IL-KUMMISSJONI EWROPEA

Brussell, 15.5.2017

COM(2017) 233 final

RAPPORT TAL-KUMMISSJONI LILL-PARLAMENT EWROPEW U LILL-KUNSILL

dwar l-implimentazzjoni tar-Regolament tal-Kunsill (UE) Nru 608/2013

Il-ksur tad-Drittijiet ta’ Proprjetà Intellettwali (DPI) huwa fenomenu mifrux u dejjem jikber madwar id-dinja. Il-kummerċ internazzjonali ta’ prodotti ffalsifikati jirrappreżenta sa 2.5% tal-kummerċ dinji, jew madwar EUR 338 biljun, abbażi tal-aħħar dejta disponibbli mill-2013 1 . L-impatt tal-falsifikazzjoni huwa partikolarment għoli fl-Unjoni Ewropea, bil-prodotti ffalsifikati u piratati jammontaw sa 5 % tal-importazzjonijiet, jew madwar EUR 85 biljun.

Komponent fundamentali tas-sistema tal-UE li tinforza d-DPI fil-fruntiera huwa r-Regolament (UE) Nru 608/2013 tal-Parlament Ewropew u tal-Kunsill tat-12 ta’ Ġunju 2013 dwar l-infurzar doganali tad-drittijiet ta’ proprjetà intellettwali 2 , li minn hawn ’il quddiem jissejjaħ ir-Regolament (UE) Nru 608/2013. Beda japplika mill-1 ta’ Jannar 2014.

L-Artikolu 37 tar-Regolament (UE) Nru 608/2013 jgħid li “... il-Kummissjoni għandha tippreżenta lill-Parlament Ewropew u lill-Kunsill rapport dwar l-implimentazzjoni ta’ dan ir-Regolament. Jekk meħtieġ, dak ir-rapport għandu jkun akkumpanjat minn rakkomandazzjonijiet xierqa.

Dak ir-rapport għandu jirreferi għal kull inċident rilevanti li jikkonċerna mediċini li jkunu għaddejjin mit-territorju doganali tal-Unjoni li jista’ jseħħ skont dan ir-Regolament, inkluża valutazzjoni tal-impatt potenzjali tiegħu fuq l-impenji tal-Unjoni dwar l-aċċess għal mediċini skont id-‘Dikjarazzjoni dwar il-Ftehim TRIPS u s-Saħħa Pubblika’ adottata mill-Konferenza Ministerjali tad-WTO f’Doha fl-14 ta’ Novembru 2001 u l-miżuri meħuda sabiex tiġi indirizzata kull sitwazzjoni li toħloq effetti negattivi f’dak ir-rigward.” 

Ir-Regolament (UE) Nru 608/2013 huwa akkumpanjat mill-Pjan ta’ Azzjoni Doganali tal-UE għall-ġlieda kontra l-ksur tad-DPI għas-snin bejn l-2013 u l-2017 3 , li għalihom il-Kummissjoni tippreżenta lill-Kunsill rapport ta’ sinteżi annwali u, sal-aħħar tal-2017, mistennija tippreżenta wkoll rapport finali.

Id-dokument preżenti għandu l-għan li jirrapporta dwar ir-rispons miġbur mill-Kummissjoni dwar l-implimentazzjoni tar-Regolament (UE) Nru 608/2013 mill-1 ta’ Jannar 2014. Fir-rigward tal-implimentazzjoni mill-Istati Membri, ir-rapport ikopri perjodu ta’ tliet snin mill-1 ta’ Jannar 2014 sa Diċembru 2016, filwaqt li l-figuri dettaljati dwar l-azzjonijiet meħuda fil-fruntieri tal-UE jkopru s-snin 2014 u 2015, minħabba li l-istatistika għall-2016 kienet għadha mhijiex disponibbli fiż-żmien meta tħejja dan ir-rapport.

It-Taqsima 2 tispjega l-metodoloġija użata għat-tħejjija tar-rapport.

It-Taqsima 3 tiddeskrivi l-qafas leġiżlattiv tal-UE u tiffoka fuq in-novitajiet ewlenin introdotti mir-Regolament (UE) Nru 608/2013.

It-Taqsima 4 tipprovdi ħarsa ġenerali lejn il-kummenti magħmula mis-settur privat.

It-Taqsima 5 tanalizza kif ġie implimentat ir-Regolament (UE) Nru 608/2013 mill-Istati Membri, b’attenzjoni speċifika fuq in-novitajiet u l-elementi fakultattivi introdotti minn dan ir-Regolament. Hija tinkludi wkoll figuri dwar l-applikazzjoni konkreta tar-Regolament (UE) Nru 608/2013.

It-Taqsima 6 tispjega fid-dettall il-konklużjonijiet.

 

Għat-tħejjija tar-rapport intużaw il-mezzi u l-għodod li ġejjin:

-żjarat ta’ appoġġ fl-Istati Membri u konsultazzjoni mal-Istati Membri dwar il-kwistjoni tal-mediċini;

-konsultazzjoni mal-partijiet ikkonċernati;

-tniżżil ta’ informazzjoni mill-bażi ta’ dejta ċentrali tal-Kummissjoni, l-hekk imsejħa COPIS Database (Sistema ta’ Informazzjoni dwar il-ġlieda kontra l-Falsifikazzjoni u l-Piraterija).

2.1    Żjarat ta’ appoġġ fl-Istati Membri u konsultazzjoni mal-Istati Membri dwar il-kwistjoni tal-mediċini

Il-Pjan ta’ Azzjoni Doganali tal-UE għall-ġlieda kontra l-ksur tad-DPI għas-snin bejn l-2013 u l-2017 jipprevedi numru ta’ azzjonijiet li jridu jittieħdu mill-Kummissjoni u mill-amministrazzjonijiet doganali tal-Istati Membri sabiex jiżguraw l-implimentazzjoni effettiva tar-Regolament (UE) Nru 608/2013.

Azzjoni waħda tirrigwarda t-tmexxija ta’ żjarat ta’ appoġġ, matul is-snin 2015-2017, mill-Kummissjoni u minn esperti nazzjonali tad-DPI, fit-28 Stat Membru, sabiex jiġi stabbilit djalogu mal-awtoritajiet responsabbli mir-Regolament ta’ implimentazzjoni (UE) Nru 608/2013, bil-għan li:

-tinġabar informazzjoni dwar l-implimentazzjoni tar-Regolament (UE) Nru 608/2013;

-jiġi ffaċilitat l-iskambju tal-esperjenzi u l-aħjar prattiki.

Fl-2015 u l-2016, il-Kummissjoni, flimkien mal-esperti tad-DPI mill-awtoritajiet doganali tal-Istati Membri, mexxiet 24 żjara ta’ appoġġ fil-pajjiżi li ġejjin: BE, NL, FI, EE, SI, HR, LV, LT, MT, IT, EL, CY, SE, DK, DE, AT, SK, CZ, HU, PL, ES, PT, FR u LU. Dawn iż-żjarat intużaw sabiex jitħejja d-dokument preżenti. Fil-każ tal-Istati Membri li għad trid issirilhom iż-żjara fl-2017, jiġifieri BG, IE, RO u UK, il-Kummissjoni stiednet lill-awtoritajiet doganali sabiex jimlew il-kwestjonarju użat fl-okkażjoni taż-żjarat ta’ appoġġ, sabiex l-awtoritajiet doganali tal-Istat Membru kollha jkunu jistgħu jesprimu l-fehmiet tagħhom dwar l-implimentazzjoni tar-Regolament (UE) Nru 608/2013. Il-kwestjonarji mimlija minn dawk l-awtoritajiet doganali tal-Istati Membri waslu matul l-2016.

Fl-okkażjoni tal-ewwel laqgħa tal-Grupp ta’ Esperti Doganali (it-taqsima tal-infurzar tad-DPI), li saret fil-11 ta’ Lulju 2016, il-Kummissjoni talbet ukoll lill-awtoritajiet doganali tal-Istati Membri sabiex jirrapportaw lill-Kummissjoni kwalunkwe inċidenti rilevanti li jikkonċernaw il-mediċini fi tranżitu madwar it-territorju doganali tal-Unjoni li setgħu seħħew skont ir-Regolament (UE) Nru 608/2013.

2.2 Konsultazzjonijiet mal-partijiet ikkonċernati

Il-Pjan ta’ Azzjoni Doganali tal-UE għall-ġlieda kontra l-ksur tad-DPI għas-snin 2013 sa 2017 waqqaf grupp li jlaqqa’ l-Kummissjoni, l-awtoritajiet doganali tal-UE, id-detenturi tad-drittijiet u partijiet ikkonċernati oħrajn fil-kuntest tal-azzjoni tiegħu 1.3.2 4 . Il-grupp jiltaqa’ darba fis-sena.

Fl-okkażjoni tar-raba’ laqgħa ta’ dan il-grupp, li saret fi Brussell fit-12 ta’ Lulju 2016, il-Kummissjoni stiednet lid-detenturi tad-drittijiet u lil partijiet ikkonċernati oħrajn sabiex jirrapportaw dwar l-implimentazzjoni tar-Regolament (UE) Nru 608/2013, b’enfasi speċifika fuq id-dispożizzjonijiet li ġejjin, li huma ta’ interess dirett għalihom:

-il-kapitolu II dwar l-applikazzjonijiet għal azzjonijiet (marbuta mal-kontenut tal-applikazzjonijiet għal azzjonijiet kif spjegati fid-dettall fir-Regolamenti ta’ Implimentazzjoni tal-Kummissjoni (UE) Nru 1352/2013);

-l-Artikolu 19 dwar l-ispezzjoni u t-teħid ta’ kampjuni ta’ oġġetti li r-rilaxx tagħhom kien sospiż jew li kienu detenuti;

-l-Artikolu 21 dwar l-użu permess ta’ ċerta informazzjoni mid-detentur tad-deċiżjoni;

-l-Artikoli 23 (proċedura standard għall-qerda tal-oġġetti u l-bidu ta’ proċeduri) u 26 (proċedura għall-qerda tal-oġġetti f’kunsinni żgħar);

-L-Artikolu 28 jikkonċerna r-responsabbiltà tad-detentur tad-deċiżjoni;

-L-Artikolu 29 jikkonċerna l-ispejjeż.

