IL-KUMMISSJONI EWROPEA
Brussell, 23.11.2017
COM(2017) 693 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
Rapport dwar il-funzjonament tas-suq Ewropew tal-karbonju
IL-KUMMISSJONI EWROPEA
Brussell, 23.11.2017
COM(2017) 693 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
Rapport dwar il-funzjonament tas-suq Ewropew tal-karbonju
WERREJ
Lista ta’ akronimi u abbrevjazzjonijiet
1. INTRODUZZJONI
2. INFRASTRUTTURA TAL-EU ETS
2.1. Kopertura ta’ attivitajiet, ta’ stallazzjonijiet u ta’ operaturi ta’ inġenji tal-ajru
2.2. Ir-Reġistru tal-Unjoni u r-Reġistru tat-Tranżazzjonijiet tal-Unjoni Ewropea (EUTL)
3. FUNZJONAMENT TAS-SUQ TAL-KARBONJU FL-2016
3.1. Provvista: kwoti mqiegħda fiċ-ċirkolazzjoni
3.1.1. Limitu massimu
3.1.2. Kwoti maħruġa
3.1.3. Krediti internazzjonali
3.2. Domanda: kwoti meħuda barra miċ-ċirkolazzjoni
3.3. Ibbilanċjar tal-provvista u tad-domanda
4. AVJAZZJONI
5. SORVELJANZA TAS-SUQ
5.1. In-natura legali u t-trattament fiskali tal-kwoti tal-emissjonijiet
6. MONITORAĠĠ, RAPPORTAR U VERIFIKA TAL-EMISSJONIJIET
7. ĦARSA ĠENERALI LEJN L-ARRANĠAMENTI AMMINISTRATTIVI
8. KONFORMITÀ U INFURZAR
9. KONKLUŻJONIJIET U ASPETTATTIVI
ANNESS
Lista ta’ akronimi u abbrevjazzjonijiet
AVR Regolament dwar l-Akkreditazzjoni u l-Verifika
AK Awtorità Kompetenti
CCS Ġbir u Ħżin tad-Diossidu tal-Karbonju
CDM Mekkaniżmu għal Żvilupp Nadif
CERs Tnaqqis Iċċertifikat ta’ Emissjonijiet
CORSIA Skema ta’ Kumpens u Tnaqqis tal-Karbonju għall-Avjazzjoni Internazzjonali
EA Kooperazzjoni Ewropea għall-Akkreditazzjoni
ŻEE Żona Ekonomika Ewropea
EEX European Energy Exchange
BEI Bank Ewropew tal-Investiment
ERUs Unitajiet ta’ Tnaqqis tal-Emissjonijiet
EU ETS Skema tal-Unjoni Ewropea għall-Iskambju ta’ Kwoti tal-Emissjonijiet
EUTL Reġistru tat-Tranżazzjonijiet tal-Unjoni Ewropea
GHG Gass serra
ICAO Organizzazzjoni tal-Avjazzjoni Ċivili Internazzjonali
ICE ICE Future Europe
JI Implimentazzjoni Konġunta
MAR Regolament dwar l-Abbuż tas-Suq
MiFID2 Direttiva dwar is-Swieq tal-Istrumenti Finanzjarji
MRR Regolament dwar il-Monitoraġġ u r-Rapportar
MRV Monitoraġġ, Rapportar u Verifika
MRVA Monitoraġġ, Rapportar, Verifika u Akkreditazzjoni
MSR Riżerva tal-Istabbiltà tas-Suq
NAB Korp Nazzjonali ta’ Akkreditament
NER Riżerva għal Min Jidħol Ġdid
PFCs Perfluworokarburi
RES Sorsi ta' Enerġija Rinnovabbli
TNAC In-Numru Totali ta’ Kwoti fiċ-Ċirkolazzjoni
1.INTRODUZZJONI
Mill-2005 ’l hawn, l-Iskema tal-UE għan-Negozjar ta' Emissjonijiet (EU ETS) kienet ċentrali għall-istrateġija tal-UE għat-tnaqqis tal-emissjonijiet ta’ gassijiet serra (GHG) mill-industrija u mis-settur tal-enerġija. Din tikkontribwixxi b’mod sinifikanti għall-ilħuq tal-mira tal-UE li sal-2020 l-emissjonijiet GHG jitnaqqsu b’20 % mil-livelli tal-1990. Filwaqt li l-UE tinsab fit-triq it-tajba biex taqbeż din il-mira 1 , it-tnaqqis tal-emissjonijiet GHG b’mill-inqas 40 % sal-2030 – kif previst fil-qafas ta' politika tal-UE għall-klima u l-enerġija għall-2030 – jirrikjedi progress kontinwu 2 . Il-mira domestika tal-2030 ser titwassal kollettivament mill-UE, bi tnaqqis kemm fis-setturi tal-ETS kif ukoll f’dawk mhux tal-ETS. Madankollu, EU ETS li tiffunzjona tajjeb u riformata ser tikkostitwixxi l-mekkaniżmu ewlieni biex tintlaħaq din il-mira, billi jiġi ffaċilitat tnaqqis ta’ 43 % tal-emissjonijiet GHG meta mqabbel mal-livelli tal-2005 fis-setturi koperti mis-sistema.
Sabiex tippermetti lill-EU ETS tissodisfa dan l-għan, f’Lulju 2015, il-Kummissjoni ppreżentat proposta leġiżlattiva 3 biex tirriforma l-EU ETS għar-raba’ perjodu ta’ negozjar tagħha (2021- 2030). Fil-bidu ta’ Novembru 2017 intlaħaq ftehim politiku dwar il-proposta, wara proċess intensiv ta’ trilogi 4 .
Dan ir-Rapport dwar il-funzjonament tas-suq Ewropew tal-karbonju huwa ppreżentat f’konformità mar-rekwiżiti tal-Artikoli 10(5) u 21(2) tad-Direttiva 2003/87/KE 5 (id-Direttiva tal-EU ETS). Kif stipulat permezz tad-Direttiva, l-għan tar-rapport huwa li jipprovdi aġġornamenti regolari dwar l-iżviluppi fis-suq Ewropew tal-karbonju fuq bażi annwali.
Tabella 1: Rapporti dwar is-suq tal-karbonju ppubblikati fis-snin preċedenti 6
Referenza |
Perjodu kopert |
Il-kuntest politiku |
COM(2012) 652 |
2008-2011 |
Valutazzjoni tal-ħtieġa għal azzjoni regolatorja fid-dawl ta’ eċċess dejjem jikber fil-kwoti tal-emissjonijiet |
COM(2015) 576 |
2013-2014 |
Ir-rapport dwar l-ewwel Stat tal-Unjoni tal-Enerġija |
COM(2017) 48 |
2015 |
Ir-rapport dwar it-tieni Stat tal-Unjoni tal-Enerġija |
Ir-rapport preżenti jkopri s-sena 2016, iżda jippreżenta wkoll ċerti inizjattivi proposti jew miftiehma fl-2017. Meta mqabbel mar-rapport preċedenti, huwa jinkludi kapitolu ġdid dwar l-iskemi ta’ kumpens għall-kostijiet tal-karbonju indiretti, kif ukoll informazzjoni dwar l-indikatur ta’ eċċess tar-Riżerva tal-Istabbiltà tas-Suq ippubblikat għall-ewwel darba f’Mejju 2017. Sakemm ma jkunx indikat mod ieħor, id-dejta użata għal dan ir-rapport kienet dik disponibbli pubblikament u għad-dispożizzjoni tal-Kummissjoni sat-30 ta’ Ġunju 2017.
Informazzjoni ġenerali u deskrittiva dwar aspetti differenti tal-EU ETS hija inkluża fil-kaxex fir-rapport kollu.
2.INFRASTRUTTURA TAL-EU ETS
2.1.Kopertura ta’ attivitajiet, ta’ stallazzjonijiet u ta’ operaturi ta’ inġenji tal-ajru
L-EU ETS topera fil-31 pajjiż taż-Żona Ekonomika Ewropea (ŻEE). Din tillimita l-emissjonijiet minn kważi 11,000 impjant tal-enerġija u stallazzjonijiet tal-manifattura kif ukoll kemxejn aktar minn 500 operatur ta’ inġenji tal-ajru li jtiru bejn l-ajruporti taż-ŻEE. Din tkopri madwar 45 % tal-emissjonijiet GHG tal-UE.
Mill-Fażi 3 (2013-2020)*, is-setturi bi stallazzjonijiet stazzjonarji regolati mill-EU ETS huma industriji intensivi fl-enerġija, inklużi impjanti tal-enerġija u impjanti oħra ta’ kombustjoni, b’input nominali termiku ta’ >20MW (ħlief stallazzjonijiet ta’ skart perikoluż jew muniċipali), raffineriji taż-żejt, fran tal-kokk, ħadid u azzar, gagazza tas-siment, ħġieġ, ġir, brikks, ċeramika, polpa, karta u bord, aluminju, petrokimiċi, ammonijaka, produzzjoni ta’ aċidu nitriku, adipiku, gliossali u gliossiliku, ġbir ta’ CO2, trasport f’pipelines u ħżin ġeoloġiku ta’ CO2.
L-ambitu tal-avjazzjoni tal-EU ETS kien limitat għal titjiriet fiż-ŻEE sal-aħħar tal-2016, sal-adozzjoni ta’ approċċ globali mill-Organizzazzjoni tal-Avjazzjoni Ċivili Internazzjonali (ICAO). F’Ottubru 2016, l-ICAO qablet dwar riżoluzzjoni dwar l-Iskema ta’ Kumpens u Tnaqqis tal-Karbonju għall-Avjazzjoni Internazzjonali (CORSIA), li għandha tibda fl-2021. Fid-dawl ta’ dan ir-riżultat, il-Kummissjoni pproponiet li l-approċċ intra-ŻEE jitkompla lil hinn mill-2016 (ara t-Taqsima 4).
L-EU ETS tkopri emissjonijiet ta’ diossidu tal-karbonju (CO2), emissjonijiet ta’ ossidu nitruż (N2O) minn kull produzzjoni ta’ aċidu nitriku, adipiku, gliossali u gliossiliku u emissjonijiet ta’ perfluworokarburi (PFC) mill-produzzjoni tal-aluminju. Għalkemm parteċipazzjoni fl-EU ETS hija obbligatorja, f’xi setturi jiġu inklużi biss stallazzjonijiet akbar minn ċertu daqs. Barra minn hekk, il-pajjiżi parteċipanti jistgħu jeskludu stallazzjonijiet żgħar mis-sistema jekk ikun hemm miżuri fis-seħħ li jnaqqsu l-emissjonijiet tagħhom b’ammont ekwivalenti għall-ammont ta’ emissjonijiet li kienu jinqatgħu li kieku l-istallazzjonijiet kienu ġew inklużi fl-EU ETS. Il-pajjiżi parteċipanti jistgħu jżidu wkoll aktar setturi u GHGs fl-EU ETS.
* Informazzjoni dwar Fażijiet 1 u 2 tal-EU ETS tista’ tinstab hawnhekk: https://ec.europa.eu/clima/policies/ets/pre2013_mt
Skont ir-rapporti tal-Artikolu 21 ippreżentati mill-pajjiżi parteċipanti 7 fl-2017, fl-2016 kien hemm total ta’ 10 790 stallazzjoni permessa meta mqabbla ma’ madwar 10 950 fl-2015 u madwar 11 200 is-sena ta’ qabilha.
Kif kien il-każ fis-snin preċedenti, il-karburanti maħruqa fl-EU ETS fl-2016, kienu għadhom fil-maġġor parti assoluta fossili. Madankollu, 29 pajjiż irrapportaw ukoll użu tal-bijomassa (meta mqabbla mas-27 fl-2015) b’rabta mal-2 079 stallazzjoni (19 % tal-istallazzjonijiet kollha). Żewġ pajjiżi biss (LI u MT) ma rrapportaw l-ebda użu tal-bijomassa 8 . Fl-2016, l-emissjonijiet mill-bijomassa ammontaw għal madwar 141 miljun tunnellata ta’ CO2 (8 % tal-emissjonijiet irrapportati tal-EU ETS), meta mqabbla ma’ madwar 125 miljun tunnellata ta’ CO2 fl-2015 (madwar 7 % tal-emissjonijiet irrapportati tal-EU ETS). L-istess żewġ pajjiżi bħas-sena li għaddiet (DE u SE) irrapportaw użu baxx ta’ bijokarburant għal tliet operaturi ta’ inġenji tal-ajru (meta mqabbla ma’ erbgħa fl-2015) 9 .
Fi ħdan il-kategoriji ta’ stallazzjoni bbażati fuq l-emissjonijiet annwali 10 , id-dejta għall-2016 turi li, bħal fis-snin preċedenti, madwar 72 % tal-istallazzjonijiet huma tal-kategorija A, kważi 21 % huma tal-kategorija B u kemxejn aktar minn 7 % huma tal-kategorija C. Aktar minn 6 202 stallazzjoni ġew irrapportati bħala “stallazzjonijiet b’livelli baxxi ta’ emissjonijiet” (57.5 % tat-total).
L-istallazzjonijiet tal-EU ETS li jinvolvu l-attivitajiet ta’ kombustjoni jistgħu jinstabu fil-pajjiżi parteċipanti kollha, filwaqt li r-raffinar taż-żejt, il-produzzjoni tal-azzar, is-siment, il-ġir, il-ħġieġ, iċ-ċeramika u l-polpa u l-produzzjoni tal-karta jistgħu jinstabu fil-maġġor parti tagħhom. Rigward l-attivitajiet tal-EU ETS elenkati b’mod addizzjonali għal emissjonijiet mhux tas-CO2, hemm rapporti ta’ permessi maħruġa għall-aluminju primarju u għall-perfluworokarburi (PFCs) fi 13-il pajjiż (DE, ES, FR, GR, IS, IT, NL, NO, RO, SE, SI, SK, UK), filwaqt li għall-produzzjoni ta’ aċidu nitriku u N2O hemm rapporti ta’ permessi maħruġa f’21 pajjiż (bl-eċċezzjonijiet li huma CY, DK, EE, IE, IS, LI, LU, LV, MT, u SI). Is-setturi l-oħrajn tal-N2O – il-produzzjoni ta’ aċidu adipiku u l-produzzjoni ta’ aċidu gliossali u gliossiliku huma rrapportati fi tliet pajjiżi (DE, FR, IT) u f’żewġ pajjiżi (DE, FR), rispettivament. L-istess żewġ pajjiżi (FR u NO) bħas-sena li għaddiet iddikjaraw attivitajiet ta’ ġbir u ħżin tas-CO2.
Tmien pajjiżi (DE, ES, FR, HR, IS, IT, SI, UK) użaw il-possibbiltà li jeskludu emittenti żgħar mill-EU ETS f’konformità mal-Artikolu 27 tad-Direttiva tal-EU ETS. Bħal fl-2015, l-emissjonijiet esklużi għall-2016 ammontaw għal madwar 4 miljun tunnellata ta’ CO2 (madwar 0.22 % tal-emissjonijiet totali vverifikati).
Skont is-sottomissjonijiet tal-Artikolu 21 fl-2017, s’issa seba’ pajjiżi (BE, DK, FR, HR, HU, LI, LT) ħadu vantaġġ mid-dispożizzjoni offruta mill-Artikolu 13 tar-Regolament tal-Kummissjoni (UE) Nru 601/2012 (“ir-Regolament dwar il-Monitoraġġ u r-Rapportar”) li tippermettilhom jawtorizzaw l-użu ta’ pjanijiet ta’ monitoraġġ issimplifikati f’każijiet ta’ riskju baxx għal stallazzjonijiet stazzjonarji. Sa mill-2015, issieħbet biss id-Danimarka. Fil-każ tal-operaturi ta’ inġenji tal-ajru b’emissjonijiet baxxi, erba’ pajjiżi rrapportaw użu ta’ din id-dispożizzjoni (BE, FI, IS u PL) bil-Belġju li ssieħeb fl-2015.
Rigward il-kopertura tal-operaturi ta’ inġenji tal-ajru, fl-2016 503 operaturi ta’ inġenji tal-ajru ġew irrapportati li għandhom pjan ta’ monitoraġġ (meta mqabbla mal-524 irrapportati għall-2015, u 611 għall-2014). Dan jissuġġerixxi li n-numru ta’ operaturi ta’ inġenji tal-ajru fi ħdan l-EU ETS qiegħed jistabbilizza. Kważi 60 % (300) tal-operaturi rrapportati kienu kummerċjali filwaqt li l-40 % l-oħra (203) ma kinux kummerċjali 11 . Total ta’ 249 (kważi 50 %) ikkwalifikaw bħala emittenti żgħar (meta mqabbla ma’ 274 (52 %) fl-2015 u ma’ 329 (54 %) fl-2014).
