Proposta għal OPINJONI TAL-KUNSILL dwar il-Programm ta' Sħubija Ekonomika ta' Franza /* COM/2013/0904 final - 2013/0394 (NLE) */
2013/0394 (NLE) Proposta għal OPINJONI TAL-KUNSILL dwar il-Programm ta' Sħubija Ekonomika ta' Franza
IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra r-Regolament (UE)
Nru 473/2013 tal-Parlament Ewropew u tal-Kunsill
tal-21 ta' Mejju 2013[1] dwar
dispożizzjonijiet komuni għall-monitoraġġ u l-valutazzjoni
tal-abbozzi tal-pjani baġitarji u l-iżgurar tal-korrezzjoni
tad-defiċit eċċessiv tal-Istati Membri fiż-żona
tal-euro, b'mod partikolari l-Artikolu 9(4) tiegħu, Wara li kkunsidra l-proposta
tal-Kummissjoni Ewropea, Billi: (1) Il-Patt ta' Stabbiltà u Tkabbir (PST)
jimmira li jiżgura d-dixxiplina baġitarja fl-Unjoni u jistabbilixxi
l-qafas għall-prevenzjoni u l-korrezzjoni tad-defiċits eċċessivi
tal-gvern. Huwa bbażat fuq l-objettiv ta' finanzi governattivi sodi
bħala mezz sabiex jissaħħu l-kundizzjonijiet
għall-istabbiltà tal-prezzijiet u għal tkabbir sostenibbli
b'saħħtu bbażat fuq stabbiltà finanzjarja, u b'hekk tiġi
appoġġjata l-kisba tal-objettivi tal-Unjoni għal tkabbir
sostenibbli u impjiegi. (2) Ir-Regolament (UE) Nru 473/2013
tal-Parlament Ewropew u tal-Kunsill tal-21 ta' Mejju 2013 dwar
dispożizzjonijiet komuni għall-monitoraġġ u l-valutazzjoni
tal-abbozzi tal-pjani baġitarji u l-iżgurar tal-korrezzjoni
tad-defiċit eċċessiv tal-Istati Membri fiż-żona
tal-euro jistabbilixxi dispożizzjonijiet għall-monitoraġġ
imsaħħaħ tal-politiki baġitarji fiż-żona tal-euro
u għall-iżgurar li l-baġits nazzjonali jkunu konsistenti
mal-gwida politika ekonomika maħruġa fil-kuntest tal-PST u s-Semestru
Ewropew. Peress li miżuri purament baġitarji jistgħu ma jkunux
biżżejjed biex jiżguraw korrezzjoni dejjiema tad-defiċit
eċċessiv, jistgħu jkunu meħtieġa miżuri
addizzjonali ta' politika u riformi strutturali. (3) L-Artikolu 9 tar-Regolament (UE)
Nru 473/2013 jistabbilixxi l-modalitajiet kif l-Istati Membri
taż-żona tal-euro jistgħu jippreżentaw programmi ta'
sħubija ekonomika taħt Proċedura ta' Defiċit
Eċċessiv. Il-programm ta' sħubija ekonomika għandu jistabbilixxi
pjan direzzjonali ta' miżuri biex jikkontribwixxi għal korrezzjoni
effettiva u dejjiema tad-defiċit eċċessiv, u għandu
jiddeskrivi fid-dettall, b'mod partikolari r-riformi fiskali strutturali
ewlenin, speċjalment dawk li jirreferu għat-tassazzjoni, is-sistemi
tal-pensjonijiet u tas-saħħa u l-oqfsa baġitarji, li se jkun
strumentali biex jiġi kkoreġut id-defiċit eċċessiv
b'mod dejjiemi. (4) Fis-27 ta' April 2009,
il-Kunsill adotta deċiżjoni skont l-Artikolu 104(6) tat-Trattat li
jistabbilixxi l-Komunità Ewropea (TKE), fejn Franza titqiegħed fi
Proċedura ta' Defiċit Eċċessiv.
