IL-KUMMISSJONI EWROPEA
Brussell, 27.10.2015
COM(2015) 535 final
ANNESS
tad-
Deċiżjoni tal-Kunsill
dwar l-approvazzjoni, f'isem l-Unjoni Ewropea, tar-Reviżjoni 3 tal-Ftehim tal-Kummissjoni Ekonomika għall-Ewropa tan-Nazzjonijiet Uniti dwar l-adozzjoni ta' preskrizzjonijiet tekniċi uniformi għall-vetturi bir-roti, it-tagħmir u l-partijiet li jistgħu jintramaw u/jew jintużaw fuq vetturi bir-roti u l-kundizzjonijiet għar-rikonoxximent reċiproku tal-approvazzjonijiet mogħtija abbażi ta' dawn il-preskrizzjonijiet ('Ftehim Rivedut tal-1958')
ANNESS
Ftehim dwar l-Adozzjoni ta' Regolamenti Tekniċi Armonizzati tan-Nazzjonijiet Uniti għall-Vetturi bir-Roti, it-Tagħmir u l-Partijiet li jistgħu Jintramaw u/jew Jintużaw fuq Vetturi bir-Roti u l-Kundizzjonijiet għar-Rikonoxximent Reċiproku tal-Approvazzjonijiet Mogħtija Abbażi ta' dawn ir-Regolamenti tan-Nazzjonijiet Uniti
Reviżjoni 3
Preambolu
IL-PARTIJIET KONTRAENTI,
WARA LI DDEĊIDEW li jemendaw il-Ftehim Dwar l-Adozzjoni ta' Kundizzjonijiet Uniformi ta' Approvazzjoni u Rikonoxximent Reċiproku għal Tagħmir u Partijiet ta' Vetturi bil-Mutur, magħmul f'Ġinevra fl-20 ta' Marzu 1958, kif emendat fis-16 ta' Ottubru 1995, u
XEWQANA li jnaqqsu l-ostakli tekniċi għall-kummerċ internazzjonali billi jiddefinixxu Regolamenti tekniċi armonizzati tan-NU hekk li jkun biżżejjed għal ċerti vetturi bir-roti, tagħmir u partijiet li jissodisfawhom sabiex jiġu użati fil-pajjiżi jew reġjuni tagħhom,
FILWAQT LI JIRRIKONOXXU l-importanza tas-sikurezza, tal-ħarsien tal-ambjent, tal-effiċjenza enerġetika u tal-prestazzjoni tas-sistemi ta' protezzjoni mis-serq ta’ vetturi bir-roti, tagħmir u partijiet li jistgħu jitwaħħlu u/jew jintużaw f’vetturi bir-roti, għall-iżvilupp ta’ regolamenti li jkunu teknikament u ekonomikament fattibbli u adattati għall-progress tekniku,
XEWQANA li japplikaw dawn ir-Regolamenti tan-NU kull meta jkun possibbli fil-pajjiżi u r-reġjuni tagħhom,
XEWQANA li jiffaċilitaw l-aċċettazzjoni fil-pajjiżi tagħhom ta' vetturi, tagħmir u partijiet, meta jkunu approvati skont dawn ir-Regolamenti tan-NU mill-awtoritajiet kompetenti ta' Parti Kontraenti oħra,
XEWQANA li jistabbilixxu skema tal-Approvazzjoni tat-Tip Internazzjonali ta' Vettura Sħiħa (IWVTA) fi ħdan il-qafas tal-Ftehim biex jiżdiedu l-vantaġġi tar-Regolamenti individwali tan-NU annessi mal-Ftehim u b’hekk jinħolqu opportunitajiet biex jissimplifikaw l-implimentazzjoni mill-Partijiet Kontraenti u l-adozzjoni usa’ ta’ rikonoxximent reċiproku ta’ approvazzjonijiet tat-tip għal vetturi sħaħ, u,
XEWQANA biex iżidu n-numru ta’ Partijiet Kontraenti għall-Ftehim, billi jittejbu l-funzjonament u l-affidabbiltà tiegħu, u b’hekk jiġi żgurat li dan il-Ftehim jibqa’ l-qafas internazzjonali ewlieni għall-armonizzazzjoni tar-regolamenti tekniċi fis-settur tal-karozzi,
FTIEHMU kif ġej:
Artikolu 1
1.Il-Partijiet Kontraenti għandhom jistabbilixxu, permezz ta' Kumitat Amministrattiv magħmul mill-Partijiet Kontraenti kollha skont ir-regoli ta' proċedura stabbilita fl-appendiċi ta' dan il-Ftehim u abbażi tal-Artikoli u l-paragrafi li ġejjin, ir-Regolamenti għal vetturi bir-roti, tagħmir u partijiet li jistgħu jitwaħħlu u/jew jiġu użati fuq vetturi bir-roti. Il-kundizzjonijiet sabiex jiġu mogħtija l-approvazzjonijiet tat-tip u r-rikonoxximent reċiproku tagħhom ser jiġu inklużi għall-użu mill-Partijiet Kontraenti li jagħżlu li jimplimentaw ir-Regolamenti permezz tal-approvazzjoni tat-tip.
Għall-finijiet ta' dan il-Ftehim:
Il-frażi "vetturi bir-roti, tagħmir u partijiet" għandha tinkludi kull vettura bir-roti, tagħmir u partijiet li l-karatteristiċi tagħhom huma relatati mas-sikurezza tal-vettura, il-ħarsien tal-ambjent, l-iffrankar enerġetiku u l-prestazzjoni tat-teknoloġija ta' protezzjoni mis-serq;
Il-frażi "approvazzjoni tat-tip skont Regolament tan-NU" tindika proċedura amministrattiva li permezz tagħha l-awtoritajiet tal-approvazzjoni ta' Parti Kontraenti jiddikjaraw, wara li jkunu għamlu l-verifiki neċessarji li t-tip ta' vettura, tagħmir jew parti sottomess mill-manifattur jikkonforma mar-rekwiżiti tar-Regolament tan-NU inkonsiderazzjoni. Wara dan il-manifattur jiċċertifika li kull vettura, tagħmir jew partijiet mqiegħdha fis-suq ġew manifatturati b'mod li jkunu identiċi għall-prodott approvat.
Il-frażi “approvazzjoni tat-tip ta' vettura sħiħa” tindika li l-approvazzjonijiet tat-tip mogħtija skont ir-Regolamenti tan-NU applikabbli għal vetturi bir-roti, tagħmir u partijiet ta’ vettura huma integrati f’approvazzjoni tal-vettura sħiħa skont id-dispożizzjonijiet amministrattivi tas-sistema IWVTA.
Il-frażi “verżjoni ta’ regolament tan-NU” tindika li Regolament tan-NU, wara li jkun ġie adottat u stabbilit, jista’ sussegwentement jiġi emendat skont il-proċeduri deskritti f’dan il-Ftehim, b’mod partikolari l-Artikolu 12. Ir-Regolament tan-NU mhux emendat kif ukoll ir-Regolament tan-NU, wara l-integrazzjoni ta’ kwalunkwe emenda/i sussegwenti, jitqiesu bħala verżjonijiet differenti ta’ dak ir-Regolament tan-NU.
Il-frażi “applikazzjoni ta’ Regolament tan-NU” tindika li r-Regolament tan-NU jidħol fis-seħħ għal Parti Kontraenti. Meta jagħmlu dan, il-Partijiet Kontraenti jkollhom il-possibbiltà li jżommu l-leġiżlazzjoni nazzjonali/reġjonali tagħhom stess. Jekk ikunu jixtiequ, jistgħu jissostitwixxu l-leġiżlazzjoni nazzjonali/reġjonali tagħhom bir-rekwiżiti tar-Regolamenti tan-NU li jkunu qed japplikaw, iżda skont il-Ftehim mhumiex marbuta li jagħmlu dan. Madankollu, il-Partijiet Kontraenti għandhom jaċċettaw, bħala alternattiva għall-parti rilevanti tal-leġiżlazzjoni nazzjonali/reġjonali tagħhom, approvazzjonijiet tat-tip tan-NU mogħtija skont l-aktar verżjoni reċenti tar-Regolamenti tan-NU applikati fil-pajjiż/reġjun tagħhom. Id-drittijiet u l-obbligi tal-Partijiet Kontraenti li japplikaw Regolament tan-NU huma deskritti fid-dettall f’diversi Artikoli ta’ dan il-Ftehim.
Għall-applikazzjoni tar-Regolamenti tan-NU jista' jkun hemm diversi proċeduri amministrattivi alternattivi għall-approvazzjoni tat-tip. L-unika proċedura alternattiva magħrufa b'mod ġenerali u applikata f'ċerti stati membri tal-Kummissjoni Ekonomika għall-Ewropa hija l-awtoċertifikazzjoni mill-manifattur, li permezz tagħha l-manifattur jiċċertifika, mingħajr ebda kontroll amministrattiv preliminari, li kull prodott imqiegħed fis-suq huwa konformi mar-Regolament tan-NU inkonsiderazzjoni; l-awtoritajiet amministrattivi kompetenti jistgħu jivverifikaw, permezz ta’ kampjunar aleatorju fis-suq, li l-prodotti awtoċertifikati huma konformi mar-rekwiżiti tar-Regolament tan-NU partikolari.
2.Il-Kumitat Amministrattiv għandu jkun kompost mill-Partijiet Kontraenti kollha skont ir-regoli ta' proċedura stabbiliti fl-appendiċi.
Regolament tan-NU, wara li jkun ġie stabbilit skont il-proċedura indikata fl-appendiċi, għandu jiġi kkomunikat mill-Kumitat Amministrattiv lis-Segretarju Ġenerali tan-Nazzjonijiet Uniti, minn hawn 'il quddiem imsejjaħ "Segretarju Ġenerali". Wara, kemm jista' jkun malajr, is-Segretarju Ġenerali għandu jinnotifika lill-Partijiet Kontraenti kollha b'dan ir-Regolament tan-NU.
Ir-Regolament tan-NU għandu jitqies li ġie adottat sakemm, f'perjodu ta' sitt xhur mid-data tan-notifika tiegħu mis-Segretarju Ġenerali, aktar minn wieħed minn kull ħamsa tal-Partijiet Kontraenti fid-data tan-notifika ma jkunux informaw lis-Segretarju-Ġenerali li ma jaqblux mar-Regolament tan-NU.
Ir-Regolament tan-NU jkopri dawn l-oqsma:
(a)Il-vetturi bir-roti, it-tagħmir jew l-partijiet ikkonċernati;
(b)Ir-rekwiżiti tekniċi, li kull fejn ikun xieraq għandhom ikunu ffokati fuq il-prestazzjoni, u ma jkollhomx restrizzjonijiet mid-disinn, għandhom iqisu b'mod oġġettiv it-teknoloġiji disponibbli, l-ispejjeż u l-benefiċċji kif xieraq, u li jistgħu jinkludu xi varjanti alternattivi;
(c)Il-metodi ta' prova li permezz tagħhom għandhom jintwerew ir-rekwiżiti ta' prestazzjoni;
(d)Il-kundizzjonijiet għall-għoti tal-approvazzjoni tat-tip u r-rikonoxximent reċiproku, inkluż dispożizzjonijiet amministrattivi, kwalunkwe marki tal-approvazzjoni u l-kundizzjonijiet sabiex tiġi żgurata l-konformità tal-produzzjoni;
(e)Id-data/i li fiha/fihom jidħol fis-seħħ ir-Regolament tan-NU, inkluż id-data meta l-Partijiet Kontraenti li japplikawh jistgħu joħorġu approvazzjonijiet skont dak ir-Regolament tan-NU, u d-data (jekk differenti) minn meta dawn għandhom jaċċettaw l-approvazzjonijiet;
(f)Dokument ta’ informazzjoni li għandu jiġi pprovdut mill-manifattur.
Ir-Regolament tan-NU jista', jekk ikun meħtieġ, jinkludi referenzi għal-laboratorji akkreditati mill-awtoritajiet tal-approvazzjoni li fihom għandhom jitwettqu t-testijiet tal-aċċettazzjoni tat-tipi tal-vetturi bir-roti, tagħmir jew partijiet sottomessi għall-approvazzjoni.
Minbarra r-regolamenti tan-NU msemmija hawn fuq, dan il-Ftehim jipprevedi l-istabbiliment ta’ Regolament tan-NU biex jintroduċi sistema ta’ Approvazzjoni tat-Tip ta’ Vettura Sħiħa. Dan ir-Regolament tan-NU għandu jistabbilixxi l-ambitu, il-proċeduri amministrattivi u r-rekwiżiti tekniċi li jistgħu jinkludu livelli differenti ta’ strettezza f’verżjoni waħda ta’ dan ir-Regolament tan-NU.
Minkejja dispożizzjonijiet oħra tal-Artikolu 1 u l-Artikolu 12, Parti Kontraenti li tapplika r-Regolament tan-NU dwar l-IWVTA għandha tkun obbligata biss taċċetta dawk l-approvazzjonijiet tat-tip mogħtija skont l-ogħla livell ta’ strettezza tal-aħħar verżjoni ta’ dan ir-Regolament tan-NU.
Dan il-Ftehim jinkludi wkoll Skedi ta’ Dispożizzjonijiet Amministrattivi u Proċedurali applikabbli għar-Regolamenti tan-NU kollha annessi ma' dan il-Ftehim u għall-Partijiet Kontraenti kollha li japplikaw Regolament tan-NU wieħed jew aktar.
3.Wara li jiġi adottat Regolament tan-NU, is-Segretarju Ġenerali għandu jinnotifika dan kemm jista' jkun malajr lill-Partijiet Kontraenti kollha, u jispeċifika liema huma l-Partijiet Kontraenti li oġġezzjonaw, jew li nnotifikaw li minkejja l-qbil tagħhom mhux se jibdew japplikaw ir-Regolament tan-NU fid-data tad-dħul fis-seħħ, u li għalihom ir-Regolament tan-NU mhux se jidħol fis-seħħ.
4.Ir-Regolament tan-NU li jkun ġie adottat għandu jidħol fis-seħħ fid-data/i speċifikata/i fih bħala Regolament tan-NU anness ma' dan il-Ftehim ghall-Partijiet Kontraenti kollha li ma jkunux innotifikaw in-nuqqas ta' qbil tagħhom jew l-intenzjoni tagħhom li ma japplikawhx f'dik id-data.
5.Meta tiddepożita l-istrument tal-adeżjoni tagħha, kwalunkwe Parti Kontraenti ġdida tista’ tiddikjara li mhijiex se tapplika ċerti Regolamenti tan-NU li f'dak iż-żmien ikunu annessi ma’ dan il-Ftehim jew li mhi se tapplika l-ebda wieħed minnhom. Jekk, f'dak iż-żmien, il-proċedura stabbilita fil-paragrafi 2, 3, u 4 ta' dan l-Artikolu tkun qiegħda tiġi applikata għal abbozz ta' Regolament tan-NU jew għal Regolament tan-NU adottat, is-Segretarju Ġenerali għandu jikkomunika dan l-abbozz jew Regolament tan-NU adottat lill-Parti Kontraenti ġdida u dan ir-Regolament jidħol fis-seħħ bħala Regolament tan-NU għall-Parti Kontraenti ġdida sakemm din il-Parti Kontraenti ġdida ma tinnotifikax li ma taqbilx mar-Regolament tan-NU adottat sa sitt xhur minn meta tiddepożita l-istrument tal-adeżjoni tagħha. Is-Segretarju Ġenerali għandu jinnotifika lill-Partijiet Kontraenti kollha bid-data ta' dan id-dħul fis-seħħ. Is-Segretarju Ġenerali għandu jikkomunikalhom ukoll id-dikjarazzjonijiet kollha dwar in-nuqqas ta’ applikazzjoni ta’ ċerti Regolamenti tan-NU li kwalunkwe Parti Kontraenti tista’ tagħmel skont it-termini ta’ dan il-paragrafu.
6.Kwalunkwe Parti Kontraenti li tapplika Regolament tan-NU tista’ fi kwalunkwe mument, tinnotifika lis-Segretarju Ġenerali, suġġett għal avviż formali ta’ sena, bl-intenzjoni tagħha li tieqaf tapplika dak ir-Regolament tan-NU. Din in-notifika għandha tiġi komunikata mis-Segretarju Ġenerali lill-Partijiet Kontraenti l-oħra.
L-approvazzjonijiet mogħtija qabel skont dak ir-Regolament tan-NU minn dik il-Parti Kontraenti għandhom jibqgħu validi sakemm ma jiġux irtirati skont id-dispożizzjonijiet tal-Artikolu 4.
Jekk xi Parti Kontraenti tieqaf toħroġ approvazzjonijiet skont Regolament tan-NU din għandha:
(a)
Iżżomm sorveljanza adegwata għall-konformità tal-produzzjoni tal-prodotti li preċedentement kienet inħarġitilhom approvazzjoni tat-tip;
(b)Tieħu l-passi neċessarji stabbiliti fl-Artikolu 4 meta tiġi mgħarrfa b'nuqqas ta' konformità minn xi Parti Kontraenti li tkompli tapplika r-Regolament tan-NU;
(c)Tkompli tinnotifika lill-Partijiet Kontraenti l-oħra bl-irtirar tal-approvazzjonijiet, kif stipulat fl-Artikolu 5;
(d)Tkompli tagħti estensjonijiet għal approvazzjonijiet eżistenti.