Sal-aħħar ta’ Settembru 2016 kienu waslu tmien tweġibiet mingħand l-assoċjazzjonijiet li ġejjin: European Express Association (EEA), Union des Fabricants (UNIFAB), l-Assoċjazzjoni tat-Trademarks tal-Komunitajiet Ewropej (ECTA), il-Federazzjoni Ewropea tal-Industriji u l-Assoċjazzjonijiet Farmaċewtiċi (EFPIA), l-Assoċjazzjoni Ewropea tal-Industrija tas-Semikundutturi (ESIA), l-Assoċjazzjoni tat-Trademarks Internazzjonali (INTA), Business Action to Stop Counterfeit And Piracy (BASCAP), l-Assoċjazzjoni Ewropea tas-Sidien tat-Trademarks (MARQUES).

Il-Kummissjoni tirringrazzja lil dawn l-assoċjazzjonijiet għall-kummenti li bagħtu.

2.3    L-użu ta’ COPIS (Tniżżil ta’ informazzjoni minn COPIS)

Ir-Regolament (UE) Nru 608/2013 jipprevedi li għall-fini tal-iżgurar tal-ipproċessar tal-informazzjoni trażmessa mill-Istati Membri lill-Kummissjoni u li tirrigwarda d-deċiżjonijiet li jagħtu l-applikazzjonijiet, kif ukoll is-sospensjoni tar-rilaxx tal-oġġetti jew id-detenzjoni tagħhom, il-Kummissjoni għandha tistabbilixxi bażi ta’ dejta ċentrali. Il-bażi tad-dejta ċentrali COPIS bdiet topera fl-1 ta’ Jannar 2014. Hija tinsab taħt żvilupp permanenti.

Il-Kummissjoni għandha aċċess għall-informazzjoni inkluża f’COPIS, kif xieraq, għall-issodisfar tar-responsabbiltajiet legali tagħha fl-applikazzjoni tar-Regolament (UE) Nru 608/2013.

Għat-tħejjija tar-rapport preżenti, il-Kummissjoni estrattat l-informazzjoni meħtieġa minn COPIS, b’mod partikolari dwar:

-in-numru ta’ Applikazzjonijiet għal Azzjonijiet (AFA) skont it-tip ta’ drittijiet ta’ proprjetà intellettwali koperti mir-Regolament (UE) Nru 608/2013 (ara l-Anness 1);

-ir-riżultati tal-użu tal-“proċedura standard”;

-l-użu tal-“proċedura għal kunsinni żgħar” (ara l-Anness 2).

3.1    Kuntest

L-UE bdiet tirregola l-infurzar tad-DPI fil-fruntieri fil-livell tal-Unjoni sa mill-1987 bir-Regolament tal-Kunsill (KE) Nru 3482/86 5 , li jistabbilixxi miżuri li jipprojbixxu r-rilaxx ta’ oġġetti ffalsifikati għal ċirkolazzjoni libera. Minn dak iż-żmien ’il hawn, daħlu fis-seħħ tliet regolamenti oħrajn 6 bil-għan li jaġġustaw il-kamp ta’ applikazzjoni u l-proċeduri għall-evoluzzjoni tax-xejriet tal-frodi. L-aħħar reviżjoni, li wasslet għall-adozzjoni tar-Regolament (UE) Nru 608/2013, ħadet f’kunsiderazzjoni b’mod partikolari l-kummerċ dejjem jikber tal-oġġetti ffalsifikati bħala riżultat tal-kummerċ elettroniku dejjem jikber.

Bħar-Regolamenti tal-UE preċedenti fil-qasam, ir-Regolament (UE) Nru 608/2013 jimplimenta l-miżuri ta’ infurzar fil-fruntieri inklużi fi ħdan il-Ftehim dwar l-aspetti ta’ Drittijiet tal-Proprjetà Intellettwali Relatati mal-Kummerċ (TRIPS), li kien approvat mill-Kunsill tal-UE fl-1994 bħala parti min-negozjati multilaterali taċ-Ċiklu tal-Urugwaj u konkluż fil-qafas tal-Organizzazzjoni Dinjija tal-Kummerċ (WTO). Ir-Regolament saħansitra jimplimenta r-rekwiżiti mhux vinkolanti tat-TRIPS f’termini tal-infurzar fil-fruntieri, bħall-kontrolli fuq oġġetti ffalsifikati f’esportazzjoni u tranżitu, sabiex b’hekk jirrifletti l-impenn tal-UE għal protezzjoni għolja tad-DPI.

L-għan huwa li jiġi evitat li oġġetti li jiksru d-DPI ‘jitpoġġew fis-suq intern’ u li jiġu adottati miżuri għal dak il-għan ‘mingħajr ma tixxekkel il-libertà tal-kummerċ leġittimu’.

Ir-Regolament (UE) Nru 608/2013 fih biss regoli proċedurali għall-awtoritajiet doganali. Għaldaqstant, dan ir-Regolament ma jistabbilixxi ebda kriterju sabiex tiġi aċċertata l-eżistenza ta’ ksur ta’ DPI, li huwa definit fil-liġi sostantiva kkonċernata.

Ir-Regolament (UE) Nru 608/2013 jagħti s-setgħa lill-awtoritajiet doganali tal-UE sabiex iżommu oġġetti li huma suspettati li qegħdin jiksru DPI konferit mil-liġijiet tal-PI nazzjonali jew tal-UE u li jinsabu taħt kontroll doganali jew superviżjoni doganali.

Il-kontroll mill-awtoritajiet doganali għandu jkun ibbażat fuq analiżi tar-riskji u għandu jkun proporzjonat għar-riskju. Għalhekk, huwa essenzjali li l-awtoritajiet doganali jkollhom għad-dispożizzjoni tagħhom informazzjoni rilevanti u suffiċjenti mid-detenturi tad-drittijiet sabiex ikunu jistgħu jorganizzaw l-analiżi tar-riskji tagħhom kif suppost.

L-awtoritajiet doganali jistgħu jaġixxu fuq “applikazzjoni għal azzjoni” (AFA) mitluba mid-detenturi tad-drittijiet, jew inkella fuq inizjattiva tagħhom stess, hekk imsejħa “ex-officio”.

AFA għandha tiġi ppreżentata lill-awtoritajiet doganali mill-persuni intitolati sabiex jibdew proċedimenti legali bil-għan li jiġi ddeterminat ksur tad-DPI. L-AFAs nazzjonali jiġu ppreżentati fi Stat Membru u jitolbu lill-awtoritajiet doganali tiegħu sabiex jieħdu azzjoni f’dak l-Istat Membru. Id-detenturi ta’ DPI abbażi ta’ liġi tal-Unjoni li tipproduċi effetti madwar l-Unjoni kollha jistgħu jippreżentaw AFA tal-Unjoni, li tipproduċi effetti f’aktar minn Stat Membru wieħed.

Il-formoli ta’ applikazzjoni u estensjoni huma stabbiliti fir-Regolament ta’ Implimentazzjoni tal-Kummissjoni (UE) Nru 1352/2013 tal-4 ta’ Diċembru 2013 7 .

L-awtoritajiet doganali jieħdu d-deċiżjoni li jagħtu jew jirrifjutaw l-AFA.

Meta l-awtoritajiet doganali jissospendu r-rilaxx jew iżommu l-oġġetti suspettati detenuti, huma jinnotifikaw lid-detentur tad-deċiżjoni li tagħti l-applikazzjoni u lid-dikjarant jew lid-detentur tal-oġġetti. Skont il-“proċedura standard”, mal-konferma bil-miktub mid-detentur tad-deċiżjoni li, fil-kundanna tiegħu, kien hemm ksur ta’ DPI, u bi qbil espliċitu jew meqjus taż-żewġ partijiet, l-oġġetti suspettati jistgħu jinqerdu. Inkella, l-oġġetti jiġu rilaxxati, sakemm id-detentur tad-deċiżjoni ma jinnotifikax lill-awtoritajiet doganali li huwa beda proċeduri sabiex jiġi ddeterminat jekk kienx hemm ksur ta’ DPI. L-iskadenza sabiex jiġi kkonfermat il-qbil mal-qerda jew sabiex l-awtoritajiet doganali jiġu informati dwar il-bidu ta’ proċeduri tammonta għal 10 ijiem tax-xogħol (3 ijiem fil-każ ta’ oġġetti li jitħassru) u tista’, fil-każ tal-bidu ta’ proċeduri, fejn xieraq, tiġi estiża b’massimu ta’ 10 ijiem tax-xogħol oħra.

Meta l-oġġetti suspettati detenuti ma jkunux koperti minn AFA (azzjoni ex-officio), l-awtoritajiet doganali jridu jinnotifikaw id-detenzjoni lill-persuni kkonċernati, filwaqt li jipprovdulhom l-opportunità li jippreżentaw AFA.

Ir-Regolament (UE) Nru 608/2013 jipprevedi wkoll proċedura simplifikata għal pakketti żgħar li jinġarru bil-posta jew b’servizz ta’ posta espress (“proċedura għal kunsinni żgħar”), li tiġi applikata jekk jitlobha d-detentur tad-deċiżjoni li tagħti l-applikazzjoni, fejn l-oġġetti jistgħu jinqerdu bil-qbil espress jew preżunt tad-dikjarant waħdieni jew tad-detentur tal-oġġetti.

L-AFAs u l-informazzjoni dwar id-detenzjoni jiġu ġestiti permezz ta’ COPIS. Abbażi tad-dejta trażmessa mill-awtoritajiet doganali tal-Istati Membri permezz ta’ COPIS, il-Kummissjoni tippubblika fuq bażi annwali r-riżultati tal-azzjonijiet doganali fil-fruntieri esterni tal-UE 8 .