2.2.Ir-Reġistru tal-Unjoni u r-Reġistru tat-Tranżazzjonijiet tal-Unjoni Ewropea (EUTL)
Ir-Reġistru tal-Unjoni u r-Reġistru tat-Tranżazzjonijiet tal-Unjoni Ewropea (EUTL) jintraċċaw is-sjieda tal-kwoti ġenerali u dawk tal-avjazzjoni u t-tranżazzjonijiet li jinvolvuhom billi jirreġistraw l-ammonti miżmuma fil-kontijiet tagħhom u t-tranżazzjonijiet bejn il-kontijiet. Dawn jitħaddmu u jinżammu mill-Kummissjoni, filwaqt li l-amministraturi tar-reġistru nazzjonali fil-31 pajjiż parteċipant jibqgħu jkunu l-punt ta’ kuntatt għar-rappreżentanti ta’ madwar 15 000 kont (il-kumpaniji jew il-persuni fiżiċi).
Filwaqt li r-Reġistru tal-Unjoni jżomm kontijiet għal stallazzjonijiet stazzjonarji u għal operaturi ta’ inġenji tal-ajru, l-EUTL jivverifika, jirreġistra u jawtorizza awtomatikament it-tranżazzjonijiet kollha bejn il-kontijiet, u b’hekk jiżgura li t-trasferimenti kollha jikkonformaw mar-regoli tal-EU ETS. Għalhekk, huma joffru lill-emittenti, lin-negozjanti u lill-31 awtorità nazzjonali Ewropej il-mezzi sabiex iwettqu l-attivitajiet tagħhom relatati mal-EU ETS: jallokaw kwoti bla ħlas lill-operaturi stazzjonarji u tal-avjazzjoni, jirreġistraw l-emissjonijiet, jawtorizzaw lill-emittenti, lin-negozjanti professjonali kif ukoll lil persuni fiżiċi biex jeżegwixxu negozju lest billi jittrasferixxu kwoti bejn il-kontijiet u jippermettu lill-emittenti jkopru l-emissjonijiet tagħhom billi jċedu kwoti.
*Id-Deċiżjoni Nru 406/2009/KE tal-Parlament Ewropew u tal-Kunsill tat-23 ta’ April 2009 dwar l-isforz tal-Istati Membri biex inaqqsu l-emissjonijiet tagħhom tal-gassijiet serra biex jonoraw l-impenji tal-Komunità għat-tnaqqis tal-emissjonijiet tal-gassijiet serra sal-2020, ĠU L 140, 5.6.2009, p. 136.
Fl-2016, ir-Reġistru tal-Unjoni baqa’ jipprovdi servizzi affidabbli lill-emittenti Ewropej (stallazzjonijiet stazzjonarji u operaturi tal-avjazzjoni), negozjanti, u awtoritajiet nazzjonali.
Diversi titjib tekniku u fl-użu ġew introdotti fir-reġistru. It-titjib jikkonċerna karatteristiċi ta’ mmaniġġjar tal-utent, kontijiet, u tranżazzjonijiet, kif ukoll is-sistema ta’ awtentikazzjoni, li tjiebet b’mod sostanzjali u saret Login tal-UE.
Fis-sajf tal-2017, il-Kummissjoni nediet stħarriġ dwar l-interfaċċa tal-utent tar-Reġistru tal-Unjoni, fejn talbet lill-utenti biex jipprovdu l-opinjonijiet tagħhom dwar il-funzjonament attwali tal-interfaċċa. L-għan kien li tkompli titjieb l-esperjenza tal-utent tar-reġistru.
3.FUNZJONAMENT TAS-SUQ TAL-KARBONJU FL-2016
Dan il-kapitolu jipprovdi informazzjoni dwar in-naħa tal-provvista u tad-domanda tal-EU ETS. It-taqsima tan-naħa tal-provvista tinkludi informazzjoni dwar il-limitu massimu, l-allokazzjoni bla ħlas, il-programm NER300, l-irkantar, id-deroga mill-irkantar sħiħ għas-settur tal-enerġija, kif ukoll l-użu ta’ krediti internazzjonali. Bħala element ġdid, ir-rapport ta’ din is-sena fih ukoll kapitolu dwar skemi ta’ kumpens għall-kostijiet tal-karbonju indiretti.
Min-naħa tad-domanda, hija pprovduta informazzjoni dwar in-numru ta’ emissjonijiet ivverifikati u dwar il-metodi biex jiġu bbilanċjati l-provvista u d-domanda ta’ kwoti, bħar-Riżerva tal-Istabbiltà tas-Suq (MSR).
3.1.Provvista: kwoti mqiegħda fiċ-ċirkolazzjoni
3.1.1.Limitu massimu
Il-limitu massimu huwa l-kwantità assoluta ta’ GHGs li jistgħu jiġu emessi fis-sistema biex jiżguraw li tintlaħaq il-mira ta’ tnaqqis ta’ emissjonijiet u li dan jikkorrispondi għan-numru ta’ kwoti mqiegħda fiċ-ċirkolazzjoni tul perjodu ta’ negozjar. Fil-Fażi 3, huwa applikat limitu massimu komuni madwar l-UE kollha, li jissostitwixxi s-sistema preċedenti ta’ limiti massimi nazzjonali.
Il-limitu massimu tal-2013 għall-emissjonijiet minn stallazzjonijiet stazzjonarji ġie stabbilit għal 2 084 301 856 kwota. Dan il-limitu massimu jonqos kull sena b’fattur lineari ta’ tnaqqis ta’ 1.74 % tal-kwantità totali medja ta’ kwoti maħruġa kull sena fl-2008-2012, u b’hekk jiżgura li n-numru ta’ kwoti li jistgħu jintużaw mill-istallazzjonijiet stazzjonarji ser ikun 21 % inqas fl-2020 minn dak fl-2005.
Il-limitu massimu tas-settur tal-avjazzjoni ġie stabbilit oriġinarjament għal 210 349 264 kwota tal-avjazzjoni fis-sena, li huwa 5 % inqas mil-livell medju annwali ta’ emissjonijiet tal-avjazzjoni fl-2004-2006. Fl-1 ta’ Jannar 2014, dan naqas b’116 524 kwota tal-avjazzjoni biex jakkomoda l-Kroazja li ser tissieħeb fl-EU ETS. Dan il-limitu massimu kien maħsub biex jirrifletti l-leġiżlazzjoni tal-2008* li kienet tinkludi avjazzjoni fl-EU ETS u li ddikjarat li t-titjiriet kollha minn, lejn u fi ħdan iż-ŻEE ser jiġu inklużi fl-EU ETS. Madankollu, l-ambitu tal-EU ETS kien temporanjament limitat għal titjiriet fi ħdan iż-ŻEE bejn l-2013 u l-2016 biex jappoġġja l-iżvilupp ta’ miżura globali mill-ICAO. Għalhekk, in-numru ta’ kwoti tal-avjazzjoni mqiegħda f’ċirkolazzjoni fl-2013-2016 kien ħafna aktar baxx mil-limitu massimu oriġinali. Fid-dawl tal-progress tal-miżura globali f’Ottubru 2016, il-Kummissjoni pproponiet biex l-approċċ attwali jitkompla lil hinn mill-2016 (ara t-taqsima 4).
* Id-Direttiva 2008/101/KE tal-Parlament Ewropew u tal-Kunsill tad-19 ta’ Novembru 2008, li temenda d-Direttiva 2003/87/KE sabiex tinkludi l-attivitajiet tal-avjazzjoni fl-iskema għall-iskambju ta’ kwoti tal-emissjonijiet ta’ gassijiet serra ġewwa l-Komunità
It-Tabella 2 turi ċ-ċifri għal-limitu massimu għall-istallazzjonijiet stazzjonarji u n-numru ta’ kwoti tal-avjazzjoni mqiegħda kull sena fiċ-ċirkolazzjoni 12 għal kull sena matul il-Fażi 3 tal-EU ETS.
Tabella 2: Limitu tal-EU ETS 2013-2020
|
|
Kwoti tal-avjazzjoni annwali mqiegħda fiċ-ċirkolazzjoni 13 |
2013 |
2 084 301 856 |
32 455 312 |
2014 |
2 046 037 610 |
41 681 025 |
2015 |
2 007 773 364 |
48 543 026 |
2016 |
1 969 509 118 |
38 034 475 |
2017 |
1 931 244 873 |
37 833 819 14 |
2018 |
1 892 980 627 |
|
2019 |
1 854 716 381 |
|
2020 |
1 816 452 135 |
3.1.2.Kwoti maħruġa
3.1.2.1.Allokazzjoni bla ħlas
Għalkemm fil-Fażi 3 l-irkantar huwa l-metodu prestabbilit għall-allokazzjoni tal-kwoti tal-emissjonijiet lil kumpaniji li jieħdu sehem fl-EU ETS, ammont sinifikanti ta' kwoti ser jibqgħu jiġu allokati bla ħlas sal-2020 u aktar tard. Japplikaw il-prinċipji li ġejjin:
L-allokazzjoni bla ħlas hija pprovduta lill-istallazzjonijiet industrijali biex jindirizzaw ir-riskju potenzjali ta’ rilokazzjoni tal-emissjonijiet tal-karbonju (sitwazzjoni fejn il-kumpaniji jittrasferixxu produzzjoni lil pajjiżi terzi b’restrizzjonijiet inqas stretti fuq l-emissjonijiet GHG għal raġunijiet ta’ kostijiet relatati mal-politiki dwar il-klima tal-UE, li tista’ twassal potenzjalment għal żieda fl-emissjonijiet totali tagħhom). Is-setturi u s-subsetturi meqjusa bħala esposti għal riskju sinifikanti ta’ rilokazzjoni tal-emissjonijiet tal-karbonju huma mqiegħda f’lista ta’ rilokazzjoni tal-emissjonijiet tal-karbonju*, li bħalissa tkopri l-perjodu 2015-2019.
* Il-lista ta’ rilokazzjoni tal-emissjonijiet tal-karbonju attwali tista’ tinstab hawnhekk: http://eur-lex.europa.eu/legal-content/MT/ALL/?uri=CELEX:32014D0746
·Il-ġenerazzjoni tal-elettriku ma għadhiex tirċievi kwoti bla ħlas;
·Il-kwoti huma distribwiti bla ħlas skont ir-regoli armonizzati madwar l-UE kollha;
·L-allokazzjoni bla ħlas hija bbażata fuq parametri referenzjarji tal-prestazzjoni għat-tisħiħ tal-inċentivi għat-tnaqqis ta’ emissjonijiet GHG u għall-ippremjar tal-istallazzjonijiet l-aktar effiċjenti;
·Ġiet stabbilita riżerva għal Min Jidħol Ġdid (NER) madwar l-UE kollha, ekwivalenti għal 5 % tal-ammont totali ta’ kwoti għall-Fażi 3.
Tul il-Fażi 3, 39 % tal-kwantità totali ta’ kwoti disponibbli ser tiġi allokata bla ħlas lil stallazzjonijiet industrijali u li jiġġeneraw l-elettriku għas-sħana li jipproduċu. Dan is-sehem ser ikompli jiżdied minħabba l-allokazzjonijiet lil min jidħol ġdid sal-2020. Mhuwiex possibbli li jiġi stabbilit kemm mill-NER ser jintuża fis-snin li ġejjin. Madankollu, il-Valutazzjoni tal-Impatt tal-2015 tal-Kummissjoni 15 indikat li f’konformità max-xejriet, kien mistenni li xejn aktar minn 2 % tal-limitu massimu jista’ jiġi allokat b’mod addizzjonali bla ħlas mill-NER. Għaldaqstant, tul il-Fażi 3, l-allokazzjoni bla ħlas hija mistennija li tkun madwar 41 % tal-ammont totali. Barra minn hekk, madwar 2 % tal-limitu massimu totali jintuża biex jiffinanzja l-iskjerament ta’ teknoloġiji innovattivi b'emissjonijiet baxxi ta' karbonju permezz tal-programm NER300 16 . Għaldaqstant, is-sehem tal-irkant fil-Fażi 3 jammonta għal 57 %.
Fil-Fażi 3 stallazzjonijiet ġodda u stallazzjonijiet li jżidu l-kapaċità b’mod sinifikanti huma eliġibbli għal allokazzjoni bla ħlas addizzjonali mill-NER. L-NER inizjali, wara li tnaqqsu 300 miljun kwota għall-programm NER300, żammet 480.2 miljun kwota. 139.9 miljun kwota ġew riżervati għal 654 stallazzjoni għall-Fażi 3 kollha 17 . L-NER li jifdal, li tammonta għal 340.3 miljun kwota, tista’ tiġi distribwita fil-futur. Madankollu, huwa mistenni li numru sinifikanti ta’ dawn il-kwoti ser jibqa’ mhux allokat.
Sa Ġunju 2017, l-allokazzjoni tnaqqset b’madwar 301.9 miljun kwota minħabba stallazzjonijiet li għalqu jew li naqqsu l-produzzjoni jew il-kapaċità ta’ produzzjoni tagħhom meta mqabbla ma’ dik inizjalment użata għall-kalkolu tal-allokazzjoni tal-Fażi 3.
Tabella 3: In-numru ta’ kwoti (f’miljuni) allokati għall-industrija bla ħlas mill-2013 sal-2017 18
2013 |
2014 |
2015 |
2016 |
2017 |
|
Allokazzjoni bla ħlas
19
|
903.0 |
874.8 |
847.6 |
821.3 |
796.2 |
Allokazzjoni mir-riżerva għal min jidħol ġdid (investimenti f’żona ġdida u żidiet fil-kapaċità) |
11.2 |
14.6 |
17.3 |
18.3 |
17.6 |
Kwoti bla ħlas li jifdal mhux allokati minħabba għeluq jew bidliet fil-produzzjoni jew il-kapaċità tal-produzzjoni |
40.2 |
58.6 |
69.9 |
65.5 |
67.5 |
Peress li d-domanda għal allokazzjoni bla ħlas qabżet l-ammont disponibbli, l-allokazzjoni għall-istallazzjonijiet kollha skont l-EU ETS tnaqqset bl-istess perċentwal bl-applikazzjoni ta’ “koeffiċjent ta’ korrezzjoni transettorjali” (skont id-Direttiva dwar l-ETS). Il-koeffiċjent ta’ korrezzjoni ġie kkalkolat bħala tnaqqis fl-allokazzjoni bla ħlas ta’ madwar 6 % fl-2013, li qiegħda tiżdied kull sena sakemm tilħaq madwar 18 % fl-2020.
Fit-28 ta’ April 2016, il-Qorti tal-Ġustizzja Ewropea
20
invalidat sa mill-1 ta’ Marzu 2017, il-valuri tal-koeffiċjent ta’ korrezzjoni transettorjali stabbiliti fid-Deċiżjoni tal-Kummissjoni 2013/448/UE (ara l-Appendiċi 5 tal-Anness). Konsegwentement, fl-24 ta’ Jannar 2017, il-Kummissjoni rrevediet il-valuri stabbiliti f’dik id-Deċiżjoni
21
sabiex iġġibhom f’konformità mas-sentenza tal-Qorti tal-Ġustizzja.
3.1.2.2.Il-programm NER 300
L-NER300 huwa programm ta’ finanzjament fuq skala kbira għal proġetti ta’ dimostrazzjoni innovattivi ta’ enerġija b'emissjonijiet baxxi ta' karbonju. Huwa mmirat għall-wiri ta’ ġbir u ħżin tal-karbonju (CCS) sikuri għall-ambjent u teknoloġiji innovattivi ta’ sorsi tal-enerġija rinnovabbli (RES) fuq skala kummerċjali fi ħdan l-UE.
L-NER 300 huwa ffinanzjat mill-monetizzazzjoni ta’ 300 miljun kwota tal-emissjoni mill-NER stabbiliti għall-Fażi 3 tal-EU ETS. Il-fondi mill-monetizzazzjoni ngħataw lill-proġetti magħżula permezz ta’ żewġ sensiliet ta’ sejħiet għal proposti f’Diċembru 2012 u f’Lulju 2014.
Bħala riżultat taż-żewġ sejħiet għal proposti, b’kollox ingħataw 38 proġett RES u 1 proġett CCS, li jkopru 20 Stat Membru tal-UE u li jammontaw għal EUR 2.1 biljun. Minnhom, diġà hemm erbgħa li bdew jaħdmu: il-proġett tal-bijoenerġija BEST fl-Italja, il-proġett tal-bijoenerġija Verbiostraw fil-Ġermanja, Windpark Blaiken fl-Iżvezja, u, mill-1 ta’ Lulju 2017, il-park eoliku fuq il-baħar ta’ Veja Mate fil-Baħar tat-Tramuntana Ġermaniż.
