MEMORANDUM TA’ SPJEGAZZJONI

1.           IL-KUNTEST TAL-PROPOSTA

1.1. Ir-raġunijiet u l-għanijiet tal-proposta

Fl-20 ta' Mejju 1987 ġew konklużi l-Konvenzjoni dwar proċedura ta' tranżitu komuni u l-Konvenzjoni dwar is-simplifikazzjoni tal-formalitajiet fil-kummerċ tal-merkanzija bejn il-Komunità Ewropea u l-pajjiżi tal-EFTA.

Il-Komunikazzjoni tal-2001 tal-Kummissjoni Ewropea lill-Parlament Ewropew u lill-Kunsill dwar Strateġija biex il-pajjiżi kandidati jitħejjew għall-adeżjoni għall-Konvenzjonijiet KE-EFTA tal-1987 dwar proċedura ta' tranżitu komuni u dwar is-simplifikazzjoni tal-formalitajiet fil-kummerċ tal-merkanzija, segwita mill-Komunikazzjoni tal-2010 tal-Kummissjoni Ewropea lill-Parlament Ewropew u lill-Kunsill dwar Strateġija għat-tħejjija ta' ċertu pajjiżi ġirien għall-adeżjoni għaż-żewġ Konvenzjonijiet u mill-konklużjonijiet tal-Kunsill tal-14 ta' April 2011 li jikkonfermaw l-approċċ adottat fiż-żewġ komunikazzjonijiet, jipprevedu appoġġ għal għadd ta' pajjiżi fl-isforzi tagħhom biex jissieħbu fil-Konvenzjonijiet.

L-għan hu li l-UE tadotta pożizzjoni komuni dwar l-abbozz tad-Deċiżjoni Nru 1/2015 tal-Kumitat Konġunt UE-EFTA dwar it-tranżitu komuni u dwar l-abbozz tad-Deċiżjoni Nru 1/2015 tal-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija, ħalli l-Eks-Repubblika Jugoslava tal-Maċedonja tiġi mistiedna tissieħeb fil-Konvenzjonijiet.

1.2. Il-kuntest ġenerali

Il-Konvenzjonijiet jistabbilixxu l-miżuri li jiffaċilitaw il-moviment tal-oġġetti bejn l-Unjoni Ewropea, ir-Repubblika tal-Iżlanda, ir-Renju tan-Norveġja, il-Konfederazzjoni Żvizzera u r-Repubblika tat-Turkija.

Wara li ssodisfat ir-rekwiżiti legali, strutturali u tat-teknoloġija tal-informatika, li huma prirekwiżiti għall-adeżjoni, l-Eks-Repubblika Jugoslava tal-Maċedonja xtaqet taderixxi formalment għall-Konvenzjonijiet.

F'konformità mad-dispożizzjonijiet tal-Artikolu 15(3) tal-Konvenzjoni dwar proċedura ta' tranżitu komuni u mad-dispożizzjonijiet tal-Artikolu 11(3) tal-Konvenzjoni dwar is-simplifikazzjoni tal-formalitajiet fil-kummerċ tal-merkanzija, il-Kumitati Konġunti UE-EFTA għandhom jieħdu deċiżjoni biex jistiednu lil pajjiż terz fis-sens tal-Artikolu 3(1)(c) u tal-Artikolu 1(2) rispettivament, biex jissieħeb għall-Konvenzjonijiet skont il-proċedura stabbilita fl-Artikolu 15a u fl-Artikolu 11a rispettivament.

Il-Kumitati Konġunti UE-EFTA jibagħtu dawn l-istediniet meta l-pajjiż juri li kapaċi jikkonforma mar-regoli dettaljati għall-applikazzjoni tad-dispożizzjonijiet tal-Konvenzjonijiet.

