MEMORANDUM TA’ SPJEGAZZJONI

1.           IL-KUNTEST TAL-PROPOSTA

Ir-raġunijiet għall-proposta u l-objettivi tagħha

Din il-proposta tikkonċerna l-inkorporazzjoni fil-liġi tal-Unjoni Ewropea tal-mekkaniżmu ta’ kontra ċ-ċirkomvenzjoni previst fi ftehim ta’ assoċjazzjoni bejn l-UE u l-Ġeorġja.

Kuntest Ġenerali

Il-Ftehim ta’ Assoċjazzjoni mal-Ġeorġja jinkludi l-hekk imsejjaħ mekkaniżmu kontra ċ-ċirkomvenzjoni, li jipprevedi l-possibbiltà li tiġi introdotta mill-ġdid ir-rata tad-dazju doganali MFN meta l-importazzjonijiet ta’ ċerti prodotti agrikoli mill-Ġeorġja jaqbżu ċertu limitu mingħajr ġustifikazzjoni xierqa tal-oriġini eżatta tagħhom.

Regolament ta' implimentazzjoni tal-Parlament Ewropew u tal-Kunsill huwa neċessarju sabiex jiġi stabbilit fl-ordni ġuridiku intern tal-UE l-istrument meħtieġ biex ikun jista' jiġi applikat il-mekkaniżmu speċjali ta' kontra ċ-ċirkomvenzjoni.

2.           RIŻULTATI TAL-KONSULTAZZJONIJIET MAL-PARTIJIET INTERESSATI U VALUTAZZJONI TAL-IMPATT

Din il-proposta għal Regolament ta' implimentazzjoni ġejja direttament mit-test tal-Ftehim innegozjat mal-Ġeorġja. Għaldaqstant, la hemm bżonn ta' konsultazzjoni separata mal-partijiet interessati u lanqas ta' stima tal-impatt.

3.           ELEMENTI LEGALI TAL-PROPOSTA

Sommarju tal-azzjoni proposta

Il-proposta mehmuża għal Regolament tal-Parlament Ewropew u tal-Kunsill tikkostitwixxi l-istrument legali għall-implimentazzjoni tal-mekkaniżmu ta' kontra ċ-ċirkomvenzjoni tal-Ftehim diġà konkluż mal-Ġeorġja.

Bażi legali

L-Artikolu 207(2) tat-Trattat dwar il-Funzjonament tal-Unjoni Ewropea.

2015/0080 (COD)

Proposta għal

REGOLAMENT TAL-PARLAMENT EWROPEW U TAL-KUNSILL

dwar il-mekkaniżmu ta' kontra ċ-ċirkomvenzjoni li jipprovdi għal sospensjoni temporanja ta' preferenzi tariffarji tal-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ġeorġja, min-naħa l-oħra

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea, u b'mod partikolari l-Artikolu 207(2) tiegħu,

Wara li kkunsidraw il-proposta mill-Kummissjoni Ewropea,

Wara t-trażmissjoni tal-abbozz tal-att leġiżlattiv lill-Parlamenti nazzjonali,

Waqt li jaġixxu skont il-proċedura ordinarja leġiżlattiva[1],

Billi:

(1)       Fl-10 ta’ Mejju 2010, il-Kunsill awtorizza lill-Kummissjoni biex tiftaħ negozjati mal-Ġeorġja għall-konklużjoni ta’ ftehim ġdid bejn l-Unjoni u l-Ġeorġja.

(2)       Dawk in-negozjati ġew konklużi u l-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ġeorġja, min-naħa l-oħra[2] (“il-Ftehim”) ġie ffirmat fis-27 ta’ Ġunju 2014 u ġie applikat provviżorjament mill-1 ta’ Settembru 2014.

(3)       Huwa meħtieġ li jiġu stabbiliti l-proċeduri li jiggarantixxu l-applikazzjoni effettiva tal-mekkaniżmu ta’ kontra ċ-ċirkomvenzjoni għas-sospensjoni temporanja tal-preferenzi tariffarji mniżżla f’dan il-Ftehim.

(4)       Għandu jkun hemm il-possibbiltà li jiġu sospiżi d-dazji doganali preferenzjali għal perjodu massimu ta’ sitt xhur meta l-importazzjonijiet ta’ ċerti prodotti agrikoli u prodotti agrikoli pproċessati jilħqu l-volumi ta’ importazzjoni annwali definiti. 

