MEMORANDUM TA’ SPJEGAZZJONI

1.           Introduzzjoni

Fit-28 ta’ Settembru 2012, in-New Zealand applika biex jaderixxi mal-Ftehim tad-WTO dwar l-Akkwisti Pubbliċi (“il-GPA”). In-New Zealand indika l-intenzjoni tiegħu li jlesti l-adeżjoni tiegħu b’referenza għat-test emendat tal-GPA (it-test ġie adottat mill-Partijiet fit-30 ta’ Marzu 2012 u konkluż mill-UE permezz ta’ deċiżjoni tal-Kunsill tat-3.12.2013[1]). Il-GPA, kif emendat, daħal fis-seħħ għall-Unjoni fis-6 ta’ April 2014.

Il-Kummissjoni, f’isem l-Unjoni, innegozjat serje ta’ impenji għall-ftuħ tas-suq kif ippreżentat min-New Zealand kemm f’format bilaterali u fi ħdan il-Kumitat dwar l-Akkwisti Pubbliċi ("il-Kumitat tal-GPA").

In-New Zealand sussegwentement ippreżenta offerta finali fil-21 ta’ Lulju 2014. Sommarju finali tal-offerta tan-New Zealand u l-valutazzjoni tal-Kummissjoni tagħha huma stabbiliti hawn taħt.

 2.           Sommarju tat-termini ta’ adeżjoni tan-New Zealand mal-GPA

L-offerta finali tan-New Zealand

Impenji għall-aċċess għas-suq (entitajiet koperti, prodotti, servizzi u servizzi tal-kostruzzjoni)

Entitajiet

L-entitajiet governattivi tan-New Zealand; fil-livell tal-gvern ċentrali hemm continuum ta’ entitajiet li jeżerċitaw gradi differenti ta’ awtorità pubblika. Dawn huma d-dipartmenti standard, immexxijja mill-Ministri, u kif ukoll diversi forom ta’ “Entitajiet tal-Kuruna”, kategorija li tindika tipi differenti ta’ entitajiet li joperaw bħala strumenti tal-Kuruna għall-Gvern u li jwettqu diversi funzjonijiet pubbliċi bħal fl-oqsma tas-saħħa, l-edukazzjoni, it-turiżmu, l-akkomodazzjoni soċjali. Fit-tarf l-ieħor tal-ispettru hemm l-Impriżi li huma Propjetà tal-Istat (“IPS”), li huma Kumpaniji jew korporazzjonijiet b’responsabbiltà limitata li joperaw bħala negozji kummerċjali.

Fl-Anness 1 (“Entitajiet ċentrali”) l-offerta ta' New Zealand tinkludi l-ministeri u d-dipartimenti tal-gvern ċentrali. F’nota in-New Zealand qabel li jispeċifika li l-entitajiet subordinati għal dawk stipulati fl-Anness 1 huma koperti wkoll.

Fl-Anness 2 (“entitajiet subċentrali”) in-New Zealand jinkludi l-biċċa l-kbira tal-Bordijiet Distrettwali tas-Saħħa, li huma Entitajiet tal-Kuruna responsabbli għall-provvediment jew għall-finanzjament tal-provvista ta’ servizzi tas-saħħa f’distretti territorjali tagħhom u l-entitajiet li jakkwistaw għalihom. Barra minn hekk, in-New Zealand aċċetta li joffri kopertura tal-kunsilli tal-akbar bliet, il-Kunsill tal-Belt ta’ Auckland, il-Kunsill tal-Belt ta' Wellington u il-Kunsill tal-Belt ta' Christchurch kif ukoll dawk il-Kunsilli reġjonali li jaqbżu l-250 000 abitant. Ikun hemm kopertura għal “għotjiet vertikali” (dan jirreferi għall-fatt li aġenziji ċentrali meta joħorġu għotjiet jistgħu jeħtieġu li l-benefiċjarji jsegwu rekwiżiti tal-akkwist "vertikali"). Kopertura ta’ kunsilli tal-ibliet u kunsilli reġjonali hija prevista fir-rigward ta’ akkwist ta’ prodotti, servizzi u servizzi tal-kostruzzjoni relatati ma' proġetti tat-trasport iffinanzjati kompletament jew parzjalment milll-Aġenzija tat-Trasport tan-New Zealand fejn il-valur totali tal-proġett jeċċedi l-limiti applikabbli rilevanti għal prodotti, servizzi u servizzi tal-kostruzzjoni. 

