5.10.2016   

MT

Il-Ġurnal Uffiċjali tal-Unjoni Ewropea

C 366/6

(1)

Id-Deċiżjoni tikkonċerna l-parteċipazzjoni tal-impriża Pometon S.p.A. (“Pometon”) fi ksur wieħed u kontinwu tal-Artikolu 101 tat-Trattat u l-Artikolu 53 tal-Ftehim taż-ŻEE fis-settur tal-barraxa tal-azzar. Il-ksur fil-każ ta’ Pometon dam sejjer mit-3 ta’ Ottubru 2003 sas-16 ta’ Mejju 2007 u kien jikkonsisti minn prattika miftiehma għall-koordinazzjoni tal-ipprezzar ta’ barraxa tal-azzar.

(2)

Il-barraxa tal-azzar huma partiċelli maħlula tal-azzar, li jkunu jew f’forma tonda (boċċi tal-azzar) jew angulari (naqal tal-azzar), li jintużaw prinċipalment fl-industriji tal-azzar, tal-awtovetturi, tal-metallurġija, tal-petrokimika u tal-qtugħ tal-ġebel. Dawn jiġu manifatturati permezz tal-atomizzazzjoni ta’ azzar maħlul minn fdalijiet tal-azzar, u wara jsiru diversi proċessi ta’ trattament termali u mekkanimu sabiex jieħdu l-karatteristiċi finali tagħhom. L-aġir antikompetittiv identifikat f’dan il-każ ikopri kemm il-boċċi tal-azzar kif ukoll in-naqal tal-azzar fil-gradi kollha tagħhom.

(3)

F’dan il-każ ġew adottati żewġ deċiżjonijiet: fuq naħa waħda deċiżjoni dwar l-erba’ impriżi li ppreżentaw talba formali ta’ saldu (2) u li kienu d-destinatarji tad-Deċiżjoni tal-Kummissjoni tat-2 ta’ April 2014 (id-“Deċiżjoni ta’ Saldu”) (3), jiġifieri (i) Ervin (ii) Winoa; (iii) Metalltechnik Schmidt u (iv) Eisenwerk Würth, u, min-naħa l-oħra, deċiżjoni għal Pometon, li ma ppreżentatx talba ta’ saldu. Dan is-sommarju huwa marbut mad-deċiżjoni indirizzata lil Pometon.

(4)

Il-każ infetaħ abbażi ta’ applikazzjoni ta’ immunità minn Ervin. Il-Kummissjoni għamlet spezzjonijiet għall-għarrieda bejn il-15 u s-17 ta’ Ġunju 2010 fil-proprjetajiet ta’ diversi produtturi tal-barraxa tal-azzar.

(5)

Matul l-investigazzjoni, il-Kummissjoni bagħtet ukoll diversi talbiet għal informazzjoni skont l-Artikolu 18 tar-Regolament (KE) Nru 1/2003.

(6)

Fis-16 ta’ Jannar 2013, il-Kummissjoni bdiet proċedimenti skont l-Artikolu 11(6) tar-Regolament (KE) Nru 1/2003 kontra d-destinatarja tad-Deċiżjoni kif ukoll kontra erba’ impriżi oħra bil-għan li tidħol f’diskussjonijiet dwar saldu. Il-laqgħat għal saldu saru bejn Frar 2013 u Diċembru 2013. Fi tmiem in-negozjati, Pometon iddeċidiet li ma tippreżentax talba għal saldu u għalhekk il-Kummissjoni marret lura għall-proċedura standard tal-kartell.

(7)

Fit-3 ta’ Diċembru 2014, il-Kummissjoni adottat Dikjarazzjoni ta’ Oġġezzjonijiet indirizzata lil Pometon.

(8)

Wara li ngħatat aċċess sħiħ għall-fajl, Pometon wieġbet bil-miktub għad-Dikjarazzjoni tal-Oġġezzjonijiet fis-16 ta’ Frar 2015, u pparteċipat f’seduta orali li saret fis-17 ta’ April 2015.

(9)

Il-Kumitat Konsultattiv fil-Qasam tal-Prattiki Restrittivi u Pożizzjonijiet Dominanti ħareġ opinjoni favorevoli fil-25 ta’ April u fit-23 ta’ Mejju 2016 u l-Kummissjoni adottat id-Deċiżjoni fil-25 ta’ Mejju 2016.

(10)

Id-Deċiżjoni tikkonċerna kartell li l-għan aħħari tiegħu kien li jikkoordina l-prezzijiet ta’ barraxa tal-azzar u li jirrestrinġi l-kompetizzjoni fil-prezzijiet. Sabiex jilħqu l-għan tagħhom il-partijiet daħlu f’kuntatti antikompetittivi bilaterali u multilaterali. Dawn il-kuntatti ntużaw mill-partijiet biex jiddiskutu l-elementi ewlenin tal-prezz applikabbli għall-bejgħ kollu tagħhom fiż-ŻEE ta’ barraxa tal-azzar. B’mod partikolari, Pometon użat dawn il-kontatti biex:

(11)

L-ambitu ġeografiku tal-komportament kien madwar iż-ŻEE kollha.

(12)

Id-Deċiżjoni tapplika l-Linji-Gwida tal-2006 dwar il-Multi (4) u timponi multi fuq Pometon.

(13)

Fil-kalkolu tal-multi, il-Kummissjoni ħadet inkunsiderazzjoni l-bejgħ ta’ Pometon fis-swieq ikkonċernati fl-aħħar sena qabel it-tmiem tal-kartell, il-fatt li l-arranġamenti ta’ koordinazzjoni tal-prezzijiet huma fost ir-restrizzjonijiet tal-kompetizzjoni l-iktar serji, it-tul tal-ksur u li kopriet iż-ŻEE kollha. L-ammont bażiku tal-multa ġie ffissat għal 16 % tal-valur tal-bejgħ relevanti kif definiti hawn fuq u l-ammont addizzjonali ta’ 16 % sabiex l-impriżi jiġu skoraġġiti milli jidħlu fi prattiki ta’ koordinazzjoni tal-prezzijiet.

(14)

Il-Kummissjoni ma applikat l-ebda ċirkostanza aggravanti. Il-Kummissjoni kkunsidrat li fil-każ ta’ Pometon japplikaw ċirkustanzi mitiganti peress li l-evidenza wriet li hija kkontribwiet f’livell anqas minn partijiet oħra fiż-żamma tal-arranġamenti dwar il-koordinazzjoni fil-każ ta’ klijenti individiwali.

(15)

Fid-dawl taċ-ċirkostanzi speċifiċi ta’ dan il-każ, il-Kummissjoni eżerċitat id-diskrezzjoni tagħha skont il-punt 37 tal-Linji Gwida dwar il-multi tal-2006 u adattat il-multa ta’ Pometon f’livell li huwa proporzjonali mal-ksur u li jikseb effett suffiċjenti ta’ deterrent.

(16)

L-Artikolu 23(2) tar-Regolament (KE) Nru 1/2003 jipprovdi li l-multa imposta għal kull ksur ma għandhiex taqbeż 10 % tal-fatturat totali ta’ impriża fis-sena ta’ negozju li tiġi qabel id-Deċiżjoni tal-Kummissjoni.

(17)

F’dan il-każ, il-multa ma’ teċċedix 10 % tal-fatturat totali ta’ Pometon għall-2015.

(18)

Ġiet imposta l-multa li ġejjia skont l-Artikolu 23(2) tar-Regolament (KE) Nru 1/2003: