MEMORANDUM TA’ SPJEGAZZJONI

1.           KUNTEST TAL-PROPOSTA

Raġunijiet u għanijiet tal-proposta

Din il-proposta tikkonċerna l-applikazzjoni tar-Regolament tal-Kunsill (KE) Nru 1225/2009 tat-30 ta' Novembru 2009 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea ('ir-Regolament bażiku') fl-investigazzjoni dwar il-possibbiltà ta' evażjoni tal-miżuri tal-antidumping imposti mir-Regolament ta' Implimentazzjoni tal-Kunsill (UE) Nru 990/2011 dwar l-importazzjonijiet ta' biċikletti kkonsenjati mill-Indoneżja, il-Malasja, is-Sri Lanka u t-Tuneżija, kemm jekk iddikjarati li joriġinaw fl-Indoneżja, il-Malasja, is-Sri Lanka u t-Tuneżija, kif ukoll jekk le.

Kuntest ġenerali Din il-proposta qed issir fil-kuntest tal-implimentazzjoni tar-Regolament bażiku u hija r-riżultat ta' investigazzjoni li twettqet skont ir-rekwiżiti sostantivi u proċedurali stipulati fir-Regolament bażiku u b’mod partikolari fl-Artikolu 13 tiegħu.

Dispożizzjonijiet eżistenti fil-qasam tal-proposta Il-miżuri fis-seħħ attwalment kienu imposti mir-Regolament ta’ Implimentazzjoni tal-Kunsill (UE) Nru 990/2011 li jimponi dazju antidumping definittiv fuq importazzjonijiet ta’ roti li joriġinaw mir-Repubblika Popolari taċ-Ċina.

Konsistenza mal-bqija tal-politiki u l-għanijiet tal-Unjoni Mhux applikabbli.

2.           IR-RIŻULTATI TAL-KONSULTAZZJONIJIET MAL-PARTIJIET INTERESSATI U TAL-VALUTAZZJONIJIET TAL-IMPATT

Konsultazzjoni mal-partijiet interessati

Il-partijiet interessati kkonċernati mill-proċediment kellhom il-possibbiltà jiddefendu l-interessi tagħhom matul l-investigazzjoni, skont id-dispożizzjonijiet tar-Regolament bażiku.

Ġbir u użu ta’ għarfien espert

Ma kienx hemm bżonn ta’ għarfien espert estern.

Valutazzjoni tal-impatt Din il-proposta tirriżulta mill-implimentazzjoni tar-Regolament bażiku. Ir-Regolament bażiku ma jipprevedix valutazzjoni ġenerali tal-impatt iżda fih lista eżawrjenti ta' kundizzjonijiet li jridu jiġu vvalutati.

3.           ELEMENTI LEGALI TAL-PROPOSTA

Sommarju tal-azzjoni proposta Il-proposta mehmuża għal Regolament ta’ Implimentazzjoni tal-Kunsill hija bbażata fuq dak li ħareġ mill-investigazzjoni, li kkonfermat li t-trażbord ta’ biċikletti mill-RPĊ u l-immuntar tal-biċikletti bl-użu ta’ partijiet Ċiniżi fl-Indoneżja, il-Malasja, is-Sri Lanka u t-Tuneżija qed iseħħ u li l-kriterji kollha li jistabbilixxu każ ta’ evażjoni kif stabbilit fl-Artikolu 13(1) u (2) tar-Regolament bażiku ġew issodisfati. Għaldaqstant, il-miżuri antidumping fis-seħħ dwar il-biċikletti li joriġinaw fir-RPĊ għandhom jiġu estiżi għal importazzjonijiet tal-istess prodott ikkunsinjati mill-Indoneżja, il-Malasja, is-Sri Lanka u t-Tuneżija. Huwa għalhekk propost li l-Kunsill jadotta l-proposta mehmuża sabiex jiġu estiżi l-miżuri anti-dumping fuq biċikletti li joriġinaw fir-RPĊ għall-importazzjonijiet tal-istess prodott ikkunsinjat mill-Indoneżja, il-Malasja, is-Sri Lanka u t-Tuneżija. Id-dazju jikkorrispondi mad-dazju għall-pajjiż kollu fuq importazzjonijiet ta' biċikletti mir-RPĊ (48,5%). Id-dazju għandu jiġi impost mid-data tat-tnedija tal-investigazzjoni. Ir-Regolament tal-Kunsill rilevanti għandu jiġi ppubblikat f’Il-Ġurnal Uffiċjali tal-Unjoni Ewropea mhux aktar tard mill-5 ta' Ġunju 2013.

Bażi ġuridika Ir-Regolament tal-Kunsill (KE) Nru 1225/2009 tat-30 ta' Novembru 2009 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea u b'mod partikolari l-Artikolu 13 tiegħu.

Il-prinċipju tas-sussidjarjetà Il-proposta taqa' taħt il-kompetenza esklussiva tal-Unjoni. Għalhekk, il-prinċipju tas-sussidjarjetà ma japplikax.

Il-prinċipju tal-proporzjonalità Il-proposta hija konformi mal-prinċipju tal-proporzjonalità għal dawn ir-raġunijiet:

Il-forma tal-azzjoni hija deskritta fir-Regolament bażiku msemmi hawn fuq u ma tħalli ebda spazju għal deċiżjoni nazzjonali.

Mhijiex applikabbli indikazzjoni ta' kif il-piż finanzjarju u amministrattiv li jaqa' fuq l-Unjoni, il-gvernijiet nazzjonali, l-awtoritajiet reġjonali u lokali, l-operaturi ekonomiċi u ċ-ċittadini qed jiġi mminimizzat u huwa proporzjonali għall-għan tal-proposta.

Għażla tal-istrumenti

Strumenti proposti: Regolament.

Mezzi oħra ma jkunux adegwati għar-raġuni li ġejja: Ir-Regolament bażiku msemmi hawn fuq ma jipprevedix għażliet alternattivi.

4.           IMPLIKAZZJONI BAĠITARJA

Il-proposta ma għandha l-ebda implikazzjoni għall-baġit tal-Unjoni.

2013/0135 (NLE)

Proposta għal

REGOLAMENT TA’ IMPLIMENTAZZJONI TAL-KUNSILL

li jestendi d-dazju anti-dumping definittiv impost mir-Regolament ta’ implimentazzjoni tal-Kunsill (UE) Nru 990/2011 fuq importazzjonijiet ta’ biċikletti li joriġinaw mir-Repubblika Popolari taċ-Ċina għal importazzjonijiet ta’ biċikletti kkunsinjati mill-Indoneżja, mill-Malasja, mis-Sri Lanka u mit-Tuneżija, kemm jekk iddikjarati bħala li joriġinaw fl-Indoneżja, il-Malasja, is-Sri Lanka u t-Tuneżija kif ukoll jekk le

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament tal-Kunsill (KE) Nru 1225/2009 tat-30 ta’ Novembru 2009 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea[1] ("ir-Regolament bażiku"), u b’mod partikolari l-Artikolu 13 tiegħu,

Wara li kkunsidra l-proposta mressqa mill-Kummissjoni Ewropea (“il-Kummissjoni”) wara li kkonsultat mal-Kumitat Konsultattiv,

Billi:

1.           PROĊEDURA

1.1.        Miżuri eżistenti

(1)       Bir-Regolament (KEE) nru 2474/93[2], il-Kunsill impona dazju definittiv anti-dumping ta' 30,6% fuq l-importazzjoni ta’ biċikletti li joriġinaw mir-Repubblika Popolari taċ-Ċina ("ir-RPĊ"). Wara investigazzjoni dwar l-evażjoni skont l-Artikolu 13 tar-Regolament bażiku, dan id-dazju ġie estiż bir-Regolament tal-Kunsill (KE) Nru 71/97[3] għall-importazzjonijiet ta' ċertu komponenti ta' biċikletti li joriġinaw fir-Repubblika Popolari taċ-Ċina. Barra minn hekk ġie deċiż li tinħoloq "skema ta' eżenzjoni" abbażi tal-Artikolu 13(2) tar-Regolament bażiku tal-anti-dumping. Id-dettalji tal-iskema ġew stipulati fir-Regolament tal-Kummissjoni (KE) Nru 88/97[4].

(2)       Wara reviżjoni tal-iskadenza skont l-Artikolu 11(2) tar-Regolament bażiku, il-Kunsill, bir-Regolament (KE) Nru 1524/2000[5], iddeċieda li l-miżuri msemmija hawn fuq għandhom jinżammu.

(3)       Wara t-twettiq ta’ analiżi interim skont l-Artikolu 11(3) tar-Regolament bażiku, il-Kunsill, bir-Regolament (KE) Nru 1095/2005[6], żied id-dazju ta' anti-dumping fis-seħħ għal 48,5%.

(4)       F'Ottubru 2011, wara t-twettiq ta’ analiżi tal-iskadenza skont l-Artikolu 11(2) tar-Regolament bażiku, il-Kunsill, bir-Regolament (UE) Nru 990/2011[7], iddeċieda li l-miżuri hawn fuq imsemmija għandhom jinżammu ("il-miżuri eżistenti").

(5)       F’Marzu 2012, il-Kummissjoni ħabbret, permezz ta’ avviż ippubblikat f’Il-Ġurnal Uffiċjali tal-Unjoni Ewropea[8] l-bidu ta’ analiżi interim tal-miżuri antidumping għall-importazzjonijiet fl-Unjoni ta’ biċikletti li joriġinaw fir-RPĊ skont l-Artikolu 11(3) u 13(4) tar-Regolament bażiku anti-dumping.

(6)       F’Mejju 2013, il-Kunsill, permezz tar-Regolament (UE) Nru XXX/2013[9] [timtela matul il-proċedura bil-miktub mis-Segretarjat tal-Kunsill], emenda r-Regolament ta’ Implimentazzjoni tal-Kunsill (UE) Nru 990/2011 li jimponi dazju antidumping definittiv fuq importazzjonijiet ta’ roti li joriġinaw mir-Repubblika Popolari taċ-Ċina wara reviżjoni interim skont l-Artikolu 11(3) tar-Regolament (KE) Nru 1225/2009.

(7)       F’April 2012 il-Kummissjoni ħabbret permezz ta’ avviż ippubblikat f’Il-Ġurnal Uffiċjali tal-Unjoni Ewropea[10] l-bidu ta’ proċediment kontra s-sussidji fir-rigward ta' importazzjonijiet fl-Unjoni ta’ biċikletti li joriġinaw mir-Repubblika Popolari taċ-Ċina skont l-Artikolu 10 tar-Regolament tal-Kunsill (KE) Nru 597/2009 tal-11 ta’ Ġunju 2009[11].

(8)       F’Novembru 2012, il-Kummissjoni ħabbret permezz ta’ avviż ippubblikat f’Il-Ġurnal Uffiċjali tal-Unjoni Ewropea[12] li s-sejbiet fl-investigazzjoni attwali jistgħu jintużaw fl-investigazzjoni tas-sussidji msemmija fil-premessa (7) hawn fuq.

(9)       F’Mejju 2013 il-Kummissjoni permezz tar-Regolament (UE) Nru xxx/2013[13] [timtela matul il-proċedura bil-miktub mis-Segretarjat tal-Kunsill], temmet il-proċediment kontra s-sussidji msemmi fil-premessa (7) hawn fuq mingħajr ma imponiet miżuri.

1.2.        Talba

(10)     Fl-14 ta' Awwissu 2012, il-Kummissjoni rċeviet talba skont l-Artikoli 13(3) u 14(5) tar-Regolament bażiku biex tinvestiga l-possibbiltà ta’ evażjoni tal-miżuri anti-dumping imposti fuq importazzjonijiet ta' biċikletti li joriġinaw fir-RPĊ u biex tagħmel l-importazzjonijiet ta' biċikletti kkunsinjati mill-Indoneżja, il-Malasja, is-Sri Lanka u t-Tuneżija soġġetti għar-reġistrazzjoni, kemm jekk dawn ikunu ddikjarati li joriġinaw mill-Indoneżja, il-Malasja, is-Sri Lanka u t-Tuneżija u kemm jekk le.

(11)     It-talba tressqet mill-Assoċjazzjoni Ewropea tal-Manifatturi tal-biċikletti (European Bicycles Manufacturers Association EBMA) f’isem In Cycles - Montagem e Comercio de Bicicletas, Ldo, SC. EUROSPORT DHS S.A. u MAXCOM Ltd, tliet produtturi tal-biċikletti tal-Unjoni.

1.3.        Tnedija

(12)     Wara li ddeterminat, wara konsultazzjoni mal-Kumitat Konsultattiv, li hemm biżżejjed evidenza prima facie biex jingħata bidu għal investigazzjoni skont l-Artikoli 13 (3) u 14 (5) tar-Regolament bażiku, il-Kummissjoni ddeċidiet li tinvestiga l-possibbiltà ta’ evażjoni tal-miżuri anti-dumping imposti fuq importazzjonijiet ta’ biċikletti li joriġinaw fl-RPĊ u biex tagħmel l-importazzjonijiet ta’ biċikletti kkonsenjati mill-Indoneżja, mill-Malasja, mis-Sri Lanka u mit-Tuneżija, kemm jekk iddikjarati bħala li joriġinaw fl-Indoneżja, il-Malasja, is-Sri Lanka u t-Tuneżija u kemm jekk le, suġġetti għal reġistrazzjoni.

