MEMORANDUM TA’ SPJEGAZZJONI

Fit-23 ta’ Ġunju 2000, il-membri tal-grupp ta’ Stati Afrikani, tal-Karibew u tal-Paċifiku (minn issa ’l quddiem imsejħin "l-Istati tal-AKP"), min-naħa l-waħda, u l-Komunità Ewropea u l-Istati Membri tagħha, min-naħa l-oħra, iffirmaw f'Cotonou (il-Benin) Ftehim ta’ Sħubija (minn issa ’l quddiem imsejjaħ "il-Ftehim ta' Cotonou").

Fil-25 ta’ Ġunju 2005, fil-Lussemburgu, l-Istati tal-AKP u l-Komunità Ewropea u l-Istati Membri tagħha ffirmaw ftehim li jemenda l-Ftehim ta' Cotonou. Il-ftehim emendat ta’ Cotonou daħal fis-seħħ fl-1 ta' Lulju 2008, b’konformità mal-Artikolu 93(3) tiegħu, wara li r-reviżjoni tiegħu ġiet irratifikata mill-Komunità Ewropea u mill-Istati Membri tagħha kif ukoll minn żewġ terzi tal-Istati tal-AKP.

Fit-22 ta’ Ġunju 2010, f'Ouagadougou, l-Istati tal-AKP u l-Unjoni Ewropea ffirmaw Ftehim li jemenda, għat-tieni darba, il-Ftehim tal-Cotonou, li ilu jiġi applikat b’mod provviżorju sa mill-31 ta’ Ottubru 2010.

F’ittra bid-data tal-25 ta’ Frar 2013 mibgħuta lill-UE Rappreżentant Għoli/Viċi President Catherine Ashton, u l-President tal-Kunsill tal-AKP u l-UE, mingħand is-Segretarjat Ġenerali tal-Kunsill tal-Unjoni Ewropea, il-Ministru tal-Affarijiet Barranin u l-Kooperazzjoni Internazzjonali tar-Repubblika Federali tas-Somalja, l-E.T. Fawzia Yusuf Adam, talab formalment l-istatus ta' osservatur u sussegwentament l-adeżjoni għall-Ftehim ta’ Cotonou skont id-dispożizzjonijiet tal-Artikolu 94 tal-Ftehim. L-Unjoni Ewropea mistennija li twieġeb b’mod favorevoli għal dawn it-talbiet, li għandhom jiġu approvati permezz ta’ deċiżjoni formali tal-Kunsill Konġunt tal-Ministri tal-Istati tal-AKP u l-UE matul il-laqgħa li se jkollhom fi Brussell fis-6 u fis-7 ta' Ġunju 2013.

Il-Parlament Ewropew se jiġi infurmat b’konformità mal-Artikolu 218(10) tat-Trattat dwar il-Funzjonament tal-Unjoni Ewropea.

Għalhekk, il-Kummissjoni tipproponi li l-Kunsill jadotta l-proposta hawn mehmuża għal pożizzjoni tal-UE dwar l-istatus tar-Repubblika Federali tas-Somalja fir-rigward tal-Ftehim emendat ta’ Cotonou.

2013/0145 (NLE)

Proposta għal

DEĊIŻJONI TAL-KUNSILL

dwar il-pożizzjoni li għandha tittieħed mill-Unjoni Ewropea fil-Kunsill tal-Ministri AKP u tal-UE dwar l-istatus tar-Repubblika Federali tas-Somalja fir-rigward tal-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 217 meħud flimkien mal-Artikolu 218(9) tiegħu,

Wara li kkunsidra l-proposta mill-Kummissjoni Ewropea,

Billi:

(1)       Il-Ftehim ta’ Sħubija bejn il-membri tal-grupp ta’ Stati Afrikani, tal-Karibew u tal-Paċifiku, minn banda waħda, u l-Komunità Ewropea u l-Istati Membri tagħha, min-naħa l-oħra, iffirmat f'Cotonou fit-23 ta’ Ġunju 2000[1], kif emendat għall-ewwel darba fil-Lussemburgu fil-25 ta' Ġunju 2005[2] (minn issa ’l quddiem imsejjaħ "il-Ftehim ta' Cotonou"), daħal fis-seħħ fl-1 ta’ Lulju 2008 skont l-Artikolu 93(3) tiegħu. Il-Ftehim ta’ Cotonou ġie emendat għat-tieni darba f’Ouagadougou fit-22 ta’ Ġunju 2010[3]. It-tieni emenda tal-Ftehim ta’ Cotonou ilha tiġi applikata b’mod provviżorju mill-31 ta’ Ottubru 2010[4].

