MEMORANDUM TA’ SPJEGAZZJONI

1.           KUNTEST TAL-PROPOSTA

Ir-Regolament (UE) Nru 439/2010 stabbilixxa l-Uffiċċju Ewropew ta’ Appoġġ għall-Asil[1] biex isaħħaħ il-koperazzjoni prattika bejn l-Istati Membri fuq l-asil, itejjeb l-implimentazzjoni tas-Sistema Ewropea Komuni tal-Asil u jgħin lill-Istati Membri li s-sistemi tal-asil u l-akkoljenza tagħhom huma taħt pressjoni partikolari.

Premessa 24 tar-Regolament tipprevedi li "sabiex iwettaq l-għan tiegħu, l-Uffiċċju ta’ Appoġġ għandu jkun miftuħ għall-parteċipazzjoni minn pajjiżi li kkonkludew ftehimiet mal-Unjoni li permezz tagħhom adottaw u japplikaw il-liġi tal-Unjoni fl-oqsma koperti minn dan ir-Regolament, partikolarment l-Islanda, il-Liechtenstein, in-Norveġja u l-Isvizzera." Dawn il-pajjiżi jissejħu l-"pajjiżi assoċjati".

Għalhekk, l-Artikolu 49 (1) tar-Regolament jistipula li "L-Uffiċċju ta’ Appoġġ" għandu jkun miftuħ għall-parteċipazzjoni tal-Islanda, il-Liechtenstein, in-Norveġja u l-Isvizzera bħala osservaturi. Għandhom isiru arranġamenti li jispeċifikaw b'mod partikolari n-natura, l-limitu u l-manjiera li fihom dawk il-pajjiżi għandhom jipparteċipaw fil-ħidma tal-Uffiċċju ta’ Appoġġ. Dawn l-arranġamenti għandhom jinkludu dispożizzjonijiet relatati mal-parteċipazzjoni f''inizjattivi meħuda mill-Uffiċċju ta’ Appoġġ, mal-kontribuzzjonijiet finanzjarji u l-persunal. Fir-rigward ta' materji ta’ persunal, dawk l-arranġamenti għandhom, fi kwalunkwe każ, jikkonformaw mar-Regolamenti tal-Persunal."

Il-parteċipazzjoni ta’ pajjiżi assoċjati fil-ħidma tal-Uffiċċju ta’ Appoġġ mhux biss hija pass loġiku, jekk wieħed jikkunsidra l-assoċjazzjoni tagħhom mas-sistema ta’ Dublin, iżda għandu wkoll valur miżjud ċar għall-offerta ta' appoġġ tal-Uffiċċju ta’ Appoġġ bħal: l-iskambju tal-aħjar prattiki u tal-għarfien espert, l-appoġġ permanenti u ta’ emerġenza tal-Uffiċċju ta' Appoġġ, il-ġbir ta’ informazzjoni u l-analiżi tal-Uffiċċju ta’ Appoġġ u s-sistema ta’ twissija bikrija u preparazzjoni tal-Uffiċċju ta' Appoġġ.

Fuq dik il-bażi l-Kummissjoni ppreżentat fl-1 ta’ Lulju 2011 rakkomandazzjoni lill-Kunsill biex jawtorizza lill-Kummissjoni biex tiftaħ in-negozjati mal-Islanda, in-Norveġja, l-Isvizzera u l-Liechtenstein dwar ftehimiet internazzjonali li jistabbilixxu arranġamenti bħal dawn.

Il-Kummissjoni rċeviet l-awtorizzazzjoni tal-Kunsill sabiex tiftaħ in-negozjati mal-Islanda, in-Norveġja, l-Isvizzera u l-Liechtenstein dwar l-arranġamenti dwar il-modalitajiet tal-parteċipazzjoni ta’ dawn il-pajjiżi fl-EASO fis-27 ta’ Jannar 2012.

