Werrej

1....... Sommarju Eżekuttiv. 3

2....... Il-Protokoll ta' Pariġi 5

3....... Niżguraw tnaqqis ambizzjuż fl-emissjonijiet tal-gassijiet serra. 6

3.1.... Il-mira tal-2030 tal-UE u l-kontribut maħsub determinat fil-livell nazzjonali 6

3.2.... Jinqasmu l-isforzi globali 7

4....... Niżguraw id-dinamiżmu permezz ta' reviżjoni regolari tal-miri 8

5....... Tisħiħ tat-trasparenza u tar-responsabbiltà. 9

6....... Niksbu r-reżiljenza għat-tibdil fil-klima bis-saħħa tal-adattament 9

7....... Promozzjoni tal-implimentazzjoni u tal-kooperazzjoni 10

7.1.... Mobilizzazzjoni tal-finanzjament pubbliku u privat tal-ġlieda kontra t-tibdil fil-klima. 10

7.2.... Tisħiħ tal-azzjoni ta' kooperazzjoni internazzjonali 11

7.3.... Appoġġ għall-iżvilupp u l-implimentazzjoni ta' teknoloġiji għall-ġlieda kontra t-tibdil fil-klima  11

7.4.... Il-bini tal-kapaċità. 12

8....... Mobilizzazzjoni ta' politiki oħra tal-UE.. 12

9....... Il-passi li jmiss. 14

1.           Sommarju Eżekuttiv

Skont l-aħħar sejbiet tal-Grupp Intergovernattiv ta' Esperti dwar it-Tibdil fil-Klima (IPCC), jekk ma titteħidx azzjoni urġenti, it-tibdil fil-klima se jġib miegħu impatti gravi, profondi u li ma jkunux jistgħu jitreġġgħu lura fuq il-popolazzjoni u l-ekosistemi tad-dinja. Sabiex nillimitaw iż-żieda perikoluża fit-temperatura medja globali għal taħt iż-2°C meta mqabbla mal-livelli preindustrjali (l-objettiv ta' taħt iż-2°C), jeħtieġ tnaqqis sostanzjali u kontinwu fl-emissjonijiet tal-gassijiet b'effett ta' serra min-naħa tal-pajjiżi kollha.

Din it-tranżizzjoni dinjija lejn livelli baxxi ta' emissjonijiet tista' tinkiseb mingħajr ma jintlaqtu ħażin it-tkabbir u l-impjieg, u tista' tipprovdi opportunitajiet sinifikanti biex tingħata saħħa ġdida lill-ekonomija Ewropew u lil dik globali. L-azzjoni kontra t-tibdil fil-klima tista' twassal ukoll għal vantaġġi sinifikanti fejn jidħol il-benessri pubbliku. Iżda jekk din it-tranżizzjoni tibqa' tiġi posposta, se jiżdiedu l-ispejjeż ġenerali biex innaqqsu l-emissjonijiet b'mod effettiv u nħejju għall-impatti tat-tibdil fil-klima, u fl-istess ħin, l-opportunitajiet biex nagħmlu dan se jkomplu jonqsu.

Jeħtieġ li l-pajjiżi kollha jaġixxu b'urġenza u b'mod kollettiv. Sa mill-1994, il-Partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima (UNFCCC) iffukaw fuq din l-isfida, sal-punt li 'l fuq minn 90 pajjiż, kemm żviluppati u kemm fil-fażi ta' żvilupp, intrabtu li jillimitaw l-emissjonijiet tagħhom sal-2020. B'danakollu, dawn il-wegħdiet mhumiex biżżejjed biex jinkiseb l-objettiv ta' taħt iż-2°C[1]. Għal dawn ir-raġunijiet, fl-2012 il-Partijiet għall-UNFCCC fetħu negozjati lejn ftehim ġdid legalment vinkolanti u applikabbli għall-Partijiet kollha, bil-għan li d-dinja titqiegħed fit-triq lejn il-kisba tal-objettiv ta' taħt iż-2°C. Il-Ftehim tal-2015 għandu jiġi ffinalizzat f'Pariġi f'Diċembru 2015, u għandu jiġi implimentat mill-2020 'il quddiem.

Il-progress li sar fil-konferenza riċenti dwar il-klima f'Lima qarreb il-possibbiltà tal-ilħiq ta' ftehim sod f'Pariġi. L-iktar importanti, ġie deċiż kif il-pajjiżi għandhom jifformulaw u jikkomunikaw il-miri proposti tagħhom ta' tnaqqis tal-emissjonijiet, ħafna qabel ma ssir il-konferenza ta' Pariġi. Tfassal ukoll l-ewwel abbozz sħiħ tal-Ftehim tal-2015, li jirrifletti l-pożizzjonijiet tal-Partijiet kollha dwar l-elementi kollha li qegħdin jiġu nnegozjati.

Ħafna qabel il-konferenza ta' Lima, l-UE kompliet turi tmexxija u determinazzjoni fil-ġlieda dinjija kontra t-tibdil fil-klima. Fis-Summit Ewropew ta' Ottubru 2014, il-mexxejja Ewropej qablu li l-UE għandha tkattar l-isforzi tagħha, u li sal-2030 għandha tnaqqas l-emissjonijiet nazzjonali b'tal-anqas 40% meta mqabbel mal-livelli tal-1990. Dan il-ftehim ġie segwit minn stqarrijiet min-naħa taċ-Ċina u tal-Istati Uniti. F'Lima, l-Istati Membri tal-UE wegħdu madwar nofs il-kapitalizzazzjoni inizjali ta' US$ 10 biljun lill-Fond Ekoloġiku għall-Klima (GCF) biex jgħin lill-pajjiżi f'fażi ta' żvilupp. Fl-UE ġie adottat pjan ta' investiment ġdid, li se jillibera investimenti pubbliċi u privati fl-ekonomija reali ta' mill-inqas EUR 315 biljun tul it-tliet snin li ġejjin (2015-17). Dawn l-investimenti se jgħinu biex l-ekonomija tal-UE tiġi mmodernizzata u tkompli tiġi dekarbonizzata.

Din il-Komunikazzjoni hija risposta għad-deċiżjonijiet li ttieħdu f'Lima, u hija element ewlieni fl-implimentazzjoni tal-prijorità tal-Kummissjoni li tinbena Unjoni tal-Enerġija soda u b'politika dwar it-tibdil fil-klima li tħares 'il quddiem u li tkun konsistenti mal-linji gwida politiċi tal-President tal-Kummissjoni. B'din il-Komunikazzjoni l-UE tħejji għall-aħħar fażi tan-negozjati qabel il-konferenza ta' Pariġi ta' Diċembru 2015.

