10.2.2016   

MT

Il-Ġurnal Uffiċjali tal-Unjoni Ewropea

C 51/34

1.

ifakkar li kull proposta leġislattiva mill-Kummissjoni, inklużi dawk fil-qasam tat-tassazzjoni, abbażi tal-Artikoli 113, 115 jew 116 tat-Trattat dwar il-Funzjonament tal-Unjoni Ewropea, trid tkun f’konformità mal-prinċipji tas-sussidjarjetà u tal-proporzjonalità;

2.

jappoġġa l-erba’ għanijiet stabbiliti fil-pjan ta’ azzjoni tal-Kummissjoni dwar it-tassazzjoni korporattiva, li huma:

3.

iqis li l-leġislazzjoni eżistenti dwar it-tassazzjoni korporattiva – kemm fil-livell nazzjonali, Ewropew jew fuq livell globali – m’għadhiex adatta għall-kuntest ekonomiku attwali tal-globalizzazzjoni, il-mobbiltà, it-teknoloġiji diġitali, għal mudelli kummerċjali ġodda u għal strutturi tan-negozju kumplessi;

4.

jenfasizza l-kumplessità kbira tar-regoli attwali dwar it-tassazzjoni korporattiva fl-UE, kif ukoll in-nuqqas ta’ koordinazzjoni u ta’ komplementarjetà bejn is-sistemi differenti tal-Istati Membri differenti;

5.

jiddispjaċih li xi kumpaniji, partikolarment kumpaniji multinazzjonali, jieħdu vantaġġ minn din is-sitwazzjoni biex inaqqsu l-kontribuzzjonijiet tat-taxxa tagħhom, permezz ta’ prattiki ġuridikament oġġezzjonabbli ta’ frodi fiskali u ta’ evitar tat-taxxa illegali, jew permezz tal-użu ta’ strateġiji ta’ ppjanar aggressiv tat-taxxa li, filwaqt li jistgħu jkunu leġittimi, imorru kontra l-ispirtu tal-leġislazzjoni inkwistjoni;

6.

jenfasizza li, f’kull każ, dawn il-kumpaniji huma fl-aħħar mill-aħħar soġġetti għal livell ta’ taxxa li xejn mhu ġust, għaliex huwa baxx meta mqabbel mal-introjtu tagħhom;

7.

ifakkar li xi kalkoli jistmaw li l-evażjoni tat-taxxa, il-frodi fiskali u l-ippjanar aggressiv tat-taxxa kull sena jiġġeneraw fl-UE telf ta’ dħul fiskali potenzjali ta’ kważi EUR 1 000 biljun (1); ifakkar ukoll li dan it-telf fid-dħul jagħmel ħsara lill-finanzi pubbliċi fil-livelli kollha, inkluż għall-awtoritajiet lokali u reġjonali; barra minn hekk, perċezzjoni ġusta, trasparenti, effikaċi u ekwa għall-kumpaniji kollha tippermetti tnaqqis fil-piż tat-taxxa;

8.

jipproponi li l-ġabra ta’ ftehimiet internazzjonali li l-Unjoni Ewropea tagħmel parti minnhom, u fosthom il-ftehimiet kummerċjali u l-ftehimiet ta’ sħubija ekonomika, għandhom jinkludu dispożizzjonijiet dwar il-promozzjoni ta’ governanza tajba fi kwistjonijiet tat-taxxa, kemm fir-rigward tat-trasparenza, kif ukoll tal-ġlieda kontra prattiki dannużi tat-taxxi, u jitlob lill-Kummissjoni Ewropea tinsisti fuq dan il-punt matul in-negozjati li għaddejjin bħalissa b’mod partikolari dwar is-Sħubija Trans-Atlantika ta’ Kummerċ u ta’ Investiment u l-Ftehim dwar il-Kummerċ fis-Servizzi (TiSA);

9.

jiddeplora l-eżistenza u l-firxa ta’ dawn il-prattiki fiskali ta’ ħsara fi żmien meta ħafna mill-kontribwenti, b’mod partikolari individwi privati, f’xi Stati Membri huma soġġetti għal piż ta’ taxxa ogħla minħabba l-politiki ta’ awsterità; huwa tal-fehma li dan in-nuqqas ta’ ekwità fiskali huwa ta’ ħsara għall-istabbilità soċjali u ekonomika;

