1. INTRODUZZJONI

Din il-Komunikazzjoni ssegwi l-Komunikazzjoni tal-24 ta' Ġunju 2013[1] dwar l-implimentazzjoni tal-Inizjattiva tal-Materja Prima.  Tippreżenta lista ġdida ta' materja prima kritika u tipprovdi, fil-konklużjonijiet, ħarsa ġenerali tal-attivitajiet li ġejjin marbuta mal-Inizjattiva tal-Materja Prima, is-Sħubija Ewropea għall-Innovazzjoni dwar il-Materja Prima u l-parti ta' Orizzont 2020 li tikkonċerna l-materja prima.

Dokument ta' Ħidma tal-Persunal parallell jagħti sommarju tax-xogħol li sar matul l-aħħar sena taħt it-tliet pilastri tal-Inizjattiva tal-Materja Prima[2] kif ukoll attivitajiet trażversali.

Fil-Komunikazzjoni tal-2011 dwar il-materja prima[3], il-Kummissjoni formalment adottat lista ta' 14-il materja prima 'kritika' (jiġifieri materja prima b'riskju għoli tal-provvista u importanza ekonomika qawwija) u qalet li se tkompli tagħmel monitoraġġ tas-sitwazzjoni biex tindentifika azzjonijiet ta' prijorità. Daħlet ukoll għar-responsabbiltà li tirrevedi u taġġorna l-lista mill-inqas kull tliet snin. Din il-komunikazzjoni tinkludi għalhekk lista riveduta tal-materja pirma kritika għall-Unjoni Ewropea (ara l-Anness 1).

L-iskop tal-lista huwa li tikkontribwixxi għall-implimentazzjoni tal-politika industrijali tal-UE u tiżgura li l-kompetittività industrijali tal-Ewropa tissaħħaħ permezz ta' azzjonijiet f'oqsma oħrajn tal-politika. Dan għandu jżid il-kompetittività globali tal-ekonomija tal-UE, f'konformità mal-aspirazzjoni tal-Kummissjoni li żżid il-kontribuzzjoni tal-industrija għall-PDG għal 20% sal-2020. Għandu wkoll jgħin jinċentiva l-produzzjoni Ewropea tal-materja prima kritika u jiffaċilita l-varar ta' attivitajiet ġodda ta' xogħol fil-minjieri. Il-lista qed tintuża wkoll biex tgħin tipprijoritizza l-ħtiġijiet u l-azzjonijiet. Pereżempju, isservi ta' element ta' appoġġ meta jiġu nnegozjati l-ftehimiet tal-kummerċ, fejn tisfida l-miżuri ta' distorsjoni tal-kummerċ jew tippromwovi r-riċerka u l-innovazzjoni. L-informazzjoni dwar l-użu tagħha mill-Istati Membri u l-industrija hija, madankollu, skarsa ħafna. Huwa importanti wkoll li jiġi enfasizzat li l-materja prima kollha, anke jekk ma tkunx ikklassifikata bħala kritika, hija importanti għall-ekonomija Ewropea u li materja prima partikolari u d-disponibbiltà tagħha fl-ekonomija Ewropea għandha għalhekk ma tiġix injorata għax sempliċiment mhix klassifikata bħala kritika.

2. IR-REVIŻJONI TAL-LISTA TAL-MATERJA PRIMA KRITIKA GĦALL-UE

Ir-reviżjoni, l-ewwel waħda mill-adozzjoni tal-lista fl-2011, saret bi tliet għanijiet ewlenin:

a) Li jitwessa l-ambitu tal-materja prima analizzata

Fl-istudju tal-2013, ġew analizzati 54 materjal mhux tal-enerġija u mhux tal-ikel (fl-2010 ġew analizzati 41), bl-użu tal-istess metodoloġija bħall-istudju preċedenti. Dan l-ambitu estiż jinkludi seba' materjali abijotiċi ġodda u tliet materjali bijotiċi (lasktu, injam tal-polpa u injam artab maqtugħ). Il-lista tal-materja prima kritika tal-2014 tinkludi 13 mill-14-il materjal identifikat fl-istudju preċedenti, fejn it-tantalju biss inħareġ mil-lista (minħabba riskju inqas ta' provvista). Ġew inklużi sitt materjali ġodda: borati, kromju, faħam tal-kokk, manjeżit, ġebla tal-fosfat u metall tas-siliċju.

