IL-KUMMISSJONI EWROPEA
Brussell, 26.1.2017
COM(2017) 46 final
ABBOZZ TA' BAĠIT EMENDATORJU Nru 1
GĠALL-BAĠIT ĠENERALI 2017
Li jakkumpanja l-proposta biex jiġi mobilizzat il-Fond ta' Solidarjetà tal-Unjoni Ewropea biex jipprovdi assistenza lir-Renju Unit, Ċipru u l-Portugal
Wara li kkunsidraw:
–it-Trattat dwar il-Funzjonament tal-Unjoni Ewropea, u b'mod partikolari l-Artikolu 314 tiegħu, flimkien mat-Trattat li jistabbilixxi l-Komunità Ewropea tal-Enerġija Atomika, u b'mod partikolari l-Artikolu 106a tiegħu,
–Ir-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni 1 , u b'mod partikolari l-Artikolu 41 tiegħu,
–il-baġit ġenerali tal-Unjoni Ewropea għas-sena finanzjarja 2017, kif adottat fl-1 ta' Diċembru 2016 2 ,
Il-Kummissjoni Ewropea b'dan tippreżenta l-Abbozz ta' baġit emendatorju Nru 1 tal-baġit tal-2017 lill-Parlament Ewropew u lill-Kunsill.
BIDLIET FID-DIKJARAZZJONI TAD-DĦUL U N-NEFQA TAQSIMA B'TAQSIMA
Il-bidliet fir-rapport tad-dħul u n-nefqa skont it-taqsima huma disponibbli fil-EUR-Lex ( http://eur-lex.europa.eu/budget/www/index-mt.htm ). Verżjoni bl-Ingliż tal-bidliet għal din id-dikjarazzjoni hija mehmuża għall-informazzjoni bħala anness baġitarju.
WERREJ
1. INTRODUZZJONI
2. Il-mobilizzazzjoni tal-Fond ta' Solidarjetà tal-Unjoni Ewropea
2.1Ir-Renju Unit — Għargħar fl-2016
2.2Ċipru — Nixfa u nirien fl-2016
2.3Il-Portugall - Nirien fil-Madeira fl-2016
3. Finanzjament
4. Konklużjoni
1.INTRODUZZJONI
L-Abbozz ta' Baġit Emendatorju (ABE) Nru 1 għas-sena 2017 ikopri l-mobilizzazzjoni tal-Fond ta' Solidarjetà tal-Unjoni Ewropea (FSUE) għall-ammont ta' EUR 71 524 810 f'approprjazzjonijiet ta' impenn u ta' pagament. Il-mobilizzazzjoni hija marbuta ma’ għargħar fir-Renju Unit, nixfa u nirien f’Ċipru u nirien fil-Portugall.
2.Il-mobilizzazzjoni tal-Fond ta' Solidarjetà tal-Unjoni Ewropea
F’Settembru 2016 il-Kummissjoni rċeviet l-applikazzjoni ffinalizzata għal assistenza finanzjarja mill-FSUE marbuta ma’ għargħar fir-Renju Unit, wara li inizjalment ġiet ippreżentata l-applikazzjoni mhux kompluta li waslet fi Frar 2016. Matul ix-xahar ta’ Settembru 2016, il-Kummissjoni rċeviet ukoll żewġ applikazzjonijiet għal għajnuna finanzjarja mill-FSUE dwar nixfa u nirien f’Ċipru kif ukoll nirien fil-Portugall.
Is-servizzi tal-Kummissjoni wettqu investigazzjoni bir-reqqa tal-applikazzjonijiet skont ir-Regolament tal-Kunsill (KE) Nru 2012/2002 3 li jistabbilixxi l-FSUE (minn hawn 'il quddiem "ir-Regolament"), u b'mod partikolari skont l-Artikoli 2, 3 u 4 tiegħu.
L-iktar elementi importanti tal-valutazzjonijiet jinsabu fil-qosor hawn taħt.
2.1Ir-Renju Unit — Għargħar fl-2016
(1)Matul Diċembru 2015 u Jannar 2016, xita u rjieħ qawwija wasslu għal għargħar u ħsara infrastrutturali li kkawżat ħerba fl-infrastrutturi pubbliċi u privati, fi djar privati u fl-agrikoltura. Total ta’ 11-il reġjun ġew affettwati 4 fir-Renju Unit. L-avvenimenti inkludew għadd sinifikanti ta’ maltempati bħall-maltempata Desmond fil-5 u s-6 ta’ Diċembru u l-maltempata Eva fl-24 ta’ Diċembru.
