Is-sistema tal-VAT tal-UE hija kwalità favorevoli tas-Suq Uniku; billi neħħiet l-ostakli li fixklu l-kompetizzjoni u xekklu l-moviment liberu tal-oġġetti, iffaċilitat il-kummerċ fl-UE. It-Taxxa fuq il-Valur Miżjud (VAT), li hija taxxa tal-konsum b’bażi mifruxa, hija kkunsidrata bħala waħda mill-iktar forom ta’ tassazzjoni favur it-tkabbir. Il-VAT hija wkoll sors kbir u li qed ikompli jikber ta’ dħul tat-taxxa fl-Unjoni Ewropea 1 . Fis-snin riċenti, madankollu, is-sistema tal-VAT ma baqgħetx aġġornata mal-globalizzazzjoni u d-diġitalizzazzjoni tal-ekonomija. B’mod partikolari, is-sistema preżenti għat-tassazzjoni tal-kummerċ bejn l-Istati Membri għadha bbażata fuq “arranġamenti tranżitorji” ta’ 25 sena ilu 2 . Skont dawn l-arranġamenti, it-tranżazzjonijiet domestiċi u t-tranżazzjonijiet transfruntiera huma soġġetti għal żewġ reġimi tal-VAT kompletament differenti. B’riżultat ta’ dan in-negozji li jagħmlu l-kummerċ transfruntier qed iġarrbu spiża ta’ konformità żejda ta’ 11% meta mqabbla man-negozji li jagħmlu l-kummerċ domestiku biss. Barra minn hekk, minħabba l-fatt li l-oġġetti jistgħu jinxtraw b’mod transfruntier mingħajr VAT, dawn l-arranġamenti huma partikolarment suxxettibbli għall-frodi. Fl-2015, intilfu EUR 151 biljun, li jirrappreżentaw 12.8% tal-obbligazzjoni tal-VAT minħabba frodi u nuqqasijiet oħrajn 3 . F’dan ir-rigward, ġie stmat li EUR 50 biljun huma dovuti għall-frodi transfruntiera tal-VAT, frodi li fil-parti l-kbira tagħha titwettaq minn organizzazzjonijiet kriminali u li, skont l-istqarrijiet għall-istampa riċenti, intużat ukoll biex tiffinanzja t-terroriżmu.

Illum, is-sistema tal-VAT tal-UE hija wisq frammentata u wisq suxxettibbli għall-frodi. Bħala parti mill-aġenda tagħha għal sistema tat-taxxa ġusta u effiċjenti fl-UE, il-Kummissjoni qed timmira li ttejjeb is-sistema tal-VAT sabiex tiżgura li tibqa’ kwalità favorevoli fil-futur. Ġie stmat li l-eventwalità li jiddaħħal fis-seħħ reġim tal-VAT unifikat fis-suq uniku jkun qed inaqqas il-frodi transfruntiera tal-VAT b’EUR 41 biljun 4 u l-ispejjeż ta’ konformità għan-negozji b’EUR 1 biljun 5 .

Il-Kummissjoni, fil-Pjan ta’ Azzjoni tagħha dwar il-VAT (il-“Pjan ta’ Azzjoni tal-VAT”) tas-7 ta’ April 2016 6 , spjegat il-ħtieġa li ddaħħal fis-seħħ żona unika Ewropea tal-VAT li tkun tista’ tindirizza l-isfidi tas-seklu 21. Tħabbar sett ta’ miżuri li għandhom jiġu adottati fuq perjodu ta’ żmien qasir u medju sabiex tiġi mmodernizzata s-sistema tal-VAT tal-UE u ssir iktar faċli, iktar sikura kontra l-frodi u iktar faċli għan-negozji. Dawn il-miżuri jwieġbu għal diversi għanijiet: jadattaw is-sistema tal-VAT għall-ekonomija globali, diġitali u mobbli, jappoġġaw il-ħtiġijiet tal-SMEs, jipprevedu politika tar-rati adegwata, itemmu l-frodi transfruntiera u jgħinu lill-Istati Membri biex jagħlqu l-lakuna tal-VAT.

Il-modernizzazzjoni tas-sistema tal-VAT eżistenti se tinkiseb f’serje ta’ passi gradwali. Din il-Komunikazzjoni tirrapporta dwar l-azzjonijiet li diġà ttieħdu (it-Taqsima 2) u tipprovdi aktar dettalji dwar il-passi ’l quddiem (it-Taqsima 3), inkluż l-inizjattivi li se jiġu adottati din is-sena:

·Pakkett leġiżlattiv dwar is-sistema definittiva tal-VAT għall-kummerċ intra-Unjoni minn negozju għal negozju (B2B) (minn hawn ’il quddiem is-“sistema definittiva tal-VAT”);

·Proposta dwar ir-riforma tar-rati tal-VAT;

·Proposta għar-rinforz tal-istrumenti eżistenti għall-Kooperazzjoni Amministrattiva tal-VAT; u

·Proposta biex jiġu ssimplifikati r-regoli tal-VAT għall-SMEs.

2.KISBIET MILL-ADOZZJONI TAL-PJAN TA’ AZZJONI TAL-VAT

2.1 L-adattament tas-sistema tal-VAT għall-ekonomija diġitali u t-tħejjija għal politika tar-rati modernizzata

Fl-1 ta’ Diċembru 2016, il-Kummissjoni adottat diversi proposti 7 biex timmodernizza l-VAT għall-kummerċ elettroniku transfruntier u proposta dwar ir-rata tal-VAT għall-pubblikazzjonijiet elettroniċi. Dawn il-proposti, li huma parti importanti tal-istrateġija tas-Suq Uniku Diġitali 8 , jimmiraw lejn l-adattament tas-sistema tal-VAT għall-ekonomija diġitali.

