MEMORANDUM TA’ SPJEGAZZJONI

Il-Punt 28 tal-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba[1] jippermetti l-mobilizzazzjoni tal-Fond Ewropew ta’ Aġġustament għall-Globalizzazzjoni (FEG) permezz ta’ mekkaniżmu ta’ flessibbiltà, bil-limitu massimu annwali ta’ EUR 500 miljun lil hinn mill-intestaturi rilevanti tal-qafas finanzjarju.

Ir-regoli applikabbli għall-kontribuzzjonijiet mill-FEG huma stipulati fir-Regolament (KE) Nru 1927/2006 tal-Parlament Ewropew u tal-Kunsill tal-20 ta’ Diċembru 2006 li jistabbilixxi l-Fond Ewropew ta’ Aġġustament għall-Globalizzazzjoni[2].

Fit-30 ta' Diċembru 2011, l-Italja ressqet l-applikazzjoni EGF/2011/025 IT/Lombardia għal kontribuzzjoni finanzjarja mill-FEG, wara sensji f'żewġ intrapriżi li joperaw fis-settur tan-NACE Reviżjoni 2 id-Diviżjoni 26 ("Manifattura ta' prodotti tal-kompjuter, elettroniċi u ottiċi")[3] fir-reġjun NUTS II ta' Lombardia (ITC4) fl-Italja.

Wara analiżi fil-fond ta’ din l-applikazzjoni, il-Kummissjoni kkonkludiet, skont l-Artikolu 10 tar-Regolament (KE) Nru 1927/2006, li l-kundizzjonijiet għal kontribuzzjoni finanzjarja skont dan ir-Regolament huma ssodisfati.

TAQSIRA TAL-APPLIKAZZJONI U ANALIŻI

Dejta ewlenija: ||

In-numru ta' referenza tal-FEG: || EGF/2011/025

Stat Membru || L-Italja

Artikolu 2 || (b)

Intrapriżi kkonċernati || 2

Ir-reġjun tan-NUTS II: || Lombardia (ITC4)

Diviżjoni tan-NACE Reviżjoni 2 || 26 ("Manifattura ta’ prodotti tal-kompjuter, elettroniċi u ottiċi")

Perjodu ta’ referenza || 20.3.2011 – 20.12.2011

Id-data tal-bidu għas-servizzi personalizzati || 1.3.2012

Id-data tal-applikazzjoni || 30.12.2011

Sensji waqt il-perjodu ta' referenza: || 529

Ħaddiema li ngħataw is-sensja identifikati tal-għajnuna || 480

Nefqa għas-servizzi personalizzati (EUR) || 1 687 200

Nefqa għall-implimentazzjoni tal-FEG[4] (EUR) || 105 000

Nefqa għall-implimentazzjoni tal-FEG (%) || 5,9

Baġit totali (EUR) || 1 792 200

Kontribuzzjoni tal-FEG (65 %) (EUR) || 1 164 930

1.           L-applikazzjoni tressqet quddiem il-Kummissjoni fit-30 ta’ Diċembru 2011 u kienet issupplimentata b'informazzjoni addizzjonali sat-12 ta’ Marzu 2013.

2.           L-applikazzjoni tissodisfa l-kundizzjonijiet għat-tħaddim tal-FEG kif stabbilit fl-Artikolu 2(b) tar-Regolament (KE) Nru 1927/2006, u ġiet ippreżentata fil-limitu ta' żmien ta' 10 ġimgħat kif imsemmi fl-Artikolu 5 ta' dak ir-Regolament.

Ir-rabta bejn is-sensji u l-bidliet strutturali ewlenin fix-xejriet tal-kummerċ dinji minħabba l-globalizzazzjoni jew il-kriżi finanzjarja u ekonomika globali

3.           Sabiex tiġi stabbilita r-rabta bejn is-sensji u l-kriżi finanzjarja u ekonomika globali, l-Italja qed issostni li n-nuqqas fid-domanda u l-investiment fl-ICT, kemm mill-konsumaturi kif ukoll mill-intrapriżi, minħabba l-kriżi, ikkontribwixxa b’mod sinifikattiv fit-tnaqqis tar-ritmu tas-settur Taljan tal-ICT u l-komponenti elettroniċi (NACE 26)[5] mill-2009 'l hawn[6].

4.           Skont l-awtoritajiet Taljani, is-settur tal-ICT fl-Italja mar pjuttost tajjeb fil-perjodu bejn l-2005 u l-2008 billi kiseb livell raġonevoli ta’ attività ekonomika, b’mod partikolari meta mqabbel ma’ setturi oħra fl-ekonomija Taljana, u dan minkejja kompetizzjoni kbira minn kumpaniji tal-ICT f’pajjiżi bi spejjeż ta’ produzzjoni baxxi matul l-aħħar għaxar snin (ara l-punt li jmiss). Madankollu, b'riżultat tal-kriżi, ix-xejra pożittiva tas-snin qabel l-2008 nqalbet, b'rati tat-tkabbir negattivi fid-diversi fergħat tal-ICT — pereżempju l-fergħa tal-IT: — 9% fl-2009, — 2,5 % fl-2010, — 4,1 % fl-2011 (rati tat-tkabbir negattivi rispettivi meta mqabbla mas-snin preċedenti rispettivi).

