Rapport dwar is-segwitu għat-talbiet li saru mill-Parlament Ewropew fir-riżoluzzjonijiet tiegħu ta' kwittanza u mill-Kunsill fir-rakkomandazzjoni tiegħu ta' kwittanza għas-sena baġitarja 2012

Kummenti preliminari

Dan huwa r-rapport tal-Kummissjoni lill-Parlament Ewropew (PE) u lill-Kunsill dwar is-segwitu għar-riżoluzzjonijiet tal-PE dwar il-kwittanza[1] u r-Rakkomandazzjoni tal-Kunsill[2] għas-sena finanzjarja 2012, skont l-Artikolu 319(3) tat-Trattat dwar il-Funzjonament tal-Unjoni Ewropea (TFUE), l-Artikolu 166 tar-Regolament Finanzjarju (RF) u l-Artikolu 119(5) tar-Regolament Finanzarju tal-Fondi Ewropew għall-Iżvilupp (FEŻ).

Ir-rapport jiffoka fuq l-impenji vinkolanti (BC) enfasizzati mill-PE fir-riżoluzzjonijiet ta' kwittanza ġenerali tiegħu. Huwa akkumpanjat minn żewġ Dokumenti ta' Ħidma tal-Persunal tal-Kummissjoni (CSWD) li fihom it-tweġibiet għal 353 talba speċifika tal-PE u 77 (79 b'kollox imma 2 huma indirizzati lill-Qorti tal-Awdituri) osservazzjoni (8 mill-PE) u talba speċifika tal-Kunsill dwar il-kwittanza.

Il-Kummissjoni taqbel li tibda azzjonijiet ġodda fuq 142 talba (108 mill-PE u 34 mill-Kunsill). Hija tqis li għal 240 talba (199 mill-PE u 41 mill-Kunsill), l-azzjoni meħtieġa diġà ttieħdet jew tinsab għaddejja bħalissa, għalkemm f'xi wħud mill-każijiet hemm il-ħtieġa li jiġu eżaminati r-riżultati tal-azzjonijiet. Fl-aħħar nett, għal raġunijiet marbuta mal-qafas legali u baġitarju eżistenti jew ir-rwol jew il-prerogattivi istituzzjonali tagħha, il-Kummissjoni ma tistax taċċetta 40 talba (38 mill-PE[3] u 2 mill-Kunsill[4]). Ġustifikazzjoni dettaljata hija pprovduta fiż-żewġ CSWD mehmuża.

1.           Impenji vinkolanti

Fir-riżoluzzjoni ta' kwittanza ġenerali għall-2012, il-PE speċifikament jenfasizza numru kbir ta' BC ta' natura ġuridika, tal-awditjar, istituzzjonali, tar-responsabbiltà u finanzjarja. Dawn it-talbiet ġew diskussi b'mod estensiv matul il-proċedura ta' kwittanza, b'mod partikolari mar-relatur u mal-Membri tal-Kumitat għall-Kontroll tal-Baġit (CONT). Fl-ittri mill-President Barroso (26.11.2013)[5] u l-Kummissarju Ṧemeta (10.3.2014)[6], ingħatat evidenza tal-impenn formali tal-Kummissjoni biex timplimenta b'mod sħiħ u f'waqtha serje ta' azzjonijiet u miżuri relatati mal-kwistjonijiet identifikati minn dawn il-BC.

Din il-Komunikazzjoni tqis il-wegħdiet li saru fiż-żewġ ittri msemmija hawn fuq filwaqt li taġġorna, fejn meħtieġ, is-sitwazzjoni f'dak li jirrigwarda l-azzjonijiet ulterjuri li ttieħdu s'issa.

1.1. L-indirizzar ta' problemi mqajma fir-Rapporti Annwali tal-Attività tad-DĠ (RAA) riżervi (§§ 25-26, 33, 39, 196, 223)

Fir-rigward tar-riżervi espressi fl-RAAs ta' diversi DĠ, il-PE jqis bħala prijorità li l-Kummissjoni tipprova li ħadet il-miżuri meħtieġa sabiex tegħleb it-tħassib dwar ir-riżervi li ġew speċifikament approvati mill-PE. Barra minn hekk il-PE għandu l-ħsieb li juża s-segwitu tar-riżervi bħala strument ta' kontroll baġitarju għall-monitoraġġ ta' dawn il-miżuri.

Il-Kummissjoni diġà ħadet għadd ta' miżuri fundamentali, kif spjegat fl-ittri msemmija qabel, flimkien mal-impenn formali mill-Kulleġġ tal-Kummissarji attwali lejn l-aħħar PE biex jieħu azzjoni ulterjuri, li fil-fatt għamilha possibbli għall-PE biex jagħti kwittanza lill-Kummissjoni.

Il-Kummissjoni tirrapporta d-dgħufijiet serji identifikati fl-eżekuzzjoni tal-baġit tal-UE permezz ta' riżervi fir-RAA tad-Diretturi-Ġenerali tal-Kummissjoni u tiżvela r-riskju li jirriżulta għall-baġit tal-UE. Riżerva dejjem timxi id f'id ma' pjan ta' azzjoni ċar biex tiġi indirizzata l-problema identifikata fil-ġestjoni tal-fondi tal-UE u, jekk jiġu ssodisfati l-kundizzjonijiet regolatorji, il-Kummissjoni tista' tinterrompi jew tissospendi l-ħlasijiet rispettivi. Il-Kummissjoni ssegwi dawn ir-riżervi u l-pjanijiet ta' azzjoni korrispondenti billi timmonitorja l-progress tax-xogħol sottostanti biex jiġu implimentati. Riżerva titneħħa biss ladarba l-Kummissjoni tkun kisbet evidenza affidabbli li d-dgħufijiet ġew indirizzati permezz tal-implimentazzjoni ta' azzjonijiet xierqa mill-Istat Membru (SM), li tnedew proċeduri ta' korrezzjoni adegwati, u li s-sistema l-ġdida wriet l-affidabilità tagħha fil-prattika. Ir-RAA juru b'mod trasparenti kif il-Kummissjoni twettaq ir-responsabilità tagħha biex tiżgura l-legalità u r-regolarità tal-politiki tal-ġestjoni kondiviża, fil-livell ta' SM u programmi individwali (għall-Politika ta' Koeżjoni) jew l-aġenziji tal-pagamenti (AP) (għall-Agrikoltura). Barra minn hekk, il-Kummissjoni tippreżenta stimi tar-rati tal-erruri u r-riskji residwi dwar il-PAs, miżuri jew programmi u l-SM għandhom indikazzjoni tar-riskju reali wara l-implimentazzjoni ta' azzjonijiet korrettivi. Dan huwa wkoll strument li jgħin lill-awtorità tal-kwittanza tivvaluta s-sitwazzjoni f'aktar dettall.

