RAPPORT TAL-KUMMISSJONI LILL-KUNSILL U LILL-PARLAMENT EWROPEW dwar l-attivitajiet tal-Pjattaforma tal-UE għat-Taħlit fil-Kooperazzjoni Esterna mit-twaqqif tagħha sat-tmiem ta' Lulju tal-2014 /* COM/2014/0733 final */
1. INTRODUZZJONI
L-Aġenda
għall-Bidla tenfasizza l-appoġġ tat-tkabbir inklużiv u
l-ħolqien tal-impjiegi bħala prijorità ewlenija tal-kooperazzjoni
esterna tal-UE. F'dan il-kuntest, it-taħlit huwa rikonoxxut bħala
strument importanti għall-ingranaġġ ta' riżorsi
addizzjonali u biex jiżdied l-impatt tal-għajnuna tal-UE. Skont
id-Deċiżjoni Nru 1080/2011/UE tal-Parlament Ewropew u
tal-Kunsill tal-25 ta' Ottubru 2011 dwar il-garanzija tal-UE
lill-Bank Ewropew tal-Investiment (BEI) għas-self estern tiegħu, il-Kunsill
u l-Parlament Ewropew (PE) talbu lill-Kummissjoni biex tistudja, u
sussegwentement tirrapporta dwar, l-iżvilupp ta' "Pjattaforma tal-UE
għall-Kooperazzjoni Esterna u l-Iżvilupp" bil-ħsieb li
tottimizza l-funzjonament tal-mekkaniżmi għat-taħlit ta' għotjiet
u self fil-qasam tal-azzjoni esterna. Fir-rapport
sussegwenti tagħha lill-Kunsill u lill-PE
fis-26 ta' Ottubru 2012, il-Kummissjoni pproponiet li
tistabbilixxi Pjattaforma ġdida tal-UE għat-Taħlit
fil-Kooperazzjoni Esterna (EUBEC) bħala Grupp ta' Esperti tal-Kummissjoni.
Għaldaqstant, il-Pjattaforma tnediet formalment fl-ewwel laqgħa
tal-"Grupp ta' Politika" li saret
fl-14 ta' Diċembru 2012. F'konformità
mal-impenn li l-Kummissjoni se tirrapporta lill-PE u lill-Kunsill, dan
id-dokument jirrappreżenta l-ewwel rapport ta' dan it-tip u jkopri
l-ħidma tal-Pjattaforma sa mit-twaqqif tagħha
fl-14 ta' Diċembru 2012 sal-aħħar ta'
Lulju 2014. [1]
Il-Kummissjoni
ppresediet il-laqgħat tal-Pjattaforma u kkontribwiet ukoll b'mod attiv
kemm fuq livell politiku kif ukoll fuq dak tekniku, flimkien mas-SEAE, l-Istati
Membri, il-PE u l-Istituzzjonijiet Finanzjarji (IF). Il-Kummissjoni
tirrikonoxxi l-valur miżjud tal-kooperazzjoni u r-riżultati miksuba,
kif rifless fir-rakkomandazzjonijiet ta' dan ir-rapport. Ir-rwol tal-Pjattaforma
mhuwiex li jissostitwixxi jew jidduplika l-istrutturi eżistenti ta'
teħid ta' deċiżjonijiet. 2.
OBJETTIVI Ir-rapport
tal-Kummissjoni lill-Kunsill u lill-PE tas-26 ta' Ottubru 2012
stipula l-objettiv u l-kamp ta' applikazzjoni globali tal-Pjattaforma. Il-Pjattaforma
għandha ttejjeb il-kwalità u l-effiċjenza tal-mekkaniżmi ta'
taħlit tal-kooperazzjoni esterna u l-iżvilupp tal-UE, b'kont
meħud tal-oqfsa ta' politika li jirregolaw ir-relazzjonijiet tal-Unjoni
mal-pajjiżi sħab differenti, b'mod partikolari l-politiki tal-UE dwar
l-Iżvilupp, il-Viċinat u t-Tkabbir. Il-Pjattaforma
għandha tipprovdi gwida għall-armonizzazzjoni tal-prinċipji
ewlenin dwar attivitajiet ta' taħlit filwaqt li tippermetti
differenzazzjoni skont is-setturi u r-reġjuni. Il-Pjattaforma
għandha tiffoka fuq setturi fejn l-istrumenti finanzjarji jistgħu
jintużaw b'mod utli, fir-reġjuni ġeografiċi u bejniethom. Il-Pjattaforma
għandha wkoll tgħin biex issaħħaħ il-koerenza
tal-attivitajiet ta' taħlit mal-politiki tal-UE. 3.
ĦARSA ĠENERALI LEJN IL-ĦIDMA TAL-PJATTAFORMA MATUL L-2013/14 Il-Pjattaforma
hija magħmula mill-Grupp tal-Politika u minn Gruppi Tekniċi. Il-Grupp
tal-Politika Il-Grupp
tal-Politika huwa magħmul minn rappreżentanti tal-Istati Membri
tal-UE, is-SEAE u l-Kummissjoni, u l-PE huwa mistieden. Parteċipanti
oħra jistgħu jiġu mistiedna bħala osservaturi. Il-Pjattaforma
tnediet fl-ewwel laqgħa tal-"Grupp ta' Politika"
(fl-14 ta' Diċembru 2012) li qabel dwar il-Pjan ta'
Ħidma għall-2013 li mbagħad ġie rivedut f'Ġunju 2013
u Diċembru 2013. Il-Grupp ta' Politika ltaqa' ħames darbiet,
f'Diċembru 2012, Ġunju u Diċembru 2013, April u
Lulju 2014 u ddiskuta x-xogħol tal-Gruppi Tekniċi u temi
speċifiċi addizzjonali, b'input ipprovdut mill-Kummissjoni, bħal
dwar il-Governanza Futura tal-faċilitajiet ta' taħlit tal-UE u r-rwol
tal-IFs li mhumiex fl-UE fil-faċilitajiet ta' taħlit tal-UE. L-IFs
involuti fix-xogħol tekniku ġew mistiedna jipparteċipaw
fil-laqgħat tal-Grupp ta' Politika bħala osservaturi. Il-Kummissjoni
tippresiedi l-laqgħat u hija inkarigata mis-segretarjat filwaqt li
tiżgura l-koordinazzjoni u l-komunikazzjoni. Il-Gruppi
Tekniċi Il-Gruppi
Tekniċi (GTs) huma magħmulin mill-Kummissjoni, is-SEAE, l-IFs u
għadd ta' rappreżentanti tal-Istati Membri. Ir-rappreżentanti
tal-PE jieħdu sehem ukoll fix-xogħol tekniku tal-Pjattaforma.
