IL-KUMMISSJONI EWROPEA
Brussell, 24.11.2015
COM(2015) 579 final
2015/0264(NLE)
Proposta għal
REGOLAMENT TAL-KUNSILL
li jistabbilixxi l-opportunitajiet tas-sajd għall-2016 għal ċerti stokkijiet tal-ħut fil-Baħar l-Iswed
MEMORANDUM TA’ SPJEGAZZJONI
1.KUNTEST TAL-PROPOSTA
Raġunijiet u għanijiet tal-proposta
Ir-Regolament (UE) Nru 1380/2013 tal-Parlament Ewropew u tal-Kunsill dwar il-Politika Komuni tas-Sajd, li jemenda r-Regolamenti tal-Kunsill (KE) Nru 1954/2003 u (KE) Nru 1224/2009 u li jħassar ir-Regolamenti tal-Kunsill (KE) Nru 2371/2002 u (KE) Nru 639/2004 u d-Deċiżjoni tal-Kunsill 2004/585/KE ifittex jiżgura li r-riżorsi akkwatiċi ħajjin huma sfruttati f’kundizzjonijiet ekonomiċi, ambjentali u soċjali sostenibbli. Għodda importanti f’dan ir-rigward hija l-istabbiliment kull sena tal-opportunitajiet tas-sajd fl-għamla ta’ qabdiet totali permissibbli (Total Allowable Catches/TACs), ta’ kwoti u ta’ limiti tal-isforzi tas-sajd.
L-għan ta’ din il-proposta huwa l-istabbiliment tal-opportunitajiet tas-sajd għall-Istati Membri għall-2016 fir-rigward tal-iktar stokkijiet kummerċjalment importanti fil-Baħar l-Iswed.
Kuntest Ġenerali
L-istokkijiet tal-Baħar l-Iswed sfruttati mill-Bulgarija u mir-Rumanija huma kondiviżi ma’ pajjiżi li mhumiex parti mill-UE, pereżempju, it-Turkija, l-Ukrajna, il-Georgia u l-Federazzjoni Russa. Madankollu ma hemm l-ebda deċiżjoni dwar il-qabdiet totali permissibbli (TACs) fil-livell reġjonali bejn il-pajjiżi tal-UE u dawk li mhumiex tal-UE. Kull sena sa mill-2008, l-Unjoni Ewropea (UE) ilha tistabbilixxi t-TACs awtonomi għall-barbun imperjali u għal-laċċa kaħla sabiex dan jgħin fl-iżgurar li jkunu applikati r-regoli tal-politika komuni tas-sajd (PKS).
Fil-livell internazzjonali, u peress li s-sehem tal-pajjiżi tal-UE fil-Baħar l-Iswed jirrappreżenta biss 6 % tal-qbid għall-barbun imperjali, il-bżonn li jkun stabbilit programm ta’ rkupru internazzjonali għall-barbun imperjali fil-Baħar l-Iswed kollu kien jikkostitwixxi prijorità tal-Kummissjoni f’dawn l-aħħar snin. Sar progress f’dan ir-rigward fl-aħħar sessjoni annwali tal-Kummissjoni Ġenerali għas-Sajd fil-Mediterran (il-GFCM) li fiha ġiet approvata proposta tal-UE għal miżuri li jevitaw, jiskoraġġixxu u jeliminaw is-sajd IUU għas-sajd tal-barbun imperjali fil-Baħar l-Iswed.
Skont valutazzjoni xjentifika maħruġa mill-Kumitat Xjentifiku, Tekniku u Ekonomiku għas-Sajd (l-STECF) u l-Kummissjoni Ġenerali għas-Sajd fil-Mediterran (il-GFCM), l-istokk fl-2014 tal-mazzola griża fil-Baħar l-Iswed ġie kklassifikat li qed jiġi sfruttat b’mod li mhuwiex sostenibbli u li huwa f’riskju ta’ kollass. Il-mazzola griża hija speċi b’ħajja twila, li timmatura tard, u għandha fekondità baxxa, li jfisser li l-istokk ikun limitat ħafna fil-kapaċità tiegħu biex jirkupra malajr wara li jiġi eżawrit. Il-ħatt l-art tal-mazzola griża tal-Baħar l-Iswed kollu naqas b’mod stabbli u drammatiku mill-bidu tas-serje tal-ħatt l-art irrappurtat, minn aktar minn 6,000 tunnellata fl-1989 għal 80 tunnellata fl-2013. L-ewwel pass biex tirkupra l-popolazzjoni tal-mazzola griża kien l-adozzjoni tar-Rakkomandazzjoni tal-Kummissjoni Ġenerali għas-Sajd fil-Mediterran dwar miżuri ta’ ġestjoni għall-mazzola griża fil-Baħar l-Iswed. Fid-dawl tas-sitwazzjoni inkwetanti ta’ dan l-istokk, li jista’ jkun f’xifer ta’ kollass, huma proposti opportunitajiet tas-sajd fil-forma ta’ limitu ta’ qbid.
