9.12.2015   

MT

Il-Ġurnal Uffiċjali tal-Unjoni Ewropea

C 409/379

RAPPORT

dwar il-kontijiet annwali tal-Aġenzija Eżekuttiva għar-Riċerka għas-sena finanzjarja 2014 flimkien mar-risposta tal-Aġenzija

(2015/C 409/42)

INTRODUZZJONI

1.

L-Aġenzija Eżekuttiva għar-Riċerka (minn hawn ‘il quddiem “l-Aġenzija”, magħrufa wkoll bħala r-“REA”), li tinsab fi Brussell, ġiet stabbilita bid-Deċiżjoni tal-Kummissjoni 2008/46/KE (1). L-Aġenzija ġiet stabbilita għal perjodu limitat li beda fl-1 ta’ Jannar 2008 u li jintemm fil-31 ta’ Diċembru 2017 bl-għan li tmexxi attivitajiet speċifiċi tal-Unjoni fil-qasam tar-riċerka (2). Fil-15 ta’ Ġunju 2009 l-Aġenzija uffiċjalment ingħatat l-awtonomija amministrattiva u operazzjonali tagħha mill-Kummissjoni Ewropea.

INFORMAZZJONI LI TAPPOĠĠA D-DIKJARAZZJONI TA’ ASSIGURAZZJONI

2.

L-approċċ tal-awditjar meħud mill-Qorti jinkludi proċeduri analitiċi tal-awditjar, ittestjar dirett tat-tranżazzjonijiet u valutazzjoni tal-kontrolli ewlenin tas-sistemi ta’ superviżjoni u kontroll tal-Aġenzija. Dan huwa ssupplimentat b’evidenza pprovduta mix-xogħol ta’ awdituri oħrajn (fejn rilevanti) u analiżi tar-rappreżentazzjonijiet tal-maniġment.

DIKJARAZZJONI TA’ ASSIGURAZZJONI

3.

Skont id-dispożizzjonijiet tal-Artikolu 287 tat-Trattat dwar il-Funzjonament tal-Unjoni Ewropea (TFUE), il-Qorti awditjat:

(a)

il-kontijiet annwali tal-Aġenzija, li jinkludu r-rapporti finanzjarji (3) u r-rapporti dwar l-implimentazzjoni tal-baġit (4) għas-sena finanzjarja li ntemmet fil-31 ta’ Diċembru 2014, u

(b)

il-legalità u r-regolarità tat-tranżazzjonijiet li fuqhom huma bbażati dawk il-kontijiet.

Ir-responsabbiltà tal-maniġment

4.

Il-maniġment huwa responsabbli mit-tħejjija u l-preżentazzjoni ġusta tal-kontijiet annwali tal-Aġenzija u mil-legalità u r-regolarità tat-tranżazzjonijiet ta’ bażi (5):

(a)

Ir-responsabbiltajiet tal-maniġment fir-rigward tal-kontijiet annwali tal-Aġenzija jinkludu t-tfassil, l-implimentazzjoni u ż-żamma ta’ sistema ta’ kontroll intern rilevanti għat-tħejjija u l-preżentazzjoni ġusta ta’ rapporti finanzjarji li jkunu ħielsa minn kwalunkwe dikjarazzjoni skorretta materjali, sew jekk minħabba frodi u sew jekk minħabba xi żball; l-għażla u l-applikazzjoni ta’ politiki kontabilistiċi xierqa fuq il-bażi tar-regoli kontabilistiċi adottati mill-uffiċjal tal-kontabbiltà tal-Kummissjoni (6); it-tħejjija ta’ stimi kontabilistiċi li jkunu raġonevoli fiċ-ċirkustanzi. Id-Direttur japprova l-kontijiet annwali tal-Aġenzija wara li l-uffiċjal tal-kontabbiltà tagħha jkun ħejjiehom fuq il-bażi tal-informazzjoni kollha disponibbli u jkun stabbilixxa nota biex takkumpanja l-kontijiet li fiha huwa jiddikjara, fost l-oħrajn, li għandu aċċertament raġonevoli li dawn jippreżentaw stampa vera u ġusta tal-pożizzjoni finanzjarja tal-Aġenzija fl-aspetti materjali kollha.