(2)L-għargħar huma ta' oriġini naturali u għalhekk jaqgħu taħt il-qasam ewlieni ta' applikazzjoni tal-FSUE.
(3)L-applikazzjoni mir-Renju Unit waslet fis-26 ta' Frar 2016, fil-limitu preskritt ta' 12-il ġimgħa wara li kienu rreġistrati l-ewwel ħsarat fil-5 ta' Diċembru 2016. Fl-applikazzjoni tagħhom l-awtoritajiet tar-Renju Unit enfasizzaw li l-valutazzjoni tal-ħsara ma kinitx kompluta u li ċ-ċifri rilevanti kienu biss proviżorji. L-aħħar fajl ta’ applikazzjoni tlesta biss fit-22 ta’ Settembru 2016 wara li l-Kummissjoni kitbet formalment lill-awtoritajiet tar-Renju Unit u stabbilixxiet skadenza sal-aħħar ta’ Settembru 2016.
(4)Ir-Renju Unit ma talabx ħlas bil-quddiem.
(5)L-awtoritajiet tar-Renju Unit fil-bidu stmaw li l-ħsara diretta totali kkawżata mid-diżastru kienet ta’ EUR 2 300 miljun. Fl-applikazzjoni finali tagħhom tat-22 ta’ Settembru, din iċ-ċifra ġiet aġġornata għal EUR 2 412,042 miljun. Dan l-ammont jirrappreżenta 73 % tal-livell limitu ta’ “diżastru maġġuri” għall-mobilizzazzjoni tal-FSUE ta’ EUR 3 312,242 miljun applikabbli għar-Renju Unit fl-2016 (jiġifieri EUR 3 biljuni bil-prezzijiet tal-2011).
(6)Peress li l-ħsara diretta totali tibqa’ taħt il-livell limitu għal diżastru maġġuri għall-attivazzjoni tal-Fond ta’ Solidarjetà, l-applikazzjoni kienet eżaminata fuq il-bażi tal-kriterji tad-“diżastri reġjonali” kif stabbilit fl-Artikolu 2(3) tar-Regolament li jiddefinixxi l-kunċett ta’ “diżastru reġjonali” bħala kwalunkwe diżastru naturali li jirriżulta, f’reġjun fil-livell NUTS 2 ta’ Stat eliġibbli, fi ħsara diretta li taqbeż il-1,5 % tal-PDG ta’ dak ir-reġjun. L-applikazzjoni tar-Renju Unit hija relatata ma’ diversi reġjuni uniċi ta’ livell NUTS 2 (irreferi għan-nota ta’ qiegħ il-paġna hawn fuq). Il-ħsara diretta rrappurtata ta’ EUR 2 412,042 miljun tirrappreżenta 5,77 % tal-PDG medju ponderat tar-reġjuni milquta mid-diżastru (EUR 41 784 miljun ibbażat fuq id-dejta tal-2014) u taqbeż il-livell limitu ta’ 1,5 % tal-Artikolu 2(3) tar-Regolament. L-applikazzjoni tar-Renju Unit għalhekk hija eliġibbli għal kontribuzzjoni mill-Fond ta’ Solidarjetà.
(7)Fir-rigward tal-impatt u l-konsegwenzi tad-diżastru, 16 143 dar ġew mgħargħra u madwar 3 600 familja kellhom jitpoġġew f’akkomodazzjoni alternattiva. Ir-Renju Unit irrapporta wkoll li 4 985 negozju kienu mgħargħa. Matul il-perjodu 1 700 persunal militari ġew ingaġġati biex jappoġġaw l-isforzi ta’ salvataġġ u rkupru, b’madwar 700 fuq il-post fi kwalunkwe ħin. B’antiċipazzjoni ta’ għargħar, nħarġu twissijiet għall-għargħar u, fejn kien meħtieġ in-nies ġew evakwati minn djarhom. Fejn kien possibbli, inżammu id-difiżi eżistenti kontra l-għargħar u twaqqfu iktar minn 5 km ta’ difiżi għall-għargħar temporanji. 43 pompa addizzjonali ġew skjerati minn qabel fl-inħawi milquta u ġew ikklerjati l-ostakoli fil-mogħdijiet tal-ilma sabiex tiġi minimizzata l-ħsara. Id-diżastru ħalla impatt ċar fuq l-industrija tat-turiżmu (eż. kanċellazzjonijiet ta’ prenotazzjonijiet fil-lukandi, inqas turisti) b’35 % tan-negozji tat-turiżmu li jinsabu f’żoni milqutin minn għargħar fit-Tramuntana tal-Ingilterra biss. L-irziezet ukoll ġarrbu telf ta’ produzzjoni. L-impatt jinkludi dannu jew telf ta’ prodotti kkultivati stabbiliti u maħżuna, minħabba li l-art ma kinitx aċċessibbli, il-kost taċ-ċaqliq tal-bhejjem u l-operazzjoni ta’ tindif. L-aktar impatt sinifikanti madankollu laqat lill-infrastruttura tat-trasport. Pontijiet essenzjali ġarrbu ħsarat jew inqerdu għalkollox. Pereżempju, ħsara fil-Vjadott Lamington ħdejn Lockerbie ħalliet il-Kosta tal-Punent Mainline – konnessjoni ferrovjarja maġġuri bejn l-Ingilterra u l-Iskozja — mingħajr servizz.