Il-Komunikazzjoni tal-Kummissjoni fuq il-konsultazzjoni dwar l-opportunitajiet tas-sajd fl-2016 (COM(2015) 239 final), tiddeskrivi l-kuntest tal-proposta.
L-opportunitajiet tas-sajd f’din il-proposta huma mmarkati bħala “pm” (pro memoria). Dan huwa minħabba l-fatt li l-parir dwar l-istokkijiet tal-Baħar l-Iswed mhux se jkun disponibbli sa meta l-proposta hi skedata għall-adozzjoni. Il-parir xjentifiku dwar l-opportunitajiet tas-sajd fl-2016 fil-Baħar l-Iswed se jingħata mill-Kumitat Xjentifiku, Tekniku u Ekonomiku għas-Sajd matul is-sessjoni plenarja li se ssir mit-28 ta’ Settembru sat-2 ta’ Ottubru 2015. Il-proposta trid tiġi aġġornata hekk kif il-parir isir disponibbli.
Dispożizzjonijiet eżistenti fil-qasam tal-proposta
L-opportunitajiet tas-sajd u l-mod li bih huma allokati lill-Istati Membri huma rregolati kull sena. L-aħħar att legali ta’ dan it-tip huwa r-Regolament tal-Kunsill (UE) Nru 2015/106 tad-19 ta’ Jannar 2015 li jistabbilixxi l-opportunitajiet tas-sajd għall-2015 għal ċerti stokkijiet ta’ ħut applikabbli fil-Baħar l-Iswed.
Minbarra l-opportunitajiet tas-sajd annwali, għandhom jissemmew il-miżuri rilevanti li ġejjin għas-sajd tal-Baħar l-Iswed koperti fil-proposta:
–Id-daqsijiet minimi ta’ konservazzjoni u d-daqsijiet minimi tax-xbieki fir-rigward tas-sajd tal-barbun imperjali fil-Baħar l-Iswed huma stabbiliti bir-Regolament (UE) Nru 227/2013 tal-Parlament Ewropew u tal-Kunsill tat-13 ta’ Marzu 2013 li jemenda r-Regolament tal-Kunsill (KE) Nru 850/98 dwar il-konservazzjoni ta’ riżorsi tas-sajd permezz ta’ miżuri tekniċi għall-protezzjoni ta’ żgħar ta’ organiżmi tal-baħar u r-Regolament tal- Kunsill (KE) Nru 1434/98 li jispeċifika l-kondizzjonijiet li taħthom jistgħu jinħattu l-aringi għal skopijiet industrijali li mhux għall-konsum dirett tal-bniedem.
–Ir-Rakkomandazzjoni GFCM/37/2013/2 li tistabbilixxi sett ta’ standards minimi għal għeżula tal-qiegħ tas-sajd għall-barbun imperjali u għall-konservazzjoni taċ-ċetaċji fil-Baħar l-Iswed adottata mill-Kummissjoni Ġenerali tas-Sajd għall-Mediterran (GFCM) fis-37 sessjoni tagħha (Split, Mejju 2013).
–Ir-Rakkomandazzjoni GFCM/39/2015/3 li tistabbilixxi sett ta’ miżuri li jevitaw, jiskoraġġixxu u jeliminaw is-sajd illegali, mhux irrappurtat u mhux irregolat għas-sajd tal-barbun imperjali fil-Baħar l-Iswed adottata mill-Kummissjoni Ġenerali għas-Sajd fil-Mediterran (GFCM) fid-39 sessjoni tagħha (Milan, Mejju 2015).