Il-Kummissjoni ġeneralment tilqa' l-approvazzjoni tal-PE tar-riżervi espressi mid-Diretturi-Ġenerali rispettivi tad-DĠ AGRI u REGIO. Madankollu, it-talba tal-PE biex jawditja l-programmi operattivi (OP) kollha mill-inqas darba matul il-perjodu ta' programmar mhix konsistenti mal-approċċ ta' awditu wieħed propost mill-QEA fl-2004 u hija f'kunflitt mat-talba tal-PE biex titjieb l-effiċjenza fl-użu ta' riżorsi limitati tal-awditjar billi l-awditi jiġu mmirati lejn programmi b'riskju għoli.

1.2. Definizzjoni u applikazzjoni aħjar tar-regolamenti u tar-regoli mill-awtoritajiet tal-Istati Membri

→ Fil-qasam tal-ġestjoni kondiviża l-PE talab regoli dettaljati fl-att delegat tar-Regolament dwar id-Dispożizzjonijiet Komuni (RDK) sabiex tiġi pprovduta definizzjoni ta' nuqqasijiet serji u valutazzjoni tar-rekwiżiti ewlenin għal sistemi ta' ġestjoni u kontroll (§§ 56-4, 216, 223).

Il-Kummissjoni adottat l-atti delegati li jirregolaw l-oqsma taħt ġestjoni kondiviża skont il-Qafas Finanzjarju Pluriennali (MFF) il-ġdid 2014-2020. L-att delegat ibbażat fuq ir-RDK jipprovdi regoli dettaljati sabiex jippermetti li l-mekkaniżmu ta' korrezzjonijiet finanzjarji (KF) jaħdem b'mod effettiv billi jiddefinixxi b'mod ċar il-kriterji għad-determinazzjoni ta' "nuqqasijiet serji" li jiskattaw il-proċedura għal korrezzjonijiet finanzjarji netti (NFC) (ara l-Artikolu 30 tar-regolament delegat tal-Kummissjoni 480/2014 tat-3 ta' Marzu 2014).

 →Il-PE talab l-applikazzjoni ta' tnaqqis fil-pagamenti u sanzjonijiet amministrattivi li jiżdiedu progressivament fejn il-kriterji ta' eliġibbiltà ma jiġux irrispettati mill-benefiċjarju finali li jirċievi pagamenti diretti jew appoġġ għall-iżvilupp rurali u nuqqasijiet rikorrenti fis-Sistema ta' Identifikazzjoni tal-Pakketti tal-Art LPIS (§§44, 56-5).

Il-qafas regolatorju attwali diġà jipprevedi sistema ta' tnaqqis u esklużjonijiet fil-pagamenti li jiżdiedu progressivament meta jkun hemm biżżejjed evidenza li l-persistenza tan-nuqqasijiet (il-benefiċjarji ma jkunux ikkonformaw mal-kundizzjonijiet ta' eliġibbiltà) tkun qed iżżid ir-riskju finanzjarju għall-baġit tal-UE.[7] Il-Kummissjoni pproponiet li żżomm din is-sistema ta' tnaqqis, rifjut, irtirar ta' pagamenti u penali fil-livell tal-benefiċjarji finali.[8] L-SM għandhom japplikaw dawn id-dispożizzjonijiet mingħajr preġudizzju għall-KF li l-Kummissjoni tista' timponi f'livell ta' SM.

→ Il-PE talab li l-mekkaniżmu ta' sospensjoni jintuża bħala strument ex-ante għall-protezzjoni tal-baġit tal-UE (§§ 42, 56-6).

L-Artikolu 41 tar-Regolament Nru 1306/2013 jipprovdi għal mekkaniżmu ġdid ta' sospensjoni fil-qasam tal-agrikoltura li jista' jintuża bħala strument ex-ante sabiex jipproteġi l-baġit tal-UE minn nuqqasijiet fis-sistema ta' kontroll tal-SM. Fil-qasam tal-agrikoltura, il-pagamenti se jkunu sospiżi fil-każijiet kollha fejn azzjonijiet ta' rimedju nazzjonali biex jiġu indirizzati nuqqasijiet serji ma jiġux imwettqa b'mod xieraq u f'waqtu.

1.3. L-iżvilupp u l-implimentazzjoni ta' strateġiji ta' kontroll u awditjar aktar b'saħħithom għall-perjodu 2014-2020

Rigward id-DĠ REGIO, il-PE talab:

→żieda fl-awditi bbażati fuq kampjuni każwali mill-Kummissjoni fuq il-post u l-użu aktar sistematiku tal-NFC (§§ 13, 38, 56-3).

Il-Kummissjoni twettaq il-verifiki tagħha stess b'mod kosteffettiv direttament fil-livell tal-awtoritajiet ta' ġestjoni ta' riskju għoli, u l-korpi intermedji u l-benefiċjarji. Din il-kwistjoni hija wkoll indirizzata fir-RAA, fl-Istrateġija tal-Awditjar u fir-rapport ġenerali tal-inkjesta tal-awditjar "Nagħlqu d-distakk tal-assigurazzjoni".

→li titressaq proposta fuq il-limitazzjoni jekk mhux il-projbizzjoni ta' proġetti ta' sostituzzjoni kollha flimkien (§§ 15, 54, 56-13, 215).

Din it-talba titlob rieżami tal-leġiżlazzjoni adottata mill-PE u l-Kunsill f'Diċembru 2013 li tkopri l-perjodu 2014-2020[9]. Il-bidla sinifikanti introdotta għall-perjodu ta' programmazzjoni 2014-2020 hija, taħt ċerti kundizzjonijiet, li titneħħa l-possibilità għall-SM biex jevitaw korrezzjoni netta billi jaċċettawha u mbagħad ikollhom id-dritt li jużaw mill-ġdid l-ammont korrispondenti. Fil-fehma tal-Kummissjoni l-possibbiltà għall-Istati Membri li jissostitwixxu proġetti irregolari identifikati minnhom stess qabel il-15 ta' Frar tas-sena N+1, tibqa' inċentiv importanti għall-SM biex isibu u jikkoreġu irregolaritajiet fil-livell tagħhom. Għalhekk, l-ebda proposta bħal din ma hi se tkun ippreżentata qabel ma tiġi vvalutata l-effettività tal-istrumenti l-ġodda.

→Li jżidu l-kontrolli tagħhom tal-ewwel livell u jagħmluhom iktar stretti (§ 46).

Din it-talba hija indirizzata lill-Istati Membri u timxi mal-linji tal-inizjattivi tal-Kummissjoni u r-rakkomandazzjonijiet tal-QEA. Il-Kummissjoni kontinwament tinkoraġġixxi lill-SM biex isaħħu l-kontrolli tagħhom. Is-sett ta' regolamenti adottati għall-perjodu ta' programmazzjoni 2014-2020 fih xi dispożizzjonijiet li għandhom iwasslu għal titjib fl-effikaċja tal-kontrolli fil-livell nazzjonali, inkluża l-introduzzjoni ta' NFC li għandha l-għan li toħloq inċentiv għall-SM biex jimplimentaw sistemi ta' ġestjoni u kontroll effettivi, u t-tisħiħ tal-użu ta' simplifikazzjoni, b'mod partikolari dwar għażliet ta' spejjeż simplifikati, li għandhom jirriżultaw fi tnaqqis ta' żbalji.