2.1.1. Proposti għall-kummerċ elettroniku tal-VAT

Id-diġitalizzazzjoni tal-ekonomija ħolqot sfidi dejjem iktar pressanti għall-politika tat-tassazzjoni. Xi soluzzjonijiet innovattivi u li jħarsu ’l quddiem huma neċessarji biex jinżamm kont ta’ dawn ix-xejriet ġodda tan-negozju. Ir-regoli tat-taxxa jeħtieġ li jevolvu biex jadattaw għall-bidla mgħaġġla fil-mudelli tan-negozju u fix-xejriet tal-konsumaturi. B’mod parallel, it-tassazzjoni jenħtieġ li tkun ġusta u effettiva għan-negozji emerġenti u jenħtieġ li tikkontribwixxi b’mod pożittiv għall-iżvilupp tas-suq uniku diġitali.

Bħala taxxa tal-konsum, il-VAT għandha rwol importanti fl-istrateġija biex jintlaħqu dawn l-għanijiet. Il-proposti dwar il-kummerċ elettroniku huma maħsuba biex jibbenefikaw lin-negozji, liċ-ċittadini u lill-Istati Membri u ppermettew li l-UE tidher bħala attur ewlieni fuq livell globali.

Ir-regoli l-ġodda jippermettu lill-kumpaniji li jbigħu l-oġġetti online biex iwettqu faċilment l-obbligi tal-VAT tal-UE tagħhom f’post wieħed u jissimplifikaw it-trattament tal-VAT għan-negozji l-ġodda u n-negozji mikro li jbigħu bejgħ transfruntier online ta’ inqas minn EUR 10 000. L-SMEs jibbenefikaw ukoll minn proċeduri iktar sempliċi għal bejgħ transfruntier sa EUR 100 000. Ir-regoli l-ġodda jneħħu wkoll l-eżenzjoni attwali mill-VAT għall-konsenji ż-żgħar importati fl-UE li jiswew inqas minn EUR 22 u jiżguraw li n-negozji tal-UE jistgħu jibbenefikaw minn kundizzjonijiet ekwi ta’ kompetizzjoni.

Dawn il-proposti bħalissa qed jiġu diskussi fil-Kunsill.

Barra minn hekk, fil-qafas tal-Forum tal-VAT tal-UE 9 , il-Kummissjoni qed tesplora kif tistabbilixxi kooperazzjoni pubblika-privata strutturata mal-amministrazzjonijiet tat-taxxa, mal-kumpaniji tal-loġistika, mal-pjattaformi tal-internet, mal-fornituri tas-servizz ta’ ħlas u mal-assoċjazzjonijiet tan-negozji bil-ħsieb li ttejjeb il-ġbir tal-VAT, tnaqqas il-frodi fil-qasam tal-kummerċ elettroniku u tippreżenta kundizzjonijiet ekwi ta’ kompetizzjoni għan-negozji konformi. Ir-riżultat ta’ din il-konsultazzjoni se jipprovdi l-evidenza għal inizjattiva tal-Kummissjoni fl-2018.

2.1.2. Proposta għall-pubblikazzjonijiet elettroniċi tal-VAT

Il-Kummissjoni aġixxiet ukoll fuq il-wegħda tagħha li tippermetti lill-Istati Membri japplikaw l-istess rata ta’ VAT għall-pubblikazzjonijiet elettroniċi bħall-kotba elettroniċi u l-ġurnali online, bħall-ekwivalenti tagħhom stampati, billi neħħiet id-dispożizzjonijiet li kienu jeskludu l-pubblikazzjonijiet elettroniċi mit-trattament favorevoli tat-taxxa li huwa permess għall-pubblikazzjonijiet stampati tradizzjonali. Din il-proposta hija pass ’il quddiem biex tkun żgurata n-newtralità teknoloġika u t-tneħħija tal-ostakli tat-taxxa għall-iżvilupp tas-suq tal-pubblikazzjonijiet elettroniċi. Din il-proposta bħalissa qed tiġi diskussa fil-Kunsill.

2.2 Miżuri fil-mira li jindirizzaw il-frodi

2.2.1 Titjib fil-ġbir tat-taxxa u tal-kooperazzjoni amministrattiva

Il-Kummissjoni varat l-iżvilupp tal-Analiżi tan-Networks tat-Tranżazzjonijiet għall-iskambju u l-ipproċessar konġunt ta’ dejta tal-VAT immirata mill-uffiċjali tal-analiżi tar-riskju tan-network Eurofisc 10 . Dan l-istrument il-ġdid se jippermetti lill-amministrazzjonijiet tat-taxxa jwaqqfu n-networks frodulenti b’mod iktar faċli, malajr u iktar sikur.

Barra minn hekk, fil-qasam tal-liġi kriminali, id-Direttiva kontra l-frodi għall-interessi finanzjarji tal-UE permezz tal-liġi kriminali 11 ġiet adottata f’Lulju li għadda u tipprevedi regoli minimi dwar id-definizzjoni tal-offiżi kriminali kontra l-interessi finanzjarji, is-sanzjonijiet u l-perjodi ta’ limitazzjoni tal-Unjoni. Id-Direttiva tiddefinixxi l-kompetenza materjali tal-Uffiċċju tal-Prosekutur Pubbliku Ewropew (UPPE) 12 . B’mod partikolari, l-UPPE se jkun kompetenti għall-investigazzjoni u l-prosekuzzjoni kriminali tal-frodi tal-VAT konnessa mat-territorju ta’ żewġ Stati Membri jew iktar li tinvolvi ħsara totali ta’ mill-inqas EUR 10 000 000.

Fir-rigward tar-relazzjonijiet internazzjonali, il-Kummissjoni qed tinnegozja Ftehim bejn l-UE u n-Norveġja għall-kooperazzjoni amministrattiva, il-ġlieda kontra l-frodi u l-irkupru tat-talbiet fil-qasam tal-VAT. Il-Ftehim se jidħol fis-seħħ wara l-adozzjoni mill-Kunsill tad-Deċiżjonijiet għall-iffirmar u l-konklużjoni tiegħu. Barra minn hekk, ġie ffirmat ftehim amministrattiv għall-kooperazzjoni bejn is-servizzi tal-Kummissjoni u l-Organizzazzjoni Intra-Ewropea tal-Amministrazzjonijiet tat-Taxxa (IOTA) sabiex isir skambju tal-aħjar prassi bejn l-Istati Membri u l-membri tal-IOTA.

