DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATTI

Li jakkumpanja d-dokument

Il-Komunikazzjoni tal-Kummissjoni lill-Parlament Ewropew u lill-Kunsill

Nibnu s-Suq Uniku għall-Prodotti Ekoloġiċi: Niffaċilitaw tagħrif aħjar dwar il-prestazzjoni ambjentali tal-prodotti u tal-organizzazzjonijiet

1.           Definizzjoni tal-problema

1.1.        Il-problema bażika: it-tkattir ta' metodoloġiji qiegħed ifixkel il-funzjonament tas-suq tal-prodotti ekoloġiċi

Hemm ħafna metodoloġiji disponibbli li jiġu użati għall-valutazzjoni u l-komunikazzjoni tal-impronta ambjentali tal-prodotti u tal-organizzazzjonijiet[1]. L-għadd tagħhom qed jiżdied b'mod mgħaġġel li qed iwassal għal tkattir ta' inizjattivi nazzjonali[2] u fis-settur privat[3]. Fil-prinċipju, il-kumpaniji huma ħielsa li jagħżlu huma liema għandhom japplikaw, iżda ħafna drabi jintalbu jużaw waħda partikolari, jew minn amministrazzjoni nazzjonali jew minn klijenti iktar 'l isfel fil-katina ta' attivitajiet. Jekk kumpanija tkun tforni kumpaniji oħrajn, jista' jkun li tintalab tagħti l-informazzjoni ambjentali b'diversi modi, li jfisser li jkollha tuża ħafna metodoloġiji differenti. Fl-istess ħin, m’hemmx tagħqid naturali ma' metodoloġija speċifika waħda.

Hemm diversi industrijalisti li qegħdin jitolbu armonizzazzjoni tal-metodi għall-ivvalutar tal-prestazzjoni ambjentali tal-prodotti biex b'hekk ikun hemm kundizzjonijiet ekwi għal kulħadd, jitnaqqsu l-ispejjeż u ma jitħalliex il-parassitiżmu. Dawk li wieġbu għall-konsulta pubblika wrew il-fehma tagħhom li n-nuqqas ta' konsistenza huwa wieħed mill-iżjed ostakoli importanti għall-wirja u l-ivvalutar komparattiv tal-prestazzjoni ambjentali (72,5% qablu). Għall-mistoqsija dwar x'inhuma l-kawżi tal-ostakoli, il-partijiet interessati wieġbu fil maġġoranza tagħhom li hemm għadd kbir ta' inizjattivi fl-UE (70,8%) u għadd kbir ta' modi li wieħed jista' jirrapporta (76,3%).

1.2.        L-ambitu u l-kobor tal-problema

(a) Spejjeż żejda għan-negozji

Il-koeżistenza ta' metodoloġiji diversi jintużaw fl-istess ħin timplika żieda fl-ispejjeż għal dawk li jridu jivvalutaw u jikkomunikaw l-impronti ambjentali tal-prodotti jew tal-organizzazzjonijiet tagħhom. Iż-żieda fl-ispejjeż hija minħabba: (1) żieda fl-ispejjeż tat-taħriġ biex kumpanija tkun tista' tlaħħaq mar-rekwiżiti tal-metodoloġiji differenti; (2) żieda fl-ispejjeż marbutin mal-ġbir ta' informazzjoni differenti; (3) rekwiżiti differenti ta' tikkettar; (4) rekwiżiti differenti ta' verifikar;

(b) Opportunitajiet għan-negozju transkonfinali ta' prodotti ekoloġiċi mnaqqsa.

Minħabba n-nuqqas ta' definizzjoni ta' prodotti ekoloġiċi miftieħma b'mod komuni, huwa diffiċli li wieħed jikkonferma kemm qed jiġi affettwat il-kummerċ fl-UE u ma' kumpaniji barra mill-UE. Iżda l-istħarriġ juri li 90% tal-konsumaturi jixtru prodotti ekoloġiċi mill-inqas xi kultant, u fost dawn ikun hemm prodotti esportati. Ġeneralment, huwa ċar li hemm negozju mhux ħażin ta' prodotti ekoloġiċi, u il-probabbiltà hi li dan qed jiżdied. Madankollu, it-tkattir ta' metodoloġiji jista' jfixkel din ix-xejra pożittiva u jnaqqas l-opportunitajiet ta' negozju transkonfinali, għaliex il-kumpaniji jiskopru li r-rekwiżiti marbutin mal-informazzjoni ambjentali dwar il-prodotti li jkollhom f'moħħom li jbiegħu jinbidlu ma' kull fruntiera. Qed tintalab iżjed u iżjed informazzjoni ambjentali differenti mill-gvernijiet nazzjonali fil-każ tal-akkwist pubbliku, tar-rekwiżiti għar-rappurtar u għat-tikkettar, jew minn inizjattivi privati, pereżempju minn bejjiegħ biex jippermetti li l-prodott jintwera fil-ħwienet.

