20.1.2015   

MT

Il-Ġurnal Uffiċjali tal-Unjoni Ewropea

C 17/2

1.

Kemm l-intraprenditorija kif ukoll l-edukazzjoni huma prijoritajiet tal-istrateġija Ewropa 2020 għal tkabbir intelliġenti, sostenibbli u inklużiv.

2.

L-iżvilupp ta’ mentalità intraprenditorjali jista’ jkollu benefiċċji konsiderevoli għaċ-ċittadini kemm fil-ħajja professjonali tagħhom kif ukoll f’dik privata.

3.

L-intraprenditorija fl-edukazzjoni u t-taħriġ tista’ trawwem l-impjegabbiltà, l-impjieg indipendenti u ċ-ċittadinanza attiva, kif ukoll istituzzjonijiet għall-edukazzjoni u t-taħriġ orjentati lejn l-estern u adattabbli.

4.

L-intraprenditorija fl-edukazzjoni u t-taħriġ għandhom jimmiraw li jipprovdu lil kull min qed jitgħallem, irrispettivament mis-sess, l-isfond soċjo-ekonomiku jew ħtiġijiet speċjali, il-ħiliet u l-kompetenzi meħtieġa biex jibni mentalità u kapaċità intraprenditorjali.

5.

L-intraprenditorija fl-edukazzjoni u t-taħriġ tista’ wkoll tagħti lil min qed jitgħallem il-ħiliet, il-kompetenzi u s-sostenn meħtieġa għall-ħolqien ta’ intrapriżi ġodda, pereżempju fil-forma ta’ SMEs u intrapriżi soċjali.

6.

Minbarra l-ħiliet bażiċi bħall-ħila tal-qari u l-ħila fil-kompetenzi aritmetiċi u matematiċi, l-intraprenditorija teħtieġ l-iżvilupp gradwali ta’ firxa ta’ kompetenzi, li jibda minn età bikrija. Dawn jinkludu, pereżempju, il-kreattività u sens ta’ inizjattiva; il-ħila li wieħed isolvi l-problemi u li jaħseb b’mod kritiku; it-teħid ta’ deċiżjonijiet u ta’ riskji; l-adattabbiltà u l-perseveranza; l-awtodixxiplina u sens ta’ responsabbiltà; il-ħila fit-tmexxija u ta’ ħidma fi grupp; il-ħila li wieħed jippjana u jorganizza; li wieħed jifhem il-kuntest soċjali, ekonomiku u kulturali; u ħiliet fil-lingwi u l-kapaċità tal-persważjoni.

7.

Il-ħiliet u l-kompetenzi intraprenditorjali għandhom jiġu indirizzati fil-livelli kollha tal-edukazzjoni u t-taħriġ u, kemm jista’ jkun, fil-kurrikulu kollu b’mod li jippermetti l-iżvilupp kontinwu tagħhom, b’attenzjoni għall-kisba ta’ riżultati ta’ tagħlim intraprenditorjali.

8.

L-istituzzjonijiet tal-edukazzjoni u t-taħriġ għandhom huma stess iħabirku biex ikunu aktar kreattivi u innovattivi, b’reazzjoni għal ambjent li qed jinbidel rapidament xprunat mit-teknoloġija, il-globalizzazzjoni u l-ħtiġiet għal kompetenzi li jevolvu. L-għalliema, min iħarreġ u l-mexxejja edukattivi għandhom ikunu inkoraġġuti jrawmu ħiliet, kompetenzi u mentalità intraprenditorjali, filwaqt li l-istituzzjonijiet għandhom joffru ambjenti ta’ tagħlim kreattivi u innovattivi u jħeġġu attivament l-involviment fil-komunità inġenerali.

9.

Sħubijiet bejn l-istituzzjonijiet tal-edukazzjoni u t-taħriġ u n-negozji, b’mod partikolari l-SMEs, jistgħu jgħinu biex titrawwem kooperazzjoni aktar mill-qrib bejn id-dinja tal-edukazzjoni u t-taħriġ u d-dinja tax-xogħol. In-negozji u l-organizzazzjonijiet tan-negozji għandhom għalhekk jiġu mħeġġa jappoġġaw l-intraprenditorija fl-edukazzjoni u t-taħriġ, pereżempju permezz tal-provvediment ta’ pjattaformi fiżiċi jew virtwali mfassla biex jippromwovu sħubijiet bħal dawn u tagħlim ibbażat fuq ix-xogħol.

