MEMORANDUM TA’ SPJEGAZZJONI

KUNTEST TAL-PROPOSTA

1.           Ir-regoli applikabbli għall-kontribuzzjonijiet finanzjarji mill-Fond Ewropew ta’ Aġġustament għall-Globalizzazzjoni (FEG) huma stabbiliti fir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[1] (ir-‘Regolament FEG’).

2.           L-awtoritajiet Spanjoli ppreżentaw applikazzjoni FEG/2014/004 ES/Metall tal-Comunidad Valenciana għal kontribuzzjoni finanzjarja mill-FEG, wara għoti ta’ sensji u ċessjoni ta’ attivitajiet skont it-tifsira tal-Artikolu 3 tar-Regolament FEG (minn hawn ’il quddiem imsejħa “sensji”) f’142 intrapriża li joperaw fid-diviżjoni 25 tan-NACE Reviżjoni 2 (Manifattura ta’ prodotti tal-metall iffabbrikat, għajr makkinarju u tagħmir)[2] fir-reġjun tal-livell NUTS 2 tal-Comunidad Valenciana (ES52).

3.           Wara eżaminazzjoni bir-reqqa ta’ din l-applikazzjoni, il-Kummissjoni kkonkludiet, b’konformità mad-dispożizzjonijiet applikabbli tar-Regolament FEG, li l-kondizzjonijiet għall-għoti ta’ kontribuzzjoni finanzjarja mill-FEG ġew issodisfati.

SOMMARJU TAL-APPLIKAZZJONI

Applikazzjoni FEG: || FEG/2014/004 ES/Metall tal-Comunidad Valenciana

Stat Membru: || Spanja

Reġjun(i) kkonċernat(i) (livell NUTS 2): || Comunidad Valenciana (ES52)

Data ta’ sottomissjoni tal-applikazzjoni: || 25.3.2014

Data ta’ skadenza għall-konferma tal-irċevuta tal-applikazzjoni u għal talba għal informazzjoni addizzjonali || 7.4.2014

Data ta’ skadenza għall-għoti ta’ informazzjoni addizzjonali: || 20.5.2014

Data ta’ skadenza għat-tlestija tal-valutazzjoni: || 12.8.2014

Kriterju ta' intervent: || Artikolu 4(1)(b) tar-Regolament FEG

Settur(i) tal-attività ekonomika (Diviżjoni ta’ NACE Rev. 2): || Diviżjoni 25 (“Manifattura ta’ prodotti tal-metall iffabbrikat, għajr makkinarju u tagħmir”)

Perjodu ta' referenza (disa' xhur): || 1.4.2013 – 31.12.2013

Għadd ta' sensji jew waqfien ta' attività matul il-perjodu ta' referenza: || 633

L-għadd ta' benefiċjarji eliġibbli li mistennija jipparteċipaw fil-miżuri: || 300

Baġit għal servizzi personalizzati || EUR 1 622 640

Baġit għal tħejjija, ġestjoni, informazzjoni u pubbliċità || EUR 76 000

Baġit totali || EUR 1 698 640

Kontribuzzjoni finanzjarja mitluba mill-FEG || EUR 1 019 184 (60 % tal-ispejjeż totali)

VALUTAZZJONI TAL-APPLIKAZZJONI

Proċedura

4.           L-awtoritajiet Spanjoli ppreżentaw applikazzjoni FEG/2014/004 ES/Metall tal-Comunidad Valenciana fi żmien 12-il ġimgħa mid-data li fiha ġew issodisfati l-kriterji ta’ intervent stabbiliti fil-paragrafi 5 sa 7 hawn taħt, fil-25 ta’ Marzu 2014. Il-Kummissjoni rrikonoxxiet il-wasla tal-applikazzjoni fi żmien ħmistax mid-data ta’ sottomissjoni tal-applikazzjoni, fis-7 ta’ April 2014. Fl-istess data, il-Kummissjoni talbet informazzjoni addizzjonali mingħand l-awtoritajiet Spanjoli. Din l-informazzjoni addizzjonali ngħatat fi żmien sitt ġimgħat mid-data tat-talba. Iż-żmien ta' 12-il ġimgħa mill-wasla tal-applikazzjoni kompluta li fih il-Kummissjoni għandha tiffinalizza l-valutazzjoni tagħha tal-konformità tal-applikazzjoni mal-kondizzjonijiet għall-għoti ta’ kontribut finanzjarju jiskadi fit-12 ta’ Awwissu 2014.

Eliġibbiltà tal-applikazzjoni

Il-kriterji ta’ intervent

5.           L-awtoritajiet Spanjoli ppreżentaw applikazzjoni skont il-kriterju ta’ intervent tal-Artikolu 4(1)(b) tar-Regolament FEG, li jirrikjedi li tal-inqas 500 ħaddiem jingħataw is-sensja fuq perjodu ta’ referenza ta’ disa’ xhur f’intrapriżi li joperaw fl-istess settur ekonomiku definit fil-livell tad-diviżjoni NACE Rev. 2 u li jinsabu f’reġjun wieħed jew żewġ reġjuni kontigwi definiti fil-livell NUTS 2 fi Stat Membru.

6.           L-applikazzjoni tirrigwarda ħaddiema li ngħataw is-sensja jew inkella li temmew l-attivitajiet tagħhom[3] f’142 intrapriża[4] li joperaw fid-diviżjoni 25 tan-NACE Rev. 2 (Manifattura ta’ prodotti tal-metall iffabbrikat, għajr makkinarju u tagħmir) fir-reġjun tal-livell NUTS 2 tal-Comunidad Valenciana (ES52).

7.           Il-perjodu ta’ referenza ta’ disa’ xhur huwa mill-1 ta’ April 2013 sal-31 ta’ Diċembru 2013.

Kalkolu tal-għotjiet tas-sensja u taċ-ċessjoni ta’ attività

8.           L-għotjiet tas-sensja ġew ikkalkulati kif ġej:

– 380 mid-data li fiha l-impjegatur, skont l-Artikolu 3(1) tad-Direttiva tal-Kunsill 98/59/KE[5], innotifika lill-awtorità pubblika kompetenti bil-miktub dwar is-sensji kollettivi proġettati. L-awtoritajiet Spanjoli kkonfermaw qabel id-data tat-tlestija tal-valutazzjoni mill-Kummissjoni li dawn it-380 sensja ġew fil-fatt effettwati; u

– 253 mid-data tat-terminazzjoni de facto tal-kuntratt ta’ impjieg jew l-iskadenza tiegħu fil-perjodu ta’ referenza.

