MEMORANDUM TA’ SPJEGAZZJONI

1.           L-ISFOND POLITIKU U LEGALI

Ir-Regolament tal-Kunsill (KE) Nru 539/2001[1] jelenka l-pajjiżi terzi li ċ-ċittadini tagħhom għandhom ikollhom viżas fil-pussess tagħhom meta jaqsmu l-fruntieri esterni tal-Istati Membri u dawk iċ-ċittadini li huma eżentati minn dak ir-rekwiżit. Ir-Regolament (KE) Nru 539/2001 huwa applikat mill-Istati Membri kollha, bl-eċċezzjoni tal-Irlanda u r-Renju Unit.

Ir-Regolament tal-Parlament Ewropew u tal-Kunsill (UE) Nru 509/2014[2] emenda r-Regolament (KE) 539/2001 billi jittrasferixxi 19-il pajjiż għall-Anness II, li jelenka l-pajjiżi terzi li ċ-ċittadini tagħhom huma eżentati mill-ħtieġa ta’ viża. Dawn il-19-il pajjiżi huma: il-Kolombja, Dominika, Grenada, Kiribati, il-Gżejjer Marshall, il-Mikroneżja, Nauru, il-Palaw, il-Perù, Santa Luċija, Saint Vincent u l-Grenadini, Samoa, il-Gżejjer Solomon, Timor-Leste, Tonga, Trinidad u Tobago, Tuvalu, l-Emirati Għarab Magħquda u l-Vanwatu. Ir-referenza għal kull wieħed minn dawk il-pajjiżi fl-Anness II hija akkumpanjata b'nota f'qiegħ il-paġna li tispeċifika li "l-eżenzjoni mill-ħtieġa ta' viża għandha tapplika mid-data tad-dħul fis-seħħ ta’ ftehim dwar l-eżenzjoni mill-viża li għandu jiġi konkluż mal-Unjoni Ewropea".

Ir-Regolment (UE) Nru 509/2014 ġie adottat fl-20 ta’ Mejju 2014, u daħal fis-seħħ fid-9 ta’ Ġunju 2014. F'Lulju 2014, il-Kummissjoni ppreżentat Rakkomandazzjoni lill-Kunsill biex jawtorizzaha biex tibda negozjati dwar ftehimiet ta’ eżenzjoni mill-viża ma’ kull wieħed mis-17-il pajjiż li ġejjin: Dominika, Grenada, Kiribati, il-Gżejjer Marshall, il-Mikroneżja, Nauru, il-Palaw, Santa Luċija, Saint Vincent u l-Grenadini, Samoa, il-Gżejjer Solomon, Timor-Leste, Tonga, Trinidad u Tobago, Tuvalu, l-Emirati Għarab Magħquda u l-Vanwatu[3]. Fid-9 ta’ Ottubru 2014, il-Kunsill ħareġ direttivi ta’ negozjati lill-Kummissjoni.

Il-Kolombja u l-Perù huma, skont il-Premessa 5 tar-Regolament (UE) Nru 509/2014 u d-dikjarazzjoni konġunta maħruġa fi żmien l-adozzjoni, suġġetti għal proċedura speċifika li teħtieġ valutazzjoni ulterjuri tat-twettiq minnhom tal-kriterji rilevanti, qabel ma l-Kummissjoni tkun tista’ tippreżenta lill-Kunsill rakkomandazzjonijiet għal deċiżjonijiet li jawtorizzaw il-bidu ta' negozjati dwar il-ftehimiet dwar l-eżenzjoni mill-viża ma’ dawk iż-żewġ pajjiżi. Għalhekk, ma kinux inklużi fir-Rakkomandazzjoni msemmija hawn fuq lill-Kunsill.

In-negozjati dwar il-ftehim tal-eżenzjoni mill-viża mal-Emirati Għarab Magħquda (EGħM) bdew fil-5 ta’ Novembru 2014 fi Brussell. Matul din il-laqgħa, l-abbozz tat-test kollu seta’ jiġi rivedut u ntlaħaq qbil dwar l-aspetti kollha tiegħu. Wara numru ta’ skambji informali sussegwenti, il-ftehim ġie inizjalat min-negozjaturi ewlenin fl-20 ta’ Novembru 2014.

L-Istati Membri ġew mgħarrfa waqt il-laqgħa tal-Grupp ta’ Ħidma dwar il-Viża tal-Kunsill li saret fl-21 ta’ Novembru 2014.