5.           Skont l-Assinform, is-settur tal-ICT Taljan ilu jbati minn kompetizzjoni qawwija minn pajjiżi bi prezzijiet baxxi matul dawn l-aħħar għaxar snin. Il-ħtieġa li s-settur jiġi riorganizzat biex jadatta ruħu mal-ħolqien rapidu ta’ teknoloġiji ġodda, bħall-cloud computing, id-diversi tipi ta’ servizzi elettroniċi, in-netwerks soċjali, eċċ., ilha li ġiet rikonoxxuta bħala sfida għal għadd ta' snin. Id-distakk diġitali bejn l-Italja u pajjiżi Ewropej ewlenin kif ukoll pajjiżi oħra fid-dinja żdied minħabba r-reċessjoni ekonomika kkawżata mill-kriżi. Dawn l-iżviluppi kollha wasslu għat-tnaqqis tal-istaff tal-ICT f'intrapriżi Taljani fis-snin wara l-2009 lil hawn.

6.           Il-waqgħa kbira tas-settur tal-ICT fl-Italja b'riżultat tal-kriżi laqtet ukoll iż-żewġ intrapriżi li huma s-suġġett ta’ din il-proposta: Anovo Italia S.p.A. (fil-provinċja ta' Varese) u Jabil CM S.r.l. (fil-provinċja ta' Milan). Is-sitwazzjoni diġà diffiċli tagħhom kompliet teħżien, u l-isforzi li saru f’dawn l-aħħar snin għall-konverżjoni u l-organizzazzjoni mill-ġdid fallew, biex dawn l-intrapriżi għalqu u taw is-sensja lill-ħaddiema tagħhom.

7.           Fil-valutazzjoni tagħha dwar l-applikazzjoni EGF/2011/016 IT Agile (Nace 62)[7] u EGF/2010/012 NL Noord Holland ICT (Nace 46)[8], il-Kummissjoni diġà għamlet stqarrija dwar l-impatt tal-kriżi ekonomika u finanzjarja fuq l-intrapriżi li joperaw fis-settur tal-ICT. Dawk l-argumenti għadhom validi. [9]

Stampa tal-għadd ta' sensji u l-konformità mal-kriterji tal-Artikolu 2(b)

8.           L-Italja ressqet din l-applikazzjoni skont il-kriterji ta' intervent tal-Artikolu 2(b) tar-Regolament (KE) Nru 1927/2006, li jitlob li jkun hemm minn tal-inqas 500 sensja fuq perjodu ta' disa' xhur f'intrapriżi li joperaw fl-istess Diviżjoni tan-NACE Reviżjoni 2 f'reġjun wieħed jew f'żewġ reġjuni kontigwi fil-livell tan-NUTS II fi Stat Membru.

9.           L-applikazzjoni tindika 529 sensja f’żewġ (2) intrapriżi li joperaw fid-Diviżjoni 26 tan-NACE Reviżjoni 2 ("Manifattura ta' prodotti tal-kompjuter, elettroniċi u ottiċi") fir-reġjun NUTS II tal-Lombardia (ITC4) matul il-perjodu ta' referenza ta' disa’ xhur bejn l-20 ta’ Marzu 2011 u l-20 ta’ Diċembru 2011. It-322 sensja f’Jabil CM S.r.l. ġew ikkalkolati skont l-ewwel inċiż tat-tieni paragrafu tal-Artikolu 2 tar-Regolament (KE) Nru 1927/2006 (fit-28 ta’ Settembru 2011 intbagħtu ittri faks mingħand l-impjegatur biex jagħtu s-sensja lill-ħaddiema). Il-207 sensji f'Anovo Italia S.p.A ġew ikkalkolati skont it-tielet inċiż tat-tieni paragrafu tal-Artikolu 2 tar-Regolament (KE) Nru 1927/2006. Fid-29 ta’ Jannar 2013, il-Kummissjoni rċeviet il-konferma meħtieġa skont l-Artikolu 2(2) tar-Regolament tal-FEG li l-207 individwi li kienu ġew irrappurtati skont it-tielet inċiż kienu fil-fatt ngħataw is-sensja.

Spjegazzjoni tan-natura mhux prevista ta’ dawk is-sensji

10.         Skont l-awtoritajiet Taljani, is-sensji fiż-żewġ intrapriżi kkonċernati minn din l-applikazzjoni, Anovo Italia S.p.A. u Jabil CM S.r.l., ma kinux previsti: il-kriżi finanzjarja u ekonomika kellha impatt qawwi fuq iż-żewġ intrapriżi li wassal għall-falliment tal-isforzi kollha li saru matul l-aħħar snin tal-konverżjoni u l-organizzazzjoni mill-ġdid u finalment għas-sensja tal-ħaddiema kollha: Anovo Italia S.p.A falliet (15.12.2011), u Jabil CM S.r.l. għalqet għal kollox wara li waqqfet l-attivitajiet kollha tagħha (l-avviż tal-għeluq u s-sensja lill-ħaddiema kollha: it-28 ta' Settembru 2011; tmiem tan-negozjati tas-sħab soċjali, mingħajr qbil: it-13 ta' Diċembru 2011, wara din id-data l-ħaddiema li ngħataw is-sensja okkupaw il-bini ta' Jabil).