–Ir-Rakkomandazzjoni GFCM/39/2015/4 li tistabbilixxi sett ta’ miżuri li jevitaw, jiskoraġġixxu u jeliminaw is-sajd illegali, mhux irrappurtat u mhux irregolat għas-sajd tal-barbun imperjali fil-Baħar l-Iswed adottata mill-Kummissjoni Ġenerali għas-Sajd fil-Mediterran (GFCM) fid-39 sessjoni tagħha (Milan, Mejju 2015).
Konsistenza ma’ politiki u ma’ għanijiet oħra tal-UE
Il-miżuri proposti huma konformi mal-għanijiet u r-regoli tal-Politika Komuni tas-Sajd u huma konsistenti mal-politika tal-Unjoni dwar l-iżvilupp sostenibbli.
2.RIŻULTATI TAL-KONSULTAZZJONIJIET MAL-PARTIJIET INTERESSATI U VALUTAZZJONIJIET TAL-IMPATT
Ġbir u użu tal-għarfien espert
L-organizzazzjonijiet/esperti ewlenin ikkonsultati
L-organizzazzjoni xjentifika kkonsultata hija l-Kumitat Xjentifiku, Tekniku u Ekonomiku għas-Sajd (l-STECF).
Kull sena, l-Unjoni titlob lill-STECF għal parir xjentifiku dwar il-qagħda ta’ stokkijiet importanti tal-ħut. L-STECF jagħti l-parir tiegħu billi jsegwi termini ta’ referenza li jirċievi mingħand il-Kummissjoni. Il-parir li se jingħata f’Ottubru 2015 ikopri l-istokkijiet kollha tal-Baħar l-Iswed li għalihom huma proposti t-TACs.
L-għan aħħari tal-Unjoni huwa li ġġib u żżomm l-istokkijiet f’livelli li jistgħu jwasslu r-Rendiment Massimu Sostenibbli (Maximum Sustainable Yield/MSY). Dan l-għan ġie inkorporat b’mod espliċitu fir-Regolament (UE) Nru 1380/2013 (magħruf bħala r-Regolament bażiku il-ġdid tal-PKS). L-Artikolu 2(2) ta’ dak ir-Regolament jistipula li dan l-oġġettiv “fejn hu possibbli”, għandu jintlaħaq sal-2015, u [...] “sa mhux iktar tard mill-2020 għall-istokkijiet kollha”. Dan jirrifletti l-impenn li ttieħed mill-Unjoni fir-rigward tal-konklużjonijiet tas-Samit Dinji tal-2002 dwar l-Iżvilupp Sostenibbli li sar f’Johannesburg u l-Pjan ta’ Implimentazzjoni marbut miegħu.
Konsultazzjoni mal-partijiet interessati
Il-partijiet interessati ġew ikkonsultati permezz tal-Komunikazzjoni tal-Kummissjoni fuq il-Konsultazzjoni dwar l-opportunitajiet tas-sajd għall-2016. Il-bażi xjentifika għall-proposta se tingħata mill-STECF. Ir-rapporti kollha tal-STECF huma disponibbli fuq is-sit web tad-DĠ MARE.
Valutazzjoni tal-impatt
Abbażi tal-parir xjentifiku, il-miżuri proposti se jirriżultaw f’bidla fl-opportunitajiet tas-sajd fir-rigward tal-volumi tal-qbid għall-bastimenti tal-UE fil-Baħar l-Iswed.
Il-proposta ma tirriflettix biss tħassib għal żmien qasir iżda hija wkoll parti minn approċċ aktar fit-tul li matulu l-livell tas-sajd jiġi adattat gradwalment għal livelli ta’ sostenibbiltà fit-tul.
Għaldaqstant, l-approċċ meħud fil-proposta jista’ jwassal għal tnaqqis fl-isforz tas-sajd fi żmien medju sa aktar fit-tul, u li fit-tul jista’ jwassal għal kwoti stabbli jew dejjem jiżdiedu. Il-konsegwenzi tal-approċċ fit-tul huma mistennija jkollhom impatt imnaqqas fuq l-ambjent minħabba l-adattament fl-isforz tas-sajd u minħabba l-istess ammont jew ammont akbar ta’ ħatt l-art . Is-sostenibbiltà tal-attivitajiet tas-sajd se tiżdied fuq żmien twil.
3.ELEMENTI LEGALI TAL-PROPOSTA
Sommarju tal-azzjoni proposta
Il-proposta tistabbilixxi l-limiti tal-qbid applikabbli għas-sajd tal-Unjoni fil-Baħar l-Iswed sabiex jintlaħaq l-għan tal-Politika Komuni tas-Sajd li jiġi żgurat sajd f’livelli li huma bijoloġikament, ekonomikament u soċjalment sostenibbli.
Bażi legali
Il-bażi legali għal din il-proposta huwa l-Artikolu 43(3) tat-Trattat dwar il-Funzjonament tal-Unjoni Ewropea (TFUE).
L-obbligi tal-Unjoni għall-isfruttar sostenibbli tar-riżorsi akkwatiċi ħajjin jirriżultaw mill-obbligi stipulati fl-Artikolu 2 tar-Regolament (UE) Nru 1380/2013.
Prinċipju ta’ sussidjarjetà
Il-proposta hija fil-kompetenza esklussiva tal-Unjoni kif imsemmi fl-Artikolu 3(1)(d) tat-TFUE. Għalhekk, il-prinċipju tas-sussidjarjetà ma japplikax.
Prinċipju ta’ proporzjonalità
Il-proposta hija konformi mal-prinċipju tal-proporzjonalità għar-raġuni li ġejja:
Il-Politika Komuni tas-Sajd hija politika komuni. Skont l-Artikolu 43(3) tat-TFUE hija r-responsabbiltà tal-Kunsill li jadotta l-miżuri dwar l-istabbiliment u l-allokazzjoni tal-opportunitajiet tas-sajd.
Ir-Regolament tal-Kunsill propost jalloka l-opportunitajiet tas-sajd lill-Istati Membri. B’kont meħud tal-Artikolu 16(6) u (7) u tal-Artikolu 17 tar-Regolament (UE) Nru 1380/2013, kull Stati Membru huwa liberu li jalloka dawn l-opportunitajiet lil bastimenti li jtajru l-bandiera tiegħu skont kif jidhirlu xieraq. Għalhekk, l-Istati Membri għandhom spazju kemm iridu biex jimmanuvraw dwar deċiżjonijiet relatati mal-mudell soċjali/ekonomiku tal-għażla tagħhom biex jisfruttaw l-opportunitajiet tas-sajd allokati lilhom.
Il-proposta ma għandha l-ebda implikazzjoni finanzjarja ġdida għall-Istati Membri. Dan ir-Regolament jiġi adottat mill-Kunsill kull sena, u l-mezzi pubbliċi u privati biex jiġi implimentat diġà jeżistu.
Għażla tal-istrumenti
L-istrumenti proposti: Regolament.
Din hija proposta għall-ġestjoni tas-sajd abbażi tal-Artikolu 43(3) tat-TFUE u skont l-Artikolu 16 tar-Regolament tal-Kunsill (KE) Nru 1380/2013.
4.IMPLIKAZZJONIJIET BAĠITARJI
Il-proposta ma għandhiex implikazzjonijiet għall-baġit tal-Unjoni.
5.ELEMENTI FAKULTATTIVI
Simplifikazzjoni
Il-proposta tipprovdi aktar għas-simplifikazzjoni tal-proċeduri amministrattivi għall-awtoritajiet pubbliċi (tal-UE jew nazzjonali), minħabba li fiha dispożizzjonijiet simili għal dawk tar-Regolament tal-Kunsill (UE) Nru 2015/106.
Klawsola ta’ analiżi/reviżjoni/terminazzjoni awtomatika
Il-proposta tikkonċerna Regolament annwali għall-2016 u għalhekk ma tinkludix klawsola ta’ reviżjoni.
Spjega Dettaljata
Il-proposta tistabbilixxi l-opportunitajiet tas-sajd għall-2016 għal ċerti stokkijiet jew gruppi ta’ stokkijiet għas-sajd tal-Istati Membri fil-Baħar l-Iswed.
L-obbligu ta’ ħatt l-art għall-istokkijiet maqbuda f’ċerti attivitajiet tas-sajd se jkun applikabbli mill-1 ta’ Jannar 2015. Fil-Baħar l-Iswed dan is-sajd ikopri s-sajd pelaġiku żgħir, jiġifieri s-sajd għal-laċċa kaħla, li huwa wieħed mill-istokkijiet li huma kkontrollati mit-TACs u l-kwoti f’dan ir-Regolament.
