Proposta għal DEĊIŻJONI TAL-KUNSILL dwar il-pożizzjoni li għandha tittieħed mill-Unjoni fi ħdan il-Kumitat Amministrattiv tal-Kummissjoni Ekonomika għall-Ewropa tan-Nazzjonijiet Uniti rigward l-abbozz tar-Regolament dwar dispożizzjonijiet uniformi li jikkonċernaw l-approvazzjoni ta’ tagħmir modifikat għall-monitoraġġ tal-emissjonijiet għal vetturi “heavy duty”, għal tratturi agrikoli u tal-forestrija u għal makkinarju mobbli mhux tat-triq mgħammra b’magni li jaqbdu bil-kompressjoni. /* COM/2013/0693 final - 2013/0333 (NLE) */
MEMORANDUM TA’ SPJEGAZZJONI 1. KUNTEST TAL-PROPOSTA ·
Raġunijiet u għanijiet tal-Proposta Fil-livell internazzjonali, il-Kummissjoni
Ekonomika għall-Ewropa tan-Nazzjonijiet Uniti (United Nations Economic
Commission for Europe/UNECE) tiżviluppa rekwiżiti armonizzati,
intenzjonati biex ineħħu l-ostakli tekniċi fil-kummerċ
tal-vetturi bil-mutur u tas-sistemi użati fuq it-tali vetturi bil-mutur,
bejn il-Partijiet Kontraenti tal-Ftehim Rivedut tal-1958 u biex jiżguraw
li tali vetturi u sistemi joffru livell għoli ta’ sikurezza u ħarsien
ambjentali. Dan l-aħħar l-UNECE ffinalizzat
abbozz ta’ Regolament dwar dispożizzjonijiet uniformi li jikkonċernaw
l-approvazzjoni ta’ Tagħmir Modifikat għall-Monitoraġġ
tal-Emissjonijiet (Retrofit Emission Control Devices/REC) għall-vetturi
“heavy duty”, għal tratturi agrikoli u tal-forestrija u għal
makkinarju mobbli mhux tat-triq mgħammra b’magni li jaqbdu
bil-kompressjoni. L-għan ta’ dan l-abbozz ta’ Regolament huwa li jiġi
stabbilit sett ta’ rekwiżiti għall-approvazzjoni ta’ dak
it-tagħmir, li jiżguraw livell aċċettabbli ta’ prestazzjoni
ambjentali u t-tħaddim korrett għat-tul ta’ ħajja tagħhom. Il-proposta preżenti għandha
l-għan li tiddefinixxi l-pożizzjoni tal-Unjoni rigward l-abbozz
tar-Regolament tal-UNECE li jikonċerna l-approvazzjoni ta’ tagħmir
modifikat għall-monitoraġġ tal-emissjonijiet (REC) u
konsegwentement li tipprevedi li l-Unjoni, irrappreżentata
mill-Kummissjoni, tivvota favur dan l-abbozz. ·
Kuntest Ġenerali Ir-rekwiżiti tekniċi dwar
l-approvazzjoni tat-tip ta’ tagħmir modifikat intenzjonat
għat-tnaqqis tal-emissjonijiet attwalment huma indirizzati fil-livell
nazzjonali. Bl-adozzjoni tal-abbozz tar-Regolament tal-UNECE dwar
l-approvazzjoni ta’ tagħmir REC, se jittieħed pass importanti ’l quddiem
f’termini ta’ armonizzazzjoni tas-suq u tat-tneħħija ta’ ostakli
eventwali ta’ kummerċ dwar tagħmir REC, billi l-Istati Membri fi
ħdan l-UE jistgħu jieħdu t-test bħala referenza meta
jfasslu l-leġiżlazzjonijiet nazzjonali tagħhom. Għalhekk issa huwa previst li l-Unjoni
tivvota favur l-abbozz tar-Regolament tal-UNECE dwar l-approvazzjoni tal-REC
biex ikun hemm rekwiżiti armonizzati komuni fil-livell internazzjonali, u
dan se jiffaċilita l-kummerċ internazzjonali. Dan jippermetti li
l-kumpaniji Ewropej isegwu sett wieħed ta’ rekwiżiti li jkunu
rikonoxxuti fid-dinja kollha, jiġifieri fil-pajjiżi li huma Partijiet
Kontraenti tal-Ftehim Rivedut tal-UNECE tal-1958. ·
Dispożizzjonijiet eżistenti fil-qasam
tal-proposta Ir-rekwiżiti tekniċi fil-qasam
tal-proposta attwalment huma indirizzati fil-livell nazzjonali, u għalhekk
s’issa la hemm leġiżlazzjoni tal-UE u lanqas leġiżlazzjoni
tal-UNECE. ·
Konsistenza mal-politiki u mal-għanijiet
l-oħra tal-Unjoni. Il-proposta hija f’konformità
mal-għanijiet tar-Regolament (KE) Nru 595/2009 dwar l-approvazzjoni
tat-tip ta’ vetturi bil-mutur u magni rigward l-emissjonijiet minn vetturi