Identifikazzjoni tal-intrapriżi li taw is-sensji u l-ħaddiema identifikati tal-għajnuna

11.         L-applikazzjoni hija dwar 529 sensja (li 480 minnhom huma identifikati għall-għajnuna) f’żewġ intrapriżi:

Jabil CM S.r.l. (Cassina de Pecchi, fil-provinċja ta' Milan)                     322

Anovo Italia S.p.A. (Saranno, fil-provinċja ta' Varese)                           207

Jabil CM S.r.l., ġiet stabbilita fl-2007 minn ex-unità tan-negozju Nokia Siemens, u speċjalizzat fil-produzzjoni, l-immuntar u t-tiswija ta’ unitajiet ta' ċirkwiti għall-apparat tat-telekomunikazzjoni (NACE 26.1). Din l-intrapriża bidlet l-idejn bosta drabi fl-aħħar snin, bl-aħħar sid ikun il-grupp mill-Istati Uniti "Competence Mercatech" (mill-2010 'l hawn).

Anovo Italia S.p.A kienet tappartjeni lill-grupp multinazzjonali Franċiż Anovo S.A[10] u kienet ilha topera fis-suq Taljan mill-1998 sal-falliment tagħha fil-15.12.2011. Anovo Italia S.p.A. speċjalizzat fit-tfassil u t-twassil ta’ attivitajiet integrati u relatati mal-IT, b’mod partikolari il-manifattura ta’ komponenti elettroniċi (NACE 26.1).

12.         It-tqassim tal-ħaddiema identifikati huwa kif ġej:

Kategorija || Numru || Persentaġġ

Irġiel || 290 || 60.4

Nisa || 190 || 39.6

Ċittadini tal-UE || 473 || 98.5

Ċittadini mhux tal-UE || 7 || 1.5

Bejn il-15 u l-24 sena || 0 || 0.0

Bejn il-25 u l-54 sena || 450 || 93.8

Bejn il-55 u l-64 sena || 22 || 4.6

> 64 sena || 8 || 1.6

13.         L-ebda ħaddiem ma għandu problema ta' saħħa fit-tul jew diżabbiltà.

14.         Fir-rigward ta’ kategoriji ta’ xogħol, it-tqassim huwa kif ġej:

Kategorija || Numru || Persentaġġ

Tekniċi u professjonisti assoċjati (ISCO 3) || 37 || 7,7

Ħaddiema ta' appoġġ/skrivani (ISCO 4) || 57 || 11,9

Ħaddiema fl-artiġjanat u snajja’ relatati (ISCO 7) || 153 || 31,9

Operaturi tal-magni / impjanti u muntaturi (ISCO 8) || 233 || 48,5

15.         Skont l-Artikolu 7 tar-Regolament (KE) Nru 1927/2006, l-Italja kkonfermat li ġiet applikata politika ta’ ugwaljanza bejn in-nisa u l-irġiel kif ukoll ta’ nondiskriminazzjoni, u li din se tkompli tapplika matul l-istadji varji tal-implimentazzjoni tal-FEG u, b’mod partikolari, fir-rigward tal-aċċess għalih.

Deskrizzjoni tat-territorju kkonċernat u l-awtoritajiet u l-partijiet interessati tiegħu:

16.         It-territorju kkonċernat huwa l-Lombardia[11], li bi kważi 10 miljun abitant huwa l-aktar wieħed popolat mill-20 reġjun tal-Italja, u b’mod aktar speċifiku il-provinċji ta' Varese u Milan.

17.         L-awtoritajiet responsabbli huma l-Ministeru tax-Xogħol u l-Politika Soċjali fil-livell nazzjonali, u r-Reġjun tal-Lombardia fil-livell reġjonali (Direzione Generale Istruzione, Formazione e Lavoro), Milan. Il-partijiet interessati fuq in-naħa tal-impjegatur huma l-assoċjazzjonijiet li ġejjin: CLAAI (Federazione Regionale Lombarda delle Associazioni Artigiane), CNA Lombardia (Confederazione Nazionale dell’Artigianato e delle piccole e medie imprese), Confapindustria Lombardia, Confartigianato Lombardia, Confcommercio Lombardia-Imprese per l’Italia, Confcooperative Lombardia. Il-partijiet interessati li jirrappreżentaw il-ħaddiema: CGIL (Confederazione generale italiana del lavoro), CISL (Confederazione italiana sindacati lavoratori), UIL (Unione italiana del lavoro), CISAL (Confederazione Italiana Sindacati Autonomi Lavoratori).

L-impatt mistenni tas-sensji fir-rigward tal-impjiegi lokali, reġjonali jew nazzjonali

18.         Il-Lombardia hija reġjun l-aktar prosperuż, b’diversità ekonomika kbira[12] li hija sostnuta minn għadd kbir ta’ intrapriżi żgħar u ta’ daqs medju, iżda wkoll xi gruppi industrijali kbar. Madwar wieħed minn kull ħamsa tal-PDG Taljan huwa prodott f’dan ir-reġjun. Madankollu, peress li s-setturi tal-manifattura qegħdin jonqsu, ir-reġjun jeħtieġ jegħleb l-isfidi strutturali ewlenin, u, bħal f’lokalitajiet oħra, il-kriżi globali finanzjarja u ekonomika aggravat is-sitwazzjoni ekonomika u tas-suq tax-xogħol tiegħu. L-awtoritajiet Taljani indikaw li l-produzzjoni industrijali fil-Lombardia fl-2009 naqset b’9,4 %, u li l-effetti fuq is-suq tax-xogħol inħassu bħala konsegwenza diretta: fl-2009 l-impjiegi totali naqsu b’1,2 % u b’ 0,7 % fl-2010 (meta ġie nnutat irkupru fraġli). Skont l-ISTAT, ir-rata tal-qgħad fil-Lombardia ilha tiżdied mill-2008: 3,7 % fl-2008, 5,4 % fl-2009, 5,6 % fl-2010, 5,8 % fl-2011 u 7,5 % fl-2012.[13]

