IL-KUMMISSJONI EWROPEA
Brussell, 26.2.2016
COM(2016) 112 final
RAPPORT MILL-KUMMISSJONI LILL-QORTI EWROPEA TAL-AWDITURI, LILL-KUNSILL U LILL-PARLAMENT EWROPEW
Tweġibiet tal-Istati Membri għar-Rapport Annwali tal-2014 tal-Qorti Ewropea tal-Awdituri
{SWD(2016) 48 final}
WERREJ
1. Kamp ta' Applikazzjoni tar-Rapport
2 Karatteristiċi ewlenin tar-rapport tal-2014 tal-QEA
3 Taqsira tat-tweġibiet tal-Istati Membri
3.1 Il-kejl tar-riżultati tal-prestazzjoni
3.2 Tipi ta' żbalji kwantifikabbli - ksur tal-għajnuna mill-Istat u tar-regoli tal-akkwist pubbliku
3.3 Ġestjoni finanzjarja tajba
4. Konklużjoni
RAPPORT MILL-KUMMISSJONI
Tweġibiet tal-Istati Membri għar-Rapport Annwali tal-2014 tal-Qorti Ewropea tal-Awdituri
1.Kamp ta' Applikazzjoni tar-Rapport
Konformi mal-Artikolu 162(5) tar-Regolament Finanzjarju 1 , wara l-pubblikazzjoni tar-rapport annwali tal-Qorti għas-sena finanzjarja 2014, il-Kummissjoni informat kif meħtieġ lill-Istati Membri bid-dettalji tar-rapport.
Din l-informazzjoni ġiet ippreżentata fil-forma ta' ittra u tliet annessi li jridu jimtlew minn kull Stat Membru, flimkien ma' linji gwida dwar it-tħejjija u l-preżentazzjoni tat-tweġibiet għall-kwestjonarji. L-Anness I kien kwestjonarju dwar il-paragrafi li jirreferu għall-Istati Membri individwali; l-Anness II kien kwestjonarju dwar ir-riżultanzi tal-awditjar li jirreferu għal kull Stat Membru u l-Anness III kien kwestjonarju dwar riżultanzi topiċi relatati mal-ġestjoni kondiviża għad-DAS 2014.
Għar-rapport ta' din is-sena, ġew identifikati tliet temi ewlenin. Dawn huma kif ġej: (1) Il-kejl tar-riżultati tal-prestazzjoni (2) It-tipi ta' żbalji kwantifikabbli – il-ksur tar-regoli tal-għajnuna mill-Istat u tar-regoli tal-akkwist pubbliku (3) Ġestjoni finanzjarja tajba. Ir-rapport huwa akkumpanjat ukoll minn Dokument ta' Ħidma tal-Persunal (SWD) li jinkludi t-tweġibiet tal-Istati Membri għall-annessi I u III.
2Karatteristiċi ewlenin tar-rapport tal-2014 tal-QEA
Għar-rapport annwali tal-2014, il-Qorti aġġornat l-approċċ tal-awditjar tagħha u l-istruttura tar-rapport. Il-bidla ewlenija f'dan l-approċċ hija dik tal-kwantifikazzjoni ta' ksur serju tar-regoli tal-akkwist pubbliku u l-aġġustament korrispondenti taċ-ċifri tal-2013 u l-2013 sabiex tiġi żgurata l-komparabilità tar-riżultati 2 . L-istruttura l-ġdida tar-rapport - il-kapitoli 5-9 - tirrifletti l-intestaturi tal-Qafas Finanzjarju Pluriennali (QFP) 2014-2020.
Ir-riżultati tal-awditjar tal-Qorti għall-2014 iddikjaraw li l-kontijiet ma ġewx affettwati mid-dikjarazzjonijiet materjali skorretti u għalhekk, hija tat opinjoni ċara dwar id-disponibbiltà tal-kontijiet 3 , kif għamlet mill-2007. F'każ tan-nefqa, il-Qorti sabet livell stmat ta' żbalji għall-pagamenti fl-2014 ta' 4,4 %, li hu qrib il-livell tal-2013 ta' 4,5 % 4 . Apparti mill-intestatura tal-QFP (Amministrazzjoni), in-nefqa għall-intestaturi kollha li fadal kienet affetwata minn żbalji materjali. Għall-Kompetittività, Koeżjoni u Ewropa Globali, il-livelli stmati ta' żbalji kienu ta' 5,6%, 5,7% and 2,7% rispettivament, li kollha jirrappreżentaw żieda fuq ir-riżultati ekwivalenti tal-2013 5 . Madankollu, għar-Riżorsi Naturali, il-livell stmat ta' żbalji kien ta' 3,6 %, tnaqqis fuq ir-riżultati ekwivalenti għall-2013. Il-Koeżjoni kienet l-akbar kontributur għar-rata ta' żbalji kumplessiva segwita mir-Riżorsi Naturali, il-Kompetittività u Ewropa Globali. Il-graff ta' hawn taħt turi l-kontribuzzjoni għal-livell stmat ta' żbalji fl-2014 skont l-intestatura tal-QFP 6 .