Bl-introduzzjoni tal-obbligu ta’ ħatt l-art, skont l-Artikolu 16(2) tar-Regolament (UE) Nru 1380/2013, l-opportunitajiet tas-sajd proposti jirriflettu l-bidla mill-ammont li nħatt l-art għall-ammont maqbud. Dan isir abbażi tal-parir xjentifiku mogħti għall-istokkijiet tal-ħut fis-sajd, kif imsemmi fl-Artikolu 15(1) tar-Regolament (UE) Nru 1380/2013. L-opportunitajiet tas-sajd għandhom jiġu stabbiliti wkoll skont l-Artikoli 16(1) (li jirreferi għall-prinċipju tal-istabbiltà relattiva) u 16(4) (li jirreferi għall-objettivi tal-Politika Komuni tas-Sajd u għar-regoli previsti għall-pjanijiet pluriennali) ta’ dak ir-Regolament. Iċ-ċifri proposti jirriflettu l-parir xjentifiku u l-qafas għall-istabbiliment tat-TACs u l-kwoti li jinsabu fil-Komunikazzjoni tal-Kummissjoni fuq il-Konsultazzjoni dwar l-opportunitajiet tas-sajd għall-2016.
Billi l-intenzjoni tal-Kummissjoni hija li tiżgura l-użu sostenibbli tar-riżorsi tas-sajd f’konformità mal-politika u mal-impenji internazzjonali tal-Unjoni filwaqt li l-opportunitajiet tas-sajd jinżammu stabbli, safejn huwa prattiku l-varjazzjonijiet annwali fit-TACs huma limitati sabiex jitqies l-istatus ta’ stokk partikolari.
It-TACs u l-kwoti allokati lill-Istati Membri jinsabu fl-Anness I tar-Regolament propost.
Skont l-Artikolu 2 tar-Regolament tal-Kunsill(KE) Nru 847/96, huwa propost li l-Artikoli 3 u 4 ma japplikawx għall-istokkijiet koperti minn dan ir-Regolament. Madankollu, skont l-Artikolu 15(9) tar-Regolament (UE) Nru 1380/2013 il-flessibbiltà ta’ sena b’sena stipulata fl-istess Artikolu tapplika għall-istokkijiet koperti bl-obbligu ta’ ħatt l-art.
2015/0264 (NLE)
Proposta għal
REGOLAMENT TAL-KUNSILL
li jistabbilixxi l-opportunitajiet tas-sajd għall-2016 għal ċerti stokkijiet tal-ħut fil-Baħar l-Iswed
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(3) tiegħu,
Wara li kkunsidra l-proposta tal-Kummissjoni Ewropea,
Billi:
(1)L-Artikolu 43(3) tat-Trattat jistipula li l-Kunsill, fuq proposta mill-Kummissjoni, għandu jadotta miżuri dwar l-iffissar u l-allokazzjoni ta’ opportunitajiet tas-sajd.
(2)Ir-Regolament(UE) Nru 1380/2013 tal-Parlament Ewropew u tal-Kunsill jeżiġi li jiġu adottati miżuri ta’ konservazzjoni filwaqt li jittieħed kont tal-pariri xjentifiċi, tekniċi u ekonomiċi disponibbli, inklużi, fejn ikunu rilevanti, rapporti mfassla mill-Kumitat Xjentifiku, Tekniku u Ekonomiku għas-Sajd (l-STECF).
(3)Il-Kunsill għandu d-dmir li jadotta miżuri dwar l-iffissar u l-allokazzjoni tal-opportunitajiet tas-sajd skont is-sajd jew il-grupp tas-sajd fil-Baħar l-Iswed, inklużi ċerti kundizzjonijiet li huma funzjonalment marbuta magħhom, kif xieraq. Skont l-Artikolu 16(1) u (4) tar-Regolament (UE) Nru 1380/2013, l-opportunitajiet tas-sajd għandhom jiġu mqassma fost l-Istati Membri b’tali mod li tiġi żgurata l-istabbiltà relattiva tal-attivitajiet tas-sajd ta’ kull Stat Membru għal kull stokk ta’ ħut jew żona tas-sajd u skont l-objettivi tal-Politika Komuni tas-Sajd stabbiliti fl-Artikolu 2(2) tal-istess Regolament.