10.

ifakkar li l-kumplessità tar-regoli attwali dwar it-tassazzjoni korporattiva, għalkemm hija ta’ benefiċċju għal ċerti kumpaniji kbar li jibbenefikaw min-nuqqasijiet tagħhom, hija ta’ żvantaġġ ċar għall-kumpaniji ż-żgħar, ta’ daqs medju u dawk mikro, peress li dan il-piż amministrattiv ixekkel l-attivitajiet tagħhom, b’mod partikolari dawk transkonfinali;

11.

iqis li din is-sitwazzjoni tirrappreżenta wkoll żbilanċ kompetittiv bejn in-negozji, prinċipalment bejn il-kumpaniji kbar multinazzjonali, li għandhom ir-riżorsi meħtieġa biex jevadu t-taxxi b’tali ppjanar aggressiv tat-taxxa, u l-intrapriżi żgħar u ta’ daqs medju (SMEs), li m’għandhomx;

12.

jinnota li hemm, fil-livell tal-UE u fuq medda twila ta’ żmien, tnaqqis ġenerali fir-rati legali tat-taxxa korporattiva;

13.

jenfasizza, madankollu, li dan it-tnaqqis tar-rati f’dawn l-aħħar snin ra diversi żviluppi, bħalma huma t-twessigħ tal-bażijiet tat-taxxa, iż-żieda fil-ħolqien ta’ kumpaniji u rati baxxi ta’ interess (li jillimitaw l-ammonti li jistgħu jitnaqqsu), li kellhom iwasslu għal żieda fid-dħul mit-taxxa korporattiva fuq l-introjtu;

14.

jinnota li huwa diffiċli li jitqabblu r-rati effettivi imposti fi Stati Membri differenti u għalhekk jissuġġerixxi li jiġi żviluppat metodu komuni ta’ kalkolu li jippermetti tqabbil tar-rati tat-taxxa effettivi fl-Istati Membri varji;

15.

fid-dawl tal-istudji tal-OECD li juru li xi kumpaniji multinazzjonali qed jużaw strateġiji li bihom ikunu jistgħu jħallsu biss 5 % tat-taxxa korporattiva filwaqt li kumpaniji iżgħar qed iħallsu sa 30 %, jappoġġa s-sejħa biex kumpanijiet multinazzjonali jkunu meħtieġa jiżvelaw sett ta’ informazzjoni aggregata fid-dikjarazzjonijiet finanzjarji tagħhom għal kull Stat Membru u l-pajjiż terz li jaħdmu fih, inkluż il-profitt u t-telf qabel it-taxxa, it-taxxa fuq il-profitt jew it-telf, in-numru ta’ impjegati u assi li għandhom; din l-informazzjoni għandha tkun disponibbli għall-pubbliku, possibbilment fil-forma ta’ reġistru ċentrali tal-UE;

16.

jagħraf il-potenzjal doppju ta’ bażi komuni konsolidata tat-taxxa korporattiva (BKKTK): l-ewwel nett fil-ġlieda kontra l-ippjanar aggressiv tat-taxxa, il-frodi u l-evitar tat-taxxa u l-kompetizzjoni fiskali dannuża bejn l-Istati Membri u, min-naħa l-oħra, sabiex jissaħħaħ is-suq uniku u jitnaqqsu l-piżijiet amministrattivi li huma ta’ piż fuq kumpaniji ta’ kull daqs li huma impenjati f’attivitajiet transkonfinali;

17.

iqis li l-fatt li jiġi determinat id-dħul taxxabbli tagħhom b’sett uniku ta’ regoli tat-taxxa minflok 28 jissemplifika l-affarijiet u huwa sors ta’ ffrankar peress li jitnaqqsu l-ispejjeż amministrattivi għall-kumpaniji, u li jista’ jkun partikolarment sinifikanti għall-SMEs li huma attivi f’diversi Stati Membri;

18.

jenfasizza, għalhekk, l-effetti pożittivi li BKKTK x’aktarx ikollha fuq it-tkabbir ekonomiku, l-impjiegi u l-ġustizzja fiskali kif ukoll fuq il-finanzi pubbliċi, inklużi dawk tal-awtoritajiet lokali u reġjonali;

19.