B'mandat mill-Kumitati Konġunti UE-EFTA dwar it-tranżitu komuni u dwar is-simplifikazzjoni tal-formalitajiet fil-kummerċ tal-merkanzija, minn missjoni ta' evalwazzjoni li tkopri l-aktar l-adattament tal-leġiżlazzjoni doganali nazzjonali tal-Eks-Repubblika Jugoslava tal-Maċedonja, il-ħolqien tal-istrutturi meħtieġa għall-ġestjoni tal-proċedura u l-implimentazzjoni tas-Sistema l-Ġdida ta’ Tranżitu Kompjuterizzata (NCTS) li tippermetti l-applikazzjoni tal-proċedura ta' tranżitu komuni, ħareġ fid-dieher li ġew issodisfati l-kundizzjonijiet biex jintbagħtu l-istediniet.

1.3. Id-dispożizzjonijiet eżistenti fil-qasam tal-proposta

Fil-qasam tal-proposta ma teżisti l-ebda dispożizzjoni.

1.4. Il-konsistenza ma' politiki u għanijiet oħrajn tal-Unjoni

Il-proposta hija konformi mal-istrateġija għall-promozzjoni tal-kompetittività u t-tkabbir ekonomiku tal-UE.

2.           IR-RIŻULTATI TAL-KONSULTAZZJONIJIET MAL-PARTIJIET INTERESSATI U VALUTAZZJONIJIET TAL-IMPATT

2.1. Il-konsultazzjoni mal-partijiet interessati

Il-metodi tal-konsultazzjoni, is-setturi ewlenin indirizzati u profil ġenerali ta' min wieġeb

Mal-Istati Membri fil-Kumitat tal-Kodiċi Doganali – l-Istatus Doganali u s-Sezzjoni tat-Tranżitu mal-Partijiet Kontraenti għall-Konvenzjonijiet fil-Gruppi ta' Ħidma UE-EFTA dwar it-tranżitu komuni u dwar is-simplifikazzjoni tal-formalitajiet fil-kummerċ tal-merkanzija saret konsultazzjoni b'approvazzjoni dwar l-abbozz tad-Deċiżjoni Nru 1/2015 tal-Kumitat Konġunt UE-EFTA dwar it-tranżitu komuni u dwar l-abbozz tad-Deċiżjoni Nru 1/2015 tal-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija, biex l-Eks-Repubblika Jugoslava tal-Maċedonja tiġi misitedna tissieħeb fil-Konvenzjonijiet.

Sommarju tat-tweġibiet u kif tqiesu

Opinjoni favorevoli

Il-kisba u l-użu tal-għarfien espert

Ma kienx hemm bżonn għarfien espert estern.

2.2. Valutazzjoni tal-impatt

L-adeżjoni għall-Konvenzjonijiet tista' titqies fi ħdan il-qafas tal-istrateġija ta' qabel l-adeżjoni tal-Eks-Repubblika Jugoslava tal-Maċedonja fl-Unjoni Ewropea. B'hekk isir allinjament mal-acquis communautaire fiż-żona tat-tranżitu. Bl-introduzzjoni tat-tranżitu komuni fl-Eks-Repubblika Jugoslava tal-Maċedonja, bħala alternattiva għall-proċedura TIR, it-tranżitu se jkompli jeħfief, jonqsu l-ispejjeż u jaf jiżdied il-kummerċ.

3.           L-ELEMENTI ĠURIDIĊI TAL-PROPOSTA

3.1. Sommarju tal-azzjoni proposta

Il-Kumitati Konġunti UE-EFTA jixtiequ jieħdu deċiżjonijiet u jibagħtu l-istediniet.

L-abbozz tad-Deċiżjoni Nru 1/2015 tal-Kumitat Konġunt UE-EFTA dwar it-tranżitu komuni għandu l-għan li lill-Eks-Repubblika Jugoslava tal-Maċedonja jistedinha taderixxi għall-Konvenzjoni tal-20 ta' Mejju 1987 dwar proċedura ta' tranżitu komuni.

L-abbozz tad-Deċiżjoni Nru 1/2015 tal-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija għandu l-għan li lill-Eks-Repubblika Jugoslava tal-Maċedonja jistedinha taderixxi għall-Konvenzjoni tal-20 ta' Mejju 1987 dwar is-simplifikazzjoni tal-formalitajiet fil-kummerċ tal-merkanzija.