Il-kondiviżjoni u l-iskambju ta' għarfien espert bejn
il-parteċipanti huma essenzjali u ta' benefiċċju reċiproku.
S'issa,
ħames GTs speċifiċi ġew stabbiliti, ikkumplimentati minn
diversi laqgħat trasversali tal-GTs. Dawn kienu ffokati fuq
l-għanijiet li ġejjin: GT
1 "Ir-rieżami tal-mekkaniżmi ta' taħlit
eżistenti" - GT 2 "It-titjib tal-attivitajiet ta'
taħlit" - Il-Qafas għall-Kejl tar-Riżultati (QKR) - GT 3
"It-Titjib tal-Proċessi" - GT 4 "Il-Promozzjoni
tal-Istrumenti Finanzjarji" - GT 5 "L-għoti ta' kuntratti,
il-monitoraġġ u r-rappurtar" Dan
ix-xogħol tekniku kien ikkomplementat minn erba' workshops: (a) dwar
il-kwistjoni tal-"Mainstreaming fit-Tibdil fil-Klima
fil-faċilitajiet ta' taħlit" (b) dwar "Is-sostenibbiltà
tad-dejn" (c) dwar it-Taħlit u l-ODA, u (d) laqgħa
ta' diskussjoni mal-Aġenziji ta' Kreditu għall-Esportazzjoni Ewropej
(ECA). Il-PE
ħa sehem b'mod attiv fid-diskussjoni tal-Pjattaforma kemm fil-Grupp ta'
Politika kif ukoll fil-Gruppi Tekniċi. L-Involviment
tas-Soċjetà Ċivili u s-Settur Privat Saru erba'
laqgħat mar-rappreżentanti tal-Organizzazzjonijiet tas-Soċjetà
Ċivili (OSĊ) - żewġ laqgħat fit-30 ta' April
u l-24 ta' Lulju 2013, sessjoni ta' skambju ta' ideat dwar kif
jistgħu jiġu kkatalizzati l-finanzjament privat bit-taħlit
organizzat fil-kuntest tal-Jiem Ewropej tal-Iżvilupp
fis-26 ta' Novembru 2013, li jimmiraw l-OSĊ u l-investituri
tas-settur privat u laqgħa oħra fit-3 ta' Lulju 2014
li tinvolvi l-OSĊ u s-settur privat. 4.
IX-XOGĦOL TAL-GRUPPI TEKNIĊI 4.1 RIEŻAMI
TAL-MEKKANIŻMI TA' TAĦLIT EŻISTENTI Ix-xogħol tekniku
inizjali fil-qafas tal-Pjattaforma kien jikkonċerna rieżami wiesa'
tal-faċilitajiet ta' taħlit tal-UE eżistenti u l-iskambju
tal-aħjar prattiki li jwassal għall-konklużjonijiet li
ġejjin: (i)
Il-faċilitajiet ta' taħlit tal-UE eżistenti juru sinjali
pożittivi rigward il-prestazzjoni b'appoġġ għall-politiki
esterni tal-UE għalkemm il-proċeduri dwar l-iżvilupp,
l-iskrinjar/valutazzjoni/għażla, il-monitoraġġ u r-rapporti
tal-operazzjonijiet għandhom jiġu ssimplifikati, armonizzati u mtejba
aktar. (ii)
Il-mekkaniżmi ta' taħlit kisbu l-għan tagħhom li
jimmobilizzaw riżorsi pubbliċi sinifikanti għall-finanzjament
ta' proġetti ta' investiment b'appoġġ għall-politiki esterni
tal-UE. Hemm lok għal aktar użu ta' strumenti finanzjarji
(bħall-kapital ta' riskju, il-garanziji, is-sussidji tar-rata
tal-imgħax). (iii) Hemm
bżonn ta' aktar titjib f'termini ta' monitoraġġ u sistemi ta'
rappurtar fil-livell ta' faċilitajiet u ta' proġetti. (iv)
Il-proġetti ffinanzjati taħt il-mekkaniżmi ta' taħlit
ikopru varjetà ta' setturi u jistgħu jkunu ta' daqs differenti u
jużaw tipi differenti ta' appoġġ skont il-ħtiġijiet.