(8)Il-kost tal-operazzjonijiet essenzjali ta' emerġenza u rkupru eliġibbli skont l-Artikolu 3(2) tar-Regolament, ġie stmat mill-awtoritajiet tar-Renju Unit li jammonta għal EUR 408,232 miljun, u ġie maqsuma skont it-tip ta' operazzjoni. L-akbar sehem ta’ dawn l-operazzjonijiet (iktar minn EUR 338 miljun) jikkonċernaw is-settur tat-trasport. It-tieni l-akbar sehem jikkonċerna l-iżgurar ta’ infrastruttura preventiva li jammonta għal aktar minn EUR 32 miljun.
(9)Ir-reġjuni milquta huma "r-reġjun anqas żviluppati", “reġjuni ta’ tranżitu” u “reġjuni aktar żviluppati” taħt il-Fondi Strutturali u ta' Investiment Ewropej (FSIE) (2014-2020). L-awtoritajiet tar-Renju Unit iddikjaraw li l-allokazzjoni tal-Fond Agrikolu Ewropew għall-Iżvilupp Rurali qed tintuża biex jiġu appoġġati l-bdiewa fl-irkupru tagħhom fuq il-bażi ta’ applikazzjoni u ttrasferew EUR 12,5 miljun għar-restawr tal-potenzjal tal-produzzjoni agrikola li saritilha ħsara b’diżastri naturali u b'avvenimenti katastrofiċi u l-introduzzjoni ta’ azzjonijiet ta’ prevenzjoni xierqa.
(10)Fir-rigward tal-implimentazzjoni tal-leġiżlazzjoni tal-Unjoni dwar il-prevenzjoni u l-ġestjoni tar-riskji tad-diżastri bħalissa ma hemm l-ebda proċedura ta’ ksur għaddejja. Ir-Regolamenti tar-Riskju tal-Għargħar (2009) jimplimentaw id-Direttiva tal-UE dwar l-Għargħar dwar il-valutazzjoni u l-immaniġġjar tar-riskji tal-għargħar. Id-Direttiva tipprovdi qafas ta’ livell għoli biex jitnaqqsu r-riskji tal-ħsara mill-għargħar fuq livell komunitarju u tippermetti lill-Istati Membri li jużaw il-valutazzjonijiet u l-pjanijiet tar-riskju eżistenti tal-għargħar sabiex jissodisfaw ir-rekwiżiti tad-Direttiva. L-Aġenzija għall-Ambjent u Awtoritajiet oħra tal-Ġestjoni tar-Riskju użaw mapep u pjanijiet komprensivi eżistenti għar-riskju tal-għargħar, fejn dan kien possibbli. Dawn se jkunu ssupplimentati bil-Pjanijiet ta' Ġestjoni tar-Riskji tal-Għargħar, li għall-ewwel darba jiġbru l-miżuri biex jindirizzaw is-sorsi kollha ta’ għargħar lokali fl-Ingilterra.
(11)Fid-data tas-sottomissjoni tal-applikazzjoni r-Renju Unit ma kienx suġġett għal proċedimenti ta’ ksur dwar il-leġiżlazzjoni tal-Unjoni relatata man-natura tad-diżastru.
(12)L-awtoritajiet tar-Renju Unit ikkonfermaw li l-ebda kopertura tal-assigurazzjoni ma tagħmel tajjeb għall-kostijiet eliġibbli.