(13)     L-investigazzjoni nbdiet fil-25 ta’ Settembru 2012 permezz tar-Regolament tal-Kummissjoni (UE) Nru 875/2012[14] (“ir-Regolament tat-tnedija”).

(14)     L-evidenza prima facie għad-dispożizzjoni tal-Kummissjoni wriet bidla sinifikanti fix-xejra tal-kummerċ li tinvolvi l-esportazzjonijiet mir-RPĊ, l-Indoneżja, il-Malasja, is-Sri Lanka u t-Tuneżija lejn l-Unjoni wara ż-żieda tad-dazju anti-dumping fuq l-importazzjonijiet tal-prodott ikkonċernat mir-Regolament tal-Kunsill (KE) Nru 1095/2005 imsemmi fil-premessa (3) hawn fuq. Il-bidla fix-xejra tal-kummerċ tidher li seħħet mingħajr raġuni jew ġustifikazzjoni biżżejjed b’saħħitha għajr iż-żieda tad-dazju.

(15)     Din il-bidla tidher li tirriżulta mit-trażbord ta’ biċikletti li joriġinaw mir-Repubblika Popolari taċ-Ċina via l-Indoneżja, il-Malasja, is-Sri Lanka u t-Tuneżija lejn l-Unjoni u minn operazzjonijiet ta' mmuntar fl-Indoneżja, is-Sri Lanka u t-Tuneżija.

(16)     Barra minn hekk, l-evidenza kienet tindika li l-effetti ta’ rimedju tal-miżuri eżistenti tal-anti-dumping fuq il-prodott ikkonċernat qed jiġu kompromessi f’termini ta’ kwantità u ta’ prezz. Volumi sinifikanti ta’ importazzjonijiet tal-prodott investigat jidher li ħadu post l-importazzjonijiet tal-prodott ikkonċernat li joriġinaw fir-RPĊ. Barra minn hekk, teżisti biżżejjed evidenza li l-importazzjonijiet tal-prodott investigat saru bi prezzijiet aktar baxxi mill-prezz mhux dannuż stabbilit fl-investigazzjoni li wasslet għall-miżuri eżistenti.

(17)     Fl-aħħar nett, kien hemm evidenza li l-prezzijiet tal-prodott taħt investigazzjoni kienu oġġett ta’ dumping fir-rigward tal-valur normali stabbilit qabel għall-prodott ikkonċernat.

1.4.        Investigazzjoni

(18)     Il-Kummissjoni avżat uffiċjalment lill-awtoritajiet tar-RPĊ, l-Indoneżja, il-Malasja, is-Sri Lanka u t-Tuneżija, lill-produtturi/esportaturi f’dawk il-pajjiżi, lill-importaturi fl-Unjoni magħrufa li huma kkonċernati u lill-industrija tal-Unjoni, bit-tnedija tal-investigazzjoni.

(19)     Formoli ta’ eżenzjoni ntbagħtu lill-produtturi/esportaturi fl-Indoneżja, il-Malasja, is-Sri Lanka u t-Tuneżija magħrufa mill-Kummissjoni jew permezz tal-Missjonijiet tal-Indoneżja, il-Malasja, is-Sri Lanka u t-Tuneżija għall-Unjoni Ewropea. Intbagħtu kwestjonarji lill-produtturi/esportaturi fir-RPĊ li taf bihom il-Kummissjoni jew permezz tal-Missjoni tar-RPĊ għall-Unjoni Ewropea. Intbagħtu wkoll kwestjonarji lill-importaturi magħrufa mhux relatati fl-Unjoni.

(20)     Il-partijiet interessati ngħataw l-opportunità jressqu l-opinjonijiet tagħhom bil-miktub u jitolbu smigħ sal-iskadenza stipulata fir-Regolament tat-tnedija. Il-partijiet kollha kienu infurmati li nuqqas ta’ kooperazzjoni jista’ jwassal għall-applikazzjoni tal-Artikolu 18 tar-Regolament bażiku u għal sejbiet li jkunu bbażati fuq il-fatti disponibbli.

(21)     Erba’ produtturi/esportaturi fl-Indoneżja, wieħed fil-Malasja, sitta fis-Sri Lanka u tnejn fit-Tuneżija ppreżentaw tweġibiet għall-formoli ta’ eżenzjoni. Il-produtturi/esportaturi Ċiniżi ma kkooperawx. Tliet importaturi mhux relatati fl-Unjoni ppreżentaw tweġiba għall-kwestjonarju.

(22)     Il-Kummissjoni għamlet iż-żjajjar ta' verifika fil-bini tal-kumpaniji li ġejjin:

– P.T. Insera Sena, Buduran, Sidoarjo, l-Indoneżja,

– Wijaya Indonesia Makmur Bicycles Industries, Driyorejo, Gresik, Jawa Timur, l-Indoneżja,

– P.T. Terang Dunia Internusa, Slipi, Jakarta Barat, l-Indoneżja,

– P.T. Chin Haur, Tangerang, l-Indoneżja,

– Tan Lan Venture Corporation Sdn Bhd, Kampar, Perak, il-Malasja,

– Asiabike Industrial Limited, Henamulla, Panadura, is-Sri Lanka,

– BSH Ventures Limited, Colombo, is-Sri Lanka,

– City Cycle Industries, Colombo, is-Sri Lanka,

– Firefox Lanka (Pvt) Ltd, Weliketiya Pamunugama, is-Sri Lanka,

– Kelani Cycles Pvt Ltd, Katunayake, is-Sri Lanka,

– Samson Bikes (Pvt) Ltd, Colombo, is-Sri Lanka,

– Mediterranean United Industries, Bouhajar Monastir, it-Tuneżija,

– Euro Cycles, Sousse, it-Tuneżija.

1.5.        Perjodu ta' rapportar u perjodu ta’ investigazzjoni

(23)     Il-perjodu ta’ investigazzjoni kien ikopri l-perjodu mill-1 ta’ Jannar 2004 sal-31 ta’ Awwissu 2012 (“il-PI”). Id-dejta nġabret għall-PI sabiex tiġi investigata, fost l-oħrajn, il-bidla allegata fix-xejra tal-kummerċ wara ż-żieda tad-dazju tal-antidumping fl-2005. Inġabret dejta aktar dettaljata għall-perjodu tar-rappurtar bejn l-1 ta’ Settembru 2011 u l-31 ta’ Awwissu 2012 (“il-PR”) sabiex tiġi eżaminata t-theddida possibbli għall-effett rimedjali tal-miżuri fis-seħħ u l-eżistenza tad-dumping.

2.           RIŻULTATI TAL-INVESTIGAZZJONI

2.1.        Kunsiderazzjonijiet ġenerali

(24)     Skont l-Artikolu 13(1) tar-Regolament bażiku, il-valutazzjoni tal-eżistenza ta' evażjoni saret billi ġie analizzat b'mod suċċessiv jekk kienx hemm bidla fix-xejra tal-kummerċ bejn ir-RPĊ, l-erba’ pajjiżi interessati u l-Unjoni; jekk din il-bidla fix-xejra tal-kummerċ irriżultatx minn xi prassi, proċess jew ħidma li għalihom ma hemmx raġuni valida jew ġustifikazzjoni ekonomika suffiċjenti għajr l-impożizzjoni tad-dazju; jekk kienx hemm evidenza ta’ ħsara jew jekk l-effetti rimedjali tad-dazju ġewx kompromessi f'termini tal-prezzijiet u/jew tal-kwantitajiet tal-prodott investigat; u jekk kienx hemm evidenza ta' dumping b'rabta mal-valuri normali stabbiliti qabel, jekk neċessarju skont id-dispożizzjonijiet tal-Artikolu 2 tar-Regolament bażiku.

2.2.        Prodott ikkonċernat u prodott investigat

(25)     Il-prodott ikkonċernat huma biċikletti u ċikletti oħra (inklużi triċikletti tal-kunsinna, iżda bl-esklużjoni tal-uniċikletti), mhux motorizzati, li joriġinaw mir-Repubblika Popolari taċ-Ċina, li bħalissa huma klassifikabbli taħt il-kodiċijiet NM 8712 00 30 u ex 8712 00 70 (“il-prodott ikkonċernat”).

(26)     Il-prodott taħt investigazzjoni huwa l-istess bħal dak definit hawn fuq, iżda kkunsinnat mill-Indoneżja, il-Malasja, is-Sri Lanka u t-Tuneżija, kemm jekk iddikjarat li joriġina mill-Indoneżja, il-Malasja, is-Sri Lanka u t-Tuneżija u kemm jekk le, u li bħalissa jaqa’ taħt l-istess kodiċi NM bħall-prodott ikkonċernat ("il-prodott taħt investigazzjoni").

(27)     L-investigazzjoni wriet li l-biċikletti, kif definiti hawn fuq, esportati lejn l-Unjoni mill-PRĊ u dawk ikkunsinjati mill-Indoneżja, il-Malasja, is-Sri Lanka u t-Tuneżija lejn l-Unjoni għandhom l-istess karatteristiċi bażiċi fiżiċi u tekniċi u l-istess użu, u għalhekk jitqiesu bħala prodotti simili skont it-tifsira tal-Artikolu 1(4) tar-Regolament bażiku.

2.3.        Grad ta’ kooperazzjoni u determinazzjoni tal-volumi tal-kummerċ

2.3.1.     L-Indoneżja

(28)     L-erba’ kumpaniji Indoneżjani li ressqu talba għal eżenzjoni skont l-Artikolu 13(4) tar-Regolament bażiku kienu jirrappreżentaw 91% tal-importazzjonijiet totali mill-Indoneżja lejn l-Unjoni matul il-PR. Il-volumi globali tal-importazzjoni mill-Indoneżja kienu stabbiliti fuq il-bażi tad-dejta mill-Comext[15].

(29)     Id-dejta sottomessa minn kumpanija waħda ma kinitx verifikabbli għaliex il-kumpanija sostniet li ma kienet żammet l-ebda dokumenti ta’ ħidma użati biex timla l-formola ta’ eżenzjoni. Għalhekk, il-kumpanija ma kinitx kapaċi tispjega u turi kif iċ-ċifri rapportati ġew miksuba. Barra minn hekk, id-dejta mressqa mill-kumpanija rriżultaw inaffidabbli għaliex iċ-ċifri rapportati li ġew ittestjati u kkalkulati mill-ġdid fuq il-bażi tal-kotba disponibbli fl-istabbilimenti tal-kumpanija nstab li ma kinux preċiżi (eż. xiri, volum tal-produzzjoni). L-investigazzjoni żvelat ukoll li l-maniġer tal-bejgħ tal-kumpanija kien fil-fatt fl-istess ħin impjegat minn produttur Ċiniż tal-biċikletti li kien l-akbar fornitur tal-materja prima (il-komponenti tal-biċikletti) tal-kumpanija Indoneżjana.

(30)     Għalhek, f'konformità mal-Artikolu 18(4) tar-Regolament bażiku, il-kumpanija ġiet infurmata bl-intenzjoni li titwarrab l-informazzjoni li hija ressqet u ngħatat limitu ta’ żmien sabiex tipprovdi l-kummenti tagħha.

(31)     Il-kumpanija ddikjarat li kienet kooperattiva ħafna billi pprovdiet id-dokumenti kollha mitluba minbarra d-dokumenti ta’ ħidma li allegatament ma kinux mitluba qabel. Madankollu, id-dokumenti ta' ħidma kienu ntalbu fl-ittra ta' qabel il-verifika mibgħuta lill-kumpanija qabel il-verifika fuq il-post. Barra minn hekk, il-kumpanija sostniet li l-kalkolu tal-valuri tal-produzzjoni u tax-xiri kien affettwat minn spjegazzjonijiet ħżiena minn ħaddiem u li l-verifika tat-tranżazzjonijiet ta’ esportazzjoni kienet preċiża. F’dan ir-rigward, ta’ min jinnota li minkejja diversi spjegazzjonijiet mingħand il-ħaddiema, fl-aħħar mill-aħħar ma kienx possibbli li ċ-ċifri pprovduti fuq il-post jiġu rrikonċiljati man-numri sottomessi fil-formola ta' eżenzjoni. F’dak li jirrigwarda l-valur tal-bejgħ tal-esportazzjoni, ir-rikonċiljazzjoni kienet fil-fatt preċiża. Barra minn hekk, matul iż-żjara ta’ verifika, il-ħaddiema li pparteċipaw fil-verifika ma kinux kapaċi jispjegaw is-sors tan-numri ddikjarati fil-formola ta' eżenzjoni u lanqas kif ġew kumpilati n-numri. Barra minn hekk, il-kumpanija kkonfermat li l-maniġer tal-bejgħ kien b’mod parallel qed jaħdem għal produttur Ċiniż tal-biċikletti.

(32)     Għalhekk, l-informazzjoni pprovduta mill-kumpanija inkwistjoni kellha tiġi mwarrba.

(33)     Għaldaqstant, il-konklużjonjiet rigward din il-kumpanija kienu bbażati fuq il-fatti disponibbli skont l-Artikolu 18 tar-Regolament bażiku. It-tliet kumpaniji l-oħra ġew ikkunsidrati li kkooperaw.