→Li jidentifikaw fil-Komunikazzjoni dwar il-ġestjoni kondiviża tal-fondi t-tliet SM bl-ogħla rati ta' erruri u KF (§ 53).

Il-Komunikazzjoni dwar il-protezzjoni tal-baġit tal-UE adottata f'Settembru ta' kull sena tindirizza l-KF, filwaqt li r-rati ta' erruri mill-SM huma rrapportati fil-kuntest tar-RAA.

→Introduzzjoni ta' mudell u rakkomandazzjonijiet għal dikjarazzjonijiet nazzjonali ta' ġestjoni (§§ 56-12, 60).

Din il-kwistjoni ġiet indirizzata mill-Grupp ta' Ħidma Interistituzzjonali li tnieda fis-16.12.2013 li ffinalizza x-xogħol tiegħu sal-aħħar ta' Ġunju 2014. Ir-riżultati tiegħu se jintbagħtu lill-PE, il-Kunsill, il-Qorti Ewropea tal-Awdituri (QEA) u l-Parlamenti nazzjonali matul il-ħarifa tal-2014.

Rigward id-DĠ AGRI, u b'mod partikolari dwar in-nuqqasijiet fis-sistemi LPIS, il-PE talab:

→ pjanijiet ta' azzjoni li għandhom jiġu implimentati minnufih u fil-każ ta' nuqqas ta' konformità mal-iskadenzi stabbiliti fil-pjanijiet ta' azzjonij għal NFC proporzjonata bħala parti mill-proċedura ta' konformità (§ 42).

Il-proċedura attwali hija li l-SM jintalbu biex ifasslu u jimplimentaw pjan ta' azzjoni meta jiġu identifikati nuqqasijiet sinifikanti fl-LPIS tagħhom. L-implimentazzjoni ta' pjan ta' azzjoni bħal dan mill-Istat Membru korrispondenti hija mmonitorjata mill-qrib mid-DĠ AGRI u hija suġġetta għal rappurtar fir-RAA tad-DĠ AGRI. Barra minn hekk, l-SM għandhom ukoll jivvalutaw, fuq bażi annwali, il-kwalità tal-LPIS tagħhom u jadottaw, fejn xieraq, azzjonijiet ta' rimedju.

Rigward il-proċedura ta' konformità, kwalunkwe riskju identifikat għall-baġit tal-UE sistematikament jiġġenera NFC, li għandha tiġi applikata proporzjonalment għar-riskju għall-baġit tal-UE. Kull dewmien fl-implimentazzjoni tal-azzjoni ta' rimedju meħtieġa jżid it-tul tar-riskji identifikati ta' pagamenti irregolari u għalhekk sistematikament jikkawża NFC ogħla għal nuqqasijiet persistenti. Il-qafas legali l-ġdid[10] jippermetti wkoll is-sospensjoni ta' pagamenti fejn il-Kummissjoni tikkonkludi li l-Istat Membru kkonċernat ma jkunx f'qagħda li jimplimenta l-miżuri ta' rimedju neċessarji skont pjan ta' azzjoni bbażat fuq indikaturi ċari dwar il-progress.

→ li jiġi kopert ir-riskju finanzjarju ta' żbalji identifikati fl-2006 mill-QEA fi Franza u l-Portugall permezz ta' korrezzjonijiet netti (§31).

Kif irrappurtat fir-RAA 2013 tad-DĠ AGRI, il-baġit tal-UE kien protett permezz ta' proċeduri ta' approvazzjoni tal-konformità. Fir-rigward tal-Portugall, il-proċedura tal-approvazzjoni tal-konformità żgurat it-treġġigħ lura ta' aktar minn EUR 100 miljun f'NFC għas-snin tat-talba mill-2006 sal-2008. Għas-snin ta' talba sussegwenti, il-proċeduri ta' approvazzjoni tal-konformità għadhom għaddejjin. Fil-każ ta' Franza, l-ebda nuqqas serju li kien jimmerita riżerva, pjan ta' azzjoni jew KF sinifikanti ma nstab qabel l-2008. Għadd ta' KF sinifikanti ġew proposti fir-rigward tas-snin finanzjarji 2008-2010 li għalihom il-proċedura tal-approvazzjoni tal-kontijiet hija avvanzata ħafna.  Għaddejjin ukoll proċeduri ta' konformità għas-snin sussegwenti.

→ li jiġu stabbiliti pjanijiet komprensivi ta' azzjoni għal Franza u l-Portugall, fost oħrajn l-aġġornament tas-sistemi tal-LPIS tagħhom (§§ 44, 56-11, 192) u jsir rapport dwar l-istat attwali tal-implimentazzjoni tagħhom sat-30 ta' Ġunju 2014 (§43).

Diġà ġew stabbiliti pjanijiet ta' azzjoni komprensivi: għall-Portugall, dan ġie stabbilit fl-2010 u tlesta fl-2013, filwaqt li għal Franza, l-aġġornament u t-tlestija tal-LPIS huma mistennija li jitlestew għalkollox għas-sena tat-talba 2016, ladarba d-daqs eliġibbli ta' kull art agrikola individwali jkun ġie vvalutat mill-ġdid. Sadanittant, l-NFC se tipproteġi l-interessi finanzjarji tal-UE. Dan huwa osservat mill-qrib mill-Kummissjoni u r-riskju finanzjarju huwa kompletament kopert mill-proċeduri tal-approvazzjoni tal-konformità li jinsabu għaddejjin (ara hawn fuq). Id-DĠ AGRI rrapporta dwar l-implimentazzjoni ta' dawn il-pjanijiet ta' azzjoni fir-RAA tiegħu tal-2013, ippubblikat f'Ġunju 2014.

→ proposta tal-Kummissjoni biex jiġu indirizzati n-nuqqasijiet rikorrenti tal-LPIS billi jiżdiedu b'mod progressiv il-penali korrettivi ħafna lil hinn mill-korrezzjonijiet netti u b'rata fissa eżistenti (§ 44).

Proposta tal-Kummissjoni tkun teħtieġ il-ftuħ mill-ġdid ta' regolament li għadu kif ġie adottat miż-żewġ koleġiżlaturi fil-qafas tar-riforma tal-PAK. Madankollu, iż-żieda f'KF għal vjolazzjonijiet rikorrenti tar-regoli tal-UE hija diġà prevista fl-Att Delegat dwar il-ġestjoni finanzjarja tal-PAK u hija applikata fil-każijiet kollha fejn ikun hemm biżżejjed provi li l-persistenza tan-nuqqasijiet qiegħda żżid ir-riskju finanzjarju għall-baġit tal-UE (ara wkoll il-punt 1.2.).

→li jiġu solvuti l-problemi li jseħħu f'PAs li r-riskju residwu tal-iżbalji tagħhom huwa ogħla mil-limitu ta' materjalità ta' 2 % b'enfasi speċjali fuq Franza, il-Bulgarija, ir-Rumanija, il-Portugall u l-Latvja (§41).