Fl-Anness 3 (“entitajiet oħra”), in-New Zealand jinkludi 14 l-Entitajiet tal-Kuruna li joperaw f’diversi oqsma inkluż it-turiżmu, l-avjazzjoni, l-edukazzjoni u t-trasport. Barra minn hekk, in-New Zealand qabel li joffri wkoll erba’ SOEs li joperaw fis-setturi tal-utilitajiet tal-linji tal-ajru, servizzi meteoroloġiċi, il-ferroviji, u l-elettriku (Airways Corporation of New Zealand Limited, Meteorological Service of New Zealand Limited, KiwiRail Holdings Limited and Transpower New Zealand Limited). Dawn huma l-SOEs li ġew identifikati li joperaw f’sitwazzjoni monopolistika.

Oġġetti

In-New Zealand ikkommetta ruħu li jkopri l-akkwist tal-oġġetti kollha mill-entitajiet koperti.

Is-Servizzi

In-New Zealand joffri kopertura komprensiva ħafna ta’ servizzi, jiġifieri s-servizzi kollha minn entitajiet koperti, b’xi esklużjonijiet speċifiċi ħafna (għar-riċerka u l-iżvilupp, servizzi tas-saħħa pubblika, is-servizzi tal-edukazzjoni u s-servizzi soċjali).

Servizzi ta’ kostruzzjoni

In-New Zealand joffri s-servizzi kollha ta’ kostruzzjoni fid-Diviżjoni 51 tal-Klassifikazzjoni Ċentrali tal-Prodott, kif huma komunement offruti mill-Partijiet tal-GPA kollha.

Limiti Stabbiliti

In-New Zealand japplika limiti li huma komunament applikati minn Partijiet tal-GPA għal oġġetti, servizzi u servizzi tal-kostruzzjoni.

Il-leġiżlazzjoni tan-New Zealand

Il-Qafas tal-Akkwist Pubbliku tan-New Zealand huwa nondiskriminatorju.  Ma hemm l-ebda dispożizzjonijiet li jagħtu lill-provvisti u lill-fornituri domestiċi trattament iktar favorevoli minn dak mogħti lil fornituri jew provvisti barranin. Il-leġiżlazzjoni tan-New Zealand dwar l-akkwist pubbliku tidher li hi miftuħa, trasparenti u nondiskriminatorja f'konformità ma’ rekwiżiti tal-GPA.

Il-valutazzjoni tal-Kummissjoni tal-Offerta tan-New Zealand

In-New Zealand jiftaħ is-suq tal-akkwist tiegħu b’mod wiesa’ għall-Partijiet tal-GPA kollha fid-dawl li għandha offerta komprensiva ħafna fir-rifward ta’ entitajiet, prodotti u servizzi, u servizzi ta’ kostruzzjoni u leġiżlazzjoni mhux diskriminatorja. Barra minn hekk, in-New Zealand ma jagħmilx xi restrizzjoni partikolari kontra kwalunkwe Parti tal-GPA. Madankollu, meta wieħed iqis li l-kopertura tan-New Zealand, għalkemm sinifikanti, mhix kompluta, ikun xieraq li jiġu introdotti ċerti restrizzjonijiet speċifiċi jew limiti għall-aċċess għas-suq tal-akkwist tal-Unjoni fir-rigward tan-New Zealand kif għamlet l-UE fl-imgħoddi għall-Partijiet tal-GPA li joffru biss kopertura parzjali.

Ir-restrizzjonijiet speċifiċi, li jkunu parti mill-patti tal-adeżjoni għall-GPA għan-New Zealand li għandu jkun adottat mill-Kumitat tal-GPA, huma dawn li ġejjin:

· Anness 1, Taqsima 2 (L-awtoritajiet kontraenti tal-Gvern Ċentrali tal-Istati Membri tal-UE), il-punt 3:

In-New Zealand se jiżdied mal-lista ta’ Partijiet tal-GPA li jkollhom aċċess għall-akkwisti ta’ inqas awtoritajiet kontraenti fil-livell tal-gvern ċentrali mill-bqija tal-isħab fil-GPA.

