IL-KUMMISSJONI EWROPEA

Brussell, 7.12.2015

SWD(2015) 263 final

DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Li jakkumpanja d-dokument

Proposta għal REGOLAMENT TAL-PARLAMENT EWROPEW U TAL-KUNSILL

dwar regoli komuni fil-qasam tal-avjazzjoni ċivili u li jistabbilixxi Aġenzija tas-Sikurezza tal-Avjazzjoni tal-Unjoni Ewropea, u li jħassar ir-Regolament (KE) Nru 216/2008 tal-Parlament Ewropew u tal-Kunsill

{COM(2015) 613 final}
{SWD(2015) 262 final}

Skeda tas-Sommarju Eżekuttiv

Valutazzjoni tal-impatt dwar inizjattiva ta’ politika dwar is-sikurezza tal-avjazzjoni u reviżjoni possibbli tar-Regolament (KE) Nru 216/2008 dwar regoli komuni fil-kamp tal-avjazzjoni ċivili u li jistabbilixxi Aġenzija Ewropea tas-Sikurezza tal-Avjazzjoni

A. Ħtieġa li tittieħed azzjoni

Għalfejn? X’inhi l-problema li qiegħda tiġi indirizzata?

Din l-inizjattiva hija rieżami ġenerali tas-sistema Ewropea tas-sikurezza tal-avjazzjoni u tar-Regolament (KE) Nru 216/2008, li huwa r-Regolament qafas tal-UE għas-sikurezza tal-avjazzjoni. Il-problema fiha erba’ komponenti: (1) is-sikurezza – filwaqt li sa issa s-sistema attwali kienet effettiva biex tiżgura livell għoli ta’ sikurezza, jaf ma tkunx kapaċi tiżgura li r-rata tal-aċċidenti tkompli tonqos proporzjonalment maż-żieda fit-traffiku (żieda ta’ 50 % fl-20 sena li ġejjin); (2) regolamentazzjoni żejda – is-sistema regolatorja hija ta’ piż u toħloq kostijiet eċċessivi; (3) żviluppi ġodda tas-suq – is-suq u t-teknoloġiji tal-avjazzjoni sebqu l-qafas regolatorju (mudelli kummerċjali ġodda, teknoloġiji ġodda) f’dawn l-aħħar għaxar snin; (4) sorveljanza – hemm differenzi sinifikanti fil-kapaċitajiet tal-Istati Membri sabiex jimplimentaw b’mod effettiv il-leġiżlazzjoni tas-sikurezza tal-avjazzjoni. Il-kawżi tal-problema huma: Nuqqas ta’ riżorsi u użu mhux effiċjenti tagħhom, lakuni u inkonsistenzi fis-sistema regolatorja, u regolamentazzjoni li fil-biċċa l-kbira hija preskrittiva u li tpoġġi lil kulħadd fuq l-istess keffa. Il-problemi jaffettwaw lill-atturi kollha fis-sistema tas-sikurezza tal-avjazzjoni u indirettament lill-pubbliku li jivvjaġġa.

X’inhu mistenni li tikseb din l-inizjattiva?

L-inizjattiva timmira li ttejjeb il-prestazzjoni tas-sistema Ewropea tal-avjazzjoni fir-rigward tas-sikurezza, tas-sigurtà, tal-kompetittività u tal-ħarsien tal-ambjent. Din trid titqies ukoll fil-kuntest tal-istrateġija l-ġdida tal-avjazzjoni tal-Kummissjoni u tal-prijoritajiet ta’ Juncker, fir-rigward tat-tnaqqis tal-burokrazija, tas-simplifikazzjoni tal-proċeduri, u tal-ixprunar tat-tkabbir ekonomiku u tal-innovazzjoni permezz ta’ approċċi regolatorji moderni, fosthom regolamentazzjoni abbażi tar-riskji u tal-prestazzjoni. L-inizjattiva tipprova tilħaq l-għanijiet speċifiċi li ġejjin: (1) jiġu eliminati rekwiżiti bla bżonn u tiġi żgurata regolamentazzjoni proporzjonata mar-riskji involuti; (2) integrazzjoni effiċjenti u sorveljanza effettiva ta’ teknoloġiji ġodda u ta’ żviluppi tas-suq; (3) proċess kooperattiv għall-ġestjoni tas-sikurezza bejn l-Unjoni u l-Istati Membri sabiex b’mod konġunt jidentifikaw u jtaffu r-riskji; (4) jingħalqu l-lakuni fis-sistema regolatorja u tiġi żgurata l-konsistenza; (5) tinħoloq sistema ta’ akkomunament u ta’ kondiviżjoni tar-riżorsi bejn l-Istati Membri u l-EASA.