(c) Nuqqas ta' ċarezza biex il-konsumaturi jkunu jistgħu jagħżlu

Fil-preżent, l-informazzjoni tal-konsumaturi dwar x'inhu ġenwinament "ekoloġiku" hija fqira ħafna. Jekk din l-informazzjoni ma tingħatax b'mod affidabbli, id-deċiżjonijiet tax-xiri ma jkunux tajbin, u ħafna konsumaturi jispiċċaw ma jixtru xejn prodott ekoloġiku, anki jekk fil-bidu jkunu xtaqu jagħmlu hekk. Dan intwera minn stħarriġ tal-Ewrobarometru. filwaqt li 75% ta' dawk li wieġbu jgħidu li huma lesti jixtru l-prodotti ekoloġiċi, kien hemm biss 17% li fir-realtà kienu xtraw minn dawn il-prodotti fix-xahar ta' qabel l-istħarriġ[4].

L-għadd ta' dikjarazzjonijiet ekoloġiċi qed jikber, minkejja li qegħdin isiru aktar superfiċjali u vagi fit-terminoloġija li jużaw, u dan qed ikompli jimmina l-fiduċja tal-konsumaturi: 48% tal-konsumaturi ma jafdawx fl-informazzjoni ambjentali li tkun ikkomunikata fuq il-prodotti[5]. In-nies għandhom tendenza li ma jafdawx fid-dikjarazzjonijiet ekoloġiċi, kemm dawk marbutin ma' prodotti, kif ukoll dawk li jkunu fir-rapporti ta' Responsabbiltà Soċjali Korporattiva (CSR), jew rapporti ambjentali oħrajn, tal-kumpaniji[6]. Din il-qagħda tippenalizza lil dawk il-kumpaniji li ilhom jinvestu ħafna fit-titjib tal-prestazzjonijiet tagħhom u biex jiksbu mudelli kummerċjali iktar ekoloġiċi. Il-perċezzjoni hija li l-kumpaniji qegħdin jikkompetu bid-dikjarazzjonijiet tagħhom flok abbażi tal-veru valur ambjentali li dawn qed jiddeskrivu.

(d) Opportunitajiet mitlufin għall-effiċjenza tar-riżorsi

Il-kumpaniji aktar proattivi fehmu kemm għad fadlilhom x'jaqdfu biex jiksbu aktar effiċjenza fil-katina tal-provvista tagħhom u biex jisfruttaw il-fatt li qegħdin dejjem iżjed jużaw perspettivi ta' ġestjoni taċ-ċiklu tal-ħajja[7]. Dawk li qed jużaw approċċi taċ-ċiklu tal-ħajja biex iżidu l-effiċjenza tagħhom fl-użu tar-riżorsi jista' jkollhom benefiċċji oħra, bħal redittu ikbar fuq l-investiment, żvilupp ta' swieq ġodda, immaġni korporattiva mtejba, aktar lealtà mill-klijenti, fehim aħjar tar-riskji tul il-katina tal-provvista tagħhom, u aktar distinzjoni bejn il-prodotti.

Qegħdin jinbiegħu aktar prodotti ekoloġiċi fis-suq u kieku jkun hemm aktar organizzazzjonijiet ekoloġiċi dan ikun jikkontribwixxi biex jinkisbu l-miri tal-inizjattiva ewlenija Effiċjenza fl-Użu tar-Riżorsi u l-Istrateġija 2020 tal-UE. Minkejja li r-rappurtaġġ ambjentali minnu nnifsu ma jfissirx li titjieb il-prestazzjoni, ħafna mill-kumpaniji li jkejlu l-prestazzjoni jiffissaw miri u jwaqqfu azzjonijiet. In-nuqqas ta' xiri ta' prodotti ekoloġiċi għandu effetti negattivi fuq l-użu tal-innovazzjoni ekoloġika wkoll, u dan ipoġġi fir-riskju l-vantaġġ kompettittiv żgħir tal-industriji ekoloġiċi tal-UE li għadhom minn ta' quddiem fid-dinja u qegħdin jikbru. Tabilħaqq, it-teknoloġiji ekoloġiċi ġew identifikati bħala sors importanti ta' tkabbir fl-Aġġornament tal-Politika Industrijali[8].

