RAPPORT TAL-KUMMISSJONI LILL-PARLAMENT EWROPEW U LILL-KUNSILL f'konformità mal-Artikolu 25 tar-Regolament (KE) Nru 1394/2007 tal-Parlament Ewropew u tal-Kunsill dwar prodotti mediċinali ta’ terapija avvanzata u li jemenda d-Direttiva 2001/83/KE u r-Regolament (KE) Nru 726/2004 /* COM/2014/0188 final */
RAPPORT TAL-KUMMISSJONI LILL-PARLAMENT
EWROPEW U LILL-KUNSILL f'konformità mal-Artikolu 25
tar-Regolament (KE) Nru 1394/2007 tal-Parlament Ewropew u tal-Kunsill dwar
prodotti mediċinali ta’ terapija avvanzata u li jemenda d-Direttiva
2001/83/KE u r-Regolament (KE) Nru 726/2004 (Test b'rilevanza għaż-ŻEE) 1. Introduzzjoni Il-progress xjentifiku wassal għal tip
ġdid ta’ prodotti mediċinali bbażati fuq it-terapija
ġenetika, it-terapija taċ-ċelloli somatiċi jew
l-inġinerija tat-tessuti. Biex jistipula qafas komuni
għall-kummerċjalizzazzjoni tal-hekk imsejħa prodotti
mediċinali ta’ terapija avvanzata (minn hawn’ il quddiem “ATMPs”), fl-2007
ġie adottat ir-Regolament (KE) Nru 1394/2007 tal-Parlament Ewropew u
tal-Kunsill dwar prodotti mediċinali ta’ terapija avvanzata (minn hawn 'il
quddiem “ir-Regolament ATMP”)[1] Ir-Regolament ATMP tfassal biex jiżgura
livell għoli ta’ ħarsien tas-saħħa tal-bniedem kif ukoll
il-moviment liberu ta’ ATMPs fl-UE. Il-bażi fundamentali ta’ dan
ir-Regolament huwa li awtorizzazzjoni ta'kummerċjalizzazzjoni għandha
tinkiseb qabel il-kummerċjalizzazzjoni ta’ ATMPs. L-awtorizzazzjoni ta'
kummerċjalizzazzjoni tista’ tingħata biss jekk, wara valutazzjoni
xjentifika tal-profil tal-kwalità, l-effikaċja u s-sikurezza, jintwera li
l-benefiċċji jgħelbu r-riskji. L-applikazzjoni għal
awtorizzazzjoni ta' kummerċjalizzazzjoni għandha titressaq quddiem
l-Aġenzija Ewropea għall-Mediċini (minn hawn’ il quddiem
imsejħa “l-Aġenzija”) u d-deċiżjoni finali tittieħed
mill-Kummissjoni. Din il-proċedura tassigura li dawn il-prodotti
jiġu vvalutati minn korp speċjalizzat (il-Kumitat għat-Terapiji
Avvanzati; minn hawn ’il quddiem “CAT”) u li l-awtorizzazzjoni ta'
kummerċjalizzazzjoni hija valida fl-Istati Membri kollha tal-UE. Ir-Regolament ATMP jagħti s-setgħa
lill-Aġenzija biex tagħmel rakkomandazzjonijiet xjentifiċi dwar
jekk prodott partikolari għandux jitqies bħala ATMP (minn hawn ’il
quddiem “klassifikazzjonijiet”). Barra minn hekk, dan stipula strument
ġdid, l-hekk imsejħa proċedura ta’ ċertifikazzjoni,
imfassal bħala inċentiv għal intrapriżi żgħar u
ta’ daqs medju (minn hawn ’il quddiem “SMEs”) li kienu involuti fl-ewwel stadji
tal-iżvilupp ta’ ATMPs iżda li ma kellhomx ir-riżorsi biex
iwettqu provi kliniċi. Speċifikament, iċ-ċertifikazzjoni
li l-aspetti prekliniċi u ta' kwalità tal-iżvilupp huma konformi
mar-rekwiżiti regolatorji rilevanti kienet mistennija li tgħin
lill-SMEs biex jattiraw il-kapital u biex jitħaffef it-trasferiment ta’
attivitajiet ta’ riċerka lil entitajiet bil-kapaċità li jikkummerċjalizzaw
prodotti mediċinali. Ir-Regolament tal-ATMP japplika mit-30 ta’
Diċembru 2008. Madankollu, ġie previst perjodu tranżizzjonali
għall-ATMPs li kienu diġà fis-suq tal-UE meta ġie adottat
r-Regolament. Speċifikament, it-terapija ġenetika u t-terapija
taċ-ċelloli somatiċi kienu meħtieġa li jikkonformaw
mar-Regolament sat-30 ta’ Diċembru 2011, filwaqt li l-prodotti
mill-inġinerija tat-tessuti kienu meħtieġa jikkonformaw
mar-rekwiżiti l-ġodda sat-30 ta’ Diċembru 2012. Permezz ta’ dan ir-rapport, imħejji
f’konformità mal-Artikolu 25 tar-Regolament tal-ATMP, il-Kummissjoni tqis
il-qagħda tal-ATMPs fl-UE u tanalizza l-impatt tar-Regolament dwar
terapiji avvanzati. Ir-rapport jikkunsidra r-riżultat tal-konsultazzjoni
pubblika dwar l-applikazzjoni tar-Regolament tal-ATMP mwettqa mis-servizzi
tal-Kummissjoni (minn hawn ’il quddiem “konsultazzjoni pubblika”).[2] 2. Attivitajiet ta’
Riċerka u Żvilupp dwar Terapiji Avvanzati fl-UE: Il-qagħda
attwali Hemm riċerka sinifikanti fit-terapiji
avvanzati fl-UE. Speċifikament, sa 250 ATMPs distinti ġew
irrapportati fil-EudraCT[3]
tul il-perjodu 2004-2010. Il-biċċa l-kbira ta’ riċerka
f’terapiji avvanzati titwettaq minn kumpaniji żgħar u entitajiet li
joperaw fuq bażi mhux għall-profitt. Għaldaqstant, kważi
70 % tas-sostenituri tal-provi kliniċi dwar ATMPs irrappurtati
fil-EudraCT huma organizzazzjonijiet mhux għall-profitt jew SMEs;
kumpaniji farmaċewtiċi kbar huma responsabbli għal inqas minn
2 % tal-inizjattivi ta' sostenn. Bl-istess mod, il-biċċa
l-kbira tal-applikazzjonijiet għal parir xjentifiku lill-CAT huma
mressqawkoll minn SMEs (ara t-Taqsima 3.5). It-tisrif ta’ attivitajiet ta’ riċerka fi
prodotti mediċinali disponibbli għall-pazjenti hija ġeneralment
diffiċli. Frazzjoni żgħira biss mill-molekuli investigati
bħala prodotti mediċinali potenzjali eventwalment jiksbu
awtorizzazzjoni ta'kummerċjalizzazzjoni. Il-biċċa l-kbira
tal-molekoli investigati saħansitra lanqas jaslu sal-istadju tal-ittestjar
fuq il-bnidem għal għadd ta’ raġunijiet (peż. l-attività
preżunta tal-molekula jew il-mekkaniżmu ta’ azzjoni ma jkunux
ikkonfermat, jew l-istudji prekliniċi juru li l-profil tas-sikurezza
mhuwiex aċċettabbli). Barra minn hekk, huwa stmat li, bħala
medja, inqas minn kwart tal-molekoli li jiġu ttestjati fi provi kliniċi
jiksbu awtorizzazzjoni ta'kummerċjalizzazzjoni. Tipikament, it-triq
mill-identifikazzjoni ta’ sustanza attiva sal-awtorizzazzjoni tal-prodott
mediċinali tista’ tieħu iktar minn għaxar snin. Minħabba l-karatteristiċi
speċifiċi ta’ terapiji avvanzati, l-iżviluppaturi ta’ ATMPs
jħabbtu wiċċhom ma’ diffikultajiet addizzjonali.