3.2 Karatteristiċi ġodda introdotti mir-Regolament (UE) Nru 608/2013

Il-karatteristiċi ġodda ewlenin introdotti mir-Regolament (UE) Nru 608/2013, li jikkompleta l-iskema diġà inkluża fir-regolamenti tal-passat, huma dawn li ġejjin:

-    L-estensjoni tad-drittijiet u l-ksur koperti mill-azzjonijiet doganali: sabiex jissaħħaħ l-infurzar tad-DPI, l-intervent doganali kien estiż għal tipi oħrajn ta’ drittijiet u tipi oħrajn ta’ ksur għajr dawk koperti fir-Regolament (KE) Nru 1383/2003. It-tipi l-oħrajn ta’ drittijiet protetti huma l-ismijiet kummerċjali, it-topografiji ta’ prodotti semikundutturi u l-mudelli ta’ utilità. L-Indikazzjonijiet Ġeografiċi koperti issa jinkludu mhux biss prodotti agrikoli, iżda wkoll prodotti mhux agrikoli futuri possibbli, u r-Regolament isemmi speċifikament l-indikazzjonijiet ġeografiċi previsti fil-Ftehimiet ma’ pajjiżi terzi. Il-kamp ta’ applikazzjoni tar-Regolament ġie estiż ukoll sabiex ikopri aktar każijiet ta’ ksur, jiġifieri l-ksur kollu possibbli tat-trademarks (bħal trademarks simili li jagħtu lok għal konfużjoni u trademarks magħrufa sewwa) u mhux biss oġġetti ffalsifikati bħal fir-Regolamenti preċedenti, kif ukoll ksur permezz ta’ tagħmir ta’ ċirkomvenzjoni (tagħmir li huwa primarjament iddisinjat, prodott jew adattat għall-iskop li jippermetti jew jiffaċilita ċ-ċirkomvenzjoni tal-miżuri teknoloġiċi li jipprevjenu jew jirrestrinġu atti fir-rigward tax-xogħlijiet li mhumiex awtorizzati).

-    Il-kamp ta’ applikazzjoni u l-ispeċifiċità tal-informazzjoni li trid tiġi pprovduta fi ħdan l-AFA ġew estiżi meta mqabbla mar-Regolament preċedenti.

-    Il-proċedura simplifikata għall-qerda saret il-proċedura standard obbligatorja. Taħt din il-proċedura, li diġà kienet teżisti bħala proċedura fakultattiva skont ir-Regolament (KE) Nru 1383/2003, mal-konferma bil-miktub mid-detentur tad-deċiżjoni li, fil-kundanna tiegħu, kien hemm ksur ta’ DPI, u bi qbil espress taż-żewġ partijiet, l-oġġetti suspettati jistgħu jinqerdu mingħajr il-ħtieġa li jiġi ddeterminat jekk kienx hemm ksur ta’ DPI. Hija tipprevedi li l-oġġetti jinqerdu malajr u b'mod kosteffettiva. Fil-passat din diġà kienet għodda ta’ suċċess fil-ġestjoni prattika u t-trattament ta’ “każijiet ċari” ta’ ksur tad-DPI; li din issir il-proċedura standard turi li kienet tal-istess suċċess fl-Istati Membri kollha.

Kuntrarju għall-proċedura simplifikata deskritta fir-Regolament (KE) Nru 1383/2003, il-proċedura standard ġdida ma titlobx lid-detentur tad-deċiżjoni jikseb direttament il-qbil bil-miktub mid-detentur tal-oġġetti/dikjarant sabiex jabbanduna l-oġġetti għall-qerda, iżda issa hija l-awtorità doganali li hija responsabbli sabiex tinnotifika lid-detentur tal-oġġetti/dikjarant u l-awtorità doganali tista’ tqis il-qbil tad-detentur tal-oġġetti/dikjarant bħala li ngħata meta huwa ma jkunx oppona espliċitament għall-qerda.

-    Il-proċedura speċifika għal kunsinni żgħar ġiet introdotta sabiex tindirizza x-xejra dejjem tiżdied lejn kunsinna żgħira ta’ oġġetti ffalsifikati u piratati, li ġeneralment jidħlu fl-Unjoni permezz tas-servizz postali jew permezz ta’ kumpanija ta’ posta espress kummerċjali, kif ukoll sabiex tnaqqas l-ispejjeż u l-piżijiet amministrattivi għat-trattament ta’ każijiet bħal dawn għal minimu. Hija tapplika għall-kunsinni żgħar kif definiti fl-Artikolu 2(19) tar-Regolament (UE) Nru 608/2013, jiġifieri kunsinni mibgħuta bil-posta jew b'posta espress li jkun fihom massimu ta’ tliet unitajiet jew li jkollhom piż gross ta’ mhux aktar minn żewġ kilogrammi.

-    “Qbil meqjus”: kemm il-proċedura standard kif ukoll dik għal kunsinni żgħar jipprevedu l-possibbiltà li jintuża l-qbil meqjus tad-detentur tal-oġġetti/dikjarant minflok il-qbil espliċitu tiegħu għall-qerda. Fi kliem ieħor, meta d-dikjarant jew id-detentur tal-oġġetti ma jkunx ikkonferma l-qbil tiegħu mal-qerda tal-oġġetti, u lanqas ma jkun innotifika lill-awtoritajiet doganali bl-oppożizzjoni tiegħu għal din il-qerda sal-iskadenza definita, l-awtoritajiet doganali jistgħu jqisu li d-dikjarant jew id-detentur tal-oġġetti jkun ikkonferma l-qbil tiegħu mal-qerda tal-oġġetti.

-    Spejjeż: minħabba li l-awtoritajiet doganali jieħdu azzjoni mal-applikazzjoni, l-Artikolu 29 tar-Regolament (UE) Nru 608/2013 jistabbilixxi li l-awtoritajiet doganali jistgħu jiddeċiedu li d-detentur tad-deċiżjoni għandu jirrimborża l-ispejjeż kollha mġarrba mill-awtoritajiet doganali meta jieħdu azzjoni sabiex jinfurzaw id-drittijiet ta’ proprjetà intellettwali tiegħu. Din tibqa’ d-deċiżjoni tal-awtoritajiet doganali tal-Istati Membri.

-    L-Artikolu 22 tar-Regolament (UE) Nru 608/2013 jintroduċi dispożizzjoni dwar il-kondiviżjoni ta’ informazzjoni u dejta mal-awtoritajiet rilevanti fil-pajjiżi terzi, bil-għan li jikkontribwixxi b’dan il-mod fil-ġlieda kontra l-kummerċ internazzjonali ta’ oġġetti li jiksru d-DPI. Sabiex tattiva l-proċedura, il-Kummissjoni għandha tadotta atti ta’ implimentazzjoni li jiddefinixxu l-elementi tal-arranġamenti prattiċi meħtieġa li jikkonċernaw l-iskambju ta’ dejta u informazzjoni.

-    L-infurzar doganali tad-DPI fi ħdan l-Unjoni Ewropea jinvolvi l-iskambju ta’ dejta dwar deċiżjonijiet li jirrigwardaw l-AFA. L-iskambju ta’ tali dejta, kif ukoll l-azzjonijiet doganali, kellhom isiru disponibbli permezz ta’ bażi ta’ dejta elettronika ċentrali. Għal dak il-għan, ġiet stabbilita l-bażi ta’ dejta ċentrali ta’ COPIS mill-Kummissjoni, li ilha topera mill-1 ta’ Jannar 2014.

L-assoċjazzjonijiet tad-detenturi tad-drittijiet u tal-kumpaniji ta’ posta espress ifaħħru ħafna min-novitajiet introdotti mir-Regolament (UE) Nru 608/2013 u jagħtu rispons ġeneralment pożittiv dwar il-funzjonament tiegħu.

L-inklużjoni ta’ drittijiet ta’ PI addizzjonali fil-qasam tal-kontroll doganali titqies bħala utli, u tippermetti allinjament bejn ir-Regolament (UE) Nru 608/2013 u d-Direttiva 2004/48/KE fuq l-infurzar tad-drittijiet tal-proprjetà intellettwali, kif ukoll billi tnaqqas id-diskriminazzjoni kontra d-DPI, minbarra t-trademarks

Il-preżentazzjoni tal-AFAs ma titqiesx bħala kumplessa żżejjed. Il-proċedura tal-AFA tal-Unjoni (il-preżentazzjoni fi Stat Membru wieħed u t-tixrid fl-Istat Membru l-ieħor mill-Istat Membru awtorizzanti) titqies ukoll bħala utli.

Il-proċedura standard ġdida bl-“għażla ta’ qbil meqjus” tagħha tidher li hija partikolarment apprezzata u kkunsidrata bħala għodda prattika ħafna.

B’mod ġenerali, it-tweġibiet riċevuti jiżvelaw fehma pożittiva fuq il-mod kif l-awtoritajiet doganali jissodisfaw id-doveri tagħhom fir-rigward tar-Regolament.

Kwistjonijiet li jqajmu xi tħassib huma dawn li ġejjin:

-    L-informazzjoni li trid tiġi ppreżentata fl-AFA mhux dejjem tkun definita b’mod ċar (pereżempju, x’għandu jitqies bħala “distributur awtorizzat”?) jew l-informazzjoni msemmija ma tkunx għadha tapplika u ma tikkunsidrax l-akkwisti globali moderni u l-prattika tal-katina tal-provvista, jew saħansitra tista’ tkun diffiċli biex tinġabar minn xi wħud (il-post tal-produzzjoni, il-kumpaniji involuti, l-operaturi tas-suq, eċċ.). Barra minn hekk, id-distinzjoni bejn l-oqsma obbligatorji u fakultattivi fil-formoli annessi mar-Regolament ta’ implimentazzjoni (UE) Nru 1352/2013 ma tkunx riflessa fir-Regolament (UE) Nru 608/2013.