7.Kwalunkwe Parti Kontraenti li ma tapplikax Regolament tan-NU tista’ fi kwalunkwe mument, tinnotifika lis-Segretarju Ġenerali li għandha l-intenzjoni li tapplikah minn dakinhar ’il quddiem, u r-Regolament tan-NU għandu jidħol fis-seħħ għal din il-Parti fis-sittin jum wara din in-notifika. Is-Segretarju Ġenerali għandu jinnotifika lill-Partijiet Kontraenti kollha b'kull dħul fis-seħħ ta' Regolament tan-NU għal Parti Kontraenti ġdida effettwat skont it-termini ta' dan il-paragrafu.
8.Il-Partijiet Kontraenti li għalihom ikun fis-seħħ Regolament tan-NU għandhom, minn hawn 'il quddiem jissejħu "il-Partijiet Kontraenti li japplikaw Regolament tan-NU".
Artikolu 2
1.Kull Parti Kontraenti li tkun tapplika Regolamenti tan-NU l-aktar permezz tal-approvazzjoni tat-tip għandha tagħti l-approvazzjonijiet tat-tip u l-marki tal-approvazzjoni deskritti fi kwalunkwe Regolament tan-NU għat-tipi ta' vetturi bir-roti, tagħmir jew partijiet inklużi fir-Regolament tan-NU, sakemm din ikollha l-kompetenza teknika u tkun issodisfata bl-arranġamenti sabiex tiġi żgurata l-konformità tal-prodott mat-tip approvat. Kull Parti Kontraenti li tagħti l-approvazzjoni tat-tip għandha tieħu l-miżuri neċessarji kif stipulati fl-Iskeda 1 annessa ma’ dan il-Ftehim sabiex tivverifika li jkunu saru l-arranġamenti adegwati biex jiġi żgurat li l-vetturi bir-roti, it-tagħmir u l-partijiet jiġu mmanifatturati f’konformità mat-tip approvat.
2.Kull Parti Kontraenti li toħroġ approvazzjonijiet tat-tip skont Regolament tan-NU għandha tispeċifika awtorità tal-approvazzjoni għar-Regolament tan-NU. L-awtorità tal-approvazzjoni għandha tassumi r-responsabbiltà għall-aspetti kollha tal-approvazzjoni tat-tip skont dan ir-Regolament tan-NU. Din l-awtorità tal-approvazzjoni tista’ taħtar Servizzi Tekniċi biex f'isimha jwettqu t-testijiet u l-ispezzjonijiet neċessarji għall-verifiki meħtieġa fil-paragrafu 1 ta’ dan l-Artikolu. Il-Partijiet Kontraenti għandhom jiżguraw li dawn is-Servizzi Tekniċi jiġu vvalutati, iddeżinjati u nnotifikati skont ir-rekwiżiti stipulati fl-Iskeda 2 annessa ma’ dan il-Ftehim.
3.L-approvazzjonijiet tat-tip, il-marki ta’ approvazzjoni u l-identifikaturi għat-tipi ta’ vetturi bir-roti, tagħmir u partijiet għandhom jiġu speċifikati fir-Regolament tan-NU u mogħtija skont il-proċeduri stabbiliti fl-Iskedi 3 sa 5 annessi ma’ dan il-Ftehim.
4.Kull Parti Kontraenti li tapplika Regolament tan-NU għandha tirrifjuta li tagħti l-approvazzjonijiet tat-tip u l-marki tal-approvazzjoni koperti fir-Regolament tan-NU jekk il-kundizzjonijiet imsemmija hawn fuq ma jiġux imħarsa.
Artikolu 3
1.Vetturi bir-roti, tagħmir jew partijiet li għalihom ikunu ħarġu approvazzjonijiet tat-tip minn Parti Kontraenti skont l-Artikolu 2 ta’ dan il-Ftehim għandhom jiġu kkunsidrati li huma konformi mal-parti rilevanti tal-leġiżlazzjoni nazzjonali tal-Partijiet Kontraenti kollha li japplikaw dan ir-Regolament tan-NU.
2.Il-Partijiet Kontraenti li japplikaw Regolamenti tan-NU għandhom, permezz ta’ rikonoxximent reċiproku, jaċċettaw għat-tqegħid fis-swieq tagħhom, u suġġett għad-dispożizzjonijiet tal-Artikoli 1, 8 u 12 kif ukoll kwalunkwe dispożizzjonijiet speċjali f’dawn ir-Regolamenti tan-NU, l-approvazzjonijiet tat-tip mogħtija skont dawn ir-Regolamenti tan-NU, mingħajr ma jirrikjedu aktar ittestjar, dokumentazzjoni , ċertifikazzjoni u mmarkar dwar dawn l-approvazzjonijiet tat-tip.
Artikolu 4
1.F'każ li xi Parti Kontraenti li tapplika Regolament tan-NU ssib li ċerti vetturi bir-roti, tagħmir u partijiet li jkollhom fuqhom marki tal-approvazzjoni maħruġa, minn waħda mill-Partijiet Kontraenti, skont ir-Regolament tan-NU msemmi, ma jkunux jikkonformaw mat-tipi approvati, din għandha tinforma lill-awtoritajiet kompetenti tal-Parti Kontraenti li tkun ħarġet l-approvazzjoni.
Il-Parti Kontraenti li tkun ħarġet l-approvazzjoni għandha tieħu l-passi neċessarji biex tiżgura li n-nuqqas ta’ konformità jiġi rrettifikat.
2.Meta n-nuqqas ta’ konformità jkun minħabba nuqqas ta’ konformità mar-rekwiżiti tekniċi speċifikati f’Regolament tan-NU, kif imsemmija fl-Artikolu 1.2.(b), il-Parti Kontraenti li tkun ħarġet l-approvazzjoni għandha tinforma minnufih lill-Partijiet Kontraenti l-oħra b'din is-sitwazzjoni u għandha tinnotifika regolarment lill-Partijiet Kontraenti dwar il-passi li qed tieħu, li jistgħu jinkludu, jekk ikun meħtieġ, l-irtirar tal-approvazzjoni.
Wara li jitqies l-impatt potenzjali fuq is-sikurezza tal-vetturi, il-ħarsien tal-ambjent, l-iffrankar enerġetiku jew il-prestazzjoni tat-teknoloġija ta' protezzjoni mis-serq, il-Partijiet Kontraenti jistgħu jipprojbixxu l-bejgħ u l-użu ta’ tali vetturi bir-roti, tagħmir jew partijiet fit-territorju tagħhom sakemm dan in-nuqqas ta’ konformità jiġi rrettifikat. F’dak il-każ, dawn il-Partijiet Kontraenti għandhom jgħarrfu lis-segretarjat tal-Kumitat Amministrattiv bil-miżuri li jkunu ttieħdu. Għas-soluzzjoni ta’ tilwim bejn il-Partijiet Kontraenti, għandha tiġi applikata l-proċedura prevista fl-Artikolu 10.4.
3.Minkejja d-dispożizzjonijiet tal-paragrafu 1 ta’ dan l-Artikolu, jekk prodott mhux konformi, kif imsemmi fil-paragrafu 2 ta’ dan l-Artikolu, ma jkunx sar konformi f'perjodu ta' tliet xhur, il-Parti Kontraenti responsabbli għall-approvazzjoni għandha tirtira l-approvazzjoni temporanjament jew b’mod permanenti. B’eċċezzjoni, dan il-perjodu jista’ jiġi estiż b’perjodu ta' mhux aktar minn tliet xhur sakemm Parti Kontraenti waħda jew aktar li japplikaw ir-Regolament tan-NU kkonċernat ma joġġezzjonawx. Meta l-perjodu jkun qed jiġi estiż, il-Parti Kontraenti li tkun ħarġet l-approvazzjoni għandha, fi żmien l-ewwel tliet xhur, tinnotifika lill-Partijiet Kontraenti kollha li japplikaw ir-Regolament tan-NU kkonċernat dwar l-intenzjoni tagħha li testendi l-perjodu li fih in-nuqqas ta’ konformità għandu jiġi rrettifikat u tipprovdi ġustifikazzjoni għal tali estensjoni.
4.Meta n-nuqqas ta’ konformità jkun minħabba nuqqas ta’ konformità mad-dispożizzjonijiet amministrattivi, il-marki ta’ approvazzjoni, il-kundizzjonijiet għall-konformità tal-produzzjoni jew id-dokument ta’ informazzjoni speċifikati f’Regolament tan-NU, kif imsemmi fl-Artikolu 1.2.(d) u 1.2.(f), il-Parti Kontraenti li tkun ħarġet l-approvazzjoni għandha tirtira l-approvazzjoni temporanjament jew b’mod permanenti jekk in-nuqqas ta' konformità ma jkunx ġie rrettifikat f'perjodu ta’ sitt xhur.
5.Il-paragrafi 1 sa 4 ta’ dan l-Artikolu japplikaw ukoll fis-sitwazzjoni fejn il-Parti Kontraenti responsabbli għall-ħruġ ta’ approvazzjoni nnifisha ssib li ċerti vetturi bir-roti, tagħmir u partijiet li jkollhom fuqhom marki ta’ approvazzjoni ma jkunux jikkonformaw mat-tipi approvati jew mar-rekwiżiti ta’ Regolament tan-NU.
Artikolu 5
1.L-awtoritajiet tal-approvazzjoni ta' kull Parti Kontraenti li tapplika Regolamenti tan-NU għandhom jibagħtu, meta jintalbu mill-Partijiet Kontraenti l-oħra, lista tal-vetturi bir-roti, tagħmir jew partijiet, li għalihom l-awtorità tkun irrifjutat li tagħti l-approvazzjoni jew li tkun irtirat l-approvazzjonijiet tagħhom.
2.Barra minn hekk, meta tirċievi rikjesta minn Parti Kontraenti oħra li tapplika Regolament tan-NU, l-awtorità għandha tibgħat minnufih, skont id-dispożizzjonijiet tal-Iskeda 5 annessa ma' dan il-Ftehim, lill-dik il-Parti Kontraenti kopja tal-informazzjoni kollha rilevanti li fuqha tkun ibbażat id-deċiżjoni li tagħti, tirrifjuta li tagħti, jew tirtira l-approvazzjoni ta' vettura bir-roti, tagħmir jew parti skont dak ir-Regolament tan-NU.
3.Il-kopja bil-miktub tista’ tiġi sostitwita b’fajl elettroniku skont l-Iskeda 5 annessa ma’ dan il-Ftehim.
Artikolu 6
1.L-istati membri tal-Kummissjoni Ekonomika għall-Ewropa, il-pajjiżi li jkunu fil-Kummissjoni f’kapaċità konsultattiva skont il-paragrafu 8 tat-Termini ta’ Referenza tal-Kummissjoni u l-organizzazzjonijiet għall-integrazzjoni ekonomika reġjonali stabbiliti minn stati membri tal-Kummissjoni Ekonomika għall-Ewropa li lilhom l-istati membri tagħhom ikunu ttrasferew setgħat fl-oqsma koperti b’dan il-Ftehim, inkluża s-setgħa li jieħdu deċiżjonijiet vinkolanti fuq l-istati membri tagħhom, jistgħu jsiru Partijiet Kontraenti għal dan il-Ftehim.
Sabiex jiġi ddeterminat l-għadd ta' voti msemmi fl-Artikolu 1(2) u fl-Artikolu 12(2), l-organizzazzjonijiet għall-integrazzjoni ekonomika reġjonali jivvotaw bl-għadd ta' voti tal-istati membri tagħhom li jkunu membri tal-Kummissjoni Ekonomika għall-Ewropa.
2.Il-pajjiżi membri tan-Nazzjonijiet Uniti li jistgħu jipparteċipaw f'ċerti attivitajiet tal-Kummissjoni Ekonomika għall-Ewropa skont il-paragrafu 11 tat-Termini ta’ Referenza tal-Kummissjoni u l-organizzazzjonijiet għall-integrazzjoni ekonomika reġjonali ta' dawk il-pajjiżi li lilhom l-Istati Membri tagħhom ikunu ttrasferew setgħat fl-oqsma koperti b’dan il-Ftehim, inkluża s-setgħa li jieħdu deċiżjonijiet vinkolanti fuq l-Istati Membri tagħhom, jistgħu jsiru Partijiet Kontraenti għal dan il-Ftehim.
Sabiex jiġi ddeterminat l-għadd ta' voti msemmi fl-Artikolu 1(2) u fl-Artikolu 12(2), l-organizzazzjonijiet għall-integrazzjoni ekonomika reġjonali jivvotaw bl-għadd ta' voti tal-Istati Membri tagħhom li jkunu membri tan-Nazzjonijiet Uniti.
3.L-adeżjoni ma' dan il-Ftehim mill-Partijiet Kontraenti li mhumiex Parti għall-Ftehim tal-1958 għandha titwettaq bid-depożitu ta' strument lis-Segretarju Ġenerali, wara d-dħul fis-seħħ ta' dan il-Ftehim.
Artikolu 7
1.Dan il-Ftehim għandu jitqies li jidħol fis-seħħ disa' xhur wara d-data li fiha s-Segretarju Ġenerali jittrażmettih lill-Partijiet Kontraenti kollha għall-Ftehim tal-1958.
2.Dan il-Ftehim għandu jitqies li ma jidħolx fis-seħħ jekk ikun hemm xi oġġezzjoni mill-Partijiet Kontraenti għall-Ftehim tal-1958 li tiġi espressa fi żmien sitt xhur wara d-data li fiha s-Segretarju Ġenerali jittrażmettih lill-Partijiet Kontraenti.
3.Għal kwalunkwe Parti Kontraenti ġdida li taderixxi ma' dan il-Ftehim, dan il-Ftehim għandu jidħol fis-seħħ fis-sittin jum wara d-depożitu tal-istrument tal-adeżjoni.
Artikolu 8
1.Kwalunkwe Parti Kontraenti tista’ tiddenunzja dan il-Ftehim billi tinnotifika lis-Segretarju Ġenerali.
2.Id-denunzja tidħol fis-seħħ tnax-il xhar wara d-data li fiha s-Segretarju Ġenerali jirċievi din in-notifika.
3.Kwalunkwe approvazzjonijiet tat-tip mogħtija mill-Parti Kontraenti għandhom jibqgħu validi għal perjodu ta’ tnax-il xahar wara li d-denunzja tkun daħlet fis-seħħ skont l-Artikolu 8.2.
Artikolu 9
1.Kwalunkwe Parti Kontraenti kif definit fl-Artikolu 6 ta’ dan il-Ftehim tista’, fil-mument tal-adeżjoni jew fi kwalunkwe ħin wara, tiddikjara permezz ta' notifika indirizzata lis-Segretarju Ġenerali li dan il-Ftehim għandu jkun estiż għat-territorji kollha jew kwalunkwe wieħed minnhom li hi tkun responsabbli għar-relazzjonijiet internazzjonali tagħhom. Il-Ftehim għandu jiġi estiż għat-territorju jew territorji msemmija fin-notifika mis-sittin jum wara li s-Segretarju Ġenerali jkun irċiviha.
2.Kwalunkwe Parti Kontraenti kif definit fl-Artikolu 6 ta’ dan il-Ftehim li tkun għamlet dikjarazzjoni skont il-paragrafu 1 ta’ dan l-Artikolu li testendi dan il-Ftehim għal kwalunkwe territorju li hi tkun responsabbli għar-relazzjonijiet internazzjonali tiegħu tista’ tiddenunzja dan il-Ftehim separatament fir-rigward ta’ dak it-territorju, skont id-dispożizzjonijiet tal-Artikolu 8.
Artikolu 10
1.Kwalunkwe tilwima bejn żewġ Partijiet Kontraenti jew aktar dwar l-interpretazzjoni jew l-applikazzjoni ta' dan il-Ftehim għandha, jekk ikun possibbili, tiġi solvuta permezz ta' negozjati bejniethom.
2.Kwalunkwe tilwima li ma tiġix solvuta bin-negozjati għandha tmur għall-arbitraġġ jekk waħda mill-Partijiet Kontraenti titlob hekk u għandha tiġi referuta lil arbitru wieħed jew aktar magħżul/a bi ftehim bejn il-Partijiet Kontraenti li bejniethom ikun hemm it-tilwima. Jekk fi żmien tliet xhur minn meta ssir it-talba għall-arbitraġġ il-Partijiet fit-tilwima ma jkunux jistgħu jaqblu fuq l-għażla ta' arbitru jew arbitri, kwalunkwe Parti tista' titlob lis-Segretarju Ġenerali biex jaħtar arbitru wieħed li t-tilwima tintbagħat lilu għal deċiżjoni.
3.Id-deċiżjoni tal-arbitru jew arbitri maħtur/a skont il-paragrafu 2 ta' dan l-Artikolu tkun torbot lill-Partijiet Kontraenti li bejniethom ikun hemm it-tilwima.