· L-Anness 2, Noti mal-Anness 2, Nota 1:

L-UE mhux se toffri lin-New Zealand l-akkwist minn awtoritajiet kontraenti lokali (unitajiet amministrattivi taħt NUTS 3 fir- Regolament (KE) Nru 1059/2003)[2] --kif emendat- u l-unitajiet amministrattivi iżgħar). Unitajiet amministrattivi taħt NUTS 1 u NUTS 2 fir-Regolament 1059/2003, akkwist mill-awtoritajiet kontraenti ta’ unitajiet amministrattivi taħt NUTS 1 u 2 mhux se jkun offrut lin-New Zealand, sakemm l-akkwist tagħhom għal proġetti tat-trasport urban ma jkunx kopert fl-Anness 3 tal-Iskeda tal-UE tal-GPA. Huwa biss l-akkwist ta’ unitajiet amministrattivi elenkati taħt NUTS 1 u NUTS 2 li joperaw fil-qasam tat-trasport urban li se jkunu offruti lin-New Zealand, fl-Anness 3 (b’mod partikolari l-attività “il-forniment jew it-tħaddim ta’ netwerks li jipprovdu servizz lil pubbliku fil-qasam tat-trasport bil-ferrovija urbana, sistemi aawtomati, bit-tramvija, trolley bus, karozza tal-linja jew kejbil” msemmija fil-punt e) tal-Anness 3 tal-iskeda tal-GPA tal-UE).

· L-Anness 3, Noti mal-Anness 3, Nota 6:

Kopertura iktar limitata se tkun offruta lin-New Zealand għal entitajiet subċentrali; huwa biss l-akkwist tal-unitajiet amministrattivi elenkati taħt NUTS 1 u NUTS 2 b’rabta mat-trasport urban (b’mod partikolari l-attività msemmija fil-punt e) tal-Anness 3 tal-iskeda tal-GPA tal-UE) li se jkun offrut lil New Zealand. Barra minn hekk, l-UE mhux se toffri lin-New Zealand l-akkwist minn entitajiet li joperaw fis-setturi tas-servizzi: ilma tajjeb għax-xorb; Fil-qasam tal-portijiet marittimi jew dawk interni jew faċilitajiet ta’ terminal oħra; u fil-qasam tal-provvediment ta’ ajruport jew faċilitajiet ta’ terminal oħra lit-trasportaturi bl-ajru.

F’każ li xi Parti oħra għall-GPA tinkludi limiti speċifiċi tgħall-kopertura tagħhom fir-rigward tan-New Zealand, dan għandu jkun rifless ukoll fil-Kumitat tal-GPA dwar il-patti ta’ adeżjoni ta' New Zealand. Madankollu, għandu jiġi nnutat li kwalunkwe tali restrizzjonijiet jew limiti mill-kopertura minn Parti għall-GPA li huma speċifiċi għan-New Zealand ma taffettwax l-offerta finali tan-New Zealand kif deskritta hawn fuq, u lanqas ir-riżervi speċifiċi tal-UE proposti, jew il-kopertura reċiproka miftehma bejn il-Partijiet tal-GPA attwali.

3. L-ELEMENTI LEGALI TAL-PROPOSTA

Il-GPA rivedut jinkludi dispożizzjoni dwar l-adeżjoni. L-Artikolu XXII(2) tal-GPA jipprovdi li kull Membru tad-WTO jista’ jissieħeb mal-GPA fuq patti li jridu jiġu miftehma bejn dak l-Istat u l-Partijiet, b’tali patti ddikjarat f’deċiżjoni tal-Kumitat tal-GPA. 

Il-patti ta’ adeżjoni tan-New Zealand se jiġu stipulati f’Deċiżjoni tal-kumitat tal-GPA li hija mistennija li tiġi adottata fit-tieni nofs tal-2014. Din id-Deċiżjoni se tinkludi l-offerta fianli tan-New Zealand għal aċċess tas-suq tagħha tal-akkwisti pubbliċi (li se jsir parti mill-Appendiċi I tal-GPA fuq l-adeżjoni tan-New Zealand), kif ukoll kwalunkwe patti speċifiċi ta’ adeżjoni mitluba minn Partijiet oħra tal-GPA. Id-Deċiżjoni ser tkun adottata b’kunsens fil-Kumitat tal-GPA.

L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jistipula li meta deċiżjoni li għandha effett legali teħtieġ li tittieħed f’korp imwaqqaf minn ftehim internazzjonali, il-Kunsill, fuq proposta tal-Kummissjoni, għandu jadotta d-Deċiżjoni li tistabbilixxi l-pożizzjoni li għandha tiġi adottata f’isem l-Unjoni. Id-deċiżjoni tal-Kumitat tal-GPA li se titsabbilixxi l-patti tal-adeżjoni tan-New Zealand taqa' fl-Artikolu 218(9) TFUE minħabba li d-deċiżjoni hi meħuda f'korp imwaqqaf minn ftehim internazzjonali u se jkollha effetti legali.

