Proposta għal DEĊIŻJONI TAL-KUNSILL li tistabbilixxi l-pożizzjoni li trid tittieħed fit-Tmintax-il Laqgħa Ordinarja tal-Partijiet Kontraenti tal-Konvenzjoni ta’ Barċellona għall-Protezzjoni tal-Ambjent u tar-Reġjun Kostali tal-Mediterran, fir-rigward tal-proposta għall-emenda tal-Annessi II u III tal-Protokoll dwar Żoni Protetti b'mod Speċjali u l-Bijodiversità Bijoloġika fil-Mediterran u fir-rigward tal-proposta għall-adozzjoni ta’ Pjan ta’ Azzjoni Reġjonali dwar l-Iskart fil-Baħar /* COM/2013/0743 final - 2013/0357 (NLE) */
MEMORANDUM TA’ SPJEGAZZJONI 1. L-UE hija Parti
għall-Konvenzjoni għall-Ħarsien tal-Ambjent tal-Baħar u
tar-Reġjun Kostali tal-Mediterran (“il-Konvenzjoni ta’ Barċellona”)[1], u l-Protokolli tagħha.
L-Italja, il-Greċja, Spanja, Franza, is-Slovenja, Malta, Ċipru u
l-Kroazja huma wkoll Partijiet għal din il-Konvenzjoni u l-Protokolli
tagħha, flimkien ma’ 13-il pajjiż tal-Mediterran li mhumiex fl-UE. 2. It-Tmintax-il Laqgħa
Ordinarja tal-Partijiet Kontraenti tal-Konvenzjoni ta’ Barċellona (MOP) se
ssir bejn it-3 u s-6 ta’ Diċembru 2013 f’Istanbul, it-Turkija. 3. Fil-Laqgħa tal-Partijiet
se tintalab deċiżjoni, i.a. fuq żewġ atti li għandhom
effetti legali: –
Proposta għall-adozzjoni ta' Pjan ta’ Azzjoni
Reġjonali dwar l-Iskart fil-Baħar, skont il-Protokoll għall-Protezzjoni
tal-Baħar Mediterran kontra t-Tniġġis minn Sorsi Bbażati
fuq l-Art ("il-Protokoll LBS" - Land Based Sources) –
Proposta għal emenda tal-Annessi II u III
tal-Protokoll dwar Żoni Protetti b’mod Speċjali (SPA - Specially
Protected Areas) u d-Diversità Bijoloġika fil-Mediterran[2] ("il-Protokoll dwar SPA u
l-Bijodiversità") 4. Rigward il-proposta
għall-adozzjoni ta' Pjan ta’ Azzjoni Reġjonali dwar l-Iskart
fil-Baħar: (a)
Il-Protokoll LBS jistipula l-adozzjoni
mill-Konvenzjoni ta’ pjanijiet ta’ azzjoni reġjonali sabiex jiġi
eliminat it-tniġġis mis-sorsi u mill-attivitajiet ibbażati fuq
l-art. Ladarba l-pjanijiet jiġu adottati, il-miżuri u l-iskedi
tagħhom isiru vinkolanti legalment, fil-qafas tal-implimentazzjoni
tal-Artikolu 15 tal-Protokoll dwar is-Sorsi Bbażati fuq l-Art. (b)
Is-Segretarjat tal-Konvenzjoni fformola proposta
ġdida għal Pjan ta' Azzjoni Reġjonali dwar l-Iskart
fil-Baħar, li f'Ġunju tal-2013 kienet approvata minn MEDPOL, il-korp
tekniku rilevanti tal-Konvenzjoni. Din il-proposta hija f’konformità
mal-leġiżlazzjoni tal-UE dwar l-iskart u l-ilma[3],u l-impenn Rio+20 sabiex
jitnaqqas b’mod sinifikanti l-iskart fil-baħar[4]. Għandha
tissaħħaħ ukoll permezz ta' xi ftit adattamenti tekniċi
addizzjonali fl-MOP 18. Il-kooperazzjoni msaħħa ma’ pajjiżi
terzi għall-ħarsien tal-ambjent tal-baħar hija
meħtieġa sabiex jingħata kontribut ħalli jintlaħqu
l-għanijiet tad-Direttiva Kwadru dwar l-Istrateġija
Marina 2008/56/KE[5].
