MEMORANDUM TA’ SPJEGAZZJONI

KUNTEST TAL-PROPOSTA

1.           Ir-regoli li japplikaw għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni (FEG) huma stipulati fir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[1] (Ir-"Regolament tal-FEG").

2.           L-awtoritajiet Finlandiżi ressqu l-applikazzjoni EGF/2014/008 FI/STX Rauma għal kontribuzzjoni finanzjarja mill-FEG, wara sensji minn STX Finland Oy f'Rauma fil-Finlandja.

3.           Il-Kummissjoni kkonfermat li l-informazzjoni pprovduta mill-Istat Membru hija kompluta. Wara l-valutazzjoni tagħha tal-applikazzjoni, il-Kummissjoni kkonkludiet li, skont id-dispożizzjonijiet kollha applikabbli tar-Regolament tal-FEG, il-kundizzjonijiet għall-għoti ta’ kontribuzzjoni finanzjarja mill-FEG huma ssodisfati.

SOMMARJU TAL-APPLIKAZZJONI

Applikazzjoni tal-FEG || EGF/2014/008 FI/STX Rauma

L-Istat Membru || Il-Finlandja

Reġjun/i kkonċernat/i (NUTS livell 2): || Il-Punent tal-Finlandja (FI19)

Data tat-tressiq tal-applikazzjoni || 27.5.2014

Data tal-konferma tal-wasla tal-applikazzjoni || 10.6.2014

Data tat-talba għal informazzjoni addizzjonali || 10.6.2014

Data ta’ skadenza għall-għoti tal-informazzjoni addizzjonali || 22.7.2014

Skadenza għat-tlestija tal-valutazzjoni || 14.10.2014

Kriterju ta' intervent || L-Artikolu 4(1)(a) tar-Regolament tal-FEG

Intrapriża ewlenija || STX Finland Oy f’Rauma

Settur(i) tal-attività ekonomika (Diviżjoni ta’ NACE Rev. 2)[2] || Diviżjoni 30 ("Manifattura ta' tagħmir ieħor għat-trasport")

Għadd ta’ sussidjarji, fornituri u produtturi fl-istadju aħħari tal-produzzjoni || 0

Perjodu ta’ referenza (erba’ xhur): || 7.11.2013 - 7.3.2014

Għadd ta’ sensji jew waqfiet mill-attività matul il-perjodu ta’ referenza (a) || 577

Għadd ta’ sensji jew waqfiet mill-attività qabel u wara l-perjodu ta’ referenza (b) || 57

Għadd totali ta’ sensji (a + b) || 634

Stima tat-total tal-għadd ta’ benefiċjarji fil-mira || 565

Għadd ta’ żgħażagħ barra mill-edukazzjoni, impjieg jew taħriġ (NEETs) li huma fil-mira || 0

Baġit għas-servizzi personalizzati (EUR) || 2 265 000

Baġit għall-implimentazzjoni tal-FEG[3] (EUR) || 113 000

Baġit totali (EUR) || 2 378 000

Kontribuzzjoni tal-FEG (60 %) (EUR) || 1 426 800

VALUTAZZJONI TAL-APPLIKAZZJONI

Proċedura

4.           Fis-27 ta’ Mejju 2014, l-awtoritajiet Finlandiżi ressqu l-applikazzjoni EGF/2014/008 FI/STX Rauma fi żmien 12-il ġimgħa mid-data li fiha l-kriterji ta’ intervent stabbiliti fil-paragrafi minn 7 sa 9 hawn taħt ġew issodisfati. Fl-10 ta’ Ġunju 2014, il-Kummissjoni kkonfermat il-wasla tal-applikazzjoni fi żmien ġimagħtejn mid-data tat-tressiq tal-applikazzjoni, u dakinhar stess talbet informazzjoni addizzjonali mingħand l-awtoritajiet Finlandiżi. Din l-informazzjoni addizzjonali ngħatat fi żmien sitt ġimgħat mid-data tat-talba. Fl-14 ta' Ottubru 2014, jiskadi l-perjodu ta' 12-il ġimgħa mill-wasla tal-applikazzjoni kompluta li fih il-Kummissjoni għandha tiffinalizza l-valutazzjoni tagħha tal-konformità tal-applikazzjoni mal-kundizzjonijiet għall-għoti ta’ kontribuzzjoni finanzjarja.

Eliġibbiltà tal-applikazzjoni

L-impriżi u l-benefiċjarji kkonċernati

5.           L-applikazzjoni tikkonċerna 634 ħaddiem li ngħataw is-sensja minn STX Finland Oy, ħafna minnhom mit-tarzna tagħha li tinsab f’Rauma, iżda xi sensji oħrajn affettwaw ukoll il-faċilità akbar tagħha ta' Turku. STX Finland Oy topera fis-settur ekonomiku kklassifikat skont id-diviżjoni 30 tan-NACE Rev. 2 ("Manifattura ta' tagħmir ieħor għat-trasport"). Is-sensji li saru mill-impriża kkonċernata jinsabu prinċipalment fir-reġjun tan-NUTS[4] il-livell 2 fil-Punent tal-Finlandja (FI19).

Il-kriterji ta’ intervent

6.           L-awtoritajiet Finlandiżi ressqu l-applikazzjoni skont il-kriterju ta’ intervent tal-Artikolu 4(1)(a) tar-Regolament tal-FEG, li jitlob li tal-inqas 500 ħaddiem jingħataw is-sensja jew inkella t-twaqqif tal-attività ta’ persuni li jaħdmu għal rashom, fuq perjodu ta’ referenza ta’ erba’ xhur, f’intrapriża fi Stat Membru, inklużi l-ħaddiema li jingħataw is-sensja mill-fornituri u l-produtturi fl-istadju aħħari tal-produzzjoni tagħha u / jew il-persuni li jaħdmu għal rashom li titwaqqfilhom l-attivtà.

7.           Il-perjodu ta’ referenza ta’ erba’ xhur huwa mis-7 ta’ Novembru 2013 sas-7 ta’ Marzu 2014.

8.           L-applikazzjoni tikkonċerna 577 ħaddiem li ngħataw is-sensja[5] minn STX Finland Oy matul il-perjodu ta’ referenza ta’ erba’ xhur.

Il-kalkolu tas-sensji u tal-waqfien tal-attività

9.           Is-sensji kollha ġew ikkalkulati mid-data tan-notifika individwali tal-impjegatur dwar it-tkeċċija jew it-terminazzjoni tal-kuntratt tal-impjieg tal-ħaddiem.

