14.6.2014   

MT

Il-Ġurnal Uffiċjali tal-Unjoni Ewropea

C 182/2

1.

Fis-6 ta’ Diċembru 2013, il-Kunsill ĠAI adotta l-Istrateġija l-ġdida dwar il-Ġustizzja elettronika Ewropea 2014-2018 (1). Din l-Istrateġija tiddefinixxi l-prinċipji ġenerali u l-objettivi tal-Ġustizzja elettronika Ewropea u tistabbilixxi linji gwida ġenerali għall-istabbiliment ta’ Pjan ta’ Azzjoni pluriennali Ewropew ġdid korrispondenti dwar il-Ġustizzja elettronika matul l-ewwel nofs tal-2014.

2.

Dan il-Pjan ta’ Azzjoni, kif jinsab fl-Anness, jinkludi lista tal-proġetti meqjusa għall-implimentazzjoni fil-perijodu 2014-2018, b’indikazzjoni tal-parteċipanti, l-azzjonijiet għall-implimentazzjoni prattika tagħhom u skeda ta’ żmien indikattiva, fejn possibbli, bil-ħsieb li jippermetti segwitu konkret għall-Pjan ta’ Azzjoni mill-Grupp ta’ Ħidma dwar il-Leġislazzjoni elettronika (Ġustizzja elettronika).

3.

Dan it-tieni Pjan ta’ Azzjoni pluriennali Ewropew dwar il-Ġustizzja elettronika għandu l-għan li jibni fuq il-ħidma li diġà twettqet u li jkompli b’dan l-iżvilupp pożittiv f’livell nazzjonali u Ewropew. Din il-ħidma għandha titqies ukoll bħala parti minn evoluzzjoni usa’ lejn spazju Ewropew ta’ ġustizzja fil-kuntest tad-diskussjonijiet li għaddejjin dwar l-iżvilupp futur tal-qasam tal-Ġustizzja u l-Affarijiet Interni.

4.

Matul id-diskussjonijiet li saru taħt il-Presidenza Litwana fil-ħarifa tal-2013 u li komplew taħt il-Presidenza Ellenika fl-ewwel nofs tal-2014, kien hemm kunsens sostanzjali fost l-Istati Membri rigward l-iżvilupp ulterjuri tal-Ġustizzja elettronika bħala wieħed mill-pedamenti tal-funzjonament effiċjenti tal-ġustizzja fl-Istati Membri u fuq livell Ewropew.

5.

L-implimentazzjoni tal-Istrateġija teħtieġ Pjan ta’ Azzjoni komprensiv imfassal biex itejjeb il-funzjonament ġenerali tas-sistemi tal-Ġustizzja elettronika fl-Istati Membri u fuq livell Ewropew.

6.

Fir-rigward tal-Istrateġija dwar il-Ġustizzja elettronika Ewropea (2014-2018) (2), u mingħajr preġudizzju għal proġetti nazzjonali u żviluppi fil-qasam tal-Ġustizzja elettronika, il-Portal Ewropew tal-Ġustizzja elettronika, ospitat u operat mill-Kummissjoni f’konformità mal-linji gwida tal-Kunsill, hu element prinċipali fil-kisba tal-Ġustizzja elettronika fuq livell Ewropew.

7.

Dan l-objettiv hu rifless fil-lista annessa ta’ proġetti fil-qasam tal-aċċess għall-informazzjoni fil-qasam tal-ġustizzja, l-aċċess għall-qrati u l-proċeduri extraġudizzjarji f’sitwazzjonijiet transkonfinali, u l-komunikazzjoni bejn l-awtoritajiet ġudizzjarji.

8.

L-iżvilupp tal-Ġustizzja elettronika Ewropea għandu jinkludi azzjonijiet kemm fil-livell Ewropew kif ukoll dak nazzjonali fil-qasam tal-Ġustizzja elettronika.

9.

Għal proġetti ġodda u eżistenti kollha fil-qasam tal-Ġustizzja elettronika, għandha tingħata attenzjoni speċjali lill-kisba tal-bażi ta’ parteċipazzjoni l-aktar wiesgħa possibbli, sabiex jiġi żgurat li jiġu sodisfatti l-aspettattivi tal-utenti, il-vijabbiltà fit-tul u l-kosteffiċjenza ta’ dawk il-proġetti. Il-proġetti ġodda żviluppati taħt il-Ġustizzja elettronika Ewropea għandu għalhekk ikollhom il-potenzjal li jinvolvu lill-Istati Membri kollha tal-Unjoni Ewropea, u l-Istati Membri kollha għandhom jiġu mħeġġa jipparteċipaw fil-proġetti kollha fuq bażi volontarja.