19.         Sabiex l-impatt tal-kriżi ekonomika u finanzjarja fuq nies li jaħdmu fis-settur tal-ICT fil-Lombardia jkun limitat, sar użu estensiv tax-xbieki ta’ sikurezza soċjali, bħalma huma l-fond għall-kumpens tal-pagi (CIG), strument li ilu stabbilit skont il-liġi Taljana li jista' jipprovdi benefiċċji finanzjarji lill-ħaddiema bħala kumpens ta’ pagamenti ta’ salarji, meta ċirkostanzi negattivi jkunu jeħtieġu dan. L-Italja pprovdiet it-tabella ta' hawn taħt biex turi ż-żieda fl-użu ta’ din l-iskema ta' assorbiment mill-bidu tal-kriżi: Fl-2009, in-numru ta' sigħat awtorizzati mill-awtoritajiet kien kważi tmien darbiet ogħla mill-għadd awtorizzat fl-2008, ħaġa li tirrifletti d-diffikultajiet tas-settur.

Total ta' sigħat ta' CIG awtorizzati fil-Lombardia fis-settur tal-ICT (NACE 26) Sors: INPS (Istituto Nazionale della Previdenza Sociale)

Total ta' sigħat: || 2005 || 2006 || 2007 || 2008 || 2009 || 2010

3.025.840 || 2.261.676 || 2.541.117 || 2.049.268 || 16.003.158 || 15.145.734

20.         Skont l-awtoritajiet Taljani, b’mod partikolari d-distrett industrijali Distretto Technologico di Milano (Vimercatese), fejn seħħew it-322 sensja ta’ Jabil CM S.r.l., qiegħed fi kriżi gravi. Fil-livelli nazzjonali, reġjonali u lokali, l-Italja qed tagħmel ħilitha biex tiżviluppa mill-ġdid u ssostni dan id-distrett f’termini ta’ volum ekonomiku u tax-xogħol. Miżuri kofinanzjati mill-FEG se jappoġġaw l-awtoritajiet Taljani f’dawn l-isforzi ta' żvilupp u trasformazzjoni.

21.         Fil-livell tan-NUTS II, il-Lombardia kienet affettwata wkoll minn mewġa kbira oħra ta’ sensji li fil-każ tagħhom tressqet applikazzjonijiet tal-FEG lill-Kummissjoni. 1 816 sensja f’190 intrapriża fis-settur tat-tessuti fl-2006/2007[14].

Il-pakkett ikkoordinat ta’ servizzi personalizzati li għandu jiġi finanzjat u analiżi tal-ispejjeż stmati tiegħu, inkluża l-kumplementarjetà tiegħu ma’ azzjonijiet iffinanzjati mill-Fondi Strutturali:

22.         Qed jiġu proposti t-tipi ta’ miżuri li ġejjin, li flimkien jiffurmaw pakkett ikkoordinat ta’ servizzi personalizzati mmirati lejn l-integrazzjoni mill-ġdid ta’ 480 ħaddiem identifikat lura f’impjieg. L-awtoritajiet Taljani speċifikaw li kwalunkwe taħriġ u t-taħriġ mill-ġdid ta’ ħaddiema għal ħiliet ġodda li jistgħu jkunu meħtieġa biex dawn iħejju għall-integrazzjoni mill-ġdid fis-suq tax-xogħol b’suċċess, se tkun iffinanzjata permezz ta’ sorsi reġjonali (għalhekk, l-ispejjeż għat-taħriġ u t-taħriġ mill-ġdid tal-ħaddiema għal ħiliet ġodda ma għandhomx jiġu kofinanzjati mill-FEG).

– Ammissjoni u aċċess għall-pakkett ta’ assistenza (accoglienza e accesso al servizio di assistenza): Informazzjoni u servizzi amministrattivi għall-ħaddiema li ngħataw is-sensja, inkluż l-iffirmar ta’ ftehimiet ta’ servizz.

– It-tekniki tal-intervisti (colloquio specialistico): Dawn jinkludu intervisti profondi mal-ħaddiema biex jiġu identifikati l-profili attwali tagħhom, issir identifikazzjoni ta’ perkors tal-possibbiltà tad-dħul mill-ġdid fix-xogħol u assistenza f’tekniki ta' mili tal-applikazzjonijiet għall-impjieg (aġġornament tas-CV).

– It-tfassil ta’ profili ta’ ħiliet (bilancio di competenze): Dan huwa sett ta’ għodod immirat biex janalizza l-esperjenzi professjonali u soċjali ta' kull ħaddiem u biex jiskopri kull kompetenza u għarfien utli, fid-dawl tal-ambizzjonijiet u x-xewqat tal-ħaddiema wkoll.

– Definizzjoni tal-perkors (definizione del percorso): Stabbiliment ta’ pjan ta' perkors professjonali personalizzat ta’ perkors li jistabbilixxi t-taħriġ individwali u l-ħtiġijiet għall-iżvilupp ta' kull ħaddiem. Il-pjan jiġi ffirmat mill-ħaddiem u l-fornitur tal-assistenza, bi ftehim tal-impenji rispettivi.