2.3.2.     Il-Malasja

(34)     L-unika kumpanija Malasjana li ressqet talba għal eżenzjoni skont l-Artikolu 13(4) tar-Regolament bażiku, kienet tirrappreżenta bejn 20% u 30% tat-total tal-importazzjonijiet mill-Malasja lejn l-Unjoni matul il-PR. L-importazzjonijiet totali ta’ biċikletti mill-Malasja lejn l-Unjoni kienu stabbiliti fuq il-bażi tad-dejta minn Comext. Il-kumpanija tqieset li kkooperat.

2.3.3.     Is-Sri Lanka

(35)     Is-sitt kumpaniji fis-Sri Lanka li ressqu talba għal eżenzjoni skont l-Artikolu 13(4) tar-Regolament bażiku kienu jirrappreżentaw 69% tal-importazzjonijiet totali mis-Sri Lanka lejn l-Unjoni matul il-PR. Il-volumi globali tal-importazzjoni mis-Sri Lanka kienu stabbiliti fuq il-bażi tad-dejta minn Comext.

(36)     Waħda mill-kumpaniji rtirat it-talba tagħha għal eżenzjoni matul l-investigazzjoni fuq il-bażi li kienet waqqfet il-produzzjoni tal-biċikletti fis-Sri Lanka. Għalhekk, id-dejta fir-rigward ta’ din il-kumpanija ġew injorati.

(37)     Il-kooperazzjoni tat-tieni kumpanija nstabet li kienet insuffiċjenti. Id-dejta ppreżentata ma kinitx verifikabbli billi l-valur u l-volum tal-komponenti ta’ oriġini Ċiniża mixtrija mill-kumpanija ma setgħux jiġu stabbiliti b’mod ta’ min jorbot fuqu. Barra minn hekk, il-valur u l-volum tal-komponenti użati fil-proċess tal-manifattura ma setgħux jiġu vverifikati billi kienu nxtraw minn parti terza u kkonsenjati lill-kumpanija biss għall-immuntar.

(38)     Għalhek, f'konformità mal-Artikolu 18(4) tar-Regolament bażiku, il-kumpanija ġiet infurmata bl-intenzjoni li titwarrab l-informazzjoni li hija ressqet u ngħatat limitu ta’ żmien sabiex tipprovdi l-kummenti tagħha. Il-kumpanija ma pprovdietx kummenti.

(39)     Il-kooperazzjoni ta’ kumpanija oħra kienet ukoll ikkunsidrata insuffiċjenti. L-informazzjoni pprovduta ma setgħetx tkun ivverifikata fil-post peress li l-kumpanija naqset milli tipprovdi informazzjoni essenzjali. Aktar speċifikament, hija naqset milli tħejji informazzjoni espliċitament mitluba qabel il-verifika fuq il-post, bħalma huma d-dokumenti ta’ ħidma jew il-lista tal-kumpaniji relatati magħha, u għaldaqstant xekklet il-proċess ta’ verifika. Min-naħa l-oħra, il-valur tax-xiri tal-partijiet ta’ oriġini lokali kif irrappurtat mill-kumpanija nstab li ma kienx affidabbli, b'mod partikolari minħabba li l-investigazzjoni żvelat mill-inqas xi rabtiet bejn il-kumpanija u l-fornitur lokali tagħha tal-komponenti tal-biċikletti li kienu jmorru lil hinn minn relazzjoni normali ta' xerrejja u bejjiegħa u li ma setgħux jiġu kkjarifikati mill-kumpanija.

(40)     Skont l-Artikolu 18(4) tar-Regolament bażiku, il-kumpanija ġiet infurmata bl-intenzjoni li tiġi injorata l-informazzjoni li ressqet u ngħatat limitu ta’ żmien sabiex tipprovdi l-kummenti tagħha. B’reazzjoni għal dan, il-kumpanija kkontestat is-sejbiet u ssottomettiet aktar evidenza u spjegazzjonijiet. L-ebda evidenza ġdida li ġiet sottomessa ma setgħet tiġi aċċettata. L-ewwel nett, għax ma setgħetx tiġi vverifikata aktar għaliex ġiet ipprovduta wara ż-żjara fuq il-post. Fil-biċċa l-kbira tal-każijiet, l-evidenza l-ġdida li ġiet sottomessa nstabet li kienet inkonsistenti mal-ispjegazzjonijiet u l-evidenza miġbura fuq il-post. Fir-rigward tal-ispjegazzjonijiet il-ġodda li ġew sottomessi, instab li dawn kienu insuffiċjenti minħabba li ma kinux jindirizzaw il-kwistjonijiet ewlenin pendenti, b’mod partikolari, l-kjarifiki nieqsa rigward kumpaniji relatati.

(41)     Għalhekk l-informazzjoni pprovduta mill-kumpanija inkwistjoni kellha tiġi skartata.

(42)     Għaldaqstant, il-konklużjonjiet rigward din il-kumpanija kienu bbażati fuq il-fatti disponibbli skont l-Artikolu 18 tar-Regolament bażiku.

2.3.4.     It-Tuneżija

(43)     Iż-żewġ kumpaniji Tuneżini li ressqu talba għal eżenzjoni skont l-Artikolu 13(4) tar-Regolament bażiku kienu jirrappreżentaw l-importazzjonijiet kollha mit-Tuneżija lejn l-Unjoni matul il-PR kif irrappurtat fil-Comext. Dawn tqiesu li kkooperaw.

2.3.5.     Ir-Repubblika Popolari taċ-Ċina

(44)     Kif imsemmi fil-premessa (21) hawn fuq, ma kien hemm l-ebda kooperazzjoni mill-produtturi/esportaturi Ċiniżi. Għalhekk, is-sejbiet fir-rigward tal-importazzjonijiet tal-prodott ikkonċernat fl-Unjoni, min-naħa l-waħda, u l-esportazzjonijiet tal-biċikletti mir-RPĊ lejn l-Indoneżja, il-Malasja, is-Sri Lanka u t-Tuneżija, min-naħa l-oħra, kienu bbażati fuq il-fatti disponibbli skont l-Artikolu 18(1) tar-Regolament bażiku. Fir-rigward tal-importazzjonijiet lejn l-Unjoni, intużat dejta tal-importazzjoni rreġistrata fil-Comext. L-istatistika nazzjonali Ċiniża ntużat fir-rigward tad-determinazzjoni tal-volumi ta’ esportazzjoni mir-RPĊ lejn l-Indoneżja, il-Malasja, is-Sri Lanka u t-Tuneżija.

2.4.        Bidla fix-xejra tal-kummerċ

2.4.1.     Importazzjonijiet fl-Unjoni mir-RPĊ, l-Indoneżja, il-Malasja, is-Sri Lanka u t-Tuneżija

(45)     L-importazzjonijiet tal-prodott ikkonċernat mir-RPĊ lejn l-Unjoni naqsu bi 38,2% mill-2005, jiġifieri wara ż-żieda tal-miżuri anti-dumping f’Lulju 2005, u komplew jonqsu fis-snin ta’ wara. B’kollox, l-importazzjonijiet mir-RPĊ naqsu b’iktar minn 80% fil-PI.

(46)     Fl-istess ħin, l-importazzjonijiet tal-prodott li qed jiġi investigat mill-Indoneżja għall-Unjoni żdiedu mill-2005 ‘l quddiem u aktar milli rdoppjaw fl-2006 meta mqabbla mal-2004. L-importazzjonijiet baqgħu jiżdiedu, bl-eċċezzjoni tal-2009, minkejja li baqgħu f’livelli ferm ogħla minn dawk tal-2004. Mill-2009 'l hawn, l-importazzjonijiet reġgħu żdiedu kontinwament sal-PR. Fil-PR l-importazzjonijiet mill-Indoneżja żdiedu b'157% meta mqabbla mal-2004.

(47)     Fir-rigward tal-importazzjonijiet tal-prodott taħt investigazzjoni mill-Malasja lejn l-Unjoni, dawn kienu negliġibbli qabel iż-żieda tad-dazju anti-dumping f’Lulju 2005. Fl-2005, dawn żdiedu b’mod sinifikanti (b'iktar minn mitejn darba) iżda naqsu fl-2009 b'46%, segwiti minn żieda oħra ta’ 38% fl-2010. Għalkemm l-importazzjonijiet mill-Malasja reġgħu naqsu fl-2011 u matul il-PR, il-livell ta’ importazzjoni mill-Malasja matul il-PR għadu jaqbeż sewwa l-livell tal-importazzjoni mill-2004 qabel iż-żieda tal-miżuri anti-dumping, jiġifieri 185 158 biċikletta meta mqabbla ma’ 10 749 waħda fl-2004 jew b'1 623%.

(48)     L-importazzjonijiet tal-prodott taħt investigazzjoni mis-Sri Lanka għall-Unjoni żdiedu b’mod sinifikanti wara ż-żieda tad-dazji antidumping fl-2005 u komplew jiżdiedu fis-snin ta’ wara bi kważi 500% u laħqu quċċata fl-2010. Fl-2011 u matul il-PR l-importazzjonijiet mis-Sri Lanka tal-prodott taħt l-investigazzjoni naqsu, għalkemm dawn għadhom ferm ogħla mil-livelli ta’ importazzjoni tal-2004 qabel iż-żieda tal-miżuri anti-dumping, jiġifieri l-importazzjonijiet globali mis-Sri Lanka żdiedu b'282% bejn l-2004 u l-PR.

(49)     Fl-aħħar nett, l-importazzjonijiet tal-prodott ikkonċernat mit-Tuneżija għall-Unjoni żdiedu bi kważi 30% fl-2005, jiġifieri wara ż-żieda tad-dazji anti-dumping, u b’aktar minn 20% fl-2006. Huma aktar milli rduppjaw bejn l-2006 u l-2007, u laħqu l-ogħla livell tagħhom fl-2007. Importazzjonijiet matul l-2008 u l-2010 kienu qegħdin jonqsu, reġgħu żdiedu fl-2011 u mbagħad naqsu bi ftit matul il-PR. Matul il-PI, l-importazzjonijiet mit-Tuneżija żdiedu b'200,3%.

(50)     It-Tabella 1 turi l-kwantitajiet ta’ importazzjonijiet ta’ biċikletti mir-RPĊ, l-Indoneżja, il-Malasja, is-Sri Lanka u t-Tuneżija lejn l-Unjoni mill-1 ta’ Jannar 2004 sal-31 ta’ Awwissu 2012, jiġifieri matul il-PI.

Tabella 1

(unitajiet) 2004 || 2005 || 2006 || 2007 || 2008 || 2009 || 2010 || 2011 || 1.9.2011-31.8.2012 (PR)

Ir-RPĊ ||  2,550,775 ||  1,575,452 ||  995,715 || 986,514 ||  941,522 ||  597,339 ||  627,066 ||  584,303 || 411,642

Indiċi (2004 = 100) || 100 || 61.8 || 39.0 || 38.7 || 36.9 || 23.4 || 24.6 || 22.9 || 16.1

L-Indoneżja || 237,648 || 282,045 || 500,623 || 593,769 || 634,623 || 437,023 || 551,847 || 614,798 || 612,448

Indiċi (2004 = 100) || 100 || 118.7 || 210.7 || 249.9 || 267.0 || 183.9 || 232.2 || 258.7 || 257.7

Il-Malasja || 10,749 || 229,354 || 497,974 || 475,463 || 360,871 || 193,102 || 266,164 || 177,306 || 185,158

Indiċi (2004 = 100) || 100 ||  2,133.7 ||  4,632.7 ||  4,423.3 ||  3,357.3 ||  1,796.5 ||  2,476.2 ||  1,649.5 ||  1,722.6

Is-Sri Lanka ||  249,491 ||  352,078 ||  534,413 ||  574,153 ||  749,358 ||  1,016,523 ||  1,237,406 ||  975,297 || 953,169

Indiċi (2004 = 100) || 100 ||  141.1 ||  214.2 ||  230.1 ||  300.4 ||  407.4 ||  496.0 ||  390.9 ||  382.0

It-Tuneżija ||  167,137 ||  212,257 ||  251,054 ||  549,848 ||  527,209 ||  529,734 ||  414,488 ||  519,217 || 501,853

Indiċi (2004 = 100) || 100 ||  127.0 ||  150.2 ||  329.0 ||  315.4 ||  316.9 ||  248.0 ||  310.7 ||  300.3

Sors: L-istatistika tal-Comext

2.4.2.     l-esportazzjonijiet mir-RPĊ lejn l-Indoneżja, il-Malasja, is-Sri Lanka u t-Tuneżija

(51)     L-esportazzjonijiet tal-biċikletti mir-RPĊ lejn l-Indoneżja żdiedu l-ewwel fl-2008 (b'56,2%). Bejn l-2008 u l-PR, l-importazzjonijiet komplew jiżdiedu, bl-eċċezzjoni tal-2009. Matul il-PI l-esportazzjonijiet mir-RPĊ lejn l-Indoneżja żdiedu fit-total bi 83,8%.