Pereżempju, il-varjabbiltà tal-materjali ta' sors jagħmilha
diffiċli li wieħed juri l-omoġenità tal-prodott. Bl-istess mod,
daqsijiet żgħar tal-lottijiet li huma tipikament disponibbli u
żmien tal-ħżin (li jvarjaw minn ftit sigħat sa ftit jiem)
jistgħu jagħmlu l-ittestjar estensiv impossibbli. Barra minn hekk,
it-twettiq ta’ provi kliniċi aleatorji kontrollati jista’ ma jkunx dejjem
vijabbli, pereżempju, jekk l-amministrazzjoni tal-prodott tkun
teħtieġ proċedura kirurġika (jiġifieri
l-biċċa l-kbira tal-prodotti ta' inġinerija tat-tessuti), jew
meta l-ebda trattamenti alternattivi ma jkun disponibbli. Barra minn hekk, l-iżvilupp ta’ ATMPs huwa
mxekkel iżjed minħabba l-fatt li r-riċerkaturi normalment ma
jkollhomx finanzjament xieraq u kompetenza regolatorja biex jaffaċċaw
b’suċċess il-proċeduri ta’ awtorizzazzjoni ta'
kummerċjalizzazzjoni. Min-naħa l-oħra, l-inċertezzi
fir-redditu għall-investiment huma deterrent ewlieni għall-investituri. 3. Ħarsa ġenerali
lejn l-applikazzjoni tar-Regolament tal-ATMP mill-1 ta’ Jannar 2009 sat-30 ta’
Ġunju 2013 Ir-regolazzjoni ta’ ATMPs kien pass importanti
biex l-pazjenti jitħarsu minn trattamenti xjentifikament ħżiena
. Barra minn hekk, ir-Regolament tal-ATMP ħoloq qafas komuni
għall-valutazzjoni ta’ terapiji avvanzati fl-UE. Għadna fil-bidu tal-iżvilupp ta’
terapiji avvanzati u erba' ATMPs biss ingħataw awtorizzazzjoni
ta'kummerċjalizzazzjoni. Madankollu, l-attività ħafna aktar
ogħla tal-CAT fil-qasam tal-konsulenza u l-klassifikazzjoni xjentifika,
kif ukoll l-għadd kbir ta’ provi kliniċi li jinvolvu ATMPs, huwa
sinjal ta’ dinamika fis-settur tar-riċerka. 3.1. Korp speċjalizzat u
qafas regolatorju adattat L-istabbiliment ta’ CAT, kif stipulat fl-Artikolu 20
tar-Regolament, kien tragward ewlieni fl-implimentazzjoni tar-Regolament
tal-ATMP. Dan il-kumitat jiġbor xi wħud mill-aqwa esperti
disponibbli fl-UE biex tiġi vvalutata l-kwalità, is-sikurezza u
l-effikaċa tal-ATMPs. Dan kellu l-ewwel laqgħa tiegħu f’Jannar
2009. Barra minn hekk, il-grupp ta’ kollaborazzjoni bejn il-CAT u l-korpi
notifikati għall-mezzi mediċi twaqqaf f’Novembru tal-2010 bħala
grupp konsultattiv għall-CAT dwar ATMPs kombinati.[4] Ir-Regolament tal-ATMP ta s-setgħa
lill-Kummissjoni biex tadotta rekwiżiti speċifiċi dwar
il-kontenut ta’ applikazzjonijiet għal awtorizzazzjoni ta'
kummerċjalizzazzjoni, prattiki tajba tal-manifattura, prattika klinika
tajba, u t-traċċabilità ta’ ATMPs. Emenda għall-Parti IV
tal-Anness tad-Direttiva 2001/83/KE adottata fl-14 ta’ Settembru 2009 adattat
xi wħud mir-rekwiżiti f’termini tal-kontenut ta’ applikazzjonijiet
għall-awtorizzazzjoni ta' kummerċjalizzazzjoni.[5] Barra minn hekk, linja
gwida riveduta dwar prassi tajba ta’ manifattura li fiha adattamenti
speċifiċi għal ATMPs ilha tapplika sa mill-31 ta’ Jannar 2013.[6] Madanakollu,
l-adozzjoni ta’ rekwiżiti speċifiċi dwar prassi klinika tajba u
t-traċċabbiltà għadha pendenti peress li esperejnza addizjonali
kienet meqjusa meħtieġa biex ikun hemm fehim aħjar tat-tipi ta'
adattamenti meħtieġa.[7]
Dispożizzjonijiet speċifiċi li
jirregolaw il-proċedura ta’ ċertifikazzjoni ġew adottati
bir-Regolament tal-Kummissjoni (KE) Nru 668/2009 tal-24 ta’ Lulju 2009.[8] 3.2. Awtorizzazzjoni ta'
kummerċjalizzazzjoni Għaxar applikazzjonijiet ta' awtorizzazzjoni
għal ATMP kienu ġew ippreżentati lill-Aġenzija sat-30 ta’
Ġunju 2013. Ħamsa minnhom kienu jikkonċernaw prodotti li qabel
kienu fis-suq tal-UE. Mill-għaxar applikazzjonijiet
għall-awtorizzazzjoni għat-tqegħid fis-suq, erba’ temmew
b’suċċess il-proċedura u ngħataw awtorizzazzjoni
għat-tqegħid fis-suq mill-Kummissjoni: - ChondroCelect,
prodott mill-inġinerija tat-tessuti indikat biex jitratta d-difetti
sintomatiċi uniċi tal-qarquċa tal-kondil femorali tal-irkoppa
fl-adulti;[9]
- Glybera,
prodott mediċinali ta’ terapija ġenetika indikat għal pazjenti
adulti dijanjostikati b’defiċjenza tal-lipoproteina lipażi familjali
(LPLD) u li jbatu minn attakki severi jew multipli ta' pankreatite minkejja
restrizzjonijiet tax-xaħam fid-dieta ;[10] - MACI,
ATMP kkombinat indikat għat-tiswija ta' difetti sintomatiċi
fil-ħxuna kollha tal-qarquċa (grad III u IV tal-Iskala Modifikata ta'
Outerbridge) ta' 3-20 cm2 f'pazjenti adulti bi skeletru matur.[11] - Provenge,
prodott mediċinali ta’ terapija ċellulari somatika indikat
għat-trattament tal-kanċer tal-prostata reżistenti
għall-kastrazzjoni asintomatiku jew minimalment sintomatiku (mhux
vixxerali) metastatiku f'adulti maskili li għalihom għadha ma
ġietx indikata klinikament il-kimoterapija.[12] B’kuntrast, erba’ applikazzjonijiet
għall-awtorizzazzjoni ta' kummerċjalizzazzjoni fallew. Waħda
minn dawn l-applikazzjonijiet ikkorrispondiet għal prodott li kien fis-suq
qabel id-dħul fis-seħħ tar-Regolament tal-ATMP. Żewġ applikazzjonijiet għal
awtorizzazzjoni ta'kummerċjalizzazzjoni kienu taħt valutazzjoni
mill-CAT fit-30 ta’ Ġunju 2013. 3.3. Klassifikazzjonijiet Il-CAT waslulha 87 talba u ħarġet 81
rakkomandazzjoni għal klassifikazzjoni sat-30 ta’ Ġunju 2013.[13] Kważi nofs
it-talbiet kollha ta’ klassifikazzjoni mressqa oriġinaw minn SMEs u
15 % oħra tatt-talbiet ġew mis-settur mhux għall-profitt.
