IL-KUMMISSJONI EWROPEA
Brussell, 6.1.2016
COM(2015) 685 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar l-effett tal-Istandard Internazzjonali tal-Kontabilità (IAS) 19 rivedut fuq il-volatilità tal-fondi proprji tal-istituzzjonijiet ta' kreditu u tad-ditti ta' investiment
1.Introduzzjoni
Skont l-Artikolu 36(1)(e) tar-Regolament (UE) Nru 575/2013 (minn hawn ’il quddiem “CRR”), l-istituzzjonijiet ta’ kreditu u d-ditti tal-investiment għandhom inaqqsu l-assi tal-fond ta' pensjoni b’benefiċċji definiti (“DBPF - Defined Benefit Pension Fund”) fil-karti tal-bilanċ tagħhom mill-entrati ta' Ekwità Komuni tal-Grad 1.
Ir-reviżjoni tal-Istandard Internazzjonali tal-Kontabilità 19 “Benefiċċji tal-Impjegati” (“IAS 19”) 1 wasslet għal bidliet fil-valwazzjoni tad-DBPF. L-Artikolu 519 CRR fih mandat lill-Kummissjoni biex tħejji rapport għall-Parlament Ewropew u għall-Kunsill dwar jekk l-ISA 19 rivedut, flimkien mat-tnaqqis tal-assi netti tal-pensjonijiet kif stipulat fl-Artikolu 36(1)(e) iwasslux għal volatilità indebita tal-fondi proprji tal-istituzzjonijiet.
Il-Kummissjoni ġiet mitluba tikkunsidra r-rapport imħejji mill-EBA dwar din il-kwistjoni f’konformità mal-mandat mogħti mill-istess Artikolu. Jekk ikun xieraq, ir-rapport tal-Kummissjoni għandu jkun akkumpanjat minn proposta leġiżlattiva sabiex jiġi introdott trattament li jaġġusta l-assi u l-obbligazzjonijiet netti tad-DBPF fil-kalkolu tal-fondi proprji.
L-EBA ppreżentat ir-rapport tagħha “Dwar l-impatt fuq il-volatilità ta’ fondi proprji tal-IAS 19 rivedut u t-tnaqqis ta’ assi tal-pensjoni definiti minn fondi proprji skont l-Artikolu 519 ta’ dan ir-Regolament dwar ir-Rekwiżiti ta’ Kapital (CRR)” (“Rapport tal-EBA”) 2 fl-24 ta’ Ġunju 2014.
Dan ir-rapport tal-Kummissjoni jwieġeb għal obbligu legali li jiġu ivvalutati l-effetti ta’ bidliet speċifiċi ħafna fil-kalkolu tal-kapital tal-Grad 1 ta’ Ekwità Komuni f’istituzzjonijiet ta’ kreditu u ditti ta’ investiment minħabba l-adozzjoni tas-CRR u l-IAS 19.
2.Kwistjonijiet Ewlenin
2.1.It-trattament kurrenti skont is-CRR
L-Artikolu 36 CRR fih ir-rekwiżit li l-banek għandhom inaqqsu l-assi tad-DBPF minn CET 1. Ir-raġuni għal dan it-trattament huwa li l-kapaċità ta’ assorbiment tat-telf ta’ dawn l-assi hija dubjuża mill-perspettiva prudenzjali. F’każ li bank jiffaċċja falliment jew riżoluzzjoni, dawn l-assi ma jkunux disponibbli biex iġarrbu t-telf.
Għandu jiġi nnutat li l-Artikolu 41 CRR fih eżenzjoni minn din ir-regola ġenerali tat-tnaqqis fir-rigward tal-assi fid-DBPF li l-istituzzjoni għandha abbiltà mingħajr restrizzjoni li tuża, soġġett għal permess superviżorju.