Finalment, diversi Stati Membri talbu appoġġ biex itejbu l-kapaċità tal-amministrazzjoni tat-taxxa. L-azzjonijiet ta’ appoġġ taħt il-Programm ta’ Appoġġ għal Riformi Strutturali huma koordinati mill-qrib taħt il-programm FISCALIS 13 .

2.2.2 Deroga temporanja

Fil-21 ta’ Diċembru 2016, il-Kummissjoni ssodisfat l-impenn tagħha li tippreżenta proposta għal Direttiva tal-Kunsill 14 fir-rigward tal-applikazzjoni temporanja ta’ mekkaniżmu tar-reverse charge ġeneralizzat f’rabta mal-provvisti tal-oġġetti u tas-servizzi li huma iktar mil-livell limitu ta’ EUR 10 000 għal kull riċevuta. Taħt tali sistema, il-VAT hija “sospiża” matul il-katina ekonomika kollha (bejn in-negozji) u tiġi ċċarġjata biss lill-konsumaturi aħħarin. Din il-miżura hija maħsuba biex tgħin lil Stati Membri li huma partikolarment affettwati minn frodi għall-ġlieda kontra l-frodi karusell 15 filwaqt li tidħol fis-seħħ soluzzjoni komprensiva u li tapplika għall-UE kollha. Fil-Kunsill għaddejjin in-negozjati.

3.IMPLIMENTAZZJONI TAL-PROPOSTI FUTURI

3.1 Lejn żona unika tal-VAT Ewropea robusta

3.1.1 Implimentazzjoni tal-ewwel pass tas-sistema definittiva tal-VAT

Kif tħabbar fil-Pjan ta’ Azzjoni tal-VAT tagħha, il-Kummissjoni qed tipproponi li tibdel l-arranġamenti tranżitorji attwali għat-tassazzjoni tal-kummerċ bejn l-Istati Membri b’arranġamenti definittivi. F’konformità mar-rekwiżiti tal-Parlament Ewropew 16 u tal-Kunsill 17 , din is-sistema definittiva tal-VAT se tkun ibbażata fuq il-prinċipju tat-tassazzjoni fl-Istat Membru destinatarju 18 .

Sabiex tkun permessa tranżizzjoni ratba għall-amministrazzjonijiet tat-taxxa u għan-negozji, din il-bidla se ssir abbażi ta’ approċċ gradwali f’żewġ passi 19 .

Bħala l-ewwel pass leġiżlattiv, se jiġi konkluż it-trattament tal-VAT tal-provvisti tal-oġġetti B2B intra-Unjoni. L-implimentazzjoni ta’ dan l-ewwel pass leġiżlattiv se tiġi diviża f’żewġ subpassi oħra (ara t-Taqsimiet 3.1.1.1 u 3.1.1.2 ta’ hawn taħt), magħmula minn sett ta’ proposti li għandhom jiġu adottati mill-Kummissjoni din is-sena (subpass 1) u ieħor li għandu jiġi adottat is-sena d-dieħla (subpass 2).

Bħala tieni pass leġiżlattiv, it-trattament tal-VAT il-ġdid se jiġi estiż għall-provvisti transfruntiera kollha, u għalhekk ikopri wkoll il-provvisti tas-servizzi. L-implimentazzjoni ta’ dan it-tieni pass leġiżlattiv se tiġi proposta mill-Kummissjoni wara l-monitoraġġ dovut tal-implimentazzjoni tal-ewwel pass, li l-funzjonament tiegħu se jiġi evalwat mill-Kummissjoni ħames snin wara d-dħul fis-seħħ tiegħu. Is-sistema definittiva wara tiġi implimentata kompletament.

Wara l-konsultazzjoni dovuta mal-partijiet ikkonċernati kollha u analiżi dettaljata tal-għażliet differenti għall-implimentazzjoni tal-prinċipju tad-destinazzjoni, il-Kummissjoni għażlet regoli tat-tassazzjoni skont liema, għall-provvisti transfruntiera ta’ oġġetti intra-Unjoni, il-fornitur jiċċarġja l-VAT lill-akkwirent tiegħu skont ir-rata tal-Istat Membru li fih jaslu l-oġġetti. Il-VAT tiġi ddikjarata u mħallsa fl-Istat Membru fejn il-fornitur ikun stabbilit permezz ta’ mekkaniżmu ta’ one-stop shop. Madankollu, matul l-ewwel pass tas-sistema definittiva tal-VAT u bħala eċċezzjoni għal dan il-prinċipju ġenerali 20 , jekk l-akkwirent huwa ċertifikat bħala negozju konformi mill-amministrazzjoni tat-taxxa tiegħu (possibbiltà li hija miftuħa wkoll għall-SMEs), dan l-akkwirent ikompli jkun responsabbli għall-VAT fuq oġġetti mixtrija minn Stati Membri oħrajn bħal ma huwa l-każ bħalissa 21 .

Barra minn hekk, il-konklużjonijiet tal-Kunsill 22 u d-diskussjonijiet mal-Istati Membri u mal-partijiet ikkonċernati l-oħra dwar il-Pjan ta’ Azzjoni tal-VAT urew il-ħtieġa li jiġi introdott ċertu titjib fuq terminu qasir għas-sistema tal-VAT attwali (“soluzzjonijiet ta’ malajr”). Dawn l-erba’ soluzzjonijiet ta’ malajr huma proposti din is-sena flimkien mal-pedamenti legali għal sistema definittiva tal-VAT (subpass 1 hawn taħt). Proposta li se jkun hemm fl-2018 (subpass 2 hawn taħt) se tipprovdi iktar dispożizzjonijiet tekniċi dettaljati għall-implimentazzjoni proprja tal-ewwel pass tas-sistema definittiva tal-VAT.

