MEMORANDUM TA’ SPJEGAZZJONI

1.           KUNTEST TAL-PROPOSTA

Din il-proposta għandha l-għan li tistabbilixxi l-pożizzjoni tal-Unjoni dwar l-emendi fil-Kodiċi tal-Konvenzjoni dwar ix-Xogħol Marittimu, 2006 dwar ir-responsabbiltà tas-sidien tal-bastimenti fir-rigward ta' a) il-kumpens għat-talbiet dwar mewt u korriment personali u b) l-abbandun tal-baħħara.

L-emendi fil-Kodiċi tal-Konvenzjoni dwar ix-Xogħol Marittimu, 2006 (Maritime Labour Convention - MLC, 2006) tal-Organizzazzjoni Internazzjonali tax-Xogħol (ILO - International Labour Organisation) minn hawn 'il quddiem magħrufa bħala "l-Konvenzjoni dwar ix-Xogħol Marittimu", "il-Konvenzjoni", jew "l-MLC" huma fuq l-aġenda tal-ewwel laqgħa tal-"Kumitat Tripartitiku Speċjali" minn hawn 'il quddiem magħruf bħala "l-Kumitat".

L-MLC tistabbilixxi l-istandards minimi tax-xogħol u tal-għajxien għall-baħħara kollha li jaħdmu fuq bastimenti li jtajru l-bnadar tal-pajjiżi li rratifikawha[1]. L-emendi li se jiġu kkunsidrati mill-Kumitat jikkonċernaw il-Kodiċi tal-MLC, li jittratta l-mod li bih l-Artikoli u r-Regolamenti tal-MLC jiġu implimentati u li fih kemm standards u kemm linji gwida[2].

1.1.        Il-kunsiderazzjoni u l-adozzjoni eventwali tal-emendi fil-Kodiċi tal-Konvenzjoni dwar ix-Xogħol Marittimu fl-ewwel laqgħa tal-"Kumitat Tripartitiku Speċjali" bejn is-7 u l-11 ta' April 2014.

Il-Kumitat huwa inkarigat li jikkunsidra l-proposti għall-emendi fil-Kodiċi tal-MLC skont l-Artikolu XV tal-MLC. Il-Korp Governattiv tal-ILO stabbilixxa l-Kumitat fit-318-il Sessjoni tiegħu f'Ġunju tal-2013. Fit-319-il Sessjoni tiegħu li saret f'Ottubru tal-2013, iddeċieda wkoll li jsejjaħ l-ewwel laqgħa tal-Kumitat f'Ġinevra bejn is-7 u l-11 ta' April 2014 u adotta l-aġenda tiegħu, li tinkludi "l-kunsiderazzjoni tal-proposti għall-emendi tal-Kodiċi tal-Konvenzjoni dwar ix-Xogħol Marittimu, 2006 (MLC, 2006)".

Fil-Grupp ta' Ħidma ta' Esperti Ad Hoc dwar ir-Responsabbiltà u l-Kumpens ILO/IMO[3] konġunt li sar fl-2009[4] bħala segwitu għar-riżoluzzjoni adottata fl-94 Sessjoni (Marittima) tal-Konferenza Internazzjonali dwar ix-Xogħol meta ġiet adottata l-MLC[5], ġew identifikati żewġ kwistjonijiet għal emendi futuri fil-Kodiċi: ir-responsabbiltà tas-sidien tal-bastimenti relatata mal-kumpens għat-talbiet dwar mewt u korriment personali u l-abbandun tal-baħħara. Il-Kumitat Preparatorju stabbilit fl-2010 mill-Korp Governattiv tal-ILO kompla jidentifika li dawn iż-żewġ kwistjonijiet għandhom jiġu kkunsidrati b'mod urġenti fl-ewwel laqgħa tal-Kumitat.

F'dan ir-rigward, f'Ottubru tal-2013, ġew sottomessi b'mod konġunt żewġ settijiet ta' Proposti għal emendi fil-Kodiċi tal-MLC mill-grupp tas-sidien tal-bastimenti u mill-grupp tal-baħħara fil-Kumitat, skont l-Artikolu XV(2) tal-MLC[6].

Skont il-proċedura ssimplifikata għall-emendi fil-Kodiċi tal-MLC kif stipulat fl-Artikolu XV(3) tal-MLC, f'Ottubru tal-2013, id-Direttur Ġenerali tal-ILO ikkomunika l-proposta għall-emendi lill-Istati Membri kollha tal-ILO u stedinhom sabiex jibagħtu l-osservazzjonijiet u s-suġġerimenti tagħhom[7]. Imbagħad f'Diċembru tal-2013, il-proposti għall-emendi tqiegħdu għad-dispożizzjoni tal-Unjoni Ewropea[8].

Fil-laqgħa tal-Kumitat f'April tal-2014 għandhom jiġu kkunsidrati dawn iż-żewġ settijiet ta' proposti għall-emendi. Sabiex dawn l-emendi jiġu adottati mill-Kumitat jeħtieġ li fil-laqgħa jiġu rrappreżentati nofs il-Membri li rratifikaw l-MLC u li maġġoranza ta' żewġ terzi tal-membri tal-Kumitat, li tinkludi nofs il-voti tal-membri tal-gvern, tas-sidien tal-basitmenti u tal-baħħara (li lkoll għandhom setgħa tal-vot).

1.2.        Approvazzjoni possibbli tal-emendi fil-Kodiċi tal-Konvenzjoni dwar ix-Xogħol Marittimu waqt il-103 Sessjoni tal-Konferenza Internazzjonali dwar ix-Xogħol bejn it-28 ta' Mejju u t-12 ta' Ġunju 2014 u dħul fis-seħħ

Ladarba jiġu adottati mill-Kumitat, l-emendi fil-Kodiċi tal-MLC iridu jiġu approvati fil-Konferenza Internazzjonali dwar ix-Xogħol permezz ta' żewġ terzi tal-voti mitfugħa mid-delegati preżenti u jiġu sottomessi għal kunsiderazzjoni tal-membri tal-ILO li rratifikaw l-MLC. Huwa mistenni li l-103 sessjoni tal-Konferenza Internazzjonali dwar ix-Xogħol, li se sseħħ bejn it-28 ta' Mejju u t-12 ta' Ġunju 2014, se tingħata dan il-kompitu.

L-emendi approvati skont din il-proċedura jidħlu fis-seħħ fi żmien perjodu normalment ta' sentejn, sakemm proporzjon sostanzjali tal-membri li rratifikaw[9] jesprimu formalment in-nuqqas ta' qbil tagħhom ma' dawn l-emendi.

1.3.        Kontenut tal-emendi proposti fil-Kodiċi tal-Konvenzjoni dwar ix-Xogħol Marittimu suġġett għal-laqgħat tal-2014 tal-Organizzazzjoni Internazzjoni tax-Xogħol

Iż-żewġ settijiet ta' proposti għall-emendi fil-Kodiċi tal-MLC suġġetti għal-laqgħat tal-2014 tal-ILO jikkonċernaw l-Istandards (il-parti A) u l-Linji gwida (il-parti B) tal-Kodiċi tal-MLC li huma relatati mar-Regolament 2.5 dwar ir-Ripatrijazzjoni fit-Titolu 2 tal-kundizzjonijiet tal-impjieg u għar-Regolament 4.2 dwar ir-Responsabbiltà tas-sidien tal-bastimenti fit-Titolu 4 dwar il-protezzjoni tas-saħħa, il-kura medika, il-benessri u l-protezzjoni tas-sigurtà soċjali[10].