In-negozjati saru b’mod konġunt mal-pajjiżi assoċjati kollha. Saru erba’ sessjonijiet ta’ negozjati. It-test finali tal-abbozz tal-Arranġament mal-Islanda ġie inizjalat fit-28 ta’ Ġunju 2013.

L-Istati Membri kienu infurmati u kkonsultati fil-gruppi ta’ Ħidma tal-Kunsill rilevanti.

Min-naħa tal-Unjoni, il-bażi legali għall-Arranġament hija l-Artikolu 74 u 78 (1) u (2), flimkien mal-Artikolu 218 tat-TFUE.

Il-Kummissjoni ffirmat l-Arranġament fil-... Skont l-Artikolu 218 (6) (a) tat-TFUE, il-kunsens tal-Parlament Ewropew għall-konklużjoni tal-Arranġament ingħata fil-[…]

2.           RIŻULTATI TAN-NEGOZJATI

Il-Kummissjoni tikkunsidra li ntlaħqu l-għanijiet stabbiliti mill-Kunsill fid-direttivi ta’ negozjati tiegħu u li l-abbozz tal-Arranġament huwa aċċettabbli għall-Unjoni.

Il-kontenut finali tiegħu jista’ jitqassar kif ġej:

L-abbozz ta’ Arranġament jipprevedi l-parteċipazzjoni sħiħa tal-Islanda fl-attivitajiet tal-Uffiċċju ta’ Appoġġ [Artikolu 1], ir-rappreżentazzjoni fil-Bord ta’ Tmexxija tal-Uffiċċju ta' Appoġġ bħala osservatur mingħajr dritt tal-vot [l-Artikolu 2], kontribuzzjonijiet finanzjarji annwali tal-Islanda, għall-baġit tal-Uffiċċju ta’ Appoġġ b’somma annwali kkalkulata skont il-PDG tagħha bħala perċentwali tal-PDG tal-Istati kollha li jieħdu sehem fil-ħidma tal-Uffiċċju ta’ Appoġġ [l-Artikolu 3 u l-Anness I].

Minbarra dan, l-Islanda aċċettat dispożizzjonijiet dwar il-possibbiltà ta’ kontribuzzjoni miżjuda jekk il-kontribuzzjoni tal-Unjoni tiżdied [l-Artikolu 3 u l-Anness I];

Barra minn hekk, l-abbozz ta’ Arranġament jipprevedi t-twaqqif ta’ kumitat magħmul minn rappreżentanti tal-Kummissjoni u tal-pajjiżi assoċjati. Għal raġunijiet ta’ effiċjenza, dan il-Kumitat għandu jiltaqa’ flimkien mal-Kumitati korrispondenti stabbiliti ma’ pajjiżi oħra assoċjati parteċipanti abbażi tal-Artikolu 49 (1) tar-Regolament. Il-kumitat ma kienx imsemmi fid-direttivi ta’ negozjar u ġie mitlub mill-pajjiżi assoċjati sabiex jippermetti skambju ta’ informazzjoni u monitoraġġ tal-implimentazzjoni xierqa tal-Arranġament [l-Artikolu 11].

3.           IMPLIKAZZJONI BAĠITARJA

L-Artikolu 3 u l-Anness I tal-abbozz tal-Arranġament jiddeskrivu d-dispożizzjonijiet relatati mal-kontribuzzjonijiet finanzjarji annwali tal-Islanda għall-baġit tal-Uffiċċju ta’ Appoġġ u l-adattament possibbli tagħhom mas-sitwazzjoni deskritta skont l-Anness I.