10.

L-integrazzjoni tat-trianglu tal-għarfien bejn l-edukazzjoni, ir-riċerka u l-innovazzjoni - bħal dik appoġġata mill-Istitut Ewropew tal-Innovazzjoni u t-Teknoloġija (EIT) - ittejjeb il-proċess tat-tagħlim, billi jistimola l-ħsieb kreattiv u attitudnijiet u approċċi innovattivi li spiss jirriżultaw fil-ħolqien ta’ intrapriżi ġodda.

11.

Attivitajiet ta’ edukazzjoni u taħriġ fil-livell ta’ masters u ta’ dottorat, bħal dawk li jsiru mill-Komunitajiet tal-Għarfien u l-Innovazzjoni tal-EIT, jgħinu wkoll biex jippromwovu l-iżvilupp ta’ ħiliet relatati mal-innovazzjoni, it-titjib ta’ ħiliet u kompetenzi maniġerjali u intraprenditorjali u l-mobilità tar-riċerkaturi u l-istudenti.

12.

It-tagħlim mhux formali u informali, kif ukoll attivitajiet volontarji, jistgħu wkoll jagħtu kontribut importanti għall-iżvilupp ta’ ħiliet, kompetenzi u mentalitajiet intraprenditorjali.

1.

Iħeġġu l-iżvilupp ta’ approċċ koordinat għall-edukazzjoni intraprenditorjali tul is-sistema kollha tal-edukazzjoni u t-taħriġ, inkluż pereżempju permezz tal-kollegament tal-ministeri tal-edukazzjoni u ministeri rilevanti oħrajn, tal-faċilitazzjoni għall-involviment tan-negozji u tal-intraprendituri - kif ukoll tas-settur mingħajr skop ta’ profitt - fil-livelli kollha ta’ ppjanar u ta’ implimentazzjoni (inklużi sħubijiet bejn l-istituzzjonijiet tal-edukazzjoni u t-taħriġ u n-negozji), u permezz tal-inkoraġġiment ta’ evalwazzjoni u monitoraġġ speċifiċi.

2.

Jippromwovu l-inklużjoni ta’ ħiliet u kompetenzi intraprenditorjali fil-programmi inizjali tal-edukazzjoni għall-għalliema/ħarrieġa kif ukoll waqt l-iżvilupp professjonali kontinwu.

3.

Jiżviluppaw sinerġiji bejn l-edukazzjoni u t-taħriġ intraprenditorjali u l-pariri dwar il-karrieri bħala appoġġ għall-kisba tal-kompetenza importanti tal-intraprenditorija u bħala riflessjoni tal-ħolqien ta’ impriżi bħala possibbiltà ta’ karriera.

4.

Jappoġġaw inizjattivi ta’ intrapriża għall-istudenti, pereżempju billi jinkoraġġixxu l-ħolqien ta’ ambjenti ta’ tagħlim xierqa, l-għoti ta’ pariri siewja dwar il-karrieri fil-livelli kollha tal-edukazzjoni u t-taħriġ u - b’mod partikolari fl-oqsma tal-edukazzjoni għolja u l-edukazzjoni u taħriġ vokazzjonali (ETV) - id-disponibbiltà ta’ mentoring u inkubaturi għal intraprendituri aspiranti.

5.

Jiffaċilitaw u jistimolaw l-involviment ta’ intraprendituri fil-proċess tat-tagħlim, kif ukoll jieħdu mill-esperjenza ta’ dawk diġà gradwati, pereżempju billi jiġu mistiedna intraprendituri f’istituzzjonijiet tal-edukazzjoni u t-taħriġ biex jiddiskutu l-esperjenzi tagħhom ma’ studenti, għalliema u ħarrieġa jew billi jingħataw opportunitajiet għal tagħlim, traineeships u apprendistati bbażati fuq ix-xogħol.

6.

Jużaw, fejn ikun possibbli, informazzjoni dwar is-sitwazzjoni tal-gradwati meta ssir valutazzjoni tal-kwalità u l-effikaċja tal-edukazzjoni u t-taħriġ intraprenditorjali.

