RAPPORT TAL-KUMMISSJONI LILL-PARLAMENT EWROPEW U LILL-KUNSILL dwar l-Istat tas-Suq tat-Trasport bit-Triq tal-Unjoni /* COM/2014/0222 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL dwar l-Istat tas-Suq tat-Trasport bit-Triq
tal-Unjoni
1.
Introduzzjoni
Skont
l-Artikolu 17(3) tar-Regolament (KE) Nru 1072/2009 dwar
l-aċċess għas-suq internazzjonali tat-trasport bit-triq tal-merkanzija[1]: "Il-Kummissjoni
għandha tfassal rapport dwar l-istat tas-suq Komunitarju tat-trasport
bit-triq sal-aħħar tal-2013. Ir-rapport għandu jkun fih
analiżi tas-sitwazzjoni tas-suq, inkluż evalwazzjoni tal-effettività
tal-kontrolli, u l-evoluzzjoni tal-kondizzjonijiet tal-impjieg fil-professjoni,
kif ukoll valutazzjoni dwar jekk l-armonizzazzjoni tar-regoli fl-oqsma, inter
alia, tal-infurzar u tat-tariffi għall-utenti tat-toroq, kif ukoll
il-leġislazzjoni soċjali u dwar is-sigurtà, ipprogressawx tant li
jkun previst aktar ftuħ tas-swieq tat-trasport bit-triq domestiku,
inkluż il-kabotaġġ." Dan ir-rapport iwieġeb
għal din it-talba. Jiġbor flimkien evidenza minn diversi studji[2], u
juża l-istatistika dwar it-trasport tal-merkanzija bit-triq miġbura
mill-Eurostat[3],
kif ukoll l-informazzjoni dwar ir-regoli soċjali[4]
fit-trasport tal-merkanzija bit-triq miġbura mill-Istati Membri. Dan
ir-rapport jibbaża wkoll fuq ir-Rapport tal-Grupp ta' Livell Għoli
dwar l-Iżvilupp tas-Suq tat-Trasportaturi Stradali tal-UE tad-19 ta' Ġunju 2012[5]. Iqis
ukoll ir-riżultati tal-konsultazzjoni estensiva mal-partijiet interessati
li saret qabel u wara l-abbozzar tar-rapport tal-Grupp ta' Livell Għoli.
Fl-aħħar nett, isegwi l-identifikazzjoni mill-Kummissjoni
tal-bżonn għal reviżjoni tar-Regolamenti (KE) Nru 1071/2009
u (KE) Nru 1072/2009 skont l-eżerċizzju REFIT[6].
2.
Żvilupp tas-Suq tat-Trasport tal-Merkanzija
bit-Triq
2.1.
L-Attività tat-Trasport tal-Merkanzija bit-Triq
It-trasport tal-merkanzija bit-triq huwa
l-mezz ewlieni ta' trasport intern fl-UE, li kif jidher fil-Grafika 1,
jammonta għal aktar minn 70 % tal-attività kollha ta' trasport
intern. L-użu totali tat-toroq fit-trasport intern tal-merkanzija baqa'
pjuttost stabbli matul l-aħħar għaxar snin.
Grafiki
1 u 2: Qasma Modali fit-Trasport Intern tal-Merkanzija fl-UE27 fl-2012
(xellug); Trasport tal-Merkanzija bit-Triq fl-UE27 fl-2012 skont it-Tip ta'
Trasport (lemin). Sors: Eurostat, DĠ MOVE. Fl-2012,
it-trasport bit-triq fl-UE27 iġġenera qrib l-1 700 biljun
tunnellata-kilometru, madwar 4 % inqas mill-2004 u bejn wieħed u
ieħor 13 % inqas mis-sena kruċjali tal-2007. L-operazzjonijiet
nazzjonali ta' trasport imwettqa minn vetturi rreġistrati domestikament
jammontaw għal madwar żewġ terzi tal-attivitajiet kollha ta'
trasport. L-operazzjonijiet nazzjonali ta' trasport imwettqa minn vetturi
rreġistrati fi Stat Membru ieħor (li huwa kabotaġġ)
jammontaw biss għal kemxejn aktar minn 1 % tal-attività totali ta'
trasport. Is-sehem tal-operazzjonijiet internazzjonali ta' trasport żdied
matul l-aħħar għaxar snin, minn 30 % tal-attivitajiet
kollha tat-trasport tal-merkanzija bit-triq fl-2004 għal 33 %
fl-2012. Dan huwa sinjal ta' suq uniku dejjem aktar integrat fl-UE. Erba' minn
kull ħames attivitajiet internazzjonali ta' trasport jitwettqu minn
vetturi li huma rreġistrati fl-Istat Membru tat-tagħbija jew fl-Istat
Membru tal-ħatt. Waħda minn kull ħames attivitajiet titwettaq
minn vetturi li huma rreġistrati f'pajjiż terz (jiġifieri
kummerċ bejn pajjiż u ieħor), li jfisser li kien hemm żieda
mill-2004 peress li l-ammont ta' vetturi rreġistrati kien ta' madwar
waħda minn kull tmienja. Is-sehem tal-kummerċ bejn pajjiż u
ieħor fl-attivitajiet kollha ta' trasport tal-merkanzija bit-triq
żdied minn 4 għal 7 % bejn l-2004 u l-2012 (ara wkoll il-Grafika
2 ta' hawn fuq). Peress li
l-kummerċ bejn pajjiż u ieħor żdied b'aktar minn 80 %
bejn l-2004 u l-2012, dan ifisser li huwa l-aktar segment li ra żieda
fis-suq tat-trasport tal-merkanzija bit-triq. Dan jibbenefika mill-fatt li
l-attivitajiet internazzjonali ta' trasport huma kompletament illiberalizzati
fl-UE. Anke l-attivitajiet ta' kabotaġġ żdiedu (b'madwar
50 %) iżda għadhom relattivament baxxi. Il-kabotaġġ
huwa ddefinit fir-Regolament (KE) Nru 1072/2009 bħala "trasport
nazzjonali għall-kiri jew għall-kumpens imwettaq fuq bażi
temporanja fi Stat Membru ospitanti". Dan huwa limitat għal tliet
operazzjonijiet ta' kabotaġġ fis-sebat ijiem ta' wara t-trasport
internazzjonali. Iż-żieda b'saħħitha fl-attivitajiet ta'
kabotaġġ hija parzjalment minħabba t-tneħħija fl-2009
u fl-2012 ta' restrizzjonijiet tranżitorji speċjali fuq
it-trasportaturi mill-biċċa l-kbira tal-pajjiżi li ssieħbu
mal-UE fl-2004 u fl-2007 rispettivament. Kif jidher
fil-grafiki 3 u 4, f'termini assoluti, it-trasportaturi tal-UE-15[7]
għadhom iwettqu l-maġġoranza tal-kabotaġġ (51 %),
l-aktar fl-Istati Membri ġirien tal-Istat Membru ta' reġistrazzjoni
tal-vettura. L-aktar swieq importanti ta' kabotaġġ huma s-swieq kbar
tat-trasport li jinsabu fiċ-ċentru (il-Ġermanja u Franza).
F'seba' mill-aqwa għaxar Stati Mmebri ospitanti
għall-kabotaġġ, il-maġġoranza tal-kabotaġġ
jitwettaq minn vetturi rreġistrati f'pajjiż tal-UE-15.
It-trasportaturi tal-UE-12 huma marbuta li jwettqu relattivament aktar
attivitajiet ta' trasport barra s-swieq domestiċi tagħhom peress li
s-swieq nazzjonali tagħhom ta' trasport tal-merkanzija bit-triq huma
pjuttost żgħar. Franza waħedha għandha aktar attività
nazzjonali ta' trasport tal-merkanzija bit-triq mit-12-il Stat Membru kollha li
ssieħbu mal-UE fl-2004 u l-2007. Grafiki
3 u 4: Kabotaġġ fl-UE fl-2012 skont l-Oriġini tal-Vettura
(xellug) u skont il-Pajjiż Ospitanti (lemin). Sors: Eurostat, DĠ
MOVE. Fl-2012, madwar
15 % tal-attività totali ta' trasport tal-merkanzija bit-triq kienet ta'
trasport proprju u l-85 % li jifdal kienet f'isem ħaddieħor.
L-attivitajiet ta' trasport f'isem ħaddieħor jitwettqu mis-settur ta'
trasport tal-merkanzija bit-triq fl-UE kif definiti fl-istatistiċi
tan-negozju filwaqt li l-attivitajiet ta' trasport proprju jitwettqu minn
setturi ekonomiċi oħra għall-finijiet tagħhom stess.
L-operazzjonijiet ta' trasport proprju huma aktar importanti fit-trasport
nazzjonali milli f'dak internazzjonali. Bħala
regola ġenerali, l-operazzjonijiet ta' trasport proprju mhumiex
aċċessibbli għall-operaturi attivi fil-kabotaġġ jew
f'kummerċ bejn pajjiż u ieħor. L-operazzjonijiet ta' trasport
f'isem ħaddieħor biss huma rilevanti f'dan il-kuntest.
Għaldaqstant, ir-rata ta' penetrazzjoni ta' kabotaġġ tqis biss
is-segment tas-suq li jirreferi għat-trasport f'isem ħaddieħor.
Id-dejta tal-Eurostat tissuġġerixxi li fl-2012 il-medja ta' vetturi
barranin fl-UE-27 kienet tammonta għal 2,5 % tas-suq totali ta'
trasport nazzjonali f'isem ħaddieħor, filwaqt li l-vetturi
domestiċi jirrappreżentaw is-97,5 % li jifdal. Filwaqt li
ġie ssuġġerit li d-dejta tal-Eurostat ma tqisx
biżżejjed il-livelli attwali ta' kabotaġġ, ir-rapporti ta'
infurzar mill-Istati Membri ma jurux livelli għolja ta' kabotaġġ
mhux identifikat (ara t-taqsima 4.2). Barra minn hekk, l-istatistika
tal-Eurostat hija l-aktar dejta komprensiva u komparabbli disponibbli, peress
li hija r-riżultat ta' ġabra ta' dejta uffiċjali mwettqa
mill-Uffiċċji Nazzjonali tal-Istatistika u rrappurtata lill-Eurostat
skont l-istandards miftiehma.
2.2.
Struttura tal-Kumpanija u Impjiegi
Is-suq
tat-trasport tal-merkanzija bit-triq fl-UE jikkonsisti f'madwar 600 000
intrapriża, li l-biċċa l-kbira tagħhom huma
żgħar, b'daqs medju ta' erba' impjegati għal kull kumpanija. Dan
in-numru baqa' stabbli matul dawn l-aħħar snin, bi 80 %
tal-kumpaniji li għandhom inqas minn 10 impjegati, filwaqt li
99 % għandhom inqas minn 50 impjegat. Fl-2011, is-settur tat-trasport
tal-merkanzija bit-triq impjega madwar tliet miljun persuna. Ta' min jinnota li
dawn iċ-ċifri jkopru biss kumpaniji u persuni attivi fit-trasport
tal-merkanzija bit-triq f'isem ħaddieħor, u b'hekk mhumiex
inklużi dawk li jwettqu trasport proprju. Xejra fuq medda twila ta'
żmien turi li l-burdnara u l-integraturi tal-merkanzija (jiġifieri,
persuna jew kumpanija li torganizza vjaġġi għal partijiet terzi)
għandhom rwol dejjem akbar fl-organizzazzjoni ta' dawn il-movimenti. Matul it-tnaqqis
fir-ritmu ekonomiku, naqsu l-marġni ta' profitt kemm fis-settur
tal-loġistika kif ukoll fis-settur tat-trasport tal-merkanzija bit-triq.
L-operazzjonijiet li jħallu inqas profitt qed jiġu subkuntrattati
dejjem aktar lil negozji żgħar, u dan wassal għal żieda
fil-konnessjonijiet tal-katina tal-loġistika[8].
Ħafna kumpaniji ta' trasport jitqiesu vulnerabbli mil-lat tas-sitwazzjoni
finanzjarja tagħhom (sa terz mill-kumpaniji Franċiżi ta'
trasport tal-merkanzija bit-triq skont il-Banque de France[9]). Madankollu,
l-ostakli pjuttost baxxi ta' dħul biex wieħed iniedi kumpanija ta'
trasport ifissru li l-kumpaniji li joħorġu mis-suq b'mod regolari,
jerġgħu jidħlu fih jew jiġu mibdula b'impriżi
ġodda. Minkejja l-klima ekonomika xejn favorevoli, l-għadd ta'
liċenzji tal-Komunità maħruġa pereżempju fi Spanja,
żdied bejn l-2010 u l-2012 (minn qrib is-26 000 fl-aħħar
tal-2010 għal aktar minn 27 000 fl-aħħar tal-2012). Dan
juri n-natura reżiljenti tas-settur, li jidher li jadatta ruħu malajr
għall-bidliet u l-iżviluppi ekonomiċi. Xi partijiet
interessati[10]
ddikjaraw li l-kompetizzjoni maħluqa minn trasportaturi mill-Istati Membri
b'bażi tal-kost iktar baxx u li joperaw fi swieq domestiċi permezz
tal-kabotaġġ, waslet għal telf ta' xogħlijiet. Din
id-dikjarazzjoni mhix appoġġata bid-dejta disponibbli fir-rigward
tal-impjiegi fis-settur. L-impjiegi fis-settur ta' trasport tal-merkanzija
bit-triq żdiedu mill-2005 sal-2011, b'ċertu tnaqqis li seħħ
mill-2009 sal-2010. Għalkemm hemm bżonn ta' aktar riċerka dwar
il-firxa tat-telf ta' xogħlijiet fil-livell ta' Stat Membru, l-ewwel
konklużjoni tindika li dan it-tnaqqis huwa marbut mal-kriżi ekonomika
flimkien mal-età medja għolja tas-sewwieqa. Fl-2011, iċ-ċifri
dwar l-impjiegi fis-settur ta' trasport tal-merkanzija bit-triq tal-UE27
laħqu, għal darba oħra, il-livelli ta' qabel il-kriżi.
