Proposta għal DEĊIŻJONI TA’ IMPLIMENTAZZJONI TAL-KUNSILL li temenda d-Deċiżjoni ta' Implimentazzjoni 2013/463/UE li tapprova l-programm ta’ aġġustament makroekonomiku għal Ċipru /* COM/2014/0118 final - 2014/0063 (NLE) */
MEMORANDUM TA’ SPJEGAZZJONI Wara talba minn Ċipru għal
assistenza finanzjarja mill-Mekkaniżmu Ewropew ta' Stabilità (MES),
fl-24 ta' April 2013 il-Bord tal-Gvernaturi tal-MES
iddeċieda li jagħti, fil-prinċipju, sostenn ta’ stabbiltà lil Ċipru
u approva l-Memorandum ta’ Qbil dwar il-Kundizzjonalità Speċifika
tal-Politika Ekonomika (minn hawn ’il quddiem “MtQ") u l-iffirmar
tiegħu mill-Kummissjoni f’isem il-MES. Fit-8 ta’ Mejju 2013
il-Bord tad-Diretturi tal-MES approva ftehim dwar faċilità ta’ assistenza finanzjarja.
Il-programm ta’ aġġustament makroekonomiku għandu l-għan li
terġa' tinkiseb il-fiduċja fis-suq finanzjarju, jiġu stabbiliti
mill-ġdid bilanċi makroekonomiċi sodi u li l-ekonomija tkun
tista' terġa’ lura għal tkabbir sostenibbli. Il-programm ta’ aġġustament
makroekonomiku għal Ċipru kien adottat inizjalment mill-Kunsill skont
id-Deċiżjoni 2013/236/UE tal-25 ta’ April 2013. Wara
d-dħul fis-seħħ tar-Regolament (UE) Nru 472/2013, il-programm
kien reġa' ġie adottat abbażi tal-Artikolu 7(2) tar-Regolament
(UE) Nru 472/2013 billi permezz tad-Deċizjoni ta' Implimentazzjoni
tal-Kunsill 2013/463/UE. Fl-istess ħin, id-Deċiżjoni 2013/236/UE
ġiet irrevokata. F’konformità
mal-Artikolu 1(2) tad-Deċiżjoni 2013/463/UE, il-Kummissjoni,
f’kollaborazzjoni mal-Bank Ċentrali Ewropew (BĊE) u fejn
meħtieġ, mal-Fond Monetarju Internazzjonali (FMI), għamlet
it-tielet rieżami biex tevalwa l-progress fl-implimentazzjoni
tal-miżuri miftiehma kif ukoll l-effikaċja u l-impatt ekonomiku u
soċjali tagħhom. B'riżultat ta' dan, il-programm ġie
aġġornat fl-oqsma tar-riforma tas-settur finanzjarju, il-politika
fiskali u r-riformi strutturali. Għas-settur finanzjarju, l-MtQ rivedut
jistipula li l-istrateġija ta’ komunikazzjoni dwar il-pjan ta' direzzjoni
tiffaċilita l-kontrolli tal-kapital u dwar l-implimentazzjoni
tal-istrateġija tas-settur bankarju huwa li jitfasslu minn task force
konġunta mill-Bank Ċentrali ta’ Ċipru (BĊĊ) u
l-Ministeru tal-Finanzi. Barra minn hekk, l-MtQ rivedut jitlob ir-rappurtar
fil-ħin tal-istimi tal-banek tal-impatt potenzjali tar-regoli li
għadhom kemm ġew introdotti u futuri tal-Unjoni Ewropea (UE) dwar
ir-rekwiżiti tal-kapital u s-self mhux produttiv (non-performing loans,
NPLs) fuq il-kapital, il-profittabilità u l-proporzjon ta’ kopertura.
Fl-aħħar nett, tiżdied taqsima ġdida dwar ir-riforma
tal-qafas ġuridiku ta’ ristrutturar tad-dejn privat. Skont dawn il-pariri
dwar il-politika, tiġi stabbilita task force biex issir stima tal-kobor
tal-kuntratt ta' bejgħ ta' art bla titlu, u jiġu pprovduti
rakkomandazzjonijiet dwar din il-kwistjoni. Se jiġi stabbilit qafas xieraq
għal riforma komprensiva li tistabbilixxi proċeduri ta’ insolvenza
korporattivi u personali. Fl-aħħar nett, il-Kodiċi
tal-Proċedura Ċivili u r-Regoli tal-Qorti se jiġu
rieżaminati biex jiġi żgurat funzjonament mingħajr intoppi
u effikaċi tal-oqfsa tal-esklużjoni riveduta u ta’ insolvenza.
