KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI EWROPEW Lejn kunsens imġedded dwar l-infurzar tad-Drittijiet tal-Proprjetà Intellettwali: Pjan ta’ Azzjoni tal-UE /* COM/2014/0392 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL U LILL-KUMITAT EKONOMIKU U SOĊJALI
EWROPEW Lejn kunsens imġedded dwar l-infurzar
tad-Drittijiet tal-Proprjetà Intellettwali:
Pjan ta’ Azzjoni tal-UE
1.
Introduzzjoni
Il-Kunsill
Ewropew ta’ Marzu 2014 afferma mill-ġdid l-importanza tal-proprjetà
intellettwali bħala l-ixprun ewlieni għat-tkabbir u l-innovazzjoni u
enfasizza l-ħtieġa tal-ġlieda kontra l-iffalsifikar biex titjieb
il-kompetittività industrijali tal-UE globalment[1].
Id-Drittijiet tal-Proprjetà Intellettwali (DPI) jikkostitwixxu wieħed
mill-mezzi prinċipali li permezz tiegħu il-kumpaniji, il-kreaturi u
l-inventuri jiġġeneraw redditi fuq l-investiment tagħhom
f’għarfien. Studju riċenti ikkalkula li s-setturi intensivi fid-DPI jammontaw
għal madwar 39 % tal-PDG tal-UE (b’valur ta’ madwar EUR 4.7
triljun kull sena) u, metajiġu kkunsidrati l-impjiegi indiretti, sa
35 % tal-impjiegi kollha.[2]
F’termini prattiċi, permezz tal-għoti ta’ drittijiet esklużivi
temporanji, il-PI hija direttament marbuta mal-produzzjoni u d-distribuzzjoni
ta’ prodotti u servizzi ġodda u awtentiċi, li minnhom jibbenefikaw
iċ-ċittadini kollha. Il-muftieħ biex jinkisbu dawn il-miri hi
"infrastruttura" ottimali u ekonomikament effiċjenti tal-PI li
tkopri r-rikonoxximent legali, ir-reġistrazzjoni, l-utilizzazzjoni u
l-infurzar ibbilanċjat tal-forom kollha tad-drittijiet tal-PI[3]. L-UE
teħtieġ l-innovazzjoni u l-kreattività biex tibqa' kompetittiva
fil-konfront ta' pajjiżi b'kostijiet aktar baxxi ta' xogħol,
l-enerġija u materja prima, u għandha toħloq il-kundizzjonijiet
li jistimulaw l-innovazzjoni sabiex l-intrapriżi Ewropej ikunu
jistgħu jgħinuna ninnegozjaw il-ħruġ tagħna
mill-kriżi. Din hija r-raġuni għalfejn l-industriji bbażti
fuq l-għarfien, għandhom rwol ewlieni fl-istrateġiji “Ewropa
Globali” u “Ewropa 2020”. Din
il-Komunikazzjoni tiffoka fuq l-infurzar tad-drittijiet tal-proprjetà
intellettwali. Hija tfittex li tibni fuq il-kunsens li l-politika ta’ infurzar
tal-PI għandha tkun iffukata fuq il-ġlieda kontra l-attività ta’ ksur
tal-PI fuq skala kummerċjali li hija l-aktar ta’ ħsara. Hija
għandha l-għan li tipproponi għodod ġodda ta’ politika ta’
infurzar, bħall-approċċ hekk imsejjaħ “segwi l-flus” li
jfittex li jċaħħad lil dawk li jiksru l-liġi fuq skala
kummerċjali mill-flussi tad-dħul li jiġbduhom lejn
f’attivitajiet bħal dawn. Prodotti
kummerċjalizzati, jiġifieri oġġetti u servizzi, li ma
jirrispettawx il-proprjetà intellettwali maħluqa minn oħrajn
jikkonċernawna lkoll bħala ċittadini, konsumaturi, negozji u
kontribwenti. Attivitajiet ta' ksur tal-PI fuq skala kummerċjali
jiskoraġġixxu l-investimenti fl-innovazzjoni u l-kreattività u b’hekk
idgħajfu l-ħolqien tal-impjiegi. Hu
diffiċli li jiġi stmat id-daqs tal-problema tal-ksur tal-PI fuq skala
kummerċjali, iżda l-impatt ekonomiku tagħha ġie diskuss
b’mod wiesa’[4].
Rapport riċenti dwar il-frodi globali li wettaq
stħarriġ fuq 800 eżekuttiv anzjan rrapporta li 11 %
tal-kumpaniji tagħhom fl- 2013 kienu vittmi ta' ksur tal-PI[5].
Fil-livell tal-UE, statistika duq id-detenzjonijiet doganali għal
suspetti ta' ksur tad-DPR fil-fruntieri esterni tagħha irreġistrat
aktar minn 90,000 każ fl-2012[6]. Madwar 70 % ta’ dawn il-każijiet huma marbuta
ma’ traffiku postali u tal-kurrier, riflessjoni tat-tkabbir tal-kummerċ
elettroniku. B’kollox, inżammu kważi 40 miljun oġġett,
b’valur stmat - f’termini ta’ prodotti ġenwini ekwivalenti - ta’
kważi EUR 1 biljun. Stat Membru wieħed ikkalkulali 81%
tal-prodotti ta' ksur huma assoċjati mal-kriminalità organizzata[7].
Ikkalkula li filwaqt li dħul illeċitu iġġenerat
mill-kriminalità organizzata f’dawn l-attivitajiet kien ta’ 'l fuq minn
EUR 100 miljun, il-kost għall-ekonomija tiegħu b'mod
ġenerali - f’termini ta’ telf ta’ dħul dirett għal kumpaniji leġittimi,
dħul mid-dħul għat-Teżor, impjiegi mitlufa u l-kostijiet
għolja tal-infurzar - ġew kważi ħames darbiet dak l-ammont
(EUR 470 miljun). Il-ksur
tad-drittijiet tal-proprjetà intellettwali fuq skala kummerċjali huma kemm
insidjużi kif ukoll mira li tiċċaqlaq. Madankollu qed isir
ħafna biex dan il-ksur jiġi skoraġġit, inkluż permezz
taż-żieda tal-offerti legali onlajn ta' oġġetti u servizzi
kompetittivi, ir-redditu ekonomiku fuq id-distribuzzjoni u l-bejgħ ta’
prodotti li jiksru l-PI huma tali li dejjem se jibqa’ inċentiv biex
wieħed jieħu sehem f’dawn l-attivitajiet. Minħabba
l-veloċità li biha dawn l-attivitajiet jistgħu jiġu
żviluppati u sfruttati, huma essenzjali sistemi ta’ individwazzjoni
preċiżi u miżuri preventivi implimentati bil-ħeffa. Fl-istess
ħin, tali miżuri għandhom ikunu proporzjonati u jimminimizzaw
kwalunkwe riskju li huma jiġu abbużati għal prattiki
antikompetittivi li jistgħu ifixklu l-ħruġ ta’ prodotti
innovattivi u mudelli kummerċjali ġodda u jirrestrinġu
sproporzjonatament il-libertajiet fundamentali. L-individwazzjoni
meħtieġa tinneċessita l-iskambju ta’ informazzjoni bejn
il-partijiet interessati, u fuq kollox bejn l-awtoritajiet tal-infurzar
nazzjonali. Loġikament, biex tfittex li tiskoraġġixxi l-ksur fuq
skala kummerċjali, il-Kummissjoni għandha tapplika sistema
ħolistika, ibbilanċjata u flessibbli li tista’ tirreaġixxi
malajr għal sfidi li qed jevolvu li qed tiffaċċja ekonomija
tal-informazzjoni tal-UE fis-seklu 21. F’konformità
mal-istrateġija Ewropa 2020 u mingħajr ħsara għal
rieżamijiet leġiżlattivi li għaddejjin bħalissa, din
il-Komunikazzjoni tistabbilixxi Pjan ta’ Azzjoni ta' għaxar punti[8].