S’issa, b’kollox hemm tlettax-il proġett li laħqu d-deċiżjoni finali ta’ investiment, filwaqt li erba’ proġetti ġew ikkanċellati. Il-Kummissjoni pproponiet li l-fondi li ma ntefqux mill-proġetti kkanċellati jiġu investiti mill-ġdid, li jammontaw għal mill-inqas EUR 436 miljun, fi strumenti finanzjarji eżistenti, jiġifieri l-Proġetti ta’ Dimostrazzjoni fil-Qasam tal-Enerġija (EDP) InnovFin u l-istrument ta’ dejn tal-Faċilità Nikkollegaw l-Ewropa, it-tnejn li huma mmaniġġjati mill-Bank Ewropew tal-Investiment (BEI). Għal dan il-għan, f’Mejju 2017, l-Istati Membri approvaw emenda rilevanti 22 għad-Deċiżjoni NER 300 23 fil-Kumitat dwar it-Tibdil fil-Klima.
Tabella 4: Il-proġetti tal-NER 300 li ntgħażlu fl-ewwel u fit-tieni sejħa għal proposti 24
L-ewwel Sejħa għal proposti |
It-tieni Sejħa għal proposti |
|
Proġetti fil-fażi tal-ippjanar |
1 |
17 |
Proġetti għal meta tintlaħaq deċiżjoni finali ta’ investiment |
11 |
2 |
Proġetti operazzjonali |
4 |
0 |
Proġetti rtirati |
4 |
0 |
Total |
20 |
19 |
Il-pubblikazzjoni ta’ aktar sejħiet għal proposti tal-NER 300 mhijiex prevista. Il-Kummissjoni issa qiegħda tiffoka fuq l-implimentazzjoni 25 tal-proġetti magħżula għal finanzjament, u l-investiment mill-ġdid rapidu ta’ fondi li ma ntefqux.
3.1.2.3.Kumpens għall-kostijiet tal-karbonju indiretti
Kif spjegat fit-taqsima 3.1.2.1, l-industriji intensivi fl-enerġija meqjusa bħala esposti għal riskju ta’ rilokazzjoni tal-emissjonijiet tal-karbonju huma eliġibbli għal kwoti bla ħlas biex ikopru l-kostijiet tal-karbonju diretti tagħhom. Barra minn hekk, l-Istati Membri tal-UE jistgħu jagħtu għajnuna mill-Istat biex jikkumpensaw xi industriji elettrointensivi għal kostijiet tal-karbonju indiretti, jiġifieri żidiet fil-prezzijiet tal-elettriku, mgħoddija minn ġeneraturi tal-enerġija minħabba l-EU ETS.
Sabiex tiġi żgurata applikazzjoni armonizzata ta’ kumpens għal kost tal-karbonju indirett fl-Istati Membri kollha, u jitnaqqsu d-distorsjonijiet tal-kompetizzjoni fis-suq intern, il-Kummissjoni adottat il-Linji Gwida tal-Għajnuna mill-Istat tal-EU ETS* għall-perjodu 2013-2020. Il-Linji Gwida jiddeterminaw, fost l-oħrajn, is-setturi eliġibbli u l-ammonti massimi għal kumpens ta’ kostijiet tal-karbonju indiretti. L-għajnuna mill-Istat mogħtija għal dan il-għan hija parzjali u qiegħda tonqos maż-żmien**, għalhekk għandhom jinżammu l-inċentivi għall-effiċjenza tal-elettriku u ssir t-tranżizzjoni lejn elettriku “nadif”, f’konformità mal-għanijiet tal-EU ETS.
* Linji Gwida dwar ċerti miżuri ta' għajnuna mill-Istat fil-kuntest tal-iskema għall-iskambju ta' kwoti ta' emissjonijiet ta' gassijiet serra wara l-2012, ĠU C 158, 05.06.2012, p. 4
** Is-sehem massimu ta’ kostijiet eliġibbli jonqos minn 85 % għall-perjodu 2013-2015, għal 75 % għall-perjodu 2019-2020.
S’issa, il-Kummissjoni approvat 10 skemi ta’ għajnuna mill-Istat għal kumpens ta’ kostijiet tal-karbonju indiretti. It-Tabella 5 tippreżenta sommarju tal-iskemi ta’ kumpens għall-kostijiet tal-karbonju indiretti approvati sa mill-2013.
Tabella 5: Skemi ta’ kumpens għall-kostijiet tal-karbonju indiretti approvati fi ħdan il-qafas tal-Linji gwida ETS 2012 26
Stat Membru |
Livell massimu tal-iskemi ta’ kumpens għall-kostijiet tal-karbonju indiretti approvat/(livell massimu medju annwali approvat) f’miljuni |
Tul tal-iskema |
Dħul mill-irkant tal-Istati Membri tal-2016 (esklużi l-kwoti tal-avjazzjoni) f’miljuni |
Ir-Renju Unit |
£113 27 / (13 - 50) |
2013 - 2020 |
EUR 419 |
DE |
EUR 756 28 / ( 203 - 350) |
2013 - 2020 |
EUR 846 |
BE |
EUR 113 29 / ( 38) |
2013 - 2020 |
EUR 107 |
NL |
EUR 156 30 /(78) |
2013 - 2020 |
EUR 142 |
EL |
EUR 160 31 /(40) |
2013 - 2020 |
EUR 147 |
LT |
EUR 13.1 / (1-3) |
2014 - 2020 |
EUR 21 |
SK |
EUR 250/ (35) |
2014 - 2020 |
EUR 65 |
FR |
EUR 364/ (61) |
2015 - 2020 |
EUR 231 |
FI |
EUR 149/ (30) |
2016 - 2020 |
EUR 71 |
ES |
EUR 5/ (1-3) |
2013 - 2015 |
EUR 365 |
EUR 106 /(6-25) |
2016 -2020 |
3.1.2.4.Irkant ta’ kwoti
Mill-Fażi 3 tal-EU ETS, l-irkantar permezz tas-suq primarju jsir il-mod prestabbilit għall-allokazzjoni ta’ kwoti. Aktar minn nofs il-kwoti għandhom jiġu rkantati waqt din il-fażi, bis-sehem jibqa’ jiżdied matul il-perjodu ta’ negozjar kollu. L-irkanti huma rregolati mir-Regolament dwar l-Irkantar* li jispeċifika t-twaqqit, l-amministrazzjoni u aspetti oħrajn ta’ kif jenħtieġ li jsiru l-irkanti sabiex jiġi żgurat proċess miftuħ, trasparenti, armonizzat u nondiskriminatorju.
* Ir-Regolament tal-Kummissjoni (UE) Nru 1031/2010 tat-12 ta’ Novembru 2010 dwar l-għażla taż-żmien, l-amministrazzjoni u aspetti oħra ta’ rkantar ta’ kwoti ta’ emissjonijiet ta’ gassijiet serra skont id-Direttiva 2003/87/KE tal-Parlament Ewropew u tal-Kunsill li tistabilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità, ĠU L 302, 18.11.2010, p.1.
L-irkanti matul il-perjodu ta' rapportar saru permezz tal-pjattaformi tal-irkant li ġejjin:
·European Energy Exchange AG (“EEX”), f’irkant bħala l-pjattaforma tal-irkant komuni għall-25 Stat Membru li ħadu sehem fi proċedura ta’ akkwist konġunt u għall-Polonja li ma ħaditx sehem fil-proċedura ta’ akkwist konġunt iżda li għadha ma għażlitx il-pjattaforma tal-irkant tagħha stess. Mill-5 ta’ Settembru 2016, EEX bdiet tmexxi l-irkanti bħala t-tieni pjattaforma tal-irkant komuni magħżula fit-13 ta’ Lulju 2016;
·EEX, f’irkant għall-Ġermanja bħala pjattaforma tal-irkant ta’ “nonparteċipazzjoni”;
·ICE Future Europe (“ICE”), f’irkant għar-Renju Unit bħala pjattaforma tal-irkant ta’ “nonparteċipazzjoni”.
L-Iżlanda, il-Liechtenstein u n-Norveġja għadhom ma bdewx l-irkantar tal-kwoti tagħhom.
Fl-2016, EEX, f’irkant f’isem 27 Stat Membru (25 Stat Membru li jikkooperaw fuq pjattaforma tal-irkant komuni, il-Ġermanja u l-Polonja) irkantat 89 % tal-ammont totali rkantat, filwaqt li ICE rkantat 11 % tal-ammont totali f’isem ir-Renju Unit.
Fl-4 ta’ Mejju 2017, seħħ l-irkant bin-numru 1000 li sar fuq pjattaformi skont ir-Regolament dwar l-Irkantar. Sat-30 ta’ Ġunju 2017, in-numru ta’ rkanti li ntlaħaq kien 1036.
It-Tabella 6 tipprovdi ħarsa ġenerali lejn il-volumi ta’ kwoti rkantati minn EEX u ICE sat-30 ta’ Ġunju 2017, inklużi l-irkanti bikrija 32 ta’ kwoti ġenerali. Il-volumi ta’ kwoti ġenerali ġew stabbiliti fid-dawl tad-Deċiżjoni 1359/2013/UE li jiġu posposti 900 miljun kwota mill-2014, 2015 u 2016. Il-volumi ta’ kwoti tal-avjazzjoni ġew stabbiliti fid-dawl tad-derogi temporanji għas-settur tal-avjazzjoni stabbiliti fid-Deċiżjoni Nru 377/2013/UE u r-Regolament (UE) Nru 421/2014.
Tabella 6: Volum totali tal-kwoti tal-Fażi 3 irkantati fl-2012-2017
Sena |
|
Kwoti tal-avjazzjoni |
2012 |
89 701 500 |
2 500 000 |
2013 |
808 146 500 |
0 |
2014 |
528 399 500 |
9 278 000 |
2015 |
632 725 500 |
16 390 500 |
2016 |
715 289 500 |
5 997 500 |
2017 (sal-1 ta’ April) 33 |
241 935 000 |
0 |
L-irkanti ġeneralment twettqu mingħajr tfixkil u l-prezzijiet tal-bejgħ fl-irkant kienu ġeneralment konformi mal-prezzijiet tas-suq sekondarju, mingħajr ma jkun hemm problemi jew inċidenti sinifikanti. Minħabba t-tranżizzjoni bejn il-pjattaforma ta’ rkant tranżizzjonali u l-pjattaforma ta’ rkant komuni suċċessur tagħha, ma twettaq l-ebda rkant għall-25 Stat Membru parteċipanti għal madwar ġimgħa f’Awwissu 2016.
L-irkant tal-25 ta’ Mejju 2016, li sar minn EEX għall-Polonja u dak tal-14 ta’ Diċembru 2016 li sar minn ICE għar-Renju Unit ġew ikkanċellati f’konformità mad-dispożizzjonijiet tar-Regolament dwar l-Irkantar. Fil-każ tal-irkant tal-Polonja, dan sar minħabba li l-prezz ta' riżerva ma ntlaħaqx, filwaqt li fil-każ tar-Renju Unit, il-volum tal-offerta totali ma laħħaqx mal-volum irkantat. B’dawn, ġew ikkanċellati total ta’ ħames irkanti fost aktar minn elf li saru skont ir-Regolament dwar l-Irkantar sa mill-aħħar tal-2012. Ħarsa ġenerali tal-prezzijiet tal-bejgħ fl-irkant, in-numru ta’ parteċipanti u l-proporzjon ta’ kopertura għall-kwoti ġenerali mill-2013 sat-30 ta’ Ġunju 2017 hija pprovduta fl-Appendiċi 2 tal-Anness.
Il pjattaformi tal-irkant jippubblikaw ir-riżultati ddettaljati ta’ kull irkant f’siti web apposta. Aktar informazzjoni dwar il-prestazzjoni tal-irkanti, inkluż dwar il-parteċipazzjoni, il-proporzjon ta’ kopertura u l-prezzijiet, tista’ tinstab fir-rapporti tal-Istati Membri ppubblikati mill-Kummissjoni 34 .
Id-dħul totali ġġenerat mill-irkanti bejn l-2012 u t-30 ta’ Ġunju 2017 qabeż il-EUR 18.4 biljun (fl-2016 biss, id-dħul totali ġġenerat kien ta’ EUR 3.79 biljun). Id-Direttiva tal-EU ETS tipprovdi li tal-anqas 50 % tad-dħul mill-irkant, inkluż id-dħul kollu ġġenerat minn kwoti mqassma għall-finijiet tas-solidarjetà u tat-tkabbir, jenħtieġ li jintuża mill-Istati Membri għal finijiet relatati mal-klima u mal-enerġija. Fl-2016, l-irkantar tal-kwoti tal-ETS iġġenera EUR 3.79 biljun fi dħul għall-Istati Membri. Skont l-informazzjoni ppreżentata lill-Kummissjoni, l-Istati Membri nefqu jew ippjanaw li jonfqu madwar 80 % ta’ dak id-dħul għal finijiet speċifiċi relatati mal-klima u mal-enerġija fl-2016 35 , madankollu hemm xi differenzi bejniethom 36 .
3.1.2.5.Deroga mill-irkantar sħiħ għas-settur tal-enerġija
Deroga mir-regola ġenerali tal-irkantar ingħatat fl-Artikolu 10c tad-Direttiva tal-EU ETS biex tappoġġja investimenti fil-modernizzazzjoni tas-settur tal-elettriku f’ċerti Stati Membri tal-UE. Tmienja minn għaxar Stati Membri eliġibbli* jużaw din id-deroga u jallokaw lill-ġeneraturi tal-elettriku numru ta’ kwoti bla ħlas bil-kundizzjoni li jsiru investimenti korrispondenti.
Il-kwoti bla ħlas skont l-Artikolu 10c jitnaqqsu mill-kwantità li l-Istat Membru rispettiv kieku kien jirkanta. Skont ir-regoli nazzjonali għall-implimentazzjoni tad-deroga, il-ġeneraturi tal-elettriku jistgħu jirċievu kwoti bla ħlas ta’ valur ekwivalenti għall-investimenti li jwettqu mill-Pjanijiet Nazzjonali ta’ Investiment tagħhom, jew għall-pagamenti magħmula f’fond nazzjonali li permezz tiegħu jistgħu jiġu ffinanzjati dawn l-investimenti.
*Il-Bulgarija, Ċipru, ir-Repubblika Ċeka, l-Estonja, l-Ungerija, il-Latvja, il-Litwanja, Malta, il-Polonja u r-Rumanija huma eliġibbli għad-deroga. Malta u l-Latvja ddeċidew li ma jużawhiex.
In-numru ta’ kwoti allokati bla ħlas lill-ġeneraturi tal-elettriku fl-2016 huwa indikat fit-Tabella 1, Appendiċi 1 tal-Anness, filwaqt li n-numru massimu ta’ kwoti fis-sena huwa indikat fit-Tabella 2 tal-Appendiċi 1.
Il-valur totali tal-appoġġ tal-investiment irrapportat matul is-snin 2009 sal-2016 huwa ta’ madwar EUR 11-il biljun. Madwar 80 % ta’ dan kien iddedikat għal titjib u modifikazzjoni fl-infrastruttura, filwaqt li l-bqija tal-investimenti kienu fit-teknoloġiji nodfa jew fid-diversifikazzjoni tal-provvista. Xi eżempji ta’ investimenti jinkludu t-tnaqqis tal-konsum tal-enerġija għall-ġenerazzjoni tal-elettriku fil-Litwanja, is-sostituzzjoni ta’ insulazzjoni fuq linji ta’ distribuzzjoni tal-fwar eżistenti fir-Repubblika Ċeka, u l-kostruzzjoni ta’ unità ta’ koġenerazzjoni li taħdem prinċipalment bil-gass naturali fil-Bulgarija.
Kwalunkwe kwota li ma tingħatax bla ħlas tiġi rkantata. Figura 1 turi n-numru ta’ kwoti li ntalbu mill-Istati Membri eliġibbli matul is-snin 2013-2016.
Figura 1: Kwoti allokati bla ħlas skont l-Artikolu 10c
Il-Figura 2 turi, għall-kwoti tal-Artikolu 10c, il-punt sa fejn dawn ġew allokati, irkantati jew jibqgħu ma jintużawx. Pereżempju, 82 miljun kwota mhux użati tnaqqsu mis-sehem ta’ kwoti rkantati tal-Polonja bejn l-2013 u l-2016, iżda għadhom ma ngħatawx b’xejn jew ġew miżjuda fl-irkantijiet.
Figura 2: Id-distribuzzjoni tal-kwoti (allokati, irkantati, li fadal mhux użati)
Kwoti allokati |
|
Kwoti rkantati |
|
Kwoti li fadal mhux użati |
It-Tabella 7 turi n-numru ta’ kwoti mhux użati mnaqqsa għas-snin sal-2016 li ġew irkantati fil-perjodu 2013-2016, kif ukoll in-numru ta’ kwoti li fadal mhux użati.