Fir-rigward tal-politika fiskali, il-mira ġenerali tad-defiċit
primarju tal-gvern fl-2014 hija riveduta għal 1,8 % tal-PDG.
Fil-qasam tar-riformi strutturali, il-MtQ rivedut se jinkludi impenn biex
jiġi implimentat l-ewwel stadju tas-Sistema Nazzjonali tas-Saħħa
(NHS) wara li l-ewwel jiġi definit u addottat pjan ta' direzzjoni
sħiħ għall-NHS. Huwa wkoll meħtieġ li jiġu
riveduti l-politiki dwar l-ipprezzar u r-rimbors ta’ oġġetti u
servizzi mediċi, inkluż dawk relatati man-nefqa farmaċewtika.
Barra minn hekk, jeħtieġ tiġi stabbilita Unità ta’
Privatizzazzjoni. Barra minn hekk, il-MtQ rivedut se jinkludi impenn li
Ċipru tippreżenta pjan ta’ azzjoni biex tindirizza n-nuqqasijiet
identifikati fil-Fażi 2 tar-rieżami bejn il-pari mill-Forum Globali
dwar it-Trasparenza u l-Iskambju ta’ Informazzjoni għal Raġunijiet
ta’ Taxxa tal-Organizzazzjoni għall-Kooperazzjoni Ekonomika u
l-Iżvilupp (OECD). Fl-aħħar nett, il-MtQ il-ġdid jinkludi
rekwiżit għall-iżvilupp ta’ strateġija ta’ tkabbir
ibbażata fuq vantaġġi kompetittivi li jgħinu
lill-awtoritajiet ta' Ċipru jagħtu spinta lill-ekonomija. Id-Deċiżjoni proposta tiżgura
konsistenza sħiħa bejn il-qafas ta’ sorveljanza multilaterali
tal-Unjoni stabbilit mit-TFUE u l-kundizzjonalità ta’ politika li tirfed
il-programm ta’ aġġustament ekonomiku. B'mod partikolari,
l-Artikolu 10 tar-Regolament (UE) Nru 472/2013 jipprovdi għal
konsistenza fir-rapportar u l-obbligi ta' monitoraġġ. 2014/0063 (NLE) Proposta għal DEĊIŻJONI TA’ IMPLIMENTAZZJONI
TAL-KUNSILL li temenda d-Deċiżjoni ta'
Implimentazzjoni 2013/463/UE li tapprova l-programm ta’ aġġustament
makroekonomiku għal Ċipru IL-KUNSILL TAL-UNJONI EWROPEA, Wara li kkunsidra t-Trattat dwar il-Funzjonament
tal-Unjoni Ewropea, Wara li kkunsidra r-Regolament (UE)
Nru 472/2013 tal-Parlament Ewropew u tal-Kunsill
tal-21 ta’ Mejju 2013 dwar it-tisħiħ tas-sorveljanza
ekonomika u baġitarja tal-Istati Membri fiż-żona tal-Ewro li
tesperjenza jew tkun mhedda b’diffikultajiet gravi fir-rigward tal-istabbiltà
finanzjarja tagħhom[1],
u b’mod partikolari l-Artikolu 7(2) u (5) tiegħu, Wara li kkunsidra l-proposta mill-Kummissjoni
Ewropea, Billi: (1) Ir-Regolament (UE)
Nru 472/2013 japplika għal Stati Membri li diġà qed
jirċievu assistenza finanzjarja, inklużi dawk mill-Mekkaniżmu
Ewropew ta’ Stabbiltà (MES), fil-mument tad-dħul fis-seħħ
tiegħu. (2) Ir-Regolament (UE)
Nru 472/2013 jistabbilixxi r-regoli għall-approvazzjoni ta’ programm
ta’ aġġustament makroekonomiku għall-Istati Membri li
jirċievu għajnuna finanzjarja, li jeħtieġ li jkunu
konsistenti mad-dispożizzjonijiet tat-Trattat li jistabbilixxi