2.2Ċipru — Nixfa u nirien fl-2016
(1)Matul il-perjodu minn Ottubru 2015 sa Ġunju 2016, il-gżira ta’ Ċipru sofriet minn preċipitazzjoni baxxa ħafna flimkien ma’ temperaturi għoljin ħafna, li wasslu għall-akkumulu ta' nixfa severa li qatlet prodotti kkultivat importanti, ikkawżat nirien fil-foresti u fil-veġetazzjoni, skarsezza ta’ ilma għall-agrikoltura u għall-popolazzjoni, u li wasslet għall-problemi fis-sistemi tal-fornitura tal-ilma. F’Ġunju 2016, is-sitwazzjoni laħqet il-quċċata f’żewġ nirien kbar li ħeġġew fit-18 u d-19 ta’ Ġunju, u ħarqu żona ta’ aktar minn 2600 ettaru ta’ foresti tal-istat.
(2)In-nixfa u n-nirien huma ta' oriġini naturali u għalhekk jaqgħu taħt il-qasam ewlieni ta' applikazzjoni tal-FSUE.
(3)L-applikazzjoni ta’ Ċipru waslet fil-5 ta’ Settembru 2016, fil-limitu preskritt ta' 12-il ġimgħa wara li kienu rreġistrati l-ewwel ħsarat fl-14 ta' Ġunju 2016, meta ttieħdu l-ewwel miżuri uffiċjali kontra n-nixfa. Wara talba mill-Kummissjoni, ġiet ipprovduta informazzjoni addizzjonali li tagħti assigurazzjoni dwar il-korrettezza ta’ din id-data fil-21 ta’ Ottubru 2016. Għalhekk, l-applikazzjoni waslet fil-limitu preskritt stabbilit mir-Regolament.
(4)Fl-applikazzjoni tiegħu Ċipru talab ħlas bil-quddiem kif stabbiliti fl-Artikolu 4a ta’ dan ir-Regolament. Fis-17 ta’ Novembru 2016, il-Kummissjoni adottat id-Deċiżjoni ta’ Implimentazzjoni C(2016) 7572 fejn allokat 10 % ta’ ħlas bil-quddiem li jammonta għal EUR 729 876 fuq il-kontribuzzjoni finanzjarja antiċipata mill-Fond u mbagħad ħalsitha kollha kemm hi lil Ċipru.
(5)L-awtoritajiet Ċiprijotti stmaw li l-ħsara diretta totali kkawżata mid-diżastru kienet ta’ EUR 180,803 miljun. Dan l-ammont jirrappreżenta 1,78 % tal-ING ta’ Ċipru u jaqbeż il-livell limitu minmu ta’ ‘diżastru maġġuri’ biex jiġi mmobilizzat il-Fond ta' Solidarjetà ta' EUR 100,412 miljun applikabbli għal Ċipru fl-2016 (jiġifieri 0,6 % tal-ING fuq il-bażi tad-dejta tal-2014). Peress li l-ħsara diretta totali stmata taqbeż il-livell limitu ta’ ‘diżastru maġġuri’, id-diżastru jikkwalifika bħala "diżastru naturali maġġuri".
(6)Fir-rigward tal-impatt u l-konsegwenzi tad-diżastru, l-iskarsezza tal-ilma kkawżat ħsarat kbar fl-agrikoltura, fid-djar u fl-ambjent. Affettwat total ta’ 374 raħal. Partijiet kbar tad-distretti ta’ Nikosija, Larnaca u Famagusta ġarrbu ħsara ta’ 100 % fil-prodotti kultivati misqija mix-xita (bħalma huma x-xgħir, il-qamħ u prodotti oħrajn mhux misqija tal-għalf). It-tifrigħ tal-ilma fir-riżervi tal-ilma naqas b’mod sever, speċjalment id-Diga “Kouris”, is-sors ewlieni tal-ilma għall-impjanti tat-trattament tal-ilma u l-irrigazzjoni, kien nieqes mill-ilma. Abbażi tad-dejta storika mill-1901 ’l hawn, ix-xita bejn Ottubru 2015 u Ġunju 2016 kienet is-6a l-aktar baxxa għal dawn l-aħħar 104 snin u r-4a l-aktar baxxa għal dawn l-aħħar 50 sena. Minbarra l-impatt tan-nixfa msemmi hawn fuq, f’nofs Ġunju 2016, ġiet mewġa ta’ sħana fuq Ċipru li tat bidu għal żewġ nirien kbar fil-foresti. L-ewwel nar f’“Argaka” ħaraq żona ta’ 763 ettaru tal-foresta tal-istat Pafos. It-tieni nar f’“Solea” ħaraq żona ta’ 1897 ettaru li fil-biċċa l-kbira tagħhom huma parti milll-foresta tal-istat “Adelfoi”.
