RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar ir-rieżami konġunt tal-implimentazzjoni tal-Ftehim bejn l-Unjoni Ewropea u l-Awstralja dwar l-ipproċessar u t-trasferiment ta' dejta tar-Reġistru tal-Ismijiet tal-Passiġġieri (PNR) minn trasportaturi bl-ajru lis-servizz Awstraljan tad-Dwana u tal-Protezzjoni tal-Fruntieri /* COM/2014/0458 final */
RAPPORT
TAL-KUMMISSJONI LILL-PARLAMENT EWROPEW U LILL-KUNSILL dwar
ir-rieżami konġunt tal-implimentazzjoni tal-Ftehim bejn l-Unjoni
Ewropea u l-Awstralja dwar l-ipproċessar u t-trasferiment ta’ dejta
tar-Reġistru tal-Ismijiet tal-Passiġġieri (PNR) minn trasportaturi
bl-ajru lis-Servizz Awstraljan tad-Dwana u tal-Protezzjoni tal-Fruntieri Il-Ftehim bejn l-Unjoni Ewropea (UE) u
l-Awstralja dwar l-ipproċessar u t-trasferiment ta’ dejta
tar-Reġistru tal-Ismijiet tal-Passiġġieri (PNR) minn
trasportaturi bl-ajru lis-Servizz Awstraljan tad-Dwana u tal-Protezzjoni
tal-Fruntieri (ACBPS) daħal fis-seħħ
fl-1 ta' Ġunju 2012. Il-Ftehim
jipprovdi għall-ewwel rieżami konġunt sena wara d-dħul
fis-seħħ tiegħu u wara dan b’mod regolari kif maqbul b’mod
konġunt. Dan ir-rieżami konġunt sar f’Kanberra fid-29 u
t-30 ta’ Awwissu 2013. L-attenzjoni ewlenija
tiegħu kienet l-implimentazzjoni tal-Ftehim, b'attenzjoni partikolari
għall-mekkaniżmu biex id-dejta tiġi ffiltrata kif ukoll
it-trasferimenti tad-dejta tal-PNR ta' ċittadini u reżidenti tal-UE
lill-awtoritajiet ta' pajjiżi terzi kif stabbilit fl-artikoli relevanti
tal-Ftehim, u skont id-Dikjarazzjoni Konġunta tal-UE u l-Awstralja dwar
il-Ftehim. Ir-rieżami
konġunt kien ibbażat fuq il-metodoloġija applikata
f’reviżjonijiet konġunti preċedenti tal-PNR mal-Istati Uniti
(2005, 2013) u l-Kanada (2008). L-ewwel parti ta’ din il-metodoloġija
kienet tikkonsisti fi kwestjonarju mibgħut mill-Kummissjoni Ewropea lil
ACBPS qabel ir-rieżami konġunt. ACBPS ipprovda tweġibiet
bil-miktub għall-kwestjonarju qabel ir-reviżjoni konġunta.