Għadd ta’ azzjonijiet se jiġu implimentati mill-Kummissjoni fejn
xieraq flimkien mal-Uffiċċju għall-Armonizzazzjoni fis-Suq
Intern (OHIM), li minn Ġunju 2012 qed jospita l-Osservatorju Ewropew
tal-Ksur tad-Drittijiet tal-Proprjetà Intellettwali[9] (minn
hawn ’il quddiem imsejjaħ l-“Osservatorju”). Dawn l-azzjonijiet ta’
sostenn flimkien ma’ attivitajiet u studji assoċjati elenkati,
jikkostitwixxu l-ewwel pass deċiżiv fil-bini ta’ politika effettiva
ta’ infurzar tal-PI immirata lejn ksur fuq skala kummerċjali fil-livelli
tal-UE u dawk nazzjonali. L-objettiv għandu jkun li wieħed jasal
għal kunsens imġedded dwar kif jiġu eżerċitati
d-Drittijiet tal-Proprjetà Intellettwali, u b’mod li jinvolvi b’mod
sħiħ lill-partijiet interessati rilevanti kollha. Il-Kummissjoni se
timmonitorja t-twettiq ta’ dan il-Pjan ta’ Azzjoni, u tistieden lill-Parlament
Ewropew, il-Kunsill, l-Istati Membri, il-Kumitat Ekonomiku u Soċjali
Ewropew, l-Osservatorju u lill-partijiet interessati biex jikkontribwixxu b’mod
attiv għax-xogħol li ġej. Il-Komunikazzjoni
qed tiġi kkomplementata minn Strateġija għall-ħarsien u
l-infurzar tad-drittijiet tal-proprjetà intellettwali fil-pajjiżi terzi u
l-iżvilupp ta’ koperazzjoni ikbar bejn l-awtoritajiet doganali fl-UE u
f’pajjiżi terzi fir-rigward tal-kummerċ ta’ oġġetti li
jiksru l-PI, kif previst fi pjan ta’ Azzjoni Doganali tal-UE. Dawn
l-azzjonijiet kollha jfittxu li jiżguraw li l-acquis eżistenti tal-UE
fir-rigward tar-regoli tal-PI, inklużi dawk dwar l-infurzar ċivili,
huma applikati u promossi b’mod effettiv. L-objettiv komuni tagħhom hu li
(i) jużaw il-mezzi kollha biex isseħħ dissważjoni
effikaċi u jimpedixxu d-dħul u t-tixrid ta’ prodotti li jiksru PI
fis-swieq (kemm dawk tal-UE u dawk li magħhom is-swieq tagħha huma
marbuta dejjem aktar) sabiex (ii) jistimulaw l-investiment, it-tkabbir u
l-impjiegi f’setturi li jiddependu fuq l-PI li huma tant essenzjali
għall-ekonomiji rispettivi tagħna. Infurzar aktar b’saħħtu
waħdu mhux se jsolvi din il-problema, li għandha tiġi
indirizzata, permezz ta’ dibattitu u ta’ sensibilizzazzjoni fuq il-kosengwenzi
usa' tal-ksur tad-DPI, mmirat lejn il-konsumaturi u l-produtturi.
2.
Rwol għall-parteċipanti kollha matul
il-katina ta' valur tal-PI
2.1. Iffalsifikat jew le?: tqajjim
ta' kuxjenza tal-konsumaturi, l-impjegati u l-klijenti Il-konsumaturi,
l-impjegati u n-negozji mhumiex dejjem konxji tal-iskala u tal-ħsara
ekonomika kkawżata minn attività ta' ksur tal-PI fuq skala
kummerċjali. Dan id-dannu jinkludi l-effetti negattivi sostanzjali ta’
dawn l-attivitajiet fuq id-dħul fiskali, il-kostijiet relatati għal
dawk li jħallsu t-taxxa, il-kompetittività ta’ negozji leġittimi u
r-rabtiet ma’ kriminalità fuq skala kbira. Fl-istess ħin, il-konsumaturi
mhux dejjem huma konxji ta’ detriment li jistgħu isofru huma personalment
meta jixtru prodotti li jiksru l-IPR, b’mod partikolari fir-rigward tar-riskji
potenzjali għas-saħħa u s-sigurtà tagħhom. L-Osservatorju
fil-25 ta’ Novembru 2013 ippubblika r-riżultati ta’ studju dwar
il-perċezzjoni tal-PI li ġabar fil-qosor il-livelli ta' koxjenza
taċ-ċittadini dwar il-kwistjoni[10].
Dan kient ibbażat fuq analiżi bibljografika, investigazzjoni
kwalitattiva ma’ 250 ċittadin Ewropew li għandhom bejn il-15 u l-65
sena u stadju kwantitattiv li fih aktar minn 26,000 ċittadin Ewropew
esprimew il-fehmiet tagħhom permezz ta’ intervisti bit-telefon.
Għalkemm hu pass tal-bidu, l-istudju xorta wera nuqqas ta' sensittività,
b’mod partikolari fost dawk li wieġbu li huma
żgħażagħ, tal-iskala tal-impatti tal-ksur tal-PI
fis-salvagwardja u l-kontribuzzjoni ta' impjiegi bażżati fuq il-PI.
Hu indika wkoll li ż-żgħażagħ Ewropej ħassew li
l-infrastruttura tal-PI hi ta' benefiċċju l-aktar għal kumpaniji
kbar. Fid-dawl ta’ dan, il-Kummissjoni tqis li hemm bżonn ta’ mod aktar
qawwi u kkoordinat ta' konsultazzjoni dwar azzjonijiet ta’ sensibilizzazzjoni u
ta’ għodod ta' informazzjoni globali u li faċli taċċessahom
madwar l-UE[11].