l-Mekkaniżmu Ewropew ta’ Stabbiltà (MES). (3) Wara t-talba
tal-25 ta’ Ġunju 2012 minn Ċipru għal assistenza
finanzjarja mill-MES, fil-25 ta’ April 2013 il-Kunsill
iddeċieda permezz tad-Deċiżjoni tal-Kunsill 2013/236/UE[2] li Ċipru kellu
jimplimenta b’mod rigoruż programm ta’ aġġustament
makroekonomiku. (4) Fl-24 ta’ April 2013
il-Bord tal-Gvernaturi tal-MES iddeċieda li jagħti,
fil-prinċipju, sostenn ta’ stabbiltà lil Ċipru u approva l-Memorandum
ta’ Qbil dwar il-Kundizzjonalità Speċifika tal-Politika Ekonomika (minn
hawn ’il quddiem “MtQ") u l-iffirmar tiegħu mill-Kummissjoni f’isem
il-MES. (5) F’konformità mal-Artikolu 1(2)
tad-Deċiżjoni ta' Implimentazzjoni 2013/463/UE, il-Kummissjoni,
f’kollaborazzjoni mal-Bank Ċentrali Ewropew (BĊE) u fejn
meħtieġ, mal-Fond Monetarju Internazzjonali (FMI), għamlet
it-tielet rieżami biex tevalwa l-progress fl-implimentazzjoni
tal-miżuri miftiehma kif ukoll l-effikaċja u l-impatt ekonomiku u
soċjali tagħhom. (6) Bħala riżultat,
id-Deċiżjoni 2013/463/UE għandha tiġi aġġornata
fl-oqsma tar-riforma tas-settur finanzjarju, il-politika fiskali u r-riformi
strutturali, b’mod speċjali fir-rigward ta’ (i) it-tfassil ta’
strateġija ta’ komunikazzjoni minn task force konġunta mill-Bank
Ċentrali ta’ Ċipru (CBC) u l-Ministeru tal-Finanzi dwar il-pjan ta'
direzzjoni biex jiġu ffaċilitati l-kontrolli tal-kapital u dwar
l-implimentazzjoni tal-istrateġija tas-settur bankarju; (ii) ir-rappurtar
fil-ħin tal-istimi tal-banek tal-impatt potenzjali tar-regoli tal-UE li
għadhom kemm ġew introdotti u futuri dwar ir-rekwiżiti
tal-kapital u s-self mhux produttiv (non-performing loans, NPLs) fuq
il-kapital, il-profittabilità u l-proporzjon ta’ kopertura; (iii) tiġi
stabbilita task force biex issir stima tal-kobor tal-kuntratt ta' bejgħ
ta' art bla titlu, u jiġu pprovduti rakkomandazzjonijiet dwar din
il-kwistjoni; (iv) ir-riforma tal-proċeduri ta' insolvenza personali u
korporattiva; (v) ir-rieżami tal-Kodiċi tal-Proċedura
Ċivili u r-Regoli tal-Qorti biex jiġi żgurat funzjonament
mingħajr intoppi u effikaċi tal-oqfsa tal-esklużjoni riveduta u
ta’ insolvenza; (vi) reviżjoni tal-mira għad-defiċit primarju
għall-2014 għal 1,8 % tal-PDG; (viii) l-implimentazzjoni
tal-ewwel stadju tas-Sistema Nazzjonali tas-Saħħa (National Health
Scheme, NHS) wara li l-ewwel jiġi definit u addottat pjan ta' direzzjoni
sħiħ għall-NHS; (viii) ir-reviżjoni tal-politiki dwar
l-ipprezzar u r-rimbors ta’ oġġetti u servizzi mediċi,
inkluż dawk relatati man-nefqa farmaċewtika; (ix) l-istabbiliment ta'
Unità ta' Privatizzazzjoni; (x) il-preżentazzjoni ta' pjan ta’ azzjoni
biex jiġu indirizzati n-nuqqasijiet identifikati fil-Fażi 2