– Il-Monitoraġġ, il-koordinazzjoni u l-ġestjoni tal-pjan ta’ intervenzjoni personali (monitoraggio, coordinamento e gestione del piano di intervento personalizzato): Dan jinvolvi s-segwitu u l-monitoraġġ tal-appoġġ personalizzat skont il-pjan tal-perkors miftiehm. Il-miżuri miftehma jistgħu jiġu aġġustati jekk tinħass il-ħtieġa.

– Tutoring u gwida dwar ix-xogħol (tutoring e counselling orientativo): Dan jinkludi pariri dwar il-mekkaniżmi tas-suq tax-xogħol, jgħin fit-tħejjija tal-applikazzjonijiet għax-xogħol u l-akkumpanjament għal intervisti tax-xogħol.

– L-esplorazzjoni ta’ opportunitajiet ta’ xogħol ma’ impjegaturi ġodda (scouting aziendale): Dan jinkludi r-riċerka dwar opportunitajiet lokali u reġjonali ta’ impjieg, kuntatti ma’ impjegaturi potenzjali, għajnuna fil-valutazzjoni ta’ offerti ta’ xogħol, appoġġ permezz tal-proċess tal-għażla.

– It-tqabbil ta’ ħiliet mal-impjiegi (preselezione e incontro domanda offerta): Dan għandu l-għan li jqabbel id-domanda tas-suq tax-xogħol mal-ħiliet tal-ħaddiema bl-għajnuna ta’ dejtabejż speċjalizzat. Il-ħaddiema jirċievu gwida personalizzata dwar il-postijiet tax-xogħol vakanti u jingħataw għajnuna fil-proċess tal-applikazzjoni għal post tax-xogħol ġdid. Il-konsulenti jkomplu jiffaċilitaw il-kuntatti tal-ħaddiema ma' impjegaturi potenzjali u jipprovdu appoġġ sakemm jiġi ffirmat il-kuntratt tax-xogħol.

– Servizz ta’ mentoring matul l-ewwel fażi ta’ impjieg ġdid (accompagnamento al lavoro): L-għan ta’ din il-miżura huwa l-appoġġ għas-sostenibbiltà ta’ impjieg ġdid: il-ħaddiem u l-impjegatur il-ġdid jirċievu appoġġ fil-forma ta’ servizz ta’ mentoring matul l-ewwel fażi tal-kollokazzjoni fl-impjieg. Isir rapport dwar din il-kollokazzjoni li jiġi ffirmat mill-ħaddiem biex jgħin fl-iżgurar ta’ integrazzjoni mill-ġdid b’suċċess. L-awtoritajiet Taljani bbaġitjaw din il-miżura għall-ħaddiema kollha identifikati, ħaġa li tirrifletti l-importanza mogħtija lill-promozzjoni tas-sostenibbiltà ta’ kuntratti ġodda tax-xogħol.

– Pariri u appoġġ għal impjieg indipendenti (consulenza e supporto all'autoimprenditorialità): Dan jikkonsisti f’sett ta’ azzjonijiet immirati biex janalizzaw l-adegwatezza/l-attitudni tal-ħaddiema lejn ix-xogħol indipendenti u l-ħolqien ta’ negozju, l-istabbiliment ta’ pjan ta’ negozju, konsulenza relatata ma' kwistjonijiet prattiċi tal-bidu, l-identifikazzjoni ta’ opportunitajiet ta’ finanzjament.

– Tutoring u appoġġ matul it-traineeship (tutoring e accompagnamento al tirocinio): Appoġġ għall-ħaddiema u l-impjegaturi potenzjali matul it-traineeship .

23.         In-nefqa għall-implimentazzjoni tal-FEG, li hija inkluża fl-applikazzjoni, skont l-Artikolu 3 tar-Regolament (KE) Nru 1927/2006, tkopri attivitajiet ta’ tħejjija, ġestjoni u kontroll kif ukoll ta' informazzjoni u pubbliċità.

24.         Is-servizzi personalizzati ppreżentati mill-awtoritajiet Taljani huma miżuri attivi tas-suq tax-xogħol fi ħdan l-azzjonijiet eliġibbli ddefiniti fl-Artikolu 3 tar-Regolament (KE) Nru 1927/2006. L-awtoritajiet Taljani jikkalkulaw li l-ispejjeż totali ta’ dawn is-servizzi huma ta’ EUR 1 687 200 u li n-nefqa għall-implimentazzjoni tal-FEG hija ta' EUR 105 000 (5,9 % tal-ammont totali). Il-kontribuzzjoni totali mitluba mill-FEG hija ta’ EUR 1 164 930 (65 % tal-ispejjeż totali).

Azzjonijiet || Stima tal-għadd ta' ħaddiema identifikati || Stima tal-ispiża għal kull ħaddiem identifikat (EUR) || Spejjeż totali (FEG u l-kofinanzjament nazzjonali) (EUR)

Servizzi personalizzati (l-ewwel paragrafu tal-Artikolu 3 tar-Regolament (KE) Nru 1927/2006)

Ammissjoni u aċċess għall-pakkett ta’ assistenza (Accoglienza e accesso al servizio di assistenza) || 480 || 33 || 15 840

Tekniki tal-intervisti (Colloquio specialistico) || 480 || 66 || 31 680

It-tfassil ta’ profili ta’ ħiliet (bilancio di competenze) || 480 || 330 || 158 400