4.Kwalunkwe tilwima bejn żewġ Partijiet Kontraenti jew aktar li tikkonċerna l-interpretazzjoni jew l-applikazzjoni ta’ Regolamenti tan-NU annessi ma’ dan il-Ftehim għandha tiġi solvuta permezz ta’ negozjati skont il-proċedura stipulata fl-Iskeda 6 annessa ma’ dan il-Ftehim.
Artikolu 11
1.Kwalunkwe Parti Kontraenti tista’, fil-mument tal-adeżjoni ma' dan il-Ftehim, tiddikjara li ma tqisx lilha nfisha marbuta bil-paragrafi 1 sa 3 tal-Artikolu 10 tal-Ftehim. Il-Partijiet Kontraenti l-oħra m'għandhomx ikunu marbuta bil-paragrafi 1 sa 3 tal-Artikolu 10 fir-rigward ta' kwalunkwe Parti Kontraenti li tkun għamlet tali riżerva.
2.Kwalunkwe Parti Kontraenti li tkun għamlet riżerva kif previst fil-paragrafu 1 ta’ dan l-Artikolu, fi kwalunkwe ħin, tista’ tirtira tali riżerva billi tinnotifika lis-Segretarju Ġenerali.
3.L-ebda riżerva oħra għal dan il-Ftehim, l-Appendiċi, l-Iskedi u r-Regolamenti tan-NU annessi miegħu ma tista' issir; iżda kwalunkwe Parti Kontraenti tista', skont it-termini tal-Artikolu 1(5), tiddikjara li hi ma għandhiex l-intenzjoni li tapplika ċerti Regolamenti tan-NU jew li hi għandha l-intenzjoni li ma tapplika l-ebda wieħed minnhom.
Artikolu 12
Ir-Regolamenti tan-NU annessi ma' dan il-Ftehim jistgħu jiġu emendati skont il-proċedura li ġejja:
1.L-emendi ta' Regolamenti tan-NU għandhom jiġu stabbiliti mill-Kumitat Amministrattiv kif deskritt fl-Artikolu 1(2) u skont il-proċedura indikata fl-appendiċi.
L-emenda tar-Regolament tan-NU, wara li tkun ġiet stabbilita, għandha tiġi kkomunikata mill-Kumitat Amministrattiv lis-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti. Mill-aktar fis possibbli wara dan, is-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti għandu jagħti n-notifika ta’ dan il-Ftehim lill-Partijiet Kontraenti li japplikaw dan ir-Regolament tan-NU u lis-Segretarju Ġenerali.
2.L-emenda ta' Regolament tan-NU titqies bħala adottata sakemm, fi żmien sitt xhur minn meta tiġi nnotifikata mis-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti, aktar minn wieħed minn kull ħamsa tal-Partijiet Kontraenti li japplikaw ir-Regolament tan-NU fi żmien in-notifika ma jkunux informaw lis-Segretarju Ġenerali li ma jaqblux ma' din l-emenda. Meta emenda ta' Regolament tan-NU tiġi adottata, is-Segretarju Ġenerali għandu mill-aktar fis possibbli jiddikjara l-emenda bħala adottata u vinkolanti fuq dawk il-Partijiet Kontraenti li japplikaw ir-Regolament tan-NU.
3.L-emendi ta' Regolament tan-NU jistgħu jinkludu dispożizzjonijiet tranżizzjonali rigward id-dħul fis-seħħ tar-Regolament tan-NU emendat, id-data sa meta l-Partijiet Kontraenti għandhom jaċċettaw approvazzjonijiet skont verżjoni preċedenti tar-Regolament tan-NU u d-data minn meta l-Partijiet Kontraenti m’għandhomx ikunu obbligati jaċċettaw approvazzjonijiet tat-tip maħruġa skont verżjoni preċedenti tar-Regolament tan-NU emendat.
4.Minkejja li d-dispożizzjonijiet tranżizzjonali fi kwalunkwe verżjoni ta’ Regolamenti tan-NU jistgħu jkunu stipulaw mod ieħor, il-Partijiet Kontraenti għal dan il-Ftehim li japplikaw Regolamenti tan-NU jistgħu, suġġetti għall-konformità mad-dispożizzjonijiet tal-Artikolu 2, xorta waħda joħorġu approvazzjonijiet tat-tip skont verżjonijiet preċedenti ta’ Regolamenti tan-NU. Madankollu, suġġett għall-paragrafu 3 ta’ dan l-Artikolu, il-Partijiet Kontraenti li japplikaw Regolament tan-NU m’għandhomx ikunu obbligati jaċċettaw approvazzjonijiet tat-tip maħruġa skont dawn il-verżjonijiet preċedenti.
5.Il-Partijiet Kontraenti kollha li japplikaw Regolament tan-NU, ħlief għall-Partijiet Kontraenti li jkunu nnotifikaw lis-Segretarju Ġenerali bl-intenzjoni tagħhom li jieqfu japplikaw ir-Regolament tan-NU, għandhom jaċċettaw l-approvazzjonijiet mogħtija skont l-aħħar verżjoni ta’ dak ir-Regolament tan-NU. Parti Kontraenti li tkun innotifikat lis-Segretarju Ġenerali bl-intenzjoni tagħha li tieqaf tapplika Regolament tan-NU għandha, matul il-perjodu ta’ sena msemmi fil-paragrafu 6 tal-Artikolu 1, taċċetta l-approvazzjonijiet mogħtija skont il-verżjoni(jiet) tar-Regolament tan-NU applikabbli għal dik il-Parti Kontraenti fil-mument tan-notifika tagħha lis-Segretarju Ġenerali.
6.Parti Kontraenti li tapplika Regolament tan-NU tista' tagħti approvazzjoni b'deroga skont Regolament tan-NU għal tip wieħed ta’ vetturi bir-roti, tagħmir jew parti li tkun ibbażata fuq teknoloġija ġdida, meta din it-teknoloġija ġdida ma tkunx koperta bir-Regolament tan-NU eżistenti, u tkun inkompatibbli ma’ wieħed jew aktar mir-rekwiżiti ta’ dan ir-Regolament tan-NU. F’dak il-każ, il-proċeduri stipulati fl-Iskeda 7 annessa ma’ dan il-Ftehim għandhom japplikaw.
7.F’każ li Parti Kontraenti ġdida taderixxi ma' dan il-Ftehim fiż-żmien ta' bejn in-notifika tal-emenda ta' xi Regolament tan-NU mis-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti u tad-dħul fis-seħħ tiegħu, ir-Regolament tan-NU inkwistjoni għandu jidħol fis-seħħ għal dik il-Parti Kontraenti, sakemm, f'perjodu ta’ sitt xhur min-notifika ta’ adeżjoni tagħha mis-Segretarju Ġenerali, dik il-Parti ma tkunx informat lis-Segretarju Ġenerali li ma taqbilx ma’ din l-emenda.
Artikolu 13
It-test tal-Ftehim innifsu u l-appendiċi tiegħu jistgħu jiġu emendati skont il-proċedura li ġejja:
1.Kwalunkwe Parti Kontraenti tista’ tipproponi emenda waħda jew iktar għal dan il-Ftehim u l-appendiċi tiegħu. It-test ta' kwalunkwe emenda proposta għal dan il-Ftehim u l-appendiċi tiegħu għandhom jiġu trażmessi lis-Segretarju Ġenerali, li għandu jittrażmettihom lill-Partijiet Kontraenti kollha u jinforma lill-pajjiżi kollha l-oħra msemmija fl-Artikolu 6(1) tiegħu.
2.Kwalunkwe emenda proposta u ċirkolata skont il-paragrafu 1 ta' dan l-Artikolu għandha titqies bħala aċċettata jekk l-ebda Parti Kontraenti ma tesprimi oġġezzjoni fi żmien disa' xhur mid-data taċ-ċirkolazzjoni tal-emenda proposta mis-Segretarju Ġenerali.
3.Is-Segretarju Ġenerali għandu, mill-aktar fis possibbli, jinnotifika lill-Partijiet Kontraenti kollha jekk tkunx ġiet espressa xi oġġezzjoni għall-emenda proposta. Jekk tkun ġiet espressa oġġezzjoni għall-emenda proposta, l-emenda titqies bħala mhux aċċettata u tkun bla ebda effett. Jekk ma jkun hemm l-ebda oġġezzjoni tali, l-emenda għandha tidħol fis-seħħ għall-Partijiet Kontraenti kollha tliet xhur wara li jgħaddi l-perjodu ta' disa' xhur imsemmi fil-paragrafu 2 ta' dan l-Artikolu.
Artikolu 13 bis
1.L-Iskedi tad-Dispożizzjonijiet Amministrattivi u Proċedurali annessi ma' dan il-Ftehim jistgħu jiġu emendati skont il-proċedura li ġejja:
1.1.L-emendi tal-Iskedi ta’ Dispożizzjonijiet Amministrattivi u Proċedurali għandhom jiġu stabbiliti mill-Kumitat Amministrattiv kif imsemmi fl-Artikolu 1.1 u skont il-proċedura indikata fl-Artikolu 7 tal-appendiċi ta' dan il-Ftehim.
1.2.Emenda tal-Iskedi ta’ Dispożizzjonijiet Amministrattivi u Proċedurali għandha tiġi kkomunikata mill-Kumitat Amministrattiv lis-Segretarju Ġenerali. Mill-aktar fis possibbli wara dan, is-Segretarju Ġenerali għandu jinnotifika dan il-Ftehim lill-Partijiet Kontraenti li japplikaw Regolament tan-NU wieħed jew aktar.
2.Emenda tal-Iskedi ta’ Dispożizzjonijiet Amministrattivi u Proċedurali titqies li ġiet adottata sakemm, f'perjodu ta' sitt xhur mid-data tan-notifika tagħha mis-Segretarju Ġenerali, ebda Parti Kontraenti li tapplika Regolament tan-NU wieħed jew aktar ma tkun informat lis-Segretarju Ġenerali li ma taqbilx mal-emenda.
3.Is-Segretarju Ġenerali għandu, mill-aktar fis possibbli, jinnotifika lill-Partijiet Kontraenti għall-Ftehim kollha li japplikaw Regolament tan-NU wieħed jew aktar jekk tkunx ġiet espressa xi oġġezzjoni għall-emenda proposta. Jekk tkun ġiet espressa oġġezzjoni għall-emenda proposta, l-emenda għandha titqies bħala li ma ġietx aċċettata u tkun bla ebda effett. Jekk ma jkun hemm l-ebda tali oġġezzjoni, l-emenda għandha tidħol fis-seħħ għall-Partijiet Kontraenti kollha li japplikaw Regolament tan-NU wieħed jew aktar tliet xhur wara li jgħaddi l-perjodu ta' sitt xhur imsemmi fil-paragrafu 2 ta' dan l-Artikolu.
4.Skeda ġdida għandha titqies bħala emenda tal-Iskedi ta’ Dispożizzjonijiet Amministrattivi u Proċedurali u, għalhekk, stabbilita skont l-istess proċedura kif speċifikat f’dan l-Artikolu.
Artikolu 14
1.Skont id-dispożizzjonijiet ta’ dan il-Ftehim, is-Segretarju Ġenerali għandu jinnotifika lill-Partijiet Kontraenti dwar:
(a)Adeżjonijiet skont l-Artikolu 6;
(b)Id-dati tad-dħul fis-seħħ ta’ dan il-Ftehim skont l-Artikolu 7;
(c)Id-denunzji skont l-Artikolu 8;
(d)In-notifiki rċevuti skont l-Artikolu 9;
(e)Id-dikjarazzjonijiet u n-notifiki rċevuti skont il-paragrafi 1 u 2 tal-Artikolu 11;
(f)Id-dħul fis-seħħ ta’ kwalunkwe Regolament tan-NU ġdid u kwalunkwe emenda ta’ Regolament tan-NU eżistenti skont il-paragrafi 2, 3, 5 u 7 tal-Artikolu 1, u l-paragrafu 2 tal-Artikolu 12;
(g)Id-dħul fis-seħħ ta’ kwalunkwe emenda tal-Ftehim, l-appendiċi jew tal-Iskedi ta’ Dispożizzjonijiet Amministrattivi u Proċedurali tagħha skont il-paragrafu 3 tal-Artikolu 13 jew il-paragrafu 3 tal-Artikolu 13bis, rispettivament;
(h)Il-waqfien ta’ applikazzjoni ta’ Regolamenti tan-NU mill-Partijiet Kontraenti skont il-paragrafu 6 tal-Artikolu 1.
2.Skont id-dispożizzjonijiet ta’ dan il-Ftehim u l-Iskedi ta’ dispożizzjonijiet Amministrattivi u Proċedurali annessi, is-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti għandu jinnotifika:
(a)Lis-Segretarju Ġenerali u l-Partijiet Kontraenti bl-istabbiliment ta’ emenda ta' Regolament tan-NU skont il-paragrafu 2 tal-Artikolu 12;
(b)
Lill-Partijiet Kontraenti bid-deċiżjoni tal-Kumitat Ammisitrattiv dwar talba għal approvazzjoni b'deroga u, sussegwentement, bl-adozzjoni tagħha skont il-paragrafu 5 tal-Iskeda 7.
Artikolu 15
1.Jekk fid-data li fiha d-dispożizzjonijiet imsemmija hawn fuq jidħlu fis-seħħ il-proċeduri previsti fil-paragrafi 3 u 4 tal-Artikolu 1 tal-verżjoni preċedenti tal-Ftehim ikunu qegħdin jiġu applikati għall-adozzjoni ta' Regolament tan-NU ġdid, dan ir-Regolament tan-NU ġdid għandu jidħol fis-seħħ skont id-dispożizzjonijiet tal-paragrafu 4 ta' dak l-Artikolu.
2.Jekk fid-data li fiha d-dispożizzjonijiet imsemmija hawn fuq jidħlu fis-seħħ, il-proċeduri previsti fil-paragrafu 1 tal-Artikolu 12 tal-verżjoni preċedenti tal-Ftehim ikunu qegħdin jiġu applikati għall-adozzjoni ta' xi emenda ta' Regolament tan-NU, dik l-emenda għandha tidħol fis-seħħ skont id-dispożizzjonijiet tal-imsemmi Artikolu.
3.Jekk il-Partijiet Kontraenti għall-Ftehim kollha jaqblu, kwalunkwe Regolament tan-NU adottat skont it-termini tal-verżjoni preċedenti tal-Ftehim jista' jitqies bħallikieku kien Regolament tan-NU adottat skont it-termini tad-dispożizzjonijiet ta’ hawn fuq.
Artikolu 16
Dan il-Ftehim sar f’Ġinevra f’kopja waħda bl-Ingliż, bil-Franċiż u bir-Russu, b’kull test ikun ugwalment awtentiku.
_________
Appendiċi
Kompożizzjoni u regoli ta' proċedura tal-Kumitat Amministrattiv
Artikolu 1
Il-membri tal-Kumitat Amministrattiv għandhom ikunu komposti mill-Partijiet Kontraenti kollha għall-Ftehim emendat.
Artikolu 2
Is-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti għandu jipprovdi lill-Kumitat b'servizzi ta' segretarjat.
Artikolu 3
Il-Kumitat għandu, fl-ewwel sessjoni tiegħu ta' kull sena, jeleġi President u viċi-President.
Artikolu 4
Is-Segretarju Ġenerali tan-Nazzjonijiet Uniti għandu jlaqqa’ l-Kumitat taħt il-patroċinju tal-Kummissjoni Ekonomika għall-Ewropa kull meta jkun meħtieġ li jiġu stabbiliti Regolament ġdid tan-NU, emenda ta' Regolament tan-NU, notifika skont il-proċedura ta’ approvazzjoni b'deroga għal teknoloġiji ġodda (stipulati fl-Iskeda 7) jew emenda tal-Iskedi ta’ Dispożizzjonijiet Amministrattivi u Proċedurali.
Artikolu 5
Ir-Regolamenti tan-NU ġodda proposti għandhom jitqiegħdu għall-vot. Kull pajjiż, Parti Kontraenti għall-Ftehim għandu jkollhom vot wieħed. Sabiex jittieħdu d-deċiżjonijiet huwa meħtieġ kworum ta' mhux anqas minn nofs il-Partijiet Kontraenti. Sabiex jiġi ddeterminat il-kworum, l-organizzazzjonijiet għall-integrazzjoni ekonomika reġjonali, bħala Partijiet Kontraenti, jivvotaw bl-għadd ta' voti tal-Istati Membri tagħhom. Ir-rappreżentant ta’ organizzazzjoni għall-integrazzjoni ekonomika reġjonali jista’ jagħti l-voti tal-pajjiżi sovrani kostitwenti tagħha. L-abbozzi għal Regolamenti tan-NU ġodda għandhom jiġu stabbiliti permezz ta' maġġoranza ta' erbgħa minn kull ħamsa ta' dawk preżenti li jistgħu jivvotaw.