Dawn l-abbozzi tad-Deċiżjonijiet approvahom il-Kumitat tal-Kodiċi Doganali – l-Istatus Doganali u s-Sezzjoni tat-Tranżitu u anki l-Gruppi ta' Ħidma UE-EFTA dwar it-tranżitu komuni u dwar is-simplifikazzjoni tal-formalitajiet fil-kummerċ tal-merkanzija.

Il-Kummissjoni hija mistiedna tapprova l-abbozzi tad-Deċiżjonijiet bi proċedura bil-miktub, sabiex tippreżentahom lill-Kunsill biex jistabbilixxi pożizzjoni komuni għall-adozzjoni finali tagħhom permezz tal-Kumitati Konġunti UE-EFTA.

3.2. Il-bażi ġuridika

L-Artikolu 15(a) tal-Konvenzjoni tal-20 ta' Mejju 1987 dwar proċedura ta' tranżitu komuni u l-Artikolu 11a tal-Konvenzjoni tal-20 ta' Mejju 1987 dwar is-simplifikazzjoni tal-formalitajiet fil-kummerċ tal-merkanzija.

3.3. Il-prinċipju tas-sussidjarjetà

Il-proposta taqa' fil-kompetenza esklussiva tal-Unjoni Ewropea (il-politika kummerċjali komuni) u għalhekk ma għandhiex bżonn tiġi eżaminata rigward il-prinċipju tas-sussidjarjetà (l-Artikolu 5(3) tat-Trattat dwar il-Funzjonament tal-Unjoni Ewropea). .

3.4. Il-prinċipju tal-proporzjonalità

Il-proposta hi konformi mal-prinċipju tal-proporzjonalità għal dawn ir-raġunijiet:

            L-unika azzjoni possibbli hi din il-forma ta' azzjoni proposta.

            Il-forma ta' azzjoni proposta ma tinvolvix spejjeż finanzjarji.

3.5. L-għażla tal-istrumenti

L-istrumenti proposti: Deċiżjoni.

Ma jeżistix strument adegwat ieħor.

4.           L-IMPLIKAZZJONI BAĠITARJA

Il-proposta ma għandha l-ebda implikazzjoni fuq il-baġit tal-UE.

5.         L-ELEMENTI FAKULTATTIVISimplifikazzjoni

Il-proposta tipprevedi simplifikazzjoni tal-proċeduri amministrattivi għall-awtoritajiet pubbliċi u simplifikazzjoni tal-proċeduri amministrattivi għas-settur privat.

Il-proposta ddaħħal proċedura waħda ta' tranżitu komuni għal kull Parti Kontraenti għall-Konvenzjoni.

Bil-proċedura ta' tranżitu komuni tkun tista' ssir l-awtorizzazzjoni ta' simplifikazzjonijiet rigward il-partijiet privati.

2015/0077 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tieħu l-Unjoni Ewropea dwar l-adozzjoni ta' Deċiżjoni mill-Kumitat Konġunt UE-EFTA dwar it-tranżitu komuni u mill-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija fejn jidħlu l-istediniet lill-Eks-Repubblika Jugoslava tal-Maċedonja biex taderixxi għal dawk il-Konvenzjonijiet

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikulari l-Artikolu 207, flimkien mal-Artikolu 218(9), tiegħu,

Wara li kkunsidra l-proposta tal-Kummissjoni Ewropea,

Billi:

(1)       L-Artikolu 15(3) tal-Konvenzjoni bejn il-Komunità Ekonomika Ewropea, ir-Repubblika tal-Awstrija, ir-Repubblika tal-Finlandja, ir-Repubblika tal-Iżlanda, ir-Renju tan-Norveġja, ir-Renju tal-Iżvezja u l-Konfederazzjoni Żvizzera dwar proċedura ta' tranżitu komuni[1] (il-"Konvenzjoni dwar proċedura ta' tranżitu komuni") jagħti s-setgħa lill-Kumitat Konġunt stabbilit minn dik il-Konvenzjoni biex permezz ta' deċiżjoni jadotta stediniet lil pajjiżi terzi fis-sens tal-Artikolu 3(1)(c) biex jaderixxu għal dik il-Konvenzjoni f'konformità mal-Artikolu 15a.