Min-naħa tal-Unjoni, il-bażi legali għall-ftehim hu l-punt (a) tal-Artikolu 77(2) tat-Trattat dwar il-Funzjonament tal-Unjoni Ewropea (TFUE), flimkien mal-Artikolu 218 tiegħu.

Il-proposta mehmuża tikkostitwixxi l-istrument legali għall-iffirmar tal-ftehim. Il-Kunsill jiddeċiedi b’maġġoranza kwalifikata.

B’kont meħud tal-fatt li l-EGħM ikunu jistgħu jikkompletaw il-proċedura ta’ ratifika interni tagħha f’perjodu qasir ta’ żmien u li miżuri li jagħtu tal-EGħM proviżorja mal-wasla tal-viża għaċ-ċittadini ta’ għadd ta’ Stati Membri se jiskadu matul Marzu 2015, bil-konsegwenza li dawn iċ-ċittadini jista’ jkun li jkollhom bżonn japplikaw minn qabel għal viża mill-EGħM, id-deċiżjoni proposta dwar l-iffirmar tistabbilixxi l-applikazzjoni proviżorja tal-Ftehim mid-data tal-iffirmar tiegħu konformi mal-Artikolu 218(5) TFUE. Filwaqt li tqis il-ħtieġa għall-kunsens tal-Parlament Ewropew qabel jiġi konkluż il-ftehim, il-Kummissjoni se tinforma lill-Parlament Ewropew dwar l-applikazzjoni proviżorja tal-ftehim.

2.           RIŻULTAT TAN-NEGOZJATI

Il-Kummissjoni tikkunsidra li nkisbu l-għanijiet stabbiliti mill-Kunsill fid-direttivi ta’ negozjati tiegħu u li l-abbozz ta’ ftehim għall-eżenzjoni mill-viża hu aċċettabbli għall-Unjoni.

Il-kontenut finali tiegħu jista’ jitqassar kif ġej:

Għan

Il-ftehim jipprovdi għal vjaġġar mingħajr il-viża għaċ-ċittadini tal-Unjoni Ewropea u għaċ-ċittadini tal-EGħM meta jivvjaġġaw lejn it-territorju tal-Parti Kontraenti l-oħra għall-perjodu massimu ta' 90 jum fi kwalunkwe perjodu ta' 180 jum.

Sabiex jitħares it-trattament ugwali taċ-ċittadini kollha tal-UE, ġiet inkluża dispożizzjoni fil-ftehim li tispula li l-EGħM jistgħu jissospendu jew itemmu l-ftehim fil-konfront biss tal-Istati Membri kollha tal-Unjoni Ewropea u li l-Unjoni tista' wkoll tissospendi jew ittemm il-Ftehim fil-konfront biss tal-Istati Membri kollha tagħha.

Is-sitwazzjoni speċifika tar-Renju Unit u tal-Irlanda hi riflessa fil-preambolu.

Kamp ta' applikazzjoni

L-eżenzjoni mill-viża tkopri l-kategoriji kollha ta’ persuni (dawk li għandhom passaport ordinarju, diplomatiku jew uffiċjali/għas-servizz) li jivvjaġġaw għal għanijiet differenti, bl-eċċezzjoni għall-għan ta’ attivitajiet bi ħlas. Għal din il-kategorija tal-aħħar, kull Stat Membru u wkoll l-EGħM jibqgħu ħielsa milli jimponu r-rekwiżit tal-viża fuq iċ-ċittadini ta’ Parti oħra konformi mal-liġi tal-Unjoni jew nazzjonali applikabbli. Sabiex tkun żgurata implimentazzjoni armonizzata, dikjarazzjoni konġunta hi mehmuża mal-ftehim dwar l-interpretazzjoni tal-kategorija ta' persuni li jivvjaġġaw għall-għan ta’ twettiq ta' attività bi ħlas.

Tul ta’ żmien tas-soġġorn

Il-ftehim jipprovdi għal vjaġġar mingħajr il-viża għaċ-ċittadini tal-Unjoni Ewropea u għaċ-ċittadini tal-EGħM meta jivvjaġġaw lejn it-territorju tal-Parti Kontraenti l-oħra għall-perjodu massimu ta' 90 jum fi kwalunkwe perjodu ta' 180 jum. Dikjarazzjoni konġunta dwar l-interpretazzjoni ta’ dan il-perijodu ta’ 90 jum huwa mehmuż ma’ dan il-ftehim.