Il-proposta skont ir-Regolament 2.5 "ir-Ripatrijazzjoni" (ara l-Anness) tindirizza l-abbandun tal-baħħara. L-abbandun iseħħ meta sid ta' bastiment jonqos milli jkopri l-ispejjeż tar-ripatrijazzjoni tal-baħħar jew ma jipprovdix il-manteniment u l-appoġġ meħtieġ lill-baħħar jew inkella unilateralment jaqta' r-rabtiet tiegħu mal-baħħar inkluż billi jonqos milli jħallas il-paga kuntrattwali għal perjodu ta' mill-inqas xahrejn. L-emendi proposti jistabbilixxu r-rekwiżiti għal sistema ta' sigurtà finanzjarja rapida u effettiva sabiex tassisti lill-baħħara impjegati jew ingaġġati jew ħaddiema f'kull kapaċità fuq bastiment li jtajjar il-bandiera tal-Membru f'każ ta' abbandun. Din is-sistema għandha tkopri l-pagi pendenti u intitolamenti oħra sa erba' xhur, l-ispejjeż tar-ripatrijazzjoni, il-manteniment neċessarju inkluż ikel adegwat, ilbies, akkomodazzjoni, il-kura medika neċessarja u kostijiet jew spejjeż raġonevoli oħra li jirriżultaw mill-abbandun. Skont il-proposta, kull Membru għandu jirrikjedi li l-bastimenti li jtajru l-bandiera tiegħu jipprovdu evidenza dokumentata tas-sigurtà finanzjarja maħruġa mill-fornitur tas-servizzi tas-sigurtà finanzjarja. Il-linji gwida proposti jindirizzaw l-assitenza immedjata f'każ li jkun jinħtieġ żmien sabiex tiġi vverifikata l-validità ta' ċerti aspetti tat-talba tal-baħħar u d-dettalji tal-evidenza tas-sigurtà finanzjarja.

Il-proposta skont 4.2 "Ir-responsabbiltà tas-sidien tal-bastimenti" (ara l-Anness) tindirizza l-kumpens f'każ ta' mewt jew diżabbiltà fit-tul minħabba korriment, mard, jew ħsara fuq ix-xogħol. Din tistabbilixxi r-rekwiżiti minimi għas-sistema tas-sigurtà finanzjarja li tipprovdi dan il-kumpens fir-rigward ta' talbiet kuntrattwali, iddefiniti bħala talbiet relatati ma' mard, korriment jew mewt li jseħħ waqt li l-baħħar jaqdi dmiru skont ftehim tal-impjieg tal-baħħara jew li jirriżulta minn impjieg skont ftehim ta' dan it-tip. Għandhom jiġu stabbiliti arranġamenti effettivi sabiex it-talbiet kuntrattwali relatati mal-kumpens jaslu, jiġu indirizzati u saldati imparzjalment permezz ta’ proċeduri rapidi u ġusti. Ma għandu jkun hemm l-ebda dewmien, l-ebda pressjoni li jiġi aċċettat ħlas anqas mill-ammont kuntrattwali jew ħlas interim f'każijiet fejn ikun diffiċli li jiġi evalwat il-kumpens. Barra minn hekk, ma għandu jkun hemm l-ebda preġudizzju għad-drittijiet legali l-oħra; madankollu, il-benefiċċju għandhom jiġu bbilanċjati mad-danni. Skont il-proposta, kull Membru għandu jirrikjedi wkoll li l-bastimenti li jtajru l-bandiera tiegħu jipprovdu evidenza dokumentata tas-sigurtà finanzjarja jew li s-sidien tal-bastimenti jinnotifikaw lill-Istat tal-bandiera u lill-baħħara li s-sigurtà ġiet ikkanċellata. Il-linji gwida proposti jindirizzaw id-dettalji tal-evidenza tas-sigurtà finanzjarja u jinkludu mudell tal-irċevuta u l-formoli ta’ rilaxx għall-ħlas tat-talbiet kuntrattwali.

1.4.        Il-liġi tal-Unjoni fil-qasam tal-emendi proposti fil-Kodiċi tal-Konvenzjoni dwar ix-Xogħol Marittimu suġġett għal-laqgħat tal-2014 tal-Organizzazzjoni Internazzjoni tax-Xogħol

L-emendi proposti fil-Kodiċi tal-MLC huma fil-biċċa l-kbira koperti mill-kompetenzi kkonferiti lill-Unjoni permezz tat-Trattati. Barra minn hekk, ħafna partijiet mill-emendi jindirizzaw oqsma tal-liġi tal-Unjoni li fihom il-grad tar-regolamentazzjoni fil-livell tal-UE diġà laħaq stadju avvanzat. Apparti dan, id-Deċiżjoni tal-Kunsill 2007/431/KE tas-7 ta' Ġunju 2007 awtorizzat lill-Istati Membri sabiex jirratifikaw l-MLC fl-interessi tal-Unjoni.

L-emendi proposti fl-MLC jiffukaw fuq kwistjonijiet li diġà ġew indirizzati fid-Direttiva 2009/13/KE li timplimenta l-Ftehim konkluż mill-Assoċjazzjonijiet tas-Sidien tal-Bastimenti tal-Komunità Ewropea (ECSA) u l-Federazzjoni Ewropea tal-Ħaddiema tat-Trasport (ETF) dwar il-Konvenzjoni dwar ix-Xogħol Marittimu, u li temenda d-Direttiva 1999/63/KE Din id-Direttiva tinkorpora d-dispożizzjonijiet rilevanti tal-MLC fil-liġi tal-UE billi tistabbilixxi r-rekwiżiti minimi fl-oqsma rilevanti abbażi ta' ftehim bejn is-sħab soċjali Ewropej tas-settur skont id-dispożizzjonijiet tat-Trattat fil-qasam tal-politika soċjali[11].

Filwaqt li mhuwiex indirizzat fid-Direttiva 2009/13/KE, madankollu l-"abbandun" tal-baħħara jaqa' taħt l-Istandard A 2.5 tagħha li jistipula li "Kull Stat Membru għandu jiżgura li l-baħħara fuq bastimenti li jtajru l-bandiera tiegħu huma intitolati għar-ripatrijazzjoni (...) meta l-baħħara ma jkunux jistgħu iktar iwettqu d-dmirijiet tagħhom taħt il-ftehim tagħhom dwar l-impjieg jew ma jkunux mistennijin iwettqu d-dmirijiet tagħhom fiċ-ċirkostanzi speċifiċi". Bl-istess mod, l-Istandard A 4.2 dwar ir-responsabbiltà tas-sidien tal-bastimenti jistipula li: "Kull Stat Membru għandu jadotta l-liġijiet u r-regolamenti li jeħtieġu li s-sidien ta’ bastimenti li jtajru l-bandiera tiegħu jkunu responsabbli għall-protezzjoni tas-saħħa u l-kura medika tal-baħħara kollha li jaħdmu abbord il-bastimenti konformement mal-istandards minimi li ġejjin: (...) is-sidien tal-bastimenti għandhom jipprovdu s-sigurtà finanzjarja biex jiżguraw kumpens fil-każ ta’ mewt jew diżabbiltà fit-tul tal-baħħara minħabba ferimenti, mard jew periklu fuq ix-xogħol, kif imniżżel fil-liġi nazzjonali, il-ftehim dwar l-impjieg tal-baħħara jew il-ftehim kollettiv". Fiż-żewġ każijiet, l-emendi fl-MLC għandhom jintroduċu rekwiżiti speċifiċi għas-sistemi ta' sigurtà finanzjarja u għall-produzzjoni ta' evidenza dokumentata f'dawn l-oqsma.

Għandu jiġu nnutat ukoll li d-dispożizzjonijiet finali tal-Ftehim konkluż mill-Assoċjazzjonijiet tas-Sidien tal-Bastimenti tal-Komunità Ewropea (ECSA) u l-/Federazzjoni Ewropea tal-Ħaddiema tat-Trasport (ETF) dwar il-Konvenzjoni dwar ix-Xogħol Marittimu, implimentati bid-Direttiva 2009/13/KE, jistabbilixxu li sussegwentement għal kull emenda f'kull dispożizzjoni tal-MLC u jekk jintalbu minn waħda mill-Partijiet għall-Ftehim, għandha ssir reviżjoni tal-applikazzjoni ta' dan il-Ftehim.

