22.12.2015

Il-Ġurnal Uffiċjali tal-Unjoni Ewropea

C 431/1

AVVIŻ TAL-KUMMISSJONI

Linji gwida dwar l-applikazzjoni tar-regoli speċifiċi stabbiliti fl-Artikoli 169, 170 u 171 tar-Regolament dwar l-OKS (organizzazzjoni komuni tas-swieq) għas-setturi taż-żejt taż-żebbuġa, tal-laħam taċ-ċanga u tal-vitella u tal-uċuħ tar-raba'

(2015/C 431/01)

WERREJ

INTRODUZZJONI: L-GĦAN U L-AMBITU TA' DAWN IL-LINJI GWIDA

REGOLI ĠENERALI U SETTORJALI APPLIKABBLI GĦALL-FTEHIMIET KONKLUŻI MINN PRODUTTURI TAŻ-ŻEJT TAŻ-ŻEBBUĠA, TAL-LAĦAM TAĊ-ĊANGA U TAL-VITELLA U TAL-UĊUĦ TAR-RABA'

2.1.

Introduzzjoni

2.2.

Qafas ġenerali tal-kompetizzjoni

2.2.1.

L-applikazzjoni tal-Artikoli 101 u 102 TFUE għall-produzzjoni u l-kummerċ fi prodotti agrikoli

2.2.2.

Derogi speċifiċi barra mil-leġiżlazzjoni agrikola mill-applikazzjoni tal-Artikolu 101 TFUE: Regolament dwar Eżenzjoni ta' Kategorija ta' Speċjalizzazzjoni

2.3.

Deroga ġenerali fir-Regolament dwar l-OKS: L-Artikoli 206 u 209

2.4.

Deroga mill-applikazzjoni tal-Artikoli 101 u 102 TFUE għas-setturi taż-żejt taż-żebbuġa, tal-laħam taċ-ċanga u tal-vitella, u tal-uċuħ tar-raba', kif stabbiliti fl-Artikoli 169, 170 u 171 tar-Regolament dwar l-OKS

2.5.

Valutazzjoni ta' OP dwar il-kompatibbiltà tal-akkordju mar-regoli tal-kompetizzjoni

KUNDIZZJONIJIET GĦALL-APPLIKAZZJONI TAD-DEROGA

3.1.

Ir-rikonoxximent tal-OP/AOP

3.2.

L-objettivi tal-OP u l-akkwist ta' prodotti minn dawk li mhumiex membri

3.3.

It-Test tal-Effiċjenzi Sinifikanti

3.3.1.

Il-metodu simplifikat

3.3.2.

Il-metodu alternattiv

3.4.

Ir-relazzjonijiet bejn l-OP u l-membri tagħha

3.5.

Il-produzzjoni tal-PAK

3.6.

L-obbligu ta' notifika

3.7.

Is-salvagwardji

3.7.1.

Introduzzjoni

3.7.2.

L-esklużjoni tal-kompetizzjoni

3.7.3.

Suq rilevanti iżgħar tal-prodott b'effetti antikompetittivi

3.7.4.

L-objettivi tal-PAK ikunu pperikolati

ID-DISPOŻIZZJONIJIET SPEĊIFIĊI DWAR IS-SETTURI KKONĊERNATI

4.1.

Iż-żejt taż-żebbuġa

4.1.1.

Eżempji tal-applikazzjoni tad-Deroga fis-settur taż-żejt taż-żebbuġ

4.1.2.

L-identifikazzjoni tas-suq rilevanti

4.1.2.1.

Is-suq rilevanti tal-prodott

4.1.2.2.

Is-suq ġeografiku rilevanti

4.2.

Is-settur tal-laħam taċ-ċanga u tal-vitella

4.2.1.

Eżempji tal-applikazzjoni tad-deroga fis-settur tal-laħam taċ-ċanga u tal-vitella

4.3.

Uċuħ tar-raba'

4.3.1.

Eżempji tal-applikazzjoni tad-deroga fis-settur tal-uċuħ tar-raba'

ANNESS I:

Flowchart għall-Produtturi

ANNESS II:

Flowchart għal OP/AOP

1. INTRODUZZJONI: L-GĦAN U L-AMBITU TA' DAWN IL-LINJI GWIDA

(1)

Dawn il-Linji Gwida (1) jiggwidaw lill-produtturi taż-żejt taż-żebbuġa, tal-laħam taċ-ċanga u tal-vitella, u s-setturi tal-uċuħ tar-raba' dwar kif għandhom jikkonformaw mal-Artikoli 169, 170 u 171 tar-Regolament dwar l-OKS (2) li jistabbilixxi regoli speċifiċi għal negozjati kuntrattwali f'dawn is-setturi. Dawn, madankollu, huma suġġetti għall-paragrafu 3 tal-Artikoli 206 tar-Regolament dwar l-OKS (3).

(2)

Il-Linji Gwida mhumiex legalment vinkolanti. Filwaqt li dawn għandhom l-għan li jipprovdu gwida speċifika lill-produtturi, tibqa' r-responsabbiltà tal-produtturi li jivvalutaw il-prattiċi proprji tagħhom. Il-Linji Gwida huma maħsuba wkoll biex jiggwidaw lill-qrati u lill-awtoritajiet tal-kompetizzjoni tal-Istati Membri fl-applikazzjoni tal-Artikoli 169, 170 u 171 tar-Regolament dwar l-OKS.

(3)

L-entitajiet ikkonċernati b'dawn il-Linji Gwida huma ddefiniti kif ġej:

—	Produttur huwa produttur tal-prodott ikkonċernat;

—	OP hija Organizzazzjoni tal-Produtturi kif definita fl-Artikolu 152 tar-Regolament dwar l-OKS;

—	AOP hija Assoċjazzjoni ta' Organizzazzjonijiet tal-Produtturi kif definita fl-Artikolu 156 tar-Regolament dwar l-OKS.

Meta l-Linji Gwida jirreferu għal Organizzazzjoni tal-Produtturi (OP), din ir-referenza għandha tinftiehem bħala li tinkludi l-Assoċjazzjoni ta' Organizzazzjonijiet tal-Produtturi (AOP) jekk mhux speċifikat mod ieħor b'mod espliċitu. OP tista' tiġi stabbilita taħt forom legali differenti, skont ir-regoli nazzjonali applikabbli. Fejn il-kooperattivi huma rikonoxxuti bħala OP ikunu jistgħu jibbenefikaw mill-Artikoli 169, 170 u 171 tar-Regolament dwar l-OKS. L-organizzazzjonijiet interprofessjonali rikonoxxuti mhumiex koperti mill-Artikoli 169, 170 u 171 tar-Regolament dwar l-OKS. Huma jistgħu madankollu jibbenefikaw mill-possibbiltà ta' deroga stabbilita fl-Artikolu 210 tar-Regolament dwar l-OKS.

(4)

L-Artikoli 169, 170 u 171 tar-Regolament dwar l-OKS jippermetti lill-OP u lill-AOP li jinnegozjaw, f'isem il-membri tagħhom, kuntratti għall-provvista tal-prodotti kkonċernati b'numru ta' kundizzjonijiet (4).

(5)

Il-Linji Gwida jindirizzaw il-kwistjonijiet li ġejjin:

—	Il-qafas tar-regoli tal-kompetizzjoni li japplikaw b'mod ġenerali;

—	Ir-regoli speċifiċi stabbiliti fl-Artikoli 169, 170 u 171 tar-Regolament dwar l-OKS;

—	L-applikazzjoni prattika tar-regoli speċifiċi stabbiliti fl-Artikoli 169, 170 u 171 tar-Regolament dwar l-OKS fis-setturi agrikoli kkonċernati.

(6)

Il-pożizzjoni tal-Kummissjoni Ewropea hija mingħajr preġudizzju għall-każistika tal-Qorti tal-Ġustizzja tal-Unjoni Ewropea (5) rigward l-interpretazzjoni tal-Artikoli 39, 42, 101 u 102 tat-Trattat dwar il-Funzjonament tal-Unjoni Ewropea (minn hawn 'il quddiem it-“TFUE”) u tal-Artikoli 169, 170 u 171 tar-Regolament dwar l-OKS.

(7)

Il-Kummissjoni tkompli tissorvelja t-tħaddim tal-Linji Gwida fuq il-bażi ta' informazzjoni dwar is-suq mingħand il-partijiet interessati u l-Awtoritajiet Nazzjonali tal-Kompetizzjoni ANK) u tista' tirrevedi l-Linji Gwida fid-dawl ta' żviluppi futuri u għarfien għal żvilupp. Sakemm ikun hemm reviżjoni tal-Linji Gwida, dawn jibqgħu validi sakemm l-Artikoli 169, 170 u 171 tar-Regolament dwar l-OKS mhumiex modifikati. Fil-każ ta' modifika tal-artikoli kollha jew kwalunkwe artikolu msemmija hawn fuq, il-Linji Gwida jiġu, fejn xieraq, riveduti u aġġornati skont il-bidliet adottati.

2. REGOLI ĠENERALI U SETTORJALI APPLIKABBLI GĦALL-FTEHIMIET KONKLUŻI MINN PRODUTTURI TAŻ-ŻEJT TAŻ-ŻEBBUĠA, TAL-LAĦAM TAĊ-ĊANGA U TAL-VITELLA U TAL-UĊUĦ TAR-RABA'

2.1. Introduzzjoni

(8)

L-Artikolu 42 TFUE jagħti lil-leġiżlatur tal-UE (il-Parlament Ewropew u l-Kunsill) s-setgħa li jiddeċiedi sa fejn ir-regoli tal-kompetizzjoni japplikaw għall-produzzjoni u l-kummerċ fi prodotti agrikoli.

(9)

B'mod aktar preċiż, skont l-Artikolu 42 TFUE, il-leġiżlatur tal-UE jiddeċiedi l-livell tal-applikazzjoni tar-regoli tal-kompetizzjoni għas-settur agrikolu, billi jikkunsidra l-objettivi tal-Politika Agrikola Komuni (minn hawn 'il quddiem l-“objettivi tal-PAK”) stabbiliti fl-Artikolu 39 TFUE. Skont il-Qorti tal-Ġustizzja, din id-dispożizzjoni tirrikonoxxi l-preċedenza tal-objettivi tal-politika agrikola fuq l-għanijiet tat-Trattat fir-rigward tal-kompetizzjoni (6).

(10)

Skont l-Artikolu 39 TFUE, l-objettivi tal-PAK huma dawn li ġejjin:

a.	Li tkabbar il-produzzjoni agrikola billi tippromwovi progress tekniku u billi tassigura l-iżvilupp razzjonali tal-produzzjoni agrikola u l-aħjar utilizzazzjoni tal-fatturi ta' produzzjoni, speċjalment ix-xogħol;

b.	Għalhekk sabiex jiġi assigurat livell ġust ta' għajxien għall-komunità agrikola, partikolarment billi tkabbar il-qligħ individwali tal-ħaddiema fl-agrikoltura;

c.	Li tistabbilizza s-swieq;

d.	Li tassigura d-disponibbiltà tal-provvisti; u

e.	Li tassigura prezzijiet raġonevoli fil-konsenja tal-prodotti lill-konsumaturi.

2.2. Qafas ġenerali tal-kompetizzjoni

2.2.1. L-applikazzjoni tal-Artikoli 101 u 102 TFUE għall-produzzjoni u l-kummerċ fi prodotti agrikoli

(11)

Fuq il-bażi tal-Artikolu 42 TFUE, l-Artikolu 206 tar-Regolament dwar l-OKS jiddikjara r-regoli tal-kompetizzjoni fl-Artikoli minn 101 sa 106 TFUE bħala applikabbli għall-produzzjoni u l-kummerċ fi prodotti agrikoli:

“Ħlief jekk ma jkunx previst mod ieħor f'dan ir-Regolament, u skont l-Artikolu 42 TFUE, l-Artikoli 101 sa 106 TFUE u d-dispożizzjonijiet ta' implimentazzjoni tiegħu għandhom, bla ħsara għall-Artikoli 207 sa 210 ta' dan ir-Regolament, japplikaw għal ftehimiet, deċiżjonijiet u prattiki kollha msemmija fl-Artikolu 101(1) u fl-Artikolu 102 TFUE li huma relatati mal-produzzjoni ta' prodotti agrikoli u mal-kummerċ tagħhom.”

(12)

L-Artikoli 101 (7) u 102 (8) TFUE japplikaw għall-imġiba ta' impriżi u assoċjazzjonijiet ta' impriżi fil-forma ta' akkordji, deċiżjonijiet, prattiċi jew abbuż minn pożizzjoni dominanti biss sa fejn dawn “jistgħu jolqtu l-kummerċ bejn l-Istati Membri”. Dettalji dwar l-interpretazzjoni ta' dan il-kriterju ta' applikabbiltà jinsabu fil-Linji Gwida tal-Kummissjoni Ewropea dwar l-effett fuq il-kummerċ (9). Jekk il-kummerċ bejn l-Istati Membri mhuwiex affettwat, japplikaw ir-regoli nazzjonali tal-kompetizzjoni.

(13)

L-Artikolu 101 TFUE japplika, fil-prinċipju, għall-attivitajiet ekonomiċi kollha tal-produtturi u l-OP. L-OP hija assoċjazzjoni ta' produtturi individwali u konsegwentement hija meqjusa kemm bħala assoċjazzjoni ta' impriżi u kif ukoll bħala impriża fiha nfisha għall-finijiet tal-applikazzjoni tad-dritt tal-UE dwar il-kompetizzjoni (10), meta hija twettaq attività ekonomika. Konsegwentement, kemm l-OP u kif ukoll il-membri tagħha jridu jkunu konformi mar-regoli tal-kompetizzjoni. Għalhekk, ir-regoli tal-kompetizzjoni ma japplikawx biss għall-akkordji bejn il-produtturi individwali (pereż. il-ħolqien ta' OP u l-istatuti ta' fondazzjoni tagħha), iżda wkoll għad-deċiżjonijiet meħuda u l-kuntratti konklużi mill-OP.

(14)

Il-Qorti tal-Ġustizzja qatgħet numru ta' sentenzi li jittrattaw il-kooperattivi b'mod partikolari. Tabilħaqq, il-kooperattivi huma forma speċifika ta' OP. Meta kienet qiegħda tivvaluta l-applikabilità tal-Artikolu 101(1) TFUE għall-kooperattivi (li hija waħda mill-forom possibbli kif tista' tiġi stabbilita OP), il-Qorti tal-Ġustizzja sostniet li l-organizzazzjoni ta' impriża fil-forma speċifika ta' assoċjazzjoni kooperattiva, ma tikkostitwixxix fiha nfisha mġiba antikompetittiva. Madankollu, dan ma jfissirx li l-assoċjazzjonijiet kooperattivi, bħala tali, awtomatikament jaqgħu barra mill-projbizzjoni tal-Artikolu 101(1) TFUE billi dawn xorta waħda jistgħu jinfluwenzaw l-imġiba kummerċjali tal-membri tagħhom sabiex jillimitaw jew jgħawġu l-kompetizzjoni fis-suq li fih joperaw dawk l-impriżi (11).

(15)

Eżempju tal-applikazzjoni tal-Artikolu 101 TFUE għall-attivitajiet tal-produtturi:

Sitwazzjoni	:	Is-suq għall-provvista ta' bhejjem ħajjin f'pajjiż jesperjenza tnaqqis kontinwu tad-domanda domestika minħabba li tonqos id-domanda tal-konsumatur finali għal-laħam taċ-ċanga. Barra minn hekk, l-importazzjonijiet tal-karkassi u l-laħam taċ-ċanga maqtugħ, u sa ċertu punt anqas l-importazzjonijiet tal-bhejjem ħajjin, jiżdiedu. Il-biċċeriji fil-pajjiż inaqqsu b'mod sinifikanti x-xirjiet tagħhom ta' bhejjem ħajjin u l-prezzijiet tal-bhejjem ħajjin jonqsu b'mod sinifikanti. Sabiex jiffaċċaw din is-sitwazzjoni, numru kbir ta' fornituri ta' bhejjem ħajjin (li jkopru madwar 60 % tas-suq tal-bhejjem ħajjin) jikkonkludu akkordju bejniethom, li jistabbilixxi prezz tal-bejgħ minimu għall-bhejjem ħajjin tagħhom li jridu jinbiegħu lill-biċċeriji.
Analiżi	:	L-akkordju għandu l-għan li jillimita l-kompetizzjoni billi jistabbilixxi prezz uniformi. Minħabba f'hekk, dan jikser il-projbizzjoni tal-prattiċi antikompetittivi, id-deċiżjonijiet ta' assoċjazzjonijiet u l-prattiċi miftiehma stabbiliti fl-Artikolu 101(1) TFUE. L-akkordju ma joħloq l-ebda benefiċċju għall-konsumaturi u jelimina l-kompetizzjoni għal parti sostanzjali tas-suq għall-bhejjem ħajjin. Għalhekk ma jistax jiġi ġustifikat fuq il-bażi tal-Artikolu 101(3) TFUE. Għaldaqstant, it-tali akkordju jikkostitwixxi ksur tal-Artikolu 101 TFUE u huwa pprojbit u null.

(16)

L-Artikolu 102 TFUE japplika wkoll għall-produtturi kif ukoll għal OP li taġixxi bħala impriża. Il-projbizzjoni tal-abbuż minn pożizzjoni dominanti prevista fl-Artikolu 102 TFUE, hija applikabbli b'mod sħiħ fis-settur agrikolu. Madankollu, sabiex jinkiser l-Artikolu 102 TFUE, iridu jiġu ssodisfati l-kundizzjonijiet li ġejjin:

L-ewwel nett, OP jew produttur irid ikollhom pożizzjoni dominanti fi prodott jew suq ġeografiku partikolari (is-suq rilevanti) (12), jiġifieri jkollhom pożizzjoni ta' saħħa ekonomika li tippermettilhom li jġibu ruħhom fi grad sinifikanti b'mod indipendenti mill-kompetituri, il-klijenti u finalment il-konsumaturi tagħhom (13).

b.	It-tieni, l-OP jew il-produttur iridu jabbużaw mill-pożizzjoni dominanti tagħhom billi jinvolvu ruħhom fi prattiċi ta' esklużjoni u/jew ta' sfruttament għad-dannu tal-kompetituri, il-klijenti u/jew il-konsumaturi (14).

c.	Dawn il-prattiċi jaffettwaw il-kummerċ bejn l-Istati Membri (15).

(17)

Eżempju tal-applikazzjoni tal-Artikolu 102 TFUE għall-attivitajiet ta' OP:

Sitwazzjoni	:	Reġjun produttur tal-qamħ huwa 'l bogħod ħafna minn reġjuni oħra produtturi tal-qamħ. Il-qamħ jintuża fir-reġjun jew għat-tħin biex jiġi prodott id-dqiq fl-imtieħen lokali jew biex jiġi prodott għalf għall-annimali mrobbija fiż-żona. Il-qamħ għat-tħin huwa meħtieġ li jirrispetta speċifikazzjonijiet aktar stretti tal-kwalità u jinbiegħ bi prezzijiet ogħla mill-qamħ għall-għalf. Hemm xi importazzjonijiet ta' qamħ minn pajjiż ġar li jikkumplimentaw il-provvista lokali ġeneralment bi prezzijiet ogħla mill-prezzijiet lokali minħabba l-ispejjeż tat-trasport. OP kbira li tiġbor flimkien nofs il-produtturi lokali tal-qamħ (f'termini ta' volum tal-produzzjoni) kienet qiegħda tforni lill-biċċa l-kbira tat-taħħana lokali, filwaqt li produtturi oħra baqgħu inqas organizzati u fornew lill-proċessuri tal-għalf u lit-taħħana għad-domanda residwa tagħhom (mhux servuta mill-OP il-kbira) meta kienu disponibbli. Il-membri tal-OP kbira huma obbligati li jfornu bil-produzzjoni kollha tagħhom lill-OP skont l-istatuti tal-OP u minħabba numru ta' kwistjonijiet legali jew prattiċi, dawn il-membri rari ħafna joħorġu mill-OP. Ftit snin ilu, numru ta' bdiewa li mhumiex membri tal-OP kbira ħolqu OP oħra li tejbet il-kwalità u l-output tal-qamħ u investit f'sistema ta' ħżin u ta' distribuzzjoni biex tforni l-qamħ fuq skala akbar. Din l-iżgħar OP ġdida kkonvinċiet b'mod gradwali lit-taħħana lokali biex jixtru l-qamħ mingħandha aktar milli mingħand l-OP il-kbira. Iffaċċata bit-telf gradwali tas-suq aktar profittabbli tal-qamħ għat-tħin, l-OP il-kbira tiddeċiedi li tnaqqas il-prezzijiet bl-ingrossa tal-qamħ għat-tħin (qmuħ) għal taħt l-ispejjeż varjabbli biex tikseb lura l-klijenti tagħha u tikseb lura xi wħud minn dawn il-klijenti għad-dannu tal-kompetitur tagħha emerġenti.
Analiżi	:	Huwa probabbli li s-suq għall-provvista tal-qamħ ma jkunx akbar mir-reġjun in kwistjoni minħabba l-ispejjeż għolja tat-trasport minn reġjuni produtturi oħra għal fir-reġjun ikkonċernat. Huwa probabbli li l-OP il-kbira in kwistjoni jkollha pożizzjoni dominanti meta jitqies is-sehem tagħha mis-suq, il-kontroll tagħha fuq il-provvista permezz tal-obbligu ta' eskussività impost fuq il-membri tagħha u l-fatt li l-importazzjonijiet ma jistgħux jieħdu post il-provvista tagħha minħabba l-ispejjeż għolja tat-trasport. Huwa probabbli li l-pożizzjoni dominanti jkollha karattru stabbli b'mod partikolari minħabba li l-membri rari joħorġu mill-OP u d-diffikultà għal sorsi alternattivi ta' qamħ sabiex ifornu volumi kbar. L-istrateġija ta' pprezzar predatorju tal-OP il-kbira kellha l-għan li teskludi kompetitur (l-OP iż-żgħira) mis-suq. Għalhekk, x'aktarx li l-OP abbużat mill-pożizzjoni dominanti tagħha b'mod kuntrarju għall-Artikolu 102 TFUE.

(18)

L-Artikolu 101 TFUE jista' japplika wkoll għal ftehimiet, inklużi deċiżjonijiet interni u l-istatuti ta' OP li saru bejn il-membri ta' OP u bejn l-OP u l-membri tagħha, meta dawn huma kompetituri attwali jew potenzjali, fl-istess suq tal-prodott. Dan jista' jkun il-każ (a) jekk il-produtturi huma kapaċi, skont l-istatuti tal-OP, li joħorġu mill-OP fi żmien qasir; (b) jekk huma kapaċi jiddeċiedu liberament dwar il-volumi li huma jipprovdu l-OP bihom, sabiex parti biss mill-produzzjoni tagħhom tinbiegħ permezz tal-OP. Il-Qorti tal-Ġustizzja indirizzat il-kwistjoni tal-istatuti ta' kooperattivi u l-konformità tagħhom mal-Artikolu 101(1) TFUE f'numru ta' każijiet, fejn hija rrikonoxxiet l-effetti favur il-kompetizzjoni tat-tali arranġamenti kooperattivi skont ċerti kundizzjonijiet (16) u fejn hija nnotat li r-regoli statutorji li jirregolaw il-ħruġ ta' membri mill-OP u l-obbligi ta' fornimenti jistgħu ma jaqgħux fil-projbizzjoni tal-Artikolu 101(1) TFUE skont ċerti kundizzjonijiet u sakemm dan huwa limitat għal dak meħtieġ sabiex jiġu żgurati l-funzjonijiet tal-OP b'mod adegwat (17).

(19)

Eżempju tal-applikazzjoni tal-Artikolu 101 TFUE għall-akkordji bejn il-membri ta' OP:

Sitwazzjoni	:	Diversi produtturi żgħar ta' xgħir għall-immaltjar stabbilew OP sabiex ibigħu flimkien permezz ta' kuntratt ta' provvista komuni bi prezz komuni lil distillerija lokali tal-wiski. Il-produtturi għamlu dan, b'mod partikolari, minħabba li mhumiex kapaċi jipprovdu l-volumi mitluba mid-distillerija separatament u d-distillerija ma tridx tittratta ma' diversi fornituri żgħar separati. L-OP timmaniġġa l-kummerċjalizzazzjoni tal-provvista tax-xgħir għall-immaltjar u torganizza l-loġistika tal-provvista, inkluż it-trasport. L-OP tirrappreżenta 8 % tas-suq għall-provvista tax-xgħir għall-immaltjar lid-distilleriji fir-reġjun.
Analiżi	:	Il-prattiċi ta' bejgħ konġunt mill-produtturi huma maqbuda mill-projbizzjoni ta' akkordji antikompetittivi stipulata fl-Artikolu 101(1) TFUE minħabba li dawn jeliminaw il-kompetizzjoni fil-prezz bejn kompetituri attwali jew potenzjali. Madankollu, is-sistema ta' kummerċjalizzazzjoni organizzata fl-OP tidher li toħloq benefiċċji importanti f'termini ta' distribuzzjoni tal-prodotti li jiġu mgħoddija lill-konsumaturi. L-ewwel nett, din tassigura li jkun hemm fornitur addizzjonali fis-suq li jkun kapaċi jipprovdi l-kwantitajiet mitluba mix-xerrej, u b'hekk iżżid il-kompetizzjoni għall-benefiċċju ta' dak ix-xerrej. Din tista' tnaqqas ukoll l-ispiża tal-provvista permezz ta' sistema loġistika integrata aħjar u spejjeż imnaqqsa tat-tranżazzjoni meta mqabbel ma' xiri mix-xerrej direttament mill-produtturi kollha individwali. Huwa improbabbli li l-kompetizzjoni tiġi ristretta minħabba s-sehem żgħir tas-suq irrappreżentat mill-OP. Għaldaqstant, huwa probabbli li l-arranġament jiġi ġġustifikat abbażi tal-Artikolu 101(3) TFUE.

2.2.2. Derogi speċifiċi barra mil-leġiżlazzjoni agrikola mill-applikazzjoni tal-Artikolu 101 TFUE: Regolament dwar Eżenzjoni ta' Kategorija ta' Speċjalizzazzjoni

(20)

Skont ir-Regolament tal-Kummissjoni (UE) Nru 1218/2010 (18) (minn hawn 'il quddiem “l-Eżenzjoni ta' Kategorija ta' Speċjalizzazzjoni”), l-akkordji ta' speċjalizzazzjoni jistgħu jinkludu, fost l-oħrajn, akkordji, deċiżjonijiet jew prattiċi miftiehma bejn impriżi li bihom jiftiehmu li jipproduċu flimkien ċerti prodotti jew li jissottokuntrattaw lil xulxin il-produzzjoni ta' prodott wieħed jew aktar (impriża waħda ssir il-produttur esklużiv għal wieħed minn dawn il-prodotti) (19).

(21)

Rigward b'mod partikolari s-settur agrikolu, akkordju ta' speċjalizzazzjoni jista' jirreferi għal produzzjoni konġunta ta' prodotti agrikoli u kull attività ta' pproċessar/trasformazzjoni ta' prodotti agrikoli fi prodotti oħra, bħalma huma l-qatla u t-tqattigħ tal-laħam, it-tħin taċ-ċereali, eċċ. Fil-kuntest ta' OP agrikoli, huwa aktar probabbli li akkordju ta' speċjalizzazzjoni jikkonċerna l-ipproċessar/it-trasformazzjoni ta' prodotti agrikoli mhux ipproċessati fi prodotti oħra billi hemm ftit impriżi konġunti għall-produzzjoni ta' prodotti agrikoli mhux ipproċessati.

(22)

Ir-Regolament dwar l-Eżenzjoni ta' Kategorija ta' Speċjalizzazzjoni jistabbilixxi li, skont l-Artikolu 101(3) TFUE, l-Artikolu 101(1) TFUE ma japplikax għall-akkordji ta' speċjalizzazzjoni sakemm jintlaħqu ċerti kundizzjonijiet (20).

