MEMORANDUM TA’ SPJEGAZZJONI

1.           IL-KUNTEST TAL-PROPOSTA

It-Trattat dwar il-Funzjonament tal-Unjoni Ewropea (TFUE), li japplika għar-reġjuni ultraperiferiċi tal-UE, u li jinkludu l-Gżejjer Kanarji, fil-prinċipju ma jawtorizza l-ebda differenza bejn it-tassazzjoni ta' prodotti lokali u t-tassazzjoni ta' prodotti minn Spanja jew minn Stati Membri oħra. Madanakollu, l-Artikolu 349 tat-TFUE (li qabel kien l-Artikolu 299(2) tat-Trattat tal-KE) jistipula l-possibbiltà ta’ introduzzjoni ta’ miżuri speċifiċi għal dawk ir-reġjuni minħabba l-eżistenza ta’ diffikultajiet permanenti li jħallu impatt fuq il-kundizzjonijiet ekonomiċi u soċjali tar-reġjuni ultraperiferiċi.

Id-Deċiżjoni tal-Kunsill 2002/546/KE tal-20 ta' Ġunju 2002[1], adottata abbażi tal-Artikolu 299(2) tat-Trattat tal-KE, tawtorizza lil Spanja biex, sat-30 ta’ Ġunju 2014, tapplika eżenzjonijiet mit-taxxa magħrufa bħala 'Arbitrio sobre Importaciones y Entregas de Mercancías en las Islas Canarias' (minn hawn 'il quddiem 'AIEM') jew tnaqqasha għal ċerti oġġetti li huma prodotti lokalment fil-Gżejjer Kanarji. L-Anness għal dik id-Deċiżjoni fih il-lista ta' prodotti li għalihom jistgħu jiġu applikati eżenzjonijiet jew tnaqqis fit-taxxa. Skont il-prodotti, id-differenza fl-impożizzjoni fit-tassazzjoni bejn il-prodotti lokali u l-prodotti l-oħra ma tistax taqbeż il-5, il-15 jew il-25 punti ta' perċentwali.

Id-Deċiżjoni 2002/546/KE tispjega r-raġunijiet tal-adozzjoni ta' miżuri speċifiċi, li jinkludu l-iżolament, il-materja prima u d-dipendenza enerġetika, l-obbligu li jinżammu ħażniet, id-daqs żgħir tas-suq lokali u l-livell baxx tal-attività ta' esportazzjoni. Flimkien, dawn l-iżvantaġġi jfissru żieda fil-kostijiet tal-produzzjoni, li twassal għal żieda fil-prezz tal-kost ta' oġġetti lokali li, mingħajr miżuri speċifiċi, ikunu anqas kompetittivi meta mqabbla ma’ oġġetti minn postijiet oħrajn, anke jekk jitqiesu l-kostijiet biex dawn il-prodotti jiġu ttrasportati lejn il-Gżejjer Kanarji. Dan se jagħmliha iktar diffiċli biex tinżamm il-produzzjoni lokali. Il-miżuri speċifiċi li huma koperti mid-Deċiżjoni 2002/546/KE ġew għaldaqstant imfassla bil-għan li tissaħħaħ l-industrija lokali billi ssir iżjed kompetittiva.

L-AIEM hi taxxa indiretta imposta mill-Istat f’stadju wieħed fuq il-provvisti ta’ oġġetti fil-Gżejjer Kanarji. Il-bażi taxxabbli għall-oġġetti importati hija bbażata fuq il-valur doganali, u dik tal-provvisti tal-oġġetti minn produtturi fil-Gżejjer Kanarji hija bbażata fuq l-ammont totali tal-kumpens. Il-miżuri speċifiċi koperti mid-Deċiżjoni 2002/546/KE jistabbilixxu forma ta’ tassazzjoni differenzjata, li tibbenefika l-produzzjoni lokali ta’ ċerti prodotti. Dan il-benefiċċju fuq it-taxxa jikkostitwixxi għajnuna mill-Istat li teħtieġ l-approvazzjoni tal-Kummissjoni, li ngħatat permezz tad-Deċiżjoni dwar l-Għajnuna mill-Istat NN 22/2008.

Fis-16 ta' Novembru 2010, Spanja ressqet talba quddiem il-Kummissjoni biex testendi l-perjodu tal-applikazzjoni tad-Deċiżjoni 2002/546/KE b'sentejn, sabiex id-data tal-iskadenza tkun tikkoinċidi ma' dik tal-Linji Gwida dwar l-għajnuna reġjonali nazzjonali għall-perjodu bejn l-2007 u l-2013[2].

Barra minn hekk, Spanja introduċiet ukoll talba għall-estensjoni b'sentejn tal-perjodu ta' applikazzjoni tad-Deċiżjoni dwar l-Għajnuna mill-Istat NN 22/2008. Skont din id-Deċiżjoni, l-għajnuna mogħtija mill-awtoritajiet Spanjoli, fir-rigward tal-AIEM, kienet kompatibbli mas-suq komuni. Il-Kummissjoni awtorizzat din l-estensjoni għal sentejn permezz tad-Deċiżjoni tagħha dwar l-Għajnuna mill-Istat SA 31950 (N 544/2010)[3], li estendiet il-perjodu tad-Deċiżjoni dwar l-Għajnuna mill-Istat NN 22/2008 sal-31 ta’ Diċembru 2013.