B'mod partikolari, din il-Komunikazzjoni:

issarraf id-deċiżjoni meħuda waqt is-Summit Ewropew f'Ottubru 2014 fil-mira proposta tal-UE ta' tnaqqis fl-emissjonijiet - jiġifieri, il-Kontribut Maħsub Determinat Nazzjonalment (INDC) li għandu jitressaq sa tmiem l-ewwel kwart tal-2015; tipproponi li l-Partijiet kollha għall-UNFCCC jressqu l-INDCs tagħhom ħafna qabel il-konferenza ta' Pariġi. Iċ-Ċina, l-Istati Uniti u pajjiżi oħra tal-G20, kif ukoll pajjiżi b'introjtu għoli u medju, għandhom ikunu f'qagħda li jagħmlu dan sa tmiem l-ewwel kwart tal-2015. Għandha tingħata iktar flessibbiltà lill-pajjiżi l-anqas żviluppati (LDCs); tfassal viżjoni għal ftehim legalment vinkolanti li jkun trasparenti u dinamiku, u li jinkludi impenji ġusti u ambizzjużi min-naħa tal-Partijiet kollha, abbażi tal-evoluzzjoni taċ-ċirkustanzi ekonomiċi u ġeopolitiċi. B'mod aggregat, dawn l-impenji - imsejsa fuq evidenza xjentifika - għandhom iqiegħdu d-dinja fit-triq it-tajba lejn it-tnaqqis, sal-2050, tal-emissjonijiet globali b'tal-inqas 60% taħt il-livelli tal-2010. Jekk ikun hemm qabża bejn din il-mira u l-livell ta' ambizzjoni li jiġi stabbilit f'Pariġi, dan għandu jiġi indirizzat billi jitfassal programm ta' ħidma, b'bidu mill-2016, f'kooperazzjoni mill-qrib mal-Fond Ekoloġiku għall-Klima, sabiex tiġi identifikata azzjoni addizzjonali għat-tnaqqis tal-emissjonijiet; tipproproni li l-Ftehim tal-2015 għandu jkollu l-forma ta' Protokoll fil-qafas tal-UNFCCC. L-ekonomiji l-kbar, b'mod partikulari dawk tal-UE, iċ-Ċina u l-Istati Uniti, għandhom juru tmexxija politika billi jingħaqdu mal-Protokoll mill-iktar kmieni possibbli. Il-Ftehim għandu jidħol fis-seħħ malli jkunu rratifikawh pajjiżi b'total kollettiv ta' 80% tal-emissjonijiet globali attwali. Fil-qafas tal-Protokoll il-ġdid, il-finanzjament tal-ġlieda kontra t-tibdil fil-klima, l-iżvilupp u t-trasferiment ta' teknoloġija, u l-bini ta' kapaċità għandhom jippromwovu l-parteċipazzjoni universali, u għandhom jiffaċilitaw l-implimentazzjoni effiċjenti u effettiva ta' strateġiji għat-tnaqqis tal-emissjonijiet u għall-adattament għall-effetti negattivi tat-tibdil fil-klima; tissottolinja li l-Organizzazzjoni tal-Avjazzjoni Ċivili Internazzjonali (ICAO), l-Organizzazzjoni Marittima Internazzjonali (IMO) u l-Protokoll ta' Montreal għandhom jaġixxu biex jirregolaw b'mod effettiv l-emissjonijiet min-naħa tal-avjazzjoni u t-tbaħħir internazzjonali, kif ukoll il-produzzjoni u l-konsum tal-gassijiet fluworinati sa tmiem l-2016; tixħet dawl fuq kif politiki oħra tal-UE, bħal dawk tal-kummerċ, ir-riċerka xjentifika, l-innovazzjoni u l-kooperazzjoni teknoloġika, il-kooperazzjoni ekonomika u ta' żvilupp, it-tnaqqis tar-riskju ta' diżastri, u l-ambjent, jistgħu jsaħħu l-politika internazzjonali tal-UE dwar it-tibdil fil-klima; u hija kkomplimentata minn pjan ta' azzjoni ta' diplomazija klimatika, imfassal mis-Servizz Ewropew għall-Azzjoni Esterna u mill-Kummissjoni. Il-pjan ta' azzjoni huwa maħsub li jżid il-komunikazzjoni esterna tal-UE u li jibni alleanzi ma' sħab internazzjonali ambizzjużi fit-tħejjijiet għall-konferenza ta' Pariġi.

Ċerti aspetti ta' din il-Komunikazzjoni jiġu spjegati f'aktar dettall fid-Dokument ta' Ħidma tal-Persunal tal-Kummissjoni li jakkumpanjaha.

2.           Il-Protokoll ta' Pariġi

Bil-għan li jħeġġeġ azzjoni kollettiva konsistenti mas-sejbiet tal-IPCC, il-Protokoll ta' Pariġi għandu jilħaq l-għanijiet li ġejjin:

jikseb impenji ambizzjużi ta' tnaqqis fl-emissjonijiet, billi:

o jispeċifika li l-mira fit-tul għandha tkun li l-emissjonijiet dinjija jitnaqqsu b'tal-anqas 60% taħt il-livelli tal-2010 sal-2050[2]; u

o jistipula, f'dak il-kuntest, impenji ta' mitigazzjoni tat-tibdil fil-klima li jkunu legalment vinkolanti, ċari, speċifiċi, ambizzjużi u ġusti, u li jqiegħdu d-dinja fit-triq lejn il-kisba tal-objettiv ta' taħt iż-2°C. Dawn l-impenji għandhom ikunu konsistenti mal-prinċipji tal-UNFCCC, applikati fid-dawl tal-evoluzzjoni tar-responsabbiltajiet, kapaċitajiet u ċirkustanzi nazzjonali differenti;

jiżgura d-dinamiżmu billi jipprovdi għal reviżjoni globali, li ssir kull ħames snin, sabiex tisseddaq l-ambizzjoni ta' dawn il-miri ta' mitigazzjoni b'mod konsistenti mal-aħħar xjenza; isaħħaħ it-trasparenza u r-responsabbiltà, sabiex ikun jista' jiġi evalwat jekk intlaħqux il-miri ta' tnaqqis tal-emissjonijiet u impenji rilevanti. Jeħtieġ li jitfassal sett ta' regoli u proċeduri għar-rappurtar annwali, għall-verifika regolari, u għal reviżjonijiet minn esperti internazzjonali tal-inventarji tal-emissjonijiet; iħeġġeġ l-iżvilupp sostenibbli reżiljenti għat-tibdil fil-klima, billi jippromwovi l-kooperazzjoni internazzjonali u jappoġġja l-politiki li jnaqqsu l-vulnerabbiltà u jtejbu l-kapaċità tal-pajjiżi biex jadattaw għall-impatti tat-tibdil fil-klima; u jippromwovi l-implimentazzjoni u l-kooperazzjoni effiċjenti u effettiv, billi jħeġġeġ politiki li jimmobilizzaw investiment sostanzjali, trasparenti u prevedibbli, mingħand is-settur pubbliku u dak privat, fi żvilupp li jkun reżiljenti għat-tibdil fil-klima u b'emissjonijiet baxxi tal-karbonju.

Dawn l-għanijiet għandhom jiġu stipulati fil-Protokoll. Programm ta' ħidma teknika, li għandu jitlesta sal-2017, għandu jfassal ir-regoli ddettaljati, il-proċessi u l-istituzzjonijiet meħtieġa biex jinkisbu dawn l-għanijiet.

Sabiex tissieħeb mal-Protokoll, Parti kontraenti għandha tieħu impenn ta' mitigazzjoni. Il-Partijiet ikunu jistgħu jieħdu sehem fit-teħid tad-deċiżjonijiet fil-qafas tal-Protokoll, u jkollhom aċċess għal riżorsi finanzjarji u oħrajn għall-appoġġ tal-implimentazzjoni tal-Protokoll. L-impenji ta' mitigazzjoni fil-qafas tal-Protokoll għandhom ikunu legalment vinkolanti fuq il-Partijiet kollha.

Dan jagħti l-iktar sinjal ċar lill-gvernijiet, lis-swieq u lill-pubbliku li l-Partijiet huma impenjati fil-ġlieda kontra t-tibdil fil-klima, billi jipprovdu:

l-aqwa espressjoni ta' rieda politika min-naħa ta' Parti kontraenti biex tikseb l-impenji tagħha; il-prevedibbiltà u ċ-ċertezza meħtieġa għall-atturi kollha pubbliċi u privati; u id-durabbiltà fil-kuntest ta' bidliet politiċi nazzonali.

Dawk il-pajjiżi li jsostnu li l-impenji ta' mitigazzjoni ma għandhomx ikunu vinkolanti fuq livell internazzjonali għandhom l-obbligu li juru kif dawn il-vantaġġi jistgħu jinkisbu b'approċċ alternattiv.