2.           Analiżi tas-Sussidjarjetà

It-tkattir ta' metodoloġiji, id-diffikultajiet relatati u l-ispejjeż imkattra jirrikjedu azzjoni koordinata min-naħa tal-UE, billi dawn jaffettwaw b'mod dirett il-funzjonament mingħajr xkiel tas-Suq Uniku. Jekk l-UE tagħżel li tħalli ż-żmien għaddej qabel ma tintervjen, il-kumpaniji jkunu diġà ġew obbligati li jikkonformaw ma' bosta metodoloġiji, u jkunu tgħabbew bl-ispejjeż biex jikkonformaw; l-amministrazzjonijiet jkunu diġà bnew l-istrutturi tagħhom għall-implimentazzjoni tal-politiki – dawn spejjeż li jkunu setgħu ma sarux kieku l-UE tkun ħadet azzjoni aktar bikrija. Għaldaqstant, huwa ġġustifikat li l-azzjoni fil-livell tal-UE ssir issa.

L-UE qiegħda f'pożizzjoni ideali biex tippromwovi l-armonizzazzjoni tal-metodoloġiji madwar is-Suq Uniku, filwaqt li tafda fl-esperjenza tal-Istati Membri u ta' inizjattivi privati f'dan il-qasam b'konsultazzjoni mal-partijiet interessati. L-UE tista' ġġib valur miżjud importanti, billi koordinazzjoni aħjar tkun tiswa frankizz sinifikanti ta' spejjeż għall-gvernijiet nazzjonali u għas-settur privat[9].

2.1.        L-inapplikabbiltà tal-prinċipju ta' għarfien reċiproku

La ma hemmx regoli fil-livell tal-UE, l-operaturi ekonomiċi privati u l-awtoritajiet pubbliċi huma ħielsa li jadottaw u japplikaw l-iskema li jippreferu huma biex jikkalkulaw u jikkomunikaw il-prestazzjoni ambjentali. Iżda fil-każ tal-Istati Membri, il-flessibbiltà regolatorja hija limitata mir-rekwiżit li ma jitħejjewx, jiġu adottati jew applikati regolamenti tekniċi bil-għan jew bl-effett li joħolqu ostakoli għall-kummerċ bla bżonn. Fil-każ ta' regolamenti nazzjonali, il-prinċipju ta' għarfien reċiproku ħafna drabi jkun l-aħjar mod li jiġi żgurat il-moviment liberu tal-prodotti fis-suq intern. Iżda f'dan il-kuntest dan ma jidhirx li huwa ta' għajnuna għaliex fil-preżent hemm xi Stati Membri li lanqas biss għandhom metodi biex jikkalkulaw u jikkomunikaw il-prestazzjoni ambjentali u fi Stati Membri oħrajn il-metodi applikati għandhom kampi ta' applikazzjoni, miri u regoli diversi. B'riżultat ta' dan, bħalissa mhuwiex possibbli li tiġi stabbilita ekwivalenza bejniethom.

Barra minn hekk, l-għarfien reċiproku ma jneħħix ostakoli oħrajn mhux tekniċi għan-negozju fi ħdan l-UE: anki mingħajr il-kundizzjonijiet legali, l-esportaturi xorta waħda jridu jużaw il-metodi ta' komunikazzjoni li huma magħrufin mill-konsumaturi fis-suq barrani biex ma jkollhomx żvantaġġ fil-konfront tal-produtturi lokali.

3.           Għanijiet

L-għan ġenerali tal-azzjoni tal-UE huwa li tiżdied id-disponibbiltà ta' informazzjoni affidabbli, dwar il-prestazzjoni ambjentali ta' prodotti u ta' organizzazzjonijiet.

3.1.        L-għanijiet speċifiċi

Il-promozzjoni tal-użu ta' metodoloġija komuni biex tiġi vvalutata u kkomunikata l-prestazzjoni ambjentali tal-prodotti u tal-organizzazzjonijiet.

3.2.        L-għanijiet operattivi

L-għan speċifiku ta' hawn fuq jista' jinqasam f'għanijiet operattivi kif jidher hawn taħt:

Tabella 1 Għanijiet operattivi

L-għan speċifiku || L-għanijiet operattivi

Il-promozzjoni tal-użu ta' metodoloġija komuni biex tiġi vvalutata u kkomunikata l-prestazzjoni ambjentali tal-prodotti u tal-organizzazzjonijiet || 1. Jitniedu żewġ metodoloġiji li jkunu relattivament sempliċi biex jintużaw, iżda robusti wkoll, waħda minnhom għall-kejl tal-prestazzjoni ambjentali tal-prodotti u l-oħra għall-kejl tal-prestazzjoni ambjentali tal-organizzazzjonijiet

2. L-Istati Membri u atturi privati jitħeġġu biex jużaw il-metodoloġiji

3. Permezz ta' proċess miftuħ, trasparenti u li jinkludi diversi partijiet interessati, jiġu żviluppati regoli għall-kejl tal-impronta ambjentali tal-prodotti u speċifiċi għas-setturi