Fir-rigward tat-talba għall-estensjoni tal-perjodu tal-applikazzjoni tad-Deċiżjoni 2002/546/KE, il-Kummissjoni vvalutatha fid-dawl tad-daqs tal-iżvantaġġi li jaffettwaw lill-Gżejjer Kanarji u waslet għall-konklużjoni li kien iġġustifikat li tagħti l-estensjoni mitluba.

Fil-fatt, ir-rapport mill-Kummissjoni lill-Kunsill dwar l-applikazzjoni tal-arranġamenti speċjali dwar it-taxxa AIEM applikabbli għall-Gżejjer Kanarji, li ġie adottat fit-28 ta' Awwissu 2008, ikkonferma li l-AIEM kienet qiegħda taħdem b'mod sodisfaċenti u ma kien hemm l-ebda ħtieġa li jsiru emendi għad-dispożizzjonijiet tad-Deċiżjoni 2002/546/KE.

Għaldaqstant, id-Deċiżjoni tal-Kunsill 895/2011/UE tad-19 ta’ Diċembru 2011[4] emendat id-Deċiżjoni 2002/546/KE, billi estendiet il-perjodu ta’ applikazzjoni tagħha sal-31 ta’ Diċembru 2013.

Fl-4 ta’ Marzu 2013, l-awtoritajiet Spanjoli talbu lill-Kummissjoni biex tħejji Deċiżjoni tal-Kunsill li tawtorizza lil Spanja biex tapplika eżenzjonijiet jew tnaqqis fl-AIEM għal ċerti prodotti li huma prodotti lokalment fil-Gżejjer Kanarji għall-perjodu 2014-2020, bl-immodifikar tal-lista ta’ prodotti u tar-rati massimi applikabbli għal xi wħud minnhom.

Fit-28 ta’ Ġunju 2013, il-Kummissjoni adottat Linji Gwida ġodda dwar l-għajnuna reġjonali għall-perjodu 2014-2020[5]. Dawn il-Linji Gwida huma parti minn strateġija usa’ biex jiġi mmodernizzat il-kontroll tal-għajnuna mill-Istat, bil-għan li jitrawwem it-tkabbir fis-Suq Uniku billi jiġu nkoraġġiti miżuri ta' għajnuna aktar effettivi u l-infurzar tal-Kummissjoni jkun iffokat fuq il-każijiet li għandhom l-ikbar impatt fuq il-kompetizzjoni.

Meta wieħed jikkunsidra li dawn il-Linji Gwida ser jidħlu fis-seħħ fl-1 ta’ Lulju 2014, jidher iġġustifikat li l-perjodu ta' applikazzjoni tad-Deċiżjoni 2002/546/KE, kif emendat bid-Deċiżjoni 895/2011/UE, jiġi estiż għal sitt xhur, biex b’hekk id-data tal-iskadenza tkun tikkoinċidi mal-iskadenza tal-Linji Gwida attwalment fis-seħħ. Id-Deċiżjoni 2002/546/KE ġiet emendata kif xieraq bid-Deċiżjoni 1413/2013/UE[6] li estendiet l-applikazzjoni tagħha sat-30 ta’ Ġunju 2014.

Il-Kummissjoni analizzat it-talba li waslet mill-awtoritajiet Spanjoli, kif ukoll l-informazzjoni pprovduta minn ħafna partijiet interessati differenti li ħadu l-inizjattiva biex jikkuntattjaw lill-Kummissjoni. Din l-analiżi tikkonferma li l-karatteristiċi speċjali tal-Gżejjer Kanarji jirrestrinġu l-iżvilupp tagħhom u huma responsabbli għal kostijiet addizzjonali għall-operaturi li jinsabu hemmhekk. Għalhekk huwa ġġustifikat li tinżamm l-eżenzjoni tal-AIEM għal lista ta’ prodotti industrijali prodotti lokalment. Din il-miżura hija meħtieġa u proporzjonata u ma’ tpoġġix fil-periklu l-intergrità u l-koerenza tal-ordni legali tal-Unjoni.

2.           ANALIŻI TAT-TALBA SPANJOLA U TAL-PROPORZJONALITÀ TAD-DEĊIŻJONI TAD-DEROGA

Skont l-Artikolu 110 TFUE l-ebda Stat Membru ma għandu japplika, direttament jew indirettament, fuq il-prodotti ta’ Stati Membri oħra taxxi interni ta' kull deskrizzjoni, ogħla minn dawk applikati direttament jew indirettament fuq prodotti simili nazzjonali. Barra dan, ebda Stat Membru ma għandu japplika fuq il-prodotti ta' Stati Membri oħra taxxi interni ta' tali natura li jagħtu protezzjoni indiretta lill-produzzjoni ta' prodotti oħrajn.