4.           KONKLUŻJONI

Fid-dawl tar-riżultati msemmija hawn fuq, il-Kummissjoni tipproponi li l-Kunsill japprova wara li jirċievi kunsens mill-Parlament Ewropew, l-Arranġament mal-Islanda dwar il-modalitajiet tal-parteċipazzjoni tagħha fl-Uffiċċju Ewropew ta’ Appoġġ għall-Asil  

2013/0425 (NLE)

Proposta għal

DEĊIŻJONI TAL-KUNSILL

Dwar il-konklużjoni tal-Arranġament mar-Repubblika tal-Islanda dwar il-modalitajiet tal-parteċipazzjoni tagħha fl-Uffiċċju ta’ Appoġġ Ewropew għall-Asil

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 74 u 78 (1) u (2), flimkien mal-Artikolu 218 (6) (a)] tiegħu,

Wara li kkunsidra l-proposta tal-Kummissjoni Ewropea,

Wara li kkunsidra l-kunsens tal-Parlament Ewropew[2],

Billi:

(1)       Skont id-Deċiżjoni tal-Kunsill 2013/XXX ta’ [...][3], l-Arranġament bejn l-Unjoni Ewropea u l-Islanda dwar il-modalitajiet tal-parteċipazzjoni tagħha fl-Uffiċċju Ewropew ta’ Appoġġ għall-Asil ġie ffirmat mill-Kummissjoni fil-[ ], soġġett għall-konklużjoni tiegħu.

(2)       L-Arranġament għandu jiġi approvat.

(3)       Kif speċifikat fil-premessa 21 tar-Regolament (UE) Nru 439/2010, ir-Renju Unit u l-Irlanda qed jieħdu sehem u huma marbuta b’dak ir-Regolament. Dawn għandhom għalhekk jagħtu effett lill-Artikolu 49 (1) tar-Regolament billi jieħdu sehem f’din id-Deċiżjoni. Ir-Renju Unit u l-Irlanda għalhekk qegħdin jieħdu sehem f’din id-Deċiżjoni.

(4)       Kif speċifikat fil-premessa 22 tar-Regolament (UE) Nru 439/2010, id-Danimarka mhix qed tieħu sehem u mhix marbuta b’dak ir-Regolament. Id-Danimarka, għaldaqstant mhux qed tieħu sehem f’din id-Deċiżjoni.

ADOTTA DIN ID-DEĊIŻJONI:

Artikolu 1

L-Arranġament bejn l-Unjoni Ewropea u l-Islanda dwar il-modalitajiet tal-parteċipazzjoni tagħha fl-Uffiċċju Ewropew ta' Appoġġ għall-Asil huwa b’dan approvat f’isem l-Unjoni.

It-test tal-Arranġament huwa mehmuż ma’ din id-Deċiżjoni.

Artikolu 2

Il-President tal-Kunsill għandu jinnomina l-persuna/i awtorizzata/i biex tipproċedi/jipproċedu, f’isem l-Unjoni Ewropea, għan-notifika stabbilita fl-Artikolu 13(1) tal-Arranġament, sabiex jiġi espress il-kunsens tal-Unjoni Ewropea li tintrabat bl-Arranġament.

Artikolu 3

Din id-Deċiżjoni għandha ssir effettiva fil-jum tal-adozzjoni tagħha.

Magħmul fi Brussell,

                                                                       Għall-Kunsill

                                                                       Il-President

ANNESS

ARRANĠAMENT bejn l-Unjoni Ewropea u r-Repubblika tal-Islanda dwar il-modalitajiet tal-parteċipazzjoni tagħha fl- Uffiċċju Ewropew ta' Appoġġ għall-Asil

L-UNJONI EWROPEA, minn hawn ‘il quddiem imsejħa l-“UE”

min-naħa l-waħda, u

IR-REPUBBLIKA TAL-ISLANDA, minn hawn 'il quddiem imsemmija bħala "l-Islanda",

min-naħa l-oħra

Wara li kkunsidraw l-Artikolu 49(1) tar-Regolament (UE) Nru 439/2010 tal-Parlament Ewropew u tal-Kunsill tad-19 ta’ Mejju 2010 li jistabbilixxi Uffiċċju Ewropew ta’ Appoġġ għall-Asil[4], minn hawn ’il quddiem imsejjaħ ir-“Regolament”,