(2)       L-Artikolu 11(3) tal-Konvenzjoni bejn il-Komunità Ekonomika Ewropea, ir-Repubblika tal-Awstrija, ir-Repubblika tal-Finlandja, ir-Repubblika tal-Iżlanda, ir-Renju tan-Norveġja, ir-Renju tal-Iżvezja u l-Konfederazzjoni Żvizzera dwar is-simplifikazzjoni tal-formalitajiet fil-kummerċ tal-merkanzija[2] (il-"Konvenzjoni dwar is-simplifikazzjoni tal-formalitajiet fil-kummerċ tal-merkanzija") jagħti s-setgħa lill-Kumitat Konġunt stabbilit minn dik il-Konvenzjoni biex permezz ta' deċiżjoni jadotta stediniet lil pajjiżi terzi fis-sens tal-Artikolu 1(2) biex jaderixxu għal dik il-Konvenzjoni f'konformità mal-Artikolu 11a.

(3)       Jixraq li tiġi stabbilita l-pożizzjoni li għandha tieħu l-Unjoni fi ħdan il-Kumitati Konġunti msemmija fejn jidħlu d-deċiżjonijiet biex tistieden lill-Eks-Repubblika Jugoslava tal-Maċedonja biex taderixxi għal dawk il-Konvenzjonijiet.

(4)       Għaldaqstant il-pożizzjoni tal-Unjoni fi ħdan il-Kumitati Konġunti għandha tibbaża fuq l-abbozzi tad-Deċiżjonijiet mehmuża,

ADOTTA DIN ID-DEĊIŻJONI:

Artikolu 1

Il-pożizzjoni tal-Unjoni Ewropea fil-Kumitat Konġunt UE-EFTA dwar it-tranżitu komuni fejn tidħol l-istedina lill-Eks-Repubblika Jugoslava tal-Maċedonja biex taderixxi għall-Konvenzjoni dwar proċedura ta' tranżitu komuni għandha tibbaża fuq l-abbozz tad-Deċiżjoni ta' dak il-Kumitat Konġunt UE-EFTA mehmuż ma' din id-Deċiżjoni.

Artikolu 2

Il-pożizzjoni tal-Unjoni Ewropea fil-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija fejn tidħol l-istedina lill-Eks-Repubblika Jugoslava tal-Maċedonja biex taderixxi għall-Konvenzjoni dwar is-simplifikazzjoni tal-formalitajiet fil-kummerċ tal-merkanzija għandha tibbaża fuq l-abbozz tad-Deċiżjoni ta' dak il-Kumitat Konġunt UE-EFTA mehmuż ma' din id-Deċiżjoni.

Artikolu 3

Ġaladarba l-Eks-Repubblika Jugoslava tal-Maċedonja tkun issodisfat kull kundizzjoni teknika għall-adeżjoni, ir-rappreżentant tal-UE fil-Kumitati Konġunti msemmija fl-Artikolu 1 u fl-Artikolu 2 rispettivament, għandu jipproponi d-deċiżjonijiet biex jistieden lill-Eks-Repubblika Jugoslava tal-Maċedonja biex taderixxi għall-Konvenzjonijiet u jivvota fuq dawn id-deċiżjonijiet f'konformità mal-Artikolu 1 u mal-Artikolu 2 ta' din id-Deċiżjoni.

Artikolu 4

Din id-Deċiżjoni tidħol fis-seħħ fl-1 ta' Ġunju 2015.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 226, 13.8.1987, p. 2.

[2]               ĠU L 134, 22.5.1987, p. 2.

