-azzjoni u / jew ikun ġie riallokat fid-DĠ, flimkien, jekk ikun meħtieġ, ma’ kwalunkwe allokazzjoni addizzjonali li tista’ tingħata lid-DĠ ta’ ġestjoni skont il-proċedura annwali ta’ allokazzjoni u fid-dawl tal-limiti baġitarji.

Deskrizzjoni tal-kompiti li jridu jitwettqu:

3.2.4.Kompatibbiltà mal-qafas finanzjarju pluriennali attwali

Il-proposta / l-inizjattiva hija kompatibbli mal-qafas finanzjarju pluriennali attwali u mal-ipprogrammar finanzjarju attwali tal-Programm ISA2, u mhumiex meħtieġa riżorsi addizzjonali.

3.2.5.Kontribuzzjonijiet ta’ partijiet terzi

Il-proposta / l-inizjattiva ma tipprevedix kofinanzjament minn partijiet terzi.

3.3.Impatt stmat fuq id-dħul

Il-proposta / l-inizjattiva ma għandha l-ebda impatt finanzjarju fuq id-dħul.

(1) Ir-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (ĠU 2003, L 1, p.1).

(2) COM(2016) 710 final.

(3) Komunikazzjoni tal-Kummissjoni - Id-dritt tal-UE: Riżultati aħjar permezz ta’ applikazzjoni aħjar, C/2016/8600, (ĠU C 18, 19.1.2017, p.10).

(4) Id-Direttiva 2002/21/KE tal-Parlament Ewropew u tal-Kunsill tas-7 ta’ Marzu 2002 dwar kwadru regolatorju komuni għan-networks ta’ komunikazzjonijiet u servizzi elettroniċi (ĠU 2002, L 108, p.33); Id-Direttiva 2009/72/KE tal-Parlament Ewropew u tal-Kunsill tat-13 ta’ Lulju 2009 dwar ir-regoli komuni għas-suq intern fil-qasam tal-elettriku u li temenda d-Direttiva 2003/54/KE (ĠU 2009, L 211, p.55); Ir-Regolament (KE) Nru 1211/2009 tal-Parlament Ewropew u tal-Kunsill tal-25 ta’ Novembru 2009 li jistabbilixxi l-Korp ta’ Regolaturi Ewropej tal-Komunikazzjonijiet Elettroniċi (BEREC) u l-Uffiċċju (ĠU 2009, L 337, p.1); Ir-Regolament (UE) Nru 1227/2011 tal-Parlament Ewropew u tal-Kunsill tal-25 ta’ Ottubru 2011 dwar l-integrità u t-trasparenza tas-swieq tal-enerġija bl-ingrossa (ĠU 2011, L 326, p.1); Id-Direttiva 2012/34/UE tal-Parlament Ewropew u tal-Kunsill tal-21 ta’ Novembru 2012 li tistabbilixxi żona ferrovjarja unika Ewropea (ĠU 2012, L 343, p.32); Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU 2013, L 347, p.671); Ir-Regolament (UE) Nru 537/2014 tal-Parlament Ewropew u tal-Kunsill tas-16 ta’ April 2014 dwar rekwiżiti speċifiċi dwar l-awditjar statutorju ta’ entitajiet ta’ interess pubbliku u li jħassar id-Deċiżjoni tal-Kummissjoni 2005/909/KE (ĠU 2014, L 158, p.77).

(5) Il-Kawża C-557/12, Kone AG vs ÖBB-Infrastruktur AG, EU:C:2014:1317, il-paragrafu 32.

(6) Il-Kawża C-439/08, Vlaamse federatie van verenigingen van Brood- en Banketbakkers, Ijsbereiders en Chocoladebewerkers (VEBIC) VZW, EU:C.2010:739, il-paragrafi 56 u 57.

(7) Il-Komunikazzjoni tal-Kummissjoni lill-Parlament Ewropew u lill-Kunsill, Għaxar Snin ta’ Infurzar tar-regoli tal-Antitrust bir-Regolament 1/2003: Kisbiet u Perspettivi Futuri COM(2014) 453 u d-Dokumenti ta’ Ħidma tal-Persunal li jakkumpanjawha: Għaxar Snin ta’ Infurzar tar-regoli tal-Antitrust bir-Regolament 1/2003 SWD(2014) 230 u Intejbu l-infurzar tal-kompetizzjoni mill-awtoritajiet tal-kompetizzjoni tal-Istati Membri: kwistjonijiet istituzzjonali u proċedurali SWD(2014) 231, http://ec.europa.eu/competition/antitrust/legislation/regulations.html.

(8) Komunikazzjoni mill-Kummissjoni lill-Parlament Ewropew u lill-Kunsill, Rapport dwar it-tħaddim tar-Regolament 1/2003 COM(2009) 206 final u d-Dokument ta’ Ħidma tal-Persunal li jakkumpanjah SEC(2009) 574 final, http://ec.europa.eu/competition/antitrust/legislation/regulations.html.

(9) It-8 % li kien fadal wieġbu: “ma nafx / ma japplikax”.

(10) Ara s-Sezzjoni 6.3 tar-Rapport dwar il-Valutazzjoni tal-Impatt disponibbli fuq: http://ec.europa.eu/transparency/regdoc/?fuseaction=ia.

(11) Ara l-Opinjonijiet tat-28 ta’ Settembru 2016 u tad-9 ta’ Diċembru 2016, disponibbli fuq: http://ec.europa.eu/transparency/regdoc/?fuseaction=ia. Ara wkoll l-Anness I tar-Rapport dwar il-Valutazzjoni tal-Impatt.