iqis li, minkejja l-fatt li BKKTK ma għandhiex direttament fil-mira – għall-inqas fil-proposta tal-2011 – it-taxxi lokali u reġjonali, it-twaqqif tagħha ser ikollu impatt fuq id-dħul mit-taxxa tal-awtoritajiet lokali u reġjonali, minn fejn toriġina parti minnhom, skont l-Istati Membri, mit-taxxi lokali jew reġjonali fuq il-bażi taxxabbli nazzjonali u/jew minn kwota tat-taxxa korporattiva nazzjonali;

20.

jistieden lill-Kummissjoni biex teżamina bir-reqqa l-impatt potenzjali ta’ proposta leġislattiva ġdida li tistabbilixxi l-BKKTK fuq l-awtoritajiet lokali u reġjonali u, b’mod aktar partikolari, fuq il-baġits tagħhom, madankollu mingħajr ma tinbeda mill-ġdid il-proċedura kollha ta’ analiżi tal-impatt tal-BKKTK, li joħloq dewmien mhux meħtieġ għall-implimentazzjoni tagħha;

21.

jenfasizza li, f’xi Stati Membri, it-taxxi lokali u reġjonali ser ikunu affettwati bl-introduzzjoni ta’ reġim ta’ BKKTK peress li jidher loġiku, għal raġunijiet ta’ semplifikazzjoni, li dan għandu jiġi użat ukoll biex jiddetermina t-taxxi lokali u reġjonali;

22.

jenfasizza li l-BKKTK ma għandhiex l-għan li tarmonizza r-rati tat-taxxa, fid-dawl tal-fatt li t-Trattati attwali ma jinkludu l-ebda artikolu speċifiku dwar it-tassazzjoni diretta. Madankollu, dan in-nuqqas ta’ perspettiva ta’ armonizzazzjoni abbażi tat-Trattati attwali ma jfissirx li l-Istati Membri ma jistgħux jipprevedu kooperazzjoni msaħħa f’dan il-qasam;

23.

jinnota li r-rati legali tat-taxxa korporattiva fl-Istati Membri differenti mhumiex indikatur preċiż, huma saħansitra qarrieqa, peress li hemm differenzi bejn il-bażijiet tat-taxxa, kif ukoll reġimi ta’ tnaqqis u dawk preferenzjali; jenfasizza li f’xi każijiet, ir-rata effettiva ta’ taxxa m’għandha l-ebda relazzjoni mar-rata legali;

24.

jitlob, għalhekk, u għal raġunijiet ta’ trasparenza, li l-Istati Membri u r-reġjuni li għandhom setgħat leġislattivi fil-qasam tat-tassazzjoni korporattiva jipprovdu lill-Kummissjoni ċifri dettaljati dwar ir-rata medja attwali tat-taxxa applikata fuq il-kumpaniji, inkluż it-tnaqqis kollu;

25.

jilqa’ b’sodisfazzjon l-isforzi tal-Kummissjoni biex tagħmel il-BKKTK obbligatorja fil-proposta l-ġdida tagħha, tal-inqas għall-kumpaniji multinazzjonali, peress li tant huwa ovvju li dawk involuti fl-ippjanar aggressiv tat-taxxa jew saħansitra l-evitar jew il-frodi fiskali mhumiex ser jimpenjaw ruħhom ma’ reġim ta’ BKKTK li jipprevjeni dawn il-prattiki kieku dan kien fakultattiv;

26.

ifakkar li, fl-opinjoni tiegħu tal-2011, il-Kumitat kien ippropona li l-BKKTK għandha ssir obbligatorja wara perjodu ta’ tranżizzjoni, għall-inqas għall-intrapriżi ta’ ċertu daqs (2);

27.

jikkunsidra li jkun jaqbel li tiġi introdotta minnufih bażi komuni konsolidata tat-taxxa korporattiva. Peress li n-negozjati relatati mal-konsolidazzjoni kienu twal u diffiċli, il-KtR jappoġġja l-approċċ tal-Kummissjoni dwar il-posponiment tal-element ta’ konsolidazzjoni tal-BKKTK, jekk dan jippermetti li jkun hemm progress fin-negozjati dwar l-elementi l-oħra tal-proposta, u b’mod partikolari d-definizzjoni ta’ bażi komuni ta’ taxxa. Għalhekk huwa jieħu nota tad-dikjarazzjoni li għamlet il-Kummissjoni fil-programm ta’ ħidma tagħha għall-2016, adottat fis-27 ta’ Ottubru, tal-intenzjoni tagħha li tirtira l-proposta BKKTK attwali iżda jistaqsi sa liema punt beħsiebha tissostitwixxiha bi “proposti għal approċċ gradwali li jibda bi qbil dwar bażi tat-taxxa obbligatorja”, u jistenna l-konklużjonijiet tal-konsultazzjoni pubblika li l-Kummissjoni nediet fit-8 ta’ Ottubru u li hija miftuħa sat-8 ta’ Jannar 2016;

