Skeda tas-Sommarju Eżekuttiv

Valutazzjoni tal-Impatt dwar il-Proposta għal Direttiva tal-Parlament Ewropew u tal-Kunsill li temenda d-Direttiva 2009/28/KE tal-Parlament Ewropew u tal-Kunsill tat-23 ta’ April 2009 dwar il-promozzjoni tal-użu tal-enerġija minn sorsi rinnovabbli

A. Ħtieġa li tittieħed azzjoni

X’inhi l-problema u għaliex hi problema fil-livell tal-UE?

Id-Direttiva 2009/28/KE (id"Direttiva tar-RES") tistabbilixxi qafas Ewropew għall-promozzjoni tal-Enerġija Rinnovabbli (ER), b’miri nazzjonali obbligatorji għall-parti tal-ER fil-konsum tal-enerġija finali gross ta’ kull Stat Membru fl-2020. F’Ottubru 2014, il-Kunsill Ewropew qabel dwar mira vinkolanti fil-livell tal-UE ta’ mill-inqas parti ta’ 27% f’ER ikkunsmata fl-UE fl-2030, li tinkiseb mingħajr miri nazzjonali obbligatorji. Il-kombinazzjoni tal-effetti fit-tul taż-żmien ta’ politiki attwali, il-kompetittività tal-ispejjeż imtejba permezz tal-progress teknoloġiku, l-inizjattivi tal-Iskema għall-Iskambju ta' Kwoti tal-Emissjonijiet (ETS) u s-setturi mhux tal-ETS, id-Disinn tas-Suq tal-Elettriku, il-Governanza u l-Effiċjenza tal-Enerġija, huma projettati biex iwasslu żieda fil-parti mill-enerġija totali moqdija mis-sorsi rinnovabbli. Madankollu, in-nuqqas ta’ politiki addizzjonali min-naħa tal-UE, din iż-żieda mhix kosteffettiva u ma twassalx għall-parti mill-enerġija totali maqbula fil-livell tal-UE li tiġi servuta minn sorsi rinnovabbli.

X’għandu jinkiseb? 

Fil-kuntest tal-Istrateġija tal-Unjoni tal-Enerġija, ir-reviżjoni tad-Direttiva tar-RES għandha erba’ għanijiet ewlenin: (i) li tikkontribwixxi għat-trażżin taż-żieda fit-temperatura medja dinjija sa mhux aktar minn 2°C, bil-ħsieb li naslu għal 1.5°C b’konformità mal-impenn tal-UE lejn l-għanijiet COP 21 ta’ Pariġi. (ii) li b’mod kosteffiċjenti tikseb l-għan ta’ 27 % tal-enerġija totali minn sorsi tal-ER fl-UE, sal-2030; (Iii) li tagħmel l-ekonomija tal-UE aktar sikura f'dik li hija enerġija billi tnaqqas id-dipendenza fuq l-importazzjoni; (Iv) li tikkontribwixxi biex l-UE ssir mexxejja dinjija fl-ER u ċentru globali għall-iżvilupp ta’ teknoloġiji avvanzati u kompetittivi tal-ER.

X’inhu l-valur miżjud ta’ azzjoni fil-livell tal-UE (is-sussidjarjetà)? 

Minħabba l-eżistenza ta’ nuqqasijiet u ostakli tas-suq speċifiċi, hemm il-ħtieġa ta’ politiki fil-livell tal-UE biex il-mira vinkolanti ta’ mill-inqas 27% ta’ ER fil-livell tal-UE tiġi kollettivament milħuqa mill-Istati Membri, u tintlaħaq bl-aktar mod kosteffiċjenti u bl-anqas mod distortiv possibbli. L-azzjoni tal-UE se twassal iċ-ċertezza għall-investituri f’qafas regolatorju mal-UE kollha, skjerament konsistenti u kosteffiċjenti tal-ER fl-UE kollha u operat effiċjenti tas-suq tal-enerġija intern filwaqt li jirrispetta l-potenzal tal-Istati Membri li jipproduċu forom differenti ta’ ER skont it-taħlita tal-enerġija li jagħżlu.

B. Soluzzjonijiet

X’inhuma l-għażliet biex jintlaħqu l-għanijiet? Hemm xi għażla preferuta? Jekk le, għaliex? 

