MEMORANDUM TA’ SPJEGAZZJONI

1.           IL-KUNTEST TAL-PROPOSTA

Il-Konvenzjoni reġjonali dwar ir-regoli preferenzjali tal-oriġini pan-Ewro-Mediterranji[1] (minn hawn’ il quddiem “il-Konvenzjoni”) tistabilixxi dispożizzjonijiet dwar l-oriġini ta’ prodotti kkummerċjati skont il-Ftehimiet rilevanti konklużi bejn il-Partijiet Kontraenti.

L-Artikolu 5(1) tal-Konvenzjoni jistipula li parti terza tista' ssir Parti Kontraenti ta' din il-Konvenzjoni, sakemm dak il-pajjiż jew territorju kandidat ikollu fis-seħħ ftehim dwar il-kummerċ ħieles, li jkun jistipula regoli preferenzjali tal-oriġini, ma’ mill-inqas waħda mill-Partijiet Kontraenti. L-Artikolu 2(2) tal-Konvenzjoni jipprovdi li, għall-finijiet ta’ din il-Konvenzjoni, “parti terza” jfisser kwalunkwe pajjiż jew territorju ġar li mhux Parti Kontraenti.

Ir-Repubblika tal-Moldova ssottomettiet it-talba bil-miktub tagħha għall-adeżjoni fil-Konvenzjoni lid-depożitarju tal-Konvenzjoni (is-Segretarjat Ġenerali tal-Kunsill tal-UE) fis-17 ta’ Lulju 2013.

Fit-talba tagħha, ir-Repubblika tal-Moldova indikat li hija membru tal-Ftehim dwar il-Kummerċ Ħieles tal-Ewropa Ċentrali bejn l-Albanija, il-Bożnija, il-Ħerzergovina, Dik li kienet ir-Repubblika Jugoslava tal-Maċedonja, r-Repubblika tal-Moldova, il-Montenegro, is-Serbja, u l-Kosovo[2]. Bħala konsegwenza, ir-Repubblika tal-Moldova għandha ftehim dwar il-kummerċ ħieles fis-seħħ ma’ sitt Partijiet Kontraenti għall-Konvenzjoni u tikkonforma mal-kundizzjoni stipulata fl- Artikolu 5(1) tal-Konvenzjoni biex issir Parti Kontraenti. Fit-talba tagħha, ir-Repubblika tal-Moldova indikat ukoll li l-għaqda tagħha mal-Konvenzjoni PEM huwa impenn li sar fil-qafas tan-negozjati ta’ ftehim ta’ kummerċ ħieles profond u komprensiv (DCFTA) mal-UE[3] u li riċentament ikkonkludiet in-negozjati ta’ ftehim ta’ kummerċ ħieles mat-Turkija.

It-talba għandha għalhekk tiġi ppreżentata lill-Kumitat Konġunt tal-Konvenzjoni b’applikazzjoni tal-Artikolu 4(3)(b) tagħha għall-adozzjoni ta’ deċiżjoni fejn stiednet lir-Repubblika tal-Moldova biex taderixxi mal-Konvenzjoni. Il-pożizzjoni li għandha tittieħed mill-UE fi ħdan il-Kumitat Konġunt għandha tiġi stabbilita mill-Kunsill.

Skont il-Kummissjoni, l-adeżjoni tar-Repubblika tal-Moldova ma teħtieġ l-ebda miżuri tranżitorji kif imsemmi fl-Artikolu 4(3)(c) tal-Konvenzjoni.

2.           IR-RIŻULTATI TAL-KONSULTAZZJONIJIET MAL-PARTIJIET INTERESSATI U L-VALUTAZZJONIJIET TAL-IMPATT

Il-Partijiet Kontraenti tal-Konvenzjoni ġew informati b’din it-talba fil-laqgħa tal-Kumitat Konġunt tal-Konvenzjoni tad-29 ta’ Ottubru 2013.

Ma kienx meħtieġ li wieħed jirrikorri għal għarfien espert estern. Barra minn hekk, ma kienx meħtieġ li titwettaq valutazzjoni tal-impatt, hekk kif l-adeżjoni ta’ parti terza għall-Konvenzjoni hija biss soġġetta għall-kundizzjoni li din ikollha fis-seħħ ftehim dwar il-kummerċ ħieles ma’ mill-inqas waħda mill-Partijiet Kontraenti tal-Konvenzjoni.

3.           L-ELEMENTI LEGALI TAL-PROPOSTA

Il-bażi ġuridika għal din id-Deċiżjoni tal-Kunsill hija l-ewwel subparagrafu tal-Artikolu 207(4), flimkien mal-Artikolu 218(9) tat-Trattat dwar il-Funzjonament tal-Unjoni Ewropea.

Il-proposta taqa’ fil-kompetenza esklussiva tal-Unjoni. Għalhekk il-prinċipju tas-sussidjarjetà ma japplikax.

L-istrument li qed jiġi propost: Deċiżjoni tal-Kunsill.