4. RAKKOMANDAZZJONI

L-adeżjoni tan-New Zealand fil-GPA hija mistennija tagħmel kontribut pożittiv ħafna lejn aktar ftuħ tas-swieq tal-akkwist pubbliku internazzjonali, billi jitkabbar in-numru ta’ partijiet għall-GPA u b’hekk tinkoraġġixxi pajjiżi oħra biex jissieħbu fil-GPA. Il-Kummissjoni tirrakkomanda li l-offerta min-New Zealand hija aċċettata suġġetta għar-restrizzjonijiet imsemmija hawn fuq il-kopertura tal-Unjoni fir-rigward tan-New Zealand.

Għaldaqstant, huwa propost li l-Kummissjoni għandha tkun awtorizzata li fil-Kumitat dwar l-Akkwisti Pubbliċi tesprimi l-pożizzjoni tal-Unjoni favur l-adeżjoni tan-New Zealand soġġetta għar-restrizzjonijiet msemmija hawn fuq, li għandhom ikunu riflessi fid-deċiżjoni tal-Kumitat tal-GPA dwar l-adeżjoni tan-New Zealand.

2014/0264 (NLE)

Proposta għal

DEĊIŻJONI TAL-KUNSILL

li tistabbilixxi l-pożizzjoni li għandha tittieħed f’isem l-Unjoni Ewropea fil-Kumitat dwar l-Akkwisti Pubbliċi dwar l-adeżjoni tan-New Zealand mal-Ftehim dwar l-Akkwisti Pubbliċi

IL-KUNSILL TA' L-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4), flimkien mal-Artikolu 218(9) tiegħu,

Wara li kkunsidra l-proposta mill-Kummissjoni Ewropea,

Billi:

(1)       Fit-28 ta’ Settembru 2012, in-New Zealand applika għall-adeżjoni mal-Ftehim dwar l-Akkwisti Pubbliċi (“il-GPA”).

(2)       L-impenji tan-New Zealand dwar il-kopertura huma stabbiliti fl-offerta finali tagħha, kif imressqa quddiem il-Partijiet għall-GPA fil-21 ta’ Lulju 2014.

(3)       Għalkemm komprensiva, l-offerta min-New Zealand ma tipprovdix kopertura sħiħa. Għalhekk huwa xieraq li jiġu introdotti ċerti konċessjonijiet speċifiċi għan-New Zealand għall-kopertura tal-Unjoni. Dawn il-limiti speċifiċi, kif rifless fl-Anness għal din id-Deċiżjoni, isiru parti mill-patti ta’ adeżjoni mal-GPA għan-New Zealand u jkunu riflessi fid-deċiżjoni adottata mill-Kumitat dwar l-Akkwisti Pubbliċi (“il-Kumitat tal-GPA”) dwar l-adeżjoni tan-New Zealand.

(4)       L-adeżjoni tan-New Zealand mal-GPA hija mistennija tagħmel kontribut pożittiv għal aktar ftuħ tas-swieq tal-akkwisti pubbliċi internazzjonali.

(5)       L-Artikolu XXII(2) tal-GPA jipprovdi li kull Membru tad-WTO jista’ jissieħeb mal-Ftehim fuq patti li jridu jiġu miftehma bejn dak l-Istat u l-Partijiet, b’tali patti ddikjarat f’deċiżjoni tal-Kumitat tal-GPA.

(6)       Għaldaqstant, huwa neċessarju li tiġi stabbilita l-pożizzjoni li għandha tittieħed f’isem l-Unjoni fi ħdan il-Kumitat tal-GPA fir-rigward tal-adeżjoni tan-New Zealand,

ADOTTAT DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni Ewropea fil-Kumitat dwar l-Akkwisti Pubbliċi hija li tapprova l-adeżjoni tan-New Zealand mal-Ftehim dwar l-Akkwisti Pubbliċi, soġġetta għal patti speċifiċi tal-adeżjoni stabbiliti fl-Anness għal din id-Deċiżjoni.

Artikolu 2

Din id-Deċiżjoni tidħol fis-seħħ fil-jum tal-adozzjoni tagħha.

Magħmul fi Brussell,

                                                                       Għall-Kunsill

                                                                       Il-President

[1]               Id-Deċiżjoni tal-Kunsill tat-2 ta’ Diċembru 2013 dwar il-konklużjoni tal-Protokoll li Jemenda l-Ftehim dwar l-Akkwist Pubbliku mill-Gvern, ĠU L 68, 7.3.2014, p. 1.