(c)
Il-Pjan ta' Azzjoni Reġjonali dwar l-Iskart
fil-Baħar huwa, kif iddikjarat fl-Artikolu 5 tiegħu
“mingħajr preġudizzju għal dispożizzjonijiet aktar stretti,
jirrispetta l-miżuri ta’ ġestjoni tal-iskart tal-baħar li
jinsabu fi strumenti jew programmi eżistenti jew futuri, nazzjonali,
reġjonali jew internazzjonali oħrajn”. Huwa jistieden lill-Partijiet
biex jelaboraw, skont kif meħtieġ, il-miżuri u l-programmi
rilevanti li jindirizzaw l-iskart fil-baħar. 5. Dwar il-proposta li temenda
l-Protokoll dwar SPA u l-Bijodiversità, sabiex tmexxi l-ħames
speċijiet ta' qroll mill-Anness III għall-Anness II u biex
tinkludi sitt speċijiet oħra direttament fl-Anness II
tal-Protokoll dwar SPA u l-bijodiversità. (a)
Il-proposta ġiet diskussa fil-korp tekniku
rilevanti tal-Konvenzjoni: il-laqgħa tal-punti ewlenin tal-Protokoll dwar
SPA u l-Bijodiversità. Il-Kummissjoni Ġenerali għas-Sajd
fil-Mediterran (GFCM - General Fisheries Commission for the Mediterranean)
ħadet sehem fil-laqgħa. Skont l-Artikolu 17 tal-Konvenzjoni u
skont l-Artikolu 14(1) tal-Protokoll dwar SPA u l-bijodiversità, emenda
tal-Annessi tal-Protokoll se tidħol fis-seħħ
għall-Partijiet Kontraenti kollha hekk kif jiskadi l-perjodu
deċiż mill-Partijiet Kontraenti kkonċernati meta tiġi
adottata l-emenda, għajr għal dawk il-Partijiet Kontraenti li
jagħmlu riżerva b’notifika bil-miktub lid-Depożitarju. (b)
L-ispeċijiet tal-qroll ikkonċernati huma
inklużi fl-Anness I tad-Direttiva tal-Ħabitats[6] bħala tipi ta'
ħabitats naturali ta' interess għall-komunità u li l-konservazzjoni
tagħhom tirrekkjedi l-għażla ta' żoni speċjali ta'
konservazzjoni[7].
Ħamsa minn dawn l-ispeċijiet ta' qroll (Callogorgia verticillata,
Cladocora caespitosa, Ellisella paraplexauroides, Lophelia pertusa u
Madrepora oculata) jissemmew b'mod espliċitu fl-interpretazzjoni
tal-manwal tal-ħabitats tal-UE[8]
u speċijiet oħra (Antipatella subpinnata, Antipathes dichotoma,
Antipathes fragilis, Leiopathes glaberrima, Parantipathes larix, Cladocora
debilis) huma inklużi bħala komponenti tal-massa tal-iskoll
koralloġeniku. (c)
L-appoġġ għal dawn il-proposti
mill-UE jiżgura l-konsistenza bejn l-azzjoni interna u esterna. L-UE hija
impenjata f’kooperazzjoni internazzjonali għall-protezzjoni
tal-bijodiversità f’konformità mal-Artikolu 191(1) tat-TFUE u skont
l-Artikolu 5 tal-Konvenzjoni tan-Nazzjonijiet Uniti dwar id-Diversità
Bijoloġika (CBD), il-ftehimiet li saru waqt il-Konferenza tal-Partijiet
tas-CBD li saret f’Nagoya fl-2010, it-tħassib espress fil-Konferenza
tan-Nazzjonijiet Uniti dwar l-Iżvilupp Sostenibbli fl-2012 “dwar