Benefiċjarji eliġibbli

9.           In-numru totali ta’ benefiċjarji eliġibbli huwa 633.

Rabta bejn l-għoti tas-sensja u l-kriżi finanzjarja u ekonomika globali indirizzata fir-Regolament (KE) Nru 546/2009

10.         Sabiex tiġi stabbilita r-rabta bejn is-sensji u l-kriżi finanzjarja u ekonomika globali indirizzata fir-Regolament (KE) Nru 546/2009, l-awtoritajiet Spanjoli isostnu li s-settur tal-prodotti tal-metall huwa fornitur ewlieni ta’ riżorsi għal firxa wiesgħa ta’ attivitajiet ta’ manifattura, b’mod partikolari tas-setturi tal-bini tal-bastimenti, tal-kostruzzjoni u tal-awtomobilistika. Dawn kollha kienu milquta b’mod sinifikanti madwar l-Unjoni Ewropea mill-kriżi ekonomika, kif rikonoxxut preċedentement mill-Kummissjoni[6] u s-servizzi tagħha[7]. Barra minn hekk, l-argumenti mressqa f’applikazzjonijiet preċedenti tal-FEG relatati ma’ dawn is-setturi jibqgħu validi[8], b’mod partikolari dawk imressqa fil-kuntest ta’ żewġ applikazzjonijiet tal-FEG minn Spanja relatati mal-istess settur[9].

Indiċi tal-produzzjoni industrijali (2010 = 100) Sors: Eurostat

11.         Kif jidher fit-tabella t'hawn fuq, bejn is-snin 2000 u 2007, jiġifieri qabel il-kriżi finanzjarja u ekonomika, il-medja tat-tkabbir annwali tal-indiċi tal-produzzjoni industrijali fl-UE-28 kienet ta’ madwar 1,7 %; fl-ewwel kwart (Q1) tal-2008, l-indiċi għall-UE 28 laħaq il-livell massimu tiegħu (112,8). Bejn April 2008 u April 2009 il-produzzjoni industrijali fl-UE-28 niżlet b’aktar minn 22 punt perċentwali. Wara, madankollu, daħal fis-seħħ irkupru relattivament dinamiku għal madwar sentejn. Minn Mejju 2011, il-produzzjoni industrijali reġgħet waqgħet. Il-medja tal-indiċi tal-produzzjoni industrijali tal-UE għall-2013 hija komparabbli mal-livell fl-2003.

12.         Fi Spanja, il-medja tat-tkabbir annwali tal-indiċi tal-produzzjoni industrijali segwiet l-istess xejra bħall-UE-28 sal-2007. Madankollu, bejn April 2008 u April 2009, il-produzzjoni industrijali fi Spanja naqset bi kważi 27 punt perċentwali (ħames punti aktar milli fil-livell tal-UE-28) u minn dak iż-żmien il-produzzjoni industrijali ma rkupratx u kien hemm tnaqqis relattivament kostanti. Il-medja tal-indiċi tal-produzzjoni industrijali ta’ Spanja għall-2013 hija komparabbli mal-livell fl-1994.

13.         Spanja hija fost l-Istati Membri milqutin l-aktar serjament mill-kriżi finanzjarja u ekonomika globali. Il-prospetti industrijali ħżiena li rriżultaw mill-kriżi finanzjarja u ekonomika globali għaldaqstant wasslu għal tnaqqis fid-domanda u fil-produzzjoni tal-metall u l-prodotti tal-metall. Fi Spanja, il-produzzjoni ta’ prodotti tal-metall naqset bi 23,3 % fl-2009 meta mqabbla mas-sena preċedenti u b’36,6 % bejn l-2008 u l-2013.

Produzzjoni ta’ prodotti tal-metall (diviżjoni 25 tan-NACE Rev. 2) fi Spanja (indiċi tal-volum tal-produzzjoni 2010 = 100) Sors: Eurostat

14.         It-tnaqqis tal-produzzjoni fl-industrija kellu konsegwenzi għall-impjiegi. Spanja b’hekk tilfet kważi 600 000 impjieg fl-industrija bejn l-2008 u l-2012, li minnhom 150 000 kienu fis-settur tal-prodotti tal-metall manifatturati. Dan it-telf ta’ impjiegi jirrappreżenta rispettivament 24 % tal-impjiegi totali fl-industrija u 35 % tal-impjiegi totali fis-settur tal-metall.

15.         It-telf ta’ impjiegi fis-settur tal-metall fil-Comunidad Valenciana kien saħansitra akbar. Fl-2008, kien hemm 35 868 impjieg fis-settur tal-metall fil-Comunidad Valenciana, filwaqt li fl-2012 in-numru ta’ impjiegi kien naqas għal 20 873. Dan jirrappreżenta tnaqqis bi 43 %, tmien punti perċentwali ogħla milli fil-livell nazzjonali.

Avvenimenti li jwasslu għall-għoti tas-sensja u ċessjoni ta’ attivitajiet

16.         L-avveniment li wassal għas-sensji huwa t-tnaqqis drastiku fil-produzzjoni ta’ prodotti tal-metall iffabbrikat fil-Comunidad Valenciana bħala konsegwenza tal-kriżi finanzjarja u ekonomika. Il-fatturat tas-settur naqas bi 38,5 % fil-perjodu 2008-2012, li b’hekk irriżulta f’sensji u aġġustamenti oħra bħal sospensjoni temporanja ta’ xogħol u tnaqqis tal-ħinijiet tax-xogħol.

17.         L-impjiegi fis-settur tal-metall fil-Comunidad Valenciana jirrappreżentaw 7,4 % tal-impjiegi f’dan is-settur fil-livell nazzjonali. Madankollu, it-telf ta’ impjiegi fis-settur tal-metall fil-Comunidad Valenciana jirrappreżenta 10 % tat-telf totali ta’ impjiegi tas-settur, li juri li l-kriżi laqtet l-intrapriżi tal-metall fil-Comunidad Valenciana b’mod aktar qawwi mill-medja nazzjonali. Dan jista’ jiġi spjegat parzjalment mill-intrapriżi tal-metall fil-Comunidad Valenciana li huma dipendenti ħafna fuq is-settur tal-kostruzzjoni. L-importanza tas-settur tal-kostruzzjoni f’dan ir-reġjun diġà ġiet enfasizzata f’applikazzjonijiet preċedenti tal-FEG[10].

Impatt mistenni tal-għoti tas-sensja fir-rigward tal-ekonomija u l-impjiegi lokali, reġjonali jew nazzjonali

18.         L-awtoritajiet Spanjoli jsostnu li s-sensji fis-settur tal-prodotti tal-metall fil-Comunidad Valenciana se jkomplu jaggravaw is-sitwazzjoni tal-qgħad fir-reġjun.