Artikolu 6
Emendi proposti għal Regolamenti tan-NU għandhom jitqiegħdu għall-vot. Kull pajjiż, Parti Kontraenti għall-Ftehim, li jkun qiegħed japplika dan ir-Regolament tan-NU għandu jkollu vot wieħed. Sabiex jittieħdu d-deċiżjonijiet huwa meħtieġ kworum ta' mhux anqas minn nofs il-Partijiet Kontraenti li japplikaw ir-Regolament tan-NU. Sabiex jiġi ddeterminat il-kworum, l-organizzazzjonijiet għall-integrazzjoni ekonomika reġjonali, bħala Partijiet Kontraenti għall-Ftehim, jivvotaw bl-għadd ta' voti tal-Istati Membri tagħhom. Ir-rappreżentant ta’ organizzazzjoni għall-integrazzjoni ekonomika reġjonali jista’ jagħti l-voti ta' dawk il-pajjiżi sovrani kostitwenti tagħha li japplikaw ir-Regolament tan-NU. Abbozzi ta' emendi għar-Regolamenti tan-NU għandhom jiġu stabbiliti permezz ta' maġġoranza ta' erbgħa minn kull ħamsa ta' dawk preżenti li jistgħu jivvotaw.
Artikolu 7
Emendi proposti għall-Iskedi ta’ Dispożizzjonijiet Amministrattivi u Proċedurali annessi ma’ dan il-Ftehim għandhom jitqiegħdu għall-vot. Kull Parti Kontraenti għall-Ftehim li tapplika Regolament tan-NU wieħed jew aktar għandu jkollha vot wieħed. Sabiex jittieħdu d-deċiżjonijiet huwa meħtieġ kworum ta' mhux anqas minn nofs il-Partijiet Kontraenti għall-Ftehim li japplikaw Regolament tan-NU wieħed jew aktar. Sabiex jiġi ddeterminat il-kworum, l-organizzazzjonijiet għall-integrazzjoni ekonomika reġjonali, bħala Partijiet Kontraenti għall-Ftehim, jivvotaw bl-għadd ta' voti tal-Istati Membri tagħhom. Ir-rappreżentant ta’ organizzazzjoni għall-integrazzjoni ekonomika reġjonali jista’ jagħti l-voti ta' dawk il-pajjiżi sovrani kostitwenti tagħha li japplikaw Regolament tan-NU wieħed jew aktar. L-abbozzi ta' emendi tal-Iskedi ta’ Dispożizzjonijiet Amministrattivi u Proċedurali għandhom jiġu stabbiliti b'vot unanimu ta' dawk preżenti li jistgħu jivvotaw.
Artikolu 8
It-talba minn Parti Kontraenti għall-awtorizzazzjoni biex tagħti approvazzjoni b'deroga proposta fir-rigward ta' teknoloġiji ġodda għandha titqiegħed għall-vot. Kull Parti Kontraenti li tapplika r-Regolament tan-NU għandu jkollha vot wieħed. Sabiex jittieħdu d-deċiżjonijiet huwa meħtieġ kworum ta' mhux anqas minn nofs il-Partijiet Kontraenti li japplikaw ir-Regolament tan-NU. Sabiex jiġi ddeterminat il-kworum, l-organizzazzjonijiet għall-integrazzjoni ekonomika reġjonali, bħala Partijiet Kontraenti għall-Ftehim, jivvotaw bl-għadd ta' voti tal-Istati Membri tagħhom. Ir-rappreżentant ta’ organizzazzjoni għall-integrazzjoni ekonomika reġjonali jista’ jagħti l-voti ta' dawk il-pajjiżi sovrani kostitwenti tagħha li japplikaw ir-Regolament tan-NU. L-awtorizzazzjoni biex tingħata approvazzjoni b'deroga lill-Parti Kontraenti msemmija għandha tiġi stabbilita permezz ta’ maġġoranza ta’ erbgħa minn kull ħamsa ta' dawk preżenti li jistgħu jivvotaw.
_________
Skedi ta’ Dispożizzjonijiet Amministrattivi u Proċedurali
Dawn l-Iskedi ta’ Dispożizzjonijiet Amministrattivi u Proċedurali (SAPP) huma annessi mal-Ftehim tal-1958 u jispeċifikaw id-dispożizzjonijiet amministrattivi u proċedurali kollha applikabbli għar-Regolamenti tan-NU annessi mal-Ftehim tal-1958:
Skeda 1
Proċeduri tal-konformità tal-produzzjoni
Skeda 2
Valutazzjoni, deżinjazzjoni u notifika tas-Servizzi Tekniċi
Skeda 3
Proċeduri għall-approvazzjonijiet tat-tip tan-NU
Skeda 4
Numerazzjoni għall-approvazzjonijiet tat-tip tan-NU
Skeda 5
Ċirkolazzjoni tad-dokumentazzjoni tal-approvazzjoni
Skeda 6
Proċeduri għas-soluzzjoni ta’ kwistjonijiet ta' interpretazzjoni fir-rigward tal-applikazzjoni ta’ Regolamenti tan-NU u l-għoti ta’ approvazzjonijiet skont dawn ir-Regolamenti tan-NU
Skeda 7
Proċedura għall-approvazzjonijiet b'deroga fir-rigward ta’ teknoloġiji ġodda
Skeda 8
Kundizzjonijiet ġenerali għall-metodi ta’ ttestjar virtwali
Skeda 1
Proċeduri tal-konformità tal-produzzjoni
Għanijiet
Il-proċedura tal-konformità tal-produzzjoni għandha l-għan li tiżgura li kull vettura bir-roti, tagħmir jew parti jkunu f’konformità mat-tip approvat.
Il-proċeduri jinkludu, b’mod inseparabbli, il-valutazzjoni ta’ sistemi ta’ ġestjoni tal-kwalità, li hawn taħt tissejjaħ "valutazzjoni inizjali" u l-verifika tas-suġġett tal-approvazzjoni u l-kontrolli relatati mal-prodott, imsejħa "arranġamenti tal-konformità tal-prodott".
1.Valutazzjoni inizjali
1.1.L-awtorità tal-approvazzjoni ta’ Parti Kontraenti għandha tivverifika - qabel ma tagħti l-approvazzjoni tat-tip tan-NU - jekk ikunx hemm arranġamenti u proċeduri sodisfaċenti sabiex jiġi żgurat il-kontroll effettiv li l-vetturi bir-roti, it-tagħmir u l-partijiet li jkunu qed jiġu manifatturati, ikunu konformi mat-tip approvat.
1.2.Gwida għat-twettiq tal-valutazzjonijiet tinsab fl-istandard internazzjonali ISO 19011:2002 – Linji gwida għall-verifiki tas-sistemi ta’ ġestjoni tal-kwalità u/jew dawk ambjentali.
1.3.Ir-rekwiżit tal-paragrafu 1.1 għandu jiġi verifikat għas-sodisfazzjon tal-awtorità li tkun qed tagħti l-approvazzjoni tat-tip tal-NU.
L-awtorità tal-approvazzjoni li tagħti approvazzjonijiet tat-tip tan-NU għandha tkun sodisfatta bil-valutazzjoni inizjali u bl-arranġamenti tal-konformità tal-prodott imsemmija fit-Taqsima 2 ta' hawn taħt, filwaqt li tqis bħala neċessarju wieħed mill-arranġamenti deskritti fil-paragrafi 1.3.1 sa 1.3.3, jew kombinazzjoni ta’ dawk l-arranġamenti b’mod sħiħ jew parzjali skont il-każ.
1.3.1.Il-valutazzjoni inizjali attwali u/jew il-verifika tal-arranġamenti tal-konformità tal-prodott għandhom jitwettqu mill-awtorità tal-approvazzjoni li tagħti l-approvazzjonijiet tat-tip tan-NU jew mis-Servizz Tekniku ddeżinjat biex jaġixxi f’isem dik l-awtorità tal-approvazzjoni.
1.3.1.1.Filwaqt li tqis sa fejn għandha tasal il-valutazzjoni inizjali, l-awtorità tal-approvazzjoni tista’ tqis l-informazzjoni disponibbli relatata ma’:
(a)
Iċ-ċertifikazzjoni tal-manifattur deskritta fil-paragrafu 1.3.3 ta' hawn taħt, li ma ġietx ikkwalifikata jew rikonoxxuta skont dak il-paragrafu;
(b)Fil-każ ta’ approvazzjoni tat-tip tan-NU ta’ tagħmir jew partijiet, il-valutazzjonijiet tas-sistema tal-kwalità mwettqa mill-manifattur(i) tal-vetturi, fil-bini tal-manifattur(i) tat-tagħmir jew tal-partijiet, skont waħda jew aktar mill-ispeċifikazzjonijiet tas-settur tal-industrija li jissodisfaw ir-rekwiżiti fl-istandard internazzjonali ISO 9001:2008.
1.3.2.Il-valutazzjoni inizjali attwali u/jew il-verifika tal-arranġamenti tal-konformità tal-prodott jistgħu jitwettqu wkoll mill-awtorità tal-approvazzjoni ta’ Parti Kontraenti oħra, jew mis-Servizz Tekniku ddeżinjat għal dan l-għan minn din l-awtorità tal-approvazzjoni, sakemm din il-Parti Kontraenti tapplika mill-inqas l-istess Regolamenti tan-NU li fuqhom tkun ġiet ibbażata l-approvazzjoni tat-tip tan-NU.
1.3.2.1.F’dak il-każ, l-awtorità tal-approvazzjoni tal-Parti Kontraenti l-oħra għandha tħejji dikjarazzjoni ta’ konformità li fiha tispjega l-oqsma u l-faċilitajiet tal-produzzjoni li hi tkun kopriet bħala rilevanti għall-prodott(i) li jrid(u) jiġi/u approvat(i) għat-tip u għar-Regolamenti tan-NU li skonthom dawn il-prodotti għandhom jiġu approvati għat-tip.
1.3.2.2.Meta tirċievi applikazzjoni għal dikjarazzjoni ta’ konformità mill-awtorità tal-approvazzjoni tat-tip ta’ Parti Kontraenti li tagħti approvazzjonijiet tat-tip tan-NU, l-awtorità tal-approvazzjoni ta’ Parti Kontraenti oħra għandha tibgħat minnufih id-dikjarazzjoni ta’ konformità jew tavża li mhix f’pożizzjoni li tipprovdi tali dikjarazzjoni.
1.3.2.3.Id-dikjarazzjoni ta’ konformità għandha tinkludi tal-anqas dan li ġej:
(a)Il-grupp jew il-kumpanija (eż. XYZ Automotive)
(b)L-organizzazzjoni partikolari (eż. diviżjoni reġjonali)
(c)L-impjanti/siti ta' produzzjoni (eż. impjant tal-magni 1 (fil-pajjiż A) - impjant tal-vetturi 2 (fil-pajjiż B));
(d)Il-medda tal-Vetturi/Komponenti (eż. il-mudelli kollha tal-kategorija M1)
(e)Iż-żoni vvalutati (eż. tal-assemblaġġ tal-magna, tal-ippressar u l-assemblaġġ tal-body, tal-assemblaġġ tal-vettura)
(f)Id-dokumenti eżaminati (eż. il-manwal u l-proċeduri ta’ ġestjoni tal-kwalità tal-kumpanija u tas-sit)
(g)Id-data tal-valutazzjoni (eż. il-verifika twettqet bejn jj/xx/ssss u jj/xx/ssss);
(h)Iż-żjara ta’ monitoraġġ ippjanata (eż. xx/ssss);
1.3.3.L-awtorità tal-approvazzjoni tista' taċċetta wkoll iċ-ċertifikazzjoni tal-manifattur skont l-istandard internazzjonali ISO 9001:2008 (l-ambitu ta' din iċ-ċertifikazzjoni għandu jkopri l-prodott(i) li għandhom jiġu approvati) jew standard ta' akkreditament ekwivalenti li jissodisfa r-rekwiżiti tal-valutazzjoni inizjali tal-paragrafu 1.1. Il-manifattur għandu jipprovdi d-dettalji taċ-ċertifikazzjoni u jimpenja ruħu li jgħarraf lill-awtorità tal-approvazzjoni bi kwalunkwe reviżjoni għall-validità jew l-ambitu li ssirilha.
1.4.Għall-fini tal-Approvazzjoni tat-Tip Internazzjonali ta' Vettura Sħiħa, il-valutazzjonijiet inizjali mwettqa għall-għoti ta’ approvazzjonijiet tan-NU għal tagħmir u partijiet tal-vettura ma hemmx għalfejn jiġu ripetuti, iżda għandhom jiġu kkompletati b’valutazzjoni li tkopri ż-żoni mhux koperti mill-valutazzjonijiet preċedenti, b’mod partikolari, fir-rigward tal-assemblaġġ tal-vettura sħiħa.
2.Arranġamenti tal-konformità tal-prodott
2.1.Kull vettura, tagħmir jew parti approvata skont Regolament tan-NU anness mal-Ftehim tal-1958 għandha tiġi manifatturata b'mod li tikkonforma mat-tip approvat billi tissodisfa r-rekwiżiti ta' din l-Iskeda u tal-imsemmi Regolament tan-NU.
2.2.L-awtorità tal-approvazzjoni ta' Parti Kontraenti li tagħti approvazzjonjiet tat-tip skont Regolament tan-NU anness mal-Ftehim tal-1958 għandha tivverifika jekk ikunx hemm arranġamenti adegwati u pjanijiet ta' kontroll dokumentati, li jridu jiġu miftiehma mal-manifattur għal kull approvazzjoni, biex f'intervalli speċifikati jitwettqu t-testijiet jew l-kontrolli assoċjati meħtieġa sabiex tiġi vverifikata l-konformità kontinwa mat-tip approvat, inkluż, speċifikament, fejn applikabbli, it-testijiet speċifikati fl-imsemmi Regolament tan-NU.
2.3.Id-detentur tal-approvazzjoni tat-tip tan-NU għandu, b'mod partikolari:
2.3.1.Jiżgura l-eżistenza u l-applikazzjoni tal-proċeduri għall-kontroll effettiv tal-konformità tal-prodotti (vetturi bir-roti, tagħmir u partijiet) mat-tip approvat;
2.3.2.Ikollu aċċess għat-tagħmir tal-ittestjar jew għal tagħmir xieraq ieħor meħtieġ għall-kontroll tal-konformità ma' kull tip approvat;
2.3.3.Jiżgura li d-dejta tar-riżultati tal-ittestjar jew tal-kontrolli jkunu reġistrati u li d-dokumenti annessi jibqgħu disponibbli għal perjodu li jiġi ddeterminat bi ftehim mal-awtorità tal-approvazzjoni. Dan il-perjodu ma jistax jaqbeż l-10 snin;
2.3.4.Janalizza r-riżultati ta' kull tip ta' test jew kontroll, sabiex jivverifika u jiżgura l-istabbiltà tal-karatteristiċi tal-prodott, filwaqt li jippermetti tolleranza għall-varjazzjoni tal-produzzjoni industrijali;
2.3.5.Jiżgura li għal kull tip ta' prodott, mill-anqas jitwettqu l-kontrolli previsti f'din l-Iskeda u t-testijiet previsti fir-Regolamenti tan-NU applikabbli;
2.3.6.Jiżgura li kull sett ta' kampjuni jew kampjuni għat-test li jagħtu evidenza ta' nuqqas ta' konformità fit-tip ta' test inkwistjoni jwasslu għal kampjunar u ttestjar ieħor. Għandhom jittieħdu l-passi meħtieġa kollha biex tiġi restawrata l-konformità tal-produzzjoni korrispondenti;
3.Arranġamenti ta’ verifiki kontinwi
3.1.L-awtorità li tat l-approvazzjoni tat-tip tan-NU tista’, fi kwalunkwe ħin, tivverifika l-metodi tal-kontroll tal-konformità applikati f’kull faċilità tal-produzzjoni.
3.1.1.L-arranġamenti normali għandhom isiru biex tiġi mmonitorjata l-effettività kontinwa tal-proċeduri stipulati fil-paragrafi 1 u 2 (valutazzjoni inizjali u arranġamenti tal-konformità tal-prodott) ta’ din l-Iskeda.
3.1.1.1.L-attivitajiet ta’ sorveljanza mwettqa mis-Servizzi Tekniċi (kwalifikati jew rikonoxxuti kif meħtieġ fil-paragrafu 1.3.3) għandhom jiġu aċċettati bħala li jissodisfaw ir-rekwiżiti tal-paragrafu 3.1.1 fir-rigward tal-proċeduri stabbiliti fil-valutazzjoni inizjali.
3.1.1.2.Il-frekwenza normali tal-verifiki mill-awtorità tal-approvazzjoni tat-tip (minbarra dawk imsemmija fil-punt 3.1.1.1) għandha tkun tali li tiżgura li l-kontrolli rilevanti applikati skont il-paragrafi 1 u 2 ta’ din l-Iskeda jiġu riveduti f’intervalli abbażi tal-metodoloġija ta’ valutazzjoni tar-riskji skont l-istandard internazzjonali ISO 31000:2009 — Ġestjoni tar-Riskji — Prinċipji u linji gwida u, fil-każijiet kollha, bi frekwenza minima ta’ darba kull tliet snin. Din il-metodoloġija għandha tqis, b'mod partikolari, kwalunkwe nuqqas ta’ konformità indikata mill-Partijiet Kontraenti skont l-Artikolu 4 tal-Ftehim tal-1958.
3.2.F’kull reviżjoni, ir-rekords tat-testijiet u tal-kontrolli u r-rekords tal-produzzjoni għandhom jitqiegħdu għad-dispożizzjoni tal-ispettur; b'mod partikolari, ir-rekords ta' dawk it-testijiet jew kontrolli dokumentati kif meħtieġ fil-paragrafu 2.2.