4.           Għażliet Politiċi

4.1.        L-għażla nru 1. Xenarju bażiku – l-ebda bidla politika:

Mingħajr aktar interventi min-naħa tal-UE, it-tkattir ta' inizjattivi privati u pubbliċi se jkompli. Minkejja li huwa mistenni li jkun hemm għadd ta' metodi li xi ftit jew wisq iqarrbu lejn xulxin f'oqsma komuni importanti, bħall-Gassijiet b'effett ta' Serra, il-kumpaniji xorta waħda jkollhom jiffaċċjaw swieq li jkollhom rekwiżiti li jvarjaw. Dan ikun ta' piż kbir partikolarment għall-SMEs. Minħabba d-diversità ta' informazzjoni li tkun disponibbli, il-konsumaturi privati, pubbliċi u kummerċjali, konfużi, jibqgħu ma jafdawx id-dikjarazzjonijiet ambjentali dwar il-prestazzjoni ambjentali.

4.2.        L-għażla nru 2. Qafas politiku obbligatorju ġdid dwar il-prodotti

Qafas legali ġdid tal-UE għal prodotti sostenibbli se jieħu post u jikkonsolida l-istrumenti politiċi eżistenti marbutin mal-prodotti li huma inklużi fil-Pjan ta' Azzjoni SCP/SIP tal-2008 (bħal, pereżempju l-Ekodisinn u l-Ekotikketta). Fil-prattika, dan ikun jiġġenera konsistenza aħjar bejn ir-rekwiżiti li jikkonċernaw il-prestazzjoni ambjentali marbuta mal-prodotti, billi juża evidenza komuni biex itejjeb il-koordinazzjoni fl-iffissar ta' standards[10]; billi jwaqqaf proċess waħdieni, aktar sempliċi (u inqas għali) ta' "ffissar ta' kriterji" għall-istess kategoriji ta' prodotti[11]; u billi japplika proċess waħdieni għall-iżvilupp u l-approvazzjoni tar-rekwiżiti għall-istess kategoriji ta' prodotti kif ukoll metodi ta' ttestjar u verifika omoġenji.

4.3.        L-għażla nru 3. Qafas obbligatorju ta' rappurtar dwar l-Impronta Ambjentali tal-Organizzazzjonijiet (OEF)

F'din l-għażla l-użu tal-metodoloġija tal-OEF ikun obbligatorju għall-organizzazzjonijiet kbar f'setturi prijoritarji għall-għanijiet ta' rappurtar/forniment ta' informazzjoni[12]. Biex iħeġġeġ titjib kontinwu, ir-rekwiżit se jkun assoċjat ma' inċentivi għall-użu tiegħu u vvalutar komparattiv. B'kollaborazzjoni mal-partijiet interessati, tul iż-żmien, il-Kummissjoni se tiżviluppa regoli settorjali tal-OEF (OEFSR)[13], li jżidu l-konsistenza tar-rappurtar ambjentali tagħhom u, sa ċertu punt, il-komparabbiltà tal-prestazzjoni ambjentali ġenerali tagħhom. B'hekk ikun possibbli li organizzazzjoni tipprovdi l-informazzjoni bbażata fuq l-OEF biex tikkomunika l-prestazzjoni ambjentali tagħha u turi l-progress tagħha tul is-snin; iżda biex tkun tista' tieħu sehem fl-ivvalutar komparattiv jew fi klassifiki skont is-settur, organizzazzjoni se jkollha tirrapporta abbażi tar-regoli settorjali stabbiliti (l-OEFSR marbut mas-settur speċifiku).

4.4.        L-għażla nru 4. L-integrazzjoni tal-metodoloġiji għall-kejl tal-impronta ambjentali ta' prodotti (PEF) u organizzazzjonijiet (OEF) fi strumenti politiċi rilevanti

F'din l-għażla, il-metodoloġiji tal-PEF u tal-OEF huma integrati, fejn rilevanti u fejn jistgħu jiġu implimentati, fi strumenti eżistenti volontarji jew obbligatorji[14]. Pereżempju l-PEF u l-OEF se jintużaw minnufih fi strumenti bħall-Ekotikketta, il-GPP u l-EMAS biex jinfurmaw il-proċess ta' żvilupp tal-kriterji[15] u l-ħolqien ta' Dokumenti ta' Referenza Settorjali[16] biex jiġu ddeterminati l-impatti ambjentali rilevanti u l-indikaturi ewlenin tal-prestazzjoni bbażati fuq iċ-ċiklu tal-ħajja. F'din l-għażla jkun meħtieġ li jitwaqqaf sett ta' inċentivi, kemm mis-settur pubbliku, kif ukoll minn dak privat, li jkun jippremja lill-kumpaniji u jirrinforza l-effett pożittiv ta' titjib fil-prestazzjoni ambjentali[17].