Il-ftehim jikkunsidra s-sitwazzjoni tal-Istati Membri li għadhom ma applikawx l-acquis ta' Schengen fl-intier tiegħu. Sakemm huma mhux parti miż-żona Schengen mingħajr fruntieri interni, l-eżenzjoni mill-viża tagħti dritt liċ-ċittadini tal-EGħM biex jibqgħu għal 90 jum fi kwalunkwe perjodu ta' 180 jum fit-territorju ta’ kull wieħed minn dawn l-Istati Membri (il-Bulgarija, il-Kroazja, Ċipru u r-Rumanija), irrispettivament mill-perjodu kkalkulat għaż-żona Schengen kollha.

Applikazzjoni territorjali

Il-ftehim għandu dispożizzjonijiet relatati mal-applikazzjoni territorrjali tiegħu: fil-każ ta’ Franza u n-Netherlands, l-eżenzjoni mill-viża għandha tintitola liċ-ċittadini tal-EGħM biex jibqgħu biss f’dawk it-territorji Ewropej tal-Istati Membri.

Dikjarazzjonijiet

Dikjarazzjonijiet konġunti oħra huma mehmuża mal-ftehim.:

- dwar it-tixrid totali tal-informazzjoni dwar il-kontenut u l-konsegwenzi tal-ftehim dwar l-eżenzjoni mill-viża u kwistjonijiet relatati, bħall-kundizzjonijiet tad-dħul fit-territorju, u

- fuq l-assoċjazzjoni tan-Norveġja, l-Iżlanda, l-Iżvizzera u l-Liechtenstein mal-implimentazzjoni, l-applikazzjoni u l-iżvilupp tal-acquis ta’ Schengen.

3.           KONKLUŻJONIJIET

Fid-dawl tar-riżultati msemmija hawn fuq, il-Kummissjoni tipproponi li l-Kunsill

– jiddeċiedi li l-ftehim jiġi ffirmat f’isem l-Unjoni u jawtorizza lill-President tal-Kunsill biex jaħtar lill-persuna/i bis-setgħa li tiffirma/jiffirmaw f’isem l-Unjoni;

– japprova l-applikazzjoni proviżorja tal-ftehim sakemm dan jidħol fis-seħħ;

2015/0046 (NLE)

Proposta għal

DEĊIŻJONI TAL-KUNSILL

dwar l-iffirmar, f'isem l-Unjoni Ewropea, u l-applikazzjoni proviżorja tal-Ftehim bejn l-Unjoni Ewropea u l-Emirati Għarab Magħquda dwar l-eżenzjoni mill-viża għal perjodu qasir

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-punt (a) tal-Artikolu 77(2), flimkien mal-Artikolu 218(5) tiegħu,

Wara li kkunsidra l-proposta mill-Kummissjoni,

Billi:

(1)       Ir-Regolament (UE) Nru 509/2014 tal-Parlament Ewropew u tal-Kunsill[4] ittrasferixxa mill-Anness I għall-Anness II tar-Regolament (KE) Nru 539/2001 [5] ir-referenza għall-Emirati Għarab Magħquda (EGħM).

(2)       Ir-referenza għal dak il-pajjiż hija akkumpanjata b'nota f'qiegħ il-paġna li tispeċifika li l-eżenzjoni mill-ħtieġa ta' viża għandha tapplika mid-data tad-dħul fis-seħħ ta’ ftehim dwar l-eżenzjoni mill-viża li għandu jiġi konkluż mal-Unjoni Ewropea.

(3)       Bid-deċiżjoni tiegħu tad-9 ta’ Ottubru 2014, il-Kunsill awtorizza lill-Kummissjoni biex tinnegozja ftehim bejn l-Unjoni Ewropea u l-EGħM dwar l-eżenzjoni mill-viża għal perjodu qasir.

(4)       In-negozjati dwar il-ftehim inbdew fil-5 ta' Novembru 2014.

(5)       Il-Ftehim inizjalat permezz ta’ skambju ta’ ittri fl-20 ta’ Novembru 2014 għandu jiġi ffirmat u d-dikjarazzjonijiet mehmuża jiġu approvati. Il-Ftehim għandu jiġi applikat fuq bażi proviżorja, sakemm jintemmu l-proċeduri għall-konklużjoni formali tiegħu.