10.

Bil-għan li dan jinkiseb, il-proġetti ġodda b’impatt possibbli fuq il-Ġustizzja elettronika Ewropea ppjanati mill-Istati Membri u mhux inklużi fl-Anness, sa fejn possibbli, għandhom l-ewwel jiġu diskussi mal-Grupp ta’ Ħidma dwar il-Leġislazzjoni elettronika (Ġustizzja elettronika) għal valutazzjoni ġenerali tal-aspetti prattiċi u aspetti rilevanti oħrajn tal-proġett. Dan jiżgura wkoll li l-ħtiġijiet u l-fehmiet ta’ Stati Membri oħra u l-Kummissjoni jiġu kkunsidrati adegwatament u li tiġi evitata d-duplikazzjoni.

11.

Fl-ippjanar ta’ ħidma futura, għandu jinkiseb bilanċ adegwat bejn l-innovazzjoni u l-konsolidazzjoni. Għal raġunijiet ta’ kosteffiċjenza u b’kont meħud tar-riżorsi limitati disponibbli, il-proġetti eżistenti għandhom jitkomplew u jitwessgħu biex jinkludu l-akbar numru ta’ Stati Membri qabel ma jinbdew proġetti ġodda. L-iżviluppi konsiderevoli li seħħew f’dan il-qasam fl-Istati Membri fis-snin reċenti juru, madankollu, li għandhom jiġu inkoraġġuti proġetti emerġenti u innovattivi ġodda fil-qasam tal-ġustizzja.

12.

L-Istati Membri għandhom jikkooperaw bejniethom fuq bażi volontarja biex jiżguraw il-finanzjament tal-proġetti proposti.

13.

Il-Kummissjoni ser tkompli tiffinanzja l-iżvilupp, l-operazzjoni u t-traduzzjonijiet tal-Portal Ewropew tal-Ġustizzja elettronika u tipprovdi opportunitajiet għall-finanzjament ta’ proġetti tal-Ġustizzja elettronika ta’ valur miżjud, pereżempju taħt il-Programm dwar il-Ġustizzja (2014-2020) (3) jew taħt programmi oħra bħall-Faċilità Nikkollegaw l-Ewropa (4) jew l-ISA (5) jew il-programm suċċessur tiegħu.

14.

Biex jiġi żgurat approċċ ikkoordinat, il-Kummissjoni għandha tkompli tippreżenta pjan ta’ ħidma regolari fil-bidu ta’ kull perijodu ta’ sitt xhur.

15.

Il-Portal tal-Ġustizzja elettronika għandu jibqa’ jipprovdi informazzjoni ġenerali liċ-ċittadini, in-negozji, il-ġuristi u l-amministrazzjoni tal-ġustizzja dwar il-leġislazzjoni u l-każistika tal-UE u dawk tal-Istati Membri, kif ukoll jipprovdi aċċess għal EUR-Lex u N-Lex.

16.

Il-Portal għandu jkun ukoll mezz biex jiġi offrut aċċess għal informazzjoni speċifika fil-qasam tal-ġustizzja fuq livell nazzjonali, Ewropew u internazzjonali.

17.

Barra minn hekk, biex titjieb l-effiċjenza tal-Portal tal-Ġustizzja elettronika ser jitwettaq stħarriġ dwar il-ħtiġijiet tal-utenti. Għandhom jitwettqu wkoll attivitajiet addizzjonali bil-għan li jagħmlu l-Portal aktar faċli għall-utent.

18.

L-Informazzjoni dwar sistemi żviluppati jew l-interkonnessjoni magħhom bħala parti minn inizjattivi mwettqa mill-membri tal-professjoni legali, bħall-avukati, in-nutara u l-uffiċjali ġudizzjarji, għandha tkompli titqies għall-inklużjoni fil-Portal tal-Ġustizzja elettronika f’konsultazzjoni mal-partijiet interessati rilevanti. L-inizjattivi minn partijiet interessati rilevanti oħra, bħall-medjaturi jew l-esperti ġudizzjarji, jista’ wkoll jittieħed kont tagħhom fil-futur.