(2)       L-Artikolu 94 tal-Ftehim ta’ Cotonou jistipula li kwalunkwe talba li ssir minn Stat biex jissieħeb għandha tiġi ppreżentata lill-Kunsill tal-Ministri tal-AKP u l-UE, biex dan japprovaha.

(3)       Fil-25 ta’ Frar 2013, ir-Repubblika Federali tas-Somalja ppreżentat talba ta’ adeżjoni skont l-Artikolu 94 tal-Ftehim ta’ Cotonou.

(4)       L-approvazzjoni tal-adeżjoni tas-Somalja mill-Kunsill tal-Ministri tal-AKP u l-UE għandha tkun appoġġjata mill-Unjoni Ewropea, ir-Repubblika Federali tas-Somalja għandha tiddepożita l-Att ta’ Adeżjoni tagħha fis-Segretarjat Ġenerali tal-Kunsill tal-Unjoni Ewropea u s-Segretarjat tal-Istati AKP, Depożitarji tal-Ftehim.

(5)       Għalhekk, huwa xieraq li tiġi stabbilita l-pożizzjoni li għandha tkun adottata mill-UE fil-Kunsill tal-Ministri tal-AKP u l-UE,

ADOTTA DIN ID-DEĊIŻJONI:

Artikolu Uniku

Il-pożizzjoni tal-Unjoni Ewropea fil-Kunsill tal-Ministri tal-AKP u l-UE dwar il-kwistjoni tat-talba tar-Repubblika Federali tas-Somalja għall-istatus ta' osservatur u sussegwentament l-adeżjoni mal-Ftehim ta’ Cotonou, kif emendat fil-Lussemburgu u f'Ouagadougou, hija li taċċetta din it-talba skont il-patti tal-abbozz tad-Deċiżjoni tal-Kunsill tal-Ministri tal-AKP u l-UE, li huma annessi ma’ din id-deċiżjoni.

Jista’ jintlaħaq qbil dwar tibdiliet formali u minuri għall-abbozz tad-Deċiżjoni tal-Kunsill tal-Ministri tal-AKP u tal-UE annessa mingħajr il-ħtieġa li tiġi emendata d-Deċiżjoni preżenti.

Magħmul fi Brussell,

                                                                       Għall-Kunsill

                                                                       Il-President

ANNESS

Abbozz Deċiżjoni Nru…/….

TAL-KUNSILL TAL-MINISTRI TAL-ISTATI TAL-AKP U L-UE

ta' ...... dwar l-istatus ta' osservatur u l-adeżjoni sussegwenti tar-Repubblika Federeali tas-Somalja għall-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra

IL-KUNSILL TAL-MINISTRI TA’ BEJN L-ISTATI TAL-AKP U L-UE,

Wara li kkunsidra l-Ftehim ta’ Sħubija bejn il-membri tal-grupp ta’ Stati Afrikani, tal-Karibew u tal-Paċifiku, min-naħa l-waħda, u l-Komunità Ewropea u l-Istati Membri tagħha, min-naħa l-oħra, iffirmat f'Cotonou fit-23 ta’ Ġunju 2000[5], kif emendat għall-ewwel darba fil-Lussemburgu fil-25 ta' Ġunju 2005[6] u għat-tieni darba f'Ouagadougou fit-22 ta' Ġunju 2010[7] (minn issa ’l quddiem imsejjaħ "il-Ftehim ta' Cotonou"), u b'mod partikolari l-Artikolu 94 tiegħu,

Wara li kkunsidra d-Deċiżjoni Nru 1/2005 tat-8 ta' Marzu 2005 tal-Kunsill tal-Ministri tal-Istati tal-AKP u l-UE dwar l-adozzjoni tar-Regoli ta’ Proċedura tal-Kunsill tal-Ministri tal-AKP u l-UE [8] u, b'mod partikolari, l-Artikolu 8(2) tagħha,

Billi

(1)          Il-Ftehim ta’ Cotonou daħal fis-seħħ fl-1 ta’ Lulju 2008 skont l-Artikolu 93(3) tiegħu. Ġie emendat għall-ewwel darba fil-Lussemburgu fil-25 ta’ Ġunju 2005, u għat-tieni darba f’Ouagadougou fil-22 ta’ Ġunju 2010. It-tieni reviżjoni ilha tiġi applikata b’mod provviżorju sa mill-31 ta’ Ottubru 2010[9].