(6)       F’konformità mal-Protokoll dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja u l-Protokoll dwar l-acquis ta’ Schengen integrat fil-qafas tal-Unjoni Ewropea, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, u filwaqt li jikkonferma li d-dispożizzjonijiet tal-Ftehim ma japplikawx għar-Renju Unit u l-Irlanda,

IDDEĊIEDA KIF ĠEJ:

Artikolu 1

L-iffirmar tal-Ftehim bejn l-Unjoni Ewropea u l-Emirati Għarab Magħquda dwar l-eżenzjoni mill-viża għal perjodu qasir (minn hawn 'il quddiem imsejjaħ il-Ftehim) huwa b'dan approvat f'isem l-Unjoni, suġġett għall-konklużjoni tiegħu.

It-test tal-Ftehim jinsab mehmuż ma' din id-Deċiżjoni.

Artikolu 2

Id-dikjarazzjonijiet mehmuża ma' din id-deċiżjoni jiġu approvati f'isem l-Unjoni.

Artikolu 3

Il-President tal-Kunsill huwa b’dan awtorizzat li jaħtar il-persuna jew persuni li jkollhom is-setgħa li jiffirmaw il-Ftehim f’isem l-Unjoni, suġġett għall-konklużjoni tiegħu.

Artikolu 4

Il-Ftehim għandu japplika b’mod proviżorju mid-data tal-iffirmar tiegħu, sakemm jitlestew il-proċeduri meħtieġa għal konklużjoni.

Magħmul fi Brussell,

                                                                       Għall-Kunsill

                                                                       Il-President

[1]               Ir-Regolament tal-Kunsill (KE) Nru 539/2001 tal-15 ta' Marzu 2001 li jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni u dawk iċ-ċittadini li huma eżentati minn dak ir-rekwiżit, ĠU L 81, 21.03.2001, p. 1.

[2]               Ir-Regolament (UE) Nru 509/2014 tal-Parlament Ewropew u tal-Kunsill tal-15 ta' Mejju 2014 li jemenda r-Regolament tal-Kunsill (KE) Nru 539/2001 li jelenka l-pajjiżi terzi li ċ-ċittadini tagħhom għandhom ikollhom viża fil-pussess tagħhom meta jaqsmu l-fruntieri esterni u dawk iċ-ċittadini li huma eżentati minn dik il-ħtieġa, ĠU L 149, 20.05.2014, p.67

[3]               COM (2014) 467, 17.7.2014

[4]               Ir-Regolament (UE) Nru 509/2014 tal-Parlament Ewropew u tal-Kunsill tal-15 ta' Mejju 2014 li jemenda r-Regolament tal-Kunsill (KE) Nru 539/2001 li jelenka l-pajjiżi terzi li ċ-ċittadini tagħhom għandhom ikollhom viża fil-pussess tagħhom meta jaqsmu l-fruntieri esterni u dawk iċ-ċittadini li huma eżentati minn dik il-ħtieġa (ĠU L 149, 20.05.2014, p. 67).

[5]               Ir-Regolament tal-Kunsill (KE) Nru 539/2001 tal-15 ta' Marzu 2001 li jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni u dawk iċ-ċittadini li huma eżentati minn dak ir-rekwiżit (ĠU L 81, 21.03.2001, p. 1).

ANNESSI

għall-

Proposta għal Deċiżjoni tal-Kunsill

dwar l-iffirmar, f'isem l-Unjoni Ewropea, u l-applikazzjoni proviżorja tal-Ftehim bejn l-Unjoni Ewropea u l-Emirati Għarab Magħquda dwar l-eżenzjoni mill-viża għal perjodu qasir

FTEHIM

bejn l-Unjoni Ewropea u l-Emirati Għarab Magħquda dwar l-eżenzjoni mill-viża għal perjodu qasir

L-UNJONI EWROPEA, minn hawn ’il quddiem imsejħa “l-Unjoni”, u

L-EMIRATI GĦARAB MAGĦQUDA, minn hawn 'il quddiem imsejħa “l-EGħM”,

minn hawn ‘il quddiem konġuntement imsejħa "il-Partijiet Kontraenti";

BIL-ĦSIEB li jiġu żviluppati ulterjorment relazzjonijiet ta’ ħbiberija bejn il-Partijiet Kontraenti u bix-xewqa li jiġi ffaċilitat l-ivvjaġġar billi jiġi żgurat dħul u soġġorn għal perjodu qasir mingħajr viża għaċ-ċittadini tagħhom;