Din il-flessibbiltà ċertament tikkontribwixxi għar-rilevanza u
l-kwalità tal-portafoll tal-proġett, u tagħti l-possibbiltà
lill-Kummissjoni li tistabbilixxi prijoritajiet operattivi skont il-politiki u
l-ħtiġijiet reġjonali speċifiċi. Involviment akbar
tad-Delegazzjonijiet tal-UE fl-iżviluppi futuri jżid ulterjorment
ir-rilevanza tal-portafoll tal-proġett. (v) It-tfassil u
l-preparazzjoni tal-proġetti jitwettqu bi proċessi u standards sodi
mill-IFs, u l-proposti tal-proġetti jiġu vvalutati permezz ta'
mekkaniżmi ta' rieżami bejn il-pari u skrinjar intern
tal-Kummissjoni/is-SEAE. Il-valur miżjud tal-għotja huwa muri
fid-dokumentazzjoni tal-proġett u eżaminat matul il-proċess ta'
skrinjar, iżda madankollu, għandu jiġi speċifikat u
analizzat aktar fil-formola tal-applikazzjoni għall-għotja biex
jippermetti l-miżurabbiltà. Il-kalkoli tal-ingranaġġ finanzjarju
u l-formoli ta' applikazzjoni għall-għotja għandhom ikunu
armonizzati u l-kwalità tal-informazzjoni mogħtija mill-IFs għandha
titjieb aktar għal valutazzjoni/għażla aktar effiċjenti u
għal raġunijiet ta' monitoraġġ u rapportar. (vi) Wieħed
mis-suċċessi ewlenin tal-faċilitajiet ta' taħlit huwa
l-koordinazzjoni, l-iskambju ta' informazzjoni u l-kooperazzjoni mtejba bejn
l-atturi fl-għajnuna Ewropea kif ukoll sa ċertu punt u f'reġjuni
speċifiċi, ma' atturi fl-għajnuna li mhumiex Ewropej. Dan
inkiseb permezz tal-parteċipazzjoni tal-atturi differenti fil-korpi ta'
governanza formali tal-mekkaniżmi ta' taħlit tal-UE kif ukoll permezz
ta' koordinazzjoni informali fil-livell lokali jew fil-livell tal-Kwartieri
Ġenerali, jew taħt diversi Memoranda ta' Fehim mal-UE/Kummissjoni
fis-seħħ. Madankollu, għandu jkun enfasizzat li ħames
sħab Ewropej ewlenin jirrappreżentaw il-biċċa l-kbira
tal-operazzjonijiet approvati s'issa. Għandhom għalhekk isiru sforzi
biex tiġi promossa parteċipazzjoni usa' fil-faċilitajiet fost
l-atturi fl-għajnuna tal-UE. Jista' jipprova jinkiseb ukoll involviment
akbar tal-atturi fl-għajnuna li mhumiex Ewropej. Din il-kwistjoni kompliet
tiġi diskussa fil-kuntest tal-Pjattaforma bil-konklużjoni li
l-involviment tal-IFs li mhumiex Ewropej u b'mod partikolari l-banek
reġjonali li jaġixxu bħala IFs ewlenin, għandha tiġi
eżaminata mill-Bord tal-qafas ta' taħlit rilevanti wara
approċċ immirat, abbażi tal-valur miżjud speċifiku
mressaq fi proġett jew reġjun partikolari. Barra minn hekk, fejn
l-IFs li mhumiex Ewropej diġà qed jaġixxu bħala mexxejja
fil-faċilitajiet ta' taħlit speċifiċi, ir-rwol tagħhom
għandu jiġi ppreservat, sakemm il-kundizzjonijiet relatati mal-valur
miżjud tagħhom ikunu ssodisfati. Il-koordinazzjoni u l-kooperazzjoni
bejn l-IFs Ewropej u dawk li mhumiex Ewropej, jibqgħu ta' importanza
kritika u għal din ir-raġuni, l-IFs li mhumiex Ewropej għandhom
ikunu mistiedna jattendu laqgħat rilevanti bħala osservaturi. (vii) Bħala regola
ġenerali, il-pajjiżi/reġjuni sħab huma involuti fil-livell
tekniku għal kull proġett mill-bidu nett, u l-pussess huwa
karatteristika ġenerali tal-assistenza ffinanzjata mis-self.
Il-pajjiżi/reġjuni sħab għandhom ikunu involuti b'mod
sistematiku, fil-livell adatt, fil-fażi tat-tfassil u tal-preparazzjoni
tal-proġett (il-konsultazzjoni mwettqa għandha tkun dokumentata
fil-formola tal-applikazzjoni għall-għotja). Il-koordinazzjoni
għandha sseħħ fuq il-livell lokali bejn id-delegazzjonijiet
tal-UE u l-IFs vis-à-vis il-pajjiż/reġjun sieħeb biex jiġi
żgurat l-impatt tal-iżvilupp massimizzat tal-proġetti
ffinanzjati taħt il-mekkaniżmi ta' taħlit. Għadd mill-punti
ta' hawn fuq kienu segwiti b'ħidma teknika ulterjuri kif deskritt hawn
taħt.