Tabella 7: Trattament tal-kwoti mhux użati tal-Artikolu 10c 2013-2016
Stat Membru |
Numru ta’ kwoti mhux użati tal-Artikolu 10c irkantati (f’miljuni) |
Numru ta’ kwoti mhux użati li jifdal 37 (f’miljuni) |
BG |
6,9 |
0,0 |
CY |
0,0 |
0,0 |
CZ |
0,1 |
0,2 |
EE |
0,2 |
0,3 |
HU |
0 |
0,9 |
LT |
0,3 |
0,6 |
PL |
0,0 |
82,8 |
RO |
8,8 |
6,6 |
Total |
16,3 |
90,5 |
3.1.3.Krediti internazzjonali
Il-parteċipanti fl-EU ETS jistgħu jużaw krediti internazzjonali mill-Mekkaniżmu għal Żvilupp Nadif (CDM) u l-Implimentazzjoni Konġunta (IJ) tal-Protokoll ta’ Kjoto sabiex jissodisfaw il-parti tal-obbligi tagħhom tal-EU ETS sal-2020*. Dawn il-krediti huma strumenti finanzjarji li jirrappreżentaw tunnellata ta’ CO2 imneħħija jew imnaqqsa mill-atmosfera bħala riżultat ta’ proġett għat-tnaqqis tal-emissjonijiet. Fil-fażi 3, il-krediti ma jibqgħux jiġu ċeduti direttament, iżda minflok jistgħu jiġu skambjati għal kwoti fi kwalunkwe ħin matul is-sena kalendarja.
Numru ta’ standards kwalitattivi japplikaw għall-użu ta’ krediti mill-parteċipanti tal-EU ETS: il-krediti mhumiex aċċettati minn proġetti nukleari, ta’ tisġir u ta’ riforestazzjoni, u proġetti ġodda rreġistrati wara l-2012 jridu jsiru fil-pajjiżi l-inqas żviluppati. Hemm ukoll livelli massimi ta’ krediti li jistgħu jintużaw mill-istallazzjonijiet stazzjonarji u mill-operaturi ta’ inġenji tal-ajru**.
* Proġetti CDM u JI jiġġeneraw krediti tal-karbonju ta’ Kjoto: Tnaqqis Iċċertifikat ta' Emissjonijiet (CERs) u Unitajiet ta’ Tnaqqis tal-Emissjonijiet (ERUs) rispettivament. Ir-Regolament tal-Kummissjoni (UE) Nru 389/2013 jistipula li l-ERUs maħruġa minn pajjiżi terzi li ma jkollhomx miri legalment vinkolanti ta' emissjonijiet ikkwantifikati mill-2013 sal-2020, kif stipulat fl-emenda ta’ Doha għall-Protokoll ta' Kjoto jew li ma jkunux iddepożitaw strument ta' ratifika marbut ma' tali emenda, jenħtieġ li jinżammu biss fir-Reġistru tal-Unjoni jekk ikunu ġew iċċertifikati li jirrelataw mat-tnaqqis fl-emissjonijiet ivverifikati li jkunu saru qabel l-2013.
**Ir-Regolament tal-Kummissjoni (UE) Nru 1123/2013 tat-8 ta’ Novembru 2013 dwar id-determinazzjoni tad-drittijiet ta’ kreditu internazzjonali skont id-Direttiva 2003/87/KE tal-Parlament Ewropew u tal-Kunsill, ĠU L 299, 9.11.2013, p. 32
Għalkemm il-kwantità eżatta ta’ intitolamenti ta’ kreditu internazzjonali matul il-Fażijiet 2 u 3 (2008-2020) ser tiddependi parzjalment fuq il-kwantità ta’ emissjonijiet ivverifikati futuri, l-analisti tas-suq jistmaw li din ser tammonta għal madwar 1.6 biljun kreditu. Mit-30 ta’ Ġunju 2017, in-numru totali ta’ krediti internazzjonali użati jew skambjati jammonta għal 1.48 biljuni, jiġifieri aktar minn 90 % tal-istima għall-massimu awtorizzat.
Il-Figura 3 turi l-iskambju ta’ krediti internazzjonali. Għal ħarsa ġenerali sħiħa, ara l-Appendiċi 3 tal-Anness.
Figura 3: Sommarju ta’ skambju ta’ krediti internazzjonali sat-30 ta’ Ġunju 2017
3.2.Domanda: kwoti meħuda barra miċ-ċirkolazzjoni
Fl-2016, ġie stmat li l-emissjonijiet ta’ GHGs mill-istallazzjonijiet li qed jieħdu sehem fl-EU ETS naqsu bi 2.9 % meta mqabbla mal-2015 abbażi tal-informazzjoni li hemm fir-Reġistru tal-Unjoni. Dan juri tendenza ta’ tnaqqis fl-emissjonijiet sa mill-bidu tal-Fażi 3 tas-sistemi fl-2013.
Tabella 8: Emissjonijiet ivverifikati (f’miljun tunnellata ta’ ekwivalenti ta’ CO2)
|
|
|
|
|
|
|
Emissjonijiet totali vverifikati |
1904 |
1867 |
1908 |
1814 |
1803 |
1750 |
Bidla għas-sena x-1 |
-1.8% |
-2 % |
2.2 % |
-4.9 % |
-0.6 % |
-2.9 % |
Emissjonijiet ivverifikati mis-settur tal-enerġija |
1.185 |
1.181 |
1.128 |
1.039 |
1.031 |
982 |
Bidla għas-sena x-1 |
-0,3 % |
-4,4 % |
-7,9 % |
-0,8 % |
-4,8 % |
|
Emissjonijiet ivverifikati mill-istallazzjonijiet industrijali |
720 |
686 |
780 |
775 |
772 |
768 |
Bidla għas-sena x-1 |
-4,6 % |
13,7 % |
-0,7 % |
-0,4 % |
-0,5 % |
|
|
|
|
|
|
|
|
Dejta tal-PDG kif irrapportata fuq: http://epp.eurostat.ec.europa.eu/tgm/table.do?tab=table&init=1&plugin=1&language=en&pcode=tec00115
(aċċessata f’Lulju 2017). L-emissjonijiet ivverifikati tal-avjazzjoni huma rrapportati b’mod separat fit-taqsima 4.
Kif turi t-tabella, l-attivitajiet ta’ kombustjoni kienu l-ixprun ewlieni fit-tnaqqis tal-emissjonijiet ivverifikati.
In-numru ta’ kwoti kkanċellati fuq bażi volontarja jammonta għal 63 573 kwota fl-2016. B’kollox, s’issa ġew irreġistrati l-kanċellazzjonijiet volontarji ta’ 267 933 kwota.
3.3.Ibbilanċjar tal-provvista u tad-domanda
Fil-bidu tal-Fażi 3, l-EU ETS kienet ikkaratterizzata minn żbilanċ kbir bejn il-provvista u d-domanda tal-kwoti, li jirriżulta f’eċċess ta’ madwar 2.1 biljun fl-2013. L-eċċess tnaqqas kemxejn fl-2014, u mbagħad naqas b’mod sinifikanti għal 1.78 biljun kwota fl-2015 u għal 1.69 biljun kwota fl-2016. Dan jirrifletti l-impatt ta’ tnaqqis ulterjuri tal-provvista tal-kwoti fl-2016, is-sena finali tal-miżura dwar il-posponiment lejn tmiem il-perjodu, b’200 miljun. Minħabba li l-emissjonijiet naqsu b’madwar 2.9 % fl-2016, provvista aktar baxxa bbilanċjat parzjalment l-impatt tat-tnaqqis fil-provvista fuq l-eċċess.
Sabiex jiġi indirizzat l-iżbilanċ strutturali bejn il-provvista u d-domanda tal-kwoti, fl-2015 sar qbil dwar il-ħolqien ta’ Riżerva tal-Istabbiltà tas-Suq (MSR) sabiex tagħmel il-provvista ta’ rkant tal-kwoti tal-emissjonijiet aktar flessibbli. Finalment, il-kwoti posposti lejn tmiem il-perjodu ser jiġu ttrasferiti lejn ir-riżerva, li ser tkun operazzjonali sa minn Jannar 2019.
Kunċett ewlieni għat-tħaddim tal-MSR huwa n-numru totali ta’ kwoti fiċ-ċirkolazzjoni (TNAC). Il-kwoti ser jiżdiedu mar-riżerva, jekk it-TNAC ikun akbar minn limitu ogħla definit minn qabel (833 miljun kwota) u ser jiġu rilaxxati mir-riżerva, jekk in-numru jkun inqas minn limitu aktar baxx definit minn qabel (taħt l-400 miljun kwota)*. Għalhekk, l-MSR tassorbi jew tirrilaxxa kwoti jekk dawk li jiċċirkolaw ikunu barra minn firxa definita minn qabel. Kwoti posposti u dawk imsejħa mhux allokati** ser jiġu assorbiti mir-riżerva wkoll.
* Jew fejn jiġu adottati miżuri skont l-Artikolu 29a tad-Direttiva tal-EU ETS
**Kwoti mhux allokati huma kwoti mhux allokati skont l-Artikolu 10a(7) tad-Direttiva tal-EU ETS, jiġifieri kwoti li jifdal fir-riżerva għal min jidħol ġdid, u li jirriżultaw mill-applikazzjoni tal-Artikolu 10a(19) u (20), jiġifieri kwoti previsti għal allokazzjoni bla ħlas lill-istallazzjonijiet iżda li jibqgħu mhux allokati minħabba waqfien (parzjali) ta’ operazzjonijiet jew tnaqqis sinifikanti tal-kapaċità. Il-kwoti effettivament “mhux allokati” li ġejjin mill-applikazzjoni tal-fattur rilevanti ta’ rilokazzjoni tal-emissjonijiet tal-karbonju għal setturi mhux inklużi fil-lista ta’ rilokazzjoni tal-emissjonijiet tal-karbonju matul il-perjodu attwali, kif ukoll kwalunkwe kwota li mhijiex allokata skont l-Artikolu 10c tad-Direttiva tal-ETS, mhuwiex previst li jiġu integrati fir-Riżerva tal-Istabbiltà tas-Suq skont l-Artikolu 1(3) tad-Deċiżjoni (UE) 2015/1814. Għaldaqstant, dawn il-kwoti mhumiex koperti (jekk jogħġbok irreferi għall-p. 225 tal-Valutazzjoni tal-Impatt (SWD(2015) 135 final) li takkumpanja l-proposta għal reviżjoni tal-ETS.
In-numru totali ta’ kwoti fiċ-ċirkolazzjoni rilevanti għad-determinazzjoni tal-għalf u tar-rilaxxi fl-MSR huwa kkalkolat bil-formula li ġejja:
TNAC = Provvista – (Domanda 38 + kwoti fl-MSR)
Il-provvista ta’ kwoti tal-emissjonijiet tikkonsisti fil-kwoti akkumulati mill-Fażi 2 tal-EU ETS (2008-2012), kwoti rkantati, kwoti allokati bla ħlas u l-kwoti fir-Riżerva għal Min Jidħol Ġdid (NER); filwaqt li d-domanda hija ddeterminata mill-emissjonijiet tal-istallazzjonijiet u l-kwoti kkanċellati. Għal aktar dettalji, ara t-Tabella 1 fl-Appendiċi 4 tal-Anness.
Il-punt tat-tluq għad-determinazzjoni tat-TNAC huwa n-numru totali ta’ kwoti li jifdal wara l-Fażi 2 li ma kinux ċeduti jew ikkanċellati 39 . Dan it-“total bankarju” ta’ 1 749 540 826 kwota 40 għalhekk jirrappreżenta n-numru eżatt ta’ kwoti tal-ETS fiċ-ċirkolazzjoni fil-bidu tat-tielet perjodu ta’ negozjar tal-EU ETS.
Ir-rapport dwar is-suq tal-karbonju jippermetti l-konsolidazzjoni taċ-ċifri għall-provvista u d-domanda li huma ppubblikati skont l-iskeda ta’ żmien tal-obbligi ta’ rapportar li jirriżultaw mid-Direttiva tal-EU ETS u d-dispożizzjonijiet ta’ implimentazzjoni tagħha. Din l-iskeda ta’ żmien, id-dejta rilevanti u l-ambitu huma deskritti fit-Tabella 2, fl-Appendiċi 4 tal-Anness. Il-Figura 4 turi l-kompożizzjoni tal-provvista u tad-domanda fl-2016. Id-dejta rilevanti ġiet ippubblikata wkoll bħala parti mill-komunikazzjoni dwar in-numru totali ta’ kwoti fiċ-ċirkolazzjoni (TNAC) għall-finijiet tal-MSR 41 .
Figura 4: Kompożizzjoni tal-provvista u d-domanda kumulattivi sa tmiem l-2016
Provvista (kumulattiva, miljuni) Domanda (kumulattiva, miljuni)
|
Allokazzjoni bla ħlas |
|
|
Kanċellazzjonijiet |
|
Krediti internazzjonali skambjati |
|
|
Emissjonijiet ivverifikati |
|
Allokazzjoni bla ħlas (NER) |
|
|
|
|
Allokazzjoni bla ħlas (10c) |
|
|
|
|
Monetizzazzjoni NER 300 mill-BEI |
|
|
|
|
Irkantar |
|
|
|
|
Irkantar bikri |
|
|
|
|
Is-settur bankarju |
|
|
|
Billi l-MSR tibda topera fl-2019, minn nofs Mejju l-Kummissjoni ser tippubblika regolarment kull sena t-TNAC għas-sena preċedenti. F’Mejju 2017, it-TNAC li jikkorrispondi għal 1 693 904 897 kwota, ġie ppubblikat għall-ewwel darba 42 .
Il-Figura 5 43 tippreżenta l-iżvilupp taċ-ċifri kumulattivi ta’ provvista u ta’ domanda għall-EU ETS sa tmiem l-2016. Fl-2013, il-provvista kienet aktar minn 2 biljun kwota, filwaqt li d-domanda kienet inqas b’madwar 1.9 biljun kwota. Fl-2014, kemm il-provvista totali kif ukoll id-domanda totali naqsu għal madwar 1.8 biljun kwota. Fl-2015, il-provvista naqset aktar għal 1.5 biljun kwota, filwaqt li d-domanda naqset b’mod marġinali. Fis-snin sussegwenti, filwaqt li l-emissjonijiet baqgħu stabbli jew tnaqqsu, il-provvista tal-kwoti tnaqqset fil-biċċa l-kbira bħala riżultat tal-miżura dwar il-posponiment.
Minħabba dan, l-eċċess kiber fl-2013 għal aktar minn 2 biljun kwota, baqa’ stabbli fl-2014 u mbagħad naqas fl-2015 għal madwar 1.8 biljun kwota. Fl-2016, l-emissjonijiet tnaqqsu meta mqabbla mal-2015 iżda d-domanda xorta waħda kienet ogħla mill-provvista. Għalhekk, it-TNAC ippubblikat f’Mejju 2017 jinsab fl-inqas livell mill-bidu tal-perjodu ta’ negozjar attwali.
Figura 5: L-iżvilupp tal-provvista u tad-domanda fl-2013-2016
|
id-domanda |
|
il-provvista |
|
it-total bankarju mill-fażi 2 |
|
|
eċċess |
4.AVJAZZJONI
Is-settur tal-avjazzjoni ilu jagħmel parti mill-EU ETS sa mill-2012. Il-leġiżlazzjoni oriġinali kopriet it-titjiriet kollha lejn u barra miż-Żona Ekonomika Ewropea (ŻEE). Madankollu, l-UE ddeċidiet li tillimita l-obbligi għall-2012-2016 għal titjiriet fi ħdan iż-ŻEE, sabiex tappoġġja l-iżvilupp ta’ miżura globali mill-ICAO għat-tnaqqis tal-emissjonijiet tal-avjazzjoni.
F’Ottubru 2016, l-Assemblea tal-ICAO qablet dwar riżoluzzjoni dwar Skema ta’ Kumpens u Tnaqqis tal-Karbonju għall-Avjazzjoni Internazzjonali (CORSIA), li għandha tibda fl-2021. CORSIA titqies bħala skema ta’ tnaqqis tal-karbonju bil-għan li tistabbilizza l-emissjonijiet mill-avjazzjoni internazzjonali fil-livelli 2020.
L-Istati Membri tal-UE indikaw 44 l-intenzjoni tagħhom li jingħaqdu mill-bidu mal-iskema globali tal-ICAO 45 , diment li jiġu ssodisfati ċerti kundizzjonijiet. Sal-applikazzjoni tal-miżura globali, il-Kummissjoni pproponiet 46 li jitkompla l-istess approċċ tal-EU ETS għall-avjazzjoni lil hinn mill-2016, jiġifieri l-ambitu ġeografiku jinżamm bħala intra-ŻEE. Il-proposta ssostni wkoll l-istess eżenzjonijiet u l-istess approċċ lejn l-allokazzjoni għal-linji tal-ajru, li għaliha se japplika l-fattur lineari ta’ tnaqqis mill-2021 ’il quddiem, u tipprevedi rieżami ġdid biex jitqiesu modi għall-implimentazzjoni tal-CORSIA fid-dritt tal-Unjoni permezz ta’ reviżjoni tad-Direttiva tal-EU ETS. F'Ottubru 2017 intlaħaq ftehim politiku dwar il-proposta.