(12) Id-Deċiżjoni (UE) 2015/2240 tal-Parlament Ewropew u tal-Kunsill tal-25 ta' Novembru 2015 li tistabbilixxi programm dwar soluzzjonijiet ta' interoperabbiltà u oqfsa komuni għall-amministrazzjonijiet pubbliċi, in-negozji u ċ-ċittadini Ewropej (Programm ISA2) bħala mezz għall-modernizzazzjoni tas-settur pubbliku (ĠU 2015, L 318. p. 1).

(13) ĠU L 349, 5.12.2014, p.1.

(14) Skont il-ġurisprudenza tal-Qorti tal-Ġustizzja tal-Unjoni Ewropea, "ir-rekwiżiti li jirriżultaw mill-protezzjoni tad-drittijiet fundamentali fis-sistema legali tal-(UE) jorbtu wkoll lill-Istati Membri meta dawn jimplimentaw ir-regoli tal-(UE)", is-sentenza fil-kawża Karlsson et, il-Kawża C-292/97, ECLI: EU:C:2000:202, il-paragrafu 37. Ara wkoll is-sentenza f’Eturas, il-Kawa C-74/14, ECLI:EU:C:2016:42, il-pararafu 38, li fiha l-Qorti tal-Ġustizzja tal-Unjoni Ewropea fakkret li s-suppożizzjoni tal-innoċenza tikkostitwixxi prinċipju ġenerali tad-dritt tal-UE, issa stipulat fl-Artikolu 48(1) tal-Karta tad-Drittijiet Fundamentali tal-Unjoni Ewropea (ara, f’dan ir-rigward, is-sentenza f’.E.ON Energie vs il-Kummissjoni, C 89/11 P, ECLI: EU:C:2012:738, il-paragrafu 72), li l-Istati Membri huma obbligati josservaw meta jimplimentaw id-dritt tal-kompetizzjoni tal-UE. F’dan ir-rigward ara wkoll, is-sentenza f’VEBIC, C439/08, ECLI: EU:C:2010:739, il-paragrafu 63.

(15) Is-Sentenza fil-kawża Inspecteur van de Belastingdienst vs X BV, C-429/07, ECLI: EU:C:2009:359, il-paragrafi 36-39. 

(16) It-terminu “multi ċivili” jintuża biex jindika multi imposti minn proċedimenti ġudizzjarji mhux kriminali.

(17) Is-sentenza f’AkzoNobel NV vs il-Kummissjoni, C-97/08 P, ECLI:EU:C:2009:536. Irid jintwera li l-kumpanija prinċipali teżerċita influwenza deċiżiva fuq is-sussidjarju li jkun wettaq il-ksur.

(18) http://ec.europa.eu/competition/cartels/whistleblower/index.html.

(19) http://ec.europa.eu/newsroom/just/item-detail.cfm?item_id=54254.

(20) Il-Qorti Ewropea tal-Ġustizzja ddeċidiet li l-Artikolu 35 tar-Regolament (KE) Nru 1/2003 irid jiġi interpretat bħala li jipprekludi r-regoli nazzjonali li ma jippermettux li NCA tipparteċipa, bħala konvenut jew intimat, fi proċedimenti ġudizzjarji mressqa kontra deċiżjoni li l-awtorità nnifisha tkun ħadet, VEBIC, il-Kawża C-439/08, ECLI:EU:C:2010:739, il-paragrafu 64.

(21) ĠU C , , p. .

(22) Ir-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (ĠU L 1, 4.1.2003, p.1).

(23) ĠU C 369, 17.12.2011, p. 14.

(24) ABM: ġestjoni bbażata fuq l-attività; ABB: ibbaġitjar ibbażat fuq l-attività.

(25) Id-dettalji tal-metodi ta’ ġestjoni u tar-referenzi għar-Regolament Finanzjarju jinstabu fuq is-sit web tad-Direttorat Ġenerali għall-Baġit tal-Kummissjoni Ewropea: http://ec.europa.eu/budget/index_en.cfm.

(26) Diff. = Approprjazzjonijiet Differenzjati / Mhux diff. = Approprjazzjonijiet Mhux Differenzjati

(27) L-EFTA: Assoċjazzjoni Ewropea tal-Kummerċ Ħieles.

(28) Pajjiżi kandidati u, fejn applikabbli, pajjiżi kandidati potenzjali mill-Balkani tal-Punent.

(29) Dawn l-ammonti huma indikattivi, taħt ir-riżerva tal-proċedura baġitarja annwali u tal-prijoritajiet stabbiliti permezz tal-Programm ta’ Ħidma annwali ISA².

(30) L-assistenza teknika u / jew amministrattiva u n-nefqa b’appoġġ għall-implimentazzjoni ta’ programmi u / jew azzjonijiet tal-UE (dawk li kienu l-linji “BA”), riċerka indiretta, riċerka diretta.

(31) Is-sena N hija s-sena li fiha tibda l-implimentazzjoni tal-proposta / tal-inizjattiva.

(32) AC = Aġenti Kuntrattwali; AL = Persunal Lokali; ENS = Espert Nazzjonali Sekondat; INT = persunal tal-aġenzija; JED = Esperti Żgħażagħ f’Delegazzjonijiet.

(33) Sottolimitu għall-persunal estern kopert mill-approprjazzjonijiet operazzjonali (dawk li kienu linji “BA”).