19.

Fir-rigward tal-kontenut ta’ informazzjoni tal-Portal, il-fornituri tal-kontenut, inkluż b’mod partikolari l-Istati Membri u l-Kummissjoni, huma responsabbli għall-preċiżjoni u l-aġġornament tal-informazzjoni fuq il-paġni tal-kontenut rispettivi tagħhom. Mill-inqas darba f’sena, il-fornituri tal-kontenut għandhom janalizzaw u, fejn meħtieġ, jaġġornaw l-informazzjoni li jkunu pprovdew.

20.

Il-Portal Ewropew tal-Ġustizzja elettronika għandu wkoll jipprovdi punt ta’ aċċess uniku permezz ta’ interkonnessjonijiet mal-informazzjoni fir-reġistri nazzjonali b’rilevanza fil-qasam tal-ġustizzja ġestit minn korpi pubbliċi nazzjonali jew professjonali li jiffaċilitaw l-amministrazzjoni tal-ġustizzja u l-aċċess għaliha, dment li fl-Istati Membri jkunu jeżistu l-prekondizzjonijiet tekniċi u legali meħtieġa għal tali interkonnessjonijiet.

21.

L-azzjoni f’dan il-qasam għandha tiffoka b’mod partikolari fuq l-interkonnessjoni tar-reġistri li huma ta’ interess għaċ-ċittadini, in-negozji, il-ġuristi u l-ġudikatura.

22.

Għandu jitkompla l-iżvilupp ta’ mezzi effettivi għall-iskambju ta’ informazzjoni legali transkonfinali, u b’mod partikolari data relatata ma’ leġislazzjoni, każistika u glossarji legali (bħal Legivoc) Ewropej jew nazzjonali.

23.

Proġetti differenti jistgħu jindirizzaw din il-kwistjoni u jżidu l-iskambju ta’ data legali u l-interoperabbiltà semantika tagħha fl-Ewropa kollha u lil hinn minnha. Identifikazzjoni unika, metadata komuni u ontoloġiji ta’ informazzjoni legali huma l-moduli bażiċi tal-web semantiku legali Ewropew.

24.

Ir-rikors fil-qorti u l-bidu ta’ proċedimenti extraġudizzjarji b’mod partikolari f’sitwazzjonijiet transkonfinali għandhom jiġu ffaċilitati permezz tad-disponibbiltà ta’ komunikazzjoni permezz ta’ mezzi elettroniċi bejn il-qrati u l-partijiet għall-proċedimenti kif ukoll ix-xhieda, l-esperti u l-parteċipanti l-oħra.

25.

Barra minn hekk, l-użu tal-vidjokonferenzi, it-telekonferenzi jew ta’ mezzi oħra adatti ta’ komunikazzjoni fuq distanza twila għal seduti orali, fejn adatt, għandu jiġi estiż sabiex titneħħa l-ħtieġa għall-ivvjaġġar lejn qorti għall-parteċipazzjoni fi proċedimenti ġudizzjarji, b’mod partikolari f’każijiet transkonfinali.

26.

Il-ġudikatura u l-ġuristi rilevanti tal-Istati Membri (bħall-avukati, in-nutara u l-uffiċjali ġudizzjarji) għandhom ikunu involuti f’diskussjonijiet futuri fil-qasam tal-Ġustizzja elettronika sabiex jiġi żgurat li s-soluzzjonijiet żviluppati jikkorrispondu għall-ħtiġijiet proprji tal-gruppi fil-mira possibbli tagħhom.

27.

Tali arranġament jippermetti kuntatt dirett ma’ dawn is-setturi professjonali, li l-Ġustizzja elettronika hi bażikament immirata għalihom, biex jiġu diskussi kwistjonijiet ta’ interess komuni u għal sensibilizzazzjoni għall-aktar żviluppi reċenti fil-qasam tal-Ġustizzja elettronika.

28.