Billi

(1) Ir-Regolament jgħid li, sabiex iwettaq l-għan tiegħu, l-Uffiċċju Ewropew ta’ Appoġġ għall-Asil, minn hawn 'il quddiem imsejjaħ l-"Uffiċċju ta' Appoġġ", għandu jkun miftuħ għall-parteċipazzjoni minn pajjiżi li kkonkludew ftehimiet mal-UE li permezz tagħhom adottaw u japplikaw il-liġi tal-UE fil-qasam kopert minn dan ir-Regolament, partikolarment l-Islanda, il-Liechtenstein, in-Norveġja u l-Isvizzera, minn hawn 'il quddiem imsejħa l-'pajjiżi assoċjati',

(2) L-Islanda kkonkludiet ftehimiet mal-UE, li bis-saħħa tagħhom adottat u tapplika l-liġi tal-UE fil-qasam kopert mir-Regolament, b’mod partikulari l-Arranġament bejn il-Komunità Ewropea u r-Repubblika tal-Islanda u r-Renju tan-Norveġja dwar il-kriterji u l-mekkaniżmi biex ikun stabbilit l-Istat responsabbli biex jeżamina talba għall-asil iddepożitata fi Stat Membru jew fl-Islanda jew fin-Norveġja[5],

FTIEHMU KIF ĠEJ:

Artikolu 1 Sa fejn ser tasal il-parteċipazzjoni

l-Islanda għandha tipparteċipa b’mod sħiħ fil-ħidma tal-Uffiċċju ta’ Appoġġ u tkun intitolata li tirċievi azzjonijiet ta' appoġġ mill-Uffiċċju ta’ Appoġġ kif deskritt fir-Regolament u skont it-termini stabbiliti bl-Arranġament preżenti.

Artikolu 2 Bord ta' Tmexxija

l-Islanda għandha tkun irrappreżentata fil-Bord ta’ Tmexxija tal-Uffiċċju ta’ Appoġġ bħala osservatur mingħajr id-dritt li tivvota.

Artikolu 3 Kontribuzzjoni Finanzjarja

1. l-Islanda għandha tikkontribwixxi għad-dħul tal-Uffiċċju ta’ Appoġġ, somma annwali kkalkulata skont il-Prodott Domestiku Gross (PDG) bħala persentaġġ tal-PDG tal-Istati parteċipanti kollha skont il-formula deskritt fl-Anness I.

2. Il-kontribuzzjoni finanzjarja msemmija fil-Paragrafu 1 għandha ssir mill-jum wara d-dħul fis-seħħ ta’ dan l-Arranġament. L-ewwel kontribuzzjoni finanzjarja għandha titnaqqas b’mod proporzjonali għall-bqija taż-żmien f’sena wara d-dħul fis-seħħ ta’ dan l-Arranġament.

Artikolu 4 Protezzjoni tad-Dejta

1. Bl-applikazzjoni ta' dan l-Arranġament, l-Islanda għandha tipproċessa d-dejta f’konformità mad-Direttiva 95/46/KE tal-Parlament Ewropew u tal-Kunsill tal-24 ta' Ottubru 1995 dwar il-protezzjoni ta’ individwi fir-rigward tal-ipproċessar ta’ data personali u dwar il-moviment liberu ta’ dik id-data.[6]

2. Għall-iskop ta' dan l-Arranġament, ir-Regolament (KE) Nru 45/2001 tal-Parlament Ewropew u tal-Kunsill tat-18 ta' Diċembru 2000 dwar il-protezzjoni ta' individwu fir-rigward tal-ipproċessar ta' data personali mill-istituzzjonijiet u l-korpi Komunitarji u dwar il-moviment liberu ta' tali data[7] għandu japplika għall-ipproċessar tad-dejta personali mill-Uffiċċju ta’ Appoġġ.

3. L-Islanda għandha tirrispetta r-regoli dwar il-kunfidenzjalità tad-dokumenti miżmumin mill-Uffiċċju ta' Appoġġ, kif stabbiliti fir-Regoli ta’ Proċedura tal-Bord tat-Tmexxija.

