IL-KUMMISSJONI EWROPEA
Brussell, 20.11.2017
COM(2017) 678 final
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW
Pjan ta’ Azzjoni 2017-2019 tal-UE
L-indirizzar tad-differenza bejn il-pagi tal-irġiel u n-nisa
1.Id-differenza bejn il-pagi tal-irġiel u n-nisa fl-UE
Il-mixja lejn l-eliminazzjoni ta' din id-differenza staġnat bħala riżultat ta'...
L-ugwaljanza bejn is-sessi hija wieħed mill-valuri fundamentali tal-Unjoni Ewropea. Madankollu, ma saritx realtà fuq il-post tax-xogħol. Madwar l-ekonomija kollha, bħala medja, in-nisa fl-UE jaqilgħu aktar minn 16 % inqas fis-siegħa mill-irġiel. Din id-differenza bejn il-pagi tal-irġiel u n-nisa baqgħet f'livell kostanti matul dawn l-aħħar 5 snin. Bir-rata ta’ tibdil attwali, se tkun eliminata biss bil-wasla tal-millennju li jmiss. L-istaġnar reċenti jqajjem mistoqsijiet rigward il-ħtieġa li jissaħħu u li jiġu adattati inizjattivi eżistenti: id-disparitajiet bejn is-sessi fis-suq tax-xogħol trażżnu, iżda ma ġewx eliminati 1 .
... segregazzjoni mifruxa fis-suq tax-xogħol,
Is-setturi u l-professjonijiet huma ssegregati: il-parti l-kbira tal-ħaddiema Ewropej għandhom primarjament kollegi tal-istess sess 2 u s-setturi fejn jinġabru n-nisa, ta' spiss ikollhom pagi aktar baxxi minn dawk fejn jinġabru l-irġiel 3 . Għalkemm għadd ta' inizjattivi rnexxielhom jinkoraġġixxu lin-nisa jidħlu f'setturi ddominati mill-irġiel bħax-xjenza u t-teknoloġija, il-livell ta' segregazzjoni professjonali u settorjali ma nbidel kważi xejn 4 . Barra minn hekk, fis-setturi kważi kollha, l-irġiel huma promossi aktar ta' spiss għal rwoli superviżorji jew maniġerjali, filwaqt li fil-quċċata nett qed tippreżenta ruħha wkoll l-ikbar differenza, b'inqas minn 5 % mis-CEOs ikunu nisa. Din is-segregazzjoni "vertikali" tikkorrispondi għal proporzjon sinifikanti mid-differenza bejn il-pagi tal-irġiel u n-nisa 5 .
... stereotipi persistenti li qed jissaħħu minn politiki inadegwati dwar il-bilanċ bejn ix-xogħol u l-ħajja privata,
Huma persistenti l-istereotipi dwar ir-rwoli tal-irġiel u n-nisa fis-soċjetà u, b'riżultat ta' dan, dwar jekk għandhomx ikunu fis-suq tax-xogħol jew inkella d-dar. Din hija waħda mill-kawżi prinċipali tad-differenza bejn il-pagi tal-irġiel u n-nisa. Bħala medja, l-irġiel iqattgħu inqas ħin min-nisa jieħdu ħsieb it-tfal jew qraba dipendenti filwaqt li n-nisa mhumiex f'pożizzjoni jqattgħu dak il-ħin b'xogħol imħallas jew bil-ksib ta' esperjenza li se tkun ta' għajnuna tul il-ħajja tax-xogħol tagħhom 6 . Jekk ikunu mfassla sew, il-politiki dwar il-bilanċ bejn ix-xogħol u l-ħajja privata jistgħu jgħinu biex titnaqqas id-differenza bejn il-pagi tal-irġiel u n-nisa. L-investimenti f'faċilitajiet formali ta' kura u f'liv adegwat relatat mal-familja kemm għan-nisa kif ukoll għall-irġiel jikkontribwixxu għal tnaqqis fid-differenza bejn il-pagi tal-irġiel u n-nisa billi jwasslu għal inqas interruzzjonijiet fil-karriera u impjiegi inqas diskontinwi għan-nisa. Jenħtieġ li arranġamenti aktar flessibbli tax-xogħol (inklużi ħinijiet tax-xogħol flessibbli, ħinijiet tax-xogħol imnaqqsa u telexogħol) jingħataw aktar valur, kemm meta jirrigwardaw lin-nisa kif ukoll meta jirrigwardaw l-irġiel, u ma jitqisux bħala spiża għal min iħaddem, li ta' spiss ikollu tendenza li jippenalizza lill-impjegati permezz ta' tnaqqis fil-paga 7 .
... u diskriminazzjoni, li ssir possibbli minħabba n-nuqqas ta' trasparenza
Bħala medja, kważi fil-professjonijiet kollha, l-irġiel jitħallsu aktar min-nisa. Id-diskriminazzjoni fil-paga għadha mifruxa: mara tista' titħallas inqas minn raġel għal preċiżament l-istess xogħol; u xogħol li s-soltu jsir min-nisa jitħallas inqas minn xogħol li s-soltu jsir mill-irġiel, anki meta jkun tal-istess valur. Barra minn hekk, is-segretezza li teżisti madwar il-livelli tal-pagi tagħmlu saħansitra aktar diffiċli li jinkixfu każijiet ta' diskriminazzjoni. Għalkemm il-parti l-kbira tal-Ewropej (69 %) huma konxji tal-eżistenza ta' differenza bejn il-pagi tal-irġiel u n-nisa madwar l-ekonomija kollha, l-impjegati ma jaħsbux li tali differenza teżisti fil-kumpanija tagħhom stess, filwaqt li terz tal-impjegati ma jafx il-paga tal-kollegi tagħhom. L-Ewropej ikunu lesti jappoġġjaw aktar trasparenza fuq ix-xogħol: kważi żewġ terzi jkunu favur il-pubblikazzjoni tal-paga medja li tinqala' fl-organizzazzjoni jew il-kumpanija fejn jaħdmu, skont is-sess u t-tip ta' impjieg 8 .
Kważi nofs il-ħaddiema fil-fatt iħossuhom skomdi bl-idea li jinnegozjaw is-salarju tagħhom, u dan il-proporzjon huwa ogħla fost in-nisa milli fost l-irġiel. Madankollu, huwa ta' importanza anki l-kuntest: in-nisa jkollhom xejra jinnegozjaw daqs l-irġiel meta jkun intqal b'mod espliċitu li l-paga hija negozjabbli u li għalhekk, in-negozjar ikun imġiba adegwata. L-organizzazzjoni tax-xogħol, id-disinn tar-reklutaġġ u l-politiki dwar il-pagi eventwalment jista' jkollhom impatt kbir: jekk ikunu mfassla sew, jistgħu jpattu għall-preġudizzji bla ħsieb tagħna dwar l-irġiel u n-nisa u jevitaw l-"istandards doppji" tar-remunerazzjoni mhux indaqs tan-nisa u l-irġiel.
Il-kobor tad-differenza bejn il-pagi tal-irġiel u n-nisa madwar l-ekonomija jiddependi wkoll mill-istituzzjonijiet li jiffissaw il-pagi. Il-pagi minimi transsettorjali u l-mekkaniżmi ta' ffissar tal-pagi jistgħu jikkontribwixxu għal pagi jiżdiedu f'setturi b'pagi baxxi u b'hekk inaqqsu d-differenza bejn il-pagi tal-irġiel u n-nisa 9 .
Is-sitwazzjoni attwali tissuġġerixxi l-ħtieġa li wieħed iqis miżuri aktar estensivi fil-livell tal-UE. Tali miżuri kieku jikkontribwixxu biex tingħata spinta lill-impjiegi u lit-tkabbir fl-UE u li jinkiseb suq uniku aktar ġust rigward l-impjiegi. Din il-Komunikazzjoni tippreżenta Pjan ta' Azzjoni għall-indirizzar ulterjuri tad-differenza bejn il-pagi tal-irġiel u n-nisa u l-iżgurar li jiġi applikat bis-sħiħ il-prinċipju ta' paga ugwali għan-nisa u l-irġiel.