X’inhu l-valur miżjud ta’ azzjoni fil-livell tal-UE?

Fil-biċċa l-kbira tiegħu, it-trasport bl-ajru huwa ta’ natura transnazzjonali u għalhekk min-natura tiegħu, jitlob approċċ regolatorju fil-livell tal-UE. Hemm fehim ġenerali fost l-Istati Membri, li sabiex jintlaħaq livell għoli ta’ sikurezza, huma meħtieġa regoli komuni fil-qasam tas-sikurezza tal-avjazzjoni. Leġiżlazzjoni komuni tfisser li ma jibqax ikun hemm bżonn koordinazzjoni bejn is-sistemi regolatorji tal-Istati Membri u b’hekk dan jikkontribwixxi biex tiżdied is-sikurezza. Il-promozzjoni ta’ sistema Ewropea komuni ta’ sikurezza mmexxija mill-EASA bħala korp regolatorju u ta’ implimentazzjoni tista’ tinkiseb bil-mod l-iżjed effettiv fil-livell tal-UE biss. Bl-istess mod, se jirriżulta titjib fl-effiċjenza permezz ta’ sistema Ewropea unika tas-sikurezza tal-avjazzjoni li tiġġieled il-frammentazzjoni li tant tiswa flus.

B. Soluzzjonijiet

X’għażliet ta’ politika leġiżlattivi u mhux leġiżlattivi ġew ikkunsidrati? Hemm għażla ppreferuta jew le? Għalfejn?

Din l-inizjattiva tikkonċerna r-reviżjoni tar-Regolament (KE) Nru 216/2008, u għaldaqstant hija ta’ natura leġiżlattiva. L-għażliet ta’ politika ġew żviluppati fi tliet oqsma (mingħajr ma jissemma x-xenarju bażi; l-għażliet ippreferuti huma mniżżla bil-korsiv):

1. Ġestjoni u Riżorsi:

1.2 Kooperazzjoni msaħħa bis-sistema attwali

1.3(a) Sistema konġunta ta’ sorveljanza bi trasferiment volontarju tar-responsabbiltajiet

1.3(b) Sistema konġunta ta’ sorveljanza bi trasferiment volontarju tar-responsabbiltajiet + b’mekkaniżmu ta’ sorveljanza ta’ emerġenza

1.4 Awtorità unika tal-UE għas-sikurezza tal-avjazzjoni

2. Proporzjonalità u prestazzjoni tas-sikurezza:

2.2 Fatturi li jwasslu għal sistema tas-sikurezza li tkun proporzjonali u li tkun abbażi tal-prestazzjoni

2.3 Sistema regolatorja b’żewġ saffi: wieħed preskrittiv – wieħed abbażi tal-prestazzjoni

2.4 Tranżizzjoni lejn sistema regolatorja sħiħa abbażi tal-prestazzjoni

3.1. Lakuni u inkonsistenzi – groundhandling

3.1(B) Standards tal-industrija / l-ebda ċertifikazzjoni

3.1(C) Regoli ta’ implimentazzjoni / ċertifikazzjoni

3.2. Lakuni u inkonsistenzi – sigurtà:

3.2(B) Qafas legali għal aspetti ta’ sigurtà tad-disinn biss

3.2(C) Approċċ ikkoordinat għal kwistjonijiet relatati mas-sikurezza u mas-sigurtà

3.3. Lakuni u inkonsistenzi – ambjent

3.3(B) Rekwiżiti essenzjali tal-UE għall-ħarsien tal-ambjent fir-rigward tal-prodotti ajrunawtiċi

Ix-xenarju ta’ politika ppreferut jiġbor flimkien għażliet ta’ intervent limitat tal-UE u jinkludi elementi volontarji.

Liema għażla u min jappoġġaha?

Ġestjoni u kwalità tar-riżorsi: Appoġġ mill-Istati Membri u mill-industrija għall-kondiviżjoni tar-riżorsi fuq bażi volontarja (PO 1.2 u 1.3(a)). PO 1.3(b) u 1.4: oppożizzjoni possibbli mill-Istati Membri minħabba elementi obbligatorji.