3.1.1.1.L-ewwel subpass: il-pakkett tas-sistema definittiva tal-VAT ta’ Ottubru 2017

Il-pakkett tas-sistema definittiva tal-VAT ta’ Ottubru 2017 jikkonsisti fit-tliet biċċiet ta’ leġiżlazzjoni li ġejjin:

A] Proposta għal Direttiva li temenda d-Direttiva tal-VAT

Il-proposta tintroduċi li ġej:

a) L-idea ta’ persuna taxxabbli ċertifikata, immudellata fuq il-kunċett eżistenti ta’ operatur ekonomiku awtorizzat fil-qasam tad-dwana. Il-kunċett ta’ persuna taxxabbli ċertifikata jippermetti l-attestazzjoni li negozju partikolari jista’ jiġi kkunsidrat globalment bħala kontribwent affidabbli. Il-persuni taxxabbli ċertifikati jkunu qed jibbenefikaw minn ċerti simplifikazzjonijiet 23 . Il-proposta tistabbilixxi l-kriterji li għandhom jiġu ssodisfati sabiex jingħata l-istatus ta’ persuna taxxabbli ċertifikata, il-każijiet ta’ esklużjoni, l-Istat Membru kompetenti biex jagħti jew jirtira l-istatus ta’ persuna taxxabbli ċertifikata, id-dritt tal-persuni taxxabbli li jappellaw kontra deċiżjonijiet amministrattivi dwar din il-kwistjoni u l-obbligu tar-rikonoxximent reċiproku mill-Istati Membri.

b) Tliet “soluzzjonijiet ta’ malajr” mitluba mill-Kunsill, jiġifieri:

- is-simplifikazzjoni u l-armonizzazzjoni tar-regoli fir-rigward tal-arranġamenti ta’ stokk f’kunsinna kuntrattat 24 ;

- rikonoxximent tan-numru ta’ identifikazzjoni tal-VAT tal-akkwirent bħala kundizzjoni sostantiva sabiex provvista tal-oġġetti intra-Komunitarja tkun eżentata mill-VAT 25 ;

- simplifikazzjoni tar-regoli sabiex tkun żgurata ċ-ċertezza legali fir-rigward tat-tranżazzjonijiet katina 26 .

Dawk is-“soluzzjonijiet ta’ malajr” ikunu disponibbli biss għall-persuni taxxabbli ċertifikati (għajr is-“soluzzjoni ta’ malajr tan-numru tal-VAT” li, fin-natura tagħha, ma tistax tkun ristretta b’dan il-mod).

c) Il-pedamenti legali tas-sistema definittiva tal-VAT. Dawn jinkludu, b’mod partikolari, l-introduzzjoni tal-prinċipju ta’ tassazzjoni fl-Istat Membru destinatarju u tal-obbligazzjoni tal-fornitur bħala regola (għajr meta l-akkwirent huwa persuna taxxabbli ċertifikata) 27 . Jintroduċu wkoll One Stop Shop (OSS) li jkun jippermetti lill-fornituri jieħdu kont tal-VAT dovuta fuq il-provvisti tagħhom tal-oġġetti lill-Stati Membri oħrajn fl-Istat Membru ta’ stabbiliment tagħhom. Dan l-OSS ikun jippermetti t-tpaċija tal-VAT tal-output dovuta fuq provvisti magħmula ma’ VAT tal-input imġarrba fuq xiri magħmul fl-UE.

B] Proposta li temenda r-Regolament ta’ Implimentazzjoni (UE) Nru 282/2011 biex tiġi introdotta r-raba’ “soluzzjoni ta’ malajr”

Din il-proposta tintroduċi r-raba’ “soluzzjoni ta’ malajr” meħtieġa mill-Kunsill, jiġifieri, l-armonizzazzjoni u s-simplifikazzjoni tar-regoli dwar il-prova tat-trasport intra-Komunitarju tal-oġġetti sabiex il-provvista intra-Komunitarja tal-oġġetti tiġi eżentata mill-VAT. Din is-simplifikazzjoni tkun disponibbli biss fejn tkun involuta persuna taxxabbli ċertifikata.

C] Proposta li temenda r-Regolament tal-VAT dwar il-Kooperazzjoni Amministrattiva

Din il-proposta hija meħtieġa biex tiżgura l-inklużjoni tal-istatus ta’ persuna taxxabbli ċertifikata fis-sistema VIES 28 . Se tipprovdi l-bażi legali għal għodda teknika tal-IT effiċjenti li tippermetti lill-Istati Membri u lill-operaturi biex minnufih jiċċekkjaw elettronikament jekk operatur ingħatax dak l-istatus.

3.1.1.2. It-tieni subpass: id-dispożizzjonijiet tekniċi dettaljati tal-2018 għal sistema definittiva tal-VAT

Il-pedamenti legali msemmija hawn fuq tas-sistema definittiva tal-VAT jikkostitwixxu l-qbil tal-prinċipju tal-Istati Membri biex jimxu mill-arranġamenti tranżitorji tal-VAT preżenti għal sistema definittiva tal-VAT ibbażata fuq il-prinċipju ta’ tassazzjoni fid-destinazzjoni. Fl-2018, il-Kummissjoni se tadotta proposta għal Direttiva, akkumpanjata mill-miżuri ta’ implimentazzjoni rilevanti, li tistabbilixxi dispożizzjonijiet tekniċi dettaljati meħtieġa għall-operat tas-sistema definittiva tal-VAT.

Il-proposta tal-2018 se tintroduċi dispożizzjonijiet speċifiċi għall-implimentazzjoni tal-pedamenti legali. Se jiġu proposti wkoll miżuri ta’ implimentazzjoni biex jiffurmaw il-bażi għall-iżviluppi tal-IT meħtieġa għall-funzjonament tas-sistema l-ġdida sal-2022.