(b)

Ir-responsabbiltajiet tal-maniġment fir-rigward tal-legalità u r-regolarità tat-tranżazzjonijiet ta’ bażi u l-konformità mal-prinċipju ta’ ġestjoni finanzjarja tajba jikkonsistu fit-tfassil, l-implimentazzjoni u ż-żamma ta’ sistema ta’ kontroll intern effettiva u effiċjenti li tinkludi superviżjoni adegwata u miżuri xierqa għall-prevenzjoni ta’ irregolaritajiet u frodi u, jekk meħtieġ, proċedimenti legali għall-irkupru ta’ fondi mħallsa jew użati ħażin.

Ir-responsabbiltà tal-awditur

5.

Ir-responsabbiltà tal-Qorti hija li, fuq il-bażi tal-awditu tagħha, tipprovdi lill-Parlament Ewropew u lill-Kunsill (7) b’dikjarazzjoni ta’ assigurazzjoni dwar l-affidabbiltà tal-kontijiet annwali u dwar il-legalità u r-regolarità tat-tranżazzjonijiet ta’ bażi. Il-Qorti tmexxi l-awditu tagħha skont l-Istandards Internazzjonali tal-Awditjar u l-Kodiċijiet tal-Etika tal-IFAC u l-Istandards Internazzjonali tal-Istituzzjonijiet Supremi tal-Awditjar tal-INTOSAI. Dawn l-istandards jeżiġu li l-Qorti tippjana u twettaq l-awditu biex tikseb aċċertament raġonevoli dwar jekk il-kontijiet annwali tal-Aġenzija jkunux ħielsa minn kwalunkwe dikjarazzjoni skorretta materjali u dwar jekk it-tranżazzjonijiet li fuqhom huma bbażati jkunux legali u regolari.

6.

L-awditu jinvolvi t-twettiq ta’ proċeduri biex tinkiseb evidenza għall-awditjar dwar l-ammonti u d-divulgazzjonijiet fil-kontijiet u dwar il-legalità u r-regolarità tat-tranżazzjonijiet ta’ bażi. Il-proċeduri magħżula jiddependu fuq il-ġudizzju tal-awditur, li huwa bbażat fuq valutazzjoni tar-riskji ta’ dikjarazzjoni skorretta materjali tal-kontijiet u ta’ nuqqas ta’ konformità materjali mit-tranżazzjonijiet ta’ bażi mar-rekwiżiti fil-qafas legali tal-Unjoni Ewropea, sew jekk minħabba frodi u sew jekk minħabba xi żball. Meta jivvaluta dawn ir-riskji, l-awditur iqis kwalunkwe kontroll intern rilevanti għat-tħejjija u l-preżentazzjoni ġusta tal-kontijiet, kif ukoll is-sistemi ta’ superviżjoni u kontroll li jkunu implimentati biex jiġu żgurati l-legalità u r-regolarità tat-tranżazzjonijiet ta’ bażi, u jfassal proċeduri tal-awditjar li jkunu xierqa skont iċ-ċirkustanzi. L-awditu jinvolvi wkoll l-evalwazzjoni tal-adegwatezza tal-politiki kontabilistiċi, ir-raġonevolezza tal-istimi kontabilistiċi u l-preżentazzjoni kumplessiva tal-kontijiet.

7.

Il-Qorti tqis li l-evidenza għall-awditjar miksuba hija suffiċjenti u xierqa biex tipprovdi bażi għad-dikjarazzjoni ta’ assigurazzjoni tagħha.

Opinjoni dwar l-affidabbiltà tal-kontijiet

8.

Fl-opinjoni tal-Qorti, il-kontijiet annwali tal-Aġenzija jippreżentaw b’mod ġust, fl-aspetti materjali kollha, il-pożizzjoni finanzjarja tagħha fil-31 ta’ Diċembru 2014 u r-riżultati tal-operazzjonijiet tagħha u l-flussi tal-flus tagħha għas-sena li ntemmet dakinhar, skont id-dispożizzjonijiet tar-Regolament Finanzjarju tagħha u r-regoli kontabilistiċi adottati mill-uffiċjal tal-kontabbiltà tal-Kummissjoni.