Skont il-ġestjoni kondiviża, huwa l-SM li jkollu jassumi r-responsabbiltà primarja biex jiżgura li l-azzjonijiet iffinanzjati mill-baġit ikunu implimentati b'mod korrett skont ir-regoli. Ir-rwol tal-Kummissjoni jikkonsisti pjuttost f'superviżjoni globali billi tivverifika l-funzjonament effettiv tas-sistemi ta' ġestjoni u ta' kontroll tal-SM permezz ta' proċeduri ta' approvazzjoni tal-konformità u l-applikazzjoni tal-NFC għall-protezzjoni tal-baġit tal-UE.

Fir-RAA 2013 tiegħu, għall-PAs b'rata ta' erruri residwa ta' bejn 2% u 5%, id-DĠ AGRI vvaluta jekk ir-riskju kienx suffiċjentement kopert minn fatturi mitiganti u għalhekk jekk kenitx neċessarja riżerva finanzjarja. Dan jinkludi jekk ikunx hemm proċedura ta' approvazzjoni tal-konformità għaddejja li tkopri n-nefqa kkonċernata u jekk l-azzjonijiet ta' rimedju neċessarji jkunux ġew implimentati mill-SM ikkonċernat. PAs b'aġġustament fir-rata ta' erruri residwu 'l fuq minn 5% ġew awtomatikament soġġetti għal riżerva. Id-DĠ AGRI għamel 62 riżerva: 11 fil-livell tal-miżura għal Miżuri tas-Suq, 20 (fil-livell tal-PAs) għal pagamenti diretti, u 31 fil-livell tal-PAs għall-iżvilupp rurali.

Barra minn hekk, l-attivitajiet tal-awditjar tad-DĠ AGRI huma xprunati minn analiżi ċentrali tar-riskju li tkopri n-nefqa kollha tal-PAK fl-SM kollha, jiġifieri l-SM, miżuri u programmi affettwati b'riskji ogħla se jiġu awditjati bħala kwistjoni ta' prijorità. 

→Proċedura ta' approvazzjoni tal-konformità li f'każijiet standard għandha titlesta f'sentejn (§§ 40, 56-10, 158).

Il-Kummissjoni qiegħda, permezz tal-qafas legali l-ġdid tal-PAK (l-att ta' implimentazzjoni adottat fis-6.8.2014), tieħu azzjonijiet li jimmiraw li jissimplifikaw il-proċedura sħiħa u jillimitaw ir-riskju ta' dewmien bla bżonn. B'mod partikolari, xi passi tal-proċedura kontradittorja eżistenti se jiġu fużi, skadenzi għal kull pass mill-proċedura huma introdotti kemm għall-Kummissjoni kif ukoll għall-SM, u jekk SM ma jibgħatx l-informazzjoni meħtieġa fil-ħin, il-Kummissjoni se tkun tista' tipproċedi għall-pass li jmiss fuq il-bażi tal-informazzjoni disponibbli. Il-Kummissjoni se tagħmel ħilitha biex tillimita t-tul massimu tal-proċedura kollha tal-approvazzjoni tal-konformità għall-minimu strettament neċessarju, filwaqt li tirrispetta l-istadji differenti tal-proċedura ta' konformità (jiġifieri dak kontradittorju u dak ta' konċiljazzjoni) meħtieġa mir-regolamenti rilevanti; għal każijiet standard, il-proċedura se titwettaq f'massimu ta' sentejn.

Rigward DĠ REGIO, DĠ EMPL u DĠ AGRI, il-PE talab:

→li d-DĠs ikkonċernati għandhom jibnu strateġija ta' awditjar ġdida u msaħħa biex jindirizzaw nuqqasijiet misjuba f'xi SM inkluża intensifikazzjoni tal-kontrolli tal-kwalità fuq ir-rapporti tal-awditjar u tal-kontroll tal-SM u linji gwida għall-awditjar mill-Kummissjoni stess (li għandhom jiġu ppreżentati bħala parti mill-kwittanza tal-2013) (§§ 45, 49-50, 56-1-2).

Il-Kummissjoni tikkonferma l-iżvilupp tal-istrateġiji tal-awditjar ġodda u msaħħa kemm għall-Politika ta' Koeżjoni kif ukoll għall-Agrikoltura deskritti fid-dettall fl-ittra tal-Kummissarju Ṧemeta.

Il-"linji gwida għall-awditjar" huma mifhuma bħala l-istrateġija tal-awditjar tal-Kummissjoni għall-2014-2020, li dalwaqt se tiġi kkomunikata lill-PE. Id-DĠ REGIO impenja ruħu, fil-Pjan ta' Azzjoni tal-2008 li l-proċeduri kontradittorji relatati mal-KF jridu jiġu ffinalizzati fi żmien massimu ta' 24 xhur wara l-awditu. Id-DĠ REGIO qed jilħaq dan l-għan.

Id-direttorat tal-awditjar tad-DĠ EMPL dejjem alloka r-riżorsi f'termini tal-indirizzar tal-programmi bl-ogħla riskju u/jew l-SM bi prestazzjoni baxxa sabiex jindirizza speċifikament il-kwistjonijiet involuti. Huwa jimmonitorja kontinwament il-prestazzjoni tal-Awtoritajiet tal-Awditjar u l-affidabbiltà tax-xogħol ta' awditjar. F'dan ir-rigward, ta' min jinnota li għal tliet snin konsekuttivi, ir-rata ta' erruri stabbilita fir-RAA (Rapport Annwali tal-Attività) ta' DĠ EMPL hija konformi mar-rata ta' erruri determinata mill-QEA. Għalhekk, jista' jiġi konkluż li s-sistemi tal-awditjar u l-monitoraġġ fis-seħħ fid-DĠ EMPL jaħdmu b'mod effettiv.

Id-DĠ AGRI adotta strateġija ta' awditjar pluriennali ġdida f'Marzu 2014. Din l-istrateġija tal-awditjar tikkonferma l-approċċ ibbażat fuq ir-riskju u fuq is-sistema, b'mod partikolari biex jinkiseb bilanċ aħjar bejn il-kopertura tal-awdijtar tar-riskju u l-kopertura ġeografika. Programm ta' awditjar kontinwu ta' tliet snin japplika minn Lulju 2014. Dan se jiġi rieżaminat perjodikament biex titqies l-implimentazzjoni tar-riforma tal-PAK u wkoll l-evidenza addizzjonali li se tkun disponibbli mill-2016 bħala riżultat tax-xogħol il-ġdid tal-korpi ta' ċertifikazzjoni dwar il-legalità u r-regolarità. Indikaturi ta' prestazzjoni ewlenin dwar il-firxa ġeografika, il-kopertura tan-nefqa u l-kopertura ta' riskju huma inklużi fl-istrateġija. Dawn se jiġu mmonitorjati u rrappurtati fir-RAA futuri mir-RAA 2014.

→Monitoraġġ aktar frekwenti tal-proċess ta' ċertifikazzjoni tal-awtoritajiet nazzjonali tal-awditjar fl-SM li jiffaċċaw rati ta' erruri ripetutament għoljin u preżentazzjoni ta' komunikazzjoni u proposti leġiżlattivi għal dan l-għan (§61).