WARA LI KKUNSIDRAW ir-Regolament tal-Kunsill u tal-Parlament Ewropew (UE) Nru 509/2014 tal-15 ta’ Mejju 2014, li jemenda r-Regolament (KE) Nru 539/2001 li jelenka l-pajjiżi terzi li ċ-ċittadini tagħhom għandu jkollhom viżi fil-pussess tagħhom meta jaqsmu l-fruntieri esterni u dawk li ċ-ċittadini tagħhom huma eżenti minn dak ir-rekwiżit billi, inter alia, jittrasferixxi 19-il-pajjiż terz, inkluż l-EGħM, fil-lista ta’ pajjiżi terzi li ċ-ċittadini tagħhom huma eżentati mir-rekwiżit tal-viża għal soġġorni qosra fl-Istati Membri tal-Unjoni Ewropea (UE),

FILWAQT LI HUMA KONXJI li l-Artikolu 1 tar-Regolament (UE) Nru 509/2014 jistipula li għal dawn il-19-il pajjiż, l-eżenzjoni mir-rekwiżit tal-viża għandha tapplika biss mid-data tad-dħul fis-seħħ ta’ ftehim dwar l-eżenzjoni mill-viża li għandu jiġi konkluż mal-Unjoni Ewropea,

FILWAQT LI JIXTIEQU li jitħares il-prinċipju ta’ trattament ugwali taċ-ċittadini kollha tal-UE;

WARA LI JIKKUNSIDRAW li l-persuni li jivvjaġġaw b'fini ta’ attività bi ħlas matul is-soġġorn qasir tagħhom mhumiex koperti b’dan il-Ftehim u għalhekk għal din il-kategorija r-regoli relevanti tal-liġi tal-Unjoni u tal-liġi nazzjonali tal-Istati Membri u tal-liġi nazzjonali ta’ EGħM dwar l-obbligu jew l-eżenzjoni mill-viża u għall-aċċess għal impjieg jibqgħu japplikaw;

FILWAQT LI JQISU l-Protokoll dwar il-pożizzjoni tar-Renju Unit u l-Irlanda fir-rigward tal-ispazju ta' libertà, sigurtà u ġustizzja u l-Protokoll dwar l-acquis ta' Schengen integrat fil-qafas tal-Unjoni Ewropea, annessi mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, u jikkonfermaw li d-dispożizzjonijiet ta' dan il-ftehim ma japplikawx għar-Renju Unit u l-Irlanda,

FTIEHMU KIF ĠEJ:

Artikolu 1

Fini

Dan il-Ftehim jipprovdi għal vjaġġar mingħajr il-viża għaċ-ċittadini tal-Unjoni Ewropea u għaċ-ċittadini tal-EGħM meta jivvjaġġaw lejn it-territorju tal-Parti Kontraenti l-oħra għall-perjodu massimu ta' 90 jum f'perjodu kwalunkwe ta' 180 jum.

Artikolu 2

Definizzjonijiet

Għal finijiet ta' dan il-Ftehim:

(a) "Stat Membru" tfisser kwalunkwe Stat Membru tal-Unjoni Ewropea, bl-eċċezzjoni tar-Renju Unit u l-Irlanda;

(b) "ċittadin tal-Unjoni Ewropea" tfisser ċittadin ta’ Stat Membru kif deskritt fil-punt (a);

(c) “ċittadin tal-Emirati Għarab Magħquda” tfisser ċittadin tal-EGħM;

(d) "iż-żona Schengen" tfisser iż-żona mingħajr fruntieri interni li jinkludu t-territorji tal-Istati Membri kif definit fil-punt (a) li japplikaw l-acquis ta’ Schengen fl-intier tiegħu.

Artikolu 3

Kamp ta' applikazzjoni

1.         Iċ-ċittadini tal-Unjoni li għandhom passaport ordinarju, diplomatiku, passaport għas-servizz/uffiċjali jew passaport speċjali, li hu validu u maħruġ minn Stat Membru, jistgħu jidħlu u jibqgħu mingħajr viża fit-territorju tal-EGħM għall-perjodu tas-soġġorn kif definit fl-Artikolu 4(1).

Iċ-ċittadini tal-EGħM li għandhom passaport ordinarju, diplomatiku, passaport għas-servizz/uffiċjali jew passaport speċjali, li hu validu u maħruġ mill-EGħM, jistgħu jidħlu u jibqgħu mingħajr viża fit-territorju tal-Istati Membri għall-perjodu tas-soġġorn kif definit fl-Artikolu 4(2).

2.         Il-paragrafu 1 ma japplikax għall-persuni li jivvjaġġaw għall-finijiet ta’ twettiq ta' attività bi ħlas.

Għal din il-kategorija ta’ persuni, kull Stat Membru jista’ jiddeċidi individwalment li jimponi r-rekwiżit tal-viża fuq iċ-ċittadini ta’ EGħM jew li jirtirah konformi mal-Artikolu 4(3) tar-Regolament (KE) Nru 539/2001.