Benefiċjarji eliġibbli

10.         Minbarra l-577 ħaddiem li diġà ssemmew, il-benefiċjarji eliġibbli jinkludu 57 ħaddiem li ngħataw is-sensja wara l-perjodu ta’ referenza ta’ erba’ xhur. Dawn il-ħaddiema kollha ngħataw is-sensja wara t-tħabbira ġenerali tas-sensji mbassrin fis-16 ta’ Settembru 2013. Tista’ tiġi stabbilita rabta kawżali ċara mal-avveniment li wassal għas-sensji matul il-perjodu ta’ referenza.

11.         L-għadd totali ta’ benefiċjarji eliġibbli huwa ta’ 634.

Rabta bejn is-sensji u l-bidliet strutturali ewlenin fix-xejriet kummerċjali dinjija minħabba l-globalizzazzjoni

12.         Sabiex tiġi stabbilita r-rabta bejn is-sensji u l-bidliet strutturali ewlenin fix-xejriet kummerċjali dinjija minħabba l-globalizzazzjoni, il-Finlandja ssostni li l-industrija marittima globali nbidlet b’mod drammatiku f’dawn l-aħħar snin. Minħabba t-tkabbir esplożiv tal-ktieb tal-ordnijiet fil-perjodu bejn l-2002 u l-2008, inbnew tarzni ġodda, il-parti l-kbira tagħhom fl-Asja. Madankollu, il-kriżi ekonomika u finanzjarja globali kienet tfisser li bejn l-2007 u l-2013 il-ktieb tal-ordnijiet naqas bin-nofs. Bħala riżultat tat-tnaqqis fl-ordnijiet u l-espansjoni sinifikanti tal-Asja fis-suq tal-bini tal-bastimenti, is-settur attwalment qed ibati minn kapaċità żejda globali li qed tirriżulta f'kompetizzjoni ħarxa.

13.         Bħala parti minn din ix-xejra, is-sehem tas-suq tal-UE waqa'. Meta mkejjel skont il-volum ta’ produzzjoni, is-sehem tas-suq tal-UE fil-bini tal-bastimenti fl-ewwel tliet kwarti tal-2013 kien 5 %, li jfisser tnaqqis ta' 13 % mill-2007. Is-sehem ekwivalenti taċ-Ċina, il-Korea t’Isfel u l-Ġappun flimkien kien ta’ 86 % fl-ewwel tliet kwarti tal-2013, filwaqt li fl-2007 dan l-istess sehem kien 77 %.

14.         Fl-2012, l-għadd ta’ bastimenti ġodda ordnati naqas b’20 % mis-sena ta’ qabel għal 24,7 CGT (compensated gross tonnage - tunnellaġġ gross ikkumpensat), li jirrappreżenta nofs il-volum totali tal-produzzjoni. Is-sehem tat-tarzni Ewropej fir-reġistru tal-ordnijiet kien ta’ 7,5 % (imkejjel f’CGT), filwaqt li bejn l-2005 u l-2008, is-sehem Ewropew kien għadu bejn 12% u 14 %. L-akbar sehem mis-suq fl-2012 kien dak taċ-Ċina (34,6 %), it-tieni l-akbar tal-Korea t’Isfel (28,8 %) u t-tielet l-akbar tal-Ġappun (17,8 %). Meta mkejjel skont il-valur tal-kotba tal-ordnijiet, il-mexxej tas-suq issa huwa l-Korea t’Isfel, li rċeviet ordnijiet aktar sinifikanti f’termini ta’ valur u ammont ta’ xogħol mill-kompetituri tagħha.

15.         Meta mkejjel skont il-volum tal-produzzjoni, fl-2012, is-sehem Ewropew mis-suq tal-bini tal-bastimenti kien ta’ 4,6 %. Il-mexxejja tas-suq kienu ċ-Ċina (41,1 %), il-Korea t'Isfel (27,9 %) u l-Ġappun (17,5 %). F’termini tal-ktieb tal-ordnijiet, fl-2012, is-sehem tal-Ewropa kien ta’ 5,8 %. Iċ-Ċina bħala l-mexxejja tas-suq kellha sehem ta’ 35,9 %, il-Korea t’Isfel 30,7 %, u l-Ġappun 14,1 %.[6]

16.         F’bosta pajjiżi Asjatiċi, l-industrija tat-tarznari saret strument tal-ħolqien ta' impjiegi nazzjonali u ta' dħul tal-munita barranija. Hemmhekk l-Istati jappoġġjaw l-industrija tal-bini tal-bastimenti minħabba n-natura globali tagħha u l-impatti fuq l-impjiegi. Għaldaqstant, l-Ewropa, il-post fejn twieldet l-industrija tal-bini tal-bastimenti moderni, tilfet kontra l-pajjiżi Asjatiċi li għandhom spejjeż tax-xogħol aktar baxxi. L-industrija tat-tarzni tradizzjonali mhijiex ibbażata fuq livell għoli ta’ għarfien espert iżda fuq il-kunsinna organizzata ta' xogħol intensiv li torbot ħafna kapital, fejn ix-xogħol intensiv, l-ispejjeż tal-materja prima u l-investimenti fit-tagħmir huma kollha importanti.

17.         Sal-lum, is-settur tal-bini tal-bastimenti f'termini wiesgħa kien is-suġġett ta’ sitt (6) applikazzjonijiet tal-FEG [7], b'waħda minnhom tkun ibbażata fuq il-globalizzazzjoni relatata mal-kummerċ u l-ħamsa l-oħra fuq il-kriżi finanzjarja u ekonomika globali. Tlieta minn dawn il-każijiet huma marbuta ma’ tarzni bħal dawn, filwaqt li t-tlieta l-oħra huma relatati ma’ makkinarju u tagħmir tal-bastimenti.

Avvenimenti li wasslu għas-sensji u l-waqfien tal-attività

18.         Is-sensji huma kkawżati mill-għeluq tat-tarzna STX f’Rauma, b’xi ftit mit-telf ta’ impjiegi li jirriżultaw fit-tarzna ikbar ta' STX f’Turku. Din tal-aħħar għadha miftuħa, iżda nbiegħet (wara li tressqet l-applikazzjoni ta’ Rauma) lil German Meyer Werft u lill-Istat tal-Finlandja.