4.5.        L-għażla nru 5. Ir-rakkomandazzjoni li l-PEF u l-OEF jiġu applikati fuq bażi volontarja

Se tkun indirizzata lill-Istati Membri Rakkomandazzjoni tal-Kummissjoni biex tirrikkmanda li kull darba li Stat Membru jkun biħsiebu jintroduċi skema volontarja jew rekwiżiti marbutin mal-kejl, il-verifika, ir-rappurtar, l-ivvalutar komparattiv u l-komunikazzjoni tal-prestazzjoni ambjentali ta' prodotti u ta' organizzazzjonijiet, għandhom japplikaw il-metodoloġiji tal-PEF u l-OEF rispettivament[18].

Ir-Rakkomandazzjoni se tkun indirizzata wkoll lin-negozji. Se tirrikkmanda l-użu tal-metodoloġiji tal-PEF u l-OEF fil-kejl tal-impronta ambjentali tal-prodotti jew l-impronta ambjentali ġenerali tal-kumpanija kull meta jitwettaq dan it-tip ta' kejl. Se tistieden ukoll lill-komunità finanzjarja (investituri, assiguraturi, banek) biex jużaw l-informazzjoni dwar il-prestazzjoni ambjentali bbażata fuq l-applikazzjoni tal-OEF u/jew tal-OEFSRs fl-ivvalutar tar-riskji ambjentali.

5.           Il-Valutazzjoni tal-Impatti u t-Tqabbil tal-Għażliet

Għall-għanijiet tal-ivvalutar u t-tqabbil, kif ukoll biex jinħolqu gruppi ta' għażliet li jkunu jeskludu wieħed lill-ieħor, l-għażliet politiċi li jidhru hawn fuq qegħdin miġburin skont jekk humiex marbutin mal-prestazzjoni ambjentali tal-prodotti jew ma' dik tal-organizzazzjonijiet. Għal analiżi dettaljata tal-impatt ekonomiku, soċjali u ambjentali ta' kull għażla, ara r-rapport dwar il-Valutazzjoni tal-Impatti.

5.1.        Tqabbil ta' għażliet politiċi marbutin mal-prestazzjoni ambjentali tal-prodotti

Tabella 2 – Tqabbil tal-impatti tal-għażliet marbutin mal-prestazzjoni ambjentali tal-prodotti

L-għażla ta’ politika Kategorija tal-impatt || 2. Qafas politiku ġdid obbligatorju dwar il-prodotti || 4. L-integrazzjoni tal-PEF u l-OEF fi strumenti politiċi rilevanti || 5. Ir-rakkomandazzjoni li l-PEF u l-OEF jiġu applikati fuq bażi volontarja

Il-funzjonament tas-suq intern u l-kompetizzjoni || +++ || ++ || ++

Il-kompetittività, il-kummerċ u l-investimenti || ++ || ++ || +

L-ispejjeż tat-tħaddim u t-tmexxija tal-kummerċ || - || 0 || +

L-impatt fuq l-SMEs || - || 0 || +

Piżijiet amministrattivi fuq in-negozji || + || 0 || 0

Piż fuq l-amministrazzjonijiet pubbliċi u l-potenzjal ta' simplifikazzjoni || - || + || +

L-innovazzjoni u r-riċerka || ++ || ++ || ++

Il-konsumaturi u l-unitajiet domestiċi || + || + || +

L-impatt ekonomiku kumplessiv || 0 || 0 || +

L-impjiegi u s-swieq tax-xogħol || ++ || ++ || ++

L-inklużjoni soċjali u l-ħarsien ta' gruppi partikolari || + || 0 || 0

Is-saħħa pubblika || + || + || +

L-impatt soċjali kumplessiv || + || + || +

L-impatt ambjentali kumplessiv || +++ || ++ || ++

5.2.        Tqabbil ta' għażliet politiċi marbutin mal-prestazzjoni ambjentali tal-organizzazzjonijiet

Tabella 3 – Tqabbil tal-impatti tal-għażliet marbutin mal-prestazzjoni ambjentali tal-organizzazzjonijiet

L-għażla ta’ politika Kategorija tal-impatt || 3. Qafas obbligatorju tal-OEF għar-rappurtar || 4. L-integrazzjoni tal-PEF u l-OEF fi strumenti politiċi rilevanti || 5. Ir-rakkomandazzjoni li l-PEF u l-OEF jiġu applikati fuq bażi volontarja