(2)          L-Artikolu 94 tal-Ftehim ta’ Cotonou jistipula li kwalunkwe talba li ssir minn Stat biex jissieħeb għandha tiġi ppreżentata lill-Kunsill tal-Ministri tal-AKP u l-UE, biex dan japprovaha.

(3)          Fil-25 ta’ Frar 2013, ir-Repubblika Federali tas-Somalja ppreżentat talba għall-istatus ta' osservatur u l-adeżjoni sussegwenti skont l-Artikolu 94 tal-Ftehim ta’ Cotonou.

(4)          Ir-Repubblika Federali tas-Somalja għandha tiddepożita l-Att ta' Adeżjoni għand id-Depożitarji tal-Ftehim ta' Cotonou, jiġifieri s-Segretarjat Ġenerali tal-Kunsill tal-Unjoni Ewropea u s-Segretarjat tal-Istati tal-AKP.

IDDEĊIEDA KIF ĠEJ:

Artikolu 1 Approvazzjoni tat-talbiet għas-sħubija u għall-istatus ta’ osservatur

It-talba tar-Repubblika Federali tas-Somalja biex tissieħeb fil-Ftehim ta' Sħubija bejn il-membri tal-Grupp ta' Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra, iffirmat f'Cotonou fit-23 ta' Ġunju 2000, kif emendat għall-ewwel darba fil-Lussemburgu fil-25 ta' Ġunju 2005 u kif emendat għat-tieni darba f'Ouagadougou fit-22 ta' Ġunju 2010, hija b'dan approvata.

Ir-Repubblika Federali tas-Somalja tiddepożita l-Att ta' Adeżjoni għand id-Depożitarji tal-Ftehim, jiġifieri s-Segretarjat Ġenerali tal-Kunsill tal-Unjoni Ewropea u s-Segretarjat tal-Istati tal-AKP.

Sad-data tal-adeżjoni tagħha, ir-Repubblika Federali tas-Somalja tista' tattendi s-sessjonijiet tal-Kunsill bħala osservatur.

Artikolu 2 Id-dħul fis-seħħ

Din id-Deċiżjoni tidħol fis-seħħ ġurnata wara li tiġi adottata.

Magħmul fi,

            Għall-Kunsill tal-Ministri AKP-UE             Il-President

[1]               ĠU L 317, 15.12.2000, p. 3.

[2]               Ftehim li jemenda l-ftehim ta’ sħubija bejn il-membri tal-grupp ta’ Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra, iffirmat f’Cotonou fit-23 ta’ Ġunju 2000 (ĠU L 209, 11.8.2005, p. 27).

[3]               Ftehim li jemenda għat-tieni darba l-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra, iffirmat f’Cotonou fit-23 ta’ Ġunju 2000, kif emendat għall-ewwel darba fil-Lussemburgu fil-25 ta’ Ġunju 2005 (ĠU L 287, 4.11.2010, p. 3).

[4]               Id-Deċiżjoni Nru 2/2010 tal-Kunsill tal-Ministri AKP-UE tal-21 ta' Ġunju 2010, ĠU L 287, 4.11.2010, p.68.

[5]               ĠU KE L 317, 15.12.2000, p. 3.

[6]               Ftehim li jemenda l-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra, iffirmat f’Cotonou fit-23 ta’ Ġunju 2000 (ĠU L 209, 11.8.2005, p. 27).

[7]               Ftehim li jemenda għat-tieni darba l-Ftehim ta’ Sħubija bejn il-membri tal-Grupp ta’ Stati Afrikani, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra, iffirmat f’Cotonou fit-23 ta’ Ġunju 2000, kif emendat għall-ewwel darba fil-Lussemburgu fil-25 ta’ Ġunju 2005 (ĠU UE L 287, 4.11.2010, p. 3).

[8]               ĠU UE L 95, 14.4.2005, p. 44

[9]               Id-Deċiżjoni Nru 2/2010 tal-Kunsill tal-Ministri AKP-UE tal-21 ta' Ġunju 2010, ĠU L 287, 4.11.2010, p.68.