2.Prijoritajiet ta' politika
L-eliminazzjoni tad-differenza bejn il-pagi tal-irġiel u n-nisa tibqa' għan ewlieni fil-qafas tal-mira globali tal-kisba ta' ugwaljanza bejn is-sessi 10 u l-kisba tal-Għanijiet ta' Żvilupp Sostenibbli tal-Aġenda 2030 tan-NU. Dan ikkontribwixxa wkoll biex il-pilastru Ewropew tad-drittijiet soċjali jiġi żviluppat ulterjorment [ipproklamat mill-Parlament, mill-Kunsill u mill-Kummissjoni fis-Summit Soċjali għall-Impjiegi Ġusti u t-Tkabbir fis-17 ta' Novembru f’Gothenburg], b'mod partikolari l-prinċipju 2 tiegħu biex tiġi żgurata ugwaljanza bejn is-sessi fl-oqsma kollha u l-prinċipju 3 dwar opportunitajiet indaqs.
Għaldaqstant, tibqa' prijorità politika tal-Kummissjoni 11 . Dan il-Pjan ta' Azzjoni għandu l-għan ukoll biex dan l-impenn jelimina d-differenza bejn il-pagi tal-irġiel u n-nisa permezz ta' lista ta' azzjonijiet ewlenin u konkreti.
Il-Pjan ta' Azzjoni jinkludi sensiela wiesgħa u koerenti ta' attivitajiet għall-indirizzar tad-differenza bejn il-pagi tal-irġiel u n-nisa aktarx mill-angoli kollha possibbli milli ffukati fuq fattur wieħed jew kawża waħda biss. Dawn l-attivitajiet se jirrinfurzaw lil xulxin.
Ġew identifikati tmien oqsma ta’ azzjoni ewlenin:
1- Titjib fl-applikazzjoni tal-prinċipju ta' paga ugwali
2- Ġlieda kontra s-segregazzjoni professjonali u settorjali
3- Tkissir tas-saqaf tal-ħġieġ: inizjattivi biex tiġi miġġielda s-segregazzjoni vertikali
4- Indirizzar tal-penalizzazzjoni tal-kura
5- Għoti ta' valur ikbar lill-ħiliet, l-isforzi u r-responsabbiltajiet tan-nisa
6- Ġlieda kontra ċ-ċpar: il-kxif ta' inugwaljanzi u stereotipi
7- Twissijiet u informazzjoni dwar id-differenza bejn il-pagi tal-irġiel u n-nisa
8- Tisħiħ ta' sħubijiet għall-indirizzar tad-differenza bejn il-pagi tal-irġiel u n-nisa
Sabiex dawn ikunu effikaċi, ikunu meħtieġa sinerġiji bejn il-miżuri meħuda mill-partijiet ikkonċernati ewlenin fil-livell Ewropew, nazzjonali u korporattiv.
Azzjoni 1: titjib fl-applikazzjoni tal-prinċipju ta' paga ugwali
Il-Kummissjoni se tivvaluta l-ħtieġa ta' miżuri legali ulterjuri biex jitjieb l-infurzar tal-prinċipju u se tibqa' timmonitorja u tinforza d-drittijiet eżistenti fl-UE.
It-TFUE jistabbilixxi l-prinċipju ta' paga ugwali fl-Artikolu 157 tiegħu. L-Artikolu 4 tad-Direttiva mfassla mill-ġdid dwar trattament ugwali tal-irġiel u n-nisa (2006/54/KE) jistabbilixxi l-prinċipju ta’ paga ugwali billi jistabbilixxi li, għall-istess xogħol jew għal xogħol ta’ valur ugwali, diskriminazzjoni diretta u indiretta minħabba s-sess hi pprojbita fl-aspetti u l-kundizzjonijiet kollha tar-rimunerazzjoni.
Fl-2013, il-Kummissjoni adottat rapport ta' implimentazzjoni dwar id-Direttiva mfassla mill-ġdid dwar trattament ugwali tal-irġiel u n-nisa 12 . Ir-rapport jipprovdi s-sitwazzjoni attwali tal-implimentazzjoni prattika tad-Direttiva, inkluża l-kwistjoni tal-paga ugwali.
Fl-2014, il-Kummissjoni adottat Rakkomandazzjoni dwar it-trasparenza fil-pagi 13 , li tippromwovi applikazzjoni aktar effikaċi tal-leġiżlazzjoni dwar pagi ugwali permezz ta' sett ta' għodod ta' miżuri konkreti għat-titjib tat-trasparenza fil-pagi 14 . Ir-Rakkomandazzjoni tistieden lill-Istati Membri jagħżlu u jimplimentaw mill-inqas waħda mill-miżuri ta' hawn fuq fid-dawl taċ-ċirkostanzi domestiċi tagħhom.
Flimkien ma' dan il-Pjan ta' Azzjoni, il-Kummissjoni adottat rapport ta' evalwazzjoni dwar ir-Rakkomandazzjoni dwar it-Trasparenza. Ir-rapport jagħti rendikont tas-segwitu mill-Istati Membri u stampa ġenerali tal-miżuri nazzjonali eżistenti 15 . Il-valutazzjoni tal-miżuri nazzjonali nnotifikati mill-Istati Membri uriet li l-miżuri ta' trasparenza nazzjonali fis-seħħ huma insuffiċjenti u mhux effikaċi fihom innifishom.
Kemm ir-riformulazzjoni tar-rapport dwar l-implimentazzjoni tad-Direttiva dwar trattament ugwali tal-irġiel u n-nisa u kemm dak dwar l-implimentazzjoni tar-Rakkomandazzjoni dwar it-Trasparenza jippreżentaw evidenza tal-ħtieġa li jitrawwem il-qafas legali eżistenti u li jissaħħaħ l-infurzar tiegħu.
B’mod partikolari, il-Kummissjoni se:
·tivvaluta l-possibbiltà ta' titjib immirat tad-Direttiva riformulata dwar trattament ugwali tal-irġiel u n-nisa billi jiġu eżaminati dawn li ġejjin:
oil-ħtieġa u l-possibbiltà li jsiru vinkolanti xi wħud mill-miżuri jew kollha kemm huma dwar it-trasparenza rigward il-pagi previsti fir-Rakkomandazzjoni tal-2013, bħalma huma:
-Id-dritt tal-impjegati li jitolbu informazzjoni dwar il-livelli tal-pagi;
-Rappurtar regolari minn min iħaddem dwar il-pagi skont il-kategorija ta' impjegat(a) jew il-pożizzjoni;
-Kjarifika tal-kunċett tax-xogħol tal-istess valur;
otitjib tas-sanzjonijiet u l-kumpens lill-vittmi b'evalwazzjoni tal-ħtieġa li jiġu introdotti miżuri bħal 16 :
-l-eżistenza ta' sanzjonijiet minimi f'każ ta' ksur tal-prinċipju ta' paga ugwali, u
-l-eżistenza ta' standards minimi għall-kumpens li jqiegħdu l-vittma fil-pożizzjoni li fiha kienet tkun kieku kien jiġi rrispettat il-prinċipju ta' paga ugwali.
ol-iżgurar ta' ugwaljanza bejn is-sessi fl-iskemi ta' pensjoni okkupazzjonali bil-għan li tiġi aġġustata d-Direttiva riformulata dwar trattament ugwali tal-irġiel u n-nisa għall-ġurisprudenza tal-Qorti tal-Ġustizzja: id-Direttiva tippermetti trattament differenti ta' nisa u rġiel rigward il-pensjonijiet okkupazzjonali minħabba l-istennija tal-għomor statistikament differenti tagħhom, li jwassal biex in-nisa jirċievu pensjoni ta' kull xahar aktar baxxa peress li bħala medja, huma jgħixu aktar (ħaġa li tikkontribwixxi għad-diskrepanza fil-pensjonijiet bejn is-sessi); din il-prattika tqieset diskriminatorja u ġiet ipprojbita mill-Qorti tal-Ġustizzja għall-pensjonijiet tal-Istat 17 fl-2014 u għall-pensjonijiet privati (kuntratti tal-assigurazzjoni) fl-2011 18 .
otisħiħ tar-rwol ta' infurzar tal-korpi tal-ugwaljanza, pereżempju billi:
-jiġi żgurat li l-korpi tal-ugwaljanza jistgħu fil-fatt jaqdu r-rwol tagħhom u jagħmlu dan bis-sħiħ, b'mod partikolari permezz ta' monitoraġġ u infurzar tar-regoli applikabbli;
-jiġu ċċarati r-rekwiżiti fil-qafas tad-Direttiva u/jew jiġu stabbiliti standards orizzontali għall-korpi tal-ugwaljanza b'konformità mal-istatus tagħhom relatat mal-monitoraġġ, b'mod partikolari rigward l-indipendenza, l-effikaċja u l-kompetenzi tagħhom 19 .