Proporzjonalità u prestazzjoni tas-sikurezza: PO 2.2 appoġġ mill-Istati Membri u mill-industrija PO 2.3 appoġġ mill-industrija, iżda wisq probabbli jkun hemm oppożizzjoni mill-Istati Membri minħabba amministrazzjoni kumplessa PO 2.4 l-inqas appoġġ mill-Istati Membri u mill-industrija

Groundhandling: appoġġ ġenerali mill-Istati Membri u mill-industrija bl-eċċezzjoni tal-linji tal-ajru

Sigurtà: PO 3.2(C) l-estensjoni tal-mandat tal-EASA jaf tiffaċċja oppożizzjoni mill-Istati Membri u mill-industrija

Ambjent: PO 3.3(B) l-ebda bidla fil-kamp ta’ applikazzjoni iżda fl-implimentazzjoni biss, għaldaqstant mhux kontroversjali.

C. Impatti tal-għażla ppreferuta

X’inhuma l-benefiċċji tal-għażla ppreferuta (jekk hemm, inkella dawk ewlenin)?

Fir-rigward tas-suq intern se jkun hemm impatti pożittivi fuq il-kundizzjonijiet ekwi permezz ta’ sorveljanza iżjed uniformi u firxa usa’ ta’ possibbiltajiet biex tintwera l-konformità, inkluż użu akbar tal-istandards tal-industrija. Il-kost tal-konformità għan-negozji se jitnaqqas permezz ta’ sorveljanza abbażi tar-riskji kif ukoll permezz ta’ regolamentazzjoni u ta’ proċeduri iżjed proporzjonati (eż. kiri ssimplifikat għal-linji tal-ajru, proċeduri ssimplifikati ta’ ċertifikazzjoni għall-inġenji tal-ajru ħfief). L-innovazzjoni tiġi xprunata permezz ta’ regolamentazzjoni iżjed proporzjonata u iżjed abbażi tal-prestazzjoni. Fir-rigward tal-impatti soċjali, l-ixprunar tal-innovazzjoni mistenni li jsarraf f’impjiegi addizzjonali fis-suq. Huwa mistenni li s-sikurezza tal-avjazzjoni titjieb permezz ta’ sorveljanza aħjar fl-UE kollha, permezz ta’ proċess kollaborattiv Ewropew għall-ġestjoni tas-sikurezza, u billi jingħalqu l-lakuni tas-sikurezza għall-groundhandling u għas-sigurtà. L-impatti ambjentali jkunu marġinali iżda pożittivi.

L-impatti jistgħu jiġu kkwantifikati biss b’mod limitat peress li l-għażliet jimmiraw li jiġi stabbilit qafas regolatorju li l-impatt tiegħu jista’ jiġi kkwantifikat biss meta jissarraf f’miżuri konkreti (eż. regoli ta’ implimentazzjoni) jew peress li l-miżuri huma ta’ natura volontarja u l-impatti jkunu jiddependu fuq l-użu.

X’inhuma l-kostijiet tal-għażla ppreferuta (jekk hemm, inkella dawk ewlenin)?

Fir-rigward tal-kostijiet għan-negozji u għall-amministrazzjonijiet nazzjonali, ara ż-żewġ taqsimiet ta’ hawn isfel. Fil-livell tal-UE, l-iżvilupp tal-akkademja virtwali, ir-repożitorju ċentrali taċ-ċertifikati, il-grupp ta’ esperti u l-appoġġ għat-tfassil tar-regoli/għall-ispezzjonijiet għall-groundhandling, għas-sigurtà u għall-ambjent se jirrikjedu sforzi addizzjonali mill-EASA li parzjalment jistgħu jiġu assorbiti minn riżorsi eżistenti jew permezz ta’ miżati u ta’ imposti. It-trasferiment ta’ porzjon limitat tal-imposti ta’ waqt ir-rotta mill-Eurocontrol għall-EASA jista’ jillibera riżorsi fl-EASA li mbagħad jistgħu jintużaw sabiex jiġu indirizzati miżuri oħra. Ma hemm l-ebda impatt ambjentali u soċjali negattiv sinifikanti.

Kif se jintlaqtu n-negozji, l-SMEs u l-mikroimpriżi?