3.1.2. Il-ġlieda kontra l-frodi tal-VAT illum: kooperazzjoni amministrattiva aħjar għal riżultati iktar bikrija

Diversi rapporti ġurnalistiċi riċenti madwar l-Ewropa kif ukoll investigazzjonijiet minn awtoritajiet nazzjonali aċċennaw ir-rabta deċisiva bejn il-każijiet ta’ frodi tal-VAT fuq skala kbira u l-kriminalità organizzata. Dawn urew li l-gwadann mill-frodi qed jikkontribwixxi għal skemi ta’ ħasil tal-flus qabel ma jiġi investit f’attivitajiet kriminali oħrajn, u possibilment għall-finanzjament tat-terroriżmu. F’dan il-kuntest, u kif rikonoxxut mill-Parlament Ewropew 29 , l-Istati Membri 30 u l-Qorti Ewropea tal-Awdituri 31 , l-istrumenti għall-kooperazzjoni amministrattiva fil-qasam tal-VAT iridu jiġu rinforzati.

Sa Novembru 2017 il-Kummissjoni se tressaq proposta leġiżlattiva biex tirrinforza l-istrumenti eżistenti għall-kooperazzjoni amministrattiva. Wieħed mill-għanijiet se jkun it-tisħiħ tal-kapaċità tal-Istati Membri biex iwettqu analiżi tar-riskju konġunta iktar malajr tal-informazzjoni disponibbli fi ħdan Eurofisc, il-varar ta’ azzjonijiet ta’ segwitu u l-kondiviżjoni tal-intelligence dwar il-VAT mal-korpi tal-infurzar tal-liġi fil-livell tal-UE, bħal Europol, OLAF u UPPE. Il-proposta jenħtieġ li jkun fiha wkoll miżuri biex tindirizza l-lakuni fis-sistema tal-importazzjoni skont l-hekk imsejħa proċedura 42 32 , billi tiffaċilita l-aċċess sistematiku għall-informazzjoni rilevanti mill-awtoritajiet tat-taxxa u tad-dwana.

Dawn il-miżuri kollha jgħinu sabiex tissawwar fiduċja reċiproka ikbar bejn l-amministrazzjonijiet tat-taxxa li se tkun meħtieġa għall-implimentazzjoni sħiħa tas-sistema definittiva tal-VAT.

3.1.3. Lejn amministrazzjonijiet tat-taxxa aktar effiċjenti

Sal-aħħar tal-2017, il-Kummissjoni se tissottometti pakkett separat ta’ żewġ rapporti lill-Parlament Ewropew u lill-Kunsill:

·rapport skont l-Artikolu 12 tar-Regolament tal-Kunsill 1553/89 dwar il-proċeduri applikati fl-Istati Membri għar-reġistrazzjoni tal-persuni taxxabbli u d-determinazzjoni u l-ġbir tal-VAT, kif ukoll dwar il-modalitajiet u r-riżultati tas-sistemi ta’ kontroll tal-VAT tagħhom 33 ;

·rapport skont l-Artikolu 27 tad-Direttiva 2010/24/UE dwar l-użu tal-assistenza reċiproka bejn l-Istati Membri għall-irkupru tat-taxxi – b’mod partikolari l-VAT – li ma jitħallsux volontarjament mill-persuni taxxabbli 34 .

Dawn ir-rapporti se jixħtu dawl fuq l-isfidi għall-amministrazzjonijiet tat-taxxa biex jiġbru t-taxxa, f’ambjent soċjali, ekonomiku u finanzjarju li qed jinbidel. Id-diġitalizzazzjoni, il-globalizzazzjoni, il-mudelli l-ġodda tan-negozju, il-frodi u l-evitar tat-taxxa u l-limitazzjonijiet tar-riżorsi jħeġġu lill-amministrazzjonijiet tat-taxxa biex jirrieżaminaw il-prattiċi tagħhom u jsibu modi moderni jew alternattivi biex jiġbru t-taxxa fis-suq uniku. Dan jagħti opportunità ulterjuri lill-Kummissjoni biex tniedi djalogu strateġiku ta’ livell għoli mal-awtoritajiet nazzjonali, sabiex tfassal soluzzjonijiet li huma konsistenti madwar l-UE u li huma allinjati mar-regoli tal-UE.

3.2 Lejn politika tar-rati modernizzata

Kif tħabbar fil-Pjan ta’ Azzjoni tal-VAT tagħha, il-Kummissjoni qed tippjana wkoll li timmodernizza r-regoli li bħalissa jsawru l-libertà tal-Istati Membri biex jissettjaw ir-rati tal-VAT.

Apparti mill-pubblikazzjonijiet elettroniċi proposti, imsemmija fil-punt 2.1.2 ta’ hawn fuq, il-Kummissjoni sa Novembru 2017 se tipproponi riforma tar-rati tal-VAT. Dan huwa konsistenti mal-arranġamenti definittivi bbażati fuq il-prinċipju tad-destinazzjoni li gradwalment se jieħu post l-arranġamenti tranżitorji attwali għat-tassazzjoni tal-kummerċ bejn l-Istati Membri.

Fil-fatt, il-fornituri mhux qed jibbenefikaw b’mod sinifikanti milli jkunu stabbiliti fi Stat Membru li għandu rata iktar baxxa, meta l-oġġetti u s-servizzi qed jiġu ntaxxati fl-Istat Membru destinatarju. Id-diversità fir-rati tal-VAT għalhekk ma tibqax tfixkel il-funzjonament tas-suq uniku, sakemm tkun akkumpanjata minn salvagwardji sabiex jiġu evitati r-riskji potenzjali bħall-erożjoni tad-dħul, id-distorsjoni tal-kompetizzjoni, il-kumplessità u l-inċertezza legali.