·tkompli tevalwa jekk l-acquis tal-UE huwiex qed jiġi implimentat korrettament fl-Istati Membri differenti tal-UE u timmonitorja kif il-prinċipju ta' paga ugwali qed jiġi applikat fil-prattika; f'każ ta' nuqqas ta’ konformità, il-Kummissjoni se tibqa' twettaq proċeduri ta' ksur kontra l-Istati Membri kkonċernati għan-nuqqas tagħhom li jikkonformaw mal-obbligi tagħhom fil-qafas tal-UE
·tadotta, fl-2019, rapport dwar il-miżuri nazzjonali adottati abbażi tal-Artikolu 157-4 tat-TFUE li jipprovdu għal vantaġġi speċifiċi, sabiex jagħmluha aktar faċli għas-sess li mhuwiex rappreżentat biżżejjed biex isegwi attività professjonali jew biex jipprevjenu jew jikkompensaw għal żvantaġġi fil-karrieri professjonali.
·tkompli taħdem flimkien man-netwerk għall-korpi tal-ugwaljanza (EQUINET), il-Kumitat Konsultattiv dwar l-Opportunitajiet Ugwali għan-Nisa u għall-Irġiel u l-Grupp ta' Livell Għoli dwar l-integrazzjoni ta' kwistjonijiet ta' ugwaljanza bejn is-sessi, bil-għan li jissaħħaħ l-infurzar tal-prinċipju ta' paga ugwali fl-Istati Membri.
Azzjoni 2: Ġlieda kontra s-segregazzjoni professjonali u settorjali
Il-Kummissjoni se tappoġġja prattiki biex jiġu indirizzati b'mod bikri fl-edukazzjoni u fil-ħajja professjonali l-istereotipi li jwasslu biex in-nisa u l-irġiel jiġu impjegati f'oqsma differenti. Il-Kummissjoni se tappoġġja kumpaniji u impjegaturi oħrajn fl-isforzi tagħhom li jiżguraw pagi ugwali u li jiġbdu lejhom u jżommu magħhom is-sess irrappreżentat inqas.
Is-segregazzjoni settorjali hija wieħed mill-fatturi ewlenin li jwasslu għal differenza bejn il-pagi tal-irġiel u n-nisa.
Ir-rappreżentanza tal-irġiel u n-nisa tvarja minn settur ekonomiku għal ieħor. In-nisa huma inqas irrappreżentati f'ċerti oqsma tal-ekonomija, bħall-kostruzzjoni, il-manifattura, it-trasport, ix-xjenzi u l-ICT 20 . Min-naħa l-oħra, l-irġiel rari li jidħlu f'setturi ewlenin għall-futur tas-soċjetà u l-ekonomija tal-Ewropa, bħall-edukazzjoni, l-infermerija u professjonijiet li jindukraw fil-kura tas-saħħa.
Is-settur tal-ICT ilu qed jikber tul dawn l-aħħar 10 snin u hu mistenni li jibqa' joħloq impjiegi. Madankollu, madwar 16 % biss mill-kważi tmien (8) miljun ruħ li qed jaħdmu fl-ICT huma nisa. Fis-settur tal-inġinerija u dak xjentifiku, għadha tinħass qasma bejn il-ġeneri fost il-ġenerazzjoni żagħżugħa: filwaqt li fl-2014, 46 % mill-gradwati kollha b'PhD fl-UE kienu nisa, dawn kienu jikkorrispondu biss għal 28 % mill-gradwati b'PhD fl-inġinerija, il-manifattura u l-kostruzzjoni u għal 21 % biss minn dawk gradwati fl-informatika. Min-naħa l-oħra, l-irġiel jikkorrispondu għal 33 % biss minn dawk b'PhD f'suġġetti relatati mat-tagħlim.
Jekk aktar nisa jinġibdu lejn is-settur tax-xjenza, it-teknoloġija, l-inġinerija u l-matematika (STEM) 21 , dan kieku jikkontribwixxi għal żieda fil-PDG per capita tal-UE ta' bejn 2,2 u 3,0 % fl-2050. Dan kieku jista' jsir abbażi ta' xejriet ġodda bħall-interess tal-bniet fil-kodifikazzjoni jew il-ħolqien ta' kumpaniji ġodda mmexxija minn nisa.
Peress li l-għażliet ta' karriera u ta' studju jsiru relattivament kmieni fil-ħajja u ta' spiss ikunu irriversibbli, l-indirizzar tas-segregazzjoni fis-suq tax-xogħol jirrikjedi azzjonijiet fil-livell tal-iskejjel. Id-data tal-PISA 22 turi li l-istereotipi tas-sessi għadhom prevalenti u jwasslu għal differenzi fl-istima tagħhom nnifishom tal-persuni u l-impenn tagħhom f'oqsma differenti. Għadd ta' prattiki tajba huma disponibbli dwar kif tista' tiġi indirizzata s-segregazzjoni fl-edukazzjoni u fis-suq tax-xogħol. Hemm bżonn ta' tagħlim reċiproku u evidenza rigward dak li "jaħdem" f'dan il-qasam.
