27.9.2013   

MT

Il-Ġurnal Uffiċjali tal-Unjoni Ewropea

C 280/1

—

wara li kkunsidra l-Komunikazzjoni tal-Kummissjoni dwar il-Programm ta’ Ħidma tagħha għall-2013 (1),

—

wara li kkunsidra r-Riżoluzzjoni tiegħu tat-30 ta’ Novembru 2012 dwar il-Prioritajiet tal-Kumitat tar-Reġjuni għall-2013 abbażi tal-Programm Leġislattiv u ta’ Ħidma tal-Kummissjoni Ewropea (2),

—

wara li kkunsidra l-Protokoll ta’ Kooperazzjoni bejn il-Kummissjoni Ewropea u l-Kumitat tar-Reġjuni, iffirmat fis-16 ta’ Frar 2012,

1.

jara l-2014 bħala sena ta' bidliet deċiżivi għall-Unjoni Ewropea li ser tkun immarkata mill-elezzjonijiet tal-Parlament Ewropew, il-ħatra ta' Kummissjoni ġdida, il-bidu tal-perjodu ta' programmazzjoni għall-2014-2020 taħt il-Qafas Finanzjarju Pluriennali l-ġdid, ir-reviżjoni ta' nofs it-term tal-Istrateġija Ewropa 2020 u l-kontinwazzjoni tal-ħidma sabiex tiġi kkompletata u tissaħħaħ l-unjoni ekonomika u monetarja;

2.

iqis li l-isfidi prinċipali għall-UE fl-2014 ser ikunu: il-ġenerazzjoni tat-tkabbir u l-impjiegi permezz tat-trasformazzjoni tal-ekonomiji tagħna għal futur sostenibbli b'livell baxx ta' emissjonijiet ta' karbonju; it-tisħiħ taċ-ċittadinanza tal-UE, b'mod partikolari fil-mument kruċjali tal-elezzjonijiet Ewropej u l-ksib mill-ġdid tal-fiduċja fil-proġett Ewropew bil-għan li tingħata spinta lil-"leġittimità demokratika" tal-UE, liema ħaġa titlob sforzi kontinwi biex jiġu difiżi l-valuri fundamentali tal-UE kontra l-erożjoni mill-forzi populisti u antidemokratiċi;

3.

jinsab imħasseb li l-livell ta' attività tal-Kummissjoni Ewropea jista' jintlaqat mill-fatt li l-mandat daqt jispiċċa filwaqt li hemm bżonn ta' azzjoni urġenti f'numru vast ta' oqsma;

4.

ifakkar li fl-okkażjoni tal-20 anniversarju, il-Kumitat tar-Reġjuni beħsiebu jwettaq proċess ta' riflessjoni dwar kif jista' jsaħħaħ ir-rwol istituzzjonali u politiku tiegħu;

5.

jistieden lill-Kummissjoni Ewropea tressaq rapport dwar l-istat attwali tad-diskussjonijiet li għaddejjin bħalissa dwar il-futur tal-Ewropa, inklużi r-riżultati tad-dibattiti maċ-ċittadini fis-Sena Ewropea taċ-Ċittadini 2013; barra minn hekk, bħala parti mid-dibattitu li għandu l-għan li terġa' tinħoloq rabta maċ-ċittadini, huwa jħeġġeġ lill-Kummissjoni Ewropea sabiex fl-2014 tibda tħejji r-rapport tagħha dwar l-applikazzjoni tar-Regolament dwar l-Inizjattivi taċ-Ċittadini Ewropej;

6.

jitlob lill-Kummissjoni tressaq malajr kemm jista' jkun il-proposti tagħha dwar abbozz ta' regolament li jwaqqaf Mekkaniżmu Uniku ta' Riżoluzzjoni, u dwar is-segwitu tar-rakkomandazzjonijiet marbutin mar-riforma strutturali tas-settur bankarju;

7.

jitlob lill-Kummissjoni Ewropea tressaq proposta biex tiġi kkunsidrata mill-ġdid is-sistema tat-Trojka bil-għan li jiġi garantit skrutinju demokratiku u r-responsabbiltà tagħha fil-konfront tal-Parlament Ewropew;

8.

