Rakkomandazzjoni għal DEĊIŻJONI TAL-KUNSILL li tirrevoka d-Deċiżjoni 2010/407/UE dwar l-eżistenza ta’ defiċit eċċessiv fid-Danimarka /* COM/2014/0434 final */
Rakkomandazzjoni għal DEĊIŻJONI TAL-KUNSILL li tirrevoka d-Deċiżjoni 2010/407/UE
dwar l-eżistenza ta’ defiċit eċċessiv fid-Danimarka IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikolu 126(12)
tiegħu, Wara li kkunsidra r-rakkomandazzjoni
mill-Kummissjoni Ewropea, Billi: (1) Permezz
tad-Deċiżjoni tal-Kunsill 2010/407/UE tat-13 ta' Lulju
2010[1], wara li saret
rakkomandazzjoni mill-Kummissjoni, kien ġie deċiż li
fid-Danimarka kien jeżisti defiċit eċċessiv. Il-Kunsill
innota li skont id-dejta rrappurtata mill-awtoritajiet tad-Danimarka f'April
2010, id-defiċit tal-amministrazzjoni ġenerali ppjanat
għall-2010 kien 5.4 % tal-PDG, u għaldaqstant, 'il fuq mill-valur ta'
referenza ta' 3% tal-PDG skont it-Trattat. Id-dejn gross tal-amministrazzjoni
ġenerali kien mistenni li jkun 45.1% tal-PDG fl-2010, ħafna 'l isfel
mill-valur ta' referenza ta' 60% tal-PDG skont it-Trattat[2]. (2) Fit-13 ta' Lulju 2010,
skont l-Artikolu126(7) tat-TFUE u l-Artikolu 3(4) tar-Regolament
tal-Kunsill (KE) 1467/97 tas-7 ta' Lulju 1997 dwar li
titħaffef u tiġi ċċarata l-implimentazzjoni
tal-proċedura ta’ defiċit eċċessiv[3], il-Kunsill,
abbażi ta' rakkomandazzjoni tal-Kummissjoni, bagħat rakkomandazzjoni
lid-Danimarka bil-għan li s-sitwazzjoni tad-defiċit
eċċessiv tinġieb fi tmiemha sa mhux aktar tard mill-2013.
Ir-rakkomandazzjoni ġiet ippubblikata. (3) Skont l-Artikolu 4
tal-Protokoll dwar il-proċedura ta’ defiċit eċċessiv anness
mat-Trattati, il-Kummissjoni tipprovdi d-dejta għall-implimentazzjoni ta'
din il-proċedura. Bħala parti mill-applikazzjoni ta’ dan
il-Protokoll, l-Istati Membri għandhom jirrappurtaw dejta dwar
id-defiċit u d-dejn tal-gvern tagħhom kif ukoll dwar varjabbli assoċjati
oħra darbtejn fis-sena, jiġifieri qabel l-1 ta’ April u
qabel l-1 ta' Ottubru, skont Artikolu 3 tar-Regolament
tal-Kunsill (KE) Nru 479/2009
tal-25 ta’ Mejju 2009 dwar l-applikazzjoni tal-Protokoll (nru
12) dwar il-proċedura tal-iżbilanċ eċċessiv anness
mat-Trattat li jistabilixxi l-Komunità Ewropea[4].
(4) Meta jiġi biex
jikkunsidra jekk deċiżjoni dwar l-eżistenza ta’ defiċit
eċċessiv għandhiex tiġi revokata, il-Kunsill għandu
jieħu deċiżjoni abbażi tad-dejta notifikata. Barra minn
hekk, deċiżjoni dwar l-eżistenza ta’ defiċit eċċessiv
għandha tiġi revokata biss jekk it-tbassir tal-Kummissjoni jindika li
d-defiċit ma jkunx se jaqbeż il-valur ta' referenza ta' 3% tal-PDG
matul il-perjodu ta’ tbassir[5]. (5) Abbażi tad-dejta
pprovduta mill-Kummissjoni (Eurostat) skont l-Artikolu 14 tar-Regolament
(KE) Nru 479/2009 wara n-notifika mid-Danimarka qabel l-1 ta’
April 2014, u abbażi tat-tbassir tar-rebbiegħa tal-2014
tas-servizzi tal-Kummissjoni, il-konklużjonijiet li ġejjin huma
ġġustifikati: –
Id-defiċit tal-amministrazzjoni pubblika baqa'
taħt il-valur ta' referenza ta' 3 % tal-PDG fil-perjodu 2010-2013,
għajr fl-2012, meta l-bilanċ intlaqat ħażin minn
rimborż ta' darba marbut ma' riforma tal-pensjonijiet fl-2011. Huwa stmat
li r-rimborż ta' darba niżżel il-bilanċ fiskali b'1.6 %
tal-PDG fl-2012. Id-defiċit tal-amministrazzjoni pubblika ammonta
għal 2.5 % tal-PDG fl-2010, 1.9 % tal-PDG fl-2011, 3.8 % tal-PDG fl-2012,
u 0.8 % tal-PDG fl-2013. It-titjib tal-bilanċ fiskali kien dovut għal
miżuri ta' konsolidament kemm fejn jidħol l-introjtu u kemm fejn
jidħol l-infiq, b'mod partikulari permezz ta' tkabbir limitat fil-konsum
pubbliku. –
Il-programm ta' konverġenza tad-Danimarka
tal-2014 ibassar defiċit tal-amministrazzjoni pubblika ta' 1.3 %
tal-PDG fl-2014, u ta' 2.9 % tal-PDG fl-2015. Fil-perjodu 2013-2014,
il-finanzi pubbliċi ntlaqtu minn introjti ta' darba mnissla
mir-ristrutturar tal-pensjonijiet tal-kapital eżistenti, li ta
l-opportunità li jitħallsu r-responsabbiltajiet fiskali tal-pensjonijiet
tal-kapital tal-futur b'rata favorevoli. Huwa stmat li din il-miżura
tixpruna l-bilanċ fiskali bi kważi 1.8 % tal-PDG tul dawk is-sentejn.
