WERREJ

1........... Introduzzjoni................................................................................................................ 2

2........... Definizzjoni tal-problema............................................................................................. 3

2.1........ Sfidi ewlenin tal-UE fis-settur ferrovjarju.................................................................... 3

2.2........ Il-problemi ewlenin li jeħtieġu azzjoni.......................................................................... 3

2.3........ Il-kaġuni ewlenin tal-problemi...................................................................................... 3

2.3.1..... Il-frammentazzjoni tal-isforzi tar-R&I.......................................................................... 3

2.3.2..... Ingranaġġ baxx tal-investiment fir-R&Ż tal-UE.......................................................... 4

2.3.3..... Il-parteċipazzjoni limitata u mhux koordinata tal-partijiet interessati tul il-katina tal-valur ferrovjarja       4

2.3.4..... Il-Kostijiet għoljin, ir-riskji u ż-żmien ta’ investimenti tar-R&I................................... 4

2.4........ L-aktar partijiet interessati affettwati u valutazzjoni tal-ħtiġijiet................................. 4

2.5........ Sussidjarjetà.................................................................................................................. 4

2.5.1..... Bażi legali..................................................................................................................... 4

2.5.2..... Il-ħtieġa u l-valur miżjud tal-UE................................................................................... 5

3........... Għanijiet....................................................................................................................... 5

4........... Alternattivi ta’ politika................................................................................................. 5

5........... Valutazzjoni tal-impatti................................................................................................ 6

5.1........ Approċċ ġenerali tal-valutazzjoni tal-impatti................................................................ 6

5.2........ Sommarju tal-impatti.................................................................................................... 6

6........... Tqabbil tal-alternattivi................................................................................................... 7

6.1.1..... Struttura governattiva................................................................................................... 8

6.1.2..... Baġit............................................................................................................................. 8

7........... Il-monitoraġġ u l-evalwazzjoni..................................................................................... 8

DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Mehmuż ma' dan id-dokument

Proposta għal Regolament tal-Kunsill li jistabbilixxi l-Impriża Konġunta Shift2Rail

1.           Introduzzjoni

Dan is-sommarju eżekuttiv jiddeskrivi s-sejbiet ewlenin u l-konklużjonijiet tar-rapport tal-valutazzjoni tal-impatt li jakkumpanja l-proposta tal-Kummissjoni għal Regolament tal-Kunsill li jistabbilixxi l-Impriża Konġunta Shift2Rail skont Orizzont 2020 (H2020) għal approċċ koordinat tal-UE għar-riċerka u l-innovazzjoni fis-settur ferrovjarju b’appoġġ għat-tlestija ta’ Żona Ferrovjarja Unika Ewropea (SERA).

Il-proposta ssegwi l-White Paper dwar il-Pjan Direzzjonali għal Żona Unika Ewropea tat-Trasport[1], li jenfasizza l-bżonn li tinħoloq SERA biex tinkiseb sistema Ewropea tat-trasport kompetittiva u b’użu effiċjenti tar-riżorsi u li tindirizza l-isfidi prinċipali tas-soċjetà marbuta mad-domanda li qed tiżdied tat-traffiku, il-konġestjoni, il-provvista tal-enerġija u t-tibdil fil-klima. Il-Komunikazzjoni tal-Kummissjoni ‘Is-Sħubija fir-Riċerka u l-Innovazzjoni” tenfasizza wkoll li s-sħubijiet pubbliċi-privati (PPPs) jistgħu jgħinu biex jiġu indirizzati dawn l-isfidi u tissaħħaħ il-pożizzjoni kompetittiva tal-Ewropa.

2.           Definizzjoni tal-problema

2.1.        Sfidi ewlenin tal-UE fis-settur ferrovjarju

Il-miri ambizzjużi tal-UE dwar it-tibdil fil-klima, l-użu tal-enerġija u l-protezzjoni ambjentali jfissru li s-settur ferrovjarju ser ikun meħtieġ jieħu sehem akbar mid-domanda għat-trasport fid-deċennji li jmiss.