2.2.Bidliet minħabba r-reviżjoni tal-IAS 19
Ir-reviżjoni tal-IAS 19 wasslet għal bidliet fil-valwazzjoni tad-DBPF. L-EBA identifikat biss żewġ aspetti tar-reviżjoni tal-IAS 19 li jista’ jkollhom impatt fuq il-kalkolu tal-fondi proprji:
1.Rikonoxximent immedjat tal-qligħ u t-telf attwarjali: Skont il-verżjoni preċedenti tal-IAS 19, bidliet f’suppożizzjoni attwarjali ma kellhomx għalfejn jiġu kkunsidrati immedjatament sakemm jibqgħu f’kurutur determinat 3 (b’hekk l-hekk imsejjaħ “approċċ ta' kuridur”) u jista’ jitqassam fuq diversi perjodi, waqt li skont l-IAS 19 revedut, dawn se jkun hemm bżonn li jiġu rikonoxxuti immedjatament.
2.Għarfien immedjat tal-kostijiet kollha tas-servizz passat: Il-kostijiet tas-servizz passat jirrappreżentaw il-bidla fil-valur preżenti tal-obbligu tal-benefiċċju definit għas-servizzi tal-impjegati f’perjodi ta’ qabel, li jirriżultaw minn emenda fil-pjan jew tnaqqis. Skont l-IAS 19 preċedenti, il-kostijiet vestiti tas-servizz passat huma rikonoxxuti fir-rapport tal-introjtu immedjatament, filwaqt li l-kostijiet tas-servizz mhux vestiti kienu rikonoxxuti matul il-perjodu ta' vestiment fuq bażi lineari.
F’dan ir-rigward, għandu jiġi nnutat li s-CEBS bħala l-predeċessur tal-EBA kkummenta 4 dwar il-verżjoni preċedenti tal-IAS 19, waqt li qajjem tħassib dwar “l-approċċ ta' kuridur” u ppropona li jkun abolit soġġett għal dispożizzjonijiet tranżitorji. Filwaqt li l-IAS 19 abolixxa l-approċċ ta’ kuridur fuq qligħ u telf attwarjali, is-CRR ipprovda dispożizzjonijiet tranżitorji biex itaffi l-impatt fuq il-fondi proprji.
2.3.Miżuri tranżitorji skont is-CRR
Is-CRR jistabbilixxi l-miżuri tranżitorji li ġejjin biex itaffu l-impatt tal-bidliet fl-IAS 19 u tnaqqis ta’ assi ta’ fond tal-pensjoni b’benefiċċju definiti b’mod ġenerali:
1.Introduzzjoni gradwali ġenerali tat-tnaqqis ta’ assi tad-DBPF mill-2014 sal-2017 bis-saħħa tal-Artikoli 469(1)(a) u l-Artikolu 478 tas-CRR.
2.Introduzzjoni speċjali tal-effett tal-bidliet fl-IAS 19 mill-2014 sal-2018 skont l-Artikolu 473 CRR.
3.It-tneħħija gradwali ta’ filtri applikati fil-livell nazzjonali mill-2014 sal-2018 skont l-Artikolu 481 CRR.
3.Valutazzjoni tal-introduzzjoni potenzjali ta’ volatilità minħabba r-reviżjoni tal-IAS 19
Abbażi tar-rapport pprovdut mill-EBA, l-analiżi tal-effett tar-reviżjoni tal-IAS 19 flimkien mat-tnaqqis tal-assi tad-DBPF skont l-Artikolu 36(1)(e) CRR hija vvalutata kif ġej 5 :
3.1.L-impatt jiddependi fuq it-tpaċija ta' qligħ jew telf
Mhux se jkun hemm volatilità ta’ fondi proprji meta l-istituzzjoni tirrapporta assi nett tad-DBPF fuq il-karta tal-bilanċ u jkun hemm tpaċija ekwivalenti ta' qligħ jew telf. Biss fejn l-istituzzjoni tirrapporta assi nett tad-DBPF mingħajr qligħ jew telf korrispondenti t-tnaqqis tal-assi nett tad-DBPF jista' jirriżulta f’volatilità tal-fondi proprji.