In-nazzjonijiet kollha tal-G20, li jirrappreżentaw madwar 75% tal-emissjonijiet dinjija, kif ukoll pajjiżi oħra b'introjtu għoli u medju, huma mistennija jirratifikaw il-Protokoll mingħajr wisq dewmien, u jimplimentawh mill-2020 'il quddiem. L-UE, iċ-Ċina u l-Istati Uniti għandhom jibagħtu sinjal importanti ta' tmexxija politika, billi jissieħbu mal-Protokoll mill-iktar fis possibbli u b'hekk jistabbilixxu r-ritmu meħtieġ. Il-Protokoll għandu jidħol fis-seħħ malli jkunu ddepożitaw l-istrument ta' ratifika tagħhom ammont ta' pajjiżi li jirrappreżentaw iktar minn 40 Gt ta' emissjonijiet ta' ekwivalent tas-CO2 fl-2015. Dan jirrappreżenta madwar 80% tal-emissjonijiet globali attwali.

3.           Niżguraw tnaqqis ambizzjuż fl-emissjonijiet tal-gassijiet serra

3.1.        Il-mira tal-2030 tal-UE u l-kontribut maħsub determinat fil-livell nazzjonali

L-isforzi tal-politika klimatika u enerġetika tal-UE qegħdin jagħtu frott. L-emissjonijiet tal-UE niżlu bi 19% bejn l-1990 u l-2013, filwaqt li l-PDG tal-UE kiber b'45%. Il-qafas ta' politika għall-klima u l-enerġija għall-2030, kif miftiehem mill-mexxejja tal-UE f'Ottubru 2014, se jkompli jsaħħaħ ix-xenarju ta' politika. Dan il-qafas jistipula mira ta' tnaqqis vinkolanti u li tapplika għall-ekonomija kollha, billi tkopri s-setturi kollha u s-sorsi kollha tal-emissjonijiet, fosthom l-agrikoltura, il-forestrija u użi oħra tal-art. Din il-mira tikkostitwixxi tnaqqis fl-emissjonijiet nazzjonali ta' mill-inqas 40% sal-2030 meta mqabbel mal-livelli tal-1990. Hija mira ambizzjuża u ġusta, konsistenti ma' rotta kosteffiċjenti li twassal għal tnaqqis fl-emissjonijiet domestiċi ta' mill-inqas 80% sal-2050[3]. L-UE diġà meddet passi sinifikanti biex issir l-iktar ekonomija effiċjenti fid-dinja f'termini ta' emissjonijiet. Il-mira tal-2030 se tnaqqas l-intensità tal-emissjonijiet tal-ekonomija tal-UE b'50% iktar. Il-pjan ta' investiment tal-UE approvat dan l-aħħar se jillibera finanzi privati sostanzjali, sabiex l-ekonomija tal-UE tiġi mmodernizzata u jkompli d-dekarbonizzazzjoni tagħha.

Bħalissa ma jkun hemm l-ebda ġid li tiġi proposta mira b'kundizzjonijiet iktar stretti. Jekk ir-riżultat tan-negozjati jagħti lok għal mira iktar ambjizzjuża, l-UE għandha tkun miftuħa għall-użu ta' krediti internazzjonali li jikkomplementaw l-impenji nazzjonali, dejjem jekk tiġi żgurata bis-sħiħ l-integrità ambjentali u jiġi evitat l-għadd doppju.

3.2.        Jinqasmu l-isforzi globali

L-UE tirrappreżenta 9% mill-emissjonijiet dinjija, u dan il-proporzjon qed jonqos. F'Novembru 2014, l-akbar żewġ emittenti fid-dinja –  iċ-Ċina (25% mill-emissjonijiet dinjija) u l-Istati Uniti (11%) –  segwew il-passi tal-UE billi ħabbru l-miri indikattivi tagħhom għal wara l-2020. Meħudin flimkien, dawn il-miri jkunu jkopru kważi nofs l-emissjonijiet dinjija. Sabiex il-Protokoll ikun effettiv, u biex jintlaħaq xenarju globali b'kundizzjonijiet indaqs, jeħtieġ li l-Protokoll jinkludi li ġej:

· Kopertura ġeografika wiesgħa. Biex tinkiseb il-kopertura meħtieġa għat-tnaqqis tal-emissjonijiet dinjija, jeħtieġ li l-Partijiet kollha, għajr il-pajjiżi l-anqas żviluppati, iressqu l-INDCs tagħhom kmieni kemm jista' jkun fl-2015. Il-pajjiżi kollha tal-G20, u dawk ta' introjtu għoli jew medju, għandhom ikunu f'qagħda li jagħmlu dan sa tmiem l-ewwel kwart tal-2015. Dawn l-INDCs għandhom jiġu kkomunikati skont ir-rekwiżit ta' informazzjoni miftiehma f'Lima. It-Tabella 1 turi l-mira ta' tnaqqis nazzjonali ta' mill-anqas 40%, kif miftiehma mill-mexxejja tal-UE f'Ottubru 2014, fil-forma ta' INDC konsistenti mar-rekwiżit ta' informazzjoni miftiehma f'Lima, bil-għan li l-miri jkunu trasparenti, kwantifikabbli u paragunabbli. Din it-tabella tipprovdi mudell sempliċi li jista' jservi ta' mudell possibbli għal dawk il-Partijiet li għadhom qegħdin jifformulaw l-INDC tagħhom. Fuq bażi volontarja, il-pajjiżi l-anqas żviluppati jistgħu jressqu INDCs li jiġbru fil-qosor politiki u miżuri bi stima ta' tnaqqis fl-emissjonijiet. Il-Partijiet kollha l-oħra għall-Protokoll għandhom iżommu impenn ta' mitigazzjoni b'mod kontinwu. Dawn l-impenji għandhom jidhru f'ordni alfabetika skont il-Parti f'Anness mal-Protokoll.

· Kopertura komprensiva ta' setturi u ta' tipi ta' emissjonijiet. L-impenji tal-Partijiet għandhom joħolqu inċentivi qawwija biex l-atturi kollha jkomplu jnaqqsu u jillimitaw l-emissjonijiet dinjija. Il-Protokoll għandu jitlob tnaqqis fl-emissjonijiet fis-setturi kollha, fosthom l-agrikoltura, il-forestrija u użi oħra tal-art, l-avjazzjoni u t-tbaħħir internazzjonali, u l-gassijiet fluworurati. L-ICAO, l-OMI u l-Protokoll ta' Montreal għandhom jieħdu azzjoni biex sa tmiem l-2016 jirregolaw b'mod effettiv, rispettivament, l-emissjonijiet mill-avjazzjoni internazzjonali, l-emissjonijiet mit-tbaħħir internazzjonali, u l-produzzjoni u l-konsum tal-gassijiet fluworurat.

· L-ogħla livell possibbli ta' ambizzjoni. Ħafna qabel il-konferenza ta' Pariġi, kull Parti għandha tagħżel it-tip ta' impenn ta' mitigazzjoni tagħha, u għandha tiddefinixxi l-livell ta' ambizzjoni u l-ambitu tagħha fid-dawl tal-evoluzzjoni tar-responsabbiltajiet, tal-kapaċitajiet u taċ-ċirkustanzi nazzjonali differenti. Il-pajjiżi bl-ogħla responsabbiltajiet u kapaċitajiet jeħtieġ li jkollhom l-iktar impenji ambizzjużi ta' mitigazzjoni. L-INDC ta' kull Parti għandu jirrappreżenta progressjoni sinifikanti fil-livell ta' ambizzjoni ta' mitigazzjoni u kopertura meta mqabbel mal-impenn attwali.  Għandu juri konverġenza f'livelli baxxi ta' emissjonijiet totali, kif ukoll ta' emissjonijiet per capita, u f'titjib fejn jidħol it-tnaqqis tal-intensità tal-emissjonijiet tul iż-żmien.