Madankollu, in-netwerk ferrovjarju Ewropew għadu qed isibha diffiċli li jisfida d-dominanza tat-trasport bit-triq. Minkejja s-sussidji pubbliċi kbar u investimenti sinifikanti fl-infrastruttura u prodotti ta’ teknoloġija għolja, is-sehem modali tat-trasport tal-merkanzija bil-ferrovija naqas f’dawn l-aħħar għaxar snin, filwaqt li s-sehem modali baqa’ kostanti fir-rigward tal-passiġġieri bil-ferrovija.

Barra dan, għalkemm l-industrija tal-provvista ferrovjarja Ewropea għadha minn ta' quddiem nett fuq livell dinji, din qiegħda kull ma jmur tħabbat wiċċha ma' sfidi minn fornituri barranin, l-aktar fl-Asja, li qed jinvestu bil-kbir fir-R&I.

Is-suċċess fit-tul fil-kompetittività ferrovjarja Ewropea, kemm kontra modi oħra tat-trasport u fil-konfront tal-kompetituri barranin, għaldaqstant, tiddependi fuq innovazzjoni kontinwa tal-prodott, is-servizz u l-proċess, li, min-naħa tagħha, teħtieġ investimenti koordinati fir-R&I fuq skala kbira.

2.2.        Il-problemi ewlenin li jeħtieġu azzjoni

L-innovazzjoni tul il-katina tal-valur ferrovjarja tgħin b'mod strateġiku biex tiġi kompluta s-SERA u tissaħħaħ il-kompetittività tas-settur ferrovjarju. Madankollu, fil-passat l-isforzi tar-R&I fis-settur ferrovjarju fil-livell tal-UE ma ġewx immirati b’mod suffiċjenti lejn politika usa’ bil-għan li tiġi kompluta s-SERA u l-adozzjoni mis-suq u l-impatt tal-proġetti tar-R&I ferrovjarji tal-UE kienu baxx u bil-mod.

2.3.        Il-kaġunijiet ewlenin tal-problema

Ġew identifikati erba’ muturi importanti li jikkontribwixxu għal dawn il-problemi.

2.3.1.     Il-frammentazzjoni tal-isforzi tar-R&I

Apparti l-frammentazzjoni tal-baġits tar-R&I fl-Istati Membri, il-koordinazzjoni ta’ sforzi tar-R&I fis-settur ferrovjarju huwa ristrett iżjed minħabba dawn il-forom ta’ frammentazzjoni:

Il-frammentazzjoni bejn l-ekosistemi ferrovjarji differenti, bi ta’ sistemi nazzjonali u reġjonali, netwerks u standards operattivi tekniċi frammentati. L-industrija kellha għalhekk tiżviluppa vetturi ddisinjati sabiex jissodisfaw il-limitazzjonijiet uniċi tas-swieq nazzjonali relattivament żgħar. Dan il-livell għoli ta’ kustomizzazzjoni tal-prodott u n-nuqqas ta’ standardizzazzjoni Ewropea mhux biss jikkostitwixxi ostaklu għas-SERA, iżda jirriżulta wkoll f'żieda fl-ispejjeż ta’ produzzjoni u marġini operattivi baxxi li ma jippermettux investimenti sinifikanti f’riċerka spekulattiva orjentata lejn it-teknoloġija u jillimitaw l-użu tal-innovazzjonijiet mis-suq.

Il-frammentazzjoni bejn is-sottosistemi tas-settur ferrovjarju. Interazzjonijiet kumplessi bejn is-sottosistemi (l-infrastruttura, il-vetturi ferrovjarji u l-manifattura tat-tagħmir tas-sinjali, l-impriżi ferrovjarji u l-maniġers tal-infrastruttura) jillimitaw il-potenzjal tat-titjib ta' xi parti speċifika tas-sistema jew tal-possibbiltà li jiġu proposti soluzzjonijiet rivoluzzjonarji li jkollhom impatt fuq is-sistema kollha u li jistgħu jintużaw biex tiġi kompletata s-SERA.