Il-funzjonament tas-suq intern u l-kompetizzjoni || +++ || ++ || ++

Il-kompetittività, il-kummerċ u l-investimenti || ++ || ++ || +

L-ispejjeż tat-tħaddim u t-tmexxija tal-kummerċ || - || 0 || +

L-impatt fuq l-SMEs || - || 0 || +

Piżijiet amministrattivi fuq in-negozji || - || 0 || 0

Piż fuq l-amministrazzjonijiet pubbliċi u l-potenzjal ta' simplifikazzjoni || - || + || +

L-innovazzjoni u r-riċerka || ++ || ++ || ++

Il-konsumaturi u l-unitajiet domestiċi || 0 || + || +

L-impatt ekonomiku kumplessiv || 0 || 0 || +

L-impjiegi u s-swieq tax-xogħol || ++ || ++ || ++

L-inklużjoni soċjali u l-ħarsien ta' gruppi partikolari || 0 || 0 || 0

Is-saħħa pubblika || + || + || +

L-impatt soċjali kumplessiv || + || + || +

L-impatt ambjentali kumplessiv || +++ || ++ || ++

5.3.        It-tqabbil tal-għażliet skont l-effiċjenza, l-effikaċja u l-koerenza

Is-sistema ta' punteġġ użata għat-tabelli ta' tqabbil 2 u 3 tgħin biex jiġu vvalutati l-vantaġġi relattivi tal-għażliet alternattivi f'kull kategorija ta' impatti li titkejjel, iżda ma tipprovdix il-piż relattiv ta' kull kategorija ta' impatti. Għaldaqstant, l-analiżi hija kkomplementata bi tqabbil tal-għażliet skont l-effikaċja, l-effiċjenza u l-koerenza[19]. Dan juri li minkejja li l-għażliet obbligatorji (2 & 3) jikkontribwixxu biex jintlaħqu l-miri, u huma assoċjati wkoll mal-ikbar potenzjal ta' titjib ambjentali, huma assoċjati wkoll ma' spejjeż tal-bidu ogħla għan-negozji u għall-awtoritajiet pubbliċi, u minħabba f'hekk jidhru inqas attraenti f'dawn iż-żminijiet ta' kriżi ekonomika. L-esperjenza preċedenti tat-tfassil tal-liġijiet fl-UE wriet li l-ispejjeż ta' adattazzjoni u transazzjoni għan-negozji u għall-amministrazzjonijiet pubbliċi huma inqas importanti meta jitnieda strument leġiżlattiv wara li l-applikazzjoni tiegħu tkun saret fuq bażi volontarja. Abbażi tal-analiżi li twettqet f'dan ir-rapport, dan jidher li hu l-każ anki għall-Għażliet 2 u 3, li jistgħu jsiru aktar kosteffikaċi wara applikazzjoni ewlenija tal-PEF u l-OEF kif inhi proposta fl-għażla 5. L-Għażla 1 tkun tgħin ftit wisq biex jintlaħqu l-miri u lanqas tagħti biżżejjed riżultati fit-titjib ambjentali u tal-użu effiċjenti tar-riżorsi. Il-prestazzjoni tal-għażla 4 tkun varjabbli, skont f'liema strument jiġu integrati l-PEF u l-OEF.

5.4.        L-għażla preferita

L-għażla preferita hija n-numru 5 "Ir-rakkomandazzjoni li l-PEF u l-OEF jiġu applikati fuq bażi volontarja" għar-raġunijiet li ġejjin:

· Hija pożittiva fl-aspetti rilevanti kollha meta mqabbla max-xenarju bażiku, u b'mod ġenerali tagħti riżultati aħjar mill-għażliet alternattivi.

· Applikazzjoni volontarja tippermetti aktar żvilupp gradwali tal-metodoloġiji tal-PEF u l-OEF fi proċess pilota li jinvolvi lill-Istati Membri u firxa wiesgħa ta' partijiet interessati sakemm tilħaq il-potenzjal sħiħ tagħha fis-snin ta' wara (eż. permezz ta' applikazzjoni obbligatorja jew permezz ta' użu mifrux);

· Tippermetti li jiġu sfruttati opportunitajiet għall-effiċjenza importanti, kemm mil-lat ekonomiku kif ukoll mil-lat ambjentali.

· Minkejja xi benefiċċji sinifikanti fit-tliet pilastri, l-Għażliet 2 u 3 jkunu jinvolvu spejjeż ogħla fil-livell ta' żvilupp preżenti tal-metodoloġiji. Barra minn hekk, hemm riskju li l-approprijazzjoni ta' dawn l-għażliet mill-partijiet interessati tkun iżjed baxxa, u dan ikun jaffettwa b'mod negattiv kemm l-istrument jiġi aċċettat u jkun effettiv.