Għaldaqstant, l-ebda evidenza oġġettiva ma tindika li
l-operazzjonijiet ta' kabotaġġ, li jirrappreżentaw perċentwal
żgħir ħafna tat-trasport domestiku, kellhom impatt notevoli fuq
ix-xogħlijiet tas-sewwieqa tat-trakkijiet.
2.3.
Żviluppi fil-Produttività
2.3.1.
Produttività tax-xogħol
Kif jidher
fit-Tabella 1, il-produttività tax-xogħol fis-settur tat-trasport bl-art
hija inqas mill-medja tal-ekonomija totali u l-inqas fost il-mezzi kollha ta'
trasport. Barra minn hekk, dan huwa l-uniku mezz ta' trasport li fih qed tonqos
il-produttività. Hemm bżonn ta' aktar informazzjoni ddettaljata dwar
il-livelli ta' produttività fis-settur tat-trasport tal-merkanzija bit-triq.
Hemm bżonn ukoll ta' aktar riċerka biex jiġi ddeterminat
l-impatt tal-kompetizzjoni fuq il-livelli ta' produttività tax-xogħol
fit-trasport tal-merkanzija bit-triq. Studji li twettqu f'setturi differenti
juru li fl-ekonomija inġenerali, il-produttività tax-xogħol hija
ogħla f'segmenti miftuħa għall-kompetizzjoni internazzjonali
(f'dan il-każ, it-trasport internazzjonali) milli f'dawk li
fil-biċċa l-kbira tagħhom huma magħluqa
għall-kompetizzjoni internazzjonali (f'dan il-każ, it-trasport
nazzjonali). Il-livelli ta' produttività jistgħu jkunu sa 15 % inqas
f'setturi li mhumiex miftuħa għall-kompetizzjoni internazzjonali[11].
Għalhekk, sabiex ikun hemm żidiet simili fil-produttività,
wieħed jista' jistenna l-ftuħ tas-swieq ta' trasport tal-merkanzija
bit-triq għall-kompetizzjoni internazzjonali. Wara
l-kriżi ekonomika, il-biċċa l-kbira tal-Istati Membri
rreġistraw tnaqqis fil-produttività. Dan huwa konsistenti
mal-iżviluppi fl-ekonomija tal-UE matul dak il-perjodu. Matul tnaqqis
fir-ritmu ekonomiku, il-produzzjoni ekonomika tonqos aktar malajr mill-impjiegi
u dan iwassal għal tnaqqis fil-produttività. L-ekonomija tal-UE
inġenerali rreġistrat żieda baxxa ħafna ta' 0,6 %
fil-produttività matul il-perjodu 2008-11[12].
Għad hemm differenzi kbar fil-livelli ta' produttività tax-xogħol
bejn l-Istati Membri, li jirriżultaw f'differenzi fil-livelli
tal-prezzijiet fl-istess Stati Membri. || || Trasport bl-Art || Trasport bl-Ilma || Trasport bl-Ajru || Ħżin, attivitajiet ta' appoġġ || Settur tat-Trasport || Ekonomija totali Produttività tax-xogħol, 2010 || EUR għal kull persuna impjegata || 45 000 || 144 000 || 63 000 || 67 000 || 55 000 || 49 000 Tkabbir medju annwali fil-produttività tax-xogħol, 2001/2010 || % || -0,2 || +7,5 || +3,2 || +1,2 || +1,0 || +0,9 Tabella 1:
Produttività tax-Xogħol fis-Settur tat-Trasport u fl-Ekonomija
Inġenerali. Sors: Il-Kontijiet Nazzjonali tal-Eurostat u l-Istatistika
Strutturali tan-Negozju.
2.3.2.
Produttività tal-vetturi
Minħabba
żbilanċi fil-flussi ta' trasport u l-prattiki tal-loġistika,
huwa inevitabbli li fit-trasport tal-merkanzija bit-triq isiru vjaġġi
mingħajr tagħbija. Dawn il-vjaġġi għandhom jitnaqqsu
kemm jista' jkun, minħabba l-effetti mhux mixtieqa tal-vjaġġi
mingħajr tagħbija fuq il-konsum tal-fjuwil, l-emissjonijiet tad-CO2
u l-ispejjeż. Il-livelli tal-vjaġġi mingħajr tagħbija
naqsu kemxejn matul dawn l-aħħar snin minħabba (żieda
kajmana fl-effiċjenza) li bil-mod il-mod qed tiżdied
l-effiċjenza fl-organizzazzjoni tal-attivitajiet ta' trasport. Minkejja
dan, fl-2012, kważi kwart (23,2 %) tat-total ta' vetturi-km
b'merkanzija tqila fl-UE kienu jinvolvu vettura mingħajr tagħbija[13].
Għalkemm ma teżisti l-ebda evidenza statistika affidabbli dwar
il-livell ta' tagħbija ta' vetturi oħra, huwa mistenni li hemm
għadd sostanzjali ta' vetturi li huma parzjalment mgħobbija. Il-livelli
tal-vjaġġi mingħajr tagħbija jibqgħu għoljin
fl-attivitajiet nazzjonali ta' trasport. Ir-rata tal-vjaġġi
mingħajr tagħbija għat-trasportaturi domestiċi li jwettqu
trasport nazzjonali hija kemxejn aktar minn 25 %. Madankollu, f'każ
ta' trakkijiet barranin li jagħmlu vjaġġi nazzjonali fi Stat
Membru ieħor minbarra dak li jkunu rreġistrati fih, din ir-rata
tiżdied għal madwar 50 %. Vetturi speċjalizzati (bħal
prodotti ffriżati ttrasportati fi trakkijiet refriġerati, likwidi
ttrasportati f'tankijiet jew skart ittrasportat minn vetturi
għall-ġbir tal-iskart) ta' spiss ikunu mgħobbija parzjalment jew
mingħajr tagħbija minħabba d-diffikultà li jsibu
vjaġġi bir-ritorn għal vjaġġi speċjalizzati.
Madankollu, il-vjaġġi ta' kabotaġġ normalment jinvolvu merkanzija
ġenerali ttrasportata bi trejlers jew kontejners li għandhom
il-purtieri fil-ġnub. Għalhekk, il-livell għoli ta'
vjaġġi mingħajr tagħbija probabbilment mhuwiex
minħabba d-diffikultà li tinstab tagħbija bir-ritorn, peress li hija
disponibbli aktar faċilment fit-trasport ġenerali. Għaldaqstant,
l-operaturi tat-trasport jidhru li huma limitati bir-restrizzjonijiet
applikabbli għall-operazzjonijiet ta' kabotaġġ u ma
jistgħux jorganizzaw l-operazzjonijiet ta' trasport tagħhom b'mod
effiċjenti. Analiżi tal-livelli
tal-vjaġġi mingħajr tagħbija fis-segmenti differenti
tas-suq turi li s-segmenti li huma esposti għall-kompetizzjoni,
jiġifieri t-trasport internazzjonali, (il-kummerċ bejn pajjiż u
ieħor u t-trasport tal-merkanzija internazzjonali u bilaterali) għandhom
livelli aktar baxxi ta' vjaġġi mingħajr tagħbija[14] minn
segmenti tas-suq li għadhom suġġetti għal restrizzjonijiet
operattivi, kif jidher fil-Grafika 5. Grafika 5:
Sehem ta' Vetturi-km Mingħajr Tagħbija fit-Total ta' Vetturi-km skont
it-Tip ta' Trasport fl-2012. Skont dejta provduta fl-2012 minn
21 pajjiż fost is-27 pajjiż tal-UE (l-ebda dejta disponibbli
minn BE, IT, CY, MT, RO u UK). Sors: Eurostat, DĠ MOVE. L-impatt
pożittiv tal-ftuħ tas-suq dwar il-livelli ta' tagħbija jidher
ukoll fl-effett tat-tneħħija ta' restrizzjonijiet
għall-aċċess fuq trasportaturi mill-Istati Membri li
ssieħbu mal-UE fl-2004 u l-2007. Meta fl-2009 u l-2012 tneħħew
ir-restrizzjonijiet ta' kabotaġġ imposti fuqhom, is-sehem
tagħhom ta' vetturi-km mingħajr tagħbija naqas b'mod sinifikanti
(ara l-Grafika 6 ta' hawn taħt). Madankollu, ma jidhirx li
r-Regolament (KE) Nru 1072/2009 kellu impatt pożittiv fuq il-livelli
ġenerali tal-vjaġġi mingħajr tagħbija
f'sitwazzjonijiet ta' kabotaġġ. Qabel l-adozzjoni tar-Regolament (KE)
Nru 1072/2009, f'diversi Stati Membri kienu stabbiliti
dispożizzjonijiet aktar permissivi[15].
Wara d-dħul fis-seħħ tad-dispożizzjonijiet ta'
kabotaġġ tar-Regolament (KE) Nru 1072/2009 f'Mejju tal-2010,
il-livell ġenerali tal-vjaġġi mingħajr tagħbija waqt
vjaġġi f'pajjiżi barranin naqas b'rata ħafna inqas
mgħaġġla minn qatt qabel u baqa' għoli kważi d-doppju
tal-livell ta' vetturi domestiċi fit-trasport nazzjonali. Għalkemm
għandhom jitqiesu żviluppi oħra bħall-kriżi ekonomika,
dan għandu jissuġġerixxi li r-restrizzjonijiet attwali dwar
l-operazzjonijiet ta' kabotaġġ qed jillimitaw it-trasportaturi
fiż-żieda ulterjuri tal-effiċjenza tagħhom. Għalhekk,
il-ftuħ ulterjuri tas-suq jista' jkun mistenni li jnaqqas b'mod raġonevoli
l-livelli tal-vjaġġi mingħajr tagħbija fit-trasport
domestiku. Madankollu, il-potenzjal għat-tnaqqis fil-livelli
tal-vjaġġi mingħajr tagħbija għandu jiġi vvalutat
fid-dawl tar-riskju tad-domanda tat-trasport bit-triq, li jista' jinħoloq
jekk iż-żieda fl-offerta tat-trasport bit-triq tiskatta tnaqqis
sinifikanti fil-prezzijiet tat-trasport bit-triq[16].
F'każijiet bħal dawn, is-settur tat-trasport tal-Istati Membri
b'livelli ogħla ta' spejjeż jista' jiġi affettwat ħafna
iktar, anke permezz ta' bidla modali. Minkejja dan, ta' min jinnota li
t-tnaqqis fil-prezzijiet tat-trasport bit-triq ikun ta' benefiċċju
għall-utenti tas-servizzi tat-trasport u għall-konsumaturi[17]. Fatturi
oħra jistgħu jgħinu biex inaqqsu l-emissjonijiet ġenerali
tad-CO2 u jtejbu l-effiċjenza tal-fjuwil
tal-vetturi, inkluż l-iżvilupp ta' metodoloġiji ta' kejl tad-CO2
u tal-konsum tal-fjuwil, bħal dik li se tiġi ppreżentata
mill-Kummissjoni fil-Komunikazzjoni li jmiss dwar
strateġija għat-tnaqqis tal-konsum tal-fjuwil u tal-emissjonijiet
tad-CO2 f'vetturi b'merkanzija tqila. Grafika 6:
Evoluzzjoni tas-sehem ta' vetturi-km mingħajr tagħbija fi
vjaġġi li jsiru f'pajjiżi barranin bejn l-2007 u l-2012 minn
grupp ta' Stati Membri fejn il-vettura kienet irreġistrata. Skont dejta
provduta fl-2012 minn 20 pajjiż fost is-27 pajjiż tal-UE fl-2012
(l-ebda dejta disponibbli minn BE, IT, CY, LU, MT, RO u UK). Sors: Eurostat,
DĠ MOVE.
3.
Evoluzzjoni tal-Istrutturi tal-Ispejjeż
fis-Settur tat-Trasport tal-Merkanzija bit-Triq
3.1.
Fatturi ta' Spiża: Ħarsa ġenerali
Il-livelli
tal-ispejjeż huma wieħed mill-fatturi ewlenin li jiddeterminaw
il-kompetittività fis-settur ta' trasport tal-merkanzija bit-triq. Fatturi
oħra jinkludu l-ispeċjalizzazzjoni u l-kwalità tas-servizz. Filwaqt
li wħud minn dawn l-ispejjeż huma marbuta mill-qrib mal-Istat Membru
tal-istabbiliment, (b'mod partikolari l-ispejjeż tar-reġistrazzjoni u
ż-żamma tal-vettura, it-tassazzjoni tal-kumpanija u l-ispiża
tal-kapital) oħrajn huma varjabbli u dipendenti fuq l-Istat Membru
tal-operazzjoni (it-tariffi għall-utenti tat-toroq jew it-taxxi fuq
il-fjuwil). Minħabba l-eżistenza ta' kumpens ibbażat fuq
id-distanza u leġiżlazzjoni nazzjonali li f'ċerti każijiet
jistgħu jwasslu għall-allinjament tal-pagi mal-istandards minimi
fl-Istat Membru tal-operazzjoni[18],
l-ispejjeż tax-xogħol jistgħu, sa ċertu punt, jingħaddu
ma' din il-kategorija. Bil-fjuwil, ix-xogħol huwa wieħed
miż-żewġ fatturi ewlenin ta' spiża għas-sewwieqa
fis-settur ta' trasport tal-merkanzija bit-triq. Sabiex tiġi ddeterminata
l-influwenza tal-possibbiltà ta' ftuħ tas-suq ulterjuri fuq l-istruttura
tas-settur tat-trasport tal-merkanzija bit-triq, jeħtieġ li tiġi
mqabbla l-istruttura tal-ispejjeż tal-industrija fl-UE kollha.