I-talbiet ta' klassifikazzjoni minn kumpaniji farmaċewtiċi kbar kienu
jirrappreżentaw bejn wieħed u ieħor 5 %
mis-sottomissjonijiet kollha. 3.4. Ċertifikazzjonijiet Tliet talbiet għal ċertifikazzjoni biss
kienu tressqu quddiem l-Aġenzija sat-30 ta’ Ġunju 2013. Tnejn
mit-talbiet kienu esklussivament dwar dejta ta’ kwalità, filwaqt li t-tielet
talba kienet b'rabta ma’ dejta tal-kwalità u mhux klinika. Il-CAT tat iċ-ċertifikazzjoni
fit-tliet każijiet kollha. 3.5. Pariri xjentifiċi Sat-30 ta’ Ġunju 2013, l-Aġenzija
kienet tat konsulenza xjentifika dwar ATMPs fi 93 okkażjoni;
il-pariri jirreferu għal 65 prodotti differenti. Iktar minn 60 %
tat-talbiet għal parir xjentifiku tressqu minn SMEs u 6 % oħra
ġew mill-akkademja. Talbiet minn kumpaniji farmaċewtiċi kbar
irrappreżentaw inqas minn 10 % tat-talbiet kollha. Barra minn hekk, ta’ min jinnota li sebgħa
minn għaxar applikanti għall-awtorizzazzjoni ta' kummerċjalizzazzjoni
preċedentement kienu talbu parir xjentifiku. 4. Analiżi
Il-kontribut tar-Regolament tal-ATMP
għas-saħħa pubblika jista' jitkejjel skont żewġ
parametri: (1) il-limitu sa kemm ATMPs ġodda saru disponibbli fl-UE; u
(2) il-limitu sa kemm ATMPs awtorizzati huma effikaċi u sikuri. Filwaqt li ma hemm l-ebda indikazzjoni li
tissuġġerixxi li r-rekwiżiti tar-Regolament tal-ATMP mhumiex
b’saħħithom biżżejjed biex tkun żgurata l-kwalità
tajba, l-effikaċja u l-profil tas-sikurezza ta’ prodotti awtorizzati,
jeħtieġ li jiġi kkunsidrat jekk il-livell għoli ta’
ħarsien tas-saħħa pubblika li r-Regolament ġie mfassal biex
jikseb hux qed jiġi mdgħajjef bil-kummerċjalizzazzjoni ta'
prodotti li għandhom il-karatteristiċi ta' ATMPs
kummerċjalizzati barra mill-qafas tar-Regolament tal-ATMP (peż.
fil-qafas regolatorju applikabbli għat-tessuti u ċ-ċelloli,
apparat mediku, jew oħrajn). Barra minn hekk, jeħtieġ li jiġi
kkunsidrat jekk hemmx lok biex jitħaffef li aktar ATMPs jistgħu jsiru
disponibbli għall-pazjenti. 4.1. L-impatt tal-ATMP fuq
id-disponibbiltà ta’ ATMPs eżistenti 4.1.1 Terapiji avvanzati disponibbli
fl-UE qabel ir-Regolament tal-ATMP Kien diffiċli li jinkisbu ċifri
preċiżi dwar l-għadd ta’ prodotti mediċinali ta' terapija
avvanzata li kienu fis-suq tal-UE qabel id-dħul fis-seħħ
tar-Regolament tal-ATMP. Dan jista’ jiġi spjegat parzjalment
bid-diffikultajiet intrinsiċi marbuta mal-applikazzjoni tad-definizzjoni
ta’ “ATMP” (ara t-Taqsima 4.3). L-Istati Membri rrappurtaw 31 ATMPs bħala li
qegħdin legalment fis-suq tal-UE qabel id-dħul fis-seħħ
tar-Regolament tal-ATMP.[14] Din iċ-ċifra trid tittieħed b’kawtela peress li,
min-naħa, l-istess prodott jista’ jkun li ġew rappurtati minn aktar
minn Stat Membru wieħed u, min-naħa l-oħra, mhux l-Istati Membri
kollha kienu setgħu jirrapportaw. Anki fost l-Istati Membri li
rrappurtaw, mhuwiex eskluż li ċ-ċifri rrappurtati mhumiex
kompluti peress li xi prodotti jistgħu jkun li tqiegħdu fis-suq
bħala tessuti/ċelluli jew tagħmir mediku minkejja li
għandhom il-potenzjal li jaqgħu taħt id-definizzjoni ta’ ATMP. Ta’ min jinnota li għadd ta’ Stati Membri
indikaw li l-ebda ATMP ma kien disponibbli fit-territorju tagħhom qabel
id-dħul fis-seħħ tar-Regolament tal-ATMP. In-nuqqas ta'
disponibbiltà ta’ dawn il-prodotti kienet aktar komuni fl-Istati Membri li huma
iżgħar. 4.1.2 Terapiji Avvanzati wara
d-dħul fis-seħħ tar-Regolament tal-ATMP L-għadd żgħir ta’ applikazzjonijiet
għal awtorizzazzjoni ta'kummerċjalizzazzjoni li rċeviet
l-Aġenzija (ara t-Taqsima 3.2) juri li għadd sinifikanti ta’
żviluppaturi ta’ ATMPs li kienu fis-suq qabel id-dħul
fis-seħħ tar-Regolament tal-ATMP ma applikawx għal
awtorizzazzjoni ta'kummerċjalizzazzjoni. Skont dejta rrapportata mill-Istati Membri, madwar
60 deroga mill-obbligu biex tinkiseb awtorizzazzjoni
ta'kummerċjalizzazzjoni qabel il-kummerċjalizzazzjoni ta’ terapiji
avvanzati kienet ingħataw sa April tal-2012.[15]
Ingħataw derogi skont l-Artikolu 3(7) tad-Direttiva 2001/83 (l-hekk
imsejħa “eżenzjoni tal-isptarijiet”) kif ukoll skont
dispożizzjonijiet oħra tad-Direttiva, notevolment l-Artikolu 5.[16] Dan ifisser li l-effetti tad-dħul
fis-seħħ tar-Regolament tal-ATMP dwar id-disponibbiltà ta’
trattamenti disponibbli qabel huwa diffiċli li jiġi stabbilit
fil-prattika: Fuq naħa waħda, għadd sinifikanti
ta’ ATMPs eżistenti għadhom jintużaw fin-nuqqas ta’
awtorizzazzjoni ta'kummerċjalizzazzjoni skont derogi mogħtija
mill-Istati Membri (l-eżenzjoni tal-isptarijiet jew mod ieħor). Min-naħa l-oħra, il-biċċa
l-kbira tal-ATMPs li ġew irrappurtati mill-Istati Membri bħala li
huma kkummerċjalizzati fit-territorji tagħhom qabel ir-Regolament
tal-ATMP daħal fis-seħħ kienu prodotti li fihom
il-kondroċita (16 minn 31). Peress li l-awtorizzazzjoni
ta'kummerċjalizzazzjoni skont ir-Regolament tal-ATMP hija valida fl-Istati
Membri kollha u billi ingħataw żewġ awtorizzazzjonijiet
għat-tqegħid fis-suq għal prodotti li fihom il-kondroċita,
l-applikazzjoni tar-Regolament tal-ATMP jista' jkun li wasslu għal
kopertura usa’ tat-territorju tal-UE għal dawn il-prodotti. 4.2. Eżenzjoni
tal-isptarijiet Ir-Regolament tal-ATMP jagħti lill-Istati
Membri s-setgħa li jawtorizzaw l-użu ta’ ATMPs imfassla skont
il-ħtieġa u ppreparati fuq bażi mhux ta’ rutina fin-nuqqas ta’
awtorizzazzjoni ta'kummerċjalizzazzjoni, sakemm il-prodott ikun użat
għal pazjenti individwali fi sptar u taħt ir-responsabbiltà
professjonali ta’ professjonista mediku.[17]
L-hekk imsejħa eżenzjoni tal-isptarijiet tirrikkjedi l-applikazzjoni
ta’ rekwiżiti nazzjonali dwar il-kwalità, it-traċċabbiltà, u
l-farmakoviġilanza ekwivalenti għal dawk meħtieġa għal
prodotti mediċinali awtorizzati. L-eżenzjoni tal-isptarijiet tippermetti li
l-pazjenti jirċievu ATMP f'kundizzjonijiet kontrollati f’każijiet
meta l-ebda prodott mediċinali awtorizzat mhuwa disponibbli. Barra minn
hekk, din tiffaċilita r-riċerka u l-iżvilupp ta' terapiji
avvanzati minn organizzazzjonijiet mingħajr skop ta’ qligħ
(bħall-akkademja u l-isptarijiet) u tista’ tkun għodda ta’ valur
għall-kisba ta' informazzjoni qabel ma tintalab awtorizzazzjoni
ta'kummerċjalizzazzjoni. Madanakollu, l-esperjenza miġbura minn mindu
r-Regolament daħal fis-seħħ turi li hemm riskju li l-użu
mifrux wisq tal-eżenzjoni tal-isptarijiet tista’ tiskoraġġixxi
s-sottomissjoni ta’ applikazzjonijiet għal awtorizzazzjoni
ta'kummerċjalizzazzjoni. Speċifikament, l-ATMPs b’awtorizzazzjoni
ta' kummerċjalizzazzjoni jiffaċċjaw spejjeż ogħla
tal-iżvilupp u l-manutenzjoni minn ATMPs li huma magħmulin
disponibbli permezz tal-eżenzjoni tal-isptarijiet, peress li
l-awtorizzazzjoni ta'kummerċjalizzazzjoni hija marbuta ma’ rekwiżiti
tad-dejta u obbligi ta' wara l-kummerċjalizzazzjoni aktar stretti.