B’mod partikolari, il-Kummissjoni se:
·tappoġġja proġetti transnazzjonali għall-indirizzar tal-istereotipi u s-segregazzjoni fl-edukazzjoni, it-taħriġ u s-suq tax-xogħol, b'enfasi fuq it-twettiq ta' esperimenti li joħolqu evidenza solida. L-appoġġ se jiġi pprovdut permezz tal-Programm ta' Drittijiet, Ugwaljanza u Ċittadinanza (REC) 2014-2020. Dan jikkomplementa l-appoġġ ipprovdut lill-Istati Membri permezz tal-FSE u tal-programm Erasmus+ ;
·torganizza konferenza ta ' rendikont (fl-2018) u konferenza finali (fl-2019) dwar ir-riżultati tal-proġetti kontra l-istereotipi u s-segregazzjoni 23 ; f'kooperazzjoni ma' partijiet ikkonċernati ewlenin, b'mod partikolari rappreżentanti ta' skejjel, fornituri ta' taħriġ, universitajiet, servizzi pubbliċi tal-impjiegi u fornituri ta' gwida dwar il-karriera. Il-konferenzi huma maħsuba biex jenfasizzaw l-aktar esperjenzi promettenti u biex ixandruhom aktar lil firxa wiesgħa ta' partijiet ikkonċernati u gvernijiet nazzjonali;
·tniedi kondivizjoni regolari ta' prattiki tajba bejn il-kumpaniji, biex tinkiseb l-eliminazzjoni tas-segregazzjoni tal-ġeneri u biex jitkompla l-iffaċilitar tal-Pjattaforma tal-UE dwar il-Karti dwar id-Diversità 24 ;
·tkompli tiffinanzja proġetti fil-livell taċ-ċittadin li jpoġġu f'dubju l-istereotipi u li jkunu mmexxija minn komunitajiet tal-edukazzjoni u t-taħriġ permezz ta' Erasmus+ ;
·timplimenta inizjattivi partikolari f'diversi setturi għall-eliminazzjoni tal-istereotipi dwar il-ħiliet, l-abbiltajiet u r-rwoli tan-nisa u l-irġiel, bħal:
-li jitkomplew jiġu mistiedna kumpaniji biex jissieħbu mal-Koalizzjoni Kbira għall-Ħiliet u l-Impjiegi Diġitali 25 , u b'mod partikolari biex jattrezzaw aktar nisa u bniet b'ħiliet diġitali u jinkoraġġixxuhom isegwu studji u karrieri fl-ICT; se jsiru disponibbli fondi tal-UE għal organizzazzjonijiet u kumpaniji biex ikomplu l-iskambju ta' prattiki tajba dwar l-innovazzjoni abbażi tal-ġeneri, id-diversità u l-inklużjoni, u t-tmexxija bbilanċjata;
-il-pubblikazzjoni u l-kunsiderazzjoni ta' segwitu adegwat għall-istudju tal-ħarifa tal-2017 dwar In-Nisa fl-Era Diġitali, li jipprovdi stampa ġenerali tax-xejriet fil-qasam;
-il-provvista ta' għodod għall-promozzjoni ta' tibdiliet istituzzjonali li jistgħu jmexxu 'l quddiem l-ugwaljanza fil-karrieri xjentifiċi (bħall-għodda dwar l-Ugwaljanza bejn is-sessi fil-qasam akkademiku u r-riċerka – GEAR, żviluppata mill-Istitut Ewropew għall-Ugwaljanza bejn is-Sessi, u t-tkomplija tal-monitoraġġ regolari tax-xejriet ewlenin fix-xjenza u r-riċerka f'She Figures, il-pubblikazzjoni ewlenija tal-Kummissjoni f'dan il-qasam);
-li jitkomplew jiġu enfasizzati l-kisbiet tan-nisa fix-xjenza bl-organizzar tal-Premju tal-UE għall-innovaturi nisa;
-it-tnedija ta' Pjattaforma tal-UE għat-tibdil bil-għan li jiżdiedu n-nisa impjegati u l-opportunitajiet indaqs fis-settur tat-trasport 26 u l-pubblikazzjoni ta' studju fl-2018 dwar il-kawża rilevanti għan-negozju favur aktar impjiegi għan-nisa fit-trasport; abbażi tar-riżultati tagħha disseminati b’mod wiesa’, se ssir kondiviżjoni tal-aħjar prattiki mis-settur, u se jiġu inkoraġġuti setturi oħra jidħlu għal eżerċizzju simili;
- appoġġ għat-tagħlim bejn il-pari bejn l-Istati Membri dwar il-karrieri tal-għalliema u l-mexxejja ta' skola għall-indirizzar tan-nuqqas ta' bilanċ bejn is-sessi fit-tagħlim 27 ; dan se jsir fil-qafas tal-programm Edukazzjoni u Taħriġ 2020 permezz ta' sensiela ta' seminars minn esperti u b'rabta mad-djalogu soċjali settorjali Ewropew fl-edukazzjoni 28 ;
-appoġġ favur il-ġbir ta' data dwar il-pagi tal-għalliema minn Eurydice 29 f'kooperazzjoni mal-OECD u tħeġġiġ lill-Istati Membri biex jieħdu azzjoni favur l-eliminazzjoni tar-remunerazzjoni insodisfaċenti f'dan is-settur.
Azzjoni 3: Tkissir tas-saqaf tal-ħġieġ: biex tiġi miġġielda s-segregazzjoni vertikali
Il-Kummissjoni se tappoġġja prattiki għat-titjib tal-bilanċ bejn is-sessi fil-proċessi u pożizzjonijiet ta' teħid ta' deċiżjonijiet fis-setturi kollha.
F'kull settur u kull professjoni, huwa inqas probabbli għan-nisa li jingħataw promozzjoni u responsabbiltajiet maniġerjali. Għalhekk, hemm bżonn ta' azzjonijiet għat-titjib tal-bilanċ bejn is-sessi fit-teħid tad-deċiżjonijiet u li żgurata l-ugwaljanza bejn is-sessi fil-livelli kollha 30 .
B’mod partikolari, il-Kummissjoni se:
·taħdem favur l-adozzjoni tal-proposta tal-Kummissjoni għal Direttiva dwar it-titjib tal-bilanċ bejn is-sessi fost diretturi ta’ kumpaniji elenkati fil-Borża. Il-proposta tistabbilixxi objettivi kwantitattivi għall-Istati Membri u tenfasizza l-importanza ta' bordijiet li jistabbilixxu kriterji tal-għażla trasparenti għall-kandidati;
·timmonitorja l-implimentazzjoni tal-politiki dwar id-diversità tal-ġeneri fil-bordijiet tad-diretturi tal-ikbar kumpaniji elenkati tal-UE fil-kuntest tad-Direttiva 2014/95/UE li temenda d-Direttiva 2013/34/UE fir-rigward tad-divulgazzjoni ta' informazzjoni mhux finanzjarja u dwar id-diversità minn ċerti impriżi u gruppi kbar; tagħti segwitu lil-linji gwida tal-Kummissjoni dwar rappurtar mhux finanzjarju, billi teżamina, b'mod partikolari, sa liema grad l-ikbar kumpaniji jindirizzaw il-bilanċ bejn is-sessi fil-politiki tagħhom dwar id-diversità 31 ;
·tkompli tiffinanzja, permezz tal-Programm ta' Drittijiet, Ugwaljanza u Ċittadinanza, proġetti ta' gvernijiet, imsieħba soċjali, negozji, NGOs u universitajiet li għandhom l-għan li jtejbu l-bilanċ bejn is-sessi fil-pożizzjonijiet maniġerjali fil-livelli kollha 32
·tidħol fi djalogu mal-imsieħba soċjali għall-promozzjoni ta' miżuri li jtejbu l-bilanċ bejn is-sessi fit-teħid ta' deċiżjonijiet, u tniedi u timplimenta proġetti li għandhom l-għan li jtejbu l-bilanċ bejn is-sessi fil-pożizzjonijiet inkarigati mit-teħid ta' deċiżjonijiet.
·tħeġġeġ lill-gvernijiet jadottaw strateġiji li jinkludu miżuri konkreti li jwasslu għal rappreżentazzjoni aħjar tas-sess irrappreżentat inqas fit-teħid ta' deċiżjonijiet.
·tidħol fi djalogu ma' korpi regolatorji settorjali għall-adozzjoni ta' miżuri li jtejbu l-bilanċ bejn is-sessi fit-teħid ta' deċiżjonijiet.
·timplimenta l-Inizjattiva ta' appoġġ għall-bilanċ bejn ix-xogħol u l-ħajja privata (ara l-Azzjoni 4), li tappoġġja bilanċ aħjar u qsim tar-responsabbiltajiet ta' kura bejn in-nisa u l-irġiel u b'hekk tinkoraġġixxi lin-nisa japplikaw għal pożizzjonijiet ogħla.
Azzjoni 4: Indirizzar tal-penalizzazzjoni tal-kura
Il-Kummissjoni se tappoġġja l-għoti ta’ setgħa ekonomika lin-nisa permezz tal-promozzjoni tal-politiki dwar il-bilanċ bejn ix-xogħol u l-ħajja privata.