Artikolu 5 Status legali

L-Uffiċċju ta’ Appoġġ għandu jkollu personalità legali skont il-liġi tal-Islanda u għandu jgawdi fl-Islanda l-iżjed kapaċità legali estensiva mogħtija lil persuni legali skont il-liġi tal-Islanda. Jista', b'mod partikolari, jakkwista jew jiddisponi minn proprjetà mobbli u immobbli u jista' jkun parti fi proċedimenti legali.

Artikolu 6 Responsabbiltà

Ir-responsabbiltà tal-Uffiċċju ta’ Appoġġ għandha tkun regolata mill-Artikolu 45 (1), (3) u (5) tar-Regolament.

Artikolu 7 Qorti tal-Ġustizzja

L-Islanda għandha tirrikonoxxi l-ġuriżdizzjoni tal-Qorti tal-Ġustizzja tal-Unjoni Ewropea fuq l-Uffiċċju ta' Appoġġ, kif provdut fl-Artikolu 45 (2) u (4) tar-Regolament.

Artikolu 8 Persunal tal-Uffiċċju ta’ Appoġġ

1. Skont l-Artikolu 38 (1) u 49 (1) tar-Regolament, ir-Regolamenti dwar il-Persunal tal-Uffiċjali u l-Kondizzjonijiet ta’ Impjieg ta’ Ħaddiema Oħra tal-Unjoni Ewropea, ir-regoli adottati b’mod konġunt mill-istituzzjonijiet tal-Unjoni Ewropea sabiex ikunu applikati dawn ir-Regolamenti tal-Persunal u r-regoli adottati mill-Uffiċċju ta’ Appoġġ skont l-Artikolu 38 (2) tar-Regolament japplikaw għal ċittadini tal-Islanda reklutati bħala membri tal-persunal mill-Uffiċċju ta’ Appoġġ.

2. B’deroga mill-Artikolu 12 (2) (a) u l-Artikolu 82 (3) (a) tal-Kundizzjonijiet tal-Impjieg ta’ Impjegati Oħra tal-Komunitajiet Ewropej, iċ-ċittadini tal-Islanda li jgawdu d-drittijiet kollha tagħhom bħala ċittadini jistgħu jiġu ingaġġati permezz ta’ kuntratt mid-Direttur Eżekuttiv tal-Uffiċċju ta’ Appoġġ skont ir-regoli eżistenti għall-għażla u l-ingaġġ tal-persunal adottati mill-Uffiċċju ta’ Appoġġ.

3. L-Artikolu 38 (4) tar-Regolament għandu japplika mutatis mutandis għaċ-ċittadini tal-Islanda.

4. Iċ-ċittadini tal-Islanda ma jistgħux, madankollu, jinħatru għal kariga ta’ Direttur Eżekuttiv tal-Uffiċċju ta’ Appoġġ.

Artikolu 9 Privileġġi u immunitajiet

l-Islanda għanda tapplika għall-Uffiċċju ta’ Appoġġ u għall-impjegati tiegħu l-Protokoll dwar il-Privileġġi u l-Immunitajiet tal-Unjoni Ewropea[8] kif ukoll kwalunkwe regoli adottati skont dan il-Protokoll relatati ma’ materji tal-persunal tal-Uffiċċju ta’ Appoġġ.

Artikolu 10 Ġlieda kontra l-frodi

Id-dispożizzjonijiet stabbiliti fl-Artikolu 44 tar-Regolament għandhom jiġu applikati u l-Uffiċċju Ewropew Kontra l-Frodi (OLAF) u l-Qorti tal-Awdituri jistgħu jeżerċitaw is-setgħat mogħtija lilhom.

L-OLAF u l-Qorti tal-Awdituri għandhom jinformaw lil Ríkisendurskoðun fi żmien xieraq dwar kwalunkwe intenzjoni biex iwettqu kontrolli fil-post jew awditi li, jekk l-awtoritajiet Islandiżi hekk jixtiequ, jistgħu jsiru b’mod konġunt ma’ Ríkisendurskoðun.

