1.   

Jinnota b’sodisfazzjon li, fir-rapport annwali tagħha dwar l-2012, il-Qorti tal-Awdituri osservat li ma ġiet identifikata l-ebda dgħufija sinifikanti fir-rigward tat-temi awditjati relatati mar-riżorsi umani u l-proċeduri ta’ akkwist għall-Ombudsman Ewropew (“l-Ombudsman”);

2.   

Jilqa’ l-fatt li, abbażi tal-ħidma ta’ awditjar tagħha, il-Qorti tal-Awdituri kkonkludiet li l-pagamenti kollha kemm huma għas-sena li ntemmet fil-31 ta’ Diċembru 2012 għan-nefqa amministrattiva u ta’ tip ieħor tal-istituzzjonijiet u tal-korpi kienu ħielsa minn żbalji materjali;

3.   

Jenfasizza li l-baġit tal-Ombudsman huwa wieħed purament amministrattiv u fl-2012 kien jammonta għal EUR 9 516 500, li minnhom EUR 7 275 000 kienu allokati għat-Titolu 1 (infiq relatat ma’ persuni li jaħdmu mal-istituzzjoni), EUR 1 656 500 attribwiti għat-Titolu 2 (bini, għamara, tagħmir u nfiq għal operat ieħor) u EUR 585 000 għat-Titolu 3 (infiq riżultat minn funzjonijiet ġenerali mħarrġa mill-istituzzjoni);

4.   

Jieħu nota li mill-approprjazzjonijiet totali, 98,30 % kienu impenjati (92,54 % fl-2011) u 88,69 % imħallsa (85,62 % fl-2011) b’rata ta’ utilizzazzjoni ta’ 95,88 % (meta mqabbla ma’ 92,54 % għall-2011); jilqa’ t-titjib tar-rata ta’ utilizzazzjoni;

5.   

Japprova t-titjib fl-ippjanar finanzjarju sabiex tiġi żgurata implimentazzjoni iktar effiċjenti tal-baġit; jitlob it-tkomplija ta’ dan l-isforz fl-eżerċizzji baġitarji li jmiss;

6.   

Ifaħħar il-Pjan ta’ Ġestjoni Annwali għall-2012 tal-Ombudsman fejn huma inklużi indikaturi tal-prestazzjoni ewlenin biex titkejjel il-prestazzjoni tal-uffiċċju fil-kisba tal-objettivi tiegħu;

7.   

Jistieden lill-Ombudsman iqiegħed ir-rata mhux użata tas-servizzi tal-interpretazzjoni mitluba matul dik is-sena fir-rapport annwali tal-attività li jmiss;

8.   

Jitlob lill-Ombudsman jikkoopera ma’ istituzzjonijiet oħra sabiex joħorġu b’metodoloġija unifikata għall-preżentazzjoni tal-ispejjeż tat-traduzzjoni bil-għan li jiġu ssimplifikati l-analiżi u t-tqabbil tal-ispejjeż;

9.   

Jilqa’ l-konklużjonijiet tal-awditur intern dwar l-azzjonijiet miftuħa mir-rapporti tal-awditjar intern; jinnota li żewġ azzjonijiet li jikkonċernaw l-implimentazzjoni tal-istandards minimi għal kontroll intern u l-ġestjoni tal-proċeduri ta’ akkwist għadhom miftuħa; jitlob li jiġu implimentati mingħajr dewmien ir-rakkomandazzjonijiet tal-awditur intern tal-Ombudsman dwar dawn l-azzjonijiet;

10.   

Iqis bħala pożittiva ż-żieda tal-perċentwal ta’ deċiżjonijiet dwar l-ammissibilità meħuda fi żmien xahar mill-wasla ta’ lment, li kien ta’ 85 % fl-2012, u jitlob objettiv saħansitra aħjar għas-snin li ġejjin; jemmen li r-ristrutturar tal-uffiċċju tal-Ombudsman, flimkien ma’ proċedura iktar simplifikata fir-Reġistru, kienu ta’ kontribut għal prestazzjoni aħjar tal-Unità għall-Ilmenti fl-2012 u se jkomplu jkunu ta’ kontribut fis-snin li ġejjin;

11.   

Jieħu nota tal-fatt li t-tul ta’ żmien medju tal-inkjesti naqas, anki jekk għall-inkjesti magħluqa fi żmien 18-il xahar, ir-riżultati kienu inqas mill-mira stabbilita u kienu inqas miċ-ċifra ta’ 80 % miksuba fl-2011; jitlob lill-Ombudsman jispeċifika l-għadd ta’ każijiet li jinvolvu iktar minn ċiklu wieħed ta’ inkjesti u meta jkun hemm bżonn tat-tieni ċiklu ta’ inkjesti;

12.   

Jitlob li jkun infurmat dwar l-azzjonijiet meħuda biex tingħeleb id-deċiżjoni tal-Kummissjoni li tirrifjuta l-organizzazzjoni ta’ awditjar estern indipendenti tal-Iskejjel Ewropej;

13.   

Jilqa’ l-involviment tal-Ombudsman mal-Fondazzjoni Ewropea għall-Ġestjoni tal-Kwalità sabiex tiżdied il-kwalità tal-ħidma tiegħu;

14.   

Jifraħ lill-Ombudsman għall-kwalità konsistenti tar-rapport annwali tal-attività tiegħu u talli jipprovdi rapport annwali tal-impatt komprensiv, li huwa għodda importanti biex tiġi vvalutata l-ħidma tiegħu;

15.   

Jitlob lill-Ombudsman jiddikjara fid-dettall, fir-rapport annwali tal-attività tiegħu, kemm jonfoq mill-baġit tiegħu biex jippromwovi lilu nnifsu u biex ikun eqreb iċ-ċittadini;

16.   

Jinnota li r-rapport annwali dwar l-attivitajiet tal-Ombudsman fl-2012 kien adottat mill-plenarja f’Settembru 2013 u jinsab sodisfatt bl-osservazzjonijiet li saru fih;

17.   

Jitlob lill-Qorti tal-Awdituri tinkludi fir-rapport annwali li jmiss tagħha rieżami tas-segwitu min-naħa tal-Ombudsman Ewropew għar-rakkomandazzjonijiet tal-Parlament li jinsabu f’din ir-riżoluzzjoni.