(52)     L-esportazzjonijiet tal-biċikletti mir-RPĊ lejn il-Malasja żdiedu fl-2005, wara ż-żieda tal-miżuri anti-dumping, bi kważi 30% u komplew jiżdiedu sakemm laħqu l-ogħla livell tagħhom fl-2011, jiġifieri żieda ta’ 110,8% meta mqabbla mal-2004. Fil-PR l-esportazzjonijiet mir-RPĊ lejn il-Malasja, naqsu kemxejn, iżda baqgħu f’livelli fil-biċċa l-kbira ogħla minn dawk tal-2004. B’mod ġenerali, l-esportazzjonijiet Ċiniżi lejn il-Malasja żdiedu b'99,6% matul il-PI.

(53)     L-esportazzjonijiet tal-biċikletti mir-RPĊ lejn is-Sri Lanka żdiedu wkoll wara ż-żieda tad-dazji anti-dumping f’Lulju 2005. Huma naqsu kemxejn fl-2007 iżda żdiedu b'iktar mid-doppju fl-2010 u fl-2011 meta mqabbla mal-2004. Kumplessivament, l-esportazzjonijiet Ċiniżi lejn is-Sri Lanka żdiedu b'132,5% matul il-PI.

(54)     Finalment l-esportazzjonijiet mir-RPĊ lejn it-Tuneżija kienu negliġibbli qabel iż-żieda tad-dazji anti-dumping. Mill-2005 'il quddiem, l-esportazzjonijiet lejn it-Tuneżija żdiedu b’mod sinifikanti u laħqu l-ogħla livell tagħhom fl-2008 (minn 2 534 unità fl-2004 għal 389 445 unità fl-2008). Għalkemm l-esportazzjonijiet mir-RPĊ lejn it-Tuneżija naqsu u baqgħu f’livelli aktar baxxi wara l-2008, huma xorta baqgħu f’livelli ferm ogħla minn dawk ta' matul l-2004. B’mod ġenerali, l-esportazzjonijiet Ċiniżi lejn it-Tuneżija żdiedu minn 2 534 biċikletta fl-2004 għal 170 772 biċikletta fil-PR.

(55)     It-Tabella 2 turi l-esportazzjonijiet tal-biċikletti mir-RPĊ lejn l-Indoneżja, il-Malasja, is-Sri Lanka u t-Tuneżija mill-1 ta’ Jannar 2004 sal-31 ta’ Awwissu 2012, jiġifieri matul il-PI.

Tabella 2

(unitajiet) 2004 || 2005 || 2006 || 2007 || 2008 || 2009 || 2010 || 2011 || 1.9.2011-31.8.2012 (PR)

L-Indoneżja || 2,128,804 || 1,731,224 || 2,121,019 || 1,906,364 || 3,325,531 || 2,287,374 || 3,644,836 || 3,773,852 || 3,912,882

Indiċi (2004 = 100) || 100 || 81.3 || 99.6 || 89.6 || 156.2 || 107.4 || 171.2 || 177.3 || 183.8

Il-Malasja || 721,335 || 933,943 || 890,241 || 974,860 || 1,515,886 || 1,111,251 || 1,291,766 || 1,520,276 || 1,440,132

Indiċi (2004 = 100) || 100 ||  129.5 ||  123.4 ||  135.1 ||  210.2 ||  154.1 ||  179.1 ||  210.8 ||  199.6

Is-Sri Lanka || 267,371 || 315,233 || 345,953 || 254,774 || 425,405 || 383,377 || 699,328 || 685,744 || 621,620

Indiċi (2004 = 100) || 100 || 117.9 || 129.4 || 95.3 || 159.1 || 143.4 || 261.6 || 256.5 || 232.5

It-Tuneżija || 2,534 || 7,188 || 37,042 || 175,761 ||  389,445 || 171,332 ||  225,369 ||  204,465 || 170,772

Indiċi (2004 = 100) || 100 ||  283.7 ||  1,461.8 ||  6,936.1 ||  15,368.8 ||  6,761.3 ||  8,893.8 ||  8,068.9 ||  6,739.2

Sors: L-istatistika Ċiniża

2.4.3.     Il-volumi ta’ produzzjoni

(56)     Il-kumpaniji fl-Indoneżja u t-Tuneżija żiedu l-produzzjoni tagћhom bejn l-2009 u l-PR, b'54% u 24% rispettivament. Il-kumpaniji tas-Sri Lanka madankollu naqqsu ftit il-produzzjoni tagħhom matul l-istess perjodu.

(57)     Dwar il-Malasja, l-unika kumpanija fil-Malasja li kkooperat bdiet tipproduċi u tesporta l-biċikletti fl-2010. Peress li l-ebda kumpanija oħra ma kkooperat, l-ebda informazzjoni ma setgħet tinkiseb fuq il-livelli possibbli tal-produzzjoni ġenwina tal-prodott investigat f’dan il-pajjiż.

Tabella 3

Il-produzzjoni ta’ biċikletti tal-kumpaniji li kkooperaw fl-Indoneżja, is-Sri Lanka u t-Tuneżija

Il-volumi ta’ produzzjoni f’unitajiet || 2009 || 2010 || 2011 || PR

L-Indoneżja || 1,217,664 || 1,631,459 || 1,877,067 || 1,877,381

Indiċi || 100 || 134 || 154 || 154

Is-Sri Lanka ||  737,632 ||  886,191 ||  688,059 ||  692,454

Indiċi ||  100 ||  120 ||  93 ||  94

It-Tuneżija || 430,022 || 483,135 || 575,393 ||  532,425

Indiċi || 100 || 112 || 134 || 124

2.5.        Konklużjoni dwar il-bidla fix-xejra tal-kummerċ

(58)     It-tnaqqis kumplessiv tal-esportazzjonijiet mir-RPĊ lejn l-Unjoni u ż-żieda parallela tal-esportazzjonijiet mill-Indoneżja, il-Malasja, is-Sri Lanka u t-Tuneżija lejn l-Unjoni u ż-żieda fl-esportazzjonijiet mir-RPĊ lejn l-Indoneżja, il-Malasja, is-Sri Lanka u t-Tuneżija wara ż-żieda tal-miżuri anti-dumping f’Lulju 2005 tikkostitwixxi bidla fix-xejra tal-kummerċ bejn il-pajjiżi konċernati, fuq naħa waħda, u l-Unjoni, fuq in-naħa l-oħra, skont it-tifsira tal-Artikolu 13(1) tar-Regolament bażiku.

2.6.        In-natura tal-prattiki ta’ evażjoni

(59)     L-Artikolu 13(1) tar-Regolament bażiku jesiġi li l-bidla fix-xejra tal-kummerċ tirriżulta minn prassi, proċess jew ħidma li għalihom ma hemmx raġuni valida jew ġustifikazzjoni ekonomika suffiċjenti għajr l-impożizzjoni tad-dazju. Il-prattika, il-proċess jew il-ħidma jinkludu, fost oħrajn, il-kunsinja tal-prodott suġġett għall-miżuri eżistenti vija pajjiżi terzi u l-immuntar ta’ komponenti permezz ta’ operazzjoni ta’ mmuntar fl-Unjoni jew f'pajjiż terz. Għal dan l-għan l-eżistenza ta’ operazzjonijiet ta’ mmuntar kienet determinata skont l-Artikolu 13(2) tar-Regolament bażiku.

2.6.1.     L-Indoneżja

Trażbord

(60)     L-esportazzjonijiet mill-erba’ kumpaniji Indoneżjani li kkooperaw inizjalment kienu jammontaw għal 91% tat-total ta’ esportazzjonijiet Indoneżjani lejn l-Unjoni fil-PR.

(61)     Għal tlieta mill-erba’ kumpaniji li kkooperaw inizjalment, l-investigazzjoni ma żvelat l-ebda prattiki ta’ trażbord.

(62)     Fir-rigward tar-raba' kumpanija, kif iddikjarat fil-premessi (29) sa (33) aktar 'il fuq, l-applikazzjoni tal-Artikolu 18 tar-Regolament bażiku kienet ġustifikata. L-investigazzjoni żvelat li l-kumpanija ma kenitx tippossjedi tagħmir suffiċjenti biex jiġġustifika l-volumi tal-esportazzjonijiet lejn l-Unjoni matul il-PR u, għalhekk, jista' jiġi konkluż li l-kumpanija kienet involuta fi prattiċi ta’ evażjoni permezz ta’ trażbord.

(63)     Għall-bqija tal-esportazzjonijiet lejn l-Unjoni ma kien hemm l-ebda kooperazzjoni kif deskritt fil-premessi (29) sa (33) hawn fuq.

(64)     Għaldaqstant, fid-dawl tal-bidliet fix-xejriet tal-kummerċ konklużi fil-premessa (58) hawn fuq bejn l-Indoneżja u l-Unjoni skont it-tifsira tal-Artikolu 13(1) tar-Regolament bażiku, is-sejbiet ta' kumpanija waħda Indoneżjana kif iddikjarat fil-premessa (61) hawn fuq, u l-fatt li mhux il-produtturi/esportaturi Indoneżjani kollha ppreżentaw ruħhom u kkooperaw, l-eżistenza ta' trażbord ta' prodotti ta' oriġini Ċiniża vija l-Indoneżja hija kkonfermata.

Operazzjoni ta' mmuntar

(65)     Is-sorsi tal-materja prima (komponenti tal-biċikletti) u l-ispiża tal-produzzjoni kienu analizzati għal kull kumpanija li kkooperat u dan sabiex ikun stabbilit jekk hemmx xi operazzjoni ta’ assembleġġ eżistenti fl-Indoneżja li qed tevadi l-miżuri skont il-kriterji tal-Artikolu 13(2) tar-Regolament bażiku. Għal tlieta mill-erba’ kumpaniji li kkooperaw inizjalment, il-materja prima ta’ oriġini Ċiniża (komponenti tal-biċikletti) ma kenitx tikkostitwixxi 60% jew aktar tal-valur totali tal-partijiet tal-prodott immuntat. Għalhekk ma kienx neċessarju li jiġi eżaminat jekk il-valur miżjud tal-komponenti mdaħħla matul l-operazzjoni ta’ mmuntar kienx ikbar minn 25% tal-ispiża tal-manifattura. Konsegwentement, operazzjonijiet tal-immuntar ma kinux stabbiliti fir-rigward ta’ dawn it-tliet kumpaniji.

(66)     Għar-raba' kumpanija, l-Artikolu 18(1) tar-Regolament bażiku ġie applikat kif imsemmi fil-premessi (29) sa (33) aktar 'il fuq. Billi l-kumpanija ma setgħetx tipprovdi dejta affidabbli, ma setax jiġi stabbilit jekk kenitx involuta f’operazzjonijiet ta’ mmuntar.

(67)     Għalhekk, l-eżistenza ta’ operazzjonijiet ta’ mmuntar fis-sens tal-Artikolu 13(2) tar-Regolament bażiku ma ġietx stabbilita.

2.6.2.     Il-Malasja

Trażbord

(68)     L-esportazzjonijiet tal-unika kumpanija Malasjana li kkooperat ammontaw għal bejn 20% u 30% tal-esportazzjonijiet totali tal-Malasja lejn l-Unjoni fil-PR. Din il-kumpanija bdiet tipproduċi u tesporta lejn l-Unjoni l-prodott ikkonċernat biss fi tmiem l-2011. L-ebda prattiki ta’ trażbord ma nstabu fir-rigward ta’ din il-kumpanija. Għall-bqija tal-esportazzjonijiet lejn l-Unjoni ma kien hemm l-ebda kooperazzjoni kif indikat b'mod ċar fil-premessa (34) hawn fuq.

(69)     Għaldaqstant, fid-dawl tal-bidliet fix-xejriet tal-kummerċ konklużi fil-premessa (58) bejn il-Malasja u l-Unjoni skont it-tifsira tal-Artikolu 13(1) tar-Regolament bażiku u l-fatt li mhux il-produtturi/esportaturi kollha tal-Malasja ppreżentaw ruħhom u kkooperaw jista’ jiġi konkluż li l-bqija tal-volumi ta’ esportazzjonijiet li mhumiex ġejjin minn din il-kumpanija jistgħu jiġu attribwiti għal prattiki ta’ trażbord.

(70)     Għaldaqstant, l-eżistenza ta' trażbord ta' prodotti ta' oriġini Ċiniża mill-Malasja, hija kkonfermata.

Operazzjoni ta' mmuntar

(71)     Fil-każ tal-Malasja l-ambitu tal-investigazzjoni ġie estiż biex ikopri prattiki ta’ evażjoni oħra li ġew identifikati fil-kors tal-investigazzjoni, jiġifieri operazzjonijiet tal-immuntar, kif stipulat fil-premessa (12) tar-Regolament tat-tnedija.

(72)     Il-kriterji tal-Artikolu 13(2) tar-Regolament bażiku ġew analizzati għall-unika kumpanija li kkooperat u dan sabiex ikun stabbilit jekk hemmx xi operazzjoni ta’ mmuntar fil-Malasja li qed tevadi l-miżuri eżistenti. L-investigazzjoni wasslet għas-sejbiet li ġejjin.