L-infurzar tal-emendi proposti fl-MLC jinvolvi li l-qasam tat-trasport[12]: Id-Direttiva 2009/16/KE dwar il-"Kontroll mill-Istat tal-Port", kif emendata bid-Direttiva 2013/38/UE tat-12 ta' Awwissu 2013 sabiex tinkludi l-MLC fost il-Konvenzjonijiet bħalma huma SOLAS[13], MARPOL[14] u l-STCW[15], kif ukoll id-Direttiva 2013/54/UE dwar l-"Istat tal-Bandiera" tal-20 ta' Novembru 2013 li tinforza l-Anness tad-Direttiva 2009/13/KE. Id-Direttiva 2009/16/KE tapplika għall-bastimenti kollha li jidħlu fil-portijiet tal-UE, irrispettivament min-nazzjonalità tal-baħħara, u d-Direttiva 2013/54/UE bl-għan li tiżgura li l-Istati Membri tal-UE jissodisfaw ir-responsabbiltajiet tagħhom bħala Stati tal-bandiera fir-rigward tad-Direttiva 2009/13/KE u l-Anness tagħha u tapplika għall-baħħara kollha fuq il-bastimenti b'bandiera tal-UE. Id-dispożizzjoni dwar l-evidenza dokumentata inkluża fil-proposti għall-emendi hija koperta b'mod partikolar bid-Direttiva 2009/16/KE kif emendata.

L-emendi proposti ikomplu jinvolvu l-aspetti tal-qasam tal-politika soċjali[16], fejn ir-rekwiżiti minimi huma stabbiliti b'mod partikolari għas-saħħa u s-sikurezza okkupazzjonali bid-Direttiva 89/391/KEE dwar l-introduzzjoni ta' miżuri sabiex jinkoraġġixxu titjib fis-sigurtà u s-saħħa tal-ħaddiema fuq ix-xogħol.

Barra minn hekk, l-emendi previsti jikkonċernaw il-koordinazzjoni tas-sigurtà soċjali indirizzata fir-Regolament (KE) Nru 883/2004 u r-Regolament ta' Implimentazzjoni (KE) Nru 987/2009 fir-rigward taċ-ċittadini tal-UE, ir-Regolament (UE) Nru 1231/2010[17] fir-rigward ta' ċittadini ta' pajjiżi terzi li huma residenti legalment fl-UE, il-membri tal-familja tagħhom u s-superstiti tagħhom f'sitwazzjoni transfruntiera. Dawn ir-Regolamenti ġew adottati fl-oqsma tal-moviment liberu tal-ħaddiema u l-immigrazzjoni[18].

L-emendi proposti jistgħu jinvolvu l-leġiżlazzjoni tal-UE fl-oqsma tal-kooperazzjoni ġudizzjarja f'materji ċivili, b'mod partikolari r-Regolament (UE) Nru 1215/2012 dwar il-ġurisdizzjoni u r-rikonoxximent u l-eżekuzzjoni ta' sentenzi fi kwistjonijiet ċivili u kummerċjali [19].

2.           RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Mhux applikabbli.

3.           ELEMENTI LEGALI TAL-PROPOSTA

X'aktarx, il-103 sessjoni tal-Konferenza Internazzjonali dwar ix-Xogħol tingħata l-kompitu li tapprova l-proposti msemmija fil-Kodiċi tal-Konvenzjoni dwar ix-Xogħol Marittimu. Skont l-Artikolu XV tal-MLC dawn l-emendi jidħlu fis-seħħ għall-Partijiet kollha li ma jesprimux formalment in-nuqqas ta' qbil tagħhom fi żmien sentejn[20], sitt xhur wara li jintemm dak il-perjodu, sakemm aktar minn 40 % tal-Partijiet, li fl-istess ħin jirrappreżentaw mhux inqas minn 40 % tat-tunellaġġ gross tal-Partijiet jesprimu nuqqas ta' qbil mal-emendi approvati fil-Konferenza Internazzjonali dwar ix-Xogħol.

Għalhekk, l-emendi maħsuba fil-Kodiċi tal-Konvenzjoni dwar ix-Xogħol Marittimu se jikkostitwixxu att ta' korp stabbilit bi ftehim internazzjonali li se jipproduċi effetti legali.

L-Istati biss huma membri tal-ILO u jistgħu jivvutaw dwar l-approvazzjoni tal-emendi fil-Kodiċi tal-MLC fil-Konferenza Internazzjonali dwar ix-Xogħol, li għaliha l-Unjoni ġiet mistiedna bi status ta' osservatur.

Minħabba dan t'hawn fuq, f'konformità mal-Artikolu 218(9) tat-TFUE, jinħtieġ li l-Kunsill jieħu deċiżjoni biex jistabbilixxi l-pożizzjoni li għandha tiġi adottata f'isem l-Unjoni, u li fl-istess ħin tawtorizza lill-Istati Membri biex jaġixxu b'mod konġunt fl-interess tal-Unjoni.

Qed jiġi propost li l-approvazzjoni tal-emendi previsti fil-Kodiċi tal-MLC tiġi appoġġata.

Fil-fatt, f'dan l-istadju, abbażi tal-proposta sottomessa b'mod konġunt mill-grupp tas-sidien tal-bastimenti u mill-grupp tal-baħħara fil-Kumitat, jidher li ma hemm l-ebda kuntradizzjoni bejn il-prinċipji ġenerali eżerċitati mill-emendi proposti u l-liġi tal-Unjoni, u ma hemm l-ebda inkumpatibbiltà bejn l-emendi proposti u l-acquis tal-Unjoni. B'mod partikolari, ma hemm l-ebda inkonsistenza fl-approċċ bejn l-emendi proposti fil-Kodiċi tal-MLC u r-rekwiżiti minimi skont l-acquis tal-Unjoni fil-qasam soċjali. Dan ifisser li l-miżuri tal-Unjoni jistgħu jkunu aktar stretti mill-istandards tal-ILO u viċe versa[21], billi skont l-Artikolu 19(8) tal-Kostituzzjoni tal-ILO il-Konvenzjonijiet tal-ILO bħall-MLC jkollhom standards minimi. Ma hemm l-ebda inkonsistenza bejn l-emendi proposti fil-Kodiċi tal-MLC u l-acquis tal-Unjoni fir-rigward tal-koordinazzjoni tas-sigurtà soċjali jew ir-regolamenti skont l-acquis tal-Unjoni fil-qasam tat-trasport,

Abbażi tal-esperjenza miksuba, it-test tal-emendi previsti fil-Kodiċi tal-MLC mhux mistenni jibdel b'mod sostanzjali bejn l-abbozz li fuqu sar qbil bejn il-grupp tas-sidien tal-bastimenti u l-grupp tal-baħħara u l-approvazzjoni tiegħu fil-Konferenza Internazzjonali dwar ix-Xogħol. Minkejja dan, sabiex l-Istat Membri jitħallew jaġixxu fi ħdan il-korpi tal-ILO b'mod konġunt fl-interess tal-Unjoni b'mod effettiv u effiċjenti, jinħtieġ li jiġi previst li l-Istati Membri jkunu jistgħu jaqblu ma' test tal-emendi fil-Kodiċi li ma jkunx fih bidliet essenzjali meta mqabbel mat-test li fuqu ntlaħaq qbil bejn il-grupp tas-sidien tal-basitmenti u l-grupp tal-baħħara.

2014/0088 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed f'isem l-Unjoni Ewropea fil-103 sessjoni tal-Konferenza Internazzjonali dwar ix-Xogħol dwar l-emendi fil-Kodiċi tal-Konvenzjoni dwar ix-Xogħol Marittimu

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikoli 153 u 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)       Il-Konvenzjoni dwar ix-Xogħol Marittimu, 2006, tal-Organizzazzjoni Internazzjonali tax-Xogħol (ILO), minn hawn 'il quddiem magħrufa bħala "il-Konvenzjoni", tistabbilixxi l-istandards minimi tal-ħidma u l-għajxien għall-baħħara kollha li jaħdmu fuq bastimenti li jtajru l-bnadar tal-pajjiżi li jirratifikaw.