heavy-duty (Euro VI), u d-Direttiva 97/68/KE dwar l-approssimazzjoni
tal-ligijiet tal-Istati Membri fir-rigward tal-miżuri kontra l-emissjoni
ta’ inkwinanti ta’ gass u partikolati minn magni tal-kombustjoni interna li
għandhom jigu installati f’makkinarju mobbli mhux tat-triq, u
għalhekk hija konsistenti mal-għan tal-UE li tipprovdi għal
livell għoli ta’ ħarsien ambjentali fit-territorju kollu tal-Unjoni. 2. RIŻULTATI TAL-KONSULTAZZJONIJIET
MAL-PARTIJIET INTERESSATI U TAL-VALUTAZZJONIJIET TAL-IMPATT · Konsultazzjoni mal-partijiet interessati Waqt li kienet qiegħda tiżviluppa l-proposta, il-Kummissjoni Ewropea pparteċipat fil-Grupp Informali tal-UNECE dwar tagħmir REC, fejn iltaqgħu r-rappreżentanti tal-partijiet interessati kif ukoll tal-Istati Membri. Barra minn hekk, waqt l-abbozzar tad-dokument, ġew diskussi l-aspetti ewlenin tat-test fil-laqgħa tal-Kumitat Tekniku dwar il-Vetturi bil-Mutur fl-10 ta’ Lulju 2012. · Valutazzjoni tal-impatt Id-dispożizzjonijiet dwar it-tagħmir modifikat għall-monitoraġġ tal-emissjonijiet jistgħu jitqiesu bħala komplementari għal-leġiżlazzjoni dwar l-emissjonijiet tal-UNECE u tal-UE dwar l-approvazzjoni tat-tip ta’ magni u vetturi “heavy-duty” (Euro VI) u makkinarju mobbli mhux tat-triq. Fil-każ tal-ewwel, twettqet valutazzjoni tal-impatt fejn ġew ivvalutati diversi għażliet ta’ politika. Rigward makkinarju mobbli mhux tat-triq, attwalment qed tiġi elaborata valutazzjoni tal-impatt, u għalhekk l-ebda valutazzjoni tal-impatt separata hija meqjusa meħtieġa għall-finijiet tal-adozzjoni tal-abbozz tar-Regolament tal-UNECE. 3. ELEMENTI LEGALI TAL-PROPOSTA ·
Sommarju tal-azzjoni proposta Il-proposta se tippermetti lill-Unjoni, irrappreżentata
mill-Kummissjoni, biex tivvota favur l-abbozz tar-Regolament tal-UNECE dwar
dispożizzjonijiet uniformi li jikkonċernaw l-approvazzjoni
tat-Tagħmir Modifikat għall-Monitoraġġ tal-Emissjonijiet
(REC) għal vetturi “heavy duty”, għal tratturi agrikoli u
tal-forestrija u għal makkinarju mobbli mhux tat-triq mgħammra
b’magni li jaqbdu bil-kompressjoni. ·
Bażi legali Meta wieħed iqis l-għan u l-kontenut
tad-Deċiżjoni tal-Kunsill, il-bażijiet legali huma
l-Artikoli 114 u 218(9) tat-TFUE. Il-proċedura li għandha
tiġi segwita għall-adozzjoni tad-Deċiżjoni tal-Kunsill hija
dik stipulata fl-Artikolu 4(2) tad-Deċiżjoni
tal-Kunsill 97/836/KE. ·
Prinċipju ta’ sussidjarjetà Id-Direttiva 2008/50/KE tistabbilixxi
l-għanijiet dwar il-kwalità tal-arja fir-rigward ta’ diversi sustanzi li
jniġġsu, u tħalli għall-ġudizzju tal-Istati Membri
d-deċiżjoni dwar il-miżuri preċiżi li għandhom
jittieħdu sabiex ikunu konformi mal-għanijiet imsemmija hawn fuq.
F’dan ir-rigward, it-tagħmir modifikat għall-monitoraġġ
tal-emissjonijiet jista’ jkollu rwol fundamentali, għaliex meta
jitwaħħlu f’vetturi li diġà tqiegħdu fis-suq, dan
jikkostitwixxi element li huwa ta’ spiss indirizzat fil-livell nazzjonali
bħala parti mill-azzjonijiet meħtieġa sabiex tittejjeb
il-kwalità tal-arja. Minħabba l-kuntest mogħti hawn fuq,
u skont il-prinċipju tas-sussidjarjetà, huwa xieraq li l-UE taderixxi
mar-Regolament tal-UNECE dwar l-approvazzjoni ta’ tagħmir REC, filwaqt li
tirrispetta l-kapaċità tal-Istati Membri li jiddeċiedu jekk
ir-Regolament għandux jiġi applikat, fil-livelli nazzjonali
rispettivi tagħhom, għall-finijiet ta’ tagħmir REC mandatorju
tal-approvazzjoni tat-tip, jew għal finijiet differenti oħrajn.