il-vulnerabbiltà sinifikanti tas-sikek tal-qroll u tal-mangrovji
għall-impatti, inkluż mit-tibdil fil-klima, l-aċidifikazzjoni
tal-oċeani, is-sajd żejjed, tal-prattiki distruttivi tas-sajd u
t-tniġġis.” l-impenn “biex tappoġġa l-kooperazzjoni
internazzjonali bil-għan li jitħarsu s-sikek tal-qroll u l-ekosistemi
tal-mangrovji u li jitwettqu l-benefiċċji soċjali,
ekonomiċi u ambjentali tagħhom kif ukoll l-iffaċilitar
tal-kollaborazzjoni teknika u l-iskambju ta’ informazzjoni volontarju"
kif ukoll il-Mira tal-Bijodiversità Aichi Nru 10 skont liema "sal-2015,
diversi pressjonijiet antropoġeniċi fuq sikek tal-qroll, u
l-ekosistemi vulnerabbli l-oħra li jintlaqtu mit-tibdil tal-klima jew
l-aċidifikazzjoni tal-oċeani jiġu mnaqqsa kemm jista’ jkun,
sabiex jinżammu l-integrità u l-funzjonament tagħhom”. 6. Il-proposta għal emenda
tal-Protokoll dwar SPA u l-Bijodiversità u l-proposta għal Pjan ta'
Azzjoni Reġjonali dwar l-Iskart fil-Baħar skont l-Artikolu 15
tal-Protokoll LBS ma jeћtieġu l-ebda bidla fil-Liġi tal-Unjoni. 7. Fid-dawl ta’ dan ta’ hawn
fuq, l-Unjoni Ewropea għandha tappoġġa l-proposta li tadotta
Pjan ta’ Azzjoni Reġjonali dwar l-Iskart fil-Baħar u l-proposta li
temenda l-Annessi II u III tal-Protokoll dwar Żoni Protetti b’mod
Speċjali u d-Diversità Bijoloġika fil-Mediterran. 2013/0357 (NLE) Proposta għal DEĊIŻJONI TAL-KUNSILL li tistabbilixxi l-pożizzjoni li trid
tittieħed fit-Tmintax-il Laqgħa Ordinarja tal-Partijiet Kontraenti
tal-Konvenzjoni ta’ Barċellona għall-Protezzjoni tal-Ambjent u
tar-Reġjun Kostali tal-Mediterran, fir-rigward tal-proposta
għall-emenda tal-Annessi II u III tal-Protokoll dwar Żoni
Protetti b'mod Speċjali u l-Bijodiversità Bijoloġika fil-Mediterran u
fir-rigward tal-proposta għall-adozzjoni ta’ Pjan ta’ Azzjoni
Reġjonali dwar l-Iskart fil-Baħar
IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikolu 192(1),
flimkien mal-Artikolu 218(9) tiegħu, Wara li kkunsidra l-proposta mill-Kummissjoni
Ewropea[9], Billi: (1) L-UE hija Parti
għall-Konvenzjoni għall-Ħarsien tal-Ambjent tal-Baħar u
tar-Reġjun Kostali tal-Mediterran[10]
(minn hawn 'il quddiem magħrufa bħala "l-Konvenzjoni ta’
Barċellona"). (2) L-UE hija Parti
għall-Protokoll għall-Protezzjoni tal-Baħar Mediterran kontra
t-Tniġġis minn Sorsi Bbażati fuq l-Art (minn hawn ’il quddiem
magħruf bħala “l-Protokoll LBS”) u għall-Protokoll dwar
Żoni Protetti b’mod Speċjali u d-Diversità Bijoloġika
fil-Mediterran[11]
("il-Protokoll dwar SPA u l-Bijodiversità"). (3) Fit-tmintax-il Laqgħa
Ordinarja tal-Partijiet Kontraenti għall-Konvenzjoni ta’ Barċellona u