· Impenji sodi ta' mitigazzjoni. L-iktar tipi ta' impenn sod huma l-miri assoluti li jkopru l-ekonomija sħiħa, flimkien mal-baġits ta' emissjonijiet. Dawn it-tipi ta' impenn fihom bosta vantaġġi, fosthom iċ-ċertezza, it-trasparenza, il-flessibbiltà, u jekk jintużaw b'mod wiesa', inaqqsu r-riskju ta' rilokazzjoni tal-emissjonijiet ta' karbonju. Skont l-idea tal-progressjoni tul iż-żmien, il-pajjiżi kollha li diġà għandhom tali miri jridu jżommuhom u jżiduhom imqabbla ma' ta' sena bażi storika jew perjodu ta' riferenza. Il-pajjiżi tal-G20 u pajjiżi oħra ta' introjtu għoli li ma għandhomx miri assoluti fil-qafas tal-Protokoll għal wara l-2020, għandhom jintrabtu li jistabbilixxu tali miri sa mhux iktar tard mill-2025. Ekonomiji oħra emerġenti, u pajjiżi oħra ta' introjtu medju, huma mħeġġa jintrabtu b'tali miri kmieni kemm jista' jkun, u mhux wara l-2030.

4.           Niżguraw id-dinamiżmu permezz ta' reviżjoni regolari tal-miri

Il-Protokoll għandu jfassal proċess li jkun applikabbli għall-Partijiet kollha, sabiex l-impenji ta' mitigazzjoni jiġu rriveduti u msaħħa b'mod regolari, u b'mod konsistenti mal-għan fit-tul tal-Protokoll. Jekk l-isforzi kollettivi tal-Partijiet ma jilħqux il-livelli meħtieġa, il-proċess għandu jħeġġeġ lill-Partijiet iżidu l-livell ta' ambizzjoni tal-impenji eżistenti, u jifformulaw impenji ambizzjużi biżżejjed f'perjodi ta' mira sussegwenti.

Mill-2020 'il quddiem, ir-reviżjoni għandha terġa' ssir kull ħames snin, u għandha tiffaċilita t-trasparenza, iċ-ċarezza, u l-fehim tal-impenji ta' mitigazzjoni fid-dawl tal-kontribut tagħhom għall-objettiv ta' taħt iż-2°C. Ir-reviżjoni għandha tistieden lill-Partijiet jispjegaw il-progress fl-impenji tagħhom ta' mitigazzjoni, u għala jaħsbu li l-azzjonijiet tagħhom kienu ġusti u ambizzjużi.

Il-proċess għandu jkun infurmat mix-xjenza, għandu jibbaża fuq l-evidenza, u għandu jkun immexxi minn kunsiderazzjonijiet tal-evoluzzjoni tar-responsabbiltajiet, il-kapaċitajiet u ċ-ċirkustanzi nazzjonali differenti. Għandu jkun proċess sempliċi u effiċjenti, li jevita d-duplikazzjoni ta' proċessi oħra. L-arranġamenti għaċ-ċiklu ta' reviżjoni għandhom jittejbu tul iż-żmien, sabiex jibqgħu fit-triq it-tajba lejn l-objettiv ta' taħt iż-2°C.

Jeħtieġ li l-Protokoll u d-deċiżjonijiet irrelatati tal-Konferenza tal-Partijiet (COP) jipprovdu għall-mobilizzazzjoni dinamika tal-finanzjament tal-ġlieda kontra t-tibdil fil-klima, għat-trasferiment tat-teknoloġija, u għall-bini ta' kapaċità għall-Partijiet eliġibbli, b'mod partikulari dawk bl-inqas kapaċitajiet. Dan se jinkludi proċessi li jevalwaw b'mod regolari u jtejbu l-adegwatezza u l-effettività tal-mezzi ta' implimentazzjoni mmobilizzati mill-Fond Ekoloġiku għall-Klima (GCF), mill-Fond għall-Ambjent Dinji (GEF), u minn istituzzjonijiet rilevanti oħra. Ikun jeħtieġ ukoll li f'Pariġi jiġi żgurat appoġġ lill-Partijiet biex iwettqu reviżjonijiet regolari u jsaħħu l-istrateġiji tagħhom għall-adattament tul iż-żmien.

5.           Tisħiħ tat-trasparenza u tar-responsabbiltà

Il-Protokoll għandu jistipula l-elementi ewlenin ta' sistema komuni ta' trasparenza u responsabbiltà, li tkun applikabbli għall-Partijiet kollha. Din is-sistema għandha tinkludi regoli sodi dwar il-monitoraġġ, ir-rappurtar, il-verifika u l-kontabbiltà, kif ukoll proċess li jiżgura r-responsabbiltà ta' kull Parti biex tikseb l-impenji tagħha. Din is-sistema se tkun fondamentali biex tipprovdi fiduċja f'li kull Parti timplimenta l-impenji tagħha u tkun fit-triq it-tajba lejn l-ilħiq tal-mira tagħha. Is-sistema se tkun kruċjali wkoll biex tinbena l-fiduċja, biex titħeġġeġ l-ambizzjoni, u biex tipprovdi prevedibbiltà u ċertezza legali. Min-naħa tagħhom, sa mhux aktar tard mill-mument tar-ratifika, il-Partijiet għandhom iressqu l-iktar sett riċenti ta' inventarji ta' emissjonijiet annwali li jkopru l-perjodu mill-2010 sal-2015.

Din is-sistema għandha tibqa' xierqa fit-tul. Is-sistema għandha tkun flessibbli biżżejjed biex taqdi firxa wiesgħa ta' tipi ta' impenn, ta' kapaċitajiet u ta' ċirkustanzi nazzjonali, iżda din il-flessibbiltà ma għandhiex tolqot ħażin it-trasparenza, ir-responsabbiltà u l-ambizzjoni. Għandhom isiru reviżjonijiet regolari minn gruppi ta' esperti indipendenti. Il-Protokoll il-ġdid għandu jirrikonoxxi t-trasferimenti netti li jsiru bejn dawk il-pajjiżi li jkunu ddeċidew li jikkollegaw s-swieq nazzjonali tal-karbonju tagħhom, u dan għandu jiġi kkunsidrat fil-valutazzjoni tal-konformità.

Fl-aħħar nett, il-Protokoll għandu jistabbilixxi entità li tiffaċilita l-implimentazzjoni u tindirizza kwistjonijiet li jistgħu jqumu rigward il-konformità fl-implimentazzjoni tal-impenji ta' kull Parti. Din l-entità għandha tiffoka fuq l-impenji marbutin mal-mitigazzjoni, inklużi l-monitoraġġ, ir-rappurtar, il-verifika u l-kontabbiltà. L-entità għandha tkun iffurmata minn esperti u għandha tkun ta' natura mhux politika, u l-mandat tagħha għandu jiġi speċifikat fil-Protokoll.

6.           Niksbu r-reżiljenza għat-tibdil fil-klima bis-saħħa tal-adattament

Filwaqt li azzjoni ambizzjuża ta' mitigazzjoni hija fondamentali, daqstant ieħor se jkun ta' importanza li jitħeġġew azzjonijiet individwali u kollaborattivi biex inħejju għall-impatti avversi tat-tibdil fil-klima u nadattaw għalihom. Ir-rwol tas-settur tal-użu tal-art fir-rigward tar-reżiljenza tas-sigurtà tal-ikel, flimkien ma' vantaġġi oħra ambjentali, soċjali u ekonomiċi, huma ta' importanza kbira għal dawk l-azzjonijiet. L-istrateġija tal-UE għall-adattament, li tikkomplementa l-istrateġiji tal-Istati Membri, għandha l-għan li trawwem Ewropa iktar reżiljenti għat-tibdil fil-klima. L-adattament abbażi tal-ekosistemi jista' jnaqqas ir-riskji tal-għargħar u tal-erożjoni tal-ħamrija, u fl-istess ħin jista' jtejjeb il-kwalità tal-ilma u tal-arja.