Il-frammentazzjoni tul iċ-ċiklu tal-ħajja tal-innovazzjoni. L-isforzi tar-riċerka tal-UE jiffokaw primarjament fuq l-innovazzjoni prekompetittiva f'Livelli ta' Preparazzjoni Teknoloġika baxxi biex b'hekk hemm ftit proġetti ta’ dimostrazzjoni fuq skala kbira u parti sinifikanti tal-għarfien iġġenerat minn proġetti tar-R&I Ewropea qatt ma jispiċċaw fis-suq.

2.3.2.     Ingranaġġ baxx tal-investiment fir-R&Ż ferrovjarju tal-UE

L-istruttura attwali ta’ R&I ferrovjarji tal-UE tillimita li jkun hemm vantaġġ dirett massimu mill-finanzajment tal-UE. Fil-proġetti ferrovjarji, is-sehem medju ta’ finanzjament privat kien biss ta' 34%. Ir-rati ta' parteċipazzjoni relattivament baxxi tal-kumpaniji privati fi proġetti jfissru wkoll li ħafna proġetti jindirizzaw livelli teknoloġiċi relattivament baxxi, u b’hekk jillimitaw l-effetti ta’ lieva indiretti marbuta ma’ investimenti privati addizzjonali wara t-tlestija tal-proġett.

2.3.3.     Parteċipazzjoni limitata u mhux koordinata tal-partijiet interessati tul il-katina tal-valur ferrovjarja

L-approċċ ta' tnedija tal-proġett tar-R&I attwali "minn isfel għal fuq” ma jippermettix approċċ programmatiku komprensiva u jfisser li l-proġetti individwali ma jkunux neċessarjament allinjati flimkien u mal-għanijiet ta’ politika ġenerali tal-UE. Il-formazzjoni ta’ konsorzji ad hoc tfisser li l-katina tal-valur kollha mhux neċessarjament tkun tirrappreżenta u xxekkel il-kollaborazzjoni kontinwa tal-imsieħba lil hinn minn proġetti uniċi, li tirriżulta fi tnaqqis tal-fiduċja fost l-imsieħba.

2.3.4.     Kostijiet għoljin, riskji u ż-żmien ta’ investimenti tar-R&I

Ir-riskji ġeneriċi tal-innovazzjoni huma akbar fis-settur ferrovjarju minħabba:

· Interazzjonijiet kumplessi bejn segmenti ferrovjarji differenti u l-ħtieġa għal sinkroniċità bejn l-innovazzjonijiet.

· Ċikli tal-ħajja ta’ prodott twal, li jfixklu l-iskjerament rapidu ta’ teknoloġiji ferrovjarji ġodda.

· Benefiċċji ta' distribuzzjoni tal-innovazzjoni mhux ugwali bejn il-partijiet interessati, li jnaqqsu l-inċentivi sabiex isir investiment f’teknoloġiji ġodda.

· In-nuqqas ta’ sinerġiji ma’ setturi industrijali oħra, speċjalment f’teknoloġiji emerġenti.

2.4.        L-aktar partijiet interessati affettwati u valutazzjoni tal-ħtiġijiet

L-inizjattiva proposta se taffettwa l-atturi kollha fis-settur ferrovjarju, u tgħin biex iżżid il-vantaġġ kompetittiv tagħhom u jitnaqqsu l-kostijiet. Setturi industrijali oħra, inklużi fornituri f’saffi u atturi ekonomiċi subsettorjali li jagħmlu użu mill-merkanzija u s-servizzi fornuti mis-settur ferrovjarju, jistgħu jiġu affettwati wkoll.

