Proposta għal DEĊIŻJONI TA’ IMPLIMENTAZZJONI TAL-KUNSILL li tawtorizza lil-Lussemburgu jintroduċi miżura speċjali li tidderoga mill-Artikolu 285 tad-Direttiva 2006/112/KE dwar is-sistema komuni ta' taxxa fuq il-valur miżjud /* COM/2013/0608 final - 2013/0296 (NLE) */
MEMORANDUM TA’ SPJEGAZZJONI 1. KUNTEST TAL-PROPOSTA Ir-raġunijiet għall-proposta u
l-għanijiet tagħha Skont l-ewwel paragrafu tal-Artikolu 395
tad-Direttiva 2006/112/KE [1]tat-28 ta' Novembru 2006
dwar is-sistema komuni ta' taxxa fuq il-valur miżjud, il-Kunsill, bi qbil
unanimu ma' proposta mill-Kummissjoni, jista' jawtorizza lil kwalunkwe Stat
Membru biex japplika miżuri speċjali ta' deroga mid-Direttiva
msemmija sabiex jissimplifika l-proċedura ta' ħlas tat-taxxa jew biex
iwaqqaf milli jsiru ċerti tipi ta' evażjoni jew evitar tat-taxxa. B'ittra rreġistrata mal-Kummissjoni
fl-24 ta’ Ottubru 2012, il-Lussemburgu talab awtorizzazzjoni
biex japplika miżura ta’ deroga mill-Artikolu 285 tad-Direttiva
2006/112/KE, li tkun tippermettilu jeżenta mill-VAT lill-persuni taxxabbli
li d-dħul annwali tagħhom ma jkunx jaqbeż
il-EUR 25 000. B’konformità mat-tieni paragrafu
tal-Artikolu 395 tad-Direttiva 2006/112/KE, il-Kummissjoni infurmat
lill-Istati Membri l-oħra permezz ta’ ittra datata
d-9 ta’ Novembru 2012 bit-talba tal-Lussemburgu. B’ittra datata
t-12 ta’ Novembru 2012, il-Kummissjoni nnotifikat
lil-Lussemburgu li kellha l-informazzjoni kollha meħtieġa biex
tikkunsidra t-talba. Il-kuntest ġenerali Il-Kapitolu 1 tat-Titolu XII
tad-Direttiva 2006/112/KE jagħti l-possibbiltà lill-Istati Membri li
japplikaw skemi speċjali għall-impriżi żgħar,
inkluża l-possibbiltà li jeżentaw lil persuni taxxabbli b'inqas minn
ċertu dħul annwali. Din l-eżenzjoni timplika li persuna taxxabbli
ma għandhiex għalfejn tħallas il-VAT fuq il-provvisti
tagħha u, konsegwentement, ma tistax tnaqqas il-VAT minn fuq ix-xiri
tagħha. Skont l-ewwel paragrafu tal-Artikolu 285
tad-Direttiva 2006/112/KE, l-Istati Membri, li ma eżerċitawx
l-għażla prevista fl-Artikolu 14 tad-Direttiva 67/228/KEE li
jintroduċu eżenzjonijiet jew ħelsien gradwat mit-taxxa,
jistgħu jagħtu eżenzjoni mit-taxxa lill-persuni taxxabbli li
d-dħul annwali tagħhom ma jaqbiżx il-EUR 5 000 jew
l-ekwivalenti fil-munita nazzjonali. Skont it-tieni paragrafu
tal-Artikolu 285 tad-Direttiva 2006/112/KE, dawk l-Istati Membri
jistgħu wkoll jagħtu ħelsien gradwat mit-taxxa lill-persuni
taxxabbli li d-dħul annwali tagħhom jaqbeż il-limitu massimu
stabbilit minnhom għall-applikazzjoni tiegħu. Skont l-informazzjoni ppreżentata
lill-Kummissjoni, il-Lussemburgu bħalissa jeżenta mill-VAT persuni
taxxabbli li d-dħul annwali tagħhom ma jaqbiżx
l-EUR 10 000. Barra minn hekk, il-Lussemburgu informa
lill-Kummissjoni li jagħmel użu mill-għażla skont it-tieni
paragrafu tal-Artikolu 285 tad-Direttiva 2006/112/KE billi jagħti
ħelsien gradwat mit-taxxa lill-persuni taxxabbli li d-dħul annwali
tagħhom hu bejn l-EUR 10 000 u l-EUR 25 000. Il-Lussemburgu għandu l-għan li