Rata ta' qgħad fil-Comunidad Valenciana

Sors: Encuesta de población activa (EPA)[11]

19.         L-impjiegi fil-Comunidad Valenciana ġew affettwati b’mod ħażin mill-kriżi. Ir-rata ta’ qgħad fir-reġjun żdiedet b’mod mgħaġġel, fejn għoliet minn 9.6 % (l-Ewwel Kwart (Q1) tal-2008) għal 28.0 % (l-Ewwel Kwart (Q1) tal-2014). L-awtoritajiet Spanjoli jsostnu li s-sensji fis-settur tal-prodotti tal-metall fil-Comunidad Valenciana se jkomplu jaggravaw is-sitwazzjoni tal-qgħad fir-reġjun milqut li jidher partikolarment fraġli, minħabba li s-settur tal-metall jirrappreżenta 25,4 % tal-impjiegi fis-settur industrijali fir-reġjun. Barra minn hekk, hemm ukoll nuqqas ta’ postijiet battala minħabba l-impatt tal-kriżi fuq setturi tradizzjonali bħaċ-ċeramika, ix-xedd tas-saqajn u ​l-kostruzzjoni, kif ukoll it-tessuti, li huma importanti ħafna għall-ekonomija tar-reġjun. L-FEG ġie mmobilizzat għall-appoġġ tal-ħaddiema li jkunu ngħataw is-sensja fil-Comunidad Valenciana f’kull wieħed mis-setturi msemmija[12].

Benefiċjarji mmirati u azzjonijiet proposti

Benefiċjarji mmirati

20.         In-numru stmat ta’ benefiċjarji eliġibbli li mistennija jipparteċipaw fil-miżuri huwa 300.

21.         It-tqassim tal-benefiċjarji fil-mira skont is-sess, in-nazzjonalità u l-grupp ta’ età huwa kif ġej:

Kategorija || Numru ta’ benefiċjarji mmirati

Sess: || Rġiel: || 258 || (86,0 %)

|| Nisa: || 42 || (14,0 %)

Nazzjonalità: || Ċittadini tal-UE: || 296 || (98,7 %)

|| ċittadini mhux tal-UE: || 4 || (1,3 %)

Grupp ta’ età: || bejn 15 u 24 sena: || 9 || (3,0 %)

|| bejn 25 u 29 sena: || 70 || (23,3 %)

|| bejn 30 u 54 sena: || 206 || (68,7 %)

|| bejn 55 u 64 sena: || 15 || (5,0 %)

|| iktar minn 64 sena: || 0 || (0,0 %)

Eliġibbiltà tal-azzjonijiet proposti

22.         Is-servizzi personalizzati li għandhom jiġu pprovduti lill-ħaddiema li ngħataw is-sensja jikkonsistu mill-azzjonijiet li ġejjin li meta magħqudin flimkien jiffurmaw pakkett ikkoordinat ta’ servizzi personalizzati maħsuba biex jerġgħu jintegrawhom fis-suq tax-xogħol.

– Sessjonijiet ta’ lqugħ u informazzjoni: Din hija l-ewwel miżura li se tiġi offruta lill-ħaddiema kollha u tinkludi: (1) sessjonijiet ta’ informazzjoni ġenerali u sessjonijiet ta’ informazzjoni individwali dwar rekwiżiti ta’ ħiliet u taħriġ; dwar programmi disponibbli ta’ pariri u ta’ taħriġ; u dwar benefiċċji u inċentivi; (2) proċedura ta’ reġistrazzjoni.

– Gwida okkupazzjonali: Dan jinvolvi l-profilar tal-ħaddiema parteċipanti u d-disinn tal-perkors personalizzat għar-reintegrazzjoni (fażi I), sessjonijiet ta’ ħidma fuq tekniki għat-tfittxija ta’ impjieg (fażi II) u pariri u s-segwitu tal-appoġġ personalizzat matul il-perjodu ta’ implimentazzjoni.

– Kollokament f’impjieg: Dan se jinvolvi tfittxija intensiva u proattiva għal opportunitajiet ta’ impjieg lokali u reġjonali mill-faċilitaturi tal-impjiegi u t-tqabbil tal-impjiegi sussegwenti. Din il-miżura hija mmirata biex tikkumplimenta t-tfittxija ta’ impjieg individwali tal-benefiċjarji. Se jinħoloq sit elettroniku biex jipprovdi lill-ħaddiema bl-għodod tal-internet li jistgħu jgħinuhom fit-tfittxija individwali tagħhom għal impjieg.

– Taħriġ: Il-miżura tat-taħriġ se tinkludi varjetà ta’ korsijiet ta’ taħriġ: (1) Taħriġ vokazzjonali u titjib tal-ħiliet. It-taħriġ vokazzjonali se jiffoka fuq liċenzjar vokazzjonali bħal dak meħtieġ għall-immaniġġjar tal-ikel, u f’setturi jew oqsma fejn jeżistu jew se jinħolqu opportunitajiet, bħas-settur tal-ikel (is-sikurezza fl-ikel, HACCP[13], 6-sigma[14], eċċ.), prevenzjoni tar-riskji okkupazzjonali u standards ta’ kontroll tal-kwalità u tal-ambjent (ISO 9001[15], ISO 14000[16], EFQM[17], eċċ.), filwaqt li t-titjib tal-ħiliet (jiġifieri taħriġ vokazzjonali fl-istess settur) jimmira li jtejjeb il-ħiliet eżistenti tal-parteċipanti. It-titjib tal-ħiliet se jkun imfassal biex jipprovdi għall-ħtiġijiet futuri ta’ manifatturi ta’ prodotti tal-metall iffabbrikat, eż. tekniki ta’ wweldjar (bħal TIG, iwweldjar MIG/MAG[18], tekniki speċjali għall-iwweldjar, eċċ.); disinn mekkaniku (2D u 3D, CAD, sistemi ta' integrazzjoni CAD-CAM); tool u die setter; għodod ta' programmar ta' magni CNC[19]; eċċ. Madwar 200 ħaddiem huma mistennija li jipparteċipaw f’din l-attività ta’ taħriġ. (2) Taħriġ f’ħiliet trasversali. L-offerta ta’ taħriġ se tinkludi taħriġ f’varjetà ta’ ħiliet li jikkontribwixxu għal prestazzjoni tax-xogħol aħjar bħall-ICT, lingwi barranin, ġestjoni tan-negozju, eċċ. Huwa stmat li 100 ħaddiem se jipparteċipaw f'din l-attività ta' taħriġ. (3) Taħriġ fuq il-post tax-xogħol. B’koperazzjoni mal-intrapriżi lokali se jkun hemm attivitajiet ta’ taħriġ fuq il-post tax-xogħol biex jikkumplimentaw it-taħriġ vokazzjonali u t-taħriġ mill-ġdid propost lill-parteċipanti. Għall-benefiċjarji din se tkun opportunità li jitgħallmu f’ambjent reali tax-xogħol u għall-intrapriżi li jkunu qed jipparteċipaw fil-miżura mod kif jittestjaw il-ħiliet vokazzjonali ta’ kandidati potenzjali li għandhom jiġu reklutati. Huwa stmat li 40 ħaddiem se jipparteċipaw f'din l-attività ta' taħriġ.