3.3.L-ispettur jista’ jagħżel kampjuni b'mod aleatorju biex jiġu ttestjati fil-laboratorju tal-manifattur jew fil-faċilitajiet tas-Servizz Tekniku. F’dak il-każ għandhom jitwettqu biss testijiet fiżiċi. In-numru minimu ta' kampjuni jista' jiġi ddeterminat skont ir-riżultati tal-verifika tal-manifattur stess.
3.4.Meta l-livell tal-kontroll jidher li mhux sodisfaċenti, jew meta jkun jidher li tkun meħtieġa verifika tal-validità tat-testijiet imwettqa b’applikazzjoni tal-paragrafu 3.2, l-ispettur għandu jagħżel il-kampjuni li jridu jintbagħtu lis-Servizz Tekniku biex iwettaq it-testijiet fiżiċi.
3.5.F’każijiet fejn, matul spezzjoni jew reviżjoni ta’ monitoraġġ, joħorġu riżultati mhux sodisfaċenti, l-awtorità tal-approvazzjoni għandha tiżgura li jittieħdu l-passi kollha meħtieġa biex tiġi restawrata l-konformità tal-produzzjoni mill-aktar fis possibbli.
Skeda 2
L-Ewwel parti: Valutazzjoni, deżinjazzjoni u notifika tas-Servizzi Tekniċi
1.Deżinjazzjoni tas-Servizzi Tekniċi
1.1.Meta Awtorità tal-Approvazzjoni taħtar Servizz Tekniku, dan tal-aħħar għandu jikkonforma mad-dispożizzjonijiet ta’ din l-Iskeda.
1.2.Is-Servizzi Tekniċi għandhom iwettqu jew jagħmlu superviżjoni tat-testijiet meħtieġa għall-approvazzjoni jew l-ispezzjonijiet speċifikati f’Regolamenti tan-NU, għajr meta jkunu speċifikament permessi proċeduri alternattivi. Huma ma jistgħux iwettqu testijiet jew spezzjonijiet li għalihom ma ġewx iddeżinjati kif dovut.
Il-prestazzjoni tas-Servizzi Tekniċi u l-kwalità tat-testijiet u tal-ispezzjonijiet li jwettqu għandhom jiżguraw li l-prodotti li għalihom tintalab l-approvazzjoni tat-tip tan-NU jiġu vverifikati għall-konformità tagħhom mar-rekwiżiti tar-Regolamenti tan-NU applikabbli li s-Servizzi Tekniċi ġew iddeżinjati għalihom.
1.3.Is-Servizzi Tekniċi għandhom jiġu ddeżinjati f’waħda jew aktar minn dawn l-erba’ kategoriji ta’ attivitajiet, skont il-qasam ta’ kompetenza tagħhom:
(a)Kategorija A: Servizzi Tekniċi li jwettqu t-testijiet imsemmija f’Regolamenti tan-NU fil-faċilitajiet tagħhom stess;
(b)Kategorija B: Servizzi Tekniċi li jagħmlu superviżjoni tat-testijiet imsemmija fir-Regolamenti tan-NU, liema testijiet jitwettqu fil-faċilitajiet tal-manifattur jew fil-faċilitajiet ta’ parti terza;
(c)Kategorija C: Servizzi Tekniċi li jivvalutaw u jimmonitorjaw fuq bażi regolari l-proċeduri tal-manifattur għall-kontroll tal-konformità tal-produzzjoni;
(d)
Kategorija D: Servizzi Tekniċi li jagħmlu superviżjoni jew iwettqu testijiet jew spezzjonijiet fil-qafas tas-sorveljanza tal-konformità tal-produzzjoni.
1.4.Is-Servizzi Tekniċi għandhom juru kompetenzi xierqa, għarfien tekniku speċifiku u esperjenza fl-oqsma speċifiċi koperti bir-Regolamenti tan-NU li huma jkunu ddeżinjati għalihom.
Barra minn hekk, is-Servizzi Tekniċi għandhom jikkonformaw mal-istandards elenkati fit-Tieni parti ta’ din l-Iskeda li jkunu rilevanti għall-kategoriji ta’ attivitajiet li għalihom ikunu ddeżinjati, iżda mhux neċessarjament jiġu approvati/akkreditati skont dawn l-istandards.
Is-Servizzi tekniċi għandhom jiżguraw li jkunu ħielsa minn kwalunkwe kontroll u influwenza ta’ partijiet interessati li jistgħu jaffettwaw b’mod ħażin l-imparzjalità u l-kwalità ta’ dawn it-testijiet u spezzjonijiet.
Is-Servizzi Tekniċi għandu jkollhom aċċess għall-faċilitajiet tal-ittestjar u l-apparati tal-kejl meħtieġa għas-superviżjoni jew it-twettiq tat-testijiet jew spezzjonijiet imsemmija fir-Regolamenti tan-NU li s-Servizzi Tekniċi ġew iddeżinjati għalihom.
1.5.Awtorità tal-approvazzjoni tista’ taġixxi bħala Servizz Tekniku għal waħda jew aktar mill-attivitajiet imsemmija fil-paragrafu 1.3. Meta awtorità tal-approvazzjoni li taġixxi bħala Servizz Tekniku tkun ġiet maħtura bil-liġi nazzjonali ta’ Parti Kontraenti u tkun iffinanzjata minn din il-Parti Kontraenti, id-dispożizzjonijiet ta’ din l-Iskeda jew regoli ekwivalenti għad-dispożizzjonijiet fil-paragrafi 1, 2 u 3.4 ta’ din l-Iskeda għandhom jiġu mħarsa. Dan japplika wkoll għas-Servizzi Tekniċi li jkunu ġew maħtura bil-liġi nazzjonali ta’ Parti Kontraenti u li jkunu suġġetti għal kontroll finanzjarju u amministrattiv mill-Gvern ta’ dik il-Parti Kontraenti. Ir-regoli ekwivalenti għandhom jiggarantixxu l-istess livell ta’ prestazzjoni u indipendenza.
1.6.Minkejja l-paragrafu 3.3, il-manifattur jew ir-rappreżentant tiegħu li jaġixxi f’ismu jista’ jiġi ddeżinjat bħala Servizz Tekniku għall-attivitajiet tal-kategorija A għal dawk ir-Regolamenti tan-NU li jipprevedu tali deżinjazzjoni biss. F’dan il-każ, u minkejja l-paragrafu 1.4, dan is-Servizz Tekniku għandu jiġi akkreditat skont l-istandards imsemmija fil-paragrafu 1 tat-Tieni parti ta’ din l-Iskeda.
1.7.L-entitajiet imsemmija fil-paragrafi 1.5 u 1.6 għandhom jikkonformaw mad-dispożizzjonijiet tal-paragrafu 1.
2.Valutazzjoni tal-kompetenzi tas-Servizzi Tekniċi
2.1.Il-kompetenzi msemmija fil-paragrafu 1 għandhom jintwerew permezz ta' rapport tal-valutazzjoni stabbilit minn awtorità kompetenti. Dan jista’ jinkludi ċċertifikat ta’ akkreditazzjoni maħruġ minn entita ta’ akkreditazzjoni.
2.2.Il-valutazzjoni msemmija fil-paragrafu 2.1 għandha titwettaq skont id-dispożizzjonijiet tat-tielet Parti ta' din l-Iskeda.
Ir-rapport tal-valutazzjoni għandu jiġi rivedut wara perjodu massimu ta’ tliet snin.
2.3.Ir-rapport tal-valutazzjoni għandu jiġi kkomunikat lis-Segretarjat tan-NU/KEE u lill-Partijiet Kontraenti fuq talba.
2.4.L-awtorità tal-approvazzjoni li taġixxi bħala Servizz Tekniku għandha turi konformità permezz ta’ evidenza dokumentata.
Din tinkludi valutazzjoni li għandha titwettaq minn awdituri indipendenti mill-attività li tkun qed tiġi vvalutata. Dawn l-awdituri jistgħu jkunu mill-istess organizzazzjoni sakemm huma jkunu indipendenti mill-persunal li jwettaq l-attività vvalutata.
2.5.Il-manifattur jew ir-rappreżentant tiegħu li jaġixxi f’ismu, iddeżinjat bħala s-Servizz Tekniku, għandu jikkonforma mad-dispożizzjonijiet rilevanti tal-paragrafu 2.
3.Proċeduri għan-notifika
3.1.Il-Partijiet kontraenti għandhom jinnotifikaw lis-segretarjat tan-NU/KEE bl-isem, l-indirizz, inkluż l-indirizz elettroniku u l-kategorija tal-attivitajiet fir-rigward ta’ kull Servizz Tekniku ddeżinjat. Huma għandhom jinnotifikaw ukoll lis-Segretarjat tan-NU/KEE bi kwalunkwe modifikazzjonijiet sussegwenti għalihom.
L-att ta’ notifika għandu jiddikjara r-Regolamenti tan-NU li għalihom ġew iddeżinjati s-Servizzi Tekniċi.
3.2.Servizz tekniku jista’ jwettaq l-attivitajiet deskritti fil-paragrafu 1 għall-finijiet tal-approvazzjoni tat-tip tan-NU biss jekk dan ikun ġie notifikat minn qabel lis-segretarjat tan-NU/KEE.
3.3.L-istess Servizz Tekniku jista’ jiġi ddeżinjat u nnotifikat minn diversi Partijiet Kontraenti, irrispettivament mill-kategorija tal-attivitajiet li jwettaq.
3.4.Is-segretarjat tan-NU/KEE għandu jippubblika l-lista u d-dettalji ta' kuntatt tal-awtoritajiet tal-approvazzjoni u tas-Servizzi Tekniċi fuq is-sit elettroniku tiegħu.
It-Tieni parti: L-istandards li s-Servizzi Tekniċi, imsemmija fil-paragrafi 1 sa 3.4 tal-Ewwel parti ta’ din l-Iskeda, għandhom jikkonformaw magħhom
1.L-attivitajiet ta' ttestjar għall-approvazzjoni tat-tip tan-NU, li għandhom jitwettqu skont ir-regolamenti tan-NU
1.1.Kategorija A (testijiet imwettqa fil-faċilitajiet tagħhom stess):
ISO/IEC 17025:2005 dwar ir-rekwiżiti ġenerali għall-kompetenza tal-laboratorji tal-ittestjar u tal-ikkalibrar.
Servizz Tekniku ddeżinjat għall-attivitajiet tal-Kategorija A jista’ jwettaq jew jagħmel superviżjoni tat-testijiet skont ir-Regolamenti tan-NU li għalihom ġie ddeżinjat, fil-faċilitajiet tal-manifattur jew tar-rappreżentant tiegħu.
1.2.Kategorija B (superviżjoni ta’ testijiet imwettqa fil-faċilitajiet tal-manifattur jew fil-faċilitajiet tar-rappreżentant tiegħu):
ISO/IEC 17020:2012 dwar il-kriterji ġenerali għall-operazzjoni ta’ tipi differenti ta’ entitajiet li jwettqu spezzjoni.
Qabel iwettaq jew jagħmel superviżjoni ta' kwalunkwe test fil-faċilitajiet ta’ manifattur jew tar-rappreżentant tiegħu, is-Servizz Tekniku għandu jivverifika li l-faċilitajiet tal-ittestjar u l-apparati tal-kejl jikkonformaw mar-rekwiżiti xierqa tal-paragrafu 1.1.
2.Attivitajiet relatati mal-Konformità tal-Produzzjoni
2.1.Kategorija C (proċedura għall-valutazzjoni inizjali u verifiki ta’ sorveljanza tas-sistema tal-ġestjoni tal-kwalità tal-manifattur):
ISO/IEC 17021:2011 dwar ir-rekwiżiti għall-entitajiet li jipprovdu verifika u ċertifikazzjoni ta' sistemi tal-ġestjoni.
2.2.Kategorija D (spezzjoni jew ittestjar ta’ kampjuni tal-produzzjoni jew superviżjoni tagħhom):
ISO/IEC 17020:2012 dwar il-kriterji ġenerali għall-operazzjoni ta’ tipi differenti ta’ entitajiet li jwettqu spezzjoni.
It-tielet Parti: Proċedura għall-valutazzjoni tas-Servizzi Tekniċi
1.Għan
1.1.Din il-parti tal-Iskeda 2 tistabbilixxi l-kundizzjonijiet li bihom għandha titwettaq il-proċedura ta’ valutazzjoni tas-Servizzi Tekniċi mill-awtorità kompetenti msemmija fil-paragrafu 2 tal-Ewwel parti ta' din l-Iskeda.
1.2.Dawn ir-rekwiżiti għandhom japplikaw, mutatis mutandis, għas-Servizzi Tekniċi kollha, irrispettivament mill-istatus legali tagħhom (organizzazzjoni indipendenti, manifattur jew awtorità tal-approvazzjoni li taġixxi bħala Servizz Tekniku).
2.Prinċipji ta’ valutazzjoni
Il-valutazzjoni għandha tkun karatterizzata mill-ħarsien ta' għadd ta’ prinċipji:
(a)L-indipendenza, li hija l-bażi għall-imparzjalità u l-oġġettività tal-konklużjonijiet;
(b)Approċċ ibbażat fuq l-evidenza, li jiggarantixxi konklużjonijiet affidabbli u riproduċibbli.
L-awdituri għandhom juru affidabbiltà u integrità, u għandhom jirrispettaw il-kunfidenzjalità u d-diskrezzjoni. Huma għandhom jirrappurtaw b’mod onest u preċiż il-fatti misjuba u l-konklużjonijiet.
3.Kompetenzi tal-awditur
3.1.Il-valutazzjonijiet jistgħu jitwettqu biss minn awdituri li jkollhom l-għarfien tekniku u amministrattiv xieraq għal dawn il-finijiet.
3.2.L-awdituri jridu jkunu tħarrġu speċifikiment għall-attivitajiet ta’ valutazzjoni. Barra minn hekk, huma għandu jkollhom l-għarfien speċifiku tal-qasam tekniku li fih is-Servizz Tekniku se jeżerċita l-attivitajiet tiegħu.
3.3.Bla preġudizzju għad-dispożizzjonijiet tal-paragrafi 3.1 u 3.2 ta' hawn fuq, il-valutazzjoni msemmija fil-paragrafu 2.5 tal-Ewwel parti ta' din l-Iskeda għandha titwettaq minn awdituri indipendenti mill-attivitajiet li għalihom qed titwettaq il-valutazzjoni.
4.Applikazzjoni għal deżinjazzjoni
4.1.Rappreżentant tas-Servizz Tekniku applikant, awtorizzat kif xieraq, għandu jippreżenta applikazzjoni formali lill-awtorità kompetenti. L-applikazzjoni għandha tinkludi tal-anqas dan li ġej:
(a)Informazzjoni ġenerali dwar is-Servizz Tekniku, inkluż l-entità korporattiva, l-isem, l-indirizzi, l-istatus legali u r-riżorsi umani u tekniċi;
(b)Deskrizzjoni dettaljata li tinkludi curriculum vitae tal-persunal inkarigat mill-ittestjar u tal-persunal maniġerjali li turi l-kompetenzi edukattivi u professjonali;
(c)Barra minn dan, is-Servizzi Tekniċi li jużaw metodi ta’ ttestjar virtwali għandhom jipprovdu xhieda tal-abbiltà tagħhom li jaħdmu f’ambjent megħjun bil-kompjuter;
(d)Informazzjoni ġenerali li tikkonċerna s-Servizz Tekniku, bħall-attivitajiet tiegħu, ir-relazzjoni tiegħu f’entità korporattiva akbar, jekk ikun il-każ, u l-indirizzi tal-post(ijiet) fiżiċi kollha li jridu jiġu koperti mill-ambitu tad-deżinjazzjoni;
(e)Dokument li permezz tiegħu, is-Servizz Tekniku jobbliga ruħu li jissodisfa r-rekwiżiti għad-deżinjazzjoni u l-obbligi l-oħra tiegħu kif applikabbli fir-Regolamenti tan-NU rilevanti li għalihom ikun ġie ddeżinjat;
(f)Deskrizzjoni tas-servizzi ta’ valutazzjoni tal-konformità li s-Servizz Tekniku jimpenja ruħu għalihom fil-qafas tar-Regolamenti tan-NU applikabbli u lista tar-Regolamenti tan-NU li għalihom is-Servizz Tekniku japplika biex jinħatar, inkluż il-limiti tal-kapaċità tiegħu, fejn applikabbli;
(g)Kopja tal-manwal ta’ garanzija tal-kwalità jew tar-regoli operattivi komparabbli tas-Servizz Tekniku.
4.2.L-awtorità kompetenti għandha tirrevedi għall-adegwatezza, l-informazzjoni li tingħata mis-Servizz Tekniku.
4.3.Is-Servizz Tekniku għandu jinnotifika lill-awtorità tal-approvazzjoni bi kwalunkwe modifika fl-informazzjoni pprovduta skont il-paragrafu 4.1.
5.Eżami tar-riżorsi
L-awtorità kompetenti għandha teżamina l-abbiltà tagħha li twettaq il-valutazzjoni tas-Servizz Tekniku, fir-rigward tal-politika tagħha, il-kompetenza tagħha u d-disponibbiltà ta’ awdituri u esperti xierqa.