(4)Il-qabdiet totali permissibbli (TACs) għandhom jiġu stabbiliti abbażi tal-parir xjentifiku disponibbli, b’kunsiderazzjoni ta’ aspetti bijoloġiċi u soċjoekonomiċi filwaqt li jiżguraw trattament ġust bejn is-setturi tas-sajd, kif ukoll fid-dawl tal-opinjonijiet espressi matul il-konsultazzjoni mal-partijiet ikkonċernati.
(5)Għas-sajd tal-laċċa kaħla, l-obbligu ta’ ħatt l-art imsemmi fl-Artikolu 15(1) tar-Regolament (UE) Nru 1380/2013 japplika mill-1 ta’ Jannar 2015. L-Artikolu 16(2) ta’ dak ir-Regolament jistipula li, meta jiddaħħal l-obbligu ta’ ħatt l-art rigward stokk tas-sajd, l-opportunitajiet tas-sajd iridu jiġu stabbiliti billi tiġi kkunsidrata l-bidla minn opportunitajiet tas-sajd li jirriflettu l-ħatt l-art għall-istabbiliment tal-opportunitajiet tas-sajd li jirriflettu l-qabdiet.
(6)Fil-laqgħa annwali tagħha fl-2015, il-Kummissjoni Ġenerali għas-Sajd fil-Mediterran adottat ir-Rakkomandazzjoni GFCM/39/2015/4 li tistabbilixxi miżuri ta’ ġestjoni għall-mazzola griża fil-Baħar l-Iswed. Fid-dawl tas-sitwazzjoni inkwetanti ta’ dan l-istokk, li jista’ jkun f’xifer ta’ kollass, u qabel ma l-miżuri ta’ ġestjoni tal-Kummissjoni Ġenerali għas-Sajd fil-Mediterran isiru kompletament effettivi, jeħtieġ li jinkludi opportunitajiet tas-sajd għall-mazzola griża f’dan ir-Regolament.
(7)L-użu tal-opportunitajiet tas-sajd kif stabbiliti f’dan ir-Regolament għandu jkun soġġett għar-Regolament tal-Kunsill (KE) Nru 1224/2009 u b’mod partikolari għall-Artikoli 33 u 34 ta’ dak ir-Regolament, fir-rigward tar-reġistrazzjoni tal-qabdiet u tan-notifika tad-dejta dwar l-eżawriment tal-opportunitajiet tas-sajd. Għalhekk, jeħtieġ li jkunu speċifikati l-kodiċijiet li l-Istati Membri għandhom jużaw meta jibagħtu dejta lill-Kummissjoni dwar il-ħatt l-art tal-istokkijiet soġġetti għal dan ir-Regolament.
(8)F’konformità mal-Artikolu 2 tar-Regolament tal-Kunsill (KE) Nru 847/96, meta jiġu stabbiliti t-TACs, il-Kunsill għandu jiddeċiedi għal liema stokkijiet ma japplikawx l-Artikoli 3 u 4, b’mod partikolari abbażi tal-istatus bijoloġiku tal-istokkijiet.
(9)Sabiex tkun evitata l-interruzzjoni tal-attivitajiet tas-sajd u sabiex jiġi żgurat l-għajxien tas-sajjieda tal-Unjoni, huwa importanti li fl-1 ta’ Jannar 2016 jinfetħu t-tipi tas-sajd inkwistjoni fil-Baħar l-Iswed. Għal raġunijiet ta’ urġenza, dan ir-Regolament għandu jidħol fis-seħħ immedjatament wara l-pubblikazzjoni tiegħu.
ADOTTA DAN IR-REGOLAMENT:
KAPITOLU I
Suġġett, kamp ta’ applikazzjoni u definizzjonijiet
Artikolu 1
Suġġett
Dan ir-Regolament jistabbilixxi l-opportunitajiet tas-sajd għall-2016 għall-istokkijiet tal-ħut tal-ispeċijiet li ġejjin fil-Baħar l-Iswed.
(a)Barbun Imperjali (Psetta maxima)
(b)Laċċa kaħla (Sprattus sprattus)
(c)Mazzola tax-xewka (Squalus acanthias).
Artikolu 2
Kamp ta’ applikazzjoni
Dan ir-Regolament japplika għall-bastimenti tas-sajd tal-Unjoni li joperaw fil-Baħar l-Iswed.