Fir-rigward tal-Fondi Strutturali u ta' Koeżjoni, id-daqs tar-rata ta' errur mhijiex marbuta mal-affidabbiltà tal-awtoritajiet tal-awditjar. Rati ta' żball għolja jistgħu jiġu rapportati kemm minn awtoritajiet tal-awditjar affidabbli kif ukoll minn dawk mhux affidabbli. L-istess jgħodd għal rati baxxi ta' żbalji. Il-Kummissjoni timmonitorja lill-awtoritajiet tal-awditjar kollha u tivverifika b'mod partikolari l-indipendenza tagħhom (kundizzjoni fir-RDK (Regolament dwar Dispożizzjonijiet Komuni)) iżda l-awtoritajiet tal-awditjar mhumiex formalment suġġetti għal proċess ta' ċertifikazzjoni skont ir-RDK. Ma hemm l-ebda ħtieġa għal proposta leġiżlattiva.

Fil-qasam tal-agrikoltura, kif stabbilit fir-Regolament Finanzjarju (UE) Nru 966/2012 u l-Artikolu 9 tar-Regolament (UE) Nru 1306/2013, mis-sena tat-talba 2014, il-korpi ta' ċertifikazzjoni se jkollhom jivverifikaw ir-riżultati tal-kontrolli fuq il-post mill-PAs, abbażi ta' kampjun rappreżentattiv ta' tranżazzjonijiet fil-livell tal-benefiċjarju finali, u joħorġu opinjoni dwar il-legalità u r-regolarità tan-nefqa ddikjarata lill-Kummissjoni. Id-DĠ AGRI se jawditja l-affidabbiltà ta' din l-opinjoni tal-korpi ta' ċertifikazzjoni u jużaha biex jikkonsolida l-assigurazzjoni tiegħu u jirfina l-analiżi tar-riskju.

→Applikazzjoni tal-Artikolu 32(5) tar-RF (§62).

Il-Kummissjoni fil-fatt tapplika d-dispożizzjonijiet tar-RF u tirreferi għat-tfassil tas-sistema ta' twettiq għall-perjodu ta' programmazzjoni 2014-2020.

→Preżentazzjoni ta' Komunikazzjoni dwar it-tnaqqis tar-rekwiżiti ta' rappurtar u densitajiet ta' kontroll għall-SM li joperaw b'mod permanenti b'rati baxxi ħafna ta' erruri (§63).

Fil-qasam tal-Politika ta' Koeżjoni, il-Kummissjoni tqis li l-affidabbiltà tar-rati ta' erruri li jiġu rrapportati hija importanti daqs ir-rata ta' erruri rrappurtata stess sabiex tevalwa l-funzjonament tas-sistemi u biex tiddeċiedi fejn għandha tiġi ffokata l-attività tal-awditjar.

Fir-rigward tal-Agrikoltura, billi r-rekwiżiti ta' rappurtar ma jistgħux jitnaqqsu, is-sejħa għal tnaqqis ta' densitajiet ta' kontroll hija diġà prevista: L-Art. 41 tal-Att ta' Implimentazzjoni, adottat fis-6.8.2014, li jiddettalja r-regoli diġà stabbiliti fl-Artikolu 59(5) tar-Regolament (UE) Nru 1306/2013, fih il-kundizzjonijiet kumulattivi li għandhom jiġu sodisfatti għal tnaqqis fin-numru ta' kontrolli fuq il-post.

Għalhekk ma hemmx ħtieġa ta' aktar proposti leġiżlattivi jew Komunikazzjoni tal-Kummissjoni dwar din il-kwistjoni.

→Li jiġu eżaminati l-arranġamenti ta' ġestjoni kondiviża interni tagħha u li tagħmel rakkomandazzjonijiet lill-PE dwar il-ħatra ta' uffiċjali tal-Unjoni li jmexxu l-awtoritajiet nazzjonali tal-ħlas, il-ġestjoni u l-awditjar fl-Istati Membri responsabbli għall-iżborżament tal-fondi tal-Unjoni (§65).

Huwa f'idejn l-Istati Membri biex jaħtru l-kapijiet tal-awtoritajiet nazzjonali. It-talba tkun tikser il-prinċipju ta' ġestjoni kondiviża u sussidjarjetà u tinterferixxi mal-awtonomija tal-amministrazzjonijiet pubbliċi nazzjonali.

Għall-Politika reġjonali, task force kien diġà stabbilit biex jgħin lill-amministrazzjonijiet fil-Greċja u l-Portugall. Id-DĠ REGIO jipprovdi wkoll seminars ta' taħriġ dwar il-ġestjoni finanzjarja u l-kontroll fil-perjodu ta' programmazzjoni 2014-2020 lill-awtoritajiet tal-SM. Jinsabu għaddejjin ukoll seminars kontra l-frodi u kontra l-korruzzjoni mmirati lejn ċerti SM b'mod partikolari. Inizjattiva oħra hija l-gwida dwar kif jistgħu jiġu evitati l-iżbalji l-aktar komuni marbuta mal-akkwist pubbliku.

Fir-rigward tal-agrikoltura, is-servizzi tad-DĠ AGRI jiltaqgħu regolarment ma' rappreżentanti tan-Netwerk tat-Tagħlim tad-Diretturi tal-PAs u l-korpi ta' koordinazzjoni sabiex jeżaminaw id-diversi aspetti tekniċi relatati mal-ġestjoni u l-kontroll tal-istrumenti tal-PAK. Waqt il-konferenza annwali tad-Diretturi tal-PAs, organizzata mid-DĠ AGRI, DĠ AGRI, l-awdituri jinfurmaw dwar l-aktar sejbiet komuni tal-awditjar tagħhom u jippreżentaw is-sejbiet tal-Qorti tal-Awdituri. Tali preżentazzjonijiet isiru wkoll fl-okkażjoni ta' konferenzi biannwali simili organizzati mill-Presidenza. Barra minn hekk, il-konsulent kontra l-frodi tad-DĠ AGRI, jagħti regolarment seminars kontra l-frodi fil-PAs. Barra minn hekk, mill-2014, id-DĠ AGRI ħoloq unità ġdida speċifikament iddedikata biex tipprovdi lill-Istati Membri b'pariri u appoġġ fl-implimentazzjoni ta' skemi ta' pagament dirett.

→Għandu jiġi stabbilit reġistru għall-fondi kollha tal-Unjoni li jmorru għall-midja fl-SM mill-fondi strutturali jew dawk agrikoli inkluż l-iżvilupp rurali (§58) u għandu jkun hemm enfasi fuq dawk l-Istati Membri li huma vulnerabbli jew li jispikkaw f'dan ir-rigward (§59).