Ir-rapport tal-Qorti identifika wkoll żewġ tipi ta' programmi tan-nefqa - il-programmi ta' intitolament u l-iskemi ta' rimborż ta' spejjeż - li jinvolvu tendenzi distinti ta' riskju 7 . Skont ir-rapport, l-iżbalji ta' eliġibilità fi skemi ta' rimborż ta' spejjeż jiddominaw l-iżbalji identifikati tal-2014. L-iżbalji fil-kategorija tar-rimborż tal-ispejjeż jinkludu ksur aktar serju tar-regoli tal-akkwist pubbliku waqt is-sejħa għal offerti u l-implimentazzjoni tal-kuntratt. Għall-programmi ta' intitolament, żbalji tipiċi jinkludu dikjarazzjonijiet żejda mill-bdiewa u żbalji amministrattivi li jaffettwaw pagamenti lill-bdiewa 8 . Il-graff ta' hawn taħt turi l-kontribuzzjoni tar-rata stmata ta' żbalji kumplessiva skont it-tip ta' żball.
3Taqsira tat-tweġibiet tal-Istati Membri
3.1Il-kejl tar-riżultati tal-prestazzjoni
Fil-Kapitolu 3 tar-rapport annwali tagħha "Il-ksib ta' riżultati mill-baġit tal-UE", 9 il-Qorti tanalizza l-prestazzjoni mill-perspettiva tal-istrateġija Ewropa 2020 u teżamina l-karatteristiċi tal-prestazzjoni introdotti mill-QFP il-ġdid 2014-2020. L-Istati Membri ġew mitluba jekk kinux diġà qiegħdin jużaw jew jippjanaw li jużaw l-indikaturi komuni li ġew introdotti għall-ħames fondi tal-UE. Għal erba' mil-fondi (Fond Agrikolu Ewropew għall-Iżvilupp Rurali - FAEŻR, Fond Ewropew għall-Affarijiet Marittimi u s-Sajd - FEMS, Fond Soċjali Ewropew - FSE, u l-Fond Ewropew għall-Iżvilupp Reġjonali - FEŻR), it-tweġibiet indikaw li kważi l-Istati Membri kollha kienu diġà qiegħdin jużaw jew jippjanaw li jużaw indikaturi komuni. Għall-Fond ta' Koeżjoni, 57 % tal-Istati Membri indikaw li kienu qed jintużaw indikaturi komuni u 14 % iddikjaraw li l-użu ta' indikaturi komuni ma kienx applikabbli. It-tabella ta' hawn taħt tagħti dettalji dwar it-tweġibiet tal-Istati Membri.
Fir-rigward tal-użu ta' indikaturi addizzjonali jew kumplimentarji, diversi Stati Membri – Franza, il-Greċja, il-Litwanja, il-Lussemburgu, Spanja u r-Renju Unit
10
- wieġbu li użaw indikaturi speċifiċi għall-programm jew indikaturi addizzjonali spiss iddefiniti mill-Awtoritajiet Maniġerjali u inklużi fil-qafas ta' prestazzjoni tal-programm operazzjonali. F'xi każijiet, l-indikaturi komuni huma kkumplimentati minn indikaturi fil-livell nazzjonali. Pereżempju, għall-FEŻR/FK/FSE, il-Polonja
11
tuża:
"firxa ta' indikaturi applikati fil-livell tal-proġett idderivati mil-Lista Komuni ta' Indikaturi Prinċipali mħejjija mill-Ministru għall-Iżvilupp Reġjonali. Il-lista tinkludi l-indikaturi komuni fil-livell Ewropew stabbilita fir-regolamenti dwar il-fondi u l-indikaturi ewlenin stabbiliti fil-livell nazzjonali."