28.

itenni, madankollu, li l-konsolidazzjoni trid tibqa’ waħda mill-għanijiet tal-istituzzjonijiet tal-UE u l-Istati Membri fir-rigward tat-tassazzjoni korporattiva, fis-sens li din tipprovdi soluzzjoni għall-kwistjonijiet tal-prezzijiet ta’ trasferiment fi ħdan il-gruppi stess ġewwa l-Unjoni Ewropea u għall-kwistjonijiet tal-evitar tat-taxxa assoċjati magħhom, u tirrappreżenta wkoll semplifikazzjoni u ffrankar sostanzjali f’termini ta’ spejjeż amministrattivi għall-kumpaniji;

29.

iqis li jekk in-negozjati dwar il-konsolidazzjoni jfallu, tista’ tiġi kkunsidrata rata minima tat-taxxa;

30.

jesprimi tħassib ukoll li l-mekkaniżmu ta’ kumpens transkonfinali temporanju previst mill-Kummissjoni sakemm tkun introdotta l-konsolidazzjoni jista’ jwassal għal opportunitajiet ġodda għal ippjanar aggressiv tat-taxxa; fid-dawl ta’ dan ir-riskju, li jirriżulta f’telf konsiderevoli ta’ dħul għall-Istati Membri, il-KtR jitlob lill-Kummissjoni tħaffef l-iskeda proposta oriġinarjament għall-implimentazzjoni;

31.

iqis li t-trattament favorevoli riżervat għad-dejn u l-interessi f’bosta sistemi ta’ tassazzjoni jxekkel id-diversifikazzjoni ta’ mudelli ta’ finanzjament tal-kumpaniji, u jipprevjeni t-tisħiħ tal-finanzjament tal-ekwità tal-kumpaniji fl-UE, li attwalment hija prattika komuni f’pajjiżi oħra;

32.

għalhekk jistieden lill-Kummissjoni u lill-Istati Membri jinkoraġġixxu diversifikazzjoni akbar tas-sorsi ta’ finanzjament għall-kumpaniji, li bla dubju tkun ta’ benefiċċju għat-tkabbir u l-impjiegi;

33.

ifakkar fil-proposta tal-Kumitat, li ressaq fl-opinjoni tiegħu tal-2011 dwar il-BKKTK, li jitqiesu l-ispejjeż rikorrenti relatati mal-protezzjoni tal-ambjent u t-tnaqqis tal-gassijiet b’effett ta’ serra, meta titfassal il-lista ta’ spejjeż li jitnaqqsu, inkluż b’referenza għall-inizjattivi li għandhom l-għan li jadottaw proċessi integrati ta’ produzzjoni b’impatt ambjentali baxx;

34.

jistieden lill-Kummissjoni tinkludi tali possibbiltà ta’ tnaqqis fil-proposta leġislattiva l-ġdida tagħha mistennija fl-2016;

35.

ifakkar ukoll, kif kien esprima fl-2011, li biex jinkiseb bis-sħiħ l-għan tas-semplifikazzjoni amministrattiva, l-implimentazzjoni ta’ bażi taxxabbli komuni u konsolidata għandha tmur id f’id mal-implimentazzjoni ta’ regoli komuni dwar il-kontabbiltà;

36.