L-armonizzazzjoni tal-istrutturi u l-livelli tal-ispejjeż la huma objettiv
tal-politiki tal-UE u lanqas kompetenza tal-UE. Madankollu, ġie allegat li
l-ftuħ tas-suq jista' jwassal għal riżultati mhux
iġġustifikati jekk il-pressjoni kompetittiva twassal għal nuqqas
ta' konformità mar-regoli soċjali, bħall-ħin ta' sewqan u l-perjodi
ta' mistrieħ, li min-naħa tagħhom joħolqu riskju
għas-sikurezza stradali. Dan it-tip ta' żvilupp imur kontra
l-għanijiet tal-politika tal-UE dwar it-trasport. L-istrutturi
tal-ispejjeż qed isiru dejjem aktar simili fis-settur kollu tat-trasport
tal-merkanzija bit-triq. L-importanza relattiva taż-żewġ fatturi
ewlenin tal-ispejjeż (l-ispejjeż tax-xogħol u tal-fjuwil)
laħqet livelli kumparabbli mal-UE kollha. Filwaqt li fl-2004
l-ispejjeż tax-xogħol kienu jirrappreżentaw minn 10 % sa
30 % tal-ispejjeż totali tal-Istati Membri li ssieħbu mal-UE
fl-istess sena, dawn kibru b'tali mod li saru jirrappreżentaw minn
20 % sa 40 % tal-ispejjeż f'dawn l-Istati Membri. F'termini
assoluti, l-ispejjeż tax-xogħol fl-Istati Membri li ssieħbu
mal-UE fl-2004 u l-2007 għadhom inqas minn dawk tal-Istati Membri
tal-UE-15, iżda din id-differenza qiegħda tonqos b'mod konsistenti.
Il-varjazzjonijiet tal-ispejjeż relatati mal-fjuwil ivarjaw minn 24 %
sa 38 % tal-ispejjeż totali. Grafika 7:
Tqassim tal-Ispejjeż tat-Trasportaturi minn Ċerti Stati Membri. Sors:
"Collection and Analysis of Data on the Structure of the Road Haulage
Sector in the European Union", AECOM, 2013. Barra minn hekk,
l-armonizzazzjoni baqgħet għaddejja f'oqsma oħra ta' kompetenza
tal-UE b'influwenza fuq spejjeż operattivi ta' impriżi ta' trasport
tal-merkanzija bit-triq, bħal nollijiet tat-triq. Dawn l-iżviluppi
huma spjegati aktar fid-dettall fit-taqsima 6 ta' dan id-dokument.
3.2.
Żviluppi fl-Ispejjeż tax-Xogħol
Ir-remunerazzjoni
fis-settur tat-trasport tal-merkanzija bit-triq ġeneralment tinqasam
f'komponenti differenti tal-ispejjeż. Il-pagi ta' kull xahar huma ffissati
fir-rigward tal-pagi minimi jew tal-ftehim kollettiv[19].
Il-livelli medji tal-pagi jvarjaw skont it-tip ta' trasport (nazzjonali jew
internazzjonali) li jitwettaq, b'rati għat-trasport internazzjonali
ogħla minn dawk għat-trasport nazzjonali. Barra minn dawn
il-varjazzjonijiet, ġeneralment jiżdiedu forom oħra ta'
remunerazzjoni sabiex jiġu stabbiliti l-livelli tal-pagi, bl-iktar komuni
jkunu s-sussidji ta' kuljum (per diems) u l-bonuses ibbażati fuq
id-distanza[20].
Minħabba l-importanza tal-ispejjeż tax-xogħol fl-istrutturi
tal-ispejjeż tat-trasportaturi operattivi, id-differenzi fil-livelli
tal-pagi jistgħu jħallu impatt fuq il-prattiki ta' negozju
fis-settur. Kumpaniji jistgħu jgħaddu l-attivitajiet tagħhom lil
Stati Membri oħra b'inqas spejjeż tax-xogħol. Jekk jitwettqu
f'konformità mar-rekwiżiti tal-istabbiliment stipulati fir-Regolament (KE)
Nru 1071/2009, il-prattika tad-delokalizzazzjoni tal-attivitajiet tista'
tikkontribwixxi għall-flussi ta' investiment transfruntiera u
ssaħħaħ l-integrazzjoni tas-suq ta' trasport tal-UE. Madankollu,
ċerti każijiet ta' delokalizzazzjoni (bħall-każijiet fejn
l-attività titwettaq biss fi Stat Membru wieħed minbarra dak
tar-reġistrazzjoni) jistgħu jkunu sinjal ta' evitar intenzjonat ta'
taxxi u tariffi tax-xogħol. Għalkemm
is-sitwazzjoni tas-swieq individwali trid tiġi vvalutata f'aktar dettall,
hemm indikazzjonijiet li l-livell ta' differenzi fil-pagi qed jonqos b'tali mod
li jittaffa r-riskju ta' mġiba illegali[21].
Minkejja dan, iridu jitkomplew l-isforzi biex jitjieb l-infurzar. Filwaqt li
għad fadal xi differenzi, il-livelli assoluti tal-ispejjeż
tax-xogħol qed jiżdiedu b'rata aktar mgħaġġla
fl-Istati Membri li ssieħbu mal-UE fl-2004 u l-2007. Meta jitqiesu l-elementi
kollha ta' remunerazzjoni, il-pagi tas-sewwiqa Rumeni fit-trasport
internazzjonali jidhru li qed jilħqu l-istess livelli tat-trasportaturi
Spanjoli (EUR 4-5/fis-siegħa)[22].
Kif jidher fil-Grafika 8, dawn l-evoluzzjonijiet huma konformi
mal-konverġenza tal-livelli medji tal-pagi fl-UE. B'riżultat ta' dan,
id-differenzi fil-livelli tal-pagi fis-settur tat-trasport tal-merkanzija
bit-triq huma paragunabbli mad-differenzi fil-pagi medji fl-UE u fl-ekonomija
kollha. Il-Grafika ta' hawn taħt turi ż-żieda relattiva fil-pagi
tal-ħaddiema mill-UE-12 mqabbla ma' dawk tal-UE-15. Grafika 8:
Evoluzzjoni tal-Indiċi tal-Kost Lavorattiv tal-Ekonomija tan-Negozju
fl-Istati Membri tal-UE-15 u l-UE-12 mill-2004. Sors: Eurostat, DĠ MOVE. Kif jidher hawn fuq, id-differenzi fil-livelli
tal-pagi fis-settur tat-trasport tal-merkanzija bit-triq huma l-istess
bħad-differenzi medji fil-pagi bejn l-Istati Membri fl-ekonomija.
Madankollu, wieħed għandu jinnota li dawn id-differenzi jista'
jkollhom impatt akbar fuq il-kompetizzjoni ta' dan is-settur minħabba
n-natura mobbli tal-attivitajiet tat-trasport tal-merkanzija bit-triq.
Għall-kuntrarju ta' setturi oħrajn, is-servizzi ta' trasport
jistgħu jiġu provduti fi Stati Membri oħra fuq bażi
temporanja filwaqt li jinżammu parzjalment il-kundizzjonijiet tal-pagi
tal-Istat Membru ta' residenza. Madankollu, teżisti
leġiżlazzjoni tal-UE li f'xi każijiet iżżid
il-protezzjoni tal-ħaddiema mhux residenti li jipprovdu servizzi fuq
bażi temporanja fi Stati Membri oħra. Id-Direttiva 96/71/KE dwar
l-impjiegi tal-ħaddiema[23]
tapplika għas-sewwieqa, jekk jaqgħu fil-kamp ta' applikazzjoni
tad-Direttiva. Ir-Regolament (KE) Nru 593/2008 dwar l-obbligi kuntrattwali[24]
jistabbilixxi l-kriterji ġenerali li jiddeterminaw il-liġi
applikabbli għall-obbligi kuntrattwali. F'ċerti każijiet,
il-liġi li normalment tkun applikabbli għall-kuntratt tista'
titwarrab, sabiex tinbidel bir-regoli obbligatorji skont it-tifsira tad-dritt
internazzjonali privat li japplika fil-post fejn is-soltu jsir ix-xogħol
(l-Artikolu 8).
3.3.
Żviluppi fil-Livelli tal-Ispejjeż
tal-Fjuwil
L-ispejjeż
tal-fjuwil fl-UE segwew l-iżviluppi tal-prezzijiet taż-żejt mhux
raffinat fis-swieq internazzjonali u ma varjawx b'mod estensiv. Dan jista' jkun
parzjalment minħabba l-armonizzazzjoni gradwali li qed iseħħ
fit-tassazzjoni tal-prodotti tal-enerġija u l-elettriku fl-Unjoni Ewropea,
li hija rregolata mid-dispożizzjonijiet tad-Direttiva tal-Kunsill
2003/96/KE (id-'Direttiva dwar it-Tassazzjoni fuq l-Enerġija')[25].
L-istruttura tad-dazji tas-sisa fuq il-fjuwil hija armonizzata: id-Direttiva
tistabbilixxi, fost l-oħrajn, livelli minimi ta' taxxa fuq il-prodotti
tal-enerġija użati bħala fjuwil tal-magni. Madankollu, l-Istati
Membri huma liberi li jistabbilixxu r-rati nazzjonali tagħhom ta' taxxa
kif iridu huma. Ir-rati nazzjonali ta' taxxa jvarjaw minn Stat Membru
għall-ieħor. L-ispejjeż tal-fjuwil huma l-inqas fil-Lussemburgu
u l-ogħla fir-Renju Unit. Grafika 9:
Spejjeż Tipiċi tad-Diżil għal kull 1,000 Litru skont
l-Istat Membru (Jannar 2014). Sors: Il-Bulettin taż-Żejt
tal-Osservatorju tas-Suq, 2014, il-Kummissjoni Ewropea, DĠ Enerġija.
3.4.
Fatturi Oħra ta' Spiża
Barra minn dawn iż-żewġ
fatturi ewlenin ta' spiża, il-kumpaniji ta' trasport tal-merkanzija
bit-triq jidħlu fi spejjeż oħra bħal: –
Tariffi ta' darba relatati mal-istabbiliment
tal-impriża (inklużi x-xiri u r-reġistrazzjoni tal-vetturi); –
Taxxi perjodiċi dwar is-sjieda jew
iċ-ċirkolazzjoni tal-vetturi; –
Taxxi li ġejjin mill-użu tal-vetturi
(it-taxxa fuq l-introjtu, in-nollijiet tat-triq ibbażati fuq il-ħin
jew fuq id-distanza). Il-livell
relattiv ta' dawn l-ispejjeż jista' jħalli impatt fuq l-imġiba
tan-negozju. Differenzi sinifikanti fil-livelli tal-ispejjeż jistgħu
jħeġġu każijiet ta' delokalizzazzjoni illegali, li
min-naħa tagħhom, ipoġġu fi żvantaġġ
il-kumpaniji li jobdu l-liġi. Għalkemm il-livelli ta' tassazzjoni u
ta' tariffi għadhom ivarjaw, hemm indikazzjonijiet li l-ammont nett ta'
tarffi mħallsa għal kull vettura qed jilħaq livelli simili fl-UE
kollha. Għad hemm
differenzi fil-livelli tal-ispejjeż imposti fuq l-istabbiliment, fuq
ir-reġistrazzjoni tal-vettura u fuq l-ispejjeż ta'
ċirkolazzjoni. L-ispejjeż tal-istabbiliment ivarjaw minn spiża
ta' darba ta' madwar EUR 40 fir-Repubblika Ċeka sa aktar minn
EUR 1 000 fil-Bulgarija[26].
It-taxxi tal-vettura (kemm it-taxxi tar-reġistrazzjoni kif ukoll
tas-sjieda) ivarjaw ukoll bejn l-Istati Membri. Il-varjazzjoni fil-livelli
tat-tariffi ma timxix fuq id-differenzi bejn l-UE12 u l-UE15 li jistgħu
jiġu identifikati fil-każ tal-ispejjeż tax-xogħol.
Pereżempju, kif jidher fil-Grafika 10 ta' hawn taħt, it-taxxi
annwali tal-vetturi jvarjaw fuq firxa ta' 1 sa 10. Fost l-ogħla 10 Stati
Membri ta' taxxi annwali tal-vetturi, tlieta huma mill-UE-12 (ir-Repubblika
Ċeka, l-Ungerija u l-Bulgarija). Grafika 10:
Taxxa Annwali tal-Vetturi (€) għal Taħlita Standard ta'
Trattur/Semitrejler (2012), Sors: ACEA Tax Guide 2012. Mingħajr ma
ssir analiżi ddettaljata tal-livelli ta' differenza ta' kull komponent ta
spiża, huwa interessanti li wieħed jinnota li minkejja dawn
id-differenzi, il-livell medju ta' taxxi u tariffi fuq ir-rotot domestiċi
ma jidhirx li jvarja b'mod sinifikanti bejn l-Istati Membri. Skont il-kalkoli
tal-OECD li jidhru fil-Grafika 10, l-ammont nett ta' tariffi mħallsa
għal kull vettura-kilometru għandhom medja ta' EUR 0,18,
b'varjazzjonijiet relattivament żgħar bejn l-Istati Membri.
L-ogħla tariffi fl-UE jinġabru fil-Ġermanja (EUR 0,34vkm) u
l-inqas fil-Bulgarija, il-Lussemburgu, il-Latvja, il-Litwanja u r-Rumanija
(EUR 0,11/vkm). Grafika 11:
Ammont Nett ta' Tariffi Mħallsa għal kull Vettura-km (Trasport
Domestiku tal-Merkanzija, 2012). Sors: "Road Haulage Charges and Taxes.