Għal din il-kategorija ta’ persuni, l-EGħM jistgħu jiddeċiedu dwar ir-rekwiżit tal-viża jew l-eżenzjoni mill-viża għaċ-ċittadini ta’ kull Stat Membru individwalment konformi mal-liġi nazzjonali tagħhom.

3.         L-eżenzjoni mill-viża pprovduta b’dan il-Ftehim għandha tapplika bla ħsara għal-liġijiet tal-Partijiet Kontraenti dwar il-kundizzjonijiet tad-dħul fit-territorju u tas-soġġorn qasir. L-Istati Membri u l-EGħM jirriżervaw id-dritt li jirrifjutaw id-dħul jew is-soġġorn qasir fit-territorji tagħhom jekk waħda jew aktar minn dawn il-kundizzjonijiet mhumiex osservati.

4.         L-eżenzjoni mill-viża tapplika irrespettivament mill-metodu ta’ trasport użat biex jinqasmu l-punti ta' qsim tal-fruntiera tal-Partijiet Kontraenti.

5.         Kwistjonijiet mhux koperti minn dan il-Ftehim għandhom jiġu koperti bil-liġi tal-Unjoni, il-liġi nazzjonali tal-Istati Membri u l-liġi nazzjonali tal-EGħM.

Artikolu 4

Tul ta’ żmien tas-soġġorn

1.         Iċ-ċittadini tal-Unjoni Ewropea jistgħu jibqgħu fit-territorju tal-EGhM għal perjodu massimu ta’ 90 jum fi kwalunkwe perjodu ta’ 180 jum.

2.         Iċ-ċittadini tal-EGħM jistgħu jibqgħu fit-territorju tal-Istat Membru li japplikaw l-acquis ta' Schengen fl-intier tiegħu għal perjodu massimu ta’ 90 jum fi kwalunkwe perjodu ta’ 180 jum. Dan il-perjodu għandu jkun ikkalkulat irrispettivament minn kwalunkwe soġġorn fi Stat Membru li għadu ma japplikax l-acquis ta’ Schengen fl-intier tiegħu.

Iċ-ċittadini ta' EGħM jistgħu jibqgħu għal perjodu massimu ta’ 90 jum fi kwalunkwe perjodu ta’ 180 jum fit-territorju ta’ kull Stat Membru li għadu ma japplikax l-acquis ta’ Schengen fl-intier tiegħu, irrispettivament mill-perjodu tas-soġġorn kkalkulat għat-territorju ta’ Stat Membru li japplika l-acquis ta’ Schengen fl-intier tiegħu.

3.         Dan il-Ftehim ma jaffettwax il-possibbiltà għall-EGħM u għall-Istati Membri biex jestendu l-perjodu ta’ soġġorn għal aktar minn 90 jum konformi mal-liġi nazzjonali u l-liġi tal-Unjoni.

Artikolu 5

Applikazzjoni territorjali

1.         Fir-rigward tar-Repubblika Franċiża, id-dispożizzjonijiet ta' dan il-Ftehim għandhom japplikaw biss għat-territorju Ewropew tar-Repubblika Franċiża.

2.         Fir-rigward tar-Renju tal-Olanda, id-dispożizzjonijiet ta' dan il-Ftehim għandhom japplikaw biss għat-territorju Ewropew u tar-Renju tal-Olanda.

Artikolu 6

Kumitat Konġunt għall-immaniġġar tal-Ftehim

1.         Il-Partijiet Kontraenti jistabbilixxu Kumitat Konġunt ta’ esperti (minn hawn ’il quddiem riferut bħala “l-Kumitat”), magħmul minn rappreżentanti tal-Unjoni Ewropea u rappreżentanti tal-EGħM. L-Unjoni hija rappreżentata mill-Kummissjoni Ewropea.

2.         Il-Kumitat għandu d-dmirijiet li ġejjin:

(a) il-monitoraġġ tal-implimentazzjoni ta’ dan il-Ftehim;

(b) is-suġġeriment ta' emendi jew żidiet għal dan il-Ftehim;

(c) is-soluzzjoni ta' tilwimiet li jitqanqlu mill-interpretazzjoni jew l-applikazzjoni tad-dispożizzjonijiet ta’ dan il-Ftehim;

(d) kwalunkwe kompitu ieħor maqbul reċiprokament bejn il-partijiet Kontraenti.