6.Is-sottokuntrattar tal-valutazzjoni
6.1.L-awtorità kompetenti tista’ tagħti b’sottokuntratt partijiet tal-valutazzjoni lil awtorità ddeżinjata oħra jew titlob għal sostenn minn esperti tekniċi pprovduti minn awtoritajiet kompetenti oħra. Is-sottokuntratturi u l-esperti għandhom jiġu aċċettati mis-Servizz Tekniku applikant.
6.2.L-awtorità kompetenti għandha tqis iċ-ċertifikati ta’ akkreditazzjoni pertinenti sabiex tkun tista' tiffinalizza l-valutazzjoni globali tagħha tas-Servizz Tekniku.
7.Preparazzjoni għall-valutazzjoni
7.1.L-awtorità kompetenti għandha taħtar tim ta’ valutazzjoni formalment. L-awtorità kompetenti għandha tiżgura li dan it-tim ikollu l-kompetenza xierqa biex iwettaq kull kompitu. B’mod partikolari, fl-intier tiegħu, it-tim:
(a)Għandu jkollu l-għarfien xieraq dwar l-ambitu speċifiku li għalih qed tintalab id-deżinjazzjoni; u
(b)
Għandu jkun intiż biżżejjed biex ikun jista’ jagħmel valutazzjoni affidabbli tal-kompetenza tas-Servizz Tekniku li jopera fl-ambitu tad-deżinjazzjoni.
7.2.L-awtorità kompetenti għandha tiddefinixxi b’mod ċar il-kompitu mogħti lit-tim ta’ valutazzjoni. Il-kompitu tat-tim ta’ valutazzjoni hu li jeżamina d-dokumenti miġbura mis-Servizz Tekniku applikant u li jwettaq valutazzjoni fuq il-post.
7.3.L-awtorità kompetenti għandha taqbel, flimkien mas-Servizz tekniku u t-tim ta’ valutazzjoni assenjat, dwar id-data u l-iskeda għall-valutazzjoni. Madankollu, tibqa’ r-responsabbiltà tal-awtorità kompetenti li tfittex data li tkun konformi mal-pjan ta’ sorveljanza u rivalutazzjoni.
7.4.L-awtorità kompetenti għandha tiżgura li t-tim ta’ valutazzjoni jkun fornut bid-dokumenti ta’ kriterji xierqa, rekords ta’ valutazzjonijiet preċedenti, u d-dokumenti u r-rekords rilevanti tas-Servizz Tekniku.
8.Valutazzjoni fuq il-post
It-tim ta’ valutazzjoni għandu jwettaq il-valutazzjoni tas-Servizz Tekniku fuq il-post tas-Servizz Tekniku li minnu titwettaq attività ewlenija waħda jew iżjed u, fejn rilevanti, għandu jagħmel valutazzjoni ta' xhieda fuq il-post f'postijiet oħra magħżula li minnhom jopera s-Servizz Tekniku.
9.Analiżi tas-sejbiet u rapport tal-il-valutazzjoni
9.1.It-tim tal-valutazzjoni għandu janalizza l-informazzjoni u l-evidenza rilevanti kollha miġbura waqt ir-reviżjoni tad-dokumenti u r-rekords u l-valutazzjoni fuq il-post. Din l-analiżi għandha tkun suffiċjenti biex tippermetti lit-tim jiddetermina l-livell tal-kompetenza u tal-konformità tas-Servizz Tekniku mar-rekwiżiti għad-deżinjazzjoni.
9.2.Il-proċeduri ta’ rappurtar tal-awtorità kompetenti għandhom jiżguraw li r-rekwiżiti li ġejjin ikunu ssodisfati.
9.2.1.Għandha ssir laqgħa bejn it-tim tal-valutazzjoni u s-Servizz Tekniku qabel jitilqu minn fuq il-post. F’din il-laqgħa, it-tim tal-valutazzjoni għandu jipprovdi rapport bil-miktub u/jew orali dwar is-sejbiet miksuba mill-analiżi. Is-Servizz Tekniku għandu jingħata l-opportunità li jagħmel mistoqsijiet dwar is-sejbiet, inkluż dwar in-nuqqasijiet ta’ konformità, jekk ikun il-każ, u l-bażi tagħhom.
9.2.2.Rapport bil-miktub dwar ir-riżultat tal-valutazzjoni għandu jiġi ppreżentat mill-ewwel lis-Servizz Tekniku. Dan ir-rapport tal-valutazzjoni għandu jinkludi kummenti dwar il-kompetenza u l-konformità, u għandu jidentifika n-nuqqasijiet ta’ konformità, jekk ikun il-każ, li jridu jiġu solvuti sabiex tinżamm il-konformità mar-rekwiżiti kollha tad-deżinjazzjoni
9.2.3.Is-Servizz Tekniku għandu jiġi mistieden jirrispondi għar-rapport tal-valutazzjoni u jiddeskrivi l-azzjonijiet speċifiċi meħuda jew ippjanati li jittieħdu, fi żmien definit, biex kwalunkwe nuqqas ta’ konformità identifikat jiġi solvut.
9.3.L-awtorità kompetenti għandha tiżgura li r-risposti tas-Servizz Tekniku jkunu effettivi u suffiċjenti biex isolvu n-nuqqasijiet ta’ konformità. Jekk jinsab li r-risposti tas-Servizz Tekniku ma jkunux suffiċjenti, għandha tintalab informazzjoni ulterjuri. Barra minn hekk, tista’ tintalab evidenza tal-implimentazzjoni effettiva ta’ azzjonijiet meħuda, jew tista’ titwettaq valutazzjoni b’segwitu biex tivverifika l-implimentazzjoni effettiva ta’ azzjonijiet korrettivi.
9.4.Ir-rapport tal-valutazzjoni għandu jinkludi, bħala minimu:
(a)L-identifikazzjoni unika tas-Servizz Tekniku;
(b)Id-data/i tal-valutazzjoni fuq il-post;
(c)L-isem/ismijiet tal-awditur(i) u/jew esperti involuti fil-valutazzjoni;
(d)L-identifikazzjoni unika tal-postijiet kollha vvalutati;
(e)L-ambitu propost tad-deżinjazzjoni li ġiet ivvalutata;
(f)Dikjarazzjoni dwar l-adegwatezza tal-organizzazzjoni interna u tal-proċeduri adottati mis-Servizz Tekniku li jixhdu l-kompetenza tiegħu, kif stabbilita permezz tal-issodisfar tar-rekwiżiti għad-deżinjazzjoni;
(g)Informazzjoni dwar is-soluzzjoni tan-nuqqasijiet ta' konformità kollha;
(h)Rakkomandazzjoni dwar jekk l-applikant għandux jiġi ddeżinjat jew ikkonfermat bħala Servizz Tekniku u, jekk iva, l-ambitu tad-deżinjazzjoni.
10.L-għoti/il-konferma tad-deżinjazzjoni
10.1.L-awtorità tal-approvazzjoni għandha, mingħajr dewmien żejjed, tieħu d-deċiżjoni dwar jekk tagħtix, tikkonfermax jew testendix id-deżinjazzjoni ta’ Servizz Tekniku abbażi tar-rapport(i) u kwalunkwe informazzjoni rilevanti oħra.
10.2.L-awtorità tal-approvazzjoni għandha tipprovdi ċertifikat lis-Servizz Tekniku. Dan iċ-ċertifikat għandu jidentifika dan li ġej:
(a)L-identità u l-logo tal-awtorità tal-approvazzjoni;
(b)L-identità unika tas-Servizz Tekniku ddeżinjat;
(c)Id-data effettiva tal-għoti tad-deżinjazzjoni u d-data tal-iskadenza;
(d)Indikazzjoni fil-qosor jew referenza tal-ambitu tad-deżjinazzjoni (Regolamenti tan-NU applikabbli, jew partijiet minnhom);
(e)Dikjarazzjoni ta’ konformità u referenza għal din l-Iskeda.
11.Rivalutazzjoni u sorveljanza
11.1.Ir-rivalutazzjoni hija simili għal valutazzjoni inizjali, iżda hawn trid titqies l-esperjenza miksuba waqt il-valutazzjonijiet preċedenti. Il-valutazzjonijiet ta’ sorveljanza fuq il-post huma anqas estensivi mir-rivalutazzjonijiet.
11.2.L-awtorità kompetenti għandha tfassal il-pjan tagħha għar-rivalutazzjoni u s-sorveljanza ta’ kull Servizz Tekniku ddeżinjat biex jiġu vvalutati, fuq bażi regolari, kampjuni rappreżentattivi tal-ambitu tad-deżinjazzjoni.
L-intervall bejn il-valutazzjonijiet fuq il-post, kemm ir-rivalutazzjonijiet u kemm is-sorveljanza, jiddependi fuq l-istabbiltà b'attestazzjoni li jkun kiseb is-Servizz Tekniku.
11.3.Meta, waqt is-sorveljanza jew ir-rivalutazzjonijiet, jiġu identifikati xi nuqqasijiet ta’ konformità, l-awtorità kompetenti għandha tiddefinixxi limiti ta’ żmien stretti għall-implimentazzjoni ta' azzjonijiet korrettivi.
11.4.Meta l-azzjonijiet korrettivi jew ta' titjib ma jkunux twettqu fil-qafas ta' żmien miftiehem jew jitqiesu li mhumiex suffiċjenti, l-awtorità kompetenti għandha tadotta miżuri xierqa bħal, twettiq ta' valutazzjoni ulterjuri, is-sospensjoni/l-irtirar tad-deżinjazzjoni għal waħda jew iżjed mill-attivitajiet li għalihom is-Servizz Tekniku ġie ddeżinjat.
11.5.Meta l-awtorità kompetenti tiddeċiedi li tissospendi jew tirtira d-deżinjazzjoni ta’ Servizz Tekniku, din għandha tinformah permezz ta’ ittra reġistrata, u għandha tinforma lis-segretarjat tan-NU/KEE b'dan. Fi kwalunkwe każ, l-awtorità kompetenti għandha tadotta l-miżuri kollha neċessarji biex tiżgura l-kontinwità tal-attivitajiet diġà mibdija mis-Servizz Tekniku.
12.Rekords dwar is-Servizzi Tekniċi ddeżinjati
12.1.L-awtorità kompetenti għandha żżomm rekords dwar is-Servizzi Tekniċi biex turi li r-rekwiżiti għad-deżinjazzjoni, inkluż il-kompetenza, ġew issodisfati effettivament.
12.2.L-awtorità kompetenti għandha żżomm ir-rekords dwar is-Servizzi Tekniċi b'mod sikur biex tiżgura l-kunfidenzjalità.
12.3.Ir-rekords dwar is-Servizzi Tekniċi għandhom jinkludu tal-anqas dan li ġej:
(a)Il-korrispondenza rilevanti;
(b)Ir-rekords u r-rapporti tal-valutazzjoni;
(c)Kopji taċ-ċertifikati tad-deżinjazzjoni.
Skeda 3
Proċeduri għall-approvazzjonijiet tat-tip tan-NU
1.Applikazzjoni għal approvazzjoni tat-tip tan-NU u l-proċedura tagħha
1.1.L-applikazzjoni għal approvazzjoni tat-tip tan-NU għandha tiġi ppreżentata lill-awtorità tal-approvazzjoni ta’ Parti Kontraenti mill-manifattur jew mir-rappreżentant awtorizzat tagħhom (minn hawn’ il quddiem imsejjaħ "l-applikant").
1.2.Applikazzjoni waħda biss tista’ tiġi ppreżentata għal tip partikolari ta’ vettura, tagħmir jew parti u dan jista’ jsir biss f’Parti Kontraenti waħda li tapplika r-Regolamenti tan-NU skont l-approvazzjoni tat-tip tan-NU li tintalab. Għandha tiġi ppreżentata applikazzjoni separata għal kull tip li jrid jiġi approvat.
1.3.L-applikazzjoni għandha tkun akkumpanjata bl-informazzjoni kif speċifikat fir-Regolamenti tan-NU, skont l-approvazzjoni tintalab. Din l-informazzjoni għandha tinkludi deskrizzjoni dettaljata tal-karatteristiċi tat-tip li għandu jiġi approvat, inkluż tpinġijiet, dijagrammi u stampi, skont ma jkun meħtieġ.
1.4.L-awtorità tal-approvazzjoni tista’, permezz ta' talba motivata, titlob lill-applikant jipprovdi kwalunkwe informazzjoni addizzjonali meħtieġa sabiex tkun tista’ tittieħed deċiżjoni dwar it-testijiet tal-approvazzjoni meħtieġa jew biex jitħaffef it-twettiq ta’ dawk it-testijiet.
1.5.L-applikant għandu jagħmel disponibbli lill-awtorità tal-approvazzjoni l-vetturi bir-roti, it-tagħmir jew il-partijiet kollha li jkunu meħtieġa għat-twettiq tat-testijiet li jirrikjedu r-Regolamenti tan-NU li skonthom qed tintalab l-approvazzjoni.
1.6.Il-konformità mar-rekwiżiti stipulati fir-Regolamenti tan-NU għandha tiġi ppruvata permezz ta’ testijiet xierqa mwettqa fuq vetturi bir-roti, tagħmir u partijiet li jkunu rappreżentattivi tat-tip li jrid jiġi approvat.
L-awtorità tal-approvazzjoni għandha tapplika l-prinċipju ta’ “l-agħar xenarju”, billi, għat-test, tagħżel il-varjant jew il-verżjoni tat-tip speċifikat li tirrappreżenta t-tip li għandu jiġi approvat fl-agħar kundizzjonijiet. Id-deċiżjonijiet li jittieħdu flimkien mal-ġustifikazzjoni tagħhom għandhom jiġu rreġistrati fid-dokumentazzjoni tal-approvazzjoni.
Madankollu, l-applikant jista’ jagħżel, bi qbil mal-awtorità tal-approvazzjoni, vettura, tagħmir jew parti li, minkejja li ma jkunux rappreżentattivi tat-tip li jrid jiġi approvat, jgħaqqdu flimkien għadd ta' karatteristiċi mill-anqas favorevoli fir-rigward tal-livell tal-prestazzjoni meħtieġ mir-Regolamenti tan-NU (l-agħar xenarju). Biex tittieħed deċiżjoni dwar l-għażla tal-agħar xenarju, jistgħu jintużaw metodi ta’ ttestjar virtwali.
1.7.It-testijiet tal-approvazzjoni għandhom jitwettqu jew jiġu ssorveljati mis-Servizzi Tekniċi. Il-proċeduri tal-ittestjar li jridu jiġu applikati u t-tagħmir u l-għodod speċifiċi li jridu jintużaw għandhom ikunu dawk speċifikati fir-Regolamenti tan-NU.
1.8.Bħala alternattiva għall-proċeduri tal-ittestjar imsemmija fil-paragrafi 1.6 u 1.7 ta' hawn fuq, fuq talba tal-applikant jista' jintuża ttestjar virtwali, sakemm dan ikun previst fir-Regolamenti tan-NU rilevanti u sakemm jiġu ssodisfati l-kundizzjonijiet ġenerali kif stipulat fl-Iskeda 8 annessa mal-Ftehim tal-1958.
1.9.Il-Partijiet Kontraenti għandhom jagħtu l-approvazzjonijiet tat-tip biss, meta tiġi żgurata l-konformità mar-rekwiżiti tal-konformità tal-produzzjoni tal-Iskeda 1 annessa mal-Ftehim tal-1958.
1.10.Meta t-testijiet tal-approvazzjoni jkunu wrew li t-tip huwa konformi mar-rekwiżiti tekniċi tar-Regolament tan-NU, l-approvazzjoni ta’ dak it-tip għandha tingħata, għandu jiġi assenjat numru tal-approvazzjoni skont l-Iskeda 4 annessa mal-Ftehim tal-1958 u għandha tiġi assenjata marka tal-approvazzjoni lil kull tip skont id-dispożizzjonijiet speċifiċi tar-Regolament tan-NU kkonċernat.
1.11.L-awtorità tal-approvazzjoni għandha tiżgura li dawn l-elementi jkunu inklużi fl-approvazzjoni tad-dokumentazzjoni:
(a)Rekord dwar l-għażla tal-agħar xenarju u l-ġustifikazzjoni għal dik l-għażla. Dan jista’ jinkludi informazzjoni pprovduta mill-manifattur;
(b)Rekord ta’ kwalunkwe interpretazzjoni teknika sinifikanti li ssir, tal-metodi differenti ta’ ttestjar applikati, jew ta' teknoloġiji ġodda introdotti;
(c)Rapport tat-test mis-Servizz Tekniku li jinkludi l-valuri rreġistrati miksuba waqt il-kejl u t-testijiet meħtieġa mir-Regolament tan-NU;
(d)Dokumenti ta’ informazzjoni mill-manifattur, li jispeċifikaw il-karatteristiċi tat-tip li jrid jiġi approvat;
(e)Dikjarazzjoni ta’ konformità fir-rigward tal-konformità tar-rekwiżiti tal-produzzjoni fl-Iskeda 1 annessa mal-Ftehim tal-1958, li tagħti dettalji dwar liema mill-arranġamenti msemmija fil-paragrafu 1.3 tal-Iskeda 1 annessa mal-Ftehim tal-1958 ġew meqjusa bħala l-bażi għall-valutazzjoni inizjali kif ukoll id-data tal-valutazzjoni inizjali u kwalunkwe attività ta’ sorveljanza;
(f)Iċ-ċertifikat tal-approvazzjoni tat-tip.