Madankollu, abbażi tal-Artikolu 349 TFUE l-Kunsill jista’ jawtorizza Stati Membri b’reġjuni u dipartimenti ultraperiferiċi li jidderogaw mid-dispożizzjonijiet tal-Artikolu 110 tat-TFUE sabiex jittieħed kont tas-sitwazzjoni strutturali soċjali u ekonomika ta’ dawn ir-reġjuni u li hija aktar ikkumplikata minħabba fatturi oħra li jirrestrinġu bi kbir l-iżvilupp tagħhom. Din id-deroga ma għandhiex tfixkel l-integrità u l-koerenza tal-ordni legali tal-Unjoni, inklużi s-suq intern u l-politika komuni, bħalma huma l-politika fiskali komuni bbażata fuq l-Artikolu 113 tat-TFUE. B’hekk, dawn id-derogi għandhom jibqgħu proporzjonali, jiġifieri ma jmorrux lil hinn minn dak li hu meħtieġ biex jindirizzaw kundizzjonijiet oqfsa ħżiena li jfixklu l-iżvilupp ekonomiku ta’ dawn ir-reġjuni u ma jridux ifixklu b'mod eċċessiv il-kompetizzjoni fis-suq uniku. B’konsegwenza ta’ dan, kull deroga mill-Artikolu 110 TFUE għandha tibqa’ limitata għall-kumpens komplet jew parzjali tal-kost tal-iżvantaġġ minn produtturi f’dawn ir-reġjuni li jsofru.

L-ekonomija tal-Gżejjer Kanarji hija dipendenti ħafna fuq it-turiżmu. Din id-dipendenza hija theddida serja għall-iżvilupp tal-Gżejjer Kanarji minħabba tibdil fit-togħma, diżastri naturali jew ta’ riċessjoni ekonomika jista' jkollha impatt kbir fis-sitwazzjoni ekonomika u soċjali tal-arċipelagu. Dan kien preċiżament dak li seħħ waqt il-kriżi finanzjarja globali tal-2008 u l-2009 li kellha impatt qawwi fl-għadd ta’ turisti li qed iżuru l-Gżejjer u, konsegwentement, fl-ekonomija tagħha. It-tnaqqis f’turisti wassal għal żieda kbira fil-livelli tal-qgħad, bir-rata tal-qgħad issir ogħla milli fi Spanja kontinentali, li hija, flimkien mal-Greċja, wieħed miż-żewġ Stati Membri bl-ogħla rata ta’ qgħad fl-Unjoni Ewropea. It-tkabbir kien saħansitra aktar viżibbli fir-rata tal-qgħad fost iż-żgħażagħ, li jista’ jiġi spjegat minn għadd kbir ta’ żgħażagħ li jiddependu fuq impjiegi staġjonali maħluqa mit-turiżmu.    

Is-suq tal-Gżejjer Kanarji huwa kkaratterizzat ukoll mid-dimensjoni mnaqqsa tagħha li jipprevjeni l-industriji milli jilħqu l-aħjar punt ta’ produzzjoni. Il-biċċa l-kbira tal-magni industrijali huma iddisinjati biex jipproduċu fuq skala kbira, sabiex tiżdied il-produttività u l-qligħ. Dawn il-magni mhumiex iddisinjati għal suq iżgħar, li jiġġeneraw kapaċità produttiva mhux użata, li jfisser li l-industriji huma mġiegħla jaħdmu f’livell ta’ produzzjoni aktar baxx minn dak meħtieġ biex jitnaqqsu l-kostijiet ta’ produzzjoni, li jillimitaw l-opportunitajiet għal ekonomiji ta’ skala.

Il-pajjiżi u t-territorji qrib il-Gżejjer Kanarji (il-Marokk, is-Saħara tal-Punent u l-Mawritanja) naqqsu l-kapaċità akkwistattiva, u d-differenza konsiderevoli fl-iżvilupp jillimita l-possibbiltajiet għall-esportazzjonijiet tal-Gżejjer Kanarji. 

Karatteristika oħra tal-Gżejjer Kanarji b’effett importanti b'kostijiet addizzjonali li ntefqu minn operaturi stabbiliti hemm, hi l-frammentazzjoni territorjali u d-distanza lejn is-sorsi tal-biċċa l-kbira tal-materja prima, li tiġġenera kostijiet ogħla tat-trasport. Il-problema ġiet aggravata minn żieda fil-prezzijiet taż-żejt li kellha impatt importanti fiż-żieda tal-kostijiet tat-trasport.

L-ilma huwa riżors skars fil-Gżejjer Kanari. L-insuffiċjenza ta’ ilma għandha impatt evidenti fil-kost, li joħloq żvantaġġ kompetittiv lejn industriji li jinsabu f’partijiet oħra ta’ Spanja jew l-Unjoni Ewropea. Dan huwa partikolarment importanti għall-industriji li jużaw l-ilma bħala materja prima importanti (eż. l-ikel, il-kimika, il-karta) iżda wkoll dawk li jeħtieġu livelli għolja ta’ refriġerazzjoni.

Hemm proġetti għall-introduzzjoni ta’ gass naturali fiż-żewġ gżejjer ewlenin tal-Gżejjer Kanarji, iżda mhuwiex ċar meta dan il-fjuwil jista' jintuża b’mod effettiv. In-nuqqas ta’ gass naturali jiġġenera element importanti ta’ telf ta’ kompetittività, hekk kif il-kost tal-ġenerazzjoni tas-sħana u l-enerġija bl-użu ta’ sorsi oħra hija konsiderevolment aktar għalja.