Billi tikkontribwixxi biex tnaqqas il-kostijiet infrastrutturali u operattivi, din l-inizjattiva se tgħin biex tnaqqas l-ammont ta’ sussidji mħallsa mill-gvernijiet nazzjonali. Billi tinżammu l-pożizzjoni Ewropea minn ta' quddiem nett fis-settur ferrovjarju, dan kollu għandu jgħin ukoll biex jinħolqu impjiegi Ewropej ta’ kwalità għolja.

L-utenti ta’ servizzi tal-merkanzija u l-passiġġieri ser ikunu affettwati indirettament billi l-affidabilità u l-kwalità tas-servizzi se jiġu mtejba. Kompetittività mtejba fis-settur ferrovjarju, flimkien ma’ żieda fil-kapaċità, se jgħinu biex jittieħed sehem akbar tad-domanda għat-trasport, u b’hekk jikkontribwixxu biex inaqqsu l-konġestjoni tat-traffiku u l-emissjonijiet tad-CO2 Is-saħħa u l-benessri taċ-ċittadini wkoll se jintlaqtu tajjeb minħabba t-tnaqqis fit-tniġġis akustiku mill-ferroviji.

2.5.        Sussidjarjetà

2.5.1.     Bażi legali

Id-dritt tal-UE li taġixxi f’dan il-qasam huwa stipulat fl-Artikolu 187 tat-Trattat dwar il-Funzjonament tal-Unjoni Ewropea, li jippermetti t-twaqqif ta’ impriżi konġunti jew kull struttura oħra neċessarja għall-eżekuzzjoni effiċjenti tal-programmi tar-riċerka, żvilupp teknoloġiku u dimostrazzjoni tal-Unjoni.

2.5.2.     Il-ħtieġa u l-valur miżjud tal-UE

Il-livelli ta’ finanzjament għar-R&I ferrovjarji kienu storikament baxxi, bl-investimenti jieħdu daqqa ta' ħarta bil-frammentazzjoni u n-nuqqas ta’ effiċjenza, minħabba d-differenzi fil-programmi nazzjonali. Il-ġbir flimkien u l-koordinazzjoni tal-isforzi tar-riċerka u l-iżvilupp fil-livell tal-UE għandhom iktar probabbiltà ta’ suċċess, minħabba n-natura transnazzjonali tal-infrastruttura u t-teknoloġiji li jridu jiġu żviluppati b'appoġġ għas-SERA u għall-ħtieġa li tinkiseb massa suffiċjenti ta’ riżorsi. L-azzjoni fil-livell tal-UE tgħin biex tirrazzjonalizza l-programmi tar-riċerka u tiżgura l-interoperabbiltà tas-sistemi żviluppati. Din l-istandardizzazzjoni se tiftaħ suq usa’ u tippromwovi l-kompetizzjoni.

3.           Għanijiet

L-għan ġenerali huwa li jiġu allinjati aħjar l-isforzi tar-R&I ferrovjarji tal-UE b'appoġġ għat-tlestija tas-SERA, filwaqt li titħaffef l-adozzjoni mis-suq ta’ soluzzjonijiet innovattivi, u b’hekk tiżdied il-kompetittività tal-UE fis-settur ferrovjarju, kemm fil-konfront ta' modi oħra tat-trasport kif ukoll fil-konfront tal-kompetituri barranin.

B’mod aktar speċifiku, l-inizjattiva se tfittex li:

· Trawwem investiment iffukat, ikkoordinat u fit-tul fir-R&I ferrovjarji tal-UE;

· Iżżid l-effett ta’ ingranaġġ tal-finanzjament tal-UE għar-R&I ferrovjarji;

· Tistabbilixxi netwerks sostenibbli u l-iskambju tal-konoxxenza bejn partijiet interessati differenti;

· Tnaqqas ir-riskji marbutin mal-innovazzjoni;

· Iżżid il-prestazzjoni operattiva u l-effikaċja tal-infiq tar-R&I ferrovjarji.

