IL-KUMMISSJONI EWROPEA
Brussell, 28.2.2017
COM(2017) 101 final
Proposta għal
DEĊIŻJONI TAL-PARLAMENT EWROPEW U TAL-KUNSILL
dwar il-mobilizzazzjoni tal-Fond Ewropew ta’ Aġġustament għall-Globalizzazzjoni (EGF/2017/000 TA 2017 - Għajnuna teknika fuq l-inizjattiva tal-Kummissjoni)
MEMORANDUM TA’ SPJEGAZZJONI
Ir-regoli li japplikaw għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni (FEG) huma stipulati fir-Regolament (KE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006 1 (ir-“Regolament dwar il-FEG”).
SOMMARJU TAL-APPLIKAZZJONI U ANALIŻI
Dejta ewlenija:
Nru ta’ Referenza tal-FEG FEG/2017/000
Il-Kummissjoni Ewropea Assistenza teknika
Nefqa amministrattiva: baġit f’EUR 310 000
% nefqa amministrattiva (limitu: 0,5 %) 0,18 %
Skont l-Artikolu 11(1) tar-Regolament dwar il-FEG, kull sena jista’ jitqiegħed għad-dispożizzjoni tal-għajnuna teknika fuq inizjattiva tal-Kummissjoni massimu ta’ 0,5 % tal-ammont annwali massimu tal-FEG.
Għajnuna teknika li se tkun iffinanzjata u analiżi tal-ispejjeż stmati tagħha
1.Il-kontribuzzjoni se tintuża għan-nefqa msemmija fl-Artikolu 11(1) u (4) kif ukoll fl-Artikolu 12(2), (3) u (4) tar-Regolament dwar il-FEG, kif spjegat hawn taħt.
2.Monitoraġġ u ġbir ta’ dejta: Il-Kummissjoni se tiġbor id-dejta dwar l-applikazzjonijiet li jkunu waslulha, dwar dawk imħallsa u dawk ta’ stralċ, u dwar il-miżuri proposti u implimentati. Din id-dejta se tkun disponibbli fuq is-sit web u se tkun kompilata f’format xieraq għar-Rapporti Biennali tal-2017 u l-2019. Abbażi tal-ħidma li saret tul dawn l-aħħar snin, l-ispejjeż għal din l-attività se jkunu ta’ EUR 20 000.
3.Informazzjoni: Is-sit web dwar il-FEG 2 , li ħolqot il-Kummissjoni fil-qasam tagħha tal-Impjiegi, l-Affarijiet Soċjali u l-Inklużjoni, u li qed tieħu ħsiebu skont kif mitlub mill-Artikolu 12(2) tar-Regolament dwar il-FEG, se jiġi aġġornat u mkabbar b’mod regolari, u kull element ġdid se jkun tradott ukoll fil-lingwi kollha tal-UE. Se tiżdied is-sensibbilizzazzjoni ġenerali dwar il-FEG u l-viżibilità tiegħu se tiġi promossa. Se jiġi stampat għadd limitat ta' kopji tal-evalwazzjoni ta’ nofs it-terminu tal-FEG u se jkun hemm disponibbli wkoll pubblikazzjoni online. Il-FEG se jiġi kopert f’diversi pubblikazzjonijiet u attivitajiet awdjoviżivi tal-Kummissjoni, kif stipulat fl-Artikolu 11(4) tar- Regolament dwar il-FEG. Huwa stmat li fl-2017 dawn il-partiti kollha se jiswew EUR 20 000.