Fil-21 ta' Ġunju 2013, il-Kunsill adotta rakkomandazzjoni
riveduta skont l-Artikolu 126(7) tat-Trattat dwar il-Funzjonament
tal-Unjoni Ewropea (TFUE) fil-kuntest ta' defiċit eċċessiv li
nfetħet qabel id-dħul fis-seħħ tar-Regolament (UE)
Nru 473/2013. F'dan il-kuntest. Franza ntalbet tippreżenta programm
ta' sħubija ekonomika sal-1 ta' Ottubru 2013. (5) Fl-1 ta' Ottubru 2013, u
b'hekk fiż-żmien stabbilit bl-Artikolu 9(3) u 17(2)
tar-Regolament (UE) Nru 473/2013, Franza ppreżentat Programm ta'
Sħubija Ekonomika lill-Kummissjoni u lill-Kunsill, li jistabbilixxi b'mod partikolari r-riformi fiskali-strutturali li
jimmiraw li jiżguraw korrezzjoni effettiva u dejjiema tad-defiċit
eċċessiv. Il-Programm ta' Sħubija Ekonomika jinkludi miżuri
intiżi sabiex jimplementaw ir-rakkomandazzjonijiet speċifiċi
għall-pajjiż (RSP) indirizzati lil Franza mill-Kunsill
fid-9 ta' Lulju 2013. (i ) l-iżgurar tas-sostenibbiltà
fit-tul tal-finanzi pubbliċi (RSP 1) filwaqt li tiġi
simplifikata s-sistema tat-taxxa (RSP 5), (ii) ir-restawr
tal-kompetittività permezz ta' miżuri biex jitnaqqsu l-kostijiet
tal-produzzjoni (RSP 2) , it-titjib tal-ambjent tan-negozju (RSP 3) u
ż-żieda fil-kompetizzjoni (RSP 4) kif ukoll (iii )
il-ġlieda kontra l-qgħad u l-inugwaljanza fis-suq tax-xogħol
(RSP 6). (6) Il-Programm ta' Sħubija Ekonomika
jiffoka fuq miżuri li, bi ftit eċċezzjonijiet, diġà
ġew implimentati jew qegħdin fil-proċess tal-adozzjoni. Huwa
jipprovdi informazzjoni limitata dwar l-istrateġija tal-politika tal-gvern
għall-perjodu sal-2015, li hija l-iskadenza għall-korrezzjoni
tad-defiċit eċċessiv. Ir-riformi fiskali-strutturali meħuda
jew ippjanati minn Franza huma dawn li ġejjin: (i) miżuri biex
jitnaqqas id-defiċit tal-amministrazzjoni pubblika, b'mod partikolari
permezz ta' sforzi li jrażżnu ż-żieda fin-nefqa, (ii)
il-ħolqien ta' kunsill fiskali indipendenti, (iii) ir-riforma tas-sistema
tal-pensjonijiet, (iv) is-simplifikazzjoni tas-sistema tat-taxxa (v) it-tnaqqis
fil-kost tax-xogħol. Riformi strutturali addizzjonali li għandhom
effett fuq it-tkabbir u l-kompetittività, u għalhekk impatt indirett fuq
it-tnaqqis tad-defiċit jinkludu: (i) l-appoġġ
għall-innovazzjoni u kapaċità ta' esportazzjoni tal-kumpaniji, (ii) miżuri
li jtejbu l-kompetizzjoni u l-effiċjenza fl-industriji tan-netwerk u
f'ċerti setturi regolati, (iii) ir-riforma tas-suq tax-xogħol, u (iv)
l-appoġġ għall-impjieg
għaż-żgħażagħ. (7) Rigward il-finanzi pubbliċi, il-miżuri