Il-belt ta’ Rauma ilha magħrufa għall-operazzjonijiet tagħha fil-bini tal-bastimenti mill-1945, meta fil-belt ġew stabbiliti żewġ tarzni. Fl-1992, iż-żewġ tarzni Finlandiżi li kien irnexxielhom isalvaw mill-kriżi tat-tarzni tas-sebgħinijiet u t-tmeninijiet (1970s u 1980s), ingħaqdu biex isiru Finnyards Oy. Fl-1998, it-tarzna ġiet f'idejn ġestjoni Norveġiża u biddlet isimha għal Aker Finnyards, u fl-2009, il-proprjetarji Koreani l-ġodda semmew lill-kumpanija STX Finland Oy.

Fl-elfejnijiet (2000s), it-tarzna ta' Rauma kisbet suċċess billi speċjalizzat f’kunsinni ta’ bastimenti tal-passiġġieri u merkanzija flimkien u bastimenti b'għanijiet speċjali kemm għal klijenti Finlandiżi kif ukoll għal klijenti internazzjonali, inklużi l-Forzi tad-Difiża Finlandiżi, il-Gwardja tal-Fruntiera tal-Finlandja, u anke l-Ministeru tan-Namibja għas-Sajd u r-Riżorsi Marini.

F’Settembru tal-2011, it-tarzna ffirmat ittra ta’ intenzjoni man-Norwegian Eide Marine Semi AS dwar l-armar, it-tlestija u l-kunsinna ta’ żewġ bastimenti tas-servizz għas-setturi taż-żejt u tal-gass.  Il-bastimenti kienu mfassla biex iwettqu diversi kompiti relatati mas-servizz fis-setturi taż-żejt u tal-gass f'kundizzjonijiet diffiċli lil hinn mill-kosta fuq il-blata kontinentali Brażiljana. Il-valur ta’ dan il-kuntratt qabeż it-EUR 300 miljun. Madankollu, it-termini tal-ittra ta’ intenzjoni ma ġewx issodisfati, u għalhekk, id-dħul tat-tarzna ta' Rauma fis-suq Brażiljan ġie mfixkel fl-aħħar minuta.

Fil-bidu tal-2013, il-Grupp STX Korean, li kien is-sid tat-tarzni ta' Turku u ta' Rauma, sab ruħu f’diffikultajiet. F'April 2013, STX Offshore & Shipbuilding, il-kumpanija responsabbli għall-operat tal-bini tal-bastimenti fil-grupp, ikkomunikat mal-kredituri tagħha dwar ftehim volontarju. It-tarzni kollha ta' STX fl-Ewropa, inkluża dik ta' Rauma, tqiegħdu fis-suq f’Mejju tal-2013, iżda ma nstab l-ebda xerrej potenzjali.

Fis-sajf tal-2013, is-sitwazzjoni dehret promettenti għat-tarzna ta' Rauma, meta STX Finland u Scandlines iffirmaw ittra ta’ intenzjoni dwar il-bini ta’ żewġ vapuri tal-karozzi għas-servizz bejn Rostock u Gedser. STX Finland stenniet li din l-ordni ġġib magħha xogħol għal kulħadd fit-tarzna ta' Rauma sal-2015.

Madankollu, f’Settembru 2013 STX Finland b'sorpriża ħabbret li l-operat tat-tarzna ta' Rauma fil-forma attwali tiegħu se jieqaf u li l-kumpanija se tikkonċentra l-operat tagħha f’Turku. Huwa probabbli li din id-deċiżjoni ġiet imqanqla minn problemi fit-taħditiet ma’ Scandlines. Fi Frar 2014, finalment ħarġet l-aħbar li t-taħditiet fit-tul ma’ Scandlines ma kinux produttivi.

Hekk kif it-tarzna għalqet, 700 impjegat ta' STX Finland f’Rauma u xi 70 f’Turku tilfu l-impjieg tagħhom.

L-impatt mistenni tas-sensji fir-rigward tal-ekonomija lokali, reġjonali jew nazzjonali u l-impjiegi

19.         Fl-2013, kien hemm medja ta’ 3 100 persuna bla impjieg f’Rauma, li minnhom aktar minn 900 kienu ħaddiema industrijali. F’Jannar 2014 din iċ-ċifra telgħet għal 3 400. Wara s-sensji ta’ STX, din se tkompli tiżdied bi kważi 700. Minn dawn in-nies, xi 500 se jkunu ħaddiema industrijali.

20.         L-anqas rata ta’ qgħad fir-reġjun kienet ta' 7,1 % u ġiet irreġistrata fl-2008. Fl-2013, ir-rata tal-qgħad kienet ta’ 10,0 %, u f'Jannar tal-2014 din kienet 11,1 %.  Wara li STX tagħlaq, ir-rata tal-qgħad hija mistennija li tiżdied b’aktar minn żewġ (2) punti perċentwali.

21.         L-isfond edukattiv l-aktar komuni ta’ dawk qiegħda fir-reġjun ta' Rauma huwa livell sekondarju (48 %). Is-sehem ta’ dawk b'livell bażiku biss ta’ edukazzjoni huwa kemxejn iżgħar (34 %), filwaqt li 8 % għandhom l-anqas livell jew livell baxx ta’ edukazzjoni terzjarja. 3 % għandhom edukazzjoni terzjarja ta' livell għoli. Is-sensji f’STX se jżidu b’mod sinifikanti s-sehem ta’ dawk b’edukazzjoni ta' livell sekondarju jew livell bażiku biss.

22.         Fost dawk fiż-żona li huma qiegħda, 30 % għandhom 'il fuq minn 55 sena. It-tieni l-akbar grupp huwa dawk li għandhom bejn 45-54 sena b’sehem ta’ 22 %. Is-sehem ta’ persuni qiegħda ta’ età anqas minn 25 sena huwa ta’ 11 %. Dawk li għandhom aktar minn 55 sena huma l-akbar grupp li ngħataw is-sensja minn STX, u jammontaw għal madwar 250 persuna. L-għadd ta’ impjegati li tilfu l-impjieg tagħhom fil-grupp ta’ età bejn 45 u 54 sena se jkun kbir ukoll, jew aktar minn 200 persuna. Minħabba l-età tal-ħaddiema li ngħataw is-sensja, dawn se jsibuha aktar diffiċli biex isibu impjieg ġdid, b’riskju li xi ħaddiema akbar fl-età jirtiraw kmieni.