Summary analysis and data tables 1998-2012", OECD 2013. Dan jista' jkun
parzjalment minħabba ż-żieda fl-użu mill-Istati Membri ta'
tariffi għall-utenti tat-toroq ibbażati fuq it-territorju (kemm jekk
huma vinjetti (vignettes) kif ukoll pedaġġi). Mill-adozzjoni u
r-reviżjoni sussegwenti tad-Direttiva 1999/62/KE dwar il-ħlas li
jrid isir minn vetturi ta' merkanzija tqila[27],
għadd dejjem jikber ta' Stati Membri daħlu fis-seħħ skemi
ta' tariffi għall-utenti tat-toroq. F'kuntest ta' strutturi
tal-ispejjeż konverġenti, it-trasportaturi tal-UE se jintalbu dejjem
aktar biex itejbu l-effiċjenza u l-kwalità tas-servizz tagħhom. Dan
it-titjib se jkun ta' benefiċċju għall-konsumaturi
tal-industrija tat-trasport tal-merkanzija bit-triq, b'mod partikolari
l-burdnara tal-merkanzija u l-industrija tal-bejgħ bl-imnut u permezz
tagħhom tiżdied l-effiċjenza u l-kompetittività tal-ekonomija
tal-UE inġenerali.
4.
Infurzar tad-Dispożizzjonijiet dwar
l-Aċċess tas-Suq ta' Trasport tal-Merkanzija bit-Triq
Ir-Regolamenti
(KE) Nru 1071/2009[28]
u 1072/2009 għandhom l-għan li jipprovdu l-impriżi
b'aċċess ġust għas-suq internazzjonali tat-trasport
tal-merkanzija bit-triq, inkluż il-forniment ta' kriterji addizzjonali
għall-awtoritajiet ta' infurzar biex jivverifikaw il-konformità ma' dawn
il-kundizzjonijiet. Huwa meħtieġ l-infurzar korrett ta' dawn
ir-Regolamenti biex jiġi żgurat li l-kumpaniji attivi fis-suq tat-trasport
tal-merkanzija bit-triq, ikunu affidabbli u jikkompetu fuq l-istess livell.
Minkejja dan, l-infurzar ta' wħud mid-dispożizzjonijiet tagħhom
jibqa' problematiku. Żewġ aspetti jiffurmaw partikolarment sors ta'
diffikultà għat-trasportaturi u l-awtoritajiet ta' infurzar: id-dispożizzjonijiet
dwar l-istabbiliment stabbli u effettiv, fil-każ tar-Regolament (KE)
Nru 1071/2009 u dawk dwar il-kabotaġġ fil-każ
tar-Regolament (KE) Nru 1072/2009.
4.1.
Infurzar tar-Regolament (KE) Nru 1071/2009
Ir-Regolament
(KE) Nru 1071/2009 dwar l-aċċess tal-professjoni ta' operatur
tat-trasport bit-triq ġabar flimkien diversi leġiżlazzjonijiet,
bil-għan li jissimplifika u jissupplimenta l-infurzar tagħhom. Dan
ir-Regolament daħħal fis-seħħ rekwiżiti addizzjonali,
b'mod partikolari, kriterju dwar l-istabbiliment stabbli u effettiv
għall-impriżi ta' trasport tal-merkanzija bit-triq,
dispożizzjonijiet għal format uniku tal-liċenzji tal-Komunità,
rekwiżiti speċifiċi għall-maniġers tat-trasport u
aktar kooperazzjoni bejn l-Istati Membri fil-qasam tal-infurzar (b'mod
partikolari permezz tal-interkonnessjoni tar-reġistri nazzjonali
tal-impriżi tat-trasport bit-triq, ERRU). Dawn il-bidliet
ikkontribwixxew għal aktar armonizzazzjoni, b'mod partikolari fir-rigward
tal-formati tal-liċenzji tal-Komunità. Madankollu, għad fadal xi jsir
biex titlesta l-implimentazzjoni ta' dan ir-Regolament, b'mod partikolari
permezz tal-interkonnessjoni sħiħa tal-ERRU. Xi rapporti puntwali
juru wkoll li f'ċerti Stati Membri għadhom jeżistu l-hekk imsejħa
'letterbox companies' (jiġifieri, kumpaniji "stabbiliti" fi Stat
Membru għal finijiet ta' taxxa, fejn ma jwettqux funzjonijiet
amministrattivi jew attivitajiet kummerċjali, bi ksur tal-Artikolu 5
tar-Regolament (KE) Nru 1071/2009). Din il-prattika mhijiex konformi
mal-intenzjoni tal-leġiżlatur. Tali prattiki jiġu
okkażjonalment dokumentati[29],
iżda jibqgħu diffiċli biex jiġu kkwantifikati minħabba
n-natura illegali tagħhom. Dawn
il-'letterbox companies' għadhom jeżistu minħabba d-differenzi
fir-riżorsi u l-livelli ta' prijorità mogħtija għall-infurzar
fl-Istati Membri kkonċernati. Dan jista' joħloq diffikultajiet
għal Stati Membri oħra li jirrappurtaw dawn il-kumpaniji lill-Istati
Membri ta' reġistrazzjoni, li jistgħu ma jkunux jiddependu fuq livell
b'saħħtu ta' appoġġ mill-kontropartijiet tagħhom.
Barra minn hekk, id-dispożizzjonijiet li jirregolaw l-infurzar
tar-rekwiżit tal-'istabbiliment stabbli' huma dgħajfa[30].
Għalhekk, jidher li jeħtieġ ikun hemm aktar kooperazzjoni
transfruntiera f'din iż-żona u infurzar aktar strett
tad-dispożizzjonijiet rilevanti.
4.2.
Ir-Regolament (KE) Nru 1072/2009:
Kwistjonijiet ta' Implimentazzjoni u Żviluppi Nazzjonali
L-awtoritajiet
ta' infurzar l-istess bħat-trasportaturi jirrappurtaw differenzi
fil-metodi użati biex jinfurzaw ir-Regolament (KE) Nru 1072/2009. Dawn
id-differenzi jistgħu jwaqqfu t-trasportaturi milli jieħdu
azzjonijiet fis-swieq domestiċi ta' barra l-pajjiż. Minkejja
tentattivi biex jiġu ċċarati t-termini tar-Regolament (KE)
Nru 1072/2009[31],
għad fadal differenzi fl-implimentazzjoni ta' ċerti dispożizzjonijiet.
Il-Finlandja pereżempju, tqis li l-operazzjonijiet li jinvolvu waqfien
frekwenti (li fihom trasportatur ineħħi parti minn tagħbija
waħda f'destinazzjonijiet differenti, bħal sussidjarji tal-istess
kumpanija) jinkludu diversi operazzjonijiet ta' trasport, filwaqt li
f'pajjiżi oħra, l-operazzjonijiet li jinvolvu waqfien frekwenti
jingħaddu bħala trasport uniku. L-awtoritajiet ta' infurzar
tad-Danimarka jew tal-Finlandja jitolbu li t-trasportaturi jkunu kapaċi
jiġġustifikaw immedjatament l-operazzjonijiet ta' kabotaġġ
fil-formola tal-kunsinna. Oħrajn jipprovdu t-trasportaturi bi ftit
tal-ħin biex jiġbru din l-informazzjoni jekk ma tkunx disponibbli
mal-ewwel, pereżempju f'każ li l-ittra tal-kunsinna ma tinġarrx
mat-tagħbija. Barra minn hekk,
ċerti Stati Membri wrew tendenza li jillimitaw il-kundizzjonijiet li
skonthom it-trasportaturi jistgħu jwettqu operazzjonijiet internazzjonali
ta' trasport u ta' kabotaġġ permezz ta' mezzi regolatorji u prattiki
ta' infurzar. Eżempji ta' dawn jinkludu diskriminazzjoni minn awtoritajiet
ta' infurzar ta' vetturi li huma ta' sussidjarji ta' kumpaniji lokali
stabbiliti fi Stat Membru ieħor jew l-applikazzjoni ta'
dispożizzjonijiet restrittivi għal tipi ta' prodotti li huma
ttrasportati prinċipalment minn trasportaturi mhux residenti. Inizjattivi
privati, tollerati mill-awtoritajiet, jikkontribwixxu biex jistigmatizzaw
is-sewwieqa barranin. Fi Stat Membru wieħed, applikazzjoni tal-ismartphone
biex jiġu mmonitorjati u lokalizzati t-trakkijiet irreġistrati barra
l-pajjiż qed ikollha suċċess mas-sewwieqa lokali. Fuq perjodu
twil ta' żmien, dawn l-inizjattivi regolatorji u privati jirriskjaw li
jdgħajfu s-suq intern acquis fil-qasam tat-trasport u b'mod
partikolari, it-titjib fl-effiċjenza li jirriżulta mill-ftuħ
tas-suq għat-trasport transfruntier. Ir-relevanza ta'
dawn il-prattiki tidher dubjuża fid-dawl tal-livell baxx ta' ksur dokumentat
fir-rigward tad-dispożizzjonijiet ta' kabotaġġ. Filwaqt li hemm
tħassib fir-rigward tal-operazzjonijiet ta' kabotaġġ illegali
(jiġifieri l-operazzjonijiet ta' kabotaġġ li jaqbżu t-tliet
operazzjonijiet possibbli skont ir-Regolament (KE) Nru 1072/2009, jew li
ma jsirux wara trasport internazzjonali, jew aktar tard minn sebat ijiem wara
trasport internazzjonali), b'mod ġenerali l-awtoritajiet ta' infurzar ma
kinux kapaċi jissostanzjaw dawn id-dikjarazzjonijiet. Fl-Istati Membri
fejn saru kontrolli estensivi ta' kabotaġġ, il-livelli ta' ksur kienu
baxxi (1,7 % tal-vetturi kollha kkontrollati fil-każ tad-Danimarka[32]).
Ksur ieħor, bħan-nuqqas ta' rispett tal-ħinijiet ta' sewqan li
jħallu impatt kemm fuq il-kompetizzjoni bejn it-trasportaturi kif ukoll
fuq is-sikurezza, huma iktar komuni għall-awtoritajiet ta' infurzar. Bħala
konklużjoni, ir-Regolamenti (KE) Nru 1071/2009 u 1072/2009 huma mifhuma,
interpretati u applikati b'mod differenti fid-diversi Stati Membri.
B'riżultat ta' dan, l-operaturi qed iħabbtu wiċċhom ma'
geġwiġija ta' dispożizzjonijiet li jiswew il-flus u jfixklu, u
li l-pakkett leġiżlattiv tal-2009 kellu inizjalment jelimina.
4.3.
Reviżjoni tar-Regolamenti skont
l-eżerċizzju REFIT
Fil-Komunikazzjoni
tagħha dwar l-Idoneità Regolatorja tal-UE ta' Diċembru 2012[33],
il-Kummissjoni nediet il-Programm dwar l-Idoneità u l-Prestazzjoni
tar-Regolamentazzjoni (REFIT), li għandu l-għan li jiċċara l-liġi
tal-UE u jnaqqas il-piż regolatorju. L-eżerċizzju ta'
analiżi li sar wara l-Komunikazzjoni identifika r-reviżjoni
tar-Regolamenti (KE) Nru 1071/2009 u (KE) Nru 1072/2009 bħala
prijorità. Is-simplifikazzjoni tar-Regolamenti tippermetti li l-uffiċjali
ta' kontroll jinfurzaw dawn ir-Regolamenti b'mod aktar effiċjenti u
uniformi, u b'hekk it-trasportaturi jiġu provduti b'interpretazzjoni
konsistenti tar-Regolamenti u b'ambjent operattiv prevedibbli.
Ir-reviżjoni se jkollha l-għan li tiċċara t-termini problematiċi
tar-Regolamenti, jiġifieri d-definizzjoni tal-istabbiliment stabbli u
effettiv fir-Regolament (KE) Nru 1071/2009 u ta' kabotaġġ
fir-Regolament (KE) Nru 1072/2009. Barra minn hekk, bl-infurzar
tar-Regolament (KE) Nru 1071/2009 jistgħu jissaħħu aktar
il-possibiltajiet ta' kooperazzjoni bejn l-Istati Membri Fl-aħħar
nett, reviżjoni tista' ttejjeb l-infurzar tar-Regolamenti. L-introduzzjoni
ta' aktar dispożizzjonijiet preskrittivi dwar il-frekwenza u
l-modalitajiet tal-kontrolli tista' tgħin biex jiġu indirizzati
d-diskrepanzi li jeżistu fl-infurzar tar-Regolamenti. L-infurzar jista'
jkun aktar effiċjenti billi jintużaw aħjar il-possibbiltajiet
il-ġodda ta' kontroll tekniku, bħall-ġenerazzjoni l-ġdida
ta' takografi diġitali.
5.
Dimensjoni Soċjali tas-Settur tat-Trasport
tal-Merkanzija bit-Triq
Il-leġiżlazzjoni
tal-UE tipprovdi kemm qafas ġenerali kif ukoll settorjali bil-għan li
tiżgura s-sikurezza stradali, il-kundizzjonijiet tax-xogħol adegwati
u l-kompetizzjoni mingħajr xkiel fis-settur tat-trasport tal-merkanzija
bit-triq. Dan il-qafas jinkludi r-Regolament (KE) Nru 561/2006 dwar
il-ħin ta' sewqan u l-perjodi ta' mistrieħ[34] u
d-Direttiva 2002/15/KE dwar il-ħin tax-xogħol tal-ħaddiema
mobbli[35].
Sabiex jiġi żgurat li dawn ir-regoli jiġu infurzati korrettament,
dawn id-dispożizzjonijiet huma kompletati b'regoli dwar il-livelli minimi
ta' kontroll (id-Direttiva 2006/22/KE[36])
u b'dispożizzjonijiet legali u tekniċi ddettaljati dwar apparat ta'
reġistrazzjoni għat-trasport bit-triq (ir-Regolament (KEE)
Nru 3821/85[37]).