Fir-rigward tal-aġġornar tal-informazzjoni inkluża fl-AFA, ma jidhirx li huwa effiċjenti li d-detentur tad-deċiżjoni jrid jirrapporta lill-awtoritajiet doganali kwalunkwe modifiki għal kwalunkwe informazzjoni msemmija fl-Artikolu 6 (fid-dawl tal-firxa sinifikanti ta’ informazzjoni meħtieġa fl-imsemmi Artikolu).

Xi tweġibiet jissuġġerixxu li jiġi ssimplifikat ir-reġim lingwistiku għall-AFA tal-Unjoni billi jiġu aċċettati sottomissjonijiet bl-Ingliż, bil-Franċiż jew bil-Ġermaniż madwar it-28 Stat Membru.

- Ir-ritorn tal-kampjuni kif previst fl-Artikolu 19(2) ma jkunx possibbli fil-każijiet kollha, minħabba li t-twettiq tal-analiżi ta’ spiss jikkawża ħsara fil-kampjuni.

Jekk il-kampjuni ma jkunux jistgħu jiġu pprovduti mill-awtoritajiet doganali fl-ewwel għaxart ijiem tax-xogħol, huwa ssuġġerit li l-iskadenza ta’ għaxart ijiem sabiex id-detentur tad-deċiżjoni jkun jista’ jibda l-proċeduri tiġi estiża kif xieraq.

-    L-iskadenza ta’ għaxart ijiem sabiex jinbdew il-proċeduri tkun qasira wisq (proċedura standard - Artikolu 23). Xi tweġibiet jissuġġerixxu li d-detentur tad-deċiżjoni għandu jingħata l-opportunità li jibda proċeduri legali matul skadenza ta’ żmien, li għandha tiġi kkalkolata minn dakinhar tan-notifika doganali tal-oġġezzjoni sal-qerda mid-detentur tal-oġġetti/dikjarant (u mhux min-notifika tas-sospensjoni tar-rilaxx jew id-detenzjoni tal-oġġetti).

-    Il-ħażna tal-oġġetti (li r-rilaxx tagħhom kien sospiż jew li nżammu fil-bini ta’ kumpanija ta’ posta espress) tinvolvi spejjeż indiretti addizzjonali.

-    L-ispejjeż tal-qerda (Artikolu 29) diffiċli jiġu vvalutati minn qabel (b’mod partikolari fil-proċedura għal kunsinni żgħar, minħabba li d-detentur tad-deċiżjoni ma jiġix ikkonsultat fuq kull detenzjoni) u se jkunu qegħdin jiżdiedu. Xi tweġibiet jissuġġerixxu li d-detentur tad-deċiżjoni għandu jingħata l-opportunità li jiddetermina l-kundizzjonijiet tal-ħażna u tal-qerda b’mod kosteffettiv jew li l-ispejjeż relatati mal-azzjoni li tikkonċerna oġġetti ffalsifikati għandhom jitħallsu mill-kontraventur/importatur jew inkella li l-piż jitpoġġa fuq l-intermedjarji (konsenjatur/speditur/trasportatur).

Fir-rigward tal-proċedura għal kunsinni żgħar, filwaqt li ċerti tweġibiet iqisuha bħala utli ħafna, oħrajn jikkonkludu li din ma tistax tintuża għal ċerti tipi ta’ prodotti (bħal mediċini, minħabba li l-industrija tal-farmaċewtika għandha obbligu li tirrapporta d-detenzjonijiet tal-mediċini lill-awtoritajiet, jew semikundutturi, minħabba li l-ksur huwa kumpless biex jiġi vvalutat) jew saħansitra li ma tista’ tintuża għal xejn, minħabba li ma tiżgurax livell suffiċjenti ta’ informazzjoni dwar id-detenzjonijiet magħmula.

-    Il-lista ta’ użi permessi tal-informazzjoni trażmessa mill-awtoritajiet doganali lid-detentur tad-deċiżjoni hija nieqsa miċ-ċarezza fil-formulazzjoni tagħha.

-    F’dak li għandu x’jaqsam mal-proċedura ta’ “rilaxx bikri tal-oġġetti” u d-definizzjoni ta’ garanzija, il-prezz tal-liċenzja miksuba minn fuq is-sit web tad-detentur tad-dritt ma għandux jitqies bħala garanzija raġonevoli.

-    F’dak li għandu x’jaqsam mar-responsabbiltà tad-detentur tad-deċiżjoni, ma sar ebda kumment ġenerali. Ftit tweġibiet jirreferu għar-responsabbiltà b’rabta mal-kwistjoni speċifika tan-nuqqas ta’ ritorn tal-kampjuni, bl-idea prinċipali tkun li d-detentur tad-deċiżjoni ma għandux jitqies bħala responsabbli għall-kampjuni li ma jiġux irritornati, jew li ssirilhom ħsara, minbarra fil-każ meta d-detentur tal-oġġetti/dikjarant jopponi għall-qerda u l-oġġetti inkwistjoni sussegwentement jinstabu li mhumiex qegħdin jiksru DPI.

It-tweġibiet ipprovduti jqajmu wkoll xi mistoqsijiet ta’ interpretazzjoni dwar ċerti aspetti tar-Regolament (UE) Nru 608/2013, li kienu jew sejrin jiġu indirizzati direttament mal-partijiet ikkonċernati.

Fl-aħħarnett, it-tweġibiet ipprovduti jirreferu għal nuqqas ta’ implimentazzjoni komuni mal-UE kollha fuq ċerti kwistjonijiet, bħall-informazzjoni li titqies bħala obbligatorja f’AFA, l-iskadenza sabiex jintalab tiġdid tad-deċiżjoni doganali li tagħti l-AFA, il-mod kif tiġi implimentata l-proċedura standard (inkluż dwar it-trażmissjoni ta’ informazzjoni lid-detentur tad-deċiżjoni), ir-raġuni rikonoxxuta bħala valida għan-nuqqas ta’ bidu ta’ proċeduri, l-implimentazzjoni tal-proċedura għal kunsinni żgħar (li mhijiex sejra tiġi implimentata mill-Istati Membri kollha), in-nuqqas ta’ użu tal-informazzjoni mogħtija mid-detentur tad-deċiżjoni fl-AFA u inkluża f’COPIS għal finijiet ta’ analiżi tar-riskji.

Filwaqt li l-leġiżlazzjoni doganali tiġi adottata fil-livell tal-UE, l-implimentazzjoni tagħha hija r-responsabbiltà tal-Istati Membri permezz tal-amministrazzjonijiet doganali nazzjonali. L-Istati Membri għandhom ukoll il-kompetenza fuq l-organizzazzjoni tal-amministrazzjoni doganali tagħhom, inkluż fuq l-organizzazzjoni tat-taħriġ tal-uffiċjali doganali. Madankollu, ir-Regolament (UE) Nru 608/2013 jindika fil-premessa 7 tiegħu li l-Istati Membri għandhom, f’kooperazzjoni mal-Kummissjoni, jipprovdu taħriġ xieraq għall-uffiċjali doganali sabiex jiżguraw l-implimentazzjoni korretta ta’ dan ir-Regolament.

Il-qari tal-kwestjonarju u l-iskambju ta’ fehmiet imwettqa matul iż-żjarat ta’ appoġġ ippermettew li ssir diskussjoni dwar l-organizzazzjoni amministrattiva tad-dipartimenti doganali li jittrattaw l-infurzar tad-DPI, kemm jekk fil-livell ċentrali jew inkella fil-livell lokali (inklużi r-riżorsi umani involuti, it-taħriġ ipprovdut, l-użu ta’ bażi ta’ dejta, eċċ.), dwar il-kooperazzjoni mad-diversi partijiet ikkonċernati u dwar l-implimentazzjoni tal-proċeduri kollha previsti mir-Regolament.

Ir-Regolament (UE) Nru 608/2013 fih kemm dispożizzjonijiet obbligatorji kif ukoll dispożizzjonijiet fakultattivi. Dawn tal-aħħar iħallu f’idejn l-Istati Membri li jiddeċiedu jekk jużawx għażla waħda jew l-oħra. Dan huwa l-każ bid-deċiżjoni li jintuża l-“qbil meqjus” imsemmi kemm fil-proċedura standard kif ukoll fil-proċedura għal kunsinni żgħar (Artikoli 23 u 26), id-deċiżjoni li titlob lid-detentur tad-deċiżjoni jħallas l-ispejjeż imġarrba mill-azzjoni doganali (Artikolu 29) u d-deċiżjoni dwar min għandu jiġi nnotifikat bejn id-detentur tal-oġġetti jew id-dikjarant kemm għall-proċedura standard kif ukoll għall-proċedura għal kunsinni żgħar (Artikoli 17 u 26). Iż-żjarat ta’ appoġġ taw l-opportunità li tissawwar stampa globali tal-għażla magħmula mill-Istati Membri vis-à-vis il-flessibbiltà offruta mir-Regolament.

5.1    Riżorsi umani/aspetti organizzazzjonali

L-Istati Membri jħabbtu wiċċhom ma’ riżorsi dejjem aktar limitati fil-qasam tad-dwana.

Ir-riżorsi umani ddedikati għad-DPI huma marbuta ħafna mal-livell ta’ prijorità mogħtija lid-DPI f’kull Stat Membru, lill-għadd ta’ AFA riċevuti fil-livell nazzjonali, lill-organizzazzjoni tad-dipartiment doganali kompetenti tad-DPI (IPR CCD - id-dipartiment responsabbli mit-trattament tal-Applikazzjonijiet għal Azzjoni) u lir-rwol tiegħu.

Fil-maġġoranza tal-Istati Membri, l-IPR CCD jinsab fil-livell ċentrali.