7.

Jippromwovu esperjenzi intraprenditorjali prattiċi, bħalma huma sfidi ta’ kreattività, bidu ta’ impriżi, simulazzjonijiet ta’ negozju jew tagħlim ibbażat fuq proġetti intraprenditorjali, waqt li titqies il-ħtieġa ta’ approċċ rilevanti għall-età.

8.

Jinnotaw il-ħidma li ssir mill-Grupp ta’ Ħidma Tematiku dwar l-Edukazzjoni fl-Intraprenditorija.

9.

Jappoġġaw l-istituzzjonijiet tal-edukazzjoni għolja (HEIs) fl-isforzi tagħhom biex jiżviluppaw miżuri mmirati għall-ġestjoni ta’ bidliet istituzzjonali u aktar żvilupp organizzattiv, b’mod partikolari fir-rigward tal-promozzjoni ta’ mentalità aktar intraprenditorjali u innovattiva.

10.

Jippromwovu l-użu tal-istrument fuq l-Internet HEInnovate  (3) bħala mezz li jappoġġa l-HEIs fit-tfassil ta’ strateġiji effettivi għall-iżvilupp ta’ aktar kapaċitajiet intraprenditorjali u innovattivi, billi jtejjeb l-għarfien dwar kwistjonijiet u sfidi li jfeġġu u billi jagħti gwida dwar kif dawn għandhom jiġu indirizzati.

11.

B’kont meħud tal-Prinċipji dwar it-Taħriġ Innovattiv għad-Dottorat (4), li jissottolinjaw li t-tħabrik għal riċerka eċċellenti huwa fundamentali, jenfasizzaw ir-rwol tar-riċerkaturi fl-istadju bikri bħala aġenti tat-trasferiment tal-għarfien lid-dinja mhux akkademika, b’mod partikolari u fejn ikun xieraq, billi jistimulaw il-kuntatt ta’ kandidati għal PhD mal-industrija u setturi tal-impjieg oħra rilevanti, kif ukoll il-kisba ta’ ħiliet trasferibbli differenti, inkluża l-intraprenditorija, permezz ta’ taħriġ jew esperjenza prattika adatti.

12.

Iħeġġu d-disponibbiltà ta’ servizzi li jassistu lill-iskejjel u l-istituzzjonijiet u min jipprovdi l-ETV u t-tagħlim għall-adulti biex isibu sħab mid-dinja tan-negozju u l-intraprendituri soċjali.

13.

Iħeġġu sforzi mill-istituzzjonijiet tal-ETV biex jappoġġaw il-ħolqien ta’ intrapriżi minn studenti permezz tal-iskambju ta’ prattiki tajbin u l-intensifikazzjoni ta’ rabtiet ma’ intrapriżi kummerċjali u soċjali.

14.

Jippromwovu d-disponibbiltà u l-aċċess għal programmi ta’ apprendistat u inizjattivi oħrajn ta’ tagħlim bbażati fuq ix-xogħol li għandhom dimensjoni intraprenditorjali.

15.

Iħeġġu lil min jipprovdi tagħlim għall-adulti biex, fejn ikun possibbli, jintegraw il-ħiliet u l-kompetenzi intraprenditorjali fit-tagħlim eżistenti jew permezz ta’ korsijiet speċifiċi.

1.

Jesploraw - f’kollaborazzjoni mill-qrib mal-Grupp ta’ Ħidma dwar il-Ħiliet Trasversali “ET2020” - il-fattibbiltà u l-utilità tal-iżvilupp ta’ qafas ta’ referenza bħala gwida għall-kompetenza importanti tal-intraprenditorija (5), li juri l-elementi differenti tal-kompetenza u juża approċċ ibbażat fuq ir-riżultati u l-livelli tat-tagħlim. Dan ikun jappoġġa approċċ koordinat bejn il-livelli differenti tal-edukazzjoni u t-taħriġ, kif ukoll jgħin biex jitqiesu l-eżiti tat-tagħlim mhux formali u t-tagħlim informali.

2.

Jiffaċilitaw l-iskambju ta’ ideat u prattiki tajba fil-livell nazzjonali u Ewropew - pereżempju permezz tal-Grupp ta’ Ħidma dwar Ħiliet Trasversali “ET 2020” - bil-ħsieb li tittejjeb l-intraprenditorija fl-edukazzjoni u t-taħriġ.