23.         Il-livell baxx tal-edukazzjoni flimkien mal-età relattivament avvanzata x’aktarx li jżidu r-riskju ta’ qgħad fit-tul. Bejn Jannar 2010 u Mejju 2014, l-għadd ta’ nies qiegħda fit-tul żdied bi 23 %. Matul l-istess perjodu, l-għadd ta’ nies qiegħda fit-tul ta’ età ta’ aktar minn 55 sena żdied bi 42 %. Billi l-akbar gruppi ta’ età li tilfu l-impjieg tagħhom minn STX huma dawk li għandhom aktar minn 55 sena u dawk fl-età bejn 45 u 54 sena, ir-riskju ta’ qgħad fit-tul u l-esklużjoni huwa għoli.

24.         Turku fil-Lbiċ tal-Finlandja ukoll se tiġi affettwata, billi hemmhekk hemm mistennija xi 70 sensja, b’mod partikolari dawk b'ħiliet ta' xogħlijiet ta’ disinn ta’ bastimenti għat-tarzna ta' Rauma.

25.         Bħala riżultat tal-kriżi finanzjarja u ekonomika globali, li fir-reġjun ilha għaddejja erba' snin, ir-rata attwali tal-qgħad fir-reġjun ta’ Turku hija ta’ 12,7 %, jiġifieri 5,5 punti perċentwali ogħla minn dik fil-bidu tal-2008, billi din iż-żieda fil-livell nazzjonali hija 4,0 punti perċentwali. Ir-reġjun ta’ Turku se jkun affettwat ukoll minn theddid ta' sensji fis-setturi tal-kummerċ u s-servizzi.

26.         Il-ktieb tal-ordnijiet ta’ STX Finland f’Turku, li huwa sinifikanti għal industrija tal-baħar, kien vojt fil-ħin tal-applikazzjoni, b’Mein Schiff 3 fil-fażi ta' rinnovar u Mein Schiff 4 fil-fażi tal-kostruzzjoni tal-blokok. Tal-ewwel se jiġi mgħoddi lit-tarzna TUI sas-sajf tal-2014, filwaqt li tal-aħħar se jingħata sar-rebbiegħa tal-2015. Minħabba l-problemi finanzjarji tas-sid, it-tarzna ta' Turku ma rnexxilhiex tattira ordnijiet ġodda. Dan x’aktarx li jinbidel taħt is-sidien il-ġodda, u diġà huma mistennija ordnijiet ġodda.

27.         Il-pożizzjoni ċiklika ġenerali tal-kumpaniji fil-Lbiċ tal-Finlandja b'mod ġenerali hija affettwata mit-termini aktar stretti ta’ finanzjament estern u t-tnaqqis fir-ritmu tal-kummerċ Russu. L-industrija tat-teknoloġija fir-reġjun (b'Nokia bħala l-akbar preżenza fil-passat) tilfet parti mis-sehem nazzjonali.

Benefiċjarji fil-mira u azzjonijiet proposti

Benefiċjarji fil-mira

28.         L-għadd stmat ta’ ħaddiema fil-mira li mistennija jipparteċipaw fil-miżuri huwa 565. It-tqassim tal-ħaddiema fil-mira skont is-sess, iċ-ċittadinanza u l-grupp ta’ età huwa kif ġej:

Kategorija || Għadd ta' benefiċjarji fil-mira

Sess: || Irġiel: || 496 || (87,79 %)

|| Nisa: || 69 || (12,21 %)

Ċittadinanza: || ċittadini tal-UE: || 565 || (100,00 %)

|| ċittadini mhux tal-UE: || 0 || (0,00 %)

Grupp ta’ età: || 15-24 sena: || 7 || (1,24 %)

|| 25-29 sena: || 28 || (4,96 %)

|| 30-54 sena: || 294 || (52,04 %)

|| 55-64 sena: || 234 || (41,42 %)

|| aktar minn 64 sena: || 2 || (0,35 %)

Eliġibbiltà tal-azzjonijiet proposti

29.         Il-Finlandja qed tippjana tliet tipi ta’ miżuri għall-ħaddiema li ngħataw is-sensja u koperti minn din l-applikazzjoni, (i) għajnuna biex jgħaddu għal impjieg ġdid, (ii) għajnuna biex jiftħu n-negozju tagħhom stess, u (iii) l-għoti ta' taħriġ jew edukazzjoni. Il-miżuri kollha li ġejjin jingħaqdu flimkien biex jiffurmaw pakkett ikkoordinat ta’ servizzi personalizzati li għandu l-għan li jintegra lill-ħaddiema li ngħataw is-sensja fl-impjieg mill-ġdid:

30.         Kowċing u miżuri oħra ta’ tħejjija: Il-ħaddiema qiegħda jistgħu jingħataw għajnuna dwar tekniki tat-tiftix għax-xogħol, b’pariri u gwida, żjarat f’fieri tal-impjiegi, għajnuna bl-applikazzjonijiet għall-impjiegi u bis-CVs. Dan is-servizz se jingħata lil gruppi ta’ daqsijiet varji. It-taħriġ se jingħata fuq perjodu bejn ħamsa (5) u 20 jum, skont il-grupp. Tingħata wkoll gwida dettaljata dwar il-karrieri lil gruppi, b’iffukar fuq l-interazzjoni u l-prattika tax-xogħol. Dan l-ikkowċjar jista’ jdum sa 40 jum. Individwi jew gruppi jistgħu jingħataw kowċis tal-impjiegi, li jistgħu jaġixxu bħala "msieħba fit-taħriġ" waqt it-tiftix għall-impjieg u bħala mentors kemm għal min iħaddem kif ukoll għall-impjegati matul l-ewwel perjodi ta’ impjieg ġdid. Jistgħu jingħataw sa 50 siegħa ta’ taħriġ fis-sena lil kull persuna li qed tfittex ix-xogħol.

Il-ħaddiema jistgħu jibbenefikaw ukoll minn firxa ta’ valutazzjonijiet tal-esperti. Dawn, pereżempju, jistgħu jevalwaw il-kapaċità individwali għax-xogħol, inklużi l-aspetti relatati mas-saħħa, il-kompetenza u l-ħiliet vokazzjonali, jew il-ħiliet intraprenditorjali u l-potenzjal tal-ħaddiem.

Dawk li qed ifittxu impjieg jistgħu jingħataw ukoll l-opportunità li jwettqu provi tat-taħriġ, fejn ikunu jistgħu jittestjaw il-kapaċitajiet tagħhom f'diversi oqsma ta’ studju għal perjodu ta’ taħriġ bi prova ta’ madwar 10 ijiem.