4.           Alternattivi ta’ politika

Billi l-attivitajiet ta’ R&I ta’ appoġġ għas-settur ferrovjarju huma previsti taħt H2020, l-għażliet ikkunsidrati għall-implimentazzjoni tal-attivitajiet tar-R&I ferrovjarji jinkludu:

· il-kontinwazzjoni tal-mudell tar-Riċerka Kollaborattiva (CR) applikabbli taħt is-7 Programm ta' Qafas waqt li jiġi integrat it-titjib skont l-H2020, bħal arranġamenti ta’ monitoraġġ simplifikat u aktar enfasi fuq dimostrazzjoni (l-għażla bażika);

· l-istabbiliment ta’ PPP kuntrattwali (cPPP), li jwassal għal ftehim kuntrattwali flessibbli bejn il-Kummissjoni u l-imsieħba privati biex jaħdmu lejn programm komuni bbażat fuq pjan direzzjonali stabbilit minn dawn tal-aħħar, bl-użu ta’ kodiċi standard għar-riċerka kollaborattiva u l-proġetti ta’ innovazzjoni.

· it-twaqqif ta’ PPP istituzzjonali (iPPP), li jimplika l-ħolqien ta’ struttura amministrattiva ddedikata għall-koordinazzjoni tar-R&I ferrovjarji, f’forma ta’ korp tal-Unjoni skont l-Artikolu 187 tat-TFUE, biex b’hekk jiġi pprovdut qafas għal atturi pubbliċi u privati biex jaħdmu flimkien u jieħdu deċiżjonijiet konġunti.

· Il-koordinazzjoni ta’ attivitajiet ta’ R&I mill-Aġenzija Ferrovjarja Ewropea (ERA), li jinvolvu modifika tar-Regolament tat-twaqqif tal-Aġenzija biex din tkun tista’ twettaq l-attivitajiet ta’ R&I biswit ir-rwol tagħha bħala awtorità regolatorja.

5.           Valutazzjoni tal-impatt

5.1.        Approċċ ġenerali tal-valutazzjoni tal-impatti

L-analiżi tkopri esklussivament l-impatt tat-tip ta’ struttura stabbilita sabiex jiġu implimentati attivitajiet ta’ R&I ferrovjarji u għalhekk tiffoka primarjament fuq l-impatti tad-dħul li ġejjin:

· Iffukar u koordinament tal-isforzi tar-riċerka

· Effett ta' ingranaġġ ta’ finanzjament tar-R&I ferrovjarji tal-UE

· Netwerks sostnuti u parteċipazzjoni wiesgħa tal-partijiet interessati

· Mitigazzjoni tar-riskji ta’ innovazzjoni

· Prestazzjoni operattiva u effiċjenza ekonomika

5.2.        Sommarju tal-impatti

Skont is-CR, il-bidliet previsti taħt H2020 se jwasslu għal aktar regoli ta’ parteċipazzjoni aktar sempliċi u koerenti, iżidu l-aċċessibilità u l-attrazzjoni ta’ programmi, l-iffaċilitar ta’ aċċess għal għarfien espert speċifiku, u jippermettu lill-applikanti li jiksbu suċċess biex jaħdmu aktar malajr. Se jkun hemm aktar enfasi fuq l-innovazzjoni u l-attivitajiet qrib is-suq u bidla lejn programmi ta’ ħidma bijennali li se jippermettu kontinwità mtejba. Madankollu, il-proġetti ffinanzjati probabilment jibqgħu f’livelli aktar baxxi ta’ preparazzjoni teknoloġika u sinkroniċità u l-koerenza tal-proġetti se tiġi mfixkla minn sejħiet individwali. Parteċipazzjoni ad hoc fil-livell tal-proġetti se tillimita l-possibbiltà li tiġi involuta katina tal-valur sħiħ tal-partijiet interessati u tal-bini ta’ netwerks sostenibbli ta’ kooperazzjoni. In-nuqqas ta’ qafas ċar tad-drittijiet tal-proprjetà intellettwali għal diversi proġetti u n-nuqqas ta’ impenn industrijali sod ifissru li l-effett ta' lieva tal-fondi tal-UE ser jibqa' simili għal-livelli attwali.