L-Istrateġija dwar il-Ġustizzja elettronika Ewropea tipprevedi l-istabbiliment ta’ mekkaniżmu ta’ kooperazzjoni mal-ġudikatura u l-ġuristi. F’dan il-kuntest, ser tiġi organizzata laqgħa annwali ma’ rappreżentanti tal-ġudikatura u l-ġuristi (bħall-avukati, in-nutara u l-uffiċjali ġudizzjarji) sabiex ikun jista’ jsir skambju regolari ta’ fehmiet ma’ dawn il-gruppi ta’ professjonisti fil-mira (6). Dawn il-laqgħat ser jiġu organizzati fil-forma ta’ punti speċifiċi fl-aġenda għal-laqgħat regolari tal-Grupp ta’ Ħidma dwar il-Leġislazzjoni elettronika (Ġustizzja elettronika).

29.

Ir-rappreżentanti tal-ġudikatura u l-ġuristi għandhom jiġu assoċjati kemm jista’ jkun mal-ħidma tal-gruppi informali u l-gruppi esperti fil-Kummissjoni fir-rigward ta’ dawk il-proġetti li huma ta’ interess dirett għalihom.

30.

In-Netwerks Ġudizzjarji Ewropej f’materji ċivili u kummerċjali kif ukoll f’materji kriminali għandhom rwol importanti fl-iżvilupp tal-Ġustizzja elettronika u għandha titkompla l-kollaborazzjoni mill-qrib maż-żewġ netwerks.

31.

L-iżvilupp ta’ komunikazzjoni elettronika bejn l-awtoritajiet ġudizzjarji tal-Istati Membri, b’mod aktar speċifiku fil-qafas ta’ strumenti adottati fl-Ispazju ġudizzjarju Ewropew fil-qasam tad-dritt ċivili, kriminali u amministrattiv, għandu jitkompla aktar (eż. permezz ta’ vidjokonferenzi jew skambji siguri ta’ data elettronika).

32.

F’dan il-kuntest, il-Portal tal-Ġustizzja elettronika għandu jibqa’ jiġi żviluppat bħala għodda effiċjenti għall-użu mill-ġuristi u l-awtoritajiet ġudizzjarji billi jiġu pprovduti pjattaforma u funzjonalitajiet individwali għal skambju effettiv u sigur ta’ informazzjoni, inkluż permezz tan-netwerk e-CODEX.

33.

Ċerti aspetti relatati mal-azzjoni futura huma ta’ natura aktar ġenerali u jkopru setturi differenti fil-qasam tal-Ġustizzja elettronika. L-iżvilupp ta’ proġetti tal-IT fuq skala kbira, bħal e-CODEX, kien ta’ suċċess, u għandhom jiġu żgurati l-integrazzjoni u s-segwitu tar-riżultati tal-proġett e-CODEX fil-Portal tal-Ġustizzja elettronika. (7)

34.

Il-proġetti li għandhom jiġu inklużi fil-Pjan ta’ Azzjoni kif jinsabu fl-Anness ġew maqsuma f’żewġ kategoriji differenti - Il-proġetti “A” u “B” (8):

35.

Il-lista ta’ proġetti “A” għandha l-ewwel prijorità. Dawn huma proġetti li jissodisfaw wieħed mill-kriterji li ġejjin:

36.

Il-Proġetti “B” huma proġetti li ma jaqgħux taħt il-kategorija “A”, iżda li

37.

Matul il-monitoraġġ ta’ segwitu tal-implimentazzjoni ta’ dan il-Pjan ta’ Azzjoni, il-Grupp ta’ Ħidma dwar il-Leġislazzjoni Elettronika (Ġustizzja elettronika) ser jistabbilixxi liema mill-proġetti “B” inklużi taħt il-paragrafu 36 għandhom jiġu implimentati bħala prijorità, filwaqt li jittieħed kont tar-riżorsi umani u finanzjarji disponibbli kif ukoll il-prinċipji ta’ azzjoni kif stabbilit fil-paragrafu 9.

38.

Sabiex jippermetti l-flessibbiltà meħtieġa fl-implimentazzjoni ta’ dan il-Pjan ta’ Azzjoni, il-Grupp ta’ Ħidma dwar il-Leġislazzjoni Elettronika (Ġustizzja elettronika) jista’ jiddeċiedi wkoll li jintroduċi inizjattivi ġodda jew imexxi l-proġetti minn kategorija għal oħra fid-dawl ta’ żviluppi ġodda.

39.