[2]               Ir-Regolament (KE) Nru 1059/2003 tal-Parlament Ewropew u tal-Kunsill dwar l-istabbiliment ta’ klassifikazzjoni komuni ta’ unitajiet territorjali għall-istatistika (NUTS) (ĠU L 342, 18.12.2013, p. 1).

ANNESS

TERMINI TAL-UE DWAR L-ADEŻJONI TAN-NEW ZEALAND MAL-GPA

Mal-adeżjoni tan-New Zealand mal-Ftehim dwar l-Akkwisti Pubbliċi l-punt 3 tat-Taqsima 2 (“L-awtoritajiet kontraenti tal-gvern ċentrali tal-Istati Membri tal-UE”) tal-Anness 1 mal-Appendiċi I tal-Unjoni Ewropea jinqara kif ġej:

" 3.         Għal prodotti, servizzi, fornituri u provdituri ta’ servizzi fl-Istati Uniti; il-Kanada; il-Ġappun Ħong Kong, iċ-Ċina; Singapor il-Korea; l-Armenja; it-Territorju Doganali Separat tat-Tajwan, Penghu, Kinmen u Matsu u n-New Zealand, l-akkwist mill-awtoritajiet kontraenti tal-gvern ċentrali li ġejjin, sakemm dawn ma jkunux immarkati b’asterisk.”

Mal-adeżjoni tan-New Zealand mal-Ftehim dwar l-Akkwisti Pubbliċi in-Nota 1 tan-Noti mal-Anness 2 tal-Appendiċi I tal-Unjoni Ewropea tinkludi l-punti segwenti wara l-punt e):

" (f)        l-akkwist minn awtoritajiet kontraenti lokali (awtoritajiet kontraenti ta’ unitajiet amministrattivi elenkati taħt NUTS 3 u unitajiet amministrattivi iżgħar, kif imsemmi fir-Regolament 1059/2003 (kif emendat)) fir-rigward ta’ prodotti, servizzi, fornituri u provdituri ta’ servizzi min-New Zealand;

 (g)         l-akkwist minn awtoritajiet kontraenti ta’ unitajiet amministrattivi elenkati taħt NUTS 1 u 2 kif imsemmi fir-Regolament 1059/2003 (kif emendat), fir-rigward ta’ prodotti, servizzi, fornituri u provdituri ta’ servizzi min-New Zealand, sakemm l-akkwist tagħhom huwa kopert mill-Anness 3 tal-UE; "

Mal-adeżjoni tan-New Zealand mal-Ftehim dwar l-Akkwisti Pubbliċi in-Nota 6 tan-Noti mal-Anness 3 tal-Appendiċi I tal-Unjoni Ewropea tinkludi l-punti segwenti wara l-punt n):

"(o)        l-akkwist mill-entitajiet tal-akkwisti li joperaw fil-qasam tal-produzzjoni, it-trasport jew id-distribuzzjoni tal-ilma għax-xorb koperti f'dan l-Anness fir-rigward ta’ provvisti, servizzi u provdituri ta' servizzi min-New Zealand;

(p)          l-akkwist mill-entitajiet tal-akkwisti li joperaw fil-qasam tal-faċilitajiet tal-ajruporti koperti f'dan l-Anness fir-rigward ta’ provvisti, servizzi u provdituri ta' servizzi min-New Zealand;

(q)          l-akkwist mill-entitajiet tal-akkwisti li joperaw fil-qasam tal-provvediment ta' faċilitajiet tal-portijiet marittimi jew interni jew faċilitajiet oħra tat-terminals koperti f'dan l-Anness fir-rigward ta’ provvisti, servizzi u provdituri ta' servizzi min-New Zealand;

(r)           l-akkwist minn awtoritajiet kontraenti reġjonali jew lokali li joperaw fl-oqsma koperti minn dan l-Anness, fir-rigward ta’ provvisti, servizzi u l-provdituri tas-servizzi min-New Zealand, bl-eċċezzjoni ta’ akkwisti mill-awtoritajiet kontraenti ta’ unitajiet amministrattivi elenkati taħt NUTS 1 u 2 (kif imsemmi fir-Regolament 1059/2003, kif emendat) li joperaw fil-qasam tat-trasport bil-ferrovija urbana, sistemi awtomatiċi, tramvija, xarabank li taħdem bl-elettriku (trolley bus), karrozzi tal-linja jew kejbil. "