Azzjoni futura
għandha tinvolvi approċċ b'diversi miri u l-analizi tar-raġunijiet
għalies il-prodotti li jiksru d-DPI huma dejjem aktar mfittxija
mill-ġenerazzjoni diġitali. Din għandha tinkludi sforzi kontinwi
biex jiġu indirizzati l-ostakli li fadal għall-iżvilupp u
t-tixrid ta’ prodotti li jirrispettaw il-PI fis-Suq Uniku b’mod li jissodisfaw
il-bżonnijiet tal-konsumaturi fl-era diġitali. Għandha wkoll
tibni fuq evidenza ta’ blind spots fl-għarfien tal-konsumaturi u
l-effikaċja ta’ kampanji ta’ għarfien tal-passat fi ħdan
l-Istati Membri. Ir-rapporttal-Osservatorju dwar il-perċezzjoni tal-PI
jagħti indikaturi utli f’dan ir-rigward. L-Osservatorju
ġabar repożitorju bbażat fuq l-internet tal-aħjar prattika
minn kampanji ta’ koxjenza nazzjonali tal-imgħoddi. Il-ksur tad-drittijiet
tal-PI jista’ jiġi mnaqqas b’mod konsiderevoli billi jiġu infurmati
l-atturi kollha fis-Suq Uniku (ċittadini, konsumaturi, impjegati, negozji
u awtoritajiet pubbliċi) dwar id-disponibbiltà ta’ prodotti ta' PI
attraenti, aċċessibbli u affordabbli fis-Suq Uniku. Fl- 2014, fuq il-bażi
ta’ għarfien li dejjem jikber ta’ studji li kien qed jagħmel,
l-Osservatorju se jassisti lill-Istati Membri fl-iżvilupp u t-tnedija ta’
kampanji ta’ komunikazzjoni sabiex iżid l-għarfien fost
iċ-ċittadini tal-UE dwar l-impatt tal-ksur tal-PI b’mod partikolari
fuq l-impjiegi u l-ekonomija. Kampanji bħal dawn għandhom ukoll ikunu
mmirati biex jiffaċilitaw l-aċċess għal prodotti li
jirrispettaw il-PI fis-Suq Uniku kollu kemm hu u li jenfasizzaw
il-benefiċċji għall-konsumaturi meta jagħżlu prodotti
li jirrispettaw il-PI, f’termini ta’ żgurar tal-konformità ma’ standards
tas-saħħa u tas-sikurezza u tal-leġiżlazzjoni
għall-ħarsien tal-konsumatur. Azzjoni
1: Il-Kummissjoni biħsiebha tippromwovi
l-isforzi tal-Osservatorju u tal-awtoritajiet nazzjonali biex tniedi u
tissorvelja ġenerazzjoni ġdida ta’ kampanji ta’ komunikazzjoni
mmirati. Dan għandu jinkludi kampanji biex titqajjem kuxjenza fost
iċ-ċittadini, speċjalment
għaż-żgħażagħ dwar il-ħsara ekonomika
ikkawżata mill-ksur tal-PI fuqskala kummerċjali u dwar ir-riskji
potenzjali għas-saħħa u s-sikurezza assoċjati ma’ prodotti
li jiksru d-DPI, kif ukoll kampanji li jenfasizzaw il-benefiċċji
għall-konsumaturi meta jagħżlu prodotti li jirrispettaw il-PI u
li jiffaċilitaw l-aċċess għal prodotti bħal dawn. 2.2. Responsabbiltà tad-detentur
li tiżgura l-integrità tal-ktajjen tal-provvista It-tixrid tat-teknoloġija tal-Informazzjoni u
l-Komunikazzjoni (ICT) iffaċilitat l-iżvilupp tal-ktajjen
tal-provvista, dejjem itwal u ta’ spiss globali. Ippermettiet ukoll
għat-tnaqqis tal-kostijiet tal-inventarju peress li l-operaturi mxew
għal kunsinna eżatt fil-ħin. Barra minn hekk, l-ICT ippermettiet
għal żieda f’kunsinja diretta lill-konsumatur finali. Filwaqt li dawn
l-iżviluppi huma pożittivi, ġew ukoll applikati minn operaturi
kummerċjali li jiksru l-PI. Din timmanifesta ruħha billi l-importanza
li dejjem qed tikber ta’ kunsinni żgħar ta’ oġġetti li
jiksru l-PI, id-dħul rapidu u l-ħruġ ta' malajr minn firxa
ġmielha ta' swieq ta' prodotti minn dawk li jiksu l-PI u l-infiltrazzjoni
fil-partijiet l-aktar dgħajfa tal-ktajjen tal-provvista li huma stess huma
mifruxa f’ħafna pajjiżi. Marbut ma' dan, peress li l-konsumaturi
finali qegħdin jiġu dejjem aktar konxji tal-prestazzjoni etika
tal-kumpaniji, l-awditjar tal-katina tal-provvista li tnaqqas ir-riskju tal-ksur
tal-PI joffri wkoll valur ta' kummerċjalizzazzjoni u ta' reputazzjoni
għal kumpaniji intensivi fil-PI li qed jinnegozjaw fis-Suq Uniku jew
migħu[12]. Il-Kummissjoni
inizjalment ser tesplora l-possibilità ta’ skema Ewropea tal-iskema applikata
b’mod volontarju dwar din il-kwistjoni, u tħeġġeġ
l-adozzjoni ta’ tali l-aħjar prattika tad-diliġenza dovuta madwar
setturi intensivi fil-PI billi jippromwovu u jinformaw dwar l-ispejjeż u
l-benefiċċji tal-applikazzjoni sistematika ta' skemi ta’ awditjar
kwalitattivi li jkunu diġà soġġetti għal standards
stabbiliti minn korpi internazzjonali rikonoxxuti. B’mod speċifiku, sa
tmiem l-2014, il-Kummissjoni se torganizza workshop għall-partijiet
interessati dwar l-applikazzjoni tad-diliġenza dovuta fil-ktajjen
tal-provvista bħala mezz għall-prevenzjoni ta’ ksur tal-IP fuq skala
kummerċjali. Dan se jinkludi l-fornituri, id-detenturi tad-drittijiet,
l-intermedjarji (inklużi pjattaformi on-line, magni tat-tiftix, dawk li
jgħabbu l-merkanzija, eċċ.) l-Istati Membri, l-akkademiċi u
l-NGOs. L-ICT
għandha wkoll rwol essenzjali fl-iżgurar tad-distribuzzjoni
fil-livell tal-konsumatur u sistemi ta' loġistika u b’hekk tgħin
fl-individwazzjoni u teskludi prodotti i jiksru l-IP milli jidħlu fihom.
Sabiex jiġi żgurat li ktajjen ta’ distribuzzjoni ta’ prodotti jkunu
sikuri u mhux infiltrati minn prodotti li jiksru l-PI, qed jiġu applikati
teknoloġiji tal-ġestjoni tal-inventarji bħal kombinazzjoni ta'
identifikaturi ta' prodotti uniċi (2D barcodes) u l-applikazzjoni ta’
Identifikazzjoni permezz tal-Frekwenza tar-Radju (RFID). Permezz tal-ħidma
taċ-Ċentru Konġunt għar-Riċerka tagħha f’dan
il-qasam, il-Kummissjoni sussegwentement se toħroġ rapport dwar kif
soluzzjonijiet teknoloġiċi ġodda li jagħtu s-setgħa
lill-konsumaturi se jgħinu fil-ġlieda kontra l-falsifikazzjoni u
l-piraterija. Biex tiskopri l-oriġini tal-oġetti trasportati u
tgħin fil-proċess tal-valutazzjoni tar-riskji, ir-riċerka dwar
is-sigurtà - iffinanzjata permezz tal-programmi qafas tal-UE dwar l-R&Ż
- qed tindirizza ktajjen tal-provvista tal-oġġetti tal-kontejner.