3.         Il-Kumitat jiltaqa' kull meta jkun meħtieġ fuq talba ta' waħda mill-Partijiet Kontraenti.

4.         Il-Kumitat jistabbilixxi r-regoli tal-proċedura tiegħu stess.

Artikolu 7

Relazzjoni bejn dan il-Ftehim u ftehimiet bilaterali eżistenti għall-eżenzjoni mill-viża bejn l-Istati Membri ul-EGħM

Dan il-Ftehim għandu jkollu preċedenza fuq id-dispożizzjonijiet ta’ kwalunkwe ftehimiet bilaterali jew arranġamenti konklużi bejn l-Istati Membri individwali u l-EGħM, sa fejn id-dispożizzjonijiet tagħhom ikopru kwistjonijiet li jaqgħu taħt l-ambitu ta’ dan il-Ftehim.

Artikolu 8

Dispożizzjonijiet finali

1.         Dan il-Ftehim għandu jiġi rratifikat jew approvat mill-Partijiet Kontraenti konformi mal-proċeduri interni rispettivi tagħhom u għandu jidħol fis-seħħ fl-ewwel jum tat-tieni xahar wara d-data li fiha l-Partijiet Kontraenti jinnotifikaw lil xulxin bit-tlestija tal-proċeduri msemmija hawn fuq.

2.         Dan il-Ftehim qed jiġi konkluż għal perjodu ta’ żmien indefinit, kemm-il darba ma jintemmx konformi mal-paragrafu 5.

3.         Dan il-Ftehim jista’ jiġi emendat bi ftehim bil-miktub mill-Partijiet Kontraenti. L-emendi għandhom jidħlu fis-seħħ wara li l-Partijiet Kontraenti jkunu nnotifikaw lil xulxin bit-twettiq tal-proċeduri interni tagħhom li huma meħtieġa għal dan il-fini.

4.         Kull Parti Kontraenti tista' tissospendi l-Ftehim fl-intier tiegħu jew parzjalment, b’mod partikolari, għal raġunijiet ta’ ordni pubbliku, protezzjoni ta’ sikurezza nazzjonali jew protezzjoni ta’ saħħa pubblika, immigrazzjoni illegali jew introduzzjoni mill-ġdid tar-rekwiżit tal-viża minn kull Parti Kontraenti. Id-deċiżjoni dwar is-sospensjoni għandha tkun notifikata lill-Parti Kontraenti l-oħra mhux aktar tard minn xahrejn qabel jidħol fis-seħħ il-Ftehim. Il-Parti Kontraenti li tkun issospendiet l-applikazzjoni ta’ dan il-Ftehim għandha tgħarraf immedjatament lill-Parti l-oħra ladarba r-raġunijiet għas-sospensjoni ma jeistux aktar.

5.         Kull Parti Kontraenti tista’ ttemm dan il-Ftehim billi tagħti avviż bil-miktub lill-Parti l-oħra. Dan il-Ftehim ma jkollux effett 90 jum wara d-data ta’ dan l-avviż.

6.         L-EGħM jistgħu jissospendu jew itemmu dan il-Ftehim fil-konfront biss tal-Istati Membri kollha.

7.         L-Unjoni tistà tissospendi jew ittemm dan il-Ftehim biss fil-konfront biss tal-Istati Membri kollha tagħha.

Magħmul fi Brussell,

B’żewġ kopji fl-ilsien Għarbi, Bulgaru, Kroat, Ċek, Daniż, Netherlandiż, Ingliż, Estonjan, Finlandiż, Franċiż, Ġermaniż, Grieg, Ungeriż, Taljan, Latvjan, Litwan, Malti, Pollakk, Portugiż, Rumen, Slovakk, Sloven, Spanjol u Svediż, b'kull wieħed minn dawn it-testi jkollhom l-istess awtentiċità. 

DIKJARAZZJONI KONĠUNTA FIl-KONFRONT TAL-ISLANDA, IN-NORVEĠJA, L-ISVIZZERA U L-LIECHTENSTEIN

Il-Partijiet Kontraenti jirrimarkaw ir-relazzjoni mill-qrib bejn l-Unjoni Ewropea u n-Norveġja, l-Islanda, l-Isvizzera u l-Liechtenstein, b’mod partikolari bis-saħħa tal-Ftehimiet tat-18 ta’ Mejju 1999 u tas-26 ta’ Ottubru 2004 dwar l-assoċjazzjoni ta’ dawn il-pajjiżi mal-implimentazzjoni, l-applikazzjoni u l-iżvilupp tal-acquis ta’ Schengen.