Tqiesu għażliet ta’ politika kemm leġiżlattivi kif ukoll mhux leġiżlattivi għall-promozzjoni tal-iskjerament tal-ER. Il-Valutazzjoni tal-Impatt (VI) li għamlet analiżi dettaljata ta’ kull għażla politika b’approċċ gradwali minn xenarju ta’ bażi (Għażla 0) sa mizuri aktar komprensivi fil-livell tal-UE. L-ebda għażla preferuta ma ntgħażlet, ħalli tħalliet bla mittiefsa d-diskrezzjoni politika tal-Kummissjoni li tiddeċiedi minn fost l-għażliet mifruxa fuq dawn il-ħames oqsma li ġejjin:

(i) Għażliet li jżidu l-ER fis-settur tal-elettriku (RES-E)

Qafas komuni Ewropew għall-iskemi ta’ appoġġ: 1 l-użu biss ta’ mekkaniżmi tas-suq; 2 kjarifikazzjoni tar-regoli permezz ta’ sett ta’ għodda; 3 mixja obbligatorja lejn għajnuna tal-investiment.

Approċċ reġjonali aktar koordinat: 1 appoġġ reġjonali obbligatorju; 2 ftuħ parzjali obbligatorju ta’ skemi ta’ appoġġ b'parteċipazzjoni krosskonfinali.

Strument finanzjarju ffukat fuq is-sorsi rinnovabbli: 1 strument finanzjarju fil-livell tal-UE bi kriterji tal-eliġibbiltà wesgħin; 2 strument finanzjarju fil-livell tal-UE li jappoġġja proġetti tar-RES bl-aktar riskju għoli.

Is-simplifikazzjoni amministrattiva: 1 dispożizzjonijiet imsaħħa b’punt wieħed minn fejn tinqeda għal kollox, meded ta’ żmien u proċeduri ffaċilitati għar-repowering; 2 il-permess ta’ proċeduri li jkunu limitati biż-żmien, permezz ta’ approvazzjoni awtomatika u notifika sempliċi fil-każ ta’ proġetti żgħar.

(ii) Għażliet li jżidu l-ER fis-settur tat-tisħin u t-tkessiħ (RES-H&C)

L-integrazzjoni tas-sorsi rinnovabbli fil-provvista tat-tisħin u t-tkessiħ: 1 obbligu dwar ir-RES H&C fuq il-fornituri tal-karburantis fossili; 2 l-istess obbligu imma fuq il-fornituri tal-karburanti kollha.

L-iffaċilitar tal-adozzjoni tal-ER u s-sħana mormija fis-sistemi tad-DHC: 1 qsim tal-aħjar prattiki; 2 ċertifikati tal-prestazzjoni tal-enerġija u l-ħolqien ta’ aċċess għal H&C lokali; 3 miżuri skont 2 + qafas addizzjonali dwar drittijiet tal-konsumaturi msaħħa.

(iii) Għażliet li jżidu l-ER fis-settur tat-trasport (RES-T)

L-integrazzjoni tas-sorsi rinnovabbli fis-settur tat-trasport: 1 obbligu ta’ inkorporazzjoni tal-UE fil-każ tal-karburanti rinnovabbli avvanzati; 2 obbligu ta’ inkorporazzjoni tal-UE fil-każ tal-karburanti rinnovabbli kkunsmati fit-trasport flimkien ma’ tneħħija gradwali tal-bijokarburanti imsejsa fuq l-ikel (subgħażliet: 2A tneħħija gradwali parzjali tal-bijokarburanti imsejsa fuq l-ikel sal-2030; 2B tneħħija gradwali totali ta’ dawn il-bijokarburanti sal-2030; 2C tneħħija gradwali aktar malajr tal-bijokarburanti imsejsa fuq l-ikel u ffrankar akbar tal-gassijiet b’effett ta’ serra sal-2030); 3 L-għażliet preċedenti flimkien ma’ obbligu ta’ inkorporazzjoni tal-UE speċifiku għall-karburanti rinnovabbli kkunsmati fis-settur marittimu u f'dak tal-avjazzjoni. 4 Obbligu ta’ tnaqqis fl-emissjonijiet tal-gassijiet b'effett ta’ serra (FQD) (subgħażliet: 4B obbligu ta’ tnaqqis tal-gassijiet b'effett ta’ serra kumplessiv mill-karburanti u l-elettriku; 4C karburanti avvanzati u obbligu ta’ tnaqqis tal-gassijiet b'effett ta’ serra mill-elettriku; 4D karburanti u elettriku avvanzati u karburanti konvenzjonali b’anqas gassijiet b'effett ta’ serra).