Ir-rwol tiegħu jista’ jiġi definit b’tali mod li jimplika ċentralizzazzjoni għolja ħafna tal-kompiti tad-DPI fl-Istat Membru (inkluż il-livell ta’ trattament tal-proċeduri ta’ notifika lid-detenturi tad-drittijiet u lid-detentur tal-oġġetti/dikjarant għad-detenzjonijiet mibdija mill-uffiċċji doganali lokali).

Il-persunal tal-IPR CCD jista’ jvarja minn tim ta’ mhux aktar minn 20 membru għal persuna waħda.

Eżempji tar-rwoli ddedikati għal IPR CCD kbir ħafna, bi rwol pjuttost ċentralizzat, huma dawn li ġejjin:

-    Konsultazzjoni fil-fażi ta’ tħejjija tal-Leġiżlazzjoni tal-UE dwar id-DPI jew ta’ atti nazzjonali dwar id-DPI;

-    It-tfassil ta’ struzzjonijiet interni sabiex jiġu pprovduti spjegazzjonijiet dwar ir-Regolament (UE) Nru 608/2013 lill-uffiċċji doganali lokali jew dwar il-kunċetti marbuta mal-ksur tad-DPI;

-    It-trattament ta’ AFA - appoġġ lid-detenturi tad-drittijiet fit-tħejjija tal-AFA, l-adozzjoni ta’ deċiżjoni li tagħti jew tirrifjuta l-AFA u r-reġistrazzjoni tal-AFAs fil-bażi ta’ dejta kkonċernata;

-    Superviżjoni tal-bażi tad-dejta;

-    Fornitur tas-servizzi għad-detenturi tad-drittijiet u r-rappreżentanti ekonomiċi (l-IPR CCD għandu r-rwol ta’ intermedjarju bejn id-detenturi tad-drittijiet u l-uffiċċju doganali lokali, sabiex jiċċentralizza l-kuntatti mad-detenturi tad-drittijiet);

-    Appoġġ tal-uffiċċji doganali, b’azzjonijiet ta’ DPI (spjegazzjonijiet dwar il-kontenut tal-AFA, appoġġ fi proċedura ex-officio, appoġġ fir-rilaxx bikri tal-oġġetti permezz ta’ definizzjoni tal-garanzija li trid tiġi pprovduta mid-dikjarant);

-    Ksur: azzjonijiet ex-officio, identifikazzjoni tad-detenturi tad-drittijiet ikkonċernati;

-    Kontribuzzjoni għall-ġestjoni tar-riskji;

-    Taħriġ (fl-iskola post-sekondarja doganali nazzjonali - It-tnissil ta’ kontenut/materjal tat-tagħlim, Il-ħolqien ta’ kontenut tat-tagħlim, Taħriġ);

-    Attivitajiet ta’ relazzjonijiet pubbliċi:

•    Il-pubblikazzjoni tal-istatistika (fuq bażi annwali);

•    Mistoqsijiet mill-istampa, intervisti;

• Sensitizzazzjoni tal-konsumaturi u tal-ekonomija (diskussjonijiet madwar mejda, konferenzi stampa, lekċers, fuljetti);

•    Kooperazzjoni ma’ assoċjazzjonijiet nazzjonali u internazzjonali.

Madankollu, fil-maġġoranza tal-każijiet, l-IPR CCD primarjament ikollu r-rwol li jittratta l-AFA.

F’xi Stati Membri, l-ispeċjalisti tad-DPI huma stazzjonati fil-livell lokali (bl-uffiċċji ewlenin jiffaċċjaw każijiet ta’ DPI).

It-taħriġ dwar id-DPI huwa previst fl-Istati Membri kollha, kemm jekk matul il-fażi ta’ taħriġ inizjali (għall-uffiċjali doganali kollha) jew matul il-fażi ta’ taħriġ vokazzjonali (għall-esperti tad-DPI). F’xi każijiet jintuża l-modulu ta’ taħriġ fit-tagħlim elettroniku, li ġie żviluppat f’kooperazzjoni bejn il-Kummissjoni, l-Istati Membri u l-EUIPO. Hemm talba rikorrenti minn ħafna Stati Membri sabiex jirċievu għajnuna b’taħriġ dwar il-liġi sostantiva tal-PI.

5.2 Kooperazzjoni mal-partijiet ikkonċernati

5.2.1    Is-settur pubbliku

Il-kooperazzjoni bejn l-awtoritajiet doganali u awtoritajiet oħrajn li jintervjenu fl-infurzar tad-DPI mhijiex prevista mir-Regolament (UE) Nru 608/2013, iżda kienet evokata matul iż-żjarat ta’ appoġġ, billi hija element essenzjali għat-titjib tar-riżultati globali fuq l-infurzar tad-DPI.

Bħala medja, il-livell ta’ kooperazzjoni bejn l-awtoritajiet doganali u l-awtoritajiet l-oħrajn involuti fl-infurzar tad-DPI kien deskritt bħala medju sa baxx. Il-kompetenzi u r-rwoli differenti attribwiti lid-diversi awtoritajiet jistgħu jispjegaw is-sitwazzjoni.

Fl-Istati Membri li jirrapportaw kooperazzjoni tajba, din tiġi organizzata permezz ta’ ftehimiet installati fil-livell nazzjonali (permezz ta’ każijiet ta’ kooperazzjoni stabbiliti fil-livell politiku bejn ministeri differenti, li xi drabi jkunu jinkludu wkoll komponent operattiv).

Il-kooperazzjoni bejn l-awtoritajiet trid tiġi indirizzata aktar permezz ta’ avveniment ta’ bini tal-għarfien organizzat f’kooperazzjoni mal-EUIPO.

5.2.2    Settur privat

B’mod ġenerali, il-kooperazzjoni bejn l-awtoritajiet doganali u d-detenturi tad-drittijiet jew ir-rappreżentanti tagħhom hija deskritta bħala tajba, anki jekk f’xi każijiet ġew irrapportati ċerti diffikultajiet (ara t-taqsima dwar l-AFA hawn taħt).

L-Artikolu 30 tar-Regolament (UE) Nru 608/2013 jipprevedi li l-Istati Membri għandhom jiżguraw li d-detenturi tad-deċiżjonijiet jikkonformaw mal-obbligi stabbiliti fir-Regolament (UE) Nru 608/2013, fejn xieraq, billi jiġu stipulati dispożizzjonijiet li jistabbilixxu l-pieni. Sa issa, huma ftit (6) l-Istati Membri li adottaw (jew li diġà kellhom) leġiżlazzjoni nazzjonali dwar il-pieni kif definiti fl-Artikolu 30. Fil-każ ta’ inċidenti ma’ detenturi ta’ deċiżjoni, il-biċċa l-kbira tal-Istati Membri huma favur li l-ewwel ifittxu d-djalogu sabiex jinstabu soluzzjonijiet aċċettabbli.

5.3    Applikazzjoni għal Azzjoni (kontenut/kwalità tal-informazzjoni)

Is-sistema ta’ infurzar amministrattiv għad-dwana, imdaħħla fis-seħħ permezz tar-Regolament (UE) Nru 608/2013, tiffunzjona fuq il-bażi tat-talba li d-detenturi tad-drittijiet iridu jippreżentaw lill-awtoritajiet doganali. L-azzjoni doganali kollha tirriżulta minn dawn l-AFAs. Għalhekk, huwa essenzjali li l-informazzjoni li jkun fihom tkun ta’ kwalità suffiċjenti sabiex ikun jista’ jsir intervent doganali effiċjenti. Dan huwa minnu, speċjalment fil-każ tal-AFAs tal-Unjoni maħruġa minn Stat Membru wieħed li għandhom japplikaw fi Stati Membri oħrajn.

Il-biċċa l-kbira tal-awtoritajiet doganali tal-Istati Membri huma tal-fehma li, bħala medja, l-AFAs li jirċievu xorta ma jkollhomx l-informazzjoni ta’ kwalità neċessarja.

F’perċentwal baxx ta’ każijiet, dan iwassal għar-rifjut tad-deċiżjoni li tagħti l-AFA.

Fil-ħarifa tal-2016 ġie organizzat seminar ta’ Dwana 2020 bejn l-awtoritajiet doganali tal-Istat Membru dwar l-infurzar doganali tad-DPI / l-armonizzazzjoni fil-proċess tal-għoti u t-trattament tal-AFA / ir-responsabbiltà tal-amministrazzjoni doganali vis-à-vis l-AFA.

F’dik l-okkażjoni, kien irrakkomandat li AFA għandha dejjem tinkludi l-elementi obbligatorji li ġejjin:

-Informazzjoni dwar l-identifikazzjoni ta’ oġġetti oriġinali u foloz;

-Karatteristiċi tas-sigurtà;

-Informazzjoni dwar il-katina ta’ provvista/distribuzzjoni.

Kien irrakkomandat ukoll, sabiex jittejbu l-kwalità u l-kontenut tal-AFA, li tiġi żgurata promozzjoni aħjar tal-“Manwal għat-Tlestija tal-Applikazzjonijiet għal Azzjoni u Talbiet għal Estensjoni” 9 .

L-Istati Membri enfasizzaw id-diskrepanzi bejn uħud mill-kaxxi tal-formola u l-oqsma ta’ COPIS. Din il-kwistjoni sejra tiġi indirizzata mill-Kummissjoni f’rilaxx futur ta’ COPIS.

5.4    L-użu tal-proċedura

5.4.1    Proċedura standard (Artikolu 23)

Il-“proċedura standard” tintuża fl-Istati Membri kollha. F’ħafna mill-Istati Membri, il-proċedura tintuża mill-bidu sal-aħħar. Fi Stat Membru wieħed, il-proċedura ta’ detenzjoni tinbeda skont ir-Regolament (UE) Nru 608/2013, iżda mbagħad dejjem tissokta skont il-proċedura kriminali nazzjonali, li jingħad li tieħu post il-proċedura amministrattiva prevista mir-Regolament (UE) Nru 608/2013. L-Artikolu 1(6) tar-Regolament (UE) Nru 608/2013 jindika li din ma għandhiex taffettwa l-liġi nazzjonali jew tal-Unjoni dwar il-proprjetà intellettwali jew il-liġijiet tal-Istati Membri b’rabta mal-proċedimenti kriminali.