l-Protokolli tagħha, li se ssir f’Istanbul (it-Turkija) bejn it-3 u s-6
ta’ Diċembru 2013 se tiġi eżaminata l-adozzjoni ta’: (a)
Proposta għall-adozzjoni ta' Pjan ta’ Azzjoni
Reġjonali dwar l-Iskart fil-Baħar, skont il-Protokoll
għall-Protezzjoni tal-Baħar Mediterran kontra t-Tniġġis
minn Sorsi Bbażati fuq l-Art ("il-Protokoll LBS"). (b)
Proposta għal emenda tal-Annessi II u III
tal-Protokoll dwar Żoni Protetti b’mod Speċjali u d-Diversità
Bijoloġika fil-Mediterran (“il-Protokolli dwar SPA u l-bijodiversità”). (4) Fir-rigward tal-proposta biex
temenda l-Annessi II u III tal-Protokoll dwar Żoni Protetti b’mod
Speċjali u d-Diversità Bijoloġika fil-Mediterran: (a)
Il-Laqgħa tal-Partijiet Kontraenti hija l-korp
li jieħu d-deċiżjonijiet tal-Konvenzjoni, u fost is-setgħat
mogħtija lilu hemm inkluża l-kapaċità li jemenda kif
meħtieġ l-annessi tal-Konvenzjoni u tal-protokolli tagħha. Skont
l-Artikolu 17 tal-Konvenzjoni ta' Barċellona u skont
l-Artikolu 14(1) tal-Protokoll, emenda tal-Annessi tal-Protokoll
għandha tidħol fis-seħħ għall-Partijiet Kontraenti
kollha għall-Protokoll hekk kif jiskadi l-perjodu deċiż
mill-Partijiet Kontraenti kkonċernati meta tiġi adottata l-emenda,
għajr għal dawk li jagħmlu riżerva b’notifika bil-miktub
lid-Depożitarju li huma ma jistgħux japprovaw l-emenda. (b)
Skont il-Memorandum ta’ Qbil iffirmat bejn il-Pjan
ta’ Azzjoni għall-Mediterran (UNEP/MAP) u l-Kummissjoni Ġenerali
għas-Sajd fil-Mediterran (GFCM), l-emendi possibbli tal-Annessi
tal-Protokoll għandhom jiġu kkonsultati bejn il-Partijiet filwaqt li
tkun żgurata ċ-ċirkolazzjoni ta' tagħrif xjentifiku
f'waqtha u addatata. (c)
L-UE għandha tappoġġa din
il-proposta minħabba li hija xjentifikament soda, konsistenti
mal-leġiżlazzjoni tal-Unjoni b’mod partikolari skont id-Direttiva
dwar il-Ħabitats u mal-impenn tal-Unjoni għall-kooperazzjoni
internazzjonali għall-protezzjoni tal-bijodiversità, u skont
l-Artikolu 5 tal-Konvenzjoni tan-Nazzjonijiet Uniti dwar id-Diversità
Bijoloġika[12],
il-mira miftiehma fil-Konvenzjoni dwar id-Diversità Bijoloġika fl-2010
sabiex titnaqqas b’mod sinifikanti r-rata attwali tat-telf tal-bijodiversità
sal-2020 kif ukoll il-Mira tal-Bijodiversità Aichi Nru 10 li skonthom
“sal-2015, diversi pressjonijiet antropoġeniċi fuq sikek tal-qroll, u
l-ekosistemi vulnerabbli l-oħra li jintlaqtu mit-tibdil tal-klima jew
l-aċidifikazzjoni tal-oċeani jiġu mnaqqsa kemm jista’ jkun,
sabiex jinżammu l-integrità u l-funzjonament tagħhom”. (5) Fir-rigward tal-proposta
għall-adozzjoni ta' Pjan ta’ Azzjoni Reġjonali dwar l-Iskart
fil-Baħar, skont il-Protokoll għall-Protezzjoni tal-Baħar