Definizzjoni tal-perkors (definizione del percorso) || 480 || 78 || 37 440

Monitoraġġ, koordinazzjoni u ġestjoni pjan ta’ intervent personali (monitoraggio, coordinamento e gestione del piano di intervento personalizzato) || 480 || 216 || 103 680

Tutoring u gwida dwar ix-xogħol (tutoring E pariri orientativo) || 480 || 155 || 74 400

Esplorazzjoni ta’ opportunitajiet ta’ xogħol ma’ impjegaturi ġodda (scouting aziendale) || 480 || 648 || 311 040

Tqabbil ta’ ħiliet mal-impjiegi (Preselezione e incontro domanda offerta) || 480 || 693 || 332 640

Servizz ta’ mentoring matul l-ewwel fażi ta’ impjieg ġdid (accompagnamento al lavoro) || 480 || 528 || 253 440

Pariri u appoġġ għal impjieg indipendenti (Consulenza e supporto all'autoimprenditorialità) || 273 || 768 || 209 664

Tutoring u appoġġ matul it-traineeship (Tutoring e accompagnamento al tirocinio) || 207 || 768 || 158 976

Subtotal tas-servizzi personalizzati || || 1 687 200

Nefqa għall-implimentazzjoni tal-FEG (it-tielet paragrafu tal-Artikolu 3 tar-Regolament (KE) Nru 1927/2006)

Attivitajiet preparatorji || || 15 000

Ġestjoni || || 40 000

Informazzjoni u pubbliċità || || 15 000

Attivitajiet ta’ kontroll || || 35 000

Subtotal tan-nefqa għall-implimentazzjoni tal-FEG || || 105 000

Total tal-istima tal-ispejjeż || || 1 792 200

Kontribut tal-EGF (65 % tal-ispejjeż totali) || || 1 164 930

25.         L-Italja tikkonferma li l-miżuri deskritti hawn fuq jikkumplimentaw l-azzjonijiet iffinanzjati mill-Fondi Strutturali u li mhux se jitħalla jsir iffinanzjar doppju. Xi miżuri kkofinanzjati mill-FEG, eż. fil-qasam tal-promozzjoni tal-intraprenditorija, ma setgħux jiġu ffinanzjati mill-Fond Soċjali Ewropew (FSE).

Id-data/i li fiha/fihom inbdew jew huwa maħsub li jinbdew is-servizzi personalizzati lill-ħaddiema affettwati

26.         L-Italja bdiet is-servizzi personalizzati għall-ħaddiema affettwati li huma inklużi fil-pakkett ikkoordinat propost lill-FEG għall-kofinanzjament fl-1 ta’ Marzu 2012. Għaldaqstant, din id-data tirrappreżenta l-bidu tal-perjodi ta' eliġibbiltà għal kull għajnuna li tista' tingħata mill-FEG.

Proċeduri għall-konsultazzjoni mas-sħab soċjali

27.         Skont l-awtoritajiet Taljani, saru diskussjonijiet mas-sħab soċjali f’diversi okkażjonijiet fil-livell reġjonali, inklużi l-avvenimenti li ġejjin. it-3 ta' Frar 2012: L-Agenzia Regionale Istruzione, Formazione e Lavoro (ARIFEL) iltaqgħet ma' rappreżentanti tal-impjegaturi u tal-ħaddiema sabiex jiddiskutu l-possibbiltà li jinħoloq grupp ta’ ħidma ta' "intrapriża soċjali" għall-ħaddiema ta’ Anovo Italia S.p.A (li ma rriżultaw fl-ebda l-ftehim); il-15 ta' Frar 2012; laqgħa tal-"grupp ewlieni dwar il-kriżi" tar-reġjun (Note Verbale[15]); is-17 ta' Frar 2012; laqgħa tar-round table tal-ICT reġjonali b'rappreżentanti tal-impjegaturi u l-ħaddiema u r-Regione Lombardia (Note Verbale[16]).

28.         L-awtoritajiet Taljani kkonfermaw li kien hemm konformità mar-rekwiżiti stipulati fil-leġiżlazzjoni nazzjonali u f’dik tal-UE dwar is-sensji kollettivi.

Informazzjoni dwar azzjonijiet li huma obbligatorji skont il-liġi nazzjonali jew il-ftehimiet kollettivi

29.         Fir-rigward tal-kriterji li jinsabu fl-Artikolu 6 tar-Regolament (KE) Nru 1927/2006, l-awtoritajiet Taljani fl-applikazzjoni tagħhom:

· ikkonfermaw li l-kontribuzzjoni finanzjarja mill-FEG ma tiħux post il-miżuri li huma r-responsabbiltà ta' kumpaniji skont il-liġi nazzjonali jew il-ftehimiet kollettivi;

· urew li l-azzjonijiet jipprovdu appoġġ għal ħaddiema individwali u ma għandhomx jintużaw għar-ristrutturazzjoni ta' kumpaniji jew setturi;

· ikkonfermaw li l-azzjonijiet eliġibbli msemmija hawn fuq ma jirċevux għajnuna minn strumenti finanzjarji oħra.