(7)Il-kost tal-operazzjonijiet essenzjali ta' emerġenza u irkupru eliġibbli skont l-Artikolu 3(2) tar-Regolament, ġie stmat mill-awtoritajiet Ċiprijotti li jammonta għal EUR 49 miljun, u ġie maqsum skont it-tip ta' operazzjoni. L-akbar sehem ta’ dawn l-operazzjonijiet (aktar minn EUR 46,082 miljun) jikkonċerna l-kost tal-intervent tas-servizzi tal-emerġenza kontra n-nirien kbar. It-tieni l-akbar sehem jikkonċerna r-restawr immedjat ta’ żoni naturali affettwati biex jiġu evitati effetti immedjati mill-erożjoni tal-ħamrija li jammontaw għal EUR 2,484 miljun.
(8)Ir-reġjun milqut huwa "reġjun żviluppat aktar" taħt il-Fondi Strutturali u ta' Investiment Ewropej (FSIE) (2014-2020). L-awtoritajiet Ċiprijotti ma indikawx lill-Kummissjoni l-ħsieb tagħhom li jallokaw fondi mill-programmi ta' FSIE għall-miżuri tal-irkupru.
(9)Fir-rigward tal-implimentazzjoni tal-leġiżlazzjoni tal-Unjoni dwar il-prevenzjoni u l-ġestjoni tar-riskji tad-diżastri bħalissa ma hemm l-ebda proċedura ta’ ksur għaddejja. Il-leġiżlazzjoni rilevanti tal-Unjoni dwar in-nirien fil-foresti hi d-Deċiżjoni 1313/2013/UE tal-Parlament Ewropew u l-Kunsill tas-17 ta’ Diċembru 2013 dwar Mekkaniżmu tal-Unjoni għall-Protezzjoni Ċivili, b'mod speċjali d-dispożizzjonijiet fl-Artikolu 6 (Ġestjoni tar-Riskju) huma rilevanti. Sabiex tikkonforma mad-dritt tal-Unjoni, ġiet żviluppata Mappa tar-Riskju ta' Nirien għal Ċipru taħt il-Ftehim ta’ Kollaborazzjoni Nru 21283-2003-10 SOSC ISP CY bejn iċ-Ċentru Konġunt tar-Riċerka (JRC) tal-Kummissjoni Ewropea u d-Dipartiment tal-Foresti tar-Repubblika ta’ Ċipru. Il-ġestjoni tar-riskju ta’ diżastri ta’ nixfa fl-agrikoltura skont ir-Regolament (UE) Nru 1305/2013 tal-Parlament Ewropew u tal-Kunsill tipprevedi l-istabbiliment u l-mobilizzazzjoni ta’ għodda għall-istabilizzazzjoni tal-introjtu taħt il-Politika Agrikola Komuni. Ċipru ddikjara li ma għandux l-intenzjoni li juża l-għodda ta’ stabbilizzazzjoni.
(10)Fid-data tas-sottomissjoni tal-applikazzjoni Ċipru ma kienx suġġett għal proċedimenti ta’ ksur tal-leġiżlazzjoni tal-Unjoni relatat man-natura tad-diżastru.
(11)L-awtoritajiet Ċiprijotti kkonfermaw li l-ebda kopertura tal-assigurazzjoni ma tagħmel tajjeb għall-kostijiet eliġibbli.
2.3Il-Portugall - Nirien fil-Madeira fl-2016
(1)Matul il-perjodu bejn it-8 u t-13 ta’ Awwissu, il-gżira Portugiża ta’ Madeira intlaqtet minn nirien kbar, li ħarqu żona ta’ 6000 ettaru. Dawn in-nirien kienu kkawżati minn temperaturi għoljin, rjieħ qawwija ħafna u b’umdità baxxa estrema. Dawn wasslu biex tinqered l-infrastruttura pubblika essenzjali, tal-binjiet pubbliċi, tad-djar privati, tan-negozji u tal-agrikoltura.
(2)In-nirien huma ta' oriġini naturali u għalhekk jaqgħu taħt il-qasam ewlieni ta' applikazzjoni tal-FSUE.
(3)L-applikazzjoni tal-Portugal waslet fil-21 ta’ Settembru 2016, li kien fil-limitu preskritt ta' 12-il ġimgħa wara li kienu rreġistrati l-ewwel ħsarat fit-8 ta' Awissu 2016. Għalhekk, l-applikazzjoni waslet fil-limitu preskritt stabbilit mir-Regolament.