Peress li ma hemm l-ebda impjant ta’ riċiklaġġ u l-iskart irid jiġi ttrasportat lejn il-kontinent u skart tossiku għandu jiġi ttrattat barra l-Gżejjer Kanarji, ir-rimi ta’ skart industrijali u t-trattament ta’ skart tossiku jwassal għal kostijiet ambjentali ogħla.

Il-karatteristiċi tal-Gżejjer Kanarji deskritti qabel sa ċertu punt kollha jaffettwaw il-produzzjoni domestika. Huwa għalhekk xieraq li jiġi verifikat x’kien l-effett ta’ tassazzjoni differenzjata eżistenti fis-sehem tas-suq tal-produzzjoni lokali u li din it-tassazzjoni differenzjata tiġi aġġustata sabiex tiżgura li ma jkunx hemm distorsjoni eċċessiva fil-kompetizzjoni.

L-analiżi li saret sabiex tikkonkludi dwar ir-rati differenzjati aċċettati qieset mhux biss is-sehem tas-suq medju tal-produzzjoni lokali fil-perjodu 2008-2011, iżda wkoll l-evoluzzjoni tiegħu u informazzjoni oħra pprovduta mill-partijiet interessati li kkuntattjaw lill-Kummissjoni biex jipprovdu l-informazzjoni rilevanti. Għal industriji li jipproduċu prodotti b’tariffi doganali komuni differenti ġie analizzat l-evoluzzjoni tas-sehem kombinat fis-suq għall-prodotti kollha u mhux biss l-ishma tas-suq individwali.  Dawn ir-raġunijiet jispjegaw għaliex prodotti b’ishma tas-suq simili medju tal-produzzjoni lokali ma jkollhomx l-istess rata massima ta’ tassazzjoni differenzjata.

Fil-każ ta’ tabakk, huwa ssuġġerit li tinżamm ir-rata differenzjata għal 25 % u jiġi aġġornat il-minimu għal 1000 sigarett minn EUR 6 għal EUR 18 kif mitlub mill-awtoritajiet Spanjoli.

L-awtoritajiet Spanjoli inkludew fil-lista ta’ prodotti li huma soġġetti għal tassazzjoni differenzjata xi prodotti b’sehem estremament żgħir fis-suq tal-produzzjoni lokali. Il-ġustifikazzjoni ppreżentata mill-awtoritajiet Spanjoli hija li hemm pjanijiet li jżidu l-produzzjoni lokali ta’ dawn il-prodotti, żieda li mhux se tkun possibbli mingħajr tassazzjoni differenzjata.

B’kollox, mill-139 prodott imsemmi fit-talba li waslet mill-awtoritajiet Spanjoli, il-Kummissjoni taċċetta r-rata kif mitlub għal 119 minn dawn, filwaqt li għall-20 li għad baqa' il-Kummissjoni tikkunsidra li r-rata differenzjata għandha tkun aktar baxxa, biex tipprevjeni każijiet possibbli ta’ distorsjoni tal-kompetizzjoni.

Mill-analiżi dettaljata li saret mill-Kummissjoni, huwa possibbli li jiġu stabbiliti listi differenti ta’ prodotti skont ir-rati ta’ taxxa differenzjata, is-settur u t-Tariffa Doganali Komuni:

5%

Prodotti agrikoli u tas-sajd:

0207 11/0207 13

Minerali:

2516 90 00 00/6801/6802

Materjali tal-bini:

3816/3824 40 00 00/3824 50/3824 90 45 00/3824 90 70 00/ 3824 90 97 99/ 6809

Sostanzi kimiċi:

2804 30 00 00/2804 40 00 00/3105 20 90 00/3208/3209/3210/3212 90 00 00/3213/3214/3304 99 00 00/3925 90 80 00/ 3401/3402/3406/3814 00 90/3923 90 00 00/4012 11 00/4012 12 00/4012 13/4012 19

L-industriji tax-xogħol tal-ħadid:

7604/7608

L-industrija tal-ikel:

0210 12 11 00/0210 12 19 00/0210 19 40 00/0210 19 81/0305 41 00/0305 43 00 90/

0901 22 00 00/1101/1102/1601/1602/1704 90 30 00/1704 90 51 00/1704 90 55 00/

1704 90 75 00/1704 90 71 00/1806/1901 20 00 00/1901 90 91 00/1901 90 99/

1904 10 10/1905/2005 20 20/2006 00 31 00/2008 11 96 00/2008 11 98 00/2008 19 92/

2008 19 93/2008 19 95/2008 19 99/2309

Xorb:

2009 11/2009 12 00/2009 19/2009 41/2009 49/2009 50/2009 61/2009 71/2009 79/2009 89/ 2009 90/2201/2202/2204

It-tessuti u l-ġilda:

6112 31/6112 41

Karta:

4818 90 90 00/4823 90 85 90

L-arti grafika u l-pubblikazzjoni:

4910

10 %

Prodotti agrikoli u tas-sajd:

0203 11/0203 12/0203 19/0701 90/0703

Materjali tal-bini:

2523 29 00 00/

L-industrija tal-ikel:

0210 11 11 00/0210 11 31 00/1905/2105

Karta:

4808/4819/4823 90 40 00/

15 %

Prodotti agrikoli u tas-sajd:

0407 21 00 00/0407 29 10 00/0407 90 10 00

Materjali tal-bini:

2523 90/7010

Sostanzi kimiċi:

3809 91 00/3917 21/3917 23/3917 32 00/ 3917 33 00/3917 39 00/3917 40 00/3923 10 00/39 23 21 00/3923 30 10/3924 10 00

L-industriji tax-xogħol tal-ħadid:

7309 00/7610 10 00 00/9403 20 80 90

L-industrija tal-ikel:

0403/0901 21/1902/2103 20 00 00/2103 30/2103 90 90/2106 90 98/

Xorb:

2203/2208 40

It-tessuti u l-ġilda:

6302

Karta:

4818 10/4818 20/4818 30/4821

L-arti grafika u l-pubblikazzjoni:

4909/4911

25 %

It-tabakk:

2402

Dawn il-listi ta’ prodotti jindirizzaw l-għan tal-Artikolu 349 biex jiġu adottati miżuri speċifiċi biex jikkunsidraw il-karatteristiċi speċjali tal-Gżejjer Kanarji bħala reġjuni ultraperiferiċi, filwaqt li fl-istess ħin, ma ssirx distorsjoni tal-kompetizzjoni b’mod li jista' jiġi pperikolat is-suq intern.

Meta l-awtoritajiet Spanjoli jissottomettu r-rapport previst fl-Artikolu 2 ta’ din id-Deċiżjoni tal-Kunsill ikun ta’ min li l-Kummissjoni tevalwa l-effetti tar-rati differenzjati u tevalwa l-ħtieġa ta’ bidliet. Ikun ukoll importanti f’dak iż-żmien biex jiġi verifikat jekk kien hemm żieda fil-produzzjoni lokali ta’ dawk il-prodotti li għalihom hi mitluba tassazzjoni differenzjata iżda li m’għandhomx produzzjoni lokali sinifikanti fil-mument.

3.           L-ELEMENTI LEGALI TAL-PROPOSTA

Sommarju tal-miżuri proposti

Li tawtorizza lil Spanja li tapplika eżenzjonijiet jew tnaqqis tat-taxxa magħrufa bħala AIEM għal ċerti prodotti li huma prodotti lokalment fil-Gżejjer Kanarji.

Bażi ġuridika

L-Artikolu 349 TFUE.

Prinċipju tas-sussidjarjetà

Il-Kunsill biss għandu s-setgħa li jadotta, abbażi tal-Artikolu 349 TFUE, miżuri speċifiċi favur ir-reġjunijiet ultraperiferiċi għall-adattament tal-applikazzjoni tat-Trattati għal dawn ir-reġjuni, inkluża l-politika komuni, minħabba l-iżvantaġġi permanenti li jħallu impatt fuq il-kundizzjonijiet ekonomiċi u soċjali tar-reġjuni l-aktar imbiegħda.

Għaldaqstant, il-proposta hija konformi mal-prinċipju tas-sussidjarjetà.

Prinċipju tal-proporzjonalità

Il-proposta tikkonforma mal-prinċipju tal-proporzjonalità għar-raġunijiet li ġejjin.

L-għażla ta’ strument

L-istrument li qed jiġi propost: Deċiżjoni tal-Kunsill.

Strumenti oħrajn ma jkunux adegwati minħabba r-raġuni li ġejja:

Id-derogi mogħtija skont l-Artikolu 349 TFUE jinsabu fid-deċiżjonijiet tal-Kunsill.

4.           IMPLIKAZZJONI BAĠITARJA

Il-proposta ma għandha l-ebda impatt fuq il-baġit tal-Unjoni Ewropea.

2014/0093 (CNS)

Proposta għal

DEĊIŻJONI TAL-KUNSILL

fuq it-taxxa AIEM applikabbli fil-Gżejjer Kanarji

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 349 tiegħu,

Wara li kkunsidra l-proposta mill-Kummissjoni Ewropea,

Wara li kkunsidra l-opinjoni tal-Parlament Ewropew[7],

Filwaqt li jaġixxi skont proċedura leġislattiva speċjali,

Billi:

(1)       Skont l-Artikolu 349 tat-TFUE, il-Kunsill, filwaqt li jqis is-sitwazzjoni strutturali soċjali u ekonomika tar-reġjuni ultraperiferiċi, li hija aggravata mid-distanza, l-insularità, id-daqs żgħir, it-topografija u l-klima diffiċli u d-dipendenza ekonomika fuq ftit prodotti, għandu jadotta miżuri speċifiċi mmirati, b’mod partikolari, li jistabbilixxu l-kondizzjoni tal-applikazzjoni tat-Trattati għal dawk ir-reġjuni, inklużi l-politiki komuni.

(2)       Għaldaqstant għandhom jiġu adottati miżuri speċifiċi sabiex jistabbilixxu l-kondizzjonijiet għall-applikazzjoni tat-Trattat għal dawk ir-reġjuni. Għandhom iqisu l-karatteristiċi u r-restrizzjonijiet speċjali ta' dawn ir-reġjuni, bla preġudizzju għall-integrità u l-koerenza tal-ordni ġuridiku Komunitarju, inklużi s-suq intern u l-politiki komuni.