Se jirriżultaw impatti pożittivi għan-negozji minn sistema regolatorja iżjed proporzjonali u iżjed abbażi tal-prestazzjoni, minn iżjed flessibbiltà fil-mezzi biex jiġu ssodisfati r-rekwiżiti, minn dipendenza akbar fuq l-istandards tal-industrija, minn proċeduri ssimplifikati ta’ ċertifikazzjoni għall-inġenji tal-ajru ħfief, u konsegwentement tnaqqis fil-kost tal-konformità. It-teknoloġiji l-ġodda jistgħu jiġu introdotti iżjed faċilment. L-SMEs jaf ma jgawdux minn regolamentazzjoni abbażi tal-prestazzjoni bl-istess mod bħal negozji li jkunu akbar, iżda jgawdu iktar meta jgħaddu għal sorveljanza abbażi tar-riskji, li tneħħi l-kontrolli bla bżonn. Il-linji tal-ajru se jintlaqtu b’mod pożittiv mis-simplifikazzjoni tal-approvazzjonijiet tal-kiri u mill-konsolidazzjoni possibbli taċ-ċertifikati li jkollha l-istess kumpanija f’diversi Stati Membri. Il-finanzjament tal-miżuri relatati mal-akkomunament u mal-kondiviżjoni tar-riżorsi se jitħallas mill-industrija abbażi tal-“prinċipju ta’ min juża jħallas”, li jaf ikollu impatt fuq in-negozji f’dawk l-Istati Membri li fihom is-sorveljanza attwalment hija ffinanzjata mid-dħul ġenerali mit-taxxa.

Se jkun hemm impatti sinifikanti fuq il-baġits u l-amministrazzjonijiet nazzjonali?

Fir-rigward tal-kostijiet tal-implimentazzjoni, l-Istati Membri li għadhom ma introduċewx il-Programmi għas-Sikurezza tal-Istat se jintalbu biex jintroduċuhom. Se jkun hemm iktar kostijiet li jfeġġu mill-ħtieġa għal taħriġ addizzjonali. Ċerti Stati Membri se jkollhom jiżviluppaw għarfien espert fiċ-ċibersigurtà u fil-groundhandling. Madankollu, il-maġġoranza tal-miżuri proposti se jiġu applikati fuq bażi volontarja, u jiġu attivati minn Stat Membru fil-biċċa l-kbira abbażi ta’ analiżi pożittiva tal-kostijiet imqabbla mal-benefiċċji. Wara xi kostijiet inizjali tat-twaqqif u tat-taħriġ, mistenni li jkun hemm impatti pożittivi fuq ir-riżorsi tal-amministrazzjonijiet nazzjonali tal-avjazzjoni fit-terminu medju u twil, billi jinkiseb titjib fl-effiċjenza permezz tal-akkomunament u tal-kondiviżjoni tar-riżorsi u bil-proċess lejn sorveljanza iżjed immirata u iżjed abbażi tar-riskji. L-akkomunament u l-kondiviżjoni tar-riżorsi se jiġu ffinanzjati permezz ta’ miżati u ta’ imposti abbażi tal-“prinċipju ta’ min juża jħallas”. L-għażliet ippreferuti tal-groundhandling u tas-sigurtà ma jinvolvux rekwiżiti ġodda ta’ ċertifikazzjoni u għalhekk mhux mistenni li l-kostijiet tas-sorveljanza għall-Istati Membri jkunu sinifikanti.

Se jkun hemm impatti sinifikanti oħra?

Il-ħolqien ta’ sistema regolatorja li tiffavorixxi l-introduzzjoni ta’ teknoloġiji ġodda u li tillibera r-riżorsi permezz ta’ proċeduri amministrattivi li jkunu iżjed proporzjonali, se jkollha impatt pożittiv fuq il-kompetittività tal-manifatturi u tal-linji tal-ajru u fl-aħħar mill-aħħar fuq l-impjiegi u fuq it-tkabbir. Bl-istess mod, iż-żamma jew it-titjib tar-rekord Ewropew tas-sikurezza grazzi għall-proċessi kollaborattivi għall-ġestjoni tas-sikurezza, għas-sorveljanza abbażi tar-riskji u għall-għeluq tal-lakuni tas-sikurezza fir-regolamentazzjoni, mhux biss se jikkontribwixxu għall-protezzjoni tal-pubbliku li jivvjaġġa, iżda wkoll għall-kompetittività (internazzjonali).

D. Segwitu

Meta se tiġi eżaminata mill-ġdid il-leġiżlazzjoni?

L-implimentazzjoni tar-Regolament (KE) Nru 216/2008 hija soġġetta għal evalwazzjoni obbligatorja kull ħames snin, rikjesta mir-Regolament stess. Din l-evalwazzjoni ta’ sikwit tissejjaħ l-evalwazzjoni tal-Artikolu 62.