– Promozzjoni tal-intraprenditorija: Din il-miżura tara li tassisti ħaddiema mkeċċija li jaħsbu biex joħolqu negozju għal rashom u se tikkonsisti minn (1) attivitajiet speċifiċi ta’ taħriġ li jkopru elementi bħall-iżvilupp ta’ idea tan-negozju, l-ippjanar, it-twettiq ta’ studji ta’ fattibbiltà, il-ġbir ta’ finanzi, eċċ.; u (2) tagħlim personalizzat tul il-proċess kollu tal-bidu tan-negozju u appoġġ dwar rekwiżiti amministrattivi. Il-parteċipanti jistgħu jagħmlu użu mis-servizzi ta’ tagħlim anki wara l-bidu tan-negozju tagħhom. Il-ħaddiema li għandhom bżonn ikabbru l-ħiliet tagħhom fil-ġestjoni tan-negozju, se jaċċessaw it-taħriġ rilevanti fi ħdan it-taħriġ fil-ħiliet trasversali.

– Inċentiv għat-twaqqif ta’ negozju: Il-benefiċjarji li jidħlu lura fl-impjieg billi jibdew negozju għal rashom se jirċievu somma f’daqqa ta’ EUR 3 000. Dan l-inċentiv huwa maħsub biex ikopri l-ispejjeż involuti biex jitnieda n-negozju.

– Għotja għat-tiftix ta’ impjieg: Wara li jilħqu l-istadji importanti miftiehma tal-perkors tagħhom għar-reinseriment, il-benefiċjarji se jirċievu għotja waħda ta’ EUR 300.

– Kontribuzzjoni għall-ispejjeż tal-ivvjaġġar: Ħaddiema li jipparteċipaw fil-miżuri se jirċievu kontribuzzjoni għall-ispejjeż tal-ivvjaġġar tagħhom. L-ammont finali għandu jiġi kkalkolat skont il-ġranet attwali ta’ parteċipazzjoni u d-distanza kommutata. Huwa stmat li bħala medja l-parteċipanti jistgħu jirċievu EUR 400.

– Inċentivi għall-impjieg: Benefiċjarji li jidħlu lura fl-impjieg b’kuntratt ta’ mill-inqas tliet xhur se jirċievu sussidju waħdieni fuq il-paga ta’ EUR 700 sabiex iħeġġiġhom —b’mod partikolari benefiċjarji akbar fl-età— biex jaċċettaw impjieg mill-ġdid, speċjalment meta l-kondizzjonijiet offruti jkunu inqas attraenti minn dawk f’impjiegi preċedenti tagħhom.

23.         L-azzjonijiet proposti jikkostitwixxu miżuri attivi tas-suq tax-xogħol fi ħdan l-azzjonijiet eliġibbli stabbiliti fl-Artikolu 7 tar-Regolament FEG. Dawn l-azzjonijiet ma għandhomx jissostitwixxu miżuri passivi ta’ protezzjoni soċjali.

24.         L-awtoritajiet Spanjoli pprovdew l-informazzjoni meħtieġa dwar azzjonijiet li huma mandatorji għall-intrapriżi kkonċernati permezz tal-liġi nazzjonali jew il-ftehimiet kollettivi. Huma kkonfermaw li kontribuzzjoni finanzjarja mill-FEG mhux se tieħu post azzjonijiet bħal dawn.

Baġit stmat

25.         L-ispejjeż totali stmati huma ta' EUR 1 698 640, inkluża n-nefqa għas-servizzi personalizzati ta’ EUR 1 622 640 u n-nefqa għat-tħejjija, il-ġestjoni, it-tagħrif u r-reklamar, il-kontroll u l-attivitajiet ta’ rappurtar ta’ EUR 76 000.

26.         Il-kontribuzzjoni finanzjarja totali mitluba mill-FEG hija ta’ EUR 1 019 184 (60 % tal-ispejjeż totali)).

Azzjonijiet || Għadd stmat ta’ parteċipanti || Kost stmat għal kull parteċipant (EUR) (*) || Spejjeż totali stmati (EUR); (% tat-total) (**)

Servizzi personalizzati (Azzjonijiet taħt l-Artikolu 7(1)(a) u (c) tar-Regolament FEG)

Merħba u sessjonijiet ta’ informazzjoni: (Acogida) || 300 || 300 || 90 000

Gwida okkupazzjonali (Orientación profesional personalizada) || 300 || 750 || 225 000

Kollokament f’impjieg (Intermediación laboral) || 300 || 900 || 270 000

Taħriġ (Formación) || 300 || 1 987 || 596 000

Promozzjoni tal-intraprenditorija (Emprendimiento) || 30 || 1 638 || 49 140

Inċentiv għat-twaqqif ta’ negozju (Incentivo a la constitución de negocios) || 20 || 3 000 || 60 000

Subtotal (a): || || 1 290 140 (79,5 %)

Benefiċċji u inċentivi (Azzjonijiet taħt l-Artikolu 7(1)(b) tar-Regolament FEG) || ||

Konċessjoni għat-tfittix għal impjieg (Incentivo a la participación) || 300 || 300 || 90 000

Kontribuzzjoni għall-ispejjeż tal-ivvjaġġar (Ayudas por desplazamientos) || 300 || 400 || 120 000

Inċentivi għall-impjieg (Incentivo a la reinserción) || 175 || 700 || 122 500

Subtotal(b): || || 332 500 (20,5 %)

Azzjonijiet skont l-Artikolu 7(4) tar-Regolament FEG:

1. Attivitajiet preparatorji || || 0

2. Ġestjoni || || 58 000

3. Tagħrif u pubbliċità || || 9 000

4. Kontroll u rappurtar || || 9 000

Subtotal (c): || || 76 000

(4,47 %)

Spejjeż totali (a + b + c): || || 1 698 640

(*) Biex jiġu evitati d-deċimali, l-ispejjeż stmati għal kull ħaddiem tqarrbu sal-eqreb ċifra. Madankollu t-tqarrib ma għandu l-ebda impatt fuq l-ispiża totali ta’ kull miżura li jifdal bħal fl-applikazzjoni ppreżentata minn Spanja.