Taħt il-ġestjoni kondiviża, il-Kummissjoni ma għandhiex informazzjoni fil-livell tal-proġetti.  Ir-RAA diġà jkopru SM b'livelli għolja ta' żbalji inklużi r-riżervi dwar is-sistemi ta' ġestjoni u kontroll tal-SM u dwar ċerti OPs. Fuq il-bażi ta' evalwazzjoni tar-riskju bir-reqqa li ssir ta' kull sena, il-Kummissjoni żżomm fil-mira l-aktar awtoritajiet riskjużi tal-ġestjoni u tal-awditjar sabiex twettaq l-awditi tagħha. F'każ ta' nuqqasijiet identifikati li jistgħu jiġu kkomunikati wkoll mill-awtoritajiet tal-SM, il-Kummissjoni tinterrompi jew tissospendi l-pagamenti.

1.4. Titjib ulterjuri tar-Rapporti Annwali tal-Attività

Il-PE talab lill-Kummissjoni:

→biex tirrapporta sa fejn l-istatistika ta' kontroll tal-SM jew rapporti tal-awditjar ġew eżaminati, ivverifikati u vvalidati (§47).

Dan diġà qed iseħħ u huwa divulgat fir-RAA.

→biex tindika kif l-analiżi tar-riskji tagħha stess influwenzat l-użu tal-kapaċitajiet tal-awditjar tagħha stess u titlob għal aktar awditi diretti ta' kampjuni aleatorji meħuda minn awtoritajiet nazzjonali tal-għoti u l-benefiċjarji finali (§48).

Għalkemm il-maġġoranza tar-rapporti tal-awditjar tal-SM huma affidabbli, il-Kummissjoni ma toqgħodx awtomatikament fuq ir-riżultati tagħhom, iżda dejjem tivvaluta r-riskji qabel tislet konklużjoni fir-rigward tal-livell ta' assigurazzjoni li jista' jittieħed minnhom.

Dwar it-talba għal aktar awditi, il-Kummissjoni twettaq l-awditi tagħha stess direttament fil-livell tal-awtoritajiet ta' ġestjoni/il-korpi intermedji u benefiċjarji ta' riskju għoli. Kważi kull wieħed mis-77 awditu tas-sistemi mwettqa minn Novembru 2010 sa tmiem l-2013 wasslu għal pjanijiet ta' azzjoni u interruzzjonijiet tal-ħlasijiet mid-DĠ REGIO.  Bejn l-2009 u l-2013, id-DĠ EMPL wettaq 87 awditu tas-sistemi ffukati fuq l-OPs tal-ikbar riskju.

Fir-rigward tal-agrikoltura, kull sena l-Kummissjoni tiftaħ madwar 250 awditu fuq l-effettività tas-sistemi ta' ġestjoni u kontroll tal-PAs, u twettaq madwar 120 missjoni ta' awditjar dwar il-konformità mar-regoli tal-UE. Dawn l-attivitajiet tal-awditjar huma ggwidati minn analiżi ċentrali tar-riskju (jiġifieri aktar awditi jiffukaw fuq l-SM, il-miżuri u l-programmi milquta minn riskji ogħla) li tkopri n-nefqa kollha tal-PAK fl-SM kollha.

Il-persunal addizzjonali meħtieġ għat-twettiq ta' awditi diretti bbażati fuq kampjun aleatorju fuq skala li tippermetti estrapolazzjoni tar-riżultati kieku jeċċedi bil-kbir il-persunal li jista' jiġi riallokat u/jew meħlus billi jitnaqqas l-għadd ta' awditi fl-SM b'rati baxxi ta' żbalji.

→biex tinkludi informazzjoni dwar ir-riżervi dwar riskju għall-baġit tal-Unjoni u dawn għandhom jitneħħew biss meta n-nuqqasijiet ikunu ġew indirizzati permezz ta' azzjoni tal-SM, u r-RAA għandhom jinkludu wkoll ir-rati ta' erruri u stimi ta' riskju residwu partikolarment meta l-Istati Membri jkunu wettqu azzjonijiet korrettivi (§ 56-8).

Il-kwistjoni tiġi ttrattata fil-punt 1.1.

→biex id-DĠ AGRI jiżviluppa l-istrateġija ta' kontroll tiegħu, ifassal mill-ġdid il-valutazzjonijiet tar-riskju tiegħu u jiżgura monitoraġġ xieraq permezz ta' indikaturi ewlenin ta' prestazzjoni li d-divulgazzjoni tagħhom fir-RAA għandha tittejjeb (§ 45).

Il-kwistjoni tiġi ttrattata fil-punt 1.3.

1.5. Teħid tal-miżuri ta' protezzjoni neċessarji

Il-PE talab:

→li jitqassru l-proċeduri kontradittorji qabel l-impożizzjoni tal-NFC jew interruzzjonijiet ta' ħlasijiet u jiġi ppreżentat rapport qabel il-kwittanza 2013 (§§ 51, 210).

Id-DĠ REGIO impenja ruħu fil-Pjan ta' Azzjoni tal-2008 li l-proċeduri kontradittorji relatati mal-KF jridu jiġu ffinalizzati fi żmien massimu ta' 24 xhur wara l-awditu. REGIO qed jilħaq dan l-għan. Din il-kwistjoni se titqies kif xieraq fl-Atti Delegati. Fir-rigward ta' interruzzjonijiet ta' ħlasijiet, ma tapplika l-ebda proċedura kontradittorja.

Għad-DĠ AGRI, aċċellerazzjoni ulterjuri tal-proċedura ta' konformità b'mod speċjali bis-simplifikazzjoni tal-fażi kontradittorja (it-twaħħid ta' passi differenti, it-twaqqif ta' skadenzi kemm għall-SM kif ukoll għall-KE, eċċ) huwa previst fl-abbozz ta' att ta' implimentazzjoni. Il-proċedura se tkun limitata għal massimu ta' sentejn f'każijiet standard (ara wkoll il-punt 1.3.).

→l-użu ta' interruzzjonijiet, sospensjonijiet, KF u rkupri ser ikun dettaljat fir-rapport annwali li jmiss dwar il-protezzjoni tal-baġit tal-Unjoni, u speċifikament għal fondi strutturali u ta' koeżjoni fir-rapporti għall-2016 u snin sussegwenti (§§ 52, 56-7);

Il-Komunikazzjoni se tipprovdi informazzjoni dwar interruzzjonijiet, sospensjonijiet, KF u rkupri. Barra minn hekk, il-Kummissjoni se tinkludi dejta dwar l-NFC li twassal għal dħul assenjat għall-baġit tal-UE u r-riżultati tal-ħidma korrettiva tal-SM.

→għandu jitħejja rapport orizzontali ġdid dwar kif l-għodod preventivi u korrettivi ġodda huma implimentati skont l-MFF 2014-2020 (§§ 56-9).

Se jitħejja rapport li janalizza kif l-għodod preventivi u korrettivi ġodda huma implimentati skont l-MFF 2014-2020. Barra minn dan, valutazzjoni tan-nuqqasijiet se tqabbel il-proposta oriġinali tal-Kummissjoni għal-leġiżlazzjoni rilevanti u l-eżitu finali kif emendat mill-korpi leġiżlattivi, u se tidentifika kull riskju potenzjali.