31.         Impjiegi u servizzi tan-negozju f’Punt ta’ Servizz: Il-ħaddiema li ngħataw is-sensja għandhom għad-dispożizzjoni Punti ta' Servizz li jieħdu ħsiebhom matul il-fażi tal-implimentazzjoni. Il-Punti ta’ servizz ġew stabbiliti biex jagħtu pariri lill-ħaddiema affettwati mill-bidu nett billi jipprovdulhom servizz ħafna aktar personali u fil-fond minn dak li l-uffiċċju pubbliku tal-impjiegi normalment ikun jista' jipprovdi. Tingħata attenzjoni speċjali biex tiżgura li l-ebda ħaddiem ma jispiċċa qiegħed fit-tul.

32.         Taħriġ u taħriġ mill-ġdid: L-għan tal-miżuri ta’ taħriġ huwa l-akkwist ta’ kwalifika bażika jew vokazzjonali fi ħdan industrija b’rata għolja tal-impjiegi, jew bħala taħriġ kontinwu permezz tat-tisħiħ ta’ kompetenzi eżistenti, jew bħala gwida/taħriġ ta’ tħejjija għas-suq tax-xogħol għal persuni li ma għandhom l-ebda pjan futur għall-karriera. It-taħriġ jitfassal apposta skont il-grupp fil-mira, u l-korsijiet jistgħu jinkludu, pereżempju, l-espansjoni tal-kompetenzi fis-settur tal-ICT; il-ġestjoni tal-kwalità u dik finanzjarja tal-proġetti, u l-iżvilupp ta’ ħiliet tan-negozju. Il-parti l-kbira tat-taħriġ vokazzjonali tas-suq tax-xogħol hija mmirata lejn kwalifika; għal dawk li qed ifittxu xogħol, se tingħata edukazzjoni xierqa marbuta mal-ftugħ ta' negozju.

33.         Promozzjoni u taħriġ dwar l-intraprenditorjat u servizzi esperti: Il-promozzjoni tal-intraprenditorija tibda permezz tat-taħriġ dwar is-suq tax-xogħol għal intraprendituri futuri potenzjali. Barra minn hekk, intraprendituri ġodda jingħataw konsulenza, konsultazzjoni u appoġġ, flimkien ma' għotjiet tal-bidu. Dawk li qed jippjanaw li jibdew negozju jistgħu jippruvaw l-intraprenditorija, pereżempju, permezz ta’ kollokament f’intrapriżi eżistenti. Għotjiet speċifiċi biex jinbdew negozji jistgħu jappoġġaw is-susisstenza ta' intraprendituri ġodda fl-istadji bikrija tal-intraprenditorija. It-tul massimu ta' għotjiet bħal dawn huwa ta' 18-il xahar.

34.         Stħarriġ tal-impriżi: Se jsir stħarriġ dwar l-impjiegi fir-reġjun ta’ Rauma flimkien ma’ negozji u industriji f’Rauma. L-istħarriġ se jagħti tagħrif aġġornat dwar il-ħtiġijiet tal-persunal tal-intrapriżi. Bl-għajnuna tal-informazzjoni miġbura, it-tiftix għall-impjiegi mill-ħaddiema identifikati jkun jista' jitmexxa fid-direzzjoni t-tajba u jsiru pjanijiet u arranġamenti għat-taħriġ meħtieġ. Kull sena se jitwettqu madwar 500 intervista.

35.         Sussidji tal-paga: Dawn jistgħu jkunu disponibbli għal impjegaturi, fis-settur pubbliku jew privat, li jkunu lesti jimpjegaw lill-ħaddiema fil-mira u jiżguraw li dawn jitħallsu salarju raġjonevoli u jingħataw kull appoġġ u taħriġ fuq ix-xogħol li jkun meħtieġ huma u jadattaw irwieħhom għal impjiegi mhux familjari. Il-ħaddiema nfushom tista' tinħarġilhom karta li tagħti sussidju tal-paga lill-impjegatur potenzjali ġdid tagħhom. L-ammont u t-tul ta’ żmien jiġu ffissati skont il-kompetenza u l-ħtiġijiet tal-ħaddiem. Minkejja l-fatt li m’hemmx żmien statutorju minimu, il-Finlandja ssostni wkoll li din il-miżura normalment iddum tliet xhur. Meta l-benefiċjarju jkun żagħżugħ li qed tfittex ix-xogħol, it-tul ta’ żmien jista’ jitnaqqas għal xahar jew għal ġimagħtejn.

36.         Benefiċċji għall-ispejjeż tal-ivjaġġar, l-akkomodazzjoni u l-ġarr: Persuna li qed tfittex ix-xogħol tista’ tingħata benefiċċji għall-ispejjeż tal-ivjaġġar u l-akkomodazzjoni li jsiru minħabba t-tiftix għax-xogħol jew l-ivvjaġġar u għall-ispejjeż tal-akkomodazzjoni li jirriżultaw mill-parteċipazzjoni f’taħriġ immirat lejn il-promozzjoni tal-impjiegi, u kumpens għall-ispejjeż tal-ġarr meta jkun aċċettat impjieg barra ż-żona tal-ivvjaġġar normali (distanza ta’ 43 km). Bl-għajnuna ta’ dawn il-benefiċċji, dawk li tilfu l-impjieg tagħhom se jkunu mħeġġa jfittxu xogħol fuq żona ġeografika wiesgħa.

37.         L-azzjonijiet proposti, deskritti hawnhekk, jikkostitwixxu miżuri attivi fis-suq tax-xogħol fi ħdan l-azzjonijiet eliġibbli stabbiliti fl-Artikolu 7 tar-Regolament tal-FEG. Dawn l-azzjonijiet ma jissostitwixxux miżuri passivi ta’ protezzjoni soċjali.

38.         L-awtoritajiet Finlandiżi pprovdew l-informazzjoni meħtieġa dwar azzjonijiet li huma obbligatorji għall-intrapriża kkonċernata permezz tal-liġi nazzjonali jew skont l-arranġamenti kollettivi. Huma kkonfermaw li l-kontribuzzjoni finanzjarja mill-FEG mhux se tieħu post azzjonijiet bħal dawn.

Baġit stmat

39.         L-ispejjeż totali stmati huma ta’ EUR 2 378 000, li jinkludu nefqa għal servizzi personalizzati ta’ EUR 2 265 000 u nefqa għal attivitajiet preparatorji, ta’ ġestjoni, informazzjoni u pubbliċità, kontroll u rapportar ta’ EUR 113 000.