(23)

L-ewwel, l-ishma mis-suq kombinati tal-partijiet ma jridux jaqbżu 20 % tas-suq rilevanti.

(24)

It-tieni, l-akkordji ta' speċjalizzazzjoni ma jridux jinkludu restrizzjonijiet 'ibsin', jiġifieri ffissar tal-prezzijiet, limitazzjoni tal-output u allokazzjoni tas-swieq jew tal-konsumaturi.

(25)

Madankollu hemm xi eċċezzjonijiet. L-isfera ta' sikurezza tal-Eżenzjoni ta' Kategorija ta' Speċjalizzazzjoni tista' tapplika għal (21):

—	L-iffissar tal-prezzijiet iċċarġjati lill-konsumaturi immedjati fil-kuntest ta' distribuzzjoni konġunta tal-prodotti mmanifatturati permezz tal-akkordju ta' speċjalizzazzjoni;

—	L-istabbiliment tal-kapaċità u l-produzzjoni tal-volum fil-kuntest ta' akkordju ta' produzzjoni konġunta; u

—	L-istabbiliment ta' miri tal-bejgħ fil-kuntest tad-distribuzzjoni konġunta tal-prodotti mmanifatturati permezz tal-akkordju ta' speċjalizzazzjoni.

(26)

Eżempju tal-applikazzjoni possibbli tal-Eżenzjoni ta' Kategorija ta' Speċjalizzazzjoni fis-settur agrikolu:

Sitwazzjoni	:	Diversi produtturi ta' wċuħ tar-raba' jaqblu li jipproduċu konġuntament għalf tal-bhejjem miż-żerriegħa tal-kolza. Qabel, kienu jbigħu biss iż-żerriegħa lill-proċessuri taż-żerriegħa. Huma jikkonkludu akkordju ta' produzzjoni konġunta li jkopri t-totalità tal-produzzjoni taż-żerriegħa tal-kolza tagħhom. Barra minn hekk, huma jwettqu distribuzzjoni konġunta u jiffissaw konġuntament il-prezz li bih ibigħu l-produzzjoni tagħhom kollha tal-għalf miż-żerriegħa tal-kolza lill-produtturi tal-bhejjem. Fi żmien sena, il-produtturi tal-uċuħ tar-raba' laħqu sehem mis-suq ta' 9,3 % fis-suq għall-għalf tal-bhejjem magħmul miż-żerriegħa tal-kolza.
Analiżi	:	L-akkordji ta' produzzjoni konġunta huma kkunsidrati bħala wieħed mit-tipi ta' akkordji ta' speċjalizzazzjoni koperti mill-Eżenzjoni ta' Kategorija ta' Speċjalizzazzjoni. L-idjaq suq possibbli jidher li huwa s-suq għall-għalf tal-bhejjem miż-żerriegħa tal-kolza (dan jista' jkun akbar u jinkludi għalf tal-bhejjem minn sorsi oħra). Is-sehem mis-suq kombinat tal-partijiet fis-suq għall-għalf tal-bhejjem miż-żerriegħa tal-kolza ma jaqbiżx 20 % kif mitlub mill-Artikolu 3 tal-Eżenzjoni ta' Kategorija ta' Speċjalizzazzjoni. Minkejja li l-akkordju jinkludi l-iffissar tal-prezzijiet, l-iffissar tal-prezzijiet iċċarġjati lill-konsumaturi immedjati (hawnhekk il-produtturi tal-bhejjem) fil-kuntest ta' distribuzzjoni konġunta huwa aċċettabbli skont l-Artikolu 4(a) tal-Eżenzjoni ta' Kategorija ta' Speċjalizzazzjoni. Il-fatt li l-akkordju jinvolvi obbligu ta' provvista esklużiva min-naħa tat-tliet produtturi ta' uċuħ tar-raba' huwa wkoll kopert mill-Eżenzjoni ta' Kategorija ta' Speċjalizzazzjoni (l-Artikolu 2(3)(a)). Għalhekk, dan l-akkordju ta' produzzjoni konġunta huwa kopert mill-Eżenzjoni ta' Kategorija ta' Speċjalizzazzjoni u ma jammontax għal akkordju antikompetittiv bi ksur tal-Artikolu 101 TFUE.

2.3. Deroga ġenerali fir-Regolament dwar l-OKS: L-Artikoli 206 u 209

(27)

L-Artikolu 206 tar-Regolament dwar l-OKS jipprevedi li l-Artikolu minn 101 sa 106 TFUE japplika għal akkordji dwar prodotti agrikoli ħlief jekk previst mod ieħor fir-Regolament dwar l-OKS. Għalhekk, l-Artikolu 206 tar-Regolament dwar l-OKS jikkonferma l-prinċipju ġenerali li d-dritt tal-kompetizzjoni tal-UE japplika għall-produzzjoni u l-kummerċ fi prodotti agrikoli. Dan, madankollu, huwa suġġett għall-Artikoli minn 207 sa 210 tar-Regolament dwar l-OKS.

(28)

L-Artikolu 209 tar-Regolament dwar l-OKS jeskludi mill-kamp ta' applikazzjoni tal-Artikolu 101(1) TFUE l-akkordji, id-deċiżjonijiet u l-prattiċi miftiehma li jirrigwardaw il-produzzjoni ta', jew il-kummerċ fi prodotti agrikoli jekk jiġu ssodisfatti ċerti kundizzjonijiet. It-tali deroga, għall-kuntrarju ta' dik li tinsab fl-Artikoli 169, 170 u 171 tar-Regolament dwar l-OKS, tapplika għas-setturi agrikoli kollha koperti bir-Regolament dwar l-OKS. Għaldaqstant, l-Artikolu 209 tar-Regolament dwar l-OKS huwa strument separat u awtonomu u huwa rreferut minn hawn 'il quddiem bħala “Deroga Ġenerali”.

(29)

Il-produtturi jistgħu jibbenefikaw minn din id-Deroga Ġenerali f'żewġ sitwazzjonijiet differenti:

L-Artikolu 101(1) TFUE ma japplikax għal akkordji, deċiżjonijiet u prattiċi li jirrigwardaw il-produzzjoni ta', jew il-kummerċ fi prodotti agrikoli jekk dawn ikunu neċessarji sabiex jintlaħqu l-objettivi tal-PAK stabbiliti fl-Artikolu 39 TFUE. F'dan il-kuntest, il-Qorti tal-Ġustizzja sostniet li anki jekk akkordju jista' jitqies bħala neċessarju għall-ilħuq ta' wieħed jew aktar mill-objettivi tal-PAK, iżda ma jkunx neċessarju sabiex jintlaħaq objettiv ieħor (jew, saħansitra jipperikola objettiv ieħor), dan ma jistax jiġi kopert minn din id-deroga (22) (l-ewwel subparagrafu tal-Artikolu 209(1) tar-Regolament dwar l-OKS);

L-Artikolu 101(1) TFUE ma japplikax għal akkordji, deċiżjonijiet u prattiċi miftiehma ta':

—	Produtturi;

—	Assoċjazzjonijiet tal-produtturi;

—	Assoċjazzjonijiet ta' tali assoċjazzjonijiet;

—	OP rikonoxxuti skont l-Artikolu 152 tar-Regolament dwar l-OKS;

—	AOP rikonoxxuti skont l-Artikolu 156 tar-Regolament dwar l-OKS,

li jirrigwardaw il-produzzjoni jew bejgħ ta' prodotti agrikoli jew l-użu ta' faċilitajiet konġunti għall-ħażna, it-trattament jew l-ipproċessar ta' prodotti agrikoli, sakemm l-objettivi tal-PAK ma jkunux ipperikolati (it-tieni subparagrafu tal-Artikolu 209(1) tar-Regolament dwar l-OKS).

(30)

Id-Deroga Ġenerali (iż-żewġ forom) ma tapplikax għal akkordji, deċiżjonijiet u prattiċi miftiehma li jinvolvu obbligu li jiġi ċċarġjat l-istess prezz jew li bih tkun eskluża l-kompetizzjoni.

(31)

Ma hija meħtieġa l-ebda deċiżjoni minn qabel tal-Kummissjoni Ewropea jew ta' Awtorità Nazzjonali tal-Kompetizzjoni sabiex wieħed jibbenefika mid-Deroga Ġenerali stabbilita fl-Artikolu 209 tar-Regolament dwar l-OKS, jiġifieri din tapplika b'mod awtomatiku u l-produtturi jridu jivvalutaw huma stess jekk huma jissodisfawx il-kundizzjonijiet tagħha. L-oneru tal-prova tal-ksur tal-Artikolu 101(1) TFUE f'kull proċediment nazzjonali jew tal-UE jaqa' fuq dawk li jallegaw il-ksur. Madankollu, il-parti li titlob il-benefiċċju tad-Deroga Ġenerali għandha l-oneru li tipprova li l-kundizzjonijiet tad-Deroga Ġenerali jkunu sodisfati.

2.4. Deroga mill-applikazzjoni tal-Artikoli 101 u 102 TFUE għas-setturi taż-żejt taż-żebbuġa, tal-laħam taċ-ċanga u tal-vitella, u tal-uċuħ tar-raba', kif stabbiliti fl-Artikoli 169, 170 u 171 tar-Regolament dwar l-OKS

(32)

Skont l-Artikolu 206 tar-Regolament dwar l-OKS, l-Artikoli 101 u 102 TFUE japplikaw għal akkordji, deċiżjonijiet u prattiċi li jirrigwardaw il-kummerċ fi prodotti agrikoli “ħlief jekk ma jkunx previst mod ieħor f'dan ir-Regolament”. Billi jistabbilixxu regoli speċifiċi għall-akkordji, id-deċiżjonijiet u l-prattiċi tal-produtturi ta' prodotti agrikoli f'ċerti setturi, l-Artikoli 169, 170 u 171 tar-Regolament dwar l-OKS joħolqu derogi mill-applikazzjoni tal-Artikoli 101 (23) u 102 TFUE.

(33)

Kollha flimkien jew separatament, l-Artikoli 169, 170 u 171 tar-Regolament dwar l-OKS jiġu riferuti fil-Linji Gwida bħala “id-Deroga”.

(34)

L-Artikoli 169, 170 u 171 tar-Regolament dwar l-OKS ma jirriżultawx f'termini, regoli u mġieba sussegwenti ta' OP li jaqaw lil hinn mill-ambitu tal- Artikolu 102 TFUE. Huwa improbabbli ħafna, fid-dawl tal-limiti stabbiliti fl-Artikoli 169(2)(c), 170(2)(c) u 171(2)(c) tar-Regolament dwar l-OKS, li OP li tosserva dawk il-limiti jkollha pożizzjoni dominanti (kollettivament) fis-sens tal-Artikolu 102 TFUE. Fit-tali ċirkustanzi eċċezzjonali, il-produtturi għandhom jivvalutaw jekk l-attivitajiet ta' dik l-OP dominanti jistgħux iwasslu għal abbuż ta' pożizzjoni dominanti.

(35)

L-Artikoli 169, 170 u 171 tar-Regolament dwar l-OKS jirrigwardaw prodotti taż-żejt taż-żebbuġa, tal-laħam taċ-ċanga u tal-vitella (24), u ċerti prodotti mis-settur tal-uċuħ tar-raba' (25). L-Artikoli 169(1), 170(1) u 171(1) tar-Regolament dwar l-OKS jistipulaw li “[a] organizzazzjoni tal-produtturi fis-settur […] li hija rikonoxxuta skont l-Artikolu 152(1) u li ssegwi objettiv wieħed jew aktar tal-konċentrazzjoni tal-provvista, it-tqegħid fis-suq tal-prodotti magħmulin mill-membri tagħha u jiġu ottimizzati l-ispejjeż tal-produzzjoni, tista' tinnegozja f'isem il-membri tagħha, fir-rigward ta' parti jew l-aggregati kollha tal-produzzjoni tal-membri tagħha, kuntratti għall-provvista” tal-prodotti ta' dawn is-setturi koperti bid-definizzjonijiet stabbiliti f'dawn l-artikoli.

(36)

L-Artikoli 169, 170 u 171 tar-Regolament dwar l-OKS jirrigwardaw kull akkordju jew deċiżjoni jew prattika meħuda mill-OP meta tinnegozja kuntratti għall-provvista f'isem il-membri tagħha.

(37)

B'mod partikolari, il-paragrafu 1 tal-Artikoli 169, 170 u 171 tar-Regolament dwar l-OKS jippermettu attivitajiet konġunti ta' provvista, jiġifieri attivitajiet konġunti ta' bejgħ u relatati mal-bejgħ ta' prodotti agrikoli fis-setturi taż-żejt taż-żebbuġa, tal-laħam taċ-ċanga u tal-vitella, u tal-uċuħ tar-raba' mill-produtturi ta' dawn il-prodotti agrikoli permezz ta' OP.

(38)

L-għan tad-Deroga huwa li żżid is-saħħa tan-negozjar tal-produtturi fis-setturi kkonċernati fir-rigward tal-operaturi downstream sabiex ikun assigurat livell tal-għajxien ġust għall-produtturi u żvilupp vijabbli tal-produzzjoni (26). Dan l-objettiv irid jintlaħaq f'konformità mal-għanijiet tal-PAK kif stabbiliti fl-Artikolu 39 TFUE. B'mod aktar preċiż, dan għandu jinkiseb billi jkunu ġġenerati effiċjenzi sinifikanti permezz tal-integrazzjoni tal-attivitajiet fl-OP sabiex l-attivitajiet ta' dawn l-OP jikkontribwixxu b'mod ġenerali sabiex jintlaħqu l-għanijiet tal-PAK (27).

(39)

L-għan tad-Deroga għandu jinkiseb billi l-OP jikkonċentraw b'mod effettiv il-provvista u jqiegħdu l-prodotti fis-suq (28) u, bħala konsegwenza, jinnegozjaw kuntratti ta' provvista f'isem il-membri tagħhom. L-iżgurar tal-konformità mal-objettivi tal-konċentrazzjoni tal-provvista u t-tqegħid fis-suq tal-prodotti tirrikjedi li dawn l-OP isegwu strateġija ta' kummerċjalizzazzjoni b'mod effettiv.

(40)

Sabiex titwettaq l-istrateġija tagħhom, it-tali OP normalment jinnegozjaw u jikkonkludu kuntratti ta' provvista li jinkludi t-termini rilevanti kollha: il-prezzijiet, il-volumi u possibbilment ukoll termini kuntrattwali oħra bħal referenzi għall-ispeċifikazzjonijiet tal-kwalità tal-prodotti, id-durata tal-kuntratt, klawżoli ta' terminazzjoni, klawżoli ta' ħruġ (29), dettalji dwar il-perjodi u l-proċeduri tal-pagament, l-arranġamenti għall-ġbir u l-kunsinna tal-prodotti kif ukoll ir-regoli applikabbli f'każ ta' force majeure.

(41)

L-implimentazzjoni tal-istrateġija ta' kummerċjalizzazzjoni tal-OP tista' tinvolvi wkoll akkordji u prattiċi bejn l-OP u l-membri tagħha li jkunu intrinsikament marbuta mal-istrateġija ta' kummerċjalizzazzjoni ta' OP bħall-ippjanar tal-produzzjoni (30), l-istabbiliment tal-kalendarju u l-volumi ta' produzzjoni li għandhom ikunu kkummerċjalizzati mill-OP (31) u skambji ta' informazzjoni kummerċjalment sensittiva (32).

(42)

Fil-Linji Gwida, in-“negozjar ta' kuntratti ta' provvista minn OP f'isem il-membri tagħha” jiġi riferut bħala “negozjati kuntrattwali”.

(43)

In-negozjati kuntrattwali jista' jkollhom forom differenti: pereż. irkanti (fiżiċi jew onlajn), bejgħ minn fuq it-telefown, negozjar f'suq spot u/jew kambju tal-futuri. Il-forma tan-negozjati kuntrattwali ma tinfluwenzax l-applikazzjoni tad-Deroga.

(44)

In-negozjati kuntrattwali jistgħu jseħħu bi jew mingħajr it-trasferiment tas-sjieda tal-prodotti mill-produtturi lill-OP (33). Barra minn hekk, dawn l-attivitajiet ta' provvista konġunta jistgħu jsiru irrispettivament minn jekk il-prezz tal-provvista nnegozjat mill-OP ikunx għall-parti mill-produzzjoni jew għall-produzzjoni sħiħa tal-membri tal-OP (34).

(45)

Madankollu, biex tibbenefika mid-Deroga, OP trid tissodisfa numru ta' kundizzjonijiet (35) meta tinnegozja kuntratti ta' provvista f'isem il-membri tagħha sabiex tibbenefika mid-Deroga:

a.	L-OP trid tkun rikonoxxuta formalment mill-awtoritajiet nazzjonali kompetenti f'konformità mal-Artikolu 152(1) tar-Regolament dwar l-OKS (jew l-Artikolu 156(1) tar-Regolament dwar l-OKS għall-AOP);

b.	L-OP trid issegwi wieħed jew aktar mill-objettivi tal-konċentrazzjoni tal-provvista, it-tqegħid fis-suq tal-prodotti mmanifatturati mill-membri tagħha jew l-ottimizzazzjoni tal-ispejjeż tal-produzzjoni;

c.	Dawn l-objettivi jintlaħqu bil-kundizzjoni li l-insegwiment tagħhom iwassal għall-integrazzjoni ta' attivitajiet u t-tali integrazzjoni tkun probabbli li twassal għal effiċjenzi sinifikanti sabiex l-attivitajiet tal-OP b'mod ġenerali jikkontribwixxu sabiex jintlaħqu l-objettivi tal-PAK;

d.	Il-volum ta' prodott suġġett għal negozjati b'mod partikolari minn OP ma jridx jaqbeż 20 % (għaż-żejt taż-żebbuġa) mis-suq rilevanti/15 % tal-produzzjoni nazzjonali totali (għall-uċuh tar-raba' u għal-laħam taċ-ċanga u tal-vitella);

e.	Il-produtturi ma jistgħux ikunu membri ta' aktar minn OP waħda li tinnegozja kuntratti ta' provvista f'isimhom;

f.	L-OP trid tinnotifika l-volum tal-prodott ikkonċernat kopert bin-negozjati lill-awtoritajiet nazzjonali kompetenti.

(46)

Dawn il-kundizzjonijiet speċifiċi jiġu diskussi fid-dettall fis-Taqsima 3 iktar 'l isfel.

(47)

Akkordju, deċiżjoni jew prattika miftiehma li ma jirrispettawx il-kundizzjonijiet stabbiliti mill-Artikoli 169, 170 u 171 tar-Regolament dwar l-OKS (pereżempju minħabba li n-negozjati kuntrattwali ta' prodotti tal-uċuħ tar-raba' jkopru aktar minn 15 % tal-produzzjoni nazzjonali totali tal-prodott) ma tistax tibbenefika mid-Deroga. Dan ma jfissirx awtomatikament ksur tar-regoli tal-kompetizzjoni kif diskuss f'din it-taqsima.

2.5. Valutazzjoni ta' OP dwar il-kompatibbiltà tal-akkordju mar-regoli tal-kompetizzjoni

(48)

L-impriżi kollha, inklużi l-produtturi agrikoli u l-OP iridu jivvalutaw huma stess il-kompatibbiltà tal-akkordji, id-deċiżjonijiet jew il-prattiċi miftiehma skont l-Artikolu 101(1) u (3) u l-Artikolu 102 TFUE.

(49)

Sabiex tipprovdi gwida u tiffaċilita l-awtovalutazzjoni tal-akkordji, id-deċiżjonijiet u l-prattiċi mill-impriżi, il-Kummissjoni Ewropea adottat linji gwida/gwida rigward l-applikazzjoni tal-Artikoli 101 u 102 TFUE. F'dan il-kuntest, l-aktar rilevanti huma:

—

Linji Gwida dwar l-applikabbiltà tal-Artikolu 101 TFUE għall-akkordji ta' kooperazzjoni orizzontali (36); b'mod partikolari fir-rigward tal-akkordji ta' produzzjoni konġunta (37) u l-akkordji ta' kummerċjalizzazzjoni konġunta (għal akkordju ta' kummerċjalizzazzjoni konġunta (38) ara wkoll eżempju fil-paragrafu (19) iktar 'il fuq);

—	Linji Gwida dwar l-applikazzjoni tal-Artikolu 81(3) tat-Trattat [attwalment l-Artikolu 101(3) TFUE] (39).

(50)

OP fis-setturi taż-żejt taż-żebbuġa, tal-laħam taċ-ċanga u tal-vitella, u tal-uċuħ tar-raba' għandha tivvaluta l-konformità tagħha mar-regoli ta' kompetizzjoni kif ġej:

3. KUNDIZZJONIJIET GĦALL-APPLIKAZZJONI TAD-DEROGA

(51)

Id-Deroga maħluqa bl-Artikoli 169, 170 u 171 tar-Regolament dwar l-OKS hija soġġetta għal numru ta' kundizzjonijiet rigward:

a.	Ir-rikonoxximent tal-OP/AOP;

b.	L-objettivi tal-OP;

c.	Test tal-Effiċjenzi Sinifikanti;

d.	Ir-relazzjonijiet bejn l-OP u l-membri tagħha;

e.	Limitu massimu fuq il-kwantitajiet tal-prodott suġġetti għal negozjati kuntrattwali;

f.	L-obbligi ta' notifika.

(52)

Din it-Taqsima tanalizza kull waħda minn dawn il-kundizzjonijiet.

3.1. Ir-rikonoxximent tal-OP/AOP

(53)

OP jew AOP trid tkun rikonoxxuta formalment mill-awtoritajiet nazzjonali skont l-Artikolu 152(1) u l-Artikolu 156(1) tar-Regolament dwar l-OKS (40) sabiex tibbenefika mid-Deroga. OP tista' tkun entità ġuridika jew parti minnha.

(54)

Jekk Stat Membru ma jirrikonoxxix OP u/jew AOP, il-produtturi f'dak l-Istat Membru ma jkunux jistgħu jibbenefikaw mid-Deroga. Madankollu huma jistgħu xorta waħda jivvalutaw l-attivitajiet tagħhom skont id-Deroga Ġenerali tal-Artikolu 209 tar-Regolament dwar l-OKS, ir-Regolament għall-Eżenzjoni ta' Kategorija ta' Speċjalizzazzjoni u skont l- Artikolu 101(3) TFUE.

(55)

OP tista' tkun membru ta' OP oħra (dak li jissejjaħ “OP tat-tieni saff”), li tikkummerċjalizza l-produzzjoni tagħha fornita mill-OP membri tagħha. L-Istat Membru kkonċernat jiddeċiedi jekk it-tali OP tat-tieni saff humiex rikonoxxuti bħala OP jew bħala AOP. Minħabba li d-Deroga tapplika bl-istess mod għall-OP u għall-AOP, l-OP tat-tieni saff tista' fiż-żewġ sitwazzjonijiet tibbenefika mid-Deroga.

(56)

Il-membri ta' OP jistgħu jkunu, apparti minn produtturi, entitajiet ukoll li ma jkunux produtturi tal-prodotti agrikoli kkonċernati. L-OP bil-parteċipazzjoni ta' nonprodutturi jridu jikkonformaw mal-kundizzjonijiet kollha li jirrigwardaw l-istabbiliment ta' OP u l-istatuti tagħhom, inkluż it-teħid tad-deċiżjonijiet u l-kontroll demokratiku kif stabbilit fl-Artikoli 152, 153 u 154 tar-Regolament dwar l-OKS. Suġġetta għal dawn il-kundizzjonijiet, il-kwantitajiet miġjuba minn produttur li mhuwiex membru lill-OP huma meqjusa bl-istess mod bħal prodotti miġjuba minn produttur membru tal-OP għall-iskop tal-applikazzjoni tad-Deroga. Saħansitra, meta jiġu kkalkulati l-volumi għall-għanijiet ta' konformità mat-Test tal-Effiċjenzi Sinifikanti, ma hemmx bżonn li ssir distinzjoni bejn prodotti miġjuba minn produtturi membri u minn produtturi li mhumiex membri.

3.2. L-objettivi tal-OP u l-akkwist ta' prodotti minn dawk li mhumiex membri

(57)

Sabiex tibbenefika mid-Deroga, OP trid issegwi mill-anqas wieħed mill-objettivi li ġejjin:

a.	Il-konċentrazzjoni tal-provvista;

b.	It-tqegħid fis-suq tal-prodotti mmanifatturati mill-membri tagħha (41); u

c.	L-ottimizzazzjoni tal-ispejjeż tal-produzzjoni (42).

(58)

Madankollu, id-Deroga teħtieġ ukoll li OP tikkonċentra l-provvista u tqiegħed il-prodotti tal-membri tagħha fis-suq għall-volum tal-prodotti kopert bin-negozjati kuntrattwali (43). Għalhekk, l-insegwiment tal-objettiv ta' ottimizzazzjoni tal-ispejjeż ta' produzzjoni (l-ittra c. iktar 'il fuq), jekk ma jkunx akkumpanjat mir-realizzazzjoni attwali taż-żewġ objettivi l-oħra tal-konċentrazzjoni tal-provvista u t-tqegħid fis-suq tal-prodotti mmanifatturati mill-membri tagħha, ma jkunx suffiċjenti sabiex tibbenefika mid-Deroga.

(59)

L-objettiv tat-tqegħid fis-suq jirreferi għall-prodotti mmanifatturati mill-membri tagħha. Dan ma jeskludix li, bħala attività anċillari, fin-negozjati kuntrattwali OP tista' tinkludi wkoll prodotti mixtrija separatament mill-OP. Dan huwa konsistenti mal-objettiv tal-OP tal-konċentrazzjoni tal-provvista. Il-possibbiltà li jiġu inklużi prodotti mixtrija separatament mingħand produtturi li ma jkunux membri (44) tippermetti lill-OP, f'ċerti sitwazzjonijiet, li tilħaq klijenti akbar li jkunu jeħtieġu volumi akbar milli jkunu jistgħu joffru l-membri f'dak il-mument partikolari. Din il-possibbiltà tippermetti wkoll lill-OP li tissostitwixxi l-produzzjoni tal-membri li tkun nieqsa f'ċerti mumenti, pereżempju minħabba kundizzjonijiet tat-temp sfavorevoli, u b'hekk jiġi evitat ir-riskju li OP titlef klijent.

(60)

Id-Deroga tkopri kemm il-prodotti tal-membri ta' OP kif ukoll ta' dawk li mhumiex membri, għall-produzzjoni totali tagħhom jew parti minnha, sakemm il-limiti u l-kundizzjonijiet stabbiliti fid-Deroga jiġu rrispettati.

(61)

Bid-Deroga, madankollu, ix-xiri ta' prodotti mingħand min mhux membru (jiġifieri mis-suq) ma jistax isir l-attività prinċipali ta' OP: skont id-Deroga, OP għandha, qabelxejn, tfittex li tqiegħed fis-suq il-prodotti tal-membri tagħha. Sabiex jiġu salvagwardjati l-objettivi tad-Deroga, ix-xiri ta' prodotti mingħand dawk li mhumiex membri għandu jibqa' anċillari. Ix-xiri ta' prodotti mingħand dawk li mhumiex membri jibqa' anċillari jekk, f'ċirkustanzi normali, OP ma tixtrix aktar minn 25 % tal-produzzjoni suġġetta għal negozjati kuntrattwali fuq perjodu ta' sena. Madankollu jista' jkun hemm sitwazzjonijiet eċċezzjonali (marbuta pereżempju mal-kundizzjonijiet tat-temp, mard) meta jinqabeż dan il-livell, f'perjodu partikolari ta' 12-il xahar, jista' jkun ġustifikat mingħajr ma jiġi mminat il-karattru anċillari ta' din l-attività.