b) Li tiġi rfinuta l-analiżi u tintuża dejta addizzjonali

Fi tqabbil mal-istudju tal-2010, hemm iktar dettall dwar l-elementi terrestri rari fejn huma maqsuma f'żewġ kategoriji 'tqal' u 'ħfief', it-tnejn li huma inklużi bħala entrati separati fil-lista l-ġdida. Fl-istudju ġiet integrata dejta Ewropea ġdida u hemm inkluża 'valutazzjoni tal-katina tal-valur' għall-materja prima kritika kollha.

c) Li tiġi ppreservata l-komparabbiltà mal-istudju tal-2010

Sabiex tkun tista' ssir komparabbiltà mar-rapport tal-2010, ma sarx tibdil fundamentali fil-metodoloġija. Għalhekk l-informazzjoni ġdida u l-għarfien, dwar pereżempju l-katina tal-provvista downstream, ġew użati biex itejbu l-analiżi kwalitattiva, mhux il-metodoloġija kwantitiattiva. Ir-rapport il-ġdid fih rakkomandazzjonijiet għat-tibdil fil-metodoloġija għar-rapport li jmiss fl-2016.

Il-lista l-ġdida hija ppreżentata fl-Anness 1, li tikkonsisti f'20 materja prima kritika, b'dejta ewlenija dwar kull oġġett.

3.  KONKLUŻJONI

L-Inizjattiva tal-Materja Prima hija proġett ta' terminu medju għal twil. Fl-aħħar mill-aħħar, sar progress sinifikanti fl-implimentazzjoni tal-inizjattiva, b'mod partikolari fl-ewwel u t-tielet pilastru. Ħafna mill-azzjonijiet imbassra fiż-żewġ Komunikazzjonijiet ġew implimentati għalkemm l-indikaturi li jħeġġu l-monitoraġġ tar-riżultati għadhom neqsin. Fis-snin li ġejjin, is-Sħubija Ewropea għall-Innovazzjoni u l-programm Orizzont 2020, li issa huma stabbiliti sew, huma mistennija li jixprunaw il-progress f'firxa wiesgħa ta' oqsma.

Iktar żvilupp fit-tieni prilastru għandu issa jsir prijorità ewlenija, speċjalment fir-rigward tal-kundizzjonijiet ta' qafas għax-xogħol fil-minjieri u t-titjib fil-bażi tal-għarfien tal-materja prima. Dan jista' jinkludi l-istabbilment sal-2020 ta' bażi tal-għarfien panEwropea dwar materja prima li mhix tal-enerġija u mhix agrikola u l-identifikazzjoni tal-indikaturi xierqa biex ikejlu l-progress.

Il-Kummissjoni qed timmira li tipprepara dokument dwar il-kwistjonijiet marbuta max-xogħol fil-minjieri fil-qiegħ tal-baħar sal-bidu tal-2015.

Il-Kummissjoni se tipproduċi Komunikazzjoni dwar is-Sħubija Ewropea għall-Innovazzjoni biex tispjega kif il-Kummissjoni nfisha, l-Istati Membri, l-industrija, id-dinja akkademika u l-NGOs beħsiebhom jaħdmu flimkien fil-prattika biex iħaddmu l-pjan ta' implimentazzjoni strateġika tas-Sħubija Ewropea għall-Innovazzjoni.

Sa mill-varar tagħha, is-Sħubija Ewropea għall-Innovazzjoni laqqat konferenza annwali ta' livell għoli. Il-konferenza tal-2014 se tkun fil-ħarifa fl-Italja. Hemmhekk se jiġu ppreżentati għadd ta' 'impenji tal-materja prima' ewlenin.

Il-proċess għal fażi li jmiss tal-ippogrammar strateġiku għar-riċerka li jkopri l-2016–18, se jibda fl-2014. Il-fokus għall-materja prima se jkun fuq il-wirja industrijali u l-attivitajiet pilota.