(4)Fl-applikazzjoni tiegħu il-Portugal talab ħlas bil-quddiem kif stabbiliti fl-Artikolu 4a ta’ dan ir-Regolament. Fid-9 ta’ Novembru 2016, il-Kummissjoni adottat id-Deċiżjoni ta’ Implimentazzjoni C(2016) 7250 fejn allokat 10 % ta’ ħlas bil-quddiem li jammonta għal EUR 392 500 fuq il-kontribuzzjoni finanzjarja antiċipata mill-Fond u mbagħad ħalsitha kollha kemm hi lill-Portugall.
(5)L-awtoritajiet Portugiżi stmaw li l-ħsara diretta totali kkawżata mid-diżastru kienet ta’ EUR 157 miljun. Dan l-ammont jirrappreżenta biss 15 % tal-livell limitu ta’ “diżastru maġġuri” għall-mobilizzazzjoni tal-FSUE ta’ EUR 1 026,714 miljun applikabbli għall-Portugal fl-2016 (jiġifieri 0,6 % tal-EUR 171 119-il miljun bil-prezzijiet tal-2014).
(6)Peress li l-ħsara diretta totali tibqa’ taħt il-livell limitu għal diżastru maġġuri għall-attivazzjoni tal-Fond ta’ Solidarjetà, l-applikazzjoni kienet eżaminata fuq il-bażi tal-kriterji tad-“diżastri reġjonali” kif stabbilit fl-Artikolu 2(3) tar-Regolament li jiddefinixxi l-kunċett ta’ “diżastru reġjonali” bħala kwalunkwe diżastru naturali li jirriżulta, f’reġjun fil-livell NUTS 2 ta’ Stat eliġibbli, fi ħsara diretta li taqbeż il-1,5 % tal-PDG ta’ dak ir-reġjun. Peress li l-applikazzjoni Portugiża tirrigwarda l-gżira ta’ Madeira (PT30 — Região Autónoma da Madeira), il-livell limitu tal-PDG applikat huwa ta’ 1 %, peress li dan huwa reġjun ultraperiferiku fit-tifsira tal-Artikolu 349 tat-Trattat dwar il-Funzjonament tal-Unjoni Ewropea. Il-ħsara diretta rrappurtata ta’ EUR 157 miljun tirrappreżenta 3,84 % tal-PDG ta’ dan ir-reġjun (EUR 4 085 miljun ibbażat fuq id-dejta tal-2014) u taqbeż il-livell limitu ta’ 1 % tal-Artikolu 2(3) tar-Regolament. L-applikazzjoni tal-Portugal għalhekk hija eliġibbli għal kontribuzzjoni mill-Fond ta’ Solidarjetà.
(7)Fir-rigward tal-impatt u l-konsegwenzi tad-diżastru, il-kapitali Funchal u l-muniċipalità ta’ Calheta ġew affettwati b’mod serju, b’impatt qawwi fuq il-ħajja ta’ kuljum u l-proprjetà tal-popolazzjoni inklużi tliet vittmi. Iż-żona maħruqa tkopri 6 000 ettaru li minnhom 560 ettaru jikkonċernaw żoni protetti li jappartjenu għan-Netwerk “Natura 2000”. Il-“Quinta do Monte”, proprjetà storika famuża tal-gvern, ukoll sofriet ħsarat. Barra minn hekk, il-Portugall irrapporta ħsara f’233 dar, li 154 minnhom inqerdu kompletament. Diversi azjendi agrikoli ġew milquta, 24 negozju u 5 lukandi ġarrbu ħsarat, kif ukoll skola u sptar lokali. Barra minn hekk, l-infrastruttura bażika kienet affettwata, bħal linji tal-enerġija elettrika li jfornu 400 konsumatur.
(8)Il-kost tal-operazzjonijiet essenzjali ta' emerġenza u irkupru eliġibbli skont l-Artikolu 3(2) tar-Regolament, ġie stmat mill-awtoritajiet Portugiżi li jammonta għal EUR 7,347 miljun, u ġie maqsum skont it-tip ta' operazzjoni. L-akbar sehem ta’ dawn l-operazzjonijiet (iktar minn EUR 1,816 miljun) jikkonċerna is-settur tal-akkomodazzjoni temporanja. It-tieni l-akbar sehem jikkonċerna l-miżuri ta' tindif li jammontaw għal EUR 1,756 miljun.