(62)

Jeħtieġ li jiġu vvalutati fuq bażi ta' każ b'każ, id-diżastri naturali jew sitwazzjonijiet oħra assimilati magħhom li jirriżultaw fil-produzzjoni limitata għal perjodu twil ta' żmien. Fit-tali sitwazzjoni, sakemm l-OP tieħu l-passi meħtieġa mingħajr dewmien biex titreġġa' lura s-sitwazzjoni preċedenti għal avveniment ta' force majeur u r-rekwiżiti oħra tad-Deroga huma sodisfati, l-OP ma għandhiex titlef il-benefiċċju tad-Deroga matul dak iż-żmien u tista' tkopri l-ħtiġijiet tagħha għall-kummerċjalizzazzjoni permezz tal-akkwist ta' prodotti mingħand min mhux membru tagħha matul perjodu raġonevoli ta' rkupru.

(63)

Il-kundizzjonijiet kollha tad-Deroga kif stabbiliti fl-Artikoli 169, 170 u 171 tar-Regolament dwar l-OKS jiġu rrispettati wkoll fir-rigward tal-kwantitajiet mixtrija mingħand dawk li mhumiex membri. B'mod partikolari, dawn il-volumi jiġu inklużi fil-volumi suġġetti għan-negozjati kuntrattwali għall-iskopijiet tal-iżgurar tal-konformità mal-limiti ta' 15 % tal-produzzjoni nazzjonali totali għas-setturi tal-laħam taċ-ċanga u tal-vitella u tal-uċuħ tar-raba' u ta' 20 % tas-suq rilevanti applikabbli fis-settur taż-żejt taż-żebbuġa.

(64)

Eżempju tal-applikazzjoni tad-Deroga għal negozjati kuntrattwali minn OP f'isem il-membri tagħha, li tkopri prodotti ta' produtturi li mhumiex membri:

Sitwazzjoni	:	Ħmistax-il produttur żgħir tax-xgħir stabbilixxew OP biex jilħqu volumi ta' produzzjoni suffiċjenti meħtieġa għan-negozjar ta' kuntratt ta' provvista ma' kumpanija reġjonali kbira tal-manifattura tal-lamtu. Il-produtturi jipprovdu lill-OP il-produzzjoni totali tagħhom. Ix-xhur ta' April u Mejju kienu xotti ħafna f'waħda mill-partijiet tar-reġjun ikkonċernat, u r-rendiment tal-produtturi kkonċernati naqas b'25 %. F'Awwissu, l-OP għalhekk ma kinitx kapaċi tforni l-volumi miftiehma lill-kumpanija tal-manifattura tal-lamtu in kwistjoni. Sabiex jiġi evitat li l-OP titlef il-kumpanija tal-manifattura tal-lamtu bħala klijent, hija tixtri l-volumi li jonqos tax-xgħir fis-suq mingħand produttur mhux membru. Il-volum mixtri mingħand il-produttur mhux membru kien jirrappreżenta 17 % tal-volum li ried jiġi fornut lill-kumpanija tal-manifattura tal-lamtu fuq il-bażi tal-kuntratt innegozjat mill-OP.
Analiżi	:	Il-prodotti forniti minn min mhux membru tal-OP jifformaw inqas minn 25 % tal-prodotti suġġetti għan-negozjati kuntrattwali mill-OP mal-kumpanija tal-manifattura tal-lamtu. Il-volum totali suġġett għan-negozjati kuntrattwali in kwistjoni, inklużi l-volumi li ġejjin mingħand min mhux membru, jirrappreżenta 2,2 % tal-produzzjoni nazzjonali totali, jiġifieri l-limitu ta' 15 % tal-produzzjoni nazzjonali totali fil-qasam tal-uċuħ tar-raba' huwa rrispettat. Billi l-kundizzjonijiet l-oħra kollha stabbiliti fl-Artikolu 171 tar-Regolament dwar l-OKS huma wkoll irrispettati, in-negozjati kuntrattwali globali tal-OP jistgħu jibbenefikaw mid-Deroga.

3.3. It-Test tal-Effiċjenzi Sinifikanti

(65)

It-test tal-Artikoli 169, 170 u 171 tar-Regolament dwar l-OKS jipprovdi għat-tliet setturi kollha taż-żejt taż-żebbuġa, tal-laħam taċ-ċanga u tal-vitella, u tal-uċuħ tar-raba' li “[a] organizzazzjoni tal-produtturi tissodisfa l-objettivi msemmija f'dan il-paragrafu dment li l-insegwiment ta' dawk l-objettivi jwassal għall-integrazzjoni tal-attivitajiet u li tali integrazzjoni aktarx tiġġenera effiċjenzi sinifikanti (45) sabiex l-attivitajiet tal-organizzazzjoni tal-produttur jikkontribwixxu b'mod ġenerali biex jiġu sodisfati l-objettivi tal-Artikolu 39 TFUE .”

(66)

Id-Deroga għalhekk tirrikjedi li OP, li twettaq negozjati kuntrattwali: (1) tintegra l-attivitajiet, u (2) li dawk l-attivitajiet ikunu aktarx jiġġeneraw effiċjenzi sinifikanti sabiex ikun assigurat li l-attivitajiet tal-OP jikkontribwixxu b'mod ġenerali sabiex jintlaħqu l-objettivi tal-PAK.

(67)

In-negozjati kuntrattwali u attivitajiet konġunti oħra mill-produtturi jista' jkollhom impatti differenti fuq il-kisba tal-objettivi tal-PAK.

(68)

L-akkordji bejn produtturi agrikoli sabiex iwettqu konġuntament ċerti attivitajiet jistgħu jwasslu għal effiċjenzi u għalhekk benefiċċji ekonomiċi, b'mod partikolari jekk jgħaqqdu flimkien attivitajiet, ħiliet jew assi, bħala mezz biex jaqsmu r-riskji, jiffrankaw l-ispejjeż, iżidu l-investimenti, jiġbru l-għarfien, itejbu l-kwalità u l-varjetà tal-prodotti, u jniedu l-innovazzjoni aktar malajr. It-tali attivitajiet jistgħu jikkontribwixxu sabiex jintlaħqu l-objettivi tal-PAK, possibbilment iwasslu pereżempju għal żidiet fil-produttività (pereż. minħabba aċċess għal teknoloġiji aħjar tal-produzzjoni, pereżempju permezz ta' attivitajiet ta' akkwist konġunt), għal żidiet fid-dħul għall-produtturi (pereż. minħabba t-titjib fil-kwalità permezz ta' faċilitajiet aħjar ta' produzzjoni jew ħażna miksuba konġuntament) jew għal disponibbiltà aħjar tal-provvisti (pereż. minħabba sistemi aħjar ta' ħażna jew distribuzzjoni miksuba jew organizzati konġuntament).

(69)

L-akkordji bejn produtturi agrikoli sabiex iwettqu negozjati kuntrattwali jistgħu, madankollu, jillimitaw il-kompetizzjoni u finalment ifixklu l-kisba tal-objettivi tal-PAK. Dan jista' jkun pereżempju l-każ jekk il-produtturi jikkonkludu akkordju li jiffissal-prezzijiet, inaqqas l-output jew jikkondividi s-swieq. It-tali akkordji, filwaqt li jistgħu jżidu l-qligħ tal-produtturi, jistgħu jipperikolaw il-kisba ta' objettivi oħra tal-PAK jekk iwasslu, pereżempju, għal prezzijiet mhux raġonevoli għall-konsumatur (minħabba ż-żidiet fil-prezzijiet), għal problemi ta' disponibbiltà tal-provvisti (minħabba restrizzjonijiet tal-provvista) jew għal tnaqqis fil-produttività (minħabba li t-tnaqqis fil-kompetizzjoni bejn il-produtturi jista' jnaqqas l-inċentiv sabiex tiżdied il-produttività).

(70)

F'sitwazzjonijiet fejn l-attivitajiet relatati mal-bejgħ ta' OP li twettaq negozjati kuntrattwali f'isem il-membri tagħha, ifixklu l-kisba ta' ċerti objettivi tal-PAK, il-ġenerazzjoni ta' effiċjenzi sinifikanti tista' tikkumpensa għal dawn l-effetti u tassigura li l-attivitajiet tal-OP b'mod ġenerali jikkontribwixxu sabiex jintlaħqu l-objettivi tal-PAK. Għalhekk, l-Artikoli 169, 170 u 171 tar-Regolament dwar l-OKS jirrikjedu li:

a.	L-OP tintegra l-attivitajiet; u

b.	Dawn l-attivitajiet x'aktarx li jiġġeneraw effiċjenzi sinifikanti sabiex l-attivitajiet tal-OP b'mod ġenerali jikkontribwixxu sabiex jintlaħqu l-objettivi tal-PAK.

(71)

L-OP tista' tibbenefika mid-Deroga biss jekk tissodisfa dan it-test (minn hawn 'il quddiem it-“Test tal-Effiċjenzi Sinifikanti”).

(72)

It-Test tal-Effiċjenzi Sinifikanti jirrikjedi:

L-identifikazzjoni tal-attivitajiet li jiġu integrati mill-OP, jiġifieri li jitwettqu mill-OP f'isem il-membri tagħha. L-integrazzjoni tista' ssir minn OP jew billi twettaq direttament l-attivitajiet jew billi testernalizza dawn l-attivitajiet lil partijiet terzi. L-OP tista' testernalizza ċerti attivitajiet lil partijiet terzi u xorta tikkunsidra dawn l-attivitajiet bl-iskop li tkun assigurata l-konformità mat-Test tal-Effiċjenzi Sinifikanti (pereż. servizzi ta' trasport minn trasportaturi ta' parti terza) (46).

Is-sejba li dawn l-attivitajiet aktarx jiġġeneraw effiċjenzi. Dan jirrigwarda n-natura tal-attivitajiet (jiġifieri jekk l-attività hijiex probabbli li toħloq effiċjenzi min-natura tagħha). Jista' jirrigwarda wkoll il-grad ta' żvilupp tal-OP (l-OP tista' tkun impenjat ruħha li tinvesti f'attivitajiet bħal dawn iżda l-investiment jista' jkun jirrikjedi xi żmien sabiex jimmaterjalizza ruħu b'mod sħiħ filwaqt li l-OP diġà tinnegozja kuntratti f'isem il-membri tagħha); u

c.	Is-sejba li dawk l-effiċjenzi x'aktarx ikunu sinifikanti biżżejjed sabiex l-OP (permezz tal-attivitajiet kollha tagħha) tikkontribwixxi sabiex jintlaħqu l-objettivi tal-PAK (47).

(73)

Kif deskritt iktar 'il fuq fil-paragrafu (55), OP tista' tkun membri ta' OP oħra (l-hekk imsemmija “OP tat-tieni saff”) li tbigħ l-output tal-ewwel OP. In-negozjati kuntrattwali tal-OP tat-tieni saff jistgħu jibbenefikaw minn Deroga sakemm hija tirrispetta l-kundizzjonijiet għall-applikazzjoni tad-Deroga kif elenkata fil-paragrafu (51). Meta jkun qiegħed jiġi valutat jekk l-OP tikkonformax b'mod partikolari mat-Test tal-Effiċjenzi Sinifikanti, l-attivitajiet li jżidu l-effiċjenza tal-OP tal-ewwel saff (pereż. il-ġbir u t-trasport tal-prodotti) jistgħu jiġu kkunsidrati għall-kontabilità tal-effiċjenzi fl-OP/AOP tat-tieni saff skont id-Deroga.

(74)

L-OP tista' tivvaluta jekk tikkonformax mat-Test tal-Effiċjenzi Sinifikanti permezz ta' metodu simplifikat ipprovdut mil-leġiżlatur tal-UE. Jekk l-OP ma tikkonformax mal-kundizzjonijiet tal-metodu simplifikat, l-OP tista', f'ċerti ċirkustanzi, tuża metodu alternattiv sabiex tivvaluta jekk tikkonformax mat-Test tal-Effiċjenzi Sinifikanti.

3.3.1. Il-metodu simplifikat

(75)

It-tielet subparagrafu tal-paragrafu 1 ta' kull wieħed mill-Artikoli 169, 170 u 171 tar-Regolament dwar l-OKS jistabbilixxi metodu sabiex tiġi valutata l-konformità mat-Test tal-Effiċjenzi Sinifikanti (“metodu simplifikat”). Id-Deroga tistipula (48) li t-Test tal-Effiċjenzi Sinifikanti jista' jiġi ssodisfat jekk:

a.	L-OP twettaq mill-anqas waħda mill-attivitajiet ta' żieda potenzjali fl-effiċjenza elenkati fl-Artikoli 169, 170 u 171 tar-Regolament dwar l-OKS (49); u

Dawn l-attivitajiet huma sinifikanti f'termini tal-volum tal-prodott ikkonċernat u l-ispejjeż tal-produzzjoni u t-tqegħid fis-suq tal-prodott. Jekk dawn l-attivitajiet ikunu sinifikanti biżżejjed, huwa preżunt li x'aktarx jiġġeneraw effiċjenzi sinifikanti. It-tali effiċjenzi jistgħu jitqiesu li jikkumpensaw għal kull tfixkil possibbli tal-kisba tal-objettivi tal-PAK bin-negozjati kuntrattwali. Konsegwentement, l-attivitajiet tal-OP b'mod ġenerali jistgħu jiġu assunti li jikkontribwixxu sabiex jintlaħqu l-objettivi tal-PAK.

(76)

Dan il-metodu simplifikat mhuwiex applikabbli f'numru ta' sitwazzjonijiet. L-ewwel, mhuwiex eskluż li attivitajiet differenti minn dawk elenkati fl-Artikoli 169, 170 u 171 tar-Regolament dwar l-OKS joħolqu effiċjenzi u, fil-każ individwali li dawn l-attivitajiet joħolqu t-tali effiċjenzi sinifikanti, li l-attivitajiet tal-organizzazzjoni tal-produtturi b'mod ġenerali jikkontribwixxu sabiex jintlaħqu l-objettivi tal-PAK. Fit-tali sitwazzjoni mhijiex koperta bil-metodu simplifikat u tkun teħtieġ analiżi każ b'każ spjegata fil-paragrafu minn (82) sa (86) iktar 'l isfel skont il-metodu alternattiv.

(77)

It-tieni, il-metodu simplifikat ma jirrigwardax sitwazzjonijiet fejn l-OP tkun impenjat ruħha li tinvesti f'attivitajiet li jżidu l-effiċjenza iżda l-investiment ikun jeħtieġ xi żmien sabiex jimmaterjalizza kompletament. It-tali sitwazzjoni mhijiex koperta bil-metodu simplifikat (li jibbaża fuq attivitajiet diġà mwettqa mill-OP) u jkun jeħtieġ analiżi każ b'każ spjegata fil-paragrafi minn (82) sa (86) iktar 'l isfel skont il-metodu alternattiv.

(78)

Il-metodu simplifikat jeħtieġ l-identifikazzjoni ta' attivitajiet fost dawk elenkati fl-Artikoli 169, 170 u 171 tar-Regolament dwar l-OKS u l-valutazzjoni tas-sinifikat tal-volumi u tal-ispejjeż koperti minn dawk l-attivitajiet. L-erba' kaxxi li ġejjin jippreżentaw għal kull wieħed mit-tliet setturi sitwazzjonijiet fejn it-tali attivitajiet jirrappreżentaw volumi sinifikanti tal-prodott ikkonċernat u spejjeż sinifikanti tal-produzzjoni u t-tqegħid fis-suq tal-prodott sabiex l-OP tkun tista' tibbenefika mid-Deroga. Dan jista' jinkiseb permezz ta' attività waħda jew permezz ta' kombinazzjoni ta' diversi attivitajiet fejn l-ebda waħda mill-attivitajiet imniżżla fid-Deroga, waħedha, aktarx li tiġġenera effiċjenzi sinifikanti. Kull sitwazzjoni tirrikjedi analiżi każ b'każ biex ikun żgurat li l-ispejjeż iġġenerati u l-volumi koperti minn dawn l-attivitajiet huma biżżejjed biex jiġu ġġenerati effiċjenzi sinifikanti. Is-segwenti eżempji ma għandhomx l-għan li jelenkaw b'mod eżawrjenti s-sitwazzjonijiet kollha meta japplika l-metodu simplifikat.

SETTUR TAŻ-ŻEJT TAŻ-ŻEBBUĠA

Applikazzjoni tat-Test tal-Effiċjenzi Sinifikanti

Eżempji ta' sitwazzjonijiet fejn attivitajiet konġunti elenkati fl-Artikolu 169 tar-Regolament dwar l-OKS x'aktarx li jiġġeneraw effiċjenzi sinifikanti fil-kuntest tal-metodu simplifikat.

i. L-ipproċessar konġunt

L-ipproċessar konġunt huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP tipproċessa aktar minn nofs il-volumi taż-żebbuġ maqtugħ mill-membri tagħha biex tipproduċi żejt taż-żebbuġa f'fabbrika taż-żejt taż-żebbuġa. L-istabbiliment ta' fabbrika taż-żejt taż-żebbuġa tirrikjedi investiment sinifikanti. L-ipproċessar taż-żebbuġ f'żejt taż-żebbuġa normalment jinvolvi diversi stadji bħal: it-tindif taż-żebbuġ, l-ippressar taż-żebbuġ u l-filtrazzjoni taż-żejt taż-żebbuġa u proċessi oħra. Fit-tali sitwazzjoni, fejn l-attivitajiet ta' pproċessar konġunt ta' OP jipproduċu aktar minn nofs iż-żejt taż-żebbuġa kummerċjalizzat mill-OP, l-OP probabbli tiġġenera effiċjenzi sinifikanti meta mqabbel mas-sitwazzjoni fejn il-membri jfittxu individwalment li jipproċessaw iż-żebbuġ tagħhom u b'hekk tissodisfa l-kundizzjonijiet tal-metodu simplifikat.

ii. L-ippakkjar, it-tikkettar jew il-promozzjoni konġunti

L-ippakkjar/l-ibbottiljar u t-tikkettar konġunt taż-żejt taż-żebbuġa huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ meta l-OP twettaq dawn l-attivitajiet f'dak li jirrigwarda aktar minn nofs iż-żejt taż-żebbuġa kummerċjalizzat fil-fabbrika taż-żejt taż-żebbuġa. L-ippakkjar/l-ibbottiljar u t-tikkettjar konġunt normalment jeħtieġ investiment sinifikanti għall-akkwist tat-teknoloġija meħtieġa/tal-makkinarju. Fit-tali sitwazzjoni, fejn l-attivitajiet tal-ippakkjar/ibbottiljar u tikkettar konġunt ta' OP ikopru aktar minn nofs taż-żejt taż-żebbuġa kummerċjalizzat mill-OP, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

Il-promozzjoni konġunta probabbli tiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk OP tiżviluppa u tikkummerċjalizza prodott b'valur miżjud. Prodott ikollu “valur miżjud”, pereżempju jekk ikun distint minn prodotti oħra bbażati fuq sett speċifiku ta' karatteristiċi li jissodisfaw ħtiġijiet partikolari ta' klijenti. L-OP tista' tiddifferenzja l-prodott tagħha abbażi tal-metodi ta' produzzjoni adottati (pereż. biex tipproduċi żejt taż-żebbuġa organiku) jew fatturi oħra. F'dan il-kuntest, il-promozzjoni konġunta hija l-parti tal-kummerċjalizzazzjoni ta' strateġija integrata sabiex jinbiegħ it-tali prodott b'valur miżjud u l-promozzjoni konġunta tkopri l-volumi kollha kummerċjalizzati mill-OP. L-OP tistabbilixxi u tassigura l-konformità mas-sett ta' speċifikazzjonijiet tal-prodott: dan jinvolvi pereżempju l-iżvilupp ta' numru adegwat ta' speċifikazzjonijiet, il-proċess ta' ppjanar tal-produzzjoni u l-kontroll tal-kwalità fir-rigward tat-tali speċifikazzjonijiet, l-akkwist ta' inputs meħtieġa biex jiġu rrispettati l-ispeċifikazzjonijiet eċċ. L-ispejjeż tat-tali approċċ integrat kemm għal OP u kif ukoll għall-membri tagħha li jirrispettaw l-ispeċifikazzjonijiet huma sinifikanti. Fit-tali sitwazzjoni, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

L-attivitajiet ta' promozzjoni settorjali konġunti, bħall-promozzjoni ġenerali tal-konsum taż-żejt taż-żebbuġa, mhumiex rilevanti għall-finijiet tad-Deroga għax dawn mhumiex attività mwettqa minn OP waħda iżda attività koordinata bejn il-produtturi u/jew l-OP fl-istess settur li għandu l-għan li jkun ta' benefiċċju għas-settur kollu u mhux OP waħda biss.

iii. Organizzazzjoni konġunta tal-kontroll tal-kwalità

L-organizzazzjoni konġunta tal-kontroll tal-kwalità probabbli tiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun l-każ meta OP tassigura kwalità konsistenti tal-prodotti mmanifatturati mill-membri tagħha jew minħabba li dan ikun meħtieġ minn regolament jew minn standard stabbilit (pereż. jekk l-OP u l-membri tagħha jkollhom l-għan li jissodisfaw il-ħtiġijiet tax-xerrejja). L-OP tgħin sabiex tinkiseb il-kwalità qabelxejn permezz ta' parir u appoġġ dwar il-proċessi tal-produzzjoni. Hija u tagħmel dan, l-OP tipprovdi lill-produtturi b'servizzi fil-kamp bħal parir dwar metodi mtejba tal-applikazzjoni ta' aġenti fitosanitarji, kimiċi oħra u fertilizzanti, dwar l-applikazzjoni ta' tekniki aħjar tal-produzzjoni, l-assistenza fi problemi tal-produzzjoni agrikola, kwistjonijiet regolatorji u ta' spezzjoni li jgħinu lill-produttur sabiex jikseb prodott ta' kwalità. It-tieni, l-OP twettaq ukoll ittestjar (minnha stess jew esternalizzat) biex tivverifika l-kwalità taż-żejt taż-żebbuġa (ittestjar fil-laboratorju tal-aċidità u l-preżenza ta' pestiċidi, ittestjar tal-kwalitajiet organolettiċi, eċċ.) prodott mill-membri tagħha u dak li l-OP tikkummerċjalizza. It-tali ttestjar isir jew sabiex jintwera lil ċertifikaturi/kontrolluri indipendenti li l-prodotti jissodisfaw ir-rekwiżiti regolatorji jew standardizzati jew/u sabiex jiġi ppruvat lix-xerrej(ja) li l-prodotti jissodisfaw ir-rekwiżiti tiegħu/tagħhom. L-ispejjeż ta' dawn l-attivitajiet kollha jkunu sinifikanti jekk dawn l-attivitajiet ikopru aktar minn nofs iż-żejt taż-żebbuġa kkummerċjalizzat mill-OP. Fit-tali sitwazzjoni, huwa probabbli li l-OP tiġġenera effiċjenzi sinifikanti għax ikun konsiderevolment ogħla għall-membru individwali sabiex jikseb l-istess riżultat waħdu/waħedha. Konsegwentement, fit-tali sitwazzjoni, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

iv. Id-distribuzzjoni konġunta

Id-distribuzzjoni konġunta tista' tkopri l-attivitajiet segwenti: it-trasport konġunt, l-istabbiliment ta' ċentru tad-distribuzzjoni jew infrastruttura tal-bejgħ, jew/u l-organizzazzjoni ta' pjattaforma tal-bejgħ.

It-trasport konġunt huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-OP torganizza servizzi tat-trasport mill-imsaġar taż-żebbuġ sal-post tal-ipproċessar (fabbrika taż-żebbuġ) għall-aktar minn nofs iż-żejt taż-żebbuġa kummerċjalizzat mill-OP jew jekk l-OP torganizza servizzi tat-trasport minn diversi fabbriki taż-żebbuġ sa post tal-ippakkjar/ibbottiljar u tikkettar għall-aktar minn nofs iż-żejt taż-żebbuġa kummerċjalizzat mill-OP. L-ispejjeż tat-trasport jirrapreżentaw sehem sinifikanti mill-ispiża tal-produzzjoni u tat-tqegħid tal-prodott fuq is-suq. F'dan il-kuntest, l-OP tista' topera n-negozju tat-trasport b'mod aktar effiċjenti meta mqabbel ma' dak li kieku jsir mill-membri fuq bażi individwali. Pereżempju, l-OP tista' tikseb ekonomiji ta' skala billi tittrasporta volumi akbar, tikkonsolida n-numru tal-konsenji, tnaqqas l-ispejjeż tal-ħatt u l-immaniġġar. Għalhekk, fit-tali sitwazzjoni, l-OP hija probabbli li tikseb tnaqqis sinifikanti fl-ispejjeż u tiġġenera effiċjenzi sinifikanti meta mqabbel ma' dak li kieku jsir mill-membri fuq bażi individwali u, konsegwentement, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

L-istabbiliment ta' ċentru tad-distribuzzjoni jew infrastruttura tal-bejgħ, jew/u l-organizzazzjoni ta' pjattaforma tal-bejgħ. Il-Kummissjoni mhijiex konxja ta' sitwazzjoni fejn ċentru ta' distribuzzjoni, l-infrastruttura tal-bejgħ u/jew ta' pjattaforma ta' bejgħ online waħedhom jiġġeneraw effiċjenzi sinifikanti biżżejjed biex jikkonformaw ma' Test tal-Effiċjenzi Sinifikanti fis-settur taż-żejt taż-żebbuġa. Madankollu, jekk ikkombinat ma' attivitajiet oħra bħat-trasport jew il-kontroll tal-kwalità, fejn l-ispiża ta' dawn l-attivitajiet flimkien huwa sinifikanti, imbagħad dan jista' jiġġenera effiċjenzi sinifikanti jekk il-volumi koperti huma aktar minn nofs il-prodotti kkumerċjalizzati mill-OP. Konsegwentement, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat. Pereżempju, l-OP tista' torganizza konġuntament ċentru ta' distribuzzjoni, it-trasport tal-produzzjoni u pjattaforma ta' bejgħ onlajn. Jekk il-volumi koperti minn dawn l-attivitajiet huma aktar minn nofs il-volumi kummerċjalizzati mill-OP l-ispejjeż għall-istabbiliment u l-organizzazzjoni ta' dawn l-attivitajiet huma sinifikanti u dawn l-attivitajiet flimkien x'aktarx jiġġeneraw effiċjenzi sinifikanti u, konsegwentement, l-OP tissodisfa l-kundizzjonijiet tal-metodu simplifikat.