(**) It-totali ma jaqblux bl-eżatt minħabba t-tqarrib.

27.         L-ispejjeż għall-azzjonijiet identifikati fit-tabella ta’ hawn fuq bħala azzjonijiet taħt l-Artikolu 7(1)(b) tar-Regolament FEG ma għandhomx jaqbżu l-35% tal-ispejjeż totali għall-pakkett koordinat ta’ servizzi personalizzati. L-awtoritajiet Spanjoli kkonfermaw li dawn l-azzjonijiet huma kondizzjonali fuq il-parteċipazzjoni attiva tar-riċevituri f’attivitajiet ta’ tfittxija ta’ impjieg jew ta’ taħriġ.

28.         L-awtoritajiet Spanjoli kkonfermaw li l-ispejjeż tal-investimenti għal impjieg indipendenti, bidu ta’ negozju u teħid ta’ kontroll mill-impjegati mhux se jaqbżu l-EUR 15 000 għal kull benefiċjarju.

Perjodu ta’ eliġibbiltà tan-nefqa

29.         L-awtoritajiet Spanjoli bdew jipprovdu servizzi personalizzati għall-benefiċjarji fil-mira fl-20 ta’ Ġunju 2014. In-nefqa għall-azzjonijiet imsemmija fil-punt 22 għalhekk se tkun eliġibbli għal kontribuzzjoni finanzjarja mill-FEG mill-20 ta’ Ġunju 2014 sal-20 ta’ Ġunju 2016.

30.         L-awtoritajiet Spanjoli bdew iġarrbu n-nefqa amministrattiva għall-implimentazzjoni tal-FEG fl-20 ta’ Ġunju 2014. Għalhekk, in-nefqa għat-tħejjija, il-ġestjoni, it-tagħrif u r-reklamar, il-kontroll u l-attivitajiet ta’ rappurtar għandha tkun eliġibbli għal kontribuzzjoni finanzjarja mill-FEG mill-20 ta’ Ġunju 2014 sal-20 ta’ Diċembru 2016.

Il-kumplimentarjetà mal-azzjonijiet iffinanzjati minn fondi nazzjonali jew tal-Unjoni

31.         L-awtoritajiet Spanjoli kkonfermaw li l-miżuri deskritti hawn fuq, li jirċievu kontribuzzjoni finanzjarja mill-FEG mhux se jirċievu wkoll kontribuzzjoni finanzjarja minn strumenti finanzjarji oħrajn tal-Unjoni.

32.         L-objettivi ewlenin tal-programmi operattivi tal-FSE 2007-2013 għall-Comunidad Valenciana qed jippromuovu t-tagħlim tal-ħaddiema tul ħajjithom u qed inaqqsu r-riskju tat-tluq mill-iskola qabel il-waqt, bl-akbar attenzjoni tkun fuq dawk li huma l-iktar vulnerabbli jew dawk li huma fir-riskju tal-esklużjoni soċjali, fil-biċċa l-kbira ħaddiema żgħażagħ, jew dawk li għandhom iktar minn 45 sena, nisa u nies b'diżabilità. Għalkemm xi wħud mill-miżuri tal-FEG jistgħu jkunu simili għall-miżuri tal-FSE, hemm differenza: Il-miżuri tal-FEG għandhom ċerta individwalità u karattru speċjali (huma jindirizzaw settur u popolazzjoni partikolari) u huma magħmulin apposta u għandhom format intensiv. Sabiex tiġi evitata duplikazzjoni tal-miżuri tal-FSE u dawk tal-FEG għandu jkun hemm prosegwiment kontinwu tal-azzjonijiet tal-FSE u tal-FEG li għandhom l-istess għanijiet, u tal-ħaddiema kkonċernati.

33.         Is-sorsi ta’ prefinanzjament jew kofinanzjament nazzjonali huma kif ġej: 30 % tal-baġit totali se jkun iffinanzjat minn fondi pubbliċi mill-Generalitat Valenciana (il-gvern awtonomu tal-Comunidad Valenciana) u b’mod partikolari mis-SERVEF (uffiċċji pubbliċi tax-xogħol tal-gvern awtonomu); filwaqt li l-assoċjazzjoni tal-impjegaturi Federación Empresarial Metalurgica Valenciana-FEMEVAL u t-trejdjunjins UGT-PV u CCOO-PV flimkien se jikkontribwixxu 10 % tal-baġit totali.

Il-proċeduri għal konsultazzjoni tal-benefiċjarji fil-mira jew ir-rappreżentanti tagħhom jew is-sħab soċjali kif ukoll l-awtoritajiet lokali u reġjonali

34.         L-awtoritajiet Spanjoli indikaw li l-pakkett ikkoordinat ta’ servizzi personalizzati ġie mfassal b’konsultazzjoni mas-sħab soċjali FEMEVAL, UGT-PV u CCOO-PV, imsemmija bħala sors ta’ kofinanzjament fil-paragrafu 33. Fit-K3 2013, imħassba dwar ir-ritmu kajman ta’ telf ta’ impjiegi fis-settur tal-metall, is-sħab soċjali infurmaw lis-Servizzi għall-Impjieg tal-Comunidad Valenciana (SERVEF) dwar ir-rieda tagħhom li jappoġġjaw applikazzjoni għall-finanzjament mill-FEG għal ħaddiema li ngħataw is-sensja fis-settur tal-metall. Diversi laqgħat tekniċi segwew f’Diċembru (16/12 u 23/12), f’Jannar (10/1 u 28/1) u fi Frar (3/2) fejn l-abbozz tal-applikazzjoni ġie diskuss u miftiehem, b’mod partikolari l-kontenut u l-iskeda tal-azzjonijiet, kif ukoll l-allokazzjoni tar-rwoli u d-distribuzzjoni tal-kompiti.

Ġestjoni u sistemi ta’ kontroll

35.         L-applikazzjoni fiha deskrizzjoni dettaljata tas-sistema ta’ ġestjoni u kontroll li tispeċifika r-responsabbiltajiet tal-korpi involuti. Spanja nnotifikat lill-Kummissjoni li l-kontribut finanzjarju se jkun immaniġġjat u kkontrollat mill-istess entitajiet li jimmaniġġjaw u jikkontrollaw il-FSE. Is-SERVEF se jkun il-korp intermedju għall-awtorità tal-ġestjoni.