Ġestjoni u sistemi ta’ kontroll

30.         L-Italja nnotifikat lill-Kummissjoni li l-kontribut finanzjarju se jkun ġestit fil-livell nazzjonali mill-Ministerio del Lavoro e delle Politiche Sociali/Direzione Generale per le Politiche Attive e Passive del Lavoro (MLPS – DG PAPL). MLPS – DG PAPL Ufficio A qed jaġixxi bħala awtorità ta’ ġestjoni; MLPS – DG PAPL Ufficio B bħala l-awtorità ta’ ċertifikazzjoni u MLPS – DG PAPL Ufficio C bħala l-awtorità tal-awditjar). Ir-reġjun tal-Lombardia se jkun l-entità intermedjarja għall-awtorità ta’ ġestjoni fil-livell reġjonali. Fl-applikazzjoni tagħha tal-FEG l-Italja ddeskriviet (fil-Parti I) pjan dettaljat ta’ sistema ta’ ġestjoni u kontroll li jispeċifika r-responsabbiltajiet rispettivi tal-atturi involuti fil-livelli nazzjonali u reġjonali.

Finanzjament

31.         Fuq il-bażi tal-applikazzjoni mill-Italja, il-kontribut propost mill-FEG għall-pakkett ikkoordinat ta’ servizzi personalizzati (inkluża n-nefqa biex jiġi implimentat il-FEG) huwa ta’ EUR 1 164 930, li jirrappreżenta 65 % tal-ispiża totali. L-allokazzjoni proposta mill-Kummissjoni minn dan il-Fond hija bbażata fuq l-informazzjoni li ngħatat mill-Italja.

32.         Filwaqt li tqis l-ammont massimu possibbli ta’ kontribuzzjoni finanzjarja mill-FEG skont l-Artikolu 10(1) tar-Regolament (KE) Nru 1927/2006, kif ukoll il-kamp ta’ applikazzjoni tal-allokazzjoni mill-ġdid ta’ approprjazzjonijiet, il-Kummissjoni tipproponi li l-FEG jiġi mobilizzat għall-ammont totali msemmi hawn fuq, li għandu jiġi allokat skont l-intestatura 1a tal-qafas finanzjarju.

33.         L-ammont propost ta' kontribut finanzjarju se jħalli aktar minn 25 % tal-ammont massimu annwali ddestinat għall-FEG disponibbli għall-allokazzjonijiet matul l-aħħar erba' xhur tas-sena, kif mitlub fl-Artikolu 12(6) tar-Regolament (KE) Nru 1927/2006.

34.         Permezz tal-preżentazzjoni ta’ din il-proposta għall-mobilizzazzjoni tal-FEG, il-Kummissjoni qed tibda l-proċedura ssimplifikata ta’ trijalogu, kif mitlub mill-Punt 28 tal-Ftehim Interistituzzjonali tas-17 ta’ Mejju 2006, bl-għan li tiżgura l-qbil taż-żewġ fergħat tal-awtorità baġitarja dwar il-ħtieġa li jintuża l-FEG u l-ammont meħtieġ. Il-Kummissjoni tistieden lill-ewwel waħda miż-żewġ fergħat tal-awtorità baġitarja li tilħaq ftehim dwar l-abbozz tal-proposta tal-mobilizzazzjoni, fil-livell politiku xieraq, biex tinforma lill-fergħa l-oħra u lill-Kummissjoni dwar l-intenzjonijiet tagħha. F’każ ta’ nuqqas ta’ qbil minn xi waħda miż-żewġ fergħat tal-awtorità baġitarja, għandha tissejjaħ laqgħa formali ta’ trijalogu.

35.         B’mod separat, il-Kummissjoni tippreżenta talba ta' trasferiment sabiex fil-baġit għall-2013 iddaħħal approprjazzjonijiet speċifiċi għall-impenji, kif mitlub mill-Punt 28 tal-Ftehim Interistituzzjonali tas-17 ta' Mejju 2006.

Sors tal-approprjazzjonijiet ta’ pagamenti

36.         Se jintużaw approprjazzjonijiet mil-linja baġitarja tal-FEG tal-baġit tal-2013 biex ikopru l-ammont ta’ EUR 1 164 930 meħtieġ għal din l-applikazzjoni.

Proposta għal

DEĊIŻJONI TAL-PARLAMENT EWROPEW U TAL-KUNSILL

dwar il-mobilizzazzjoni tal-Fond Ewropew ta’ Aġġustament għall-Globalizzazzjoni, skont il-punt 28 tal-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba (applikazzjoni EGF/2011/025 IT/Lombardia mill-Italja)

IL-PARLAMENT EWROPEW U L-KUNSILL TAL-UNJONI EWROPEA,

Wara li kkunsidraw it-Trattat dwar il-Funzjonament tal-Unjoni Ewropea,

Wara li kkunsidraw il-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba[17], u b’mod partikolari l-punt 28 tiegħu,

Wara li kkunsidraw ir-Regolament (KE) Nru 1927/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-Fond Ewropew ta' Aġġustament għall-Globalizzazzjoni[18], u b'mod partikolari l-Artikolu 12(3) tiegħu,

Wara li kkunsidraw il-proposta mingħand il-Kummissjoni Ewropea[19],

Billi:

(1)       Il-Fond Ewropew ta' Aġġustament għall-Globalizzazzjoni (FEG) twaqqaf biex jipprovdi appoġġ addizzjonali għall-ħaddiema ssensjati minħabba bidliet strutturali kbar fl-andament tal-kummerċ dinji minħabba l-globalizzazzjoni u biex jgħinhom fl-integrazzjoni mill-ġdid tagħhom fis-suq tax-xogħol;

(2)       Il-kamp ta’ applikazzjoni tal-FEG twessa’ għall-applikazzjonijiet imressqa mill-1 ta’ Mejju 2009 sat-30 ta’ Diċembru 2011 biex jinkludi appoġġ għall-ħaddiema li jingħataw is-sensja b’riżultat dirett tal-kriżi finanzjarja u ekonomika globali.