Fir-rigward tal-iżviluppi fl-emissjonijiet tal-avjazzjoni fi ħdan l-EU ETS, fl-2016, l-emissjonijiet ivverifikati baqgħu jiżdiedu u ammontaw għal 61 miljun tunnellata ta’ CO2, żieda ta’ 7.9 % meta mqabbla mal-2015.
L-allokazzjoni bla ħlas ammontat għal kemxejn aktar minn 32.0 miljun kwota fl-2016 47 . L-ammont ta’ kwoti rkantati bejn Jannar u Diċembru 2016 kien madwar 6.0 miljun.
Fl-2017, sakemm tiġi adottata l-proposta leġiżlattiva dwar l-EU ETS għall-avjazzjoni, il-kwoti nħarġu f’konformità mal-ambitu intra-ŻEE. L-allokazzjoni bla ħlas aġġustata ammontat għal kemxejn aktar minn 32.0 miljun kwota fl-2017 48 . Barra minn hekk, kważi 1.1 miljun kwota ġew allokati bla ħlas mir-riżerva speċjali għal min jidħol ġdid u għall-operaturi li qegħdin jikbru malajr. Din hija l-ewwel fost l-erba’ konċessjonijiet annwali, li jikkorrispondu għall-perjodu 2013-2020. L-ammont ta’ kwoti li jridu jiġu rkantati matul l-2017 ser ikun proporzjonali għan-numru totali ta’ kwoti maħruġa. It-Tabella 9 turi sommarju ta’ emissjonijiet ivverifikati, allokazzjoni bla ħlas, u volumi tal-irkant għas-settur tal-avjazzjoni sa mill-bidu tal-Fażi 3 tal-EU ETS.
Tabella 9: Emissjonijiet ivverifikati u allokazzjoni għas-settur tal-avjazzjoni
|
|
|
|
|
2017 |
|
53 495 902 |
54 822 754 |
57 085 143 |
61 124 583 |
|
|
1 326 852 |
2 262 389 |
4 039 440 |
||
|
32 455 312 |
32 403 025 |
32 152 526 |
32 036 975 |
32 018 239 |
Allokazzjoni bla ħlas minn riżerva speċjali għal min jidħol ġdid u għall-operaturi li qegħdin jikbru malajr |
0 |
0 |
0 |
0 |
1 085 080 |
Volumi ta’ kwoti rkantati |
0 |
9 278 000 |
16 390 500 |
5 997 500 |
4 730 500 49 |
Il-volumi ta’ kwoti tal-avjazzjoni rkantati matul il-perjodu 2013-2015 jirriflettu d-deċiżjoni tal-koleġiżlatur tal-2013 biex “jitwaqqaf l-arloġġ” 50 u biex l-obbligi tal-klima jiġu limitati biss għal titjiriet fi ħdan iż-ŻEE, sabiex jiġi appoġġjat l-iżvilupp ta’ miżura globali mill-ICAO. Il-konformità għas-settur tal-avjazzjoni ġiet posposta u l-ebda kwota tal-avjazzjoni ma ġiet irkantata fl-2012 u fl-2013. Għalhekk, il-volumi tal-2012 ġew irkantati fl-2014, filwaqt li l-konformità saret fl-2015 għall-emissjonijiet tal-avjazzjoni mill-2013 u l-2014.
5.SORVELJANZA TAS-SUQ
Sehem sinifikanti mit-tranżazzjonijiet ta’ kuljum fil-kwoti tal-emissjonijiet huwa fil-forma ta’ derivattivi (futuri, forwards, opzjonijiet, swaps), li diġà huma soġġetti għar-Regolament tal-UE dwar is-swieq finanzjarji. Dan qiegħed jiġi sostitwit bid-Direttiva l-ġdida dwar is-Suq Finanzjarju (pakkett MiFID2*), li ser tkun applikabbli minn Jannar 2018.
Skont din id-Direttiva l-ġdida, il-kwoti tal-emissjonijiet ser jiġu kklassifikati bħala strumenti finanzjarji. Dan ifisser li regoli applikabbli għal swieq finanzjarji tradizzjonali (dawk li jinkludu n-negozju ta’ derivattivi tal-karbonju fuq pjattaformi ewlenin jew barra l-borża (OTC)) ser japplikaw ukoll għas-segment spot tas-suq tal-karbonju sekondarju, li jqiegħdu l-kwoti tal-emissjonijiet fuq l-istess livell mas-suq tad-derivattivi f’termini ta’ trasparenza, ta’ protezzjoni u ta’ integrità tal-investitur.
Barra minn hekk, bis-saħħa ta’ kontroreferenzi għal definizzjonijiet tal-MiFID2 ta’ strumenti finanzjarji, ser japplikaw biċċiet oħra ta’ leġiżlazzjoni tas-suq finanzjarju. Dan huwa partikolarment il-każ għar-Regolament dwar l-Abbuż tas-Suq (MAR)**, li ser ikopri t-tranżazzjonijiet u l-kondotta li jinvolvu kwoti tal-emissjonijiet, kemm fis-swieq primarji kif ukoll fis-swieq sekondarji. B’mod simili, kontroreferenza għall-MiFID2 fid-Direttiva kontra l-Ħasil tal-Flus*** ser tagħti lok għal applikazzjoni obbligatorja ta’ kontrolli ta’ diliġenza dovuta tal-klijenti minn negozjanti tal-karbonju liċenzjati mill-MiFID lill-klijenti tagħhom fis-suq spot sekondarju tal-kwoti tal-emissjonijiet. ****
* Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE
** Ir-Regolament (UE) Nru 596/2014 tal-Parlament Ewropew u tal-Kunsill tas-16 ta’ April 2014 dwar l-abbuż tas-suq (Regolament dwar l-abbuż tas-suq) u li jħassar id-Direttiva 2003/6/KE tal-Parlament Ewropew u tal-Kunsill u d-Direttivi tal-Kummissjoni 2003/124/KE, 2003/125/KE u 2004/72/KE
*** Id-Direttiva (UE) 2015/849 tal-Parlament Ewropew u tal-Kunsill tal-20 ta’ Mejju 2015 dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, li temenda r-Regolament (UE) Nru 648/2012 tal-Parlament Ewropew u tal-Kunsill, u li tħassar id-Direttiva 2005/60/KE tal-Parlament Ewropew u tal-Kunsill u d-Direttiva tal-Kummissjoni 2006/70/KE
**** Il-kontrolli tad-diliġenza dovuta huma diġà obbligatorji fis-suq primarju u fis-suq sekondarju fid-derivattivi tal-kwoti tal-emissjonijiet.
L-MiFID2 u l-MAR, it-tnejn adottati fl-2014, jipprevedu ċerti adattamenti tar-reġim ġenerali għall-ispeċifiċitajiet tas-suq tal-karbonju (ara r-Rapport tal-2015 dwar is-Suq tal-Karbonju).
Diversi miżuri li jirregolaw aspetti ddettaljati tad-dispożizzjonijiet skont l-MiFID2 51 u l-MAR 52 ġew adottati fl-2016 u fl-2017.
5.1.In-natura legali u t-trattament fiskali tal-kwoti tal-emissjonijiet
It-trattament legali u fiskali tal-kwoti tal-emissjonijiet ivarja minn pajjiż għall-ieħor, peress li dawn iż-żewġ aspetti mhumiex definiti fid-Direttiva ETS. Il-pajjiżi huma minflok obbligati li jirrapportaw kull sena dwar ir-reġimi nazzjonali tagħhom relatati man-natura legali u t-trattament fiskali tal-kwoti bħala parti mir-rapporti tagħhom tal-Artikolu 21. Madankollu, minkejja n-nuqqas ta' armonizzazzjoni, żviluppa suq matur u likwidu ħafna matul l-aħħar għaxar snin. Il-qafas regolatorju attwali jipprovdi l-irfid legali meħtieġ għal suq tal-karbonju trasparenti u likwidu, filwaqt li jiżgura l-istabbiltà u l-integrità tas-suq.
It-trattament nazzjonali tal-kwoti jvarja minn strumenti finanzjarji u assi intanġibbli għal drittijiet tal-proprjetà u komoditajiet. Skont is-sottomissjonijiet tal-Artikolu 21 fl-2017, mill-inqas erba’ pajjiżi parteċipanti implimentaw jew ipprevedew bidliet fil-leġiżlazzjoni nazzjonali, fil-biċċa l-kbira emendi fir-rigward tal-implimentazzjoni tal-MiDIF2.
Fir-rigward tat-trattament fiskali tal-kwoti, tliet pajjiżi biss irrapportaw li t-taxxa fuq il-valur miżjud (VAT) tapplika għall-ħruġ ta’ kwoti tal-emissjonijiet. Għall-kuntrarju, il-VAT hija dovuta fuq it-tranżazzjoni ta’ kwoti tal-emissjonijiet fis-suq sekondarju f’ħafna mill-pajjiżi parteċipanti (kollha ħlief CY, EE, IS, LI). Il-maġġoranza tal-pajjiżi rrapportaw li huma japplikaw il-mekkaniżmu tar-reverse charge 53 fuq tranżazzjonijiet domestiċi li jinvolvu kwoti tal-emissjonijiet. Il-kwoti tal-emissjonijiet għall-korporazzjonijiet jistgħu jiġu ntaxxati wkoll (pereżempju permezz tal-applikazzjoni ta’ taxxa korporattiva jew taxxa fuq id-dħul korporattiva). Ħmistax-il pajjiż irrapportaw li ma kienx hemm taxxa bħal din.
Kif imsemmi fir-rapport dwar is-suq tal-karbonju preċedenti, il-Kummissjoni bħalissa qiegħda twettaq studju dwar in-natura legali tal-kwoti tal-EU ETS.
F’deċiżjoni preliminari riċenti 54 tat-8 ta’ Marzu 2017, il-Qorti tal-Ġustizzja qagħdet lura milli tiddefinixxi n-natura tal-kwoti (ara l-Appendiċi 5 tal-Anness).
6.MONITORAĠĠ, RAPPORTAR U VERIFIKA TAL-EMISSJONIJIET
Il-monitoraġġ, ir-rapportar u l-verifika (MRV) tal-emissjonijiet GHG iridu jkunu robusti, trasparenti, konsistenti u preċiżi sabiex l-EU ETS topera b’mod effettiv. Dawn huma ssupplimentati minn sistema ta’ akkreditazzjoni soda għall-iżgurar ta’ kwalità adegwata ta’ verifikaturi terzi. Ir-rekwiżiti tal-MRV huma armonizzati fir-Regolament dwar il-Monitoraġġ u r-Rapportar (MRR) u fir-Regolament dwar l-Akkreditazzjoni u l-Verifika (AVR).
Is-sistema ta’ monitoraġġ fl-EU ETS hija mfassla bħala approċċ ta’ elementi importanti li jippermetti grad għoli ta’ flessibbiltà għall-operaturi biex jiżguraw kosteffiċjenza, filwaqt li fl-istess ħin tintlaħaq affidabbiltà kbira tad-dejta dwar l-emissjonijiet immonitorjata. Għal dan il-għan, diversi metodi ta’ monitoraġġ (“ibbażati fuq il-kalkolu" jew “ibbażati fuq il-kejl”, kif ukoll bħala eċċezzjoni “approċċi ta’ riżerva”) huma permessi. Il-metodi jistgħu jingħaqdu għal partijiet individwali ta’ stallazzjoni. Għall-operaturi ta’ inġenji tal-ajru, approċċi bbażati fuq il-kalkolu biss huma fattibbli, fejn il-konsum tal-karburant huwa l-parametru ċentrali li jrid jiġi ddeterminat għat-titjiriet koperti mill-EU ETS. Ir-rekwiżit li l-istallazzjonijiet u l-operaturi ta’ inġenji tal-ajru jkollhom pjan ta’ monitoraġġ approvat mill-awtorità kompetenti fuq il-bażi tal-MRR jipprevjeni għażla arbitrarja tal-metodi ta’ monitoraġġ u varjazzjonijiet temporali.
Permezz tal-AVR għall-Fażi 3 u lil hinn, ġie introdott approċċ armonizzat madwar l-UE lejn l-akkreditazzjoni tal-verifikaturi. Il-verifikaturi li huma persuna ġuridika jew entità ġuridika jridu jiġu akkreditati minn Korp Nazzjonali ta’ Akkreditament (NAB) sabiex iwettqu verifiki f’konformità mal-AVR. Is-sistema l-ġdida ta’ akkreditazzjoni uniformi tipprovdi l-vantaġġ li tippermetti lill-verifikaturi joperaw b’rikonoxximent reċiproku fil-pajjiżi parteċipanti kollha, u għalhekk jieħdu vantaġġ sħiħ mis-suq intern u jgħinu biex tiġi żgurata disponibbiltà suffiċjenti ġenerali.
6.1 Żviluppi Ġenerali
Il-Kummissjoni tkompli tfittex titjib fil-gwida u fil-mudelli li tqiegħed għad-dispożizzjoni sabiex tiffaċilita l-implimentazzjoni konsistenti tar-rekwiżiti tal-MRR 55 u tal-AVR 56 . F’dan ir-rigward, ġiet abbozzata gwida ġdida dwar l-ispezzjoni tal-EU ETS abiex tgħin fil-koordinazzjoni tar-rispons tal-pajjiżi għal rakkomandazzjoni mill-Qorti Ewropea tal-Awdituri sabiex dawn jimplimentaw oqfsa ta’ kontroll tal-implimentazzjoni tal-EU ETS aktar koerenti u effettivi li jinkludu spezzjonijiet.
Il-Kummissjoni tkompli tħeġġeġ ukoll titjib fl-implimentazzjoni tal-MRVA tal-EU ETS min-naħa tal-pajjiżi. Fejn rilevanti, ġiet iċċarata l-gwida u ġew organizzati avvenimenti ta’ taħriġ sabiex jiġu indirizzati wħud mill-kwistjonijiet ewlenin identifikati fil-Pjanijiet ta’ Azzjoni prodotti biex jassistu lil kull pajjiż 57 .
Huwa rikonoxxut li l-effiċjenza tas-sistema ta’ konformità ttejbet peress li l-MRR jippermetti lill-pajjiżi jagħmlu r-rapportar elettroniku obbligatorju. Ħafna mill-pajjiżi parteċipanti jirrapportaw l-użu ta’ mudelli jew ta’ sistemi bbażati fuq ir-rekwiżiti minimi stabbiliti mill-Kummissjoni. Fl-2017 erbatax-il Stat Membru rrapportaw li jużaw xi forma ta’ sistema informatika awtomatizzata għar-rapportar tal-EU ETS (meta mqabbla ma’ 13 fl-2016 u ma’ 10 fl-2015).
Kif imsemmi fir-rapport dwar is-suq tal-karbonju preċedenti, f’Mejju 2016 il-Kummissjoni nediet DECLARE ETS MRVA – sistema bbażata fuq il-web żviluppata biex tappoġġja l-obbligi relatati mal-pjanijiet ta’ monitoraġġ, mar-rapporti annwali dwar l-emissjonijiet, mar-rapporti ta’ verifika u mar-rapporti ta’ titjib tal-EU ETS minn pajjiżi parteċipanti.
6.2 Monitoraġġ applikat
Skont ir-rapporti tal-Artikolu 21 sottomessi fl-2017, ħafna mill-istallazzjonijiet jużaw il-metodoloġija bbażata fuq il-kalkolu 58 . 150 stallazzjoni biss (inqas minn 1.5 %) fi 23 pajjiż ġew irrapportati li jużaw sistemi għall-kejl tal-emissjonijiet kontinwi, l-aktar frekwenti fil-Ġermanja u fir-Repubblika Ċeka. B’mod globali, hemm pajjiż aktar mis-sena li għaddiet, iżda stallazzjoni inqas.
Ħdax-il pajjiż biss irrapportaw l-użu tal-approċċ ta’ riżerva minn 36 stallazzjoni, li jkopru madwar 5.1 miljun tunnellata ta’ CO2e (meta mqabbla ma’ 6.6 miljun tunnellata ta’ CO2e fis-sena ta’ qabel). In-Netherlands irrapportaw tnaqqis fin-numru ta’ stallazzjonijiet li japplikaw metodoloġija ta’ riżerva (9 meta mqabbla mat-12 tas-sena li għaddiet) u nofs l-emissjonijiet affettwati. Żewġ stallazzjonijiet (waħda fir-Renju Unit u waħda fin-NL) huma responsabbli għal aktar minn nofs l-emissjonijiet globali rrapportati b’rabta mal-metodoloġija ta’ riżerva.