Mediterran kontra t-Tniġġis minn Sorsi Bbażati fuq l-Art
("il-Protokoll LBS"): (a)
Il-Protokoll LBS jistipula l-adozzjoni
mill-Laqgħa tal-Partijiet ta' programmi u pjanijiet ta’ azzjoni
Reġjonali, inklużi l-miżuri u l-iskedi, sabiex jiġi
eliminat it-tniġġis mis-sorsi u mill-attivitajiet ibbażati fuq
l-art. Bis-saħħa tal-Artikolu 15 tal-Protokoll, meta l-pjanijiet
jiġu adottati, il-miżuri u l-iskedi tagħhom isiru vinkolanti
għall-Partijiet fil-mija u tmenin jum wara dak tan-notifika
mis-Segretarjat lill-Partijiet kollha. (b)
Il-Pjan ta’ Azzjoni Reġjonali dwar l-Iskart
fil-Baħar ġie fformulat mill-korp innominat mill-Partijiet bħala
responsabbli biex iħejji l-Laqgħa tal-Partijiet, u ġie approvat
mill-korp tekniku rilevanti tal-Konvenzjoni. Barra minn hekk, il-Pjan ta’ Azzjoni
Reġjonali għandu jittejjeb bi ftit modifiki tekniċi, sabiex dan
isir aktar konformi mal-prattiki attwali fl-UE. (c)
Il-Pjan ta’ Azzjoni Reġjonali jikkonċerna
qasam kopert mil-liġi tal-Unjoni b’mod partikolari l-qasam tal-iskart u
l-ilma kif ukoll tat-trasport[13]
u huwa koerenti mal-impenn li sar f’Rio+20 biex jitnaqqas b'mod sinifikanti
l-iskart fil-baħar. Il-kooperazzjoni msaħħa ma’ pajjiżi
terzi għall-ħarsien tal-ambjent tal-baħar hija
meħtieġa sabiex jingħata kontribut ħalli jintlaħqu
l-għanijiet tad-Direttiva Kwadru dwar l-Istrateġija Marina 2008/56/KE.
(6) Iż-żewġ
proposti li se jiġu eżaminati waqt it-Tmintax-il Laqgħa
Ordinarja tal-Partijiet Kontraenti ma jeħtieġu l-ebda bidla
fil-liġi tal-Unjoni. (7) L-UE għandha
tappoġġa dawn il-proposti. ADOTTA DIN ID-DEĊIŻJONI: Artikolu 1 Fit-tmintax-il Laqgħa Ordinarja
tal-Partijiet Kontraenti għall-Konvenzjoni ta’ Barċellona u
l-Protokolli tagħha, il-pożizzjoni tal-Unjoni Ewropea għandha
tkun li tappoġġa ż-żieda tal-ispeċijiet li ġejjin
mal-Anness II tal-Protokoll u t-tħassir rispettiv tagħhom mill-Anness III: ·
Antipatella subpinnata
(Ellis & Solander, 1786); ·
Antipathes dichotoma (Pallas,
1766); ·
Antipathes fragilis (Gravier,
1918); ·
Leiopathes glaberrima (Esper,
1792); ·
Parantipathes larix (Esper,
1790); U l-inklużjoni tal-ispeċijiet li
ġejjin fl-Anness II: ·
Callogorgia verticillata (Pallas, 1766); ·
Cladocora caespitosa (Linnaeus,
1767); ·
Cladocora debilis (Edwards
& Haime, 1849); ·
Ellisella paraplexauroides (Stiasny, 1936); ·
Lophelia pertusa (Linnaenus,
1758); ·
Madrepora oculata (Linnaeus,
1758). Artikolu 2 F’din il-laqgħa, il-pożizzjoni tal-Unjoni
Ewropea għandha wkoll tkun li tappoġġa l-adozzjoni ta’ Pjan ta’
Azzjoni Reġjonali dwar l-Iskart fil-Baħar, skont il-qafas