Il-Portugall 12 enfasizza l-fatt li għall-perjodu 2014-2020, għal programmi operazzjonali b'għanijiet komuni, l-indikaturi li għandhom jintużaw ġew armonizzati u "barra mil-lista ta' indikaturi Komunitarji komuni hemm lista ta' indikaturi nazzjonali armonizzati".
L-Istati Membri pprovdew ukoll listi jew informazzjoni aktar dettaljata dwar diversi indikaturi speċifiċi għal ċertu programmi użati għal fondi differenti. L-Isvezja 13 ddikjarat li għad-disa' (9) programmi tal-FEŻR hemm madwar ħamsa u tletin indikaturi ta' output u "madwar tletin indikaturi tal-prestazzjoni li huma marbuta ma' prijoritajiet ta' investiment u objettivi speċifiċi fi ħdan il-programmi." Id-Danimarka 14 pprovdiet il-lista tagħha ta' indikaturi ta' impatt, indikaturi tal-output u indikaturi tar-riżultati għall-FAEŻR, l-FSE u l-FEMS. Is-Slovakkja 15 elenkat indikaturi li ġew imfassla mill-Korpi ta' Koordinazzjoni Ċentrali u li jkopru diversi programmi u pprovdiet ukoll lista ta' indikaturi għall-Fondi Strutturali u ta' Investiment Ewropej - fondi - SIE.
Finalment, l-Istati Membri ntalbu jekk humiex se jkunu jistgħu jipprovdu dejta sinifikanti dwar l-indikaturi disponibbli għal użu fir-rieżami ta' nofs it-terminu tal-QFP skedat għall-2017. Xi Stati Membri inkluż id-Danimarka, Franza u l-Greċja 16 rrapportaw li mhux se jkun possibbli li jipprovdu dejta sinifikanti sal-2017, l-aktar peress li l-livell ta' implimentazzjoni ta' ċertu programmi operazzjonali jkun baxx wisq u d-dejta ma tkunx sinifikanti. Il-Greċja 17 ddikjarat li:
"L-informazzjoni dwar il-kisba tal-miri nazzjonali tal-istrateġija "Ewropa 2020" se tkun disponibbli fir-Rapport ta' Progress 18 tal-ESS fl-2017 (u fl-2019). Madankollu, peress li l-implimentazzjoni tal-OPs mhux se tkun laħqet tat riżultati qabel jitressaq ir-rapport fl-2017, l-ebda dejta materjali ma hi mistennija li tkun disponibbli għar-rieżami ta' nofs it-terminu tal-QFP."
Il-Portugall 19 u l-Polonja 20 t-tnejn enfasizzaw il-fatt li għandhom fis-seħħ sistema ta' rapportar komprensiva li tiżgura r-rapportar ta' kwalità fuq bażi regolari. Minkejja dan, kif innutat mill-Polonja 21 :
"mhux se jkun possibbli li l-impatt tal-fondi tal-UE jinġabar fil-qosor fil-perspettiva finanzjarja 2014-20 qabel ma jkun sar progress biżżejjed - l-2017 jkun stadju bikri wisq biex jiġu prodotti konklużjonijiet fil-qosor."
Diversi Stati Membri oħra, pereżempju, l-Awstrija, il-Kroazja, ir-Repubblika Ċeka, l-Irlanda u s-Slovenja 22 kienu ċerti li tista' tiġi pprovduta dejta sinifikanti sal-2017 għal programmi taħt uħud mill-fondi. Ir-Repubblika Ċeka 23 irrapportat li:
"hija se tkun f'pożizzjoni li tipprovdi dejta affidabbli abbażi tas-sistema stabbilita fir-Repubblika Ċeka għar-rapportar dwar ir-rendikont, il-progress u l-iżvilupp".
Il-Kroazja ddikjarat ukoll li se tipprovdi dejta komprensiva u li barra minn hekk:
"jista' jintuża r-riżultat ta' evalwazzjonijiet, li għandu jikkontribwixxi għal simplifikazzjoni imtejba u possibbli ta' sistemi ta' ġestjoni u kontroll".