3.

Jesploraw il-valur miżjud tal-iżvilupp ta’ strument għaċ-ċittadini fil-livell Ewropew għall-awtovalutazzjoni tal-kompetenza fl-intraprenditorija, inkluż l-identifikazzjoni ta’ xi strumenti simili li huma attwalment disponibbli.

4.

Jisfruttaw il-potenzjal sħiħ li joffri Erasmus+ fl-appoġġ għall-edukazzjoni intraprenditorjali, pereżempju billi jħeġġu l-integrazzjoni tal-kooperazzjoni bejn l-edukazzjoni u n-negozju f’Alleanzi ta’ Għarfien għall-edukazzjoni għolja u f’Alleanzi ta’ Ħiliet Settorjali għall-ETV. B’mod partikolari, jikkunsidraw ir-riżultati tal-inizjattiva Ewropea dwar il-politiki sperimentali rigward esperjenzi intraprenditorjali prattiċi.

5.

Jippromwovu l-edukazzjoni fil-ħiliet u l-kompetenzi intraprenditorjali għall-għalliema u l-ħarrieġa, pereżempju permezz ta’ proġetti li jlaqqgħu flimkien netwerks ta’ għalliema u ħarrieġa u li jinkoraġġixxu l-kontribut ta’ intraprendituri proprja, jew permezz tal-iżvilupp ta’ korsijiet jew riżorsi ġodda, inkluż permezz tat-tagħlim diġitali u t-tagħlim bl-Internet.

6.

Fil-kuntest tal-implimentazzjoni tal-Garanzija għaż-Żgħażagħ, jesploraw modi sabiex jiggwidaw liż-żgħażagħ lejn l-attivitajiet intraprenditorjali permezz ta’ taħriġ rilevanti, filwaqt li titjieb il-kooperazzjoni bejn l-istituzzjonijiet tal-edukazzjoni u t-taħriġ u d-dinja tax-xogħol sabiex jidentifikaw żgħażagħ li jistgħu jibbenefikaw mill-Iskema, tingħata promozzjoni lit-tagħlim intraprenditorjali għall-parteċipanti fl-Iskema u jiġi identifikat il-bidu ta’ negozji bħala karriera potenzjali.

7.

Iqisu kif l-aħjar jużaw riżorsi Ewropej oħrajn bħall-Fond Soċjali Ewropew b’appoġġ għall-promozzjoni tal-intraprenditorjat fl-edukazzjoni u t-taħriġ.

8.

Jappoġġaw il-kooperazzjoni bejn l-intraprendituri u l-istituzzjonijiet tal-edukazzjoni u t-taħriġ bil-ħsieb li jiġu żviluppati soluzzjonijiet edukattivi innovattivi, pereżempju permezz ta’ kompetizzjonijiet u inkubaturi.

9.

Jappoġġaw il-kooperazzjoni u l-iskambji ma’ netwerks u organizzazzjonijiet fil-livell reġjonali, nazzjonali u dak Ewropew, li jistgħu joffru esperjenza u għarfien espert fit-tisħiħ tal-intraprenditorija fl-edukazzjoni u t-taħriġ u fl-iżvilupp ta’ strumenti u metodoloġiji mfassla biex jippromwovu l-intraprenditorija bħala kompetenza importanti.

10.

Filwaqt li jqisu l-ħidma li saret mill-Grupp ta’ Esperti dwar id-Data u l-Indikaturi tat-Tagħlim u l-Kompetenza Intraprenditorjali, u bl-involviment xieraq tal-Grupp Permanenti dwar Indikaturi u Punti ta’ Referenza, jesploraw aktar is-siwi u l-possibbiltà li jiġu ddefiniti indikaturi dwar l-edukazzjoni fl-intraprenditorija biex tissaħħaħ il-bażi tal-evidenza u bħala appoġġ fl-identifikazzjoni tal-oqsma tal-aħjar prattika.

11.