jitlob li jerġgħu jinfetħu n-negozjati dwar id-Direttiva dwar Skemi ta' Garanzija tad-Depożiti b'mod parallel mal-Proposta għal Direttiva li tistabbilixxi qafas għall-irkupru u r-riżoluzzjoni tal-istituzzjonijiet tal-kreditu u l-impriżi ta' investiment;

9.

jinnota l-introduzzjoni b'suċċess tal-bonds tal-proġetti fis-suq fil-kuntest tal-fażi pilota li għaddejja bħalissa u jitlob li din l-inizjattiva tiġi estiża għall-perjodu kollu tal-qafas finanzjarju pluriennali li jmiss (2014-2020) u għal oqsma oħra ta' politika apparti l-oqsma tal-enerġija, it-trasport u l-infrastrutturi tat-telekomunikazzjoni; jipproponi li l-ambitu ta' parteċipazzjoni jiġi estiż għall-intrapriżi żgħar u ta' daqs medju (SMEs) bil-għan li l-fondi għall-investiment reġjonali jiġu trasmessi lejn l-SMEs u tissaħħaħ l-industrija Ewropea tal-kapital ta' riskju bbażata fuq ir-reġjuni;

10.

iħeġġeġ lill-Kummissjoni Ewropea tkompli tissorvelja s-sitwazzjoni u l-iżvilupp tal-finanzi pubbliċi fil-livell reġjonali u lokali fir-Rapport Annwali tagħha dwar il-Finanzi Pubbliċi fl-Unjoni Monetarja Ewropea;

11.

iqis li s-sitwazzjoni attwali mhux sodisfaċenti tal-Istrateġija Ewropa 2020 s'issa hija dovuta mhux biss għall-kriżi ekonomika u n-nuqqas ta' ambizzjoni tal-Istati Membri iżda wkoll għan-nuqqas ta' involviment tal-awtoritajiet lokali u reġjonali fit-tfassil u l-implimentazzjoni tal-istrateġija u, b'mod aktar ġenerali, għan-nuqqas ta' dimensjoni territorjali ġenwina fl-Istrateġija Ewropa 2020;

12.

jappella lill-Kummissjoni sabiex tipprovdi malajr qafas għar-reviżjoni tagħha ta' nofs it-term tal-Istrateġija Ewropa 2020, li tmur lil hinn mill-intenzjoni stipulata tagħha li tniedi metodoloġija;

13.

ifakkar li huwa qiegħed jissorvelja kontinwament il-progress li sar fl-inizjattivi ewlenin kollha tal-Istrateġija Ewropa 2020 u diġà qiegħed jaħdem fuq valutazzjoni ta' nofs it-term minn perspettiva lokali u reġjonali;

14.

jikkundanna l-fatt li la l-Istħarriġ Annwali dwar it-Tkabbir 2013 u lanqas ir-rakkomandazzjonijiet speċifiċi għall-pajjiżi ma għamlu referenza għall-bżonn ta' approċċ ibbażat fil-lokal u għal sħubija f'diversi livelli fl-implimentazzjoni tal-Istrateġija Ewropa 2020. Huwa jitlob li l-Kummissjoni Ewropea tissodisfa l-obbligi tagħha li tiżgura li l-Istati Membri jibnu sħubijiet mal-awtoritajiet lokali u reġjonali fl-abbozzar u l-implimentazzjoni tal-programmi nazzjonali ta' riforma;

15.

iħeġġeġ lill-Kummissjoni Ewropea tidentifika u tagħti prijorità lill-funzjonament tas-suq uniku lil dawk l-oqsma li l-aktar li jistgħu jiġġeneraw innovazzjoni u joħolqu impjiegi ta' kwalità;

16.

iħeġġeġ lill-Kummissjoni tagħmel proposti għal politika industrijali Ewropea bħala waħda mill-pilastri tal-proġett Ewropew u li din għandha tiġi ttrattata bħala prijorità politika ġenwina fuq l-istess livell politiku tal-koeżjoni, l-infrastruttura u l-agrikoltura;

17.