→Użu aħjar tal-RAL u limitazzjoni tal-perjodu kopert mill-prefinanzjament (§ 56-14);

Il-prefinanzjament huwa strument maħsub biex jipprovdi lill-benefiċjarji b'fond ta' flus u biex jippermettilhom imexxu l-proġetti li ħadu bħala impenn. Kieku l-perjodu kopert mill-prefinanzjament ikun iqsar mill-perjodu tal-proġett, il-benefiċjarju eventwalment jispiċċawlu r-riżorsi u l-proġett inkwistjoni jista' eventwalment ifalli. Minbarra dan, dan l-approċċ jimplika modifika tar-regolamenti rilevanti adottati dan l-aħħar u emendar ta' kull ftehim individwali ġdid.

1.6. Miżuri oħra

→Il-PE talab li tiġi indirizzata l-problema tal-"intermedjarji" li qed jintużaw għall-finijiet ta' ksib ta' kuntratti pubbliċi. Kull stadju tal-proċeduri tal-akkwist pubbliku għandu jiġi ppubblikat fuq l-Internet (§ 64).

Diġà ttieħdu miżuri f'din id-direzzjoni, li jikkonċernaw id-disponibilità elettronika tad-dokumenti relevanti kollha sa mill-bidu tal-proċedura, il-pubblikazzjoni ex-ante u ex-post u, ladarba jingħata l-kuntratt, l-obbligu li jiġu divulgati l-ismijiet u l-indirizzi tas-sottokuntratturi.

Fir-rigward tad-Direttiva tal-Konċessjonijiet 2014/23, ir-regoli l-ġodda fihom l-obbligu li jiġi żgurat aċċess onlajn mingħajr ħlas u mingħajr restrizzjonijiet għad-dokumenti kollha tal-konċessjonijiet (mill-ħin tal-pubblikazzjoni ta' avviż ta' konċessjoni jew sejħa għall-offerti).

→Il-PE talab li jintlaħqu ftehimiet bilaterali li jorbtu mal-SM li attiraw attenzjoni partikolari, fuq il-linji tas-Semestru Ewropew (§56-15);

Kif issemma' fl-ittri tal-President Barroso u l-Kummissarju Ṧemeta, il-Kummissjoni impenjat ruħha li tindirizza d-dgħufijiet fl-SM. L-ittra tal-Kummissarju Ṧemeta tipprovdi sinteżi komprensiva tal-istrumenti u tal-azzjonijiet implimentati fil-qafas legali eżistenti għall-programmi ta' nfiq skont il-qafas finanzjarju l-ġdid. Huma stabbiliti proċessi differenti għar-rappurtar dwar l-Ewropa 2020 li huwa impenn komuni tal-SM u l-Kummissjoni.

2.           OLAF (§§ 284-296)

2.1.         Il-każ Dalli u kwistjonijiet relatati (§§ 284-287, 289-92, 296)

Il-PE qajjem diversi kwistjonijiet li jikkonċernaw dan il-każ u b'mod partikolari fir-rigward tal-informazzjoni mogħtija lill-PE, ir-responsabilità kemm mill-Kummissjoni kif ukoll mill-OLAF, ir-rispett tal-prinċipju tal-innoċenza, il-legalità tar-reġistrazzjonijiet, il-kooperazzjoni mal-Awtoritajiet Ġudizzjarji tal-SM u r-rispett tad-drittijiet fundamentali.

Il-Kummissjoni l-ewwel nett tixtieq tirrimarka li l-President tagħha spjega s-sitwazzjoni fil-Konferenza tal-Presidenti f'Novembru 2012. Il-punt qatt ma ġie skedat għall-plenarja u l-Kummissjoni rrispettat il-prinċipju tal-preżunzjoni tal-innoċenza f'kull ħin. Is-Sur Dalli kkontesta l-karattru volontarju u l-legalità tar-riżenja tiegħu, u talab danni quddiem il-Qorti Ġenerali tal-Unjoni Ewropea fil-Kawża T-562/12, li għadha pendenti.

Il-Kummissjoni u l-OLAF qiegħdin, bħal dejjem, jikkooperaw b'mod sħiħ mal-Awtoritajiet Ġudizzjarji tal-SM f'dawn l-investigazzjonijiet. It-tnejn wieġbu kif dovut għal kull talba għal informazzjoni jew assistenza li huma rċevew mill-awtoritajiet.

Dwar il-kwistjoni marbuta ma' nuqqas ta' responsabbiltà, l-OLAF ifakkar li huwa diġà b'mod estensiv u ripetutament wieġeb mistoqsijiet fil-limiti stabbiliti rispettivament fl-Artikolu 8 tar-Regolament 1073/1999 u fl-Artikolu 10 tar-Regolament 883/2013.

Rigward l-analiżi ġuridika tal-legalità tar-reġistrazzjonijiet, l-OLAF diġà informa lill-CONT li, skont l-Artikolu 4(3), it-tieni subparagrafu, tar-Regolament (KE) Nru 1073/1999, huwa kien intitolat li jikseb informazzjoni rilevanti għall-investigazzjonijiet tiegħu. L-OLAF iqis li huwa aġixxa f'konformità mar-regoli u r-regolamenti applikabbli. L-ewwel verżjoni ta' studju intern komprensiv dwar il-legalità tar-reġistrazzjonijiet ta' konverżazzjonijiet telefoniċi privati mill-awtoritajiet pubbliċi fl-SM ġiet maqsuma mal-persunal investigattiv tal-OLAF, u qiegħda tiġi kontinwament imtejba u aġġornata.

Rigward is-sejbiet tal-Kumitat Superviżorju tal-OLAF (OSC), l-OLAF jindika li huwa wettaq l-attivitajiet investigattivi tiegħu filwaqt li jirrispetta r-rekwiżiti proċedurali kollha. L-OSC ma identifika l-ebda ksur tad-drittijiet fundamentali jew tal-garanziji proċedurali fir-Rapport tal-Attività tiegħu fir-rigward tal-persuni kkonċernati. Għalhekk it-tħassib imqajjem huwa purament ipotetiku.

Barra minn hekk, il-Linji Gwida tal-OLAF lill-Persunal dwar Proċeduri Investigattivi huma maħsuba biex jiżguraw li l-investigazzjonijiet kollha mwettqa mill-OLAF jilħqu l-ogħla standards professjonali u jirrispettaw b'mod sħiħ id-drittijiet proċedurali tal-persuni kkonċernati.

Fl-aħħar nett, dwar it-talba ta' informazzjoni dwar il-laqgħat tal-Kamra tal-Ikklerjar fl-2012 u l-2013, u minħabba l-ħtieġa li jiġu mħarsa investigazzjonijiet li jinsabu għaddejjin, l-indipendenza tal-OLAF u l-preżunzjoni tal-innoċenza tal-persuni kkonċernati, il-Kummissjoni jkollha tenfasizza li l-informazzjoni dwar il-ħidma ta' dan il-grupp għandha tibqa' limitata. Madankollu, il-Kummissjoni tivvaluta kull talba addizzjonali mill-PE rigward il-laqgħat tal-Kamra tal-Ikklerjar skont il-kundizzjonijiet tal-Ftehim Qafas.