4.Il-ħolqien ta’ bażi tal-għarfien / interfaċċa tal-applikazzjoni: Il-Kummissjoni qiegħda tkompli bil-ħidma tagħha biex tistabbilixxi proċeduri standardizzati għall-applikazzjonijiet u l-ġestjoni tal-FEG, bl-użu tal-funzjonalitajiet tal-SFC 2014 li fiha qed jiġi integrat il-FEG. Dan jippermetti li l-applikazzjonijiet skont ir-Regolament dwar il-FEG ikunu ssimplifikati, li l-ipproċessar tagħhom isir b’mod aktar mgħaġġel u li r-rapporti jkunu jistgħu jiġu estratti aktar faċilment għal diversi ħtiġijiet. Il-proċeduri tar-rappurtar huma integrati wkoll. Modulu ta’ back-office li jagħmilha ta’ medjatur bejn l-SFC u l-ABAC, is-sistema ta’ informazzjoni kontabilistika u finanzjarja tal-Kummissjoni, jiffaċilita l-operazzjonijiet finanzjarji tal-FEG. Peress li l-parti l-kbira tal-ipprogrammar sar fis-snin li għaddew, il-bidliet possibbli jeħtieġu biss titjib u aġġustamenti ulterjuri. Minħabba l-ispejjeż aktar baxxi għall-programmazzjoni u l-ispejjeż ugwali għall-manutenzjoni, il-fondi meħtieġa huma aktar baxxi minn dawk tas-snin li għaddew. L-ispiża ta’ dawn il-partiti hi stmata li se tiswa EUR 80 000, bħall-kontribuzzjoni tal-FEG għall-iżvilupp ulterjuri u l-aġġornament tal-SFC u l-manutenzjoni regolari tagħha.
5.Appoġġ amministrattiv u tekniku: Il-Grupp ta’ Esperti tal-Persuni ta’ Kuntatt tal-FEG, b’membru wieħed minn kull Stat Membru, se jkun qed isejjaħ żewġ laqgħat (fit-tieni nofs tal-2017 / fl-ewwel nofs tal-2018), li flimkien huma stmati li se jiswew EUR 70 000.
6.Barra minn hekk, sabiex jiġi promoss in-netwerking fost l-Istati Membri, il-Kummissjoni se torganizza żewġ seminars bil-parteċipazzjoni tal-korpi ta’ implimentazzjoni tal-FEG u tal-imsieħba soċjali . Sa fejn ikun possibbli, dawn se jkunu skedati li jsiru bejn wieħed u ieħor fl-istess dati tal-laqgħat tal-Grupp ta’ Esperti u se jiffukaw fuq kwistjonijiet li jinbtu mill-implimentazzjoni prattika tar-Regolament tal-FEG fil-livell ta’ bażi. L-ispiża għal dawn il-partiti hija stmata li se tkun EUR 120 000.
|
Elementi |
Għadd stmat |
Spiża stmata għal kull partita
|
Spejjeż totali
|
|
Monitoraġġ u ġbir tad-dejta |
Varji |
Varji |
20 000 |
|
Attivitajiet ta’ informazzjoni |
Varji |
Varji |
20 000 |
|
Ħolqien, aġġornament u manutenzjoni ta’ bażi ta’ għarfien / interfaċċa tal-applikazzjoni fl-SFC |
Varji |
Varji |
80 000 |
|
Appoġġ amministrattiv u tekniku: Laqgħat tal-Grupp ta’ Esperti tal-Persuni ta’ Kuntatt tal-FEG |
2 |
35 000 |
70 000 |
|
Appoġġ amministrattiv u tekniku: Seminars ta’ netwerking dwar l-implimentazzjoni tal-FEG |
2 |
60 000 |
120 000 |
|
Total tal-ispejjeż stmati |
310 000 |
||
Finanzjament
7.Il-baġit annwali massimu disponibbli għall-FEG fl-2017 huwa ta’ EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020 3 .
8.L-Artikolu 11(1) tar-Regolament dwar il-FEG jiddikjara li 0,5 % ta’ dan l-ammont (jiġifieri EUR 844 620 fl-2017) jista’ jintuża għall-għajnuna teknika fuq l-inizjattiva tal-Kummissjoni. Fil-preżent, għadu disponibbli l-ammont sħiħ tal-2017; għadu ma ġie allokat xejn għall-għajnuna teknika. L-ammont propost jikkorrispondi għal madwar 0,18 % tal-baġit annwali massimu disponibbli għall-FEG fl-2017.