Opinjoni dwar il-legalità u r-regolarità tat-tranżazzjonijiet li fuqhom huma bbażati l-kontijiet

9.

Fl-opinjoni tal-Qorti, it-tranżazzjonijiet li fuqhom huma bbażati l-kontijiet annwali għas-sena li ntemmet fil-31 ta’ Diċembru 2014 huma legali u regolari fl-aspetti materjali kollha.

Dan ir-Rapport ġie adottat mill-Awla IV, immexxija mis-Sur Milan Martin CVIKL, Membru tal-Qorti tal-Awdituri, fil-Lussemburgu fil-laqgħa tagħha tat-8 ta’ Settembru 2015.

Għall-Qorti tal-Awdituri

Vítor Manuel da SILVA CALDEIRA

President

(1)  ĠU L 11, 15.1.2008, p. 9.

(2)  L-Anness I jagħti sommarju tal-kompetenzi u l-attivitajiet tal-Aġenzija. Huwa ppreżentat għal skopijiet ta’ informazzjoni.

(3)  Dawn jinkludu l-karta tal-bilanċ u r-rapport tal-prestazzjoni finanzjarja, it-tabella tal-flussi tal-flus, ir-rapport tat-tibdil fl-assi netti u sommarju tal-politiki kontabilistiċi sinifikanti u noti oħra ta’ spjegazzjoni.

(4)  Dawn jinkludu l-kont tar-riżultat baġitarju u l-anness għall-kont tar-riżultat baġitarju.

(5)  L-Artikoli 62 u 68 flimkien mal-Artikoli 53 u 58 tar-Regolament (UE, Euratom) Nru 966/2012 (ĠU L 298, 26.10.2012, p. 1).

(6)  Ir-regoli kontabilistiċi adottati mill-uffiċjal tal-kontabbiltà tal-Kummissjoni huma dderivati mill-Istandards Internazzjonali tal-Kontabbiltà għas-Settur Pubbliku (IPSAS) maħruġa mill-Federazzjoni Internazzjonali tal-Kontabilisti jew, fejn rilevanti, l-Istandards Internazzjonali tal-Kontabbiltà (IAS)/l-Istandards Internazzjonali tar-Rappurtar Finanzjarju (IFRS) maħruġa mill-Bord dwar l-Istandards Internazzjonali tal-Kontabbiltà.

(7)  L-Artikolu 162 tar-Regolament (UE, Euratom) Nru 966/2012.

ANNESS

L-Aġenzija Eżekuttiva għar-Riċerka (Brussell)

Kompetenzi u attivitajiet

Oqsma ta’ kompetenza tal-Unjoni li jidderivaw mit-Trattat

(L-Artikoli 179 u 180 tat-TFUE)

Ġbir ta’ informazzjoni

L-Unjoni għandha jkollha l-objettiv li ssaħħaħ is-sisien xjentifiċi u teknoloġiċi tagħha billi tistabbilixxi żona ta’ riċerka Ewropea li fiha r-riċerkaturi, l-għarfien xjentifiku u t-teknoloġiji jiċċirkolaw liberament, u li tinkoraġġixxi l-iżvilupp tal-kompetittivita tagħha u tal-industrija tagħha.

Għal dan l-għan l-Unjoni għandha tinkoraġġixxi lill-impriżi inklużi l-SMEs, liċ-ċentri ta’ riċerka u lill-universitajiet fl-attivitajiet tagħhom ta’ riċerka u żvilupp teknoloġiku ta’ livell għoli; għandha wkoll tappoġġa l-isforzi tagħhom li jikkooperaw ma’ xulxin, u timmira fuq kollox li tippermetti lir-riċerkaturi li jikkooperaw liberament lil hinn mill-fruntieri u lill-impriżi li jisfruttaw il-potenzjal kollu tas-suq intern, speċjalment […] bid-definizzjoni ta’ standards komuni u bit-tneħħija ta’ xkiel legali u fiskali għal dik il-kooperazzjoni. […]

Filwaqt li tfittex li tikseb dawn l-għanijiet, l-Unjoni għandha twettaq dawn l-attivitajiet li ġejjin, li jikkomplementaw l-attivitajiet li jsiru fl-Istati Membri:

—

l-implimentazzjoni ta’ programmi ta’ riċerka, ta’ żvilupp teknoloġiku u ta’ dimostrazzjoni, billi ssaħħaħ il-kooperazzjoni ma’ u bejn l-impriżi, ċentri ta’ riċerka u universitajiet,

—

il-promozzjoni ta’ kooperazzjoni ma’ pajjiżi terzi u organizzazzjonijiet internazzjonali fl-oqsma tar-riċerka, l-iżvilupp teknoloġiku u d-dimostrazzjoni tal-Unjoni,

—

id-disseminazzjoni u l-valorizzazzjoni tar-riżultati ta’ attivitajiet fir-riċerka, l-iżvilupp teknoloġiku u d-dimostrazzjoni tal-Unjoni,

—

l-istimulazzjoni tat-taħriġ u l-mobilità tar-riċerkaturi fl-Unjoni.

Kompetenzi tal-Aġenzija

(Id-Deċiżjoni ta’ Implimentazzjoni tal-Kummissjoni 2013/778/UE)

Għanijiet

Ir-REA tassisti lill-Kummissjoni fil-ksib tal-objettivi tal-Programmi Oqfsa għar-Riċerka u tal-istrateġiji tal-UE biex jitrawwem it-tkabbir permezz tas-sostenn tar-riċerka u l-innovazzjoni, bl-implimentazzjoni ta’ partijiet mill-Programm Qafas tal-Orizzont 2020 u l-Programm Kwadru tal-FP7. Hija twassal servizzi effiċjenti u effettivi lill-komunità tar-riċerka billi tiżgura implimentazzjoni bla intoppi tal-parti tagħha tal-finanzjament mill-UE għar riċerka u l-innovazzjoni, u billi tipprovdi servizzi ta’ sostenn lis-servizzi ta’ riċerka kollha tal-Kummissjoni u lill-parteċipanti fil-Programmi Oqfsa. Billi żżomm kuntatti mill-qrib mal-benefiċjarji u billi tipprovdi viżibbiltà għolja tal-Unjoni Ewropea, ir-REA taġixxi bħala promotur taż-Żona Ewropea tar-Riċerka u tal-politiki ta’ riċerka tal-UE.

Taħt il-mandat il-ġdid tar-REA (adottat mill-Kummissjoni f’Diċembru 2013), ir-REA timmaniġġja l-“legat” tal-proġetti tal-FP7 mill-mandat ta’ qabel (azzjonijiet Marie Curie, azzjonijiet tal-SMEs u Riċerka tal-Ispazju u s-Sigurtà) flimkien ma’ għadd kbir ta’ azzjonijiet taħt il-Programm Qafas il-ġdid tal-Orizzont 2020 (azzjonijiet Marie Skłodowska-Curie, Teknoloġiji Futuri u Emerġenti (FET miftuħa), Riċerka tal-Ispazju, Sfidi Soċjetali 2 u 6 u 7, Tixrid tal-Eċċellenza u Twessigħ tal-Parteċipazzjoni u x-Xjenza mas-Soċjetà u għaliha). Rigward is-servizzi ta’ sostenn, ir-REA tipprovdi lista estiża ta’ servizzi taħt il-mandat il-ġdid u taqdi klijenti addizzjonali.

Kompiti

Rigward l-immaniġġjar ta’ proġetti, l-Aġenzija tikkonkludi u tmexxi ftehimiet ta’ għotjiet, li jinvolvi l-operazzjonijiet li ġejjin:

—

tħejjija u pubblikazzjoni ta’ sejħiet għal proposti,

—

evalwazzjoni ta’ proposti,

—

tħejjija u ffirmar ta’ ftehimiet ta’ għotjiet,

—

monitoraġġ tal-implimentazzjoni ta’ proġetti inkluża l-aċċettazzjoni ta’ rapporti u riżultati oħra,

—

pagamenti, irkupri, u applikazzjoni ta’ sanzjonijiet fi ħdan it-tifsira tal-Artikolu 114(4) tar-Regolament Finanzjarju ġenerali, b’mod notevoli meta jkunu ġew identifikati żbalji fi spejjeż iddikjarati wara awditi ex-post fil-livell tal-benefiċjarji finali,

—

pubbliċità u disseminazzjoni ex-post tar-riżultati.