Artikolu 11 Il-Kumitat

1. Kumitat, kompost minn rappreżentanti tal-Kummissjoni Ewropea u l-Islanda, għandu jissorvelja l-implimentazzjoni xierqa tal-Arranġament u jiżgura proċess kontinwu ta’ azzjonijiet ta’ informazzjoni u skambju ta’ opinjonijiet f’dan ir-rigward. Għal raġunijiet ta’ effiċjenza, dan il-Kumitat għandu jiltaqa’ flimkien mal-Kumitati korrispondenti stabbilit ma’ pajjiżi oħra assoċjati parteċipanti abbażi tal-Artikolu 49 (1) tar-Regolament. Għandu jiltaqa’ fuq talba jew mill-Islanda jew lill-Kummissjoni Ewropea. Il-Bord ta’ Tmexxija tal-Uffiċċju ta’ Appoġġ għandu jkun infurmat dwar il-ħidma ta’ dan il-Kumitat.

2. L-informazzjoni dwar leġiżlazzjoni prevista tal-UE, li jew taffettwa direttament jew temenda r-Regolament jew mistennija li jkollha implikazzjoniet relatati mal-kontribuzzjonijiet finanzjarji stipulati fl-Artikolu 3 ta’ dan l-Arranġament, għandha tinqasam u skambju ta’ fehmiet dwar dan għandu jseħħ fil-Kumitat.

Artikolu 12 Anness

L-Anness I ta’ dan l-Arranġament għandu jikkostitwixxi parti integrali minn dan l-Arranġament.

Artikolu 13 Dħul fis-seħħ

1. Il-Partijiet Kontraenti għandhom japprovaw dan l-Arranġament skont il-proċeduri tagħhom. Il-Partijiet għandhom jinnotifikaw lil xulxin bit-tlestija ta' dawn il-proċeduri.

2. Dan l-Arranġament għandu jidħol fis-seħħ fl-ewwel jum tal-ewwel xahar wara l-jum tal-aħħar notifika msemmija fil-paragrafu 1.

Artikolu 14 Tmiem u validità

1. Dan l-Arranġament għandu jkun għal perjodu mhux limitat.

2. Kull Parti Kontraenti tista’, wara konsultazzjoni fi ħdan il-Kumitat, tiddenunzja dan l-Arranġament billi tinnotifika lill-Parti Kontraenti l-oħra. L-Arranġament għandu jieqaf milli japplika sitt xhur wara d-data ta’ dan l-avviż.

3. Dan l-Arranġament għandu jiġi terminat f’każ ta’ terminazzjoni tal-Arranġament bejn il-Komunità Ewropea u r-Repubblika tal-Islanda u r-Renju tan-Norveġja dwar il-kriterji u l-mekkaniżmi biex ikun stabbilit l-Istat responsabbli biex jeżamina talba għall-asil iddepożitata fi Stat Membru jew fl-Islanda jew fin-Norveġja.

4. Dan l-Arranġament għandu jitfassal f'oriġinal wieħed bil-lingwa Bulgara, Kroata, Ċeka, Daniża, Olandiża, Ingliża, Estonjana, Finlandiża, Franċiża, Ġermaniża, Griega, Ungeriża, Taljana, Latvjana, Litwana, Maltija, Pollakka, Portugiża, Rumena, Slovakka, Slovena, Spanjola, Svediża u Islandiża, b’kull test ikun ugwalment awtentiku.