jappoġġja l-proposta tal-Parlament Ewropew sabiex jinħoloq grupp ta' tmexxija dwar il-politika industrijali sabiex jingħaqdu flimkien il-poteri Ewropej, nazzjonali, reġjonali u lokali u r-riżorsi li attwalment jinsabu mxerrda mal-livelli u s-setturi kollha;

18.

jitlob lill-Kummissjoni Ewropea sabiex tikkonsulta formalment lill-KtR fit-tħejjija tal-linji gwida l-ġodda li jirregolaw l-applikazzjoni tar-regoli tal-UE dwar l-għajnuna mill-istat;

19.

iħeġġeġ lill-Kummissjoni Ewropea tippromovi l-iżvilupp tal-pjani ta' azzjoni reġjonali għall-innovazzjoni inkluż ukoll l-iżvilupp industrijali;

20.

jitlob lill-Kummissjoni sabiex tagħmel segwitu tal-Komunikazzjoni dwar l-Intraprenditorija 2020 billi tanalizza aktar l-ostakli reali li jiffaċċjaw l-intraprendituri żgħażagħ u jħeġġeġ li jkun hemm aktar skambju u possibbiltajiet transkonfinali għalihom;

21.

itenni t-talba tiegħu lill-Kummissjoni Ewropea sabiex tipprepara White Paper dwar il-koeżjoni territorjali li għandha tanalizza l-konnessjoni bejn l-Aġenda Territorjali 2020 u l-Istrateġija Ewropa 2020 kif ukoll l-impatt territorjali ex post tal-politika ta' koeżjoni fl-2007-2013;

22.

jitlob lill-Kummissjoni Ewropea sabiex tagħmel rapport dwar jekk l-awtoritajiet lokali u reġjonali kinux involuti b'mod strutturat u f'waqtu fl-abbozzar tal-Ftehimiet ta' Sħubija u l-Programmi Operattivi għall-2014-2020, b'konformità mal-prinċipji tas-sħubija u tal-governanza f'diversi livelli li jinsabu fir-Regolament dwar id-Dispożizzjonijiet Komuni kif ukoll fil-Kodiċi ta' Kondotta dwar is-Sħubija;

23.

jitlob lill-Kummissjoni Ewropea tippubblika gwida prattika u faċli biex tintuża għall-partijiet interessati lokali dwar kif għandhom jintużaw il-fondi strutturali l-ġodda hekk kif jiġu adottati r-regolamenti l-ġodda;

24.

fir-rigward tal- Inizjattiva favur l-Impjieg taż-Żgħażagħ, għandu preokkupazzjonijiet serji dwar il-fondi insuffiċjenti għall-perjodu kollu ta' programmazzjoni li jmiss u l-konċentrazzjoni tiegħu fl-2014/2015, liema ħaġa tixħet dubju fuq is-sostenibbiltà u l-effiċjenza tiegħu. Għalhekk, jitlob b'mod partikolari li jiġi emendat l-Artikolu 9f tar-Regolament dwar il-Qafas Finanzjarju Pluriennali sabiex titneħħa l-limitazzjoni espliċita tal-intestatura baġitarja l-ġdida tal-Inizjattiva għal EUR 3 biljun. Dan ikun meħtieġ b'mod partikolari biex jiġi evitat li, wara l-2016, ikun hemm konċentrazzjoni eċċessiva tal-programmi li huma kritiċi għall-koeżjoni, bħall-programmi dwar il-kooperazzjoni transkonfinali jew partijiet mill-Faċilità Nikkollegaw l-Ewropa;

25.

ser jikkoopera mal-Kummissjoni Ewropea sabiex ir-REKT jiġi integrat fil-politiki tal-UE, kif iddikjarat fil-ftehim fis-seħħ bejn iż-żewġ istituzzjonijiet u jħeġġeġ lill-Kummissjoni Ewropea tippromovi l-użu tar-REKT fl-implimentazzjoni tal-Politika dwar il-Viċinat; il-KtR ser jesplora l-possibbiltajiet sabiex jitwaqqfu REKT mal-pajjiżi msieħba tal-viċinat permezz tal-ARLEM u l-CORLEAP;

26.

jistieden lill-Kummissjoni tipprepara Komunikazzjoni dwar il-mobbiltà f'reġjuni li għandhom sfidi ġeografiċi u demografiċi;

27.