40.         Il-kontribuzzjoni finanzjarja totali mitluba mill-FEG hija ta’ EUR 1 426 800 (60 % tal-ispejjeż totali).

Azzjonijiet || Għadd stmat ta’ parteċipanti || Spiża stmata għal kull parteċipant (EUR)[8] || Spejjeż totali stmati (EUR) [9]

Servizzi personalizzati (Azzjonijiet skont l-Artikolu 7(1)(a) u (c) tar-Regolament tal-FEG)

Kowċing u miżuri oħra ta’ tħejjija || 405 || 400 || 162 000

Impjiegi u servizzi tan-negozju f’punt ta’ servizz || 550 || 360 || 200 000

Taħriġ u taħriġ mill-ġdid || 208 || 4 900 || 1 016 000

Promozzjoni u taħriġ dwar l-intraprenditorjat u servizzi esperti || 60 || 6 000 || 360 000

Għotja tal-bidu || 30 || 6 000 || 180 000

Stħarriġ tal-impriżi || 550 || 45 || 25 000

Subtotal (a): || – || 1 943 000

(85,78 %)

Benefiċċji u inċentivi (Azzjonijiet skont l-Artikolu 7(1)(b) tar-Regolament tal-FEG)

Sussidju tal-paga || 62 || 5 000 || 310 000

Benefiċċji għall-ispejjeż tal-ivjaġġar, l-akkomodazzjoni u l-ġarr || 80 || 150 || 12 000

Subtotal (b): || — || 322 000

(14,22 %)

Azzjonijiet skont l-Artikolu 7(4) tar-Regolament tal-FEG

1. Attivitajiet ta' tħejjija || — || 2 500

2. Ġestjoni || — || 73 000

3. Informazzjoni u pubbliċità || — || 25 000

4. Kontroll u rrapportar || — || 12 500

Subtotal (c): || — || 113 000

(4,75 %)

Spejjeż totali (a + b + c): || — || 2 378 000

Kontribuzzjoni tal-FEG (60 % tal-ispejjeż totali) || — || 1 426 800

41.         L-ispejjeż tal-azzjonijiet identifikati fit-tabella ta’ hawn fuq bħala azzjonijiet skont l-Artikolu 7(1)(b) tar-Regolament tal-FEG ma jaqbżux il-35 % tal-ispejjeż totali tal-pakkett ikkoordinat ta’ servizzi personalizzati. L-awtoritajiet Finlandiżi kkonfermaw li dawn l-azzjonijiet jiddependu mill-parteċipazzjoni attiva tal-benefiċjarji fil-mira fl-attivitajiet ta’ tiftix ta’ impjieg jew taħriġ.

42.         L-awtoritajiet Finlandiżi kkonfermaw li l-ispejjeż tal-investimenti għall-ħaddiema indipendenti u l-ftuħ ta’ negozji mhumiex se jaqbżu l-EUR 15 000 għal kull benefiċjarju.

Perjodu ta’ eliġibbiltà tan-nefqa

43.         L-awtoritajiet Finlandiżi bdew jipprovdu s-servizzi personalizzati lill-benefiċjarji fil-mira fil-15 ta’ Jannar 2014. Għaldaqstant, in-nefqa fuq l-azzjonijiet imsemmija fil-punti minn 29 sa 37 għandha tkun eliġibbli għal kontribuzzjoni finanzjarja mill-FEG mill-15 ta’ Jannar 2014 sas-27 ta’ Mejju 2016.

44.         L-awtoritajiet Finlandiżi bdew iġarrbu n-nefqa amministrattiva sabiex jimplimentaw il-FEG fil-15 ta’ Jannar 2014. Għalhekk, in-nefqa għal attivitajiet preparatorji, ta’ ġestjoni, informazzjoni u pubbliċità, kontroll u rapportar għandha tkun eliġibbli għal kontribuzzjoni finanzjarja mill-FEG mill-15 ta’ Jannar 2014 sas-27 ta’ Novembru 2016.

Komplimentarjetà ma’ azzjonijiet iffinanzjati minn fondi nazzjonali jew tal-Unjoni

45.         Il-kofinanzjament nazzjonali meħtieġ se jiġi primarjament mil-linja tas-servizzi pubbliċi tal-impjiegi fil-fergħa amministrattiva tal-Ministeru tal-Impjiegi u l-Ekonomija. Xi servizzi se jkunu kofinanzjati mill-ispejjeż operazzjonali taċ-Ċentri għall-Iżvilupp Ekonomiku, it-Trasport u l-Ambjent u l-Uffiċċji għall-Iżvilupp Ekonomiku u tal-Impjiegi. Kompiti ta’ appoġġ tekniku se jkunu kofinanzjati mill-ispejjeż operazzjonali tal-Ministeru tal-Impjiegi u l-Ekonomija u ċ-Ċentri għall-Iżvilupp Ekonomiku, it-Trasport u l-Ekonomija. Se jsir ukoll sforz biex jingħata finanzjament nazzjonali minn qabel għall-azzjonijiet u l-kompiti kollha, biex jippermetti li jitnedew attivitajiet dwar l-appoġġ tal-FEG kemm jista' jkun malajr u b'mod effiċjenti sakemm tkun mistennija l-kontribuzzjoni mitluba tal-FEG.

46.         Qed jitħejja pakkett ta’ miżuri nazzjonali bit-titolu "Mudelli bejn il-kumpanija li qed tirrekluta u l-kumpanija li qed tnaqqas in-nies" fi ħdan il-perjodu ta’ programmazzjoni l-ġdid tal-FSE. L-għan ta’ dan is-sett ta' miżuri huwa li jissupplimentaw u jiżviluppaw attivitajiet relatati ma’ bidliet strutturali nazzjonali u s-sigurtà fi żmien ta' bidla. L-għan ċentrali tal-koordinazzjoni nazzjonali huwa li tiżdied l-effikaċja u l-effiċjenza u biex tiġi evitata d-duplikazzjoni filwaqt li jitqiesu kemm l-attività reġjonali tal-FSE kif ukoll l-esperjenzi mill-perjodi ta’ programmazzjoni preċedenti. Hija maħsuba, fost affarijiet oħra, biex twassal għall-iżvilupp konġunt ta’ prodotti, biex jiġu identifikati prattiki tajba u ħżiena, biex tittejjeb il-komunikazzjoni u biex ir-riżultati tajba tal-proġetti jibqgħu fit-tul. L-Awtorità tal-Ġestjoni tal-FEG se tkun qed issegwi din l-attività bil-għan li tagħmel użu tajjeb minnha fl-applikazzjonijiet futuri tal-FEG.