Il-maġġoranza assoluta tal-istallazzjonijiet tissodisfa l-valuri minimi prestabbiliti 59 tas-saffi tal-MRR. 105 stallazzjoni tal-kategorija C biss (meta mqabbla ma’ 113 fis-sena preċedenti u 118 is-sena ta’ qabel), jiġifieri 13 % (meta mqabbla ma’ 14 % tas-sena li għaddiet) ġew irrapportati li jiddevjaw għal mill-inqas parametru wieħed mir-rekwiżit li japplikaw l-ogħla saffi għall-flussi minn sorsi maġġuri. Dawn id-devjazzjonijiet huma permessi biss meta l-operatur juri li l-ogħla saff mhuwiex teknikament vijabbli jew jimplika kostijiet mhux raġonevoli. Ladarba dawn il-kundizzjonijiet ma jibqgħux japplikaw, l-operaturi għandhom itejbu s-sistema ta’ monitoraġġ tagħhom kif xieraq. Fl-2013 il-perjodu ta' rapportar, 137 stallazzjoni tal-kategorija C (16 % mit-total) ġew irrapportati bħala li ma jissodisfawx l-ogħla saffi b’xi mod jew ieħor. Għalhekk, titjib kostanti fil-konformità tal-ogħla saff tal-istallazzjoni tal-kategorija C jista’ jidher f’kull sena tal-Fażi 3 tal-EU ETS.
B’mod simili, rapporti mit-22 pajjiż parteċipanti (l-istess bħal fis-sentejn preċedenti) jindikaw li b’mod globali 22 % tal-istallazzjonijiet tal-kategorija B huma permessi b’xi forma ta’ devjazzjoni mir-rekwiżiti prestabbiliti tal-MRR, meta mqabbla ma’ 26 % fis-sena ta’ qabel u ma’ 28 % fis-sena ta’ qabel dik, u għal darb’oħra dan juri titjib kostanti fil-konformità tal-ogħla saff.
6.3 Verifika akkreditata
In-numru totali ta’ verifikaturi mhuwiex irrapportat fir-rapporti tal-Artikolu 21, iżda stima raġonevoli bbażata fuq in-numru akkreditat għall-kombustjoni (l-ambitu primarju tal-akkreditazzjoni) hija li kien hemm tal-anqas 130 verifikatur akkreditati differenti b’mod ġenerali rigward il-verifiki tal-2016. Is-sottomissjonijiet tal-Artikolu 21 fl-2017 jindikaw li kien hemm 47 verifikatur individwali akkreditati għall-2016 rigward l-avjazzjoni. Il-kooperazzjoni Ewropea għall-Akkreditazzjoni (EA) tipprovdi link ċentrali għall-Korpi Nazzjonali ta' Akkreditament (NABs) rilevanti u għal-listi tagħhom ta’ verifikaturi akkreditati tal-EU ETS 60 .
Ir-rikonoxximent reċiproku tal-verifikaturi fost il-pajjiżi parteċipanti qiegħed jaħdem b’suċċess: ħafna mill-pajjiżi (29, kollha ħlief FR u LV) irrapportaw li mill-inqas verifikatur barrani wieħed huwa attiv fit-territorju tagħhom.
Il-konformità tal-verifikaturi mal-AVR hija għolja. Il-Polonja biss irrapportat sospensjoni u l-Iżvezja rtirar tal-akkreditazzjoni fl-2016 (ta’ verifikatur wieħed f’kull każ). Dan ma jitqabbel mal-ebda sospensjoni jew irtirar irrapportati fir-rigward tal-2015 u sospensjoni waħda jew irtirar wieħed għall-2014. Il-Polonja biss irrapportat tnaqqis fl-ambitu tal-akkreditazzjoni ta’ verifikatur wieħed fl-2016, meta mqabbla mal-erba’ pajjiżi li rrapportaw tali tnaqqis għal ħames verifikaturi fl-2015 u tliet pajjiżi għal sitt verifikaturi fl-2014.
Din is-sena, inqas pajjiżi rrapportaw ilmenti riċevuti dwar verifikaturi (tmienja meta mqabbla mad-disgħa tas-sena li għaddiet). In-numru globali tal-ilmenti huwa wkoll 17 % inqas. 96 % tal-ilmenti riċevuti huma rrapportati bħala solvuti (l-istess bħas-sena li għaddiet). Disa’ pajjiżi rrapportaw li identifikaw nuqqasijiet ta’ konformità tal-verifikaturi bħala parti mill-proċess ta’ skambju ta’ informazzjoni bejn l-NABs u l-awtoritajiet kompetenti (meta mqabbla ma’ ħdax is-sena li għaddiet).
7.ĦARSA ĠENERALI LEJN L-ARRANĠAMENTI AMMINISTRATTIVI
Il-pajjiżi li jipparteċipaw fl-EU ETS jużaw approċċi differenti rigward l-awtoritajiet kompetenti inkarigati mill-implimentazzjoni tagħha. F’ċerti pajjiżi diversi awtoritajiet lokali huma involuti, filwaqt li f’oħrajn l-approċċ huwa ferm aktar iċċentralizzat. Ir-rapporti tal-Artikolu 21 jagħtu ħarsa ġenerali ta’ livell għoli lejn l-istruttura organizzazzjonali ta’ kull pajjiż parteċipanti.
Mill-aħħar perjodu ta' rapportar, ma ġiet osservata l-ebda bidla sinifikanti fl-arranġamenti amministrattivi tal-pajjiżi parteċipanti. Skont is-sottomissjonijiet tal-Artikolu 21 fl-2017, kien hemm, bħala medja, 5 awtoritajiet kompetenti involuti fl-implimentazzjoni tal-EU ETS għal kull pajjiż. 61 Fir-rigward tal-koordinazzjoni bejn l-awtoritajiet, ġew irrapportati għodod u metodi differenti, bħal strumenti leġiżlattivi għall-ġestjoni ċentrali ta’ pjanijiet ta’ monitoraġġ jew ta’ rapporti ta’ emissjonijiet (fi 12-il pajjiż), għoti ta’ struzzjonijiet vinkolanti u gwida minn awtorità ċentrali kompetenti lill-awtoritajiet lokali (f’10 pajjiżi), gruppi ta’ ħidma jew laqgħat regolari bejn l-awtoritajiet (fi 15-il pajjiż), u l-użu ta’ pjattaforma tal-IT konġunta (fi 13-il pajjiż), fost l-oħrajn. Seba’ pajjiżi (CY, EE, HU, IT, IS, LI, LU) indikaw li l-ebda wieħed minn dawn ta’ hawn fuq ma huwa fis-seħħ.
Fir-rigward tat-tariffi amministrattivi imposti b’rabta mal-permessi u mal-pjanijiet ta’ monitoraġġ approvati, fl-2017 14-il pajjiż irrapportaw li ma jimponu l-ebda tariffa fuq l-operaturi tal-istallazzjonijiet (CY, DE, EE, FR, GR, IE, LI, LT, LU, LV, MT, NL, SE, SK), meta mqabbla ma’ 16 tas-sena li għaddiet. L-operaturi ta’ inġenji tal-ajru ma jħallsux tariffi fi 15-il pajjiż (BE, CY, CZ, DE, EE, ES, GR, LI, LT, LU, LV, MT, NL, SE, SK), meta mqabbla ma’ 16 tas-sena li għaddiet. L-imposti jvarjaw b’mod sinifikanti skont il-pajjiż u s-servizz partikolari involut. Pereżempju, it-tariffi għall-permessi u għall-pjan ta’ monitoraġġ approvat għall-istallazzjonijiet ivarjaw minn EUR 5 sa EUR 7621, u għall-avjazzjoni t-tariffi għall-pjan ta’ monitoraġġ approvat ivarjaw minn EUR 5 sa EUR 2400.
B’mod ġenerali, is-sistemi tal-pajjiżi parteċipanti huma effettivi ħafna meta jiġu allinjati mal-organizzazzjoni amministrattiva tagħhom. Il-komunikazzjoni bejn l-awtoritajiet lokali u l-qsim tal-aħjar prattiki bejn l-Awtoritajiet Kompetenti, inkluż permezz tal-attivitajiet tal-Forum ta’ Konformità tal-EU ETS, jenħtieġ li tkompli tissaħħaħ u titħeġġeġ. F’dan ir-rigward, is-seba’ Konferenza ta’ Konformità 62 saret fl-2016, kif ukoll żewġ avvenimenti ta’ taħriġ separati relatati mal-Forum ta’ Konformità. Din il-konferenza annwali tgħin sabiex tiġi żgurata l-aktar sensibilizzazzjoni wiesgħa dwar l-attivitajiet tal-Forum ta’ Konformità, b’mod partikolari dwar il-ħames Task Forces tiegħu rigward il-Monitoraġġ u r-Rapportar, l-Akkreditazzjoni u l-Verifika, l-Avjazzjoni, ir-Rapportar Elettroniku u l-Ġbir u l-Ħżin tal-Karbonju.
8.KONFORMITÀ U INFURZAR
Id-Direttiva tal-EU ETS tipprevedi penali għal emissjonijiet żejda fil-forma ta’ EUR 100 (indiċjati) għal kull tunnellata ta’ CO2 mormija li għalihom ma ġiet ċeduta l-ebda kwota fiż-żmien dovut. Penali oħrajn applikabbli għal ksur fl-implimentazzjoni tal-EU ETS huma konformi mad-dispożizzjonijiet nazzjonali stabbiliti mill-pajjiż ikkonċernat.
L-EU ETS għandha rata għolja ħafna ta’ konformità: kull sena madwar 99 % tal-emissjonijiet huma koperti bin-numru meħtieġ ta’ kwoti fil-ħin. Is-sena 2016 ma kinitx eċċezzjoni. Sad-data tal-iskadenza, jiġifieri sat-30 ta’ April 2017, anqas minn 1 % tal-istallazzjonijiet li jirrapportaw li kellhom emissjonijiet fl-2016 ma ċedewx kwoti li jkopru l-emissjonijiet kollha tagħhom. Dawn l-istallazzjonijiet kienu tipikament żgħar u ammontaw għal madwar 0.4 % tal-emissjonijiet tal-EU ETS. Fis-settur tal-avjazzjoni, il-livell ta’ konformità kien għoli ħafna wkoll: l-opertauri ta’ inġenji tal-ajru responsabbli għal aktar minn 99 % tal-emissjonijiet tal-avjazzjoni tal-EU ETS ikkonformaw.
L-awtoritajiet kompetenti jibqgħu jwettqu verifiki ta’ konformità differenti fuq ir-rapporti tal-emissjonijiet annwali. Skont is-sottomissjonijiet tal-Artikolu 21 fl-2017, il-pajjiżi parteċipanti kollha jivverifikaw ir-rapporti tal-emissjonijiet annwali għall-kompletezza (100 % tar-rapporti ħlief FR 77 % SE 3 % u UK 62 %). Ir-rapporti jkomplu jindikaw li bħala medja l-pajjiżi jivverifikaw aktar minn 75 % tar-rapporti għal konsistenza fir-rigward tal-pjanijiet ta’ monitoraġġ (il-pajjiżi kollha) u madwar 75 % fid-dejta dwar l-allokazzjoni (il-pajjiżi kollha ħlief FI, MT u NO). Ħamsa u għoxrin pajjiż irrapportaw li huma jwettqu wkoll kontroverifiki ma’ dejta oħra. Tlieta biss (LV, SI, SK) jissuġġerixxu nuqqas ta’ verifika ddettaljata tar-rapporti tal-emissjonijiet mill-awtoritajiet kompetenti.
Abbażi tas-sottomissjonijiet tal-Artikolu 21 fl-2017, l-awtoritajiet kompetenti f’16-il pajjiż (BE, BG, DK, ES, FI, FR, EL, HR, IT, LU, NL, NO, PL, SE, SK, UK) wettqu stimi konservattivi dwar dejta mitlufa fil-każ ta’ 125 stallazzjoni fl-2016. Madankollu, 68 minn dawn ġew irrapportati mir-Renju Unit għal emissjonijiet fis-snin ta’ qabel l-2016, abbażi ta’ notifiki mill-operatur ta’ żbalji storiċi li jkunu għadhom kemm ġew skoperti. It-tnaqqis tad-dejta tar-Renju Unit mit-totali għall-2016, l-istimi konservattivi ġew irrapportati minn 15-il pajjiż għal 57 stallazzjoni (madwar 0.5 % tal-istallazzjonijiet ġenerali), meta mqabbla ma’ 45 stallazzjoni (0.4 %) għall-2015 u 37 (0.3%) għall-2014. Il-kwantità rrapportata tal-emissjonijiet affettwati tal-2016 kienet ta’ 1.9 miljun tunnellata ta’ CO2 (meta mqabbla ma’ 8.3 miljun tunnellata tas-sena li għaddiet u 9.1 miljun is-sena ta’ qabel dik), madwar 0.1 % tal-emissjonijiet globali (meta mqabbla ma’ kważi 0.5 % fis-sentejn preċedenti). L-aktar raġunijiet komuni mogħtija għat-twettiq ta’ stimi konservattivi kienu n-nuqqas ta’ rapport dwar l-emissjonijiet sal-31 ta’ Marzu jew rapporti dwar l-emissjonijiet li ma kinux kompletament konformi mar-rekwiżiti tal-MRR/AVR.
L-istimi konservattivi dwar id-dejta mitlufa għall-avjazzjoni ġew irrapportati minn erba’ pajjiżi biss fir-rigward ta’ 18-il operatur ta’ inġenju tal-ajru (madwar 3.5 % tat-total), li kollha kemm huma kienu emittenti żgħar ħafna (b’kollox inqas minn 0.2 % tal-emissjonijiet tal-avjazzjoni). Dan jitqabbel mal-103 operaturi ta’ inġenji tal-ajru (kważi 20 %) irrapportati minn tmien pajjiżi s-sena li għaddiet.
Il-verifiki tal-awtorità kompetenti jibqgħu importanti wkoll biex jissupplimentaw ix-xogħol tal-verifikatur. Għall-2016, il-pajjiżi parteċipanti kollha kkonfermaw li fil-każ ta’ stallazzjonijiet huma jwettqu verifiki ulterjuri. Ħafna mill-pajjiżi rrapportaw approċċ simili dwar l-operaturi ta’ inġenji tal-ajru (ħlief HU, LV u SI). Madankollu, 17-il pajjiż biss irrapportaw li wettqu xi spezzjonijiet fuq il-post fl-istallazzjonijiet fl-2016 (AT 63 , CY, CZ, DE, ES, FI, FR, GR, HR, HU, IE, IS, LT, LV, NL, NO, UK).
Għall-2016, l-applikazzjoni ta’ penali għal emissjonijiet żejda ġiet irrapportata għal 14-il stallazzjoni biss minn erba’ pajjiżi (BG 1, PL 1, RO 6 u UK 6). Għall-avjazzjoni, il-penali għal emissjonijiet żejda ġew irrapportati għal 48 operatur ta’ inġenju tal-ajru (BE 1, DE 4, ES 4 u UK 39).
Għaxar pajjiżi kkonfermaw il-ħruġ ta’ penali (b’żieda mal-penali għal emissjonijiet żejda) fil-perjodu ta’ rapportar tal-2016. Ma ġiet irrapportata l-ebda priġunerija, iżda ġew innotati multi jew avviżi formali li jikkonċernaw 56 stallazzjoni u 8 operaturi ta’ inġenji tal-ajru, li jammontaw għal valur finanzjarju totali ta’ EUR 1 573 389. Madwar wieħed minn kull sitta ta’ dan il-valur ġie attribwit għall-iskopertura mill-awtorità kompetenti u mill-korpi kummerċjali ta’ 19-il stallazzjoni li nstabu li kienu qegħdin joperaw mingħajr permess fir-Renju Unit. Dawn l-operaturi issa huma permessi u jirrappreżentaw il-maġġor parti tan-numru akbar ta’ stallazzjonijiet irrapportati mir-Renju Unit.
L-aktar reati komuni rrapportati għall-2016 kienu tħaddim mingħajr permess (21 każ), nuqqas ta’ rapportar tal-bidliet fil-kapaċità (14-il każ), nuqqas ta’ sottomissjoni tar-rapporti annwali dwar l-emissjonijiet ivverifikati sal-iskadenza dovuta (9 każijiet), nuqqas ta’ konformità mal-kundizzjonijiet ta’ permess (6 każijiet) u nuqqas ta’ tfassil ta’ pjan ta’ monitoraġġ approvat kif xieraq (5 każijiet). Każijiet oħrajn kienu jinkludu n-nuqqas ta’ konformità tar-rapport tal-emissjonijiet annwali mar-rekwiżiti tal-MRR, nuqqas ta’ ċediment ta’ numru suffiċjenti ta’ kwoti sat-30 ta’ April u nuqqas ta’ sottomissjoni ta’ rapporti ta’ titjib.
9.KONKLUŻJONIJIET U ASPETTATTIVI
Fl-2016, l-EU ETS baqgħet l-għodda ewlenija għall-indirizzar tat-tibdil fil-klima b’mod kosteffiċjenti. Is-sistema wettqet tnaqqis fl-emissjonijiet ta’ 2.9 % minn stallazzjonijiet parteċipanti, li mmarka tendenza ta’ tnaqqis fl-emissjonijiet mill-bidu tal-Fażi 3 fl-2013, filwaqt li l-eċċess ta’ kwoti fis-suq tal-karbonju niżel għall-inqas livell tiegħu sa mill-bidu tal-perjodu ta’ negozjar attwali. F’dan ir-rigward, l-ewwel pubblikazzjoni tal-indikatur ta’ eċċess tar-Riżerva tal-Istabbiltà tas-Suq f’Mejju 2017 twitti t-triq għall-bidu tat-tħaddim tar-Riżerva tal-Istabbiltà tas-Suq fl-2019, is-soluzzjoni strutturali tal-EU ETS għall-istabbilizzazzjoni tas-suq Ewropew tal-karbonju f’nofs it-terminu.