japplika limitu ta' dħul ta' EUR 25 000 rigward l-iskema ta’
eżenzjoni għan-negozji żgħar filwaqt li fl-istess ħin
ineħħi l-applikazzjoni ta’ ħelsien gradwat mit-taxxa. Iqis li,
bħala parti minn programm ta’ rkupru ekonomiku u wkoll biex jittieħed
kont tad-deprezzament monetarju li seħħ mill-introduzzjoni tal-iskema
ta’ eżenzjoni fil-Lussemburgu, iż-żieda tal-limitu massimu
tal-iskema attwali ta’ eżenzjoni għal impriżi żgħar
għal EUR 25 000 għandha tippermetti li l-piż
amministrattiv tal-VAT jitnaqqas b’mod sinifikanti għall-impriżi
b’livell baxx ta’ dħul u għandha trawwem il-ħolqien ta’
opportunitajiet ġodda għal dan it-tip ta’ negozju. L-applikazzjoni tal-limitu miżjud
għall-eżenzjoni hija fil-fehma tiegħu xierqa biex tissimplifika
s-sistema tal-VAT għall-impriżi ż-żgħar billi tnaqqas
b'mod sinifikanti l-piżijiet minn fuq dawk in-negozji li huma
eleġibbli għall-iskema billi tirrilaxxahom minn ħafna
mill-obbligi tal-VAT skont l-arranġamenti normali tal-VAT. Barra minn
hekk, il-miżura segwita se jkollha l-effett addizzjonali li tnaqqas
il-piż amministrattiv għan-negozji li huma attwalment
suġġetti għall-iskema għall-ħelsien gradwat mit-taxxa,
li se titneħħa fl-istess ħin. Is-sistema tkun fakultattiva
għall-persuni taxxabbli. Skont l-awtoritajiet Lussemburgiżi,
il-miżura speċjali segwita se jkollha biss effett negliġibbli
fuq l-ammont totali tad-dħul mill-VAT miġbur (mhux aktar minn
0,10 %). Id-dispożizzjonijiet eżistenti
fil-qasam tal-proposta Fl-2004, il-Kummissjoni għamlet proposta
biex – fost l-oħrajn – tgħolli l-limitu tad-dħul annwali
disponibbli lill-Istati Membri (COM(2004) 728 finali[2]) għall-eżenzjoni mill-VAT
tal-persuni taxxabbli għal EUR 100 000. Dik il-proposta
għadha fl-aġenda fil-Kunsill. Fit-terminu medju, il-Kummissjoni tqis li
l-adozzjoni ta’ dik il-proposta tkun triq 'il quddiem aktar xierqa minn
approċċ frammentat ibbażat fuq derogi individwali.
Il-Kummissjoni għalhekk tistieden lill-Kunsill biex ikompli n-negozjati
dwar dik il-proposta. Konsistenza ma' politiki u għanijiet
oħra tal-Unjoni Mhux applikabbli. 2. RIŻULTATI
TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET TAL-IMPATT Il-konsultazzjoni mal-partijiet
interessati Mhux rilevanti. Il-ġbir u l-użu ta' kompetenzi Ma kienx hemm bżonn ta’ kompetenzi
esterni. Valutazzjoni tal-impatt Il-proposta għal Deċiżjoni
tal-Kunsill għandha l-għan li tapplika miżura ta' simplifikazzjoni
li tneħħi ħafna mill-obbligi tal-VAT għan-negozji li
jaħdmu bi dħul annwali ta’ mhux aktar minn EUR 25 000, u
għalhekk għandha impatt potenzjali pożittiv. Minħabba l-kamp ta' applikazzjoni limitat
tad-deroga u l-applikazzjoni limitata tagħha fiż-żmien,
l-impatt, fi kwalunkwe każ, se jkun limitat. 3. ELEMENTI ĠURIDIĊI
TAL-PROPOSTA Sommarju tal-azzjoni proposta Il-proposta għandha l-għan li
tawtorizza lil-Lussemburgu jintroduċi miżura ta’ simplifikazzjoni li
tagħti deroga mill-Artikolu 285 tad-Direttiva 2006/112/KE sabiex
il-persuni taxxabbli bi dħul annwali mhux ogħla minn
EUR 25 000 ikunu jistgħu jiġu eżentati mill-VAT.