Bil-għan li jinkiseb żvilupp sostenibbli reżiljenti għat-tibdil fil-klima għall-Partijiet kollha, il-Protokoll għandu jseddaq l-impenji tal-Partijiet kollha sabiex ikomplu jifformulaw, jippjanaw u jimplimentaw miżuri li jiffaċilitaw l-adattament, u sabiex jirrappurtaw dwar dawn il-miżuri permezz tal-komunikazzjonijiet nazzjonali tagħhom. Il-Protokoll għandu jissokta jipprovdi għajnuna lil dawk ir-reġjuni u pajjiżi li huma partikolarment vulnerabbli għall-effetti avversi tat-tibdil fil-klima, inkluż billi jipprovdi appoġġ finanzjarju u tekniku, kif ukoll bini tal-kapaċitajiet.

B'dan il-mod, il-Protokoll se jipprovdi aktar viżibbiltà għall-azzjoni u l-appoġġ għall-adattament, u se jsaħħaħ id-dispożizzjonijiet ta' monitoraġġ u rappurtar fil-qafas tal-UNFCCC. Il-Protokoll se jippermetti wkoll fehim aħjar tal-effettività tal-miżuri mwettqa biex jiffaċilitaw l-adattament xieraq, billi jiġbor tagħrif mir-rapporti nazzjonali u minn sorsi rilevanti oħra, bil-għan li jikkontribwixxi lejn it-tfassil ta' azzjoni mtejba li għandha titwettaq mill-Partijiet.

Bl-adozzjoni tal-Protokoll, deċiżjonijiet sussegwenti tal-Konferenza tal-Partijiet għandhom isaħħu l-implimentazzjoni tad-dispożizzjonijiet fil-Qafas ta' Adattament ta' Cancún u fil-Programm ta' Ħidma ta' Nairobi.

7.           Promozzjoni tal-implimentazzjoni u tal-kooperazzjoni

7.1.        Mobilizzazzjoni tal-finanzjament pubbliku u privat tal-ġlieda kontra t-tibdil fil-klima

It-trasformazzjoni lejn ekonomiji reżiljenti għat-tibdil fil-klima u b'livelli baxxi ta' emissjonijiet tista' tinkiseb biss billi jinkisbu bidliet kbar fix-xejriet tal-investimenti. Il-Protokoll għandu jippromwovi investimenti fi programmi u politiki li huma reżiljenti għat-tibdil fil-klima u għandhom livelli baxxi ta' emissjonijiet. Il-pajjiżi kollha għandhom jintrabtu li jieħdu passi biex itejbu l-ambjenti ta' investiment tagħhom b'mod li jiġbdu investimenti favur il-klima. Bi qbil mal-Komunikazzjoni tal-Kummissjoni "Sħubija Globali għall-Qerda tal-Faqar u l-Iżvilupp Sostenibbli wara l-2015", għandhom jintużaw b'mod effettiv ir-riżorsi kollha sabiex jintlaħqu għadd ta' objettivi klimatiċi u ta' żvilupp sostenibbli li jkunu miftiehma internazzjonalment. Il-pajjiżi li jinsabu f'qagħda li jagħmlu dan għandhom jimmobilizzaw appoġġ finanzjarju għall-Partijiet eliġibbli għall-Protokoll. Jeħtieġ li l-bażi tal-appoġġ finanzjarju titwessa' tul iż-żmien, hekk kif jevolvu l-kapaċitajiet tal-Partijiet. Il-Partijiet kollha għandhom jipprovdu wkoll ċarezza dwar l-impatti klimatiċi tal-flussi ta' finanzjament li ma jaqgħux fil-mandat tal-finanzjament tal-ġlieda kontra t-tibdil fil-klima. Il-finanzjament tal-azzjoni klimatika għandu jibqa' jirrifletti l-impenji tal-gvernijiet nazzjonali, l-ambjenti u l-istrateġiji ta' investiment għal wara l-2020. L-ammont ta' finanzjament klimatiku li għandu jiġi mmobilizzat se jiddependi wkoll mill-ambizzjoni u l-kwalità tal-INDCs proposti, mill-pjanijiet ta' investiment sussegwenti, u mill-proċessi ta' ppjanar nazzjonali ta' adattament. F'dan l-istadju, ġaladarba l-INDCs u l-proċessi ta' ppjanar nazzjonali ta' adattament għadhom mhux magħrufin bis-sħiħ, għadu kmieni wisq biex nelaboraw fuq l-iskala u t-tip ta' finanzjament klimatiku meħtieġ għal wara l-2020.

Il-finanzjament mis-settur pubbliku għall-ġlieda kontra t-tibdil fil-klima se jkompli jiżvolġi rwol importanti fil-mobilizzazzjoni tar-riżorsi għal wara l-2020. Il-Protokoll għandu jirrikonoxxi wkoll l-importanza tas-settur privat bħala sors ewlieni ta' finanzjament klimatiku ta' livell għoli. Il-Protokoll għandu jiċċara r-rwol tal-Fond għall-Ambjent Dinji u tal-Fond Ekoloġiku għall-Klima fl-għoti ta' appoġġ għall-implimentazzjoni. Għandu jipprovdi lill-ifqar pajjiżi, u lil dawk il-pajjiżi l-aktar vulnerabbli għat-tibdil fil-klima, garanziji li se jkomplu jirċievu appoġġ ta' prijorità. Dan ikun jista' jinkiseb l-aħjar jekk il-qafas ta' finanzjament tal-Protokoll ikun għalkollox konsistenti mal-proċess "Finanzjament għall-Iżvilupp" u mal-Aġenda tal-Iżvilupp għal wara l-2015.

Il-Protokoll għandu jippromwovi l-formulazzjoni u l-implimentazzjoni ta' ambjenti tajbin għall-investiment, u b'hekk għat-trasformazzjoni lejn ekonomiji reżiljenti għat-tibdil fil-klima u b'livelli baxxi ta' emissjonijiet, fost l-oħrajn bis-saħħa ta':

politiki nazzjonali ambizzjużi għall-ġlieda kontra t-tibdil fil-klima; governanza effettiva, inklużi oqfsa ta' investiment, inċentivi tal-prezz u strumenti finanzjarji li jiffavorixxu investimenti reżiljenti għat-tibdil fil-klima u b'livelli baxxi ta' emissjonijiet; u l-għoti ta' informazzjoni dwar kif tista' tiġġieled it-tibdil fil-klima.

F'dan se jiżvolġu rwol ewlieni l-ipprezzar tal-karbonju u l-politiki ta' investiment tal-banek ta' żvilupp pubbliċi. Ir-razzjonalizzazzjoni tal-kunsiderazzjonijiet klimatiċi f'kull politika, strateġija ta' żvilupp u investiment se tkun essenzjali biex jittieħed l-ikbar vantaġġ mis-sinerġiji bejn l-iżvilupp, il-mitigazzjoni u l-finanzjament għall-adattament.