Iċ-Ċentru Konġunt għar-Riċerka żviluppa wkoll
għodda tal-IT (Contraffic) li tippermetti lid-dwana biex tanalizza rotot u
movimenti ta’ kontejners tal-merkanzija importata fl-UE[13].
Il-workshop propost se jivvaluta l-applikabbiltà ta’ teknoloġiji ta'
traċċar u rintraċċar ta’ distribuzzjoni differenti u
mudelli ta’ negozju fil-livell tal-konsumatur li fuqhom jistrieħu
s-setturi intensivi fid-DPI u jinforma lid-ditti dwar l-aħjar prassi. Azzjoni
2: Il-Kummissjoni se tniedi sensiela ta’ azzjonijiet
ta’ konsultazzjoni mal-partijiet interessati kollha rilevanti inkluża
s-soċjetà ċivili dwar l-applikazzjoni ta' diliġenza dovuta
fil-ktajjen ta' distribuzzjoni bħala mezz għall-prevenzjoni ta’ ksur
tal-PI fuq skala kummerċjali. Fuq il-bażi tal-informazzjoni
miġbura hi għandha l-ħsieb li tiżviluppa skema ta’
diliġenza dovuta tal-UE għal dan l-għan. Fl-ewwel istanza, se
tfittex li tinkoraġġixxi l-adozzjoni volontarja tal-iskema li se timmonitorja
mill-qrib biex jiġi ddeterminat jekk humiex meħtieġa aktar
inizjattivi. 2.3. "Segwi l-flus":
Djalogi tal-Partijiet Interessati tal-industrija biex il-prodotti li jiksru
l-PI jinammu l-barra mill-internet Ftehimiet bejn
id-detenturi tad-drittijiet u l-imsieħba tan-negozju li fuqhom
jistrieħu jissorsjaw, jippromwovu, jqassmu, u jbiegħu l-prodotti
tagħhom huma importanti biex jintlaħqu l-għanijiet doppji ta’
individwazzjoni rapida u interruzzjoni ta’ attivitajiet li jiksru l-PI fuq
skala kummerċjali. Kwalunkwe memorandum bħal dan għandu jkollu
mekkaniżmi integrati sewwa għall-protezzjoni tad-drittijiet
fundamentali u ambjent kompetittiv, b’enfasi partikolari fuq il-prevenzjoni ta’
abbużi potenzjali. Ftehimiet bħal dawn meta applikati, huma
mekkaniżmu ta’ rispons rapidu għall-problema tal-ksur tal-PI. Djalogi
bejn il-Partijiet Interessati li jwasslu għal ftehimiet bħal dawn
jinvolvu laqgħat bejn grupp rappreżentattiv tal-partijiet interessati
rilevanti u jfittxu li jiffukaw fuq problemi konkreti u fuq soluzzjonijiet
prattiċi li huma realistiċi, bilanċjati, proporzjonati u
ġusti għal dawk kollha kkonċernati. Huma ngħataw bidu
mill-Kummissjoni u jfittxu li jiffaċilitaw l-iżvilupp ta’ Memoranda
ta’ Qbil (MtQ) li jistabbilixxu l-prinċipji li l-firmatarji jistgħu
japplikaw fi ftehimiet kuntrattwali bilaterali. L-għan huwa li dawk li
jikru l-PI jiċċaħħdu mill-flussi tad-dħul
tagħhom.. L-ewwel djalogu, dwar il-limitazzjoni tal-iskala
tal-oġġetti ffalsifikati permezz ta’ pjattaformi onlajn,
irriżulta f’MoU fl-2011[14].
Rapport ta’ evalwazzjoni f’April 2013[15]
kkonkluda li tista’ tiġi estiża b’mod utli biex jinkludi partijiet
ġodda. Filwaqt li jitqiesu l-iżviluppi rilevanti kollha,
il-Kummissjoni, se tistabbilixxi Djalogi ġodda bejn il-Partijiet
interessati fl-2014 u l-2015, li jinkludu l-fornituri tas-servizzi ta’ reklamar,
servizzi ta’ ħlas u t-trasportaturi, bl-objettiv li jinkiseb matul l-2015
Memorandum ieħor ta’ Qbil li għandu jgħin biex il-prodotti li
jiksru l-PI jinżammu 'l bogħod mill-Internet. B’mod parallel,
l-Osservatorju għandu jwettaq analiżi komparattiva dwar prattiċi
kollaborattivi eżistenti bejn id-detenturi tad-drittijiet u
l-imsieħba kummerċjali stabbiliti fl-Istati Membri u f’pajjiżi
terzi. Azzjoni
3: Il-Kummissjoni se tiffaċilita l-iżvilupp
ta’ Memoranda ta’ Qbil volontarji ulterjuri biex inaqqsu l-profitti minn ksur
tal-PI fuq skala kummerċjali fl-ambjent onlajn, wara djalogi bejn
il-partijiet interessati li jinvolvu fornituri ta’ servizzi ta’ reklamar,
servizzi ta’ ħlas u trasportaturi. 2.4. Għajnuna lil SMEs biex
jiġu inforzati d-drittijiet tagħhom tal-PI L-UE tipprovdi
għal regoli armonizzati ta' s-sistemi ta’ rimedju ċivili dwar il-PI
permezz tad-Direttiva tal-2004 dwar l-infurzar tad-drittijiet tal-proprjetà
intellettwali[16].