3.2.Impatt mal-applikazzjoni inizjali tal-IAS 19 rivedut
L-impatt tat-tnaqqis assi nett tad-DBPF mill-fondi proprji mal-applikazzjoni inizjali se jkun limitat għall-parti l-kbira tal-istituzzjonijiet minħabba l-livelli baxxi ta’ assi nett tad-DBPF 6 skont kemm l-IAS 19 preċedenti u dak rivedut. Barra minn hekk, għall-parti l-kbira tal-istituzzjonijiet, l-effett negattiv fuq is-CET1 ikun ulterjorment limitat minħabba li l-livell ta’ telf attwarjali mhux rikonoxxut meta mqabbel mal-pożizzjoni kapitali tagħhom huwa żgħir. Minoranza żgħira biss 7 ta’ istituzzjonijiet li għandhom assi tad-DBPF sinifikanti jistgħu jiġu affettwati materjalment. B’mod partikolari, l-eżistenza ta’ telf attwarjali mhux rikonoxxut sostanzjali tista’ twassal għal tnaqqis fil-fondi proprji.
3.3.Valutazzjoni ġenerali ta’ volatilità limitata introdotta mill-IAS 19 rivedut 8
Fuq il-bażi tar-rapport tal-EBA, jista’ jiġi konkluż li, bħala medja, hemm volatilità limitata ta’ fondi proprji minħabba bidliet tal-kontabilità u dawk prudenzjali. Għal xi istituzzjonijiet u f’xi pajjiżi l-impatt fuq il-volatilità tal-fondi proprji tista’ tkun ogħla, skont id-daqs u l-prestazzjoni tad-DBPF relattiva għall-pożizzjoni kapitali tal-istituzzjoni.
Barra minn hekk, kull bidla fis-suppożizzjonijiet attwarjali li għandhom jintużaw tista’ titqies bħala titjib fl-allinjament ta’ valur kontabilistiku tad-DBPF mal-iskopertura "reali" tal-istituzzjoni u l-ekonomiji tat-tranżazzjoni.
Fl-aħħar nett, kwalunkwe impatt fuq il-fondi proprji minħabba applikazzjoni għall-ewwel darba tal-IAS 19 rivedut jista’ jkun imtaffi permezz ta’ dispożizzjoni tranżitorja speċifika stipulata fl-Artikolu 473 tas-CRR u l-Artikolu 481 tas-CRR. L-applikazzjoni ġenerali ta' dawn ir-rekwiżiti għat-tnaqqis tal-assi tad-DBPF tista' tiddaħħal gradwalment skont id-dispożizzjonijiet tal-Artikoli 469(1)(a) CRR flimkien mal-Artikolu 478 CRR.
4.Konklużjoni
B’kont meħud tar-rapport tal-EBA, hija l-valutazzjoni tal-Kummissjoni li l-volatilità potenzjali addizzjonali ta’ fondi proprji introdotti permezz tar-reviżjoni tal-IAS 19 se tkun limitata u hija ġustifikata skont l-argumenti ppreżentati f’dan ir-rapport. Barra minn hekk, kwalunkwe impatt dovut għall-applikazzjoni inizjali ttaffa permezz ta' dispożizzjonijiet tranżitorji xierqa. Għaldaqstant, il-Kummissjoni tikkonkludi li l-IAS 19, flimkien mat-tnaqqsi tal-assi tad-DBPF stipulat fl-Artikolu 36(1)(e) CRR u l-bildiet fl-obbligazzjonijiet netti tal-pensjoni mhux se jwasslu għal volatilità mhux dovuta tal-fondi proprji tal-istituzzjonijiet. Konsegwentement, il-Kummissjoni tqis li t-trattament CRR kif inhu huwa xieraq u mhux se tippreżenta proposta leġiżlattiva flimkien ma’ dan ir-rapport.
IR-REGOLAMENT TAL-KUMMISSJONI (UE) 475/2012 tal-5 ta' Ġunju 2012 li jemenda r-Regolament (KE) Nru 1126/2008 li jadotta ċerti standards internazzjonali tal-kontabilità skont ir-Regolament (KE) Nru 1606/2002 tal-Parlament Ewropew u tal-Kunsill fir-rigward tal-Istandard Internazzjonali tal-Kontabilità (IAS) 1 u tal-Istandard Internazzjonali tal-Kontabilità (IAS) 19.