Għaldaqstant, l-iżviluppaturi li jkunu jridu jiksbu awtorizzazzjoni
ta'kummerċjalizzazzjoni jitqiegħdu fi żvantaġġ
kompetittiv fil-konfront ta’ dawk li jikkummerċjalizzaw il-prodotti
permezz tal-eżenzjoni tal-isptarijiet. Jekk l-eżenzjoni tal-isptarijiet saret
il-mezz normali kif jiġu kkummerċjalizzati terapiji avvanzati, ikun
hemm konsegwenzi ħżiena għas-saħħa pubblika. L-ewwel
nett, il-provi kliniċi għadhom il-mezz ewlieni biex tinkiseb
informazzjoni affidabbli dwar l-effikaċja u l-profil tas-sikurezza ta'
prodott mediċinali u l-amministrazzjoni sistematika ta’ prodotti
mediċinali kumplessi lill-pazjenti fin-nuqqas ta’ provi kliniċi xierqa
tista’ tqiegħed lill-pazjenti f'riskju. It-tieni nett, il-ġbir ta’
dejta dwar l-effikaċja u s-sikurezza tat-trattament ikun imfixkel b’mod
serju hekk kif kull sit jiġġenera biss informazzjoni dwar għadd
żgħir ta’ pazjenti u ma jkun hemm ebda trażmissjoni ta’
informazzjoni lill-awtoritajiet ta’ Stat Membru ieħor fejn l-istess tip
ta’ prodott jista’ jkun qed jintuża wkoll taħt l-eżenzjoni
tal-isptarijiet. Barra minn hekk, it-trattament ma jkunx disponibbli
għall-pazjenti kollha madwar l-UE. Għaldaqstant, huwa meħtieġ li jinstab
bilanċ bejn il-ħtieġa li jiġi żgurat li l-ATMPs
jiġu magħmula disponibbli għal pazjenti biss wara li l-kwalità,
l-effikaċja u s-sikurezza tagħhom tkun ġiet murija b’mod xieraq,
u l-ħtieġa li l-aċċess bikri għal trattamenti
ġodda f’każ ta’ ħtiġijiet mediċi li
mhumiex indirizzati jitħaffef. In-nuqqas ta’ armonizzazzjoni dwar
il-kundizzjonijiet meħtieġa mill-Istati Membri
għall-applikazzjoni tal-eżenzjoni ġie identifikat ukoll
bħala ta’ tħassib fil-konsultazzjoni pubblika. L-użu li jsir
minn din id-deroga huwa differenti ħafna madwar l-Istati Membri,
parzjalment minħabba approċċi differenti rigward it-tifsira ta’
“mhux ta’ rutina”. Pereżempju, filwaqt li l-kunċett ta’ “mhux ta’
rutina” huwa mifhum b’mod strett f’xi Stati Membri fejn numru massimu ta’ pazjenti
huwa stabbilit, f’oħrajn ma hemmx limitu u d-deroga tiġi applikata
każ b’każ. Kjarifika tal-kundizzjonijiet li taħthom hija
possibbli l-eżenzjoni tal-isptarijiet u tar-rekwiżiti mehmuża
jistgħu jikkontribwixxu biex jittejjeb il-funzjonament tas-suq intern
f’terapiji avvanzati. F’dan il-kuntest, għandha tingħata
kunsiderazzjoni xierqa lir-rappurtar ta’ riżultati, partikolarment
riżultati negattivi, biex il-pazjenti ma jiġux esposti bla bżonn
għal trattamenti mhux sikuri jew mhux effettivi. Kwistjonijiet oħra li jistgħu
jibbenefikaw minn kjarifika addizzjonali jinkludu: - ir-rwol ta' dispożizzjonijiet derogatorji
tad-Direttiva 2001/83/KE għajr għall-eżenzjoni tal-isptarijiet
(b’mod partikolari l-Artikolu 5(1) tagħha) fil-kuntest ta’ ATMPs, u - ir-rwol ta’ dejta ġġenerata
mill-użu ta’ prodott taħt l-eżenzjoni tal-isptarijiet
fil-kuntest ta’ applikazzjoni għal awtorizzazzjoni ta’
kummerċjalizzazzjoni. 4.3. Il-kamp ta' applikazzjoni
tar-Regolament u l-klassifikazzjoni tal-ATMPs 4.3.1. Il-kamp ta' applikazzjoni
tar-Regolament tal-ATMP Tliet tipi ta’ prodotti mediċinali huma
kkunsidrati bħala ATMPs: it-terapiji ġenetiċi, it-terapiji
ċellulari somatiċi u prodotti mill-inġinerija tat-tessuti.
Il-valutazzjoni dwar jekk prodott jaqax taħt xi waħda minn dawn
il-kategoriji tista' tinvolvi ġudizzji xjentifiċi kumplessi.
Speċifikament, il-kwistjoni jekk manipulazzjoni ta’ materjal ħaj
għandhiex titqies bħala sostanzjali tista’ tkun diffiċli li
titwieġeb. Anki l-kwistjoni dwar jekk ċelluli jew tessuti humiex
maħsuba biex jissodisfaw l-istess funzjoni fid-donatur u r-riċevitur
tista’ tkun ta’ sfida f’xi każijiet (peż. materjal tal-mudullun). L-esperjenza fl-applikazzjoni tad-definizzjonijiet
tad-diversi kategoriji ta’ ATMPs mill-CAT turi li xi aspetti tad-definizzjoni
jistgħu jiġu ċċarata iktar biex ikun żgurat it-tqabbil
aħjar tad-definizzjonijiet legali mar-realtà xjentifika sottostanti. Barra minn hekk, hekk kif it-terapiji avvanzati
huma qasam soġġett għall-progress xjentifiku, huwa
meħtieġ li d-definizzjonijiet tat-terapiji ġenetiċi,
it-terapiji ċellulari somatiċi u prodotti mill-inġinerija
tat-tessuti taħt reviżjoni kontinwa. Qed jitfaċċaw
prodotti innovattivi ġodda li mhumiex koperti b'mod ċar permezz ta'
dispożizzjonijiet eżistenti. Pereżempju, l-iżvilupp ta’
tagħmir li jippermetti l-ġbir ta’ ċelluli jew tessuti,
l-ipproċessar tagħhom f’ambjent magħluq u injezzjoni
mil-ġdid tagħhom fid-donatur tiegħu fl-istess proċedura
iqajjem mistoqsijiet dwar kif dawn it-trattamenti għandhom ikunu regolati
(b’mod partikolari fil-każ ta’ użu mhux omologu). 4.3.2. Klassifikazzjoni Numru dejjem jiżdied ta’ prodotti
bijoloġiċi innovattivi juru karatteristiċi li potenzjalment
jistgħu jaqgħu taħt reġimi regolatorji varji (peż.