· B'mod ġenerali, il-partijiet interessati kollha kienu jaqblu mal-introduzzjoni ta' skema volontarja bbażata fuq il-metodoloġija tal-PEF, minbarra l-NGOs (50% ma qablux). L-opinjoni tal-partijiet interessati dwar l-integrazzjoni tal-metodoloġija tal-PEF fl-istrumenti regolatorji SCP tal-UE u fil-miżuri politiċi kienet maqsuma, u kienet fil-biċċa l-kbira kontra miżura ġdida obbligatorja (60% ma qablux).

· It-tieni għażla li l-iżjed qablu magħha l-partijiet interessati kienet l-Għażla 5 (41% jaqblu ħafna jew jaqblu). Il-maġġoranza ma qablux mal-għażliet politiċi marbutin ma' prijorità fuq għodda obbligatorji (43%) jew mas-setturi kollha (52,8%) u mal-integrazzjoni tal-OEF fi strumenti obbligatorji eżistenti (44%).

6.           Monitoraġġ u Evalwazzjoni

Il-Valutazzjoni tal-Impatti tistabbilixxi sett ta' indikaturi Speċifiċi, li jistgħu Jitkejlu, li jistgħu Jinkisbu, li huma Rilevanti u Marbutin biż-Żmien, relatati mal-adozzjoni u l-implimentazzjoni tal-għażla preferita, li huma raggruppati skont miri rilevanti. Dawn huma ppreżentati fid-dettall fir-Rapport dwar il-Valutazzjoni tal-Impatti.

Reviżjoni ġenerali tal-politiki introdotti mill-inizjattiva politika soġġett għall-Valutazzjoni tal-Impatti preżenti hija prevista sal-2015, flimkien mar-reviżjoni ta' xi strumenti politiċi SCP ewlenin.

[1]               Ara lista tal-iżjed inizjattivi importanti (u diversi) dwar il-valutazzjoni tal-impronta ambjentali tal-prodotti u tal-organizzazzjonijiet fl-Annessi 17, 18 u 19.

[2]               Eż. Bħalissa Franza qiegħda tevalwa programm pilota dwar it-tikkettar ambjentali tal-prodotti. Mill-2008 'l hawn, il-kumpaniji privati qed jiġu mistiedna biex jipparteċipaw fil-programm biex jintwerew u jiġu ttestjati eżempji ta' tikkettar ambjentali b'ħafna kriterji. Evalwazzjoni preliminari tal-prodotti agrikoli tal-ikel juru li 75% tal-kumpaniji involuti fil-programm pilota biħsiebhom ikomplu bit-tikkettar ambjentali u madwar 64% huma favur approċċ armonizzat tal-UE. (http://www.developpement-durable.gouv.fr/IMG/pdf/LPS125.pdf) Jeżistu inizjattivi oħra fir-Renju Unit, fl-Isvizzera, u internazzjonalment fil-Ġappun, fl-Awstralja u fil-Kanada. Għal aktar dettalji ara l-Anness 19.

[3]               Eż. is-Sustainability Consortium, l-Envifood Protocol, il-GHG Product Protocol, tikketti u standards diversi (l-impronta tal-karbonju, il-LCA, l-impronta tal-ilma); Il-Carbon Disclosure Project, l-indiċijiet tas-sostenibbiltà, il-Global Reporting Initiative, eċċ. Għal aktar dettalji ara l-Annessi 18 u 19.

[4]               Eurobarometer Attitudes of European citizens towards the environment (L-attitudnijiet taċ-ċittadini tal-Ewropa lejn l-ambjent), 2008;

[5]               The Flash Eurobarometer 332 .

[6]               It-tieni stħarriġ tal-Ewrobarometru dwar Attitudes of European citizens towards environment (L-attitudnijiet taċ-ċittadini Ewropej lejn l-ambjent) (2011), wera tnaqqis fl-għadd ta' dawk li wieġbu li jemmnu li t-tikketti fuq il-prodotti jippermettu l-identifikazzjoni ta' dawk li huma favur l-ambjent (47% mqabbel ma' 52% fl-2008).

[7]               Għal lista tal-istudji li jsostnu din l-asserzjoni, ara l-Anness 21.