EBA (2014): Rapport. Dwar l-impatt fuq il-volatilità ta’ fondi proprji tal-IAS 19 rivedut u t-tnaqqis ta’ assi tal-pensjoni definiti minn fondi proprji skont l-Artikolu 519 ta’ dan ir-Regolament dwar ir-Rekwiżiti ta’ Kapital (CRR): Ir-rapport jidentifika l-bidliet tal-Kontabilità u l-Bidliet regolatorji minħabba r-rieżami tal-IAS 19 u janalizza jekk dawn il-bidliet jistgħux jaffettwaw il-fondi proprji. Dan jinkludi valutazzjoni kwantitattiva dwar l-impatt ta’ dawn il-bidliet fuq il-volatilità ta’ fondi proprji matul perjodu speċifiku ta’ żmien jekk wieħed jassumi l-applikazzjoni sħiħa tar-rekwiżiti tas-CRD IV/CRR u l-IAS 19 rivedut. Informazzjoni kwalitattiva u kwantitattiva għal kampjun ta’ istituzzjonijiet tal-UE u l-Istati Membri tenfasizza l-impatti prinċipali ta’ tibdiliet prudenzjali u ta’ kontabilità, il-kobor tagħhom u liema tipi ta’ istituzzjonijiet huma prinċipalment affettwati. Fl-aħħar nett, ir-rapport jagħti ħarsa wkoll lejn varjabbli oħra li jista’ jkollhom impatt dirett fuq fondi ta’ pensjonijiet b’benefiċċju definit u l-volatilità ta’ fondi proprji. Ir-rapport tal-EBA jista’ jinkiseb minn: https://www.eba.europa.eu/documents/10180/534414/EBA+Report+on+the+impact+on+the+volatility+of+own+funds+from+defined+pension+plans.pdf
Ara r-REGOLAMENT TAL-KUMMISSJONI (KE) Nru 1126/2008, l-Anness, l-IAS 19 Benefiċċji tal-Impjegati, il-paragrafu 95
L-Ittra ta’ Kumment tas-CEBS dwar l-IASB ED/2010/3 Pjanijiet ta’ benefiċċju definiti — Emendi Proposti għall-IAS 19 fis-6 ta’ Settembru 2010.
L-EBA ibbażat l-analiżi tagħha fuq kampjun kompost minn 57 istituzzjoni Ewropea b’20 pajjiż taż-ŻEE użati mill-EBA għall-analiżi tal-KRI (Key Risk Indicators - Indikaturi tar-Riskju Ewlenin).
Ara r-rapport EBA p. 25: “L-istituzzjonijiet kollha ħlief tlieta (38 istituzzjoni) kellhom livell baxx ta’ assi netti ta' pensjoni b’benefiċċju definit fl-IAS 19 preċedenti, jekk kien hemm, f’kull waħda mis-snin tal-perjodu vvalutat (sa 0,2 % tar-RWA) u livelli baxxi, jekk kien hemm, ta’ qligħ attwarjali mhux rikonoxxut f’kull sena vvalutata (sa 0,4 % tar-RWA).”
Skont ir-rapport tal-EBA, l-ebda wieħed mit-tliet istituzzjonijiet fil-kampjun analizzat b'ammont relattivament għoli ta’ assi ta’ benefiċċju definit taħt l-IAS 19 preċedenti jkunu affettwati peress li kellhom telf attwarjali mhux rikonoxxut sinifikanti li jkun jeħtieġ li jiġi rikonoxxut immedjatament kontra assi ta’ benefiċċju definit.
Għal preżentazzjoni li tiġbor fiha l-evidenza kwantitattiva, il-qarrejja huma mitluba jirreferu għar-rapport tal-EBA u speċjalment għat-tabelli li jiġbru fil-qosor l-informazzjoni kwantitattiva fuq paġna 23 u paġna 31.