(3)       Fil-quċċata tal-lista ta’ żvantaġġi identifikati fil-Gżejjer Kanarji hija l-predominanza tas-settur tas-servizzi u b’mod partikolari t-turiżmu fil-prodott reġjonali u wkoll id-dipendenza tal-ekonomija tal-Gżejjer Kanarji fuq dan is-settur u s-sehem żgħir tal-industrija fil-PDG tal-Gżejjer Kanarji.

(4)       Fit-tieni post huwa l-iżolament inerenti f’arċipelagu li jfixkel il-moviment ħieles ta’ persuni, oġġetti u servizzi. Id-dipendenza fuq ċerti modi ta’ trasport, it-trasport bl-ajru u t-trasport marittimu tiżdied peress li dawn huma mezzi ta’ trasport li għadhom ma ġewx liberalizzati kompletament. Il-kostijiet tal-produzzjoni huma akbar minħabba li dawn il-modi ta’ trasport huma inqas effiċjenti u aktar għalja milli bit-triq jew bil-ferroviji.

(5)       Bħala konsegwenza ulterjuri ta’ dan l-iżolament, tirriżulta żieda fil-kostijiet ta’ produzzjoni minn dipendenza f’termini ta’ materja prima u enerġija, l-obbligu li jinżammu ħażniet u diffikultajiet li jaffettwaw il-forniment ta’ tagħmir ta’ produzzjoni.

(6)       Id-daqs żgħir tas-suq u l-livell baxx ta’ attività ta’ esportazzjoni, il-frammentazzjoni ġeografika tal-arċipelagu, u l-obbligu li jinżammu linji ta’ produzzjoni żgħar iżda diversifikati biss sabiex jissodisfaw ir-rekwiżiti ta’ suq żgħir, jillimita l-opportunitajiet għal ekonomiji ta’ skala.

(7)       F’ħafna każijiet huwa aktar diffiċli jew aktar għali biex tikseb servizzi speċjalizzati u ta’ manutenzjoni, u taħriġ għal maniġers u tekniċi, jew li tissottokuntratta jew tippromwovi l-espansjoni ta' negozju lil hinn mis-suq tal-gżejjer Kanarji. Il-firxa dejqa ta’ metodi ta’ distribuzzjoni tirriżulta wkoll f’eċċess ta' stokk.

(8)       Fir-rigward l-ambjent, ir-rimi ta’ skart industrijali u t-trattament ta’ skart tossiku jagħti lok għal kostijiet ambjentali ogħla. Dawn il-kostijiet huma ogħla minħabba li ma hemmx impjanti tar-riċiklaġġ, ħlief għal ċerti prodotti, u l-iskart irid ikun ittrasportat lejn il-kontinent u l-iskart tossiku għandu jiġi ttrattat barra l-Gżejjer Kanarji.

(9)       Fuq il-bażi ta’ din l-informazzjoni kollha u n-notifika mill-awtoritajiet Spanjoli, huwa rakkomandabbli li tiġġedded l-awtorizzazzjoni biex l-applikazzjoni ta’ taxxa għal lista ta’ prodotti lokali li għalihom eżenzjonijiet għal prodotti lokali tkun permessa.

(10)     Id-Deċiżjoni tal-Kunsill 2002/546/KE tal-20 ta' Ġunju 2002[8], adottata abbażi tal-Artikolu 299 tat-Trattat tal-KE, tawtorizza lil Spanja biex, sal-31 ta’ Diċembru 2011, tapplika eżenzjonijiet mit-taxxa magħrufa bħala ‘Arbitrio sobre Importaciones y Entregas de Mercancías en las Islas Canarias’ (minn hawn 'il quddiem 'AIEM') jew tnaqqasha għal ċerti oġġetti li huma prodotti lokalment fil-Gżejjer Kanarji. L-Anness għal dik id-Deċiżjoni fih il-lista ta' prodotti li għalihom jistgħu jiġu applikati eżenzjonijiet jew tnaqqis fit-taxxa. Skont il-prodotti, id-differenza fl-impożizzjoni bejn il-prodotti lokali u l-prodotti l-oħra ma tistax taqbeż il-5, il-15 jew il-25 punti ta' perċentwali.

(11)     Id-Deċiżjoni tal-Kunsill 895/2011/UE tad-19 ta’ Diċembru 2011[9] emendat id-Deċiżjoni 2002/546/KE billi estendiet il-perjodu tal-applikazzjoni tagħha sal-31 ta' Diċembru 2013.

(12)     Id-Deċiżjoni tal-Kunsill 1413/2013/UE tas-17 ta’ Diċembru 2013[10] emendat id-Deċiżjoni 2002/546/KE billi estendiet il-perjodu tal-applikazzjoni tagħha sat-30 ta' Ġunju 2014.

(13)     It-taxxa AIEM qed isservi l-għan tal-iżvilupp awtonomu tas-setturi ta’ produzzjoni industrijali tal-Gżejjer Kanarji u għad-diversifikazzjoni tal-ekonomija tal-Gżejjer.