(iv) Għażliet biex il-konsumaturi tal-ER jiġu infurmati u mogħtija s-setgħa:

Is-setgħa lill-konsumaturi li jiġġeneraw l-awtokonsum u jaħżnu l-elettriku rinnovabbli: 1 gwida tal-UE dwar l-awtokonsum; 2 is-setgħa tal-awtokonsum u tal-ħażna tal-elettriku rinnovabbli liċ-ċittadini; 3 awtokonsum fuq distanza għall-muniċipalitajiet.

L-iżvelar ta’ informazzjoni fil-każ tal-elettriku rinnovabbli: 1 tisħiħ tas-sistema tal-GO; 2 miżuri skont 1 + l-obbligu tal-iżvelar tal-GOs; 3 miżuri skont 2 + l-estensjoni tal-GOs għas-sorsi kollha tal-ġenerazzjoni tal-elettriku.

L-ittraċċar tal-karburanti minn sorsi rinnovabbli użati fit-tisħin u t-tkessiħ u t-trasport: 1 GOs estiżi għall-karburanti gassużi rinovabbli; 2 GOs estiżi għall-karburanti likwidi u gassużi rinnovabbli; 3 it-tiswir ta’ sistema tal-ittraċċjar alternattiva għall-karburanti rinnovabbli likwidi u gassużi.

(v) Għażliet għall-iżgurar tal-kisba ta’ mill-inqas 27 % ta’ ER fl-2030:

Il-miri nazzjonali tal-2020: Il-miri nazzjonali tal-2020 bħala bażi vs bażi ta’ referenza.

Perkors: Lineari vs mhux lineari.

Mekkaniżmi li jevitaw distakk fl-ambizzjoni għall-mira tal-UE fl-ER: 1 reviżjoni tal-ambizzjoni tal-pjanijiet nazzjonali; 2 inklużjoni ta’ klawsola ta’ rieżami għall-proponiment ta’ mekkaniżmi ta’ provvista addizzjonali fil-livell tal-UE fi stadju aktar tard jekk ikun meħtieġ; 3 żieda tal-ambizzjoni lejn miżuri mal-UE kollha; 4 introduzzjoni ta’ miri nazzjonali obbligatorji.

Evitar u mili ta’ distakk fl-ambizzjoni: 1 reviżjoni tal-pjanijiet nazzjonali; 2 inklużjoni ta’ klawsola ta’ rieżami għall-proponiment ta’ mekkaniżmi ta’ provvista addizzjonali fil-livell tal-UE fi stadju aktar tard jekk ikun meħtieġ; 3 żieda tal-ambizzjoni lejn miżuri mal-UE kollha; 4 introduzzjoni ta’ miri nazzjonali obbligatorji.

X’jidhrilhom il-partijiet ikkonċernati differenti? Min jappoġġja liema għażla?

Bejn it-18 ta’ Novembru 2015 u l-10 ta’ Frar 2016 saret Konsultazzjoni Pubblika onlajn. Din tikkonferma li hemm kunsens wiesa’ fost l-Istati Membri, l-NGOs u l-gruppi ta' riflessjoni, l-investituri u l-assoċjazzjonijiet dwar il-ħtieġa għal qafas legali tal-UE dwar is-sorsi tal-enerġija rinnovabbli stabbli u prevedibbli, dwar l-importanza tal-miżuri ta’ definizzjoni fl-RES-E, RES-H&C, RES-T, dwar il-parteċipazzjoni msaħħa tal-konsumaturi fis-suq tal-enerġija intern, dwar it-tneħħija tal-ostakli amministrattivi u dwar il-kisba ta’ mira obbligatorja tal-UE ta’ mill-inqas 27%. Il-partijiet ikkonċernati kollha ġeneralment qablu dwar il-ħtieġa li jsaħħu l-iżvilupp infrastrutturali, speċjalment fir-rigward tal-grilji intelliġenti u s-sistemi tal-ħżin.

L-Istati Membri enfasizzaw l-impenn li jitnaqqsu l-emissjonijiet tal-gassijiet b'effett ta’ serra, flimkien mal-ħtieġa li t-tkabbir ekonomiku jinfired mill-vijabbiltà tal-enerġiji rinnovabbali. Xi Stati Membri ssottolineaw ir-rwol tas-sorsi rinnovabbli kontra is-sigurtà tal-enerġija u d-dipendenza fuq l-importazzjoni. L-industrija enfasizzat il-ħtieġa ta’ suq idoneu għas-sorsi rinnovabbli, permezz tal-integrazzjoni tas-suq, reġim ta’ protezzjoni tal-investiment imsaħħaħ fuq medda twila ta’ żmien, rikjesta ta’ qafas regolatorju stabbli li jistimola l-innovazzjoni, żgurar tal-vijabbiltà ekonomika u żieda tal-kompetittività fil-livell tal-UE. L-NGOs issottolineaw l-importanza li jiġu stabbiliti d-drittijiet taċ-ċittadini ħalli tiżdied id-deċentralizzazzjoni u li tingħata s-setgħa lill-komunitajiet lokali biex jistimulaw l-aċċettazzjoni pubblika ta’ skemi futuri.