meħuda jimmiraw li jikkonformaw mal-miri tad-defiċit nominali
stabbiliti fir-rakkomandazzjoni tal-Kunsill
tal-21 ta' Ġunju 2013, bi sforzi speċifiċi biex
irażżnu ż-żieda fin-nefqa, inkluż fil-kura
tas-saħħa. Għal dak l-għan, twettqu numru ta'
valutazzjonijiet ta' politika pubblika bħala parti mir-rieżami li
għadu għaddej tal-infiq u dawn irriżultaw fi proposti
speċifiċi iżda l-iffrankar mistenni għadu ma ġiex
ikkwantifikat b'mod sistematiku. Barra minn hekk, parti mill-miżuri
mħabbra s'issa jikkonsistu fil-limitazzjoni u/jew it-tneħħija
tal-eżenzjonijiet tat-taxxa u tas-sigurtà soċjali, li fil-fatt se
jgħollu l-piż tat-taxxa minflok ibaxxu n-nefqa. B'mod aktar
ġenerali, wieħed għad irid jara sa liema punt ir-rieżami
tal-infiq se jirriżulta fil-fatt f'riformi maġġuri tal-politiki
tal-gvern, u jkopri l-attivitajiet fis-settur pubbliku u l-modi ta' twassil
tas-servizzi pubbliċi. Il-gvern nieda wkoll riforma ta'
deċentralizzazzjoni mmirata li tiċċara r-responsabbiltajiet
tal-awtoritajiet lokali u tal-gvern ċentrali sabiex tiżdied
l-effiċjenza tan-nefqa tal-gvern lokali. Madankollu, mhuwiex ċar
f'dan l-istadju jekk dan il-proċess hux se jikkontribwixxi fil-fatt
għar-razzjonalizzazzjoni tal-infiq lokali u l-iffrankar mistenni
għadu ma ġiex ikkwantifikat. Lil hinn mill-ammont sinifikanti ta' ffrankar
immirat għall-2014, il-Programm ta' Sħubija Ekonomika jipprovdi ftit
informazzjoni dwar il-miżuri biex titjieb il-kost-effettività tal-infiq
fuq il-kura tas-saħħa fit-terminu medju u dak twil, inkluż
fil-qasam tal-farmaċewtiċi, fid-dawl taż-żieda mbassra
f'dan l-infiq. (8) It-tmexxija tal-finanzi pubbliċi
ġiet imsaħħa b'mod partikolari permezz tal-ħolqien ta'
Kunsill Għoli għall-Finanzi Pubbliċi. Bħala awtorità
indipendenti bil-liġi, il-Kunsill Għoli jipprovdi opinjoni dwar
ix-xenarju makroekonomiku li fuqu huma bbażati l-abbozzi tal-baġit u
l-programmi ta' stabbiltà u dwar il-konsistenza tal-miri fiskali annwali
mal-istrateġija baġitarja pluriennali. Kif xieraq, il-kunsill
ipprovda opinjoni dwar il-Programm ta' Stabbiltà ppreżentat minn Franza
fit-30 ta' April 2013 kif ukoll dwar l-Abbozz ta' Pjan
Baġitarju. (9) Ir-riforma ppjanata tal-pensjonijiet tista'
tkun mistennija li tikkontribwixxi għas-sostenibbiltà fit-tul tas-sistema
tal-pensjonijiet. Il-miżuri meħuda sal-2020 jiffokaw
prinċipalment fuq in-naħa tad-dħul, b'mod partikolari
b'żieda fil-kontribuzzjonijiet soċjali kemm għall-impjegati kif
ukoll għal min iħaddem, miżura li l-Kunsill kien wissa kontriha.