mediċini, tagħmir mediku, kożmetiċi, jew tessuti u
ċelloli). Ċarezza dwar ir-reġim li huwa applikabbli għal
prodotti ġodda hija essenzjali biex jinkiseb il-livell meħtieġ
ta’ ħarsien tas-saħħa pubblika. Barra minn hekk,
l-iżviluppaturi jeħtieġu wkoll fehim ċar tal-qafas
regolatorju li se jkunu applikabbli għall-prodotti tagħhom sabiex
il-proċess tal-iżvilupp ikun jista' jiġi adattat
għar-rekwiżiti rilevanti. Madanakollu, ġew irrapurtati każijiet
fejn l-awtoritajiet kompetenti tal-Istati Membri kienu waslu għal
konklużjonijiet diverġenti dwar jekk prodott għandux jitqies
bħala ATMP jew le. Id-differenzi li jeżistu madwar l-UE fir-rigward
tal-klassifikazzjoni ta’ ATMPs ġew identifikati wkoll bħala ta’
tħassib fil-konsultazzjoni pubblika mwettqa mis-servizzi tal-Kummissjoni
fit-tħejjija ta’ dan ir-rapport. Il-possibbiltà li l-istess prodott jista' jkun
soġġett għal rekwiżiti differenti madwar l-UE timplika li
l-livell ta’ ħarsien tas-saħħa pubblika huwa differenti skont
il-post ta’ residenza tal-pazjent. Il-fatt li l-istess prodott jista'
jiġi kkumerċjalizzat taħt sistemi regolatorji differenti mhux
biss mhux mixtieq għal raġunijiet ta' saħħa pubblika
iżda dan idgħajjef ukoll inċentivi biex jiġu
żviluppati ATMPs. L-ewwel nett, l-inċertezza dwar il-potenzjal
tas-suq għal prodott tiskoraġġixxi l-investiment. It-tieni
nett, il-klassifikazzjoni diverġenti tal-istess prodott tfixkel
il-kompetizzjoni bejn l-iżviluppaturi. Fl-aħħar nett,
l-applikazzjoni ta’ rekwiżiti regolatorji differenti madwar l-UE tfixkel
il-moviment liberu ta’ dawn il-prodotti. Ir-Regolament tal-ATMP ta lilll-Aġenzija
l-kompitu li tipprovdi rakkomandazzjonijiet xjentifiċi dwar
klassifikazzjonijiet ta’ terapija avvanzata. Il-parir huwa mogħti bla
ħlas u mhux vinkolanti. Il-mekkaniżmu tal-klassifikazzjoni stipulat
fir-Regolament tal-ATMP uriet żewġ punti b'saħħithom.
L-ewwel nett, valutazzjoni ċċentralizzata tiżgura perpettiva
unika fl-UE u tagħti ċertezza. It-tieni nett, il-fatt li s-servizz
huwa mogħti mingħar ebda spiża wassal biex kumpaniji
żgħar jużaw dan il-mekkaniżmu (ara t-Taqsima 3.3).
Fil-fehma tal-Kummissjoni, dan huwa riżultat pożittiv peress li
jista’ jgħin biex jiġi żgurat li l-proċess ta’ żvilupp
ta’ dawn il-prodotti huwa mfassal f’fażi bikrija b’tali mod li
jimmassimizza l-opportunitajiet għall-kisba ta’ awtorizzazzjoni
ta'kummerċjalizzazzjoni. Madanakollu, il-mekkaniżmu ta’
klassifikazzjoni attwali juri wkoll xi dgħjufijiet. L-ewwel nett,
il-konklużjoni tal-CAT li prodott huwa ATMP tista' tiġi injurata minn
żviluppatur li jiddeċiedi li jikkummerċjalizza l-prodott
mingħajr ma jiġġenera dejta dwar l-effikaċja u s-sikurezza,
u/jew mingħajr ma jikkonforma mar-rekwiżiti tal-kwalità u
l-farmakoviġilanza li huma tipiċi għall-prodotti
mediċinali. Limitazzjoni oħra tas-sistema attwali hija li
l-awtoritajiet kompetenti tal-Istati Membri ma għandhomx il-possibbiltà li
jitolbu l-fehma tal-CAT meta jkunu kkonfrontati bi kwistjoni dwar jekk prodott
għandux jitqies bħala ATMP. 4.4. Rekwiżiti
għall-awtorizzazzjoni ta' kummerċjalizzazzzjoni ta’ ATMPs 4.4.1. Kunsiderazzjonijiet
ġenerali Ir-Regolament tal-ATMP jibni fuq
il-proċeduri, il-kunċetti, u r-rekwiżiti mfassla
għall-prodotti mediċinali bbażati fuq il-kimiki. Madanakollu,
l-ATMPs juru karatteristiċi differenti ħafna. Barra minn hekk,
f’kuntrast ma’ prodotti mediċinali bbażati fuq il-kimiki,
ir-riċerka f’terapiji avvanzati hija - fil-biċċa l-kbira-
immexxija mill-akkademja, organizzazzjonijiet mingħajr skop ta'
qligħ, u SMEs, li jkollhom biss riżorsi finanzjarji limitati u
ħafna drabi ma jkunux esposti għas-sistema regolatorja li biha huma
rregolati l-mediċini. Id-Direttiva tal-Kummissjoni 2009/120/KE tistipula
rekwiżiti adattati f’termini tal-informazzjoni li l-applikanti jridu
jagħtu meta japplikaw għal awtorizzazzjoni
ta'kummerċjalizzazzjoni ta’ ATMP. Hemm il-ħsieb ukoll dwar
il-possibbiltà li jiġi applikat approċċ ibbażat fuq
ir-riskju biex tiġi determinata l-kwalità, dejta kliniki u mhux klinika. Madanakollu, il-konsultazzjoni pubblika turi li
ħafna ħassew li għandha tiġi applikata flessibbiltà
addizzjonali, b’mod partikolari fil-qasam tal-kwalità, bil-ħsieb li jkun
żgurat li r-rekwiżiti għall-applikazzjoni ta'awtorizzazzjoni
ta'kummerċjalizzazzjoni jqisu b'mod xieraq il-progress xjentifiku u
l-karatteristiċi speċifiċi tal-ATMPs. Din il-fehma kienet
kondiviża minn dawk li wieġbu li jirrappreżentaw l-industrija,
il-pazjenti, l-isptarijiet, l-akkademja u organizzazzjonijiet mingħajr skop
ta' qligħ. Minbarra adattamenti speċifiċi possibbli
dwar rekwiżiti tad-dejta fir-rigward tal-kwalità jew
tal-effikaċja/is-sikurezza, kien issuġġerit li, biex ikun
permess li terapiji avvanzati jitnedew, għandhom jitqiesu approċċi
alternattivi biex jitnaqqsu l-ispejjeż regolatorji. B’hekk, għadd
minn dawk li wieġbu fil-konsultazzjoni pubblika ssuġġerew
l-introduzzjoni ta’ awtorizzazzjoni ta'kummerċjalizzazzjoni mogħtija
abbażi ta’ dejta limitata biex tintuża f'qafas ristrett, b’mod
partikolari f’każijiet ta’ ħtiġijiet mediċi li mhux qed
jiġu indirizzati. Id-dejta
miġbura dwar l-użi fl-oqfsa restrittivi jistgħu jiġu
użati sussegwentement biex jespandu l-awtorizzazzjoni
ta'kummerċjalizzazzjoni sal-punt li ssir awtorizzazzjoni standard. 4.4.2. Il-każ tal-ATMPs awtologi Fil-każ ta’ prodotti awtologi
ċ-ċelluli/it-tessuti jittieħdu minn pazjent, imbagħad
jiġu trattati jew imkabbra, u fl-aħħar nett jiġu introdotti
mill-ġdid fl-istess pazjent. Il-materjal tal-bidu (jiġifieri
ċ-ċelluli/it-tessuti) huwa differenti għal kull pazjent u
għalhekk il-proċess tal-manifattura ta’ dawn il-prodotti għandu
karatteristiċi speċifiċi meta mqabbel ma’ prodotti
mediċinali oħra. Madanakollu, mhux il-prodotti awtologi kollha
jiffaċċjaw l-istess sfidi tal-manifattura. F’dan ir-rigward, huwa
f'loku li wieħed jiddistingwi bejn żewġ xenarji differenti.