IL-KUMMISSJONI EWROPEA

Brussell, 7.12.2015

SWD(2015) 263 final

DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Li jakkumpanja d-dokument

proposta għal REGOLAMENT TAL-PARLAMENT EWROPEW U TAL-KUNSILL

{COM(2015) 613 final}
{SWD(2015) 262 final}

Skeda tas-Sommarju Eżekuttiv

Valutazzjoni tal-impatt dwar l-iżvilupp sigur ta’ operazzjonijiet bid-droni fl-UE

A. Ħtieġa ta' azzjoni

X’inhi l-problema u għaliex hija problema fil-livell tal-UE?

Il-problema prinċipali hija li s-sistema regolatorja kurrenti tfixkel l-iżvilupp tas-suq tad-droni. Ir-regoli tal-avjazzjoni eżistenti ma jindirizzawx b’mod xieraq l-ispeċifiċitajiet tad-droni u jew huma sproporzjonati għar-riskju operazzjonali, diffiċli (tqal) wisq biex jitwettqu jew inkella l-ispejjeż tagħhom tant huma għoljin li ħafna mis-servizzi tad-droni mhumiex ekonomiċi. Barra minn hekk, l-operazzjonijiet bid-droni joħolqu għadd ta' problemi li mhumiex preżenti jew mhux daqstant, fl-avjazzjoni ċivili 'bl-ekwipaġġ'. Dawn il-kwistjonijiet għandhom x'jaqsmu mas-sikurezza, is-sigurtà, il-protezzjoni tad-dejta u l-privatezza, il-protezzjoni ambjentali, u r-responsabbiltà. Minkejja li jidher li m'hemmx bżonn jiġi emendat i-qafas legali f'dan ir-rigward fil-livell tal-UE, fir-realtà hemm xi ostakli fl-applikazzjoni tar-regoli eżistenti għall-operazzjonijiet bid-droni. Il-kawżi prinċipali tal-problemi huma: (1) frammentazzjoni tal-kompetenzi f'dak li għandu x'jaqsam mar-regolamentazzjoni tad-droni, li twassal għal rekwiżiti diverġenti fis-suq intern; (2) awtorizzazzjonijiet individwali li jqumu wisq flus u li jieħdu ħafna ħin u ħafna riżorsi; (3) nuqqas ta' attenzjoni adegwata għall-ispeċifiċitajiet tad-droni fil-metodi tradizzjonali tar-regolamentazzjoni tal-avjazzjoni ċivili; (4) in-nuqqas ta' informazzjoni u strumenti xierqa mill-awtoritajiet ta' sorveljanza u tal-infurzar tal-liġi. Il-problemi jolqtu lill-atturi kollha fis-sistema tal-avjazzjoni, lill-manifatturi u lill-operaturi tad-droni u b'mod indirett liċ-ċittadini kollha minħabba li d-droni jistgħu jittajru kullimkien.

X'mistenni jinkiseb b'din l-inizjattiva?

L-għan ġenerali tal-politika huwa li tiffaċilita l-iżvilupp tad-droni u s-servizzi tad-droni b'mod sikur, sigur u sostenibbli u b'rispett sħiħ għad-drittijiet fundamentali taċ-ċittadini. Għalhekk l-inizjattiva għandha l-għan li temenda r-Regolament (KE) Nru 216/2008 u diversi atti ta’ implimentazzjoni sabiex jiġi estiż il-qafas leġiżlattiv tal-UE għad-droni kollha. F’dan ir-rigward, l-ewwel għan speċifiku huwa li jiġu eliminati l-ostakli regolatorji li llum il-ġurnata jfixklu l-produzzjoni u l-esplojtazzjoni tad-droni, sabiex il-manifatturi jkunu jistgħu faċilment iqiegħdu l-prodotti tagħhom fis-suq u l-operaturi jkunu jistgħu jipprovdu servizzi tad-droni lill-ekonomija. Għandhom jitneħħew l-ostakli regolatorji mhux ġustifikati iżda għandha tibqa' fis-seħħ ir-regolamentazzjoni ġustifikata, bħal pereżempju r-regoli essenzjali tas-sikurezza, u jekk nieqsa, għandha tiġi żviluppata. It-tieni għan speċifiku hu li jitnaqqsu r-riskji speċifiċi u l-problemi li jirriżultaw mill-użu tad-droni, notevolment fl-oqsma tas-sikurezza, is-sigurtà,il-protezzjoni tad-dejta u l-privatezza, u l-ambjent. L-indirizzar ta' dawn il-kwistjonijiet huwa kruċjali biex jiggarantixxi li d-droni jiġu aċċettati mill-pubbliku bħala parti dejjem aktar importanti tal-ħajja ta' kuljum.