(73)     Il-kumpanija bdiet topera fl-2010 u għalhekk wara li l-miżuri anti-dumping kontra r-RPĊ ġew miżjuda. Il-kumpanija nstabet li kienet orjentata lejn l-esportazzjoni mmirata lejn is-suq tal-Unjoni, peress li sar biss bejgħ negliġibbli fis-suq domestiku jew f'pajjiżi terzi oħra. Barra minn hekk, il-komponenti użati fil-produzzjoni kienu misjuba li oriġinaw primarjament mir-RPĊ. Il-kriterji tal-Artikolu 13(2)(a) tar-Regolament Bażiku għalhekk kienu kkunsidrati li ġew issodisfati.

(74)     Minbara dan, din il-kumpanija kienet qed tixtri kits tal-biċikletti żarmati għal kollox mir-RPĊ, minbarra għal tliet tipi ta’ komponenti. F’dan il-każ, il-materja prima ta’ oriġini Ċiniża (komponenti tal-biċikletti) kienet tikkostitwixxi iktar minn 60% tal-valur totali tal-partijiet tal-prodott finali. Barra minn hekk, il-valur miżjud tal-komponenti mdaħħla matul l-operazzjoni tal-immuntar ma nstabx li kien ikbar minn 25% tal-ispiża tal-manifattura ta’ din il-kumpanija. Il-kriterji tal-Artikolu 13(2)(b), għaldaqstant, ġew issodisfati.

(75)     Barra minn hekk, skont l-Artikoli 2(11) u (12) tar-Regolament bażiku, tqabbil tal-valur normali, kif stabbilit qabel (ara l-premessa (98) hawn taħt), u l-prezzijiet ta’ esportazzjoni tal-kumpanija lejn l-Unjoni matul il-PR, espressi bħala perċentwali tal-prezz CIF fil-fruntiera tal-Unjoni bid-dazju mhux imħallas, wera dumping sinifikanti mill-kumpanija kkonċernata fir-rigward tal-importazzjonijiet tal-prodott li qed jiġi investigat. It-tqabbil twettaq għal kull kull tip tal-prodott taħt investigazzjoni esportat lejn l-Unjoni fil-PR. Barra minn hekk, instab illi l-prezzijiet tal-esportazzjoni ta’ din il-kumpanija kienu ferm inqas mil-livell ta’ tneħħija ta’ ħsara stabbilit għall-industrija tal-Unjoni fl-investigazzjoni oriġinali. Il-kalkolu sar skont il-kategoriji ewlenin ta' prodotti, fuq il-bażi tal-informazzjoni disponibbli. Għalhekk, l-effetti rimedjali tad-dazju fis-seħħ instab li huma mminati f’termini ta’ prezzijiet. Għal dawn ir-raġunijiet, kien konkluż li l-kriterji tal-Artikolu 13(2)(c) tar-Regolament bażiku kienu ssodisfati.

(76)     Fuq din il-bażi, il-kumpanija nstabet li hi involuta f’operazzjoni ta’ mmuntar. Għalhekk, l-eżistenza ta’ operazzjonijiet ta’ mmuntar skont it-tifsira tal-Artikolu 13(2) tar-Regolament bażiku fil-Malasja hija kkonfermata.

2.6.3.     Is-Sri Lanka

Trażbord

(77)     L-esportazzjonijiet tal-kumpaniji tas-Sri Lanka li inizjalment ikkooperaw kienu jammontaw għal 69% tat-total tal-esportazzjonijiet tas-Sri Lanka lejn l-Unjoni fil-PR. Għal tlieta mis-sitt kumpaniji li kkooperaw inizjalment, l-investigazzjoni ma żvelat l-ebda prattiki ta’ trażbord. Għall-esportazzjonijiet l-oħra ma kien hemm l-ebda kooperazzjoni kif spjegat fil-premessi (35) sa (42) aktar 'il fuq.

(78)     Għaldaqstant, fid-dawl tat-tibdil fix-xejriet tal-kummeċ konklużi fil-premessa (58) bejn is-Sri Lanka u l-Unjoni skont it-tifsira tal-Artikolu 13(1) tar-Regolament bażiku u l-fatt li mhux il-produtturi/esportaturi kollha tas-Sri Lanka ppreżentaw ruħhom u/jew ikkooperaw jista’ jiġi konkluż li l-esportazzjonijiet ta’ dawk il-produtturi/esportaturi jistgħu jiġu attribwiti għal prattiki ta’ trażbord.

(79)     Għaldaqstant, l-eżistenza ta' trażbord ta' prodotti ta' oriġini Ċiniża mill-Malasja hija kkonfermata.

Operazzjoni ta' mmuntar

(80)     Is-sorsi tal-materja prima (komponenti tal-biċikletti) u l-ispiża tal-produzzjoni kienu analizzati għal kull kumpanija li kkooperat u dan sabiex ikun stabbilit jekk hemmx xi operazzjoni ta’ assembleġġ fis-Sri Lanka li qed tevadi l-miżuri eżistenti skont il-kriterji tal-Artikolu 13(2) tar-Regolament bażiku.

(81)     Għal tlieta mis-sitt kumpaniji li kkooperaw inizjalment, il-materja prima ta’ oriġini Ċiniża (komponenti tal-biċikletti) ma kinitx tikkostitwixxi 60% jew aktar tal-valur totali tal-komponenti tal-prodott immuntat. Għalhekk ma kienx neċessarju li jiġi eżaminat jekk il-valur miżjud tal-komponenti mdaħħla matul l-operazzjoni ta’ mmuntar kienx ikbar minn 25% tal-ispiża tal-manifattura. Konsegwentement, operazzjonijiet tal-immuntar ma kinux stabbiliti fir-rigward ta’ dawn it-tliet kumpaniji.

(82)     L-Artikolu 18(1) tar-Regolament bażiku kien applikat għal żewġ kumpaniji oħra kif spjegat fil-premessi (37) sa (42) hawn fuq, filwaqt li kumpanija waħda oħra rtirat il-kooperazzjoni tagħha waqt il-verifika fuq il-post kif imsemmi fil-premessa (36) hawn fuq. Għalhekk, l-eżistenza ta’ operazzjonijiet ta’ mmuntar fis-sens tal-Artikolu 13(2) tar-Regolament bażiku ma ġietx stabbilita.

2.6.4.     It-Tuneżija

Trażbord

(83)     L-esportazzjonijiet ta’ kumpaniji Tuneżini li kkooperaw koprew l-importazzjonijiet totali mit-Tuneżija lejn l-Unjoni fil-PR.

(84)     Il-verifikazzjoni taż-żewġ kumpaniji li kkooperaw ma żvelat l-ebda trażbord ta’ prodotti ta’ oriġini Ċiniża via t-Tuneżija.

Operazzjoni ta' mmuntar

(85)     Is-sorsi tal-materja prima (komponenti tal-biċikletti) u l-ispiża tal-produzzjoni kienu analizzati għal kull kumpanija li kkooperat biex ikun stabbilit jekk hemmx xi operazzjoni ta’ mmuntar fit-Tuneżija li qed tevadi l-miżuri eżistenti skont il-kriterji tal-Artikolu 13(2) tar-Regolament bażiku. Għal kumpanija waħda li kkooperat, il-materja prima (komponenti tal-biċikletti) ta’ oriġini Ċiniża kkostitwiet iktar minn 60% tal-valur totali tal-partijiet tal-prodott immuntat. Madankollu, l-investigazzjoni wriet li l-valur miżjud tal-partijiet li ddaħħlu matul l-operazzjoni ta’ mmuntar kien jaqbeż il-25% tal-ispiża tal-manifattura ta’ din il-kumpanija. Fuq din il-bażi l-kumpanija nstabet li mhix involuta f’operazzjoni ta' mmuntar.

(86)     Il-kriterji tal-Artikolu 13(2) tar-Regolament bażiku ġew analizzati għall-kumpanija Tuneżina l-oħra. L-investigazzjoni wasslet għas-sejbiet li ġejjin.

(87)     Il-kumpanija bdiet topera mill-2006 u għalhekk wara li l-miżuri anti-dumping kontra r-RPĊ ġew miżjuda. Il-kumpanija nstabet li kienet orjentata lejn l-esportazzjoni u mmirata lejn is-suq tal-Unjoni, peress li sar biss bejgħ negliġibbli fis-suq domestiku jew f'pajjiżi terzi oħra. Barra minn hekk, il-komponenti użati fil-produzzjoni nstab li kienu oriġinaw primarjament mir-RPĊ. Għaldaqstant, kien ikkunsidrat li l-kriterji tal-Artikolu 13(2)(a) tar-Regolament bażiku kienu ssodisfati.

(88)     Minbarra dan, il-kumpanija kkonċernata nstab li kellha manifattur Ċiniż tal-biċikletti bħala l-azzjonist maġġoritarju tagħha.

(89)     Barra minn hekk, il-kumpanija xtrat il-partijiet kollha mir-RPĊ u għalhekk il-materja prima ta’ oriġini Ċiniża (komponenti tal-biċikletti) kienet tikkostitwixxi iktar minn 60% tal-valur totali tal-partijiet tal-prodott finali. Barra minn hekk, l-investigazzjoni żvelat li l-uniku fornitur tas-servizzi u tal-komponenti Ċiniżi kien relatat mal-azzjonist maġġoritarju Ċiniż tal-kumpanija inkwistjoni. Minbarra dan, il-valur miżjud tal-partijiet imdaħħla matul l-operazzjonijiet ta’ mmuntar tal-kumpanija ma kienx jaqbeż il-25% tal-ispiża tal-manifattura ta’ din il-kumpanija. Fuq din il-bażi il-kriterji tal-Artikolu 13(2)(b) tar-Regolament Bażiku għalhekk kienu kkunsidrati li ġew issodisfati.

(90)     Barra minn hekk, il-verifika żvelat għadd kbir ta’ żbalji fil-lista ta’ esportazzjonijiet lejn l-Unjoni fil-PR u, għalhekk, fajl ġdid kien kostruwit fuq il-bażi tal-fatturi tal-bejgħ fil-kampjun li jkopru madwar 25% tal-esportazzjonijiet totali lejn is-suq tal-Unjoni. Għaldaqstant, kif previst fl-Artikolu 2(11) u (12) tar-Regolament bażiku, fin-nuqqas ta’ tagħrif dettaljat dwar it-tranżazzjonijiet tal-esportazzjonijiet tal-kumpanija rispettiva lejn l-Unjoni, il-paragun bejn il-valur normali u l-prezz tal-esportazzjoni sar fuq il-bażi tal-valur normali medju peżat stabbilit qabel (ara l-premessa (98) hawn taħt) ma' prezz tal-esportazzjoni medju peżat ta’ din il-kumpanija lejn l-Unjoni. Il-marġni tad-dumping espress bħala perċentwal tal-valur CIF fil-fruntiera tal-Unjoni nstab li huwa sinifikanti. Barra minn hekk, instab illi l-prezzijiet tal-esportazzjoni ta’ din il-kumpanija bħala medja kienu ferm inqas mil-livell ta’ tneħħija ta’ ħsara stabbilit għall-industrija tal-Unjoni fl-investigazzjoni oriġinali. Il-kalkolu sar fuq bażi ta’ medja ppeżata. Għalhekk, l-effetti rimedjali tad-dazju fis-seħħ nstab li huma mminati f’termini ta’ prezzijiet. Għalhekk, ġie konkluż li l-kriterji tal-Artikolu 13(2)(c) tar-Regolament bażiku ġew issodisfati. Fuq din il-bażi, il-kumpanija nstabet li hi involuta f’operazzjoni ta’ mmuntar.

(91)     Għalhekk, l-eżistenza ta’ operazzjonijiet ta’ mmuntar fit-Tuneżija fit-tifsira tal-Artikolu 13(2) tar-Regolament bażiku hija b’dan ikkonfermata.

2.7.        Nuqqas ta’ raġuni valida jew ġustifikazzjoni ekonomika suffiċjenti għajr għall-impożizzjoni tad-dazju anti-dumping

(92)     L-investigazzjoni ma żvelat l-ebda kawża adegwata jew ġustifikazzjoni ekonomika oħra għall-operazzjonijiet ta’ mmuntar għajr għall-evażjoni tal-miżuri oriġinali fuq il-prodott ikkonċernat. Ma nstab l-ebda element, għajr għad-dazju, li seta’ jitqies bħala kumpens għall-ispejjeż tat-trażbord u l-operazzjonijiet ta’ mmuntar, partikolarment fir-rigward tat-trasport u t-tagħbija mill-ġdid tal-biċikletti li joriġinaw fir-RPĊ vija l-Indoneżja, il-Malasja, is-Sri Lanka u t-Tuneżija.

2.8.        L-imminar tal-effett rimedjali tad-dazju anti-dumping

(93)     Sabiex jiġi vvalutat jekk il-prodotti importati, f’termini ta’ kwantitajiet u prezzijiet, dgħajfux l-effetti rimedjali tal-miżuri eżistenti fuq l-importazzjonijiet tal-prodott ikkonċernat mir-RPĊ, kienet użata d-dejta Comext għax din kienet ikkunsidrata bħala l-aħjar dejta disponibbli dwar il-kwantitajiet u l-prezzijiet ta’ esportazzjonijiet minn produtturi/esportaturi li kkooperaw inizjalment fejn l-Artikolu 18 tar-Regolament bażiku kien applikat u minn kumpaniji li ma kkooperawx. Fejn applikabbli, għall-kumpaniji li kkooperaw li nstabu involuti fi prattiċi ta’ evażjoni, intużaw il-kwantitajiet irrappurati u l-prezzijiet tal-esportazzjonijiet tagħhom. Il-prezzijiet tal-esportazzjoni kif kienu determinati ġew imqabbla mal-livell ta’ eliminazzjoni ta’ ħsara għal produtturi tal-Unjoni kif l-aħħar stabbilit, jiġifieri fir-reviżjoni interim konkluża fl-2005, imsemmija fil-premessa (3) hawn fuq.