Wara komunikazzjoni fl- 2010[17],
sar proċess ta’ konsultazzjoni pubbliku estensiv mill-Kummissjoni biex
tivvaluta jekk dan it-test hux tajjeb għall-iskop tal-isfidi numerużi
li qed jiffaċċja l-infurzar tal-PI. Tard fl-2012, il-Kummissjoni
ħarġet kwestjonarju lill-partijiet interessati biex tinġabar
informazzjoni dwar jekk ir-rimedju ċivili transkonfinali eżistenti
għall-ksur tal-PI kienx aċċessibbli għad-detenturi
tad-drittijiet kollha, speċjalment l-SMEs. Hija esplorat ukoll jekk
is-sistema ta’ qrati fl-Istati Membri kintex ħafifa biżżejjed u
mogħni b’biżżejjed speċjalizzazzjoni. Ir-riżultati ta'
dan l-istudju kienu ppublikati f’Jannar 2013[18]. Waqt
li tibni fuq dan, il-Kummissjoni se tikkunsidra jekk hemmx il-ħtieġa
ta’ azzjoni ulterjuri biex ittejjeb il-proċeduri ta’ rimedju ċivili,
bħal talbiet ta’ valur baxx, għall-SMEs. L-ispejjeż għoljin
u l-kumplessità ta’ litigazzjoni sikwit jiskoraġġixxu lill-SMEs
innovattivi milli jinfurzaw id-drittijiet tal-PI tagħhom, inklużi
dawk li jirriżultaw minn privattivi standard essenzjali (SEPs), u
jistgħu jwasslu għal abbuż tas-suq minn kompetituri ikbar
minnhom. Fil-livell tal-Unjoni, diversi strumenti fil-qasam tal-proċedura
ċivili diġà jeżistu. Dan l-aħħar, il-Kummissjoni
pproponiet[19]
li ssaħħaħ u ttejjeb proċedura attwali Ewropea
għat-talbiet iż-żgħar, li hija proċedura uniformi
disponibbli madwar l-Istati Membri (ir- Regolament (KE) Nru 861/2007). Din
l-azzjoni żżid mal-inizjattivi mill-Kummissjoni biex tgħin
lill-Istati Membri fit-titjib tal-effettività ta’ sistemi nazzjonali
tal-ġustizzja tagħhom bħat-Tabella ta' Valutazzjoni
tal-Ġustizzja tal-UE[20]. Azzjoni
4: Il-Kummissjoni fi ħsiebha tanalizza u
tirrapporta dwar l-inizjattivi nazzjonali eżistenti li għandhom
l-għan li jtejbu l-proċeduri ċivili ta’ infurzar tal-PI
għall-SMEs, b’mod partikolari f’dak li għandu x’jaqsam ma’ talbiet
ta’ valur baxx u tikkunsidra azzjoni possibbli f’dan il-qasam. L-ispejjeż
għoljin u l-kumplessità ta’ litigazzjoni ħafna drabi jistgħu
jiskoraġġixxu lill-SMEs innovattivi milli jinfurzaw id-drittijiet
tal-PI tagħhom. Bħala konsegwenza, ir-redditi tal-SMEs fuq
l-investimenti innovattivi mhumiex ottimizzati u jonqsu milli jespandu
l-attivitajiet tagħhom ta’ riċerka u żvilupp. F’xi Stati Membri,
l-iskemi u l-fondi nazzjonali għandhom l-għan li jirrimedjaw din
is-sitwazzjoni, eż. permezz ta’ possibbiltajiet imtejba ta' assigurazzjoni
tal-litigazzjoni. Fl- 2015, bl-għajnuna tal-Osservatorju, il-Kummissjoni
għandha, jekk ikun xieraq, tirrevedi l-effikaċja ta’ tali skemi
nazzjonali, kif ukoll l-iskemi ta’ pajjiżi terzi. Fuq din il-bażi,
il-Kummissjoni ser tikkonsulta dwar ir-riżultati ta’ din ir-reviżjoni
permezz tal-Green Paper, u twassal, jekk xieraq, għal inizjattiva ta’
politika. Azzjoni
5: Il-Kummissjoni se toħroġ Green Paper
biex tikkonsulta l-partijiet interessati dwar il-ħtieġa għal
azzjoni tal-UE fil-ġejjieni bbażata fuq l-aħjar prattiki li
nstabu fl-iskemi finanzjati nazzjonalment biex jgħinu lill-SMEs biex
jinfurzaw id-drittijiet tal-PI tagħhom. L-Osservatorju
jista’ utilment iqis fl-attivitajiet differenti tiegħu
il-partikolaritajiet tal-SMEs, inklużi l-limitazzjonijiet tar-riżorsi
tagħhom, meta l-SMEs jiġu biex jinfurzaw id-drittijiet tal-PI
tagħhom. Bħala detenturi tad-drittijiet, il-SMEs ta' spiss
jeħtieġu informazzjoni biex jaġġustaw l-istrateġiji
ta’ kummerċjalizzazzjoni jew distribuzzjoni u jistgħu wkoll ma
jkollhomx il-ħiliet u l-kompetenza sabiex b’mod effettiv jipproteġu
l-proprjetà intellettwali tagħhom. Għaldaqstant, il-Kummissjoni
tpoġġi l-isforzi tagħha biex tiżivuluppa sistema ta'
appoġġ[21]
li tinkludi kwistjonijiet ta' infurzar: billi ssaħħaħ u
tikkoordina l-appoġġ nazzjonali permezz tal-proġett IPorta; u
permezz ta' pariri fuq il-PI f'attivitajiet ta' negozju transnazzjonali permezz
tal-helpdesk Ewropew tad-DPI u l-Helpdesks tad-DPI tal-SMEs f'pajjiżi
terzi[22].
Din is-sistema tikkoopera mill-qrib ma’ appoġġ ġenerali
għan-negozju, b’appoġġ nazzjonali tal-PI u ma’ azzjonijiet
tal-Osservatorju. 2.5. Sistemi ta' ritrasferiment:
għodda għall-konsumatur Ċerti
fornituri ta’ karti kreditu u debitu joffru skemi ta' ritrasferiment fejn, sa
ċertu valur, il-konsumaturi jistgħu jikkontestaw u ma jħallsux
għal xi servizz jew prodott li ma kinux xtaqu jixtru u kienu jafu
diġà li ma kienx ġenwin. F’ċerti Stati Membri dawn l-iskemi huma
rikjesti bil-liġi. Skemi bħal dawn ovvjament jaħdmu biex itaffu
l-effetti tal-frodi iżda jistgħu wkoll jgħinu sabiex
jiżguraw li dawk il-konsumaturi li bla ma jridu jirċievu
oġġetti u servizzi li jiksrru l-PI jew ma jispiċċawx
ikollhom iħallsu għalihom jew ikunu jistgħu sussegwentement
ifittxu kumpens. Dawn l-iskemi jistgħu jaqdu rwol fil-limitazzjoni
tal-qligħ diżonest li jagħmlu l-operaturi li jiksru l-PI.
Fl-2014, il-Kummissjoni se tniedi eżerċizzju ta’ konsultazzjoni dwar
skemi oħra ta’ ritrasferiment u skemi oħra li jnaqqsu l-fluss ta’
flus li jmorru fl-attivitajiet li jiksru l-PI fuq skala kummerċjali. Dan
l-eżerċizzju ta' konsultazzjoni pubblika se jesplora l-ambitu biex
tittieħed azzjoni f’dan il-qasam. Azzjoni
6: Il-Kummissjoni se toħroġ Green Paper
biex tikkonsulta ma’ partijiet interessati dwar l-impatt ta’ fatturazzjoni
b'lura u skemi relatati biex jiġi indirizzat il-ksur tal-PI fuq skala
kummerċjali. Fuq din il-bażi, se tesploral-bżonn u l-ambitu biex
tieħu azzjoni konkreta f'dan il-qasam.
3.
L-awtoritajiet pubbliċi f’ħidma flimkien
3.1. Kooperazzjoni bejn
l-awtoritajiet nazzjonali F’Ewropa
mingħajr fruntieri interni, minħabba n-natura transnazzjonali
tal-involviment tal-kriminalità organizzata f'attivitajiet ta' ksur tal-PI,
hemm il-bżonn li titjieb il-kooperazzjoni bejn l-awtoritajiet nazzjonali,
l-istituzzjonijiet tal-UE, l-aġenziji tal-ġustizzja u l-affarijiet
interni tal-UE, il-pajjiżi terzi rilevanti u sħab oħra. F’dan
il-kuntest, il-Kunsill tal-Ġustizzja u l-Affarijiet Interni[23] —
notevolment fuq il-bażi tal-Valutazzjoni tal-Europol tat-Theddid
mill-Kriminalità Serja u Organizzata — iddeċieda f’Ġunju tal-2013 li
t-tfixkil tal-gruppi kriminali organizzati involuti fil-produzzjoni u
d-distribuzzjoni ta’ oġġetti ffalsifikati li jiksru r-regolamenti
tas-saħħa, is-sigurtà u l-ikel u dawk li jipproduċu prodotti
sub-standard għandu jkun prijorità għall-perjodu 2014-2017. Biex jitwettqu
d-diversi prijoritajiet ta’ dawn il-konklużjonijiet tal-Kunsill dwar
il-ġlieda kontra l-kriminalità serja u organizzata, il-pjanijiet annwali
ta’ azzjoni operazzjonali huma żviluppati mill-Istati Membri
bl-appoġġ tas-Segretarjat tal-Kunsill, il-Kummissjoni, l-Eurojust,
l-Europol u aġenziji Ewropej rilevanti oħrajn[24].