Min-naħa, hemm prodotti awtologi fejn ċ-ċelluli/it-tessuti
tal-pazjent jiġu trasportati lejn kumpanija farmaċewtika u l-prodott
mediċinali finali jitwassal lura l-isptar biex jiġi
impjantat/injettat fl-istess pazjent. ChondroCelect, MACI u Provenge, li
rċevew awtorizzazzjoni ċentralizzata ta'kummerċjalizzazzjoni,
huma eżempji ta’ tali ATMPs awtologi. Min-naħa l-oħra, hemm
każijiet fejn iċ-ċelluli/it-tessuti tal-pazjent huma manipulati
fl-isptarijiet (peż. permezz ta’ tagħmir mediku li huwa
żviluppat għas-separazzjoni u l-manipulazzjoni taċ-ċelloli)
qabel l-amministrazzjoni mill-ġdid lill-istess pazjent. Fil-konsultazzjoni pubblika xi wħud minn dawk
li wieġbu qiesu li l-ATMPs awtologi ma għandhomx jiġu regolati
bħala mediċini. Filwaqt li dan l-approċċ inaqqas
l-ispejjeż ta' żvilupp assoċjati mal-użu ta’ dawn
il-prodotti, fil-fehma tal-Kummissjoni, il-ħtieġa li jkun żgurat
livell xieraq ta’ ħarsien tas-saħħa pubblika għandu
jieħu preċedenza fuq kunsiderazzjonijiet ekonomiċi. Ir-regolazzjoni ta’ dawn il-prodotti bħala
mediċini tiżgura li l-bilanċ bejn ir-riskji u
l-benfiċċji tagħhom ikun nstab li huwa pożittiv minn korp
indipendenti u speċjalizzati ħafna, li l-pazjenti jkunu segwiti wara
t-trattament, u li l-effetti fit-tul tat-trattament ikunu jistgħu
jiġu magħrufa minn professjonisti fil-kura medika (mhux biss
f’termini ta’ sikurezza iżda wkoll ta’ effikaċja). Madanakollu, huwa importanti li r-rekwiżiti
li japplikaw għal prodotti awtologi huma proporzjonati u adattati
għall-karatteristiċi speċifiċi tagħhom. Li l-prodotti
awtologi manifatturati fl-isptar qabel l-amministrazzjoni lill-pazjent ikunu
meħtieġa li jikkonformaw mal-kontrolli ta' kwalità u r-rekwiżiti
tal-manifattura ta' prodotti mediċinali bbażati fuq il-kimiki
standardizzati jwaqqaf l-iżvilupp ta' dawn it-trattamenti fil-prattika
billi tkun meħtieġa ċertifikazzjoni tar-rilaxx ta' lott
għal kull trattament u liċenzja tal-manifattura għal kull sptar. 4.4.3. Il-każ ta’ ATMPs
ikkombinati ATMP ikkombinat huwa ATMP li fih ċelluli jew
tessuti vijabbli u li jinkorpora tagħmir mediku wieħed jew aktar
bħala parti integrali mill-prodott. ATMPs li fihom apparat iżda li
fihom ċelluli jew tessuti mhux vijabbli huma wkoll ATMPs ikkombinati jekk
l-azzjoni taċ-ċelluli/it-tessuti tal-ġisem tal-bniedem tkun
primarja għal dik tat-tagħmir. Skont ir-regoli attwali, il-valutazzjoni
xjentifika finali tal-ATMPs ikkombinati titwettaq mill-CAT. Madankollu,
għall-parti tat-tagħmir, l-Aġenzija għandha toqgħod
fuq il-valutazzjoni tal-korpi notifikati (jekk din tkun disponibbli). Jekk
l-ebda valutazzjoni ma tkun disponibbli mill-korpi notifikati, l-Aġenzija
hija fil-prinċipju meħtieġa li tikkonsulta wieħed
mill-korpi, sakemm il-CAT ma tqisx li din ma tkunx meħtieġa. Il-konsultazzjoni pubblika wriet li l-valutazzjoni
separata tat-tagħmir mediku u l-prodott mediċinali ġeneralment
titqies bħala piż eċċessiv meta t-tagħmir ma jkunx
kummerċjalizzat separatament. Għaldaqstant, kien hemm
appoġġ qawwi għall-prinċipju ta’ valutazzjoni unika
(mill-CAT) għall-ATMPs meta t-tagħmir ikun parti integrali
mill-prodott (jiġifieri l-ATMPs ikkombinati kollha). Barra minn hekk,
il-konsultazzjoni pubblika wriet li l-partijiet interessati għandhom
diffikultajiet biex jifhmu l-interazzjoni bejn l-Aġenzija u l-korpi
notifikati fil-prattika. Ġie identifikat ukoll ir-riskju li l-qafas
attwali jagħti inċentivi lill-iżviluppaturi biex jużaw
tagħmir mediku liċenzjat diġà (anki jekk għal użu
differenti mill-użu intenzjonat fl-ATMP ikkombinat) iktar milli jiġi
żviluppat tagħmir ġdid u mmirat aħjar. Din il-linja ta’
azzjoni tista' tiġi instigata mill-perċezzjoni li l-għażla
ta’ tagħmir bil-marka CE jħaffef il-proċedura regolatorja. 4.5. PROĊEDURA
TA’ AWTORIZZAZZJONI TA' KUMMERĊJALIZZAZZJONI Ir-Regolament tal-ATMP jirrikjedi li
l-applikazzjonijiet ta'kummerċjalizzazzjoni għal terapiji avvanzati
jitressqu quddiem l-Aġenzija. L-evalwazzjoni xjentifika tiegħu
tinvolvi sa ħames kumitati. Speċifikament: (i) il-CAT
jivvaluta l-applikazzjoni għall-awtorizzazzjoni ta'
kummerċjalizzazzjoni u jagħti l-opinjoni tiegħu lill-Kumitat
għall-Prodotti Mediċinali għall-Użu mill-Bniedem (“CHMP”); (ii) is-CHMP
jadotta opinjoni li tiġi trażmessa lill-Kummissjoni; (iii) il-Kumitat
dwar il-Valutazzjoni tar-Riskji tal-Farmakoviġilanza (“PRAC”) jagħti
rakkomandazzjonijiet lis-CHMP dwar kwistjonijiet ta’ farmakoviġilanza; (iv) il-Kumitat
Pedjatriku (“PDCO”) jintervjeni fuq aspetti relatati mal-obbligi imposti skont
ir-Regolament (KE) Nru 1901/2006 tal-Parlament Ewropew u tal-Kunsill;[18] kif ukoll (v) il-Kumitat
dwar il-Prodotti Mediċinali Orfni (“COMP”) jagħti opinjonijiet
xjentifiċi lill-Kummissjoni dwar aspetti marbuta mal-applikazzjoni ta’
inċentivi orfni (għaldaqstant dan il-Kumitat huwa involut biss jekk
l-applikant ifittex l-istatus ta’ orfni). Il-proċedura ta’ awtorizzazzjoni
ta'kummerċjalizzazzjoni attwali uriet li hija kumplessa biex tiġi
ġestita fil-prattika u hija wkoll sfida għal applikanti prospettivi,
li tipikament huma entitajiet li mhumiex esposti għall-proċedura
ċentralizzata ta’ awtorizzazzjonijiet ta'kummerċjalizzazzjoni. F’dan
ir-rigward, il-konsultazzjoni pubblika wriet li l-proċedura
għall-evalwazzjoni ta’ ATMPs fl-Aġenzija hija perċeputa bħala
kkumplikata wisq, b’mod partikolari għal SMEs u organizzazzjonijiet
mingħajr skop ta' qligħ. Fil-qosor, l-esperjenza miksuba minn mindu
daħal fis-seħħ ir-Regolament tal-ATMP turi li hemm lok
għas-simplifikazzjoni tal-proċedura għall-evalwazzjoni ta’
ATMPs. Is-simplifikazzjoni ta’ din il-proċedura m’għandhiex biss
iġġib benefiċċji għal applikanti prospettivi iżda
għandha tiżgura wkoll li jkun hemm evalwazzjoni tajba ta’ dawn
il-prodotti kumplessi u allokazzjoni ċara tar-responsabbiltà fl-Aġenzija
għal dan il-kompitu. 4.6. Ċertifikazzjoni Iċ-ċertifikazzjoni ta’ dejta dwar
il-kwalità u d-dejta mhux klinika mill-Aġenzija kienet strument ġdid
mfassal biex jgħin lill-SMEs jattiraw investimenti/jiksbu dħul
għall-iżvilupp ta’ ATMPs. B'analoġija mat-tnaqqis applikat fil-każ
ta' parir xjentifiku, l-Aġenzija applikat tnaqqis ta' 90 %
fil-miżata għal talbiet għal ċertifikazzjoni mressqa minn
SMEs.[19] Madanakollu, l-għadd żgħir
ħafna ta’ applikazzjonijiet għal ċertifikazzjoni li waslu huwa
riżultat diżappuntanti. L-użu limitat tal-proċedura ta’
ċertifikazzjoni tista’ tiġi spjegata parzjalment bl-esklużjoni
ta’ entitajiet mhux kummerċjali mill-iskema ta’ ċertifikazzjoni.