(2)       Il-proposti għall-emendi fil-Kodiċi tal-Konvenzjoni huma fuq l-aġenda tal-ewwel laqgħa tal-"Kumitat Tripartitiku Speċjali" stabbilit skont il-Konvenzjoni, minn hawn 'il quddiem magħruf bħala "il-Kumitat", li se ssir bejn is-7 u l-11 ta' April 2014 sabiex jiġu kkunsidrati u possibilment adottati. L-emendi adottati għandhom jiġu sottomessi għall-approvazzjoni waqt il-103 sessjoni tal-Konferenza Internazzjonali dwar ix-Xogħol bejn it-28 ta' Mejju u t-12 ta' Ġunju 2014.

(3)       Il-proposti għall-emendi jikkonċernaw ir-responsabbiltà tas-sidien tal-bastimenti fir-rigward tal-kumpens relatat mat-talbiet minħabba mewt, korriment personali u abbandun ta' baħħara. Dawn ġew sottomessi b'mod konġunt mill-grupp tas-sidien tal-bastimenti u mill-grupp tal-baħħara fil-Kumitat f'Otturbu tal-2013, skont il-paragrafu 2 tal-Artikolu XV tal-Konvenzjoni (minn hawn 'il quddiem magħrufa bħala "abbozz ta' emendi").

(4)       Ir-regoli skont il-Konvenzjoni u l-abbozz ta' emendi huma fil-biċċa l-kbira koperti mill-kompetenzi kkonferiti lill-Unjoni permezz tat-Trattati. Barra minn hekk, l-abbozz tal-emendi se jaffettwa l-acquis eżistenti fl-oqsma tal-politika soċjali[22], it-trasport u l-koordinazzjoni tas-sigurtà soċjali[23]. B'mod partikolari, il-biċċa l-kbira tad-dispożizzjonijiet tal-Konvenzjoni kienu s-suġġett tad-Direttiva tal-Kunsill 2009/13/KE li timplimenta l-Ftehim konkluż mill-Assoċjazzjonijiet tas-Sidien tal-Bastimenti tal-Komunità Ewropea (ECSA) u l-Federazzjoni Ewropea tal-Ħaddiema tat-Trasport (ETF) dwar il-Konvenzjoni dwar ix-Xogħol Marittimu, 2006, u li temenda d-Direttiva 1999/63/KE L-implimentazzjoni tal-Konvenzjoni fl-Unjoni tkompli tiġi żgurata permezz tad-Direttiva 2009/16/KE tat-23 ta' April 2009 dwar il-"Kontroll mill-Istat tal-Port", kif emendata bid-Direttiva 2013/38/UE tat-12 ta' Awwissu 2013 u d-Direttiva 2013/54/UE dwar l-"Istat tal-Bandiera" tal-20 ta' Novembru 2013 li tinforza l-Anness tad-Direttiva 2009/13/KE tas-16 ta' Frar 2009.

(5)       Skont l-Artikolu XV tal-Konvenzjoni, l-emendi fil-Kodiċi approvati fil-Konferenza Internazzjonali dwar ix-Xogħol se jidħlu fis-seħħ għall-Partijiet kollha li ma jesprimux formalment in-nuqqas ta' qbil tagħhom fi żmien li normalment ikun ta' sentejn, sitt xhur wara dak il-perjodu, sakemm aktar minn 40 % tal-Partijiet, li fl-istess ħin jirrappreżentaw mhux inqas minn 40 % tat-tunellaġġ gross tal-Partijet jesprimu nuqqas ta' qbil ma' dawn l-emendi. Għalhekk, l-emendi previsti fil-Kodiċi tal-Konvenzjoni dwar ix-Xogħol Marittimu se jikkostitwixxu att ta' korp stabbilit bi ftehim internazzjonali li se jipproduċi effetti legali.

(6)       Minħabba dan t'hawn fuq, f'konformità mal-Artikolu 218(9) tat-TFUE, jinħtieġ li l-Kunsill jieħu deċiżjoni biex jistabbilixxi l-pożizzjoni li għandha tiġi adottata f'isem l-Unjoni, u li fl-istess ħin tawtorizza lill-Istati Membri biex jaġixxu b'mod konġunt fl-interess tal-Unjoni, li mhijiex membru tal-ILO[24].

(7)       Billi, f'dan l-istadju, għadu ma nltaħaqx qbil dwar l-abbozz tal-emendi mill-partijiet interessati kollha u billi għadhom jistgħu jsiru xi bidliet qabel l-approvazzjoni tal-Konferenza Internazzjonali tax-Xogħol, jinħtieġ li jiġi previst li l-Istati Membri, filwaqt li jaġixxu b'mod konġunt fl-interess tal-Unjoni, jistgħu jaqblu ma' test tal-emendi li ma jkunx fih bidliet essenzjali meta mqabbel mat-test li fuqu ntlaħaq qbil bejn il-grupp tas-sidien tal-bastimenti u l-grupp tal-baħħara.  

ADOTTA DIN ID-DEĊIŻJONI:

Artikolu 1

1.           Il-pożizzjoni tal-Unjoni fil-103 sessjoni tal-Konferenza Internazzjonali dwar ix-Xogħol għandha tkun li tappoġġa l-approvazzjoni tal-emendi proposti fil-Kodiċi tal-Konvenzjoni, kif inhuma bħalissa, sottomessi b'mod konġunt mill-grupp tas-sidien tal-bastimenti u mill-grupp tal-baħħara fil-Kumitat (imsemmija "abbozz ta' emendi). It-test ta' dawn l-emendi huwa mehmuż ma' din id-deċizjoni.

2.           Il-pożizzjoni tal-Unjoni, kif stipulat fil-paragrafu 1 għandha tittieħed mill-Istati Membri, li jaġixxu b'mod konġunt fl-interessi tal-Unjoni meta japprovaw l-emendi fil-Kodiċi tal-Konvenzjoni fil-103 sessjoni tal-Konferenza Internazzjonali dwar ix-Xogħol.

3.           Jista jintlaħaq qbil dwar bidliet mhux sostanzjali għal din il-pożizzjoni fil-korpi tal-ILO mill-Istati Membri li jaġixxu b'mod konġunt fl-interess tal-Unjoni, mingħajr ma tittieħed deċiżjoni oħra mill-Kunsill.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell,

                                                                       Għall-Kunsill

                                                                       Il-President

[1]               http://www.ilo.org/global/standards/maritime-labour-convention/lang--en/index.htm.

[2]               L-MLC hija mqassma fi tliet partijiet prinċipali: l-Artikoli, li jiġu l-ewwel, jistabbilixxu l-prinċipji u l-obbligi wiesgħa. Wara l-Artikoli jiġu r-Regolamenti u l-Kodiċi, li jittrattaw l-oqsma tal-kundizzjonijiet tax-xogħol u tal-għajxien tal-baħħara koperti mill-Konvenzjoni u li jittrattaw ukoll l-ispezzjoni u l-konformità. Ir-Regolamenti, miktuba f'termini ġenerali ħafna, huma kkumplementati bil-Kodiċi li huwa iżjed dettaljat. Il-Kodiċi maqsum f'żewġ partijiet: Il-Parti A fiha l-Istandards u l-Parti B l-Linji Gwida. Il-pajjiżi li jirratifikaw l-MLC iridu jadottaw liġijiet nazzjonali jew jieħdu miżuri oħra sabiex jiżguraw li l-prinċipji u d-drittijiet stabbiliti bir-Regolamenti jiġu implimentati bil-mod stabbilit bl-Istandards fil-Parti A tal-Kodiċi (jew b'mod sostanzjalment ekwivalenti). Fid-deċiżjonijiet dwar id-dettalji tal-liġijiet tagħhom jew il-miżuri ta' implimentazzjoni, il-pajjiżi li jirratifikaw iridu jikkunsirdaw b'mod dovut il-Linji gwida stabbiliti fil-Parti B tal-Kodiċi.

[3]               Organizzazzjoni Marittima Internazzjonali.

[4]               ILO–IMO–WGPS/9/2009/10, Rapport finali, Grupp ta' Ħidma ta' Esperti Ad Hoc IMO/ILO konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara, id-Disa' Sessjoni.