Fil-qasam tal-avjazzjoni, sar ukoll progress importanti. Wara r-riżoluzzjoni tal-ICAO 2016 dwar it-tnaqqis fl-emissjonijiet tal-avjazzjoni globali, il-Kummissjoni ħadet passi lejn il-kontinwazzjoni ta’ miżuri attwali għall-avjazzjoni fl-EU ETS fid-dawl tal-iskema globali li ser tidħol fis-seħħ u l-ippjanar għall-implimentazzjoni f’waqtha tagħha.
Barra minn hekk, fir-raba’ sena tal-fażi 3 l-arkitettura tal-EU ETS tat prova li ser tibqa’ robusta. Ir-rata ta’ konformità baqgħet b’mod konsistenti għolja ħafna kemm għall-istallazzjonijiet stazzjonarji kif ukoll għall-operaturi tal-avjazzjoni u l-organizzazzjoni amministrattiva fil-pajjiżi parteċipanti tat prova li hija effettiva.
F’Mejju 2017, l-irkant numru 1000 immarka stadju simboliku fil-funzjonament bla xkiel tal-infrastruttura li ġġib kwoti lejn is-suq.
Wara aktar minn sentejn ta’ negozjati dwar il-proposta biex tiġi rriformata l-EU ETS għar-raba’ perjodu ta’ negozjar tagħha, f'Novembru 2017 intlaħaq ftehim storiku li juri r-rieda tal-Unjoni Ewropea li ssarraf l-impenn tagħha fil-ftehim ta’ Pariġi f’azzjoni konkreta. L-EU ETS riveduta u sostanzjalment imsaħħa ser tifforma parti ewlenija mill-kontribut tal-UE għall-implimentazzjoni tal-ftehim ta’ Pariġi lejn tranżizzjoni globali lejn livell baxx ta’ karbonju.
Il-Kummissjoni ser tkompli tissorvelja s-suq Ewropew tal-karbonju u ser tipprovdi r-rapport li jmiss fl-aħħar tal-2018.
ANNESS
Appendiċi 1
Tabella 1: Numru ta’ kwoti bla ħlas mitluba għall-immodernizzar tas-settur tal-elettriku
Numbru ta’ kwoti bla ħlas mitluba minn Stat Membru skont l-Artikolu 10c |
||||
SM |
2013 |
2014 |
2015 |
2016 |
BG |
11 009 416 |
9 779 243 |
8 259 680 |
6 593 238 |
CY |
2 519 077 |
2 195 195 |
1 907 302 |
1 583 420 |
CZ |
25 285 353 |
22 383 398 |
20 623 005 |
15 831 329 |
EE |
5 135 166 |
4 401 568 |
3 667 975 |
2 934 380 |
HU |
7 047 255 64 |
mhux applikabbli |
mhux applikabbli |
mhux applikabbli |
LT |
322 449 |
297 113 |
269 475 |
237 230 |
PL |
65 992 703 |
52 920 889 |
43 594 320 |
31 621 148 |
RO |
15 748 011 |
8 591 461 |
9 210 797 |
7 189 961 |
Total |
133 059 430 |
100 568 867 |
87 532 554 |
65 990 706 |
Tabella 2: Numru massimu ta’ kwoti bla ħlas fis-sena skont id-deroga mill-irkantar sħiħ għas-settur tal-enerġija
Numru massimu ta’ kwoti fis-sena |
|||||||
2013 |
2014 |
2015 |
2016 |
2017 |
2018 |
2019 |
Total |
13 542 000 |
11 607 428 |
9 672 857 |
7 738 286 |
5 803 714 |
3 869 143 |
1 934 571 |
54 167 999 |
2 519 077 |
2 195 195 |
1 907 302 |
1 583 420 |
1 259 538 |
935 657 |
575 789 |
10 975 978 |
26 916 667 |
23 071 429 |
19 226 191 |
15 380 953 |
11 535 714 |
7 690 476 |
3 845 238 |
107 666 668 |
5 288 827 |
4 533 280 |
3 777 733 |
3 022 187 |
2 266 640 |
1 511 093 |
755 547 |
21 155 307 |
7 047 255 |
0 |
0 |
0 |
0 |
0 |
0 |
7 047 255 |
582 373 |
536 615 |
486 698 |
428 460 |
361 903 |
287 027 |
170 552 |
2 853 628 |
77 816 756 |
72 258 416 |
66 700 076 |
60 030 069 |
52 248 393 |
43 355 049 |
32 238 370 |
404 647 129 |
17 852 479 |
15 302 125 |
12 751 771 |
10 201 417 |
7 651 063 |
5 100 708 |
2 550 354 |
71 409 917 |
151 565 434 |
129 504 488 |
114 522 628 |
98 384 792 |
81 126 965 |
62 749 153 |
42 070 421 |
679 923 881 |
Appendiċi 2
Figura 1: Ħarsa ġenerali lejn l-irkanti tal-kwoti ġenerali mill-2013 sat-30 ta’ Ġunju 2017
___ Prezz tal-bejgħ fl-irkant
. Rata ta’ Kopertura
Appendiċi 3
Tabella 1: Sommarju ta’ skambju ta’ krediti internazzjonali sat-30 ta’ Ġunju 2017
Krediti internazzjonali skambjati sat-30 ta’ Ġunju 2016 |
miljun |
perċentwali |
|||||||
CERs |
231.08 |
54.61 % |
|||||||
Iċ-Ċina |
164.30 |
71.10 % |
|||||||
l-Indja |
13.13 |
5.68 % |
|||||||
L-Użbekistan |
8.04 |
3.47 % |
|||||||
Il-Brażil |
4.59 |
1.98 % |
|||||||
Iċ-Ċilì |
3.11 |
1.34 % |
|||||||
Il-Korea |
2.92 |
1.26 % |
|||||||
Il-Messiku |
2.75 |
1.19 % |
|||||||
Oħrajn |
19.25 |
8.33 % |
Trajettorja 1 |
Trajettorja 2 |
|||||
ERUs |
192.07 |
45.39 % |
miljun |
perċentwali tal-ERUs |
miljun |
perċentwali tal-ERUs |
|||
L-Ukrajna |
147.69 |
76.89 % |
145.95 |
78.32 % |
1.74 |
0.91 % |
|||
Ir-Russja |
32.06 |
16.69 % |
32.06 |
17.20 % |
0.00 |
0.00 % |
|||
Il-Polonja |
2.82 |
1.46 % |
3.02 |
1.62 % |
0.00 |
0.00 % |
|||
Il-Ġermanja |
1.65 |
0.85 % |
1.66 |
0.89 % |
0.00 |
0.00 % |
|||
Franza |
1.24 |
0.64 % |
1.24 |
0.67 % |
0.00 |
0.00 % |
|||
Il-Bulgarija |
0.49 |
0.25 % |
0.49 |
0.26 % |
0.00 |
0.00 % |
|||
Oħrajn |
6.21 |
3.23 % |
1.76 |
0.94 % |
4.35 |
2.26 % |
|||
Total |
423.16 |
100 % |
186.18 |
96.83 % |
6.09 |
3.17 % |
Appendiċi 4
Tabella 1: Elementi ta’ provvista u domanda tal-ETS
Element |
Provvista jew domanda? |
Pubblikazzjoni |
Aġġornament u inċertezzi |
Total bankarju tal-fażi 2 |
Il-provvista |
Rapport dwar is-suq tal-karbonju |
Mhuwa previst l-ebda aġġornament peress li l-fażi 2 spiċċat. Ċifra finali. |
Irkanti tal-fażi 3 bikrija |
Il-provvista |
Sit web tad-DĠ Klima, siti web tal-EEX u ICE |
Mhix parti mit-total bankarju tal-fażi 2. Ċifri finali. |
Kwoti għal NER 300 |
Il-provvista |
Sit web tal-BEI |
300 miljun kwota ġew monetizzati fl-2012-2014. Ċifri finali. |
Irkanti tal-avjazzjoni |
Il-provvista |
Sit web tad-DĠ Klima, siti web tal-EEX u ICE |
Le – l-aġġustamenti huma riflessi fil-volumi għas-sena ta’ wara. L-irkanti tal-2013 u l-2014 saru fl-2015. |
Irkanti tal-Fażi 3 |
Il-provvista |
Sit web tad-DĠ Klima, siti web tal-EEX u ICE |
Le - iċ-ċifra mhijiex soġġetta għal reviżjoni. Madankollu, il-kwoti (eż. minħabba dewmien biex jibda l-irkantar għal ċerti Stati Membri, pereżempju dawk għaż-ŻEE-EFTA) miżmuma mill-irkantijiet jistgħu jiġu rkantati fis-snin sussegwenti. |
Allokazzjoni bla ħlas (NIMs) |
Il-provvista |
EUTL, tabelli |
Dawn iċ-ċifri huma aġġornati matul is-sena kollha. - Stat Membru jista’ jipprovdi sottomissjonijiet tard għas-snin preċedenti jew allokazzjoni attwali tista’ tkun inqas mill-ammont inizjalment previst. L-EUTL jipprovdi stat tal-ħidma preċiż tal-allokazzjoni attwali. |
Allokazzjoni bla ħlas (NER) |
Il-provvista |
EUTL, tabelli |
|
Allokazzjoni bla ħlas (avjazzjoni) |
Il-provvista |
EUTL, Pubblikazzjoni minn SM ta’ tabelli ta’ allokazzjoni |
|
Allokazzjoni bla ħlas (Artikolu 10c) |
Il-provvista |
EUTL, tabella tal-istatus |
|
Emissjonijiet (stallazzjonijiet stazzjonarji) |
Id-domanda |
EUTL, dejta ta’ konformità |
Dejta ta’ konformità disponibbli għall-pubbliku fl-1 ta’ Mejju turi emissjonijiet u kwoti ċeduti għall-istallazzjonijiet li huma konformi (jiġifieri dawk l-istallazzjonijiet li jirrapportaw għas-snin kollha kkonċernati). |
Emissjonijiet (avjazzjoni) |
Id-domanda |
Konformità għall-operaturi tal-avjazzjoni kemm għall-2013 u l-2014 saru fl-2015. |
|
Kwoti kkanċellati |
Id-domanda |
Rapport dwar is-suq tal-karbonju |
Tabella 2: Skeda ta’ żmien għall-pubblikazzjoni tad-dejta
L-iskedar |
Id-dejta |
L-ambitu |
Mill-1 ta’ Jannar sat-30 ta’ April tas-sena x |
Aġġornamenti għall-allokazzjoni bla ħlas għall-enerġija (Artikolu 10c) |
Is-sena x-1 |
L-1 ta’ April tas-sena x |
Emissjonijiet ivverifikati Allokazzjoni bla ħlas (Artikolu 10a(5) – NIMs) |
Is-sena x-1 |
L-1 ta’ Mejju tas-sena x |
Skadenza ta’ konformità: emissjonijiet ivverifikati u kwoti ċeduti |
Is-sena x-1 |
Mejju/Ottubru tas-sena x |
Krediti internazzjonali skambjati |
|
L-aħħar trimestru tas-sena x |
Rapport dwar is-Suq tal-Karbonju |
Is-sena x-1 |
Jannar/Lulju tas-sena x |
Status tar-riżerva għal min jidħol ġdid - tabella NER |
|
Mhux ippubblikata fil-livell tal-UE |
Allokazzjoni bla ħlas għall-avjazzjoni ppubblikata fil-livell tal-Istati Membri |
Appendiċi 5
Tabella 1: Deċiżjonijiet preliminari tal-Qorti tal-Ġustizzja tal-UE rilevanti għall-funzjonament tal-EU ETS fil-perjodu ta’ Lulju 2016 sa Ġunju 2017
Ir-referenza tal-każ |
Il-leġiżlazzjoni kkonċernata |
Partiti |
Każ sommarju |
Data |
Sommarju tas-sentenza |
Kawża C-461/15 |
Id-Deċiżjoni 2011/278/UE |
E. ON Kraftwerke/DE |
Limitu tal-obbligu li tingħata informazzjoni għall-allokazzjoni bla ħlas ta’ kwoti tal-emissjonijiet, fir-rigward tal-bidliet li jsiru fit-tħaddim ta’ impjant tal-enerġija wieħed |
08.09.2016 |
L-awtorità kompetenti tista’ tiddefinixxi “informazzjoni rilevanti” li għandha tiġi rrapportata dwar il-kapaċità, il-livell ta’ attività u t-tħaddim ta’ stallazzjoni. Informazzjoni tista’ titqies bħala rilevanti, irrispettivament minn jekk ikunx hemm bidla fl-allokazzjoni tal-operatur. |
Kawża C-460/15 |
Ir-Regolament UE 601/2012 |
Schaefer Kalk GmbH & Co. KG/DE |
Il-legalità tal-esklużjoni ta’ CO2 użat fil-produzzjoni ta’ karbonat tal-kalċju preċipitat fl-Artikolu 49(1) u l-punt 10 tal-Anness IV. |
19.01.2017 |
Fil-kuntest ta’ CO2 ittrasferit barra stallazzjoni li tipproduċi l-ġir u marbut b’mod stabbli fil-produzzjoni tal-karbonat tal-kalċju preċipitat, l-Artikolu 49 u l-punt 10. B tal-Anness IV huma kuntrarji għall-Artikolu 3(d) tad-Direttiva tal-ETS, peress li jassumu b’mod mhux konfutabbli li hemm rilaxx ta’ CO2 fl-atrmosfera. |
Kawża C-457/15 |
Id-Direttiva 2003/87/KE |
Vattenfall Europe Generation AG/ DE |
L-obbligu ta’ negozjar tal-emissjonijiet meta jirriżulta għall-inklużjoni tal-kombustjoni ta’ karburanti fi stallazzjonijiet b’input termiku nominali totali > 20 MW fl-Anness I? |
28.07.2016 |
L-inklużjoni ta’ “Attivitajiet għall-kombustjoni ta’ karburanti fi stallazzjonijiet b’input termiku monimali totali > 20 MW” fl-Anness I jibda fid-data tal-ewwel emissjonijiet ta’ GHGs prodotti mill-istallazzjoni (anke qabel ma jiġi ġġenerat l-elettriku). |
Kawża C-456/15; Kawżi Magħquda C-191/14, C-192/14, C-295/14, C-389/14 u C-391/14 sa C-393/14 |
Id-Deċiżjoni 2013/448/UE |
Borealis Polyolefine GmbH/ AT Ministru Federali għall-Agrikoltura, il-Forestrija, l-Ambjent u l-Immaniġġjar tal-Ilma |
Validità tal-metodu għall-kalkolu tal-koeffiċjent ta’ korrezzjoni transettorjali (CSCF) uniformi |
14.07/2016; 28.04.2016 |
L-Artikolu 4 u l-Anness II tad-Deċiżjoni 2013/448/UE huma invalidi. Id-dejta dwar l-emissjonijiet li ġejjin minn attivitajiet ġodda fi stallazzjonijiet eżistenti ma kellhomx jitqiesu, iżda biss l-istallazzjonijiet li għadhom kemm ġew koperti mill-EU ETS sa mill-2013. CSCF ser ikun invalidu mill-01.03.2017. |
Kawża C-321/15 |
Id-Direttiva 2003/87/KE |
ArcelorMittal Rodange et Schifflange SA/ LU |
Kwistjoni dwar iċ-ċediment ta’ kwoti allokati b’mod żbaljat u jekk il-kwoti jistgħux jitqiesu bħala proprjetà |
08.03.2017 |
L-Istati Membri huma intitolati li jitolbu lura l-kwoti allokati b’mod żbaljat mingħajr kumpens. Il-kwistjoni tal-istatus legali tal-kwoti mhijiex essenzjali biex tingħata sentenza fil-każ inkwistjoni. |
Kawża C-272/15 |
Deċiżjoni 377/2013/UE, Direttiva 2008/101/KE |
Swiss International Air Lines AG/ Segretarju tal-Istat għall-Enerġija u t-Tibdil fil-Klima tar-Renju Unit, Aġenzija għall-Ambjent |
Id-Deċiżjoni 377/2013/UE tikser il-prinċipju ta’ trattament ugwali tal-UE billi tistabbilixxi moratorju fuq iċ-ċediment ta’ kwoti tal-emissjonijiet għal titjiriet bejn l-Istati taż-ŻEE u l-Istati mhux taż-ŻEE, iżda mhux għal titjiriet bejn l-Istati taż-ŻEE u l-Iżvizzera? |
12.12.2016 |
Il-fatt li l-moratorju fuq titjiriet ulterjuri taż-ŻEE ma japplikax għal titjiriet minn u lejn l-ajruporti tal-Iżvizzera ma jiksirx il-prinċipju ta’ trattament ugwali, li ma japplikax vis-à-vis pajjiżi terzi. |
Kawża C-180/15; Kawża C-506/14 |
Id-Deċiżjoni 2011/278/UE, Id-Deċiżjoni 2013/448/UE |
Borealis AB u oħrajn/ SE Environmental Protection Agency; Yara Suomi Oy u oħrajn/ FI Ministru għall-Impjiegi u l-Ekonomija |
Validità tal-metodu għall-kalkolu tal-koeffiċjent ta’ korrezzjoni transettorjali (CSCF) uniformi u tal-metodu sabiex jiġi determinat il-parametru referenzjarju ta’ prodott għall-metall sħun |
08.09/2016; 26.10.2016 |
Invalidità tas-CSCF minn Marzu 2017 (ara l-kawżi C-191/14 u oħrajn). Il-metodoloġija għall-kalkolu tal-parametru referenzjarju tal-metall sħun hija meqjusa bħala valida. Il-Qorti enfasizzat il-prinċipju ta’ nuqqas ta’ għadd doppju tal-emissjonijiet. |
Kawża C-203/12 |
Id-Direttiva 2003/87/KE |
Billerud Karlsborg Aktiebolag/ SE Environmental Protection Agency |
Operatur li sat-30 ta’ April ma jkunx ċeda biżżejjed kwoti tal-emissjonijiet għandu jħallas penali irrispettivament mill-motiv għan-nuqqas ta’ ċediment, anke jekk fit-30 ta’ April l-operatur kellu numru suffiċjenti ta’ kwoti? |
17.10.2016 |
Skont id-Direttiva tal-ETS, il-penali japplikaw anke jekk l-operatur li ma jkunx ċeda l-kwoti tiegħu fil-ħin, fit-30 ta’ April kellu biżżejjed kwoti disponibbli biex ikopri l-emissjonijiet tiegħu għall-aħħar sena. |
Fl-2015, l-emissjonijiet GHG tal-UE kienu diġà 22 % taħt il-livelli tal-1990.