jilqa’ b’sodisfazzjon il-fatt li l-ħidma tal-Organizzazzjoni għall-Kooperazzjoni u l-Iżvilupp Ekonomiċi (OECD) wasslet għall-adozzjoni mill-Kapijiet ta’ Stat u ta’ Gvern tal-G20 f’Antalya nhar is-16 ta’ Novembru 2015 tal-pjan ta’ azzjoni tagħha dwar l-erożjoni tal-bażi tat-taxxa u trasferiment tal-profitt, pjan li jinvolvi 62 pajjiż; madankollu jqis li l-miżuri li jikkonċernaw ir-rapportar pubbliku għal kull pajjiż mhumiex biżżejjed peress li l-azzjoni 13 tal-BEPS tipprevedi rapportar awtomatiku tad-data b’mod uniku lill-awtoritajiet tat-taxxa tar-residenza fiskali tal-entità prinċipali finali, fid-dawl tal-fatt li fl-UE diġà jeżisti l-obbligu ta’ rapportar għall-banek u l-industriji estrattivi stabbiliti fl-UE;

37.

jappella lill-Kummissjoni Ewropea, lill-Istati Membri u lir-reġjuni li għandhom setgħat leġislattivi fil-qasam tat-taxxa fuq il-kumpaniji biex jassiguraw l-applikazzjoni vinkolanti tal-pakkett BEPS permezz ta’ direttiva ġdida “anti-BEPS” biex tiġġieled b’mod effikaċi dawn il-fenomeni fi ħdan l-UE.

38.

iqis li hija ħaġa pożittiva li ntlaħaq ftehim dwar l-“approċċ nexus modifikat” fi ħdan l-ECOFIN, u jemmen ukoll li l-“approċċ nexus modifikat” definit fil-livell tal-OECD fil-kuntest tal-pakkett BEPS u fil-livell tal-ECOFIN fil-kuntest tal-grupp ta’ ħidma dwar il-kodiċi tal-kondotta, u relatat mas-sistemi ta’ inċentivi tat-taxxa favur il-privattivi, għandu jsir parti vinkolanti tal-liġi tal-UE taħt din id-Direttiva;

39.

iqis li, b’mod parallel mal-inizjattivi u l-passi meħtieġa li ttieħdu fi ħdan l-Unjoni, huwa kruċjali li jissaħħaħ l-approċċ Ewropew lejn il-ġurisdizzjonijiet mhux kooperattivi, jew ir-rifuġji fiskali;

40.

jemmen li f’dan il-qasam, b’mod partikolari, in-nuqqas ta’ unità u koordinazzjoni bejn l-Istati Membri huma l-fatturi li jippermettu lill-kumpaniji jevitaw it-tassazzjoni ġusta;

41.

jilqa’ l-pubblikazzjoni mill-Kummissjoni ta’ “lista ta’ ġurisdizzjonijiet tat-taxxa mhux kooperattivi f’pajjiżi terzi” mehmuża mal-Komunikazzjoni, u jqis li din hija inizjattiva simbolika qawwija;

42.

iqis, barra minn hekk, li l-pubblikazzjoni ta’ din il-lista għandha tifforma bażi għal diskussjoni ambizzjuża bejn l-Istati Membri kollha, bl-għan li jiġi stabbilit approċċ komuni u koordinat fil-livell Ewropew fir-rigward ta’ dawn il-ġurisdizzjonijiet, sabiex jiġu miġġielda prattiki fiskali dannużi li dawn jippermettu;

43.

jistaqsi jekk il-kriterju użat biex tiġi stabbilita l-lista tal-ġurisdizzjonijiet tat-taxxa mhux kooperattivi ppubblikata mill-Kummissjoni hijiex waħda restrittiva wisq, billi dawn għandhom jiġu identifikati bħala tali minn tal-inqas għaxar Stati Membri;

44.

jilqa’, f’dan ir-rigward, il-ftehimiet iffirmati f’Mejju 2015 bejn l-UE minn naħa u l-Iżvizzera, Andorra u l-Liechtenstein min-naħa l-oħra, peress li huwa pass importanti lejn it-trasparenza u l-ġlieda kontra l-frodi fiskali;

45.

iqis li l-iskambju awtomatiku ta’ informazzjoni previst fil-ftehimiet imsemmija fil-punt preċedenti huwa strument effikaċi sabiex jitnaqqas u jiġi miġġieled l-ippjanar aggressiv tat-taxxa u dan għandu jintuża b’mod ġenerali; jilqa’ wkoll il-fatt li diversi ġurisdizzjonijiet mhux kooperattivi elenkati mill-Kummissjoni adottaw jew huma impenjati li jadottaw l-istandard dinji f’dan il-qasam.