Permezz tal-pubblikazzjoni ta' sejħa fl-14 ta' Frar 2014, li tagħlaq fl-10 ta' Settembru 2014, l-Istitut Ewropew tal-Innovazzjoni u t-Teknoloġija vara l-proċess tal-għażla għal Komunita tal-Għarfien u l-Innovazzjoni (KIC - Knowledge and Innovation Community) dwar il-materja prima. Din il-KIC se tiġbor flimkien organizzazzjonijiet ta' edukazzjoni ogħla, riċerka u kummerċ biex ittejjeb il-kapaċità tal-innovazzjoni tal-UE fil-qasam tal-materja prima.

L-aħħar laqgħa tal-proġett tan-Netwerk Ewropew dwar il-Kompetenza fit-Terrestri Rari (ERECON - European Rare Earth Competency Network) se tkun fl-aħħar tal-2014, fejn se jiġu ppreżentati dokumenti tas-settur u rakkomandazzjonijiet tal-politika.

Matul il-bqija tal-2014, huma ppjanati avvenimenti diplomatiċi dwar il-materja prima mal-Groenlandja, l-Unjoni Afrikana u diversi pajjiżi avvanzati teknoloġikament bħall-USA u l-Kanada. Mill-2015, jistgħu jitwettqu diversi azzjonijiet diplomatiċi u tal-iżvilupp kummerċjali fil-materja prima ma' msieħba mhux tal-UE permezz ta' Strument ta' Sħubija ġdid.

F'konformità mal-konklużjonijiet tal-Kunsill Ewopew ta' Marzu 2014, li "l-isforzi għandhom jitkomplew biex jitjieb l-aċċess għas-suq madwar id-dinja permezz tal-iffaċilitar tal-integrazzjoni tal-kumpaniji Ewropej fil-katini tal-valur globali u l-promozzjoni ta' kummerċ ħieles, ġust u miftuħ filwaqt li jiġu kkonfermati l-interessi tiegħu, fl-ispirtu tar-reċiproċità u l-benefiċċju reċiproku. [...] Għandha ssir wkoll iktar azzjoni biex ikun żgurat l-aċċess għall-materja prima prinċipali", in-negozjati u l-infurzar tar-regoli tal-kummerċ se jibqgħu prijorità għolja, b'enfażi partikolari fuq in-negozjati tas-Sħubija Trans-Atlantika ta’ Kummerċ u ta’ Investiment mal-Istati Uniti.

Finalment, fir-rigward tat-tielet pilastru, l-ikbar prijorità fl-2014 se tkun ir-reviżjoni tal-politika tal-iskart, inkluż reviżjoni tal-miri.

Anness 1

Lista tal-materja prima kritika

L-20 materja prima elenkati hawn taħt huma kritiċi għaliex ir-riskji ta' nuqqas ta' provvista u l-impatti tagħhom fuq l-ekonomija huwa ogħla minn dawk ta' ħafna materja prima oħra. It-tabella tindika b'mod ċar li ċ-Ċina hija l-iktar pajjiż influwenti f'termini ta' provvista globali tal-20 materja prima kritika. Diversi pajjiżi oħrajn għandhom provvisti dominanti ta' materja prima speċifika bħall-Brażil (nijobju). Il-provvista ta' materja oħra, pereżempju il-Metalli tal-Grupp tal-Platinu u l-borati, hija iktar diversifikata iżda xorta waħda konċentrata. Ir-riskji assoċjati ma' din il-konċentrazzjoni ta’ produzzjoni huma amplifikati f'ħafna każijiet minħabba r-rati baxxi ta' sostitwibbiltà u ta' riċiklaġġ.