L-implimentazzjoni ta’ dawn l-azzjonijiet se tiġi kkontrollata
regolarment. Il-Kummissjoni hija lesta li tappoġġa lill-Istati Membri
permezz ta’ kofinanzjament possibbli ta’ dawn l-azzjonijiet. Pjan ta’ Azzjoni
Doganali tal-UE għall-ġlieda kontra l-ksur tal-PI għas-snin
2013-2017[25]
jistabbilixxi l-qafas għal azzjoni konġunta mit-28
amministrazzjonijiet doganali sabiex itejbu l-ġlieda kontra l-ksur tal-PI
fuq il-fruntieri esterni tal-UE. Dan jipprevedi l-iżvilupp ta’
approċċi li huma mfassla apposta biex jindirizzaw il-ksur
tal-oġġetti li jiksru l-PI mixtrija fuq l-internet permezz ta’
kurrier u pakketti postali. Aktar kooperazzjoni transkonfinali u bejn
l-awtoritajiet hija meħtieġa. Il-Kummissjoni se torganizza konferenza
fl- 2015 mar-rappreżentanti tal-awtoritajiet tad-dwana, tal-pulizija u
dawk ġudizzjarji biex jiddeterminaw kif tali kooperazzjoni
msaħħa tista’ tiġi miksuba. L-isfida dwar
kif jiġu ssorveljati aħjar ix-xejriet li qed jevolvu fl-infurzar
tal-PI 'il barra mill-UE qed tiġi indirizzata b'mod parallel
fil-Komunikazzjoni tal-Kummissjoni li taġġorna
l-"Istrateġija aġġornata tat-tisħiħ tal-jeddijiet
tal-proprjetà intelletwali f'pajjiżi terzi"[26].
Fil-kuntest tan-negozjati dwar ftehimiet ta’ kummerċ ħieles, l-UE
għandha l-għan li tikseb impenji sostanzjali min-naħa ta’
gvernijiet ta’ pajjiżi terzi li jilħqu livell għoli ta’ infurzar
tad-drittijiet tal-proprjetà intellettwali biex b’hekk jiġi
ffaċilitat il-kummerċ fi prodotti intensivi fil-PI. Għandhom
jiġu żviluppati wkoll kooperazzjoni aktar profonda bejn
l-awtoritajiet doganali fl-UE u f’pajjiżi terzi fir-rigward
tal-kummerċ ta’ oġġetti li jiksru l-PI, kif previst fi pjan ta’
Azzjoni Doganali tal-UE[27]. Xi
Stati Membri stabbilixxew unitajiet tal-kriminalità tal-PI fi ħdan
il-ġurisdizzjonijiet tagħhom biex jevitaw ix-xogħol doppju fi
strateġiji ta’ infurzar tal-PI madwar l-awtoritajiet rilevanti kollha fi
ħdan dawn l-Istati Membri. Hemm nuqqasijiet u riskji simili ta’ duplikazzjoni
f’kooperazzjoni bejn l-Istati Membri. L-awtoritajiet ħafna drabi jsibu
diffikultà sabiex jintraċċaw l-attivitajiet transkonfinali li jiksru
l-PI fl-Unjoni, u għalhekk rarament huma jkunu jistgħu jippjanaw u
jwettqu investigazzjonijiet u operazzjonijiet transkonfinali fi ħdan
is-suq uniku. Mingħajr
ħsara għall-attivitajiet li għaddejjin bħalissa[28],
il-Kummissjoni tqis li l-kooperazzjoni bejn l-awtoritajiet nazzjonali kollha li
għandhom rwol fil-protezzjoni tal-PI tista' tittjeb permezz tat-twaqqif
ta' Grupp ta' Esperti għall-awtoritajiet rilevanti kollha tal-Istati
Membri[29].
B'hekk dan il-forum, li jippermetti kemm għall-kondiviżjoni
tal-aħjar prattika kif ukoll għal taħdidiet dwar
l-orjentazzjonijiet ta' politika tal-PI, jista' jikkontribwixxi biex iżid
l-effiċjenza tal-infurzar tal-PI mill-UE[30].
Azzjoni
7: Il-Kummissjoni se tistabbilixxi Grupp ta’ Esperti
tal-Istati Membri dwar l-infurzar tal-PI, fejn l-Istati Membri jistgħu
jaqsmu l-aħjar prattika dwar ix-xogħol fi ħdan l-UE
tal-awtoritajiet ikkonċernati kollha tagħhom u jkunu infurmati dwar
it-twassil ta’ dan il-Pjan ta’ Azzjoni. 3.2. Taħriġ
għall-awtoritajiet nazzjonali fis-Suq Uniku Taħriġ
tal-awtoritajiet nazzjonali biex jindirizzaw xejriet u mudelli tan-negozju
assoċjati ma’ attivitajiet ta' ksur tal-PI u wkoll biex jaqsmu
l-aħjar prattiki dwar metodi ta’ teknika ta’ Identifikazzjoni l-aktar
issir fil-livell nazzjonali. Barra minn hekk, fejn jeżisti
taħriġ transkonfinali u l-bini tal-għarfien, huwa ta’ spiss
skont it-tip ta’ awtorità ta’ infurzar u mhux fost l-awtoritajiet. Fil-kuntest
tas-Suq Uniku, għalhekk hemm bżonn li jiġu żviluppati
programmi ta’ taħriġ transkonfinali tal-awtoritajiet tal-infurzar
tal-PI. Fl- 2012 u l- 2013, l-Osservatorju għamel seminars tat-tiswir
tal-għarfien għall-uffiċjali ta’ infurzar dwar pestiċidi
ffalsifikati u l-kriminalità farmaċewtika. Fuq dan il-pedament, issa
għandhom jiġu ppjanati sessjonijiet ta’ taħriġ
għall-uffiċjali nazzjonali involuti fuq il-post fl-infurzar tal-PI.