(3)       Il-Ftehim Interistituzzjonali tas-17 ta’ Mejju 2006 jippermetti l-mobilizzazzjoni tal-FEG fil-limitu massimu annwali ta’ EUR 500 miljun.

(4)       L-Italja ressqet applikazzjoni biex timmobilizza l-FEG, fir-rigward tas-sensji f'żewġ (2) intrapriżi li joperaw fid-Diviżjoni 26 tan-NACE Reviżjoni 2 ("Manifattura ta' prodotti tal-kompjuter, elettroniċi u ottiċi") fir-reġjun NUTS II tal-Lombardia (ITC4), fit-30 ta' Diċembru 2011 u ssupplimentatha b'informazzjoni addizzjonali sat-12 ta' Marzu 2013. Din l-applikazzjoni hija konformi mar-rekwiżiti għad-determinazzjoni tal-kontribuzzjonijiet finanzjarji kif stabbilit fl-Artikolu 10 tar-Regolament (KE) Nru 1927/2006. Il-Kummissjoni, għalhekk, ressqet proposta biex timmobilizza l-ammont ta’ EUR 1 164 930.

(5)       Il-FEG għandu, għalhekk, jiġi mmobilizzat sabiex jipprovdi kontribuzzjoni finanzjarja għall-applikazzjoni ppreżentata mill-Italja,

ADOTTAW DIN ID-DEĊIŻJONI:

Artikolu 1

Għall-baġit ġenerali tal-Unjoni Ewropea għas-sena finanzjarja 2013, il-Fond Ewropew ta' Aġġustament għall-Globalizzazzjoni (FEG) għandu jiġi mobilizzat biex jipprovdi s-somma ta' EUR 1 164 930 f'approprjazzjonijiet ta' impenn u ta' pagamenti.

Artikolu 2

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

Magħmul fi Brussell,

Għall-Parlament Ewropew                           Għall-Kunsill

Il-President                                                    Il-President

[1]               ĠU C 139, 14.6.2006, p. 1.

[2]               ĠU L 406, 30.12.2006, p. 1.

[3]               Ir-Regolament (KE) Nru 1893/2006 tal-Parlament Ewropew u tal-Kunsill tal-20 ta' Diċembru 2006 li jistabbilixxi l-klassifikazzjoni tal-istatistika ta' attivitajiet ekonomiċi tan-NACE Reviżjoni 2 u li jemenda r-Regolament tal-Kunsill (KEE) Nru 3037/90 kif ukoll ċerti Regolamenti tal-KE dwar setturi speċifiċi tal-istatistika (ĠU L 393, 30.12.2006, p. 1).

[4]               Skont it-tielet paragrafu tal-Artikolu 3 tar-Regolament (KE) Nru 1927/2006.

[5]               Is-settur NACE 26 jinkludi varjetà ta' attivitajiet, inklużi l-manifattura ta’ prodotti tal-kompjuter, elettroniċi u ottiċi u tagħmir elettriku, strumenti tal-kejl, arloġġi tal-idejn u arloġġi kif ukoll ta’ attivitajiet ta’ servizzi relatati mal-produzzjoni ta’ softwer, konsulenza u attivitajiet relatati.

[6]               Is-sorsi kkwotati mill-Italja: Assinform – L-Assoċjazzjoni Taljana tat-Teknoloġiji tal-Informazzjoni u tal-Komunikazzjoni (www.assinform.it); Ir-rapport tal-2009 tal-Osservatorio ICT & PMI della School of Management del Politecnico di Milano (www.osservatori.net); ISTAT (http://www.istat.it/).

[7]               COM(2013) 120 finali.

[8]               COM(2010) 685 finali.

[9]               Aktar informazzjoni dwar l-applikazzjonijiet tal-FEG skont is-setturi tinstab fl-Istampa Statistika tal-FEG 2007-2011 u fl-aġġornamenti ta' wara, disponibbli fuq http://ec.europa.eu/egf.

[10]             Anovo S.A., li twaqqfet fl-1987, kienet tħaddem madwar 20 uffiċċju fl-Ewropa kollha, kif ukoll fl-Amerika t’Isfel u l-Amerika Ċentrali. L-intrapriża Franċiża bdiet il-likwidazzjoni fl-2011.

[11]             Ir-reġjun NUTS II fit-tramuntana tal-Italja (il-kapitali tar-reġjun: Milan)

[12]    Jinkludu setturi tal-manifattura, bħal dawk mekkaniċi, tal-elettriku, tal-metall, kimiċi, tal-ikel, kif ukoll setturi tas-servizzi, bħal dawk bankarji, tat-trasport, tal-komunikazzjoni.

[13]             http://www.bancaditalia.it/pubblicazioni/econo/ecore/2010/analisi_s_r/1046_lombardia/Lombardia_2009.pdf; http://www.istat.it/it/lombardia

[14]             EGF/2007/007 IT/Lombardia, ĠU L 330, 9.12.2008.

[15]             https://arifl.box.com/s/d9994b938ecb153700d7

[16]             https://arifl.box.com/s/ea34733bb72d514b5404

[17]             ĠU C 139, 14.6.2006, p. 1.

[18]             ĠU L 406, 30.12.2006, p. 1.

[19]             ĠU C […], […], p. […].