2.Emendi tal-approvazzjonijiet tat-tip tan-NU
2.1.Il-manifatturi li jkollhom approvazzjoni tat-tip tan-NU għall-vettura, għat-tagħmir jew għall-partijiet tagħhom għandhom jinformaw mingħajr dewmien lill-Parti Kontraenti li tkun ħarġet approvazzjoni tat-tip tan-NU bi kwalunkwe bidla fil-karatteristiċi tat-tip kif ġew irreġistrati fid-dokument ta' informazzjoni msemmi fil-paragrafu 1.3.
2.2.Il-Parti Kontraenti għandha tiddeċiedi liema waħda miż-żewġ proċeduri għall-emendar tal-approvazzjoni tat-tip tan-NU, kif stipulati fil-paragrafi 2.5 u 2.6, għandha tiġi segwita. Fejn ikun meħtieġ, il-Parti Kontraenti tista’ tiddeċiedi, f’konsultazzjoni mal-manifattur, li għandu mnejn ikun meħtieġ li tinħareġ approvazzjoni tat-tip tan-NU ġdida.
2.3.Applikazzjoni għall-emendar ta’ approvazzjoni tat-tip tan-NU tista' tiġi ppreżentata biss lill-Parti Kontraenti li tkun ħarġet l-approvazzjoni tat-tip tan-NU oriġinali.
2.4.Jekk il-Parti Kontraenti tqis li, għall-fini tal-emendar tal-approvazzjoni tat-tip tan-NU jkun meħtieġ li jitwettqu spezzjonijiet jew testijiet, din għandha tinforma lill-manifattur b'dan.
2.5.Meta l-karatteristiċi tat-tip kif irreġistrati fid-dokumenti ta’ informazzjoni u r-rapporti tat-test ikunu nbidlu u l-Parti Kontraenti tqis li l-bidliet aktarx ma jkollhomx effett avvers apprezzabbli fuq il-prestazzjoni ambjentali u/jew tas-sikurezza funzjonali, u li fi kwalunkwe każ it-tip xorta għadu konformi mar-rekwiżiti tar-Regolamenti tan-NU kkonċernati, il-modifika tal-approvazzjoni tat-tip tan-NU għandha tiġi identifikata bħala “reviżjoni”.
F'każ bħal dan, il-Parti Kontraenti għandha toħroġ il-paġni riveduti tad-dokumenti ta' informazzjoni u tar-rapporti tat-test kif meħtieġ, u timmarka kull paġna riveduta biex turi b’mod ċar in-natura tal-modifika u d-data tal-ħruġ mill-ġdid. Verżjoni konsolidata aġġornata tad-dokumenti ta’ informazzjoni u tar-rapporti tat-test, flimkien ma’ deskrizzjoni dettaljata tal-modifika, għandha titqies li tissodisfa dan ir-rekwiżit.
2.6.L-emenda ta’ approvazzjoni tat-tip tan-NU għandha tissejjaħ “estensjoni” jekk, minbarra l-bidla tad-dejta rreġistrata fid-dokumenti ta’ informazzjoni:
(a)Ikunu meħtieġa aktar spezzjonijiet jew testijiet; jew
(b)Tinbidel xi informazzjoni dwar id-dokument ta’ komunikazzjoni (bl-eċċezzjoni ta’ partijiet annessi magħha); jew
(c)L-approvazzjoni ta' serje ta’ emendi aktar tard tintalab wara d-dħul fis-seħħ tagħha, li tista’ tingħata bil-kundizzjoni li r-rekwiżiti ta’ serje ta’ emendi aktar tard jiġu ssodisfati.
2.7.Il-konferma jew ir-rifjut tal-emendar tal-approvazzjoni tat-tip tan-NU, flimkien mal-ispeċifikazzjoni tal-bidliet, għandhom jiġu kkomunikati lill-Partijiet Kontraenti għall-Ftehim tal-1958 li japplikaw ir-Regolament tan-NU permezz ta’ formola ta’ komunikazzjoni. Barra minn hekk, il-werrej tad-dokumenti ta’ informazzjoni u tar-rapporti tat-test, mehmuż mad-dokument ta' komunikazzjoni, għandu jiġi emendat kif meħtieġ biex jindika d-data tal-aktar reviżjoni jew estensjoni reċenti.
2.8.L-awtorità tal-approvazzjoni tat-tip li tagħti l-estensjoni tal-approvazzjoni għandha taġġorna n-numru tal-approvazzjoni b'numru ta' estensjoni, inkrementat skont in-numru ta’ estensjonijiet suċċessivi diġà mogħtija skont l-Iskeda 4 annessa mal-Ftehim tal-1958, u toħroġ il-formola ta’ komunikazzjoni riveduta ddenotata b’dan in-numru ta' estensjoni.
Skeda 4
Numerazzjoni tal-approvazzjonijiet tat-tip tan-NU
1.Mid-dħul fis-seħħ tal-Ftehim tal-1958, il-Partijiet Kontraenti għandhom joħorġu numru ta’ approvazzjoni tat-tip skont il-paragrafu 1.10 tal-Iskeda 3 għal kull approvazzjoni tat-tip ġdida u kull estensjoni ta’ approvazzjoni bħal din.
2.Mid-dħul fis-seħħ tal-Ftehim tal-1958 u minkejja li d-dispożizzjonijiet dwar il-marki tal-approvazzjoni fi kwalunkwe verżjoni ta’ Regolamenti tan-NU jistgħu jkunu stipulaw mod ieħor, il-manifattur għandu jwaħħal marka tal-approvazzjoni, jekk mitluba, skont id-dispożizzjonijiet tar-Regolamenti tan-NU rilevanti; madankollu, f’dik il-marka għandu juża l-ewwel żewġ ċifri tat-Taqsima 2 u ċ-ċifri tat-Taqsima 3 tan-numru tal-approvazzjoni kif imsemmi f’din l-Iskeda bħala n-numru ta' approvazzjoni għal kull vettura bir-roti, tagħmir jew parti li lilhom tkun ingħatat approvazzjoni ġdida jew li għalihom ikunu ġew estiżi dawn l-approvazzjonijiet. Madankollu, din id-dispożizzjoni ma għandhiex tapplika meta Regolament tan-NU jkun jeħtieġ li fil-marka tal-approvazzjoni jintuża kodiċi tal-approvazzjoni jew kodiċi tal-identifikazzjoni minflok in-numru tal-approvazzjoni. Iż-żerijiet ta' quddiem iċ-ċifri tat-Taqsima 3 jistgħu jitħallew barra.
3.Għandu jiġi assenjat numru tal-approvazzjoni għal kull tip approvat. In-numru tal-approvazzjoni tat-tip għandu jkun magħmul minn 4 taqsimiet. Kull taqsima għandha tkun separata bis-simbolu "*".
Taqsima 1
L-ittra kapitali “E” segwita bin-numru distintiv tal-Parti Kontraenti li tkun tat l-approvazzjoni tat-tip.
Taqsima 2
In-numru tar-Regolament tan-NU rilevanti, segwit bl-ittra “R”, segwiti suċċessivament bi:
(a)Żewġ ċifri (b’żerijiet fuq quddiem, kif applikabbli) li jindikaw is-serje ta’ emendi li tinkorpora d-dispożizzjonijiet tekniċi tar-Regolament tan-NU applikata għall-approvazzjoni (00 għar-Regolament tan-NU fil-forma oriġinali tiegħu),
(b)Linja mmejla u żewġ ċifri (b’żerijiet fuq quddiem, kif applikabbli) li jindikaw in-numru tas-suppliment għas-serje ta’ emendi applikata għall-approvazzjoni (00 għas-serje ta’ emendi fil-forma oriġinali tagħha),
(c)Linja mmejla u karattru wieħed jew tnejn li jindikaw l-istadju ta’ implimentazzjoni, jekk applikabbli.
Taqsima 3
Numru sekwenzjali b’erba’ ċifri (b’żerijiet fuq quddiem, kif applikabbli). Is-sekwenza għandha tibda minn 0001.
Taqsima 4
Numru sekwenzjali b'żewġ ċifri (b'żerijiet fuq quddiem, jekk applikabbli) biex jindikaw l-estensjoni. Is-sekwenza għandha tibda minn 00.
Iċ-ċifri kollha għandhom ikunu ċifri Għarab.
4.L-istess Parti Kontraenti ma għandhiex tagħti l-istess numru lil approvazzjoni oħra.
Eżempji:
Eżempju tat-tieni estensjoni għar-raba’ approvazzjoni tat-tip maħruġa minn Netherlands skont ir-Regolament tan-NU Nru 58 fil-verżjoni oriġinali tagħha:
E4*58R00/00*0004*02
Eżempju tal-ewwel estensjoni għall-2439 approvazzjoni tat-tip maħruġa mir-Renju Unit tal-Gran Brittanja u l-Irlanda ta’ Fuq għal approvazzjoni ta’ vettura skont ir-Regolament tan-NU Nru 83, it-tielet serje ta’ emendi, verżjoni għal vettura tal-kategorija M, N1 Klassi I fir-rigward tal-emissjoni ta’ sustanzi li jniġġsu skont ir-rekwiżiti tal-fjuwil tal-magna:
E11*83R03/00J*2439*01
Skeda 5
Ċirkolazzjoni tad-dokumentazzjoni tal-approvazzjoni
1.Meta awtorità tal-approvazzjoni tkun meħtieġa jew tintalab tipprovdi kopja tal-approvazzjoni u tal-annessi tagħha, din għandha tibgħat id-dokumenti bħala kopji stampati, jew permezz tal-posta elettronika f’format elettroniku, jew bl-użu tal-bażi tad-dejta fuq sit tal-internet sikur stabbilita mill-Kummissjoni Ekonomika għall-Ewropa tan-Nazzjonijiet Uniti.
2.Id-dokumenti maħżuna fil-bażi tad-dejta fuq sit tal-internet sikur għandhom ikunu, minn tal-inqas, id-dokumenti speċifikati f’kull Regolament tan-NU. Dawn għandhom jinkludu dokumentazzjoni li tikkomunika lill-Partijiet Kontraenti l-avviż tal-approvazzjoni, tal-estensjoni, tar-rifjut jew tal-irtirar tal-approvazzjoni jew ta' produzzjoni mwaqqfa għalkollox ta’ tip ta’ vetturi bir-roti, tagħmir jew partijiet skont ir-Regolament tan-NU.
3.Jekk l-approvazzjonijiet tat-tip applikabbli għal vetturi bir-roti, tagħmir jew partijiet ikunu maħżuna fil-bażi tad-dejta fuq sit tal-internet sikur, il-marki tal-approvazzjoni meħtieġa mir-Regolamenti tan-NU jistgħu jiġu sostitwiti b'Identifikatur Uniku
preċedut bis-simbolu, sakemm ma jkunx speċifikat mod ieħor fir-Regolamenti tan-NU. Dan l-identifikatur uniku għandu jiġi ġġenerat awtomatikament mill-bażi tad-dejta.
4.Il-Partijiet Kontraenti kollha li japplikaw Regolament tan-NU għandu jkollhom aċċess, billi jużaw l-Indentifikatur Uniku, għall-informazzjoni dwar dak ir-Regolament tan-NU li tinsab fil-bażi tad-dejta, u dan għandu jipprovdi aċċess għall-informazzjoni rilevanti dwar l-approvazzjoni(jiet) speċifiċi.
5.Ir-Regolamenti tan-NU annessi mal-Ftehim tal-1958 jistgħu jeħtieġu ċ-ċirkolazzjoni ta’ approvazzjonijiet tat-tip permezz ta’ kopji elettroniċi bl-użu tal-bażi tad-dejta fuq sit tal-internet sikur, fejn dan ikun meħtieġ għall-operazzjoni effiċjenti tal-proċess tal-approvazzjoni, suġġett għal drittijiet ta’ aċċess kif definit mill-Partijiet Kontraenti.
Skeda 6
Proċeduri għas-soluzzjoni ta’ kwistjonijiet ta' interpretazzjoni fir-rigward tal-applikazzjoni ta’ Regolamenti tan-NU u l-għoti ta’ approvazzjonijiet skont dawn ir-Regolamenti tan-NU
1.Kwistjonijiet ta’ interpretazzjoni, qabel ma tingħata l-approvazzjoni tat-tip tan-NU
Meta applikazzjoni għal approvazzjoni tat-tip tan-NU tesiġi li l-awtorità tal-approvazzjoni tagħti interpretazzjoni sinifikanti dwar l-applikazzjoni tar-Regolament tan-NU, jew jekk dan jintalab mill-applikant għall-approvazzjoni, l-awtorità tal-approvazzjoni għandha tgħaddi l-informazzjoni lil awtoritajiet tal-approvazzjoni oħra u titlob parir mingħandhom, qabel ma tieħu deċiżjoni.
L-awtorità tal-approvazzjoni kkonċernata għandha tinnotifika lill-awtoritajiet tal-approvazzjoni l-oħra li japplikaw ir-Regolament tan-NU bil-kwistjoni u bis-soluzzjoni proposta tagħhom għall-interpretazzjoni, inkluż kwalunkwe informazzjoni ta’ sostenn mingħand il-manifattur. Bħala regola ġenerali, dan għandu jsir permezz ta’ mezzi elettroniċi. Għandu jingħata perjodu ta’ erbatax-il jum għat-tweġibiet mill-awtoritajiet tal-approvazzjoni l-oħra.
(a)Wara li tqis il-kummenti kollha li tirċievi, l-awtorità tal-approvazzjoni tkun tista' tagħti l-approvazzjonijiet skont l-interpretazzjoni l-ġdida.
(b)Jekk ma jkunx possibbli li tieħu deċiżjoni skont il-kummenti li tirċievi, l-awtorità tal-approvazzjoni għandha titlob kjarifika ulterjuri permezz tal-proċedura deskritta fil-paragrafu 3 ta' hawn taħt.
2.Kwistjonijiet ta’ interpretazzjoni, wara li tingħata l-approvazzjoni tat-tip tan-NU
F’sitwazzjonijiet fejn Partijiet Kontraenti jkollhom interpretazzjonijiet differenti, iżda wara li tkun inħarġet l-approvazzjoni, għandhom jiġu segwiti l-proċeduri li ġejjin.
L-ewwel nett, il-Partijiet Kontraenti kkonċernati għandhom jipprovaw isolvu l-kwistjoni bi ftehim reċiproku. Dan jirrikjedi kollaborazzjoni, u kull Parti Kontraenti jkollha tirrevedi l-proċeduri użati għall-ittestjar u l-approvazzjoni tal-vetturi bir-roti, tat-tagħmir u tal-partijiet li jkunu s-suġġett tal-kwistjoni ta’ interpretazzjoni. Għandhom jiġu applikati dawn il-proċeduri:
(a)F’każ li awtorità tal-approvazzjoni tirrikonoxxi żball tagħha, l-awtorità tal-approvazzjoni għandha tieħu azzjoni skont id-dispożizzjonijiet tal-Ftehim tal-1958, u b’mod partikolari l-Artikolu 4 tiegħu.
(b)Meta jintlaħaq ftehim li jkun jeħtieġ interpretazzjoni ġdida jew differenti ta' prassi eżistenti (minn kwalunkwe Parti Kontraenti), dan għandu jiġi kkomunikat lil Partijiet Kontraenti oħra li japplikaw ir-Regolament tan-NU kkonċernat bħala kwistjoni ta' urġenza. Il-Partijiet l-oħra għandhom jingħataw perjodu ta' erbatax-il jum għall-kummenti tagħhom dwar id-deċiżjoni, u mbagħad, wara li l-awtoritajiet tal-approvazzjoni jkunu qiesu l-kummenti kollha li rċevew, dawn ikunu jistgħu joħorġu approvazzjonijiet tat-tip tan-NU skont l-interpretazzjoni l-ġdida.
(c)Meta ma jkunx jista’ jintlaħaq qbil, il-Partijiet Kontraenti kkonċernati għandhom jagħmlu reviżjoni ulterjuri permezz tal-proċess ta’ arbitraġġ deskritt fil-paragrafu 3 ta' hawn taħt.
(d)Fi kwalunkwe każ, il-kwistjoni għandha tinġieb għall-attenzjoni tal-Grupp ta’ Ħidma kompetenti sussidjarju tal-Forum Dinji għall-Armonizzazzjoni tar-Regolamenti dwar il-Vetturi (WP. 29). Jekk jitqies meħtieġ, il-Grupp ta' Ħidma sussidjarju għandu jippreżenta proposti lid-WP.29 għal emendi regolatorji xierqa biex jissolvew il-problemi ta’ interpretazzjonijiet differenti.