(94)     Il-paragun tal-livell ta’ eliminazzjoni tal-ħsara kif stabbilit fir-reviżjoni interim fl-2005 u l-medja ppeżata tal-prezz tal-esportazzjoni matul il-PR tal-investigazzjoni attwali wera bejgħ sinifikanti taħt il-prezz għal kull wieħed mill-erba’ pajjiżi kkonċernati.

(95)     Iż-żieda ta’ importazzjonijiet mill-Indonesja, mill-Malasja, mis-Sri Lanka u mit-Tuneżija lejn l-Unjoni kienet meqjusa sinifikanti f’termini ta’ kwantitajiet kif diskuss fit-taqsima 2.4.1 hawn fuq.

(96)     Għalhekk ġie konkluż li l-miżuri eżistenti qegħdin jiġu mminati f’termini ta’ kwantitajiet u prezzijiet.

2.9.        Evidenza ta' dumping

(97)     Finalment, b’konformità mal-Artikolu 13(1) tar-Regolament bażiku, ġie eżaminat jekk kienx hemm evidenza ta’ dumping b’rabta mal-valur normali stabbilit preċedentement għall-prodott ikkonċernat.

(98)     Fir-reviżjoni interim konkluża fl-2005, imsemmija fil-premessa (3) hawn fuq, il-valur normali ġie stabbilit fuq il-bażi ta’ prezzijiet fil-Messiku, li f'dik l-investigazzjoni nstab li kien pajjiż analogu adegwat b’ekonomija tas-suq għar-RPĊ (“il-valur normali stabbilit qabel”).

2.9.1.     L-Indoneżja

(99)     Parti sinifikattiva tal-esportazzjonijiet Indoneżjani nstabu li kienu produzzjoni ġenwina Indoneżjana esportata minn tliet kumpaniji Indoneżjani li nstabu li ma kinux involuti fi prattiki ta’ evażjoni kif iddikjarat fil-premessi (61) u (65) hawn fuq. Għal din ir-raġuni, biex ikunu stabbiliti l-prezzijiet tal-esportazzjoni mill-Indoneżja li huma affettwati mill-prattiki ta' evażjoni, biss l-esportazzjonijiet tal-produtturi/esportaturi li ma kooperawx ġew ikkunsidrati. Għal dan l-għan saret rikorrenza għall-aħjar fatti disponibbli u l-prezzijiet tal-esportazzjoni ġew stabbiliti fuq il-bażi tal-prezz medju ta’ esportazzjoni ta’ biċikletti mill-Indoneżja lejn l-Unjoni matul il-PR kif irrappurtat fil-Comext.

(100)   Biex jiġi żgurat paragun ġust bejn il-valur normali u l-prezz tal-esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-paragunabbiltà tal-prezzijiet skont l-Artikolu 2(10) tar-Regolament bażiku. Għalhekk, saru aġġustamenti għal differenzi fl-ispejjeż tat-trasport, tal-assigurazzjoni u tal-ppakkjar ippreżentati mill-industrija tal-Unjoni fit-talba tagħha għal din l-investigazzjoni.

(101)   Skont l-Artikoli 2(11) u 2(12) tar-Regolament bażiku, id-dumping ġie kkalkulat billi ġew ipparagunati l-valur normali medju ppeżat kif stabbilit qabel u l-prezzijiet medji ppeżati li jikkorrispondu ma' dan tal-esportazzjonijiet tal-Indoneżja matul il-PR, espressi bħala perċentwali tal-prezz CIF fil-fruntiera tal-Unjoni bid-dazju mhux imħallas.

(102)   It-tqabbil tal-valur normali medju ppeżat u l-prezz medju ppeżat tal-esportazzjoni kif stabbilit wera li kien hemm dumping.

2.9.2.     Il-Malasja

(103)   Minħabba l-kooperazzjoni baxxa mill-produtturi tal-prodott investigat fil-Malasja, il-prezz tal-esportazzjoni mill-Malasja kellu jiġi bbażat fuq il-fatti disponibbli, jiġifieri fuq il-prezz medju tal-esportazzjoni ta’ biċikletti matul il-PR kif irrappurtat fil-Comext.

(104)   Biex jiġi żgurat paragun ġust bejn il-valur normali u l-prezz tal-esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-paragunabbiltà tal-prezzijiet skont l-Artikolu 2(10) tar-Regolament bażiku. Għalhekk, saru aġġustamenti għad-differenzi fit-trasport, l-assigurazzjoni, u l-ispejjeż tal-imballaġġ. Minħabba li l-kooperazzjoni kienet baxxa, l-aġġustamenti rilevanti kienu bbażati fuq l-informazzjoni mibgħuta mill-industrija tal-Unjoni fit-talba tagħha għal din l-investigazzjoni.

(105)   Skont l-Artikoli 2(11) u 2(12) tar-Regolament bażiku, id-dumping ġie kkalkulat billi ġew ipparagunati l-valur normali medju ppeżat kif stabbilit qabel u l-prezzijiet medji ppeżati li jikkorrispondu ma' dan tal-esportazzjonijiet tal-Malasja matul il-PR, espressi bħala perċentwali tal-prezz CIF bid-dazju mhux imħallas fil-fruntiera tal-Unjoni.

(106)   It-tqabbil tal-valur normali medju ppeżat u l-prezz medju ppeżat tal-esportazzjoni kif stabbilit wera li kien hemm dumping.

2.9.3.     Is-Sri Lanka

(107)   Billi l-kooperazzjoni mis-Sri Lanka kienet baxxa, il-prezz tal-esportazzjoni ġie stabbilit fuq il-bażi tal-fatti disponibbli, jiġifieri fuq il-prezz medju tal-esportazzjonijiet ta’ biċikletti matul il-PR kif irrappurtat fil-Comext li tqabbel mad-dejta ta’ esportazzjoni disponibbli tal-kumpaniji mhux involuti fi prattiċi ta’ evażjoni.

(108)   Biex jiġi żgurat paragun ġust bejn il-valur normali u l-prezz tal-esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-paragunabbiltà tal-prezzijiet skont l-Artikolu 2(10) tar-Regolament bażiku. Għaldaqstant, u minħabba n-nuqqas ta’ kwalunkwe informazzjoni oħra disponibbli, saru aġġustamenti għal differenzi fl-ispejjeż tat-trasport, tal-assigurazzjoni u tal-ippakkjar abbażi tal-informazzjoni mibgħuta mill-industrija tal-Unjoni fit-talba tagħha għal din l-investigazzjoni.

(109)   Skont l-Artikoli 2(11) u 2(12) tar-Regolament bażiku, id-dumping ġie kkalkulat billi ġew ipparagunati l-valur normali medju ppeżat kif stabbilit qabel u l-prezzijiet medji ppeżati li jikkorrispondu miegħu tal-esportazzjonijiet tas-Sri Lanka matul il-PR, espressi bħala perċentwali tal-prezz CIF fil-fruntiera tal-Unjoni bid-dazju mhux imħallas.

(110)   It-tqabbil tal-valur normali medju ppeżat u l-prezz medju ppeżat tal-esportazzjoni kif stabbilit wera li kien hemm dumping.

2.9.4.     It-Tuneżija

(111)   Il-prezz tal-esportazzjoni ġie stabbilit fuq il-bażi tal-prezz medju tal-esportazzjoni tal-biċikletti matul il-PR kif irrappurtat fil-Comext li tqabblet mad-dejta tal-esportazzjoni mill-kumpanija li ma kenitx involuta fi prattiċi ta’ evażjoni.

(112)   Biex jiġi żgurat paragun ġust bejn il-valur normali u l-prezz tal-esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-paragunabbiltà tal-prezzijiet skont l-Artikolu 2(10) tar-Regolament bażiku. Għalhekk, saru aġġustamenti għal differenzi fl-ispejjeż tat-trasport, tal-assigurazzjoni u tal-ippakkjar fuq il-bażi ta' informazzjoni mibgħuta mill-industrija tal-Unjoni fit-talba tagħha għal din l-investigazzjoni.

(113)   Skont l-Artikoli 2(11) u 2(12) tar-Regolament bażiku, id-dumping ġie kkalkulat billi ġew ipparagunati l-valur normali medju ppeżat kif stabbilit qabel u l-prezzijiet medji ppeżati li jikkorrispondu ma' dan tal-esportazzjonijiet tat-Tuneżija matul il-PR, espressi bħala perċentwali tal-prezz CIF fil-fruntiera tal-Unjoni bid-dazju mhux imħallas.

(114)   It-tqabbil tal-valur normali medju ppeżat u l-prezz medju ppeżat tal-esportazzjoni kif stabbilit wera li kien hemm dumping.

3.           MIŻURI

(115)   Minħabba dak li ntqal hawn fuq, jista’ jiġi konkluż li d-dazju definittiv anti-dumping impost fuq l-importazzjonijiet tal-biċikletti li joriġinaw mir-RPĊ kien evitat permezz ta’ trażbord vija l-Indoneżja, il-Malasja, u s-Sri Lanka u operazzjonijiet ta’ mmuntar, vija l-Malasja u t-Tuneżija skont it-tifsira tal-Artikolu 13 tar-Regolament bażiku.

(116)   Skont l-ewwel sentenza tal-Artikolu 13(1) tar-Regolament bażiku, il-miżuri eżistenti fuq l-importazzjonijiet tal-prodott ikkonċernat li joriġina mir-RPĊ għandhom għalhekk jiġu estiżi għall-importazzjonijiet tal-istess prodott ikkunsinnat mill-Indoneżja, mill-Malasja, mis-Sri Lanka u mit-Tuneżija kemm jekk iddikjarati bħala li joriġinaw fl-Indoneżja, il-Malasja, is-Sri Lanka u t-Tuneżija kif ukoll jekk le.

(117)   Il-miżuri li għandhom jiġu estiżi għandhom ikunu dawk bħalissa stabbiliti fl-Artikolu 1(2) tar-Regolament (KE) Nru 990/2011, li huma dazju definittiv anti-dumping ta’ 48,5% applikabbli għall-prezz nett, mingħajr ħlas fuq il-fruntiera tal-Unjoni, qabel id-dazju doganali.

(118)   Skont l-Artikoli 13(3) u 14(5) tar-Regolament bażiku, li jistipula li kull miżura estiża għandha tapplika għall-importazzjonijiet li daħlu fl-Unjoni skont ir-reġistrazzjoni imposta mir-Regolament tat-tnedija, għandhom jinġabru d-dazji fuq dawk l-importazzjonijiet irreġistrati tal-biċikletti kkunsinnati mill-Indoneżja, il-Malasja, is-Sri Lanka u t-Tuneżija.

4.           TALBIET GĦAL EŻENZJONI

4.1.        L-Indoneżja

(119)   l-erba’ kumpaniji fl-Indoneżja li talbu eżenzjoni mill-miżuri estiżi possibbli skont l-Artikolu 13(4) tar-Regolament bażiku ppreżentaw tweġiba għall-formola ta' eżenzjoni.

(120)   Kif iddikjarat fil-premessi (29) sa (33) hawn fuq, l-applikazzjoni tal-Art 18 kienet ġustifikata għal kumpanija waħda. Għalhekk, fid-dawl tas-sejbiet fir-rigward tal-bidla fix-xejra tal-kummerċ u tat-trażbord kif stabbilit fil-premessa (58) hawn fuq, ma tistax tingħata l-eżenzjoni lil din il-kumpanija.

(121)   It-tliet kumpaniji l-oħra li kkooperaw fl-Indoneżja li talbu eżenzjoni mill-miżuri estiżi possibbli skont l-Artikolu 13(4) tar-Regolament bażiku nstab li ma kinux involuti fi prattiki ta’ evażjoni li huma s-suġġett ta' din l-investigazzjoni kif iddikjarat fil-premessa (65) hawn fuq. Barra minn hekk, dawn il-produtturi setgħu juru li ma kienu relatati mal-ebda wieħed mill-produtturi/esportaturi involuti fi prattiċi ta’ evażjoni u lanqas mal-ebda wieħed mill-produtturi/esportaturi Ċiniżi tal-biċikletti. Għalhekk, eżenzjoni mill-miżuri estiżi tista' tingħata lil dawn it-tliet kumpaniji.

4.2.        Il-Malasja

(122)   Kumpanija waħda fil-Malasja li talbet eżenzjoni mill-miżuri estiżi possibbli skont l-Artikolu 13(4) tar-Regolament bażiku ppreżentat tweġiba għall-formola ta' eżenzjoni.