tar-rieżami bejn il-pari mill-Forum Globali dwar it-Trasparenza u
l-Iskambju ta’ Informazzjoni għal Raġunijiet ta’ Taxxa
tal-Organizzazzjoni għall-Kooperazzjoni Ekonomika u l-Iżvilupp
(OECD). (xi) l-iżvilupp ta’ strateġija ta’ tkabbir ibbażata fuq
vantaġġi kompetittivi li jgħinu lill-awtorijatiet ta' Ċipru
jagħtu spinta lill-ekonomija. L-implimentazzjoni ta’ riformi komprensivi u
ambizzjużi f’oqsma finanzjarji, fiskali u strutturali għandha
tissalvagwardja s-sostenibbiltà, fuq perjodu ta' żmien medju, tad-dejn
pubbliku Ċiprijott. (7) Matul l-implimentazzjoni
tal-pakkett komprensiv ta’ politika ta’ Ċipru, il-Kummissjoni għandha
tipprovdi konsulenza politika addizzjonali kif ukoll assistenza teknika f’oqsma
speċifiċi. Stat Membru soġġett għal programm ta’
aġġustament makroekonomiku li jesperjenza kapaċità
amministrattiva insuffiċjenti għandu jfittex assistenza teknika
mill-Kummissjoni, li tista’ tikkostitwixxi, għal dak l-iskop, gruppi ta’
esperti. (8) L-awtoritajiet
Ċiprijotti jfittxu l-opinjonijiet, skont ir-regoli u l-prattika nazzjonali
attwali, tal-imsieħba soċjali u l-organizzazzjonijiet
tas-soċjetà ċivili fil-preparazzjoni, l-implimentazzjoni,
il-monitoraġġ u l-evalwazzjoni tal-programm ta’ aġġustament
makroekonomiku. ADOTTA DIN ID-DEĊIŻJONI: Artikolu 1 L-Artikolu 2 tad-Deċiżjoni ta’
Implimentazzjoni 2013/463/UE huwa b’dan emendat kif ġej: (1) Il-paragrafu 5 jiġi
sostitwit b’dan li ġej: "5. Bil-għan li tiġi
rrestawrata l-istabbiltà tas-settur finanzjarju tiegħu, Ċipru (i)
ikompli jimplimenta r-ristrutturar tas-settur bankarju u s-setturi
tal-istituzzjoni ta’ kreditu kooperattiv, (ii) ikompli jsaħħaħ
is-sorveljanza u r-regolamentazzjoni, (iii) ikompli r-riforma tal-qafas ta’
ristrutturazzjoni tad-dejn u (iv) gradwalment ineħħi restrizzjonijiet
kapitali skont li-pjan ta' direzzjoni tiegħu, filwaqt li jħares
l-istabbiltà finanzjarja. Il-programm jipprevedi dawn il-miżuri u
r-riżultati: (a)
li jiġi żgurat li s-sitwazzjoni
tal-likwidità tas-settur bankarju tiġi ssorveljata mill-qrib.
Restrizzjonijiet temporanji fuq il-moviment ħieles tal-kapital (inter
alia, limiti fuq il-ġbid ta’ flus kontanti, fuq il-pagamenti u fuq
it-trasferimenti) jiġu mmonitorjati mill-qrib. L-għan huwa li
l-kontrolli jibqgħu fis-seħħ biss sakemm ikunu strettament
meħtieġa sabiex jipprevjenu riskji serji u immedjati
għall-istabbiltà tas-sistema finanzjarja. L-implimentazzjoni tal-pjan ta'
direzzjoni għal rilassament gradwali ta’ miżura restrittiva tkompli,
b’kont meħud ukoll tas-sitwazzjoni tal-likwidità tal-istituzzjonijiet ta’
kreditu. Titfassal strateġija ta’ komunikazzjoni mmirata tajjeb