4.2 IT-TISĦIĦ
TAL-EFFIKAĊJA, IT-TRASPARENZA U R-RESPONSABBILTÀ TAL-ATTIVITAJIET TA'
TAĦLIT - QAFAS GĦALL-KEJL TAR-RIŻULTATI, IT-TITJIB
TAL-PROĊESSI - L-IKKUNTRATTAR, IL-MONITORAĠĠ U R-RAPPURTAR
Wara
r-rieżami tal-faċilitajiet ta' taħlit eżistenti msemmi hawn
fuq u l-esperjenza miksuba s'issa, il-ħidma teknika bl-għan li
tindirizza b'mod konkret it-tliet sfidi ewlenin tqassmet fuq il-GT 2, GT 3 u GT
5:- (1)
Valutazzjoni Teknika Mtejba tal-Proġetti ta' Taħlit Qed issir
ħidma biex ikompli jitjieb il-proċess ta' valutazzjoni ta'
proġetti, filwaqt li kemm jista' jkun, fil-faċilitajiet kollha,
jiġu armonizzati l-kriterji ta' valutazzjoni bbażati fuq l-aħjar
prattiki. Il-ħidma
teknika mwettqa rriżultat f'Formola ta' Applikazzjoni
għall-Għotjiet imtejba u armonizza biex tintuża mid-diversi
faċilitajiet ta' Taħlit tal-UE. Ġew żviluppati Linji
Gwida Dettaljati biex jakkumpanjaw il-Formola ta' Applikazzjoni,
bl-għan li jipprovdu informazzjoni u kjarifiki lill-applikanti dwar kif
għandha timtela l-formola. Il-Linji Gwida l-ġodda jispjegaw b'mod
partikolari kif il-kwistjoni tal-addizzjonalità u l-ingranaġġ ta'
kwalunkwe għotja mitluba għandha tkun ġustifikata u
ppreżentata f'mod aktar strutturat u miżurabbli filwaqt li oqsma
oħra bħalma huma l-istruttura finanzjarja tal-proġetti jkomplu
jiġu elaborati fejn rilevanti. L-aspetti ambjentali u soċjali
jiġu mqabbla mal-istandards tal-UE bħal kull xorta ta' proġett
iffinanzjat mill-UE. Il-kwistjoni tas-sostenibbiltà tad-dejn hija
espliċitament introdotta, abbażi tal-workshops li saru mal-kollegi
tal-FMI. Hemm ukoll taqsima ġdida dwar l-indikaturi li hija marbuta
mal-Qafas għall-Kejl tar-Riżultati l-ġdid (ara hawn taħt).
Fil-bidu tal-2014, ġiet introdotta Formola ta' Applikazzjoni ġdida
għall-proposti ta' proġetti ġodda fil-faċilitajiet kollha
ġestiti mid-DEVCO. Abbażi tal-ħidma tal-EUBEC, it-Task Force
tad-WBIF qed tkompli taħdem biex tissimplifika u ttejjeb il-proċeduri
operattivi rilevanti. (2)
Żvilupp ta' Qafas għall-Kejl tar-Riżultati standardizzat Twettqet
ħidma teknika dwar qafas ġdid ta' kejl tar-riżultati maħsub
biex jgħin lill-Kummissjoni u lill-IFs jipprovdu informazzjoni dwar
ir-riżultati mistennija ta' proġetti sostnuti mil-faċiltajiet ex-ante,
ikejlu ex-post l-eżitu tal-attivitajiet ta' finanzjament
tagħhom u jippermettu aktar titjib tar-rappurtar dwar il-kisbiet
tal-faċilitajiet; dan kollu jirrifletti l-ħtiġiet tar-Regolament
Finanzjarju l-ġdid, l-oqfsa ta' riżultati tal-Kummissjoni, kif ukoll
il-prijoritajiet u l-objettivi tal-politiki tal-kooperazzjoni esterna tal-UE. Ir-riżultat kien
qafas miftiehem li jikkonsisti minn sett komuni ta' indikaturi
tar-riżultati li jirriflettu l-kisbiet u l-eżiti maħsuba
tal-proġetti. L-għażla
tal-indikaturi kienet iggwidata minn serje ta' kunsiderazzjonijiet,
bħall-koerenza mal-objettivi u l-prijoritajiet tal-faċilitajiet,
l-objettivi ta' politika tal-kooperazzjoni esterna tal-UE u r-Regolament
Finanzjarju, kif ukoll il-prattiki attwali mill-IFs u l-possibbiltà
għall-aggregazzjoni u għar-rappurtar lill-pubbliku ġenerali
(fost oħrajn). Il-qafas jinkludi definizzjoni
għal kull wieħed mill-indikaturi maqbula u jeħtieġ ukoll li
l-applikanti kwalitattivament jiddeskrivu l-impatt mistenni tal-proġett
propost. Il-qafas tar-riżultati l-ġdid ġie inkorporat
fil-Formola ta' Applikazzjoni u l-Linji Gwida l-ġodda (ara hawn fuq) u
fil-bidu tal-2014 dan ġie introdott għal proposti ta' proġetti
ġodda. (3)
L-Armonizzazzjoni tal-Ikkuntrattar, il-Monitoraġġ u r-Rappurtar Ix-xogħol tekniku li
twettaq kien jinvolvi lill-Kummissjoni, lis-servizzi tas-SEAE fil-kwartieri
ġenerali u lid-Delegazzjonijiet kif ukoll l-IFs. L-għan ewlieni
tal-GT kien li jaħdem fuq l-armonizzazzjoni u li jħaffef
il-proċess tal-ikkuntrattar fil-faċilitajiet billi joħloq Linji
Gwida rilevanti u dettaljati li se jgħinu biex idaħħlu
l-informazzjoni dwar l-ikkuntrattar rilevanti fil-fajls tal-proġetti
ppreżentati lill-korpi ta' governanza tal-faċilitajiet, bil-għan
li jiġi ssimplifikat l-ikkuntrattar tal-proġetti. Il-GT 5
ikkonċentra fuq l-ispjegazzjoni u l-iċċarar tad-definizzjonijiet
u l-proċessi tal-ikkuntrattar li jeħtieġ li jiġu integrati
bil-quddiem fil-dokument tal-informazzjoni tal-proġett sabiex ikun hemm
komprensjoni sħiħa tal-implimentazzjoni tal-proġett, tal-flussi
finanzjarji u tar-responsabbiltà rispettiva tal-partijiet interessati.