Illum, in-nisa żgħażagħ itemmu l-iskola bi kwalifiki aħjar miż-żgħażagħ irġiel, iżda f'10 Stati Membri diġà jkunu qed jaqilgħu 10 % inqas mill-irġiel qabel l-età ta' 34 sena 33 . Din id-disparità tikber bl-età, b'mod partikolari bħala riżultat tal-hekk imsejħa penali tal-maternità 34 . In-nisa jitilqu mis-suq tax-xogħol u jindukraw lit-tfal u/jew membri tal-familja dipendenti u, jekk ma jirtirawx għalkollox mis-suq tax-xogħol, ta' spiss jaċċettaw pożizzjonijiet bi kwalifika aktar baxxa sabiex jakkomodaw id-dmirijiet tal-familja huma u ġejjin lura. Il-politiki dwar il-bilanċ bejn ix-xogħol u l-ħajja privata huma prekundizzjoni għat-titjib tas-setgħa ekonomika tan-nisa billi bilanċ tajjeb bejn ix-xogħol u l-ħajja privata jżid l-opportunitajiet għan-nisa fis-suq tax-xogħol u jneħħi l-ostakli rigward l-aċċess għall-impjiegi 35 .
Fil-kuntest tal-pilastru Ewropew tad-drittijiet soċjali, il-Kummissjoni adottat inizjattiva għat-titjib tal-bilanċ bejn ix-xogħol u l-ħajja privata għall-ġenituri u l-persuni li jindukraw li wkoll jaħdmu, bl-immodernizzar tal-qafas legali Ewropew attwali dwar il-liv relatat mal-familja u arranġamenti flessibbli tax-xogħol, u bl-iżvilupp ta' qafas ta' politika komprensiv dwar titjib fid-disinn tal-liv relatat mal-familja u arranġamenti flessibbli tax-xogħol, b'titjib fil-kwalità, l-affordabbiltà u l-aċċessibbiltà ta' servizzi formali ta' kura u l-indirizzar ta' diżinċentivi għat-tieni sors tad-dħul. L-inizjattiva għandha l-għan li tindirizza r-rappreżentazzjoni insuffiċjenti tan-nisa fis-suq tax-xogħol bis-saħħa ta' qsim aħjar tar-responsabbiltajiet ta' kura bejn l-irġiel u n-nisa, biex b'hekk jitnaqqas ir-riskju li n-nisa jkunu inqas kapaċi jagħmlu progress fil-karrieri tagħhom u jiġu indirizzati l-istereotipi li jiskoraġġixxu lil min iħaddem mir-reklutaġġ u/jew il-promozzjoni tan-nisa. Dan huwa mistenni li jħalli impatt pożittiv fuq l-indirizzar tas-segregazzjoni vertikali skont is-sess fis-suq tax-xogħol billi jitnaqqsu l-inċentivi biex in-nisa jagħżlu għalihom innifishom setturi b'paga aktar baxxa jew livelli ta' impjieg li bħalissa jitqiesu li jipprovdulhom bilanċ aħjar bejn ix-xogħol u l-ħajja privata u li ta' spiss ikunu mħallsa inqas (bħat-tobba tal-familja, l-għalliema fl-iskejjel jew il-ħaddiema mal-awtoritajiet lokali).
B’mod partikolari, il-Kummissjoni se:
·tistinka lejn adozzjoni rapida tad-Direttiva dwar il-bilanċ bejn ix-xogħol u l-ħajja privata għall-ġenituri u għall-persuni li jindukraw 36 mill-koleġiżlaturi,
·tiżgura l-implimentazzjoni rapida tal-azzjonijiet mhux leġiżlattivi deskritti f'din il-Komunikazzjoni 37 .
Azzjoni 5: Għoti ta' valur ikbar lill-ħiliet, l-isforzi u r-responsabbiltajiet tan-nisa
Is-segregazzjoni professjonali u settorjali hija mifruxa u s-sitwazzjoni qed tinbidel bil-mod biss 38 . F'terminu ta' żmien qasir u medju, huma meħtieġa anki miżuri li jtejbu l-pagi fil-professjonijiet iddominati min-nisa , bħala rikonoxximent tal-ħiliet, l-isforzi u r-responsabbiltajiet li qed jiġu mmobilizzati fis-setturi ddominati min-nisa.
B’mod partikolari, il-Kummissjoni se:
·taħdem favur rikonoxximent aħjar tal-ħiliet fis-setturi kollha, inklużi s-setturi ddominati min-nisa, fil-qafas tal-Aġenda Ġdida tagħha għall-Ħiliet għall-Ewropa 39 . L-għodod 40 żviluppati fil-kuntest ta' din l-Aġenda (rigward il-kwalifiki, il-ħiliet, u l-validazzjoni tat-tagħlim informali) huma newtrali fir-rigward tal-ġeneru u se jgħinu biex jiġu sfruttati kemm jista' jkun dawn il-ħiliet u t-titjib fit-trasparenza tal-kwalifiki. Waqt l-implimentazzjoni tal-Aġenda Ġdida għall-Ħiliet għall-Ewropa, attenzjoni speċjali se tingħata lill-kwistjonijiet relatati mal-ġeneru. B'mod partikolari, se jiġu organizzati attivitajiet ta' tagħlim reċiproku ma' partijiet ikkonċernati ewlenin dwar kif ir-rikonoxximent u l-validazzjoni ta' ħiliet jistgħu jippromwovu l-ugwaljanza bejn is-sessi 41 .
·tkompli tqajjem il-kuxjenza dwar l-importanza ta' sistemi ta' klassifikazzjoni tal-impjiegi newtrali fir-rigward tal-ġeneru bil-għan li tiġi żgurata paga ugwali fil-prattika. Il-Kummissjoni se tippubblika u xxandar b'mod wiesa' Gwida aġġornata dwar sistemi ta' evalwazzjoni u ta' klassifikazzjoni tax-xogħol newtrali rigward il-ġeneru fl-2018 42 .
Azzjoni 6: Ġlieda kontra ċ-ċpar: il-kxif ta' inugwaljanzi u stereotipi
Il-Kummissjoni se tibqa' tiġbor u tipprovdi data rilevanti dwar id-differenza eżistenti bejn il-pagi tal-irġiel u n-nisa u l-konsegwenzi tagħha għall-qligħ u l-pensjonijiet.
L-indirizzar tad-differenza bejn il-pagi tal-irġiel u n-nisa jirrikjedi għarfien xieraq tal-problemi inerenti f'dan il-qasam u l-kobor tagħhom, sabiex wieħed ikun f'pożizzjoni jipproponi miżuri korrettivi adegwati. Għaldaqstant, il-Kummissjoni qed taħdem b'mod kontinwu biex tipprovdi data rilevanti dwar id-differenza persistenti bejn il-pagi tal-irġiel u n-nisa u l-konsegwenzi tagħha għall-individwi, l-ekonomiji u s-soċjetajiet 43 u biex xxerred studji rilevanti 44 .
B’mod partikolari, il-Kummissjoni se:
·tkompli tirrapporta b'mod regolari dwar l-evoluzzjoni tad-distakk li hemm bejn is-sessi rigward il-pagi, il-qligħ u l-pensjonijiet fl-Ewropa permezz ta':
-ir-Rapport annwali tagħha dwar l-ugwaljanza bejn in-nisa u l-irġiel ippubblikat fl-okkażjoni tal-Jum Internazzjonali tan-Nisa;
-data dwar id-differenza "aġġustata" bejn il-pagi tal-irġiel u n-nisa 45 żviluppata b'mod konġunt mill-Kummissjoni u l-Eurostat fl-2017 u l-2018, u data dwar id-differenza "mhux aġġustata" bejn il-pagi tal-irġiel u n-nisa żviluppata mill-Kummissjoni fit-Tabella ta' valutazzjoni tal-indikaturi soċjali 46 ;
-l-Ewrobarometru dwar id-differenza bejn il-pagi tal-irġiel u n-nisa u t-trasparenza rigward il-pagi se jiġi ppubblikat fil-ħarifa tal-2017;
-rapport dwar l-infurzar tal-pagi ugwali se jiġi ppublikat flimkien ma' dan il-Pjan ta' Azzjoni;
·tniedi ħidma għal valutazzjoni aħjar tal-ugwaljanza bejn is-sessi fl-ekonomija kollaborattiva billi data miġbura fl-Ewropa u fl-Istati Uniti 47 turi li aktar nisa huma deħlin fl-"ekonomija tal-pjattaforma". Jista' jkun li din ix-xejra tikkontribwixxi għat-tkabbir tad-differenza bejn il-pagi tal-irġiel u n-nisa. Unità speċifika fuq dan is-suġġett se tkun inkluża fl-Istħarriġ annwali tal-Eurostat dwar il-forza tax-xogħol;
·tinkludi perspettiva ddedikata għall-ġeneri mar-Rapport dwar l-Adegwatezza tal-Pensjonijiet tal-2018.