[8]               COM(2012) 582 finali, Industrija Ewropea Aktar B'saħħitha għat-Tkabbir u l-Irkupru Ekonomiku - Aġġornament tal-Komunikazzjoni dwar il-Politika Industrijali

[9]               Ta' min jinnota li l-iskemi tar-Renju Unit u ta' Franza diġà jagħmlu kontroreferenza għall-iżviluppi fl-UE u l-Italja tipprevedi rabta qawwija wkoll. Jidher li l-Istati Membri qegħdin jitolbu gwida/appoġġ armonizzat fil-livell tal-UE dwar l-ivvalutar tal-impronta ambjentali. Ara l-konklużjonijiet tal-Kunsill tal-20 ta' Diċembru 2010 fejn stieden lill-Kummissjoni "biex tiżviluppa metodu komuni għall-valutazzjoni kwantitattiva tal-impatti ambjentali tal-prodotti tul iċ-ċiklu tal-ħajja tagħhom".

[10]             Il-kriterji għall-istrumenti politiċi tal-UE marbutin mal-prodotti s-soltu jiġu stabbiliti abbażi ta' evidenza teknika u tas-suq li tinġabar permezz ta' studji ta' tħejjija speċifiċi. Jekk din l-evidenza tkun taqbel għall-istrumenti kollha tal-SCP tal-UE, l-assunzjonijiet dwar l-effetti ekonomiċi/kompetittivi ta' kriterji ġodda jkunu l-istess u r-riżultat jista' jkun li jkun hemm iktar omoġenjità.

[11]             Jekk il-kriterji jiġu ffissata bħala riżultat ta' proċess wieħed għal "użi" differenti, li jqis il-miri diversi tal-istrumenti politiċi tal-UE marbutin mal-prodotti, tista' tkun żgurata aktar konsistenza (eż.: fid-definizzjoni tal-limiti għall-Ekotikketta u t-Tikketta tal-Enerġija).

[12]             Mill-2010 'hawn, iċ-Ċentru tar-Riċerka Konġunta tal-UE ilu jiżviluppa l-metodi (li jiġbru fihom kategoriji differenti ta' prodotti u ta' organizzazzjonijiet) għall-kejl tal-Impronta Ambjentali tal-Prodotti (PEF) u tal-Impronta Ambjentali tal-Organizzazzjonijiet (OEF). Kemm il-PEF, kif ukoll l-OEF huma metodoloġiji bbażati fuq iċ-ċiklu tal-ħajja (LCA) biex jidentifikaw u jikkwantifikaw l-impatti ambjentali l-aktar rilevanti tal-prodotti (kemm tal-oġġetti kif ukoll tas-servizzi) jew portafoll tal-prodotti u tas-servizzi (organizzazzjoni). Dawn ikomplu jibnu fuq approċċi eżistenti u fuq standards internazzjonali, minkejja li l-użu tal-LCA għall-ivvalutar fil-livell ta' organizzazzjoni huwa approċċ relattivament ġdid. Għal deskrizzjoni aktar sħiħa tal-karatteristiki tal-PEF u l-OEF ara l-Anness 9.

[13]             Ir-Regoli Settorjali għall-kejl tal-Impronta Ambjentali tal-Organizzazzjonijiet huma sett ta' speċifikazzjonijiet u struzzjonijiet metodoloġiċi mfasslin altapposta biex jintużaw għal settur speċifiku. Ara l-Anness 9

[14]             L-għażla tal-integrazzjoni u l-possibbiltà tal-implimentazzjoni teknika jkollhom jiġu vvalutati fid-dettal, kull każ għalih. Għal aktar informazzjoni dwar l-iżviluppi metodoloġiċi meħtieġa biex jiġu implimentati bis-sħiħ il-PEF u l-OEF fi strumenti politiċi eżistenti, ara l-Anness 9.

[15]             http://ec.europa.eu/environment/ecolabel/products-groups-and-criteria.html

[16]             http://susproc.jrc.ec.europa.eu/activities/emas/index.html

[17]             Għal aktar dettalji dwar l-inċentivi, ara l-Annessi 20 u 14.

[18]             Eż. fil-każ ta' skemi jew rekwiżiti nazzjonali marbutin mar-rappurtar mhux finanzjarju jew tal-promozzjoni tal-użu tal-indikaturi tal-prestazzjoni ambjentali fil-valutazzjonijiet tar-riskji fl-investiment, il-metodoloġija ta' referenza tkun l-OEF flimkiem mal-OEFSRs.

[19]             L-effikaċja hija ddefinita bħala safejn l-għażliet jirnexxilhom jilħqu l-miri; L-effiċjenza hija ddefinita bħala safejn dawn il-miri jistgħu jintlaħqu b'mod kosteffikaċi; Il-koerenza hija ddefinita bħala safejn l-għażliet ikunu koerenti mal-miri tal-politika tal-UE u kemm huwa probabbli li jillimitaw il-kompromessi minn qasam għal ieħor, ambjentali, soċjali u ekonomiku. Ara t-tabella 6 fir-rapport dwar il-Valutazzjoni tal-Impatti.