Jesploraw il-potenzjal għall-iżvilupp ta’ strumenti diġitali u fuq l-Internet bla ħlas u miftuħa għal kulħadd, li jsaħħu l-kisba ta’ ħiliet u kompetenzi intraprenditorjali u innovattivi, u jesploraw il-kooperazzjoni mal-komunità tal-“open source” biex jippromwovu strumenti kummerċjali bla ħlas, kif ukoll taħriġ għal dawk l-istrumenti.

12.

Jippromwovu sinerġiji mas-settur tar-riċerka u l-innovazzjoni, bil-ħsieb li jinkoraġġixxu inizjattivi maħsuba għall-iżvilupp u t-twessigħ ta’ ħiliet u kompetenzi intraprenditorjali.

13.

Jappoġġaw l-iżvilupp ulterjuri, l-adattament u d-disseminazzjoni ta’ HEInnovate bħala strument għal HEIs intraprenditorjali u innovattivi, billi titqies l-evidenza miġbura bl-applikazzjoni tiegħu f’dawk l-HEIs li jagħżlu li jipparteċipaw, bl-użu tal-konklużjonijiet tal-evalwazzjonijiet nazzjonali tal-OECD u bl-iffaċilitar ta’ skambji regolari mal-Istati Membri u l-partijiet konċernati tal-HEI.

14.

Jistiednu lill-EIT biex jesplora l-potenzjal tat-tikketta “innovatur u intraprenditur ċertifikat” tal-EIT li qed tiġi żviluppata bħalissa u jorbotha mal-aġenda edukattiva kumplessiva tiegħu, u jikkomunikaw ir-riżultati b’mod ampju, skont l-aġenda ta’ sensibilizzazzjoni tal-EIT, filwaqt li jevitaw kull piż amministrattiv addizzjonali.

15.

Jisfruttaw, fejn ikun xieraq, il-potenzjal intraprenditorjali tal-edukazzjoni għolja, billi jiġu identifikati fatturi abilitanti f’termini kurrikulari, ekstrakurrikulari u istituzzjonali, permezz tal-promozzjoni aktar mifruxa ta’ dawn fl-HEIs u f’livelli oħra tal-edukazzjoni u bl-użu ta’ studji rilevanti dwar l-appoġġ għal tali potenzjal.

16.

Jikkunsidraw ir-rwol u l-impatt tal-Forum Università-Negozju, b’mod partikolari r-rakkomandazzjoni tal-Pilastru intraprenditorjali tiegħu, bil-ħsieb li jiġu żviluppati approċċi innovattivi u jitrawmu skambji dwar suġġetti b’rabta mal-intraprenditorija f’salib it-toroq bejn l-universitajiet u n-negozji.

17.

Jesploraw il-potenzjal ta’ Entrepreneurship360 bħala strument biex jgħin lill-iskejjel u l-istituzzjonijiet tal-ETV jidentifikaw u jaġixxu fir-rigward tal-qawwiet u dgħufijiet intraprenditorjali tagħhom.

18.

Jappoġġaw l-użu ta’ netwerks u l-iżvilupp ta’ proġetti għal għalliema u ħarrieġa fl-edukazzjoni intraprenditorjali, pereżempju permezz tal-pjattaformi eTwinning u EPALE.

19.

Jesploraw il-potenzjal tal-Forum Ewropew għall-Impriżi dwar it-Taħriġ Vokazzjonali, b’mod partikolari billi jikkunsidraw ir-riżultati u r-rakkomandazzjonijiet tiegħu rigward intraprenditorija, kif ikun adatt.

20.

Fi ħdan l-Alleanza Ewropea għall-Apprendistati, iħeġġu inizjattivi għall-iżvilupp u t-twessigħ ta’ ħiliet u kompetenzi intraprenditorjali fil-kuntest ta’ programmi ta’ apprendistat u ta’ tagħlim ieħor ibbażat fuq ix-xogħol.

1.

Iżżid il-bażi ta’ evidenza dwar l-edukazzjoni intraprenditorjali permezz ta’ studji rilevanti, bħar-rapport tematiku Eurydice ippjanat għall-2015.

2.

Tirrapporta dwar il-komunikazzjoni u l-impatt tal-istrument HEInnovate u l-metodoloġija tiegħu sal-ewwel nofs tal-2016, u tagħmel kwalunkwe rakkomandazzjoni rilevanti għall-iżvilupp ulterjuri tiegħu.