It-tieni parti kienet tikkonsisti minn żjara fl-Unità tal-Analiżi
tal-Passiġġieri tal-ACBPS mit-tim tal-UE. It-tielet parti kienet
tikkonsisti f’laqgħa bejn ir-rappreżentanti ta' ACBPS, id-Dipartiment
Awstraljan tal-Affarijiet Barranin u l-Kummerċ, l-Uffiċċju
tal-Kummissarju Awstraljan għall-Informazzjoni, il-Kummissarju Awstraljan
għall-Privatezza u t-tim tal-UE, biex jiddiskuti fid-dettall
l-implimentazzjoni tal-Ftehim. Qabel
ir-rieżami konġunt, ACBPS ipprovda lit-tim tal-UE dokumentazzjoni
dettaljata dwar l-ipproċessar tad-data tal-PNR minn ACBPS, inkluż
qafas ta’ kontroll tal-PNR li jistabbilixxi inventarju komplet ta’ sistemi
awtomatizzati u ta’ kontrolli manwali għall-ipproċessar tad-dejta
tal-PNR, dokumenti interni operazzjonali oħra, valutazzjoni tal-impatt
tal-privatezza tal-PNR reċenti, u rapporti riċenti ta’ awditjar
mill-Uffiċċju tal-Kummissarju Awstraljan għall-Privatezza. It-tim
tal-UE sab li l-Awstralja implimentat bis-sħiħ il-Ftehim f’konformità
mal-kundizzjonijiet stipulati fih. L-Awstralja tirrispetta l-obbligi
tagħha fir-rigward tas-salvagwardji għall-protezzjoni tad-dejta skont
il-Ftehim, u tipproċessa d-dejta tal-PNR b’konformità mal-kundizzjonijiet
stipulati fil-Ftehim. L-Awstralja ma tipproċessax dejta sensittiva
miżmuma f’dejta tal-PNR miksuba skont dan il-Ftehim, u qiegħda
tfittex b’mod attiv li ttejjeb aktar l-identifikazzjoni awtomatizzata u
t-tħassir ta’ dejta sensittiva. Il-mod immirat ħafna li bih
l-Awstralja tivvaluta d-dejta tal-PNR kontra l-indikaturi tar-riskju
jimminimizza l-aċċess għad-dejta personali. L-ipproċessar
tad-dejta tal-PNR taħt il-Ftehim huwa soġġett għal livell
għoli ta’ sorveljanza indipendenti mill-Uffiċċju tal-Kummissarju
Awstraljan għall-Informazzjoni. L-Awstralja jistħoqqilha
tifħir għall-mod kif tapplika l-metodu PBRGOV "push".
Għalkemm ma jaqax taħt l-ambitu tal-Ftehim, huwa fattur pożittiv
li l-Awstralja estendiet l-applikazzjoni tal-metodu “push” għal-linji
tal-ajru kollha li mhumiex koperti b’dan il-Ftehim. Barra minn hekk,
l-Awstralja hija minn ta’ quddiem fl-iżvilupp u l-promozzjoni tal-format
standard ta’ messaġġerija PNRGOV, li jipprova jikseb
standardizzazzjoni globali għat-trażmissjoni tad-dejta tal-PNR
fl-impenji tagħha ma’ linji tal-ajru individwali u fil-qafas
tal-Organizzazzjoni Dinjija Doganali (WCO), l-Organizzazzjoni Internazzjonali
tal-Avjazzjoni Ċivili (ICAO) u l-Assoċjazzjoni Internazzjonali
tat-Trasport bl-Ajru (IATA). Iż-żewġ
naħat beħsiebhom jgħaqqdu r-rieżami konġunt li jmiss
tal-Ftehim mal-evalwazzjoni konġunta tal-Ftehim f’nofs l-2016. Fir-rigward ta’
kwistjonijiet li jridu jiġu ulterjorment indirizzati, jeħtieġ li
tingħata aktar attenzjoni lill-kooperazzjoni fl-infurzar tal-liġi
bbażata fuq il-kondiviżjoni ta’ informazzjoni analitika miksuba
mid-dejta tal-PNR. L-Awstralja hija mitluba li ttejjeb l-isforzi tagħha
biex tiżgura r-reċiproċità u tikkondividi b’mod proattiv
informazzjoni analitika miksuba mid-dejta tal-PNR mal-Istati Membri u, fejn
xieraq, mal-Europol u l-Eurojust. Fl-istess ħin, min jirċievi