(9)Ir-reġjun milqut huwa "reġjun anqas żviluppat" taħt il-Fondi Strutturali u ta' Investiment Ewropej (FSIE) (2014-2020). L-awtoritajiet Portugiżi indikaw lill-Kummissjoni l-ħsieb tagħhom li jallokaw fondi mill-programmi ta' FSIE għall-miżuri tal-irkupru.
(10)Fir-rigward tal-implimentazzjoni tal-leġiżlazzjoni tal-Unjoni dwar il-prevenzjoni u l-ġestjoni tar-riskji tad-diżastri bħalissa ma hemm l-ebda proċedura ta’ ksur għaddejja. L-applikazzjoni Portugiża tagħti ħarsa lejn il-miżuri ta’ prevenzjoni fis-seħħ. Pereżempju, fl-2015, ir-Riżoluzzjoni Nru 56/2015 tal-Kunsill tal-Ministri ippubblikata fil-Ġurnal Uffiċjali tar-Repubblika Portugiża Nru 147 tat-30 ta’ Lulju 2015, approvat il-Qafas Strateġiku għall-Politika dwar il-Klima, il-Programm Nazzjonali għat-Tibdil fil-Klima u l-Istrateġija Nazzjonali għall-Adattament għat-Tibdil fil-Klima, dokumenti strateġiċi f’konformità mal-leġiżlazzjoni tal-UE dwar il-prevenzjoni u l-ġestjoni tar-riskji ta’ diżastru relatati man-natura ta’ nirien fil-foresti.
(11)Fid-data tas-sottomissjoni tal-applikazzjoni il-Portugal ma kienx suġġett għal proċedimenti ta’ ksur tal-leġiżlazzjoni tal-Unjoni relatat man-natura tad-diżastru.
(12)L-awtoritajiet Portugiżi kkonfermaw li l-ebda kopertura tal-assigurazzjoni ma tagħmel tajjeb għall-kostijiet eliġibbli, minbarra l-ammont ta’ EUR 360 000 li diġà ġie identifikat.
3.Finanzjament
Il-metodoloġija biex jiġi kkalkulat il-Fond ta’ Solidarjetà kienet imfassla fir-Rapport Annwali tal-2002-2003 dwar il-Fond ta’ Solidarjetà u aċċettata mill-Kunsill u mill-Parlament Ewropew.
Minħabba li s-solidarjetà kienet il-ġustifikazzjoni ċentrali għall-ħolqien tal-Fond, il-Kummissjoni hija tal-fehma li l-għajnuna mill-Fond għandha tkun progressiva. Dan ifisser li, skont il-prattika preċedenti, il-porzjon tal-ħsarat li jaqbeż il-livell limitu ta' "diżastru maġġuri" għall-mobilizzazzjoni tal-Fond (jiġifieri 0,6 % tal-ING jew EUR 3 biljun bil-prezzijiet tal-2011, skont liema minnhom ikun l-iżgħar ammont) għandu jwassal għal intensità ta' għajnuna akbar milli mill-ħsarat li ma jaslux sal-livell limitu. Ir-rata applikata fil-passat biex jiġu definiti l-allokazzjonijiet għal diżastri maġġuri hija ta' 2,5% tal-ħsara diretta totali taħt il-livell limitu maġġuri, u 6 % għall-parti tal-ħsara 'l fuq minn dan. Għal diżastri reġjonali u diżastri aċċettati taħt id-dispożizzjoni ta' “pajjiż ġar” ir-rata hija ta’ 2,5 %.
L-ammonti tal-għajnuna mill-Fond ta’ Solidarjetà ma jistgħux jaqbżu l-kostijiet totali stmati tal-operazzjonijiet eliġibbli kif imsemmi fil-paragrafi rispettivi (5) hawn fuq għar-Renju Unit, Ċipru u l-Portugall.
Fil-kalkolu tal-ammont totali tal-għajnuna taħt l-FSUE, ġie applikat it-2.5 % fil-każijiet tar-Renju Unit u l-Portugall peress li l-ħsara diretta totali hija taħt il-limiti rispettivi tagħhom ta’ diżastru maġġuri. Fil-każ ta’ Ċipru, ġie applikat it-2,5 % sal-livell tal-livell limitu ta’ diżastru maġġuri filwaqt li ġie applikat 6 % għall-parti tad-dannu totali dirett ogħla minn dan il-livell limitu.