fil-kuntest tal-livell għoli ta' qgħad f'ħafna Stati Membri, li huwa partikolarment sever għaż-żgħażagħ, jappoġġja l-isforzi li saru sabiex tingħata Garanzija għaż-Żgħażagħ u jħeġġeġ lill-Kummissjoni Ewropea sabiex tkompli tiżviluppa dan il-qasam u toħroġ rapport dwar il-progress matul l-2014;

28.

jappella li l-Kummissjoni Ewropea tipproponi "Patt ta' Investiment Soċjali" kif mitlub ukoll mill-Parlament Ewropew;

29.

jemmen li hemm bżonn ta' ċertezza legali ikbar għall-attivitajiet fl-ekonomija soċjali u f’dan il-kuntest jappella għal statut ta’ impriża mutwa Ewropea;

30.

fid-dawl tal-potenzjal tal-SMEs li joħolqu l-impjiegi fil-livell lokali u reġjonali u sabiex dawn jiġu megħjuna jiffaċċjaw il-kriżi persistenti, jitlob lill-Kummissjoni Ewropea sabiex tkompli tħeġġeġ aktar lill-istituzzjonijiet finanzjarji biex isellfu u jinvestu fl-SMEs bħala mezz kif jiżguraw is-sopravivenza tagħhom kif ukoll jippromovu t-tkabbir tagħhom. Għal dan il-għan, jistenna li jintlaħaq ftehim mill-Kunsill Ewropew ta' Ġunju dwar il-proposti għall-"pjan ta' investiment" il-ġdid, u jħeġġeġ investimenti ġodda f'innovazzjoni miftuħa u start-ups intraprenditorjali;

31.

jitlob lill-Kummissjoni tissokta bl-isforzi tagħha biex tissemplifika u timminimizza l-piż regolatorju għall-SMEs fl-ambitu tal-programm dwar l-idoneità u l-prestazzjoni tar-regolamentazzjoni (REFIT), u jitlobha wkoll biex, permezz ta' konsultazzjonijiet regolari mal-SMEs, tidentifika l-liġijiet tal-UE u l-oqsma ta' leġislazzjoni li huma jqisu li huma l-aktar ta’ piż (l-inizjattiva "Top Ten");

32.

jitlob lill-Kummissjoni tiżviluppa approċċ politiku ġdid iffukat fuq l-intraprenditorija u strateġiji ta' Speċjalizzazzjoni Intelliġenti, kif ukoll skoperti intraprenditorjali fil-livelli kollha tal-edukazzjoni, mill-iskejjel tal-primarja sal-iskejjel vokazzjonali u l-universitajiet; l-enfasi għandha ssir fuq kif l-Ewropej – mill-mexxejja lokali u reġjonali sal-industrijalisti u l-intraprendituri tal-istart-ups – jistgħu jinteraġixxu mal-istudenti fl-iskejjel tal-primarja sabiex isiru iżjed intraprenditorjali fl-attitudni tagħhom u l-attivitajiet ta' kuljun sa minn età żgħira ħafna;

33.

jitlob lill-Kummissjoni tressaq proposta dwar l-informazzjoni lill-ħaddiema, il-konsultazzjoni tagħhom, l-antiċipazzjoni u l-ġestjoni tar-ristrutturazzjoni, kif deskritt fir-Riżoluzzjoni tal-Parlament Ewropew tal-15 ta' Jannar 2013;

34.

jappella lill-Kummissjoni toħroġ rapport dwar l-implimentazzjoni tad-Direttiva dwar il-Ħlasijiet Tard fil-livell nazzjonali, reġjonali u lokali tal-gvern;

35.

jappella lill-Kummissjoni u lill-Istati Membri sabiex ikomplu jinvolvu lill-awtoritajiet lokali u reġjonali fit-tfassil u l-implimentazzjoni tal-politiki fil-qasam tal-ġustizzja u l-affarijiet interni u b'mod speċifiku fil-qasam tal-migrazzjoni u l-asil kif ukoll fil-ġlieda li qed issir bħalissa kontra l-korruzzjoni u l-kriminalità organizzata u l-protezzjoni tal-vittmi;

36.