Xi Stati Membri jista’ jkollhom bżonn jaġġornaw il-mod ta’ kif huma jimplimentaw il-proċedura standard, sabiex jadattaw kompletament għad-dettalji tal-proċedura definita fir-Regolament (UE) Nru 608/2013.

5.4.2    Proċedura għal kunsinni żgħar (Artikolu 26)

L-Istati Membri kollha jużaw il-“proċedura għal kunsinni żgħar”, bl-eċċezzjoni ta’ żewġ Stati Membri, li jibbażaw l-azzjonijiet tagħhom fuq kunsinni żgħar dwar proċedimenti kriminali. Erba’ Stati Membri ma kellhom ebda sekwestru sa issa bil-“proċedura għal kunsinni żgħar”, anki jekk jużawha, fejn wieħed minnhom jispjega n-nuqqas ta’ riżultati bin-nuqqas ta’ riżorsi umani impenjati sabiex tiġi implimentata l-proċedura.

Ir-risposta ġenerali mill-awtoritajiet doganali għall-mistoqsija dwar għaliex xi detenturi tad-drittijiet ma jitolbux il-“proċedura għal kunsinni żgħar” kienet li, f’ċerti każijiet, fid-dawl tal-ispejjeż involuti u n-nuqqas ta’ informazzjoni (billi ma jiġux innotifikati bid-detenzjoni) iżommuhom lura milli jagħżlu l-proċedura.

5.4.3    Notifika lid-dikjarant jew lid-detentur tal-oġġetti (Artikoli 17 u 26)

B’mod ġenerali, kemm jekk skont il-“proċedura standard” jew skont il-“proċedura għal kunsinni żgħar”, meta tiġi ppreżentata dikjarazzjoni doganali, l-awtoritajiet doganali jinnotifikaw lid-dikjarant direttament fl-okkażjoni tal-kontroll imwettaq (billi d-dikjarant spiss ikun preżenti).

5.4.4    L-użu tal-“qbil meqjus” (Artikoli 23 u 26)

Il-qbil meqjus jintuża b’mod wiesa’ għall-proċedura standard (minn madwar 60 % tal-Istati Membri fil-każijiet kollha fejn id-dikjarant jew id-detentur tal-oġġetti ma jkunx ikkonferma l-qbil tiegħu mal-qerda tal-oġġetti u lanqas ikun innotifika l-oppożizzjoni tiegħu għaliha, kif ukoll minn madwar 30 % oħrajn f’ċerti każijiet biss). Għall-proċedura għal kunsinni żgħar, huwa jintuża minn madwar 57 % tal-Istati Membri fil-każijiet kollha fejn id-dikjarant jew id-detentur tal-oġġetti ma jkunx ikkonferma l-qbil tiegħu mal-qerda tal-oġġetti u lanqas ikun innotifika l-oppożizzjoni tiegħu għaliha. Żewġ Stati Membri għażlu li ma jużawhx kompletament, f’każ wieħed wara deċiżjoni politika u fil-każ l-ieħor minħabba li mhuwiex awtorizzat minn regola amministrattiva trasversali.

L-użu tal-qbil meqjus ma wassal għal ebda tħassib fl-Istati Membri li jużawh u huwa meqjus bħala essenzjali minn dawk li japplikawh għall-użu effettiv tal-proċedura għal kunsinni żgħar.

5.4.5    Spejjeż (Artikolu 29)

Madwar 85 % tal-Istati Membri jitolbu lid-detentur tad-deċiżjoni sabiex iħallas l-ispejjeż għall-qerda skont il-proċedura standard.

Madwar 46 % tal-Istati Membri jitolbu lid-detentur tad-deċiżjoni sabiex iħallas l-ispejjeż għall-qerda kemm skont il-proċedura standard kif ukoll skont il-proċedura għal kunsinni żgħar.

Żewġ Stati Membri jħallsu l-ispejjeż imġarrba mill-azzjonijiet tagħhom fuq il-ħażna u l-qerda ta’ oġġetti skont ir-Regolament (UE) Nru 608/2013 għall-proċedura standard.

Xi Stati Membri jaġixxu fuq bażi ad hoc fir-rigward tal-ispiża għall-qerda skont il-proċedura għal kunsinni żgħar.

5.4.6    Rilaxx bikri tal-oġġetti (Artikolu 24)

L-Artikolu 24 jipprevedi li, meta l-awtoritajiet doganali jkunu ġew innotifikati dwar il-bidu tal-proċeduri sabiex jiddeterminaw jekk kienx hemm ksur ta’ disinn, privattiva, mudell ta’ utilità, topografija ta’ prodott semikonduttur jew varjetà ta’ pjanta, id-dikjarant jew id-detentur tal-oġġetti jista’ jitlob lill-awtoritajiet doganali sabiex jirrilaxxaw l-oġġetti jew iwaqqfu d-detenzjoni tagħhom qabel it-tlestija ta’ dawk il-proċeduri, sakemm id-dikjarant jew id-detentur tal-oġġetti jkun ipprovda garanzija suffiċjenti għall-ħarsien tal-interess tad-detentur tad-deċiżjoni.

Ir-rilaxx bikri tal-oġġetti ma japplikax għat-trademarks, li jirrappreżentaw il-maġġoranza kbira tas-sekwestri doganali (fl-2014 u fl-2015, 94 % tad-detenzjonijiet tal-oġġetti kollha kienu jikkonċernaw trademarks). Din hija probabbilment ir-raġuni għala l-proċedura rari ntużat madwar l-Unjoni (f’okkażjoni waħda minn Stat Membru wieħed u fuq bażi aktar regolari minn Stat Membru ieħor).

5.5    L-użu ta’ COPIS

COPIS bdiet topera fl-1 ta’ Jannar 2014. Minn dakinhar ’il hawn, l-awtoritajiet doganali ħadu passi sabiex jadattawha. Saru modifiki fl-ewwel rilaxx tal-għodda sabiex jiffaċilitaw l-użu tagħha. Anki jekk l-Istati Membri jirrikonoxxu t-titjib li sar f’COPIS matul l-aħħar sentejn, xorta waħda għad hemm xi tħassib ġenerali dwar l-effiċjenza u l-użu faċli mill-utenti ta’ ċerti funzjonijiet tal-bażi tad-dejta. Barra minn hekk, bħalissa qegħdin jiġu żviluppati aktar modifiki f’COPIS sabiex jiżguraw li din tirrispondi aħjar għall-ħtiġijiet tal-awtoritajiet doganali.

Matul l-iżvilupp tal-proġett tal-bażi tad-dejta ta’ COPIS, saru talbiet sabiex COPIS tippermetti l-preżentazzjoni elettronika ta’ AFA. Billi l-Enforcement Data Base (EDB), bażi ta’ dejta żviluppata mill-Osservatorju Ewropew dwar il-ksur tad-DPI, fiha informazzjoni rilevanti għall-preżentazzjoni tal-AFAs, tali bażi ta’ dejta tqieset bħala sors addattat għat-twassil tal-informazzjoni meħtieġa dwar l-AFA f’format elettroniku. Minbarra l-kuntatti bejn il-Kummissjoni u l-Osservatorju Ewropew dwar il-ksur tad-DPI, ġiet żviluppata proposta sabiex tiġi implimentata l-funzjonalità tal-‘pre-AFA’ fi ħdan COPIS bil-għan li tiffaċilita l-ħidma kemm tal-applikanti kif ukoll tal-awtoritajiet doganali.

Bħalissa għaddejja ħidma fuq l-iżvilupp ta’ portal tal-kummerċjanti għall-preżentazzjoni ta’ AFA elettronika, li fil-futur għandu jwassal għal AFA mingħajr karti.

Il-konnessjoni operattiva bejn COPIS u EDB ilha fis-seħħ mill-1 ta’ Lulju 2015. Għall-applikant, din il-konnessjoni tnaqqas il-piż ta’ aktar minn preżentazzjoni waħda ta’ informazzjoni.

21 Stat Membru jużaw COPIS għall-ġestjoni tal-AFAs u l-ksur.

6 Stati Membri jużaw, għall-ġestjoni tal-AFAs u l-ksur, sistemi nazzjonali li huma awtomatikament marbuta ma’ COPIS.

Stat Membru wieħed juża, għall-ksur biss, sistema nazzjonali li hija awtomatikament marbuta ma’ COPIS, iżda juża COPIS għall-ġestjoni tal-AFAs.

Xi Stati Membri jagħtu aċċess sħiħ għal COPIS lill-uffiċjali doganali tagħhom; oħrajn jagħtu aċċess limitat għaliha, billi pjuttost jippromwovu l-użu tal-bażi tad-dejta nazzjonali tagħhom f’każ li tkun teżisti bażi ta’ dejta nazzjonali dwar id-DPI fi ħdan l-amministrazzjoni doganali. Dan jista’ jkun is-sors ta’ żbalji fit-trasferiment ta’ informazzjoni u ċertament iwassal għal ammont ta’ xogħol addizzjonali.

Ħafna Stati Membri jirrapportaw diffikultà sabiex jużaw l-informazzjoni mogħtija mid-detentur tad-deċiżjoni fl-AFA u inkluża f’COPIS għall-finijiet ta’ analiżi tar-riskji.

5.6    Implimentazzjoni mill-Kummissjoni

Kif previst fl-Artikolu 6, il-paragrafu 1 tar-Regolament (UE) Nru 608/2013, fl-4 ta’ Diċembru 2013 ġie adottat Regolament ta’ Implimentazzjoni tal-Kummissjoni 10 li jistabbilixxi l-formola prevista fir-Regolament (UE) Nru 608/2013. Huwa previst aġġornament fl-2017.