(123)   Kif iddikjarat fil-premessi (72) sa (76) hawn fuq, il-kumpanija nstabet li kienet involuta fi prattiċi ta’ evażjoni. Għalhekk, fid-dawl tas-sejbiet fir-rigward tal-bidla fix-xejra tal-kummerċ u tat-trażbord kif stabbilit fil-premessa (58) hawn fuq, ma tistax tingħata eżenzjoni lil din il-kumpanija:

4.3.        Is-Sri Lanka

(124)   Is-sitt kumpaniji fis-Sri Lanka li talbu eżenzjoni mill-miżuri estiżi possibbli skont l-Artikolu 13(4) tar-Regolament bażiku ppreżentaw tweġibiet għall-formola ta’ eżenzjoni.

(125)   Kif iddikjarat fil-premessa (36) hawn fuq, waħda mill-kumpaniji rtirat it-talba tagħha għal eżenzjoni matul l-investigazzjoni u għalhekk, fid-dawl tas-sejbiet fir-rigward tal-bidla fix-xejra tal-kummerċ u tat-trażbord kif stabbilit fil-premessa (58) hawn fuq, ma tistax tingħata eżenzjoni lil din il-kumpanija.

(126)   Għal żewġ kumpaniji oħra, l-applikazzjoni tal-Artikolu 18 tar-Regolament bażiku kienet ġustifikata kif iddikjarat fil-premessi (36) sa (42) hawn fuq, u għalhekk, fid-dawl tas-sejbiet fir-rigward tal-bidla fix-xejra tal-kummerċ u tat-trażbord kif stabbilit fil-premessa (58) hawn fuq, ma tistax tingħata eżenzjoni lil dawn il-kumpaniji.

(127)   It-tliet kumpaniji l-oħra li kkooperaw fis-Sri Lanka li talbu eżenzjoni mill-miżuri estiżi possibbli skont l-Artikolu 13(4) tar-Regolament bażiku nstabu li ma kinux involuti fil-prattiki ta’ evażjoni li huma soġġetti għal din l-investigazzjoni kif iddikjarat fil-premessi (80) u (81) hawn fuq. Barra minn hekk, dawn il-produtturi setgħu juru li ma kienu relatati mal-ebda waħda mill-kumpaniji li nstabu li qed jevadu u lanqas mal-ebda wieħed mill-produtturi/esportaturi Ċiniżi tal-biċikletti. Għalhekk, tista' tingħata eżenzjoni mill-miżuri estiżi lil dawn il-kumpaniji.

4.4.        It-Tuneżija

(128)   Iż-żewġ kumpaniji fit-Tuneżija li talbu eżenzjoni mill-miżuri estiżi possibbli skont l-Artikolu 13(4) tar-Regolament bażiku ppreżentaw tweġibiet għall-formola ta’ eżenzjoni.

(129)   Kumpanija waħda nstabet li ma kenitx involuta fil-prattiki ta’ evażjoni li huma s-suġġett ta' din l-investigazzjoni. Barra minn hekk, dan il-produttur seta' juri li ma kien relatat mal-ebda wieħed mill-kumpaniji li nstabu li qed jevadu u lanqas mal-ebda wieħed mill-produtturi/esportaturi Ċiniżi tal-biċikletti. Għalhekk, eżenzjoni mill-miżuri estiżi tista' tingħata lil din il-kumpanija.

(130)   Kif iddikjarat fil-premessa (89) hawn fuq, it-tieni kumpanija nstabet li kienet involuta fi prattiċi ta’ evażjoni. Għalhekk, fid-dawl tas-sejbiet fir-rigward tal-bidla fix-xejra tal-kummerċ u tat-trażbord kif stabbilit fil-premessa (58) hawn fuq, ma tistax tingħata eżenzjoni.

4.5.        Miżuri speċjali

(131)   Huwa meqjus li huma meħtieġa miżuri speċjali f'dan il-każ sabiex tiġi żgurata l-applikazzjoni korretta ta' dawn l-eżenzjonijiet. Dawn il-miżuri speċjali huma r-rekwiżit tal-preżentazzjoni lill-awtoritajiet tad-dwana tal-Istati Membri ta' fattura kummerċjali valida, li tikkonforma mar-rekwiżiti stabbiliti fl-Anness ta' dan ir-Regolament. Importazzjonijiet mhux akkumpanjati minn din il-fattura jkunu suġġett għad-dazju tal-anti-dumping estiż.

4.6.        Operaturi ġodda

(132)   Bla ħsara għall-Artikolu 11(3) tar-Regolament bażiku, produtturi oħra fil-Malasja li ma ppreżentawx ruħhom f’dan il-proċediment u li ma esportawx il-prodott investigat lejn l-Unjoni fil-PR u li jikkunsidraw li jagħmlu talba għall-eżenzjoni mid-dazju tal-anti-dumping estiż, skont l-Artikoli 11(4) u 13(4) tar-Regolament bażiku, ser ikollhom jimlew kwestjonarju sabiex jippermettu lill-Kummissjoni tistabbilixxi jekk eżenzjoni tistax tkun ġustifikata. Din l-eżenzjoni tista’ tingħata wara l-valutazzjoni tal-qagħda tas-suq għall-prodott ikkonċernat, il-kapaċità ta’ produzzjoni u l-użu tal-kapaċità, l-akkwist u l-bejgħ u l-probabbiltà tat-tkomplija tal-prattiki li għalihom ma hemmx raġuni valida jew ġustifikazzjoni ekonomika suffiċjenti u l-evidenza ta’ dumping. Il-Kummissjoni normalment tagħmel ukoll żjara ta’ verifika fil-post. It-talba għandha tkun indirizzata lill-Kummissjoni minnufih, bl-informazzjoni rilevanti kollha, partikolarment kull modifika fl-attivitajiet tal-kumpanija li għandhom x’jaqsmu mal-produzzjoni u l-bejgħ.

(133)   Fejn eżenzjoni hi ġustifikata, il-miżuri estiżi fis-seħħ għandhom jiġu emendati skont dan. Sussegwentement, kull eżenzjoni mogħtija tkun immonitorjata biex tkun żgurata l-osservanza tal-kundizzjonijiet stabbiliti fiha.

5.           DIVULGAZZJONI

(134)   Il-partijiet kollha interessati ġew mgħarrfa bil-fatti u l-kunsiderazzjonijiet essenzjali li wasslu għall-konklużjonijiet imsemmija u ġew mistiedna biex jikkummentaw.

(135)   Kumpaniji Indoneżjana waħda tenniet il-pretensjonijiet tagħha msemmija fil-premessa (31) hawn fuq mingħajr ma pprovdiet l-ebda evidenza ssostanzjata ġdida. F’dan ir-rigward, kif imsemmi fil-premessa (29) hawn fuq, id-dejta sottomessa mill-kumpanija ma kenitx verifikablli billi l-ebda fajls ta’ ħidma li jissostanzjaw iċ-ċifri pprovduti fil-formola tal-eżenzjoni ma kienu miżmuma mill-kumpanija. Barra minn hekk, iċ-ċifri rapportati li ġew ittestjati u ikkalkulati mill-ġdid fuq il-bażi tal-kotba disponibbli fl-istabbiliment tal-kumpanija, jiġifieri l-volum tax-xiri u tal-produzzjoni, instab li mhumiex eżatti. Għalhekk, dawn il-pretensjonijiet huma miċħuda.

(136)   Kumpanija waħda fil-Malasja argumentat li l-fatt li l-piż tal-komponenti ta’ oriġini Ċiniża fl-ispiża tal-manifattura tal-biċikletti kien biss ftit ogħla mil-limitu ta’ 60% ma għandux iwassal lill-Kummissjoni biex tirrifjuta t-talba tagħha għal eżenzjoni. Barra minn hekk, il-kumpanija ssottomettiet xi fatturi għax-xiri ta’ partijiet li allegatament kienu rrapportati skorrettament bħala li joriġinaw mir-RPĊ meta fil-fatt kienu mill-Indoneżja.

(137)   F’dan ir-rigward għandu jiġi nnutat li l-limiti stipulati fl-Artikolu (13)(2)(b) tar-Regolament bażiku huma ċari ħafna u, għalhekk, mhuwiex rilevanti b’kemm il-piż ta’ komponenti ta' oriġini Ċiniża fl-ispiża tal-produzzjoni tal-biċikletti jaqbeż il-limitu ta’ 60% iżda li l-partijiet ta' oriġini Ċiniża jirrappreżentaw inqas minn 60% mill-ispiża tal-produzzjoni tal-biċikletti. Barra minn hekk, dawn il-fatturi ma setgħux jiġu ntraċċati lura fil-lista ta’ xiri pprovduta mill-kumpanija u, barra minn hekk, il-valur tal-fatturi ppreżenati ma kienx materjali biex ibiddel l-istima oriġinali tal-Kummissjoni. Għalhekk, dawn il-pretensjonijiet huma miċħuda.

(138)   Barra minn hekk, il-kumpanija kkonċernata argumentat li mhemmx bażi legali suffiċjenti għaċ-ċaħda tat-talba tal-kumpanija għal eżenzjoni billi l-konklużjonijiet milħuqa huma bbażati fuq kalkoli mingħajr kunsiderazzjoni għas-sitwazzjoni individwali tal-kumpanija kkonċernata. B’risposta għal din it-talba, il-kumpanija rċeviet aktar spjegazzjonijiet li jirriflettu l-analiżi fil-premessi (72) sa (75) hawn fuq.

(139)   Barra minn hekk, il-kumpanija sostniet li ż-żieda ta’ importazzjonijiet tal-prodott li qed jiġi investigat mill-kumpanija in kwistjoni tikkoinċidi mal-laxkar tas-Sistema Ġeneralizzata ta’ Preferenzi għall-Malasja u għalhekk iż-żieda fl-esportazzjonijiet tal-kumpanija lejn l-Unjoni fl-2010 ma kellha l-ebda ġustifikazzjoni ekonomika fiż-żieda tal-miżuri anti-dumping imposti kontra r-RPĊ. Bħala tweġiba għal dan l-argument kien ikkunsidrat li filwaqt li l-laxkar tar-regoli tas-Sistema Ġeneralizzata ta’ Preferenzi seta' kkontribwixxa għall-motivazzjoni tal-kumpanija biex tesporta lejn l-Unjoni, dan ma jikkontradixxix il-konklużjoni li l-kumpanija bdiet l-operat tagħha wara li ġew miżjuda d-dazji anti-dumping kontra r-RPĊ u li hi kienet iġġib il-komponenti prinċipalment mir-RPĊ (ara l-premessa (73) hawn fuq). Għalhekk, l-argument tal-parti ġie miċħud.

(140)   l-istess kumpanija ddikjarat ukoll li d-dejta rrappurtata dwar il-valuri tal-komponenti tal-biċikletti mixtrija u kkunsmati ma kenitx debitament ivverifikata għaliex ma saret l-ebda distinzjoni bejn komponenti mixtrija u kkunsmati. F’dan ir-rigward huwa nnutat li abbażi taċ-ċifri rappurtati mill-kumpanija, il-valuri tal-komponenti mixtrija u kkunsmati nstab li kienu identiċi. Barra minn hekk, il-figuri rrappurtati tal-komponenti mixtrija fl-2011 kien jikkorrispondi mal-valur tal-komponenti kkunsmati rrappurtat fir-rapport annwali tal-kumpanija għall-2011. Iċ-ċifri li jikkonċernaw komponenti mixtrija u kkunsmati rrappurtati għall-PR u l-2010 ġew aċċettati kif iddikjarat mill-kumpanija. Għalhekk, l-argument ġie rrifjutat.

(141)   Il-kumpanija kkonċernata ssottomettiet aktar tqassim tal-ispejjeż għal kull mudell ta’ prodott fejn uriet l-allegata konformità tagħha mar-rekwiżit li l-komponenti miksuba mir-RPĊ ma jaqbżux is-60% tal-valur totali tal-komponenti tal-prodott immuntat. Din l-informazzjoni kkontradixxiet it-tqassim tal-ispejjeż għal kull mudell miġbur u vverifikat għal mudelli magħżula fuq il-post li għalihom in-nuqqas tal-kumpanija li tikkonforma mal-limitu ta’ 60% ġie kkonfermat. L-informazzjoni l-ġdida li tressqet mill-kumpanija f’dan ir-rigward ma kienet ikkonfermata mill-ebda evidenza u, essenzjalment, ikkontradixxiet informazzjoni vverifikata. Għal din ir-raġuni l-informazzjoni ġiet injorata.

(142)   Barra minn hekk, il-kumpanija sostniet li hija aġixxiet b’rieda tajba billi serrħet fuq il-konformità allegata tagħha mar-Regolament tal-Kummissjoni (KE) Nru 1063/2010[16] li jistabbilixxi r-regoli tal-oriġini applikabbli. F’dan il-kuntest ta’ min jinnota li l-għan tal-investigazzjoni kontra l-evażjoni mhuwiex li tiġi vverifikata l-konformità mar-regoli tal-oriġini applikabbli. Din il-verifika ma twettqitx fil-kuntest tal-analiżi tal-investigazzjoni kurrenti ta' kontra l-evażjoni u għalhekk l-allegata konformità mar-regoli tal-oriġini ma tistax tiġi kkonfermata f’dan il-każ. Għal dawn ir-raġunijiet, l-allegata konformità mar-regoli tal-oriġini f’dan il-każ ma teskludi bl-ebda mod il-possibbiltà ta’ evażjoni kif definita fl-Artikolu 13(2) tar-Regolament bażiku[17]. F'dan il-kuntest, l-argument huwa għalhekk miċħud.