informazzjoni bħal din fuq in-naħa tal-UE għandu jipprovdi
reazzjonijiet adegwati lill-ACBPS dwar l-użu ta’ din l-informazzjoni u r-riżultati
miksuba. L-Awstralja hija wkoll mitluba biex tistabbilixxi mekkaniżmu ta’
rappurtar li jippermetti l-Awstralja tgħarraf lill-Istati Membri jekk
id-dejta tal-PNR rċevuta taħt il-Ftehim, jew informazzjoni analitika
li jkun fiha dejta bħal din, eventwalment tiġix kondiviża ma’
pajjiż terz. Barra minn hekk, l-Awstralja għandha tkompli
tiżgura li s-salvagwardji stabbiliti fil-Ftehim jiġu wkoll
estiżi għal dejta estratta tal-PNR li tkun kondiviża ma’ oqsma
oħra ta' ACBOS jew awtoritajiet oħra tal-gvern Awstraljan Minkejja
l-Artikolu 24(4) dwar l-evalwazzjoni konġunta tal-Ftehim erba’ snin
wara d-dħul fis-seħħ tiegħu, evalwazzjoni preliminari dwar
il-kwistjoni dwar jekk il-PNR iservix l-iskop ta' sostenn fil-ġlieda
kontra t-terroriżmu u reati oħra serji li huma tranżnazzjonali
fin-natura wriet li l-ipproċessar tad-dejta tal-PNR ipprovda lil ACBPS
bil-possibbiltà li twettaq valutazzjonijiet tar-riskju effettivi qabel it-tluq
tal-passiġġieri kollha sa 72 siegħa qabel it-tluq. ACBPS
jipproċessa d-dejta tal-PNR biex ikun jista' jaċċessa informazzjoni
kontra regoli mmirati li jkunu jistgħu jinkludu diversi indikaturi
tar-riskju. F’każ li l-valutazzjoni b’indikaturi tar-riskju tagħti
indikazzjoni ta' vjaġġaturi potenzjalment b’riskju għoli,
id-dejta tal-PNR tkompli tiġi pproċessata minn analista flimkien ma’
informazzjoni oħra tal-infurzar tal-liġi biex jiġi ddeterminat
jekk vjaġġatur huwiex ta' riskju għoli, biex tingħata
għajnuna fl-identifikazzjoni ta’ dawk il-vjaġġaturi li jkun
jeħtieġ li jsir intervent kif jaslu. L-identifikazzjoni bikrija ta’
passiġġieri li jistgħu jkunu ta' riskju kbir tippermetti lil
ACBPS biex jippreparaw il-miżuri meħtieġa mal-wasla u biex
l-interventi tagħhom ikunu mmirat aħjar, filwaqt li tiffaċilita
l-ivvjaġġar ta’ vjaġġaturi leġittimi minħabba
interventi minimali. Skont ACBPS, l-analiżi tad-dejta tal-PNR flimkien ma’
informazzjoni oħra taqdi rwol kritiku fil-kapaċità ta’ ACBPS li
jidentifika, qabel il-wasla, vjaġġaturi b’riskju għoli,
fil-kuntest tal-ġlieda kontra t-terroriżmu, it-traffikar tad-droga,
il-frodi tal-identità, it-traffikar tal-bnedmin u forom serji oħra ta’
kriminalità tranżnazzjonali. ACBPS ipprovda eżempji tal-użu
tal-PNR. Ir-Rapport
Konġunt ta' Rieżami li jakkumpanja dan ir-Rapport jikkonsisti fi
tliet Kapitoli. Il-Kapitolu 1 jipprovdi ħarsa ġenerali lejn l-isfond
tar-rieżami u l-iskop u l-aspetti proċedurali
tal-eżerċizzju. Il-Kapitolu 2 jippreżenta s-sejbiet ewlenin
tar-reviżjoni konġunta. Dan il-Kapitolu huwa supplimentat bl-Anness A
li fih il-kwestjonarju u t-tweġibiet għalih minn ACBPS. Finalment, il-Kapitolu
3 jippreżenta l-konklużjonijiet ġenerali
tal-eżerċizzju. L-Anness B jelenka l-kompożizzjoni tat-timijiet
tal-UE u tal-Awstralja li għamlu l-eżerċizzju
tar-reviżjoni. L-eżempji pprovduti minn ACBPS tal-użu tad-dejta
tal-PNR mill-Awstralja jidhru fl-Anness C.