47.         L-awtoritajiet Finlandiżi kkonfermaw li l-miżuri deskritti hawn fuq li jirċievu kontribuzzjoni finanzjarja mill-FEG mhumiex se jirċievu wkoll kontribuzzjonijiet finanzjarji minn strumenti finanzjarji oħra tal-Unjoni u taw deskrizzjoni tas-sistemi użati għal dan il-għan.

Proċeduri għall-konsultazzjoni tal-benefiċjarji fil-mira jew ir-rappreżentanti tagħhom jew l-imsieħba soċjali kif ukoll l-awtoritajiet lokali u reġjonali

48.         L-awtoritajiet Finlandiżi indikaw li l-pakkett ikkoordinat ta’ servizzi personalizzati tfassal b’konsultazzjoni mar-rappreżentanti tal-imsieħba soċjali kkonċernati kif ukoll ma' partijiet ikkonċernati oħra.

49.         Il-konsultazzjoni saret u se tkompli f’forma ta’ grupp ta’ ħidma msejjaħ mill-Ministeru tal-Impjiegi u l-Ekonomija speċifikament biex jindirizza s-sensji ta’ STX Finland. Il-Grupp ta’ Ħidma għandu rappreżentanti miċ-Ċentru għall-Iżvilupp Ekonomiku, it-Trasport u l-Ambjent għal Satakunta, miċ-Ċentru għall-Iżvilupp Ekonomiku, it-Trasport u l-Ambjent għal-Lbiċ tal-Finlandja, mill-Uffiċċju għall-Iżvilupp Ekonomiku u l-Impjiegi għal Satakunta, mill-belt ta’ Rauma, u mill-imsieħba soċjali, il-Kunsill tal-Unjins Industrijali Finlandiżi (inklużi Trade Union Pro, l-Unjin tal-Ħaddiema Finlandiżi tal-Metall u l-Akkademja tal-Inġiniera u l-Arkitetti tal-Finlandja/il-Federazzjoni tal-persunal Professjonali u Maniġerjali tal-YTN, l-Unjoni tal-Inġiniera Professjonali tal-Finlandja) u l-Federazzjoni tat-Teknoloġija Finlandiża tal-Finlandja, kif ukoll rappreżentanti ta' STX Finland.

Sistemi ta’ ġestjoni u kontroll

50.         L-applikazzjoni tinkludi deskrizzjoni tas-sistema ta’ ġestjoni u kontroll, li tispeċifika r-responsabbiltajiet tal-korpi involuti. Il-Finlandja nnotifikat lill-Kummissjoni li l-kontribuzzjoni finanzjarja se tkun ġestita mill-Ministeru tal-Impjiegi u l-Ekonomija, li jieħu ħsieb ukoll il-fondi tal-FSE. L-istess Ministeru jaġixxi bħala l-Awtorità taċ-Ċertifikazzjoni. Hemm separazzjoni stretta tad-dmirijiet u tar-relazzjonijiet ta' rappurtar bejn id-dipartimenti responsabbli għal dawn iż-żewġ funzjonijiet. Il-funzjonijiet ta’ ġestjoni tal-FEG ġew assenjati lid-Dipartiment tal-Impjiegi u tal-Intraprenditorija, filwaqt li dawk tal-FSE ngħataw lid-Dipartiment Reġjonali. Il-funzjonijiet ta’ ċertifikazzjoni għaż-żewġ Fondi huma f'idejn l-Unità tar-Riżorsi Umani u tal-Amministrazzjoni. Il-Ministeru ħejja manwal li jiddeskrivi fid-dettall il-proċeduri li għandhom jiġu segwiti.

51.         Fir-rigward tal-verifika, il-korp responsabbli huwa l-Unità tal-Verifika Interna indipendenti, li jopera taħt is-Segretarju Permanenti. Il-funzjonijiet relatati mal-monitoraġġ u l-awditjar huma inklużi wkoll fil-firxa ta’ funzjonijiet tal-awtoritajiet tal-ġestjoni u taċ-ċertifikazzjoni.

Impenji pprovduti mill-Istat Membru kkonċernat

52.         L-awtoritajiet Finlandiżi pprovdew l-assigurazzjonijiet meħtieġa kollha dwar dan li ġej:

– il-prinċipji ta’ ugwaljanza tat-trattament u n-nondiskriminazzjoni se jiġu rrispettati fl-aċċess għall-azzjonijiet proposti u l-implimentazzjoni tagħhom;

– inżammet konformità mar-rekwiżiti stabbiliti fil-leġiżlazzjoni nazzjonali u tal-UE dwar sensji kollettivi;

– l-intrapriża li tat is-sensji kompliet għaddejja bl-attivitajiet tagħha wara li tat is-sensji; hija kkonformat mal-obbligi legali tagħha li jirregolaw is-sensji u pprovdiet għall-ħaddiema tagħha kif xieraq;

– l-azzjonijiet proposti jipprovdu appoġġ għal ħaddiema individwali u ma għandhomx jintużaw għal kumpaniji jew setturi li qegħdin jiġu ristrutturati;

– l-azzjonijiet proposti mhumiex se jirċievu appoġġ finanzjarju minn fondi jew strumenti finanzjarji oħrajn tal-Unjoni u se jiġi evitat kwalunkwe finanzjament doppju;

– l-azzjonijiet proposti se jkunu kumplimentari ma’ azzjonijiet iffinanzjati mill-Fondi Strutturali;

– il-kontribuzzjoni finanzjarja mill-FEG se tikkonforma mar-regoli proċedurali u materjali tal-Unjoni dwar l-għajnuna mill-Istat.

IMPLIKAZZJONI BAĠITARJA

Proposta baġitarja

53.         Il-FEG ma għandux jaqbeż l-ammont annwali massimu ta’ EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020[10].

54.         Wara li eżaminat l-applikazzjoni fir-rigward tal-kundizzjonijiet stabbiliti fl-Artikolu 13(1) tar-Regolament tal-FEG, u wara li qieset l-għadd ta’ benefiċjarji fil-mira, l-azzjonijiet proposti u l-ispejjeż stmati, il-Kummissjoni tipproponi li jiġi mobilizzat il-FEG għall-ammont ta’ EUR 1 426 800, li jirrappreżenta 60 % tal-ispejjeż totali tal-azzjonijiet proposti, sabiex tiġi pprovduta kontribuzzjoni finanzjarja għall-applikazzjoni.