Sa issa, il-Kummissjoni għadha ma adottat ebda att ta’ implimentazzjoni kif imsemmi fl-Artikolu 22 tar-Regolament (UE) Nru 608/213.

5.7    Ir-riżultati fil-fruntieri tal-UE għall-2014 u l-2015

Il-pubblikazzjoni annwali tar-rapport dwar l-infurzar doganali tal-UE tad-drittijiet tal-proprjetà intellettwali 11 fil-fruntieri esterni tal-UE tipprovdi opportunità sabiex titkejjel l-iskala tal-azzjonijiet doganali għall-infurzar tad-DPI. Ir-rapport fih informazzjoni statistika dwar id-detenzjonijiet magħmula taħt proċeduri doganali u jinkludi dejta dwar id-deskrizzjoni, il-kwantitajiet u l-valur tal-oġġetti, il-provenjenza tagħhom, il-mezzi tat-trasport u t-tip ta’ DPI li seta’ nkiser.

L-istatistika hija stabbilita mill-Kummissjoni, abbażi tad-dejta trażmessa mill-amministrazzjonijiet tal-Istati Membri permezz ta’ COPIS.

5.7.1    Riżultati ġenerali

DETENZJONIJIET	2012	2013	2014	2015
Każijiet	90.473	86.854	95.194	81.098
Proċeduri	Mhux disponibbli	Mhux disponibbli	105.488	95.313
Artikoli	39.917.445	35.940.294	35.568.982	40.728.675
Valur bl-imnut domestiku	EUR 896 miljun	EUR 768 miljun	EUR 617-il miljun	EUR 642 miljun

Kull detenzjoni ssir referenza għaliha bħala każ li jista’ jkun fih oġġett wieħed jew aktar. Kull każ jista’ jkun fih oġġetti ta’ kategoriji ta’ prodotti differenti u minn detenturi tad-drittijiet differenti. F’COPIS, l-Istati Membri jirreġistraw kull każ b’informazzjoni skont il-kategorija ta’ oġġetti u skont id-detentur tad-dritt. Għal kull kategorija ta’ oġġetti u kull detentur ta’ dritt, sejra tinbeda proċedura ta’ detenzjoni, li tispjega għaliex hemm aktar proċeduri minn każijiet.

Skont ir-rapport tal-2015 dwar l-infurzar doganali tad-DPI mill-UE fil-fruntieri esterni tal-UE, il-volum ta’ oġġetti li jiksru d-DPI ssekwestrati fil-fruntiera żdied bi 15 % bejn l-2014 u l-2015.

5.8    Ir-riżultati dwar il-mediċina fi tranżitu

Il-Kummissjoni talbet lill-awtoritajiet doganali tal-Istati Membri sabiex jirrapportaw lill-Kummissjoni kwalunkwe inċidenti rilevanti li jikkonċernaw il-mediċini fi tranżitu fit-territorju doganali kollu tal-Unjoni li setgħu seħħew skont ir-Regolament (UE) Nru 608/2013.

27 Stat Membru rrapportaw li ma seħħ ebda inċident rilevanti fuq il-kontroll tal-mediċini fi tranżitu madwar it-territorju doganali tal-Unjoni.

Stat Membru wieħed irrapporta każ ta’ detenzjoni fuq il-mediċini fi tranżitu, li jikkonċernaw il-mediċini koperti minn privattiva, fejn l-informazzjoni dwar il-vjeġġi kienet tinkludi indikazzjonijiet ċari li l-oġġetti kienu destinati għas-suq intern u, għalhekk, l-oġġetti ġew detenuti. Finalment, dawn l-oġġetti nqerdu bi qbil miż-żewġ partijiet involuti.

5.9    Applikazzjoni għal Azzjonijiet u sekwestri li jirrigwardaw id-drittijiet ta’ proprjetà intellettwali koperti mir-Regolament (UE) Nru 608/2013

Id-drittijiet li għadhom kif ġew koperti mir-Regolament (UE) Nru 608/2013, jiġifieri l-mudelli ta’ utilità, l-ismijiet kummerċjali u t-topografiji ta’ semi-kondutturi, ma ġġenerawx numru kbir ta’ AFAs.

Fil-15 ta’ Settembru 2016, l-ismijiet kummerċjali kienu koperti minn 8 AFAs attivi u l-mudelli ta’ utilità kienu koperti minn 15-il AFA attiva. It-topografiji ta’ semikunduttur ma ġġeneraw ebda AFA.

Konsegwentement, l-għadd ta’ detenzjonijiet ta’ oġġetti li jiksru d-drittijiet li ġew miżjuda riċentament huwa pjuttost baxx.

Pereżempju, fi 18-il każ, l-oġġetti ġew detenuti abbażi ta’ suspett ta’ ksur ta’ isem kummerċjali, filwaqt li, f’żewġ każijiet, l-oġġetti ġew detenuti abbażi ta’ suspett ta’ ksur ta’ mudell ta’ utilità. Ma saret ebda detenzjoni għall-oġġetti fuq is-suspett ta’ ksur tat-topografija tas-semikundutturi.

Ma saret ebda detenzjoni għat-tagħmir ta’ ċirkomvenzjoni.

Fir-rigward tad-drittijiet li diġà kienu koperti skont ir-Regolament (KE) Nru 1383/2003, l-għadd ta’ AFAs li jkopru l-indikazzjonijiet ġeografiċi għadu baxx.

5.10    Riżultati tal-użu tal-“proċedura standard”

Fl-2014, 69.12 % tal-każijiet kollha ġew ittrattati skont il-“proċedura standard” u 30.88 % skont il-“proċedura għal kunsinni żgħar”.

Dan wassal għar-riżultati li ġejjin:

−    l-oġġetti nqerdu skont il-“proċedura standard” wara konferma mid-detentur tad-dritt u l-qbil tad-detentur tal-oġġetti (58.43 %);

−    l-oġġetti nqerdu skont il-“proċedura għal kunsinni żgħar” wara l-qbil tad-detenturi tal-oġġetti (27 %);

−    inbdiet kawża fil-qorti mid-detentur tad-dritt sabiex jiġi ddeterminat il-ksur (6.14 %);

−    l-oġġetti ġew rilaxxati minħabba li kienu jidhru li huma oġġetti oriġinali u mhux foloz (2.8 %);

−    l-oġġetti ġew rilaxxati minħabba li d-detentur tad-dritt ma rreaġixxiex għan-notifika mill-awtoritajiet doganali (5.5 %);

−    instabet soluzzjoni barra l-qorti bejn id-detentur tad-dritt u d-detentur tal-oġġetti, li warajha l-oġġetti ġew rilaxxati (0.11 %).

Fl-2015, 72.14% tal-każijiet kollha ġew ittrattati skont il-“proċedura standard” u 27.86% skont il-“proċedura għal kunsinni żgħar”. Dan wassal għar-riżultati li ġejjin:

−    l-oġġetti nqerdu skont il-“proċedura standard” wara konferma mid-detentur tad-dritt u l-qbil tad-detentur tal-oġġetti (59.93%)

−    l-oġġetti nqerdu skont il-“proċedura għal kunsinni żgħar” wara l-qbil tad-detenturi tal-oġġetti (22.05%);

−    inbdiet kawża fil-qorti mid-detentur tad-dritt sabiex jiġi ddeterminat il-ksur (9.21%);

−    l-oġġetti ġew rilaxxati minħabba li kienu jidhru li huma oġġetti oriġinali u mhux foloz (2.77%);

−    l-oġġetti ġew rilaxxati minħabba li d-detentur tad-dritt ma rreaġixxiex għan-notifika mill-awtoritajiet doganali (5.75%);

−    instabet soluzzjoni barra l-qorti bejn id-detentur tad-dritt u d-detentur tal-oġġetti, li warajha l-oġġetti ġew rilaxxati (0.29%).

5.11    L-użu tal-“proċedura għal kunsinni żgħar”

Fil-15 ta’ Settembru 2016, 48 % tal-AFAs nazzjonali kienu jinkludu talba sabiex tintuża l-proċedura għal kunsinni żgħar (726 minn 1502), filwaqt li 33 % tal-AFAs tal-Unjoni kienu jinkludu wkoll talba bħal din (393 minn 1184).

B’kollox, 41 % tal-AFAs jinkludu talba għall-użu tal-kunsinna żgħira.

Ir-rappreżentanti mis-settur privat spjegaw li għal ċertu tip ta’ drittijiet (li għalihom il-ksur huwa kumpless wisq sabiex jiġi vvalutat u li għalihom huma jqisu l-kompetenzi tad-detentur tad-dritt bħala essenzjali), l-użu tal-proċedura għal kunsinni żgħar ma jitqiesx bħala xieraq u, għalhekk, din ma tintgħażilx.

Fl-2015, fi ftit aktar minn 22 % tad-detenzjonijiet mibdija, l-oġġetti nqerdu skont il-proċedura għal kunsinni żgħar. Fl-2014, il-qerda skont l-istess proċedura kienet tirrappreżenta 27 % tar-riżultat tal-każijiet ta’ detenzjoni kollha.

Għad-dettalji kompleti tar-rapporti tal-2014 u tal-2015, ara s-sit web tat-TAXUD:

http://ec.europa.eu/taxation_customs/sites/taxation/files/resources/documents/customs/customs_controls/counterfeit_piracy/statistics/2015_ipr_statistics.pdf

https://ec.europa.eu/taxation_customs/sites/taxation/files/2016_ipr_statistics.pdf

   

F’dan l-istadju, il-Kummissjoni tqis li l-implimentazzjoni tar-Regolament Nru 608/2013 qiegħda tiffunzjona b’mod sodisfaċenti. Hija tipprevedi firxa wiesgħa ta’ protezzjoni u proċeduri li qegħdin jintużaw b’mod korrett fit-28 Stat Membru.