Azzjoni 7: twissijiet u informazzjoni dwar id-differenza bejn il-pagi tal-irġiel u n-nisa
Il-Kummissjoni se timpenja ruħha b'mod attiv f'attivitajiet ta' sensibilizzazzjoni dwar id-differenza bejn il-pagi tal-irġiel u n-nisa u se tipprovdi linji gwida dwar il-prinċipju ta' paga ugwali.
Id-differenza bejn il-pagi tal-irġiel u n-nisa se tonqos biss b'involviment qawwi tal-atturi kollha kkonċernati, jiġifieri l-ħaddiema, il-kumpaniji u l-awtoritajiet pubbliċi. L-informazzjoni hija kruċjali biex tqiegħed lill-vittmi ta' diskriminazzjoni fil-pożizzjoni li jasserixxu d-drittijiet tagħhom, tagħti l-possibbiltà lill-kumpaniji jaġġustaw il-prattiki u l-politiki tagħhom u tippermetti lill-awtoritajiet pubbliċi jieħdu l-miżuri ta' akkumpanjament meħtieġa u/jew jadottaw il-linji gwida tagħhom.
B’mod partikolari, il-Kummissjoni se:
·tiġbed l-attenzjoni għad-differenza bejn il-pagi tal-irġiel u n-nisa u l-kawżi sottostanti, b'mod partikolari bl-okkażjoni tal-Jum Ewropew għall-Paga Ugwali
·taġġorna u xxandar ta' kull sena materjal ta' komunikazzjoni u skedi informattivi speċifiċi għall-pajjiżi dwar id-differenza bejn il-pagi tal-irġiel u n-nisa
·tkompli tħabbar ir-riżultati tal-proġetti ffinanzjati fil-qafas tal-programm PROGRESS tal-UE, jiġifieri tmien proġetti transnazzjonali , immexxija mis-soċjetà ċivili u msieħba soċjali, bil-għan li wieħed jifhem u jindirizza d-differenza bejn il-pagi tal-irġiel u n-nisa b'enfasi fuq setturi speċifiċi. Il-proġetti jinkludu l-iżvilupp ta' kalkolatur li jippermetti lill-kumpaniji jifhmu u jindirizzaw aħjar id-differenza bejn il-pagi tagħhom tal-irġiel u n-nisa (ispirat mil-LOGIB)
·tippubblika u xxandar, fl-2018, gwida aġġornata dwar il-ġurisprudenza fuq il-prinċipju ta' paga ugwali abbażi tal-Anness 48 tar-rapport ta' implimentazzjoni dwar id-Direttiva 2006/54/KE 49 , li jipprovdi preżentazzjoni ġenerali tal-ġurisprudenza ta' importanza partikolari
·tħejji u xxandar b'mod wiesa', fl-2018, gwida aġġornata ta' prattiki tajba li se tirrifletti l-aħħar azzjonijiet meħuda mill-Istati Membri biex jiżguraw l-applikazzjoni tal-paga ugwali fil-prattika 50 .
Azzjoni 8: tisħiħ ta' sħubijiet għall-indirizzar TAD-differenza bejn il-pagi tal-irġiel u n-nisa
Il-Kummissjoni se tkompli tinvolvi ruħha ma' atturi ewlenin għall-iskambju ta' prattika tajba, tipprovdi finanzjament u tindirizza l-konsegwenzi tad-differenza bejn il-pagi tal-irġiel u n-nisa permezz tal-proċess tas-Semestru Ewropew.
Il-Kummissjoni tappoġġja lill-Istati Membri, lill-kumpaniji, lis-soċjetà ċivili u lill-imsieħba soċjali permezz ta' fondi u azzjonijiet għall-iskambju ta' prattika tajba. Eżempji reċenti jinkludu:
·il-laqgħa speċifika għall-Pjattaforma tal-Karti dwar id-Diversità tal-UE dwar l-integrazzjoni tal-perspettiva tal-ġeneri (Ġunju 2016);
·seminar tal-UE ma' msieħba multisettorjali u msieħba soċjali settorjali (Novembru 2016); u
·seminar ta' tagħlim reċiproku organizzat għad-diskussjoni dwar il-prattika t-tajba tal-Belġju fil-promozzjoni tal-klassifikazzjoni tax-xogħol newtrali rigward il-ġeneru (Ottubru 2016).
Il-Kummissjoni tappoġġja wkoll l-isforzi tal-Istati Membri għall-indirizzar tad-differenza bejn il-pagi tal-irġiel u n-nisa permezz tal-proċess tas-Semestru Ewropew, li fih timmonitorja s-sitwazzjoni ekonomika tal-Istati Membri u b'mod partikolari tappoġġja l-isforzi tagħhom fl-indirizzar tad-differenza bejn il-pagi tal-irġiel u n-nisa, eventwalment billi tirrakkomanda lill-Istat Membru li jkun jindirizza din il-kwistjoni speċifika jew xi wħud mill-kawżi ewlenin tagħha, bħan-nuqqas ta' investimenti fil-kura tat-tfal jew diżinċentivi fiskali li jżommu lura lit-tieni sors tad-dħul – primarjament nisa – mix-xogħol jew minn aktar xogħol.
Fl-2017, id-differenza bejn il-pagi tal-irġiel u n-nisa ġiet indirizzata fir-rapporti tal-pajjiż ta' disa' Stati Membri tal-UE 51 . F'Mejju 2017, il-Kummissjoni ħarġet rakkomandazzjonijiet speċifiċi għall-pajjiżi (CSRs) b'enfasi fuq l-investimenti fil-faċilitajiet għall-indukrar tat-tfal u diżinċentivi fiskali u fuq miżuri oħra għall-indirizzar tad-differenza bejn il-pagi tal-irġiel u n-nisa 52 .
B’mod partikolari, il-Kummissjoni se:
·torganizza seminars ta' tagħlim reċiproku għar-rappreżentanti tal-gvernijiet dwar id-distakk li hemm bejn is-sessi rigward il-pagi, il-qligħ u l-pensjonijiet kif ukoll il-kawżi ewlenin tiegħu. L-enfasi se tkun fuq għodod u strumenti legali konkreti u l-isfidi li tinvolvi l-implimentazzjoni tagħhom;
·tappoġġa t-tagħlim reċiproku u t-tisħiħ tal-kapaċitajiet fost l-imsieħba soċjali, il-kumpaniji u partijiet ikkonċernati oħrajn fl-indirizzar tad-differenza bejn il-pagi tal-irġiel u n-nisa;
·tipprovdi appoġġ finanzjarju lill-Istati Membri li għandhom ir-rieda li jnaqqsu d-differenza bejn il-pagi tal-irġiel u n-nisa, permezz ta' sejħiet għal offerti ristretti fil-qafas tal-Programm ta' Drittijiet, Ugwaljanza u Ċittadinanza (REC) 2014-2020; u
·tkompli tagħti s-segwitu għad-differenza bejn il-pagi tal-irġiel u n-nisa fil-kuntest tas-Semestru Ewropew u tinvolvi ruħha fi djalogu mal-Istati Membri rispettivi dwar miżuri meħtieġa għall-eliminazzjoni tagħha.