Fl-2015, din il-miżura mhux se jkollha impatt, u b'hekk hija mistennija
żieda fid-defiċit tal-finanzi pubbliċi. It-tbassir
tar-rebbiegħa tal-2014 tas-servizzi tal-Kummissjoni jbassar li
d-defiċit tal-amministrazzjoni pubblika se jkun 1.2 % tal-PDG fl-2014,
u 2.7 % tal-PDG fl-2015. B’hekk, id-defiċit mistenni li jibqa’
taħt il-valur ta' referenza tat-Trattat ta’ 3 % tal-PDG matul
il-perjodu ta' tbassir. –
Wara li tjieb b'0.7 % tal-PDG f'termini kumulattivi
bejn l-2011 u l-2013, il-bilanċ strutturali, jiġifieri
aġġustat għaċ-ċiklu ekonomiku u għall-ammont nett
minn miżuri ta' darba u miżuri temporanji oħra, huwa mbassar li
jmur lura b'0.8 % tal-PDG fl-2014 (għal -0.2 % tal-PDG), u b'0.3 % aktar
tal-PDG fl-2015, abbażi ta' suppożizzjoni ta' ebda bidla politika. –
It-tbassir tar-rebbiegħa
tal-2014 tal-Kummissjoni jbassar li d-dejn gross tal-amministrazzjoni pubblika
ser jonqos għal 43.5 % tal-PDG fl-2014, u li wara dan jiżdied
għal 44.9 % tal-PDG fl-2015, 'l isfel mill-valur ta' referenza ta' 60
% tal-PDG skont it-Trattat. (6) Il-Kunsill ifakkar li,
mill-2014, li hija s-sena sussegwenti għas-sena tal-korrezzjoni
tad-defiċit eċċessiv, id-Danimarka hija soġġetta
għall-parti preventiva tal-Patt ta' Stabbiltà u Tkabbir, u għandha
żżomm il-bilanċ strutturali tagħha fil-mira fuq terminu
medju tagħha jew 'il fuq minnha. (7) Skont l-Artikolu 126(12)
tat-Trattat, Deċiżjoni tal-Kunsill dwar l-eżistenza ta’
defiċit eċċessiv għandha tiġi revokata meta, fil-fehma
tal-Kunsill, tkun saret korrezzjoni tad-defiċit eċċessiv fl-Istat
Membru kkonċernat. (8) Fil-fehma tal-Kunsill,
id-defiċit eċċessiv fid-Danimarka ġie kkoreġut u
d-Deċiżjoni 2010/407/KE għalhekk għandha tiġi
revokata, ADOTTA DIN ID-DEĊIŻJONI: Artikolu 1 Minn valutazzjoni globali jsegwi li
s-sitwazzjoni ta' defiċit eċċessiv fid-Danimarka ġiet
ikkorreġuta. Artikolu 2 Id-Deċiżjoni 2010/407/UE hija b’dan
revokata. Artikolu 3 Din id-Deċiżjoni hija indirizzata
lir-Renju tad-Danimarka. Magħmul fi Brussell, Għall-Kunsill Il-President [1] ĠU L 189, 22.7.2010, p. 15. [2] Id-defiċit tal-amministrazzjoni ġenerali
għall-2010 ġie rrivedut sussegwentement għal 2.5 % tal-PDG,
filwaqt li d-dejn gross tal-amministrazzjoni pubblika ġie rrivedut
għal 42.8 % tal-PDG. [3] ĠU L 209, 2.8.1997, p. 6. [4] ĠU L 145, 10.6.2009, p. 1. [5] B'konformità mal-“Ispeċifikazzjonijiet dwar l-implimentazzjoni
tal-Patt ta’ Stabbiltà u Tkabbir u l-Linji Gwida dwar il-format u l-kontenut
ta' Programmi ta' Stabbiltà u Konverġenza”, tat-3 ta’
Settembru 2012. Ara:
http://ec.europa.eu/economy_finance/economic_governance/sgp/pdf/coc/code_of_conduct_en.pdf