cPPP jiffaċilita l-istabbiliment ta’ għanijiet ċari, il-konċentrazzjoni fuq numru limitat ta’ setturi ta’ riċerka u l-koordinament fost bosta temi ta’ riċerka. Il-programm ta’ ħidma se jkun allinjat mal-ħtiġijiet tal-industrija b'kontenut dettaljat ta' regoli dwar il-proprjetà intellettwali, u l-inklużjoni ta' attivitajiet ta’ dimostrazzjoni favorevoli għal adozzjoni qawwija mis-suq. Madankollu, minħabba l-approċċ minn isfel għal fuq u n-nuqqas ta’ arranġamenti ta' kotmexxija mal-Kummissjoni, il-prijoritajiet tar-riċerka u l-innovazzjoni se jkunu inqas mmirati lejn l-għanijiet tal-politika tal-UE. L-industrija determinata minn qabel tista' tiżgura lieva akbar, iżda dan mhuwiex garantit peress li l-impenji legali huma limitati għal proġetti uniċi. Is-sistema ta’ sejħa individwali taf tfixkel is-sinkroniċità tal-proġetti u l-involviment ta’ atturi mill-katina ta’ valur ferrovjarju kollha kemm hi.

Permezz ta’ iPPP, il-koordinazzjoni, l-ipprogrammar u t-twettiq ta’ attivitajiet tar-R&I ferrovjarji jkunu r-responsabbiltà ta’ struttura amministrattiva, dedikata u unika, li tiżgura aktar kontinwità u inqas frammentazzjoni tal-isforzi tar-R&I. L-iżvilupp ta’ strateġija fit-tul, b’kooperazzjoni mill-qrib ma’ dawk kollha li jieħdu sehem fis-suq, se tiżgura li l-proġetti tar-R&I jappoġġjaw il-kompetittività fis-settur ferrovjarju, filwaqt li r-rwol ewlieni tal-Kummissjoni se jiżgura l-allinjament tal-aġenda tar-R&I mal-għanijiet tas-SERA. In-natura stabbli tal-iPPP, id-definizzjoni ċara tar-regoli dwar il-proprjetà intellettwali, u l-impenn sħiħ tal-UE se jagħti fiduċja lill-imsieħba pubbliċi u privati, u b’hekk jiġi stimulat investiment f'livelli ogħla. Impenji legalment vinkolanti mill-industrija li jlaħħqu mal-fondi tal-UE se jiżguraw effett ta’ lieva dirett ta' mill-inqas 30% ogħla minn għażliet oħra. Billi l-kundizzjonijiet għall-parteċipazzjoni jistgħu jiġu ġestiti b’mod flessibbli u trasparenti, l-iPPP se jkun f’qagħda li jiżgura l-parteċipazzjoni mifruxa tal-partijiet interessati u approċċ immirat lejn l-SMEs.