itenni l-impenn tiegħu għas-sħubija strateġika offruta mill-Kummissjoni Ewropea fl-2012 permezz tal-Aġenda Ewropea riveduta dwar l-integrazzjoni taċ-ċittadini ta' pajjiżi terzi u d-djalogu ta' politika mwettaq fi ħdan il-Forum Ewropew dwar l-Integrazzjoni; jitlob lill-Kummissjoni tinsisti fuq l-użu tal-patti territorjali f'dan il-qasam ta' politika kif issuġġerit fl-aġenda riveduta tagħha dwar l-integrazzjoni;

37.

jitlob lill-Kummissjoni Ewropea tirrevedi d-Direttiva 2004/18/KE dwar il-koordinazzjoni tal-proċeduri għall-għoti ta' kuntratti sabiex "prodott lokalment" jista' jkun kriterju standard ta' għażla fis-sejħiet għall-offerti għall-provvista ta' ikel, pereżempju, għall-iskejjel, id-djar tax-xjuħ u l-faċilitajiet pubbliċi (3);

38.

jitlob li jiġi evalwat bir-reqqa l-impatt territorjali tal-proposti kollha sabiex jitneħħew il-mekkaniżmi li jirregolaw is-suq tal-agrikoltura, inklużi l-ftehimiet tal-kummerċ bilaterali u l-ftehimiet ta' assoċjazzjoni, u li jiġi ċċekkjat jekk dawn il-proposti jmorrux kontra l-għan tal-koeżjoni territorjali minqux fit-Trattat ta' Lisbona;

39.

jitlob lill-Kummissjoni tipproponi strateġija Ewropa għall-iżvilupp rurali sabiex jerġa' jkun hemm bilanċ tar-riżorsi favur l-oqsma rurali li l-livell tagħhom ta' żvilupp għadu taħt il-medja tal-UE;

40.

jenfasizza l-importanza ta' implimentazzjoni tajba tal-approċċ reġjonalizzat il-ġdid tat-teħid ta' deċiżjonijiet fi ħdan il-Politika Komuni tas-Sajd riformata, li tipprevedi li d-deċiżjonijiet jiġu adottati fil-livell tal-baċir marittimu minflok il-mikroġestjoni attwali tal-UE, u li jiġi garantit involviment aħjar tal-partijiet interessati kollha; huwa mħasseb dwar l-użu mill-Kummissjoni tal-atti ddelegati għax dan m'għandux isir a skapitu tal-karatteristiċi speċifiċi ta' kull żona tas-sajd u tal-baħar;

41.

ifakkar fir-rwol ewlieni li trid taqdi t-tranżizzjoni lejn provvista ta' enerġija rinnovabbli fil-politika tal-UE dwar il-klima u l-enerġija; għalhekk, jitlob lill-Kummissjoni Ewropea tipproponi żieda li torbot bil-liġi fil-mira tal-enerġija rinnovabbli għall-2030, kif ukoll il-miri intermedji għall-2040 bil-għan li tintlaħaq il-mira ta' 100 % rinnovabbli sal-2050;

42.

jitlob lill-Kummissjoni Ewropea biex fl-2014 tniedi aktar inizjattivi fi ħdan il-Pjan Direzzjonali għal Ewropa b'Użu Effiċjenti tar-Riżorsi (4), pereżempju billi minbarra l-indikatur prinċipali tal-produttività tar-riżorsi użat biex jitkejjel l-għan ewlieni tal-Pjan Direzzjonali – jiġifieri li tittejjeb il-prestazzjoni ekonomika filwaqt li tonqos il-pressjoni fuq ir-riżorsi naturali – jinħolqu indikaturi komplementari relatati mal-effiċjenza tar-riżorsi u indikatur ġdid prinċipali dwar l-impatti naturali fuq il-kapital u l-ambjent tal-użu tar-riżorsi, u sabiex twettaq progress fir-rigward tal-miri bbażati fuq dawn l-indikaturi; jiġifieri li jkun jista' jitkejjel b'mod kontinwu u bl-irħis il-progress fit-titjib tal-użu effiċjenti tar-riżorsi; itenni t-talba tiegħu li l-Kummissjoni Ewropea tavvanza azzjonijiet lejn miri obbligatorji għall-akkwist pubbliku ekoloġiku, filwaqt li tqis li hemm fatturi importanti oħra fl-akkwist pubbliku (5);