3.2 Tipi ta' żbalji kwantifikabbli - ksur tal-għajnuna mill-Istat u tar-regoli tal-akkwist pubbliku
Fir-rapport annwali tal-2014, il-Qorti ddikjarat li 14-il proġett FEŻR/FK fi tmien Stati Membri kisru r-regoli dwar l-Għajnuna mill-Istat tal-UE. Skont il-Qorti, l-iżbalji kwantifikati għal ksur tal-għajnuna mill-Istat jifformaw madwar 1,5 punti perċentwali ta' stima ta' żbalji għall-politika reġjonali u urbana 24 . L-Istati Membri ntalbu jipprovdu informazzjoni dwar il-ksur ta' regoli dwar l-għajnuna mill-Istat u dwar kwalunkwe miżura preventiva li ttieħdet.
It-tweġibiet tal-Istati Membri indikaw li f'xi każijiet, pereżempju Franza, il-Latvja u s-Slovenja 25 , ma kien hemm ebda kwistjoni jew defiċjenza sistematika relatati mar-regoli tal-għajnuna mill-Istat fl-għoti tal-Fondi SIE, għalkemm seta' kien hemm każijiet iżolati ta' ksur. Il-Bulgarija 26 enfasizzat żewġ każijiet ta' nonkonformità bħal dawn, it-tnejn identifikati waqt awditjar. L-ewwel wieħed kien fil-Programm Operazzjonali "L-Iżvilupp tal-Kompetittività tal-Ekonomija Bulgara 2007–2013" u t-tieni kien fis-sistemi ta' ġestjoni stabbiliti fl-ambitu tal-inizjattiva "Riżorsi Ewropej Konġunti għall-Impriżi Mikro sa Medji" (JEREMIE). Fiż-żewġ każijiet, l-Awtorità tal-Awditjar tat parir lill-awtorità maniġerjali u lill-intermedjarji finanzjarji rispettivament dwar il-kors adegwat ta' azzjoni korrettiva.
Għalkemm kien jidher li l-kwistjonijiet jew id-defiċjenzi sistemiċi ma kinux mifruxa, xi Stati Membri rraportaw dwar il-miżuri preventivi li ħadu.
L-Ungerija 27 ddikjarat li:
"fil-każ ta' talbiet għal proposti u proġetti prijoritarji, l-Uffiċċju ta' Monitoraġġ tal-Għajnuna mill-Istati, li jopera mill-uffiċċju tal-Prim Ministru, jwettaq eżami preliminari tal-konformità mar-regoli dwar l-għajnuna mill-Istat jew, fil-qafas tal-verifiki fl-ewwel livell, dan jiġi ċċekkjat mill-korpi intermedjarji / l-awtoritajiet maniġerjali abbażi ta' dikjarazzjonijiet mill-offerenti."
Franza 28 enfasizzat il-fatt li s-CGET 29 kienet wettqet għadd ta' azzjonijiet fil-kuntest tal-perjodu ta' programmazzjoni inkluż programm nazzjonali ta' taħriġ u l-ħolqien ta' netwerk ta' esperti reġjonali li jispeċjalizzaw fir-regoli ta' għajnuna mill-Istat.
Il-Lussemburgu u s-Slovenja 30 rreferew għal listi ta' kontroll bħala parti ewlenija mill-miżuri preventivi tagħhom, filwaqt li Spanja 31 ddikjarat li minbarra l-listi ta' kontroll, hija użat ukoll "matriċi għall-valutazzjoni tar-riskju".
Il-Qorti aġġornat il-mod li bih tikkwantifika ksur serju tal-akkwist pubbliku u żbalji tal-akkwist huma sors ewlieni ta' żbalji għall-Koeżjoni Ekonomika, Soċjali u Territorjali 32 . L-Istati Membri ntalbu jipprovdu informazzjoni dwar il-miżuri preskritti fil-livell nazzjonali għall-valutazzjoni u għall-kwantifikazzjoni tan-nonkonformità mar-regoli ta' akkwist pubbliku. Xi Stati Membri - l-Irlanda, il-Latvja, il-Litwanja, in-Netherlands, il-Polonja u s-Slovenja 33 indikaw li l-leġiżlazzjoni nazzjonali teżisti u li spiss il-leġiżlazzjoni tal-UE ġiet trasposta jew appoġġat leġiżlazzjoni nazzjonali. Fil-Litwanja 34 , l-Uffiċċju tal-Akkwist Pubbliku jassumi r-responsabilità ġenerali sabiex jgħin jiżgura l-implimentazzjoni xierqa tal-Programm Operazzjonali skont ir-rekwiżiti tar-regolazzjonijiet tal-UE u jipprevjeni l-irregolaritajiet. Il-Latvja 35 ddikjarat li:
"L-akkwisti jitwettqu skont il-leġiżlazzjoni nazzjonali li tfasslet abbażi ta' / ttrasponiet id-dispożizzjonijiet tal-leġiżlazzjoni tal-UE."