Għaldaqstant l-espansjoni tal-kategorija ta’ applikanti li jistgħu
japplikaw għal ċertifikazzjoni tista’ tgħin fiż-żieda
tal-valur ta’ dan l-istrument. Barra minn hekk, ir-riżultat
tal-konsultazzjoni pubblika u l-inkjesta mwettqa mill-EMA[20] jissuġġerixxi li l-valur ta’ ċertifikazzjoni jista’
jiżdied jekk isiru xi tibdiliet, bħal kjarifika tar-rabta bejn
il-proċedura taċ-ċertifikazzjoni u tal-awtorizzazzjoni
ta'kummerċjalizzazzjoni, jew l-estensjoni tal-iskema ta’
ċertifikazzjoni biex tkopri partijiet oħra tad-dossier
(jiġifieri aspetti kliniċi). 4.7. Pariri Xjentifiċi Kuntatti bikrin bejn l-iżviluppaturi ta’
ATMPs u l-awtoritajiet huma importanti biex jiġi żgurat li
l-attivitajiet ta’ żvilupp jitfasslu bl-aħjar mod possibbli biex
jiġu massimmizzati l-opportunitajiet għall-kisba ta' awtorizzazzjoni
ta' kummerċjalizzazzjoni. Il-fehim fi stadju inizjali ta’ żvilupp
tar-rekwiżiti li huma meħtieġa biex jintwerew l-effikaċja u
s-sikurezza tal-prodott huwa partikolarment importanti
għall-iżviluppaturi li mhumiex familjari ma’ proċeduri għal
awtorizzazzjoni ta' kummerċjalizzazzjoni. Bħala inċentiv biex l-iżviluppaturi
ta' ATMPs jitħajru jiddiskutu l-iżvilupp tal-prodotti tagħhom
mal-aġenzija, ir-Regolament tal-ATMP jistipula tnaqqis sinifikanti
fil-miżati għat-talbiet għal parir xjentifiku. L-iskont tela’
għal 90 % fil-każ ta’ SMEs. L-għadd kbir ta’ talbiet għal parir
xjentifiku li waslu lill-Aġenzija fil-perjodu li qed jiġi kkunsidrat
f’dan ir-rapport huwa żvilupp pożittiv li jista' jikkontribwixxi biex
ir-riċerka tissarraf fi prodotti mediċinali. Ta’ rilevanza
partikolari huwa li l-maġġoranza tat-talbiet għal parir
xjentifiku ġew minn SMEs (ara t-Taqsima 3.5). Dan ifisser li l-iskont
qawwi applikat għall-SMEs wera li kien effettiv. B’kuntrast ma’ dan, l-esklużjoni ta’
ċerti organizzazzjonijiet mingħajr skop ta’ qligħ
mill-inċentivi dwar il-miżati ġiet identifikata bħala
nuqqas fil-konsultazzjoni pubblika. Il-perċentwal
baxx ta’ talbiet għal pariri xjentifiċi mil-akkademja (6 %)
jissuġġerixxi li tnaqqis fil-miżati analogu għal dak
applikat għal SMEs jista' jinkoraġġixxi riċerkaturi li
jaħdmu f’qafas akkademiku (jew qafas mingħajr skop ta' qligħ
ieħor) biex ifittxu l-parir xjentifiku tal-Aġenzija. 4.8. Tnaqqis
fl-ammontl-miżata għall-l-applikazzjoni ta'kummerċjalizzazzjoni
u l-obbligi ta' wara l-kummerċjalizzazzjoni Miżati marbuta mal-applikazzjoni għal
awtorizzazzjoni ta’ kummerċjalizzazzjoni u attivitajiet ta’ wara
l-kummerċjalizzazzjoni (matul l-ewwel sena wara l-għoti
tal-awtorizzazzjoni) tnaqqsu b’50 % għall-SMEs u l-isptarijiet jekk
kien hemm interess għas-saħħa pubblika fl-ATMP inkwistjoni.
Madanakollu dan it-tnaqqisi fl-ammont tal-miżata kien limitat
fiż-żmien u m'għadhux japplika. Huwa diffiċli li wieħed jagħmel
konklużjonijiet ġenerali dwar l-impatt ta’ dan it-tnaqqis fl-ammont
tal-miżata peress li ngħataw biss żewġ awtorizzazzjonijiet
ta'kummerċjalizzazzjoni matul it-terminu tal-validità tagħhom.
Madanakollu, f’termini ġenerali, l-ispejjeż marbuta ma’ attivitajiet
ta’ wara l-kummerċjalizzazzjoni jistgħu jkunu sinifikanti ħafna,
b’mod partikolari jekk jiġi impost għadd kbir ta’ obbligi ta’ wara
l-kummerċjalizzazzjoni. Dawn l-ispejjeż jistgħu jkunu
għaljin wisq għal kumpaniji żgħar, partikolarment sakemm
il-prodott mediċinali jkun jista' jiġġenera dħul
(jiġifieri sakemm isir ftehim bejn il-korpi nazzjonali responsabbli
għall-proċeduri ta’ rimborż). 5. Konklużjonijiet It-terapiji avvanzati għandhom il-potenzjal
li jkunu ta' benefiċċju għall-pazjenti. Madanakollu, għad
hemm ħafna aspetti mhux magħrufa u għaldaqstant huwa importanti
li jiġu stabbiliti kontrolli xierqa biex jiġu evitati konsegwenzi detrimentali
għas-saħħa pubblika. Ir-Regolament tal-ATMP iħares lill-pazjenti
billi jirrikkjedi li tiġi magħmula reviżjoni indipendenti
tal-ATMP mill-aħjar esperti disponibbli fl-UE skont standards għoljin
ta’ kwalità, effikaċja u sikurezza qabel ma l-prodott isir disponibbli
għall-pazjenti. Madanakollu, rekwiżiti eċċessivi
jistgħu jkollhom konsegwenzi detrimentali għas-saħħa
pubblika peress li jistgħu jipprevjenu l-preżenza ta’ trattamenti
validi għal ħtiġijiet mediċi li mhumiex indirizzati.