Il-gvern impenja ruħu biex itaffi l-impatt tar-riforma ppjanata
tal-pensjonijiet fuq il-kost tax-xogħol fl-2014 permezz ta' tnaqqis
fil-kontribuzzjonijiet tal-familja. Mill-2020, il-perjodu ta' kontribuzzjoni
għal pensjoni sħiħa se jiżdied b'mod gradwali għal 43
sena fl-2035. Ir-riforma ppjanata ma tindirizzax b'mod sħiħ
ir-rakkomandazzjoni tal-Kunsill minħabba li l-miżuri kkunsidrati huma
mistennija li jnaqqsu biss bin-nofs id-differenza ta' finanzjament fis-sistema
tal-pensjonijiet sal-2020. F'dan ir-rigward, l-ambitu u r-regoli
speċifiċi tal-iskemi tal-ħaddiema tas-settur pubbliku ma ġewx
rieżaminati. Barra minn hekk, jista' jkun li l-lakuna finanzjarja
tas-sistema tal-pensjonijiet sal-2020 tkun saħansitra ikbar milli mistenni
jekk ix-xenarju makroekonomiku li fuqu hija bbażata r-riforma
jispiċċa jkun ottimist iżżejjed, sitwazzjoni li ma tistax
tiġi kompletament eskluża abbażi tal-iżviluppi
ekonomiċi attwali. Il-kost baġitarju tal-miżuri ppjanati biex
jittieħed iżjed kont tal-attivitajiet ta' strapazz huwa
soġġett għal inċertezza sinifikanti u huwa riskju
ieħor għall-prospetti finanzjarji tas-sistema tal-pensjonijiet. (10) Saru aktar sforzi biex tiġi
simplifikata s-sistema tat-taxxa u tiżdied l-effiċjenza tagħha
permezz ta' tnaqqis ulterjuri fin-nefqa tat-taxxa u proposti biex tiżdied
it-tassazzjoni ambjentali. Min-naħa l-oħra, minbarra l-miżura li
diġà ġiet adottata fl-2013 u li l-impatt tagħha se jiżdied
fl-2014, l-ebda miżuri m'huma meqjusa fl-Abbozz ta' Pjan Baġitarju
biex jitkompla jitnaqqas il-preġudizzju tad-dejn fit-tassazzjoni
korporattiva. Emendi għall-Abbozz ta' Pjan Baġitarju wara li dan
ġie ppreżentat lill-Kummissjoni u lill-Kunsill se jirriżultaw
f'rata statutorja de facto ogħla ta' taxxa fuq id-dħul
korporattiv għall-kumpaniji kbar, kontra r-rakkomandazzjoni tal-Kunsill
biex jitnaqqsu r-rati statutorji filwaqt li titwessa' l-bażi fiskali.
Barra minn hekk, filwaqt li r-rati tat-taxxa b'valur miżjud se jinbidlu
minn Jannar 2014, kif deċiż f'Diċembru 2012,
il-Programm ta' Sħubija Ekonomika ma jinkludix informazzjoni dwar
il-miżuri intiżi biex ir-rati mnaqqsa jinġiebu eqreb ir-rata
standard kif rakkomandat mill-Kunsill. Is-sospensjoni ta' taxxa ekoloġika
fuq vetturi b'merkanzija tqila mħabbra mill-gvern
fid-29 ta' Ottubru tidher f'kontradizzjoni mal-isforzi
ppreżentati fil-Programm ta' Sħubija Ekonomika biex tiżdied
it-tassazzjoni ambjentali. (11) Il-miżuri meħuda mill-gvern biex
jappoġġja l-kost kompetittività jistgħu jkunu mistennija li
jtaffu ż-żieda fil-kost tax-xogħol marbuta mal-miżuri ta'
konsolidazzjoni fiskali adottati mill-2010. B'mod partikolari, ir-ribass tat-taxxa
għall-kompetittività u l-impjiegi adottat f'Diċembru
2012 inaqqas b'mod sinifikanti l-kost tax-xogħol għall-pagi li
huma inqas minn 2.5 darbiet il-paga minima. Minbarra l-impenn biex
jittaffa l-impatt tar-riforma tal-pensjoni ppjanata fl-2014 il-gvern ħabbar
riforma fil-futur tal-finanzjament tas-sigurtà soċjali sabiex jiġu
diversifikati r-rikavati u jitnaqqas l-impatt tagħhom fuq il-kost
tax-xogħol. Madankollu, ftit informazzjoni hija disponibbli f'dan
l-istadju fuq l-ispeċifiċitajiet ta' din ir-riforma. (12) Il-Programm ta' Sħubija Ekonomika