L-informazzjoni kuntrattwali xierqa kienet għalhekk integrata għal
raġunijiet ta' effiċjenza fil-Linji Gwida dettaljati dwar kif timtela
l-Formola ta' Applikazzjoni. Barra minn hekk, sett ta'
rakkomandazzjonijiet/l-aħjar prattiki għar-rappurtar u
l-monitoraġġ ġew identifikati abbażi tal-esperjenza attwali
kemm tal-Kummissjoni kif ukoll tal-IFs matul l-implimentazzjoni ta'
proġetti kif ukoll abbażi tar-rekwiżiti tal-qafas legali
applikabbli għall-istrumenti finanzjarji stabbiliti fir-Regolament
Finanzjarju. Il-Kummissjoni tilqa'
l-isforzi tal-Pjattaforma biex tkompli tiżgura proċess
tal-għażla tal-proġetti strutturat sew, trasparenti u effettiv,
bi proċessi tal-ikkuntrattar effiċjenti kif ukoll
monitoraġġ orjentat lejn ir-riżultati u proċeduri ta' rappurtar
xierqa, ibbażati adegwatament fuq ir-rekwiżiti legali rilevanti u
aġġornati. Il-Kummissjoni
tirrikonoxxi l-progress importanti li sar taħt il-Pjattaforma permezz
tal-iżvilupp tal-għodda ġodda – armonizzati – li għandhom
jintużaw fil-faċilitajiet ta' taħlit kollha bħall-formola
ta' applikazzjoni mtejba u l-linji gwida ta' akkumpanjament.
4.3 ŻVILUPP ULTERJURI TAL-ISTRUMENTI
FINANZJARJI
L-investiment
ibbażat fuq is-suq huwa mutur ewlieni tal-iżvilupp u parametru
importanti li jagħmel distinzjoni bejn l-ekonomiji żviluppati u dawk
anqas żviluppati. Eżempji jinkludu s-self tal-banek lill-impriżi
żgħar u ta' daqs medju, l-utilitajiet pubbliċi u privati li
jinvestu fil-produzzjoni tal-enerġija, jew proġetti ta'
infrastruttura ewlenin bħal toroq u ferroviji. L-użu
usa' ta' strumenti finanzjarji speċifiċi (pereż. garanziji,
ekwità, riskji tal-kambju lokali, u mekkaniżmi oħra ta' qsim
tar-riskju) huwa motivat mill-ħtieġa li jintużaw il-fondi
baġitarji limitati disponibbli kemm jista' jkun b'mod effiċjenti kif
ukoll mill-valutazzjoni li l-għotjiet mhumiex dejjem l-aħjar strument
biex jiġu żviluppati dawn it-tipi ta' attività ekonomika u li xi
drabi dawn jistgħu jfallu għalkollox. L-użu
ta' strumenti finanzjarji speċifiċi jista' jiġi rakkomandat meta
l-parteċipanti fis-suq, li jistgħu jinkludu istituzzjonijiet ta'
finanzjament tal-iżvilupp, ma jkunux qed jipprovdu l-finanzjament
meħtieġ f'ammonti suffiċjenti jew f'kundizzjonijiet xierqa
għal proġetti vijabbli finanzjarjament b'xi mod ieħor
minħabba l-preżenza ta' fallimenti tas-suq. Minbarra li
jindirizzaw il-fallimenti tas-suq jew is-sitwazzjonijiet subottimali
tal-investiment, jeħtieġ li l-istrumenti finanzjarji jipprovdu
addizzjonalità definita b'mod ċar (valur miżjud) kif ukoll ingranaġġ
għall-fondi baġitarji tal-UE, u t-tfassil tagħhom għandu
jiżgura l-allinjament tal-imgħaxijiet bejn il-Kummissjoni u
s-sħab implimentattivi tagħha. Fuq
il-bażi ta' dan ta' hawn fuq u fuq l-esperjenzi prattiċi tal-membri
tal-Pjattaforma, il-Pjattaforma għażlet għadd ta' setturi fejn
l-użu miżjud tal-istrumenti finanzjarji msemmija hawn fuq għandu
jiġi esplorat aktar, pereżempju l-infrastruttura, il-MSMEs,
l-agrikoltura, il-qasam soċjali. Għalkemm it-tip u l-livell ta'
appoġġ tal-UE għandu jiġi vvalutat fid-dawl ta' kull
proġett individwali, il-Pjattaforma approvat xi prinċipji
bażiċi dwar ir-rekwiżiti minimi, il-limiti ta' appoġġ
massimu u l-mekkaniżmi li jiżguraw l-allinjament tal-imgħaxijiet
bejn il-Kummissjoni u l-Istituzzjoni Finanzjarja Eliġibbli ta'
implimentazzjoni. Il-Kummissjoni
tapprova l-isforzi tal-pjattaforma għall-promozzjoni ta' użu akbar
tal-istrumenti finanzjarji. Minħabba li dawn l-istrumenti finanzjarji huma
prodotti komparattivament kumplessi, it-tfassil tagħhom se jiġi
adattat bir-reqqa għall-ambjent operattiv tal-pajjiżi sħab
individwali. Barra minn
hekk, il-Kummissjoni se tapplika l-prinċipju bażiku tal-UE
għall-istrumenti finanzjarji: ir-regola tal-ebda obbligazzjoni
kontinġenti, li tiżgura li r-responsabbiltà finanzjarja tal-UE li
tirriżulta minn strument finanzjarju ma tista' fl-ebda każ
taqbeż l-ammont tal-impenn baġitarju rilevanti li jsir għalih. 5. GOVERNANZA FUTURA
TAL-FAĊILITAJIET TA' TAĦLIT TAL-UE Sabiex
titjieb l-effettività tal-operazzjonijiet ta' taħlit fil-kisba tal-għanijiet
ta' politika tagħhom tat-tnaqqis tal-faqar u l-iżvilupp
soċjoekonomiku kif ukoll l-effiċjenza tal-ġestjoni tagħhom
inkluż tnaqqis fil-kostijiet ta' tranżazzjoni, il-Pjattaforma qablet
dwar l-organizzazzjoni ta' erba' "oqfsa" ta' taħlit skont l-istrumenti
ta' finanzjament (EDF – ENI – DCI – IPA). Fl-istess ħin, sabiex ikunu
jistgħu jiġu indirizzati l-prijoritajiet strateġiċi
reġjonali differenti, bil-għan li jiżdied l-ingranaġġ
politiku u jintużaw l-operazzjonijiet ta' taħlit b'mod effettiv
għad-djalogu politiku, u għal skopijiet ta' rappurtar, huwa propost
li taħt kull qafas jiġu maħtura "faċilitajiet"