X'inhu l-valur miżjud ta' azzjoni fil-livell tal-UE?

It-trasport bl-ajru fil-biċċa l-kbira għandu karattru transnazzjonali u għalhekk, min-natura tiegħu stess, jeħtieġ approċċ regolatorju fil-livell tal-UE biex jintlaħaq livell għoli ta’ sigurtà. B'kunsiderazzjoni għall-fatt li t-teknoloġiji l-ġodda jippermettu lil droni dejjem eħfef jinterferixxu mal-"operazzjonijiet ajrunawtiċi bl-ekwipaġġ", li għalihom l-UE diġà hija kompetenti, il-leġiżlazzjoni tal-UE għandha tkopri wkoll kull tip ta' droni sabiex tiggarantixxi azzjoni koerenti u b'hekk tevita li l-operazzjonijiet bid-droni jħallu impatt negattiv fuq is-sikurezza ta' azzjonijiet tal-avjazzjoni diġà eżistenti. Jekk nikkunsidraw id-droni bħala "prodotti ajrunawtiċi", dawn it-teknoloġiji globali m'għandhomx skala ta' żvilupp suffiċjenti fis-swieq nazzjonali. Ir-rikonixximent reċiproku huwa diffiċli li jinkiseb fis-suq uniku minħabba fi standards u regoli nazzjonali dettaljati. Huma biss ir-regoli bażiċi tal-UE li japplikaw għall-medda sħiħa ta'd-droni, irrispettivament mill-piż tagħhom, li joffru qafas regolatorju konsistenti għall-produzzjoni u l-esplojtazzjoni tad-droni fis-suq intern tal-UE.

B. Soluzzjonijiet

Liema għażliet ta' politiki leġiżlattivi u mhux leġiżlattivi tqiesu? Hemm alternattiva preferuta? Għaliex?

Din l-inizjattiva għandha natura leġiżlattiva. Billi l-operazzjonijiet bid-droni huma kritiċi għas-sikurezza tal-avjazzjoni, kull tip ta' approċċ ibbażat purament fuq azzjoni volontarja mhuwiex ottimu f'termini ta' twassil ta' prestazzjoni elevata mil-lat tas-sikurezza u b'mod koordinat ma' attivitajiet ajrunawtiċi oħra . F'dak li għandu x'jaqsam mal-approċċ għar-Regolament (minbarra x-xenarju bażiku) ġew żviluppati għażliet ta' politika, li xorta waħda jridu jiġu segwiti minn għadd ta’ atti ta’ implimentazzjoni:

1. L-estensjoni tar-regolament tal-avjazzjoni tal-UE eżistenti għad-droni kollha - l-integrazzjoni tad-droni fil-qafas leġiżlattiv tal-UE bl-użu tal-approċċ tal-avjazzjoni ċivili tradizzjonali.

2. Leġiżlazzjoni tal-UE dwar id-droni bbażata fuq ir-riskju — ir-regoli u l-proċeduri ta’ approvazzjoni u ta' sorveljanza jkunu bbażati fuq ir-riskju partikolari u ma jibqgħux jiddependu aktar b'mod kważi awtomatiku mill-karatteristiċi tad-dron.

2.1 L-applikazzjoni tal-leġiżlazzjoni tal-UE dwar il-prodotti għad-droni b'riskju baxx — id-dron b'riskju baxx, żgħir, prodott bil-massa u li jinstab għall-bejgħ fil-ħwienet u fuq l-internet ikun awtorizzat abbażi ta’ leġiżlazzjoni ta’ armonizzazzjoni tal-prodotti tat-tip “approċċ ġdid”.

L-għażla politika 2.1 hija l-għażla ta’ politika preferuta minħabba li tindirizza r-riskji għas-sikurezza b’mod inqas pedantiku. Id-dispożizzjonijiet fir-regolamenti dwar is-sigurtà tal-prodotti adattati speċifikament għal prodotti tal-massa jistgħu jikkumplimentaw ir-regoli tal-avjazzjoni kif żviluppati taħt l-għażla 2.

Min jappoġġa liema għażla?