Il-Koalizzjoni għall-Ħiliet u l-Impjiegi Diġitali tiġbor flimkien Stati Membri, kumpaniji, imsieħba soċjali, organizzazzjonijiet mingħajr skop ta' qligħ u fornituri tal-edukazzjoni li jieħdu azzjoni għall-indirizzar tan-nuqqas ta' ħiliet diġitali fl-Ewropa .
Bejn l-2014 u l-2016, ġew allokati EUR 5 miljun għal 23 proġett fuq dan is-suġġett.
IL-KUMMISSJONI EWROPEA
Brussell, 20.11.2017
COM(2017) 678 final
ANNESS
għall-
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW
Pjan ta’ Azzjoni 2017-2019 tal-UE
L-indirizzar tad-differenza bejn il-pagi tal-irġiel u n-nisa
ANNESS
Pjan ta’ Azzjoni tal-UE 2017–2019
L-indirizzar tad-differenza bejn il-pagi tal-irġiel u n-nisa
LISTA TA’ AZZJONIJIET MAL-ISKEDA TAŻ-ŻMIEN U L-ATTURI INVOLUTI:
|
Azzjonijiet |
Għanijiet / Modalitajiet |
Skedar |
Atturi involuti: |
|
AZZJONI 1: TITJIB TAL-APPLIKAZZJONI TAL-PRINĊIPJU TA’ PAGA UGWALI |
|||
|
Valutazzjoni tal-possibbiltà ta’ emendi tad-Direttiva 2006/54/KE ta’ Tfassil mill-Ġdid tal-Ugwaljanza bejn is-Sessi |
Prova tal-ħtieġa li jitrawwem il-qafas legali eżistenti u jittejjeb l-infurzar tiegħu: • Tisħiħ tar-rwol ta’ infurzar tal-korpi tal-ugwaljanza • Titjib tas-sanzjonijiet u tal-kumpens lill-vittmi • Żgurar tal-ugwaljanza bejn is-sessi fi skemi ta’ pensjoni okkupazzjonali • Żgurar tat-trasparenza fil-pagi |
Ħarifa 2018 |
Il-Kummissjoni Ewropea |
|
2- L-adozzjoni ta’ rapport dwar miżuri nazzjonali adottati abbażi tal-Artikolu 157–4 TFUE, li jipprevedi vantaġġji speċifiċi sabiex jagħmluha aktar faċli għas-sess l-anqas rappreżentat biex ifittex attività professjonali jew biex jipprevjeni jew jikkumpensa għal żvantaġġi f’karrieri professjonali |
Obbligu skont l-Artikolu 31–2 tal-Att dwar it-Tfassil mill-Ġdid tal-Ugwaljanza bejn is-Sessi |
2019 |
Il-Kummissjoni Ewropea |
|
3- il-ħidma flimkien ma’ EQUINET, il-Kumitat Konsultattiv dwar l-opportunitajiet ugwali għan-nisa u l-irġiel u l-Grupp ta’ Livell Għoli dwar l-integrazzjoni tal-ugwaljanza bejn is-sessi |
sabiex jissaħħaħ l-infurzar tal-prinċipju ta’ paga ndaqs fl-Istati Membri. |
għadu għaddej |
Il-Kummissjoni Ewropea EQUINET L-awtoritajiet nazzjonali |
|
AZZJONI 2: IL-ĠLIEDA KONTRA S-SEGREGAZZJONI PROFESSJONALI U FIS-SETTURI |
|||
|
4- l-appoġġ ta’ proġetti transnazzjonali biex jiġu ttrattati l-istereotipi u s-segregazzjoni |
- Il-Programm għad-Drittijiet, l-Ugwaljanza u ċ-Ċittadinanza (“Programm DUC”) 2014–2020, - FSE - Erasmus + |
2014-2020 |
Il-Kummissjoni Ewropea L-Istati Membri |
|
5- l-organizzazzjoni ta’ konferenzi fuq il-bażi tar-riżultati ta’ proġetti li jiġġieldu l-istereotipi u s-segregazzjoni |
- konferenza ta’ rendikont - konferenza finali |
2018 2019 |
Il-Kummissjoni Ewropea L-awtoritajiet nazzjonali Partijiet interessati ewlenin |
|
6- biex tiġi ffaċilitata l-Pjattaforma tal-UE ta’ Karti dwar id-Diversità u tinbeda kondiviżjoni regolari tal-aqwa prattiki fost il-kumpaniji |
- it-twassil tal-eliminazzjoni ta’ segregazzjoni bejn is-sessi |
għadu għaddej |
Il-Kummissjoni Ewropea L-awtoritajiet nazzjonali Partijiet interessati ewlenin |
|
7- il-finanzjament ta’ proġetti fil-livell lokali li jistudjaw l-istereotipi immexxija minn komunitajiet edukattivi u ta’ taħriġ |
- Erasmus + |
għadu għaddej |
Il-Kummissjoni Ewropea L-awtoritajiet nazzjonali Partijiet interessati ewlenin |
|
8- li jiġu pprovduti għodda biex jippromwovu tibdil istituzzjonali li jista’ irawwem l-ugwaljanza fil-karrieri xjentifiċi u jenfasizza l-kisbiet tan-nisa fix-xjenza bi premju tal-UE għal nisa innovaturi |
- l-Ugwaljanza bejn is-Sessi fl-Akkademja u r-Riċerka |
għadu għaddej |
Il-Kummissjoni Ewropea EIGE (European Institute for Gender Equality) |
|
9- li titnieda Pjattaforma tal-UE għall-bidla sabiex jiżdiedu l-impjiegi tan-nisa u l-opportunitajiet indaqs fis-settur tat-trasport |
- li jiġu skambjati prattiki tajbin u jsiru viżibbli azzjonijiet konkreti favur l-impjieg tan-nisa fit-trasport - li jiġi ppubblikat studju dwar il-każ tan-negozju biex tiżdied ir-rata ta’ impjiegi fost in-nisa fit-trasport |
Diċembru 2017 2018 |
Il-Kummissjoni Ewropea L-awtoritajiet nazzjonali Partijiet interessati ewlenin |
|
10- li jiġi appoġġat it-tagħlim bejn il-pari bejn l-Istati Membri dwar il-karrieri tal-għalliema u l-mexxejja tal-iskejjel; li jiġi appoġġat il-ġbir tad-dejta dwar il-pagi tal-għalliema u l-inkoraġġiment tal-Istati Membri biex jieħdu azzjoni biex jeliminaw remunerazzjoni baxxa f’dan is-settur |
- Edukazzjoni u Taħriġ 2020 - Djalogu soċjali settorjali Ewropew fl-edukazzjoni - Eurydice, f’kooperazzjoni mal-OECD |
għadu għaddej għadu għaddej |
Il-Kummissjoni Ewropea L-awtoritajiet nazzjonali Partijiet interessati ewlenin |
|
AZZJONI 3: INKISSRU S-SAQAF TAL-ĦĠIEĠ: IL-ĠLIEDA KONTRA S-SEGREGAZZJONI VERTIKALI |
|||
|
11- biex inkomplu naħdmu favur l-adozzjoni tal-proposta tal-Kummissjoni għal Direttiva dwar it-titjib tal-bilanċ bejn is-sessi fost diretturi ta’ kumpaniji elenkati f’borża u nissorveljaw l-implimentazzjoni ta’ politiki dwar id-diversità tas-sessi tal-bordijiet ta’ tmexxija tal-ikbar kumpaniji elenkati tal-UE |
- Li naħdmu għall-adozzjoni tal-proposta tal-Kummissjoni |
għadu għaddej |
Il-Kummissjoni Ewropea Il-Kunsill Il-Parlament Ewropew L-awtoritajiet nazzjonali |
|
12- biex niffinanzjaw proġetti li għandhom l-għan li jtejbu l-bilanċ bejn is-sessi f’pożizzjonijiet ekonomiċi fil-livelli kollha tal-maniġment |