Madankollu, u mingħajr preġudizzju għall-fakultà tal-Istati
Membri li jiddeċiedu fl-ambitu tal-kompetenzi tagħhom, ir-regoli
bażiċi tal-Ftehim tal-1958 japplikaw għall-UE u bl-istess mod
għall-Istati Membri kollha. Għaldaqstant, il-proposta hija konformi
mal-prinċipju tas-sussidjarjetà. ·
Prinċipju ta’ proporzjonalità Il-proposta hija konformi mal-prinċipju
ta’ proporzjonalità għaliex ma tmurx lil hinn minn dak li huwa
meħtieġ sabiex jintlaħqu l-għanijiet li jkun żgurat
il-funzjonament xieraq tas-suq intern waqt li fl-istess ħin ikun previst
livell għoli ta’ ħarsien ambjentali. ·
Għażla tal-istrumenti L-istrument li qed jiġi propost:
Deċiżjoni tal-Kunsill. L-użu ta’ Deċiżjoni tal-Kunsill
huwa kkunsidrat adegwat minħabba li huwa f’konformità mar-rekwiżiti
tal-Artikolu 218(9) tat-TFUE. 4. IMPLIKAZZJONI BAĠITARJA Il-proposta ma għandha l-ebda
implikazzjoni għall-baġit tal-Unjoni. 2013/0333 (NLE) Proposta għal DEĊIŻJONI TAL-KUNSILL dwar il-pożizzjoni li għandha tittieħed
mill-Unjoni fi ħdan il-Kumitat Amministrattiv tal-Kummissjoni Ekonomika
għall-Ewropa tan-Nazzjonijiet Uniti rigward l-abbozz tar-Regolament dwar
dispożizzjonijiet uniformi li jikkonċernaw l-approvazzjoni ta’
tagħmir modifikat għall-monitoraġġ tal-emissjonijiet
għal vetturi “heavy duty”, għal tratturi agrikoli u tal-forestrija u
għal makkinarju mobbli mhux tat-triq mgħammra b’magni li jaqbdu
bil-kompressjoni. IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b’mod partikolari l-Artikolu 114,
flimkien mal-Artikolu 218(9) tiegħu, Wara li kkunsidra l-proposta mill-Kummissjoni
Ewropea, Billi: (1) Bid-Deċiżjoni
tal-Kunsill 97/836/KE[1],
l-Unjoni ssieħbet fil-Ftehim tal-Kummissjoni Ekonomika għall-Ewropa
tan-Nazzjonijiet Uniti (UNECE) dwar l-adozzjoni ta’ preskrizzjonijiet
tekniċi uniformi għal vetturi bir-roti, għal tagħmir u
partijiet li jistgħu jintramaw u/jew jintużaw fuq vetturi bir-roti u
dwar il-kundizzjonijiet għar-rikonoxximent reċiproku
tal-approvazzjonijiet mogħtija abbażi ta’ dawn il-preskrizzjonijiet
("il-Ftehim Rivedut tal-1958"). (2) Ir-rekwiżiti
standardizzati tal-abbozz tar-Regolament tal-UNECE dwar dispożizzjonijiet
uniformi li jikkonċernaw l-approvazzjoni ta’ Tagħmir Modifikat
għall-Monitoraġġ tal-Emissjonijiet (REC) għal vetturi
“heavy duty”, għal tratturi agrikoli u tal-forestrija u għal
makkinarju mobbli mhux tat-triq mgħammra b’magni li jaqbdu bil-kompressjoni[2] huma intenzjonati biex
ineħħu ostakli tekniċi fil-kummerċ ta’ tagħmir REC
bejn il-partijiet kontraenti tal-Ftehim Rivedut tal-1958 u biex jiżguraw
li sistemi bħal dawn joffru livell għoli ta’ prestazzjoni u ta’
ħarsien ambjentali. (3) Huwa xieraq li tiġi
stabbilita l-pożizzjoni li għandha tiġi adottata f’isem l-Unjoni
fil-Kumitat Amministrattiv tal-Ftehim Rivedut tal-1958 dwar l-adozzjoni ta’ dak
l-abbozz tar-Regolament tal-UNECE, ADOTTA DIN ID-DEĊIŻJONI : Artikolu Uniku Il-pożizzjoni li għandha tittieħed
mill-Unjoni, irrappreżentata mill-Kummissjoni, fi ħdan il-Kumitat
Amministrattiv tal-Ftehim Rivedut tal-1958 hija li tivvota favur l-abbozz
tar-Regolament tal-UNECE dwar dispożizzjonijiet uniformi li
jikkonċernaw l-approvazzjoni ta’ tagħmir modifikat
għall-monitoraġġ tal-emissjonijiet (REC) għal vetturi
“heavy duty”, għal tratturi agrikoli u tal-forestrija u għal
makkinarju mobbli mhux tat-triq mgħammra b’magni li jaqbdu
bil-kompressjoni, kif stipulat fid-dokument ECE TRANS/ WP.29/ /2013/119. Magħmul fi Brussell, Għall-Kunsilll [1] ĠU
L 346, 17.12.1997, p. 78. [2] Id-Dokument
tal-UNECE ECE TRANS/WP.29/GRPE/2013/6.