2014/0058 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tiġi adottata, f’isem l-Unjoni Ewropea, fi ħdan il-Kumitat Konġunt imwaqqaf permezz tal-Konvenzjoni reġjonali dwar ir-regoli preferenzjali tal-oriġini pan-Ewro-Mediterranji rigward it-talba tar-Repubblika tal-Moldova li ssir Parti Kontraenti ta' dik il-Konvenzjoni

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-ewwel subparagrafu tal-Artikolu 207(4) flimkien mal-Artikolu 218(9) tiegħu,

Wara li kkunsidra l-Konvenzjoni Reġjonali dwar ir-regoli preferenzjali tal-oriġini Pan-Ewro-Mediterranji[4].

Wara li kkunsidra l-proposta mill-Kummissjoni Ewropea,

Billi:

(1)       Il-Konvenzjoni Reġjonali dwar ir-regoli preferenzjali ta’ oriġini pan-Ewro-Mediterranji (il-“Konvenzjoni”) daħlet fis-seħħ fl-1 ta’ Diċembru 2012.

(2)       L-Artikolu 5(1) tal-Konvenzjoni jistipula li parti terza tista' ssir Parti Kontraenti ta' din il-Konvenzjoni, sakemm dak il-pajjiż jew territorju kandidat ikollu fis-seħħ ftehim dwar il-kummerċ ħieles, li jkun jistipula regoli preferenzjali tal-oriġini, ma’ mill-inqas waħda mill-Partijiet Kontraenti.

(3)       Ir-Repubblika tal-Moldova ssottomettiet talba bil-miktub għall-adeżjoni fil-Konvenzjoni lid-depożitarju tal-Konvenzjoni (is-Segretarjat Ġenerali tal-Kunsill tal-UE) fis-17 ta’ Lulju 2013.

(4)       Ir-Repubblika tal-Moldova hija membru tal-Ftehim dwar il-Kummerċ Ħieles tal-Ewropa Ċentrali bejn l-Albanija, il-Bożnija, il-Ħerzergovina, dik li kienet ir-Repubblika Jugoslava tal-Maċedonja, r-Repubblika tal-Moldova, il-Montenegro, is-Serbja, u l-Kosovo[5]. Bħala konsegwenza, ir-Repubblika tal-Moldova għandha ftehim dwar il-kummerċ ħieles fis-seħħ ma’ sitt Partijiet Kontraenti għall-Konvenzjoni u tikkonforma mal-kundizzjoni stipulata fl- Artikolu 5(1) tal-Konvenzjoni biex issir Parti Kontraenti.

(5)       Skont l-Artikolu 4(3)(b) tal-Konvenzjoni l-Kumitat Konġunt se jadotta permezz ta’ Deċiżjoni stediniet lil partijiet terzi biex jidħlu fil-Konvenzjoni.

(6)       Il-pożizzjoni tal-Unjoni fi ħdan il-Kumitat Konġunt għandha tkun li tivvota favur Deċiżjoni fejn stiednet lir-Repubblika tal-Moldova biex taderixxi mal-Konvenzjoni,

ADOTTA DIN ID-DEĊIŻJONI:

Artikolu 1

Il-pożizzjoni li se tiġi adottata mill-Unjoni Ewropea fi ħdan il-Kumitat Konġunt tal-Konvenzjoni Reġjonali dwar ir-regoli tal-oriġini preferenzjali Pan-Ewro-Mediterranji, rigward it-talba tar-Repubblika tal-Moldova li ssir Parti Kontraenti għal dik il-Konvenzjoni, se tkun ibbażata fuq l-abbozz tad-Deċiżjoni tal-Kumitat Konġunt anness ma’ din id-Deċiżjoni.

Tibdiliet minuri fl-abbozz tad-Deċiżjoni jistgħu jiġu miftiehma mir-rappreżentanti tal-Unjoni fil-Kumitat Konġunt mingħajr deċiżjoni ulterjuri tal-Kunsill.

Artikolu 2

Wara l-adozzjoni tagħha, id-Deċiżjoni tal-Kumitat Konġunt se tiġi ppubblikata f’Il-Ġurnal Uffiċjali tal-Unjoni Ewropea.

Magħmul fi Brussell,

                                                                       Għall-Kunsill

                                                                       Il-President

[1]               ĠU L 54, 26.2.2013, p. 4.

[2]               Din id-deżinjazzjoni hija bla preġudizzju għall-pożizzjonijiet dwar l-istatus, u hija konformi mal-UNSCR 1244 u l-Opinjoni tal-QIĠ dwar id-Dikjarazzjoni ta' Indipendenza tal-Kosovo.

[3]               Id-DCFTA kien inizjalat fis-Summit tas-Sħubija tal-Lvant f’Vilnius, fit-28-29 ta’ Novembru 2013.

[4]               ĠU L 54, 26.2.2013, p. 4.

[5]               Din id-deżinjazzjoni hija bla preġudizzju għall-pożizzjonijiet dwar l-istatus, u hija konformi mal-UNSCR 1244 u l-Opinjoni tal-QIĠ dwar id-Dikjarazzjoni ta' Indipendenza tal-Kosovo.