Artikolu 3
Definizzjonijiet
Għall-finijiet ta’ dan ir-Regolament, japplikaw id-definizzjonijiet li ġejjin:
(a)“GFCM” tfisser il-Kummissjoni Ġenerali għas-Sajd fil-Mediterran;
(b)“Il-Baħar l-Iswed” tfisser is-subżona ġeografika 29 kif definita fl-Anness I tar-Regolament (UE) Nru 1343/2011 tal-Parlament Ewropew u tal-Kunsill;
(c)“bastiment tas-sajd” tfisser kull bastiment mgħammar għall-użu kummerċjali tar-riżorsi bijoloġiċi tal-baħar;
(d)“bastiment tas-sajd tal-Unjoni” tfisser bastiment li jtajjar il-bandiera ta’ Stat Membru u li jkun irreġistrat fl-Unjoni;
(e)
“stokk” tfisser riżorsa bijoloġika tal-baħar li tkun tinsab f’żona ta’ ġestjoni partikolari;
(f) “qabda totali permissibbli” (TAC) tfisser:
(i) fis-sajd soġġett għall-obbligu ta’ ħatt l-art imsemmi fl-Artikolu 15 tar-Regolament (UE) Nru 1380/2013, il-kwantità li tista’ tinqabad minn kull stokk kull sena;
(ii) fis-sajd l-oħra kollha, il-kwantità li tista’ tinħatt minn kull stokk kull sena;
(g)“kwota” tfisser proporzjon tat-TAC allokat lill-Unjoni, lil Stat Membru jew lil pajjiż terz.
KAPITOLU II
Opportunitajiet tas-sajd
Artikolu 4
TACs u allokazzjoni
It-TACs għall-bastimenti tal-UE, l-allokazzjoni ta’ tali TACs fost l-Istati Membri, u l-kundizzjonijiet funzjonalment marbuta magħhom, fejn xieraq, huma stabbiliti fl-Anness.
Artikolu 5
Dispożizzjonijiet speċjali dwar l-allokazzjonijiet
L-allokazzjoni ta’ opportunitajiet tas-sajd fost l-Istati Membri kif stabbiliti f’dan ir-Regolament għandha tkun mingħajr preġudizzju għal:
(a)skambji magħmula skont l-Artikolu 16(8) tar-Regolament (UE) Nru 1380/2013;
(b)tnaqqis u riallokazzjonijiet magħmula skont l-Artikolu 37 tar-Regolament (KE) Nru 1224/2009;
(c)ħatt l-art addizzjonali permess bl-Artikolu 15(9) tar-Regolament (KE) Nru 1380/2013;
(d)kwantitajiet trasferiti f’konformità mal-Artikolu 15(9) tar-Regolament (UE) Nru 1380/2013;
(e)tnaqqis magħmul skont l-Artikoli 105 u 107 tar-Regolament (KE) Nru 1224/2009.
Artikolu 6
Kundizzjonijiet għall-ħatt l-art tal-qabdiet u tal-qabdiet inċidentali mhux suġġetti għall-obbligu ta’ ħatt l-art
Il-qabdiet u l-qabdiet inċidentali tal-barbun tat-tbajja’ għandhom jinżammu abbord jew jinħattu l-art biss jekk il-qabdiet isiru minn bastimenti tas-sajd tal-Unjoni li jtajru l-bandiera ta’ Stat Membru li għandu kwota, liema kwota ma tkunx eżawrita.
KAPITOLU III
Dispożizzjonijiet finali
Artikolu 7
Trażmissjoni tad-dejta
Fejn, skont l-Artikoli 33 u 34 tar-Regolament (KE) Nru 1224/2009, l-Istati Membri jibagħtu dejta lill-Kummissjoni relatata mal-ħatt l-art ta’ kwantitajiet ta’ stokkijiet maqbuda, huma għandhom jużaw il-kodiċijiet tal-istokkijiet stabbiliti fl-Anness ta’ dan ir-Regolament.
Artikolu 8
Dħul fis-seħħ
Dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Japplika mill-1 ta’ Jannar 2016.
Dan ir-Regolament jorbot fl-intier tiegħu u japplika direttament fl-Istati Membri kollha.
Magħmul fi Brussell,
Għall-Kunsill
Il-President