[5]               Ir-Riżoluzzjoni dwar il-Grupp ta' Ħidma ta' Esperti Ad Hoc IMO/ILO Konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara, il-Konferenza Internazzjonali dwar ix-Xogħol, Rekord Proviżorju Nru 3-1(Rev.), l-94 Sessjoni (Marittima), Ġinevra, 2006, p. 3-1/16. Ara: http://www.ilo.org/global/standards/maritime-labour-convention/WCMS_088130/lang--en/index.htm.

[6]               http://www.ilo.org/wcmsp5/groups/public/---ed_norm/---normes/documents/genericdocument/wcms_229695.pdf, ara l-Anness tad-Deċiżjoni Rakkomandata.

[7]               http://www.ilo.org/wcmsp5/groups/public/---ed_norm/---normes/documents/genericdocument/wcms_229694.pdf.

[8]               L-istedina sabiex jattendu għall-Kumitat kienet tinkludi referenza għall-websajt http://www.ilo.org/global/standards/maritime-labour-convention/WCMS_228789/lang--en/index.htm li ġiet aġġornata f'Novembru tal-2013.

[9]               40 % tal-membri li rratifikaw l-MLC u li jirrappreżentaw 40 % tat-tunellaġġ gross tal-bastimenti tal-Membri li rratifikaw l-MLC.

[10]             http://www.ilo.org/wcmsp5/groups/public/---ed_norm/---normes/documents/genericdocument/wcms_229695.pdf.

[11]             L-Artikoli 153 u 155 tat-TFUE.

[12]             L-Artikolu 100 tat-TFUE.

[13]             Il-Konvenzjoni Internazzjonali għas-Salvagwardja tal-Ħajja Umana fuq il-Baħar.

[14]             Il-Konvenzjoni Internazzjonali għall-Prevenzjoni tat-Tniġġis mill-Bastimenti.

[15]             Il-Konvenzjoni Internazzjonali dwar Standards ta' Taħriġ, Ċertifikazzjoni u Għassa għall-Baħħara.

[16]             L-Artikoli 153 u 155 tat-TFUE.

[17]             Jew ir-Regolament (KE) Nru 859/2003 fil-każ tad-Danimarka u r-Renju Unit.

[18]             L-Artikolu 48 tat-TFUE, 79.2b tat-TFUE.

[19]             L-Artikolu 67(4) u l-punti (a), (c) u (e) tal-Artikolu 81(2) tat-TFUE.

[20]             Inkella perjodu ieħor stabbilit mill-Konferenza, wara li dawn jiġu nnotifikati mid-DĠ tal-ILO lill-Membri li rratifikaw il-Konvenzjoni

[21]             L-Opinjoni 2/91 tal-Qorti tal-Ġustizzja tal-Unjoni Ewropea, il-para. 18.

[22]               Inkluża d-Direttiva 89/391/KEE dwar il-qafas tas-sigurtà u s-saħħa.

[23]               Inkluż ir-Regolament (KE) Nru 883/2004 u r-Regolament ta' Implimentazzjoni (KE) Nru 987/2009 fir-rigward taċ-ċittadini tal-UE, ir-Regolament (UE) Nru 1231/2010 jew ir-Regolament (KE) Nru 859/2003 fir-rigward ta' ċittadini ta' pajjiżi terzi li huma residenti legalment fl-UE, il-membri tal-familja tagħhom u s-superstiti tagħhom f'sitwazzjoni transfruntiera.

[24]               L-Opinjoni 2/91 tal-Qorti tal-Ġustizzja tal-Unjoni Ewropea tad-19 ta' Marzu 1993, Ġabra 1993-I, p. 1061, il-para. 26.

ANNESS

I— L-ewwel sett ta’ proposti konġunti: Proposta għal emendi fil-Kodiċi dwar ir-Regolament 2.5 tal-Konvenzjoni Dwar ix-Xogħol Marittimu, 2006

Din il-proposta tirrifletti l-prinċipji li ġew adottati waqt id-Disa’ Sessjoni (bejn it-2 u s-6 ta’ Marzu 2009) tal-Grupp ta' Ħidma ta' Esperti Ad Hoc IMO/ILO Konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara[1]. In-noti f’qiegħ il-paġna ta' din il-proposta huma għall-informazzjoni biss u mhumiex parti minn din il-proposta għat-test tal-emendi.

A. Proposti relatati mal-Istandard A2.5

1. F' din l-intestatura, “Standard A2.5 — Ripatrijazzjoni”, “A2.5” tinbidel u ssir “A2.5.1”.

2. Wara l-paragrafu 9 tal-Istandard A2.5, jiżdiedu din l-intestatura u t-test li ġejjin:

Standard A2.5.2 – Sigurtà Finanzjarja[2]

1. Fl-implimentazzjoni tal-paragrafu 2 tar-Regolament 2.5, dan l-Istandard jistabbilixxi r-rekwiżiti li jiżguraw il-forniment ta’ sistema ta’ sigurtà finanzjarja rapida u effettiva biex tassisti l-baħħara f’każ ta’ abbandun tal-baħħara.

2. Għall-finijiet ta’ dan l-Istandard, għandu jitqies li baħħar ġie abbandunat jekk, bi ksur tar-rekwiżiti ta’ din il-Konvenzjoni jew tat-termini tal-ftehim dwar l-impjieg tal-baħħara, sid il-bastiment:

(a) jonqos milli jkopri l-ispejjeż tar-ripatrijazzjoni tal-baħħar; jew

(b) ma jipprovdix il-manteniment u l-appoġġ meħtieġ lill-baħħar; jew

(c) unilateralment jaqta' r-rabtiet tiegħu mal-baħħar inkluż billi jonqos milli jħallas il-paga kuntrattwali għal perjodu ta' mill-inqas xahrejn.

3. Kull Membru għandu jiżgura li tiġi stabbilita sistema ta’ sigurtà finanzjarja li tissodisfa r-rekwiżiti ta’ dan l-Istandard għal bastimenti li jtajru l-bandiera tiegħu. Is-sistema tas-sigurtà finanzjarja tista’ tkun fil-forma ta’ skema tas-sigurtà soċjali jew assigurazzjoni jew fond nazzjonali jew arranġament ieħor simili. Il-forma għandha tiġi ddeterminata mill-Membru wara konsultazzjoni mal-organizzazzjonijiet tas-sidien tal-bastimenti u tal-baħħara kkonċernati.

4. Is-sistema tas-sigurtà finanzjarja għandha tipprovdi aċċess dirett, kopertura suffiċjenti u assistenza finanzjarja rapida, skont dan l-Istandard, lil kull baħħar abbandunat li kien impjegat jew ingaġġat jew jaħdem f'kull kapaċità fuq bastiment li jtajjar il-bandiera ta’ xi Membru.

5. Għall-finijiet ta' dan l-Istandard, il-manteniment u l-appoġġ neċessarju għall-baħħara għandu jinkludi: ikel adegwat, ilbies, akkomodazzjoni, il-kura medika neċessarja u kostijiet jew spejjeż raġonevoli oħra li jirriżultaw mill-abbandun.

6. Kull Membru għandu jirrikjedi li l-bastimenti li jtajru l-bandiera tiegħu, u li għalihom japplika l-paragrafu 1 jew 2 tar-Regolament 5.1.3, jipprovdu evidenza dokumentata tas-sigurtà finanzjarja maħruġa mill-fornitur tas-servizzi tas-sigurtà finanzjarja.[3] L-evidenza dokumentata għandha tintbagħat f’pożizzjoni prominenti fl-akkomodazzjoni tal-baħħar. Jekk ikun hemm aktar minn fornitur wieħed tas-servizzi tas-sigurtà finanzjarja li qed jipprovdi kopertura, id-dokument ipprovdut minn kull fornitur għandu jinġarr abbord.