Ċertament hemm il-ħtieġa li jissaħħu l-isforzi li saru f’ċerti oqsma, bħal:

-il-kwalità tal-informazzjoni li tinsab fl-Applikazzjonijiet għal Azzjoni, notevolment l-AFA tal-Unjoni;

-l-użu tal-proċedura standard f’koerenza mad-dettalji tal-proċedura definita fir-Regolament (UE) Nru 608/2013.

Dan sejjer jiġi diskuss aktar fil-kuntest tal-azzjonijiet previsti mill-Pjan ta’ Azzjoni Doganali tal-UE għall-ġlieda kontra l-ksur tad-DPI għas-snin 2013/2017 u fl-eżerċizzju ta’ segwitu għas-Seminar ta’ Dwana 2020 dwar l-Applikazzjoni għal Azzjonijiet.

Il-funzjonament u l-immaniġġjar ta’ kunsinni żgħar ċertament għadha sfida, hekk kif il-bejgħ fuq l-internet qiegħed jiżdied b’mod kostanti, b’mod partikolari l-bejgħ ta’ prodotti li jiksru d-DPI. Il-ħidma fuq din il-kwistjoni sejra tissokta fil-grupp ta’ ħidma diġà eżistenti fuq kunsinni żgħar, li l-attivitajiet tiegħu sejrin jitkomplew fl-2017.

It-tħassib imqajjem mis-settur privat sejjer jiġi diskuss ukoll mal-awtoritajiet doganali tal-Istati Membru bil-għan li jivvalutaw jekk dan huwiex stabbilit sewwa u jekk jistgħux jiġu previsti soluzzjonijiet għal dan it-tħassib.

Il-Kummissjoni tikkonkludi li, għalissa, ma hemm ebda ġustifikazzjoni sabiex hija tirrevedi kwalunkwe dispożizzjonijiet tar-Regolament (UE) Nru 608/2013.

Il-Pjan ta’ Azzjoni Doganali tal-UE għall-ġlieda kontra l-ksur tad-DPI għas-snin 2013-2017 sejjer jiġi vvalutat aktar tard din is-sena. Jista’ jkun opportun, sabiex jiġu indirizzati aħjar l-isfidi li qiegħda tiffaċċja l-UE bil-ksur tad-DPI, li jiġi kkunsidrat pjan ta’ azzjoni globali futur dwar l-infurzar tad-DPI mill-UE, li jkun jinkludi mhux biss azzjonijiet doganali, iżda wkoll l-azzjonijiet li fil-preżent huma koperti mill-Komunikazzjoni ta’ Lulju 2014 “Lejn kunsens imġedded dwar l-infurzar tad-Drittijiet ta’ Proprjetà Intellettwali: Pjan ta’ Azzjoni tal-UE”, 12 kif ukoll l-attivitajiet żviluppati mill-Osservatorju Ewropew dwar il-Ksur tad-Drittijiet ta’ Proprjetà Intellettwali.

Anness 1

In-numru ta’ Applikazzjonijiet għal Azzjonijiet (AFAs) skont it-tip ta’ drittijiet – Is-sitwazzjoni fil-15 ta’ Settembru 2016

	Attivi	Skaduti	Imħassra	Totali
Indikazzjonijiet ġeografiċi
Għal xarbiet aromatizzati bbażati fuq prodotti tal-inbid	0	0	0	0
Għal prodotti elenkati fil-ftehimiet ma’ pajjiżi terzi	1	0	0	1
Għal prodotti agrikoli u oġġetti tal-ikel	5	0	0	5
Għal xorb spirituż	2	1	0	3
Għall-inbid	3	2	0	5
GI nazzjonali għal prodotti oħrajn	0	0	0	0
Disinn
Disinn komunitarju rreġistrat	627	398	58	1083
Disinn komunitarju mhux irreġistrat	11	11	0	22
Disinn internazzjonali rreġistrat	109	73	4	186
Disinn nazzjonali	128	63	2	193
TM
Trademark tal-UE	2326	1596	118	4040
Trademark internazzjonali	1053	832	55	1940
Trademark nazzjonali	1220	771	20	2011
Drittijiet tal-awtur u drittijiet relatati	206	103	7	316
Privattiva
Privattiva nazzjonali	115	72	6	193
Privattiva tal-Unjoni	110	75	6	191
Mudell ta’ utilità	15	10	0	25
Ċertifikat supplimentari għall-mediċini	23	17	0	40
Ċertifikat supplimentari għal prodott għall-protezzjoni tal-pjanti	4	12	1	17
Dritt ta’ varjetajiet ta’ pjanti nazzjonali	8	8	2	18
Dritt ta’ varjetajiet ta’ pjanti fil-Komunità	1	1	0	2
Isem kummerċjali	8	10	0	18
Topografija ta’ prodott semikunduttur	0	0	0	0

Anness 2

L-għadd ta’ Applikazzjonijiet għal Azzjonijiet (AFAs) li fihom talba għall-użu tal-“proċedura għal kunsinni żgħar” - Is-sitwazzjoni fil-15 ta’ Settembru 2016

	Attivi	Skaduti	Imħassra	Totali
In-numru ta’ AFAs:
NAFA	1502	2395	82	3979
UAFA	1184	406	103	1693
Totali	2686	2801	185	5672
AFAs bi proċedura għal kunsinni żgħar:
NAFA	726	510	30	1266
UAFA	393	152	15	560
Totali	1119	662	45	1826
% ta’ NAFAs b’SC tat-total:	48%	21%
% ta’ UAFAs b’SC tat-total:	33%	37%
% ta’ AFAs b’SC tat-total:	41%	24%

(1)

Kummerċ ta’ Oġġetti Ffalsifikati u Piratati: L-Immappjar tal-Impatt Ekonomiku, OECD/EUIPO (2016).

https://euipo.europa.eu/tunnel-web/secure/webdav/guest/document_library/observatory/documents/Mapping_the_Economic_Impact_study/Mapping_the_Economic_Impact_en.pdf .

(2)

Ir-Regolament (UE) Nru 608/2013 tal-Parlament Ewropew u tal-Kunsill tat-12 ta’ Ġunju 2013 dwar l-infurzar doganali tad-drittijiet ta’ proprjetà intellettwali u li jħassar ir-Regolament tal-Kunsill (KE) Nru 1383/2003 (ĠU L 181, 12.6.2013, p. 15-33).

(3)

Riżoluzzjoni tal-Kunsill li tistabbilixxi l-Pjan ta’ Azzjoni Doganali tal-UE għall-ġlieda kontra d-drittijiet ta’ proprjetà intellettwali (DPI) (ĠU C 80, 19.3.2013, p. 1).

(4)

L-azzjoni 1.3.2 mill-Pjan ta’ Azzjoni Doganali tal-UE għall-ġlieda kontra l-ksur tad-DPI għandha l-għan li tistabbilixxi djalogu bejn l-awtoritajiet doganali u d-detenturi tad-drittijiet u l-partijiet ikkonċernati dwar l-infurzar doganali tad-DPI.

(5)

Ir-Regolament tal-Kunsill (KEE) Nru 3842/86 tal-1 ta’ Diċembru 1986 li jistabbilixxi miżuri li jipprojbixxu r-rilaxx ta’ merkanzija ffalsifikata għal ċirkolazzjoni libera (ĠU L 357, it-18 ta’ Diċembru 1986, p.1.).

(6)

Ir-Regolament tal-Kunsill (KE) Nru 3295/94 tat-22 ta’ Diċembru 1994 li jistabbilixxi miżuri li jipprojbixxu r-rilaxx għal ċirkolazzjoni libera, l-esportazzjoni, l-esportazzjoni mill-ġdid jew dħul għal proċedura sospensiva ta’ oġġetti ffalsifikati jew pirati (ĠU L 341, 30.12.1994, p. 8), ir-Regolament tal-Kunsill (KE) Nru 1383/2003 tat-22 ta’ Lulju 2003 li jikkonċerna azzjoni doganali kontra merkanzija suspettati li jiksru ċerti drittijiet ta’ proprjetà intellettwali u l-miżuri li għandhom jittieħdu kontra merkanzija li jinsabu li jkunu kisru dawk id-drittijiet (ĠU L 196, 2.8.2003, p. 7) u r-Regolament (UE) Nru 608/2013.

(7)

Ir-Regolament ta’ Implimentazzjoni tal-Kummissjoni (UE) Nru 1352/2013 tal-4 ta’ Diċembru 2013 li jistabbilixxi l-formoli previsti fir-Regolament (UE) Nru 608/2013 tal-Parlament Ewropew u tal-Kunsill dwar l-infurzar doganali tad-drittijiet tal-proprjetà intellettwali (ĠU L, 18.12.2016, p. 10).

(8)

  http://ec.europa.eu/taxation_customs/business/customs-controls/counterfeit-piracy-other-ipr-violations/ipr-infringements-facts-figures_en

(9)

 Ara  http://ec.europa.eu/taxation_customs/business/customs-controls/counterfeit-piracy-other-ipr-violations/defend-your-rights_en

(10)

Ir-Regolament ta’ Implimentazzjoni tal-Kummissjoni (UE) Nru 1352/2013 tal-4 ta’ Diċembru 2013 li jistabbilixxi l-formoli previsti fir-Regolament (UE) Nru 608/2013 tal-Parlament Ewropew u tal-Kunsill dwar l-infurzar doganali tad-drittijiet tal-proprjetà intellettwali (ĠU L 341, 18.12.2013, p. 10-31).

(11)

  http://ec.europa.eu/taxation_customs/business/customs-controls/counterfeit-piracy-other-ipr-violations/ipr-infringements-facts-figures_en

(12)

COM (2014) 392: Komunikazzjoni mill-Kummissjoni lill-Parlament Ewropew, lill-Kunsill u lill-Kumitat Ekonomiku u Soċjali Ewropew: Lejn kunsens imġedded dwar l-infurzar tad-Drittijiet tal-Proprjetà Intellettwali: Pjan ta’ Azzjoni tal-UE