Livell mhux biżżejjed ta' konformità ma' dawn ir-regoli jista'
jwassal għal konsegwenzi negattivi. Dawn il-konsegwenzi jinkludu:
degradazzjoni tal-kundizzjonijiet tax-xogħol għall-ħaddiema
tat-trasport bit-triq, żieda fir-riskji għas-sikurezza stradali u
għal utenti oħra tat-triq u li jitpoġġew fi
żvantaġġ l-impriżi konformi. Qed jitkomplew
l-isforzi biex jitjieb aktar l-infurzar ta' dawn id-dispożizzjonijiet. Dan
jinkludi l-elaborazzjoni mill-Kummissjoni ta' noti ta' gwida u ta' kjarifika li
jkunu disponibbli għall-Istati Membri u għall-partijiet interessati[38].
Madankollu, in-noti ta' gwida jibqgħu dokumenti mhux vinkolanti.
B'riżultat ta' dan, il-Kummissjoni ma tistax tagħti sanzjonijiet
lill-Istati Membri li ma jsegwuhomx. L-elaborazzjoni ta' noti ta' gwida hija
diffiċli (nota ta' gwida dwar il-'perjodu ta' 24 siegħa'
għall-kalkolu tal-ħin ta' sewqan u l-perjodi ta' mistrieħ ilha
tiġi diskussa għal aktar minn 4 snin u t-test tagħha għadu
ma ġiex iffinalizzat). L-esperjenza twila tal-Istati Membri li japplikaw
verament in-noti ta' gwida li ġew diskussi magħhom fil-kumitat
relevanti turi wkoll differenzi sinifikanti. Qed ikomplu
l-isforzi fir-rigward tal-kooperazzjoni mal-partijiet interessati.
Il-proġett TRACE[39],
li ħoloq kurrikulu komuni ta' taħriġ għall-uffiċjali
ta' infurzar ta' mal-ġenb tat-triq, tlesta. Il-White Paper tal-2011 dwar
it-Trasport[40]
identifikat il-promozzjoni tal-kwalità tax-xogħlijiet u
tal-kundizzjonijiet tax-xogħol bħala prijorità.
5.1.
Kundizzjonijiet tax-Xogħol
Il-kundizzjonijiet
tax-xogħol fis-settur tat-trasport tal-merkanzija bit-triq huma
diffiċli, kif jidher mil-livell baxx ta' attrattività tas-settur. Fost
ir-raġunijiet għal dan insibu: in-natura mobbli tal-attivitajiet ta'
trasport bit-triq u l-perjodi twal li persuna trid tqatta' 'l bogħod
mill-bażi. Fatturi oħra ta' riskju identifikati mill-Aġenzija
Ewropea għas-Sigurtà u s-Saħħa jinkludu: il-fatt li s-sewwieqa
ta' spiss jaħdmu f'iżolament, il-ġestjoni li t-tagħbija
trid tasal eżatt fil-ħin u d-domandi tal-klijenti li jwasslu
għal pressjoni għolja fuq il-post tax-xogħol, il-ħidma
f'siti ta' oħrajn, l-użu aktar frekwenti tat-telesorveljanza u ta'
teknoloġija kumplessa, l-ippjanar tal-post tax-xogħol,
l-aċċessibbiltà għal faċilitajiet u servizzi
(iġjeniċi, tal-ikel u mediċi), ir-riskju ta' mard infettiv,
il-vjolenza u l-attakki, il-qagħad ta' bilqiegħda għal
żmien twil u l-espożizzjoni għall-vibrazzjoni, ir-riskji ta'
aċċidenti meta jsiru t-tagħbija u l-ħatt u r-riskji ta'
sikurezza stradali assoċjati ma' xogħol fit-traffiku[41].
L-istess rapport jidentifika s-sigħat tax-xogħol atipiċi
fis-settur bħala fattur li jista' jkollu effetti negattivi fuq
is-saħħa. Madankollu, madwar id-dinja kollha qed jonqsu
l-aċċidenti li jinvolvu vetturi heavy-duty, filwaqt li qed titjieb
il-konformità mad-dispożizzjonijiet dwar il-ħin ta' sewqan u
l-perjodi ta' mistrieħ[42]. Iż-żieda
fil-prattiki ta' ġestjoni li t-tagħbija trid tasal eżatt
fil-ħin, li żviluppat permezz ta' possibbiltajiet tekniċi
ġodda li huma disponibbli fis-settur tal-loġistika, ifissru li
s-sewwieqa huma suġġetti għal pressjoni biex jilħqu
l-iskadenzi tal-kunsinni. Il-pressjoni fuq il-ħaddiema tat-trasport
bit-triq titqies li żdiedet matul il-kriżi ekonomika li
għaddejja bħalissa, u li l-partjiet interessati jemmnu li hija
konnessa ma' diversi prattiki illegali bħall-eċċess
tal-ħinijiet ta' sewqan, ir-remunerazzjonijiet ibbażati fuq
il-prestazzjoni li jipperikolaw is-sikurezza stradali jew l-impjiegi
indipendenti fittizji[43].
Il-kwistjonijiet soċjali ewlenin identifikati mill-partijiet interessati
li jeħtieġu azzjoni leġiżlattiva futura huma stabbiliti
fit-Tabella 2. Kwistjoni || Grad ta' importanza Skemi illegali/mhux ġusti ta' impjieg li joħolqu dumping soċjali (inklużi l-'letter-box companies') || ***** Nuqqas ta' infurzar u kontrolli || ***** L-armonizzazzjoni soċjali fl-Istati Membri tal-UE27 għad baqgħalha biex tinkiseb || **** Operazzjonijiet illegali ta' kabotaġġ || **** Il-kwalità tal-mistrieħ u tal-faċilitajiet iddedikati għal dan || *** Ħin ta' sewqan u perjodi ta' mistrieħ || ** Tabella 2:
Kwistjonijiet Identifikati mill-Partijiet Interessati li Jeħtieġu
Azzjoni Leġiżlattiva Futura fir-Rigward tal-Kundizzjonijiet
Soċjali u ta' Xogħol fis-Settur tat-Trasport tal-Merkanzija bit-Triq.
Sors: "Kundizzjonijiet Soċjali u tax-Xogħol tat-Trasportaturi
tat-Trasport bit-Triq", il-Parlament Ewropew, 2013. Il-kwistjonijiet
enfasizzati mill-partijiet interessati fit-Tabella 2 huma marbuta
mill-qrib mal-implimentazzjoni tar-Regolamenti (KE) 1071/2009 u 1072/2009,
għalkemm l-infurzar huwa kompetenza tal-Istati Membri. L-infurzar mhux
sodisfaċenti ta' dawn id-dispożizzjonijiet imur lura għan-nuqqas
ta' dispożizzjonijiet vinkolanti dwar l-għadd u l-frekwenza
tal-kontrolli fiż-żewġ Regolamenti. In-nuqqas ta' dawn
id-dispożizzjonijiet joħloq ukoll diffikultajiet
għall-Kummissjoni biex timmonitorja l-implimentazzjoni ta' dawn
ir-Regolamenti. Għalhekk, jeħtieġ li dan tal-aħħar
jitjieb bl-introduzzjoni ta' dispożizzjonijiet vinkolanti dwar l-infurzar.
Il-ħin ta' sewqan
u l-perjodi ta' mistrieħ jibqgħu qasam ta' tħassib.
Evoluzzjonijiet riċenti juru li qed titjieb il-konformità
mal-leġiżlazzjoni rilevanti[44],
filwaqt li għad hemm differenzi fil-prattiki ta' infurzar tal-Istati
Membri[45].
Is-sehem tal-kontrolli mwettqa mal-ġenb tat-triq jew fil-bini
tal-kumpanija għadu jvarja, l-istess bħas-sehem ta' jiem ta'
xogħol ikkontrollati. Dan jirrifletti kemm id-differenzi fir-riżorsi
ddedikati mill-Istati Membri għall-infurzar, kif ukoll id-differenzi
fis-swieq ta' trasport (filwaqt li l-kontrolli fil-bini huma effettivi fi Stati
Membri fejn huma aktar komuni l-kumpaniji kbar, il-kontrolli mal-ġenb
tat-triq jistgħu jkunu aktar effettivi fi swieq dominati minn impriżi
żgħar). Riċerka li
saret dan l-aħħar uriet ukoll li r-riskji relatati mal-kompetizzjoni
tas-sigurtà soċjali huma limitati, minħabba ugwaljanza
fl-ispejjeż tax-xogħol li mmodifikat il-produttività u
l-armonizzazzjoni ta' għadd ta' standards tax-xogħol. Barra minn
hekk, l-Istati Membri b'bażijiet ta' spejjeż aktar baxxi ma jidhrux
li għandhom livelli inqas ta' infurzar fir-rigward
tal-leġiżlazzjoni soċjali u tax-xogħol. Għalhekk ma
hemm l-ebda evidenza li n-nuqqas ta' rispett tal-leġiżlazzjoni
tax-xogħol se jwassal għal vantaġġ kompetittiv.[46]
Madankollu, għad fadal xi jsir fil-bord biex jitjieb l-infurzar
tal-leġiżlazzjoni soċjali transsettorjali fis-settur
tat-trasport bit-triq.
5.2.
Antiċipazzjoni tal-Bidla
Is-settur ta'
trasport tal-merkanzija bit-triq diġà huwa affettwat b'għadd ta'
bidliet ewlenin fuq perjodu twil; l-ewwel nett bin-nuqqas ta' sewwieqa li hemm
bħalissa. Il-ħaddiema tat-trasport tal-merkanzija bit-triq huma
popolazzjoni li qed tixjieħ, b'aktar minn 250 000 sewwieq li
fil-Ġermanja biss mistennija jirtiraw fil-perjodu ta' bejn l-10 u l-15-il
sena li ġejjin[47].
Dan, flimkien man-nuqqas ta' sewwieqa kwalifikati li diġà kien identifikat
qabel il-kriżi ekonomika, se jaffettwaw bil-kbir il-possibbiltajiet ta'
reklutaġġ tal-kumpaniji tat-trasport tal-merkanizija bit-triq.
Ir-riżultati ta' dan in-nuqqas jistgħu diġà jinħassu
f'ċerti Stati Membri, bħal-Latvja, fejn attwalment, ammont
żgħir ta' sewwieqa qed jiġu reklutati minn pajjiżi terzi. L-Aġenzija
Ewropea għas-Sigurtà u s-Saħħa tenfasizza dwar il-fatt li
n-natura tax-xogħol tat-trasportatur għaddejja minn bidla
sħiħa. Iż-żieda fl-użu tat-teknoloġija hija
fattur determinanti fit-trasport internazzjonali. Il-kompjuters abbord,
it-takografi diġitali ta' ġenerazzjoni ġdida u apparat
ieħor telematiku għandhom rwol importanti fl-organizzazzjoni
tal-movimenti tat-traffiku u tal-verifika tal-konformità
mal-leġiżlazzjoni applikabbli. Titjib tekniku ieħor (sistemi
ġodda ta' propulsjoni u sistemi awtomatiċi tal-awtostrada) se jbiddel
ukoll il-kontenut tax-xogħol tas-sewwieqa. Flimkien maż-żieda
fl-età medja tas-sewwieqa, dan se joħloq ħtiġijiet ġodda
ta' taħriġ għas-sewwieqa. Filwaqt li t-tagħlim tul
il-ħajja għandu jitqies bħala prijorità, għandu jiġu
addattat ukoll il-kurrikulu tal-għalliema ta' sewqan. Il-Kummissjoni
se tkompli d-djalogu tagħha mal-Istati Membri u mal-partijiet interessati
sabiex tantiċipa dawn il-bidliet. Il-Kumitat ta' Djalogu Soċjali
tas-Settur jeżisti bħala għodda li tista' tintuża sabiex
jiġu indirizzati b'mod proattiv dawn l-isfidi li ġejjin. Se
jintlaqgħu kontribuzzjonijiet mis-sħab soċjali bil-għan li
jiġi adottat kodiċi soċjali għall-ħaddiema mobbli
tat-trasport bit-triq, kif imsemmi fl-Inizjattiva 8 tal-White Paper
tal-2011 dwar it-Trasport. Kif inhu enfasizzat fil-Komunikazzjoni
tal-Kummissjoni dwar politika industrijali integrata għall-era tal-globalizzazzjoni,
il-kompetittività u s-sostenibbiltà fix-xena prinċipali[48],
l-indirizzar tal-isfidi tas-suq tax-xogħol fil-qafas tad-djalogu
soċjali huwa element ewlieni ta' politika industrijali kompetittiva u
effiċjenti. Fil-kuntest tan-nuqqas futur ta'
sewwieqa, għandhom jitħeġġu miżuri biex itejbu
l-użu ta' vetturi (eżempju l-iffaċilitar tal-konsolidazzjoni
tat-tagħbija u l-ippjanar tad-distribuzzjoni). Il-ftuħ tas-suq, li x'aktarx
se jikkontribwixxi għal użu aktar effiċjenti tal-vetturi, jista'
jgħin ukoll biex jiġi indirizzat dan in-nuqqas.
6.
Żviluppi Regolatorji Oħra
Wara l-adozzjoni
tar-Regolament (KE) Nru 1072/2009, il-leġiżlatur tal-UE ħa
passi biex ikun hemm aktar armonizzazzjoni tas-suq intern għat-trasport
tal-merkanzija bit-triq billi jiġu adottati aktar miżuri
leġiżlattivi, kif inhu enfasizzat hawn taħt. Fil-kuntest
tal-ftuħ tas-suq, dawn l-iżviluppi jikkontribwixxu
għall-armonizzazzjoni tal-kundizzjonijiet tas-suq li jaffettwaw
it-trasportaturi tal-UE.
6.1.