Materja prima || Produtturi prinċipali (2010, 2011, 2012) || Sorsi prinċipali tal-importazzjonijiet fl-UE (primarjament 2012) || Indiċi tas-sostituzzjonabbiltà* || Rata tal-input tar-riċiklaġġ fl-aħħar tal-ħajja

Antimonju (Stibju) || Iċ-Ċina 86 % || Iċ-Ċina 92% (mhux maħdum u f'forma ta' trab) || 0.62 || 11 %

Il-Bolivja 3 % || Il-Vjetnam (mhux maħdum u f'forma ta' trab) 3 %

It-Taġikistan 3 % || Il-Kirgiżistan 2% (mhux maħdum u f'forma ta' trab) Ir-Russja 2% (mhux maħdum u f'forma ta' trab)

Berillju || USA 90 % || USA, iċ-Ċina u l-Możambik[4] || 0.85 || 19 %

Iċ-Ċina 9 %

Il-Możambik 1 %

Borati || It-Turkija 41 % || It-Turkija 98 % (borati naturali) u 86 % (borati rfinuti) || 0.88 || 0 %

USA 33 % || USA 6%, il-Peru 2% (borati rfinuti); L-Arġentina 2% (borati naturali)

Kromju || L-Afrika t’Isfel 43 % || L-Afrika t’Isfel 80 % || 0.96 || 13 %

Il-Kazakistan 20 % || It-Turkija 16 %

L-Indja 13 % || Oħrajn 4 %

Kobalt (Kobaltu) || DRC 56 % ↑ || Ir-Russja 96 % (minerali sinterizzati u konċentrazzjonijiet tal-kobalt) || 0.71 || 16 %

Iċ-Ċina 6% Ir-Russja 6% Iż-Żambja 6 % || USA 3 % (minerali sinterizzati u konċentrazzjonijiet tal-kobalt)

Faħam tal-kokk || Iċ-Ċina 53 % || USA 41 % || 0.68 || 0 %

L-Awstralja 18 % || L-Awstralja 37 %

Ir-Russja 8% USA 8 % || Ir-Russja 9 %

Fluworospar (Fluworit) || Iċ-Ċina 56 % || Il-Messiku 48 % ↑ || 0.80 || 0 %

Il-Messiku 18 % || Iċ-Ċina 13 % ↓

Il-Mongolja 7 % || L-Afrika t’Isfel 12 % ↓

Gallju[5] || Iċ-Ċina 69 % (irfinut) || USA 49 % || 0.60 || 0 %

Il-Ġermanja 10 % (irfinut) || Iċ-Ċina 39 %

Il-Kazakistan 6 % (irfinut) || Ħong Kong 8 %

Ġermanju || Iċ-Ċina 59 % ↓ || Iċ-Ċina 47 % ↓ || 0.86 || 0 %

Il-Kanada 17 % || USA 35 %

USA 15 % || Ir-Russja 14 %

Indju || Iċ-Ċina 58 % || Iċ-Ċina 24 % ↓ || 0.82 || 0 %

Il-Ġappun 10 % || Ħong Kong 19 % ↑

Il-Korea 10 % || Il-Kanada 13 %

Il-Kanada 10 % || Il-Ġappun 11 %

Manjesit || Iċ-Ċina 69 % || It-Turkija 91 % || 0.72 || 0 %

Ir-Russja 6% Is-Slovakkja 6 % || Iċ-Ċina 8 %

Manjesju || Iċ-Ċina 86 % ↓ || Iċ-Ċina 91 % ↓ || 0.64 || 14%

Ir-Russja 5 % || L-Iżrael 5 %

L-Iżrael 4 % || Ir-Russja 2 %

Grafit naturali || Iċ-Ċina 68 % || Iċ-Ċina 57 % ↓ || 0.72 || 0%

L-Indja 14 % || Il-Brażil 15 %

Il-Brażil 7 % || In-Norveġja 9 %

Nijobju || Il-Brażil 92 % || Il-Brażil 86 % (Ferro-Nijobju) || 0.69 || 11%

Il-Kanada 7 % || Il-Kanada 14 % (Ferro-Nijobju)

Ġebla tal-fosfat || Iċ-Ċina 38 % || Il-Marokk 33% || 0.98 || 0%

USA 17 % || L-Algeria 13 %

Il-Marokk 15 % || Ir-Russja 11 %

Metalli tal-Grupp tal-Platinu || L-Afrika t’Isfel 61 % ↓ || L-Afrika t’Isfel 32 % ↓ || 0.83 || 35 %