Sabiex jiġi żgurat l-użu konsistenti ta’ teknoloġija tal-informazzjoni u tal-komunikazzjoni moderna fl-implimentazzjoni tal-leġislazzjoni l-ġdida tal-UE fil-qasam tal-ġustizzja, il-Ġustizzja elettronika għandha tiġi integrata fl-istrumenti leġislattivi futuri kollha adottati f’dak il-qasam, mingħajr ma taffettwa l-ambitu tal-Grupp ta’ Ħidma rilevanti tal-Kunsill. Għal dan il-fini, l-istrumenti leġislattivi futuri kollha għandhom jgħaddu minn eżami analitiku qabel l-adozzjoni tagħhom u l-Grupp ta’ Ħidma għandu jkun jista’ jagħti parir, jekk meħtieġ, sabiex jiżgura li dejjem jittieħed kont tal-użu possibbli ta’ sistemi tal-Ġustizzja elettronika.

40.

Il-kooperazzjoni ma’ pajjiżi li mhumiex parti mill-UE fil-qasam tal-Ġustizzja elettronika għandha titkompla, filwaqt li jittieħed kont dovut tar-regoli istituzzjonali stabbiliti fil-livell tal-UE. Il-pajjiżi li mhumiex parti mill-UE għandhom jiġu mħeġġa jadottaw soluzzjonijiet teknoloġiċi u mudelli ta’ informazzjoni komparabbli ma’ dawk użati fl-UE f’dan il-qasam, sabiex jinħoloq ambjent interoperabbli għal kooperazzjoni volontarja fil-futur.

41.

Il-pajjiżi aderenti u stati oħra interessati li mhumiex parti mill-UE jistgħu jiġu involuti wkoll fir-rigward ta’ punti speċifiċi li għandhom jiġu definiti fil-kuntest tal-Ġustizzja elettronika, bħall-vidjokonferenzi u diskussjonijiet fil-kuntest ta’ e-CODEX.

42.

Il-Grupp ta’ Ħidma dwar il-Leġislazzjoni elettronika (Ġustizzja elettronika) għandu jeżamina liema tip ta’ kuntatti għandhom jiġu stabbiliti ma’ pajjiżi speċifiċi li mhumiex parti mill-UE.

43.

Għandha titkompla l-esplorazzjoni ta’ soluzzjoni għall-konsolidazzjoni tar-riżultati tal-implimentazzjoni ta’ dan il-Pjan ta’ Azzjoni, bħar-riżultati tal-proġett e-CODEX. Huwa nnotat ukoll li l-istruttura ġenerali tal-ħidma stabbilita fil-Pjan ta’ Azzjoni pluriennali dwar l-e-Justice Ewropea 2009-2013 (paragrafi 57-63) għandha tapplika fil-kuntest tal-implimentazzjoni ta’ dan it-tieni Pjan ta’ Azzjoni.

44.

Tal-inqas darba darba kull semestru l-Grupp ta’ Ħidma ser iwettaq monitoraġġ tal-implimentazzjoni tal-Pjan ta’ Azzjoni, li għandu jiġi adattat, fejn meħtieġ, fid-dawl ta’ ħtiġijiet u żviluppi fil-ġejjieni. Għandu jiġi kkunsidrat li l-implimentazzjoni tal-azzjonijiet kif stabbiliti fl-Anness ser tinvolvi spiża konsiderevoli u/jew ser iżżid il-piż amministrattiv kemm għall-Istati Membri kif ukoll għall-Kummissjoni. Għaldaqstant għandu jkun hemm prijoritizzazzjoni bir-reqqa tal-proġetti mill-Grupp ta’ Ħidma dwar il-Leġislazzjoni Elettronika (Ġustizzja elettronika).

45.

Il-gruppi informali ta’ Stati Membri involuti fi proġetti speċifiċi jistgħu jiltaqgħu sabiex isir progress f’dawk l-oqsma ta’ ħidma. Id-dettalji tal-organizzazzjoni tal-ħidma ta’ dawn il-gruppi informali huma stabbiliti f’dokument separat.

46.

Il-Kunsill ser jivvaluta l-attivitajiet ta’ implimentazzjoni fl-ewwel nofs tal-2016 u ser jissuġġerixxi azzjoni sabiex jitjieb il-funzjonament tal-Ġustizzja elettronika.

47.

Il-Coreper/Kunsill huwa mistieden japprova dan il-Pjan ta’ Azzjoni fil-laqgħa tiegħu tas-6 ta’ Ġunju 2014.