9.Id-deċiżjoni li ġiet proposta biex il-FEG jiġi mobilizzat se tittieħed b’mod konġunt mill-Parlament Ewropew u mill-Kunsill, kif stipulat fil-punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta’ baġit u dwar ġestjoni finanzjarja tajba 4 .
Atti relatati
10.Fl-istess żmien li se tkun qed tippreżenta din il-proposta għal deċiżjoni biex jiġi mmobilizzat il-FEG, il-Kummissjoni se tippreżenta proposta lill-Parlament Ewropew u lill-Kunsill biex jiġu trasferiti EUR 310 000 fil-linja baġitarja rilevanti.
Sors tal-approprjazzjonijiet ta’ pagament
11.Approprjazzjonijiet mil-linja baġitarja tal-FEG se jintużaw biex ikopru l-ammont ta’ EUR 310 000 meħtieġ għall-għajnuna teknika.
Proposta għal
DEĊIŻJONI TAL-PARLAMENT EWROPEW U TAL-KUNSILL
dwar il-mobilizzazzjoni tal-Fond Ewropew ta’ Aġġustament għall-Globalizzazzjoni (EGF/2017/000 TA 2017 - Għajnuna teknika fuq l-inizjattiva tal-Kummissjoni)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea,
Wara li kkunsidraw ir-Regolament (KE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006 5 , u b’mod partikolari l-Artikolu 11(2) tiegħu,
Wara li kkunsidraw il-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f'materji ta’ baġit u dwar ġestjoni finanzjarja tajba 6 , u b’mod partikolari l-punt 13 tiegħu,
Wara li kkunsidraw il-proposta mill-Kummissjoni Ewropea,
Billi:
(1)Il-Fond Ewropew ta’ Aġġustament għall-Globalizzazzjoni (FEG) ġie stabbilit biex isostni lill-ħaddiema li jkunu ngħataw is-sensja u lil persuni li jaħdmu għal rashom li l-attivitajiet tagħhom ikunu waqfu b’riżultat ta’ bidliet strutturali kbar fix-xejriet tal-kummerċ dinji minħabba l-globalizzazzjoni, b’riżultat ta’ kontinwazzjoni tal-kriżi finanzjarja u ekonomika globali indirizzata fir-Regolament (KE) Nru 546/2009 tal-Parlament Ewropew u tal-Kunsill 7 , jew b’riżultat ta’ kriżi finanzjarja u ekonomika globali ġdida, u biex jgħinhom fir-riintegrazzjoni tagħhom fis-suq tax-xogħol.
(2)Il-FEG ma għandux jaqbeż l-ammont massimu annwali ta’ EUR 150 miljun (prezzijiet tal-2011), kif stabbilit fl-Artikolu 12 tar-Regolament tal-Kunsill (UE, Euratom) Nru 1311/2013 8 .
(3)Ir-Regolament (UE) Nru 1309/2013 jistipula li kull sena jista’ jintuża massimu ta’ 0,5 % tal-ammont massimu annwali tal-FEG għall-għajnuna teknika fuq l-inizjattiva tal-Kummissjoni.
(4)Għaldaqstant, il-FEG għandu jiġi mobilizzat biex jipprovdi l-ammont ta’ EUR 310 000 għal għajnuna teknika fuq l-inizjattiva tal-Kummissjoni.
ADOTTAW DIN ID-DEĊIŻJONI:
Artikolu 1
Għall-baġit ġenerali tal-Unjoni Ewropea għas-sena finanzjarja 2017, il-Fond Ewropew ta’ Aġġustament għall-Globalizzazzjoni għandu jiġi mobilizzat biex jipprovdi s-somma ta’ EUR 310 000 f'approprjazzjonijiet ta’ impenn u ta’ pagament.
Artikolu 2
Din id-Deċiżjoni tidħol fis-seħħ l-għada tal-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell,
Għall-Parlament Ewropew Għall-Kunsill
Il-President Il-President