L-impenji pprovduti mill-Istat Membru kkonċernat

36.         L-awtoritajiet Spanjoli pprovdew l-assigurazzjonijiet kollha meħtieġa rigward dan li ġej:

– il-prinċipji tal-ugwaljanza tat-trattament u n-nondiskriminazzjoni se jiġu rispettati fl-aċċess għall-azzjonijiet proposti u l-implimentazzjoni tagħhom;

– ir-rekwiżiti stabbiliti fil-leġiżlazzjoni nazzjonali u tal-UE dwar għotjiet ta' sensji kollettivi ġew issodisfati;

– l-azzjonijiet proposti se jipprovdu appoġġ għall-ħaddiema individwali u mhux se jintużaw għar-ristrutturar ta’ kumpaniji jew setturi;

– l-azzjonijiet proposti mhux se jirċievu appoġġ finanzjarju minn fondi oħra tal-Unjoni jew strumenti finanzjarji u kwalunkwe finanzjament doppju se jiġi evitat;

– l-azzjonijiet proposti se jikkumplimentaw l-azzjonijiet iffinanzjati mill-Fondi Strutturali;

– il-kontribuzzjoni finanzjarja mill-FEG se tikkonforma mar-regoli proċedurali u materjali tal-Unjoni dwar għajnuna mill-Istat.

IMPLIKAZZJONI BAĠITARJA

Il-proposta baġitarja

37.         Il-FEG ma għandux jaqbeż l-ammont massimu annwali ta' EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 tat-2 ta’ Diċembru 2013 li jistabbilixxi l-qafas finanzjarju pluriennali għas-snin 2014-2020[20].

38.         Wara li eżaminat l-applikazzjoni fir-rigward tal-kondizzjonijiet stabbiliti fl-Artikolu 13(1) tar-Regolament FEG, u wara li kkunsidrat in-numru ta’ benefiċjarji fil-mira, l-azzjonijiet proposti u l-ispejjeż stmati, il-Kummissjoni tipproponi li timmobilizza l-FEG għall-ammont ta’ EUR 1 019 184, li jirrappreżenta 60 % tal-ispejjeż totali tal-azzjonijiet proposti, sabiex tiġi pprovduta kontribuzzjoni finanzjarja bi tweġiba għall-applikazzjoni.

39.         Id-deċiżjoni proposta biex jiġi mobilizzat il-FEG se tittieħed b'mod konġunt mill-Parlament Ewropew u mill-Kunsill, kif stipulat fil-punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, il-kooperazzjoni fi kwistjonijiet baġitarji u l-ġestjoni finanzjarja tajba[21].

Atti relatati

40.         Fl-istess ħin li hija tippreżenta din il-proposta għal deċiżjoni sabiex jiġi mmobilizzat il-FEG, il-Kummissjoni se tippreżenta lill-Parlament Ewropew u lill-Kunsill proposta għal trasferiment għal-linja baġitarja rilevanti tal-ammont ta’ EUR 1 019 184.

41.         Fl-istess żmien li tadotta l-proposta għal deċiżjoni biex jiġi mobilizzat il-FEG, il-Kummissjoni għandha tadotta deċiżjoni dwar kontribuzzjoni finanzjarja, permezz ta' att ta' implimentazzjoni, li għandu jidħol fis-seħħ fid-data li fiha l-Parlament Ewropew u l-Kunsill jadottaw id-deċiżjoni biex biex jiġi mobilizzat il-FEG.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta' Aġġustament għall-Globalizzazzjoni, skont il-Punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, il-kooperazzjoni fi kwistjonijiet baġitarji u l-ġestjoni finanzjarja tajba (applikazzjoni FEG/2014/004 ES/Metall tal-Comunidad Valenciana)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw ir-Regolament (UE) Nru 1309/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Ewropew ta’ Aġġustament għall-Globalizzazzjoni (2014-2020) u li jħassar ir-Regolament (KE) Nru 1927/2006[22], u b’mod partikolari l-Artikolu 15(4) tiegħu,

Wara li kkunsidraw il-proposta mill-Kummissjoni Ewropea,

Filwaqt li jaġixxu skont il-proċedura stabbilita fil-punt 13 tal-Ftehim Interistituzzjonali tat-2 ta’ Diċembru 2013 bejn il-Parlament Ewropew, il-Kunsill u l-Kummissjoni dwar id-dixxiplina baġitarja, il-kooperazzjoni fi kwistjonijiet baġitarji u l-ġestjoni finanzjarja tajba[23],

Billi:

(1)       Il-Fond Ewropew ta’ Aġġustament għall-Globalizzazzjoni (FEG) ġie stabbilit biex jipprovdi appoġġ għall-ħaddiema li jingħataw is-sensja u lill-persuni li jaħdmu għal rashom li l-attività tagħhom waqfet b’konsegwenza ta’ bidliet strutturali kbar fix-xejriet dinjija tal-kummerċ minħabba l-globalizzazzjoni u biex jassistihom fir-riintegrazzjoni tagħhom fis-suq tas-xogħol.

(2)       Il-FEG ma għandux jaqbeż l-ammont massimu annwali ta' EUR 150 miljun (prezzijiet tal-2011), kif stipulat fl-Artikolu 12 tar-Regolament tal-Kunsill (UE, Euratom) Nru 1311/2013 li jistabbilixxi l-qafas finanzjarju pluriennali għas-snin 2014-2020[24].

(3)       Spanja ressqet applikazzjoni biex timmobilizza l-FEG, fir-rigward ta’ sensji[25] f’142 intrapriża li joperaw fid-diviżjoni 25 Reviżjoni 2 tan-NACE (Manifattura ta’ prodotti tal-metall iffabbrikati, għajr makkinarju u tagħmir)[26] fir-reġjun tal-livell NUTS 2 tal-Comunidad Valenciana (ES52), fil-25 ta’ Marzu 2014 u ssupplimentatha b’informazzjoni addizzjonali kif provdut fl-Artikolu 8.3 tar-Regolament (UE) Nru 1309/2013. Din l-applikazzjoni tikkonforma mar-rekwiżiti għad-determinazzjoni tal-kontributi finanzjarji mill-FEG kif stipulat fl-Artikolu 13 tar-Regolament (KE) Nru 1309/2013.

(4)       Għaldaqstant, il-FEG għandu jiġi mmobilizzat sabiex jipprovdi kontribuzzjoni finanzjarja f’ammont ta’ EUR 1 019 184 għall-applikazzjoni mressqa minn Spanja,

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2014, għandu jiġi mmobilizzat il-FEG biex jipprovdi s-somma ta’ EUR 1 019 184 f’approprjazzjonijiet ta’ impenn u ta’ pagament.

Artikolu 2

Din id-Deċiżjoni se tiġi ppubblikata f'Il-Ġurnal Uffiċjali tal-Unjoni Ewropea.