(14)     L-eżenzjonijiet massimi li jistgħu jkunu applikati għall-prodotti industrijali inkwistjoni jvarjaw skont is-settur u l-prodott, minn 5 % għal 15 %.

(15)     L-eżenzjoni massima applikabbli għal prodotti tat-tabakk lesti huwa madankollu ogħla, għaliex is-settur tat-tabakk huwa każ eċċezzjonali. L-industrija tat-tabakk, li kienet espandiet ħafna fil-Gżejjer Kanarji, ilha tonqos b’mod sinifikanti ħafna għal għadd ta’ snin. L-iżvantaġġi tradizzjonali tal-insularità deskritti hawn fuq huma naturalment fl-oriġini tat-tnaqqis lokali għall-produzzjoni tat-tabakk fil-Gżejjer Kanarji. Hemm raġunijiet għaż-żamma ta’ eżenzjoni sostanzjali għat-tabakk. Eżenzjoni mit-taxxa hija f’relazzjoni diretta mal-għan li tinżamm il-produzzjoni fil-Gżejjer Kanarji.

(16)     L-għanijiet li jippromwovu l-iżvilupp soċjo-ekonomiku tal-Gżejjer Kanarji huma riflessi fil-livell nazzjonali għall-għan tat-taxxa u l-allokazzjoni tad-dħul li hija tiġġenera. L-inkorporazzjoni tad-dħul minn din it-taxxa fir-riżorsi tal-Gżejjer Kanarji tas-sistema ekonomika u tat-taxxi u l-użu tagħha għal żvilupp ekonomiku u soċjali tal-istrateġija li l-promozzjoni ta’ attivitajiet lokali hi obbligu legali.

(17)     L-arranġamenti għandhom japplikaw għal 6,5 snin. Madankollu se jkun meħtieġ li jiġu evalwati r-riżultati tagħhom. L-awtoritajiet Spanjoli għandhom b’hekk jippreżentaw lill-Kummissjoni sa mhux aktar tard mit-30 ta’ Settembru 2017 rapport dwar l-applikazzjoni tal-arranġamenti msemmija fl-Artikolu 1, sabiex teżamina l-impatt tal-miżuri meħuda u l-kontribuzzjoni tagħhom għal promozzjoni jew iż-żamma ta’ attivitajiet ekonomiċi lokali, billi jiġu kkunsidrati l-iżvantaġġi li jaffettwaw ir-reġjuni ultraperiferiċi. Fuq din il-bażi, l-ambitu u l-eżenzjonijiet awtorizzati skont regoli tal-Komunità għandhom b'hekk jiġu riveduti jekk dan ikun meħtieġ.

(18)     Il-vantaġġ fiskali li jkopri AIEM jeħtieġ li jibqa’ proporzjonat sabiex ma jfixkilx l-integrità u l-koerenza tal-ordni legali tal-Unjoni, inklużi l-protezzjoni ta’ kompetizzjoni mingħajr xkiel fis-suq intern u l-politiki ta’ għajnuna mill-Istat.

(19)     Din id-Deċiżjoni preżenti hija bla ħsara għall-applikazzjoni possibbli tal-Artikoli 107 u 108 tat-TFUE,

ADOTTA DIN ID-DEĊIŻJONI:

Artikolu 1

1.         B’deroga mill-Artikoli 28, 30 u 110 tat-Trattat dwar il-Funzjonament tal-Unjoni Ewropea, l-awtoritajiet Spanjoli għandhom jiġu awtorizzati sal-31 ta’ Diċembru 2020 li jistipulaw, fir-rigward ta’ prodotti elenkati fl-Anness li huma prodotti lokalment fil-Gżejjer Kanari, eżenzjonijiet totali jew tnaqqis parzjali tat-taxxa magħrufa bħala “Arbitrio sobre las Importaciones y Entregas de mercancias en las islas Canarias (AIEM)”. Dawn l-eżenzjonijiet għandhom jagħmlu parti mill-istrateġija għall-iżvilupp ekonomiku u soċjali tal-Gżejjer Kanarji u jikkontribwixxu għall-promozzjoni ta’ attivitajiet lokali.

2.         L-applikazzjoni ta’ eżenzjonijiet jew tnaqqis totali msemmija fil-paragrafu 1 jistgħu ma jwasslux għal differenzi li jeċċedu:

(a) 5 % għall-prodotti elenkati fl-Anness, it-Taqsima A;

(a) 10 % għall-prodotti elenkati fl-Anness, it-Taqsima B;

(a) 15 % għall-prodotti elenkati fl-Anness, it-Taqsima C;

(d) 25 % għall-prodotti elenkati fl-Anness, it-Taqsima D. Madankollu, l-awtoritajiet Spanjoli jistgħu jistabbilixxu taxxa minima fuq is-sigaretti ta’ mhux aktar minn EUR 18 għal kull 1 000 sigarett, applikabbli biss jekk it-taxxa AIEM li tirriżulta mill-applikazzjoni ta’ tipi ġenerali ta’ tassazzjoni hija taħt din iċ-ċifra.