7.2.        Tisħiħ tal-azzjoni ta' kooperazzjoni internazzjonali

Il-qsim ta' informazzjoni dwar esperjenzi fid-disinn ta' politiki u fil-promozzjoni tal-prassi tajba se jħaffef u jwessa' ferm l-azzjoni kontra t-tibdil fil-klima. F'dawn l-aħħar snin, l-UE kienet proattiva f'inizjattivi bilaterali u multilaterali f'din id-direzzjoni, pereżempju bi djalogi ta' politika bilaterali dwar l-iskambju ta' kwoti tal-emissjonijiet; bl-ivvarar ta' inizjattivi favur l-enerġija sostenibbli li jikkontribwixxu għall-iżvilupp ta' ekonomiji b'użu baxx tal-karbonju; jew bil-promozzjoni tal-iżvilupp u l-implimentazzjoni prattika ta' politiki ta' adattament permezz tal-Alleanza Globali Kontra t-Tibdil fil-Klima, li llum tħaddan lil 38 pajjiż vulnerabbli fil-fażi ta' żvilupp kif ukoll tmien reġjuni fl-Afrika, fl-Ażja, fil-Karibew u fil-Paċifiku.

Il-Protokoll għandu jħeġġeġ skambju aktar sistematiku tal-esperjenzi fir-reġjuni ġeografiċi u fosthom, b'mod li jinġabar l-għarfien tekniku espert, fost l-oħrajn minn organizzazzjonijiet speċjalizzati, mis-settur privat, mill-akkademja, mir-reġjuni u mill-muniċipalitajiet. Il-Protokoll għandu jipprovdi għar-rikonoxximent ta' inizjattivi sinifikanti li jimplimentaw u jikkomplementaw l-isforzi nazzjonali favur it-tnaqqis tal-emissjonijiet u l-adattament għall-effetti avversi tat-tibdil fil-klima. Fil-konferenza ta' Pariġi, għandu jiġi deċiż ukoll li jitkompla l-programm ta' ħidma biex tiġi identifikata azzjoni addizzjonali ta' mitigazzjoni fl-2016, b'ħidma mill-qrib mal-Fond Ekoloġiku għall-Klima u ma' istituzzjonijiet finanzjarji oħra. Dan se jkun ta' importanza partikulari jekk ikun hemm qabża bejn il-livell aggregat ta' ambizzjoni tal-impenji ta' mitigazzjoni u bejn it-tnaqqis fl-emissjonijiet meħtieġ biex jintlaħaq l-objettiv ta' taħt iż-2°C.

7.3.        Appoġġ għall-iżvilupp u l-implimentazzjoni ta' teknoloġiji għall-ġlieda kontra t-tibdil fil-klima

L-iżvilupp u l-implimentazzjoni ta' teknoloġiji għall-ġlieda kontra t-tibdil fil-klima jiżvolġu rwol ewlieni fit-tiftix ta' objettivi klimatiċi, kif ukoll fil-kontribuzzjoni lejn il-ħolqien tal-impjieg u t-tkabbir ekonomiku sostenibbli. Il-kombinazzjoni tal-finanzjament tar-riċerka, miżuri ta' kummerċjalizzazzjoni, programmi edukattivi, finanzjamenti u politiki li jimponu prezz fuq l-emissjonijiet, toħloq ambjent tajjeb għall-investiment favur firxa wiesgħa ta' teknoloġiji. Dawn it-teknoloġiji huma maħsuba, fost l-oħrajn, biex jippromwovu r-reżiljenza għall-impatti estremi tat-temp, servizzi klimatiċi u sistemi għall-ġestjoni tal-ilma, kif ukoll il-produzzjoni tal-enerġija, proċessi industrijali, it-trasport, l-agrikoltura, u t-tnaqqis tad-deforestazzjoni.

Il-pajjiżi jagħżlu l-iktar teknoloġiji li jkunu xierqa għalihom, spiss bl-appoġġ ta' valutazzjonijiet tal-ħtiġijiet tekniċi u ċ-Ċentru u Netwerk ta' Teknoloġija għall-Klima (CTCN). L-innovazzjoni, inkluż l-aġġornament meħtieġ tat-trasferiment tat-teknoloġija, tiddependi mill-kollaborazzjoni volontarja ma' atturi tas-settur privat bil-għan li teknoloġija tiġi żviluppata, iffinanzjata u implimentata. Huwa fondamentali li r-regoli eżistenti ta' proprjetà intellettwali jinżammu kif inhuma.

Il-Protokoll għandu jirrikonoxxi r-rwol li diġà qegħdin jiżvolġu l-Kumitat Eżekuttiv Teknoloġiku u s-CTCN, flimkien ma' proċess riformat ta' valutazzjoni tal-ħtiġijiet tekniċi.

7.4.        Il-bini tal-kapaċità

Il-bini tal-kapaċità għandu jkun element integrali tal-appoġġ għall-attivitajiet kollha marbutin mal-Protokoll, fosthom l-ippjanar għall-adattament, l-obbligi ta' rappurtar, l-inventarji tal-emissjonijiet, it-trasferiment tat-teknoloġija, u l-proġetti ta' mitigazzjoni. Għaldaqstant, il-bini tal-kapaċità għandu jiġi pprovdut permezz tal-istituzzjonijiet responsabbli għall-appoġġ ta' attivitajiet fl-oqsma msemmija, u għandu jkun adattat skont il-ħtiġijiet ta' kull pajjiż.

L-arranġamenti eżistenti fil-qafas tal-Konvenzjoni jistgħu jissaħħu, għalkemm il-Forum ta' Durban dwar il-Bini tal-Kapaċità se jibqa' l-ispazju x-xieraq għad-diskussjonijiet f'dan il-qasam. L-UE qiegħda tintegra attivament il-bini tal-kapaċità fl-appoġġ tagħha għall-azzjoni klimatika f'pajjiżi fil-fażi tal-iżvilupp, inkluż b'rabta mal-impenji ta' mitigazzjoni.

Il-konferenza ta' Pariġi għandha taqbel li tgħin lil dawk il-pajjiżi li jeħtieġu assistenza biex joħolqu inventarji tal-emissjonijiet u sistemi ta' monitoraġġ, rappurtar u verifika, kif ukoll biex jiżviluppaw strateġiji ta' żvilupp reżiljenti għat-tibdil fil-klima u b'livelli baxxi ta' emissjonijiet, bis-saħħa ta' strutturi ta' inċentivi xierqa.

8.           Mobilizzazzjoni ta' politiki oħra tal-UE

Fix-xhur li ġejjin, l-UE se tintensifika d-diplomazija klimatika tagħha qabel il-konferenza ta' Pariġi. Il-Ministri tal-Affarijiet Barranin tal-UE approvaw Pjan ta' Azzjoni għad-Diplomazija Klimatika, li tfassal b'mod konġunt mis-Servizz Ewropew għall-Azzjoni Esterna u mill-Kummissjoni.

Il-Pjan jinkludi l-azzjonjiet li ġejjin:

il-promozzjoni tal-ġlieda kontra t-tibdil fil-klima bħala prijorità strateġika fid-djalogi politiċi, inkluż fil-laqgħat tal-G7 u l-G20 u fl-Assemblea Ġenerali tan-Nazzjonijiet Uniti; l-appoġġ għall-iżvilupp reżiljenti għat-tibdil fil-klima u għad-diżastri klimatiċi u b'livelli baxxi ta' emissjonijiet, permezz ta' kooperazzjoni għall-iżvilupp min-naħa tal-UE; u l-istabbiliment ta' rabtiet bejn it-tibdil fil-klima u l-konsegwenzi possibbli tiegħu fit-tul, inklużi sfidi ta' sigurtà.