bl-għan li jikkomunikaw regolarment informazzjoni dwar il-pjan ta'
direzzjoni msemmi hawn fuq, u l-progress li sar fl-implimentazzjoni
tal-istrateġija tas-settur bankarju. Il-finanzjament u l-pjanijiet
kapitali mingħand il-banek domestiċi li jiddependu fuq
il-finanzjament mill-bank ċentrali jew li jirċievu għajnuna
mill-istat għandhom jirriflettu b’mod realistiku t-tnaqqis antiċipat
fl-ingranaġġ finanzjarju fis-settur bankarju, u jnaqqsu d-dipendenza
fuq is-self mill-banek ċentrali, filwaqt li jiġu evitati bejgħ
taħt emerġenza ta’ assi u kriżi tal-kreditu; (b)
l-adattament tar-rekwiżiti ta’ kapital minimu,
filwaqt li jitqiesu l-parametri ta’ valutazzjoni tal-karta tal-bilanċ u
tal-ittestjar tal-istress madwar l-UE; (c)
jiġi żgurat li kwalunkwe pjan ta’
ristrutturar jiġi formalment approvat taħt ir-regoli
tal-għajnuna mill-Istat, qabel tiġi pprovduta xi għajnuna
mill-Istat. Banek b’defiċit ta’ kapital jistgħu, jekk miżuri
oħrajn ma jkunux biżejjed, jitolbu għajnuna
għar-rikapitalizzazzjoni mill-Istat skont il-proċeduri ta’
għajnuna mill-Istat. Banek bi pjanijiet ta’ ristrutturazzjoni jirrapportaw
il-progress fl-implimentazzjoni tagħhom tal-pjanijiet; (d)
jiżguraw li jinħoloq reġistru ta’
kreditu u li jkun operazzjonali, li l-qafas regolatorju kurrenti fuq
l-indeboliment u l-forniment tal-assi, u dwar it-trattament ta’ kollateral fi
provvedimenti jiġi emendat, kif meħtieġ, u li l-implimentazzjoni
tar-regoli tal-UE dwar ir-rekwiżiti ta’ kapital u self mhux produttiv
jiġu adottati f'waqthom; (e)
it-tħaffif tal-limitazzjonijiet fuq il-qbid
ta’ kollateral. Dan jinkludi tħejjija ta’ leġiżlazzjoni
abbażi tar-riforma komprensiva li jistabbilixxi qafas xieraq
għall-proċeduri ta’ insolvenza korporattiva u personali, kif ukoll
jiżgura t-tħaddim korrett u effettiv tal-oqfsa ta' esklużjoni
riveduta u ta’ insolvenza. Barra minn hekk, ladarba riformat, jiġi rivedut
qafas ġuridiku ġdid għar-ristrutturar tas-settur privat tad-dejn
u jiġu definiti miżuri addizzjonali kif meħtieġ; (f)
l-implimentazzjoni tal-istrateġija
għall-istruttura futura, il-funzjonament u l-vijabbiltà tas-settur
tal-istituzzjonijiet kooperattivi ta’ kreditu, kif imfassla mill-Bank
Ċentrali ta’ Ċipru f’konsultazzjoni mal-Kummissjoni, il-BĊE u
l-FMI; (g)
it-tisħiħ tal-monitoraġġ fuq
id-djun tas-settur korporattiv u dak domestiku u li jiġi stabbilit qafas
ta’ ristrutturar immirat lejn id-dejn tas-settur privat sabiex ikun
iffaċilitat self ġdid u jitnaqqsu l-limiti fuq il-kreditu;
Il-politiki u l-prattiċi għall-ġestjoni tal-arretrati tal-banek
jiġu riveduti u d-Direttiva għall-Ġestjoni tal-Arretrati u
l-Kodiċi ta’ Kondotta jiġu emendati, kif meħtieġ.