2.2.         Kwistjonijiet oħra (§§ 288, 293-295)

Il-PE esprima tħassib dwar l-indikaturi finanzjarji biex tinfetaħ investigazzjoni, il-miżuri ta' segwitu meħuda dwar każijiet ta' frodi ssuspettata miċħuda u riferuti lura lill-Kummissjoni fl-2012-2013, stħarriġ fost il-persunal tal-OLAF u talba għal verżjoni mhux redatta ta' dokument dwar l-użu ħażin tal-fondi tal-UE.

Il-Prijoritajiet tal-Politika Investigattiva (IPPs) tal-OLAF fl-2012 u l-2013 kienu jinkludu l-prinċipji tal-għażla li ġejjin: il-proporzjonalità, l-użu effiċjenti tar-riżorsi investigattivi u s-sussidjarjetà/valur miżjud. Dawn l-IPPs (2012, 2013) kien fihom indikaturi finanzjarji. Dawn l-indikaturi ma ġewx maħsuba jew użati bħala "kriterju ta' esklużjoni", iżda kienu użati bħala wieħed minn diversi kriterji biex jiġi evalwat jekk għandhiex tinfetaħ investigazzjoni jew le. L-impatt finanzjarju qatt ma kien "conditio sine qua non" għall-ftuħ ta' investigazzjoni.

Għall-2014, id-Direttur Ġenerali ddeċieda li ma jinkludix indikaturi finanzjarji fl-IPPs, meta qies li kien hemm, u sa ċertu punt għad hemm, malintiż persistenti fost il-partijiet ikkonċernati tal-OLAF dwar din il-kwistjoni u kemm huwa diffiċli f'ħafna mill-każijiet biex jiġi vvalutat l-impatt finanzjarju potenzjali ta' każ ġdid. L-OLAF għandu l-ħsieb li jimmonitorja jekk li ma jkunx hemm indikaturi finanzjarji espliċiti disponibbli fil-proċess tal-għażla jwassalx għall-ftuħ ta' numru ta' każijiet akbar minn dak li jista' jlaħħaq miegħu l-Uffiċċju. Jekk iva, id-Direttur-Ġenerali jikkunsidra r-riintroduzzjoni possibbli tagħhom, f'kunsiderazzjoni mill-qrib mal-partijiet ikkonċernati tal-OLAF u mal-Kumitat ta' Superviżjoni tiegħu. Fejn ikun hemm is-suspett ta' frodi, l-OLAF ma jiċħadx il-każijiet u ma jirreferihomx lura lis-servizzi tal-Kummissjoni biex jinvestigawhom. L-OLAF huwa u jibqa' l-uniku korp intitolat li jmexxi investigazzjonijiet amministrattivi f'każijiet bħal dawn. Meta l-OLAF jirċievi informazzjoni dwar suspett ta' frodi minn servizz ieħor tal-Kummissjoni, huwa jiddeċiedi jekk jiftaħx investigazzjoni jew jiċħadx il-każ fuq il-bażi tal-kriterji stabbiliti fl-Artikolu 5 (1) tar-Regolament Nru 883/2013. L-OLAF jinforma lis-servizz tal-Kummissjoni li jkun bagħat it-tagħrif bid-deċiżjoni taċ-ċaħda u bir-raġunijiet għaċ-ċaħda. Fil-każijiet rari meta każ ikun miċħud skont il-prinċipji tas-sussidjarjetà u l-proporzjonalità, u jista' jeħtieġ investigazzjoni, il-każ jiġi trażmess mill-OLAF lil dik l-awtorità li tkun fl-aħjar pożizzjoni biex twettaq l-investigazzjoni l-awtoritajiet nazzjonali, jew korpi dixxiplinarji kompetenti.

Fl-aħħar nett, dwar it-talba għall-verżjoni mhux redatta tad-dokument imsemmi aktar 'il fuq, il-Kummissjoni tirrimarka li fit-tweġiba miktuba E-012041/2013 ipprovduta mill-Kummissjoni fit-28 ta' Jannar 2013 għall-mistoqsija mill-MEP Ingeborg Gräßle, kien speċifikat li: "Fir-rigward tal-verżjoni mhux redatta tad-Dokument D/000955, il-Kummissjoni se tivvaluta kull talba mill-PE skont il-kundizzjonijiet tal-Ftehim ta' Qafas bejn il-Parlament u l-Kummissjoni.". L-OLAF ma rċieva l-ebda talba mill-PE skont il-Ftehim imsemmi hawn fuq sa issa.

* * *

[1]               Il-Kwittanza tal-Baġit Ġenerali tal-2012, ir-Rapporti Speċjali tal-QEA fil-kuntest tal-Kwittanza tal-Kummissjoni, il-Kwittanza tal-FEŻ, il-Kwittanza tal-Aġenziji. Referenzi tad-dokumenti P7_TA(2014)0287, P7_TA-PROV(2014)0288),  P7_TA-PROV(2014)0290 u P7_TA-PROV(2014)0299) rispettivament disponibbli fuq l-indirizz tal-internet li ġej:

                http://www.europarl.europa.eu/sides/getDoc.do?type=TA&reference=20140403&secondRef=TOC&language=en.

[2]               Referenzi tad-dokumenti 5848/14, 5848/14 ADD1, 5850/14 u 5850/14 ADD 1 ippubblikati fuq: http://www.europarl.europa.eu/committees/en/cont/publications.html?id=CONT00006#menuzone

[3]               Minkejja li xi wħud minn dawn it-talbiet huma msemmija parzjalment jew indirettament f'partijiet oħra tar-riżoluzzjoni. Ara §§ 6, 11, 15, 17, 20, 24, 46-49, 51, 53, 55, 59, 65, 67, 70, 73, 81, 88, 90, 117, 120, 128, 137-139, 141, 149, 176-180, 183, 205, 253, 258, 260-261, 264, 270, 272, 282, 302, 314, 318, 319, 323, 326-327, 332-333, 335, 343 tas-CSWD dwar ir-riżoluzzjonijiet tal-PE.

[4]               Ara §§ 19, 22, 61, 77 tas-CSWD dwar ir-Rakkomandazzjoni tal-Kunsill.

[5]               Ares(2013)3567754

[6]               Ares(2014)654055

[7] Ir-Regolamenti tal-Kummissjoni (KE) Nru 1122/2009 fil-qasam tal-pagamenti diretti u KE Nru 65/2011 għall-iżvilupp rurali.

[8] Abbozz ta' Regolament ta' Implimentazzjoni tal-Kummissjoni li jistabbilixxi r-regoli għall-applikazzjoni tar-Regolament (UE) Nru 1306/2013 tal-Parlament Ewropew fir-rigward tas-Sistema Integrata ta' Amministrazzjoni u Kontroll (IACS), miżuri ta' żvilupp rurali u kundizzjonalità

[9] Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta' Diċembru 2013, ĠU L 347/320 tal-20.12.2013, p.320.

[10] Ir-Regolament (UE) Nru 1306/2013 l-hekk imsejjaħ Regolament Orizzontali tal-PAK