Finalment, l-Irlanda 36 ddikjarat li:
"Barra minn hekk, fir-rigward tal-kwistjoni tas-sorveljanzi fl-għoti ta' kuntratti tal-Gvern, il-prattiki tal-akkwist pubbliku huma soġġetti għal awditjar u għal skrutinju skont l-Att dwar il-Comptroller u l-Awditur Ġenerali (Emenda) 1993, u l-Att ta' Riforma tal-Gvern Lokali 2014, u l-Uffiċjali tal-Kontabilità huma responsabbli għan-nefqa li ssir".
Fir-rapport tagħha, il-Qorti enfasizzat każijiet ta' nuqqas ta' rispett tar-regoli ta' prokura f'ċertu Stati Membri 37 . L-Istati Membri kkonċernati ntalbu jipprovdu informazzjoni dwar in-nuqqasijiet u d-defiċjenzi possibbli fis-sistemi ta' kontroll intern rispettivi tagħhom li setgħu wasslu għal dawn l-irregolaritajiet u biex jipprovdu informazzjoni dwar il-miżuri ta' rimedju meħuda. Il-Bulgarija u Franza 38 nnotaw li l-irregolaritajiet kienu dovuti għal proċeduri ta' akkwist pubbliku kumplessi u nuqqas ta' persunal imħarreġ li jindirizza dawn il-kwistjonijiet ta' akkwist. Ir-Rumanija 39 rrapportat li:
"is-sistemi ta' kontroll intern fis-seħħ fil-qasam tal-akkwist pubbliku fil-livell benefiċjarju huma frammentati, parzjalment redundanti u jiffokaw aktar fuq aspetti formali relatati mar-regolarità tal-proċess, mingħajr ma jivvalutaw l-aspetti ta' kwalità b'mod oġġettiv."
Sabiex tirrimedja s-sitwazzjoni, hija implimentat "l-istrateġija nazzjonali għall-akkwist pubbliku għall-perjodu 2014-2020" li "tipprevedi azzjonijiet biex tiżgura r-regolarità u l-kwalita tal-proċess ta' akkwist pubbliku".
Franza, il-Polonja u Spanja 40 kollha semmew li programmi ta' taħriġ speċifiċi mfassla għal membri tal-persunal li jindirizzaw kwistjonijiet ta' akkwist pubbliku kienu miżura ewlenija biex jiżguraw il-ġestjoni aħjar ta' kwistjonijiet ta' akkwist pubbliku.
3.3 Ġestjoni finanzjarja tajba
L-Istati Membri jkomplu l-isforzi tagħhom biex iġibu 'l quddiem ġestjoni finanzjarja tajba permezz tal-użu estensiv ta' Għażliet ta' Spejjeż Simplifikati (SCOs), titjib fil-verifiki tal-ġestjoni u rapportar aħjar dwar l-istrumenti finanzjarji.
Fil-Kapitolu 6 41 , il-Qorti tirrakommanda li l-Istati Membri għandhom jagħmlu użu aħjar mill-possibilitajiet stabbiliti fir-Regolament dwar Dispożizzjonijiet Komuni u r-Regolament dwar l-FSE għall-perjodu 2014-2020 rigward is-SCOs.
Il-maġġoranza tal-Istati Membri, fosthom Ċipru, il-Finlandja, Franza, il-Ġermanja, l-Ungerija, il-Latvja, il-Litwanja, il-Lussemburgu u r-Renju Unit 42 , irrapportaw li s-SCOs kienu qed jintużaw fil-perjodu ta' programmazzjoni fil-fondi kollha, sakemm ikun possibbli. Il-Litwanja 43 ddikjarat li fl-2015, l-awtorità maniġerjali organizzat konferenza - "Possibilitajiet għall-applikazzjoni tal-proċedura simplifikata għall-ħlas tal-infiq fl-2014-2020" biex tinforma lill-parteċipanti dwar:
"il-possibilitajiet għall-applikazzjoni tal-proċedura simplifikata għall-ħlas tal-infiq u l-benefiċċji tagħha fil-proċess tal-amministrazzjoni tal-fondi strutturali tal-UE."