F’ċirkostanzi bħal dawn hu mixtieq li l-awtoritajiet tan-Norveġja, l-Islanda, l-Isvizzera u l-Liechtenstein, min-naħa, u l-awtoritajiet tal-Emirati Għarab Magħquda, min-naħa l-oħra, jikkonkludu, bla dewmien, ftehimiet bilaterali dwar l-eżenzjoni mill-viża għal perjodu qasir f’termini simili għal dan il-Ftehim.

DIKJARAZZJONI KONĠUNTA DWAR L-INTERPRETAZZJONI TAL-KATEGORIJA TA’ PERSUNI LI JIVVJAĠĠAW B'FINI TA’ TWETTIQ TA' ATTIVITÀ BI ĦLAS SKONT L-ARTIKOLU 3(2) TA’ DAN IL-FTEHIM

Filwaqt li tkun ssodisfata x-xewqa li tkun żgurata interpretazzjoni komuni, il-Partijiet Kontraenti jaqblu li, għal dan il-fini, il-kategorija ta’ persuni li jwettqu attività bi ħlas tkopri l-persuni li jidħlu b'fini li jkollhom mestier bi qliegħ / attività b’remunerazzjoni fit-territorju tal-Parti Kontraenti l-oħra bħala impjegat jew fornitur ta’ servizz.

Din il-kategorija ma għandiex tkopri:

- persuni tan-negozju, jiġifieri persuni li li jivvjaġġaw b'fini ta’ deliberazzjoni tan-negozju (mingħajr ma jkunu impjegati fil-pajjiż tal-Parti Kontraenti l-oħra),

- persuni tal-isports u artisti li jeżebixxu attività fuq bażi ad hoc,

- ġurnalisti mibgħuta mill-midja ta’ pajjiż ta’ residenza tagħhom u

apprendisti intra-korporattivi.

L-implimentazzjoni ta’ din id-Dikjarazzjoni għandha tkun issorveljata mill-Kumitat Konġunt fi ħdan ir-responsabbiltà tiegħu skont l-Artikolu 6 ta’ dan il-Ftehim, li jista’ jipproponi modifikazzjonijiet fuq il-bażi tal-esperjenzi tal-Partijiet Kontraenti, meta jikkunsidrah neċessarju.

DIKJARAZZJONI KONĠUNTA DWAR L-INTERPRETAZZJONI TAL-PERJODU TA’ 90 JUM FI KWALUNKWE PERJODU TA' 180 JUM KIF STABBILIT FL-ARTIKOLU 4 TA’ DAN IL-FTEHIM

Il-Partijiet Kontraenti jifhmu li perjodu massimu ta’ 90 jum fi kwalunkwe perjodu ta’ 180 jum kif previst fl-Artikolu 4 ta’ dan il-Ftehim ifisser soġġorn kontinwu jew bosta soġġorni konsekuttivi, li l-perjodu ta’ żmien tagħhom ma jaqbiżx 90 jum fi kwalunkwe perjodu ta’ 180 jum b’kollox.

Il-kunċett ta’ “kwalunkwe” jimplika l-applikazzjoni ta’ perjodu referenzjarju mobbli ta' 180 jum, billi wieħed iħares lura lejn kull ġurnata tas-soġġorn matul l-aħħar perjodu ta' 180 jum, sabiex jiġi vverifikat jekk ir-rekwiżit tad-90 jum fi kwalunkwe perjodu ta' 180 jum għadux jiġi ssodisfat. Fost l-oħrajn, dan ifisser li assenza għal perjodu mhux interrott ta’ 90 jum tippermetti li jkun hemm soġġorn ġdid ta' mhux aktar minn 90 jum.

DIKJARAZZJONI KONĠUNTA DWAR L-INFORMAZZJONI TAĊ-ĊITTADINI DWAR IL-FTEHIM TAL-EŻENZJONI MILL-VIŻA

Filwaqt li tkun rikonoxxuta l-importanza tat-trasparenza għaċ-ċittadini tal-Unjoni Ewropea u ċ-ċittadini tal-Emirati Għarab Magħquda, il-Partijiet Kontraenti jiftiehmu sabiex jiżguraw it-tixrid totali ta’ informazzjoni dwar il-kontenut u l-konsegwenzi tal-eżenzjoni mill-viża u kwistjonijiet relatati, bħall-kundizzjonijiet għad-dħul.