v. L-użu konġunt ta' tagħmir jew faċilitajiet ta' ħażna

L-użu konġunt ta' tagħmir huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju f'makkinarju agrikolu sinifikanti (pereż. magni tal-ħsad, applikaturi għall-aġenti fitosanitarji, fertilizzanti, pestiċidi) u tassigura l-użu u l-manutenzjoni xierqa tiegħu. Fit-tali każ, l-OP inizjalment iġġorr l-ispejjeż tal-investiment billi tixtri t-tagħmir (ġdid jew użat) sabiex tipproduċi ż-żejt taż-żebbuġa. L-OP wara ġġorr spejjeż oħra li jirrigwardaw il-manutenzjoni u li jassiguraw l-użu xieraq tat-tagħmir (pereż. it-taħriġ). L-investiment inizjali u spejjeż oħra fit-tagħmir jinvolvu spejjeż sinifikanti jekk ikunu jirrigwardaw volumi sinifikanti. F'dan il-kuntest, l-ispejjeż tal-użu tat-tagħmir ikunu sinifikanti jekk partijiet sinifikanti mill-volumi kummerċjalizzati mill-OP jiġu prodotti bil-għajnuna tat-tagħmir bi sjieda konġunta. Għalhekk, jekk it-tagħmir jintuża biex jiġi prodott aktar minn nofs il-volum ta' żejt taż-żebbuġa kummerċjalizzat mill-OP, l-OP probabbli tiġġenera effiċjenzi sinifikanti. Sikwit ikun meħtieġ tagħmir/makkinarju ġdid sabiex tiżdied il-produttività kif ukoll sabiex ikun assigurat li l-prodott jissodisfa l-eżiġenzi tas-suq. Madankollu, xi produtturi ma jistgħux jaffordjaw tagħmir ġdid minħabba l-investimenti kbar meħtieġa, għalhekk l-użu konġunt tat-tagħmir jista' jiffranka l-ispejjeż għall-membri u jżid il-produttività tagħhom. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-użu konġunt ta' faċilitajiet ta' ħażna huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju fil-faċilitajiet ta' ħażna u tassigura l-użu u l-manutenzjoni xierqa tiegħu. L-OP iġġorr l-ispejjeż tal-investiment inizjali fil-ħażna billi tixtri jew tippjana u tibni l-faċilitajiet. L-OP iġġorr l-ispejjeż ta' investimenti oħra fil-ħażna billi ttejjeb il-faċilitajiet. L-investimenti fil-ħażna jinvolvu spejjeż sinifikanti jekk ikunu jirrigwardaw volumi sinifikanti. L-ispejjeż tal-użu tal-ħażna jkunu wkoll sinifikanti jekk partijiet sinifikanti mill-volumi taż-żejt taż-żebbuġa tal-OP jinħażnu permezz ta' dawn il-faċilitajiet. Jekk l-attivitajiet ta' ħażna jkopru aktar minn nofs iż-żejt taż-żebbuġa kummerċjalizzat mill-OP u għalhekk ikunu sinifikanti f'termini ta' volumi, l-OP probabbli tiġġenera effiċjenzi sinifikanti. Il-forniment ta' faċilitajiet ta' ħażna mill-OP jista' jwassal għal spejjeż anqas meta mqabbel mas-sitwazzjoni fejn il-membri jridu jinvestu individwalment fil-ħażna. Il-possibbiltà li l-prodott jinħażen mingħajr ma jiġi kkonsenjat minnufih lil parti terza, possibbilment għal perjodu itwal u possibbilment fi kwantitajiet akbar, tippermetti lill-membri tal-OP li jbigħu l-prodotti tagħhom meta l-prezz ikun aktar favorevoli u mhux neċessarjament fi żmien il-ħsad meta l-provvista tkun fl-ogħla livell. Din tista' tindirizza wkoll l-iżbilanċi fil-provvista maħluqa mill-volumi varjabbli taż-żebbuġ li jinħasad fi snin differenti. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

vi. Ġestjoni konġunta ta' skart relatat direttament mal-produzzjoni taż-żejt taż-żebbuġa

Sa fejn taf il-Kummissjoni, jidher li ġestjoni konġunta ta' skart relatat direttament mal-produzzjoni taż-żejt taż-żebbuġa normalment isseħħ flimkien mal-ipproċessar konġunt, li waħdu, jekk dan ikopri aktar minn nofs iż-żejt taż-żebbuġa kummerċjalizzat mill-OP, aktarx jiġġenera effiċjenzi sinifikanti u għalhekk jissodisfa l-kundizzjonijiet tal-metodu simplifikat (ara iktar 'il fuq il-punt (i) għal ipproċessar konġunt).

vii. L-akkwist konġunt ta' inputs

L-akkwist konġunt ta' inputs probabbli jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-akkwist isir għal volumi sinifikanti billi mbagħad l-OP tista' tikseb skontijiet sinifikanti, termini ta' konsenja u/jew termini ta' kreditu aħjar meta mqabbla ma' dak li kieku jikseb produttur individwali. Barra minn hekk, billi tixtri dawn l-inputs f'isimha, l-OP tista' tassigura ħażna u/jew konsenja xierqa ta' dawn il-prodotti. Meta OP takkwista fertilizzanti, aġenti fitosanitarji, pestiċidi jew enerġija (fjuwil, elettriku) għall-membri tagħha, dawn l-inputs jirrappreżentaw spejjeż sinifikanti (50). Jekk OP tagħmel l-akkwist ta' dawn l-inputs għal volum li jikkorrispondi għal dak li jkun meħtieġ sabiex jiġi prodott aktar minn nofs taż-żejt taż-żebbuġa kummerċjalizzat b'mod konġunt, l-OP probabbli tiġġenera effiċjenzi sinifikanti. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-akkwist ta' tip ieħor ta' input, bħal appoġġ tal-IT, pariri ekonomiċi jew tekniċi, servizzi fitosanitarji, waħdu, normalment ma jirrappreżentax spejjeż sinifikanti għall-OP. Konsegwentement mhuwiex probabbli li li l-OP tiġġenera effiċjenzi sinifikanti sabiex tibbenifika mid-Deroga.

viii. Il-kombinamenti ta' attivitajiet

10.

IS-SETTUR TAL-LAĦAM TAĊ-ĊANGA U TAL-VITELLA

L-applikazzjoni tat-Test tal-Effiċjenzi Sinifikanti

Eżempji ta' sitwazzjonijiet fejn attivitajiet konġunti elenkati fl-Artikolu 170 tar-Regolament dwar l-OKS x'aktarx li jiġġeneraw effiċjenzi sinifikanti fil-kuntest tal-metodu simplifikat.

i. Id-distribuzzjoni konġunta

Id-distribuzzjoni konġunta tista' tkopri l-attivitajiet li ġejjin: it-trasport konġunt, l-istabbiliment ta' ċentru tad-distribuzzjoni jew infrastruttura tal-bejgħ, jew/u l-organizzazzjoni ta' pjattaforma tal-bejgħ.

It-trasport konġunt huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-OP torganizza servizzi tat-trasport mill-punti tal-produzzjoni sax-xerrej jew sal-post tal-ipproċessar għal aktar minn nofs tal-bhejjem ikkummerċjalizzati mill-OP. F'dan il-kuntest, l-OP tista' topera n-negozju tat-trasport b'mod aktar effiċjenti meta mqabbel ma' dak li kien isir mill-membri fuq bażi individwali. Pereżempju, l-OP tista' tikseb ekonomiji ta' skala billi tittrasporta volumi akbar, tikkonsolida n-numru tal-konsenji, tnaqqas l-ispejjeż tal-ħatt u l-immaniġġar. Għalhekk, fit-tali sitwazzjoni, l-OP hija probabbli li tikseb tnaqqis sinifikanti fl-ispejjeż u tiġġenera effiċjenzi sinifikanti meta mqabbel ma' dak li kieku jsir mill-membri fuq bażi individwali u l-OP tissodisfa l-kundizzjonijiet tal-metodu simplifikat.

L-organizzazzjoni ta' pjattaforma tal-bejgħ probabbli tiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-OP tiżviluppa suq fiżiku jew pjattaforma tal-irkant għall-bejgħ tal-bhejjem. Fit-tali sitwazzjoni, l-OP tinvesti f'faċilitajiet sabiex tippreżenta l-bhejjem u tippermetti l-kummerċ tal-bhejjem. Dan jeħtieġ kostijiet sinifikanti ta' investiment u jirriżulta fi spejjeż sinifikanti operattivi. Sabiex wieħed jikkonforma ruħu mal-metodu simplifikat, l-attività jkollha tkopri volumi kbar u kummerċ regolari. Dan jinkiseb jekk il-pjattaforma ta' bejgħ tirrapreżenta l-kanal prinċipali ta' bejgħ għall-membri tagħha, jiġifieri l-OP tbigħ aktar minn nofs il-bhejjem tal-membri tagħha (f'volum). Dan huwa probabbli li jassigura ekonomiji ta' skala għall-bejgħ tal-bhejjem billi jippermetti lill-produtturi li jilħqu numru akbar ta' xerrejja u aktar malajr milli kieku kienu qegħdin jagħmlu dan individwalment. Dan jista' jnaqqas ukoll l-ispejjeż tat-tranżazzjonijiet għall-bejjiegħa u x-xerrejja. Għalhekk, fit-tali sitwazzjoni, l-OP probabbli tiġġenera effiċjenzi sinifikanti meta mqabbel ma' dak li kieku jsir mill-membri fuq bażi individwali u l-OP tissodisfa l-kundizzjonijiet tal-metodu simplifikat.

L-istabbiliment ta' ċentru tad-distribuzzjoni huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju f'faċilità tad-distribuzzjoni bħal ċentru ta' ġbir tal-għoġġiela biex tiġbor l-għoġġiela abbażi ta' ċerti speċifikazzjonijiet u tassigura l-użu u l-manutenzjoni xierqa taċ-ċentru. L-OP iġġorr l-ispejjeż tal-investiment inizjali fiċ-ċentru tad-distribuzzjoni billi tixtri jew tippjana u tibni l-faċilità. L-OP iġġorr investimenti oħra billi ttejjeb il-faċilità. L-investimenti inizjali u oħrajn jinvolvu spejjeż sinifikanti jekk ikunu jirrigwardaw volumi sinifikanti. L-ispejjeż tat-tmexxija tal-faċilità jkunu sinifikanti wkoll meta partijiet sinifikanti mill-volumi tal-OP jiġu distribwiti permezz ta' din il-faċilità. Jekk l-attivitajiet ta' distribuzzjoni jkopru aktar minn nofs il-bhejjem kummerċjalizzati mill-OP u għalhekk ikunu sinifikanti f'termini ta' volumi, l-OP probabbli tiġġenera effiċjenzi sinifikanti. Dan jassigura ekonomiji ta' skala għall-bejgħ tal-bhejjem billi jippermetti lill-produtturi li jilħqu numru akbar ta' xerrejja u aktar malajr milli kieku kienu qegħdin jiddistribwixxu l-bhejjem individwalment. Dan jista' jnaqqas ukoll l-ispejjeż tat-tranżazzjonijiet għall-bejjiegħa u x-xerrejja. Għalhekk, fit-tali sitwazzjoni, l-OP probabbli tiġġenera effiċjenzi sinifikanti meta mqabbel ma' dak li kieku jsir mill-membri fuq bażi individwali u l-OP tissodisfa l-kundizzjonijiet tal-metodu simplifikat.

ii. Il-promozzjoni konġunta

Il-promozzjoni konġunta probabbli tiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk OP tiżviluppa u tikkummerċjalizza prodott b'valur miżjud. Prodott ikollu “valur miżjud”, pereżempju jekk ikun distint minn prodotti oħra bbażati fuq sett speċifiku ta' karatteristiċi li jissodisfaw ħtiġijiet partikolari ta' klijenti. L-OP tista' tiddifferenzja l-prodott tagħha fuq il-bażi tar-razza, l-għalf, is-sistema tal-produzzjoni jew il-post tal-oriġini jew fatturi oħra. F'dan il-kuntest, il-promozzjoni konġunta hija l-parti tal-kummerċjalizzazzjoni ta' strateġija integrata sabiex jinbiegħ it-tali prodott b'valur miżjud u l-attività ta' promozzjoni konġunta hija waħda minn diversi attivitajiet imwettqa sabiex tiġi implimentata din l-istrateġija. L-OP tistabbilixxi u tassigura l-konformità mas-sett ta' speċifikazzjonijiet tal-prodott: dan jinvolvi pereżempju l-iżvilupp ta' numru adegwat ta' speċifikazzjonijiet, il-proċess ta' ppjanar tal-produzzjoni u l-kontroll tal-kwalità fir-rigward tat-tali speċifikazzjonijiet, l-akkwist ta' inputs meħtieġa biex jiġu rrispettati l-ispeċifikazzjonijiet eċċ. L-ispejjeż tat-tali approċċ integrat kemm għal OP u kif ukoll għall-membri tagħha sabiex jikkonformaw ruħhom mal-ispeċifikazzjonijiet ikunu sinifikanti meta dawn ikopru aktar minn nofs il-volumi kkummerċjalizzati mill-OP. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-attivitajiet ta' promozzjoni settorjali konġunti, bħall-promozzjoni ġenerali tal-konsum tal-laħam taċ-ċanga, mhumiex rilevanti għall-finijiet tad-Deroga għax din mhijiex attività mwettqa minn OP waħda iżda attività koordinata bejn l-OP fl-istess settur li għandu l-għan li jkun ta' benefiċċju għas-settur kollu u mhux għal OP waħda biss.

iii. Organizzazzjoni konġunta tal-kontroll tal-kwalità

L-organizzazzjoni konġunta tal-kontroll tal-kwalità probabbli tiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ meta OP tassigura kwalità konsistenti tal-bhejjem mill-membri tagħha jew minħabba li dan ikun meħtieġ minn regolament jew minn standard stabbilit meħtieġ mix-xerrejja. L-OP tgħin sabiex tinkiseb il-kwalità qabelxejn permezz ta' pariri u appoġġ dwar il-proċessi tal-produzzjoni. Hija u tagħmel dan, l-OP tipprovdi servizzi bħal pariri dwar ir-razza, għalf imtejjeb, l-applikazzjoni ta' tekniki aħjar għat-trobbija tal-bhejjem u l-assistenza fi problemi tal-produzzjoni fl-irziezet u kwistjonijiet regolatorji u ta' spezzjoni għall-produttur biex jikseb prodott ta' kwalità. It-tieni, l-OP tipprovdi servizzi veterinarji (tagħha stess jew esternalizzati) biex tassigura s-saħħa u s-sikurezza tal-prodott (tilqim u azzjonijiet profilattiċi oħra, sorveljanza tal-mard, attivitajiet ta' riproduzzjoni, eċċ) li jiġi prodott mill-membri tagħha u li l-OP tikkummerċjalizza. Barra minn hekk, l-OP twettaq ittestjar, jew biex turi lil ċertifikaturi/kontrolluri indipendenti li l-prodotti jissodisfaw ir-rekwiżiti regolatorji ta' sikurezza jew ir-rekwiżiti standardizzati ta' kwalità, jew/u biex tipprova lix-xerrej(ja) li l-prodotti jissodisfaw ir-rekwiżiti addizzjonali tiegħu/tagħhom. L-ispejjeż ta' dawn l-attivitajiet kollha jkunu sinifikanti jekk dawn l-attivitajiet ikopru aktar minn nofs il-bhejjem ikkummerċjalizzati mill-OP. Fit-tali sitwazzjoni, huwa probabbli li l-OP tiġġenera effiċjenzi sinifikanti għax ikun konsiderevolment ogħla għall-membru individwali sabiex jikseb l-istess riżultat waħdu/waħedha u, konsegwentement, l-OP tissodisfa l-kundizzjonijiet tal-metodu simplifikat.

iv. L-użu konġunt ta' tagħmir jew faċilitajiet ta' ħażna

L-użu konġunt ta' tagħmir huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju fit-tagħmir sinifikanti (pereż. makkinarju għall-produzzjoni tal-għalf bħal magna tal-ħsad, magna tat-tħin) u tassigura l-użu u l-manutenzjoni xierqa tiegħu. F'każ bħal dan, l-OP inizjalment iġġorr l-ispejjeż tal-investiment billi tixtri t-tagħmir (ġdid jew użat) biex tipproduċi l-bhejjem. L-OP wara ġġorr spejjeż oħra li jirrigwardaw il-manutenzjoni u li jassiguraw l-użu xieraq tat-tagħmir (pereż. it-taħriġ). L-investiment inizjali u spejjeż oħra fit-tagħmir jinvolvu spejjeż sinifikanti jekk ikunu jirrigwardaw volumi sinifikanti. F'dan il-kuntest, l-ispejjeż tal-użu tat-tagħmir ikunu sinifikanti jekk partijiet sinifikanti mill-volumi kummerċjalizzati mill-OP jiġu prodotti bil-għajnuna tat-tagħmir bi sjieda konġunta. Għalhekk, jekk it-tagħmir jintuża biex jiġi prodott aktar minn nofs tal-volum tal-bhejjem ikkummerċjalizzati mill-OP, l-OP probabbli tiġġenera effiċjenzi sinifikanti. Sikwit ikun meħtieġ tagħmir/makkinarju ġdid sabiex tiżdied il-produttività kif ukoll sabiex ikun assigurat li l-prodott jissodisfa l-eżiġenzi tas-suq. Madankollu, xi produtturi ma jistgħux jaffordjaw tagħmir ġdid minħabba l-investimenti kbar meħtieġa, għalhekk l-użu konġunt tat-tagħmir jista' jiffranka l-ispejjeż għall-membri u jżid il-produttività tagħhom. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-użu konġunt ta' faċilitajiet ta' ħażna huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju fil-faċilitajiet ta' ħażna (pereż. għall-għalf) u tassigura l-użu u l-manutenzjoni xierqa tiegħu. L-OP iġġorr l-ispejjeż tal-investiment inizjali fil-ħażna billi tixtri jew tippjana u tibni l-faċilitajiet. L-OP iġġorr investimenti oħra f'faċilitajiet ta' ħażna billi ttejjeb il-faċilitajiet. L-investimenti inizjali u investimenti oħra f'faċilitajiet ta' ħażna jinvolvu spejjeż sinifikanti jekk dawn ikunu jirrigwardaw volumi sinifikanti. L-ispejjeż tal-użu tal-faċilitajiet ta' ħażna jkunu wkoll sinifikanti jekk partijiet sinifikanti mill-volumi tal-OP jiġu maħżuna permezz ta' dawn il-faċilitajiet. Jekk l-attivitajiet ta' ħażna jkopru aktar minn nofs tal-bhejjem ikkummerċjalizzati mill-OP u għalhekk ikunu sinifikanti f'termini tal-volumi, l-OP probabbli tiġġenera effiċjenzi sinifikanti. Il-forniment ta' faċilitajiet ta' ħażna mill-OP jista' jwassal għal spejjeż anqas meta mqabbel mas-sitwazzjoni fejn il-membri jridu jinvestu individwalment f'faċilitajiet ta' ħażna. Il-possibbiltà li jinħażen l-għalf mingħajr ma ssir il-kunsinna tiegħu minnufih lill-membri tal-OP, possibilment għal perjodu itwal u possibilment fi kwantitajiet kbar, jippermetti lill-membri tal-OP sabiex ikollhom l-għalf meta meħtieġ, mingħajr dewmien. Barra minn hekk, l-OP tista' tixtri ammonti kbar ta' għalf meta l-prezz ikun interessanti u taħżnu sakemm dan jintuża' mill-membri. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

v. Il-ġestjoni konġunta ta' skart relatat direttament mal-produzzjoni ta' bhejjem ħajjin

Il-ġestjoni konġunta ta' skart probabbli tiġġenera effiċjenza sinifikanti f'ċerti sitwazzjonijiet. Pereżempju, dan jista' jkun il-każ jekk l-OP tassigura t-tneħħija, il-ħażna u l-użu mill-ġdid tal-iskart b'mod sostenibbli (għall-enerġija u għall-produzzjoni tal-bijogass, għall-fertilizzanti, eċċ) għall-iskart ipproduċit minn aktar minn nofs il-bhejjem ikkummerċjalizzati mill-OP. F'dan il-kuntest, l-OP tista' topera l-ġestjoni ta' skart b'mod aktar effiċjenti meta mqabbel ma' dak li kieku jsir mill-membri fuq bażi individwali. Pereżempju, l-OP tista' tikseb ekonomiji ta' skala billi tittrasporta volumi akbar ta' skart, tikkonsolida n-numru tal-konsenji, tnaqqas l-ispejjeż tal-ħatt u l-immaniġġar. Għalhekk, fit-tali sitwazzjoni, l-OP hija probabbli li tikseb tnaqqis sinifikanti fl-ispejjeż u tiġġenera effiċjenzi sinifikanti meta mqabbel ma' dak li kieku jsir mill-membri fuq bażi individwali u għalhekk, l-OP tissodisfa l-kundizzjonijiet tal-metodu simplifikat.

vi. L-akkwist konġunt ta' inputs

L-akkwist konġunt ta' inputs huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-akkwist isir għal volumi sinifikanti billi mbagħad l-OP tista' tikseb skontijiet sinifikanti, termini ta' konsenja u/jew termini ta' kreditu aħjar meta mqabbla ma' dak li kieku jikseb produttur individwali. Minbarra li tixtri dawn l-inputs f'isimha, l-OP tista' tassigura ħażna u/jew konsenja xierqa ta' dawn il-prodotti lill-membri tagħha. Meta OP takkwista għalf, annimali mixtrija jew inputs oħra bħall-fjuwil u l-elettriku għall-membri tagħha, dawn l-inputs jirrappreżentaw spejjeż sinifikanti (51). Jekk OP takkwista dawn l-inputs għal volum li jikkorrispondi għal dak li jkun meħtieġ sabiex jiġi prodott aktar minn nofs tal-bhejjem ikkummerċjalizzati b'mod konġunt, l-OP probabbli tiġġenera effiċjenzi sinifikanti. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-akkwist per se ta' tip ieħor ta' inputs, bħall-appoġġ tal-IT, il-pariri ġenetiċi, is-servizzi veterinarji, is-servizzi ta' inseminazzjoni normalment ma jirrappreżentax spejjeż sinifikanti għall-OP sabiex tikkonforma mal-metodu simplifikat u għalhekk mhuwiex probabbli li l-OP tiġġenera effiċjenzi sinifikanti sabiex tibbenifika mid-Deroga.

vii. Il-kombinamenti ta' attivitajiet

10.

Il-kombinament ta' attivitajiet f'sitwazzjoni fejn l-ebda attività ma tkopri aktar minn nofs tal-bhejjem ikkummerċjalizzati minn OP aktarx jiġġenera effiċjenzi sinifikanti f'ċerti sitwazzjonijiet. Ara aktar 'l isfel il-kaxxa għall-Kombinamenti ta' attivitajiet għal aktar dettalji.

IS-SETTUR TAL-UĊUĦ TAR-RABA'

L-applikazzjoni tat-Test tal-Effiċjenzi Sinifikanti

Eżempji ta' sitwazzjonijiet fejn attivitajiet konġunti elenkati fl-Artikolu 171 tar-Regolament dwar l-OKS aktarx li jiġġeneraw effiċjenzi sinifikanti fil-kuntest tal-metodu simplifikat.

i. Id-distribuzzjoni konġunta

Id-distribuzzjoni konġunta tista' tkopri l-attivitajiet li ġejjin: it-trasport konġunt, l-istabbiliment ta' ċentru tad-distribuzzjoni jew infrastruttura tal-bejgħ, u/jew l-organizzazzjoni ta' pjattaforma tal-bejgħ.

It-trasport konġunt huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-OP torganizza servizzi tat-trasport (trasport fit-toroq jew trasport ferrovjarju, jew trasport marittimu) mill-punti tal-ħsad sal-faċilità ta' ħażna jew sal-post tal-ipproċessar tax-xerrej għal aktar minn nofs il-volumi tal-uċuħ tar-raba' kummerċjalizzati mill-OP. F'dan il-kuntest, l-OP tista' topera n-negozju tat-trasport b'mod aktar effiċjenti meta mqabbel ma' dak li kien isir mill-membri fuq bażi individwali. Pereżempju, l-OP tista' tikseb ekonomiji ta' skala billi tittrasporta volumi akbar, tikkonsolida n-numru tal-konsenji, tnaqqas l-ispejjeż tal-ħatt u l-immaniġġar. Għalhekk, fit-tali sitwazzjoni, l-OP hija probabbli li tikseb tnaqqis sinifikanti fl-ispejjeż u tiġġenera effiċjenzi sinifikanti meta mqabbel ma' dak li kieku jsir mill-membri fuq bażi individwali u għalhekk, l-OP tissodisfa l-kundizzjonijiet tal-metodu simplifikat.

L-istabbiliment ta' ċentru tad-distribuzzjoni jew infrastruttura tal-bejgħ, jew/u l-organizzazzjoni ta' pjattaforma tal-bejgħ. Il-Kummissjoni mhijiex konxja ta' sitwazzjoni fejn ċentru ta' distribuzzjoni, l-infrastruttura tal-bejgħ u/jew ta' pjattaforma ta' bejgħ onlajn waħedhom jiġġeneraw effiċjenzi sinifikanti biżżejjed biex jikkonformaw ma' Test tal-Effiċjenzi Sinifikanti fis-settur tal-uċuħ tar-raba'. Madankollu, jekk ikkombinat ma' attivitajiet oħra bħat-trasport jew il-kontroll tal-kwalità, l-ispiża ta' dawn l-attivitajiet flimkien tkun sinifikanti u mbagħad dan jista' jiġġenera effiċjenzi sinifikanti jekk il-volumi koperti huma aktar minn nofs il-produzzjoni tal-OP. Konsegwentement, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat. Pereżempju, l-OP tista' torganizza konġuntament ċentru ta' distribuzzjoni, it-trasport tal-produzzjoni u pjattaforma ta' bejgħ onlajn. Jekk il-volumi koperti huma aktar minn nofs il-volumi kummerċjalizzati mill-OP, l-ispejjeż għall-istabbiliment u l-organizzazzjoni ta' dawn l-attivitajiet huma sinifikanti u dawn l-attivitajiet flimkien aktarx jiġġeneraw effiċjenzi sinifikanti u, konsegwentement, l-OP tissodisfa l-kundizzjonijiet tal-metodu simplifikat.

ii. Il-promozzjoni konġunta

Il-promozzjoni konġunta probabbli tiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk OP tiżviluppa u tikkummerċjalizza prodott b'valur miżjud. Prodott ikollu “valur miżjud”, pereżempju jekk ikun distint minn prodotti oħra bbażati fuq sett speċifiku ta' karatteristiċi li jissodisfaw ħtiġijiet partikolari ta' klijenti. L-OP tista' tiddifferenzja l-prodott tagħha fuq il-bażi tal-kontenut ta' proteini, iż-żerriegħa użata, l-użu ta' fertilizzanti, il-kontenut umdu tal-għelejjel u d-daqs tal-konsenja jew il-post tal-oriġini jew fatturi oħra. Pereżempju, fis-settur taż-żrieragħ, il-promozzjoni tista' tinkludi informazzjoni teknika tar-razzjonijiet tal-għalf. F'dan il-kuntest, il-promozzjoni konġunta hija l-parti tal-kummerċjalizzazzjoni ta' strateġija integrata sabiex jinbiegħ it-tali prodott b'valur miżjud u l-attività ta' promozzjoni konġunta hija waħda minn diversi attivitajiet imwettqa sabiex tiġi implimentata din l-istrateġija. L-OP tistabbilixxi u tassigura l-konformità mas-sett ta' speċifikazzjonijiet tal-prodott. Dan jinvolvi pereżempju l-iżvilupp ta' numru adegwat ta' speċifikazzjonijiet, il-proċess ta' ppjanar tal-produzzjoni u l-kontroll tal-kwalità fir-rigward tat-tali speċifikazzjonijiet, l-akkwist ta' inputs meħtieġa biex jiġu rrispettati l-ispeċifikazzjonijiet eċċ. L-ispejjeż tat-tali approċċ integrat kemm għal OP u kif ukoll għall-membri tagħha sabiex jikkonformaw ruħhom mal-ispeċifikazzjonijiet ikunu sinifikanti meta dawn ikopru mill-anqas nofs il-volumi kkummerċjalizzati mill-OP. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-attivitajiet ta' promozzjoni settorjali konġunti, bħall-promozzjoni ġenerali tal-konsum ta' uċuħ tar-raba', mhumiex rilevanti għall-finijiet tad-Deroga għax din mhijiex attività mwettqa minn OP waħda iżda attività koordinata bejn l-OP fl-istess settur li għandhom l-għan li jkunu ta' benefiċċju għas-settur kollu u mhux għal OP waħda biss.