3.3 Lejn Pakkett tal-VAT għall-SMEs

L-SMEs iġarrbu spejjeż ta’ konformità tal-VAT li huma proporzjonalment ogħla minn dawk tan-negozji l-kbar minħabba l-kumplessità u l-frammentazzjoni tas-sistema tal-VAT tal-UE. Sabiex tnaqqas dawk l-ispejjeż ta’ konformità, il-Kummissjoni f’Novembru 2017 se tipprepara pakkett komprensiv ta’ simplifikazzjoni għall-SMEs biex toħloq ambjent li jgħin it-tkabbir tagħhom u jiffavorixxi l-kummerċ transfruntier.

L-iskema speċjali eżistenti għall-intrapriżi żgħar timmira li tnaqqas l-ispejjeż ta’ konformità għall-SMEs iżda mhix adattata għal sistema bbażata fuq id-destinazzjoni. Jenħtieġ li din tiġi adattata sabiex tiżgura t-trattament ugwali tal-SMEs irrispettivament minn fejn huma stabbiliti fl-UE u biex tħeġġiġhom jinvolvu ruħhom f’attivitajiet transfruntiera u jibbenefikaw mill-opportunitajiet kollha tas-suq uniku.

4.KONKLUŻJONI

L-immodernizzar tas-sistema tal-VAT u l-adattament tagħha għall-isfidi li jirriżultaw mill-ġlieda kontra l-frodi huma elementi ewlenin għall-futur tas-suq uniku tagħna. Ir-riforma tas-sistema tal-VAT attwali għandha tikkontribwixxi għall-iżvilupp tas-suq uniku diġitali u tikkumplimenta l-aġenda stabbilita mill-Kummissjoni għal sistema tat-taxxa korporattiva iktar ġusta u effiċjenti fl-UE.

F’dan il-kuntest, huwa neċessarju kif ukoll urġenti li nkomplu nipprogressaw fit-triq lejn sistema tal-VAT għall-UE kollha li tista’ tgħin l-impjiegi, it-tkabbir, l-investiment u l-kompetittività u hija adattata għal ekonomija dejjem aktar diġitalizzata. Il-Kummissjoni tibqa’ impenjata li żżomm il-wegħdiet tagħha.

(1) Fl-2015 il-VAT daħħlet ftit iktar minn EUR 1 triljun, li jikkorrispondi għal 7% tal-PDG tal-UE jew 17.6% tat-total tad-dħul tat-taxxa nazzjonali (sors: Eurostat, Statistika tad-dħul tat-taxxa).

(2) L-Artikolu 402 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (ĠU L 347, 11.12.2006, p. 1) u COM(2016) 148 final, 7.04.2016.

(3) Ara: https://ec.europa.eu/taxation_customs/sites/taxation/files/study_and_reports_on_the_vat_gap_2017.pdf Study and Reports on the VAT Gap in the EU-28 Member States, CASE 2017;

(4) Fir-rigward ta’ modalitajiet oħrajn tal-frodi tal-VAT, u b’mod partikolari l-frodi tal-VAT domestika, il-Kummissjoni hija impenjata f’għadd ta’ azzjonijiet li beħsiebha twettaq flimkien mal-Istati Membri u partijiet interessati oħra. F’dan ir-rigward, ara l-punt 3.1.3 ta’ din il-Komunikazzjoni. Ara wkoll “20 measures to tackle the VAT gap” fil-link li ġejja: https://ec.europa.eu/taxation_customs/sites/taxation/files/docs/body/2016-03_20_measures_en.pdf

(5) Ara s-Sommarju Eżekuttiv tal-valutazzjoni tal-impatt li takkumpanja d-dokument Proposta għal Direttiva li temenda d-Direttiva 2006/112/KE fir-rigward tal-armonizzazzjoni u tas-simplifikazzjoni ta’ ċerti regoli fis-sistema ta’ taxxa fuq il-valur miżjud u l-introduzzjoni tas-sistema definittiva għat-tassazzjoni tal-kummerċ bejn l-Istati Membri (SWD(2017)326)

(6) Ara: https://ec.europa.eu/taxation_customs/sites/taxation/files/com_2016_148_mt.pdf Komunikazzjoni mill-Kummissjoni lill-Parlament Ewropew, lill-Kunsill u lill-Kumitat Ekonomiku u Soċjali Ewropew dwar pjan ta’ azzjoni dwar il-VAT – Lejn żona unika tal-VAT fl-UE – Iż-żmien biex niddeċiedu (COM(2016) 148 final).

(7) Ara: https://ec.europa.eu/taxation_customs/sites/taxation/files/com_2016_757_en.pdf Proposta għal Regolament ta’ Implimentazzjoni tal-Kunsill li jemenda r-Regolament ta’ Implimentazzjoni (UE) Nru 282/2011 li jistabbilixxi miżuri ta’ implimentazzjoni fir-rigward tad-Direttiva 2006/112/KE dwar is-sistema komuni ta’ taxxa fuq il-valur miżjud (COM(2016)756);Ara https://ec.europa.eu/taxation_customs/sites/taxation/files/com_2016_756_en.pdf Proposta għal Direttiva tal-kunsill li temenda d-Direttiva 2006/112/KE u d-Direttiva 2009/132/KE fir-rigward ta’ ċerti obbligi tat-taxxa fuq il-valur miżjud għall-provvisti ta’ servizzi u għall-bejgħ mill-bogħod ta’ prodotti (COM(2016) 757 final);Proposta għal Regolament tal-Kunsill li jemenda r-Regolament (UE) Nru 904/2010 dwar il-kooperazzjoni amministrattiva u l-ġlieda kontra l-frodi fil-qasam tat-taxxa fuq il-valur miżjud (COM(2016)755); https://ec.europa.eu/taxation_customs/sites/taxation/files/com_2016_755_en.pdf Ara: Proposta għal Direttiva tal-Kunsill li temenda d-Direttiva 2006/112/KE rigward ir-rati tat-taxxa fuq il-valur miżjud li japplikaw għall-kotba, għall-gazzetti u għall-perjodiċi (COM(2016)758); https://ec.europa.eu/taxation_customs/sites/taxation/files/com_2016_758_en.pdf Ara:

(8) Ara: http://eur-lex.europa.eu/legal-content/MT/TXT/?qid=1447773803386&uri=CELEX%3A52015DC0192

(9) Id-Deċiżjoni tal-Kummissjoni 2012/C 198/05 tat-3 ta’ Lulju 2012 li tistabbilixxi l-forum tal-UE dwar il-VAT, ĠU C 198 tas-6 ta’ Lulju 2012; Ara: http://eur-lex.europa.eu/legal-content/EN/TXT/?uri=CELEX:32012D0706%2802%29

(10) Eurofisc huwa network għall-iskambju rapidu ta’ informazzjoni mmirata bejn l-Istati Membri. Ara l-informazzjoni taħt il-link li ġejja EUROFISC .

(11) Id-Direttiva (UE) 2017/1371 tal-Parlament Ewropew u tal-Kunsill tal-5 ta’ Lulju 2017 dwar il-ġlieda kontra l-frodi tal-interessi finanzjarji tal-Unjoni permezz tal-liġi kriminali (ĠU L 198, 28.7.2017, p. 29-41).

(12) Fit-8 ta’ Ġunju 2017 għoxrin Stat Membru waslu għal qbil politiku. Il-Parlament Ewropew issa jrid jagħti l-kunsens tiegħu qabel ma jkun jista’ jiġi adottat ir-Regolament. http://www.consilium.europa.eu/mt/press/press-releases/2017/06/08-eppo/ Ara:

(13) L-Istati Membri jistgħu jitolbu lill-Kummissjoni għall-assistenza teknika fil-politika tat-taxxa u l-kwistjonijiet tal-amministrazzjoni tat-taxxa. Dawn it-talbiet huma koordinati, analizzati u mmonitorjati mis-Servizz ta’ Sostenn għar-Riforma Strutturali (SRSS). Tali assistenza tista’ tiġi ffinanzjata taħt il-Programm Fiscalis.

(14) Proposta għal Direttiva tal-Kunsill li temenda d-Direttiva 2006/112/KE dwar is-sistema komuni ta’ taxxa fuq il-valur miżjud fir-rigward tal-applikazzjoni temporanja ta’ mekkaniżmu tar-reverse charge ġeneralizzat b’rabta mal-provvista ta’ prodotti u servizzi ’l fuq minn ċertu livell limitu (COM(2016)811 tal-21.12.2016) https://ec.europa.eu/taxation_customs/sites/taxation/files/com_2016_811_en.pdf Ara:

(15) Il-frodi karusell hija tip partikolari ta’ frodi tal-VAT imwettqa minn gruppi ta’ kriminalità organizzata li jisfruttaw il-fatt li, taħt arranġamenti tranżitorji, il-kummerċ bejn il-ġurisdizzjonijiet tal-UE huwa mingħajr VAT.

(16) Riżoluzzjoni tal-Parlament Ewropew tat-13 ta’ Ottubru 2011 dwar il-futur tal-VAT (P7_TA(2011)0436): http://www.europarl.europa.eu/sides/getDoc.do?pubRef=-//EP//TEXT+TA+P7-TA-2011-0436+0+DOC+XML+V0//MT

(17) Il-konklużjonijiet tal-Kunsill dwar il-futur tal-VAT - it-3167 laqgħa tal-Kunsill tal-Affarijiet Ekonomiċi u Finanzjarji, Brussell, il-15 ta’ Mejju 2012 (ara b’mod partikolari l-punt B4): http://www.consilium.europa.eu/uedocs/cms_data/docs/pressdata/en/ecofin/130257.pdf

(18) Sistema tal-VAT “ibbażata fuq id-destinazzjoni” tfisser li l-oġġetti kkummerċjati bejn il-fruntieri huma ntaxxati fil-pajjiż fejn jiġu kkunsmati (il-pajjiż destinatarju) u skont ir-rata tat-taxxa tal-pajjiż destinatarju, minflok fejn jiġu prodotti (il-pajjiż tal-oriġini).

(19) Ara t-Taqsima 4 tal-Pjan ta’ Azzjoni tal-VAT.

(20) Ara n-nota ta’ qiegħ il-paġna 27.

(21) Fit-tieni pass leġiżlattiv tas-sistema definittiva tal-VAT, it-tassazzjoni tkopri l-provvisti tal-oġġetti u tas-servizzi transfruntiera kollha (u għalhekk il-fornitur, u mhux l-akkwirent, ikun responsabbli mill-VAT fuq l-oġġetti u s-servizzi mixtrija minn Stati Membri oħrajn) sabiex il-provvisti kollha tal-oġġetti u tas-servizzi fis-suq uniku, domestiku jew transfruntier, jiġu ttrattati bl-istess mod.

(22) Il-konklużjonijiet tal-Kunsill tat-8 ta’ Novembru 2016 dwar Titjib fir-regoli attwali tal-UE dwar il-VAT għal tranżazzjonijiet transfruntiera (Dok. 14257/16 FISC 190 ECOFIN 1023); http://data.consilium.europa.eu/doc/document/ST-14257-2016-INIT/mt/pdf Ara:

(23) Is-simplifikazzjonijiet previsti minn ċerti “soluzzjonijiet ta’ malajr” - ara l-punt A], b) u l-punt B], u s-simplifikazzjoni fir-rigward tar-regola tal-obbligazzjoni għall-akkwirenti-persuni taxxabbli ċertifikati taħt is-sistema l-ġdida ta’ tassazzjoni – ara l-punt A], c).