Miżuri amministrattivi li jistgħu jfixklu l-iffissar ta’ rati ta’
self bankarju ma jiġux introdotti; (h)
jitkompla t-tisħiħ tal-qafas kontra‑l-ħasil
tal-flus u jiġi implimentat pjan ta’ azzjoni li jiżgura
l-applikazzjoni ta’ prattiċi mtejba fir-rigward tad-diliġenza dovuta
tal-klijent u trasparenza tal-entitajiet, f’konformità mal-aħjar prattika; (i)
l-integrazzjoni tal-ittestjar‑tal-istress
f'superviżjoni regolari ta' banek mhux‑fil-post; (j)
l-introduzzjoni ta' rekwiżiti obbligatorji ta’
divulgazzjoni biex jiġi żgurat li l-banek jikkomunikaw regolarment
lill-awtoritajiet u lis-swieq il-progress fir-ristrutturar tal-operazzjonijiet
tagħhom; (k)
l-iżgurar tal-implimentazzjoni tal-miżuri
ta’ ristrutturar li jsaħħu il-vijabilità tas-settur ta' tal-kreditu
tal-kooperattivi, wara l-istabbiliment tal-qafas ġuridiku
għall-istruttura l-ġdida ta’ governanza għall-ġestjoni
tas-sehem tal-Istat fis-settur; u (l)
l-iżgurar tar-reviżjoni tad-Direttiva
għall-Governanza, li tispeċifika, fost l-oħrajn, l-interazzjoni
bejn l-unitajiet ta’ verifika interna tal-banek u s-superviżuri tal-bank (2) Il-paragrafu 7 jiġi
sostitwit b’dan li ġej: "7. Matul l-2014, l-awtoritajiet
Ċiprijotti jimplimentaw bis-sħiħ il-miżuri permanenti
inklużi fil-Liġi tal-Baġit tal-2014 li jammontaw għal
mill-inqas EUR 270 miljun. Huwa jiżguraw ukoll
l-implimentazzjoni sħiħa tal-miżuri ta’ konsolidazzjoni adottati
sa minn Diċembru 2012." (3) Jiżdied il-paragrafu li
ġej: "7a. Għall-politika fiskali
fl-2015-2016, l-awtoritajiet Ċiprijotti jsegwu bilanċ ġenerali
tal-gvern f’konformità mat-triq ta’ aġġustament li tirrispetta
r-rakkomandazzjoni tal-Proċedura ta’ Defiċit Eċċessiv
(PDE)." (4) Il-paragrafu 8 jiġi
emendat kif ġej: (a) Is-subparagrafu (a) jiġi mibdul
b'dan li ġej: "(a) jekk ikun meħtieġ, aktar
riformi fis-sistema tal-pensjonijiet tas-settur ġenerali u pubbliku biex
tiġi żgurata fit-tul il-vijabilità tas-sistema tal-pensjonijiet,
filwaqt li tiġi indirizzata l-adegwatezza tal-pensjonijiet. (b) Is-subparagrafu (e) jiġi mibdul b'dan
li ġej: "(e) it-tfassil ta’ programm biex
tinkiseb sistema ta’ governanza korporattiva solida għal intrapriżi
li huma proprjetà‑tal-Istat u semi‑pubbliċi u l-bidu ta’ pjan
ta’ privatizzazzjoni bħala għajnuna biex tittejjeb l-effiċjenza
ekonomika u tiġi restawrata s-sostenibbiltà tad-dejn;" (5) Il-paragrafi minn 10 sa 13
jiġu sostitwiti b'dan li ġej: "10. Ċipru jiżgura
l-implimentazzjoni tal-miżuri miftiehma biex jiġu indirizzati
n-nuqqasijiet identifikati f’politiki ta’ attivazzjoni tiegħu. Ċipru
jieħu azzjoni rapida biex joħloq opportunitajiet għaż-żgħażagħ
u jtejjeb il-prospetti tagħhom li jsibu impjieg, skont l-objettivi
tar-Rakkomandazzjoni tal-Kunsill dwar l-Istabbiliment ta' Garanzija
għaż-Żgħażagħ[3].