Nollijiet tat-Triq
Id-Direttiva 1999/62/KE,
kif emendata bid-Direttiva 2006/38/KE ġiet immodifikata ulterjorment
bid-Direttiva 2011/76/UE. Din id-Direttiva tistabbilixxi qafas komuni
għall-Istati Membri li se jwaqqfu pedaġġi relatati mad-distanza
u tariffi għall-utenti tat-toroq ibbażati fuq il-ħin (vignettes)
għal vetturi b'merkanzija tqila (aktar minn 3,5 tunnellati)
għall-użu ta' ċerta infrastruttura. Bl-emenda tal-2011,
id-Direttiva integrat elementi li għandhom l-għan li jirriflettu
aħjar il-prinċipju ta' 'min iniġġes iħallas',
bħall-possibiltajiet għall-Istati Membri li jimponu tariffi fuq
it-trasportaturi għall-impatt tal-vettura tagħhom fuq il-kwalità
tal-arja u l-livelli tal-ħoss. Filwaqt li l-ebda Stat Membru ma għadu
beda jinternalizza l-ispejjeż esterni, għadd dejjem akbar ta' Stati
Membri qed jużaw forma ta' tariffi għall-infrastruttura: • Sistemi
ta' vinjetti li daħlu fis-seħħ: il-Bulgarija, ir-Rumanija,
l-Ungerija u l-Litwanja għandhom sistemi nazzjonali ta' vinjetti
għat-trakkijiet. Ir-Renju Unit se jimplimenta sistema ta' vinjetti
mill-1 ta' April 2014. L-Isvezja, id-Danimarka, il-Pajjiżi
l-Baxxi, il-Belġju u l-Lusemburgu jaħdmu bis-sistema kondiviża
tal-'Eurovignette'. • Sistemi ta' vinjetti li qed
jiġu żviluppati: fil-Latvja. • Sistemi
ta' pedaġġi elettroniċi mifruxa man-netwerk kollu li daħlu
fis-seħħ: fil-Ġermanja, l-Awstrija, ir-Repubblika Ċeka,
l-Ungerija, is-Slovakkja, il-Polonja u l-Portugall. • Sistemi
ta' pedaġġi elettroniċi mifruxa man-netwerk kollu li qed
jiġu żviluppati: fid-Danimarka, il-Belġju u Franza. Franza se
tapplika biss it-tariffi għall-awtostradi eżistenti tal-Istat li ma
għandhomx pedaġġi u għat-toroq nazzjonali, biex hekk
iżżomm is-sistema attwali ta' pedaġġi b'ostakli
fiżiċi għall-konċessjonijiet tal-awtostrada. • Pedaġġi
b'ostakli fiżiċi: jinkludu l-Irlanda, Franza, Spanja, l-Italja,
is-Slovenja u l-Greċja. Għalkemm pajjiżi oħra għandhom
sistemi manwali ta' pedaġġ fuq għadd żgħir ta' toroq,
id-daqs tagħhom mhux sinifikanti. Fuq parti tan-netwerk, il-Polonja u
l-Portugall għandhom ukoll pedaġġi b'ostakli fiżiċi,
għalkemm huma kklassifikati li għandhom fis-seħħ sistemi
ta' pedaġġi elettroniċi mifruxa man-netwerk kollu minħabba
li din hija s-sistema primarja. • L-ebda
pedaġġ: fil-Latvja, il-Finlandja, l-Estonja, Malta u Ċipru. Barra minn hekk,
qed isiru sforzi biex jiġi introdott is-Servizz Ewropew ta’
Pedaġġ Elettroniku (EETS). L-ispeċifikazzjonijiet tekniċi
dwar l-interoperabbiltà tal-EETS jinsabu fid-Direttiva 2004/52/KE[49],
filwaqt li d-Deċiżjoni tal-Kummissjoni 2009/750/KE[50], li
ddefiniet l-ispeċifikazzjonijiet tal-EETS, daħlet fis-seħħ
f'Ottubru 2009. Bħalissa qed isiru sforzi dwar Servizzi
Reġjonali ta' Pedaġġ Elettroniku bħala l-pass li jmiss
għal kopertura madwar l-UE kollha.
6.2.
Speċifikazzjonijiet tal-Vettura
Il-kriterji
applikabbli għall-vetturi użati mit-trasportaturi tal-UE inbidlu
b'mod sostanzjali mill-adozzjoni tar-Regolament (KE) Nru 1072/2009.
Id-dħul fis-seħħ tal-istandard ta' emissjonijiet EURO VI
f'Jannar 2013 (wara d-dħul fis-seħħ tal-istandards ta'
emissjonijiet EURO V fl-2008) wassal għal tiġdid aktar mgħaġġel
tal-flotta tal-vetturi kemm fl-UE15 kif ukoll fl-UE12, fejn l-età medja
tal-vetturi li qed jintużaw hija ogħla[51].
B'mod ġenerali, il-vetturi li huma aktar moderni jintużaw
għat-trasport internazzjonali tal-merkanzija bit-triq aktar milli
għat-trasport domestiku tal-merkanzija bit-triq. Dan huwa parzjalment
minħabba l-livelli aktar baxxi ta' pedaġġ applikati
għat-tali vetturi u l-konsum aktar baxx ta' fjuwil, iżda wkoll
minħabba l-ħtieġa li dawn il-vetturi jinbidlu b'mod regolari
peress li jilħqu kilometraġġ għoli malajr. Grafika 12:
Tqassim skont l-età ta' vetturi b'merkanzija tqila użati mit-trasportaturi
tal-UE27 fl-2012 (sehem fil-vettura-km totali f'%). Sors: Eurostat, DĠ
MOVE. Barra
mill-adozzjoni tal-istandards tal-Euro, l-ispeċifikazzjonijiet tal-vettura
se jiġu aktar armonizzati bl-adozzjoni ta' rekwiżiti Ewropej
armonizzati għall-approvazzjoni tat-tip għal vetturi heavy-duty u
t-trejlers tagħhom, li daħlu fis-seħħ fl-2012[52].
6.3.
Sikurezza Stradali
Ir-rekords ta'
sikurezza fl-UE, inklużi dawk ta' vetturi b'merkanzija tqila (HGV),
qegħdin dejjem jitjiebu u ma juru l-ebda impatt negattiv wara l-adozzjoni
fl-2009 tad-dispożizzjonijiet il-ġodda dwar l-aċċess
għas-suq tat-trasport tal-merkanzija bit-triq. Kif wieħed jista' jara
mit-Tabella ta' hawn taħt, l-aċċidenti li jinvolvu HGV u li
jwasslu għal fatalitajiet naqsu fi kważi l-Istati Membri kollha
kkonċernati. 2008 || 2009 || 2010 || Bidla fl-2010 fir-rigward tal-2008 (HGV) HGV || Total || HGV bħala % tat-Total || HGV || Total || HGV bħala % tat-Total || HGV || Total || HGV bħala % tat-Total Il-Belġju || 122 || 944 || 13 % || 117 || 944 || 12 % || 111 || 840 || 13 % || -9,0 % Ir-Repubblika Ċeka || 169 || 1076 || 16 % || 163 || 901 || 18 % || 175 || 802 || 22 % || +3,6 % Id-Danimarka || 62 || 406 || 15 % || 35 || 303 || 12 % || 36 || 255 || 14 % || -41,9 % Il-Ġermanja || 625 || 4477 || 14 % || 536 || 4152 || 13 % || 534 || 3648 || 15 % || -14,6 % L-Irlanda || 44 || 280 || 16 % || 22 || 238 || 9 % || 13 || 212 || 6 % || -70,4 % Il-Greċja || 138 || 1553 || 9 % || 113 || 1456 || 8 % || 127 || 1258 || 10 % || -8,0 % Spanja || 452 || 3099 || 15 % || 353 || 2714 || 13 % || 333 || 2479 || 13 % || -26,3 % Franza || 596 || 4275 || 14 % || 502 || 4273 || 12 % || 552 || 3992 || 14 % || -7,4 % L-Italja || 977 || 4725 || 21 % || 785 || 4237 || 19 % || 835 || 4090 || 20 % || -14,5 % Il-Lussemburgu || 2 || 35 || 6 % || 2 || 48 || 4 % || 9 || 32 || 28 % || +350,0 % Il-Pajjiżi l-Baxxi || 107 || 677 || 16 % || 95 || 644 || 15 % |||||||| L-Awstrija || 107 || 679 || 16 % || 81 || 633 || 13 % || 97 || 552 || 18 % || -9,3 % Il-Polonja || 1 155 || 5437 || 21 % || 952 || 4572 || 21 % || 947 || 3908 || 24 % || -18,0 % Il-Portugall || 112 || 885 || 13 % || 120 || 840 || 14 % || 95 || 937 || 10 % || -15,2 % Ir-Rumanija || 292 || 3061 || 10 % || 252 || 2796 || 9 % || 191 || 2377 || 8 % || -34,6 % Is-Slovenja || 7 || 214 || 3 % || 12 || 171 || 7 % || 7 || 138 || 5 % || 0,0 % Il-Finlandja || 106 || 344 || 31 % || 70 || 279 || 25 % || 92 || 272 || 34 % || -13,2 % L-Isvezja || 72 || 397 || 18 % || 45 || 358 || 13 % |||||||| Ir-Renju Unit || 380 || 2645 || 14 % || 287 || 2337 || 12 % || 282 || 1965 || 14 % || -25,8 % Tabella 3:
Fatalitajiet li Jinvolvu Vetturi b'Merkanzija Tqila (HGV) skont l-Istat Membru
(2008 - 2010). Sors: "Traffic Safety Basic Facts 2012, Heavy Goods
Vehicles and Buses", Osservatorju Ewropew għas-Sikurezza fit-Triq.[53] Dan in-nuqqas
jirriżulta parzjalment mit-tnaqqis fil-volumi ta' trasport tal-merkanzija
li seħħ bejn l-2008 u l-2010 (-7 %). Madankollu, huwa probabbli
li fatturi oħra kkontribwixxew ukoll għat-tnaqqis tar-rata ta'
aċċidenti li jinvolvu l-HGVs, bħat-titjib tekniku tal-vetturi
għal aktar infurzar tar-regoli tat-traffiku. L-adozzjoni ta' regoli
għall-kooperazzjoni aħjar fir-rigward tal-infurzar ta' diversi regoli
tat-traffiku[54]
hija inizjattiva li ta' min wieħed isemmi f'dan ir-rigward. Wara tmiem
il-perjodu ta' traspożizzjoni fis-7 ta' Novembru 2013, huwa
mistenni li l-impatt sħiħ tagħha jinħass fix-xhur segwenti. Din ix-xejra
hija mistennija li tkompli peress li diversi proposti jinsabu attwalment
fil-proċess leġiżlattiv li, meta jiġu adottati, se
jikkontribwixxu għaż-żamma aħjar tal-vetturi eżistenti[55] u
għat-tqegħid fis-suq ta' vetturi li huma aktar siguri
għall-utenti vulnerabbli tat-triq[56].
6.4.
Tassazzjoni fuq il-Fjuwil
Il-prodotti
tal-enerġija, inkluż il-fjuwil kummerċjali huma
suġġetti għad-Direttiva 2003/96/KE msemmija hawn fuq dwar
tassazzjoni fuq prodotti ta' enerġija u elettriku. Fost l-oħrajn, din
id-Direttiva tistabbilixxi livelli minimi ta' dazji tas-sisa fuq il-fjuwil. Fit-13 ta' April 2011[57],
il-Kummissjoni adottat proposta biex tirrevedi din id-Direttiva. Jekk tiġi
adottata, il-proposta se tallinja l-politiki ta' tassazzjoni fuq
l-enerġija sabiex jirriflettu l-impatt ambjentali tal-fjuwils u ta'
prodotti oħra tal-enerġija, u b'hekk jinħoloq inċentiv
ieħor għat-trasportaturi biex jużaw vetturi aktar nodfa.
7.
Konklużjonijiet
7.1.
Sitwazzjoni tas-suq
L-iżviluppi
ewlenin li jaffettwaw is-suq ta' trasport tal-merkanzija bit-triq sa
mill-adozzjoni tar-Regolament (KE) Nru 1072/2009 jikkonsistu f'xejriet
ġenerali bħall-kriżi eknomika u t-tkabbir suċċessiv
tal-UE. Għalkemm sal-2011 kien jidher li s-settur qiegħed jirkupra
bil-mod il-mod mill-kriżi ekonomika, il-volumi tat-trasport
reġgħu naqsu għal darba oħra, fid-dawl tal-iżviluppi
fil-bqija tal-ekonomija. Xejriet ewlenin oħra li kienu preżenti qabel
il-kriżi ekonomika għad għandhom rwol importanti
fid-definizzjoni tal-movimenti tat-trasport, bħar-rwol dejjem akbar
tal-burdnara tal-merkanzija u tal-fornituri ta' loġistika għal
partijiet terzi biex jikkonsolidaw it-tagħbija u f'relazzjonijiet
kuntrattwali mat-trasportaturi. L-adozzjoni
tal-pakkett tat-triq tal-2009 ikkontribwixxiet biex tipprovdi lit-trasportaturi
u lill-infurzaturi bi standards komuni u kriterji għall-aċċess
ta' xogħlijiet u għas-suq internazzjonali tat-trasport tal-merkanzija
bit-triq. Madankollu, ċerti dispożizzjonijiet tar-Regolament (KE)
Nru 1072/2009 huma diffiċli li jiġu applikati, b'mod partikolari
dawk relatati mal-istabbiliment stabbli tal-impriżi ta' trasport
tal-merkanzija bit-triq u mal-kabotaġġ. Barra minn hekk,
il-geġwiġija tad-dispożizzjonijiet
tal-leġiżlazzjonijiet nazzjonali li kellha tiġi eliminata
fit-tfassil mill-ġdid tal-2009 qed terġa' titfaċċa,
b'konsegwenzi detrimentali għas-settur intern tat-trasport bit-triq. Fl-aħħar
nett, fil-futur is-settur se jaffaċċja għadd ta' sfidi. Biex
iwieġeb għal dawn l-isfidi, se jkun jeħtieġ li jtejjeb
l-effiċjenza tiegħu. In-nuqqas ta' sewwieqa jittaffa permezz
tal-kriżi iżda jibqa' sors ta' tħassib, b'mod partikolari
għas-sewwieqa speċjalizzati. Fil-futur, dan se joħloq domandi
ġodda ta' sewwieqa u kwalifiki, inkluż f'kuntest ta' tixjiħ
tal-forza tax-xogħol. Barra minn hekk, il-kundizzjonijiet tax-xogħol
jibqgħu diffiċli fis-settur tat-trasport tal-merkanzija bit-triq,
filwaqt li r-relazzjonijiet kuntrattwali huma kkaratterizzati għal darba
oħra b'livell għoli ta' impjiegi indipendenti. Bl-ammont ta' sewwieqa
disponibbli dejjem jonqos, il-kumpaniji jridu jnaqqsu l-livelli għolja ta'
vjaġġi mingħajr tagħbija sabiex jużaw aħjar
il-persunal tagħhom. It-tijib fl-effiċjenza tas-settur tat-trasport
tal-merkanzija bit-triq se jikkontribwixxi għall-kompetittività
tal-ekonomija tal-UE inġenerali.