jressaq numru ta' riformi strutturali meħuda biex jiżdiedu t-tkabbir
u l-kompetittività u għall-ġlieda kontra l-qgħad. Sabiex
jappoġġja l-kompetittività, il-gvern ħa miżuri li
jiffaċilitaw l-aċċess għall-finanzi għal proġetti
innovattivi u jappoġġjaw il-kumpaniji ta' esportazzjoni. Ġew
imnedija inizjattivi li jissimplifikaw l-interazzjonijiet bejn il-kumpaniji u
l-amministrazzjoni. Barra minn hekk, il-Programm ta' Sħubija Ekonomika
jsemmi miżuri mmirati biex tiżdied il-kompetizzjoni f'xi setturi
regolati (pereżempju n-nutara, il-kontabilisti) iżda dawn
il-miżuri ma jindirizzawx b'mod sħiħ ir-rakkomandazzjonijiet
speċifiċi għall-pajjiż li appellaw għal riforma
ambizzjuża fis-settur tas-servizzi. Ġiet ippreżentata wkoll
riforma tas-sistema ferrovjarja fil-Programm ta' Sħubija Ekonomika.
Filwaqt li din ir-riforma tfittex li ttejjeb l-effiċjenza tas-sistema, ma
tipprevedix il-ftuħ tat-trasport domestiku tal-passiġġieri
għall-kompetizzjoni, kif hemm mitlub fir-rakkomandazzjonijiet
speċifiċi għall-pajjiż. Il-Programm ta' Sħubija
Ekonomika jippreżenta wkoll miżuri sinifikanti adottati
għall-ġlieda kontra l-qgħad, għalkemm ħafna minnhom
kienu magħrufa fiż-żmien tar-rakkomandazzjoni tal-Kunsill.
Il-liġi tal-14 ta' Ġunju 2013 dwar l-iżgurar
tal-impjiegi, il-miżuri speċifiċi li jappoġġjaw
l-impjieg taż-żgħażagħ u ta' ħaddiema akbar
fl-età, kif ukoll ir-riforma li jmiss ta' taħriġ vokazzjonali u
apprendistat huma passi pożittivi biex jitjieb il-funzjonament tas-suq
tax-xogħol u b'hekk jiżdied il-potenzjal ta' tkabbir fi Franza.
B'kuntrast, in-negozjati dwar is-sistema ta' benefiċċji
tal-qgħad ġew posposti għall-2014, ADOTTA DIN L-OPINJONI: Il-Programm ta' Sħubija Ekonomika
ta' Franza ppreżenta sett ta' riformi fiskali-strutturali lill-Kummissjoni
u lill-Kunsill fl-1 ta' Ottubru 2013, li huwa parzjalment
adegwat biex jappoġġja korrezzjoni effettiva u dejjiema
tad-defiċit eċċessiv. Il-Programm ta' Sħubija Ekonomika
jipprovdi ħarsa ġenerali komprensiva lejn il-miżuri adottati
qabel ir-rakkomandazzjoni tal-Kunsill tad-9 ta' Lulju. Dan jinkludi wkoll
informazzjoni dwar ir-riformi addizzjonali mnedija sal-ħin meta l-Programm
ta' Sħubija Ekonomika ġie ppreżentat. Madankollu, dawn mhux se
jkunu biżżejjed biex jindirizzaw l-iżbilanċi fiskali u
strutturali u ġie pprovdut ftit dettall dwar ir-riformi addizzjonali
ppjanati bħala tweġiba għar-rakkomandazzjoni. Il-proposta
tal-gvern għal riforma tal-pensjonijiet se tnaqqas id-defiċit
tas-sistema tal-pensjonijiet imma mhix biżżejjed biex dan jiġi
eliminat sal-2020, b'mod partikolari minħabba skemi
għall-uffiċjali tal-gvern statali u impjegati li jaħdmu
f'għadd ta' kumpaniji kkontrollati mill-istat mistennija li jkollhom
defiċits sinifikanti sa dak iż-żmien u x-xenarju makroekonomiku
sottostanti jidher wisq ottimist. Ir-rieżami tal-infiq li għaddej
wassal biss riżultati limitati s'issa u wieħed għad irid jara sa
liema punt se jirriżulta f'iffrankar imdaqqas. Barra minn hekk mhux
ċar ukoll jekk ir-riforma ta' deċentralizzazzjoni ppjanata hix se
ttejjeb il-koordinazzjoni bejn il-livelli lokali, reġjonali u nazzjonali u
twassal iffrankar sinifikanti għall-amministrazzjoni pubblika kollha.