iii. L-organizzazzjoni konġunta tal-kontroll tal-kwalità

L-organizzazzjoni konġunta tal-kontroll tal-kwalità probabbli tiġġenera effiċjenzi sinifikanti f'ċerti sitwazzjonijiet. Pereżempju, dan ikun il-każ meta OP tassigura kwalità konsistenti tal-prodotti mmanifatturati mill-membri tagħha jew minħabba li dan ikun meħtieġ minn regolament jew minn standard stabbilit meħtieġ mix-xerrejja. Dan jista' jkun il-każ ta' tnixxif u t-taħlit konġunt ta' uċuħ tar-raba' sabiex jintlaħaq l-istandard tal-kwalità mitlub minn xerrej. L-OP tgħin sabiex tinkiseb il-kwalità qabelxejn permezz ta' pariri u appoġġ dwar il-proċessi tal-produzzjoni. Hija u tagħmel dan, l-OP tipprovdi servizzi fil-kamp bħal pariri dwar metodi mtejba tal-applikazzjoni tal-kimiċi u l-fertilizzanti, l-applikazzjoni ta' tekniki aħjar, pereż. il-ħrit bl-ixfra, il-fertilizzar, it-transpjantar, il-kontroll tal-pesti, eċċ., jew/u l-assistenza fi problemi tal-produzzjoni fl-azjendi agrikoli u kwistjonijiet regolatorji u ta' spezzjoni għall-produttur biex jikseb prodott ta' kwalità. It-tieni, l-OP twettaq ukoll ittestjar fil-laboratorju (minnha stess jew esternalizzat) biex tivverifika l-kwalità tal-għelejjel (proteini, umdità, daqs taż-żerriegħa, impuritajiet, eċċ.) li jiġu prodotti mill-membri tagħha u li l-OP tikkummerċjalizza. Ittestjar bħal dan isir jew sabiex jintwera lil ċertifikaturi/kontrolluri indipendenti li l-prodotti jissodisfaw ir-rekwiżiti regolatorji jew standardizzati jew/u sabiex jiġi ppruvat lix-xerrej(ja) li l-prodotti jissodisfaw ir-rekwiżiti tiegħu/tagħhom. L-ispejjeż ta' dawn l-attivitajiet kollha jkunu sinifikanti jekk dawn l-attivitajiet ikopru aktar minn nofs l-uċuħ tar-raba' kkummerċjalizzati mill-OP. Fit-tali sitwazzjoni, huwa probabbli li l-OP tiġġenera effiċjenzi sinifikanti għax ikun konsiderevolment ogħla għall-membru individwali sabiex jikseb l-istess riżultat waħdu/waħedha. Għalhekk, l-OP tissodisfa l-kundizzjonijiet tal-metodu simplifikat.

iv. L-użu konġunt ta' tagħmir jew faċilitajiet ta' ħażna

L-użu konġunt ta' tagħmir huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju f'makkinarju agrikolu sinifikanti (bħal magna tal-ħsad jew magna li tnixxef) u tassigura l-użu u l-manutenzjoni xierqa tiegħu. Fit-tali każ, l-OP inizjalment iġġorr l-sipejjeż tal-investiment billi tixtri t-tagħmir (ġdid jew użat) biex tipproduċi l-uċuħ tar-raba' u/jew timmaniġġa l-wiċċ maħsud. L-OP wara ġġorr spejjeż oħra li jirrigwardaw il-manutenzjoni u li jassiguraw l-użu xieraq tat-tagħmir (pereż. it-taħriġ). L-investiment inizjali u spejjeż oħra fit-tagħmir jinvolvu spejjeż sinifikanti jekk ikunu jirrigwardaw volumi sinifikanti. F'dan il-kuntest, l-ispejjeż tal-użu tat-tagħmir ikunu sinifikanti jekk partijiet sinifikanti mill-volumi kummerċjalizzati mill-OP jiġu prodotti bil-għajnuna tat-tagħmir bi sjieda konġunta. Għalhekk, jekk it-tagħmir jintuża biex jiġi prodott aktar minn nofs tal-volum tal-uċuħ tar-raba' kummerċjalizzati mill-OP, l-OP probabbli tiġġenera effiċjenzi sinifikanti. Sikwit ikun meħtieġ tagħmir/makkinarju ġdid sabiex tiżdied il-produttività kif ukoll sabiex ikun assigurat li l-prodott jissodisfa l-eżiġenzi tas-suq. Madankollu, xi produtturi ma jistgħux jaffordjaw tagħmir ġdid minħabba l-investimenti kbar meħtieġa, għalhekk l-użu konġunt tat-tagħmir jista' jiffranka l-ispejjeż għall-membri u jżid il-produttività tagħhom. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-użu konġunt ta' faċilitajiet ta' ħażna huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ fejn l-OP twettaq l-investiment neċessarju fil-faċilitajiet ta' ħażna sabiex tissodisfa r-rekwiżiti ta' saħħa u r-rekwiżiti industrijali u tassigura l-użu u l-manutenzjoni xierqa tagħhom. L-OP iġġorr l-ispejjeż tal-investiment inizjali fil-ħażna billi tixtri jew tippjana u tibni l-faċilitajiet. L-OP iġġorr l-ispejjeż ta' investimenti oħra fil-ħażna billi ttejjeb il-faċilitajiet. L-investimenti fil-ħażna jinvolvu spejjeż sinifikanti jekk ikunu jirrigwardaw volumi sinifikanti. L-ispejjeż tal-użu tal-ħażna jkunu wkoll sinifikanti jekk partijiet sinifikanti mill-volumi tal-OP jinħażnu permezz ta' dawn il-faċilitajiet. Jekk l-attivitajiet ta' ħażna jkopru iktar minn nofs tal-uċuħ tar-raba' kummerċjalizzati mill-OP u għalhekk ikunu sinifikanti f'termini ta' volumi, l-OP probabbli tiġġenera effiċjenzi sinifikanti. Il-forniment ta' faċilitajiet ta' ħażna mill-OP jista' jwassal għal spejjeż anqas meta mqabbel mas-sitwazzjoni fejn il-membri jridu jinvestu individwalment fil-ħażna. Il-possibbiltà li l-prodott jinħażen mingħajr ma jiġi kkonsenjat immedjatament lil parti terza, possibbilment għal perjodu itwal u possibbilment fi kwantitajiet akbar, tippermetti lill-membri tal-OP li jbigħu l-prodotti tagħhom meta l-prezz ikun aktar favorevoli u mhux neċessarjament fi żmien il-ħsad meta l-provvista tkun fl-ogħla livell. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

v. L-akkwist konġunt ta' inputs

L-akkwist konġunt ta' inputs huwa probabbli li jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ jekk l-akkwist isir għal volumi sinifikanti billi mbagħad l-OP tista' tikseb skontijiet sinifikanti, termini ta' konsenja u/jew termini ta' kreditu aħjar meta mqabbla ma' dak li kieku jikseb produttur individwali. Minbarra li tixtri dawn l-inputs f'isimha, l-OP tista' tassigura ħażna u/jew konsenja xierqa ta' dawn il-prodotti. Meta OP takkwista fertilizzanti, pestiċidi jew enerġija (fjuwil, elettriku) għall-membri tagħha, dawn l-inputs jirrappreżentaw spejjeż sinifikanti (52). Jekk OP takkwista dawn l-inputs għal volum li jikkorrispondi għal dak li jkun meħtieġ sabiex jiġi prodott aktar minn nofs tal-uċuħ tar-raba' kummerċjalizzati konġuntament, l-OP probabbli tiġġenera effiċjenzi sinifikanti. Fit-tali sitwazzjoni, l-OP tissodisfa l-kundizzjonijiet tal-metodu simplifikat.

L-akkwist ta' tip ieħor ta' input, bħal appoġġ tal-IT, servizzi finanzjarji, pariri ekonomiċi u tekniċi, ittestjar, ippjanar ta' ħsad, waħdu normalment ma jirrappreżentax spejjeż sinifikanti għall-OP. Konsegwentement mhuwiex probabbli li li l-OP tiġġenera effiċjenzi sinifikanti sabiex tibbenifika mid-Deroga.

vi. Il-kombinamenti ta' attivitajiet

Il-kombinament ta' attivitajiet f'sitwazzjoni fejn l-ebda attività ma tkopri aktar minn nofs ta' uċuħ tar-raba' kummerċjalizzati minn OP aktarx jiġġenera effiċjenzi sinifikanti f'ċerti sitwazzjonijiet. Ara aktar 'l isfel il-kaxxa għall-Kombinamenti ta' attivitajiet għal aktar dettalji.

Il-kombinamenti ta' attivitajiet

Eżempji ta' sitwazzjonijiet fejn attivitajiet ikkombinati elenkati fl-Artikoli 169, 170 u 171 tar-Regolament dwar l-OKS aktarx li jiġġeneraw effiċjenzi sinifikanti fil-kuntest tal-metodu simplifikat.

L-attivitajiet li jtejbu l-effiċjenza deskritti aktar 'il fuq huma misjuba f'ħafna każijiet li joħolqu effiċjenzi sinifikanti meta dawn ikopru aktar minn nofs il-volumi kkummerċjalizzati mill-OP. Meta OP twettaq żewġ attivitajiet jew aktar ta' titjib tal-effiċjenza li kull waħda minnhom tkopri volumi li huma iżgħar minn nofs il-volumi kkummerċjalizzati mill-OP, is-somma u/jew il-kombinament tal-effiċjenzi maħluqa mill-attivitajiet differenti jistgħu konġuntament ikunu sinifikanti biżżejjed għall-OP sabiex tissodisfa t-Test tal-Effiċjenzi Sinifikanti.

Jista' jkun li attivitajiet differenti bil-għan li tittejjeb l-effiċjenza jkopru l-istess volum (jiġifieri t-trikkib ta' attivitajiet) jew li dawn jkopru volumi separati.

Jekk attività ta' titjib tal-effiċjenza tkopri proporzjon baxx ħafna (pereż. 10 % jew 15 %) tal-volumi kkummerċjalizzati mill-OP, huwa improbabbli li din tikkontribwixxi għall-ħolqien ta' effiċjenzi sinifikanti billi waħedha din toħloq effiċjenzi limitati u huwa improbabbli li l-kombinament tagħha ma' attività oħra jżid b'mod sinifikanti l-effiċjenzi tal-attivitajiet tal-OP. Huwa għalhekk improbabbli li OP toħloq effiċjenzi sinifikanti bit-twettiq ta' attività addizzjonali ta' titjib tal-effiċjenza li tkopri proporzjon baxx ħafna tal-volumi kkummerċjalizzati. Fi kliem ieħor, huwa improbabbli li OP tissodisfa t-Test tal-Effiċjenzi Sinifikanti billi twettaq attività waħda addizzjonali ta' titjib tal-effiċjenza li tkopri proporzjon baxx ħafna tal-volumi kkummerċjalizzati.

Anki minħabba li l-ekonomiji ta' skala kbira mhumiex lineari, l-effiċjenzi miksuba permezz ta' attività b'volum partikolari huma akbar minn darbtejn l-effiċjenzi miksuba b'żewġ attivitajiet li jkopru nofs il-volum. U b'hekk l-effiċjenzi miksuba b'żewġ attivitajiet li jkopru nofs il-volum huma wkoll akbar minn tliet darbiet l-effiċjenzi miksuba bi tliet attivitajiet li jkopru terz tal-volum. Konsegwentement, OP tista' tissodisfa t-Test tal-Effiċjenzi Sinifikanti billi tikkombina attivitajiet li jtejbu l-effiċjenza jekk il-volum totali kopert minn kombinament tali ta' attivitajiet (l-għadd tal-volumi koperti mid-diversi attivitajiet) huwa ogħla mill-volum għal attività waħda biss u meta dan il-volum totali jiżdied kull darba li tiġi miżjuda attività.

Rigward żewġ attivitajiet li jtejbu l-effiċjenza huwa probabbli li l-kombinament taż-żewġ attivitajiet jiġġenera effiċjenzi sinifikanti jekk l-għadd ta' volumi koperti miż-żewġ attivitajiet huwa ogħla minn 70 % tal-volumi kummerċjalizzati mill-OP. Fit-tali każ, ebda attività ma tkopri volum anqas minn 20 % (inkella l-OP tissodisfa t-Test tal-Effiċjenzi Sinifikanti bl-attività l-oħra vvalutata individwalment, jiġifieri mingħajr l-bżonn ta' kombinament ma' attività oħra). Jekk mill-inqas attività waħda tkopri volum kbir daqs 35 % imbagħad l-għadd u/jew il-kombinament tal-effiċjenzi maħluqa miż-żewġ attivitajiet aktarx ikun sinifikanti biżżejjed għall-OP sabiex tissodisfa t-Test tal-Effiċjenzi Sinifikanti.

Rigward tliet attivitajiet li jtejbu l-effiċjenza huwa probabbli li l-kombinament tat-tliet attivitajiet jiġġenera effiċjenzi sinifikanti jekk l-għadd ta' volumi koperti mit-tliet attivitajiet huwa ogħla minn 100 % tal-volumi kummerċjalizzati mill-OP. Fit-tali każ, ebda attività ma tkopri volum anqas minn 20 % (inkella l-OP tissodisfa t-Test tal-Effiċjenzi Sinifikanti b'waħda miż-żewġ attivitajiet l-oħra jew biż-żewġ attivitajiet l-oħra flimkien). Jista' ikun hemm numru ta' kombinamenti ta' tliet attivitajiet (pereżempju tnejn ikopru volum ta' madwar 40 % kull waħda bit-tielet attività li tkopri volum ta' madwar 20 % jew tliet attivitajiet li jkopru volum ta' madwar 33 % kull waħda). Il-kombinament tal-effiċjenzi maħluqa mit-tliet attivitajiet aktarx ikun sinifikanti biżżejjed għall-OP sabiex tissodisfa t-Test tal-Effiċjenzi Sinifikanti.

Kull attività li waħedha mhijiex biżżejjed biex tiġġenera effiċjenzi sinifikanti (pereżempju l-akkwist ta' servizzi tal-IT, il-promozzjoni ġenerali) hija improbabbli ħafna li tiġġenera effiċjenzi sinifikanti meta kkombinata u għalhekk huwa improbabbli ħafna li din tista' tikkontribwixxi biex toħloq effiċjenzi sinifikanti meta jiġu kkombinati l-attivitajiet.

i. Il-kombinament ta' żewġ attivitajiet b'volumi li jikkoinċidu:

Pereżempju, dan jista' jkun il-każ meta l-OP tuża tagħmir għat-taħlit ta' ċereali ta' karatteristiċi differenti skont il-ħtiġijiet tal-klijenti u taħżen iċ-ċereali għal dak il-għan. Dawn iż-żewġ attivitajiet integrati jippermettu l-OP sabiex tissodisfa d-domandi tal-klijenti li jeħtieġu taħlitiet ta' karatteristiċi speċifiċi (bħal pereżempju fran), li l-bdiewa individwali ma jkunux kapaċi jissodisfaw affattu jew huma ma jkunux kapaċi jissodisfawhom fil-kwalità/volum/ħin/prezz meħtieġ. Jekk dawn iż-żewġ attivitajiet tal-OP, meta kkunsidrati flimkien, ikopru aktar minn 70 % tal-volum ta' uċuħ tar-raba' kummerċjalizzati mill-OP, huma għandhom il-potenzjal li jwasslu għal iffrankar sinifikanti tal-ispejjeż meta mqabbla mas-sitwazzjoni, li fiha l-produtturi individwali jipprovaw jissodisfaw id-domanda għal taħlitiet ta' ċereali speċifiċi u tista' wkoll tinħoloq il-possibbiltà għall-OP sabiex toffri t-tali taħlitiet meta l-membri ma setgħux jagħmlu dan waħedhom. Fit-tali sitwazzjoni, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

ii. Il-kombinament ta' żewġ attivitajiet b'volumi li ma jikkoinċidux:

Pereżempju, dan jista' jkun il-każ meta l-OP takkwista mis-suq parti mill-għalf tal-annimali meħtieġa biex it-trobbija mill-membri u l-membri tal-OP jużaw tagħmir konġuntament akkwistat għall-produzzjoni ta' xi parti oħra mill-għalf tal-annimali meħtieġ għat-trobbija mill-membri. Jekk dawn iż-żewġ attivitajiet tal-OP, meta kkunsidrati flimkien, ikopru l-għalf meħtieġ għal aktar minn 70 % tal-volum ta' bhejjem kummerċjalizzati mill-OP, huma għandhom il-potenzjal li jwasslu għal iffrankar sinifikanti tal-ispejjeż meta mqabbla mas-sitwazzjoni li fiha l-għalf tal-annimali jiġi akkwistat individwalment mis-suq minn produtturi ta' bhejjem jew prodott fuq il-makkinarju li jkunu kisbu individwalment. Fit-tali sitwazzjoni, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

iii. Il-kombinament ta' tliet attivitajiet b'volumi li jikkoinċidu:

Il-kombinament ta' attivitajiet f'sitwazzjoni fejn l-ebda attività ma tkopri aktar minn nofs iż-żejt taż-żebbuġa kummerċjalizzat minn OP aktarx jiġġenera effiċjenzi sinifikanti f'ċerti sitwazzjonijiet. Pereżempju, dan jista' jkun il-każ meta l-OP tikkombina l-attivitajiet marbuta mal-bejgħ ta' żejt taż-żebbuġa fil-flixken. Jekk OP taħżen iż-żejt taż-żebbuġa konġuntament, twettaq l-ibbottiljar u t-tikkettjar konġunt u topera netwerk ta' distribuzzjoni konġunt, dawn it-tliet attivitajiet tal-OP jirrappreżentaw sistema integrata għall-produzzjoni ta' żejt taż-żebbuġa fil-flixken li tinvolvi spejjeż sinifikanti tal-investiment. Jekk il-volum ta' żejt taż-żebbuġa li jgħaddi minn din is-sistema integrata jkopri mill-inqas terz tal-volum taż-żejt taż-żebbuġa kummerċjalizzat mill-OP, dawn l-attivitajiet, meta kkunsidrati flimkien, għandhom il-potenzjal li jwasslu għal iffrankar sinifikanti tal-ispejjeżmeta mqabbla mas-sitwazzjoni li fiha dawn l-attivitajiet jitwettqu minn produtturi individwali taż-żejt taż-żebbuġa. Fit-tali sitwazzjoni, l-OP probabbli tiġġenera effiċjenzi sinifikanti u għalhekk tissodisfa l-kundizzjonijiet tal-metodu simplifikat.

(79)

Fis-sitwazzjonijiet ta' applikazzjoni tal-metodu simplifikat tat-Test tal-Effiċjenzi Sinifikanti identifikat iktar 'il fuq dan jwassal sabiex l-attività singola ta' titjib tal-effiċjenza tkopri aktar minn nofs il-volumi kummerċjalizzati mill-OP. Il-volumi rikjesti jistgħu jkunu eċċezzjonalment aktar baxxi kont meħud tal-varjazzjonijiet żgħar fil-volumi ta' produzzjoni fis-snin konsekuttivi minħabba l-kundizzjonijiet ambjentali/klimatiċi. Fit-tali sitwazzjoni, it-Test tal-Effiċjenzi Sinifikanti jiġi kkunsidrat bħala sodisfatt jekk l-attività tkopri aktar minn 40 % tal-volumi kkummerċjalizzati mill-OP f'sena partikolari u għal dik is-sena biss u meta l-attività għat-titjib tal-effiċjenza tkopri aktar minn nofs il-volumi kkummerċjalizzati mill-OP fis-snin l-oħra.

(80)

F'każ ta' force majeure (pereżempju faċilitajiet ta' ħżin jiġu distrutti b'nar), anki jekk attività hija temporanjament sospiża, l-OP tista' xorta waħda tibbenefika mid-Deroga sakemm hija taddotta mingħajr dewmien il-miżuri kollha meħtieġa biex treġġa' lura għas-sitwazzjoni qabel l-avveniment ta' force majeure u li r-rekwiżiti l-oħrajn tad-Deroga huma sodisfatti.

(81)

Fl-aħħar nett, jekk OP ma tissodisfax il-kundizzjonijiet stabbiliti fil-metodu simplifikat, hija tista' turi permezz ta' metodu alternattiv li xorta waħda tissodisfa t-Test tal-Effiċjenzi Sinifikanti.

3.3.2. Il-metodu alternattiv

(82)

Jekk OP ma tikkonformax mal-kundizzjonijiet tal-metodu simplifikat spjegat iktar 'il fuq, hija tista' tuża metodu alternattiv sabiex tivvaluta jekk tikkonformax mat-Test tal-Effiċjenzi Sinifikanti. Dan jista' jkun minħabba li ma setax ikun hemm konformità mal-metodu simplifikat iżda l-OP tikkunsidra li l-attivitajiet tagħha xorta waħda jissodisfaw it-Test tal-Effiċjenzi Sinifikanti. Dan jista' jkun ukoll minħabba li l-OP tkun f'sitwazzjoni li ma tkunx koperta bil-metodu simplifikat: l-OP tista' twettaq attivitajiet mhux elenkati fil-metodu simplifikat jew l-OP tista' tkun għadha mhijiex qiegħda twettaq attivitajiet ta' titjib tal-effiċjenza b'mod partikolari f'każijiet fejn ikunu qegħdin jinħolqu OP ġodda, meta l-OP ikun beħsiebhom jiżviluppaw attivitajiet ġodda ta' integrazzjoni, eċċ.

(83)

Il-metodu alternattiv jeħtieġ valutazzjoni tal-attivitajiet kollha tal-OP u valutazzjoni ta' jekk xi wħud mill-attivitajiet humiex probabbli li jiġġeneraw effiċjenzi sinifikanti sabiex l-OP b'mod ġenerali tikkontribwixxi sabiex jintlaħqu l-objettivi tal-PAK. Dawn il-Linji Gwida jipprovdu xi gwida dwar il-metodu alternattiv mingħajr ma jkopru l-aspetti kollha possibbli ta' valutazzjoni bil-metodu alternattiv minħabba n-natura ta' każ b'każ tagħha.

(84)

Xi attivitajiet għajr dawk elenkati fil-paragrafu 1(a) tal-Artikoli 169, 170 u 171 tar-Regolament dwar l-OKS jistgħu joħolqu effiċjenzi. F'każijiet bħal dawn, huwa neċessarju li jiġi vvalutat abbażi tal-fatti tas-sitwazzjoni speċifika in kwistjoni jekk it-tali attivitajiet ta' OP ikunux probabbli li jiġġeneraw effiċjenzi sinifikanti sabiex dawn l-attivitajiet b'mod ġenerali jikkontribwixxu sabiex jintlaħqu l-objettivi tal-PAK (53).

(85)

Il-metodu alternattiv jista' jindirizza wkoll sitwazzjoni fejn OP tkun impenjat ruħha li tinvesti f'attivitajiet li jtejbu l-effiċjenza iżda l-investiment ikun jeħtieġ xi żmien sabiex jimmaterjalizza ruħu kompletament waqt li l-OP diġà tkun tbigħ sabiex tistabbilixxi l-preżenza tagħha fis-suq u tassigura l-vijabbiltà tal-investimenti li tagħmel. Kull investiment jeħtieġ perjodu differenti biex jiġi implimentat. Madankollu, bħala regola ġenerali, dan ma għandux jieħu aktar minn sena biex jiġi implimentat, ħlief għal investimenti sinifikanti ħafna (jiġifieri fl-ipproċessar jew f'faċilitajiet ta' loġistika).

(86)

Fit-tali ċirkustanzi, l-OP trid turi li hija finanzjarjament impenjata li twettaq l-attività u li hija biss kwistjoni ta' żmien qabel ma hija effettivament twettaq l-attività minħabba dewmien inevitabbli fl-implimentazzjoni (pereż. il-bini ta' faċilità). Jekk l-OP tkun kapaċi turi tali impenn, ikun neċessarju li jiġi valutat abbażi tal-fatti tas-sitwazzjoni speċifika in kwistjoni jekk it-tali attivitajiet ġodda ta' OP jiġġenerawx effiċjenzi sinifikanti sabiex dawn l-attivitajiet b'mod ġenerali jikkontribwixxu sabiex jintlaħqu l-objettivi tal-PAK (54). Jekk il-każ in kwistjoni jkun jirrigwarda attivitajiet elenkati fil-paragrafu 1(a) tal-Artikoli 169, 170 u 171 tar-Regolament dwar l-OKS, il-valutazzjoni tista' ssir bħall-valutazzjoni bil-metodu simplifikat abbażi tat-tip u s-sinifikat (f'termini ta' volum u spejjeż) tal-attivitajiet ippjanati. Jekk il-każ in kwistjoni jkun jirrigwarda attivitajiet mhux elenkati fil-paragrafu 1(a) tal-Artikoli 169, 170 u 171 tar-Regolament dwar l-OKS, il-valutazzjoni tkun speċifika għall-każ. Jekk fil-prattika, l-attività fl-aħħar mill-aħħar ma tkunx tista' titwettaq minħabba avveniment li ma jaqax fil-kontroll tal-OP, l-OP xorta waħda tista' tibbenefika mid-Deroga sakemm ikun għadda żmien neċessarju wara l-materjalizzazzjoni ta' dan l-avveniment għat-twaqqif tan-negozjati kuntrattwali li jfixklu l-objettivi tal-PAK (ara l-eżempju tal-uċuħ tar-raba' fit-Taqsima 4.3.).

3.4. Ir-relazzjonijiet bejn l-OP u l-membri tagħha

(87)

Id-Deroga ma tiddependix fuq jekk ikunx hemm trasferiment jew le tas-sjieda tal-prodott(i) kkonċernat(i) mill-produtturi għall-OP billi hija tapplika għall-OP fiż-żewġ sitwazzjonijiet (55). It-trasferiment tas-sjieda mhuwiex neċessarju għall-benefiċċju tad-Deroga.

(88)

Madankollu, id-Deroga timponi żewġ rekwiżiti fir-rigward tar-relazzjonijiet bejn l-OP u l-membri tagħha (56):

Il-produtturi kkonċernati ma jridu jkunu membri tal-ebda OP oħra li tinnegozja wkoll tali kuntratti f'isimhom għall-istess prodott. Fi kliem ieħor, huwa meħtieġ li l-produttur ma jagħti l-mandat lill-ebda OP oħra biex twettaq negozjati kuntrattwali għal perjodu partikolari fir-rigward tal-prodotti tagħha b'mod konġunt ma' dawk ta' produtturi oħra. Il-produttur jista' madankollu jbigħ b'mod parallel l-istess prodott direttament lis-suq u jista' jbigħ ukoll prodotti oħra permezz ta' OP oħra.

In-negozjati mill-OP jistgħu jsiru bil-kundizzjoni li l-prodott ikkonċernat ma jkunx kopert b'obbligu ta' provvista li jirriżulta mis-sħubija tal-produttur f'kooperattiva li hija nnifisha ma tkunx membru ta' OP skont il-kundizzjonijiet stabbiliti fl-istatuti tal-kooperattiva jew ir-regoli u d-deċiżjonijiet previsti fi jew derivati minn dawn l-istatuti. Għalhekk l-Artikoli 169, 170 u 171 tar-Regolament dwar l-OKS ma jistgħux jitqiesu bħala bażi għan-nuqqas ta' konformità ma' obbligu ta' provvista eżistenti fi strutturi kooperattivi.

3.5. Il-produzzjoni tal-PAK

(89)

Id-Deroga hija suġġetta għal limiti kwantitattivi (57).

(90)

Fis-setturi tal-laħam taċ-ċanga u tal-vitella u tal-uċuħ tar-raba', id-Deroga hija applikabbli bil-kundizzjoni li l-volum tal-prodott li jkun kopert bin-negozjati kuntrattwali minn OP partikolari, u li jiġi prodott f'kull Stat Membru partikolari, ma jaqbiżx 15 % tal-produzzjoni nazzjonali totali ta' kull prodott imsemmi rispettivament fl-Artikoli 170(1)(a) u (b) u l-Artikoli 171(1)(a)-(l) tar-Regolament dwar l-OKS.

(91)

Fis-settur taż-żejt taż-żebbuġa, id-Deroga hija applikabbli biss f'każ li l-volum tal-produzzjoni ta' żejt taż-żebbuġa li jkun kopert bin-negozjati kuntrattwali minn OP partikolari, u li jkun prodott f'kull Stat Membru partikolari, ma jaqbiżx l-20 % tas-suq rilevanti, filwaqt li ssir distinzjoni bejn iż-żejt taż-żebbuġa għall-konsum mill-bniedem u ż-żejt taż-żebbuġa għal użi oħra. Dawn il-Linji gwida jipprovdu dettalji rigward l-istabbiliment tas-suq rilevanti fit-Taqsima speċifika dwar is-settur taż-żejt taż-żebbuġa.