7. L-evidenza dokumentata tas-sigurtà finanzjarja għandha tinkludi l-informazzjoni meħtieġa fl-Appendiċi A2-I. Din għandha tkun bl-Ingliż jew akkumpanjata minn traduzzjoni bl-Ingliż.

8. L-assistenza pprovduta mis-sistema tas-sigurtà finanzjarja għandha tingħata minnufih fuq talba magħmula mill-baħħar ikkonċernat jew f’ismu u għandha tkun appoġġjata bil-ġustifikazzjoni tal-intitolament meħtieġa skont il-paragrafu 2 hawn fuq.

9. Wara li jiġu kkunsidrati r-Regolamenti 2.2 u 2.5, l-għajnuna pprovduta mis-sistema tas-sigurtà finanzjarja għandha tkun suffiċjenti biex tkopri li ġej:

(a) il-pagi pendenti u l-intitolamenti l-oħra dovuti minn sid il-bastiment lill-baħħar skont il-ftehim tagħhom dwar l-impjieg, il-ftehim ta' negozjar kollettiv rilevanti jew il-liġi nazzjonali tal-Istat tal-bandiera, b'limitu ta' erba’ xhur ta’ kull paga pendenti u erba’ xhur ta’ intitolamenti pendenti;

(b) l-ispejjeż kollha minfuqa raġonevolment mill-baħħar, inklużi l-ispejjeż ta’ ripatrijazzjoni msemmija fil-paragrafu 10; u

(c) l-ispejjeż tal-manteniment u l-appoġġ meħtieġa li jirriżultaw mill-att jew l-ommissjoni li jikkostitwixxu l-abbandun sakemm il-baħħar jasal f’pajjiżu.

10. L-ispejjeż tar-ripatrijazzjoni għandhom ikopru l-ivvjaġġar b'mezzi xierqa u veloċi, normalment bl-ajru, u jinkludu dispożizzjoni għall-ikel u l-akkommodazzjoni tal-baħħara minn meta jħallu l-bastiment sakemm jaslu lura f'pajjiżhom, il-kura medika neċessarja, il-passaġġ u t-trasport tal-oġġetti personali u l-ispejjeż jew il-kostijiet raġonevoli l-oħra kollha li jirriżultaw mill-abbandun.

11. Jekk il-fornitur tal-assigurazzjoni jew ta' sigurtà finanzjarja oħra għamel kull ħlas lil kwalunkwe baħħar skont dan l-Istandard, dan il-fornitur għandu, sal-ammont li jkun ħallas, jakkwista b’surroga, ċessjoni jew mod ieħor, id-drittijiet li l-baħħar kien igawdi.

12. Xejn f’dan l-Istandard ma għandu jippreġudika kwalunkwe dritt ta’ rikors tal-assiguratur jew tal-fornitur tas-servizz tas-sigurtà finanzjarja kontra partijiet terzi.

13. Id-dispożizzjonijiet f’dan l-Istandard mhumiex maħsubin biex ikunu esklussivi jew biex jippreġudikaw xi drittijiet, talbiet jew rimedji oħra li jistgħu jkunu disponibbli wkoll biex jikkumpensaw lill-baħħara li ġew abbandunati. Il-liġijiet u r-regolamenti nazzjonali jistgħu jipprevedu li kwalunkwe ammonti pagabbli skont dan l-Istandard jistgħu jiġu bbilaċjati kontra ammonti riċevuti minn sorsi oħra li jirriżultaw minn kwalunkwe dritt, talba jew rimedju li jistgħu jkunu s-suġġett ta’ kumpens skont dan l-Istandard.       

B. Proposta relatati mal-Linja Gwida B2.5

Wara din il-Linja Gwida B2.5, jiżdiedu l-intestatura u t-test li ġejjin:          

Il-Linja Gwida B 2.5.3 — Sigurtà finanzjarja

1. Fl-implimentazzjoni tal-paragrafu 8 tal-Istandard A2.5.2, jekk jinħtieġ żmien sabiex tiġi vverifikata l-validità ta’ ċerti aspetti tat-talba tal-baħħar, dan ma għandux iwaqqaf lill-baħħar jew ir-rappreżentant milli jirċievu immedjatament din il-parti tal-assistenza mitluba kif inhi rikonoxxuta bħala ġġustifikata.           

C. Proposta għal appendiċi ġdid

Qabel l-Appendiċi A5-I, jiżdied l-Appendiċi li ġej:  

APPENDIĊI A2-I

Evidenza tas-sigurtà finanzjarja skont ir-Regolament 2.5(2)

Iċ-ċertifikat jew[4] l-evidenza dokumentata l-oħra msemmija fil-paragrafu 7 tal-Istandard A2.5.2, għandhom jinkludu l-informazzjoni li ġejja:

(a) l-isem tal-bastiment;

(b) il-port tar-reġistrazzjoni tal-bastiment;

(c) is-sinjal tas-sejħa tal-bastiment;

(d) in-numru IMO tal-bastiment;

(e) l-isem u l-indirizz tal-fornitur tas-servizzi tas-sigurtà finanzjarja;

(f) id-dettalji ta’ kuntatt tal-persuni jew l-entità responsabbli għall-immaniġġar tat-talbiet għall-eżenzjoni tal-baħħara;

(g) l-isem tas-sid tal-bastiment;

(h) il-perjodu tal-validità tas-sigurtà finanzjarja; u

(i) attestazzjoni mill-awtorità kompetenti li s-sigurtà finanzjarja tissodisfa r-rekwiżiti tal-Istandard A2.5.2.

D. Proposti relatati mal-Appendiċi A5-I, 5-II u 5-III[5]

1. Fl-aħħar tal-Appendiċi A5-I, jiżdied il-punt li ġej:

Sigurtà finanzjarja għar-ripatrijazzjoni.        

2. Fl-Appendiċi A5-II, wara l-punt 14 taħt l-intestatura Dikjarazzjoni ta’ Konformità tax-Xogħol Marittimu — Parti I, jiżdied il-punt li ġej:   

15. Sigurtà finanzjarja għar-ripatrijazzjoni (ir-Regolament 2.5).     

3. Fl-Appendiċi A5-II, wara l-punt 14 taħt l-intestatura Dikjarazzjoni ta’ Konformità tax-Xogħol Marittimu — Parti II, jiżdied il-punt li ġej:          

15. Sigurtà finanzjarja għar-ripatrijazzjoni (ir-Regolament 2.5).     

4. Fl-aħħar tal-Appendiċi A5-III, jiżdied il-qasam li ġej:      

Sigurtà finanzjarja għar-ripatrijazzjoni.        

II — It-tieni sett ta’ proposti konġunti: Proposta għal emendi fil-Kodiċi dwar ir-Regolament 4.2 tal-MLC, 2006

Din il-proposta tirrifletti l-prinċipji li ġew adottati waqt id-Disa’ Sessjoni (bejn it-2 u s-6 ta’ Marzu 2009) tal-Grupp ta' Ħidma ta' Esperti Ad Hoc IMO/ILO Konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara[6]. In-noti f’qiegħ il-paġna ta' din il-proposta huma għall-informazzjoni biss u mhumiex parti minn din il-proposta għat-test tal-emendi.        