Magħmul fi Brussell,

Għall-Parlament Ewropew                            Għall-Kunsill

Il-President                                                    Il-President

[1]               ĠU L 347, 20.12.2013, p. 855.

[2]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi l-klassifikazzjoni tal-istatistika ta' attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[3]               Fi ħdan it-tifsira tal-Artikolu 3 tar-Regolament FEG.

[4]               Għal-lista tal-intrapriżi kkonċernati u n-numru ta’ ħaddiema li ngħataw is-sensja f’kull intrapriża ara l-anness1.

[5]               Id-Direttiva tal-Kunsill 98/59/KE ta' l-20 ta' Lulju 1998 dwar l-approssimazzjoni tal-liġijiet ta' l-Istati Membri dwar redundancies kollettivi (ĠU L 225, tat-12.8.1998, p. 16).

[6]               COM (2009) 104 finali tal-25.2.2009, "Komunikazzjoni mill-Kummissjoni dwar "Reazzjoni għall-kriżi fl-industrija awtomobilistika Ewropea".

[7]               Eurostat – Statistics in focus 61/2011 on Industry, trade and services, “EU-27 Construction activity falls by 16 % from its pre-crisis high by the second quarter of 2011”, http://epp.eurostat.ec.europa.eu/cache/ITY_OFFPUB/KS-SF-11-061/EN/KS-SF-11-061-EN.PDF

[8]               Għall-industrija tal-bini tal-bastimenti, ara: FEG/2010/006 PL/H. Cegielski-Poznan, FEG/2010/025 DK/Odense Steel Shipyard u FEG/2011/008 DK/Odense Steel Shipyard.

                Għas-settur tal-kostruzzjoni, ara: EGF/2011/006 ES/Comunidad Valenciana Construction, EGF/2011/009 NL/Gelderland Construction 41, EGF/2011/012 NL/Noord Brabant-Zuid Holland u EGF/2011/017 ES/Aragón Construction.

                Għas-settur tal-karozzi, ara: EGF/2009/019 FR/Renault, EGF/2010/002 ES/Cataluña Automotive u 2011/003 DE/Arnsberg and Düsseldorf Automotive.

[9]               COM (2012) 451 relatata ma’ FEG/2011/019 ES/Metall tal-Galicia and COM (2012) 620 relatata ma’ FEG/2011/018 ES Metall tal-País Vasco.

[10]             FEG/2011/006 ES Kostruzzjoni tal-Comunidad Valenciana COM (2012) 053 u tliet applikazzjonijiet relatati ma’ industriji anċillari tas-settur tal-kostruzzjoni: FEG/2009/014 ES Ċeramika tal-Comunidad Valenciana COM (2010) 216; FEG/2010/005 ES Ġebla naturali tal-Comunidad Valenciana COM (2010) 617; u FEG/2013/004 ES Materjali tal-bini tal-Comunidad Valenciana COM (2013) 635.

[11]             EPA (Stħarriġ tal-Forza tax-Xogħol) http://www.datosmacro.com/paro-epa/ccaa/valencia?sector=Tasa-de-paro&sc=EPA-.

[12]             Għas-settur tal-kostruzzjoni u l-industriji anċillari tiegħu, ara n-nota nru 10; għas-settur tat-tessuti, ara FEG/2010/009 ES Tessuti tal-Comunidad Valenciana COM (2010) 613 u FEG/2013/008 ES Tessuti tal-Comunidad Valenciana COM (2014) 45; u għax-xedd tas-saqajn, ara FEG/2011/020 ES Xedd tas-saqajn tal-Comunidad Valenciana COM (2012) 204.

[13]             Analiżi tal-Periklu u l-Punti ta’ Kontroll Kritiċi (HACCP)

[14]             Sitt Sigma (Six Sigma) huwa sett ta’ tekniki u għodod għall-proċess ta’ titjib.

[15]             L-ISO 9001 jistabbilixxi r-rekwiżiti ta’ sistema ta’ ġestjoni tal-kwalità.

[16]             Il-familja tal-ISO 14000 tindirizza aspetti varji ta’ ġestjoni ambjentali.

[17]             Mudell ta’ kwalità tal-EFQM definit mill-Fondazzjoni Ewropea għall-Ġestjoni tal-Kwalità.

[18]             Iwweldjar b’gass inerti tat-tungstenu (iwweldjar TIG), iwweldjar b’gass inerti tal-metall/b’gass attiv tal-metall (iwweldjar MIG/MAG).

[19]             Għodod ta’ magni tal-kontroll numeriku bil-kompjuter (CNC).

[20]             ĠU L 347, 20.12.2013, p. 884.

[21]             ĠU C 373, 20.12.2013, p. 1.

[22]             ĠU L 347, 20.12.2013, p. 855.

[23]             ĠU C 373, 20.12.2013, p. 1.

[24]             ĠU L 347, 20.12.2013, p. 884.

[25]             Skont it-tifsira tal-Artikolu 3(a) tar-Regolament FEG.

[26]             Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi l-klassifikazzjoni tal-istatistika ta' attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