definiti ġeografikament. Il-finanzjament
se jiġi primarjament minn programmi reġjonali definiti taħt
l-istrumenti differenti, f'konformità mal-prijoritajiet u l-għanijiet
definiti fid-dokumenti ta' programmar, fi djalogu mal-pajjiżi sħab u
l-organizzazzjonijiet reġjonali rilevanti. Fejn rilevanti u xieraq,
il-finanzjament jista' jiġi wkoll minn programmi speċifiċi
nazzjonali/reġjonali[2], b'appoġġ għall-prijoritajiet
u l-objettivi f'dawn il-pajjiżi/reġjuni kif definit fid-dokumenti ta'
programmazzjoni rilevanti. Għandu jkun hemm interess mill-Istati Membri
tal-UE jew minn donaturi oħrajn biex jikkontribwixxu
għall-operazzjonijiet ta' taħlit; dan se jsir permezz ta' fond(i)
speċifiku/speċifiċi. Se jkun hemm struttura ta' governanza
waħda għal kull qafas ta' taħlit, li tirregola l-fondi
tal-Kummissjoni kif ukoll tal-Istati Membri tal-UE jew kontribuzzjonijiet
oħra ta' donaturi permezz ta' fondi apposta. Dan il-qafas se japplika
għar-reġjuni kollha, inkluża l-Afrika. Abbażi
tal-ħidma tal-EUBEC, it-Task Force tad-WBIF qed tkompli taħdem biex
tissimplifika u ttejjeb l-istruttura ta' governanza rilevanti. It-teħid
ta' deċiżjonijiet se jkun organizzat fi struttura b'2 livelli.
L-opinjonijiet dwar il-proposti tal-proġetti se jiġu fformulati
fil-livell tal-Bord. Opinjonijiet bħal dawn se jkunu ppreparati permezz
ta' valutazzjoni fil-livell tekniku. Il-Bords[3],
ippreseduti mill-Kummissjoni, jinkludu lis-SEAE, lill-Istati Membri tal-UE
bħala membri bid-dritt tal-vot, u l-IFs bħala osservaturi. Dawn se
jkunu responsabbli biex jifformulaw opinjonijiet dwar operazzjonijiet ta'
taħlit individwali, jipprovdu gwida lill-istituzzjonijiet
parteċipanti, jimmonitoraw u jeżaminaw mill-ġdid
il-proġetti futuri, jeżaminaw ir-riżultati relatati
mal-proġetti u jimmonitorjaw il-portafoll ta' proġetti approvati, kif
ukoll jieħdu mill-għarfien espert speċifiku tal-IFs kif xieraq,
billi jiżguraw it-tqassim tax-xogħol. Il-valutazzjoni
teknika tal-proposti tal-proġetti se tinkludi laqgħat
tekniċi regolari ppreseduti mill-Kummissjoni (li jinvolvu lid-DĠs
rilevanti kif xieraq) bil-parteċipazzjoni tas-SEAE[4] u
tal-IFs li se jiddiskutu u jivvalutaw il-proġetti futuri li jitressqu
quddiem il-Bords. Il-formola
tal-applikazzjoni għall-proġetti mtejba (u aktar armonizzata)
żviluppata taħt il-Pjattaforma diġà tinsab fis-seħħ u
tikkontribwixxi biex tiżgura proċess tal-għażla
tal-proġetti strutturat sew, trasparenti u effettiv[5].
Is-Segretarjat
jappoġġja lill-Bord fil-kompiti kollha tiegħu, jagħti
l-appoġġ tiegħu fl-organizzazzjoni ta' avvenimenti ta'
komunikazzjoni u fl-implimentazzjoni ġenerali tal-istrateġija ta'
komunikazzjoni, jorganizza l-valutazzjoni fil-livell tekniku tal-proposti u
huwa l-punt ċentrali ta' kuntatt għall-partijiet ikkonċernati
kollha involuti fl-oqfsa ta' taħlit. L-istruttura u t-tħaddim
tas-Segretarjat iridu jiġu aġġustati skont l-istruttura
ġenerali ġdida u l-proċess tat-teħid
tad-deċiżjonijiet; il-Kummissjoni se tiżgura s-Segretarjat ta'
kull qafas ta' taħlit tal-UE kif ukoll il-faċilitajiet
korrispondenti, possibbilment b'esplorazzjoni tal-għażla
tal-esternalizzazzjoni ta' kompiti speċifiċi. Il-proċess
tat-teħid tad-deċiżjonijiet rieżaminat propost
għandu l-għan li jirrazzjonalizza, jissimplifika u jtejjeb
l-effiċjenza tal-proċess tat-teħid ta' deċiżjonijiet
kif ukoll li jilħaq ir-rekwiżiti l-ġodda stabbiliti
mir-Regolament Finanzjarju meta jiġu implimentati proġetti taħt
ġestjoni indiretta. Il-proċess tat-teħid tad-deċiżjonijiet
rieżaminat jinkludi: (i) Koordinazzjoni mtejba fi stadju bikri, li se
tiżgura li r-riżorsi jkunu ffokati fuq il-prijoritajiet identifikati,
(ii) Valutazzjoni teknika usa' u mtejba biex tkompli ttejjeb il-kwalità u
tiffaċilita l-iskambju tal-għarfien espert, billi tuża
l-għarfien espert speċifiku tal-IFs kif xieraq, (iii) Flessibbiltà
akbar b'ħin ta' tqabbil meħud fuq il-valutazzjoni teknika
għall-kumplessità relattiva ta' kull proposta u (iv) Numru mnaqqas ta'
passi globali fil-proċess. Ladarba proposta tiġi vvalutata bħala
teknikament matura, l-IF ewlenija[6]
se tkun tista' tissottometti formola ta' applikazzjoni riveduta finali
lis-Segretarjat bil-ħsieb ta' sottomissjoni lill-Bord. Fil-każ
ta' oqfsa tat-taħlit ġestiti mid-DEVCO, il-Kummissjoni, is-SEAE u
l-Istati Membri se jkollhom djalogu (ippresedut mis-SEAE u l-Kummissjoni)
dwar l-orjentazzjonijiet strateġiċi, il-linji gwida ġenerali mal-pajjiżi
benefiċjarji u l-organizzazzjonijiet reġjonali rilevanti. Dan
jista' jsir jew fil-kuntest ta' fora eżistenti ta' koordinazzjoni
tal-politika reġjonali jew subreġjonali jew, fejn ma jkunx hemm fora
xierqa identifikati, f'laqgħat strateġiċi ddedikati, taħt
il-prinċipju ta' sjieda tal-kooperazzjoni tagħna għall-iżvilupp.