A. Proposti relatati mal-Istandard A4.2

1. F’din l-intestatura, "Standard A4.2 - ir-Responsabbiltà tas-sid tal-bastiment”, “A 4.2” tinbidel u ssir “A4.2.1”.

2. Wara l-paragrafu 7 ta’ dan l-Istandard A4.2, jiżdied it-test li ġej:

8. Il-liġijiet u r-regolamenti nazzjonali għandhom jipprevedu li s-sistema ta’ sigurtà finanzjarja biex jiġi żgurat kumpens kif provdut fil-paragrafu 1(b) ta’ dan l-Istandard għat-talbiet kuntrattwali, kif iddefinit fl-istandard A4.2.2, tissodisfa r-rekwiżiti minimi li ġejjin:

(a) il-kumpens kuntrattwali, jekk stabbilit fil-ftehim tal-impjieg tal-baħħar u mingħajr preġudizzju għal (c) hawn taħt, għandu jitħallas b’mod sħiħ u mingħajr dewmien;

(b) ma għandu jkun hemm l-ebda pressjoni li jiġi aċċettat ħlas anqas mill-ammont kuntrattwali;

(ċ) jekk in-natura tad-diżabbiltà fit-tul ta’ baħħar tagħmilha diffiċli li jiġi evalwat il-kumpens sħiħ li għalih il-baħħar jista’ jkun intitolat, għandhom isiru pagament jew pagamenti interim lill-baħħar sabiex tiġi evitata tbatija mhux xierqa;

(d) skont il-paragrafu 2 tar-Regolament 4.2, il-baħħar għandu jirċievi pagament mingħajr preġudizzju għal drittijiet legali oħra, iżda dan il-ħlas jista’ jiġi kkumpensat minn sid il-bastiment kontra kull dannu li jirriżulta minn kull talba oħra magħmula mill-baħħar kontra sid il-bastiment u li toriġina mill-istess inċident;

(e) it-talba għal kumpens kuntrattwali tista’ titressaq direttament mill-baħħar ikkonċernat, jew il-qraba tiegħu, jew rappreżentant tal-baħħar jew benefiċjarju maħtur[7].

9. Il-liġijiet u r-regolamenti ta’ kull Membru għandhom jiżguraw li l-baħħara jirċievu notifika minn qabel jekk is-sigurtà finanzjarja ta’ sid ta' bastiment għandha tiġi kkanċellata u li jiġu nnotifikati minnufih jekk din ma tistax tiġġedded.

10. Il-liġijiet u r-regolamenti ta’ kull Membru għandhom jiżguraw li l-Istat tal-bandiera jiġi nnotifikat mill-fornitur tal-assigurazzjoni jekk is-sigurtà finanzjarja ta’ sid ta' bastiment għandha tiġi kkanċellata, hekk kif tiġi kkanċellata u f'nuqqas ta’ tiġdid.

11. Kull Membru għandu jirrikjedi li l-bastimenti li jtajru l-bandiera tiegħu jipprovdu evidenza dokumentata tas-sigurtà finanzjarja maħruġa mill-fornitur tas-servizzi tas-sigurtà finanzjarja. L-evidenza dokumentata għandu jkollha pożizzjoni prominenti fl-akkomodazzjoni tal-baħħar. Jekk ikun hemm aktar minn fornitur wieħed tas-servizzi tas-sigurtà finanzjarja li qed jipprovdi kopertura, id-dokumenti pprovduti minn kull fornitur għandhom jinġarru abbord.

12. Is-sigurtà finanzjarja għandha tipprovdi għall-ħlas tat-talbiet kuntrattwali kollha koperti minnha li jirriżultaw matul il-perjodu li matulu jkun validu d-dokument.

13. L-evidenza dokumentata tas-sigurtà finanzjarja għandha tinkludi l-informazzjoni meħtieġa fl-Appendiċi A4-I. Għandha tkun bl-Ingliż jew akkumpanjata minn traduzzjoni bl-Ingliż.

Tiżdied l-intestatura li jmiss u t-test li jsegwi dan l-Istandard A4.2: 

Standard A4.2.2 — Trattament ta’ talbiet kuntrattwali[8]

1. Għall-finijiet tal-Istandard A4.2.1 u tal-Istandard preżenti, it-terminu "talba kuntrattwali" ifisser kull talba relatata ma' mard, korriment jew mewt li jseħħ waqt li l-baħħar jaqdi dmiru skont ftehim tal-impjieg tal-baħħara jew li jirriżulta minn impjieg skont ftehim ta' dan it-tip.

2. Il-liġijiet u r-regolamenti ta’ kull Membru għandhom jiżguraw li jiġu stabbiliti arranġamenti effettivi sabiex it-talbiet kuntrattwali relatati mal-kumpens imsemmija fl-istandard A4.2.1 jaslu, jiġu indirizzati u saldati imparzjalment permezz ta’ proċeduri rapidi u ġusti.

B. Proposti relatati mal-Linja Gwida B4.2

1. F’din l-intestatura, "Linja Gwida B4.2 - ir-Responsabbiltà tas-sid tal-bastiment”, “B4.2” tinbidel u ssir “B4.2.1”.

2. Fil-paragrafu 1 ta’ din il-Linja Gwida B4.2, “l-Istandard A4.2” tinbidel u ssir “l-Istandard A4.2.1”.     

3. Wara l-paragrafu 3 ta’ din il-Linja Gwida B4.2, tiżdied l-intestatura u t-test li ġejjin:     

Linja Gwida B4.2.2 — Trattament ta’ talbiet kuntrattwali

1. Il-liġijiet jew ir-regolamenti nazzjonali għandhom jipprevedu li l-partijiet għall-ħlas ta' talba kuntrattwali jistgħu jużaw il-Mudell tal-Irċevuta u tal-Formola ta’ Rilaxx stabbiliti fl-Appendiċi B4-I.           

C. Proposti għal appendiċi ġodda

1. Wara l-Appendiċi A2-I, jiżdied l-Appendiċi li ġej:           

APPENDIĊI A4-I

Evidenza ta’ sigurtà finanzjarja skont ir-Regolament 2.5(2)

L-evidenza dokumentata tas-sigurtà finanzjarja meħtieġa skont il-paragrafu 13 tal-Istandard A4.2.1, għandha tinkludi l-informazzjoni li ġejja:

(a) l-isem tal-bastiment;

(b) il-port tar-reġistrazzjoni tal-bastiment;

(c) is-sinjal tas-sejħa tal-bastiment;

(d) in-numru IMO tal-bastiment;

(e) l-isem u d-dettalji ta’ kuntatt tal-fornitur/i tas-sigurtà finanzjarja;

(f) il-post tan-negozju tal-fornitur/i tas-sigurtà finanzjarja;

(g) l-isem tas-sid tal-bastiment;

(h) il-perjodu tal-validità tas-sigurtà finanzjarja;

(i) attestazzjoni mill-awtorità kompetenti li s-sigurtà finanzjarja tissodisfa r-rekwiżiti ta’ dan l-Istandard.       

2. Wara l-Appendiċi A4-I, jiżdied l-Appendiċi li ġej:           

APPENDIĊI B4-I

Mudell tal-irċevuta u tal-formola ta’ rilaxx msemmija fil-Linja gwida B4.2.2

Bastiment: ………………………………………………………………………………………….

Inċident: ……………………….…………………………………………………………………

Baħħar/werriet legali u/jew dipendenti: ………………………….……………….………….....................................................

Sid tal-bastiment: ………………………………………………………………………………………….

Jiena, [il-baħħar] [il-werriet legali u/jew id-dipendenti tal-baħħar] * hawnhekk ngħarrfek li rċevejt s-somma ta’ [il-munita u l-ammont] b’sodisfazzjon tal-obbligu tas-sid tal-bastiment sabiex iħallas kumpens kuntrattwali għal korriment personali u/jew mewt skont it-termini u l-kundizzjonijiet tal-impjieg tal-baħħar/tiegħi u hawnhekk jien nirrilaxxa s-sid tal-bastiment mill-obbligi tiegħu skont l-imsemmija termini u kundizzjonijiet.

Il-ħlas isir mingħajr rikonoxximent tar-responsabilità ta’ kwalunkwe talba u jiġi aċċettat mingħajr preġudizzju għall-werriet legali tiegħi/tal-baħħar u/jew id-dritt tad-dipendent li jsegwi kwalunkwe talba fil-liġi fir-rigward ta’ negliġenza, tort jew kwalunkwe rimedju legali ieħor disponibbli u li joriġina mill-inċident imsemmi hawn fuq.

Bid-data: ………………………………………………………………………………………….

Baħħar/werriet legali u/jew dipendenti: ………………………………………………………………………………………….

Firma: …………………..……………………….………………………………………..........

Għar-rikonoxximent:

Sid tal-bastiment/Rappreżentant tas-sid tal-bastiment:

Firma: ……………………….…………………………………………………………............