It-tqegħid tal-ERA fil-pożizzjoni tal-entità responsabbli mill-koordinazzjoni tar-R&I għandu jiżgura li l-istrateġija fit-tul tkun skont l-għanijiet tal-politika tal-UE, għalkemm taf tirrestrinġiha għal wisq kwistjonijiet ta' standardizzazzjoni u interoperabbiltà b'riflessjoni tal-mandat ewlieni tal-ERA u minħabba n-nuqqas ta’ għarfien espert kummerċjali. L-eżistenza ta’ struttura dedikata, b'kompetenza teknika b’saħħitha u netwerks stabbiliti, tiżgura tmexxija u koordinazzjoni b'saħħithom. Madankollu, minħabba n-nuqqas ta’ impenji formali, l-effett ta’ ingranaġġ dirett mill-industrija x’aktarx li jkun relattivament baxx. Aktar importanti minn hekk, il-kombinazzjoni tar-rwol tal-ERA bħala awtorità regolatorja b’rwol ta’ koordinazzjoni u ġestjoni tar-R&I jaf iwassal għal kunflitt ta’ interess gravi. Barra dan, mhuwiex ċert jekk l-ERA għanhiex riżorsi suffiċjenti biex timmaniġġja l-baġit sostanzjali għall-attivitajiet tar-R&I ferrovjarji.

F’termini ta’ kosteffettività, minkejja li iPPP jiswa marġinalment aktar minn għażliet oħra b’mod ġenerali, il-fatt li l-industrija timpenja ruħha li tkopri nofs l-ispejjeż amministrattivi, ifisser li l-operat ta' iPPP fil-fatt ikun 17% sa 35% irħas għall-Kummissjoni minn għażliet oħra.

6.           Inqabblu l-alternattivi

It-tabella li ġejja tiġbor fil-qosor il-valutazzjoni tal-għażliet ta’ politika differenti.

Parametri || Linja bażi || cPPP || iPPP || ERA

Iffukar u koordinament || Strateġija ta' terminu fit-tul || = || + || + || +

Relevanza għall-UE || = || = || + || =

Koordinazzjoni || = || + || ++ || ++

Effett ta' lieva ta’ finanzjament tar-R&I ferrovjarji tal-UE || Effett ta' lieva dirett (kofinanzjament privat) || 1.5 || =/+ 1.5 sa 2 || ++ mill-inqas 2 || 1.5

Impenn fis-sod || = || + || ++ || =

Netwerks sostnuti u parteċipazzjoni wiesgħa || Rappreżentazzjoni tal-katina tal-valur kollha kemm hi || = || = || + || =

Sħubijiet sostenibbli || = || + || ++ || =

Mitigazzjoni tar-riskji ta’ innovazzjoni || Rilevanza lill-industrija u l-livelli ta' preparazzjoni Teknoloġika || = || ++ || + || -

Protezzjoni tal-proprjetà intellettwali || = || + || ++ || -

Il-prestazzjoni operattiva || Żmien ta’ stabbiliment || L-ebda dewmien tal-bidu tal-istabbiliment || - 9-12-il xahar || -- Sentejn (2) inkluża l-proċedura leġiżlattiva || -- Sentejn (3) inkluża l-proċedura leġiżlattiva

Rata ta’ suċċess || 20% || + 20-30% || ++ 30-40 % || = 20%

Tal-medja taż-żmien sal-għotja || 250 || + 210 || + 160-240 || = 250

Il-kost-effettività || Kost annwalment ekwivalenti għall-Kummissjoni || EUR 4.7 miljuni || + EUR 4.9 miljuni || ++ EUR 3.2 miljuni || ++/-- EUR 3.8 miljuni

Eżiti ekonomiċi, soċjali u ambjentali || = || + || ++ || =

Tifsira:           =          : punt ta’ referenza jew ekwivalenti għall-punt ta’ referenza

+ sa ++  : sitwazzjoni ftit aħjar jew ħafna aħjar meta mqabbla mal-punt ta’ referenza

- sa - -    : sitwazzjoni ftit agħar jew ħafna agħar meta mqabbla mal-punt ta’ referenza

Abbażi tal-valutazzjoni u r-riżultati tal-konsultazzjoni pubblika, l-għażla iPPP toħroġ bħala l-iktar għażla xierqa biex jinkisbu l-għanijiet dikjarati, minkejja aktar dewmien meħtieġa biex tiġi stabbilita l-istruttura tagħha.