tal-implimentazzjoni tal-Artikolu 15 tal-Protokoll għall-Protezzjoni
tal-Baħar Mediterran kontra t-Tniġġis minn Sorsi u Atiitvitajiet
Ibbażati fuq l-Art. Ir-rappreżentanti tal-Unjoni se jippruvaw
jiżguraw li qabel l-adozzjoni t-test ikun kemxejn emendat sabiex: - jirrifletti l-ħtieġa li jiġu stabbiliti
linji gwida u jiġu diskussi l-prattiki tajba dwar is-sajd
għall-iskart, - jiddefendi l-kompatibbiltà tal-Bank tad-Dejta
tar-Reġjun tal-Mediterran dwar l-iskart fil-baħar ma’ bażijiet
tad-dejta reġjonali jew globali oħra, - jinkludi l-mikroplastiċi fid-definizzjoni
tal-iskart tal-baħar, u - jinfurza mill-ġdid ir-referenzi
għall-involviment tal-partijiet interessati. Ir-rappreżentanti tal-Unjoni jistgħu
jaqblu dwar bidliet minuri fuq din il-pożizzjoni fit-Tmintax-il
Laqgħa Ordinarja tal-Partijiet Kontraenti mingħajr
deċiżjoni ulterjuri tal-Kunsill. Magħmul fi Brussell, Għall-Kunsill Il-President
[...] [1] Id-Deċiżjoni tal-Kunsill 77/585/KEE
tal-25 ta’ Lulju 1977 li tikkonkludi l-Konvenzjoni
għall-protezzjoni tal-Baħar Mediterran mit-tniġġis u
l-Protokoll għall-prevenzjoni tat-tniġġis tal-Baħar Mediterran
bir-rimi tal-iskart minn bastimenti u vetturi tal-ajru, ĠU L 240,
19.9.1977, p. 1. [2] Id-Deċiżjoni tal-Kunsill 1999/800/KE
tat-22 ta' Ottubru 1999 dwar il-konklużjoni tal-Protokoll
li jikkonċerna żoni protetti b'mod speċjali u d-diversità
bijoloġika fil-Mediterran, u dwar l-aċċettazzjoni tal-annessi
ta' dak il-Protokoll (Konvenzjoni ta' Barċellona), ĠU L 322,
14.12.1999, p. 1. [3] Bħalma hija d-Direttiva Qafas dwar l-Iskart
(id-Direttiva 2008/98/KE tal-Parlament Ewropew u tal-Kunsill
tad-19 ta’ Novembru 2008 dwar l-iskart u li tħassar
ċerti Direttivi (ĠU L 312, 22.11.2008, P. 3-30), id-Direttiva
dwar l-Ilma Urban Mormi (id-Direttiva tal-Kunsill 91/271/KEE
tal-21 ta’ Mejju 1991 dwar it-trattament tal-ilma urban mormi
ĠU L 135, 30.5.1991, P. 40-52), kif ukoll id-Direttiva dwar
il-formalitajiet ta’ rappurtar għal bastimenti li jaslu fi u/jew jitilqu
minn portijiet tal-Istati Membri (id-Direttiva 2010/65/UE tal-Parlament Ewropew
u tal-Kunsill ĠU L 283, 29.10.2010, p. 1-10) u d-Direttiva dwar
il-faċilitajiet tal-Akkoljenza fil-Portijiet (id-Direttiva 2000/59/KE
tal-Parlament Ewropew u tal-Kunsill tas-27 ta’ Novembru 2000
dwar il-faċilitajiet tal-akkoljenza fil-portijiet għall-iskart
iġġenerat mill-bastimenti u għall-fdalijiet mill-merkanzija
(ĠU L 332, 28/12/2000 P. 0081-0090). [4] Id-dokument finali tal-Konferenza Rio+20 bl-isem ta'
"il-Futur li Rridu", il-paragrafu 163 "Aħna
nimpenjaw ruħna aktar li, sal-2025, nieħdu azzjoni biex, abbażi