Il-Greċja 44 innotat li kienet qed taġġorna u tħarreġ lill-operaturi kollha fl-użu tas-SCOs filwaqt li l-Polonja 45 saħqet li għalkemm sar provvediment għall-użu tas-SCOs "l-użu tagħhom huwa fakultattiv u d-deċiżjoni finali dwar din il-kwistjoni tittieħed minn kull Awtorità Maniġerjali."
L-Isvezja 46 enfasizzat il-fatt li kellha mudell ta' simplifikazzjoni għall-FSE u li "l-gvern qed iġib 'il quddiem is-simplifikazzjoni."
Finalment, il-Portugall 47 stabbilixxa Ċentru ta' Simplifikazzjoni fl-Aġenzija għall-Iżvilupp u l-Koeżjoni (AD&C). L-iskop tiegħu hu li "jinforma lill-MAs dwar l-aspetti rilevanti f'dan il-qasam sabiex jippromwovi l-użu estensiv ta' għażliet ta' spejjeż simplifikati fil-Fondi ta' Koeżjoni differenti (FEŻR, FSE u l-Fond ta' Koeżjoni)".
Bħal fis-snin preċedenti, għall-politika reġjonali, l-impjiegi u l-affarijiet soċjali 48 , il-QEA irrapportat li għal parti kbira tat-tranżazzjonijiet affetwati minn żbalji kwantifikabbli, kien hemm informazzjoni suffiċjenti disponibbli għall-awtoritajiet tal-Istati Membri biex setgħu ipprevenew, identifikaw u kkoreġew l-iżbalji, qabel iċċertifikaw in-nefqa lill-Kummissjoni. L-Istati Membri intalbu jipprovdu informazzjoni dwar jekk kinux stabbilew miżuri biex itejbu l-verifiki tal-ġestjoni u sabiex itejbu l-effikaċja tal-verifiki li twettqu qabel ma ċċertfikaw in-nefqa lill-Kummissjoni.
Rigward xi titjib fil-verifiki tal-ġestjoni li ttieħdu, il-Lussemburgu 49 pprovda lista ta' miżuri fl-ambitu tal-FEŻR u l-FSE, li tinkludi verifika ex-post ġdida, nota ta' gwida, taħriġ u laqgħat immirati biex jibnu għarfien dwar l-għażliet ta' spejjeż simplifikati.
Il-Portugall 50 għamel referenza għall-implimentazzjoni tal-pjan ta' azzjoni f'ċertu każijiet u rrapporta wkoll li l-Awtorità taċ-Ċertifikazzjoni, qabel tressaq talbiet ta' pagamenti lill-Kummissjoni Ewropea, twettaq serje ta' verifiki. Jekk hemm dubji rigward:
"il-legalità u r-regularità tan-nefqa li trid tiġi ċċertifikata, is-somom inkwistjoni jitnaqqsu bħala miżura ta' prekawzjoni sakemm jissolvew il-kwistjonijiet."
Spanja 51 rraportat ukoll li ġew implimentati pjanijiet ta' azzjoni u:
"ġie inkorporat titjib fil-proċeduri għall-għażla u l-validazzjoni ta' dikjarazzjonijiet ta' rimborż, titjib fil-listi ta' kontroll, ir-rieżami ta' dokumenti ta' akkwist pubbliku għal diversi entitajiet lokali eċċ."
Ċipru 52 rraportat li l-akbar ammont ta' żbalji kien jeżisti
"prinċipalment f'kuntratti tal-kostruzzjoni eżegwiti mill-awtoritjiet lokali u f'kuntratti ta' żvilupp ta' softwer eżegwiti minn universitajiet pubbliċi u li l-awtoritajiet kuntrattwali huma referuti għall-Kumitat Ċentrali għall-Varjazzjonijiet u l-Klejms għall-eżami tat-talbiet ta' rikjesta għal tali kuntratti, il-provvista ta' gwida u ta' opinjoni, kif ukoll għall-medjazzjoni mal-kuntratturi involuti għar-riżoluzzjoni tat-tilwim."
Rigward il-kwalità tar-rapportar dwar strumenti finanzjarji, xi Stati Membri (pereżempju Ċipru, is-Slovenja, u l-Isvezja 53 ) wieġbu li huma segwew il-linji gwida tal-Kummissjoni, użaw il-mudelli l-ġodda u li f'xi każijiet ma kien meħtieġ ebda titjib peress li l-kwalità ta' rapportar kienet ikkunsidrata tajba.