55.         Id-deċiżjoni proposta, biex jiġi mobilizzat il-FEG, se tittieħed b’mod konġunt mill-Parlament Ewropew u mill-Kunsill, kif stipulat fil-punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba[11].

Atti relatati

56.         Filwaqt li tippreżenta din il-proposta għal deċiżjoni biex jiġi mmobilizzat il-FEG, il-Kummissjoni se tippreżenta proposta lill-Parlament Ewropew u lill-Kunsill għal trasferiment tal-ammont ta’ EUR 1 426 800 fl-intestatura baġitarja rilevanti.

57.         Filwaqt li tadotta din il-proposta għal deċiżjoni biex jiġi mobilizzat il-FEG, il-Kummissjoni se tadotta deċiżjoni fuq kontribuzzjoni finanzjarja, permezz ta’ att ta’ implimentazzjoni, li se tidħol fis-seħħ fid-data li fiha l-Parlament Ewropew u l-Kunsill jadottaw id-deċiżjoni proposta biex jiġi mobilizzat il-FEG.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta’ Aġġustament għall-Globalizzazzjoni, skont il-Punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, dwar kooperazzjoni f’materji ta' baġit u dwar ġestjoni finanzjarja tajba (applikazzjoni EGF/2014/008 FI/STX Rauma)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw ir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[12], u b’mod partikolari l-Artikolu 15(4) tiegħu,

Wara li kkunsidraw il-proposta tal-Kummissjoni Ewropea,

Filwaqt li jaġixxu skont il-proċedura stabbilita fil-punt 13 tal-Ftehim Interistituzzjonali tat-2 ta' Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, il-kooperazzjoni fi kwistjonijiet baġitarji u ġestjoni finanzjarja tajba[13],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) ġie stabbilit biex jipprovdi appoġġ lil ħaddiema li jingħataw is-sensja u persuni li jaħdmu għal rashom li l-attività tagħhom waqfet minħabba bidliet strutturali kbar fix-xejriet tal-kummerċ dinji minħabba l-globalizzazzjoni, minħabba ssoktar tal-kriżi finanzjarja u ekonomika globali indirizzata fir-Regolament (KE) Nru 546/2009[14], jew minħabba kriżi finanzjarja u ekonomika globali ġdida u biex jassistihom fir-riintegrazzjoni tagħhom fis-suq tax-xogħol.

(2)       Il-FEG ma għandux jaqbeż l-ammont massimu annwali ta' EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 li jistabbilixxi l-qafas finanzjarju pluriennali għas-snin 2014-2020[15].

(3)       Il-Finlandja ressqet applikazzjoni għall-mobilizzazzjoni tal-FEG, fir-rigward tas-sensji[16] f’STX Finland Oy f'Rauma fil-Finlandja, fis-27 ta’ Mejju 2014 u ssupplimentatha b’informazzjoni addizzjonali kif stipulat fl-Artikolu 8.3 tar-Regolament (UE) Nru 1309/2013. Din l-applikazzjoni tikkonforma mar-rekwiżiti għad-determinazzjoni ta’ kontribuzzjoni finanzjarja mill-FEG kif stabbilit fl-Artikolu 13 tar-Regolament (UE) Nru 1309/2013.

(4)       Għaldaqstant, il-FEG għandu jiġi mmobilizzat sabiex tingħata kontribuzzjoni finanzjarja li tammonta għal EUR 1 426 800 għall-applikazzjoni sottomessa mill-Finlandja,

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2014, il-FEG għandu jiġi mmobilizzat biex jipprovdi s-somma ta’ EUR 1 426 800 f’approprjazzjonijiet ta’ impenn u ta’ pagament.

Artikolu 2

Din id-Deċiżjoni għandha tiġi ppubblikata f'Il-Ġurnal Uffiċjali tal-Unjoni Ewropea.

Magħmul fi Brussell,

Għall-Parlament Ewropew                            Għall-Kunsill

Il-President                                                    Il-President

[1]               ĠU L 347, 20.12.2013, p. 855.

[2]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi l-klassifikazzjoni tal-istatistika ta' attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[3]               Skont ir-raba' paragrafu tal-Artikolu 7 tar-Regolament (UE) Nru 1309/2013.

[4]               Ir-Regolament tal-Kummissjoni (UE) Nru 1046/2012 tat-8 ta’ Novembru 2012 li jimplimenta r-Regolament (KE) Nru 1059/2003 tal-Parlament Ewropew u tal-Kunsill dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS), fejn tidħol it-trażmissjoni tas-serje kronoloġika għat-tqassim reġjonali l-ġdid (ĠU L 310, 9.11.2012, p. 34).

[5]               Skont it-tifsira tal-Artikolu 3(a) tar-Regolament tal-FEG.

[6]               Sors : Sea Europe Market Monitoring 1-3Q/2013

[7]               Dawn huma: EGF/2010/001 DK/Nordjylland COM(2010)451; EGF/2010/006 PL/Cegielski-Poznan COM(2010)631; EGF/2010/025 DK/Odense Steel Shipyard COM(2011)251; EGF/2011/008 DK/Odense Steel Shipyard COM(2012)272; EGF/2011/019 ES/Galicia Metal COM(2012)451, u l-każ preżenti EGF/2014/008 FI/STX Rauma.

[8]               Biex jiġu evitati d-deċimali, l-ispejjeż stmati għal kull ħaddiem ġew imqarrba sal-eqreb żero. Madankollu t-tqarrib ma għandu l-ebda impatt fuq l-ispiża totali ta’ kull miżura li tibqa' l-istess bħal fl-applikazzjoni mressqa mill-Finlandja.

[9]               It-totali ma jaqblux minħabba t-tqarrib taċ-ċifri.

[10]             ĠU L 347, 20.12.2013, p. 884.

[11]             ĠU C 373, 20.12.2013, p. 1.

[12]             ĠU L 347, 20.12.2013, p. 855.

[13]             ĠU C 373, 20.12.2013, p. 1.

[14]             ĠU L 167, 29.6.2009, p.26.

[15]             ĠU L 347, 20.12.2013, p. 884.

[16]             Skont it-tifsira tal-Artikolu 3(a) tar-Regolament tal-FEG.