Fil-każ tad-WBIF, id-diskussjonijiet fil-livell strateġiku diġà
stabbiliti li jinvolvu l-pajjiżi benefiċjarji għandhom
jissaħħu aktar bil-promozzjoni tal-"pjanijiet futuri ta' settur
wieħed" għal kull pajjiż. L-involviment tas-soċjetà ċivili fil-livell tal-proġett hija fil-preżent ġestita mill-IFs,
bħala parti mill-proċessi ta' approvazzjoni u ġestjoni
tal-proġetti tagħhom, jew billi jiġi żgurat li l-promotur
tal-proġett jieħu l-impenn tal-konsultazzjoni pubblika rilevanti jew
b'mod dirett.
Ir-rwol tad-Delegazzjonijiet/Unitajiet Ġeografiċi għandu jkun
l-involviment mar-rappreżentanti tas-soċjetà ċivili lokali
f'konformità mal-prattika komuni għal proċeduri oħra ta'
implimentazzjoni. Barra minn hekk, il-Kummissjoni se tkompli żżid
l-isforzi tagħha biex ittejjeb l-aċċess għall-informazzjoni
għal organizzazzjonijiet tas-soċjetà ċivili, inklużi dawk
reġjonali, fil-livell tal-faċilitajiet. Laqgħat regolari dwar
it-taħlit ġew organizzati ma' CSOs fi Brussell.
6.
ĦARSA ĠENERALI LEJN IL-KONKLUŻJONIJIET U R-RAKKOMANDAZZJONIJIET
(1) Abbażi
tal-esperjenza miksuba s'issa, il-faċilitajiet ta' taħlit tal-UE
eżistenti juru sinjali pożittivi rigward il-prestazzjoni
b'appoġġ għall-politiki esterni tal-UE. (2) Il-ħidma
teknika mwettqa diġà, irriżultat f'Formola ta' Applikazzjoni
għall-Għotjiet mtejba u armonizzata biex tintuża mid-diversi
faċilitajiet ta' taħlit tal-UE. Ġew żviluppati Linji Gwida
dettaljati biex jakkumpanjaw il-Formola ta' Applikazzjoni, bl-għan li
jipprovdu informazzjoni u kjarifiki lill-applikanti dwar kif għandha
timtela l-formola. Il-kwistjoni tas-sostenibbiltà tad-dejn ġiet
espliċitament introdotta u r-reviżjoni kontinwa tal-Qafas tal-FMI se
tiġi segwita. (3) Qafas tar-riżultati ġdid ġie żviluppat u
inkorporat fil-Formola ta' Applikazzjoni u Linji Gwida ġodda (ara hawn
fuq). Il-Kummissjoni
tilqa' l-isforzi tal-Pjattaforma biex tkompli tiżgura proċess
tal-għażla tal-proġetti strutturat sew, trasparenti u effettiv,
bi proċessi tal-ikkuntrattar effiċjenti u monitoraġġ
orjentat lejn ir-riżultat u proċeduri ta' rappurtar xierqa,
ibbażati adegwatament fuq ir-rekwiżiti legali rilevanti u
aġġornati, u allinjati mal-politiki, il-prijoritajiet u l-objettivi
tal-kooperazzjoni esterna tal-UE. F'dan
il-qafas, il-Kummissjoni tirrikonoxxi l-progress importanti li sar taħt
il-Pjattaforma permezz tal-iżvilupp tal-għodda ġodda –
armonizzati li għandhom jintużaw fil-faċilitajiet ta'
taħlit eżistenti kollha bħall-formola ta' applikazzjoni mtejba u
l-linji gwida ta' akkumpanjament. (4) Ġew identifikati oqsma ewlenin fejn l-użu akbar
tal-istrumenti finanzjarji speċifiċi għandu jiġi esplorat
aktar. Dawn huma bbażati fuq ir-rilevanza prattika tagħhom u wkoll
biex jindikaw oqsma fejn l-azzjonijiet futuri taħt il-faċilitajiet
ta' taħlit għandhom ikunu mmirati: - Garanziji, ekwità u strumenti oħra ta' kondiviżjoni
tar-riskji għall-proġetti infrastrutturali u l-MSMEs; - Setturi ġodda: Garanziji u mekkaniżmi
għall-kondiviżjoni tar-riskji għas-settur tal-agrikoltura, dak
soċjali u oħrajn. Il-Kummissjoni
tappoġġja r-rakkomandazzjonijiet tal-Pjattaforma għall-oqfsa ta'
taħlit tal-UE biex isir użu akbar tal-istrumenti finanzjarji
speċifiċi, b'mod partikolari fl-infrastruttura, l-MSMEs,
l-agrikoltura u s-setturi soċjali – b'kunsiderazzjoni xierqa tal-ambjenti
operattivi fil-pajjiżi sħab u tar-regola tal-ebda obbligazzjoni
kontinġenti. Din se taħdem mill-qrib mas-sħab finanzjarji
tal-iżvilupp tagħha biex iddaħħal fis-suq strumenti
finanzjarji innovattivi b'impatt ta' żvilupp qawwi. (5) Il-Pjattaforma
kkonkludiet li l-erba' "oqfsa" tat-taħlit għandhom ikunu
organizzati skont l-istrumenti ta' finanzjament (EDF – ENI – DCI – IPA).