(143)   Fl-aħħar nett, il-kumpanija sostniet li l-kalkolu tal-marġini tad-dumping kellha tkun imwettqa fuq il-bażi tad-dejta speċifika għall-kumpanija. Din it-talba ġiet aċċettata kif rifless fil-premessa (75) hawn fuq u l-kumpanija ġiet mgħarrfa b’dan.

(144)   Kumpanija mis-Sri Lanka qajmet dubju dwar ir-relevanza tad-dokumenti mitluba matul iż-żjara ta’ verifika u għalhekk argumentat li t-talba tagħha għal eżenzjoni ma għandhiex tiġi miċħuda. F’dan ir-rigward ta’ min jinnota li d-dokumenti li juru l-oriġini tal-partijiet użati fl-armar tal-biċikletti esportati lejn l-Unjoni għandhom importanza sinifikanti għall-valutazzjoni tal-konformità mal-kundizzjonijiet tal-Artikolu 13(2)(b). Barra minn hekk, kif imsemmi fil-premessa (37) hawn fuq, id-dejta sottomessa mill-kumpanija ma kinitx verifikabbli. Barra minn hekk, il-kumpanija ammettiet fuq il-post li l-partijiet mixtrija mir-RPĊ fil-fatt ma kinux reġistrati fil-kontijiet tagħha u konsegwentement il-konformità mal-kriterji stabbiliti fl-Artikolu 13(2) tar-Regolament bażiku, ma setgħetx tkun determinata. Għalhekk, dawn il-pretensjonijiet huma miċħuda.

(145)   Kumpanija oħra mis-Sri Lanka sostniet li kieku kienet taf li l-esportazzjonijiet lejn l-Unjoni mis-Sri Lanka jistgħu jkunu suġġetti għad-dazju antidumping kif estiż għas-Sri Lanka sa mill-bidu tal-investigazzjoni, ma kenitx tirtira t-talba tagħha għal eżenzjoni. Madankollu, huwa enfasizzat li, fiż-żmien tal-irtirar tat-talba tagħha għal eżenzjoni, il-kumpanija hija kkunsidrata li taf bil-possibbiltà tal-applikazzjoni tad-dazju anti-dumping kif estiż mid-data tar-reġistrazzjoni tal-importazzjonijiet mis-Sri Lanka lejn l-Unjoni, jiġifieri l-bidu tal-investigazzjoni ta’ kontra l-evażjoni. Il-kumpanija ġiet infurmata dwar din il-konsegwenza fi tliet każijiet, permezz tal-premessa (20) tar-Regolament tat-tnedija, matul seduta fil-bidu tal-investigazzjoni u matul iż-żjara fuq il-post. Għalhekk, il-pretensjoni ma setgħetx tiġi aċċettata.

(146)   Kumpanija oħra mis-Sri Lanka ssottomettiet informazzjoni ġdida li kellha tissottometti qabel iż-żjara ta’ verifika u minħabba l-istadju avvanzat tal-investigazzjoni dik l-informazzjoni ma kenitx għadha tista' tiġi vverifikata. Barra minn hekk, il-kumpanija argumentat li kienet ippreżentat l-informazzjoni kollha meħtieġa.

(147)   Kif imsemmi fil-premessi (39) u (40) il-kumpanija ma ppreżentatx l-informazzjoni kollha mitluba sabiex tiġi verifikata fuq il-post. B'mod partikolari, il-valur tax-xiri tal-komponenti kif irrappurtat mill-kumpanija nstab li ma kienx affidabbli. Bħala riżultat, il-konformità mal-kriterji stabbiliti fl-Artikolu 13(2) tar-Regolament bażiku, ma setgħetx tiġi ddeterminata.

(148)   Barra minn hekk, il-kumpanija qalet li kien hemm irregolaritajiet li jikkonċernaw iż-żjara fuq il-post, fir-rigward tat-tul tagħha u kwistjonijiet ta’ lingwa. F’dan ir-rigward, ta’ min jinnota li l-kumpanija kienet imwaqqaf riċentament u għalhekk kien skedat jum wieħed biss ta’ verifika. Il-verifika twettqet matul jum wieħed sħiħ tax-xogħol. Fi tmiem il-verifika, il-kumpanija ma talbitx sabiex tissottometti l-ebda informazzjoni addizzjonali li ma kinitx kapaċi tipprovdi matul il-verifika.

(149)   Barra minn hekk, qabel il-verifika fuq il-post il-kumpanija kienet informata li l-verifika ser issir bl-Ingliż u l-parti ma qajmet l-ebda oġġezzjoni. Barra minn hekk, il-Kummissjoni kienet akkumpanjata minn interpretu waqt il-verifika fuq il-post biex jiffaċilita problemi ta’ komunikazzjoni tal-lingwa, jekk ikun hemm. Barra minn hekk, huwa enfasizzat li l-parti l-kbira tad-dokumenti ppreżentati mill-kumpanija matul iż-żjara ta’ verifika kienu fil-fatt bl-Ingliż, inklużi d-dokumenti relatati mal-kontabilità.

(150)   Fid-dawl ta’ dak li ntqal hawn fuq, il-pretensjonijiet kollha tal-kumpanija huma miċħuda.

ADOTTA DAN IR-REGOLAMENT:

Artikolu 1

1.           Fid-dawl tal-iskop ta' dan ir-Regolament, id-dazju anti-dumping definittiv applikabbli fuq “il-kumpaniji l-oħra kollha” impost permezz tal-Artikolu 1(2) tar-Regolament ta’ Implimentazzjoni (UE) Nru 990/2011 fuq importazzjonijiet ta’ biċikletti u ċikletti oħra (inklużi triċikletti tal-kunsinna, iżda bl-esklużjoni tal-uniċikletti), mhux motorizzati li joriġinaw mir-Repubblika Popolari taċ-Ċina, huwa b’dan estiż għal importazzjonijiet ta’ biċikletti u ċikletti oħra (inklużi triċikletti tal-kunsinna, iżda bl-esklużjoni tal-uniċikletti), mhux motorizzati, mibgħuta mill-Indoneżja, mill-Malasja, mis-Sri Lanka u mit-Tuneżija kemm jekk iddikjarati bħala li joriġinaw fl-Indoneżja, il-Malasja, is-Sri Lanka u t-Tuneżija kemm jekk le, u li bħalissa jaqgħu taħt il-kodiċi NM eks 8712 00 30 u eks 8712 00 70 (kodiċi TARIC 8712 00 30 10 u 8712 00 70 91) bl-eċċezzjoni ta’ dawk prodotti mill-kumpaniji elenkati hawn taħt:

Pajjiż || Kumpanija || Kodiċi addizzjonali TARIC

L-Indoneżja || P.T. Insera sena, 393 Jawa Street, Buduran, Sidoarjo 61252, Indonesia || B765

|| PT Wijaya Indonesia Makmur Bicycle Industries (Wim Cycle), Raya Bambe KM. 20, Driyorejo, Gresik 61177, Jawa Timur Indonesia || B766

|| P.T. Terang Dunia Internusa, (United Bike), Jl. Anggrek Neli Murni 114 Slipi, 11480, Jakarta Barat, Indonesia || B767

Is-Sri Lanka || Asiabike Industrial Limited, No 114, Galle Road, Henamulla, Panadura, Sri Lanka B768 || BSH Ventures (Private) Limited, No.

|| 84, Campbell Place, Colombo-10, Sri Lanka || B769

|| Samson Bikes (Pvt) Ltd., No 110, Kumaran Rathnam Road, Colombo 02, Sri Lanka || B770

It-Tuneżija || Euro Cycles SA, Zone Industrielle Kelaa Kebira, 4060, Sousse, Tunisia || B771

2.           L-applikazzjoni ta' eżenzjonijiet mogħtija lill-kumpaniji speċifikament imsemmija fil-paragrafu 1 ta' dan l-Artikolu jew awtorizzati mill-Kummissjoni skont l-Artikolu 2(2) għandha tkun soġġetta għal preżentazzjoni lill-awtoritajiet tad-dwana tal-Istati Membri ta' fattura kummerċjali valida, li għandha tkun konformi mar-rekwiżiti stipulati fl-Anness ta' dan ir-Regolament. Jekk din il-fattura ma tiġix ippreżentata, jiġi applikat id-dazju anti-dumping kif impost mill-paragrafu 1 ta’ dan l-Artikolu.

3.           Id-dazju estiż mill-paragrafu 1 ta’ dan l-Artikolu għandu jinġabar fuq importazzjonijiet ikkunsinjati mill-Indoneżja, mill-Malasja, mis-Sri Lanka u mit-Tuneżija, kemm jekk iddikjarati bħala li joriġinaw fl-Indoneżja, il-Malasja, is-Sri Lanka u t-Tuneżija u kemm jekk le, irreġistrati skont l-Artikolu 2 tar-Regolament (UE) Nru 875/2012 u l-Artikoli 13(3) u 14(5) tar-Regolament (KE) Nru 1225/2009, bl-eċċezzjoni ta’ dawk prodotti minn kumpaniji elenkati fil-paragrafu 1.

4.           Sakemm ma jkunx speċifikat mod ieħor, għandhom japplikaw id-dispożizzjonijiet fis-seħħ dwar id-dazji doganali.

Artikolu 2

1.           It-talbiet għal eżenzjoni mid-dazju estiż skont l-Artikolu 1, isiru bil-miktub f'waħda mil-lingwi uffiċjali tal-Unjoni Ewropea u jridu jkunu ffirmati minn persuna awtorizzata li tirrappreżenta l-entità li qed titlob l-eżenzjoni. It-talba trid tintbagħat fl-indirizz li ġej:

European Commission Directorate-General for Trade Directorate H Office: N-105 08/20 1049 Brussels

Belgium Faks (32 2) 295 65 05

2.           F’konformità mal-Artikolu 13(4) tar-Regolament (KE) Nru 1225/2009, il-Kummissjoni tista’, wara li tikkonsulta mal-Kumitat Konsultattiv, tawtorizza, b'deċiżjoni, l-eżenzjoni ta' importazzjonijiet minn kumpaniji li ma jevadux il-miżuri tal-antidumping imposti mir-Regolament (UE) Nru 990/2011, mid-dazju estiż mill-Artikolu 1 ta' dan ir-Regolament.

Artikolu 3

L-awtoritajiet tad-dwana huma b’dan ordnati li jtemmu r-reġistrazzjoni tal-importazzjonijiet, stabbiliti skont l-Artikolu 2 tar-Regolament (UE) Nru 875/2012.

Artikolu 4

Dan ir-Regolament għandu jidħol fis-seħħ l-għada tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament jorbot fl-intier tiegħu u japplika direttament fl-Istati Membri kollha.

Magħmul fi Brussell,

                                                                       Għall-Kunsill

                                                                       Għall-President

ANNESS

Dikjarazzjoni ffirmata minn uffiċjal tal-entità li qed toħroġ il-fattura kummerċjali, fil-format li ġej, għandha tidher fuq il-fattura kummerċjali valida msemmija fl-Artikolu 1(2):

(1) L-isem u l-kariga tal-uffiċjal tal-entità li qed joħroġ il-fattura kummerċjali;

(2) Id-dikjarazzjoni li ġejja: “Jiena, hawn taħt iffirmat, niċċertifika li l-(volum) ta’ (prodott ikkonċernat) mibjugħ għall-esportazzjoni lejn l-Unjoni Ewropea koopert minn din il-fattura, kien immanifatturat minn (isem u indirizz tal-kumpanija) (kodiċi addizzjonali TARIC) fi (pajjiż ikkonċernat). Niddikjara li t-tagħrif mogħti f’din il-fattura huwa sħiħ u korrett”;

(3) Data u firma.

[1]               ĠU L 343, 22.12.2009, p. 51.

[2]               ĠU L 228, 9.9.1993, p. 1

[3]               ĠU L 16, 18.1.1997, p. 55

[4]               ĠU L 17, 21.1.1997, p. 17

[5]               ĠU L 175, 14.7.2000, p. 39

[6]               ĠU L 183, 14.7.2005, p. 1

[7]               ĠU L 261, 6.10.2011, p. 2

[8]               ĠU C 71, 9.3.2012, p. 10

[9]               ĠU L XX, [data], p.x

[10]             ĠU C 122, 27.4.2012, p. 9

[11]             ĠU L 188, 18.7.2009, p. 93

[12]             ĠU C 346, 14.11.2012, p.7

[13]             ĠU L XXX, data, paġna

[14]             ĠU L 258, 26.9.2012, p. 21.

[15]             Comext hija bażi tad-dejta dwar il-kummerċ barrani ġestita mill-Eurostat.

[16]             ĠU L 307, 23.11.2010, p. 1.

[17]             Ara wkoll il-każijiet preċedenti, eż. il-premessa (48) tar-Regolament tal-Kunsill (KE) Nru 388/2008 (ĠU L 117, 1.5.2008. p. 1).