(5)       Għal raġunijiet ta' trasparenza, il-Kummissjoni għandha tippreżenta rapport annwali lill-Parlament Ewropew u lill-Kunsill dwar l-implimentazzjoni tal-Ftehim u dwar l-applikazzjoni tal-mekkaniżmu ta' kontra ċ-ċirkomvenzjoni.

(6)       L-implimentazzjoni tal-mekkaniżmu ta’ kontra ċ-ċirkomvenzjoni għas-sospensjoni temporanja tal-preferenzi tariffarji stipulati fil-Ftehim teżiġi kundizzjonijiet uniformi. Sabiex jiġu żgurati kundizzjonijiet uniformi għall-implimentazzjoni ta' dan ir-Regolament, setgħat tal-implimentazzjoni għandhom jiġu konferiti fuq il-Kummissjoni. Dawk is-setgħat ta' implimentazzjoni għandhom jiġu eżerċitati skont ir-Regolament (UE) Nru 182/2011 tal-Parlament Ewropew u tal-Kunsill[3].

(7)       Il-proċedura konsultattiva għandha tintuża għall-adozzjoni ta’ atti ta’ implimentazzjoni minħabba li dawk l-atti għandhom jiġu implimentati malajr ladarba l-limitu rilevanti għall-kategoriji tal-prodotti mniżżla fl-Anness II-C għall-Ftehim ġie sodisfat u jkollha impatt tassew perjodu tal-applikazzjoni limitat ħafna.

(8)       Sabiex jiġi evitat impatt negattiv fuq il-qagħda tas-suq tal-Unjoni bħala riżultat ta' żieda fl-importazzjonijiet, il-Kummissjoni għandha wkoll tadotta atti ta' implimentazzjoni applikabbli minnufih, f'każijiet ġustifikati kif xieraq għas-sospensjoni temporanja tat-tariffi preferenzjarji skont il-mekkaniżmu ta' kontra ċ-ċirkomvenzjoni kif ipprovdut fil-Ftehim, jekk raġunijiet imperattivi ta' urġenza jitolbu li jsir hekk.

ADOTTAW DAN IR-REGOLAMENT:

Artikolu 1

Ambitu u kamp ta' applikazzjoni

1.           Dan ir-Regolament iniżżel dispożizzjonijiet għall-implimentazzjoni tal-mekkaniżmu ta' kontra ċ-ċirkomvenzjoni li jipprovdi għas-sospensjoni temporanja tal-preferenzi tariffarji li hemm fil-Ftehim ta’ Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u l-Ġeorġja, min-naħa l-oħra

2.           Dan ir-Regolament japplika għal prodotti li joriġinaw fil-Ġeorġja.

Artikolu 2

Il-Mekkaniżmu ta' kontra ċ-ċirkomvenzjoni għal prodotti agrikoli u prodotti agrikoli pproċessati

1.           Il-volum medju ta' importazzjonijiet annwali huwa stabbilit għall-prodotti mniżżla fl-Anness II-C għal dan il-Ftehim, li huma soġġetti għall-mekkaniżmu ta' kontra ċ-ċirkomvenzjoni stipulat fl-Artikolu 27 ta’ dan il-Ftehim. Għal raġunijiet imperattivi debitament ġustifikati ta’ urġenza relatati mal-volum tal-importazzjonijiet ta’ wieħed jew aktar prodotti li jilħqu l-volum indikat l-Anness II-C għal dan il-Ftehim fi kwalunkwe sena mill-1 ta’ Jannar, u sakemm ma tkunx irċeviet ġustifikazzjoni valida mill-Ġeorġja, il-Kummissjoni  tadotta att ta’ implimentazzjoni immedjatament applikabbli f’konformità mal-proċedura msemmija fl-Artikolu 4(2) ta’ dan ir-Regolament. Il-Kummissjoni tista’ tiddeċiedi li jew tissospendi temporanjament id-dazju preferenzjali applikat għall-prodott(i) kkonċernat(i) jew tiddetermina li tali sospensjoni mhijiex xierqa.

2.           Is-sospensjoni temporanja tad-dazju preferenzjali  tkun applikabbli għal perjodu massimu ta' sitt xhur mid-data tal-pubblikazzjoni tad-deċiżjoni biex jiġi sospiż id-dazju preferenzjali. Qabel ma jiskadi dak il-perjodu ta’ sitt xhur u fuq raġunijiet ta' urġenza imperattivi ġustifikati kif xieraq relatati mas-sospensjoni tad-dazji preferenzjali, il-Kummissjoni tista’ tadotta att ta’ implimentazzjoni immedjatament applikabbli f’konformità mal-proċedura msemmija fl-Artikolu 4(2) ta’ dan ir-Regolament sabiex titneħħa s-sospensjoni temporanja tad-dazju preferenzjali jekk tkun sodisfatta li l-volum tal-kategorija rilevanti ta’ prodotti importati li jaqbżu l-volum imsemmi fl-Anness II-C għal dan il-Ftehim jirriżulta minn bidla fil-livell ta’ produzzjoni u l-kapaċità ta’ esportazzjoni tal-Ġeorġja għall-prodott(i) kkonċernat(i).