Il-konklużjonijiet operattivi relatati mal-proġetti se jittieħdu
fl-erba' bords rispettivi rilevanti (il-bord EDF – il-bord ENI – il-bord DCI –
il-Kumitat tat-Tmexxija tad-WBIF). Il-proċess tat-teħid
tad-deċiżjonijiet rivedut se jgħin biex jissimplifika u jtejjeb
l-effiċjenza kif ukoll biex jissodisfa r-rekwiżiti l-ġodda
stabbiliti mir-Regolament Finanzjarju. Il-Kummissjoni
tappoġġja s-simplifikazzjoni ulterjuri tal-faċilitajiet ta'
taħlit f'erba' oqfsa tat-taħlit sabiex ittejjeb l-effikaċja
tal-operazzjonijiet ta' taħlit fil-kisba tal-għanijiet ta' politika
tagħhom u biex jitnaqqsu l-kostijiet. Il-Kummissjoni,
f'koordinazzjoni mill-qrib mas-SEAE u l-Istati Membri tal-UE, se tagħmel
ħilitha biex tiżgura l-implimentazzjoni effiċjenti u effettiva
tar-rakkomandazzjonijiet għal struttura ta' governanza riveduta
tal-faċilitajiet ta' taħlit. (6) L-involviment
tal-IFs li mhumiex Ewropej u b'mod partikolari l-banek reġjonali li
jaġixxu bħala IFs ewlenin, għandha tiġi eżaminata
mill-Bord tal-qafas ta' taħlit rilevanti wara approċċ immirat,
abbażi tal-valur miżjud speċifiku mressaq fi proġett jew
reġjun partikolari. Barra minn hekk, fejn l-IFs li mhumiex Ewropej
diġà qed jaġixxu bħala mexxejja fil-faċilitajiet ta'
taħlit speċifiċi, ir-rwol tagħhom għandu jiġi
ppreservat, sakemm il-kundizzjonijiet relatati mal-valur miżjud
tagħhom ikunu ssodisfati. Il-koordinazzjoni u l-kooperazzjoni bejn l-IFs
Ewropej u dawk li mhumiex Ewropej, jibqgħu ta' importanza kritika u
għal din ir-raġuni, l-IFs li mhumiex Ewropej għandhom ikunu
mistiedna jattendu laqgħat rilevanti bħala osservaturi. (7) Il-parteċipazzjoni
attiva tal-Istati Membri tal-UE, il-PE, is-SEAE, u s-servizzi tal-Kummissjoni,
firxa wiesgħa ta' IFs pubbliċi, multilaterali u bilaterali, Ewropej u
mhux Ewropej, kienet essenzjali għas-suċċess tagħha
sal-lum. Dan ġie mtejjeb aktar bl-iskambji ma' CSOs u l-komunikazzjoni ma'
atturi oħrajn. Il-Kummissjoni
temmen li l-Pjattaforma tal-UE wriet biċ-ċar il-valur tagħha
billi ġabret flimkien firxa wiesgħa ta' partijiet ikkonċernati
biex jiskambjaw l-għarfien espert dwar l-aspetti kollha ta' taħlit
fil-kooperazzjoni esterna. Il-Kummissjoni tirrakkomanda li l-Pjattaforma tal-UE
tkompli tibni fuq din l-esperjenza u s-suċċess tagħha s'issa u
tkompli bil-ħidma tagħha fuq kwistjonijiet speċifiċi
relatati mat-taħlit fil-kooperazzjoni esterna. Fl-aħħar
nett, u f'konformità mal-Pjan ta' Ħidma ppreżentat mill-Kummissjoni u
adottat mill-Grupp ta' Politika, il-kwistjonijiet li ġejjin ġew
identifikati u qed jiġu indirizzati matul l-2014. • Il-mobilizzazzjoni
ta' Riżorsi tas-Settur Privat • L-Aħjar
Prattiki u l-Opportunitajiet ta' Finanzjament fit-Tibdil fil-Klima [1] Dokumenti ta' ħidma
dettaljati u rapporti ulterjuri jinsabu f'http://ec.europa.eu/transparency/regexpert/index.cfm peress li l-Pjattaforma hija Grupp ta'
Esperti tal-Kummissjoni rreġistrat E02852 [2] Kif ukoll sa ċertu
punt mill-programmi tematiċi. [3] Fil-każ tad-WBIF, dan jissejjaħ
il-Kumitat ta' Tmexxija, fejn is-SEAE mhuwiex involut. [4] Is-SEAE mhuwiex involut fil-valutazzjoni teknika tal-proposti ta'
proġetti tad-WBIF [5] Fid-WBIF dan jirrifletti
l-fatt li l-applikanti ewlenin huma l-pajjiżi benefiċjarji. [6] Fil-każ tal-faċilitajiet
ġestiti mid-DEVCO biss.