(92)

L-Artikoli 169, 170 u 171 tar-Regolament dwar l-OKS jirreferu għall-iskopijiet tal-istabbiliment tal-limiti massimi fuq is-saħħa tas-suq għall-produzzjoni “fi kwalunkwe Stat Membru partikolari”. Għalhekk, jekk in-negozjar minn OP f'isem il-membri tagħha jirrigwarda l-provvista f'aktar Stati Membri, il-volumi tal-produzzjoni f'kull Stat Membru ma għandhomx jaqbżu 15 % tal-produzzjoni nazzjonali għal-laħam taċ-ċanga u tal-vitella u l-uċuħ tar-raba' u 20 % tas-suq rilevanti għaż-żejt taż-żebbuġa.

(93)

Jekk is-sehem inizjalment mhuwiex aktar minn 15 % tal-produzzjoni nazzjonali għal-laħam taċ-ċanga u tal-vitella jew l-uċuħ tar-raba' (58) jew 20 % tas-suq rilevanti għas-settur taż-żejt taż-żebbuġ, iżda sussegwentement jogħla oltre dak il-livell mingħajr ma jaqbeż l-20 % tal-produzzjoni nazzjonali għal-laħam taċ-ċanga u tal-vitella jew l-uċuħ tar-raba' jew 25 % tas-suq rilevanti għaż-żejt taż-żebbuġa, id-Deroga prevista fl-Artikoli 169, 170 u 170 tar-Regolament dwar l-OKS għandha tkompli tapplika għal perjodu ta' sena kalendarja wara s-sena li fiha s-sehem ta' produzzjoni nazzjonali ta' 15 % għal-laħam taċ-ċanga u tal-vitella jew l-uċuħ tar-raba' jew 20 % tas-suq rilevanti għaż-żejt taż-żebbuġa kien inqabeż.

(94)

Fl-2014, il-Kummissjoni Ewropea ppubblikat ċ-ċifri ta' produzzjoni nazzjonali rilevanti f'Il-Ġurnal Uffiċjali tal-UE (59). Hemm informazzjoni aġġornata fuq is-sit elettroniku tal-Kummissjoni Ewropea (60). Id-dejta tal-produzzjoni nazzjonali totali rilevanti hija kkalkulata abbażi ta' medja Olimpika (61) ta' ħames snin preċedenti sabiex jiġi pprovdut valur ta' referenza stabbli li ma jkunx suġġett għal varjazzjonijiet annwali.

(95)

Dawn il-limiti massimi ma jillimitawx il-kapaċità tal-OP biex jinnegozjaw f'isem il-membri tagħhom dwar volumi ogħla. F'dan il-każ, id-Deroga ma tapplikax, billi dan huwa limitat għal negozjati kuntrattwali li jikkonformaw mal-kundizzjonijiet spjegati f'dawn il-Linji Gwida. Fil-każ fejn l-OP tinnegozja volumi ogħla, l-OP jkollha tivvaluta l-attivitajiet tagħha skont ir-regoli tal-kompetizzjoni l-oħra u d-derogi disponibbli u spjegati fit-Taqsima 2 iktar 'il fuq.

3.6. L-obbligu ta' notifika

(96)

Id-Deroga tirrikjedi (62) li l-OP tinnotifika lill-awtoritajiet kompetenti tal-Istat Membru li fih topera l-volum ta' produzzjoni tal-prodotti kkonċernati li jkun kopert bin-negozjati tagħha f'isem il-membri tagħha. L-awtoritajiet kompetenti rispettivi huma determinati minn kull Stat Membru.

(97)

L-obbligu li jiġi nnotifikat il-volum ta' produzzjoni kopert min-negozjati kuntrattwali lill-awtorità kompetenti tal-Istat Membru kkonċernat ma jimplikax li l-awtorità nazzjonali kkonċernata tawtorizza n-negozjati kuntrattwali.

3.7. Is-salvagwardji

3.7.1. Introduzzjoni

(98)

Il-paragrafu 5 tal-Artikoli 169, 170 u 171 tar-Regolament dwar l-OKS jistabbilixxi mekkaniżmu ta' salvagwardja, li jipprovdi lill-awtoritajiet tal-kompetizzjoni tal-Istati Membri u l-Kummissjoni Ewropea bis-setgħa li jiddeċiedu f'każ individwali jekk negozjar partikolari mill-OP għandu jerġa' jinfetaħ jew ma jkollux lok.

(99)

Jekk in-negozjati mill-OP ikopru Stat Membru wieħed biss, is-salvagwardji jiġu applikati mill-awtorità tal-kompetizzjoni ta' dak l-Istat Membru. Jekk in-negozjati mill-OP ikopru aktar minn Stat Membru wieħed, is-salvagwardji jiġu applikati mill-Kummissjoni Ewropea. L-awtoritajiet tal-kompetizzjoni tal-Istati Membri u l-Kummissjoni Ewropea huma riferuti minn hawn 'il quddiem bħala “l-awtoritajiet kompetenti tal-kompetizzjoni”.

(100)

Kif stipulat fil-paragrafu 5 tal-Artikoli 169, 170 u 171 tar-Regolament dwar l-OKS il-klawżola ta' salvagwardja tikkostitwixxi eċċezzjoni mid-Deroga u għalhekk għandha tiġi interpretata b'mod restrittiv.

(101)

L-awtoritajiet kompetenti tal-kompetizzjoni jistgħu jużaw il-klawżola ta' salvagwardja anki jekk il-limiti kwantitattivi (15 % tal-produzzjoni nazzjonali totali tal-prodotti fis-setturi tal-laħam taċ-ċanga u tal-vitella u tal-uċuħ tar-raba' jew 20 % tas-suq rilevanti fis-settur taż-żejt taż-żebbuġa) għan-negozjati mill-OP ikunu rrispettati b'mod sħiħ.

(102)

Il-mekkaniżmu ta' salvagwardja jista' jiġi applikat mill-awtorità kompetenti tal-kompetizzjoni fit-tliet sitwazzjonijiet limitati li ġejjin:

a.	jekk hija tqis li dan huwa neċessarju sabiex jiġi evitat li l-kompetizzjoni tkun eskluża; jew

b.	jekk hija ssib li l-prodott kopert bin-negozjati jifforma parti minn suq separat minħabba l-karatteristiċi speċifiċi tal-prodott jew l-użu maħsub tiegħu u li t-tali negozjar kollettiv ikopri aktar minn 15 % tal-produzzjoni nazzjonali totali ta' dak is-suq (63); jew

c.	jekk hija ssib li l-objettivi tal-PAK ikunu pperikolati.

(103)

Fit-tliet sitwazzjonijiet kollha, l-azzjoni tal-awtorità kompetenti tal-kompetizzjoni skont l-Artikoli 169, 170 u 171 tar-Regolament dwar l-OKS ma għandhiex il-karattru ta' sanzjoni għall-ksur tar-regoli tal-kompetizzjoni, iżda pjuttost hija meqjusa bħala miżura preventiva.

(104)

Sakemm tiġi adottata deċiżjoni mill-awtorità kompetenti tal-kompetizzjoni li n-negozjati għandhom jerġgħu jinfetħu jew li ma għandhomx ikollhom lok, in-negozjati mwettqa minn OP f'konformità mal-Artikoli 169, 170 u 171 tar-Regolament dwar l-OKS huma legali. Għalhekk, qabel id-data tat-tali deċiżjoni, in-negozjati minn OP li jissodisfaw il-kundizzjonijiet fl-Artikoli 169, 170 u 171 tar-Regolament dwar l-OKS ma jistgħux jiġu sanzjonati skont il-liġi ġenerali tal-kompetizzjoni tal-UE.

(105)

Għaldaqstant, jekk l-OP tirrispetta d-deċiżjoni tal-awtorità kompetenti tal-kompetizzjoni dwar l-innegozjar mill-ġdid jew il-kanċellazzjoni tan-negozjati kuntrattwali, l-OP tkun responsabbli biss għal negozjati kuntrattwali li huma mwettqa wara dik id-data.

(106)

Madankollu, wara d-deċiżjoni mill-awtorità kompetenti tal-kompetizzjoni li n-negozjati in kwistjoni għandhom jerġgħu jinfetħu jew li ma għandhomx ikollhom lok, id-Deroga ma tibqax aktar disponibbli. Konsegwentement, jekk l-OP wara d-data tad-deċiżjoni tal-awtorità kompetenti tal-kompetizzjoni ma tirrispettax id-deċiżjoni u tkompli n-negozjati jew iżżomm l-implimentazzjoni tal-kuntratti konklużi, jistgħu jinbdew proċeduri skont il-liġi ġenerali tal-kompetizzjoni fir-rigward tal-imġiba tal-OP.

3.7.2. L-esklużjoni tal-kompetizzjoni

(107)

Rigward l-ewwel sitwazzjoni, meta l-awtorità kompetenti tal-kompetizzjoni tintervjeni biex tevita li tkun eskluża l-kompetizzjoni, il-bejgħ/kuntratti ta' OP innegozjati f'isem il-membri tagħha jistgħu jkunu konformi b'mod sħiħ mal-kundizzjonijiet stabbiliti fl-Artikoli 169, 170 u 171 tar-Regolament dwar l-OKS, iżda jinkludu klawżoli li jillimitaw il-kompetizzjoni lil hinn minn dak li jkun meħtieġ sabiex tinkiseb il-konċentrazzjoni tal-provvista, jiġifieri negozjati kuntrattwali (jiġifieri klawżoli mhux inklużi bħala kundizzjonijiet fl-Artikoli 169, 170 u 171 tar-Regolament dwar l-OKS, pereżempju klawżola ta' esklużività li jista' jkollha effetti antikompetittivi f'suq b'numru limitat ta' operaturi li kollha jkollhom kundizzjonijiet ta' esklużività).

(108)

Meta l-awtorità kompetenti tal-kompetizzjoni tintervjeni biex tevita l-esklużjoni tal-kompetizzjoni, hija jkollha l-għan li tipproteġi r-rivalità bejn il-produtturi u l-proċessi kompetittivi. Fit-tali analiżi jiġu kkunsidrati kemm il-kompetizzjoni attwali u l-kompetizzjoni potenzjali (64). Il-kompetizzjoni tista' tiġi eskluża jekk wieħed mill-aktar parametri importanti tagħha jiġi eliminat kompletament f'suq rilevanti partikolari: dan jgħodd b'mod partikolari għall-kompetizzjoni fil-prezz (65) jew il-kompetizzjoni fir-rigward tal-innovazzjoni. Elementi oħra li għandhom impatt fuq l-analiżi tal-eliminazzjoni tal-kompetizzjoni huma inter alia: l-ishma mis-suq fil-kuntest aktar wiesa' tal-analiżi tal-kapaċità attwali li jikkompetu tal-kompetituri u l-inċentivi tagħhom biex jagħmlu dan (66); it-tnaqqis tal-kompetizzjoni b'riżultat tan-negozjati kuntrattwali kkonċernati; il-kapaċità li jiġu implimentati u miżmuma żidiet fil-prezzijiet; l-ostakoli għal dħul ġdid. Għal aktar dettalji rigward il-valutazzjoni tal-esklużjoni tal-kompetizzjoni ara (b'analoġija) it-Taqsima 2 tal-Linji Gwida dwar l-applikazzjoni tal-Artikolu 81(3) tat-Trattat [attwalment l-Artikolu 101(3) TFUE]. (67).

(109)

Jekk, madankollu, il-kuntratti ta' provvista ta' OP konklużi f'isem il-membri tagħha ma jissodisfawx il-kundizzjonijiet fl-Artikoli 169, 170 u 171 tar-Regolament dwar l-OKS u dawn il-kuntratti ma jkunx fihom klawżoli li jirrestrinġu l-kompetizzjoni lil hinn minn dak li jkun meħtieġ sabiex jippermettu l-konċentrazzjoni tal-provvista prevista minn dawk l-artikoli, huma ma jiksrux l-Artikolu 101 TFUE.

3.7.3. Suq rilevanti iżgħar tal-prodott b'effetti antikompetittivi

(110)

Dwar it-tieni sitwazzjoni, l-awtorità kompetenti tal-kompetizzjoni tista' tiddeċiedi li n-negozjati għandhom jerġgħu jinfetħu jew ma jkollhomx lok jekk hija ssib:

a.	li s-suq rilevanti (mhux ġeografiku) tal-prodott għan-negozjati li jirrigwardaw is-settur tal-laħam taċ-ċanga u tal-vitella jew tal-uċuħ tar-raba', ikun iżgħar minn dak li huwa definit fl-Artikoli 170 u 171 tar-Regolament dwar l-OKS;

b.	li n-negozjati in kwistjoni jkollhom effett antikompetittiv fuq dawn is-swieq iżgħar.

Dan ma japplikax għas-settur taż-żejt taż-żebbuġa, fejn is-suq rilevanti mhuwiex definit fl-Artikolu 169 tar-Regolament dwar l-OKS.

3.7.4. L-objettivi tal-PAK ikunu pperikolati

(111)

It-tielet sitwazzjoni, meta l-awtorità kompetenti tal-kompetizzjoni tista' tintervjeni hija marbuta mas-sejbiet tagħha li l-objettivi tal-PAK huma pperikolati minħabba attivitajiet ta' integrazzjoni ulterjuri ta' OP. Din is-sitwazzjoni tista' timmaterjalizza ruħha f'każijiet fejn OP tkun għamlet valutazzjoni proprja bbażata fuq il-metodu simplifikat. Skont dak il-metodu, hemm suppożizzjoni li jekk jintlaħqu l-kriterji rilevanti, l-attivitajiet tal-OP b'mod ġenerali jikkontribwixxu sabiex jintlaħqu l-objettivi tal-PAK. Awtorità tal-kompetizzjoni tista' ssib li fil-prattika dan ma jkunx il-każ anki jekk jintlaħqu l-kriterji.

4. ID-DISPOŻIZZJONIJIET SPEĊIFIĊI DWAR IS-SETTURI KKONĊERNATI

4.1. Iż-żejt taż-żebbuġa

4.1.1. Eżempji tal-applikazzjoni tad-Deroga fis-settur taż-żejt taż-żebbuġ

(112)

Din it-taqsima tal-linji gwida tindirizza l-applikazzjoni prattika tar-regoli speċifiċi tar-Regolament dwar l-OKS fis-settur taż-żejt taż-żebbuġa, permezz tal-eżempji ta' hawn taħt.

(113)

Eżempju tal-valutazzjoni skont l-Artikolu 169 tar-Regolament dwar l-OKS ta' OP attiva fis-settur taż-żejt taż-żebbuġa fejn tapplika d-Deroga:

Sitwazzjoni

F'reġjun partikolari, diversi OP li jipproduċu ż-żejt taż-żebbuġa billi jipproċessaw iż-żebbuġ miġjub lilhom mill-membri tagħhom ġew maħluqa b'mod parallel minn numru ta' kultivaturi taż-żebbuġ. L-OP jixtru wkoll prodotti fitosanitarji, fertilizzanti, tagħmir, eċċ. għall-membri tagħhom, u jassiguraw il-kontroll tal-kwalità tal-produzzjoni taż-żebbuġ.

Min-naħa tagħhom l-OP ħolqu OP tat-tieni saff li jfornu l-produzzjoni kollha tagħhom lilha. L-OP tat-tieni saff tittrasporta ż-żjut taż-żebbuġa differenti prodotti mill-OP tal-ewwel saff għall-bini tagħha għat-taħlit u l-ibbottiljar (meta ma jinbiegħux f'massa). L-OP tat-tieni saff tinnegozja l-kuntratti ta' provvista mal-bejjiegħa bl-imnut f'isem il-membri tagħha, jiġifieri twettaq negozjati kuntrattwali. Hija twettaq ukoll attivitajiet ta' kummerċjalizzazzjoni u promozzjoni. Hija tipprovdi wkoll pariri fitosanitarji u kontroll tal-kwalità lill-OP tal-ewwel saff. Kemm l-OP tal-ewwel saff u l-OP tat-tieni saff huma rikonoxxuti mill-Istat Membru kkonċernat, f'konformità mar-rekwiżiti tar-Regolament dwar l-OKS. Il-volum ta' żejt taż-żebbuġa li huwa kopert b'negozjati kuntrattwali mill-OP tat-tieni saff jirrappreżenta 17,4 % tas-suq rilevanti. L-OP tat-tieni saff, li twettaq negozjati kuntrattwali, innotifikat il-volum taż-żejt taż-żebbuġa suġġett għal negozjati kuntrattwali lill-awtoritajiet nazzjonali.

Analiżi

L-OP tat-tieni saff kienet rikonoxxuta bħala OP jew bħala AOP, skont ir-regoli applikabbli fl-Istat Membru kkonċernat. L-OP tat-tieni saff tikkonċentra l-provvista u tqiegħed fis-suq iż-żejt taż-żebbuġa. Il-volum ta' żejt taż-żebbuġa li huwa kopert b'negozjati kuntrattwali mill-OP tat-tieni saff ma jaqbiżx l-20 % tas-suq rilevanti. Il-volum ta' żejt taż-żebbuġa suġġett għal negozjati kuntrattwali kien innotifikat lill-awtoritajiet nazzjonali. L-attivitajiet imwettqa mill-OP tal-ewwel saff u l-OP tat-tieni saff twettaq attivitajiet li probabbli jiġġeneraw effiċjenzi kif elenkat fl-Artikolu 169 tar-Regolament dwar l-OKS. L-attivitajiet rilevanti fl-OP tal-ewwel saff huma l-produzzjoni konġunta, ix-xiri konġunt ta' inputs, il-kontroll konġunt tal-kwalità u l-attivitajiet rilevanti fl-OP tat-tieni saff huma t-trasport konġunt, l-ibbottiljar, il-kontroll konġunt tal-kwalità, il-kummerċjalizzazzjoni u l-promozzjoni konġunti. Dawn l-attivitajiet ikopru wkoll it-totalità tal-volumi li huma suġġetti għal negozjati kuntrattwali. Għalhekk jista' jiġi konkluż li t-Test tal-Effiċjenzi Sinifikanti huwa sodisfat bil-metodu simplifikat. Konsegwentement, id-Deroga tapplika għall-attivitajiet ta' negozjati kuntrattwali tal-OP tat-tieni saff.

(114)

Eżempju tal-valutazzjoni skont l-Artikolu 169 tar-Regolament dwar l-OKS ta' OP attiva fis-settur taż-żejt taż-żebbuġa fejn tapplika d-Deroga:

Sitwazzjoni	:	F'reġjun diversi produtturi taż-żejt taż-żebbuġa ħolqu OP sabiex tipproċessa konġuntament iż-żejt taż-żebbuġa. L-OP timmaniġġa wkoll konġuntament l-iskart marbut direttament mal-produzzjoni taż-żejt taż-żebbuġa. L-OP tnixxef l-iskart u tittrasformah f'gerbub biex tużah bħala sors ta' enerġija rinnovabbli. Fix-xhur tax-xitwa l-OP tuża dan il-gerbub għat-tisħin. Barra minn dan, l-OP tat-tieni saff tinnegozja l-kuntratti ta' provvista mal-bejjiegħa bl-imnut u l-klijenti tal-industrija tal-ikel f'isem il-membri tagħha, jiġifieri hija twettaq negozjati kuntrattwali. Kemm l-ipproċessar konġunt taż-żejt taż-żebbuġa u l-ġestjoni konġunta tal-iskart ikopru 80 % tal-volum taż-żejt taż-żebbuġa kummerċjalizzat mill-OP. Il-volumi taż-żejt taż-żebbuġa kummerċjalizzat mill-OP jirrapreżentaw 2,4 % tas-suq rilevanti għaż-żejt taż-żebbuġa. L-OP innotifikat il-volum ta' żejt taż-żebbuġa suġġett għal negozjati kuntrattwali lill-awtoritajiet nazzjonali.
Analiżi	:	L-OP hija rikonoxxuta formalment mill-awtorità nazzjonali rilevanti. Barra minn dan, hija tikkonċentra l-provvista u tqiegħed fis-suq iż-żejt taż-żebbuġa. Il-volum ta' żejt taż-żebbuġa kopert bin-negozjati kuntrattwali mill-OP ma jaqbiżx l-20 % tas-suq rilevanti. Il-volum ta' żejt taż-żebbuġa suġġett għal negozjati kuntrattwali kien innotifikat lill-awtoritajiet nazzjonali. L-OP twettaq attivitajiet li huma probabbli li jiġġeneraw effiċjenzi kif elenkati fl-Artikolu 169 tar-Regolament dwar l-OKS, jiġifieri l-ipproċessar u l-immaniġġar konġunt ta' skart marbut direttament mal-ipproċessar taż-żejt taż-żebbuġa. Iż-żewġ attivitajiet, jiġifieri l-ipproċessar konġunt u l-immaniġġar konġunt ta' skart tal-OP, ikopru aktar minn nofs tal-volumi kkummerċjalizzati mill-OP. L-ipproċessar konġunt waħdu jkopri aktar minn nofs iż-żejt taż-żebbuġa kkummerċjalizzat mill-OP. Għalhekk, l-OP probabbli tiġġenera effiċjenzi sinifikanti. Għalhekk jista' jiġi konkluż li t-Test tal-Effiċjenzi Sinifikanti huwa ssodisfat bil-metodu simplifikat. F'din is-sitwazzjoni, ma hemmx bżonn li jiġi analizzat separatament l-immaniġġar konġunt ta' skart marbut direttament mal-produzzjoni taż-żejt taż-żebbuġa. Għalhekk id-Deroga tapplika għall-attivitajiet ta' negozjati kuntrattwali tal-OP.

(115)

Eżempju tal-valutazzjoni, skont l-Artikolu 169 tar-Regolament dwar l-OKS, ta' OP attiva fis-settur taż-żejt taż-żebbuġa meta ma tapplikax id-Deroga:

Sitwazzjoni	:	Diversi produtturi taż-żejt taż-żebbuġa (fabbriki taż-żejt taż-żebbuġa) jiddeċiedu li jbigħu konġuntament parti mill-produzzjoni taż-żejt taż-żebbuġa tagħhom lil diversi kumpaniji tal-ibbottiljar bil-massa; huma jbigħu l-parti li tifdal tal-produzzjoni rispettiva tagħhom separatament lil klijenti oħra. Il-produtturi taż-żejt taż-żebbuġa jistabbilixxu OP sabiex timmaniġġa n-negozjati kuntrattwali f'isimhom fir-rigward ta' diversi kumpaniji tal-ibbottiljar. Għall-iskop ta' provvista lil wieħed mill-bottiljaturi (l-ikbar klijent), l-OP testernalizza s-servizzi ta' trasport, li jkopru 30 % tal-volum totali ta' żejt taż-żebbuġa suġġett għal negozjati kuntrattwali mill-OP. It-trasport taż-żejt taż-żebbuġa lill-kumpaniji tal-ibbottiljar ma jsirx mill-OP; il-klijenti (il-kumpaniji tal-ibbottiljar) jorganizzaw it-trasport huma stess. Il-volum ta' żejt taż-żebbuġa li huwa kopert b'negozjati kuntrattwali mill-OP jirrappreżenta 15,2 % tas-suq rilevanti.
Analiżi	:	L-OP hija rikonoxxuta formalment mill-awtorità nazzjonali rilevanti. Barra minn dan, hija tikkonċentra l-provvista u tqiegħed fis-suq iż-żejt taż-żebbuġa. Il-volum ta' żejt taż-żebbuġa kopert bin-negozjati kuntrattwali mill-OP ma jaqbiżx l-20 % tas-suq rilevanti. Madankollu, l-unika attività ta' titjib tal-effiċjenza mwettqa mill-OP hija t-trasport konġunt fir-rigward tal-provvista taż-żejt taż-żebbuġa lil waħda mill-kumpaniji tal-ibbottiljar. It-trasport konġunt huwa elenkat fl-Artikolu 169 tar-Regolament dwar l-OKS fost l-attivitajiet li għandhom il-potenzjal li jiġġeneraw effiċjenzi sinifikanti. F'dan il-każ, it-trasport konġunt ikopri ħafna anqas minn 50 % tal-volum taż-żejt taż-żebbuġa suġġett għal negozjati kuntrattwali mill-OP. Skont il-Metodu Simplifikat, dan ma jkoprix volumi sinifikanti biżżejjed ta' żejt taż-żebbuġa biex jissodisfa l-kundizzjonijiet tat-Test tal-Effiċjenzi Sinifikanti. Dawn l-attivitajiet tat-trasport mhumiex probabbli li jiġġeneraw effiċjenzi sinifikanti u n-negozjati kuntrattwali mwettqa mill-OP għalhekk mhumiex probabbli li jikkonformaw mad-Deroga.

4.1.2. L-identifikazzjoni tas-suq rilevanti

(116)

Id-Deroga tirrikjedi l-identifikazzjoni tal-prodott u s-swieq ġeografiċi rilevanti għall-bejgħ bl-ingrossa taż-żejt taż-żebbuġa sabiex l-OP ikunu jistgħu jidentifikaw jekk dawn ikunux konformi mal-limitu massimu ta' sehem mis-suq stabbilit mid-Deroga (68).

(117)

Jeħtieġ li s-swieq rilevanti jiġu valutati fuq bażi ta' każ b'każ u l-Kummissjoni Ewropea pprovdiet gwida dwar kif jiġu identifikati s-swieq rilevanti fl-Avviż tagħha dwar id-definizzjoni tas-suq rilevanti (69). Mhuwiex possibbli għall-Kummissjoni Ewropea li tipprovdi definizzjonijiet preċiżi tas-swieq rilevanti għas-settur taż-żejt taż-żebbuġa iżda, sabiex tgħin il-produtturi jimplimentaw id-Deroga, dawn il-Linji Gwida jipprovdu gwida speċifika għas-settur ibbażat fuq l-informazzjoni disponibbli lill-Kummissjoni Ewropea fil-ħin tal-adozzjoni ta' dawn il-Linji Gwida (70). Is-swieq rilevanti jistgħu jevolvu maż-żmien, fost l-oħrajn minħabba l-iżviluppi fis-suq.

(118)

Il-kwistjoni hija li jiġu identifikati s-swieq tal-prodott u ġeografiċi rilevanti għall-bejgħ bl-ingrossa taż-żejt taż-żebbuġa. F'dak is-suq, il-bejjiegħa essenzjalment jinkludu produtturi u kummerċjanti filwaqt li x-xerrejja essenzjalment jinkludu kummerċjanti, manifatturi, bejjiegħa bl-imnut, klijenti industrijali u klijenti fis-settur tal-lukandi u r-ristoranti.

4.1.2.1. Is-suq rilevanti tal-prodott

(119)

L-ewwel nett, is-suq tal-prodott rilevanti għaż-żejt taż-żebbuġa jidher li huwa distint mis-swieq tal-prodott għal żjut oħra tal-ikel, meta jitqiesu fost l-oħrajn id-differenzi fil-karatteristiċi, il-prezzijiet u l-għanijiet ta' dawn il-prodotti. Barra minn dan, jista' ma jkunx neċessarju li jiġu identifikati swieq separati għat-tipi differenti ta' żejt taż-żebbuġa (straverġni, verġni u żjut oħra bbażati fuq iż-żebbuġ (71)) meta jitqies il-grad għoli ta' sostituzzjoni bejn dawn il-kategoriji. Barra minn dan, kont meħud tal-organizzazzjoni tal-kanali tal-bejgħ, jista' jkun xieraq li jiġu identifikati tliet swieq separati:

—	Iż-żejt taż-żebbuġa fornut lill-bejjiegħa bl-imnut;

—	Iż-żejt taż-żebbuġa fornut lil klijenti industrijali, u

—	Iż-żejt taż-żebbuġa fornut lil klijenti fis-settur tal-lukandi u r-ristoranti.