Il-Programm ta' Sħubija Ekonomika jipprovdi ftit informazzjoni dwar
il-miżuri li jindirizzaw iż-żieda prevista fil-perjodu medju jew
fit-tul fin-nefqa pubblika fuq il-kura tas-saħħa. Barra minn hekk,
deċiżjonijiet riċenti meħuda mill-gvern fil-qasam
tat-tassazzjoni jidhru li jmorru kontra r-rakkomandazzjoni tal-Kunsill u
joħolqu inċertezza dwar l-istrateġija tal-gvern.
Fl-aħħar nett, jeħtieġ li l-miżuri li jsostnu l-impenn
tal-gvern biex inaqqas il-kost tax-xogħol jiġu speċifikati
aktar. B'mod ġenerali, filwaqt li r-riformi li diġà kienu
leġiżlati huma passi pożittivi, xorta jeħtieġu aktar
sforzi biex jiġu indirizzati l-iżbilanċi fiskali u strutturali
biex tiġi appoġġjata b'mod effettiv korrezzjoni dejjiema
tad-defiċit eċċessiv u s-sostenibbiltà fit-tul tal-finanzi
pubbliċi. Għalhekk, Franza hija mistiedna tippreżenta
informazzjoni addizzjonali fil-Programm tar-Riformi Nazzjonali u fil-Programm
ta' Stabbiltà li jmiss fuq l-isforzi ta' riforma biex tiżdied
l-effiċjenza tal-infiq pubbliku fis-subsetturi kollha tal-amministrazzjoni
pubblika u b'mod partikolari biex tinkiseb koordinazzjoni aħjar u ffrankar
addizzjonali bejn il-livelli ċentrali u lokali tal-gvern. Hija
meħtieġ aktar spjegazzjoni fuq miżuri biex tiżdied
il-kost-effettività tan-nefqa fuq il-kura tas-saħħa u biex jiġi
evitat li d-defiċits previsti tal-iskemi tal-pensjonijiet
tal-ħaddiema fis-settur pubbliku jkunu ta' piż fuq id-defiċit
tal-amministrazzjoni pubblika. Hija meħtieġa wkoll aktar
informazzjoni fuq l-azzjonijiet ippjanati biex ikomplu jnaqqsu l-kost
tax-xogħol u b'mod aktar ġenerali dwar ir-riformi strutturali
ulterjuri previsti biex tiżdied il-kapaċità ta' aġġustament
tal-ekonomija u biex jissaħħaħ it-tkabbir potenzjali.
Il-Kummissjoni u l-Kunsill se jimmonitorjaw l-implimentazzjoni tar-riformi
fil-kuntest tas-Semestru Ewropew. Magħmul fi Brussell, Għall-Kunsill Il-President [1] ĠU
L 140, 27.5.2013 p. 11.