7.2.
Konverġenza ta' indikaturi tas-suq
Bħal
f'partijiet oħra tal-ekonomija, l-Istati Membri għandhom strutturi
differenti tal-ispejjeż għas-settur tat-trasport tal-merkanzija
bit-triq. Għalkemm probbabilment qatt mhuma se jitneħħew
għalkollox id-differenzi fl-ispejjeż, il-lakuna qiegħda kull ma
tmur tonqos. It-trasportaturi involuti fit-trasport internazzjonali huma
esposti għal spejjeż bħal tariffi tat-triq u spejjeż
tal-fjuwil, li jiġu applikati fuq l-utenti irrispettivament mill-Istat
Membru tar-reġistrazzjoni. Barra minn hekk, il-parteċipazzjoni
tas-sewwieqa f'operazzjonijiet internazzjonali ta' trasport, fejn
ġeneralment ir-remunerazzjonijiet ikunu ogħla, waslet għal
żieda fil-livelli tal-pagi, b'mod partikolari f'dawk l-Istati Membri li
ssieħbu mal-UE fl-2004 u l-2007. Il-bidla gradwali tal-livelli
tal-ispejjeż iġġiegħel lit-trasportaturi jikkompetu fuq
l-effiċjenza u l-kwalità tas-servizzi, u b'hekk jibbenefikaw l-utenti
tat-trasport fl-ekonomija kollha tal-UE. Madankollu, dan mhuwiex kompetenza
tal-UE u lanqas għan tas-Suq Uniku biex jiġu bbilanċjati
l-ispejjeż. Barra minn hekk,
saru xi żviluppi leġiżlattivi li qed iwasslu għal aktar
armonizzazzjoni tal-kundizzjonijiet qafas fis-settur tat-trasport
tal-merkanzija bit-triq. Dawn jinkludu l-użu dejjem aktar ta' sistemi
tat-tariffi tat-triq, armonizzazzjoni teknika addizzjonali u titjib
fis-sikurezza tal-vetturi tat-trasport bit-triq, u aktar kooperazzjoni bejn
l-Istati Membri tal-UE biex jindirizzaw ir-reati tat-traffiku. Dawn
l-iżviluppi jillimitaw ir-riskju għas-sikurezza stradali li tista'
toħloq żieda fil-pressjoni kompetittiva, b'mod partikolari fil-każ
tal-ftuħ ulterjuri tas-suq. Hemm skopiiet
għall-armonizzazzjoni ulterjuri fl-infurzar tad-dispożizzjonijiet
dwar l-aċċess għas-suq ta' trasport tal-merkanzija bit-triq, li
għadhom differenti bejn l-Istati Membri. B'mod partikolari,
id-dispożizzjonijiet ta' kabotaġġ fir-Regolament (KE)
Nru 1072/2009 u dwar l-istabbiliment stabbli u effettiv fir-Regolament
(KE) Nru 1071/2009 ma jidhrux li qed jiġu applikati b'mod uniformi.
Dan iwassal biex it-trasportaturi jaħdmu f'kundizzjonijiet mhux ekwi u
joħloq diffikultajiet għall-awtoritajiet ta' infurzar li huma
responsabbli mill-applikazzjoni ta' dawn ir-regoli. L-indirizzar ta' dawn
in-nuqqasijiet se jgħin biex tiġi limitata d-delokalizzazzjoni
illegali, li taffettwa b'mod negattiv il-kompetizzjoni u l-kundizzjonijiet
tax-xogħol.
7.3.
Il-passi li jmiss
Mill-elementi
ta' hawn fuq jidher li għandha titqies riforma oħra biex
tiċċara d-dispożizzjonijiet dwar l-aċċess
għas-suq ta' trasport tal-merkanzija bit-triq tal-UE. Riforma
bbilanċjata, li tinkludi dispożizzjonijiet li jiżguraw
l-applikazzjoni uniformi tar-regoli ta' aċċess għas-suq,
tiċċara d-dispożizzjonijiet legali li l-Istati Membri u
l-industrija jifhmu u japplikaw b'mod differenti. Regoli aktar ċari
jipprovdu l-bażi għal kultura msaħħa ta' konformità u
jillimitaw il-possibbiltajiet ta' frodi (fil-qasam fiskali jew soċjali).
Din hija kundizzjoni sine qua non biex titjieb il-koerenza tal-infurzar
li huwa mistenni minn Żona Unika Ewropea tat-Trasport. Ir-reviżjoni
pjanata tar-Regolamenti (KE) Nru 1071/2009 u (KE) Nru 1072/2009 skont
l-eżerċizzju REFIT se tkun l-ewwel pass f'din id-direzzjoni. Abbażi ta'
miżuri xierqa ta' infurzar, ikun xieraq li ssir reviżjoni gradwali
ta' xi restrizzjonijiet arkajki li għadhom jeżistu
għall-aċċess tas-suq. Il-kundizzjonijiet għall-operazzjoni
ta' kabotaġġ jillimitaw is-swieq li huma aċċessibbli
għat-trasportaturi tal-UE, peress li s-swieq domestiċi jammontaw
għal madwar żewġ terzi tal-volumi tat-trasport bit-triq.
It-tneħħija gradwali ta' dawn ir-restrizzjonijiet tista'
tikkontribwixxi għat-tnaqqis tal-piż amministrattiv li qed
joħolqu r-regoli kumplessi u mhux ċari ta' bħalissa. Barra minn
hekk, dan se jippermetti li jkun hemm titjib fir-rigward tal-offerta u
d-domanda tat-trasport. Kif uriet ir-riċerka, it-tnaqqis
tar-restrizzjonijiet ta' kabotaġġ jista' jikkontribwixxi għal
settur ta' trasport bit-triq aktar ekonomiku u effiċjenti
fir-riżorsi, peress li dan jista' jwassal għal tnaqqis ta'
vjaġġi mingħajr tagħbija u jkollu parti importanti
fiż-żieda tal-ekonomija u tal-effiċjenza tal-fjuwil fis-settur.
Inizjattivi oħra se jikkontribwixxu wkoll għal dan,
bħall-Komunikazzjoni li jmiss li tinkludi strateġija
għat-Tnaqqis tal-Konsum tal-Fjuwil u tal-Emissjonijiet tad-CO2
f'Vetturi b'Merkanzija Tqila. Sabiex jiġi
żgurat li d-dimensjonijiet ekonomiċi u dawk soċjali jimxu id
f'id, se jkun meħtieġ li jitfasslu miżuri li għandhom
l-għan li jġibu lura l-attrattività tal-professjoni u li jtejbu
l-ambjent tax-xogħol tas-sewwieqa. Dan jinkludi miżuri dwar
l-infurzar, il-kontroll u l-mitigazzjoni ta' frodi fiskali u soċjali, kif
ukoll titjib fil-livelli u l-ħiliet ta' taħriġ. Dan se jkun ta'
benefiċċju għall-ekonomija inġenerali u se jtejjeb
l-attrattività tal-professjoni. Il-forniment tal-industrija b'forza
tax-xogħol imħarrġa tajjeb ħafna u lesta
għax-xogħol jgħin ukoll fit-tweġiba għan-nuqqas
imminenti ta' sewwieqa. Barra minn hekk, għandu jitkompla x-xogħol
biex jitjieb l-infurzar tad-dispożizzjonijiet soċjali tal-UE
fit-trasport bit-triq, li jinkludi dawk relatati mal-ħin ta' sewqan u l-perjodi
ta' mistrieħ. Fil-każijiet
kollha fejn l-istrumenti u l-miżuri attwali jew dawk maħsuba u li
jissemmew f'dan ir-Rapport jinvolvu l-ipproċessar ta' dejta personali, dan
irid isir f'konformità mad-Direttiva 95/46/KE[58] dwar
il-protezzjoni ta' dejta personali u mad-dispożizzjonijiet nazzjonali li
jimplimentawha. Kif irrimarka
l-President Barroso fid-diskors tiegħu dwar l-Istat tal-Unjoni
tal-11 ta' Settembru 2013: "Għandna suq uniku li
jiffunzjona tajjeb fejn jidħlu l-prodotti, u qed naraw
il-benefiċċji ekonomiċi ta' dan. Għandna bżonn nestendu
l-istess formola lejn oqmsa oħrajn: fil-mobilità, il-komunikazzjoni,
l-enerġija, il-finanzi u l-kummerċ elettroniku, biex insemmi biss xi
ftit aspetti. Irridu nneħħu l-ostakli li jżommu lura lil
kumpaniji u persuni dinamiċi. Jeħtieġ li nwettqu l-proġett
li l-Ewropa tkun konnessa." [1] Ir-Regolament (KE) Nru 1072/2009 tal-Parlament
Ewropew u tal-Kunsill tal-21 ta’ Ottubru 2009 dwar regoli komuni
għall-aċċess għas-suq internazzjonali tat-trasport bit-triq
tal-merkanzija, ĠU L 300, 14.11.2009, p. 72-87. [2] B'mod partikolari "Collection and Analysis of Data
on the Structure of the Road Haulage Sector in the European Union" (AECOM
2013); "Development and Implementation of Road Cabotage"
(Il-Parlament Ewropew 2013); "Road Haulage Charges and Taxes. Summary analysis
and data tables 1998-2012" (OECD 2013); "Kundizzjonijiet Soċjali
u tax-Xogħol tat-Trasportaturi tat-Trasport bit-Triq" (Il-Parlament
Ewropew 2013). [3] Għal raġunijiet ta' disponibbiltà tad-dejta,
dan ir-rapport jiddiskuti l-iżviluppi fis-suq tat-trasport tal-merkanzija
bit-triq tal-UE sal-2012 biss. Għaldaqstant, matul id-dokument kollu
jirreferi għall-UE-27. [4] Jiġifieri r-Regolament (KE) Nru 561/2006 dwar
il-ħinijiet tas-sewqan, il-pawżi u l-perjodi ta' mistrieħ
tas-sewwieqa professjonali; Id-Direttiva 2006/22/KE dwar ir-rekwiżiti
minimi għall-infurzar ta' dawn ir-regoli; Ir-Regolament (KEE)
Nru 3821/85 dwar apparat ta' reġistrazzjoni u
d-Direttiva 2002/15/KE dwar il-ħin tax-xogħol ta' ħaddiema
mobbli. [5] Rapport tal-Grupp ta' Livell
Għoli dwar l-Iżvilupp tas-Suq tat-Trasportaturi Stradali tal-UE,
immexxi mill-Prof Bayliss, Ġunju 2012. [6] L-Idoneità u l-Prestazzjoni tar-Regolamentazzjoni (REFIT):
Ir-Riżultati u l-Passi li Jmiss, COM (2013) 685 finali [7] "UE-15" tirreferi għall-Istati Membri
tal-UE qabel l-1 ta' Mejju 2004; l-Istati Membri li ssieħbu
mal-UE fl-2004 u l-2007 huma inklużi fl-"UE-12". [8] "Collection and Analysis of Data on the Structure
of the Road Haulage Sector in the European Union", AECOM, 2013. [9] "Panorama économique et financier du transport
routier en France", Banque de France, 2012. [10] Pereżempju, l-ETF (European Transport Federation -
il-Federazzjoni Ewropea tat-Trasport), id-DTL (Danish Transport and Logistics
Association - l-Assoċjazzjoni Daniża dwar it-Trasport u
l-Loġistika) u l-FNTR (French National Federation for Road Transport -
il-Federazzjoni Nazzjonali Franċiża għat-Trasport bit-Triq). [11] Danmarks Produktivitet – Hvor er
problemerne?, Produktivitets Komissionen, 2013 [12] L-Impjiegi u l-Iżviluppi Soċjali fl-Ewropa
tal-2012, il-Kummissjoni Ewropea. [13] Din it-taqsima tuża ċifri miġbura mill-Eurostat,
iżda l-miżuri tal-fatturi ta' tagħbija ta' vetturi jistgħu
jvarjaw skont it-tip ta' tagħbija ttrasportata. Il-fatturi ta'
tagħbija huma limitati wkoll minn fatturi esterni bħall-piżijiet
u d-dimensjonijiet tal-vettura. Ara wkoll: Beladingsgraad van gewicht en
volume. Het vergelijken van lood met veren, Transport en Logistiek Nederlands,
2013. [14] Cabotage en CO2-reductie, Notitie met een eerste
verkenning naar de potentiële reductie van CO2 door cabotage, Kennisinstituut
voor Mobiliteitsbeleid (2010). [15] L-Italja ppermettiet li t-trasportaturi jwettqu
kabotaġġ fit-territorju tagħha għal massimu ta' 15-il
ġurnata fix-xahar, li jinkludu mhux aktar minn ħamest ijiem
konsekuttivi kull darba. Ir-Renju Unit adotta interpretazzjoni ta'
kabotaġġ bħala attività 'temporanja' li skontha trasportatur
għandu jkun kapaċi jagħti prova li l-vettura tiegħu qed
tħalli t-territorju tar-Renju Unit minn tal-inqas darba f'xahar. Fl-1998,
il-Greċja ffissat limitu għall-kabotaġġ ta' xahrejn
fis-sena, li nbidel fis-sena 2000 permezz ta' ċirkolari li
tneħħi kull limitu ta' ħin għall-kabotaġġ u li
minflok hija bbażata fuq definizzjoni ta' kabotaġġ bħala
attività li mhix permanenti, frekwenti, regolari jew kontinwa. B'żieda ma'