Il-persuni taxxabbli għadhom ikunu jistgħu jagħżlu
l-arranġamenti normali tal-VAT. Bażi ġuridika L-Artikolu 395 tad-Direttiva tal-Kunsill
2006/112/KE. Il-prinċipju tas-sussidjarjetà Il-proposta taqa’ taħt il-kompetenza
esklussiva tal-Unjoni Ewropea. Għalhekk, il-prinċipju
tas-sussidjarjetà ma japplikax. Il-prinċipju tal-proporzjonalità Din il-proposta tikkonforma mal-prinċipju
tal-proporzjonalità minħabba li din id-Deċiżjoni
tikkonċerna awtorizzazzjoni mogħtija lil Stat Membru fuq it-talba
tiegħu stess u ma timplika l-ebda obbligu. Minħabba l-kamp ta' applikazzjoni limitat
tad-deroga, il-miżura speċjali hija proporzjonata mal-għan
mixtieq. L-għażla tal-istrumenti L-istrument li qed jiġi propost:
Deċiżjoni tal-Kunsill. Mezzi oħrajn ma jkunux adegwati
għar-raġunijiet li ġejjin: Skont l-Artikolu 395 tad-Direttiva
tal-Kunsill 2006/112/KE, deroga mir-regoli komuni tal-VAT hija possibbli biss
bl-awtorizzazzjoni tal-Kunsill li jkun qiegħed jaġixxi b'mod unanimu
wara proposta mill-Kummissjoni. Deċiżjoni tal-Kunsill hija l-aktar
strument xieraq peress li tista' tiġi indirizzata lil Stat Membru
individwali. 4. IMPLIKAZZJONI BAĠITARJA Il-proposta mhix se taffettwa b'mod negattiv
lir-riżorsi proprji tal-Unjoni mill-VAT minħabba li l-Lussemburgu se
jwettaq kalkolu tal-kumpens skont l-Artikolu 6 tar-Regolament tal-Kunsill
(KEE, EURATOM) Nru 1553/89. 5. ELEMENTI FAKULTATTIVI Il-proposta tinkludi klawżola sunset. 2013/0296 (NLE) Proposta għal DEĊIŻJONI TA’ IMPLIMENTAZZJONI
TAL-KUNSILL li tawtorizza lil-Lussemburgu jintroduċi
miżura speċjali li tidderoga mill-Artikolu 285 tad-Direttiva 2006/112/KE
dwar is-sistema komuni ta' taxxa fuq il-valur miżjud IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, Wara li kkunsidra d-Direttiva tal-Kunsill
2006/112/KE tat-28 ta' Novembru 2006 dwar is-sistema komuni ta'
taxxa fuq il-valur miżjud[3],
u b’mod partikolari l-Artikolu 395(1) tagħha, Wara li kkunsidra l-proposta tal-Kummissjoni
Ewropea, Billi: (1) B'ittra rreġistrata
mal-Kummissjoni fl-24 ta’ Ottubru 2012, il-Lussemburgu talab
awtorizzazzjoni biex japplika miżura ta’ deroga mill-Artikolu 285
tad-Direttiva 2006/112/KE, li tkun tippermettilu jeżenta mill-VAT
lill-persuni taxxabbli li d-dħul annwali tagħhom ma jkunx jaqbeż
il-EUR 25 000. Permezz ta’ din il-miżura, dawk il-persuni
taxxabbli se jkomplu jkunu eżenti minn ċerti obbligi jew mill-obbligi
kollha fir-rigward tal-VAT imsemmija fil-Kapitoli 2 sa 6
tat-Titolu XI tad-Direttiva 2006/112/KE. (2) B’konformità
mal-Artikolu 395(2) tad-Direttiva 2006/112/KE, b’ittra datata
d-9 ta’ Novembru 2012 il-Kummissjoni infurmat lill-Istati Membri
l-oħrajn bit-talba li saret mil-Lussemburgu. Permezz ta' ittra datata
t-12 ta' Novembru 2012, il-Kummissjoni nnotifikat
lil-Lussemburgu li kellha l-informazzjoni kollha meħtieġa biex tqis
it-talba. (3) Skont l-Artikolu 285
tad-Direttiva 2006/112/KE, l-Istati Membri li m’għamlux użu minn din
l-għażla skont l-Artikolu 14 tat-Tieni Direttiva tal-Kunsill