……………

ANNESS I

Il-Formula biex tiġi kkalkolata l-kontribuzzjoni

1. Il-kontribuzzjoni finanzjarja tal-Islanda għad-dħul tal-Uffiċċju ta’ Appoġġ definita fl-Artikolu 33 (3) (d) tar-Regolament hija kkalkolata kif ġej:

L-aktar figuri finali aġġornati tal-Prodott Gross Domestiku (PGD) tal-Islanda disponibbli fil-31 ta’ Marzu ta’ kull sena għandhom ikunu diviżi bl-għadd ta’ ċifri tal-PGD tal-Istati kollha li jipparteċipaw fl-Uffiċċju ta’ Appoġġ disponibbli għall-istess sena. l-persentaġġ miksub se jiġi applikat għall-parti tad-dħul tal-Uffiċċju ta’ Appoġġ awtorizzat kif definit fl-Artikolu 33 (3) (a) tar-Regolament, fis-sena li qed tiġi analizzata sabiex jiġi miksub l-ammont tal-kontribuzzjoni finanzjarja tal-Islanda.

2. Il-kontribuzzjoni finanzjarja għandha titħallas f’Euro.

3. l-Islanda għandha tħallas il-kontribuzzjoni finanzjarja tagħha sa mhux aktar tard minn 45 jum wara li tirċievi n-nota ta’ debitu. Kull dewmien fil-ħlas iwassal għall-ħlas ta’ imgħax tal-inadempjenza mill-Islanda fuq l-ammont mhux imħallas mid-data dovuta. Ir-rata tal-imgħax għandha tkun ir-rata applikata mill-Bank Ċentrali Ewropew għall-operazzjonijiet prinċipali ta’ finanzjament mill-ġdid, kif inhi ppubblikata fis-serje Ċ tal-Ġurnal Uffiċjali tal-Unjoni Ewropea, li tidħol fis-seħħ fl-ewwel jum kalendarju tax-xahar tad-data ta’ skadenza, miżjuda bi 3.5 punti perċentwali.

4. Il-kontribuzzjoni finanzjarja tal-Islandagħandha tiġi adattata skont dan l-Anness f’każ li l-kontribuzzjoni finanzjarja mill-Unjoni Ewropea li ddaħħlet fil-baġit ġenerali tal-Unjoni Ewropea kif definit fl-Artikolu 33 (3) (a) ta’ dan ir-Regolament tiżdied skont l-Artikoli 26, 27 jew 41 tar-Regolament (UE, Euratom) Nru 966/2012[9] dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002. F’dan il-każ, id-differenza għandha tkun dovuta 45 jum wara li tiġi riċevuta n-nota ta’ debitu.

5. Fil-każ li l-krediti ta’ ħlas tal-Uffiċċju ta’ Appoġġ riċevut mill-UE skont l-Artikolu 33 (3) (a) tar-Regolament dwar is-sena N ma jintefqux qabel il-31 ta’ Diċembru tas-sena N jew li l-baġit tal-Uffiċċju ta’ Appoġġ tas-sena N jitnaqqas skont l-Artikoli 26, 27 jew 41 tar-Regolament (UE, Euratom) Nru 966/2012, dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 il-parti ta’ dawn il-krediti ta’ ħlas li ma ntefqux jew li tnaqqsu korrispondenti għall-perċentwal tal-kontribuzzjoni magħmula mill-Islanda, hija trasferita fil-baġit tas-sena N+1 tal-Uffiċċju ta’ Appoġġ. Il-kontribuzzjoni tal-Islanda għall-baġit tal-Uffiċċju ta’ Appoġġ tas-sena N + 1 għandha titnaqqas f’dan is-sens.

[1]               Ir-Regolament (UE) Nru 439/2010 tal-Parlament Ewropew u tal-Kunsill tad-19 ta' Mejju 2010 li jistabbilixxi Uffiċċju Ewropew ta' Appoġġ għall-Asil; ĠU L 132/11 tad-29.05.2010.

[2]               ĠU C […], […], p. […].

[3]               ĠU C […], […], p. […].

[4]               ĠU L 132, 29.5.2010, p. 11

[5]               ĠU L 93, 3.4.2001, p. 40.

[6]               ĠU L 281, 23.11.1995, p. 31.

[7]               ĠU L 8, 12.1.2011, p. 1.

[8]               ĠU C 83, 30.3.2010, p. 266.

[9]               ĠU L 298, 26.10.2012, p. 1.