Għalhekk, il-Kummissjoni tipproponi li tapplika l-istess persentaġġi u timmobilizza l-ammonti ta' għajnuna segwenti:
|
Diżastru |
Ħsara diretta totali
(f’miljuni ta’ EUR) |
Il-limitu massimu applikat għal diżastru reġjonali (f’miljuni ta’ EUR) |
Il-limitu massimu applikat għal diżastru maġġuri (f’miljuni ta’ EUR) |
2,5 % tal-ħsara diretta totali sal-livell maġġuri
|
6 % tal-ħsara diretta totali ’il fuq mill-livell maġġuri
|
Ammont totali tal-għajnuna proposta
(EUR) |
|
Ir-Renju Unit - Għargħar fl-2016 (diżastru reġjonali) |
2 412,042 |
626,764 |
Mhux disponibbli |
60 301 050 |
- |
60 301 050 |
|
Ċipru - Perjodi ta’ Nixfa u nirien fl-2016 (diżastru maġġuri) |
180,803 |
Mhux disponibbli |
101,412 |
2 535 300 |
4 763 460 |
7 298 760 |
|
Il-Portugall - nirien fil-Madejra fl-2016 (diżastru reġjonali) |
157,000 |
40,850 |
Mhux disponibbli |
3 925 000 |
- |
3 925 000 |
|
TOTAL |
71 524 810 |
|||||
Din hija l-ewwel proposta għal deċiżjoni ta’ mobilizzazzjoni tal-FSUE fl-2017. L-ammont totali disponibbli għall-mobilizzazzjoni tal-FSUE fil-bidu tal-2017 huwa EUR 1 115 121 612 u huwa s-somma tal-allokazzjoni tal-2017 ta’ EUR 563 081 210 (jiġifieri EUR 500 000 000 fi prezzijiet tal-2011) skont l-Artikolu 10(1) tar-Regolament dwar il-Qafas Finanzjarju Pluriennali 5 (QFP), flimkien mal-allokazzjoni kollha tal-2016 ta’ EUR 552 040 402 (jiġifieri EUR 500 000 000 fi prezzijiet tal-2011) li baqgħu ma ntefqux u riportati għal sena waħda, skont l-Artikolu 10(2) tar-regolament dwar il-QFP.
Billi l-ammont totali ta’ għajnuna propost huwa taħt l-ammont totali disponibbli għall-mobilizzazzjoni tal-FSUE fl-2017, id-dispożizzjonijiet limitu tar-regolament dwar il-QFP, ġew osservati.
4.Konklużjoni
Il-Kummissjoni tipproponi li timmobilizza l-Fond ta’ Solidarjetà tal-Unjoni Ewropea għat-tliet każijiet li jikkonċernaw ir-Renju Unit, Ċipru u l-Portugall ippreżentati hawn fuq u biex jiġi emendat il-baġit 2017 billi żżid l-Artikolu tal-baġit 13 06 01 ‘Għajnuna għall-Istati Membri fil-każ ta’ diżastru naturali kbir b’riperkussjonijiet serji fuq il-kundizzjonijiet tal-għajxien, l-ambjent naturali jew l-ekonomija’ b'EUR 71 524 810 kemm fl-approprjazzjonijiet ta’ impenn kif ukoll fl-approprjazzjonijiet ta’ pagament.
Peress li l-Fond ta' Solidarjetà tal-Unjoni Ewropea huwa strument speċjali kif definit fir-Regolament QFP, huwa mistenni li l-approprazzjonijiet korrispondenti jiġu bbaġittjati ’il barra mil-limiti massimi tal-QFP korrispondenti.
Il-Kummissjoni hija fiduċjuża li l-ammont ta’ EUR 71 524 810 ta’ approprjazzjonijiet ta’ pagament jista' jiġi riallokat fi ħdan il-baġit 2017. Madankollu, f’dan l-istadju bikri tal-implimentazzjoni, il-Kummissjoni għadha mhix f’pożizzjoni li tidentifika xi sors preċiż. Għalhekk, il-Kummissjoni tipproponi li tibbukkja f’dan l-ABE riżerva negattiva ta’ approprjazzjonijiet ta’ pagament fuq l-artikolu 40 03 01 tal-baġit għal ammont ta’ EUR 71 524 810.
F’konformità mal-Artikolu 47 tar-Regolament Finanzjarju 6 , il-Kummissjoni se tnaqqas ir-riżerva negattiva mill-aktar fis possibbli permezz ta’ trasferiment ta’ approprjazzjonijiet minn partiti oħra tal-baġit bi qbil mal-proċedura preskritta fl-Artikoli 26 u 27 tal-istess regolament.