Id-disinn, il-ġestjoni u l-implimentazzjoni tal-miżuri mmirati lejn
iż-żgħażagħ ikunu integrati sewwa fis-sistema usa' ta’
politiki ta’ attivazzjoni u jkunu koerenti mar-riforma tas-sistema ta'
assistenza soċjali u l-miri baġitarji miftiehma. "11. Ċipru jkun lest li jadotta kull
emenda oħra meħtieġa għal leġiżlazzjoni
speċifika għas-settur sabiex tiġi implimentata
bis-sħiħ id-Direttiva 2006/123/KE tal-Parlament Ewropew u tal-Kunsill
[4]. L-awtoritajiet
Ċiprijotti jsaħħu aktar it-tħaddim ta’ professjonijiet
regolati. Il-qafas tal-kompetizzjoni jittejjeb billi jitjieb l-iffunzjonar
tal-awtorità kompetenti għall-kompetizzjoni u billi jiġu
msaħħa l-indipendenza u s-setgħat tal-Awtoritajiet Regolatorji
Nazzjonali. 12. Ċipru jiżgura li jitnaqqas
id-dewmien fil-ħruġ ta’ titoli ta’ proprjetà li għadhom
pendenti, jieħu azzjoni biex iżid il-pass tal-tneħħija ta’
piżijiet fuq it-titoli ta’ proprjetà li għandhom jiġu trasferiti
għal xiri ta’ proprjetà immobbli, u jimplimenta skedi ta’ żmien
garantiti għall-ħruġ ta’ ċertifikati tal-bini u t-titoli
tal-proprjetà. 13. Ċipru jemenda r-regoli dwar
il-bejgħ sfurzat ta’ proprjetà ipotekata u jippermetti l-bejgħ
bl-irkant privat fl-iqsar perjodu ta’ żmien possibbli. Il-pass ta’
pproċessar ta' każijiet fil-qorti jitħaffef u l-ammont ta'
kawżi pendenti fil-qorti jkun eliminat sa tmiem il-programm. Ċipru
jieħu inizjattivi biex isaħħaħ il-kompetittività fis-settur
tat-turiżmu, billi jipprovdi pjan ta’ azzjoni konkret li jwassal
għall-implimentazzjoni ta’ miri kwantifikati identifikati, inter alia
fl-Istrateġija tat-Turiżmu għall-2011‑2015 riveduta
riċentament. Ċipru jimplimenta strateġija aero-politika li
twassal għall-adattament tal-politika tal-avjazzjoni esterna ta'
Ċipru, b’kont meħud tal-politika esterna dwar l-avjazzjoni tal-UE u
ftehimiet tal-UE b'rabta mal-avjazzjoni, filwaqt li tiġi żgurata
biżżejjed il-konnettività tal-ajru.” (6) Il-paragrafu 14,
subparagrafu (b) jinbidel b'li ġej: "(b) sinteżi komprensiva tas-sistema
regolatorja u l-organizzazzjoni tas-suq għas-settur ristrutturat
tal-enerġija u tal-gass, inkluż qafas tal-bejgħ adatt
għall-forniment tal-gass lil hinn mill-kosta mmirat biex jiġi
massimizzat id-dħul; u" (7) Il-paragrafu 15 jiġi
sostitwit b’dan li ġej: "15. Ċipru jressaq talba
aġġornata lill-Kummissjoni għal assistenza teknika matul
il-perjodu tal-programm. It-talba tidentifika u tispeċifika l-oqsma ta’
assistenza teknika jew ta' servizzi ta’ konsulenza li l-awtoritajiet
Ċiprijotti jqisu essenzjali għall-implimentazzjoni tal-programm ta’
aġġustament makroekonomiku tiegħu." (8) Jiżdied il-paragrafu li
ġej: "16. Fl-iżvilupp ta’ strateġija
ta’ tkabbir komprensiv u koerenti li jippermetti r-rilanċ tal-eknomija,
Ċipru jintegraha fil-qafas istituzzjonali nazzjonali tiegħu billi
jsaħħaħ l-amministrazzjoni pubblika kontinwa, ir-riformi
fil-ġestjoni tal-finanzi pubbliċi, impenji oħra fil-programm ta’
aġġustament makroekonomiku ta' Ċipru u inizjattivi rilevanti
tal-UE billi jieħu kont tal-ftehim ta' Sħubija
għall-implimentazzjoni tal-Fondi Ewropej Strutturali u ta'
Investiment." Artikolu 2 Din
id-Deċiżjoni hija indirizzata lir-Repubblika ta’ Ċipru. Magħmul fi Brussell, Għall-Kunsill Il-President [1] ĠU L 140, 27.5.2013, p. 1. [2] Id-Deċiżjoni tal-Kunsill 2013/236/UE
tal-25 ta’ April 2103 indirizzata lil Ċipru dwar
miżuri speċifiċi għall-kisba mill-ġdid ta’ stabbiltà
finanzjarja u tkabbir sostenibbli (ĠU L 141, 28.05.2013, p. 32). [3] Ir-Rakkomandazzjoni tal-Kunsill
tat-22 ta’ April 2013 dwar l-Istabbiliment ta’ Garanzija
għaż-Żgħażagħ (ĠU C 120, 26.4.2013,
p. 1). [4] Id-Direttiva 2006/123/KE tal-Parlament Ewropew u
tal-Kunsill dwar is-servizzi fis-suq intern (ĠU
L 376, 27.12.2006, p. 36).