Assiguratur/Rappreżentant tal-assiguratur:

Firma: ……………………….…………………………………………………………............___________________

*Aqta' fejn xieraq.   

D. Proposti relatati mal-Appendiċi A5-I, 5-II u 5-III[9]       

1. Fl-aħħar tal-Appendiċi A5-I, jiżdied il-punt li ġej:

Sigurtà finanzjarja relatata mar-responsabbiltà tas-sidien tal-bastimenti.    

2. Fl-Appendiċi A5-II, wara l-punt 15 taħt l-intestatura Dikjarazzjoni ta’ Konformità tax-Xogħol Marittimu — Parti I, jiżdied il-punt li ġej:   

16. Sigurtà finanzjarja relatata mar-responsabbiltà tas-sidien tal-bastimenti (ir-Regolament 4.2)   

3. Fl-Appendiċi A5-II, wara l-punt 15 taħt l-intestatura Dikjarazzjoni ta’ Konformità tax-Xogħol Marittimu — Parti II, jiżdied il-punt li ġej:          

16. Sigurtà finanzjarja relatata mar-responsabbiltà tas-sidien tal-bastimenti (ir-Regolament 4.2)   

4. Fl-aħħar tal-Appendiċi A5-III, jiżdied il-qasam li ġej:      

Sigurtà finanzjarja relatata mar-responsabbiltà tas-sidien tal-bastimenti

[1]               ILO–IMO–WGPS/9/2009/10, Rapport finali, Grupp ta' Ħidma ta' Esperti Ad Hoc IMO/ILO konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara, id-Disa' Sessjoni. Ara: http://www.ilo.org/sector/activities/sectoral-meetings/WCMS_ 161446/lang--en/index.htm. L-importanza ta’ dan il-Grupp ta’ Ħidma bħala parti mis-segwitu tal-adozzjoni tal-Konvenzjoni dwar ix-Xogħol Marittimu, 2006, kienet rikonoxxuta wkoll f’Riżoluzzjoni adottata fl-94 Sessjoni tal-Konferenza Internazzjonali tax-Xogħol meta ġiet adottata l-Konvenzjoni dwar ix-Xogħol Marittimu, 2006. Ara r-riżoluzzjoni dwar il-Grupp ta' Ħidma ta' Esperti Ad Hoc IMO/ILO konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara, il-Konferenza Internazzjonali tax-Xogħol, ir-Rekord Provviżorju Nru 3-1 (Rev.), l-94 Sessjoni (Marittima), Ġinevra, 2006, p. 3-1/16. Ara: http://www.ilo.org/global/standards/maritime-labour-convention/WCMS_088130/lang--en/index.htm.

[2]               It-titolu propost jistabbilixxi r-relazzjoni bejn il-forniment ta’ sigurtà finanzjarja għar-ripatrijazzjoni fil-paragrafu 2 tar-Regolament 2.5, u l-kunċett ta’ abbandun, kif iddefinit fil-paragrafu 2  tal-Istandard A2.5.2 il-ġdid propost, (li qabel kien il-paragrafu 5 tal-Grupp ta' Ħidma ta' Esperti Ad Hoc IMO/ILO "prinċipji").

[3]               Il-Grupp ta' Ħidma ta' Esperti Ad Hoc IMO/ILO Konġunt laħaq qbil fl-2009 li din il-parti għandha tiżdied mal-lista ta’ oqsma suġġetti għall-kontroll mill-Istat tal-port u għaldaqstant tkun kwistjoni li jiġu ċċertifikati l-bastimenti li għandhom jiġu spezzjonati kif ukoll iċċertifikati. Ara r-Rapport finali msemmi fin-nota 1 hawn fuq, fil-paragrafu 106. It-terminu evidenza dokumentata kien intuża biex jindirizza d-differenza fil-fehmiet dwar il-format preċiż ta’ din id-dokumentazzjoni li jagħti evidenza tas-sigurtà finanzjarja. Dan il-kliem huwa konsistenti wkoll mal-approċċ adottat fil-Linji gwida tal-ILO dwar l-ispezzjoni tal-Istat tal-Bandiera li tħejjew fl-2008 permezz ta’ laqgħa tripartitika internazzjonali ta’ esperti.

[4]               Kif innotat hawn fuq, fil-Grupp ta' Ħidma ta' Esperti Ad Hoc IMO/ILO Konġunt kien hemm xi opinjonijiet differenti, fir-rigward tal-format għall-evidenza ta’ din is-sigurtà. Ġie propost il-kliem “jew” sabiex  jipprovdi flessibbiltà

[5]               Kif indikat hawn fuq fin-nota 3, il-Grupp ta' Ħidma ta' Esperti Ad Hoc IMO/ILO Konġunt qabel li dawn ir-rekwiżiti jkunu inklużi fis-sistema taċ-ċertifikazzjoni tal-bastiment.

[6]               ILO–IMO–WGPS/9/2009/10, Rapport finali, Grupp ta' Ħidma ta' Esperti Ad Hoc IMO/ILO konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara, id-Disa' Sessjoni. L-importanza ta’ dan il-Grupp ta’ Ħidma bħala parti mis-segwitu tal-adozzjoni tal-Konvenzjoni dwar ix-Xogħol Marittimu, 2006, kienet rikonoxxuta wkoll f’Riżoluzzjoni adottata fl-94 Sessjoni tal-Konferenza Internazzjonali tax-Xogħol meta ġiet adottata l-Konvenzjoni dwar ix-Xogħol Marittimu, 2006. Ara r-riżoluzzjoni dwar il-Grupp ta' Ħidma ta' Esperti Ad Hoc IMO/ILO konġunt dwar ir-Responsabbiltà u l-Kumpens relatati mat-Talbiet dwar Mewt, Korriment Personali u l-Abbandun tal-Baħħara, il-Konferenza Internazzjonali tax-Xogħol, ir-Rekord Provviżorju Nru 3-1 (Rev.), l-94 Sessjoni (Marittima), Ġinevra, 2006, p. 3-1/16. Ara: http://www.ilo.org/global/standards/maritime-labour-convention/WCMS_088130/lang--en/index.htm.

[7]               Il-kliem li kien jinsab fil-prinċipji li ġew proposti mill-Grupp ta' Ħidma ta' Esperti Ad Hoc IMO/ILO Konġunt (ara r-Rapport finali, imsemmi fin-nota 6 hawn fuq, fil-paragrafi 149-152 u l-Appendiċi II, “prinċipji” fil-paragrafu 4), ġie aġġustat għal raġunijiet ta’ abbozzar legali. Għalkemm it-test jidher li kien is-suġġett ta’ ftehim (ara l-paragrafu 152), il-kelliem għall-grupp tal-baħħara talab li l-paragrafu jitqiegħed f’parenteżi kwadri (ara l-paragrafu 151). Ta’ min jinnota li din il-proposta ma fihiex parenteżi kwadri

[8]               Il-prinċipji proposti mill-Grupp ta' Ħidma ta' Esperti Ad Hoc IMO/ILO koprew żewġ kwistjonijiet. Ara r-Rapport finali, imsemmi fin-nota 6 hawn fuq, fil-paragrafi 133-134.

[9]               Il-Grupp ta' Ħidma ta' Esperti Ad Hoc IMO/ILO laħaq qbil fl-2009 li din il-parti għandha tiżdied mal-lista ta’ oqsma suġġetti għall-kontroll mill-Istat tal-port u għaldaqstant tkun kwistjoni li jiġu ċċertifikati l-bastimenti li għandhom jiġu spezzjonati kif ukoll iċċertifikati. Ara r-Rapport finali msemmi fin-nota 1 hawn fuq, fil-paragrafu 126. Dan il-kliem huwa konsistenti wkoll mal-approċċ adottat fil-Linji gwida tal-ILO dwar l-ispezzjoni tal-Istat tal-Bandiera li tħejjew fl-2008 permezz ta’ laqgħa tripartitika internazzjonali ta’ esperti. Ara: http://www.ilo.org/global/standards/maritime-labour-convention/WCMS_101788/lang--en/ index.htm