Fl-aħħar nett, ma jistax jiġi eskluż li fis-suq taż-żejt taż-żebbuġa fornut lill-bejjiegħa bl-imnut, il-provvista ta' tikketti privati u prodotti tal-marka jiffurmaw swieq tal-prodott differenti.

(120)

L-elementi komuni deskritti hawn fuq ta' segmentazzjoni tas-suq ma jeskludux l-identifikazzjoni ta' swieq tal-prodott aktar dojoq.

4.1.2.2. Is-suq ġeografiku rilevanti

(121)

Minn perspettiva ġeografika, is-suq rilevanti għall-provvista taż-żejt taż-żebbuġa ma jidhirx li huwa idjaq minn dak nazzjonali u jista' jkun mifrux maż-ŻEE kollha fir-rigward tat-tliet kanali kollha tal-bejgħ, jiġifieri l-provvista ta' żejt taż-żebbuġa lil klijenti bl-imnut, lill-industrija u lis-settur tal-lukandi u r-ristoranti.

4.2. Is-settur tal-laħam taċ-ċanga u tal-vitella

4.2.1. Eżempji tal-applikazzjoni tad-deroga fis-settur tal-laħam taċ-ċanga u tal-vitella

(122)

Din it-taqsima tal-linji gwida tindirizza l-applikazzjoni prattika tar-regoli speċifiċi tar-Regolament dwar l-OKS fis-settur tal-laħam taċ-ċanga u tal-vitella permezz tal-eżempji ta' hawn taħt.

(123)

Eżempju tal-valutazzjoni, skont l-Artikolu 170 tar-Regolament dwar l-OKS, ta' OP attiva fis-settur tal-laħam taċ-ċanga u tal-vitella meta tapplika d-Deroga.

Sitwazzjoni	:	OP rikonoxxuta tbigħ il-produzzjoni kollha (100 %) tal-ifrat tal-membri tagħha għall-provvista ta' bhejjem ħajjin għall-qatla. Il-bejgħ jirrappreżenta sehem mis-suq ta' 1,3 % tal-produzzjoni nazzjonali totali tal-laħam taċ-ċanga fl-Istat Membru in kwistjoni. Minbarra l-bejgħ konġunt, l-OP torganizza l-ġbir u t-trasport tal-bhejjem kollha (100 %) mibjugħa f'isem il-membri tagħha għal kunsinna fil-biċċeriji, li jirrappreżenta 17 % tal-ispiża tal-produzzjoni u t-tqegħid fis-suq tal-prodott. Barra minn dan, l-OP takkwista għall-membri tagħha l-biċċa l-kbira tal-għalf u l-medikazzjoni li jużaw, li jirrappreżenta madwar 9 % tal-ispiża tal-produzzjoni.
Analiżi	:	L-OP hija rikonoxxuta formalment mill-awtorità nazzjonali rilevanti. L-OP tikkonċentra l-provvista u tqiegħed fis-suq bhejjem ħajjin. L-OP tbigħ ferm anqas mill-15 % tal-produzzjoni nazzjonali totali ta' bhejjem ħajjin. Il-volum ta' bhejjem suġġett għal negozjati kuntrattwali kien innotifikat lill-awtoritajiet nazzjonali. L-OP twettaq attivitajiet li huma probabbli li jiġġeneraw effiċjenzi kif elenkati fl-Artikolu 170 tar-Regolament dwar l-OKS: l-ewwel, it-trasport konġunt tal-ifrat, it-tieni, l-akkwist konġunt ta' inputs bħall-għalf u l-medikazzjoni. It-trasport konġunt tal-OP ikopri aktar minn nofs il-volumi kkummerċjalizzati mill-OP (f'dan il-każ 100 % tal-bhejjem). Għalhekk jista' jiġi konkluż li t-Test tal-Effiċjenzi Sinifikanti huwa ssodisfat bil-metodu simplifikat. Rigward l-akkwist konġunt ta' inputs, ma hemmx bżonn tiġi analizzata din l-attività separatament f'din is-sitwazzjoni. Għalhekk id-Deroga tapplika għall-attivitajiet ta' negozjati kuntrattwali tal-OP.

(124)

Eżempju tal-valutazzjoni, skont l-Artikolu 170 tar-Regolament dwar l-OKS, ta' OP attiva fis-settur tal-laħam taċ-ċanga u tal-vitella meta tapplika d-Deroga.

Sitwazzjoni	:	Diversi produtturi tal-bhejjem tal-laħam taċ-ċanga u tal-vitella għall-qatla minn reġjun wieħed ħolqu OP, li permezz tagħha huma jakkwistaw konġuntament l-għalf tal-annimali. Huma bnew ukoll konġuntament faċilità għall-ħsad sabiex jaħżnu l-għalf tal-annimali f'kundizzjonijiet tajbin (is-sistema ta' ħżin tippermettilhom jirregolaw it-temperatura u l-umdità sabiex huma jkunu jistgħu jżommu l-għalf tal-annimali fi kwalità tajba u għal perjodi itwal ta' żmien). L-OP tosserva wkoll il-livell ta' ħażna tal-għalf tal-annimali sabiex ammont biżżejjed ta' għalf ikun dejjem disponibbli għad-distribuzzjoni lill-produtturi skont il-ħtiġijiet momentarji tagħhom mingħajr interruzzjonijiet. Barra minn dan, l-OP tinnegozja l-kuntratti ta' provvista għall-bhejjem tal-laħam taċ-ċanga u tal-vitella għall-qatla mal-klijenti f'isem il-membri tagħha, jiġifieri hija twettaq negozjati kuntrattwali. L-akkwist konġunt tal-għalf tal-annimali jkopri 80 % tal-għalf meħtieġ għall-volumi ta' bhejjem għall-qatla kummerċjalizzati mill-OP. Is-sehem tal-laħam taċ-ċanga u tal-vitella, li huwa mibjugħ mill-OP, ikopri 14,5 % tal-produzzjoni totali nazzjonali. L-OP innotifikat il-volum ta' bhejjem tal-laħam taċ-ċanga u tal-vitella suġġett għal negozjati kuntrattwali lill-awtoritajiet nazzjonali.
Analiżi	:	L-OP hija rikonoxxuta formalment mill-awtorità nazzjonali rilevanti. Barra minn dan, hija tikkonċentra l-provvista u tqiegħed fis-suq il-laħam taċ-ċanga u tal-vitella. Il-volum tal-bhejjem tal-laħam taċ-ċanga u tal-vitella kopert bin-negozjati kuntrattwali mill-OP ma jaqbiżx l-15 % tas-suq nazzjonali. Il-volum ta' bhejjem suġġett għal negozjati kuntrattwali kien innotifikat lill-awtoritajiet nazzjonali. L-OP twettaq attivitajiet li probabbli jiġġeneraw effiċjenzi kif elenkati fl-Artikolu 170 tar-Regolament dwar l-OKS, jiġifieri l-akkwist konġunt ta' inputs (l-għalf tal-annimali). L-attività ta' akkwist konġunt ta' inputs imwettqa mill-OP tkopri inputs meħtieġa għal aktar minn nofs il-volumi ta' bhejjem għall-qatla kummerċjalizzat mill-OP. Għalhekk jista' jiġi konkluż li t-Test tal-Effiċjenzi Sinifikanti huwa ssodisfat skont il-metodu simplifikat. Konsegwentement, id-Deroga tapplika għan-negozjati kuntrattwali tal-OP.

(125)

Eżempju tal-valutazzjoni, skont l-Artikolu 170 tar-Regolament dwar l-OKS, ta' OP attiva fis-settur tal-laħam taċ-ċanga u tal-vitella meta ma tapplikax id-Deroga:

Sitwazzjoni	:	OP rikonoxxuta twettaq bejgħ konġunt ta' 80 % tal-produzzjoni tal-ifrat tal-membri tagħha għall-provvista ta' bhejjem ħajjin għall-qatla. Il-bejgħ jirrappreżenta sehem mis-suq ta' 6 % tal-produzzjoni nazzjonali totali ta' laħam taċ-ċanga fl-Istat Membru kkonċernat. Minbarra l-bejgħ konġunt, l-OP qiegħda torganizza kampanji ta' promozzjoni konġunta f'isem il-membri tagħha fil-forma ta' reklami ġenerali fil-gazzetta lokali dwar il-bhejjem tal-membri tagħha. L-attività ta' promozzjoni konġunta tkopri l-prodotti kollha mibjugħa mill-OP.
Analiżi	:	L-OP hija rikonoxxuta formalment mill-awtorità nazzjonali rilevanti. L-OP tikkonċentra l-provvista u tqiegħed fis-suq bhejjem ħajjin. Il-volum tal-bhejjem tal-laħam taċ-ċanga u tal-vitella kopert bin-negozjati kuntrattwali mill-OP ma jaqbiżx l-15 % tal-produzzjoni nazzjonali. L-OP twettaq attività waħda li probabbli tiġġenera effiċjenzi sinifikanti kif elenkati fl-Artikolu 170 tar-Regolament dwar l-OKS: il-promozzjoni konġunta. Din l-attività qiegħda tkopri l-volum kollu mibjugħ konġuntament, madankollu, l-attività konġunta ma tidhirx li tissodisfa l-kundizzjonijiet tat-Test tal-Effiċjenzi Sinifikanti skont il-metodu simplifikat. Fl-eżempju kurrenti, l-OP ma tidhirx li qiegħda tiżviluppa prodott b'valur miżjud, b'mod partikolari mhux prodott li jiddistingwi ruħu minn prodotti oħra bbażati fuq sett speċifiku ta' karatteristiċi, iżda tidher li qiegħda tippromwovi biss il-prodott tal-membri tagħha fil-forma ta' reklami ġenerali. Finalment, din l-attività ta' promozzjoni konġunta mhijiex probabbli li tiġġenera effiċjenzi sinifikanti u n-negozjati kuntrattwali mwettqa mill-OP għalhekk mhumiex probabbli li jikkonformaw mad-Deroga.

4.3. Uċuħ tar-raba'

4.3.1. Eżempji tal-applikazzjoni tad-deroga fis-settur tal-uċuħ tar-raba'

(126)

Din it-taqsima tal-linji gwida tindirizza l-applikazzjoni prattika tar-regoli speċifiċi tar-Regolament dwar l-OKS fis-settur tal-uċuħ tar-raba', permezz tal-eżempji ta' hawn taħt.

(127)

Eżempju tal-valutazzjoni, skont l-Artikolu 171 tar-Regolament dwar l-OKS, ta' OP attiva fis-settur tal-uċuħ tar-raba', fejn tapplika d-Deroga:

Sitwazzjoni

OP rikonoxxuta mill-produtturi tal-qamħ hija stabbilita u għandha xi membri fis-Stati Membri B u C. L-OP kienet ġiet stabbilita biex tipprovdi servizzi ta' trasport lill-membri tagħha billi l-ispejjeż tat-trasport huma relattivament għaljin minħabba d-distanza tal-punti tal-bejgħ. Bħala medja, 60 % tal-kwantità kuntrattwalment innegozjata mill-OP tuża' s-servizzi ta' trasport konġunt (proprji jew esternalizzati). Barra minn dan, l-OP tagħmel akkwist konġunt ta' inputs, speċjalment tal-fertilizzanti u l-pestiċidi. Barra dan, hija tipprovdi servizzi ta' informazzjoni lill-membri tagħha bħal informazzjoni dwar żrieragħ ġodda fis-suq, id-diversifikazzjoni tar-riskju inkluż l-iħħeġġjar, eċċ.

Rigward is-servizzi loġistiċi, l-OP tippossjedi hija stess xi trakkijiet. Madankollu, dawn it-trakkijiet ikopru biss 9 % tal-ħtiġijiet tat-trasport tal-membri tagħha. Għalhekk, l-OP iffirmat kuntratti ma' żewġ kumpaniji oħra, li huma speċjalizzati fil-forniment ta' servizzi tat-trasport. L-OP innotifikat it-talba għall-esternalizzazzjoni lill-awtorità nazzjonali rilevanti, li approvatha. Hija ppreżentat spjegazzjonijiet rilevanti li l-esternalizzazzjoni tat-trasport tiffranka spejjeż sinifikanti billi l-investimenti fit-trakkijiet huma għaljin, il-ħtiġijiet tat-trasport fis-settur tal-uċuħ tar-raba' huma ċikliċi ħafna (jiġifieri huwa meħtieġ ħafna trasport fil-ħsad, altrimenti l-ħtieġa hija baxxa ħafna), il-manutenzjoni tat-trakkijiet hija għalja u li jkollok sewwieqa speċjalizzati li mhumiex impjegati l-ħin kollu jista' jkun għali.

Barra minn hekk, fl-2014 l-OP kellha s-sehem li ġej mill-produzzjoni nazzjonali totali. Fl-Istat Membru A: il-qamħ komuni 6,4 %, ix-xgħir 4 %, il-ħafur 13,8 %, iż-żerriegħa tal-kolza 13,6 %, il-ful 2,3 % u l-piżelli 1 %. Fl-Istati Membri B u Ċ, is-sehem mis-suq tal-OP huwa anqas minn 1 % f'kull tip ta' qamħ. Il-membri tal-OP jixtru bħala medja 80 % tal-produzzjoni tagħhom permezz tal-OP. Il-membri jixtru bħala medja żewġ terzi mill-fertilizzanti u l-pestiċidi tagħhom permezz tal-OP u dawn l-inputs jirrappreżentaw bħala medja 18 % tal-ispiża varjabbli totali tal-produzzjoni u t-tqegħid fis-suq tal-prodott għat-tipi kollha ta' uċuħ tar-raba' nnegozjati mill-OP.

Analiżi

L-OP hija rikonoxxuta formalment mill-awtorità nazzjonali rilevanti. L-OP tikkonċentra l-provvista u tqiegħed l-għelejjel fis-suq. Is-sehem ta' qamħ, xgħir, ħafur, żerriegħa tal-kolza, ful u piżelli li huwa mibjugħ/innegozjat mill-OP, ma jeċċedix 15 % tal-produzzjoni nazzjonali totali fis-Stat Membru A. Il-volumi ta' uċuħ tar-raba' suġġetti għal negozjati kuntrattwali kienu nnotifikati lill-awtoritajiet nazzjonali. L-OP twettaq attivitajiet li probabbli jiġġeneraw effiċjenzi kif elenkati fl-Artikolu 171 tar-Regolament dwar l-OKS, jiġifieri t-trasport konġunt u l-akkwist konġunt ta' inputs. It-trasport konġunt tal-OP ikopri aktar minn nofs il-volumi kummerċjalizzati mill-OP. Għalhekk jista' jiġi konkluż li t-Test tal-Effiċjenzi Sinifikanti huwa ssodisfat skont il-metodu simplifikat. Il-valutazzjoni tal-akkwist konġunt ta' inputs u tas-servizzi ta' informazzjoni mhijiex f'dan il-każ meħtieġa billi l-kundizzjonijiet tat-test għal attività waħda konġunta huma ssodisfatti. Konsegwentement, id-Deroga tapplika għan-negozjati kuntrattwali tal-OP.

(128)

Eżempju tal-valutazzjoni, skont l-Artikolu 171 tar-Regolament dwar l-OKS, ta' OP attiva fis-settur tal-uċuħ tar-raba' meta tapplika d-Deroga:

Sitwazzjoni	:	F'reġjun fejn hemm ħafna xmajjar navigabbli, diversi produtturi ta' qamħ komuni u xgħir, sabiex jużaw l-attributi ġeografiċi u naturali tal-pajsaġġ għall-vantaġġ tagħhom, iddeċidew li joħolqu OP sabiex tistabbilixxi ċentru ta' distribuzzjoni fil-faċilitajiet portwali. Dan jippermetti lill-bejjiegħa sabiex jixxippjaw direttament l-għelejjel li huma jkunu xtraw mill-OP. Iċ-ċentru ta' distribuzzjoni huwa integrata mal-attività ta' trasport konġunt. L-OP torganizza t-trasport tal-għelejjel mill-għelieqi tal-produtturi għaċ-ċentru ta' distribuzzjoni. Barra minn dan, l-OP tinnegozja l-kuntratti ta' provvista mal-klijenti f'isem il-membri tagħha, jiġifieri hija twettaq negozjati kuntrattwali. L-attivitajiet ta' stabbiliment ta' ċentru ta' distribuzzjoni u trasport konġunt ikopru 85 % tal-volumi ta' qamħ komuni u xgħir kummerċjalizzati mill-OP. Is-sehem ta' qamħ komuni u xgħir, li huwa mibjugħ mill-OP, ikopri 12,5 % u 8 % rispettivament tal-produzzjoni nazzjonali totali ta' dawn l-uċuħ tar-raba'. L-OP innotifikat il-volumi ta' qamħ komuni u xgħir suġġetti għal negozjati kuntrattwali lill-awtoritajiet nazzjonali.
Analiżi	:	L-OP hija rikonoxxuta formalment mill-awtorità nazzjonali rilevanti. Barra minn dan, hija tikkonċentra l-provvista u tqiegħed l-għelejjel fis-suq. Il-volumi ta' qamħ komuni jew xgħir kopert bin-negozjati kuntrattwali mill-OP ma jaqbżux l-15 % tal-produzzjoni nazzjonali. Il-volumi ta' qamħ komuni u xgħir suġġetti għal negozjati kuntrattwali ġew notifikati lill-awtoritajiet nazzjonali. Bl-istabbiliment ta' ċentru ta' distribuzzjoni li huwa marbut mat-trasport konġunt tal-għelejjel mill-produtturi għaċ-ċentru ta' distribuzzjoni, l-OP twettaq attivitajiet li probabbli jiġġeneraw effiċjenzi kif elenkati fl-Artikolu 171 tar-Regolament dwar l-OKS, jiġifieri l-istabbiliment ta' ċentru ta' distribuzzjoni li huwa marbut mat-trasport konġunt. Dawn l-attivitajiet ikopru aktar minn nofs il-volumi kummerċjalizzati mill-OP. Għalhekk jista' jiġi konkluż li t-Test tal-Effiċjenzi Sinifikanti huwa ssodisfat skont il-metodu simplifikat. Konsegwentement, id-Deroga tapplika għan-negozjati kuntrattwali tal-OP.

(129)

Eżempju tal-valutazzjoni, skont l-Artikolu 171 tar-Regolament dwar l-OKS, ta' OP attiva fis-settur tal-uċuħ tar-raba', meta ma tapplikax id-Deroga:

Sitwazzjoni	:	OP rikonoxxuta qiegħda tbigħ il-qamħ u x-xgħir tal-membri tagħha u ta' dawk li mhumiex membri. Is-sehem tal-qamħ prodott mill-membri tagħha u li huwa kopert b'negozjati kuntrattwali mill-OP, huwa ta' 9,8 % tal-produzzjoni nazzjonali tal-qamħ tal-Istat Membru A, 11 % rispettivament tal-produzzjoni tax-xgħir rilevanti. Is-sehem mis-suq b'kont meħud wkoll tal-qamħ u x-xgħir ipprovduti minn min mhux membru, huwa ta' 12,2 % u 14,1 % rispettivament. Minbarra li twettaq in-negozjati kuntrattwali f'isem il-membri tagħha, l-OP beħsiebha tinvesti f'faċilità ta' ħażna b'xi magni tal-ipproċessar (jiġifieri t-tnixxif u t-tindif), li tkun tkopri 10 % tal-ħtiġijiet ta' ħażna tagħha u madwar 1 % tal-volum totali tal-qamħ mibjugħ mill-OP (prodott tal-membri u ta' dawk li mhumiex membri). L-OP irċeviet selfa minn bank lokali biex tiffinanzja l-faċilità. Attwalment, l-OP qiegħda tivvaluta l-offerti differenti li rċeviet mill-kumpaniji differenti għall-bini u għat-tagħmir. L-OP beħsiebha tkun tista' tuża l-faċilità fi żmien 6-8 xhur. Barra minn dan, l-OP tibgħat ukoll bullettini kull ġimgħa lill-membri tagħha dwar l-iżviluppi tas-swieq u aħbarijiet rilevanti għall-produtturi tal-qamħ u x-xgħir.
Analiżi	:	L-OP hija rikonoxxuta formalment mill-awtorità nazzjonali rilevanti. L-OP tikkonċentra l-provvista u tqiegħed l-uċuħ tar-raba' fis-suq. L-ishma tal-qamħ u x-xgħir mixtrija minn min mhux membru huwa anqas minn 25 % tal-kwantità totali ta' qamħ u xgħir innegozjat b'mod kuntrattwali mill-OP fuq perjodu ta' sena. Il-volumi ta' qamħ jew xgħir koperti minn negozjati kuntrattwali mill-OP ma jaqbżux 15 % tal-produzzjoni nazzjonali, inklużi l-volumi pprovduti minn min mhux membru. L-OP ma twettaqx attivitajiet li probabbli jiġġeneraw effiċjenzi kif elenkati fl-Artikolu 171 tar-Regolament dwar l-OKS. L-OP beħsiebha tipprovdi attività waħda li għandha l-potenzjal ta' titjib tal-effiċjenza elenkata fl-Artikolu 171 tar-Regolament dwar l-OKS fil-futur (ħżin konġunt) għall-produzzjoni tagħha tal-qamħ. Għalhekk il-metodu simplifikat għall-valutazzjoni tat-Test tal-Effiċjenzi Sinifikanti mhuwiex applikabbli. Madankollu, fl-eżempju kurrenti jista' jintuża metodu alternattiv kif deskritt fil-paragrafi minn (82) sa (86). L-OP in kwistjoni rċeviet linja ta' kreditu mill-bank u rċeviet offerti minn kumpaniji differenti biex jibnu l-faċilità tal-ħażna. Il-proġett għandu skadenza fi żmien 6 — 8 xhur. Għalhekk, jidher li l-OP hija impenjata li tinvesti f'attività li żżid l-effiċjenza u teħtieġ biss iż-żmien biex tibni l-faċilitajiet tal-ħażna għall-produzzjoni tagħha tal-qamħ. L-OP għalhekk tista' tibbenefika mid-Deroga sakemm l-effiċjenzi li jinħolqu minn din l-attività ta' ħażna probabbli li jkunu sinifikanti. Madankollu, dan huwa improbabbli billi l-OP beħsiebha tipprovdi l-ħażna għal 1 % biss tal-volumi totali ta' qamħ kummerċjalizzat mill-OP. Rigward l-attivitajiet l-oħra, l-OP tipprovdi informazzjoni lill-membri tagħha fil-forma ta' bullettini. Huwa possibbli li t-tali informazzjoni tista' tkun utli u saħansitra ttejjeb l-effiċjenza. Madankollu, ma jidhirx probabbli li l-informazzjoni pprovduta per se tiġġenera effiċjenzi sinifikanti. Fir-rigward tax-xgħir, ma hemm fis-seħħ jew ippjanati l-ebda attivitajiet li jtejbu l-effiċjenza. Konsegwentement, l-attivitajiet tal-OP mhumiex probabbli li jiġġeneraw effiċjenzi sinifikanti u n-negozjati kuntrattwali mwettqa mill-OP għalhekk mhumiex probabbli li jikkonformaw mad-Deroga.

(1) Il-Linji Gwida dwar l-applikazzjoni tar-regoli speċifiċi stabbiliti fl-Artikoli 169, 170 u 171 tar-Regolament dwar l-OKS għas-setturi taż-żejt taż-żebbuġa, tal-laħam taċ-ċanga u tal-vitella u tal-uċuħ tar-raba' (minn hawn 'il quddiem “il-Linji Gwida”).

(2) Ir-“Regolament dwar l-OKS” huwa r-Regolament (UE) Nru 1308/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi Organizzazzjoni Komuni tas-Swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671).

(3) L-Artikolu 206, paragrafu 3, tar-Regolament dwar l-OKS: “il-Kummissjoni għandha, fejn adegwat, tippubblika linji gwida biex tassisti lill-awtoritajiet nazzjonali tal-kompetizzjoni, kif ukoll lill-impriżi”.

(4) B'mod partikolari, l-Artikoli 169, 170 u 171 tar-Regolament dwar l-OKS japplikaw esklużivament għal kategorija speċifika ta' OP u AOP, li huma rikonoxxuti mill-Istati Membri skont l-Artikoli 152(1) u 156(1) tar-Regolament dwar l-OKS, jiġifieri dawn ir-regoli ma jirrigwardaw l-ebda kategorija ta' OP jew AOP. Għal aktar dettalji ara l-paragrafu (53) hawn taħt.

(5) Il-Qorti tal-Ġustizzja tal-Unjoni Ewropea hawnhekk tirreferi għall-Qorti tal-Ġustizzja u l-Qorti Ġenerali.

(6) Sentenza fil-Kawża Maizena, 139/79, UE:C:1980:250, paragrafu 23; Sentenza fil-Kawża Il-Ġermanja vs Il-Kunsill, C-280/93, UE:C:1994:367, paragrafu 61.

(7) L-Artikolu 101 TFUE:

“1. Is-segwenti għandhom ikunu inkompatibbli mas-suq intern u għandhom ikunu projbiti: l-akkordji kollha bejn impriżi, id-deċiżjonijiet kollha ta' deċiżjonijiet assoċjazzjonijiet bejn impriżi u l-prattiċi kollha miftiehma li jistgħu jolqtu l-kummerċ bejn l-Istati Membri u li jkollhom bħala għan jew riżultat tagħhom il-prevenzjoni, ir-restrizzjoni jew id-distorsjoni tal-kompetizzjoni fi ħdan is-suq intern, partikolarment dawk li jinvolvu:

(a)	iffissar dirett jew indirett tal-prezzijiet tal-akkwist jew tal-bejgħ, jew ta' kundizzjonijiet oħra tan-negozju,

(b)	il-limitazzjoni jew kontroll tal-produzzjoni, tas-swieq, tal-iżvilupp tekniku jew tal-investiment,

(c)	it-taqsim tas-swieq jew it-taqsim ta' fonti ta' provvista,

(d)	l-applikazzjoni ta' kundizzjonijiet differenti għal transazzjonijiet ekwivalenti ma partijiet oħra, li b'hekk jiġu mqiegħda fi żvantaġġ kompetittiv,

(e)	is-suġġettar tal-konklużjoni ta' kuntratt għall-aċċettazzjoni, mill-parti l-oħra, ta' obbligi addizzjonali li, jew min-natura tagħhom jew skont l-użu kummerċjali, ma jkollhom l-ebda konnessjoni mas-suġġett ta' dawk il-kuntratti.

2. L-akkordji jew deċiżjonijiet projbiti bid-dispożizzjonijiet ta' dan l-Artikolu jkunu awtomatikament nulli.

3. Madankollu, id-dispożizzjonijiet tal-paragrafu 1 jistgħu jiġu dikjarati inapplikabbli fil-każ ta' xi wieħed milli ġejjin, jiġifieri:

—	akkordji jew kategoriji ta' akkordji bejn impriżi,

—	deċiżjonijiet ta' assoċjazzjonijiet ta' impriżi jew kategoriji ta' assoċjazzjonijiet ta' impriżi,

—	prattiċi miftiehma jew kategoriji ta' prattiċi miftiehma,

li jikkontribwixxu sabiex itejbu l-produzzjoni jew id-distribuzzjoni ta' prodotti, jew sabiex jippromwovu progress tekniku jew ekonomiku waqt li fl-istess ħin, jassiguraw li l-konsumaturi jkollhom sehem ġust mill-benefiċċji li joħorġu minnhom, iżda li ma:

(a)	jimponux fuq l-impriżi interessati restrizzjonijiet li ma jkunux indispensabbli għall-kisba tal-għanijiet ta' hawn fuq,

(b)	jagħtux lil dawn l-impriżi l-possibiltà li jeliminaw il-kompetizzjoni f'parti sostanzjali tal-prodotti in kwistjoni.”

(8) L-Artikolu 102 TFUE:

“Safejn il-kummerċ bejn l-Istati Membri jista' jiġi milqut, kull abbuż minn impriża waħda jew iktar minn pożizzjoni dominanti fi ħdan is-suq intern, jew fi ħdan parti sostanzjali tiegħu, ikun inkompatibbli mas-suq intern u jkun projbit.