Rigward is-Servizzi ta’ Sostenn, l-Aġenzija twettaq il-kompiti li ġejjin:

—

sostenn amministrattiv għal pubblikazzjoni ta’ sejħiet, immaniġġjar tar-riċeviment elettroniku ta’ proposti u sostenn għal evalwazzjonijiet remoti u fuq il-post;

—

ikkuntrattar u pagament tal-evalwaturi esperti kollha tal-Orizzont 2020 (minbarra l-esperti tal-Kunsill Ewropew tar-Riċerka) u ta’ monituri esperti użati mir-REA;

—

immaniġġjar tad-database tal-parteċipanti tal-Orizzont 2020 (Faċilità tar-Reġistrazzjoni Unika – URF), inkluż sostenn għal kontrolli tal-kapaċità finanzjarja fuq benefiċjarji magħżula, li jintuża wkoll għal programmi oħra tal-UE (Fond għar-Riċerka dwar il-Faħam u l-Azzar, COSME, Erasmus+, Ewropa Kreattiva, Ċittadinanza u programmi fil-qasam tas-saħħa u l-konsumaturi);

—

immaniġġjar tas-Servizz ta’ Tagħrif dwar ir-Riċerka/Helpdesk tal-Orizzont 2020.

Governanza

Kumitat ta’ Ġestjoni

Magħmul minn ħames membri u osservatur wieħed maħtura mill-Kummissjoni Ewropea. Huwa jadotta t-tabella tal-organizzazzjoni (organigramma) tal-Aġenzija u l-Programm ta’ Ħidma Annwali tagħha wara l-approvazzjoni mill-Kummissjoni. Barra minn hekk, huwa jadotta l-baġit amministrattiv tal-Aġenzija kif ukoll ir-Rapport Annwali tal-Attività u l-kontijiet annwali tal-Aġenzija.

Direttur

Maħtur mill-Kummissjoni, id-Direttur imexxi l-Aġenzija flimkien mal-Kumitat ta’ Ġestjoni, jimplimenta l-baġit amministrattiv, jistabbilixxi sistemi ta’ ġestjoni u ta’ kontroll intern adattati għall-kompiti fdati lill-Aġenzija u jħejji r-rapporti li jkunu se jiġu ppreżentati lill-Kummissjoni.

Awditu estern

Il-Qorti Ewropea tal-Awdituri.

Awtorità ta’ kwittanza

Il-Parlament Ewropew li jaġixxi fuq rakkomandazzjoni mill-Kunsill. Fir-rigward tal-implimentazzjoni mill-Aġenzija tal-baġit amministrattiv tagħha, id-deċiżjoni ta’ kwittanza tiġi indirizzata lid-Direttur. Għall-implimentazzjoni tal-baġit operazzjonali ddelegata mill-Kummissjoni lill-Aġenzija, il-Kummissjoni tibqa’ responsabbli.

Riżorsi disponibbli għall-Aġenzija fl-2014 (2013)

Baġit Operazzjonali 2014

EUR 1  557,8(1  759,2) miljun f’approprjazzjonijiet ta’ impenn u EUR 1  057,4(1  443,6) miljun f’approprjazzjonijiet ta’ pagament. L-Aġenzija timplimenta l-baġit operazzjonali tal-Kummissjoni taħt deċiżjoni ta’ delega mill-Kummissjoni.

Baġit Amministrattiv 2014

EUR 51,5(46,8) miljun. L-Aġenzija timplimenta l-baġit amministrattiv b’mod awtonomu.

Persunal fil-31 ta’ Diċembru 2014

Postijiet fit-tabella tal-persunal: 145 (140) li minnhom 139 (138) okkupati

Persunal kuntrattwali: 435 (418-il) membru tal-persunal ippjanati li minnhom 409 (407) kienu fil-post fil-31 ta’ Diċembru 2014.