3.Il-proċess ta’ arbitraġġ permezz tad-WP.29 u l-Gruppi ta’ Ħidma sussidjarji tiegħu
Il-Presidenti tal-Gruppi ta’ Ħidma sussidjarji għandhom jidentifikaw il-kwistjonijiet li jirriżultaw mill-interpretazzjonijiet diverġenti tal-Partijiet Kontraenti fir-rigward tal-applikazzjoni ta’ Regolamenti tan-NU u l-għoti ta’ approvazzjonijiet tat-tip tan-NU skont dawn ir-Regolamenti tan-NU, bil-għan li jiġu stabbiliti miżuri mill-aktar fis possibbli sabiex isolvu l-problemi ta' interpretazzjonijiet differenti.
Il-Presidenti tal-Gruppi ta’ Ħidma għandhom jiżviluppaw proċeduri xierqa li jindirizzaw tali kwistjonijiet ta’ interpretazzjoni, sabiex ikunu jistgħu juru lid-WP.29 li:
(a)L-opinjonijiet differenti tal-awtoritajiet tal-approvazzjoni tal-Partijiet Kontraenti kkonċernati jitqiesu fis-sħiħ, kif jitqiesu wkoll l-opinjonijiet ta’ Partijiet Kontraenti oħra li japplikaw ir-Regolament tan-NU;
(b)Id-deċiżjonijiet huma bbażati fuq pariri tekniċi xierqa, fejn jitqiesu l-aspetti kollha tas-suġġett inkonsiderazzjoni;
(c)Kull meta jkun possibbli, tittieħed deċiżjoni unanima; u
(d)Il-proċeduri huma trasparenti u verifikabbli.
Jekk meħtieġ biex tiġi solvuta l-kwistjoni, il-President jista’ jippreżenta punt ġdid dwar il-kwistjoni għall-aġenda tal-ewwel sessjoni li jmiss tal-Grupp ta' Ħidma sussidjarju, mingħajr il-ħtieġa li jikseb l-approvazzjoni bil-quddiem tad-WP.29. F’dawn iċ-ċirkustanzi, il-President għandu jirrapporta dwar il-progress li jkun sar lid-WP.29 mal-ewwel opportunità possibbli.
Fi tmiem il-proċess ta’ arbitraġġ, il-President għandu jipprovdi rapport lid-WP.29.
3.1.Meta l-kwistjoni tista' tiġi solvuta fil-qafas regolatorju attwali:
L-interpretazzjoni tar-Regolament tan-NU kif adottata fil-Grupp ta’ Ħidma għandha tiġi implimentata u l-awtoritajiet tal-approvazzjoni għandhom joħorġu approvazzjonijiet tat-tip tan-NU skont dan.
3.2.Meta l-kwistjoni ma tkunx tista' tiġi solvuta fil-qafas regolatorju attwali:
Id-WP.29 għandu jiġi mgħarraf b’dan u għandu jitlob lill-Grupp ta' Ħidma sussidjarju rilevanti biex iqis din il-kwistjoni bħala punt ta' prijorità fis-sessjoni li jkun imiss tiegħu. L-aġenda tas-sessjoni għandha tiġi emendata skont dan.
Il-Grupp ta' Ħidma sussidjarju għandu jqis kwalunkwe proposta dwar il-kwistjoni tal-interpretazzjoni u għandu jippreżenta proposti formali lid-WP.29 għall-emendar tar-Regolament tan-NU kkonċernat skont il-proċeduri normali. Id-WP.29 għandu jqis din il-kwistjoni bħala punt ta' prijorità fis-sessjoni li jkun imiss tiegħu.
Skeda 7
Proċedura għall-approvazzjonijiet b'deroga fir-rigward ta’ teknoloġiji ġodda
1.Il-Partijiet Kontraenti li japplikaw Regolament tan-NU jistgħu, meta ssir applikazzjoni mill-manifattur, jagħtu approvazzjoni b'deroga skont ir-Regolament tan-NU fir-rigward ta’ vettura, tagħmir jew parti li tinkorpora teknoloġiji li jkunu inkompatibbli ma’ wieħed jew aktar mir-rekwiżiti ta’ dak ir-Regolament tan-NU, suġġett għall-għoti ta’ awtorizzazzjoni mill-Kumitat Amministrattiv tal-Ftehim tal-1958 skont il-proċedura deskritta fil-paragrafi 2 sa 12 ta’ din l-Iskeda.
2.Sakemm tittieħed deċiżjoni dwar jekk tingħatax l-awtorizzazzjoni għal tali approvazzjoni b'deroga, il-Parti Kontraenti li tapplika r-Regolament tan-NU tista' tagħti approvazzjoni proviżorja lit-territorju tagħha biss. Partijiet Kontraenti oħra li japplikaw dak ir-Regolament tan-NU jistgħu jiddeċiedu li jaċċettaw din l-approvazzjoni proviżorja fit-territorju tagħhom.
3.Il-Parti Kontraenti li tagħti l-approvazzjoni proviżorja msemmija fil-paragrafu 2 ta’ din l-Iskeda għandha tinnotifika lill-Kumitat Amministrattiv bid-deċiżjoni tagħha u tippreżenta fajl b’dan li ġej:
(a)Ir-raġunijiet għaliex it-teknoloġiji jew il-kunċett ikkonċernati jagħmlu l-vettura, it-tagħmir jew il-parti inkompatibbli mar-rekwiżiti tar-Regolament tan-NU;
(b)Deskrizzjoni tal-konsiderazzjonijiet ambjentali, ta' sikurezza jew konsiderazzjonijiet oħra, u tal-miżuri meħuda;
(c)Deskrizzjoni tat-testijiet u r-riżultati, li juru li, imqabbel mar-rekwiżiti li għalihom qed tintalab id-deroga, huwa żgurat livell ta’ sikurezza u ta' protezzjoni ambjentali li huwa mill-inqas ekwivalenti;
(d)Talba għall-awtorizzazzjoni biex tingħata approvazzjoni b'deroga għar-Regolament tan-NU għat-tip ta’ vettura, tagħmir jew parti.
4.Il-Kumitat Amministrattiv għandu jqis in-notifika sħiħa msemmija fil-paragrafu 3 ta’ din l-Iskeda fis-sessjoni li jmiss tiegħu wara li jirċievi n-notifika, sakemm din in-notifika tkun waslet mill-inqas tliet xhur qabel is-sessjoni. Wara li jqis in-notifika, il-Kumitat Amministrattiv jista’ jiddeċiedi li jawtorizza jew jirrifjuta l-għoti tal-approvazzjoni b'deroga jew li jirreferi l-kwistjoni lill-Grupp ta’ Ħidma sussidjarju kompetenti.
5.Id-deċiżjoni tal-Kumitat Amministrattiv għandha tiġi stabbilita skont il-proċedura indikata fl-Artikolu 8 tal-Appendiċi.
6.L-approvazzjoni b'deroga mitluba skont ir-Regolament tan-NU, imsemmija fil-paragrafu 3 ta’ din l-Iskeda, għandha titqies li tkun awtorizzata sakemm, f'perjodu ta’ xahar minn meta s-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti jiġi nnotifikat bid-deċiżjoni ta’ awtorizzazzjoni tal-Kumitat Amministrattiv, aktar minn wieħed minn kull ħamsa tal-Partijiet Kontraenti li japplikaw ir-Regolament tan-NU fi żmien in-notifika ma jkunux informaw lis-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti li ma jaqblux mal-awtorizzazzjoni tal-approvazzjoni b'deroga.
7.Meta tiġi adottata l-awtorizzazzjoni għall-għoti tal-approvazzjoni b'deroga, is-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti għandu, mill-aktar fis possibbli, jinnotifika b'din l-adozzjoni lill-Partijiet Kontraenti li japplikaw ir-Regolament tan-NU kkonċernat.
Mid-data ta’ dik in-notifika, il-Parti Kontraenti msemmija fil-paragrafu 3 ta’ din l-Iskeda tista’ mbagħad tagħti l-approvazzjoni b'deroga skont ir-Regolament tan-NU. L-approvazzjoni b'deroga għandha tiġi aċċettata mill-Partijiet Kontraenti li japplikaw ir-Regolament tan-NU, bl-eċċezzjoni ta’ dawk li jkunu nnotifikaw in-nuqqas ta’ qbil tagħhom, jew l-intenzjoni tagħhom li ma jaċċettawx l-approvazzjoni b'deroga immedjatament, lis-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti. Il-Partijiet Kontraenti li jkunu nnotifikaw in-nuqqas ta’ qbil tagħhom, jew l-intenzjoni tagħhom li ma jaċċettawx l-approvazzjoni b'deroga immedjatament, jistgħu, bl-awtorizzazzjoni tal-Kumitat Amministrattiv, jaċċettaw l-approvazzjoni b'deroga f’data aktar tard billi jinnotifikaw id-deċiżjoni tagħhom lis-Segretarju Eżekuttiv tal-Kummissjoni Ekonomika għall-Ewropa tan-Nazzjonijiet Uniti.
8.Fid-deċiżjoni tal-awtorizzazzjoni, il-Kumitat Amministrattiv għandu jispeċifika kwalunkwe restrizzjoni għall-awtorizzazjoni b'deroga. Il-limiti ta’ żmien m’għandhomx ikunu inqas minn sitta u tletin xahar. Il-Partijiet Kontraenti li japplikaw dan ir-Regolament tan-NU għandhom jaċċettaw l-approvazzjoni b'deroga tal-anqas sakemm jiskadi l-limitu ta’ żmien, jekk ikun hemm, jew, meta r-Regolament tan-NU inkwistjoni jiġi emendat sussegwentement skont il-paragrafi 9 u 10 ta’ din l-Iskeda sabiex titqies it-teknoloġija koperta mill-approvazzjoni b'deroga, sad-data li minnha l-Partijiet Kontraenti jistgħu jirrifjutaw l-approvazzjonijiet tal-verżjoni preċedenti tar-Regolament tan-NU, skont liema minn dawn id-dati tiġi l-ewwel.
Il-Parti Kontraenti awtorizzata biex tagħti l-approvazzjoni b'deroga għandha tiżgura li l-manifattur jikkonforma bis-sħiħ mar-restrizzjonijiet kollha assoċjati ma’ din l-approvazzjoni u li l-formola ta’ komunikazzjoni tindika b'mod ċar li hija bbażata fuq deroga awtorizzata mill-Kumitat Amministrattiv.
9.Il-Kumitat Amministrattiv għandu fl-istess ħin jinforma lill-Grupp ta’ Ħidma sussidjarju responsabbli għar-Regolament tan-NU dwar l-awtorizzazzjoni li tingħata l-approvazzjoni b'deroga.
Il-Parti Kontraenti awtorizzata biex tagħti l-approvazzjoni b'deroga għandha tippreżenta lill-Grupp ta’ Ħidma sussidjarju responsabbli mir-Regolament tan-NU proposta għall-emendar tar-Regolament tan-NU li għalih intalbet l-approvazzjoni b'deroga, sabiex dan jiġi adattat għall-iżvilupp teknoloġiku. Din il-preżentazzjoni għandha ssir mhux aktar tard mis-sessjoni li jmiss tal-Grupp ta’ Ħidma sussidjarju ta' wara n-notifika tad-deċiżjoni ta’ awtorizzazzjoni tal-Kumitat Amministrattiv skont il-paragrafu 6 ta’ din l-Iskeda.
10.Hekk kif ir-Regolament tan-NU jiġi emendat biex jitqies l-iżvilupp teknoloġiku li għalih tkun ingħatat l-approvazzjoni b'deroga, u jidħol fis-seħħ, il-manifattur għandu jkun awtorizzat biex japplika għall-approvazzjoni tat-tip skont ir-Regolament tan-NU emendat, b’sostituzzjoni tal-approvazzjoni b'deroga mogħtija qabel għal dak ir-Regolament tan-NU. L-awtorità tal-approvazzjoni li tagħti dik l-approvazzjoni tat-tip għandha, kemm jista' jkun malajr, tirtira l-approvazzjoni b'deroga jew tinforma lill-awtorità tal-approvazzjoni li tkun tat l-approvazzjoni b'deroga li din l-approvazzjoni b'deroga għandha tiġi rtirata.
11.Jekk il-proċedura tal-emendar tar-Regolament tan-NU ma titlestiex qabel jiskadi l-limitu ta’ żmien definit fil-paragrafu 8 ta’ din l-Iskeda, il-validità tal-approvazzjoni b'deroga tista’ tiġi estiża, fuq talba tal-Parti Kontraenti li tkun tat l-approvazzjoni b'deroga, suġġett għal deċiżjoni li tiġi adottata skont il-proċedura deskritta fil-paragrafi 2 u 3 ta’ din l-Iskeda. Jekk, madankollu, il-Parti Kontraenti li tkun ġiet awtorizzata tagħti l-approvazzjoni b'deroga tonqos milli tippreżenta proposta għall-emendar tar-Regolament tan-NU qabel l-iskadenza speċifikata fil-paragrafu 9 ta’ din l-Iskeda, dik il-Parti Kontraenti għandha minnufih tirtira din l-approvazzjoni b'deroga, fejn iżda għandha tqis il-limitu ta’ żmien kif definit fil-paragrafu 8 ta’ din l-Iskeda. Il-Parti Kontraenti li tkun irtirat l-approvazzjoni b'deroga għandha tinforma lill-Kumitat Amministrattiv b'dan fis-sessjoni li jmiss tiegħu.
12.Jekk il-Kumitat Amministrattiv jiddeċiedi li jirrifjuta awtorizzazzjoni għall-għoti ta’ approvazzjoni b'deroga, il-Parti Kontraenti li tkun ħarġet l-approvazzjoni proviżorja msemmija fil-paragrafu 2 ta’ din l-Iskeda tista’ tirtira din l-approvazzjoni proviżorja. F’dan il-każ, dik il-Parti Kontraenti għandha tinnotifika minnufih lid-detentur tal-approvazzjoni proviżorja li din l-approvazzjoni proviżorja, mogħtija skont il-paragrafu 2 ta’ din l-Iskeda, tkun ser tiġi rtirata sitt xhur wara d-data tad-deċiżjoni, fejn jitqies ukoll li l-approvazzjoni proviżorja għandha tkun valida mill-inqas għal tnax-il xahar mid-data tal-għoti tagħha.
Skeda 8
Kundizzjonijiet ġenerali għall-metodi ta’ ttestjar virtwali
1.Skema ta’ test virtwali
L-iskema li ġejja għandha tintuża bħala struttura bażika għad-deskrizzjoni u t-twettiq tal-ittestjar virtwali:
(a)Għan;
(b)Mudell tal-istruttura;
(c)Kundizzjonijiet limiti;
(d)Suppożizzjonijiet ta’ tagħbija;
(e)Kalkolu;
(f)Valutazzjoni;
(g)Dokumentazzjoni.
2.Prinċipji ewlenin ta' simulazzjoni u kalkolu bil-kompjuter
2.1.Mudell matematiku
Il-mudell matematiku għandu jiġi pprovdut mill-manifattur. Dan għandu jirrifletti l-kumplessità tal-istruttura tal-vettura bir-roti, tat-tagħmir u tal-partijiet li jkunu se jiġu ttestjati skont ir-rekwiżiti tar-Regolament tan-NU kkonċernat u l-kundizzjonijiet limiti tiegħu.
L-istess dispożizzjonijiet għandhom japplikaw, mutatis mutandis, għall-ittestjar ta’ komponenti indipendenti mill-vettura.
2.2.Il-proċess ta’ validazzjoni tal-mudell matematiku
Il-mudell matematiku għandu jiġi vvalidat b’paragun mal-kundizzjonijiet tat-test attwali.
Għal dan il-għan, għandu jitwettaq test fiżiku kif xieraq sabiex ir-riżultati miksuba meta jintuża l-mudell matematiku jkunu jistgħu jiġu pparagunati mar-riżultati ta’ test fiżiku. Il-komparabbiltà tar-riżultati tat-test għandha tiġi ppruvata. Il-manifattur jew is-Servizz Tekniku għandu jfassal ir-rapport tal-validazzjoni u jippreżentah lill-awtorità tal-approvazzjoni.
Kwalunke bidla li ssir lill-mudell matematiku jew lis-softwer li x'aktarx tinvalida r-rapport tal-validazzjoni għandha titressaq għall-attenzjoni tal-awtorità tal-approvazzjoni li tista’ tesiġi li jitwettaq proċess ta’ validazzjoni ġdid.
2.3.Dokumentazzjoni
Id-dejta u l-għodod awżiljarji użati għas-simulazzjoni u l-kalkolu għandhom ikunu disponibbli mill-manifattur u jiġu dokumentati kif meħtieġ għas-servizz tekniku.
3.Għodod u sostenn
Fuq talba tal-awtorità tal-approvazzjoni jew tas-Servizz Tekniku, il-manifattur għandu jforni jew jipprovdi aċċess għall-għodod neċessarji, inkluż is-softwer xieraq.
Barra minn hekk, il-manifattur għandu jipprovdi sostenn xieraq lill-awtorità tal-approvazzjoni jew lis-Servizz Tekniku.
L-għoti tal-aċċess u sostenn lil Servizz Tekniku ma jneħħix l-obbligi tas-Servizz Tekniku fir-rigward tal-kompetenzi tal-persunal tiegħu, tal-ħlas tad-drittijiet tal-liċenzja u tar-rispett tal-kunfidenzjalità.