ta' dejta xjentifika miġbura, niksbu tnaqqis sinifikanti fl-iskart fil-baħar
biex tiġi evitata l-ħsara lill-ambjent kostali u dak tal-baħar.". [5] ĠU L 162, 21.6.2008, p. 11. [6] Id-Direttiva tal-Kunsill 92/43/KEE
tal-21 ta’ Mejju 1992 dwar il-konservazzjoni tal-ħabitat
naturali u tal-fawna u l-flora selvaġġa, ĠU L 206,
22.7.1992, p. 7. [7] Żoni speċjali ta' konservazzjoni kif definit
fl-Artikolu 1(l) tad-Direttiva tal-Ħabitats tfisser sit ta’
importanza għall-Komunità nnominat mill-Istati Membri permezz ta’ att
statutorju, amministrattiv u/jew kuntrattwali li bih il-miżuri
meħtieġa ta’ konservazzjoni huma applikati għall-manteniment jew
għar-ripristinar, fi stat ta’ konservazzjoni favorevoli, il-ħabitat
naturali u/jew il-popolazzjonijiet tal-ispeċi li għalihom is-sit
ġie nominat. [8] http://ec.europa.eu/environment/nature/legislation/habitatsdirective/docs/Int_Manual_EU28.pdf [9] ĠU C [...], [...], p. [...]. [10] Id-Deċiżjoni
tal-Kunsill 77/585/KEE tal-25 ta’ Lulju 1977 li tikkonkludi
l-Konvenzjoni għall-protezzjoni tal-Baħar Mediterran
mit-tniġġis u l-Protokoll għall-prevenzjoni
tat-tniġġis tal-Baħar Mediterran bir-rimi tal-iskart minn
bastimenti u vetturi tal-ajru, ĠU L 240, 19.9.1977, p. 1. [11] Id-Deċiżjoni tal-Kunsill 1999/800/KE
tat-22 ta' Ottubru 1999 dwar il-konklużjoni tal-Protokoll
li jikkonċerna żoni protetti b'mod speċjali u d-diversità
bijoloġika fil-Mediterran, u dwar l-aċċettazzjoni tal-annessi
għal dak il-Protokoll (il-Konvenzjoni ta' Barċellona), ĠU
L 322, 14.12.1999, p. 1. [12] Id-Deċiżjoni
tal-Kunsill 93/626/KEE tal-25 ta’ Ottubru 1993 dwar
il-konklużjoni tal-Konvenzjoni fuq id-Diversità Bijoloġika, ĠU
L 309, 13.12.1993, p. 1. [13] Bħalma hija d-Direttiva Qafas dwar l-Iskart
(id-Direttiva 2008/98/KE tal-Parlament Ewropew u tal-Kunsill
tad-19 ta’ Novembru 2008 dwar l-iskart u li tħassar
ċerti Direttivi (ĠU L 312, 22.11.2008, P. 3-30), id-Direttiva
dwar l-Ilma Urban Mormi (id-Direttiva tal-Kunsill 91/271/KEE
tal-21 ta’ Mejju 1991 dwar it-trattament tal-ilma urban mormi
ĠU L 135, 30.5.1991, P. 40-52), u barra minn hek anki
d-Direttiva dwar il-formalitajiet ta’ rappurtar għal bastimenti li jaslu
fi u/jew jitilqu minn portijiet tal-Istati Membri (id-Direttiva 2010/65/UE
tal-Parlament Ewropew u tal-Kunsill ĠU L 283, 29.10.2010,
p. 1-10) u d-Direttiva dwar il-faċilitajiet tal-Akkoljenza
fil-Portijiet (id-Direttiva 2000/59/KE tal-Parlament Ewropew u tal-Kunsill
tas-27 ta’ Novembru 2000 dwar il-faċilitajiet
tal-akkoljenza fil-portijiet għall-iskart iġġenerat
mill-bastimenti u għall-fdalijiet mill-merkanzija (ĠU L 332,
28/12/2000 P. 0081-0090).