Stati Membri oħra ikkwotaw it-titjib li sar. F'Novembru 2015, Franza 54 stabbiliet grupp ta' ħidma dwar strumenti finanzjarji bil-għan li jkun segwit il-progress fl-istrumenti u tiġi żgurata l-konsolidazzjoni tal-informazzjoni. Il-Bulgarija 55 implimentat sistema estensiva ta' rapportar annwali u kull sitt xhur għall-istrument finanzjarju, JESSICA.
4.Konklużjoni
Il-Kummissjoni diġà impenjat ruħha li timplimenta baġit tal-UE ffokat fuq ir-riżultati u dan huwa konformi mal-"approċċ kompletament ġdid" għal investiment u infiq tal-UE li l-Qorti appellat għalih fir-rapport annwali tal-2014 56 . Wieħed mill-karatteristiċi ewlenin ta' dan l-approċċ il-ġdid huwa l-prestazzjoni, li tiġi vvalutata abbażi ta' prinċipji ta' ġestjoni finanzjarja tajba 57 .
It-tweġibiet tal-Istati Membri għall-annessi urew impenn kontinwu għal ġestjoni finanzjarja tajba billi ġabu 'l quddiem b'mod attiv l-użu tas-SCOs, tejbu l-verifiki tal-ġestjoni u r-rapportar dwar strumenti finanzjarji. Skont diversi Stati Membri, il-kwistjonijiet ta' akkwist pubbliku qed jiġu indirizzati wkoll permezz tal-allinjament tal-leġiżlazzjoni nazzjonali u l-leġiżlazzjoni tal-UE. F'każijiet fejn jinsabu nuqqasijiet, fost il-miżuri li jiġu meħuda biex jirrimedjaw id-defiċjenzi fl-akkwist pubbliku hemm il-programmi ta' taħriġ, iż-żidiet fil-verifiki fuq il-post u l-irkuprar tal-ammonti, kif attestati mir-Repubblika Ċeka, il-Kroazja, il-Belġju, il-Finlandja u l-Ġermanja 58 .
It-tweġibiet mill-Istati Membri ta' din is-sena jindikaw ukoll li hemm għarfien li qed jiżdied biex tinħoloq kultura ta' prestazzjoni effettiva u biex ikun hemm fokus fuq ir-riżultati. Kważi l-Istati Membri kollha rrapportaw li jużaw l-indikaturi - komuni u speċifiċi - fil-fondi kollha, fil-livell nazzjonali u f'dak reġjonali biex ikejlu l-prestazzjoni. Minkejja dan, livelli baxxi ta' implimentazzjoni ta' programmi jista' jfisser li dejta sinifikanti dwar il-prestazzjoni ma tiġix pprovduta fil-ħin għar-rieżami ta' nofs it-terminu tal-QFP 2017. X'aktarx, dejta iktar sinifikanti tkun disponibbli skont l-oqfsa ta' prestazzjoni ta' diversi programmi skedati għall-2018 u l-2019. Il-Latvja 59 ġabret fil-qasir is-sitwazzjoni fid-dikjarazzjoni li ġejja:
"il-kwantità ta' dejta dwar ir-riżultati miksuba tista' tvarja fost assi ta' prijorità differenti, skont il-fond inkwistjoni, is-sodisfazzjon tal-kundizzjonijiet ex ante u l-iżvilupp ta' leġiżlazzjoni statutorja fil-livell nazzjonali."
Fid-dikjarazzjoni ta' konklużjoni tagħha, id-Danimarka tirrikapitula l-impenn ġenerali apparenti tal-Istati Membri għal prestazzjoni u għal baġit tal-UE ffokati fuq riżultati fid-dikjarazzjoni ta' għeluq tagħha 60 :
"Aspett vitali tal-implimentazzjoni tal-baġit tal-UE huwa dak li jiġu ġġenerati riżultati u li jiġi żgurat li dawn ir-riżultati jappoġġaw l-objettivi politiċi globali. Għalhekk, għad-Danimarka huwa importanti li l-fokus jibqa' fuq it-twaqqif ta' qafas għal sistema orjentata lejn ir-riżultati b'fokus ikbar fuq ir-riżultati u fuq l-impatt tal-proġetti tal-UE. Għalhekk, aħna nieħdu pożizzjoni pożittiva dwar il-fokus dejjem akbar fuq dan fir-rapport annwali."