Ir-Russja 27 % ↑ || USA, 22 % ↑

Iż-Żimbabwe 5 % || Ir-Russja 19 % ↓

Elementi Rari Terrestri Tqal || Iċ-Ċina 99 % || Iċ-Ċina 41 % (l-Elementi Rari Terresti kollha) Ir-Russja 35 % (l-Elementi Rari Terresti kollha) USA 17 % (l-Elementi Rari Terresti kollha) || 0.77 || 0%

L-Awstralja 1 %

Elementi Rari Terrestri Ħfief || Iċ-Ċina 87 % || 0.67 || 0%

USA 7 %

L-Awstralja 3 %

Metall tas-Siliċju (Siliċju) || Iċ-Ċina 56 % || In-Norveġja 38 % || 0.81 || 0%

Il-Brażil 11 % || Il-Brażil 24 %

USA 8%; In-Norveġja 8 % || Iċ-Ċina 8 %

Franza 6 % || Ir-Russja 7 %

Tungstenu (Wolframju) || Iċ-Ċina 85 % || Ir-Russja 98 % || 0.70 || 37%

Ir-Russja 4 % || Il-Bolivja 2 %

Il-Bolivja 2 %

Is-sitt elementi ta' materja prima kritika ġodda huma griżi skuri fit-tabella t'hawn fuq. B'differenza mir-rapport tal-2010, l-elementi terrestri rari tqal, l-elementi terrestri rari ħfief u l-iskandju ġew ivvalutati separatament, mhux bħala grupp wieħed ta' 'terrestri rari'. It-terrestri rari tqal u ħfief huma griżi ċari.

Għall-produtturi prinċipali u s-sorsi ewlenin ta' importazzjonijiet fl-UE, il-vleġeġ jindikaw żieda jew tnaqqis ta' madwar 10 punti perċentwali mir-rapport tal-2010 dwar il-materja prima kritika.

Noti:

(*) L-'Indiċi ta' Sostitwibbiltà' huwa kejl tad-diffikultà fis-sostituzzjoni tal-materjal, imkejjel u mogħti l-punti fl-applikazzjonijiet kollha. Il-valuri huma bejn 0 u 1, fejn 1 huwa l-inqas sostitwibbli.

(**) Ir-'rata tal-input tar-riċiklaġġ tal-Aħħar tal-Ħajja' tkejjel il-proporzjon tal-metall u l-prodotti tal-metall li huma prodotti minn materjal ta' skart tal-aħħar tal-ħajja u residwi oħra ta' grad baxx li fihom il-metall f'materjal ta' skart tal-aħħar tal-ħajja madwar id-dinja.

Sors: miġbura abbażi tar-rapport tal-2014 “Materja prima kritika għall-UE” mill-grupp ta’ ħidma ad hoc dwar id-definizzjoni ta’ materja prima kritika tal-Grupp tal-Provvista tal-Materja Prima.

[1] COM(2013) 442 final

[2] It-tliet pilastri huma: 1. Żgurar ta' provvista ġusta u sostenibbli ta’ materja prima mis-swieq globali; 2. Żgurar ta' provvista sostenibbli ta' materja prima fl-UE; 3. Tħeġġiġ tal-effiċjenza tar-riżorsi u żieda fl-ammont tar-riċiklaġġ. Il-Kummissjoni se tkompli tirrapporta permezz ta’ Dokumenti ta’ Ħidma tal-Persunal bħal dawn dwar l-implimentazzjoni tal-Inizjattiva dwar il-Materja Prima.

[3] COM(2011) 25 final, "Komunikazzjoni mill-Kummissjoni lill-Parlament Ewropew, il-Kunsill, il-Kumitat Ekonomiku u Soċjali Ewropew u l-Kumitat tar-Reġjuni – Naffrontaw l-isfidi fis-swieq tal-prodotti bażiċi u dawk marbuta mal-materja prima".

[4] Suġġett għal varjazzjonijiet qawwijin.

[5] Il-gallju huwa prodott sekondarju; l-aħjar dejta disponibbli tirreferi għall-kapaċità tal-produzzjoni, mhux għall-produzzjoni nfisha.