ċerti kundizzjonijiet oħra, il-vetturi kienu mitluba jħallu
t-territorju tal-Greċja minn tal-inqas darba fix-xahar. It-tentattiv
tal-2002 ta' Franza li tillimita l-attivitajiet ta' kabotaġġ
għal ġimgħa kull darba, ġie rrifjuat mill-Kummissjoni
peress li tqies bħala sproporzjonat. [16] Skeda informattiva Nru 4/1, ASSIST - Valutazzjoni
tal-impatti soċjali u ekonomiċi tal-politika, tal-passat u tal-futur,
dwar it-trasport sostenibbli fl-UE. [17] Onderzoek naar de gevolgen voor
Nederland van het verder vrijgeven van cabotage, Policy Research Corporation in
opdracht van Ministerie van Infrastructuur en Milieu, 2013. [18] Id-Direttiva 96/71/KE tal-Parlament Ewropew u
tal-Kunsill tas-16 ta' Diċembru 1996 dwar l-impjieg ta'
ħaddiema fil-qafas ta' prestazzjoni ta' servizzi, ĠU L 18,
21.1.1997, p. 1-6; Ir-Regolament (KE) Nru 593/2008 tal-Parlament
Ewropew u tal-Kunsill tas-17 ta' Ġunju 2008 dwar
il-liġi applikabbli għall-obbligazzjonijiet kuntrattwali (Ruma I),
ĠU L 177, 4.7.2008, p. 6-16. [19] F'Lulju tal-2013, 21 pajjiż mit-28 Stat Membru tal-UE
(kollha ħlief id-Danimarka, il-Ġermanja, l-Italja, Ċipru,
l-Awstrija, il-Finlandja u l-Isvezja) kellhom leġiżlazzjoni
nazzjonali li tistabbilixxi paga minima skont l-istatut jew bi ftehim
intersettorjali nazzjonali. Il-ftehim kollettiv huwa stabbilit f'dawk l-Istati
Membri li ma jistabbilixxux paga minima, għalkemm dan il-ftehim kollettiv
jista' japplika biss għal ċerti impriżi (bħal dawk li huma
membri tal-Kmamar tal-Kummerċ) u jista' jvarja minn reġjun għal
ieħor ta' Stat Membru partikolari. [20] Skont ir-Regolament (KE) Nru 561/2006, is-sussidji
bbażati fuq id-distanza huma illegali jekk huma ta' natura li jipperikolaw
is-sikurezza stradali. [21] Auch zu Hause wird gut verdient - Deutscher Arbeitsmarkt
für bulgarische und rumänische LKW-Fahrer wenig attraktiv, Deutsche
Verkehrszeitung, it-28 ta' Jannar 2014. [22] "Collection and Analysis of Data on the Structure of
the Road Haulage Sector in the European Union", AECOM, 2013. [23] Id-Direttiva 96/71/KE tal-Parlament Ewropew u
tal-Kunsill tas-16 ta' Diċembru 1996 dwar l-impjieg ta'
ħaddiema fil-qafas ta' prestazzjoni ta' servizzi, ĠU L 18,
21.1.1997, p. 1. [24] Ir-Regolament (KE) Nru 593/2008 tal-Parlament Ewropew
u tal-Kunsill tas-17 ta' Ġunju 2008 dwar il-liġi
applikabbli għall-obbligazzjonijiet kuntrattwali (Ruma I), ĠU
L 177, 4.7.2008, p. 6. [25] Id-Direttiva tal-Kunsill 2003/96/KE
tas-27 ta' Ottubru 2003 li tirriforma l-istruttura tal-Komunità
dwar tassazzjoni fuq prodotti ta' enerġija u elettriku, ĠU
L 283, 31.10. 2003, p. 51. [26] "Collection and Analysis of Data on the Structure of
the Road Haulage Sector in the European Union", AECOM, 2013. [27] Id-Direttiva 1999/62/KE tal-Parlament Ewropew u
tal-Kunsill tas-17 ta' Ġunju 1999 dwar il-ħlas li jrid
isir minn vetturi ta' merkanzija tqila għall-użu ta' ċerti
infrastrutturi, kif immodifikata bid-Direttiva 2006/38/UE u bid-Direttiva
2011/76/UE. [28] Ir-Regolament (KE) Nru 1071/2009 tal-Parlament
Ewropew u tal-Kunsill tal-21 ta’ Ottubru 2009 li jistabbilixxi
regoli komuni dwar il-kondizzjonijiet li għandhom jiġu rispettati
għall-eżerċizzju tal-professjoni ta’ operatur tat-trasport
bit-triq u li jħassar id-Direttiva tal-Kunsill 96/26/KE, ĠU
L 300, 14.11.2009, p. 51. [29] Din l-attività ta' spezzjoni fl-impjiegi ta' ħaddiema
fit-trasport bit-triq: gwida għall-awtoritajiet ta' kontroll. Rapport
finali tal-proġett TRANSPO, Marzu 2012 www.tagliacarne.it/download/229.html [30] Skont l-Artikolu 12(2) tar-Regolament (KE)
Nru 1071/2009: "Sal-31 ta’ Diċembru 2014,
l-Istati Membri għandhom iwettqu kontrolli minn tal-inqas kull ħames
snin biex jivverifikaw li l-impriżi jissodisfaw [ir-rekwiżiti
meħtieġa għall-eżerċizzju tal-professjoni ta' operatur
ta' trasport bit-triq]". [31] "The new cabotage regime under Regulation (EC) No
1072/2009, Questions & Answers". Il-Kummissjoni Ewropea, 2011 http://ec.europa.eu/transport/modes/road/haulage/doc/qa_the_new_cabotage_regime_2011.pdf
[32] http://ekstrabladet.dk/112/article2107804.ece,
għal aktar informazzjoni jekk jogħġbok ara: http://www.ft.dk/samling/20121/almdel/TRU/spm/464/svar/1050069/1244171/index.htm?/samling/20121/almdel/TRU/spm/464/svar/1050069/1244171/index.htm [33] L-Idoneità Regolatorja tal-UE (COM(2012)746) [34] Ir-Regolament (KE) Nru 561/2006 tal-Parlament Ewropew u
tal-Kunsill tal-15 ta' Marzu 2006 dwar l-armonizzazzjoni ta'
ċerta leġiżlazzjoni soċjali li għandha x'taqsam
mat-trasport bit-triq u li jemenda r-Regolamenti tal-Kunsill (KEE)
Nru 3821/85 u (KE) Nru 2135/98 u li jħassar ir-Regolament
tal-Kunsill (KEE) Nru 3820/85, ĠU L 102, 11.4.2006, p. 1. [35] Id-Direttiva 2002/15/KE tal-Parlament Ewropew u
tal-Kunsill tal-11 ta’ Marzu 2002 dwar l-organizzazzjoni
tal-ħin tax-xogħol ta’ ħaddiema li jwettqu attivitajiet mobbli
tat-trasport fit-toroq, ĠU L 80, 23.3.2002, p.35. [36] Id-Direttiva 2006/22/KE tal-Parlament Ewropew u
tal-Kunsill tal-15 ta' Marzu 2006 dwar il-kondizzjonijiet minimi
għall-implimentazzjoni tar-Regolamenti tal-Kunsill (KEE) Nri 3820/85
u 3821/85 dwar il-leġiżlazzjoni soċjali li għandha x'taqsam
ma' attivitajiet tat-trasport bit-triq u li tħassar id-Direttiva
tal-Kunsill 88/599/KEE, ĠU L 102, 11.4.2006, p. 35. [37] Ir-Regolament tal-Kunsill (KEE) Nru 3821/85
tal-20 ta' Diċembru 1985 dwar apparat ta'
reġistrazzjoni għat-trasport bit-triq, ĠU L 370, 31.12.1985,
p. 8. [38] http://ec.europa.eu/transport/modes/road/social_provisions/driving_time/guidance_notes_en.htm [39] http://www.traceproject.eu [40] Il-White Paper "Pjan direzzjonali għal Żona
Unika Ewropea tat-Trasport – Lejn sistema tat-trasport kompetittiva u li
tuża r-riżorsi b'mod effiċjenti", COM(2011)144 finali [41] "OSH in figures:
Occupational safety and health in the transport sector — An overview",
l-Aġenzija Ewropea għas-Sigurtà u s-Saħħa fuq il-Post
tax-Xogħol, 2011. [42] "Overview and Evaluation of
Enforcement in the EU Social Legislation for the Professional Road Transport
Sector", il-Parlament Ewropew, 2012. [43] "Kundizzjonijiet Soċjali u tax-Xogħol
tat-Trasportaturi tat-Trasport bit-Triq", il-Parlament Ewropew, 2013. [44] "Report on the implementation in 2009-2010 of
Regulation (EC) No 561/2006 on the harmonisation of certain social legislation
relating to road transport and of Directive 2002/15/EC on the organisation of
the working time of persons performing mobile road transport activities",
SWD(2012) 270 finali. [45] "Overview and Evaluation of
Enforcement in the EU Social Legislation for the Professional Road Transport
Sector", il-Parlament Ewropew, 2012. [46] "Kompetizzjoni Soċjali fl-UE: Fantażiji u
Realtajiet", Notre Europe - l-Istitut Jacques Delors, 2013. [47] ZF-Zukunftsstudie Fernfahrer. Der Mensch im Transport- und
Logistikmarkt, Institut für Nachhaltigkeit in Verkehr und Logistik, Stuttgart
2012. [48] COM(2010)614 finali. [49] Id-Direttiva 2004/52/KE tal-Parlament Ewropew u tal-Kunsill
tad-29 ta' April 2004 dwar l-interoperabilità ta' sistemi
elettroniċi dwar taxxi tat-toroq fil-Komunità, ĠU L 166,
30.4.2004, p. 124. [50] Id-Deċiżjoni tal-Kummissjoni 2009/750/KE
tas-6 ta' Ottubru 2009 dwar id-definizzjoni tas-Servizz
Elettroniku Ewropew tan-Nollijiet u l-elementi tekniċi tiegħu,
ĠU L 268, 13.10.2009, p. 11-29. [51] Bħala medja, nofs il-vetturi-km kollha misjuqa
mit-trasportaturi tal-UE15 huma minn vetturi li għandhom massimu ta'
5 snin. Is-sehem korrispondenti għat-trasportaturi tal-UE12 huwa qrib
terz (32 %). Il-flotta użata għal operazzjonijiet
internazzjonali ta' trasport ġeneralment hija iżgħar minn dik
użata għal operazzjonijiet nazzjonali ta' trasport. Ma hemmx
differenzi kbar fl-età medja tal-vetturi minn kwalunkwe Stat Membru użati
fit-trasport internazzjonali. [52] Ir-Regolament tal-Kummissjoni (UE) Nru 1230/2012
tat-12 ta' Diċembru 2012 li jimplimenta r-Regolament (KE)
Nru 661/2009 tal-Parlament Ewropew u tal-Kunsill dwar rekwiżiti
għall-approvazzjoni tat-tip għall-mases u d-dimensjonijiet
tal-vetturi bil-mutur u t-trejlers tagħhom u li jemenda d-Direttiva
2007/46/KE tal-Parlament Ewropew u tal-Kunsill, ĠU L 353, 21.12.2012,
p. 31-79. [53] Xi Stati Membri ma ppreżentaw l-ebda dejta
komparabbli u għalhekk ma jidhrux. Dawn l-Istati Membri huma l-Bulgarija,
l-Ungerija, l-Estonja, il-Latvja, il-Litwanja, is-Slovakkja, Malta u
Ċipru. L-Isvezja u l-Pajjiżi l-Baxxi ma ppreżentawx dejta
għall-2010. [54] Id-Direttiva 2011/82/UE tal-Parlament Ewropew u
tal-Kunsill tad-25 ta' Ottubru 2011 li tiffaċilita
l-iskambju transkonfinarju ta' informazzjoni fir-rigward ta' reati tat-traffiku
relatati mas-sikurezza fit-toroq, ĠU L 288, 5.11.2011, p. 1-15. [55] Proposta għal Regolament tal-Parlament Ewropew u
tal-Kunsill dwar it-testijiet perjodiċi tal-affidabbiltà stradali
għal vetturi bil-mutur u t-trejlers tagħhom u li jħassar
id-Direttiva 2009/40/KE, (COM(2012) 380 final). [56] Proposta għal Direttiva tal-Parlament Ewropew u
tal-Kunsill li temenda d-Direttiva 96/53/KE
tal-25 ta' Lulju 1996, li tistabbilixxi għal ċerti
vetturi tat-triq li jiċċirkolaw fi ħdan il-Komunità
d-dimensjonijiet massimi awtorizzati fit-traffiku nazzjonali u internazzjonali
u l-piżijiet massimi awtorizzati fit-traffiku internazzjonali,
(COM(2013) 195 finali). [57] Proposta għal Direttiva tal-Kunsill li temenda
d-Direttiva 2003/96/KE li tirriforma l-istruttura tal-Komunità dwar
tassazzjoni fuq prodotti ta’ enerġija u elettriku, (COM(2011) 169/3). [58] Id-Direttiva 95/46/KE tal-Parlament Ewropew u
tal-Kunsill tal-24 ta’ Ottubru 1995 dwar il-protezzjoni ta’
individwi fir-rigward tal-ipproċessar ta’ dejta personali u dwar
il-moviment liberu ta’ dik id-dejta, ĠU L 281, 23.11.1995,
p. 31.