Artikolu 2

L-awtoritajiet Spanjoli għandhom b’hekk jippreżentaw lill-Kummissjoni sa mhux aktar tard mit-30 ta’ Settembru 2017 rapport dwar l-applikazzjoni tal-arranġamenti msemmija fl-Artikolu 1, sabiex teżamina l-impatt tal-miżuri meħuda u l-kontribuzzjoni tagħhom għal promozzjoni jew iż-żamma ta’ attivitajiet ekonomiċi lokali, billi jiġu kkunsidrati l-iżvantaġġi li jaffettwaw ir-reġjuni ultraperiferiċi.

Fuq din il-bażi, il-Kummissjoni għandha tippreżenta rapport lill-Kunsill li tinkludi analiżi sħiħa tal-aspetti ekonomiċi u soċjali u, fejn ikun xieraq, proposta mmirata għall-adattament tad-dispożizzjonijiet ta’ din id-Deċiżjoni.

Artikolu 3

Din id-Deċiżjoni għandha tkun applikabbli mill-1 ta' Lulju 2014.

Artikolu 4

Din id-Deċiżjoni hija indirizzata lir-Renju ta’ Spanja.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 179, 9.7.2002, p. 22-27.

[2]               ĠU C 54, 4.3.2006, p. 13.

[3]               ĠU C 237, 13.8.2011, p. 1.

[4]               ĠU L 345, 29.12.2011, p. 17.

[5]               ĠU C 209, 23.7.2013, p. 1.

[6]               ĠU L 353, 28.12.2013, p.13,14.

[7]               ĠU C […].

[8]               ĠU L 179,9.7.2001, p. 22

[9]               ĠU L 345, 29.12.2011, p. 17.

[10]             ĠU L 353, 28.12.2013, p.13,14.

ANNESS

A. Lista ta' prodotti li hemm referenza għalihom fl-Artikolu 1(2)(a) skont il-klassifikazzjoni tan-Nomenklatura tat-Tariffa Doganali Komuni

Prodotti agrikoli u tas-sajd:

0207 11/0207 13

Minerali:

2516 90 00 00/6801/6802

Materjali tal-bini:

3816/3824 40 00 00/3824 50/3824 90 45 00/3824 90 70 00/ 3824 90 97 99/ 6809

Sostanzi kimiċi:

2804 30 00 00/2804 40 00 00/3105 20 90 00/3208/3209/3210/3212 90 00 00/3213/3214/3304 99 00 00/3925 90 80 00/ 3401/3402/3406/3814 00 90/3923 90 00 00/4012 11 00/4012 12 00/4012 13/4012 19

L-industriji tax-xogħol tal-ħadid:

7604/7608

L-industrija tal-ikel:

0210 12 11 00/0210 12 19 00/0210 19 40 00/0210 19 81/0305 41 00/0305 43 00 90/

0901 22 00 00/1101/1102/1601/1602/1704 90 30 00/1704 90 51 00/1704 90 55 00/

1704 90 75 00/1704 90 71 00/1806/1901 20 00 00/1901 90 91 00/1901 90 99/

1904 10 10/1905/2005 20 20/2006 00 31 00/2008 11 96 00/2008 11 98 00/2008 19 92/

2008 19 93/2008 19 95/2008 19 99/2309

Xorb:

2009 11/2009 12 00/2009 19/2009 41/2009 49/2009 50/2009 61/2009 71/2009 79/2009 89/ 2009 90/2201/2202/2204

It-tessuti u l-ġilda:

6112 31/6112 41

Karta:

4818 90 90 00/4823 90 85 90

L-arti grafika u l-pubblikazzjoni:

4910

B. Lista ta' prodotti li hemm referenza għalihom fl-Artikolu 1(2)(b) skont il-klassifikazzjoni tan-Nomenklatura tat-Tariffa Doganali Komuni

Prodotti agrikoli u tas-sajd:

0203 11/0203 12/0203 19/0701 90/0703

Materjali tal-bini:

2523 29 00 00/

L-industrija tal-ikel:

0210 11 11 00/0210 11 31 00/1905/2105

Karta:

4808/4819/4823 90 40 00

C. Lista ta' prodotti li hemm referenza għalihom fl-Artikolu 1(2)(c) skont il-klassifikazzjoni tan-Nomenklatura tat-Tariffa Doganali Komuni

Prodotti agrikoli u tas-sajd:

0407 21 00 00/0407 29 10 00/0407 90 10 00

Materjali tal-bini:

2523 90/7010

Sostanzi kimiċi:

3809 91 00/3917 21/3917 23/3917 32 00/ 3917 33 00/3917 39 00/3917 40 00/3923 10 00/39 23 21 00/3923 30 10/3924 10 00

L-industriji tax-xogħol tal-ħadid:

7309 00/7610 10 00 00/9403 20 80 90

L-industrija tal-ikel:

0403/0901 21/1902/2103 20 00 00/2103 30/2103 90 90/2106 90 98/

Xorb:

2203/2208 40

It-tessuti u l-ġilda:

6302

Karta:

4818 10/4818 20/4818 30/4821

L-arti grafika u l-pubblikazzjoni:

4909/4911

D. Lista ta' prodotti li hemm referenza għalihom fl-Artikolu 1(2)(d) skont il-klassifikazzjoni tan-Nomenklatura tat-Tariffa Doganali Komuni

It-tabakk:

2402