(24) Stokk f’kunsinna kuntrattat jirreferi għas-sitwazzjoni fejn il-fornitur iċaqlaq stokk lejn Stat Membru fejn mhuwiex stabbilit, sabiex ibigħu fi stadju iktar tard lil xerrej diġà magħruf. Bħalissa dan jiskatta t-trattament kumpless li ġej: (i) provvista meqjusa intra-Komunitarja magħmula mit-trasferent, (ii) akkwist meqjus intra-Komunitarju fl-Istat Membru tal-wasla tal-oġġetti magħmul mit-trasferent li jrid jirreġistra hemmhekk u (iii) provvista domestika.

(25) Il-forniment ta’ numru ta’ identifikazzjoni tal-VAT validu tax-xerrej isir kundizzjoni sostantiva għall-fornitur biex japplika l-eżenzjoni tal-VAT fil-każ ta’ provvisti intra-Komunitarji tal-oġġetti. Din il-modifika tippermetti monitoraġġ aħjar tal-fluss tal-oġġetti permezz ta’ kwalità mtejba tad-dikjarazzjonijiet rikapitulattivi skambjati (id-dikjarazzjonijiet rikapitulattivi jridu jiġu sottomessi mill-fornitur u skambjati bejn l-Istati Membri permezz tas-sistema VIES inkluż in-numru ta’ identifikazzjoni tal-VAT tal-akkwirent).

(26) It-tranżazzjonijiet katina huma provvisti suċċessivi tal-istess oġġetti fejn l-oġġetti fornuti huma soġġetti għal trasport intra-Komunitarju uniku bejn żewġ Stati Membri. F’din is-sitwazzjoni, it-trasport irid jiġi attribwit għall-provvista waħda biss fil-katina sabiex ikun determinat għal liema mit-tranżazzjonijiet jenħtieġ li tiġi applikata l-eżenzjoni għall-provvisti intra-Komunitarji skont l-Artikolu 138 tad-Direttiva tal-VAT. L-Istati Membri talbu titjib leġiżlattiv sabiex tiżdied iċ-ċertezza legali għall-operaturi fid-determinazzjoni tal-provvista fi ħdan il-katina tat-tranżazzjonijiet li għalihom għandu jiġi attribwit it-trasport intra-Komunitarju.

(27) B’mod simili għat-tranżazzjonijiet domestiċi, fit-tranżazzjonijiet intra-Unjoni tal-oġġetti, il-fornitur jiċċarġja l-VAT dovuta (dik tal-Istat Membru destinatarju tal-oġġetti) lill-akkwirent tiegħu. Madankollu, jekk l-akkwirent tiegħu huwa persuna taxxabbli ċertifikata, mhux se jiċċarġja l-VAT dovuta lilu. Kif inhu l-każ bħalissa, l-akkwirent se jagħmel awtovalutazzjoni tal-VAT dovuta fir-ritorn tal-VAT domestika tiegħu. Għal fini ta’ dawn il-bidliet, se jiġi introdott il-kunċett ta’ “provvista intra-Unjoni tal-oġġetti” u l-idea ta’ “akkwist intra-Komunitarju tal-oġġetti” se tiġi abolita.

(28) Is-sistema ta’ Skambju tal-Informazzjoni tal-VAT (VIES) hija mezz elettroniku ta’ validazzjoni tan-numri ta’ identifikazzjoni tal-VAT tal-operaturi ekonomiċi reġistrati fl-Unjoni Ewropea għall-provvisti transfruntiera ta’ oġġetti jew ta’ servizzi. http://ec.europa.eu/taxation_customs/vies/?locale=mt Ara iktar informazzjoni fuq:

(29) Ir-Riżoluzzjoni tal-Parlament Ewropew tal-24 ta’ Novembru 2016; http://www.europarl.europa.eu/sides/getDoc.do?pubRef=-//EP//TEXT+TA+P8-TA-2016-0453+0+DOC+XML+V0//MT Ara:

(30) Konklużjonijiet tal-Kunsill tal-25 ta’ Mejju 2016; http://www.consilium.europa.eu/press-releases-pdf/2016/5/47244641288_en.pdf Ara:

(31) Rapport Speċjali Nru 24, L-indirizzar tal-frodi intra-Komunitarja tal-VAT: Tinħtieġ aktar azzjoni, 2015: http://www.eca.europa.eu/Lists/ECADocuments/SR15_24/SR_VAT_FRAUD_MT.pdf Ara:

(32) Il-proċedura 42 hija proċedura tad-dwana li biha l-oġġetti jiġu importati u jitpoġġew f’ċirkolazzjoni libera fi Stat Membru u f’dak il-mument ikun ċar li l-oġġetti se jitilqu mit-territorju ta’ dak l-Istat Membru lejn Stat Membru ieħor. Bħala riżultat, id-dazji doganali se jiġu imposti fl-Istat Membru tal-importazzjoni fil-mument tal-importazzjoni, iżda l-VAT hija eżentata, għaliex se titħallas iktar tard mal-akkwist wara l-importazzjoni fl-Istat Membru tal-wasla tal-oġġetti. Fil-mument tal-importazzjoni l-persuna li tippreżenta l-oġġetti lid-dwana se tindika l-kodiċi tal-proċedura doganali 4200 (għall-importazzjoni) jew il-kodiċi 6300 (għall-importazzjoni mill-ġdid) fid-dikjarazzjoni tal-importazzjoni tad-dwana.

(33) Ir-Regolament tal-Kunsill (KEE, Euratom) Nru 1553/89 tad-29 ta’ Mejju 1989 dwar l-arranġamenti uniformi definittivi għall-ġbir ta’ riżorsi proprji li jakkumulaw mit-taxxa tal-valur miżjud, ĠU L 155/13 tas-7.6.1989.

(34) Id-Direttiva tal-Kunsill 2010/24/UE tas-16 ta’ Marzu 2010 dwar l-assistenza reċiproka għall-irkupru ta’ talbiet relatati ma’ taxxi, dazji u miżuri oħra, ĠU L 84/1, tal-31.3.2010.