6.1.1.     Struttura governattiva

Il-prinċipji li ġejjin għandhom ikunu kkunsidrati meta tkun żviluppata struttura ta’ governanza tal-iPPP futuri:

· Rabta qawwija mal-politika tal-UE: L-UE għandha żżomm rwol importanti fl-iPPP biex tiżgura li l-attivitajiet tar-R&I jkunu allinjati mal-għanijiet tal-politika tal-UE.

· Parteċipazzjoni wiesgħa tal-partijiet interessati: Is-sħubija għandha tkun miftuħa għall-atturi kollha fis-settur ferrovjarju sabiex dawn jiżguraw approċċ sistematiku għall-innovazzjoni, u jintegraw il-komponenti kollha tal-katina tal-valur ferrovjarju.

· Għarfien espert: Għandhom jiġu stabbiliti korpi konsultattivi u xjentifiċi sabiex jagħtu għarfien espert tekniku rilevanti lill-iPPP. Barra dan, meta wieħed iqis l-għarfien espert estenziv tal-ERA dwar kwistjonijiet ta’ interoperabbiltà u integrazzjoni tas-sistema ferrovjarja, din għandha tkun involuta f'ħidmet l-iPPP.

6.1.2.     Baġit

L-istimi attwali tal-industrija tar-R&I jeħtieġ li jvarjaw minn EUR 800 miljun għal EUR 1 biljun. L-UE se tkopri 50% ta’ din l-ispiża, biex il-kontribut tagħha ikun ta' madwar EUR 450 miljun, li ġejjin mill-baġit tal-H2020.

L-imsieħba industrijali se jikkontribwixxu l-50% li jifdal, permezz ta’ kontribuzzjonijiet fi flus kontanti u in natura. Dawn se jikkontribwixxu wkoll fuq bażi ta’ 50/50 għall-kost amministrattiv kollu.

Huwa stmat li l-istruttura futura tkun teħtieġ madwar 20 impjegat full-time u li l-ispejjeż amministrattivi jistgħu jammontaw għal madwar 3% tan-nefqa operattiva.

7.           Il-monitoraġġ u l-evalwazzjoni

Is-sistema futura ta’ monitoraġġ u evalwazzjoni se tkopri l-legalità u r-regolarità tat-tranżazzjonijiet imwettqa mill-istruttura l-ġdida, kif ukoll it-twettiq ta’ attivitajiet ta’ R&I biex jiġi żgurat li dawn jikkontribwixxu għall-programm ta’ ħidma strateġika. Dan jinkludi:

· Il-monitoraġġ tal-pakkett ta' ħidma u fil-livell tal-proġett u r-rappurtar fuq bażi ta’ kull tliet xhur, abbażi ta’ sett ta’ indikaturi konċiżi affidabbli ewlenin tar-rendiment iddefiniti mid-Direttur Eżekuttiv u vvalidati mill-Bord Amministrattiv.

· Il-monitoraġġ u r-rappurtar fil-livell ta’ programm, ibbażati fuq id-dejta ta' proġett u l-pakkett ta’ ħidma, u inkluż il-monitoraġġ tal-kwalità tar-riżultati tanġibbli fil-konfront ta' sett ta’ kriterji dwar is-sodisfazzjon; il-monitoraġġ tal-ġestjoni tal-proġett biex tiġi vverifikata l-kwalità ġenerali tiegħu u l-konformità mal-programm ta’ ħidma strateġika.

Evalwazzjonijiet tal-implimentazzjoni tar-Regolament, li għandhom jitwettqu mill-Kummissjoni kull tliet snin mill-bidu tal-attivitajiet tal-iPPP u mill-inqas sena qabel l-iskadenza tat-terminu tal-iPPP, immirati biex jivvalutaw jekk is-sħubija fl-istruttura attwali tagħha kienetx effiċjenti u effettiva.

[1]               COM/2011/0144 finali