67/228/KEE tal-11 ta’ April 1967 dwar l-armonizzazzjoni
tal-leġiżlazzjoni tal-Istati Membri dwar it-taxxi fuq id-dħul
mill-bejgħ, struttura u proċeduri għall-applikazzjoni
tas-sistema komuni ta’ taxxa fuq il-valur miżjud[4], jistgħu jagħtu
eżenzjoni mill-VAT lill-persuni taxxabbli li d-dħul annwali
tagħhom ma jaqbiżx il-EUR 5 000 jew l-ekwivalenti
fil-munita nazzjonali u jistgħu wkoll jagħtu ħelsien gradwat
mit-taxxa lill-persuni taxxabbli li d-dħul annwali tagħhom
jaqbeż il-limitu massimu stabbilit minnhom għall-applikazzjoni
tiegħu. (4) Il-Lussemburgu informa
lill-Kummissjoni li bħalissa jeżenta mill-VAT persuni taxxabbli li
d-dħul annwali tagħhom ma jaqbiżx l-EUR 10 000 u li
jagħmel użu mill-għażla li jagħti ħelsien gradwat
mit-taxxa fir-rigward ta’ persuni taxxabbli li d-dħul annwali tagħhom
hu bejn l-EUR 10 000 u l-EUR 25 000. Il-Lussemburgu talab
l-awtorizzazzjoni, bħala miżura ta' deroga, biex jeżenta
mill-VAT persuni taxxabbli li d-dħul annwali tagħhom ma jaqbiżx
il-EUR 25 000. (5) Limitu ogħla
għall-iskema speċjali hu miżura ta’ simplifikazzjoni,
minħabba li dan jista’ jnaqqas b’mod sinifikanti l-obbligi tal-VAT
għan-negozji ż-żgħar u jippermetti lil-Lussemburgu jieqaf
japplika l-iskema ta’ ħelsien gradwat mit-taxxa li hija ta’ piż
għan-negozji. Il-persuni taxxabbli għadhom ikunu jistgħu
jagħżlu l-arranġamenti normali tal-VAT. (6) Fil-proposta tagħha
għal Direttiva li temenda d-Direttiva 77/388/KEE bl-għan li
tissimplifika l-obbligi tat-taxxa tal-valur miżjud bid-data
tad-29ta' Ottubru 2004[5],
il-Kummissjoni inkludiet dispożizzjonijiet immirati li jippermettu
lill-Istati Membri jistabbilixxu limitu annwali ta' dħul għall-iskema
ta' eżenzjoni mill-VAT li jista' jasal sa EUR 100 000 jew
l-ekwivalenti fil-munita nazzjonali, bil-possibbiltà li jiġi
aġġornat l-ammont kull sena. Din id-Deċiżjoni hi konformi
ma’ dik il-proposta. (7) Id-deroga se jkollha biss
effett negliġibbli fuq l-ammont globali ta’ taxxa miġbur fl-istadju
tal-konsum finali u mhux se jkollha effetti negattivi fuq ir-riżorsi
proprji tal-Unjoni li jinġabru mit-taxxa fuq il-valur miżjud. ADOTTA DIN ID-DEĊIŻJONI: Artikolu 1 B’deroga mill-Artikolu 285
tad-Direttiva 2006/112/KE, il-Lussemburgu hu awtorizzat li jeżenta
mill-VAT persuni taxxabbli li d-dħul annwali tagħhom ma jaqbiżx
il-EUR 25 000. Artikolu 2 Din id-Deċiżjoni għandha
tidħol fis-seħħ fil-jum tan-notifika tagħha. Din id-Deċiżjoni tapplika sad-data
tad-dħul fis-seħħ tar-regoli tal-Unjoni li jemendaw l-ammonti
tal-limiti massimi ta’ dħul annwali li taħthom il-persuni taxxabbli
jistgħu jikkwalifikaw għal eżenzjoni mill-VAT jew
sal-31 ta’ Diċembru 2016, skont liema data tiġi
l-ewwel. Artikolu 3 Din
id-Deċiżjoni hija indirizzata lill-Gran Dukat tal-Lussemburgu. Magħmul fi Brussell, Għall-Kunsill Il-President [1] ĠU 347, 11.12.2006, p. 1. [2] http://eur-lex.europa.eu/LexUriServ/LexUriServ.do?uri=COM:2004:0728:FIN:MT:PDF
[3] ĠU 347, 11.12.2006, p. 1. [4] ĠU 71, 14.4.1967, p. 1303/67. [5] COM(2004) 728 finali.