Sadanittant, l-Uffiċċju Komunitarju tal-Varjetajiet tal-Pjanti (CPVO)
organizza seminar ta’ infurzar f’Mejju 2013 dwar id-drittijiet
għall-kategoriji kollha tal-prattikanti tal-PI li jispeċjalizzaw
f’dan il-qasam. Fl-2014, l-Osservatorju se tkompli jiżviluppa sett
komprensiv ta' programmi ta’ taħriġ settorjali ta’ infurzar tal-PI
għall-awtoritajiet tal-Istati Membri. Dawn il-programmi huma kkoordinati
mal-Europol, l-Eurojust, il-Kulleġġ Ewropew tal-Pulizija (CEPOL) u
s-CPVO. Sadanittant,
l-iżvilupp ta’ taħriġ maħsub għall-prattikanti legali
dwar il-leġiżlazzjoni tal-UE dwar il-PI jista’ jwassal ukoll
għal titjib fl-infurzar effettiv tal-IPRs u l-għoti ta’ rimedju. Għal dan
l-għan, il-Kummissjoni se tippromwovi taħriġ ta’ prattikanti
legali dwar il-leġiżlazzjoni tal-UE fil-qasam tal-PI, b’mod partikolari
bl-użu sħiħ tal-Portal Ewropew tal-Ġustizzja elettronika[31]
permezz tat-tixrid ta’ materjal ta’ taħriġ eżistenti. Azzjoni
8: Il-Kummissjoni se tappoġġa Osservatorju
fl-iżvilupp ta’ sett komprensiv ta' programmi settorjali ta’
taħriġ relatati tal-infurzar tal-PI għall-awtoritajiet
tal-Istati Membri fil-kuntest tas-Suq Uniku. 3.3. Ir-responsabbiltà
tal-kuntratturi pubbliċi li jiflu l-akkiwst għal prodotti li jiksru
l-PI Kuntratti ta’
akkwist pubbliku fi ħdan l-Unjoni jistgħu jirriżultaw f'servizzi
tas-settur pubbliku li jiġu nfiltrati ma’ prodotti tal-ksur tal-PI.
Bħala l-ewwel pass, fl- 2014, il-Kummissjoni għandha trawwem skambju
aħjar bejn l-awtoritajiet pubbliċi tal-Istati Membri dwar dawn
il-kwistjonijiet, u se torganizza konsultazzjoni għal dan l-għan
fil-Grupp ta’ Esperti tal-Istati Membri dwar l-Akkwist Pubbliku. Gruppi ta'
xogħol tematiċi, organizzata mill-Osservatorju, ukoll se jippermettu
lill-awtoritajiet pubbliċi minn Stati Membri differenti biex jiddiskutu
l-problemi li ltaqgħu magħhom u jiskambjaw l-aħjar prattika.
Barra minn hekk, il-Kummissjoni se twettaq l-ewwel eżerċizzju pilota
settorjali billi tifli l-akwisti pubbliċi fis-settur mediku biex tevalwa
l-kobor tal-problema f’dak il-qasam. Fuq il-bażi ta’ dawn l-attivitajiet
il-Kummissjoni għandha tippubblika u tippromwovi gwida dwar
metodoloġiji biex jgħinu l-awtoritajiet pubbliċi
fl-individwazzjoni u l-prevenzjoni ta' prodotti ffalsifikati milli jidħlu
f’servizzi pubbliċi. Azzjoni
9: Il-Kummissjoni fi ħsiebha tiżviluppa,
tippromwovi u tippubblika gwida dwar l-aħjar prattika biex l-awtoritajiet
pubbliċi jevitaw li jixtru prodotti foloz.
4.
Monitoraġġ u mmirar aħjar ta’
politika ta’ infurzar tal-PI
4.1. L-analizzar tax-xejriet
tal-PI u tal-attivitajiet ta' ksur tal-PI Minn perspettiva
ta’ interess pubbliku, il-politiki ta’ infurzar tal-PI għandhom ikunu
mmirati lejn dawk l-attivitajiet ta’ ksur tal-PI fuq skala kummerċjali li
huma bl-akbar probabbiltà li jagħmlu ħsara għall-investimenti
fl-innovazzjoni u l-kreattività u jagħmlu l-akbar ħsara għall-benesseri
tal-konsumatur u t-tkabbir ekonomiku. F’dan il-kuntest, dawk is-setturi
intensivi fid-DPI li jsofru l-aktar ksara sinifikanti minn attivitajiet ta'
ksur tal-PI jeħtieġ li jiġu identifikati b’mod
oġġettiv u mbagħad sorveljati sistematikament biex jiġi
żgurat li l-għodod ta’ politika stabbiliti f’din il-Komunikazzjoni
kif ukoll li s-sistemi leġiżlattivi ta’ rimedju jaħdmu.
F’Settembru 2013, l-Uffiċċju Ewropew tal-Privattivi (EPO) u l-OHIM
ippubblikaw studju sabiex tiġi pprovduta valutazzjoni inizjali tas-setturi
intensivi fid-DPI fi ħdan l-UE[32].
It-tieni fażi tar-rapport OHIM/EPO tas-setturi intensivi fil-PI se
tiġi ppubblikata fil-ħarifa tal-2014[33].
Ladarba s-setturi intensivi fil-PI jiġu
identifikati, hi meħtieġa l-applikazzjoni ta’ metodoloġiji ta’
stima affidabbli biex jitkejjel id-daqs tal-iskala kummerċjali tal-ksur
tal-PI f’dawn is-setturi[34].
Flimkien mal-Osservatorju, il-Kummissjoni se tressaq sal-2015 mudelli
trasparenti u prammatiċi li jistmaw ix-xejriet ta’ attivitajiet li jiksru
l-PI fis-setturi intensivi fl-IPR. Għal
setturi intensivi fid-DPI li jipprovdu l-prodotti tagħhom onlajn u
jiffaċċjaw l-offerta ta’ prodotti “ħielsa” illegali li jiksru
l-PI, il-Kummissjoni qiegħda tagħmel studju biex tevalwa l-effetti
ta’ spustament ta’ prodotti infrazzjonarji fuq il-prodotti leċiti. Dan se
jitlesta sal-aħħar tal-2014. Mal-Osservatorju, il-Kummissjoni se
tniedi wkoll studju fuq ksur tal-liċenzji tal-Creative Commons minn min
dawk li jwettqu l-ksur li jkunu qed ifittxu li japproprjaw xogħlijiet ta’
dominju pubbliku. Barra minn hekk, l-Osservatorju se jagħmel riċerka
dwar l-imġiba u l-attitudnijiet tal-ġenerazzjoni
żagħżugħa fir-rigward tax-xejriet tal-mudelli tal-konsum
ta’ prodotti li għalihom japplikaw id-drittijiet tal-proprjetà
intellettwali. Fil-kuntest
tax-xogħol tagħha fil-qasam tal-politika doganali, il-Kummissjoni se
tkompli tiġbor u tagħmel id-dejta disponibbli dwar detenzjonijiet
doganali fil-fruntieri esterni tal-UE. Din l-informazzjoni se titlesta
mill-informazzjoni dwar każi ta’ ksur tal-PI irreġistrati fuq is-Suq
Uniku[35].