L-azzjoni leġiżlattiva fil-livell tal-UE hija appoġġjata mill-partijiet interessati kollha u mill-Istati Membri (il-konklużjonijiet tas-Summit Ewropew tad-19 ta’ Diċembru 2013). Il-maġġoranza l-kbira tal-partijiet interessati fil-konsultazzjoni pubblika indikaw li l-kompetenza kurrenti bbażata fuq il-piż ta' 150kg hija skaduta u l-istatus quo ftit li xejn għandu appoġġ. Il-kunsens ġenerali huwa li hemm bżonn nitbiegħdu mill-piż u minflok nikkunsidraw sett ta' fatturi, bħat-tip ta' operazzjoni, il-kwalità tal-operatur tad-droni, il-post tal-operazzjoni u l-affidabiltà tas-sistema kollha (96%). Kien hemm appoġġ qawwi speċjalment min-naħa tal-produtturi u tal-operaturi ta' droni eħfef u inqas kumplessi favur regoli proporzjonati għar-riskju tat-tip ta' operazzjoni. L-għażla 2 u l-għażla sekondarja 2.1 jipproponu approċċ ta' dan it-tip billi jiġu aġġustati r-rekwiżiti għar-riskji ta’ operazzjoni bid-droni.

C. Impatti tal-għażla preferuta

X'inhuma l-benefiċċji tal-għażla ppreferuta (jekk hemm, inkella dawk ewlenin)?

L-għażla 2.1 se tistimula l-iżvilupp tas-suq intern għall-prodotti u għas-servizzi tad-droni billi tipprovdi regoli u standards komuni, anke permezz tal-aħjar użu ta’ għodod ta’ sorveljanza tas-suq ġenerali għad-droni involuti f’operazzjonijiet ta’ riskju baxx. Fl-istess ħin, jekk ir-regoli jiġu applikati b’mod proporzjonat għar-riskji, il-parti tas-suq tad-droni iżgħar (fil-biċċa l-kbira din il-parti hija okkupata mill-SMEs) ma tinħonoqx b'regolamentazzjoni żejda. L-għażla tittratta firxa wiesgħa ta’ riskji operattivi u teknoloġiji li qed jevolvu malajr u minħabba f'din il-flessibbiltà tiffavorixxi l-użu aktar mgħaġġel ta’ teknoloġiji ġodda u konsegwentement ma jintilifx il-vantaġġ kompetittiv tal-kumpaniji tal-UE . Hija l-iktar għażla li tista' żżomm l-ispejjeż operattivi baxxi għan-negozji u li tnaqqas kemm jista' jkun ix-xogħol amministrattiv, billi tipprovdi qafas flessibbli għal firxa ta’ proċeduri bħal awtodikjarazzjonijiet, validazzjonijiet sempliċi jew ċertifikazzjonijiet parzjali. Barra minn hekk, b'mod effettiv se tindirizza r-riskji kollha tas-sigurtà, b’mod partikolari billi tiffaċilita l-konformità u kif ukoll l-infurzar tas-sigurtà, tal-privatezza u tad-dispożizzjonijiet ambjentali.

X'inhuma l-ispejjeż għall-għażla ppreferuta (jekk hemm, inkella dawk ewlenin)?

L-ispejjeż tal-alternattiva ppreferuta għan-negozju għandhom jinżammu kemm jista' jkun baxxi . Bl-armonizzazzjoni tar-regoli u approvazzjoni teknika waħda jew rikonoxximent uniku ta’ liċenzja tal-operatur u tal-pilota, l-ispejjeż għal kull tip ta' operazzjoni transkonfinali ikunu aktar baxxi. L-għan ta’ din l-għażla huwa li l-ispejjeż tal-awtorizzazzjoni jinżammu baxxi u proporzjonati għar-riskju, iżda l-impatt ġenerali fuq l-ispejjeż se jiddependi fuq ir-regoli tal-implimentazzjoni u r-rekwiżiti kurrenti fl-Istati Membri. F'dak li għandu x'jaqsam mal-ispejjeż tar-regolamentazzjoni għall-awtoritajiet nazzjonali u dawk Ewropej, huwa mistenni li dawn jistgħu jitħallsu bir-riżorsi eżistenti. L-ispejjeż tas-sorveljanza tas-suq u l-awtorizzazzjonijiet tad-droni se jitqassmu fis-sistema tal-EASA b’kunsiderazzjoni għall-użu l-aktar ottimu tar-riżorsi u se jingħataw ukoll xi responsabbiltajiet lill-pulizija u lis-sorveljanza tas-suq. Fi kwalunkwe każ, l-ispejjeż skont din l-għażla dejjem se jkunu inqas milli kieku l-UE ma ħadet ebda inizjattiva.