ANNESS 1

Anness tal-proposal għal Deċiżjoni tal-Kunsill dwar il-pożizzjoni li għandha tieħu l-Unjoni Ewropea dwar l-adozzjoni ta' Deċiżjoni mill-Kumitat Konġunt UE-EFTA dwar it-tranżitu komuni u mill-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija fejn jidħlu l-istediniet lill-Eks-Repubblika Jugoslava tal-Maċedonja biex taderixxi għal dawk il-Konvenzjonijiet

proposta għal Deċiżjoni Nru .../2015 tal-Kumitat Konġunt UE-EFTA dwar it-tranżitu komuni fejn tidħol l-istedina lill-Eks-Repubblika Jugoslava tal-Maċedonja biex taderixxi għall-Konvenzjoni dwar proċedura ta' tranżitu komuni

IL-KUMITAT KONĠUNT,

Wara li kkunsidra l-Konvenzjoni tal-20 ta' Mejju 1987 dwar proċedura ta' tranżitu komuni[1] ("il-Konvenzjoni"), u b'mod partikolari l-Artikolu 15(3)(a) tagħha,

Billi:

(1)        Il-promozzjoni tal-kummerċ mal-Eks-Repubblika Jugoslava tal-Maċedonja se teħfief permezz ta' proċedura ta' tranżitu komuni għall-merkanzija trasportata bejn l-Eks-Repubblika Jugoslava tal-Maċedonja u l-Unjoni Ewropea, ir-Repubblika tal-Iżlanda, ir-Renju tan-Norveġja, il-Konfederazzjoni Żvizzera u r-Repubblika tat-Turkija.

(2)        Sabiex tinkiseb din il-proċedura, jixraq li l-Eks-Repubblika Jugoslava tal-Maċedonja tkun mistiedna taderixxi għall-Konvenzjoni,

ADOTTA DIN ID-DEĊIŻJONI:

Artikolu 1

F'konformità mal-Artikolu 15a tal-Konvenzjoni, l-Eks-Repubblika Jugoslava tal-Maċedonja għandha tiġi mistiedna taderixxi għall-Konvenzjoni mill-1 ta' Ġunju 2015.

Artikolu 2

Din id-Deċiżjoni tidħol fis-seħħ fid-data tal-adozzjoni tagħha.

Magħmul fi            2015,

                                                                                   

Għall-Kumitat Konġunt

                                                                                    Il-President

ANNESS 2

Abbozz tal-proposta għal

Deċiżjoni Nru .../2015 tal-Kumitat Konġunt UE-EFTA dwar is-simplifikazzjoni tal-formalitajiet fil-kummerċ tal-merkanzija fejn tidħol l-istedina lill-Eks-Repubblika Jugoslava tal-Maċedonja biex taderixxi għall-Konvenzjoni dwar is-simplifikazzjoni tal-formalitajiet fil-kummerċ tal-merkanzija

IL-KUMITAT KONĠUNT,

Wara li kkunsidra l-Konvenzjoni tal-20 ta' Mejju 1987 dwar is-simplifikazzjoni tal-formalitajiet fil-kummerċ tal-merkanzija[2] ("il-Konvenzjoni"), u b'mod partikolari l-Artikolu 11(3) tagħha,

Billi:

(1)        L-iskambju tal-merkanzija mal-Eks-Repubblika Jugoslava tal-Maċedonja se jeħfief bis-simplifikazzjoni tal-formalitajiet li jaffettwaw il-kummerċ tal-merkanzija trasportata bejn l-Eks-Repubblika Jugoslava tal-Maċedonja u l-Unjoni Ewropea, ir-Repubblika tal-Iżlanda, ir-Renju tan-Norveġja, il-Konfederazzjoni Żvizzera u r-Repubblika tat-Turkija.

(2)        Sabiex jeħfief dan l-iskambju, jixraq li l-Eks-Repubblika Jugoslava tal-Maċedonja tkun mistiedna taderixxi għall-Konvenzjoni,

ADOTTA DIN ID-DEĊIŻJONI:

Artikolu 1

F'konformità mal-Artikolu 11a tal-Konvenzjoni, l-Eks-Repubblika Jugoslava tal-Maċedonja għandha tiġi mistiedna taderixxi għall-Konvenzjoni mill-1 ta' Ġunju 2015.

Artikolu 2

Din id-Deċiżjoni tidħol fis-seħħ fid-data tal-adozzjoni tagħha.[

Magħmul fi,            2015,

           

Għall-Kumitat Konġunt

                                                                                                Il-President

[1]               ĠU L 226, 13.08.1987, p. 2.

[2]               ĠU L 134, 22.5.1987, p. 2.