B’mod parallel, l-Osservatorju, bl-appoġġ tal-awtoritajiet nazzjonali
rilevanti, qed jaħdem fuq l-iżvilupp ta’ bażi tad-dejta
tal-każistika għal każi ta’ ksur tal-IP. Biex jiġi
żgurat li dawn is-settijiet jintużaw tajjeb biex jiġi
żgurat li l-politika ta’ infurzar tal-PI tkun ibbażata fuq sisien
ekonomiċi trasparenti, mill-2014, il-Kummissjoni fi ħsiebha tipprovdi
rapporti ekonomiċi f’dan il-qasam. Dawn se jservu bħala għodda
ta’ monitoraġġ għall-politiki tal-Kummissjoni kontra
attivitajiet ta' ksur tal-PI fuq skala kummerċjali. Azzjoni
10: Il-Kummissjoni għandha tippubblika rapport
biennali tal-impatt ekonomiku tal-politika tal-UE dwar l-PI li jista' jservi
bħala għodda ta' monitoraġġ aktar effettiva
għall-politika l-ġdida tal-UE dwar l-infurzar tal-PI kif stabbilit
fil-Komunikazzjoni. [1] Konklużjonijiet tal-Kunsill Ewropew 20-21.03.2014,
p. 5 u p. 6. [2] Industriji intensivi tad-Drittijiet tal-Prorpjetà
Intelletwali: kontribuzzjoni għall-prestazzjoni ekonomika u l-impjiegi
fl-Ewropa. Ara: oami.europa.eu. [3] Ara: ec.europa.eu/internal_market/intellectual-property. [4] Fl- 2012, RAND Europe, lestiet rapport: Il-Kejl tal-ksur
tad-DPI fis-suq intern. Dan ir-rapport jiddiskuti studji ffinanzjati
mill-industrija li jevalwaw din il-kwistjoni u l-limitazzjonijiet
assoċjati tagħhom. http://ec.europa.eu/internal_market/iprenforcement/docs/ipr_infringment-report_en.pdf
[5] Ara: kroll.com. [6] Ara: ec.europa.eu/taxation_customs. [7] https://www.gov.uk/government/uploads/system/uploads/attachment_data/file/246390/horr73.pdf.
Iċ-ċiberkriminalità hi eskluża minn din l-istima. [8] L-azzjonijiet proposti ma għandhomx impatt
baġitarju 'il fuq minn dak li hu previst diġà għas-sninli
ġejjin fl-ipprogrammar uffiċjali tal-Kummissjoni. [9] Regolament (UE) Nru 386/2012 tad-19.4.2012 jafda
lill-OHIM b’diversi kompiti li għandhom l-għan li jiffaċilitaw u
jappoġġaw l-attivitajiet tal-awtoritajiet nazzjonali, is-settur
privat u l-istituzzjonijiet tal-Unjoni fil-ġlieda kontra l-ksur tad-DPI.
Dawn il-ħidmiet ma jestendux għall-parteċipazzjoni
f'operazzjonijiet individwali jew investigazzjonijiet imwettqa
mill-awtoritajiet nazzjonali, u lanqas għal kwistjonijiet koperti
mit-Titolu V tat-Tielet Parti tat-Trattat dwar il-Funzjonament tal-Unjoni
Ewropea (eż. fil-qasam kriminali u tal-pulizija). [10] Ara: oami.europa.eu. [11] Dan l-aħħar ħadet inizjattiva fejn
ġibdet l-attenzjoni għall-effetti ekonomiċi negattivi ta' ċittadini
kemm tal-impjiegi mitlufa kif ukoll tad-dħul pubbliku mitluf li
jirriżulta mill-ksur tad-DPI kontra prodotti legali, speċjalment
f'erti setturi: Tajjeb iżżejjed biex ikun minnu: Il-prezz veru
tal-oġġetti ffalsifikati, għal aktar informazzjoni: http://ec.europa.eu/commission_2010-2014/tajani/stop-fakes/index_en.htm [12] Regolament (UE) Nru 995/2010 tal-20.10.2010
jistabbilixxi obbligi ta’ diliġenza fuq l-operaturi li jpoġġu
l-prodotti tal-injam fis-suq. [13] Ara: ec.europa.eu/dgs/jrc. [14] Ara: ec.europa.eu/internal_market/iprenforcement. [15] COM(2013) 209 tal-18.4.2013. [16] Id-Direttiva 2004/48/KE, 29.4.2004. [17] COM (2010)779 tat-22.12.2010. [18] Ara: ec.europa.eu/internal_market/consultations. [19] COM(2013) 794 final [20] http://ec.europa.eu/justice/effective-justice/files/justice_scoreboard_communication_en.pdf [21] http://ec.europa.eu/enterprise/initiatives/ipr/what-are-iprs/index_en.htm
[22] [Għal aktar dettalji, ara l-Komunikazzjoni
tal-Kummissjoni “Kummerċ, tkabbir u proprjetà intellettwali -
għall-ħarsien u l-infurzar tad-drittijiet tal-proprjetà intellettwali
fil-pajjiżi terzi COM (2014) [… ],] [23] Il-konklużjonijiet tal-Kunsill tas-7.6.2013 li
jistabbilixxu l-prijoritajiet għall-ġlieda kontra l-kriminalità serja
u organizzata. [24] Dawn l-azzjonijiet jimmiraw notevolment li jtejbu
l-informazzjoni u l-intelliġenza għall-finijiet ta’ analiżi
strateġika u operazzjonali, jagħtu prijorità u jpoġġu
fil-mira gruppi ta’ kriminalità organizzata u prominenti, jiżviluppaw
investigazzjoni finanzjarja u ta' rkupru tal-assi, jippromwovu l-kooperazzjoni
multidixxiplinarja fi ħdan l-UE u jtejbu l-kooperazzjoni ma’ pajjiżi
ta’ oriġini u ta’ tranżitu ewlenin u msieħba rilevanti. [25] Riżoluzzjoni tal-Kunsill tal-10.12.2012. [26] ĠU, C 129 of 26.5.2005, p. 3. [27] Ibid. [28] Notevolment fil-qafas ta’ Pjan ta’ Azzjoni Doganali
fil-ġlieda kontra l-kriminalità serja u organizzata tal-UE, ara ĠU, C
80 of 19.3.2013, p. 1. [29] Dan jista’ wkoll jissorvelja l-użu ta’ għodod
komuni bħall-Enforcement Database u l-ACIST żviluppati
mill-Osservatorju. [30] L-ambitu u l-mandat ta’ dan il-Grupp ta’ Esperti
għandhom jiġu stabbiliti f’deċiżjoni tal-Kummissjoni fl-
2014. [31] Ara: e-justice.europa.eu. [32] Id-drittijiet tal-proprjetà intellettwali
tal-industriji intensivi, op. cit. [33] Bl-imminar tad-dejta fil-lvrll tal-kumpanija, se jiġu
identifikati s-setturi intensivi fl-IPR fil-livell nazzjonali u jiġi
kkwantifikat il-kontribut tagħhom għall-ekonomija ta’ kull Stat
Membru, kif ukoll tiġi evalwata d-dipendenza tal-SMEs fuq l-IPR. [34] Fl- 2012, RAND Europe lestiet rapport
għall-Kummissjoni (Il-kejl ta’ ksur tad-DPI fis-Suq Intern,
ikkwotat iktar ’il fuq) li rreveda xi 200 studju eżistenti u enfasizza
s-saħħa u d-dgħufijiet tal-metodoloġija/dejta tagħhom.
Fuq din il-bażi, hija pproponiet metodoloġija rieżaminata
mill-pari li tista' tintuża biex jiġu stmati l-livelli ta’ attività
li tikser l-IP fl-ekonomija. [35] Id-dejta se tinħażen fl-Gooda
għall-Appoġġ tal-Intelliġenza Kontra l-Iffalsifikar (ACIST)
żviluppata mill-OHIM mal-Europol:
https://www.tmdn.org/enforcementintelligence-webapp/