X’inhuma l-impatti fuq l-SMEs u l-kompetittività?

Impatti pożittivi fuq in-negozji ż-żgħar se jirriżultaw minn sistema regolatorja aktar proporzjonata u bbażata fuq ir-riskji, minn aktar flessibilità fil-mezzi biex jiġu ssodisfati r-rekwiżiti, minn dipendenza akbar fuq l-istandards tal-industrija, minn proċeduri semplifikati ta’ ċertifikazzjoni għad-droni u konsegwentement minn spiża tal-konformità mnaqqsa. L-objettiv li r-rekwiżiti jsiru proporzjonati għar-riskju huwa proprju biex l-ispejjeż tal-konformità jinżammu baxxi u biex jiġi evitat piż amministrattiv mhux meħtieġ, b’mod partikolari għall-SMEs li mhumiex familjari mas-sistema tas-sikurezza tal-avjazzjoni tradizzjonali. Għalhekk qed jiġi propost li jintuża l-mekkaniżmu CE tal-immarkar li huwa magħruf sew. Il-fatt li mhux se jkun hemm bżonn ta' awtorizzazzjoni uffiċjali għall-kategorija uffiċjali tad-droni se jnaqqas l-ispejjeż ta’ konformità għal ħafna kumpaniji u operaturi żgħar attivi f’dan is-segment tas-suq u b'hekk huma se jsaħħu l-kompetittività tagħhom. Jista' jinqala' impatt negattiv wieħed mill-ħtieġa li s-sistemi nazzjonali (jekk dawn jeżistu) jiġu adattati għas-sistemi l-ġodda Ewropej dwar is-sikurezza speċjalment f'dak li għandu x'jaqsam ma' droni użati fil-kategoriji ta’ riskju speċifiku.

Se jkun hemm impatti sinifikanti fuq il-baġits u l-amministrazzjonijiet nazzjonali?

Meta niġu għall-ispejjeż ta' implimentazzjoni, dawk l-Istati Membri li għadhom ma introduċewx regoli speċifiċi għad-droni taħt il-150kg se jkollhom jintroduċuhom. Se jinqalgħu aktar spejjeż ukoll mill-ħtieġa ta' taħriġ addizzjonali. Il-korpi ta’ sorveljanza tas-suq (il-korpi nnotifikati) se jkollhom jiżviluppaw kompetenza fid-droni u t-teknoloġiji tad-droni, għalkemm sa ċertu punt dan jista’ jkun il-każ ukoll fix-xenarju bażi. L-awtoritajiet nazzjonali tal-avjazzjoni ukoll se jkollhom bżonn iġarrbu l-ispejjeż tal-adattament għar-regoli l-ġodda u tas-sorveljanza ta’ għadd dejjem jikber ta’ droni u ta' operazzjonijiet bid-droni.

Se jkun hemm impatti sinifikanti oħra?

L-inizjattiva għandha żżid is-sikurezza tal-ispazju tal-ajru Ewropew b'mod sostanzjali u tista’ tikkontribwixxi għal perċezzjoni aħjar tad-droni, billi tegħleb it-tħassib ewlieni li huwa relatat magħhom. Aċċettazzjoni pubblika aħjar tal-operazzjonijiet mid-droni hija prerekwiżit għall-espansjoni tas-suq tagħhom.

Proporzjonalità?

L-għażla preferuta għandha tibbilanċja b’mod xieraq il-ħtieġa li jkollna regoli komuni tas-sikurezza fl-Ewropa u li n-negozji ma jispiċċawx b'piżijiet bla bżonn. Din l-għażla se taqsam ukoll b'mod adegwat ir-responsabbiltajiet bejn l-atturi differenti tas-sistema tal-EASA u se tħalli kemm jista' jkun responsabbiltajiet fil-livell nazzjonali jew lokali.

D. Segwitu

Meta se tiġi riveduta l-politika?

L-implimentazzjoni tar-Regolament (KE) Nru 216/2008 hija soġġetta għal evalwazzjoni obbligatorja ta’ kull 5 snin meħtieġa mir-Regolament innifsu. Din l-evalwazzjoni hija magħrufa b’mod komuni bħala l-evalwazzjoni tal-Artikolu 62. Parti speċifika ta’ dan l-eżerċizzju se tkun iddedikata għar-regolamentazzjoni tas-suq tad-droni.