Artikolu 3

Rapport

1.           Il-Kummissjoni  tippreżenta rapport annwali lill-Parlament Ewropew u lill-Kunsill dwar l-applikazzjoni, l-implimentazzjoni u l-konfmormità mal-obbligi stabbiliti fit-Titolu IV tal-Ftehim u ta’ dan ir-Regolament.

2.           Ir-rapport jippreżenta wkoll ġabra qasira tal-istatistika u tal-evoluzzjoni tal-kummerċ mal-Ġeorġja.

3.           Il-Parlament Ewropew jista', fi żmien xahar mill-preżentazzjoni tar-rapport tal-Kummissjoni, jistieden lill-Kummissjoni għal laqgħa ad hoc tal-kumitat reponsabbli tiegħu sabiex tippreżenta u tispjega kwalunkwe kwistjoni relatata mal-implimentazzjoni ta’ dan ir-Regolament.

4.           Mhux aktar tard minn tliet xhur wara l-preżentazzjoni tar-rapport tagħha lill-Parlament Ewropew u lill-Kunsill, il-Kummissjoni  tippubblikah.

Artikolu 4

Proċedura ta' kumitat

1.           Il-Kummissjoni  tkun megħjuna mill-Kumitat għall-Organizzazzjoni Komuni tas-Swieq Agrikoli stabbilit permezz tal-Artikolu 229(1) tar-Regolament (UE) Nru 1308/2013 u, fir-rigward ta’ prodotti agrikoli pproċessati, il-Kummissjoni  tkun assistita minn kumitat dwar il-kwistjonijiet orizzontali li jirrigwardaw il-kummerċ fil-prodotti agrikoli pproċessati mhux mniżżla fl-Anness I stabbilit bl-Artikolu 44(1) tar-Regolament (UE) Nru 510/2014[4]. Dawn il-Kumitati  ikunu kumitati fl-ambitu tat-tifsira tar-Regolament (UE) Nru 182/2011.

2.           Fejn issir referenza għal dan il-paragrafu  japplika l-Artikolu 8 tar-Regolament (UE) Nru 182/2011, flimkien mal-Artikolu 4 tiegħu.

Artikolu 5

Id-dħul fis-seħħ

Dan ir-Regolament  jidħol fis-seħħ l-għada tal-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Huwa japplika għal importazzjonijiet mill-Ġeorġja mid-data ta' applikazzjoni tal-Ftehim.

Dan ir-Regolament  jorbot fl-intier tiegħu u japplika direttament fl-Istati Membri kollha.

Magħmul fi Brussell,

Għall-Parlament Ewropew                            Għall-Kunsill

Il-President                                                    Il-President

[1]              

[2]               Id-Deċiżjoni tal-Kunsill 2014/494/UE tas-16 ta' Ġunju 2014 dwar l-iffirmar, f'isem l-Unjoni Ewropea, u l-applikazzjoni provviżorja tal-Ftehim ta' Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, min-naħa l-waħda, u l-Ġeorġja, min-naħa l-oħra (ĠU L 261, 30.8.2014, p. 4).

[3]               Ir-Regolament (UE) Nru 182/2011 tal-Parlament Ewropew u tal-Kunsill tas-16 ta' Frar 2011 li jistabbilixxi r-regoli u l-prinċipji ġenerali dwar il-modalitajiet ta' kontroll mill-Istati Membri tal-eżerċizzju mill-Kummissjoni tas-setgħat ta' implimentazzjoni (ĠU L 55, 28.2.2011, p 13).

[4]               Ir-Regolament (UE) Nru 510/2014 tal-Parlament Ewropew u tal-Kunsill tas-16 ta’ April 2014 li jistabbilixxi l-arranġamenti kummerċjali applikabbli għal ċerti prodotti li jirriżultaw mill-ipproċessar tal-prodotti agrikoli u jħassar r-Regolamenti tal-Kunsill (KE) Nru 1216/2009 u (KE) Nru 614/2009 (ĠU L 150, 20.5.2014, p. 1).