43.

jitlob lill-Kummissjoni Ewropea tiżgura li r-reviżjoni tagħha prevista għall-2014 tal-leġislazzjoni tal-iskart u tal-miri eżistenti dwar il-prevenzjoni, l-użu mill-ġdid, ir-riċiklaġġ, l-irkupru u l-alternattivi għall-miżbliet ser tqis kif dovut l-Opinjoni ta' prospettiva tal-Kumitat mitluba mill-Kummissjoni Ewropea dwar il-kwistjoni; ir-reviżjoni għandha tkun konsistenti mal-"miri ambizzjużi" stabbiliti fil-Pjan Direzzjonali għal Ewropa b'Użu Effiċjenti tar-Riżorsi li jwittu t-triq lejn ekonomija bbażata fuq l-użu mill-ġdid u r-riċiklaġġ, bi skart residwu kważi xejn; jitlob li fil-kuntest tar-reviżjoni tal-2014 tingħata attenzjoni speċjali lill-iskart tal-plastik;

44.

bħala segwitu għall-Green Paper, jitlob lill-Kummissjoni Ewropea tfassal qafas ambizzjuż ġdid dwar il-klima u l-enerġija għall-perjodu sal-2030; dan il-qafas għandu speċifikament jipprovdi għal rati ogħla ta' kofinanzjament mill-UE għall-proġetti ta' infrastruttura li jappoġġjaw l-għanijiet għat-tibdil fil-klima u huma relatati b'mod sinifikanti mal-klima;

45.

jitlob li l-Kummissjoni tiżviluppa strateġija dwar il faqar enerġetiku, li tkun akkumpanjata mill-proposti adatti, inkluża definizzjoni fil-livell tal-UE tal-faqar enerġetiku;

46.

jitlob lill-Kummissjoni Ewropea sabiex tagħmel l-isforzi kollha sabiex tippromovi l-effiċjenza fl-użu tal-enerġija u tipproponi miri nazzjonali vinkolanti għall-effiċjenza fl-użu tal-enerġija akkumpanjati minn valutazzjoni ddettaljata tal-impatt baġitarju u pakkett ta' miżuri finanzjarji; itenni li f'dan il-qasam hemm bżonn li l-politika tiġi implimentata waqt li jiġi rispettat il-prinċipju tas-sħubija u waqt li jiġi segwit l-approċċ tal-governanza f'diversi livelli;

47.

jitlob lill-Kummissjoni tibda u tikkonkludi ħafna mill-eżerċizzji tal-valutazzjoni previsti fil-kuntest tal-Istrateġija għal Regolamentazzjoni Aħjar u b'mod partikolari r-REFIT, u jfakkar fl-offerta tiegħu biex jagħti kontribut permezz tan-netwerks konsultattivi tiegħu;

48.

jitlob li l-Kummissjoni Ewropea tagħmel il-Valutazzjoni tal-Impatt Territorjali operattiva u obbligatorja f'ċerti oqsma ta' politika; itenni r-rieda tiegħu li jikkoopera mill-qrib mal-Kummissjoni f'dan il-qasam u jissuġġerixxi li d-Direttorat Ġenerali għall-Politika Reġjonali u Urbana jsir punt ta' kuntatt uniku għall-Valutazzjoni tal-Impatt Territorjali;

49.

jistieden lill-Kummissjoni tibgħat lill-Kumitat proposti għal kollaborazzjoni fil-qasam tal-konsultazzjoni tal-awtoritajiet reġjonali u lokali fil-fażi preleġislattiva (Artikolu 2 tal-Protokoll dwar is-Sussidjarjetà u l-Proporzjonalità) u fil-qasam tal-konformità mal-prinċipji tas-sussidjarjetà u l-proporzjonalità;

50.

jistieden lill-Kummissjoni Ewropea ttejjeb il-qafas regolatorju tal-UE għas-setturi tal-kultura u l-kreattività, b'enfasi fuq is-semplifikazzjoni u l-aċċess għall-finanzjament. Il-kultura u l-kreattività għandhom jiġu integrati aħjar fl-Istrateġija Ewropa 2020;