- il-programm REC |
għadu għaddej |
Il-Kummissjoni Ewropea L-awtoritajiet nazzjonali Partijiet interessati ewlenin |
|
13- biex ninkoraġġixxu lill-gvernijiet biex jadottaw strateġiji b’miżuri konkreti biex jiżguraw bilanċ aħjar bejn is-sessi fit-teħid tad-deċiżjonijiet, biex jidħlu fi djalogu mal-imsieħba soċjali u korpi regolatorji settorjali biex jippromwovu / jadottaw miżuri rilevanti |
- biex inkomplu nimpenjaw ruħna fi djalogu mal-imsieħba soċjali -Sabiex jiġu implimentati proġetti bl-għan li jitjieb il-bilanċ bejn is-sessi f’pożizzjonijiet ta’ teħid ta’ deċiżjonijiet. -li nappoġġaw miżuri nazzjonali konkreti li jwasslu għal rappreżentanza aħjar mis-sess l-inqas rappreżentat fit-teħid tad-deċiżjonijiet -li ninvolvu ruħna u nagħtu l-appoġġ tagħna fid-djalogu ma’ korpi regolatorji settorjali |
għadu għaddej |
Il-Kummissjoni Ewropea Sħab soċjali L-awtoritajiet nazzjonali Korpi regolatorji |
|
AZZJONI 4: LI TIĠI INDIRIZZATA L-PENALI TAL-KURA |
|||
|
14- biex tiġi implimentata l-inizjattiva tal-bilanċ bejn ix-xogħol u l-ħajja privata |
- Li jkun hemm ħidma għall-adozzjoni rapida tad-Direttiva dwar il-bilanċ bejn ix-xogħol u l-ħajja privata għall-ġenituri u persuni li jindukraw mill-koleġiżlaturi kif ukoll l-implimentazzjoni ta’ azzjonijiet mhux leġiżlattivi previsti fil-Komunikazzjoni |
għadu għaddej |
Il-Kummissjoni Ewropea Il-Kunsill Il-Parlament Ewropew |
|
AZZJONI 5: BIEX JIĠU VVALORIZZATI AĦJAR IL-ĦILIET, L-ISFORZI U R-RESPONSABBILITAJIET TAN-NISA |
|||
|
15- biex ikun hemm ħidma favur ir-rikonoxximent aħjar tal-ħiliet fis-setturi kollha |
- Aġenda għall-Ħiliet Ġodda |
għadu għaddej |
Il-Kummissjoni Ewropea L-awtoritajiet nazzjonali Partijiet interessati ewlenin |
|
16- biex titqajjem kuxjenza dwar sistemi ta’ klassifikazzjoni newtrali fir-rigward tas-sessi |
- Li titkompla titqajjem kuxjenza dwar l-importanza ta’ sistemi ta’ klassifikazzjoni newtrali ta’ xogħol fir-rigward tas-sessi biex tiġi żgurata paga ugwali - li tiġi ppubblikata u mxerrda b’mod wiesa’ Gwida aġġornata dwar sistema ta’ evalwazzjoni u klassifikazzjoni ta’ xogħol newtrali fir-rigward tas-sessi |
għadu għaddej 2018 |
Il-Kummissjoni Ewropea L-awtoritajiet nazzjonali Partijiet interessati ewlenin |
|
AZZJONI 6: ĠLIEDA KONTRA Ċ-ĊPAR: TIKXIF TA’ INUGWALJANZI U STEREOTIPI |
|||
|
17- biex jiġi rrapportat regolarment dwar l-evoluzzjoni tad-differenza fil-pagi bejn is-sessi, il-qligħ u d-differenza tal-pensjonijiet bejn l-irġiel u n-nisa fl-Ewropa; li tiġi nkluża l-perspettiva ta’ bejn is-sessi fir-Rapport tal-2018 dwar l-Adegwatezza tal-Pensjonijiet |
- Rapport annwali dwar l-ugwaljanza bejn in-nisa u l-irġiel - dejta dwar id-diskrepanza “aġġustata” fil-pagi bejn is-sessi - Eurobarometer dwar id-differenza fil-pagi bejn is-sessi u trasparenza fil-pagi |
Il-Jum Internazzjonali tal-Mara 2017/2018 Il-Jum Ewropew għall-Paga Ugwali 2017 |
Il-Kummissjoni Ewropea |
|
- Pubblikazzjoni ta’ rapport dwar l-infurzar ta’ paga ugwali - Pubblikazzjoni tar-Rapport tal-Adegwatezza tal-Pensjonijiet 2018 |
Il-Jum Ewropew għall-Paga Ugwali 2017 2018 |
||
|
18- li tiġi varata l-ħidma biex tiġi vvalutata aħjar l-ugwaljanza bejn is-sessi fl-ekonomija kollaborattiva |
- Li tiġi vvalutata l-ugwaljanza bejn is-sessi fl-ekonomija kollaborattiva |
2018 |
Il-Kummissjoni Ewropea |
|
AZZJONI 7: TWISSIJA U INFORMAZZJONI DWAR ID-DIFFERENZA BEJN IL-PAGI TAL-IRĠIEL U N-NISA |
|||
|
19- li jkun hemm sensibilizzazzjoni dwar id-differenza bejn il-pagi tal-irġiel u n-nisa |
- Il-Jum Ewropew għall-Paga Ugwali |
Kull sena |
Il-Kummissjoni Ewropea |
|
20- li jiġu ppubblikati u mxerrda fl-2018 Linji Gwida aġġornati fuq il-ġurisprudenza dwar il-prinċipju ta’ paga ugwali |
- li jiġu aġġornati u ppubblikati linji gwida fuq il-ġurisprudenza tal-QtĠ-UE dwar il-prinċipju ta’ paga ugwali |
2018 |
Il-Kummissjoni Ewropea |
|
21- li jiġu mħejjija u mxerrda Linji Gwida dwar l-aħjar prattiki |
- It-tħejjija u t-tixrid b’mod wiesa’ ta’ Linji Gwida aġġornati dwar l-aħjar prattiki li jirriflettu l-aħħar azzjonijiet meħuda mill-Istati Membri biex jiżguraw l-applikazzjoni ta’ paga ugwali |
2018 |
Il-Kummissjoni Ewropea |
|
AZZJONI 8: SELF TAL-IDEJN: TITJIB TA’ SĦUBIJI BIEX TIĠI INDIRIZZATA D-DIFFERENZA BEJN IL-PAGI TAL-IRĠIEL U N-NISA |
|||
|
22- li jsiru seminars ta’ tagħlim reċiproku dwar il-kwistjoni tad-differenza fil-pagi bejn is-sessi inkluż appoġġ immirat għall-imsieħba soċjali |
- ikomplu jsiru seminars ta’ tagħlim reċiproku għal rappreżentant governattiv dwar id-differenza abbażi tas-sess bejn il-pagi, il-qligħ, u l-pensjonijiet, u l-kawżi ewlenin tagħha - li jiġi appoġġjat it-tagħlim reċiproku u l-bini tal-kapaċità tal-imsieħba soċjali, kumpaniji u partijiet interessati oħra, sabiex tiġi indirizzata d-differenza bejn il-pagi tal-irġiel u n-nisa |
għadu għaddej |
Il-Kummissjoni Ewropea L-awtoritajiet nazzjonali Sħab soċjali Partijiet interessati ewlenin |
|
23- li jingħata appoġġ finanzjarju lill-Istati Membri lesti li jnaqqsu d-differenza bejn il-pagi tal-irġiel u n-nisa |
- il-Programm REC 2014-2020 |
għadu għaddej |
Il-Kummissjoni Ewropea L-awtoritajiet nazzjonali Partijiet interessati ewlenin |
|
24- biex ikun hemm segwitu fuq id-differenza bejn il-pagi tal-irġiel u n-nisa fil-kuntest tas-Semestru Ewropew |
- Is-Semestru Ewropew |
għadu għaddej |
Il-Kummissjoni Ewropea L-awtoritajiet nazzjonali |