ANNESS

Intrapriża u għadd ta' sensji

ABANTIA INSTALACIONES, SA || 1 || INDUSTRIAL  ANREU SL || 1

ABANTIA TICSA, SAU || 3 || INDUSTRIAS JOSE TAMARIT MORENO SL || 1

ABELLÓN METAL, S.L. || 1 || INDUSTRIAS MECANICAS ROYSER S.L || 1

ACEROS Y OXICORTE ALICANTE S.L. || 1 || INDUSTRIAS METÁLICAS CARBÓ SA || 47

ADOLFO ALBA, S.L. || 1 || INDUSTRIAS OCHOA S.L || 1

ALMACENES METALURGICOS SAU - GRUPO ALMESA || 1 || INDUSTRIAS TAMS S.L || 1

ALMERICH CARPINTERIA METALICA SL || 1 || INDUSTRIAS YUK, SA || 1

ALMESA ALME SA || 1 || INFAC SL || 3

ALPHA DESSIN S.L || 2 || JUMAVI ILUMINACION, S.L. || 1

ALUCASMI, S.L. || 1 || KEMMERICH IBERICA S.L || 1

ALUMINIOS JOSE LUIS, S.L. || 1 || KOSY ,S.L. || 1

ALUMINIOS JUCRIMA, S.L. || 1 || LAMAS Y ESTANTERIAS ,S.L. || 1

ALUMINIOS MONFORTE SL || 1 || LUMOSA METALES S.L || 1

ALUMINIOS RAMJO SL || 2 || MANUFACTURAS TALLMAR S.L || 1

ALUMINIOS VER ASL || 1 || MANUFACTURAS VICEDO S.L || 1

ALUMINIS FAVARA, C.B. || 1 || MAR EXPLOT SLU || 2

ALUMINIS VIDAL TELLOLS, SL || 1 || MASSET Y CATALA FRANCISCO-ANTONIO || 1

ALUPLEX S.L || 1 || MATRICERIA Y DECOLETAJE, S.L. || 2

ANDEVAL, S.L. || 1 || MATRICERIA Y ESTAMPACION  F. SEGURA  SLU || 1

ANTONIO GARCIA SANCHEZ || 1 || MATRICES ALCANTARA,S.L. || 1

APLICACIONES TÉCNICAS DE LA ENERGÍA SL || 120 || MATRITRES,S.L. || 1

ARCELOMITTAL || 3 || METAL CRIS-JOHN ,S.L. || 1

ATECMAN VIALES SL || 1 || METALDYNE SINTERED COMPONENTS ESPAÑA,S.L. || 1

AUTOMATISMOS COS-MAR,S.L. || 1 || METALES TRABAJOS Y SERVICIOS SL || 6

BELSERHER,S.L. || 1 || METALESA, S.L. || 2

CALDERERI E INSTALACIONES GOMEZ ALMERO S.L. || 4 || METALICAS ELCHE SL || 1

CANDELA ALUMINIOS Y VIDRIO, S.L. || 1 || METALURGICAS  ASPRILLAS, S.L. || 1

CARMELO RESINA MANZANO || 1 || MODELOS ATIENZA S.L. || 2

CASTELLANO HERRAJES, COOP. V || 1 || MONTAJES PUENTES & PUENTES, SL || 1

CERRAJERIA DOMINGO SERNA, S.L. || 1 || NIQUELADOS VALENCIA S.L || 1

CERRAJERIA HERMANOS GARCIA S.L. || 4 || ORMET S.L || 2

CERRAJERIA MORATO, S.L. || 1 || PEREZ CAMPILLO FRANCISCO JAVIER || 1

CERRAJERIA SAN NICOLAS S.L || 1 || PERFIL 10 S.L. || 1

CERRAJERIA SILJO, S.L. || 1 || POLIESTER COLOR SA || 1

COLOREAR SL || 14 || PRODUCCIONES SIDERÚRGICAS DEL MEDITERRANEO SA - PROSIMED || 21

COPIMETAL, S.L. || 1 || PROFILTEK SPAIN SA || 3

CORPORACION SRB ENERGY, S.L. || 3 || RAMON PERAL SL || 1

CREACIONES METALICAS SL || 1 || RANMAR S.L || 46

CUATROMETAL 2010 S.L.L || 1 || RECUBRIMIENTOS TECNICOS DE PINTURA S.L || 1

CUSTOCROM S.L || 1 || RECUPERACION  Y AFINAJE DE METALES SA || 1

DIMENSION TECNICA 2012,S.L. || 2 || REUNIÓN INDUSTRIAL, S.L.U. || 1

DISEÑO Y TECNOLOGIA DE MATRICES,S.L. || 1 || RICAMA,S.L. || 1

DISYTEC S.L || 1 || ROLSER SA || 1

DOBON Y TAMARIT, SL || 2 || ROTULACIONES RAPSA  SOCIEDAD LIMITADA || 1

E.M.P.A., S.L. || 1 || RUTALCHI,S.A. || 2

ENDAL SL || 1 || SAF EQUIPAMIENTO COMERCIAL SA || 3

ENVASES METÁLICOS EUROBOX S.L. || 1 || SAMUEL ESPI S.L. || 1

ENVOLVENTES METALICAS JM, S.L. || 1 || SANTIAGO GUTIERREZ  AGUSTIN || 1

EPOXIPLAST,S.L. || 1 || SEMI SA || 2

ESMET FABRICADOS METALICOS, S.L. || 2 || SENDA RECUBRIMIENTOS, S.L. || 1

ESTRUCTURAS  Y CUBIERTAS  2000,S.L. || 5 || SERGIO JOSE PEÑALVER SANSANO || 1

ESTRUCTURAS FERROMAR, SL || 3 || SERVIMETAL ARTESANIA SL || 1

ESTRUCTURAS METÁLICAS EMCASA S.L. || 1 || SOMYCOL S.L. || 3

FABRICACION Y COMERCIALIZACION COMPONENTES D MATRICERIA, S.L || 1 || SUMINISTROS PAIPORTA, S.L. || 1

FAURECIA AUTOMOTIVE ESPAÑA S.A || 1 || TALLERES LUARTO, S.L. || 5

FEDERICO GINER S.A. || 2 || TALLERES MOLINER SL || 3

FERRO ADBRO, S.L. || 1 || TALLERES SANZ BALLESTER SL || 1

FERROS TECA SRL || 1 || TECNIALFER, S.L. || 3

FORJA GARCIA,S.L. || 1 || TECNICA  Y MANIPULACION DE CHAPA S.L || 4

FRANCISCO JAVIER GARCIA S.L || 1 || TECNIMAHER,S.L. || 1

GALOL ,S.A. || 1 || THYSSEN ROS CASARES, S.A. || 1

GARCIA ALBEROLA E HIJOS,  S.L. || 7 || THYSSENKRUPP GALMED || 164

GAVIOTA SIMBAC, S.L. FORJAS DEL VINALOPO || 1 || TOSSAL SERVICIOS INTEGRADOS S.L. || 1

GOMEZ MADRID SOLUCIONES METALICAS, S.L.U. || 1 || TRANSFORMACIONES INDUSTRIALES DEL MEDITERRANEO,S.A. || 1

HERCOR SL || 3 || TROQUELES QUIRANT SL || 1

HEREDEROS DE MIGUEL GRACIA SL || 15 || UNION INDUSTRIAL XATIVA S.L. || 4

HIERROS Y ACEROS ASPE, S.L. || 1 || VALMECA S.A || 2

HIERROS Y ESTRUCTURAS BENIGANIM, S.L. || 2 || VICENTE CALABUIG E HIJOS S.A || 1

HIJOS DE MANUEL PARDO PASTOR, SL || 3 || VICENTE VILA, S.L. || 1

HISPAMIG,S.L. || 2 || VILAMAQ S.L || 1

INDUSTRIA METALGRAFICA VALENCIANA SA || 1 || WOODEQUIP,S.L. || 1

Għadd totali ta' impriżi: 142 || Għadd totali ta' Sensji: || 633

Għadd totali ta’ persuni li jaħdmu għal rashom li l-attività tagħhom waqfet: || 0

Total (ħaddiema u persuni li jaħdmu għal rashom): || 633