Eżempji ta' abbuż bħal dan huma:

(a)	l-impożizzjoni diretta jew indiretta ta' prezzijiet inġusti tal-akkwist jew tal-bejgħ, jew kundizzjonijiet oħra inġusti ta' kummerċ,

(b)	il-limitazzjoni tal-produzzjoni, tas-swieq jew tal-iżvilupp tekniku bi ħsara għall-konsumaturi,

(c)	l-applikazzjoni ta' kundizzjonijiet differenti għal transazzjonijiet ekwivalenti ma' partijiet oħra, li b' hekk jiġu mqiegħda fi żvantaġġ kompetittiv,

(d)	is-suġġettar tal-konklużjoni ta' kuntratti għall-aċċettazzjoni mill-parti l-oħra, ta' obbligi addizzjonali li, jew min-natura tagħhom jew skont l-użu kummerċjali, ma jkollhom l-ebda konnessjoni mas-suġġett ta' dawk il-kuntratti.”

(9) Avviż tal-Kummissjoni — Linji Gwida dwar l-effett fuq il-kunċett ta' kummerċ li hemm fl-Artikoli 81 u 82 tat-Trattat (ĠU C 101, 27.4.2004, p. 81).

(10) Attività ekonomika hija definita bħala attività li tikkonsisti fl-offerta ta' prodotti u servizzi f'suq partikolari. Għad-dettalji ara: pereż. is-sentenza fil-Kawża Il-Kummissjoni vs L-Italja, 118/85, UE:C:1987:283, paragrafu 7. Impriża hija entità involuta f'attività ekonomika.

(11) Għal aktar dettalji u sfond ara s-sentenza fil-Kawża Oude Luttikhuis, C-399/93, UE:C:1995:434, paragrafi 10-16. Ara wkoll l-Opinjoni tal-Avukat Ġenerali Tesauro f'din il-kawża, UE:C:1995:277, paragrafu 29-30.

(12) Għad-dettalji ara: L-Avviż tal-Kummissjoni dwar id-definizzjoni tas-suq rilevanti għall-għanijiet tal-liġi dwar il-kompetizzjoni tal-Komunità (ĠU C 372, 9.12.1997, p. 5).

(13) Is-sentenza fil-Kawża United Brands, 27/76, UE:C:1995:277, paragrafu 65.

(14) L-imġiba abbużiva ta' esklużjoni huma dawk il-prattiċi mhux ibbażati fuq prestazzjoni normali tan-negozju, li jfittxu li jagħmlu ħsara lill-pożizzjoni kompetittiva tal-kompetituri tal-kumpanija dominanti, jew li jeskluduhom għalkollox mis-suq, li finalment jikkawżaw dannu lill-klijenti (bħar-rifjut ta' provvista, li jagħtu liċenzja, prezzijiet predatorji). L-imġiba abbużiva ta' sfruttament, mill-banda l-oħra, tinvolvi t-tentattiv minn kumpanija dominanti li tisfrutta l-opportunitajiet ipprovduti mis-saħħa tagħha fis-suq sabiex tagħmel ħsara direttament lill-klijenti, pereżempju billi timponi prezzijiet eċċessivi.

(15) Għad-dettalji ara: Avviż tal-Kummissjoni — Linji Gwida dwar l-effett fuq il-kunċett ta' kummerċ li hemm fl-Artikoli 81 u 82 tat-Trattat (ĠU C 101, 27.4.2004, p. 81).

(16) Ara, fost l-oħrajn, is-sentenza fil-Kawża Oude Luttikhuis UE:C:1995:434, paragrafu 12; is-sentenza fil-Kawża Dansk Landbrugs Grovvareselskab (DLG), C-250/92, UE:C:1994:413, pereż. il-paragrafu 32.

(17) Pereż. is-sentenza fil-Kawża Dansk Landbrugs Grovvareselskab (DLG), UE:C:1994:413, paragrafu 35; is-sentenza fil-Kawża Oude Luttikhuis, UE:C:1995:434, paragrafu 14.

(18) Ir-Regolament tal-Kummissjoni (UE) Nru 1218/2010 tal-14 ta' Diċembru 2010 dwar l-applikazzjoni tal-Artikolu 101(3) tat-Trattat dwar il-Funzjonament tal-Unjoni Ewropea għal ċerti akkordji ta' speċjalizzazzjoni, ĠU L 335, 18.12.2010, p. 43.

(19) Għad-dettalji dwar id-definizzjonijiet, ara l-Artikolu 1 tal-Eżenzjoni ta' Kategorija ta' Speċjalizzazzjoni.

(20) L-Artikoli 2, 3 u 4 tal-Eżenzjoni ta' Kategorija ta' Speċjalizzazzjoni.

(21) L-Artikolu 4 tal-Eżenzjoni ta' Kategorija ta' Speċjalizzazzjoni.

(22) Is-sentenza fil-Kawża Frubo, 71/74, UE:C:1975:61; Is-sentenza tal-14 ta' Diċembru 1997, Florimex, T-70/92 u T-71/92 UE:T:1997:69; is-sentenza fil-Kawża Oude Luttikhuis UE:C:1995:434; is-sentenza tat-13 ta' Diċembru 2006, FNCBV vs Il-Kummissjoni, T-217/03 u T-245/03, UE:T:2006:391.

(23) Il-Linji Gwida japplikaw għall-kuntratti ta' provvista nnegozjati minn OP f'isem il-membri tagħhom irrispettivament mil-livell ta' integrazzjoni li jinvolvu bl-eċċezzjoni ta' operazzjonijiet li jikkostitwixxu konċentrazzjoni fis-sens tal-Artikolu 3 tar-Regolament tal-Kunsill (KE) Nru 139/2004 tal-20 ta' Jannar 2004 dwar il-kontroll ta' konċentrazzjonijiet bejn impriżi (ir-Regolament dwar l-Għaqdiet, ĠU L 24, 29.1.2004, p. 1) kif ikun il-każ, pereżempju, b'impriżi konġunti li jwettqu fuq bażi permanenti l-funzjonijiet kollha ta' entità ekonomika awtonoma.

(24) Dawn bhejjem ħajjin maħsuba għall-qatla huma koperti mill-Artikolu 170 tar-Regolament dwar l-OKS:

(a)	l-ifrat tas-subġeneru Bibos jew tas-subġeneru Poephagus ta' piż li jaqbeż 80 kg iżda li ma jaqbiżx 160 kg għall-atla taħt il-Kodiċi NM ex 0102 29 21;

(b)	l-ifrat tas-subġeneru Bibos jew tas-subġeneru Poephagus ta' piż li jaqbeż 160 kg iżda li ma jaqbiżx 300 kg għall-qatla taħt il-Kodiċi NM ex 0102 29 41;

(c)	l-ifrat tas-subġeneru Bibos jew tas-subġeneru Poephagus ta' piż li jaqbeż 300 kg għall-qatla taħt il-Kodiċi NM ex 0102 29 51;

(d)	il-baqar għall-qatla li jaqgħu taħt il-Kodiċi NM ex 0102 29 61; u

(e)	l-ifrat għall-qatla li jaqgħu taħt il-Kodiċi NM ex 0102 29 91.

L-ifrat għat-tismin u l-qatla ulterjuri mhumiex koperti mill-Kodiċijiet NM elenkati fl-Artikolu 170 tar-Regolament dwar l-OKS.

(25) Il-prodotti li ġejjin mhux maħsubin għaż-żrigħ u fil-każ tax-xgħir mhux maħsub għall-immaltjar, huma koperti mill-Artikolu 171 tar-Regolament dwar l-OKS:

(a)	qamħ komuni li jaqa' taħt il-Kodiċi NM ex 1001 99 00;

(b)	xgħir li jaqa' taħt il-Kodiċi NM ex 1003 90 00;

(c)	qamħirrum li jaqa' taħt il-Kodiċi NM ex 1005 90 00;

(d)	sikrana li taqa' taħt il-Kodiċi NM 1002 90 00;

(e)	qamħ durum li jaqa' taħt il-Kodiċi NM 1001 19 00;

(f)	ħafur li jaqa' taħt il-Kodiċi NM 1004 90 00;

(g)	triticale (taħlita ta' qamħ u segala) li taqa' taħt il-Kodiċi ex 1008 60 00;

(h)	żerriegħa tal-kolza li taqa' taħt il-Kodiċi NM ex 1205;

(i)	żerriegħa tal-ġirasol li taqa' taħt il-Kodiċi NM ex 1206 00;

(j)	fażola tas-sojja li taqa' taħt il-Kodiċi NM 1201 90 00;

(k)	ful li jaqa' taħt il-Kodiċijiet NM ex 0708 u ex 0713;

(l)	piżelli ħodor li jaqgħu taħt il-kodiċijiet NM ex 0708 u ex 0713.

(26) Ara t-Taqsima 2.4 ta' dawn il-Linji Gwida fuq ir-relazzjoni bejn l-Artikoli 169, 170 u 171 tal-OKS mal-Artikoli 101 u 102 TFUE.

(27) Ara l-premessa 139 tar-Regolament dwar l-OKS.

(28) Il-paragrafu 2(d) tal-Artikoli 169, 170 u 171 tar-Regolament dwar l-OKS.

(29) Il-ħruġ minn kuntratt jista' jkun meħtieġ pereżempju fil-każ ta' falliment tal-uċuħ tar-raba' kkważat pereżempju bil-kundizzjonijiet tat-temp jew il-mard.

(30) L-istrateġija ta' kummerċjalizzazzjoni tal-OP tista' teħtieġ l-ippjanar tal-produzzjoni tal-membri sabiex tkun assigurata l-kunsinna tal-prodotti mill-membri lill-OP skont l-istrateġija ta' kummerċjalizzazzjoni. L-ippjanar tal-produzzjoni jseħħ qabel ma jibda ċ-ċiklu ta' produzzjoni, meta dan ikun għadu jista' jinfluwenza l-ammont ta' output li l-OP teħtieġ. Is-sitwazzjoni fejn l-ippjanar tal-produzzjoni tifforma parti mill-istrateġija ta' kummerċjalizzazzjoni ta' OP, hija koperta mid-Deroga. Madankollu, din is-sitwazzjoni tvarja mis-sitwazzjoni fejn l-ippjanar tal-produzzjoni titwettaq barra mit-tali strateġija, pereżempju meta OP tikkoordina ppjanar konġunt ma' OP oħra, jew meta OP tikkoordina ppjanar konġunt mal-membri tagħha għall-produzzjoni li dawk il-membri jbigħu barra mill-OP. F'dan l-aħħar każ, l-ippjanar tal-produzzjoni jista' jiġi kopert minn derogi oħra mir-regoli ta' kompetizzjoni skont ir-Regolament dwar l-OKU jew mir-regoli ġenerali ta' kompetizzjoni.

(31) L-istrateġija ta' kummerċjalizzazzjoni tal-OP tista' tirrikjedi l-istabbiliment tal-kalendarju u li l-volumi ta' produzzjoni jiġu kkummerċjalizzati mill-OP. Dan jista' jirriżulta fil-ħżin ta' parti mill-produzzjoni tal-OP jew f'deċiżjonijiet mill-OP biex jiġi pospost il-bejgħ ta' ċerti volumi minħabba l-kundizzjonijiet tas-suq. It-tali deċiżjonijiet inkwantu jifformaw parti mill-istrateġija ta' kummerċjalizzazzjoni ta' OP huma koperta mid-Deroga. Id-Deroga ma tkoprix, madankollu, kull ftehim mill-OP u/jew il-membri tagħha dwar prodotti li mhumiex kummerċjalizzati mill-OP.

(32) L-istrateġija ta' kummerċjalizzazzjoni tal-OP tista' tirrikjedi l-iskambju ta' informazzjoni kummerċjalment sensittiva bejn il-membri sabiex pereżempju tiġi identifikata l-kapaċità tal-membri biex iżidu l-kunsinni lill-OP. Għaldaqstant, is-sitwazzjoni fejn l-iskambju ta' informazzjoni kummerċjalment sensittiva tifforma parti mill-istrateġija ta' kummerċjalizzazzjoni ta' OP tkun koperta mid-Deroga. Din is-sitwazzjoni madankollu tvarja mis-sitwazzjoni fejn l-iskambju ta' informazzjoni kummerċjalment sensittiva jitwettaq barra mit-tali strateġija. Dan ikun il-każ pereżempju jekk l-informazzjoni tirrigwarda bħala eżempju l-volumi li l-produtturi jbiegħu barra mill-OP. Fl-aħħar każ, l-iskambju ta' informazzjoni kummerċjalment sensittiva tista' tiġi koperta minn derogi oħra mir-regoli tal-kompetizzjoni skont ir-Regolament dwar l-OKS jew mir-regoli ta' kompetizzjoni ġenerali.

(33) Ara l-paragrafu 2(a) tal-Artikoli 169, 170 u 171 tar-Regolament dwar l-OKS.

(34) Ara l-paragrafu 2(b) tal-Artikoli 169, 170 u 171 tar-Regolament dwar l-OKS.

(35) Din hija biss ħarsa ġenerali tal-aktar kundizzjonijiet importanti; elementi speċifiċi jiġu ttrattati fid-dettall fit-taqsimiet li ġejjin u lista sħiħa tista' tinstab fil-leġiżlazzjoni rispettiva, jiġifieri l-Artikoli 169, 170 u 171 tar-Regolament dwar l-OKS.

(36) ĠU C 11, 14.1.2011, p. 1.

(37) Ara l-paragrafi minn 150 sa 293 tal-Linji Gwida dwar l-applikabbiltà tal-Artikolu 101 TFUE għall-akkordji ta' kooperazzjoni orizzontali.

(38) Dettalji rigward l-akkordji ta' kummerċjalizzazzjoni konġunta fil-paragrafi 225-257 tal-Linji Gwida dwar l-applikabbiltà tal-Artikolu 101 TFUE għall-akkordji ta' kooperazzjoni konġunta.

(39) ĠU C 101, 27.4.2004, p. 97.

(40) L-Artikolu 152(1) tar-Regolament dwar l-OKS:

“Organizzazzjonijiet tal-produtturi

1. L-Istati Membri jistgħu fuq talba jirrikonoxxu, meta jintalbu, organizzazzjonijiet ta' produtturi, li:

(a)	ikunu magħmulin u kkontrollati f'konformità mal-punt (c) tal-Artikolu 153(2), minn produtturi f'settur speċifiku elenkat fl-Artikolu 1(2);

(b)	ikunu ffurmati fuq inizjattiva tal-produtturi;

(c)

isegwu objettiv speċifiku li jista' jinkludi mill-anqas wieħed mill-objettivi li ġejjin:

(i)	li jiġi żgurat li l-produzzjoni tiġi ppjanata u aġġustata skont id-domanda, partikolarment fir-rigward tal-kwalità u l-kwantità;

(ii)	il-konċentrazzjoni tal-provvista u t-tqegħid fis-suq tal-prodotti magħmulin mill-membri tagħhom, speċjalment permezz ta' bejgħ dirett, inkluż permezz ta' kummerċjalizzazzjoni diretta;

(iii)

li jiġu ottimizzati l-ispejjeż u l-qligħ fuq l-investimenti bħala rispons għall-istandards tal-benesseri ambjentali u tal-annimali, u jiġu stabbilizzati l-prezzijiet tal-produttur;

(iv)	li ssir riċerka u li jiġu żviluppati inizjattivi għal metodi sostenibbli ta' produzzjoni, prattiki innovattivi, kompetittività ekonomika u żviluppi tas-suq;

(v)	li ssir promozzjoni u li tingħata assistenza teknika għall-użu ta' prattiki ta' kultivazzjoni, tekniki ta' produzzjoni ambjentalment tajbin u prattiki u tekniki tajba ta' benesseri tal-annimali;

(vi)	li tiġi promossa u pprovduta assistenza teknika għall-użu ta' standards ta' produzzjoni, titjib fil-kwalità tal-prodotti u żvilupp ta' prodotti b'denominazzjoni protetta tal-oriġini, indikazzjoni ġeografika protetta jew koperti b'tikketta ta' kwalità nazzjonali;

(vii)

l-immaniġġar ta' prodotti sekondarji u ta' skart, b'mod partikolari biex tiġi protetta l-kwalità tal-ilma, tal-ħamrija u tal-pajsaġġ, u tiġi ppreservata u stimulata l-bijodiversità;

(viii)

li jingħata kontribut għall-użu sostenibbli ta' riżorsi naturali u għall-mitigazzjoni tat-tibdil fil-klima;

(ix)	li jiġu żviluppati inizjattivi fil-qasam tal-promozzjoni u l-kummerċjalizzazzjoni;

(x)	jiġu mmaniġġati l-fondi mutwi msemmija fil-programmi operattivi fil-qasam tal-frott u l-ħaxix msemmija fl-Artikolu 31(2) ta' dan ir-Regolament u skont l-Artikolu 36 tar-Regolament (UE) Nru 1305/2013;

(xi)	tingħata l-assistenza teknika meħtieġa għall-użu tas-swieq tal-futuri u ta' skemi tal-assigurazzjoni.”

(41) OP tagħmel sforzi biex tbigħ il-prodotti b'mod effettiv; jiġifieri hija ma twettaqx biss strateġija ta' kummerċjalizzazzjoni konġunta iżda tagħmel ukoll offerti ta' bejgħ u tikkonkludi bejgħ ma' klijenti/xerrejja fir-rigward tal-prodotti tal-membri tagħha.

(42) Il-paragrafu 1, l-ewwel subparagrafu tal-Artikoli 169, 170 u 171 tar-Regolament dwar l-OKS.

(43) Il-paragrafu 2(d) tal-Artikoli 169, 170 u 171 tar-Regolament dwar l-OKS.

(44) Xi ħadd mhux membru jista' jkun jew produttur li ma jkunx membru tal-OP jew kummerċjant. Dawk li mhumiex membri ma jipparteċipawx direttament fin-negozjati kuntrattwali mwettqa minn OP f'isem il-membri tagħha, jiġifieri l-OP tinnegozja b'mod indipendenti minn dawk li mhumiex membri. Il-prodotti ta' dawk li mhumiex membri jinxtraw minn OP mingħand dawk li mhumiex membri separatament, dawn in-negozjati ma' dawk li mhumiex membri ma jiffurmawx parti min-negozjati kuntrattwali u għalhekk ma jibbenefikawx mid-Deroga.

(45) Enfasi miżjuda.

(46) Madankollu, l-esternalizzazzjoni ta' attivitajiet minn OP rikonoxxuta trid tkun f'konformità mal-Artikolu 155 tar-Regolament dwar l-OKS. Dan irid ikun permess minn qabel mill-Istati Membri. L-esternalizzazzjoni tal-produzzjoni mhijiex permessa. L-OP trid tibqa' responsabbli biex tassigura t-twettiq tal-attività esternalizzata u għall-ġestjoni, il-kontroll u s-superviżjoni ġenerali tal-arranġament kummerċjali għat-twettiq tal-attività. Aktar dettalji dwar l-esternalizzazzjoni huma stabbiliti fir-Regolament Delegat tal-Kummissjoni li jrid jiġi adottat.

(47) Billi dan it-test ta' effiċjenza jiddependi fuq il-kisba tal-objettivi tal-PAK fid-dawl tal-bażi legali speċifika pprovduta mill-Artikoli 39 u 42 TFUE għar-regoli tal-kompetizzjoni fil-produzzjoni u l-kummerċ ta' prodotti agrikoli, huwa differenti minn kull test tal-effiċjenza li jiġi applikat fl-infurzar tal-kompetizzjoni f'setturi oħra.

(48) Il-paragrafu 1, subparagrafu 3 punt (a) u (b) tal-Artikoli 169, 170 u 171 tar-Regolament dwar l-OKS.

(49) Dawn l-attivitajiet huma:

(i)	id-distribuzzjoni konġunta, inkluża l-pjattaforma tal-bejgħ konġunt jew it-trasport konġunt;

(ii)	l-ippakkjar, it-tikkettar jew il-promozzjoni konġunti; l-ewwel żewġ attivitajiet huma kkunsidrati biss għas-settur taż-żejt taż-żebbuġa;

(iii)

l-organizzazzjoni konġunta tal-kontroll tal-kwalità;

(iv)	l-użu konġunt ta' tagħmir jew faċilitajiet ta' ħażna;

(v)	l-ipproċessar konġunt; din l-attività hija kkunsidrata biss għas-settur taż-żejt taż-żebbuġa;

(vi)	il-ġestjoni konġunta ta' skart relatat direttament mal-produzzjoni tal-prodott; din l-attività hija kkunsidrata biss għas-setturi taż-żejt taż-żebbuġa u tal-laħam taċ-ċanga u tal-vitella;

(vii)

l-akkwist konġunt ta' inputs.

(50) Fil-Greċja, l-Italja u Spanja, l-ispejjeż tal-fertilizzanti bħala medja kienu jirrappreżentaw 18 % tal-ispejjeż operattivi (azjendi agrikoli speċjalizzati fil-produzzjoni taż-żejt taż-żebbuġa) fl-2010, 14 % għall-pestiċidi u 27 % għall-ispejjeż tal-fjuwil u l-enerġija, abbażi tad-dejta tar-rapport EU olive oil farms report based on FADN data, http://ec.europa.eu/agriculture/rica/pdf/Olive_oil%20_report2000_2010.pdf, p. 57-76.

(51) Fl-UE-27, l-ispejjeż tal-għalf fl-2011 kienu jirrappreżentaw 41 % tal-ispejjeż operattivi għal min irabbi u min isemmen, 22 % għall-ispiża tal-annimali mixtrija u 7 % għall-ispejjeż tal-fjuwil u l-enerġija, abbażi tar-rapport EU beef farms report 2012 based on FADN data. http://ec.europa.eu/agriculture/rica/pdf/beef_report_2012.pdf, p. 69.

(52) Fl-UE-27, l-ispejjeż tal-fertilizzanti kienu jirrappreżentaw pereżempju għall-qamħ, il-qamħ durum, ix-xgħir u l-qamħirrum medja ta' 24 % tal-ispejjeż operattivi fl-2011, 11 % għall-pestiċidi u 17 % għall-ispejjeż tal-fjuwil u l-enerġija, abbażi tad-dejta tar-rapport EU cereal farms report 2013 based on FADN data, http://ec.europa.eu/agriculture/rica/pdf/cereal_report_2013_final.pdf p. 26-79.

(53) Jekk l-elementi tal-metodu simplifikat f'termini ta' volum u spejjeż kif deskritt iktar 'il fuq ikunu ssodisfati, huwa probabbli li t-Test tal-Effiċjenzi Sinifikanti jkun issodisfat fit-tali sitwazzjoni ukoll. Jekk le, it-Test tal-Effiċjenzi Sinifikanti jkun irid jiġi vvalutat abbażi tal-fatti tas-sitwazzjoni speċifika in kwistjoni sabiex ikun assigurat li l-attivitajiet ta' OP jiġġeneraw effiċjenzi sinifikanti biex dawn l-attivitajiet b'mod ġenerali jikkontribwixxu sabiex jintlaħqu l-objettivi tal-PAK.

(54) Ara n-nota f'qiegħ il-paġna 53.

(55) Il-paragrafu 2(a) tal-Artikoli 169, 170 u 171 tar-Regolament dwar l-OKS.

(56) Il-paragrafu 2(e) u (f) tal-Artikoli 169, 170 u 171 tar-Regolament dwar l-OKS.

(57) Il-paragrafu 2(c) tal-Artikoli 169, 170 u 171 tar-Regolament dwar l-OKS.

(58) L-Artikoli 170(1)(a) u (b) l-Artikoli 171(1)(a)-(l) tar-Regolament dwar l-OKS.

(59) Iż-żejt taż-żebbuġa: ĠU C 256, 7.8.2014, p. 4.

L-uċuħ tar-raba': ĠU C 256, 7.8.2014, p. 1.

Il-laħam taċ-ċanga u tal-vitella: ĠU C 256, 7.8.2014, p. 3.

(60) Iż-żejt taż-żebbuġa: http://ec.europa.eu/agriculture/olive-oil/legislation/index_en.htm

Il-laħam taċ-ċanga u tal-vitella: h http://ec.europa.eu/agriculture/beef-veal/policy-instruments/index_en.htm

L-uċuħ tar-raba': http://ec.europa.eu/agriculture/cereals/legislation/index_en.htm

(61) Il-medja Olimpika hija kkalkulata abbażi tad-dejta ta' produzzjoni matul l-aħħar ħames snin, billi jitneħħew is-snin għoljin jew baxxi u b'ponderazzjoni fil-medja tat-tliet snin rimanenti.

(62) Il-paragrafu 2 g) tal-Artikoli 169, 170 u 171 tar-Regolament dwar l-OKS.

(63) Din il-possibbiltà tapplika biss għas-setturi tal-laħam taċ-ċanga u tal-vitella u tal-uċuħ tar-raba', jiġifieri mhux għas-settur taż-żejt taż-żebbuġa, fejn huma rilevanti biss il-kundizzjonijiet taħt a. jew c.

(64) Pereż. Is-sentenza tat-28 ta' Frar 2002, T-395/94, Atlantic Container Line vs il-Kummissjoni, UE:T:2002:49, paragrafu 330.

(65) Pereż. is-sentenza fil-Kawża Metro vs il-Kummissjoni, 26/76, UE:C:1977:167, paragrafu 21: “… Madankollu, għalkemm il-kompetizzjoni fil-prezzijiet hija tant importanti li qatt ma tista' tiġi eliminata, hija ma tikkostitwixxix l-unika forma effettiva ta' kompetizzjoni jew dik li trid tingħata prijorità assoluta f'kull ċirkustanza. Is-setgħat mogħtija lill-Kummissjoni bl-Artikolu 85(3) juru li r-rekwiżiti għaż-żamma ta' kompetizzjoni li taħdem jistgħu jiġu rikonċiljati mas-salvagwardja ta' objettivi ta' natura differenti u li għal dan il-għan ċerti restrizzjonijiet fuq il-kompetizzjoni huma permissibbli, sakemm ikunu essenzjali għall-kisba ta' dawk l-objettivi u li ma jwasslux għall-eliminazzjoni tal-kompetizzjoni għal parti sostanzjali tas-Suq Komuni. …”

(66) F'dan il-kuntest għandu jitfakkar li l-entitajiet li jibbenefikaw mid-Deroga huma suġġetti għal limiti ta' saħħa fis-suq ta' 15 % tal-produzzjoni nazzjonali għal-laħam taċ-ċanga u tal-vitella u l-uċuħ tar-raba' kif ukoll ta' 20 % tas-suq rilevanti għaż-żejt taż-żebbuġa.

(67) Komunikazzjoni mill-Kummissjoni — Avviż — Linji Gwida dwar l-applikazzjoni tal-Artikolu 81(3) tat-Trattat [attwalment l-Artikolu 101(3) TFUE], ĠU C 101, 27.4.2004, p. 97.

(68) Ara t-Taqsima 3.5 dwar il-Limitu ta' produzzjoni

(69) Avviż tal-Kummissjoni dwar id-definizzjoni tas-suq rilevanti għall-għanijiet tal-liġi dwar il-kompetizzjoni tal-Komunità (ĠU C 372, 9.12.1997, p. 5).

(70) Dan jinkludi investigazzjonijiet preċedenti mill-awtoritajiet tal-kompetizzjoni [DĠ għall-Kompetizzjoni tal-Kummissjoni Ewropea u każijiet Spanjoli tal-Awtorità Nazzjonali tal-Kompetizzjoni (NCA — National Competition Authority)] kif ukoll informazzjoni miġbura mill-Kummissjoni Ewropea mill-operaturi.

(71) Ir-Regolament ta' Implimentazzjoni tal-Kummissjoni (UE) Nru 29/2012 tat-13 ta' Jannar 2012 dwar l-istandards ta' marketing għaż-żejt taż-żebbuġa, ĠU L 12, 14.1.2012, p. 14 (kif emendat).

ANNESS I

ANNESS II