Skont il-projezzjonijiet nazzjonali, l-emissjonijiet ser ikomplu jonqsu sal-2020, iżda sabiex tintlaħaq il-mira tal-2030 ser ikun meħtieġ li jiġu implimentati politiki addizzjonali.
COM (2015) 337, http://eur-lex.europa.eu/legal-content/MT/TXT/?uri=CELEX:52015PC0337
Trilogi huma laqgħat tripartitiċi informali li għalihom jattendu rappreżentanti tal-Parlament Ewropew, tal-Kunsill tal-UE u tal-Kummissjoni.
Id-Direttiva 2003/87/KE tal-Parlament Ewropew u tal-Kunsill tat-13 ta’ Ottubru 2003 li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità u li temenda d-Direttiva 96/61/KE, ĠU L 275, 25.10.2003, p. 32.
Rapporti ppubblikati fis-snin preċedenti jistgħu jinstabu hawnhekk: https://ec.europa.eu/clima/policies/ets_mt#tab-0-1
Għal referenza għar-rapporti tal-Artikolu 21, “pajjiżi parteċipanti” jew sempliċiment “pajjiżi” jinkludu t-28 Stat Membru tal-UE flimkien ma’ pajjiżi taż-ŻEE (l-Iżlanda, in-Norveġja u l-Liechtenstein).
L-emissjonijiet tal-bijomassa għandhom rata żero fl-EU-ETS, jiġifieri l-emissjonijiet għandhom jiġu rrapportati iżda l-ebda kwota ma għandha tiġi ċeduta għalihom.
L-emissjonijiet irrapportati skont l-Artikolu 21 rigward l-użu tal-bijokarburant ammontaw għal inqas minn 0.04 % tal-emissjonijiet globali tal-operatur ta’ inġenju tal-ajru involut.
Ara r-Regolament tal-Kummissjoni (UE) Nru 601/2012 tal-21 ta’ Ġunju 2012 dwar il-monitoraġġ u r-rapportar ta’ emissjonijiet ta’ gassijiet serra skont id-Direttiva 2003/87/KE tal-Parlament Ewropew u tal-Kunsill, ĠU L 181, 12.7.2012, p. 30, fejn l-istallazzjonijiet tal-kategorija C jemettu aktar minn 500 000 tunnellata ta’ CO2e fis-sena, l-istallazzjonijiet tal-kategorija B jemettu bejn 500000 u 50000 tunnellata ta’ CO2e fis-sena, u l-istallazzjonijiet tal-kategorija A jemettu inqas minn 50000 tunnellata ta’ CO2e fis-sena. Barra minn hekk, “stallazzjonijiet b’livelli baxxi ta’ emissjonijiet” huma subsett tal-stallazzjonijiet tal-kategorija A li jemettu anqas minn 25000 tunnellata ta’ CO2e fis-sena.
Eżempju ta’ operatur ta’ inġenju tal-ajru kummerċjali huwa linja tal-ajru tal-passiġġieri li tipprovdi servizzi lill-pubbliku ġenerali. Eżempju ta’ operatur ta’ inġenju tal-ajru mhux kummerċjali huwa inġenju tal-ajru privat.
In-numru ta’ kwoti tal-avjazzjoni mqiegħda fiċ-ċirkolazzjoni sa mill-2013 huwa r-riżultat ta’ approċċ minn isfel għal fuq li jibda minn allokazzjoni bla ħlas (iddeterminat fuq il-bażi ta’ parametri referenzjarji bbażati fuq l-attivitajiet għall-attività tal-operaturi fi ħdan iż-ŻEE). In-numru ta’ kwoti rkantati mbagħad jinkiseb abbażi tal-fatt li l-allokazzjoni bla ħlas (inkluża riżerva speċjali għal distribuzzjoni aktar tard għal operaturi ta’ inġenji tal-ajru li qed jikbru malajr u għal min jidħol ġdid) jenħtieġ li tkun 85 % tat-total u l-irkantar jenħtieġ li jkun 15 %.
In-numru ta’ kwoti tal-avjazzjoni mqiegħda fiċ-ċirkolazzjoni għall-2017, l-2018, l-2019 u l-2020 ser jiddependi fuq l-eżitu tal-proposta leġiżlattiva tal-Kummissjoni (ara t-taqsima 4).
In-numri tal-irkantar inklużi huma minn Awwissu 2017 (ara t-taqsima 4).
SWD(2015) 135 final, https://ec.europa.eu/clima/sites/clima/files/ets/revision/docs/impact_assessment_en.pdf
NER300 huwa programm ta’ finanzjament għal proġetti ta’ dimostrazzjoni innovattivi ta’ enerġija b'emissjonijiet baxxi ta' karbonju ffinanzjat mill-monetizzazzjoni ta’ 300 miljun kwota tal-emissjoni mill-NER (ara t-taqsima 3.1.2.2.).
In-numri ppreżentati huma minn Lulju 2017: https://ec.europa.eu/clima/sites/clima/files/ets/allowances/docs/170711_status_table_ner.pdf
Iċ-ċifri jinkludu notifiki rċevuti sa Lulju 2017 u jistgħu jkunu soġġetti għal bidliet kbar minħabba notifiki aktar tard mill-Istati Membri.
Ammont inizjali, qabel l-applikazzjoni tat-tnaqqis imsemmi hawn taħt fit-tabella.
Sentenza tal-Qorti tal-Ġustizzja tat-28 ta’ April 2016 fil-Kawżi Magħquda C-191/14, C-192/14, C-295/14, C-389/14 u C-391/14 sa C-393/14 Borealis Polyolefine GmbH et vs Bundesminister für Land- und Forstwirtschaft, Umwelt und Wasserwirtschaft et, EU:C:2016:311.
Id-Deċiżjoni tal-Kummissjoni 2017/126/UE, ĠU L 19, 25.1.2017, p. 93.
https://ec.europa.eu/clima/sites/clima/files/lowcarbon/ner300/docs/2017_draft_amendment_post_ccc_en.pdf
Id-Deċiżjoni tal-Kummissjoni 2010/670/UE, ĠU L 290, 6.11.2010, p. 39
B’konformità mad-Deċiżjoni tal-Kummissjoni 2010/670/UE, il-proġetti magħżula fl-ewwel sejħa jridu jieħdu deċiżjoni finali ta’ investiment sa tmiem l-2016, filwaqt li l-proġetti magħżula fit-tieni sejħa jridu jagħmlu dan sa tmiem Ġunju 2018.
Mappa interattiva wara l-implimentazzjoni tal-proġett tista’ tinstab hawnhekk: https://setis.ec.europa.eu/NER300
Il-verżjonijiet mhux kunfidenzjali tad-deċiżjonijiet kollha jistgħu jinstabu fuq is-sit web tad-DĠ Kompetizzjoni: http://ec.europa.eu/competition/elojade/isef/index.cfm?clear=1&policy_area_id=3
Il-baġit stmat huwa għall-2013-2015
Il-baġit stmat huwa għall-2013-2015
Baġit totali stmat massimu dipendenti fuq l-istimi tal-prezz tal-karbonju
Baġit stmat għall-2014-2015
Baġit stmat għall-2015-2018
Fl-2012 saru rkanti bikrija ta’ kwoti tal-Fażi 3 fid-dawl tal-prattika kummerċjali mifruxa fis-settur tal-elettriku ta’ bejgħ ta’ enerġija fuq bażi bil-quddiem u xiri tal-inputs meħtieġa (inklużi kwoti) meta jbigħu l-produzzjoni tagħhom.
Barra minn hekk, bejn l-1 ta’ April u t-30 ta’ Ġunju 2017, ġew irkantati 244 388 000 kwota ġenerali. Skont il-kalendarji tal-irkantijiet ippubblikati fl-2017, 452 064 000 kwota ġenerali oħra huma previsti li ser jiġu rkantati bejn Lulju u Diċembru tal-2017.
Tali rapporti huma disponibbli fuq is-sit web apposta tal-Kummissjoni fuq https://ec.europa.eu/clima/policies/ets/auctioning_mt.htm
Jekk jogħġbok ara l-Artikolu 10(3) tad-Direttiva tal-EU ETS.
Analiżi tal-użu tad-dħul mill-irkant mill-Istati Membri hija disponibbli hawnhekk: https://ec.europa.eu/clima/sites/clima/files/ets/auctioning/docs/auction_revenues_report_2017_en.pdf
Jinkludi volumi mill-kalendarju tal-irkant tal-2017.
Dan jinkludi wkoll kwoti kkanċellati.
Dawn il-kwoti ġew sostitwiti minn kwoti tal-Fażi 3 fi tmiem it-tieni perjodu ta’ negozjar. Ebda kwota oħra ta’ qabel it-tielet fażi ta’ negozjar ma tikkontribwixxi għan-numru totali ta’ kwoti fiċ-ċirkolazzjoni. Għall-ispjegazzjoni bankarja tal-kwoti tal-emissjonijiet ara: https://ec.europa.eu/clima/policies/ets/registry_mt#tab-0-2
Dan in-numru ma jinkludix irkanti bikrija ta’ kwoti tal-Fażi 3 li seħħew fl-2012 iżda jirrifletti l-użu ta’ krediti internazzjonali qabel il-bidu tal-Fażi 3. L-ammont totali ta’ krediti internazzjonali użati sa mill-2008 huma elenkati fit-taqsima 3.1.3.
C(2017) 3228 final, https://ec.europa.eu/clima/sites/clima/files/ets/reform/docs/c_2017_3228_en.pdf
C(2017) 3228 final, https://ec.europa.eu/clima/sites/clima/files/ets/reform/docs/c_2017_3228_en.pdf
Dawn iċ-ċifri relatati mal-2013-2016 huma bbażati fuq l-aktar dejta riċenti relatata ma’ dawn is-snin, kif jista’ jiġi derivat mill-EUTL. Dan ifisser li dawn jistgħu jinkludu dejta riċenti relatata mal-2013, l-2014, l-2015 u l-2016.
https://ec.europa.eu/transport/modes/air/news/2016-09-09-bratislava-declaration_en
Ir-Riżoluzzjoni tal-Assemblea tal-ICAO dwar il-CORSIA tista’ tinstab hawnhekk: https://www.icao.int/Meetings/a39/Documents/Resolutions/a39_res_prov_en.pdf
COM(2017)054 final, http://eur-lex.europa.eu/legal-content/MT/TXT/?uri=COM:2017:0054:FIN
Dejta minn Ġunju 2017
Dejta minn Ġunju 2017
Informazzjoni minn Awwissu 2017, https://ec.europa.eu/clima/news/2017-auction-calendars-aviation-allowances-published_mt
Id-Deċiżjoni Nru 377/2013/UE tal-Parlament Ewropew u tal-Kunsill tal-24 ta’ April 2013 għal deroga temporanja mid-Direttiva 2003/87/KE li tistabbilixxi skema għall-iskambju ta’ kwoti ta’ emissjonijiet ta’ gassijiet serra ġewwa l-Komunità Test b’relevanza għaż-ŻEE, ĠU L 113, 25.4.2013, p. 1.
https://ec.europa.eu/info/law/markets-financial-instruments-mifid-ii-directive-2014-65-eu/amending-and-supplementary-acts/implementing-and-delegated-acts_mt
https://ec.europa.eu/info/law/market-abuse-regulation-eu-no-596-2014/amending-and-supplementary-acts/implementing-and-delegated-acts_mt
Il-mekkaniżmu tar-reverse charge jittrasferixxi r-responsabbiltà għall-ħlas tat-tranżazzjoni tal-VAT mill-bejjiegħ għax-xerrej ta’ oġġett jew servizz u jikkostitwixxi salvagwardja effettiva kontra l-frodi tal-VAT.
Is-Sentenza tal-Qorti tal-Ġustizzja tat-8 ta’ Marzu 2017 fil-Kawża C-321/15 ArcelorMittal Rodange et Schifflange SA vs État du Grand-duché de Luxembourg, EU:C:2017:179.
Ir-Regolament tal-Kummissjoni (UE) Nru 601/2012 tal-21 ta’ Ġunju 2012 dwar il-monitoraġġ u r-rapportar ta’ emissjonijiet ta’ gassijiet serra skont id-Direttiva 2003/87/KE tal-Parlament Ewropew u tal-Kunsill, ĠU L 181, 12.7.2012, p. 30.
Ir-Regolament tal-Kummissjoni (UE) Nru 600/2012 tal-21 ta’ Ġunju 2012 dwar il-verifika tar-rapporti dwar l-emissjonijiet tal-gassijiet serra u r-rapporti dwar it-tunnellati kilometri u l-akkreditazzjoni tal-verifikaturi skont id-Direttiva 2003/87/KE tal-Parlament Ewropew u tal-Kunsill, ĠU L 181, 12.7.2012, p. 1.
Dawn il-pjanijiet ta’ azzjoni huma speċifiċi għal kull Stat Membru. Madankollu, eżempju ta’ kwistjoni identifikata komunement hija l-klassifikazzjoni korretta ta’ dikjarazzjonijiet skorretti u nuqqasijiet ta’ konformità rrapportati fir-rapporti ta’ verifika. Mudelli u dokumenti ta’ gwida tal-MRR u tal-AVR jistgħu jinstabu hawnhekk: https://ec.europa.eu/clima/policies/ets/monitoring_mt#tab-0-1
Ir-raġuni ewlenija għal dan hija li l-metodoloġija bbażata fuq il-kejl tinvolvi l-iskjerament ta’ riżorsi sinifikanti u għarfien għall-kejl kontinwu tal-konċentrazzjoni ta’ GHGs rilevanti, li ħafna mill-operaturi ż-żgħar ma għandhomx.
Ir-Regolament tal-Kummissjoni (UE) Nru 601/2012 jeħtieġ li l-operaturi kollha jilħqu ċerti saffi minimi, fejn sorsi akbar ta’ emissjonijiet huma meħtieġa biex jintlaħqu saffi ogħla (li jinvolvu kwalità tad-dejta aktar affidabbli), filwaqt li għal raġunijiet ta’ kosteffiċjenza japplikaw rekwiżiti anqas stretti għal sorsi iżgħar.
Lista tal-EA ta’ punti ta’ aċċess għall-NABs li jakkreditaw verifikaturi għall-EU ETS: http://www.european-accreditation.org/information/national-accreditation-bodies-having-been-successfully-peer-evaluated-by-ea
F’xi każijiet, il-pajjiżi jistgħu jkunu qegħdin jirrapportaw diversi awtoritajiet reġjonali/lokali bħala awtorità kompetenti waħda.
Il-proċedimenti tal-konferenzi jistgħu jinstabu hawnhekk: https://ec.europa.eu/clima/events/articles/0114_mt
Bħala parti mill-ispezzjonijiet tad-Direttiva dwar l-Emissjonijiet Industrijali (IED)
L-Ungerija użat id-deroga tal-Artikolu 10c fl-2013 biss.