Barra minn dan, politiki oħra tal-UE jistgħu jappoġġjaw attivament l-għanijiet tal-UE fil-proċess ta' negozjati internazzjonali u fl-implimentazzjoni tal-Protokoll f'pajjiżi msieħba. Tali politiki jistgħu jgħinu lill-pajjiżi msieħba fil-fażi ta' tħejjija tal-Protokoll, kif ukoll aktar 'il quddiem meta jiġi implimentat. Dawn il-politiki jinkludu:

Kooperazzjoni ekonomika u għall-iżvilupp. L-UE u l-Istati Membri tagħha diġà huma l-ikbar fornituri ta' għajnuna uffiċjali għall-iżvilupp u ta' finanzjament tal-ġlieda kontra t-tibdil fil-klima lill-pajjiżi fil-fażi tal-iżvilupp. Fl-2013, l-UE tat iktar minn EUR 9.5 biljun bħala finanzjament tal-ġlieda kontra t-tibdil fil-klima. L-UE għandha tkompli tirrazzjonalizza l-għanijiet klimatiċi fil-kooperazzjoni tagħha ekonomika u għall-iżvilupp. Għal dan il-għan, diġà ġie miftiehem li għall-perjodu 2014-20, mill-anqas 20% tal-għajnuna tal-UE għall-iżvilupp ikollu jkun rilevanti għall-ġlieda kontra t-tibdil fil-klima, jiġifieri madwar EUR 14 biljun. L-Istati Membri wkoll għandhom jistipulaw għanijiet ċari ta' razzjonalizzazzjoni. Barra minn hekk, l-UE u l-Istati Membri għandhom jintensifikaw il-koordinazzjoni fil-qasam tal-finanzjament globali tal-ġlieda kontra t-tibdil fil-klima, sabiex jittejbu l-impatt u l-effiċjenza ta' dak il-finanzjament. Riċerka xjentifika, żvilupp ta' teknoloġiji, u politika ta' innovazzjoni. L-UE se tislet aktar vantaġġ mill-fatt li l-programm ta' qafas tagħha ta' riċerka u innovazzjoni, Orizzont 2020, huwa għalkollox miftuħ għas-sehem ta' pajjiżi terzi, u jipprovdi appoġġ finanzjarju lil pajjiżi inqas żviluppati. L-UE se xxerred l-għarfien dwar l-impenn tagħha biex tinvesti, fil-qafas ta' dan il-programm, tal-anqas EUR 28 biljun għal azzjonijiet marbutin mal-klima. Proporzjon minn dan l-ammont se jagħti lok għal kollaborazzjoni internazzjonali wiesgħa biex it-teknoloġiji għall-ġlieda kontra t-tibdil fil-klima jiġu kkummerċjalizzati, biex jiġu mgħallma xjenzati u intraprendituri, u biex issir kontribuzzjoni lejn l-għanijiet tad-diplomazija klimatika. Il-politika kummerċjali.           Fil-ftehimiet kummerċjali bilaterali tagħha, l-UE u s-sħab tagħha ta' kummerċ ħieles jintrabtu li jippromwovu għanijiet klimatiċi u li jimplimentaw b'mod effettiv l-UNFCCC, inkluż permezz ta' djalogi strutturati regolari u kooperazzjoni fi kwistjonijiet klimatiċi u kummerċjali. Fil-qafas tal-iskema GSP+, l-UE toffri aċċess miżjud għas-suq lill-pajjiżi fil-fażi tal-iżvilupp li jkunu rratifikaw u li jimplimentaw b'mod effettiv konvenzjonijiet internazzjonali, inkluż dwar it-tibdil fil-klima. L-UE qiegħda taħdem mas-sħab kummerċjali tagħha fi ħdan id-WTO lejn il-konklużjoni ta' ftehim internazzjonali sinifikanti dwar il-liberalizzazzjoni tal-kummerċ f'oġġetti u servizzi ambjentali sa tmiem 2015, bil-għan li jiżdiedu t-tixrid u l-adozzjoni tat-teknoloġiji favur il-klima. Il-politika ambjentali. L-implimentazzjoni tal-impenji tal-UE fil-qafas tal-Pjan Strateġiku Globali għall-Bijodiversità, kif approvat mill-istrateġija tal-UE għall-bijodiversità, se tkun kruċjali fl-indirizzar tat-tibdil fil-klima, filwaqt li jinħolqu vantaġġi soċjali, ekonomiċi u kulturali. Tnaqqis tar-riskju ta’ diżastri. Il-kooperazzjoni tal-UE fil-ġestjoni tar-riskji ta' diżastri - li tinkludi l-iżvilupp ta' valutazzjonijiet nazzjonali tar-riskji li jindirizzaw ukoll l-impatti klimatiċi u kapaċitajiet imsaħħa ta' ġestjoni tar-riskji - tikkontribwixxi lejn it-tisħiħ tal-adattament għat-tibdil fil-klima.[4]

9.           Il-passi li jmiss

Jeħtieġ li l-UE:

tressaq l-INDC proprju tagħha sa tmiem l-ewwel kwart tal-2015; tħeġġeġ lill-ekonomiji ewlenin juru t-tmexxija tagħhom permezz ta' INDCs f'waqthom u ambizzjużi, partikularment fil-kuntest tal-Forum tal-Ekonomiji Ewlenin, il-G20 u l-G7; tħeġġeġ u tappoġġja, kif xieraq, it-tħejjija ta' INDCs ambizzjużi min-naħa tal-akbar numru ta' Partijiet possibbli; tippromwovi l-azzjoni klimatika globali ambizzjuża bħala prijorità ewlenija tar-relazzjonijiet diplomatiċi tagħha u tad-djalogu tagħha mal-pajjiżi msieħba; iġġib 'il quddiem, permezz tal-UNFCCC u diskussjonijiet oħra multilaterali u bilaterali, l-adozzjoni ta' Protokoll ambizzjuż, trasparenti u dinamiku, kif deskritt hawn fuq; turi u tiżgura l-istabbiltà u l-prevedibbiltà tal-appoġġ finanzjarju pprovdut kollettivament mill-UE lill-imsieħba internazzjonali tagħha, favur l-iżvilupp reżiljenti għat-tibdil fil-klima u b'livelli baxxi ta' emissjonijiet; tagħmel pressjoni biex ma ddumx ma ssir liberalizzazzjoni tal-kummerċ fl-oġġetti u servizzi ambjentali, sa tmiem l-2015; tiżgura li l-azzjoni klimatika tkun konsistenti man-negozjati tan-NU dwar l-Għanijiet ta' Żvilupp Sostenibbli u dwar il-Finanzjament tal-Iżvilupp Sostenibbli għal wara l-2015, kif ukoll mal-Qafas għat-Tnaqqis tar-Riskju ta' Diżastri għal wara l-2015; u tiżgura li t-tieni perjodu ta' impenji tal-Protokoll ta' Kjoto jiġi rratifikat qabel tmiem l-2015 mill-UE u mill-Istati Membri tagħha, kif ukoll mill-għadd ta' Partijiet meħtieġ biex jiġi żgurat id-dħul fis-seħħ tiegħu.

Il-Kummissjoni se torganizza konferenza internazzjonali biex jittejjeb il-fehim reċiproku tal-firxa tal-INDCs u tal-adegwatezza tal-ambizzjoni kollettiva tagħhom, kif ukoll biex jiġi ffaċilitat skambju miftuħ ta' fehmiet qabel il-konferenza ta' Pariġi. Din il-konferenza organizzata mill-Kummissjoni, li se ssir f'Novembru 2015, ser ikollha l-għan li tlaqqa' flimkien il-pajjiżi msieħba, esperti ewlenin mill-akkademja, gruppi ta' riflessjoni u organizzazzjonijiet internazzjonali.

Sa nofs l-2015, il-Kummissjoni se tibda tressaq lill-Parlament Ewropew u lill-Kunsill proposti leġiżlattivi biex jimplimentaw il-Qafas ta' politika għall-klima u l-enerġija għall-2030.