Total tal-persunal fil-post: 548 (545) li jwettqu l-kompiti li ġejjin:

—

implimentazzjoni tal-programmi: 365 (366)

—

servizzi ta’ sostenn għall-Orizzont 2020: 99 (96)

—

funzjonijiet maniġerjali u amministrattivi: 84 (83)

Prodotti u servizzi 2014 (2013)

Minbarra l-legat tal-FP7 u l-kontinwazzjoni tal-immaniġġjar tal-azzjonijiet Marie Skłodowska-Curie u r-Riċerka tal-Ispazju u s-Sigurtà tal-Orizzont 2020 mill-1 ta’ Jannar 2014 ‘il quddiem, ir-REA gradwalment ħadet f’idejha l-attivitajiet iddelegati ġodda matul it-tieni nofs tal-2014: riċerka agrikola u sikurezza alimentari (Sfida Soċjetali 2), riċerka fil-qasam ta’ soċjetajiet innovattivi, inklużivi u riflettivi (Sfida Soċjetali 6), partijiet ġodda mill-Isfida Soċjetali 7 (Riċerka tas-Sigurtà fl-IT) u l-azzjoni “FET miftuħa” mill-parti Xjenza Eċċellenti tal-Orizzont 2020.

Għall-Parti I – Xjenza Eċċellenti tal-programm Orizzont 2020, ingħalqu sebgħa sejħiet fl-2014 u ġew ikkompletati tliet evalwazzjonijiet. Ġew iffirmati 246 ftehim ta’ għotja ġdid.

Għall-Parti II – Tmexxija Industrijali tal-programm Orizzont 2020, ingħalqu sitt sejħiet fl-2014 u ġew ikkompletati sitt evalwazzjonijiet. Ġew iffirmati 36 ftehim ta’ għotja ġdid.

Għall-Parti III – Sfidi Soċjetali 2, 6 u 7 tal-programm Orizzont 2020, ingħalqu 11-il sejħa fl-2014 u ġew ikkompletati 6 evalwazzjonijiet. Ġew iffirmati seba’ ftehimiet ta’ għotja ġodda.

Għall-proġetti kollha mmaniġġjati taħt l-Orizzont 2020, saru 159 pagament ta’ prefinanzjament fl-2014 u pagament interim wieħed.

Għall-immaniġġjar tal-legat tal-Programm Nies tal-FP7, saru 2  379(3  787) pagament (pagamenti interim/finali, esklużi pagamenti għal evalwaturi esperti). Fi tmiem l-2014, l-Aġenzija mmaniġġjat total ta’ 5  745(6  090) proġett taħt dan il-programm.

Għall-immaniġġjar tal-legat ta’ azzjonijiet tal-SMEs tal-FP7 taħt il-Programm Kapaċitajiet, saru 390 (577) pagament (pagamenti interim/finali, esklużi pagamenti għal evalwaturi esperti). Fi tmiem l-2014, l-Aġenzija kienet qed timmaniġġja total ta’ 565 (691) proġett taħt din l-iskema.

Għall-immaniġġjar tal-legat tat-temi Spazju u Sigurtà tal-FP7 taħt il-Programm Kooperazzjoni, saru 193 (294) pagament (pagamenti interim/finali, esklużi pagamenti għal evalwaturi esperti). Fi tmiem l-2014, l-Aġenzija kienet qed timmaniġġja total ta’ 324 (348) proġett taħt dawn it-temi.

Fir-rigward tas-servizzi ta’ sostenn tal-Orizzont 2020, ir-riżultati miksuba għall-2014 huma kif ġej:

—

64 (194) pubblikazzjoni ta’ sejħiet sostnuti;

—

42  874(25  214-il) proposta riċevuti permezz tal-għodda elettronika għall-preżentazzjoni ta’ proposti;

—

11  399(4  323) evalwatur espert ikkuntrattati u saru 10  585(5  055) pagament għal esperti (ta’ min jinnota li ċ-ċifri tal-2013 huma relatati mal-programmi mmaniġġjati mill-Aġenzija fil-każ biss fejn fl-2014 l-Aġenzija mmaniġġjat kważi l-evalwaturi esperti kollha għall-Orizzont 2020);

—

5  923(4  524) validazzjoni ta’ parteċipanti kkompletati;

—

13  052(4  488) tweġiba mibgħuta wara mistoqsijiet lis-Servizz ta’ Tagħrif dwar ir-Riċerka.

Sors: Anness ipprovdut mill-Aġenzija.

IT-TWEĠIBA TAL-AĠENZIJA

L-Aġenzija ħadet nota tar-rapport tal-Qorti.