Ir-regolamentazzjoni f’dan il-qasam, għandha tikkontribwixxi
għall-ħolqien ta’ kondizzjonijiet li jħaffu l-ħolqien ta’
prodotti mediċinali ġodda, filwaqt li jkun żgurat livell
għoli ta’ ħarsien tas-saħħa pubblika. Huwa daqstant
importanti li l-qafas regolatorju jiġi adattat għall-progress
xjentifiku mgħaġġel. Abbażi tal-esperjenza miġbura minn mindu
daħal fis-seħħ ir-Regolament tal-ATMP, jistgħu jiġu
identifikati xi possibilitajiet biex jiġi mgħejun it-tisrif ta’
riċerka f'ATMPs disponibbli għall-pazjenti madwar l-UE filwaqt li
jinżamm livell għoli ta’ ħarsien tas-saħħa pubblika ,
inkluż: - kjarifika
tal-kamp ta' applikazzjoni tar-Regolament tal-ATMP billi jsir
aġġustament tad-definizzjonijiet attwali tal-ATMPs u billi jkun hemm
riflessjoni dwar il-qafas regolatorju xieraq għal prodotti innovattivi
ġodda li jistgħu ma jkunux koperti mid-dispożizzjonijiet
eżistenti; - jitqiesu
miżuri biex jiġu evitati disparitajiet fil-klassifikazzjoni ta’ ATMPs
fl-UE; - kjarifika
tal-kundizzjonijiet għall-applikazzjoni tal-eżenzjoni
tal-isptarijiet, kif ukoll ir-rwol ta’ dejta miksuba minnhom fil-kuntest ta’
proċeduri ta’ awtorizzazzjoni ta' kummerċjalizzazzjoni; - reviżjoni
tar-rekwiżiti għall-awtorizzazzjoni ta’ ATMPs bil-ħsieb li
jiżguraw li r-rekwiżiti applikabbli huma proporzjonati u adattati sew
għall-karatteristiċi speċifiċi tiegħu, filwaqt li
jiġu kkunsidrati b'mod speċifiku prodotti awtologi; - simplifikazzjoni
tal-proċeduri ta' awtorizzazzjoni ta'kummerċjalizzazzjoni; - estensjoni
tal-proċedura ta’ ċertifikazzjoni u kjarifika tar-rabta bejn
iċ-ċertifikazzjoni u l-proċedura ta’ awtorizzazzjoni
ta'kummerċjalizzazzjoni; - il-ħolqien
ta' ambjent aktar favorevoli għal żviluppaturi ta' ATMP li
jaħdmu f’ambjent akkademiku jew mingħajr skop ta' qligħ,
inkluż bil-promozzjoni ta’ kuntatti bikrija mal-awtoritajiet permezz
tal-applikazzjoni tat-tnaqqis tal-miżati għall-parir xjentifiku u
billi jestendu l-iskema ta’ ċertifikazzjoni għal dawn
l-iżviluppaturi; - jitqiesu
inċentivi tal-miżati possibbli biex jitnaqqas l-impatt finanzjarju
tal-obbligi ta’ wara l-kummerċjalizzazzjoni. [1] Ir-Regolament (KE) Nru 1394/2007 tal-Parlament
Ewropew u tal-Kunsill tat-13 ta’ Novembru 2007 dwar prodotti
mediċinali ta’ terapija avvanzata u li jemenda d-Direttiva 2001/83/KE u
r-Regolament (KE) Nru 726/2004 (ĠU L 324, 10.12.2007
p. 121). [2] http://ec.europa.eu/health/files/advtherapies/2013_05_pc_atmp/2013_04_03_pc_summary.pdf [3] Bażi tad-dejta tal-provi kliniċi kollha li
bdew fl-UE wara l-1 ta’ Mejju 2004. [4] http://www.ema.europa.eu/docs/en_GB/document_library/Other/2010/12/WC500099532.pdf
[5] Id-Direttiva tal-Kummissjoni 2009/120/KE li temenda
d-Direttiva 2001/83/KE tal-Parlament Ewropew u tal-Kunsill dwar il-kodiċi
tal-Komunità li għandu x’jaqsam ma’ prodotti mediċinali
għall-użu mill-bniedem fir-rigward ta’ prodotti mediċinali ta’
terapija avvanzata (ĠU L 242 15.9.2009, p. 3); [6] http://ec.europa.eu/health/files/eudralex/vol-4/vol4-an2__2012-06_en.pdf [7] Madankollu, xi rakkomandazzjonijiet fir-rigward
tal-prassi klinika tajba għall-ATMPs, ġew ippubbliktati mis-servizzi
tal-Kummissjoni (http://ec.europa.eu/health/files/eudralex/vol-10/2009_11_03_guideline.pdf)
[8] Ir-Regolament tal-Kummissjoni (KE) Nru 668/2009 li
jimplimenta r-Regolament (KE) Nru 1394/2007 tal-Parlament Ewropew u tal-Kunsill
fir-rigward tal-evalwazzjoni u ċ-ċertifikazzjoni ta’ dejta
tal-kwalità u dik mhux klinika marbuta ma’ prodotti mediċinali ta’
terapija avvanzata żviluppati minn intrapriżi mikro, żgħar
u medji (ĠU L 194, 25.07.2009, p. 7). [9] L-awtorizzazzjoni ta' kummerċjalizzazzjoni
mogħtija bid-Deċiżjoni tal-Kummissjoni C (2009) 7726 tat- 5 ta’
Ottubru 2009. [10] Awtorizzazzjoni ta' kummerċjalizzazzjoni
mogħtija bid-Deċiżjoni tal-Kummissjoni C (2012) 7708 tal-25 ta’
Ottubru 2012. [11] L-awtorizzazzjoni ta'kummerċjalizzazzjoni
mogħtija bid-Deċiżjoni tal-Kummissjoni C (2013) 4190 tas-27 ta’
Ġunju 2013. [12] L-awtorizzazzjoni ta'kummerċjalizzazzjoni
mogħtija bid-Deċiżjoni tal-Kummissjoni C (2013) 5841 tas-6 ta’
Settembru 2013. [13] Il-proċedura ta’ klassifikazzjoni kienet
għaddejja għas-sitt applikazzjonijiet l-oħra. [14] Dejta aggregata minn stħarriġiet imwettqa
mill-EMA fl- 2007 u l-2009. [15] http://ec.europa.eu/health/files/advtherapies/2013_05_pc_atmp/07_2_pc_atmp_2013.pdf [16] L-Artikolu 5(1) tad-Direttiva 2001/83 jistipula li Stat
Membru jista' jeskludi mid-disposizzjonijiet tad-Direttiva prodotti
mediċinali provduti bi tweġiba għal ordni bona fede mhux
mitluba, formulati skont l-ispeċifikazzjonijiet ta' professjonist
awtorizzat fil-kura medika u għall-użu minn pazjent individwali
taħt ir-responsabbiltà diretta personali tiegħu. [17] L-Artikolu 28(2) tar-Regolament tal-ATMP li jemenda
l-Artikolu 3 tad-Direttiva 2001/83. [18] Ir-Regolament (KE) Nru 1901/2006 tal-Parlament
Ewropew u tal-Kunsill dwar prodotti mediċinali għall-użu
pedjatriku u li jemenda r-Regolament (KEE) Nru 1768/92, id-Direttiva
2001/20/KE, id-Direttiva 2001/83/KE u r-Regolament (KE) Nru 726/2004
(ĠU L 378, 27.12.2006, p. 1). [19] http://www.ema.europa.eu/docs/en_GB/document_library/Other/2013/07/WC500146978.pdf [20] http://www.ema.europa.eu/docs/en_GB/document_library/Other/2013/02/WC500138476.pdf