Il-Kummissjoni se tkompli tirrazzjonalizza l-azzjoni kontra t-tibdil fil-klima fil-kooperazzjoni tagħha ekonomika u għall-iżvilupp; tieħu inizjattivi biex taħdem iktar mill-qrib mal-Istati Membri fl-għoti ta' finanzjament għall-iżvilupp marbut mal-klima; u se tisfrutta aħjar l-orjentament tar-riċerka xjentifika u tal-programmi ta' innovazzjoni tagħha lejn l-appoġġ lis-sħab internazzjonali tal-UE, billi tgħinhom iħejju l-impenji tagħhom fil-qafas tal-Protokoll il-ġdid.

Il-Kummissjoni tistieden lill-Parlament Ewropew u lill-Kunsill japprovaw mill-iktar fis l-istrateġija proposta.

Tabella 1: Il-Kontribut Maħsub Determinat Nazzjonalment (INDC) propost mill-UE

L-Impenn

Tip || Tnaqqis assolut mill-emissjonijiet tas-sena bażi.

Kopertura || L-ekonomija sħiħa.

Ambitu || Il-gassijiet serra kollha li mhumiex ikkontrollati mill-Protokoll ta' Montreal: id-Dijossidu tal-Karbonju (CO2) · il-Metan (CH4) · l-Ossidu Nitruż (N2O) · l-Idrofluworokarburi (HFCs) · il-Perfluworokarburi (PFCs) · l-Eżafluworur tal-kubrit (SF6) · it-Trifluworur tan-nitroġenu (NF3)

Sena Bażi || 1990.

Perjodu || 2021-2030 inklussivi.

Livell ta' Tnaqqis || Irid jinkiseb tnaqqis nazzjonali ta' mill-inqas 40% fl-emissjonijiet fl-2030.

% tal-Emissjonijiet Koperti || 100%.

Agrikoltura, forestrija u użi oħra tal-art inklużi || Iva.

Kontribut Nett ta' Mekkaniżmi Bażati fuq is-Suq Internazzjonali || L-ebda kontribut minn krediti internazzjonali.

Proċess ta’ ppjanar || Il-Kunsill Ewropew tat-23 u l-24 ta' Ottubru 2014 li japprova l-Qafas ta' Politika għall-Klimatika u l-Enerġija għall-2030 (EUCO 169/14). Il-Kummissjoni Ewropea se tħejji proposti leġiżlattivi biex jimplimentaw il-qafas għall-2030 (il-Programm ta' Ħidma tal-Kummissjoni tal-2015), inkluż dwar l-użu tal-art, it-tibdil fl-użu tal-art u l-forestrija.

Ġust u ambjizzjuż || Dan l-impenn huwa konsistenti ma' politiki tal-UE li jfittxu li jiksbu tranżizzjoni lejn ekonomija b'livell baxx ta' emissjonijiet, u li b'hekk tagħti lok għall-possibbiltà li jintlaħaq l-objettiv ta' taħt iż-2°C. Dan l-impenn iqiegħed l-UE f'rotta kosteffettiva lejn tnaqqis fit-tul fl-emissjonijiet nazzjonali ta' 80%, konsistenti mal-valutazzjoni mill-IPCC tat-tnaqqis meħtieġ min-naħa tal-pajjiżi żviluppati meħudin bħala grupp sabiex jitnaqqsu l-emissjonijiet bi 80%-95% meta mqabbel mal-livelli tal-1990 sal-2050. L-UE diġà rat il-quċċata tal-emissjonijiet tagħha. Skont il-bażi ta' dejta EDGAR, l-emissjonijiet tat-28 Stat Membru tal-UE laħqu l-quċċata tagħhom fl-1979, b'6.4 Gt f'ekwivalent tas-CO2.

Suppożizzjonijiet Ewlenin

Metrika Applikata || Potenzjal ta' Tisħin Dinji fuq skala ta' żmien ta' 100 sena, skont ir-Raba' Rapport ta' Valutazzjoni tal-IPCC.

Metodoloġiji għall-Istima tal-Emissjonijiet || Linji Gwida tal-IPCC tal-2006.

Approċċ lejn il-kontabbiltà għall-agrikoltura, il-forestrija u użi oħra tal-art || Approċċ komprensiv għal qafas ta' kontabbiltà abbażi tal-attività jew tal-art, għall-emissjonijiet u għat-tneħħija mill-użu tal-art, it-tibdil fl-użu tal-art u l-forestrija, li jibni fuq: (i) regoli kif miftiehma skont 2/CMP.7, deċiżjonijiet applikabbli tal-Konferenza tal-Partijiet, u l-leġiżlazzjoni domestika tal-UE (id-Deċiżjoni 529/2013/UE); u (ii) il-livell attwali ta' integrità ambjentali.

Kopertura

Setturi / Kategorji tas-Sorsi || · Enerġija o Konsum ta’ fjuwil § Industriji tal-enerġija § Industriji ta' manifattura u kostruzzjoni § Trasport § Setturi oħra § Oħrajn o Emissjonijiet li jaħarbu mill-karburanti § Karburanti solidi § Żejt u gass naturali o Trasport u ħażna tas-CO2 · Proċessi industrijali u l-użu tal-prodotti o Industrija tal-minerali o Industrija kimika o Industrija tal-metalli o Prodotti mhux enerġetiċi mill-fjuwils u mill-użu ta' solventi o Industrija elettronika o Użu ta' prodotti bħala sostituti għall-ODS o Manifattura u użu ta' prodotti oħra o Oħrajn · Agrikoltura o Fermentazzjoni enterika o Ġestjoni tad-demel o Kultivazzjoni tar-ross o Ħamrija agrikola o Ħruq preskritt ta' savanni o Ħruq fl-għelieqi ta' fdalijiet agrikoli o Trattament tal-ġir o Applikazzjoni tal-urea o Fertilizzanti oħra li fihom il-karbonju o Oħrajn · Skart o Rimi tal-iskart solidu o Trattament bijoloġiku tal-iskart solidu o Inċinerazzjoni u ħruq fil-miftuħ tal-iskart o Trattament tal-ilma mormi u rimi o Oħrajn · Użu tal-art, tibdil fl-użu tal-art u forestrija, kif stipulat fid-Deċiżjoni 529/2013/UE o Afforestazzjoni, riforestazzjoni o Deforestazzjoni o Ġestjoni tal-foresti o Ġestjoni tar-raba' o Ġestjoni tal-imriegħi o Jew kontabbiltà ekwivalenti abbażi tal-art bl-użu tal-kategoriji ta' rappurtar tal-UNFCCC o Kategoriji / attivitajiet oħra magħżula mill-UE u l-Istati Membri tagħha bħala Partijiet għall-Protokoll ta' Kjoto u l-Emenda ta' Doha.

[1] Il-Programm tan-Nazzjonijiet Uniti għall-Ambjent (UNEP) - "The emissions gap report 2014. A UNEP synthesis report".

[2] Dan huwa ekwivalenti għall-objettiv stabbilit tal-UE li l-emissjonijiet globali jitnaqqsu bin-nofs sal-2050 meta mqabbla ma' tal-1990, kif ġie mtenni mill-Kunsill Ambjent fil-konklużjonijiet tiegħu tat-28 ta' Ottubru 2014.

[3] COM(2011) 112 final: Pjan direzzjonali għal ekonomija kompetittiva b’livell baxx ta’ emissjonijiet tal-karbonju fl-2050 [traduzzjoni mhux uffiċjali].

[4] L-Artikoli 5 u 6 tad-Deċiżjoni 1313/2013 tal-Parlament Ewropew u tal-Kunsill dwar Mekkaniżmu tal-Unjoni

għall-Protezzjoni Ċivili.

Anness: Informazzjoni ta' sfond dwar il-profili tal-emissjonijiet tal-UE u tal-ikbar emittenti globali

L-UE - jonqsu l-emissjonijiet tal-Gassijiet Serra filwaqt li tikber l-ekonomija

Sors: EEA, DĠ ECFIN (il-bażi ta' dejta Ameco), Eurostat