C. L-impatti tal-għażla ppreferuta

X’inhuma l-benefiċċji tal-għażla ppreferuta (jekk hemm, inkella ta’ dawk ewlenin)? 

Għalissa mhux possibbli li jiġi kkwantifikat bis-sħiħ l-impatt, peress lil-ebda għażliet ippreferuti m’għadhom intgħażlu. L-Għażliet minn 1 sa 4 ta’ hawn fuq jindirizzaw l-inċertezza tal-investituri , iżidu l-kosteffettività, jintervjenu kontra l-fallimenti tas-swieq, jaġġornaw il-qafas regolatorju eżistenti u jżidu l-parteċipazzjoni taċ-ċittadini.

L-implimentazzjoni tal-miżuri ewlenin se jgħin lill-UE biex tilħaq l-għanijiet tagħha dwar it-tnaqqis tal-emissjonijiet tal-gassijiet b'effett ta’ serra (b’kontribuzzjoni lejn it-tnaqqis addizzjonali ta’ 5% fl-emissjonijiet tal-gassijiet b'effett ta’ serra meħtieġ bi tqabbil mal-projezzjonijiet tax-Xenarju ta’ Referenza). Dan jista’ jikkontribwixxi wkoll lejn it-tnaqqis fil-kont tal-importazzjoni tal-enerġija (l-effetti kumulattivi tal-implimentazzjoni tal-miri tal-2030 jkunu jfissru tnaqqis ta’ EUR 221 biljun tul il-perjodu bejn l-2021 u l-2030), u jiġġenera wkoll kobenefiċċji addizzjonali, bħall-kontribut lejn it-tnaqqis kumplessiv fl-ispejjeż tal-kontroll tat-tniġġis u l-ispejjeż tal-ħsara għas-saħħa ta’ EUR 12.3-19.5 biljun fis-sena).

X'inhuma l-ispejjeż tal-għażla ppreferuta (jekk hemm, inkella dawk ewlenin)? 

L-għażliet ewlenin li ssawru jaf ikollhom impatti soċjali, ekonomiċi u ambjentali fil-livell tal-Istati Membri. Fejn huwa possibbli, dawn l-impatti ġew ikkwantifikati.

X’inhuma l-impatti fuq l-SMEs u fuq il-kompetittività?

Il-VI inkludiet eċċezzjonijiet speċifiċi għall-SMEs biex jiġi żgurat li l-miżuri biex tinkiseb il-mira tas-sorsi rinnovabbli fil-livell tal-UE għall-2030 tippromwovi l-kompetittività (eż. simplifikazzjoni amministrattiva, dispożizzjonijiet speċifiċi dwar l-appoġġ pubbliku, miżuri usa’ ta’ awtokonsum).

Se jkun hemm impatti sinifikanti fuq il-baġits u l-amministrazzjonijiet nazzjonali? 

L-Istati Membri se jintalbu jikkontribwixxu lejn l-isforz komuni biex tinkiseb il-mira maqbula dwar is-sorsi rinnovabbli fil-livell tal-UE sal-2030 permezz ta’ ġabra ta’ miżuri li potenzjalment tħalli impatt fuq il-baġits u l-amministrazzjonijiet nazzjonali.

D. Segwitu

Meta se tiġi rieżaminata l-politika?

Xi dispożizzjonijiet tad-Direttiva tar-RES effettivament jintemmu f’Diċembru 2020, b'mod partikolari dawk dwar il-miri nazzjonali obbligatorji. Il-VI timmira li tindirizza l-miżuri li se jiġu inklużi fid-Direttiva tar-RES wara l-2020. Xi għażliet jagħtu lok għall-ħtieġa li jiġi żgurat li l-klawsoli ta’ rieżami jiġu stipulati fid-Direttiva tar-RES reveduta biex tiġi żgurat li l-qalba mill-miri nazzjonali obbligatorji għall-mira fil-livell tal-UE għall-2030 tiġi ssorveljata u implimentata kif jixraq.