51.

fid-dawl tal-Pakkett dwar l-Investiment fl-Innovazzjoni, jitlob lill-Kummissjoni Ewropea tiddefinixxi b'mod ċar u tenfasizza r-rwol tal-awtoritajiet lokali u reġjonali fil-programmi u l-proġetti relatati mas-sħubijiet pubbliċi-privati. Ir-reġjuni u l-bliet huma atturi ewlenin fil-ħoloqien tal-kundizzjonijiet qafas adatti għall-ambjenti innovattivi. Bħala intermedjarji, huma jlaqqgħu flimkien, fi ħdan it-territorju tagħhom, l-atturi ewlenin tat-trijangolu tal-innovazzjoni, taħlita ta' akkademiċi, universitajiet, riċerkaturi, industriji u negozji;

52.

jenfasizza l-bżonn li tinħareġ Komunikazzjoni dwar l-istrateġija għal turiżmu kulturali sostenibbli u kompetittiv bħala mezz sabiex jiġu appoġġjati opportunitajiet ġodda ta' impjiegi u jissaħħu l-ekonomiji lokali u reġjonali. Strateġija bħal din tista' toffri qafas komuni għall-promozzjoni u l-finanzjament tal-wirt arkitettoniku, etnografiku u industrijali tar-reġjuni Ewropej;

53.

jirrikonoxxi l-intenzjoni tal-Kummissjoni Ewropea li ssaħħaħ il-kooperazzjoni mal-KtR fit-tisħiħ tad-dimensjoni lokali u reġjonali fil-proċess tat-tkabbir; jitlob li dan jiġi rifless fir-rapporti annwali dwar il-progress tat-tkabbir;

54.

jistieden lill-Kummissjoni tesplora aktar il-possibbiltajiet li l-Faċilità tal-Amministrazzjoni Lokali (FAL) tiġi estiża għall-gvernijiet lokali fil-pajjiżi msieħba tas-Sħubija tal-Lvant u tal-Euromed;

55.

jappella lill-Kummissjoni Ewropea u lill-Kunsill biex iżommu approċċ ta' "aktar b'aktar" fil-Pjan Direzzjonali l-ġdid għas-Sħubija tal-Lvant, fejn l-inizjattiva għandha titqies aktar bħala strument biex jiġi applikat il-poter trasformattiv tal-kontribut tal-Unjoni Ewropea u sabiex l-awtoritajiet lokali u reġjonali jiġu inklużi fl-implimentazzjoni tal-inizjattiva;

56.

fil-kuntest tal-kooperazzjoni tal-Euromed, jilqa' l-enfasi li tpoġġiet fuq l-iżvilupp reġjonali u jixtieq jara l-involviment tal-ARLEM fl-hekk imsejħa Proġetti Pilota għall-Iżvilupp Reġjonali;

57.

ifakkar fl-appoġġ sħiħ tiegħu biex l-2015 tiġi ddikjarata s-Sena Ewropea għall-Iżvilupp bil-għan li jiġi żgurat is-segwitu tal-Għanijiet ta' Żvilupp tal-Millenju, u jilqa' r-riflessjonijiet imnedija mill-Kummissjoni Ewropea dwar l-approċċ globali tal-futur għall-iżvilupp; jappella lill-Kummissjoni tiddefendi qafas globali għall-Għanijiet ta' Żvilupp tal-Millenju wara l-2015 li jgħaqqad it-tliet dimensjonijiet tal-iżvilupp sostenibbli: dik ekonomika, dik soċjali u dik ambjentali;

58.

huwa fiduċjuż li r-rakkomandazzjonijiet tiegħu ser jitqiesu kif dovut fil-proċess tat-tħejjija tal-programm ta' ħidma tal-Kummissjoni għall-2014 u jagħti struzzjonijiet lill-President tal-Kumitat tar-Reġjuni sabiex iressaq din ir-Riżoluzzjoni lill-President tal-Kummissjoni Ewropea, lill-President tal-Parlament Ewropew, lill-President tal-Kunsill Ewropew, lill-Presidenza Litwana tal-Kunsill tal-UE u l-Presidenzi li jmiss Griega u Taljana.